ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 53. ತಾಂಚ್ಯಾ ಹಾತಾಂನಿ
ಟೈಟಸ್ ತಾಕೊಡೆ: ಕೊಂಕ್ಣೆಂತ್ ಕವಿ ಜಾವ್ನ್ ಫಾಮಾದ್ ತರ್ಯೀ, ಕಾಣ್ಯೆಗಾರ್ ಜಾವ್ನ್ಯೀ ತಿತ್ಲೆಚ್ ಶ್ಯಾಥಿವಂತ್ ಜಾವ್ನಾಸ್ಚೆ ಕಾಣ್ಯೆಗಾರಾಂ ಪಯ್ಕಿಂತ್ ತಾಕೊಡೆಚೊ ಟೈಟಸ್ ನೊರೊಞ್ ಎಕ್ಲೊ. ಸುಮಾರ್ ವೀಸ್-ಬಾವಿಸ್ ವರ್ಸಾದಿಂ ಸಕ್ರಿಯ್ ಕಾಣ್ಯೆಗಾರಾಂಚಾ ಮೆಳಿಂತ್ ಹಾಚೆಂ ನಾಂವ್ ಪ್ರಚಲಿತ್ ಜಾವ್ನಾಸ್ಲ್ಲೆಂ. ಆಜ್ಕಾಲ್ ಕಾಮಾಚ್ಯಾ ರಾಟಾವಳೆನಿಮ್ತಿಂ ಜಾಯ್ಜಯ್, ಹಾಣೆಂ ಬರಂವ್ಚೆಂ ಉಣೆಂ ಕೆಲಾಂ ತರ್ಯೀ, ತಾಚ್ಯಾ ಥೊಡ್ಯಾ ಬರ್ಯಾ ಮಟ್ವ್ಯಾ ಕಾಣ್ಯಾಂ ಪಯ್ಕಿ ಹಿ ಏಕ್.
ಟೈಟಸ್, ತಾಕೊಡೆ
ಇಸ್ಕೊಲ್ ಸೊಡುನ್ ಆರ್ಧೆಂ ವೋರ್ ಜಾಲ್ಲೆಂ.
ಇಸ್ಕೊಲಾ ಪಾಟ್ಲೆ ಜಿರ್ಯೆಂತ್ ಭಾರಾ ವರ್ಸಾಂಚೊ ಜಾಕು ಬೆಣ್ಸಾಂ ಕಾಡುನ್ ತೊಂಡಾಕ್ ಘಾಲ್ತಾಲೊ.
ಎಕಾ ಬೆಣ್ಸಾಚಿ ಬಿ ಧರ್ಣಿರ್ ಪಡ್ತಾನಾ, ದುಸ್ರೆಂ ಬೆಣ್ಸ್ ಜಾಕುಚ್ಯಾ ತೊಂಡಾಕ್ ಉಡ್ತಾಲೆಂ. ಜಾಕುಚೆಂ ಪಿಂಜ್ಕರ್ ಬೂಕ್ ಮ್ಹೆಳ್ಕುಟ್ಯಾ ಪೊತ್ಯಾಂತ್ ಬೆಣ್ಸಿಚ್ಯಾ ಫಾಂಟ್ಯಾಕ್ ಉಮ್ಕೊಳ್ ಘೆತಾಲೆ!
ಗಳ್ಚಿ ಚಡ್ಡಿ ದಾವ್ಯಾ ಹಾತಾನ್ ವೊಡುನ್ ಪೆಂಕ್ಟಾಚ್ಯಾ ನಾಡ್ಯಾಕ್ ಶಿರ್ಕಾಯ್ಲಿ ಜಾಕುನ್.
’ಆನಿಂ ಥೊಡಿಂ ಬೆಣ್ಸಾಂ ಕಾಡೂನ್ ಬೊಲ್ಸಾಂತ್ ಘಾಲಿಜಾಯ್’. ತೊಂಡಾಕ್ ಪಡ್ಚಿಂ ಬೆಣ್ಸಾಂ ಜಾಕುಚ್ಯಾ ಹಾತಾಂತ್ ಥಾವ್ನ್ ಬೊಲ್ಸಾಂತ್ ಗಳೊಂಕ್ ಸುರು ಜಾಲಿಂ.
ಜಾಕುಚ್ಯಾ ಚಡ್ಡೆಚ್ಯಾ ಬೊಲ್ಸಾಕ್ ಬುರಾಕ್ ಜಾಲ್ಲೊ. ಎಕೇಕ್ ಪಾವ್ಟಿಂ ತಿತೀನ್ ಬೆಣ್ಸಾಂ ಗಳೊನ್ ವೆಚೆ ತೆದೊ!
ಜಾಕುಚಿ ಭುಕ್ ಹಳ್ತಾನ್ ಥಾಂಬೊನ್ ಯೆತಾಲಿ. ನಿಳ್ಶಿ ಥಿಂಪಿ ಧರ್ಣಿರ್ ಗಳವ್ನ್ ಜಾಕುನ್ ಧೆಂಕ್ ಕಾಡ್ಲೊ. ಫಾಂಟ್ಯಾಕ್ ವಿಶೆವ್ ಘೆಂವ್ಚೆಂ ಚೀಲ್ ಕಾಡ್ನ್ ಜಾಕುನ್ ಖಾಂದ್ಯಾರ್ ಘಾಲೆಂ......
"ಜಾ.........ಕೂ............ಜಾಕೂ......." ನಿಶ್ಶಬ್ದ್ ಪರಿಸರಾಂತ್ ಎಕ್ಚ್ ಪಾವ್ಟಿಂ ದೊರಗ್ ತಾಳೊ ಆಯ್ಕೊನ್ ಜಾಕು ಉಡೊನ್ ಪಡ್ಲೊ.
ಜಾಕುನ್ ದೀಶ್ಃಟ್ ವಾಟೆ ತೆವ್ಶಿಂ ಘುಂವ್ಡಾಯ್ಲಿ. ಜಾಕುಚ್ಯಾ ಬಾಬಾಚ್ಯಾ ತಾಂಬ್ಡ್ಯಾ ದೊಳ್ಯಾಂನಿ ಪಿಂತ್ರಾಂ ಭರ್ಲ್ಲಿ. ಆಮಾಲಿ ದೊಳೆ ಉಬಾರುಂಕ್ ಜಾಯ್ನಾಸ್ತಾ ಘಡ್ಯೆಕ್ ಪಾವ್ಟಿಂ ಧಾಂಪ್ತಾಲೆಂ.
ಲುಂಗಿ ಬೊಂಬ್ಲೆ ಪ್ರಾಸ್ ಗೇಣ್ ಸಕಯ್ಲ್ ಪೆಂಕ್ಟಾರ್ ರಾವೊಂಕ್ ಪ್ರಯತ್ನ್ ಕರ್ತಾಲಿ. ಕುಡಿಚೆಂ ಸಮತೋಲನ್ ಸಾಂಬಾಳುಂಕ್ ಸಕಾನಾತ್ಲ್ಲೆ ಪಾಂಯ್, ಜಾಕುಚ್ಯಾ ಬಾಬಾಚೆ ಹೆಳ್ಕೆವಿಣೆಂಚ್ ಉಜ್ವ್ಯಾಕ್ - ದಾವ್ಯಾಕ್, ಪಾಟಿಂ - ಮುಖಾರ್ ನಾಚ್ ಮಾರ್ತಾಲೆ!
ಬಾಪಾಯ್ಚೊ ಜಿನೊಸ್ ದೆಕೊಂಕ್ ಸಕಾನಾಸ್ತಾಂ ಜಾಕುನ್ ದೊಳೆ ದಾಂಪ್ಲೆಂ!
"ಚೊರಾ........ ಇತ್ಲೊ ವೇಳ್ ಕ್ಕಿ....... ಕ್ಕಿತೆಂ ಕರ್ತಾಯ್ರೆ ತುಂ? ಹಾಂಗಾ ಯೆ.......ರೆ"
ಜಾಕು ಬಾಪಾಯ್ಲಾಗಿಂ ಸರ್ತಾಲೊ............. ನಾಕಾಕ್ ಮಾರ್ಚಿ ಸೊರ್ಯಾಚಿ ಘಾಣ್ ತಡ್ವುಂಕ್ ಸಕಾನಾಸ್ತಾಂ ಜಾಕುಚೆಂ ದಾಕ್ಟುಲೆಂ ಬೊಟ್, ಆಪ್ಲೆಂ ನಾಕ್ ಘಸ್ಟುನ್ ಪಾಟಿಂ ಆಯ್ಲೆಂ.
"ಸ......ಸಕ್ಕಡ್ ಭುರ್ಗಿಂ ಘರಾ ಪಾವ್ಲಿಂ......ತುಂ....ತುಂ..........ಹಾಂಗಾಚ್ ಆಸಾಯ್ರೆ ಪಡ್ಪಶ್ಯಾ..........ಉಸಾಳ್ರೇ ಘರಾ......"
ಜಾಕುಚ್ಯಾ ಬಾವ್ಳ್ಯಾಕ್ ಆರಾಯ್ಲೆಂ ತಾಚ್ಯಾ ಬಾಬಾನ್. ಪಿಂಜ್ಕರ್ ಚಡ್ಡೆಚಿಂ ಉಮ್ಕಾಳ್ಚಿಂ ಸುತಾಂ ಜಾಕು ಕಾಂಪ್ತಾ ಮ್ಹಳ್ಳ್ಯಾಕ್ ಸಾಕ್ಸ್ ದಿತಾಲಿಂ. ತಿತ್ಲ್ಯಾರ್.......
’ರಪ್ಪ್’ ಬಾಪಾಯ್ಚೆಂ ಏಕ್ ಬಳಿಷ್ಟ್ ಥಾಪಾಡ್ ಜಾಕುಚ್ಯಾ ಕಾನ್ಸುಲಾಕ್ ಆಂರ್ದಾಲೆ!
ಮಿರ್ಮಿರ್ಚೊ ಪೊಲೊ ಪುಸುನ್, ದೆಂವ್ಚೆಂ ದುಕಾಂ ಜಿಬೆನ್ ಲೆಂವೊನ್................ ಎಕಾ ಹಾತಾನ್, ಗಳ್ಚಿ ಚಡ್ಡಿ ವೊಡ್ನ್ ಧರ್ನ್ ಜಾಕು ಧಾಂವ್ಲೊ, ಘರಾ ಪರ್ಯಾಂತ್!
’ಯೇ ಪುತಾ ಬಸ್, ಕಾಫಿ ಪಿಯೆ’ ಮ್ಹಣ್ಚಿ ಆವಯ್ ಜಾಕುಕ್ ನಾತ್ಲ್ಲಿ. ಪಿಂಜ್ಲ್ಲೆ ಚಡ್ಡೆಕ್ ಸುವಿ-ಸುತ್ ಲಾಗಂವ್ಚಿ, ಆವಯ್ ಜಾಕುಕ್ ನಾತ್ಲ್ಲಿ, ಮೆಳ್ಲ್ಲೊ ಜಿಬ್ಬೊ ಉದ್ಕಾಂತ್ ಬಿಜಂವ್ಚಿ ಆವಯ್ ಜಾಕುಕ್ ನಾತ್ಲ್ಲಿ.
ಸಕ್ಟಾಂ ಪರಿಂ ಆಪ್ಣಾಕ್ಯಿ ಆವಯ್ ಆಸ್ಲ್ಲಿ ಮ್ಹಳ್ಳೆಂ ಸತ್ಯಿ ತೊ ನೆಣಾಂ. ತರ್ಯಿ ಎಕ್ ಸ್ತ್ರೀಯೆಚೆಂ ವೆಂಗೆಂತ್ ಆಸ್ಲ್ಲೊ, ತಿಣೆಂ ಉಮೆ ಘೆತ್ಲ್ಲೊ, ಬಾಬಾನ್ ತಿಕಾ ಖೊಟೊ ಘಾಲ್ಲ್ಯೊ, ಕೆಸಾಂಕ್ ಧರ್ನ್ ಪಾಟಿಕ್ ಮುಟಿ ಮಾರ್ಲ್ಲ್ಯೊ. ಕಾನ್ಸುಲಾಕ್ ಥಾಪ್ಡಾಂ ಮಾರ್ಲ್ಲಿಂ............. ಆನಿಂ ತಿಚ್ ಸ್ತ್ರೀ ರಿತ್ಯಾ ರುಕಾಡಾಚೆ ಪೆಟೆಂತ್ ಎಕ್ಸುರಿಚ್ ಧೊವೆಂ ಕಾಪಾಡ್ ನ್ಹೆಸೊನ್ ನಿದ್ಲ್ಲಿ....... ಆಪಯ್ಲ್ಯಾರ್ಯಿ ಜಾಪ್ ದೀನಾತ್ಲ್ಲಿ ಆನಿಂ..... ತಿಕಾ ಥೊಡ್ಯಾಂನಿ ಪೇಟೆ ಸಮೇಟ್ ಉಕಲ್ನ್ ವ್ಹೆಲ್ಲಿ...... ಹೆಂ ಸರ್ವ್ ಗಯ್ರೆಂ..... ಗಯ್ರೆಂ ಉಡಾಸ್ ಆಸಾ ಜಾಕುಕ್.
.............. ತರ್ಯೀ ತೆ ವಿಶಿಂ ತಾಣೆಂ ಚಡ್ ಚಿಂತ್ಲ್ಲೆಂ ನಾ. ತಾಕಾ ಚಿಂತುಂಕ್ಚ್ ವೇಳ್ ಮೆಳ್ನಾಸ್ಲೊ. ಬಾಬಾಚೆ ಮಾರ್, ದೆಂಕ್ಣೆಂ........ವ್ಹಡ್ಲಿ ಮಾಂಯ್ಚೆ ಪುರ್ಪುರೆ ಆನಿಂ ತ್ಯಾ ಮಧೆಂ................. ಹೆಣೆಂ ತೆಣೆಂ ಇಲ್ಲೆಂ ಕಾಮ್ ಆನಿಂ ಸೆಜಾರಿ ಭುರ್ಗ್ಯಾ ಸಾಂಗಾತಾ ಖೆಳ್ ಮ್ಹಣ್ತಾನಾ ಜಾಕುಚೊ ದೀಸ್ ಪಾಶಾರ್ ಜಾತಾಲೊ!
...............ಆನಿಂ ರಾತಿಕ್, ಪೊಟ್ಭರ್ ಜೇಂವ್ಕ್ ಆಸ್ಲ್ಯಾರ್ ಜಾಕು ಸುಶೆಗಾತ್ ನಿದ್ತಾಲೊ. ನಾಂ ತರ್....... ಚಿಮ್ಣಿ ಪಾಲ್ವಯ್ಲ್ಯಾ ಉಪ್ರಾಂತ್ ಉಟೊನ್ ರಾಂದ್ಚ್ಯಾ ಕುಡಾಂತ್ಲ್ಯಾ ಹರ್ಯೇಕಾ ಕುಡ್ಲ್ಯಾಂತ್ ಹಾತ್ ಘಾಲ್ನ್ ಸಾಸ್ಪಾತಾಲೊ....... ಆನಿಂ ಗೊಬ್ಳೊಭರ್ ಉದಾಕ್ ಪಿಯೆವ್ನ್ ಯೇವ್ನ್ ಜಬರ್ದಸ್ತೆನ್ ದೊಳೆ ದಾಂಪುನ್ ನಿದ್ತಾಲೊ!
***********
ಇಸ್ಕೊಲ್ ಸೊಡೂನ್ ಆರ್ದೊ ಘಂಟೊ ಉತ್ರಾಲ್ಲೊ.................
ಇಸ್ಕೊಲಾಚ್ಯಾ ವಠಾರಾಂತ್ ಕೊಣ್ಯಿ ಭುರ್ಗೆ ದಿಸನಾತ್ಲ್ಲೆ.
ಭುಕೆಚೆ ವೋಡಿಂನಿ ಪೊಟಾಂತ್ ಪರ್ತೊನ್ ಯೆಂವ್ಚೆ ಗುಳೆ ಚಡಾತ್ ವೆತಾಲೆ. ದಂತಾಂಚಿ ’ಗರ್ರ್...............ಗುರ್ರ್ರ್’ ಬೊಬ್ ನಿಶಬ್ದ್ ವಾತಾವರಣಾಂತ್ ಚಿಕ್ಕೆ ವ್ಹಡ್ಲ್ಯಾನ್ಚ್ ಆಯ್ಕಾತಾಲಿ ಜಾಕುಕ್.
’ಘರಾ ವಚೊನ್ ಗೊಬ್ಳೊಭರ್ ಉದಾಕ್ ಮಾತ್ರ್ ಪಿಯೆಜಾಯ್. ತಾಚೆ ಉಪ್ರಾಂತ್ ನ್ಹಾಣ್ಯೆ ರಾಂದ್ಣಿಕ್ ಉಜೊ ಕರುಂಕ್, ಬಿತರ್ಲ್ಯಾ ರಾಂದ್ಣಾಕ್ ಉದಾಕ್ ಭರುಂಕ್, ಆಯ್ದಾನಾಂ ಧುಂವ್ಕ್.............ಆನಿಂ ವ್ಹಡ್ಲಿ ಮಾಂಯ್ಚೆ ಪುರ್ಪುರೆ ಆಯ್ಕೊಂಕ್.....! ರಾತಿಂ ಯೇವ್ನ್ ಬಾಬಾಚೆ ಧೆಂಕ್ಣೆ............... ಮಾರ್ ................ ಮಾಗಿರ್ ರಾತಿಂ ಜೇಂವ್ಕ್ ಆಸಾಗಿ ನಾಂಗಿ? ಬಾಬ್ ಕಾಂಯ್ ಹಾಡಿನಾತ್ಲ್ಯಾರ್ ವ್ಹಡ್ಲಿಮಾಂಯ್ನ್ ರಾಂದ್ಚೆಂ ಖಂಚೆ?’ ಚಿಂತ್ತಾ....................ಚಿಂತ್ತಾನಾ ಜಾಕುಚೆ ದೊಳೆ ಭರೊನ್ ಆಯ್ಲೆ.
ಭರ್ಲ್ಲಿಂ ದುಃಕಾಂ ಪೊಲ್ಯಾಂ ವಯ್ಲ್ಯಾನ್ ಗಳೊನ್ ವೆಚೆ ಪಯ್ಲೆಂ ಜಿಬ್ಬ್ಯಾಚೆಂ ಪೋಂತ್ ಉಕ್ಲುನ್ ತಾಂತುಂ ತಿಂ ಜಿರಯ್ಲಿಂ ಜಾಕುನ್.
’ಕಿತೆಂಯ್ ಜಾಂವ್ ಆಜ್ ಸಾವೆರಾಮಾಚ್ಯಾ ಹೊಟೆಲಾಂತ್ ಪಿಯೆಜಾಯಿಚ್. ಹುನ್ - ಹುನ್ ಪೊಳೆ ಕಾಯ್ಜಾಯಿಚ್, ಆಂಬಡೆ......... ಗೋಳಿ ಬಜೆ............ ಆನಿಂ.......... ಉಪ್ಪಿಟ್ಟು’ ತೊಂಡಾಂತ್ ಭರೊನ್ ಆಯಿಲ್ಲೆಂ ಉದಾಕ್ ವೊಂಟಾಂ ಇಡಾಂತ್ಲ್ಯಾನ್ ಭಾಯ್ರ್ ಪಡ್ಚೆ ಪಯ್ಲೆಂ ಆಪ್ಲ್ಯಾ ಪೊಟಾಕ್ ಗಳಯ್ಲೆಂ ಜಾಕುನ್.
ಜಾಕುಚ್ಯಾ ಚಿಂತ್ನಾಂಕ್ ಸರಿ ಜಾವ್ನ್ ಪೊಟಾಂತ್ಲ್ಯಾ ದಂತಾಂನಿ ಆಫ್ಲೆಂ ಆಸ್ಥಿತ್ವ್ ದಾಕಂವ್ಕ್ ಆವಾಜ್ ಉಟಯ್ಲೊ.
ಎದೊಳ್ಯಿ ಬಸೊನ್ ಆಸ್ಲ್ಲ್ಯಾ ಜಾಕುನ್ ಉಟೊನ್, ಹಳೂ ಮೆಟಾಂ ಕಾಡುನ್, ಇಸ್ಕೊಲಾಚೆ ಮುಖ್ಲೆ ಕುಶಿಕ್ ಯೇವ್ನ್ ಪಾದ್ರ್ಯಾಬಾಚ್ಯಾ ಘರಾ ತಿಳ್ಳೆಂ. ಎದೊಳ್ ಬಸೊನ್ ವಾಚುನ್ ಆಸ್ಲ್ಲೊ ಫಾ. ಡ್’ಸೋಜಾ ಆತಾಂ ಉಟ್ಚೆಂ ಆಟ್ಟಾಣೆಂ ಕರ್ತಾಲೊ. ಪಾದ್ರ್ಯಾಬ್ ಉಟೊನ್ ಕುಜ್ನಾ ತೆವ್ಶಿಂ ಚಮ್ಕಾಲೊ.
ಪಿಂಜ್ಕರ್ ಪೊತೆಂ ಜಾಕುಚ್ಯಾ ಖಾಂದಾರ್ ಚಡ್ಲೆಂ. ಹಳೂ ಮಾಜ್ರಾ ಮೆಟಾಂ ಕಾಡುನ್ ಪಾದ್ರ್ಯಾಬಾಚ್ಯಾ ಘರ್ಚಿಂ ಮೆಟಾಂ ಚಡ್ಲೊ ಜಾಕು. ಗೊಮ್ಟಿ ಲಾಂಬ್ ಕಾಡ್ನ್ ಚಾರ್ಯಿ ಭಂವ್ತಣಿ ಜಾಕುನ್ ತೀಳ್ನ್ ಪಳೆಲೆಂ ನಾ....ಕೋಣ್ಯಿ ನಾಂತ್!
ಧಡ್ದಡ್ಯಾ ಕಾಳ್ಜಾ ವಯ್ರ್ ಹಾತ್ ದಾಂಬುನ್ ದರ್ನ್ ಜಾಕುನ್ ದಾವೊ ಪಾಂಯ್ ಪಾದ್ರ್ಯಾಬಾಚ್ಯಾ ಕುಡಾ ಬಿತರ್ ದವರ್ಲೊ. ಉಪ್ರಾಂತ್ ಉಜ್ವೊ ಪಾಂಯ್.....ಉಪ್ರಾಂತ್ ದಾವೊ................
ಜಾಕುಕ್ ಆಪ್ಲ್ಯಾ ಕಾಳ್ಜಾಚಿ ಉಡಿ ಸ್ವಷ್ಟ್ ಆಯ್ಕಾತಾಲಿ. ಪುಣ್ ಪಾಂಯ್ ಮಾತ್ರ್ ಕಿತೆಂಚ್ ಆವಾಜ್ ಕರಿನಾತ್ಲ್ಲೆ.
ಜಾಕು ಇಸ್ಕೊಲಾಚೆ ಪಯ್ಶೆ ದವರ್ಚ್ಯಾ ಡಬ್ಬ್ಯಾ ಸರ್ಶಿಂ ಪಾವ್ಲ್ಲೊ. ಉಗ್ತೊಚ್ ಆಸ್ಚ್ಯಾ ಡಬ್ಬ್ಯಾಂತ್ ಭರ್ನ್ ಚಿಲ್ಲರ್ ಪಯ್ಶೆ ’ಹಾಬ್ಬಾ.......!’ ಜಾಕುನ್ ಪಯಿಲ್ಲೆ ಪಾವ್ಟಿಂ ತಿತ್ಲೆ ಪಯ್ಶೆ ಪಳೆಂವ್ಚೆ.
ಜಾಕುನ್ ವಳೂ ಡಬ್ಬ್ಯಾಕ್ ಹಾತ್ ಘಾಲೊ. ಮೂಟ್ಭರ್ ಪಯ್ಶೆ ಕಾಡ್ನ್ ಚಡ್ಡೆಚ್ಯಾ ಬೊಲ್ಸಾಂತ್ ಹಾತ್ ಚೆಪ್ಲೊ. ಮೂಟ್ ಸಡಿಳ್ ಕೆಲಿ!
’ಗಿಜಿಲ್ಲ್’ ಚಡ್ಡೆಚ್ಯಾ ಬೊಲ್ಸಾಚ್ಯಾ ಬುರಾಕಾಂತ್ಲ್ಯಾನ್ ದೋನ್ ಚಾರ್ ಪಾವ್ಲ್ಯೊ ಧರ್ಣಿರ್ ಗಳ್ಳ್ಯೊ! ಆವಾಜ್ ಆಯ್ಕೊನ್ ಜಾಕು ಉಡೊನ್ ಪಡ್ಲೊ.
’ದುಸ್ರಿ ಮೂಟ್ ಮಾರ್ನ್ ಹಾಂಗಾ ಥಾವ್ನ್ ಧಾಂವಾಜಾಯ್!’ ತಿತ್ಲ್ಯಾಚ್ ವೇಗಾನ್ ಜಾಕುನ್ ಪರತ್ ಮೂಟ್ ಮಾರ್ಲಿ. ಭುಕೆಚ್ಯೊ ವೋಡಿ ಜಾಕುಕ್ ಧಣ್ಸಿತಾಲ್ಯೊ.
ಮಾರ್ಲೆಲಿ ಮೂಟ್ ಪಾಟಿಂ ಕಾಡ್ಚೆ ಪಯ್ಲೆಂ..........ಏಕಾ ಬಳಿಷ್ಟ್ ಹಾತಾನ್ ಜಾಕುಚ್ಯಾ ಹಾತಾಕ್ ಧರ್ಲೆಂ!
ಧರ್ಲಲ್ಯಾ ಹಾತಾನ್ ವಯ್ಲ್ಯಾನ್ ಚರೊನ್ ಗೆಲ್ಲಿ ಜಾಕುಚಿ ದೀಷ್ಟ್ ವಚೊನ್ ಹಾತ್ ಧರ್ಲೆಲೆ ವ್ಯಕ್ತಿಚ್ಯಾ ವದನಾರ್ ಖಂಚ್ಲಿ. ತ್ಯಾ ವದನಾ ವಯ್ಲೆ ರಾಗಿಷ್ಟ್ ತಾಂಬ್ಡೆ ದೊಳೆ ಪಳೆವ್ನ್ ಜಾಕುಚ್ಯಾ ಚಡ್ಡೆಚಿಂ ಉಮ್ಕಾಳ್ಚಿಂ ಸುತಾಂ ಬಾರಿಕ್ ಕಾಂಪೊಂಕ್ ಲಾಗ್ಲಿಂ!
’ಪಾದ್ರಾಬ್!’ ಜಾಕುಚೆಂ ತೊಂಡ್ ಉಗ್ತೆಂಚ್ ಉರ್ಲೆಂ. ಚಿಲ್ಲರ್ ಧರ್ಲೆಲಿ ಮೂಟ್ ಸದಿಳ್ ಜಾಲಿ. ತಾಂತ್ಲೆ ಪಯ್ಶೆ ಮೆಕ್ಳೊನ್ ಡಬ್ಬ್ಯಾಂತ್ ಪಡ್ಲೆ. ’ಗಿಜಿಲ್ಲ್’ ಆವಾಜ್ ಜಾಲೊ. ಪುಣ್ ಜಾಕುಕ್ ಕಾಂಯ್ ಆಯ್ಕಾಲೆಂ ನಾ!
’ಬೊಲ್ಸಾಂತ್ಲೆ ಪಯ್ಶೆ ಕಾಡ್ನ್ ಪೂರಾ ಡಬ್ಬ್ಯಾಕ್ ಘಾಲ್’ ಫಾ. ಡಿಸೋಜಾನ್ ತಾಳೊ ಕಾಡ್ಲೊ. ಜಾಕುನ್ ದಾವೊ ಹಾತ್ ಬೊಲ್ಸಾಂತ್ ರಿಗವ್ನ್ ಪೂರಾ ಚಿಲ್ಲರ್ ಪಯ್ಶೆ ಕಾಡ್ನ್ ಡಬ್ಬ್ಯಾಂತ್ ಘಾಲೆ.
ಧರ್ಲ್ಲೊ ಹಾತ್ ಸೊಡಿನಾಸ್ತಾನಾ ಮೆಜಾಲಾಗಿಂ ಮ್ಹಣಾಸರ್ ಜಾಕುಕ್ ವೋಡ್ನ್ಚ್ ವ್ಹರ್ನ್ ಗೆಲೊ ಪಾದ್ರ್ಯಾಬ್. ಮೆಜಾಚೆಂ ಡ್ರಾವರ್ ಉಗ್ತೆಂ ಕರ್ನ್ ಬಾರೀಕ್ - ಲಾಂಬ್ ಬೆತ್ ಭಾಯ್ರ್ ಕಾಡ್ಲೆಂ!
’ದಮ್ಮಯಾ ಫಾದ......ಮಾರಿನಾಕಾತ್ ಫಾದ.....ಹಾಂವೆಂ ಚೊರುಂಕ್ ನಾ ಫಾದ....... ಮ್ಹಾಕಾ ಭುಕ್ ಲಾಗ್ತಾ ಫಾದ...ಮಾರಿನಾಕಾತ್ ಫಾದರ್....’ ಜಾಕುಚೆ ದೊಳೆ ಭರೊನ್ ಸವ್ಕಾಸ್ ವೊಮ್ತಾಲೆ.
"ದಮ್ಮಯಾ ಫಾದ.............."
"ತೊಂಡ್ ಧಾಂಪ್ರೆ........" ಎಕಾಚ್ ದೆಂಕ್ಣ್ಯಾನ್ ಜಾಕುಚಿ ಜೀಬ್ ಥಂಡ್ ಪಡ್ಲಿ.
ದುಸ್ರೆ ಘಡ್ಯೆ ಜಾಕುಚಿ ಚಡ್ಡಿ ನಿಸ್ರಾಯ್ಲಿ!
’ರಪ್ಪ್...........ರಪ್ಪ್........ರಪ್ಪ್....’ ಬೆತಾಚೆ ಕಠಿಣ್ ಮಾರ್ ಜಾಕುಚ್ಯಾ ಮುಗ್ದ್, ನಾಜೂಕ್ ಕುಡೀಚೆರ್ ವ್ಹಾಳ್ಳೆ!
ಸುಸ್ಕಾರ್ನ್ ...........ಸುಸ್ಕಾರ್ನ್ ...........ರಡೊನ್ ಜಾಕುಚ್ಯಾ ದೊಳ್ಯಾಂತ್ಲಿಂ ದುಃಖಾಂ ಸುಕೊನ್ ಗೆಲಿಂ. ಗಳ್ಚೆಂ ಕಿರ್ಮೆಂ ಹಾತಾನ್ ಪುಸುನ್ ಭುಕೆಚ್ಯಾ ವೊಡಿಂನಿ ಜಾಕು ಘರಾ ಕುಶಿನ್ ಚಮ್ಕಾಲೊ.
ಇಸ್ಕೊಲ್ ಸೊಡುನ್ ಥೊಡೊ ವೇಳ್ ಜಾಲ್ಲೊ..........................
ಭುರ್ಗೆ ಸಕ್ಕಡ್ಯಿ ತಾಂಚ್ಯಾ ತಾಂಚ್ಯಾ ಘರ್ಚೆ ವಾಟೆಕ್ ಲಾಗ್ಲ್ಲೆ. ಜಾಕುಕ್ ಘರಾ ವೆಚಿ ಉರ್ಭಾಚ್ ನಾತ್ಲ್ಲಿ! ತರ್ಯಿ ಘರಾ ವೆಚೆ ಖಾತಿರ್ ಮೆಟಾಂ ಕಾಡ್ತಾಲೊ.
ಗುರ್ಕಾರಾಮಾಚ್ಯಾ ಘರಾ ಪಾಟ್ಲ್ಯಾನ್ ಪಾಶಾರ್ ಜಾತಾನಾ ಜಾಕುಚಿ ದೀಷ್ಟ್ ಗುರ್ಕಾರಾಮಾಚ್ಯಾ ಆಂಬ್ಯಾ ರುಕಾಚೆರ್ ಖಂಚ್ಲಿ.
ಪಿಕೊನ್ ತಾಂಬ್ಡೆ ಜಾಲ್ಲೆ ಸಾತಾಟ್ ಆಂಬೆ! ಭುಕೆನ್ ಬೊಬ್ ಮಾರ್ಚೆಂ ಪೊಟ್!
ಜಾಕುನ್ ಭಂವ್ತಣಿ ನದರ್ ಭೊಂವ್ಡಾಯ್ಲಿ. ಕೊಣ್ಯಿ ನಾಂತ್, ಖಾತ್ರಿ ಜಾತಚ್ ಖಾಂದಾ ವಯ್ಲೆಂ ಪೊತೆಂ ಕಾಡ್ನ್ ವಾಟೆ ದೆಗೆನ್ ಗಳಯ್ಲೆಂ. ದಾವೊ ಪಾಂಯ್ ವಯ್ರ್ ಉಕಲ್ನ್ ದೋನ್ಯಿ ಹಾತಾಂನಿ ದೊರೊ ಪೊಟ್ಲುನ್ ಧರ್ನ್, ಪೊಟ್ ಜೆಂಜಾರ್ನ್ ಜಾಕು ದೊರೊ ಚಡ್ಲೊ. ದೋನ್ ಆಂಬೆ ಕಾಡ್ನ್ ದೊರೊ ಉಡೊಂಕ್ ತಯಾರಿ ಕರ್ತಾನಾ............
ಜಾಕುಚೊ ಜಿಬ್ಬೊ ಕೊಣೆಂಗಿ ಪಾಟ್ಲ್ಯಾನ್ ಥಾವ್ನ್ ವೊಡ್ಲೊ.
ಜಾಕುನ್ ಭುಜಾ ವಯ್ಲ್ಯಾನ್ ಗೊಮ್ಟಿ ಘುಂವ್ಡಾವ್ನ್ ಪಾಟಿಂ ಚೊಯ್ಲೆಂ.
ಗುರ್ಕಾರಾಮ್! ತೆ ಫಿರ್ಗಜಿಂತ್ಲೊ ಗ್ರೇಸ್ತ್ ಮನಿಸ್, ಸಾಂಗಾತ್ಚ್ ಹರಾಮಿ.............. ದೊಳ್ಯಾಂತ್ ರಗಾತ್ ನಾತ್ಲ್ಲೊ!
ಜಾಕುಚ್ಯಾ ಪಿಂಜ್ಕರ್ ಚಡ್ಡೆಚಿಂ ಉಮ್ಕಾಳ್ಚಿಂ ಬಾರೀಕ್ ಸುತಾಂ ಹಳ್ತಾನ್ ಕಾಂಪೊಂಕ್ ಲಾಗ್ಲಿಂ.
"ಹೆವ್ಶಿನ್ ದೀರೆ ಆಂಬೆ". ಜಾಕುನ್ ದೋನ್ಯಿ ಆಂಬೆ ಗುರ್ಕಾರಾಮಾಚ್ಯಾ ಹಾತಾಂತ್ ಒಪ್ಸಿಲೆ. ಆಪ್ಲೆಂ ಕಾಳಿಜ್ಚ್ ದಿಂವ್ಚೆಂ ತಿತ್ಲೆಂ ದೂಕ್ ಭೊಗ್ಲೆಂ ಜಾಕುಕ್.
’ದೆವಾ, ಎಕಾಡ್ಚಾನ್ ಹಿ ಭುಕ್, ವಯ್ಲ್ಯಾನ್ ಆತಾಂ ಹಾಣೆಂ ಮ್ಹಾಕಾ ಮಾರಿನಾತ್ಲ್ಯಾರ್ ಪುರೊ’ ಜಾಕು ಹಳ್ತಾನ್ ಘಾಮೆಲೊ.
"ಚೊರಾ, ಕೊಣಾಚೆ ಆಂಬೆ ಕಾಡ್ಲೆಯ್ರೆ ತುವೆಂ?"
"ಮಾಫ್ ಕರ್ ಮಾಮಾ.............ಮಾರಿನಾಕಾ ಮಾಮಾ..................ಮ್ಹಾಕಾ ಭುಕ್ ಲಾಗ್ಲಿ ಮಾ.............ಮಾ..........."
"ಭುಕ್ ಆಮ್ಚ್ಯಾ ಟೊಮಿಕ್ಯಿ ಲಾಗ್ತಾರೆ"
ಗುರ್ಕಾರಾಮಾನ್ ಉಸ್ಕೆಚೆಂ ಆಡಾರ್ ಮೊಡ್ಲೆಂ! ಪಾನಾಂ ಬುಡ್ಡುನ್ ಧರ್ಣಿರ್ ಘಾಲಿಂ. ಉಪ್ರಾಂತ್..........ಜಾಕುಚ್ಯಾ ಕುಲ್ಯಾಂ ವಯ್ರ್, ಪಾಟಿ ವಯ್ರ್, ಪಾಂಯಾಂಚೆರ್ ಸುಶೆಗಾತ್ ವೊಡ್ಲೆಂ!
ಜಾಕು ರಡ್ಲೊ, ಹುಳ್ವಳ್ಳೊ, ಬೊಬಾಟ್ಲೊ! ನಾ..........ಫಾಯ್ದೊ ಲಾಬ್ಲೊ ನಾ. ಖಾಂವ್ಚೆ ಪೂರಾ, ಖಾವ್ನ್ ಜಾಲ್ಯಾ ಉಪ್ರಾಂತ್ ಜಾಕುಕ್ ದೊರ್ಯಾರ್ ಥಾವ್ನ್ ಸಕ್ಲಾ ಲೊಟ್ಲೊ!
ಪಡ್ಲ್ಲೆ ಕಡೆ ಥಾವ್ನ್ ಉಟೊನ್ ಜಾಕುನ್ ಚಡ್ಡೆಚಿ ಧುಳ್ ಫಾಪುಡ್ಲಿ. ಜೆಂಜ್ರೊನ್ ಜಾಲ್ಲ್ಯಾ ಘಾಯಾಂಚಿ ಮಾತಿ ಪುಸುನ್ ಕಾಡ್ಲಿ. ಗಳ್ಚಿಂ ದುಕಾಂ ಪೊತ್ಯಾನ್ ಪುಸುನ್ ತ್ಯಾ ಮ್ಹೆಳ್ಕುಟ್ಯಾ ವಸ್ತುರಾಂತ್ ಜಿರಯ್ಲಿಂ..............ಚೀಲ್ ಖಾಂದಿ ಚಡವ್ನ್ ಜಾಕು ಘರ್ಚೆ ವಾಟೆಕ್ ಲಾಗ್ಲೊ.
ರಾತ್ ಝೂನ್ ಜಾವ್ನ್ ಯೆತಾಲಿ ತರ್ಯಿ, ಜಾಕುಚ್ಯಾ ದೊಳ್ಯಾಕ್ ದೊಳೊ ಲಾಗಾನಾಸ್ಲ್ಲೊ. ಜಾಕುನ್ ಆಜ್ ಪಯಿಲ್ಲೆ ಪಾವ್ಟಿಂ ಇತ್ಲೆಂ ಚಿಂತುಂಕ್ ಆರಂಭ್ ಕೆಲ್ಲೆಂ. ’ಮನ್ಶಾನ್ ಪೊಟಾಕ್ ಖೆಲ್ಯಾರ್ ಮಾತ್ರ್ ಪಾವನಾ, ಹೆರ್ ಸಬಾರ್ ಸಂಗ್ತಿಂ ಗರ್ಜ್ ಆಸಾತ್’ ಮ್ಹಳ್ಳೆಂ ಚಿಂತಾಂಪ್ ಜಾಕುಚೆ ನೆಣ್ತೆ ಮತಿಂತ್ ಉದೆವ್ನ್ ಯೆತಾಲೆಂ.
ಬೆಬ್ದ್ಯಾ ಬಾಪಾಯ್ಚೆಂ ರುಪ್ಣೆಂ, ಪಾದ್ರ್ಯಾಬಾಚೆ ತಾಂಬ್ಡೆ ದೊಳೆ, ಗುರ್ಕಾರಾಮಾಚೆಂ ಉಸ್ಕೆಚೆಂ ಆಡಾರ್............ಎಕಾ ಪಾಟ್ ಏಕ್ ಉದೆವ್ನ್ ಪಾಶಾರ್ ಜಾಲೆಂ. ಆನಿಂ ನಿಮಾಣೆಂ ........... ಜಾಕುಕ್ ಕೆದಾಳಾ ಝೆಮ್ ಆಯ್ಲಿ ಆನಿಂ ದೊಳೊ ಆಡ್ ಜಾಲೊ ಮ್ಹಳ್ಳೆಂ ಕಳ್ಳೆಂನಾ.
ಸಕಾಳಿಂ ಉಟ್ತಾನಾ ಜಾಕುಚೆಂ ಆಂಗ್ ಕಠಿಣ್ ದುಕ್ತಾಲೆಂ. ಕಾಲ್ಚಿಂ ಚಿಂತ್ನಾಂ ಆಜ್ ಮುಖಾರುನ್ ವೆತಾಲಿಂ! ಆಂಗ್ ದುಕಿನ್ ಕೂಸ್ ಪರ್ತುನ್ ನಿದ್ಲೊ ಜಾಕು.
’ಛಟ್’ ಜಾಕುಚ್ಯಾ ಕುಲ್ಯಾರ್ ಏಕ್ ಥಾಪಾಡ್ ಪಡ್ಲೆಂ. "ಊಟ್ರೆ ರೆಡ್ಯಾ, ಆನಿಕ್ಯಿ ಲೊಳ್ತಾಯ್ ಮಾಂದ್ರೆರ್". ಪಾಟಾಪಾಟ್ ಜಾಕುಚ್ಯಾ ಬಾಬಾಚೊ ತಾಳೊ ಸಾದ್ಲೊ.
ಎಕ್ಚ್ ಪಾವ್ಟಿಂ ಉಟೊನ್ ಬಸ್ಲೊ ಜಾಕು. ಥಂಯ್ ಪತ್ತೆ ಘಾಲ್ಲಿ ವೋಲ್ ಆನಿಂ ಮಾಂದ್ರಿ ಗುಟ್ಲಾವ್ನ್ ಸುರ್ಯೆಲ್ಲ್ಯಾ ಬಾಂಕಾ ಪಂದಾ ಲೊಟುನ್ ಆಂಗ್ ವೊಳಾಯ್ಲೆಂ ಜಾಕುನ್. ದುಕಿನ್ ಹಳ್ತಾರ್ ಪಿಂರ್ಗಾಲೊ ಜಾಕು.
ಗೊಬ್ರಾಂತ್ಲೊ ಇಂಗ್ಳೊ ಉಸ್ತುನ್, ತೊಂಡಾಂತ್ ಘಾಲ್ನ್ ಚಾಬ್ಲೊ.
ಉಪ್ರಾಂತ್ ಬೊಟ್ ಇಂಗ್ಳ್ಯಾ ಸಂಗಿಂ ದಾಂತಾರ್ ಘಸ್ಟುನ್ ಘರಾ ಪಾಟ್ಲ್ಯಾ ಗುಡ್ಯಾರ್ ಕುಡಿಚಿ ಗರ್ಜ್ ಸಂಪಂವ್ಕ್ ಚಮ್ಕಾಲೊ ಜಾಕು.............
ಜಾಕುಚೆ ತರ್ನೆ ಮತಿನ್ ಸಬಾರ್ ಝುನ್ ನಿರ್ಧಾರ್ ಘೆವ್ನ್ ಜಾಲ್ಲೆ!
’ಆನಿಂ ಹಾಂವ್ ಮಿಸಾಕ್ ವೆಚೊಂ ನಾ...............ಹಾಂವ್ ಆನಿಕ್ಯಿ ಚಡ್ ಚೊರ್ತಾಲೊಂ, ಮಾರ್ ಖೆಲ್ಯಾರ್ಯಿ ಚೊರ್ಲ್ಲಿ ವಸ್ತ್ ಪಾಟಿಂ ದಿಂವ್ಚೊನಾ. ಚಿಕ್ಕೆ ವ್ಹಡ್ ಜಾಲ್ಯಾ ಉಪ್ರಾಂತ್ ಚೊರ್ಲ್ಯಾರ್ಯಿ ಮಾರ್ ಖಾಂವ್ಚೊಂ ನಾ..........! ಪಾದ್ರ್ಯಾಬಾಚ್ಯಾ ಘರಾ ರಿಗೊನ್ ಪೂರಾ ಚೊರ್ನ್ ವ್ಹರ್ತಾಲೊಂ. ಗುರ್ಕಾರಾಮಾ ತಸಲ್ಯಾಂಕ್ ಜಿವೆಶಿಂ ಮಾರ್ತಾಲೊಂ..........! ಬಾಬಾ ತಸಲ್ಯಾಂಕ್ ಕಾಜಾರ್ ಜಾಂವ್ಕ್ಚ್ ಸೊಡ್ಚೊಂ ನಾ.............ವ್ಹಡ್ಲಿಮಾಂಯ್ ತಸಲ್ಯಾಂಕ್ ತಾಂದುಳ್ ವ್ಹರ್ನ್ ದಿತಲೊ..........! ಭುಕ್ ಲಾಗ್ಲ್ಲ್ಯಾ ಭುರ್ಗ್ಯಾಂಕ್ ಚೊರುಂಕ್ ಶಿಕಯ್ತಾಲೊಂ! ತಾಂಕಾಂ ಕೋನ್ಯಿ ಮಾರಿತ್ ಜಾಲ್ಯಾರ್ ತಸಲ್ಯಾಂಕ್ ......!’ ಚಿಂತ್ನಾಂ ಬರಾಬರ್ ಜಾಕುನ್ ಮೊಡ್ಕರ್ ಬಾಂಕಾರ್ ಮೂಟ್ ಮಾರ್ಲಿ. ’ದಡ್’ ಆವಾಜಾಕ್ ಜಾಕುನ್ ಆಪ್ಣಾಕ್ಚ್ ಸಾಂಬಾಳ್ಳೊ.
ಬಾಬ್ ಕಾಮಾಕ್ ಗೆಲ್ಯಾ ಉಪ್ರಾಂತ್ ಧಣ್ಸಾಲ್ಲೆ ಕುಡೀಕ್ ವಿಶೆವ್ ದಿಂವ್ಚ್ಯಾಕ್ ಜಾಕು ಬಾಂಕಾ ಪಂದಾ ಆಡ್ ಪಡ್ಲೊ. ಇಸ್ಕೊಲಾಕ್ ವೆಚೆಂ ಗಿನ್ಯಾನ್ ಜಾಕು ಥಂಯ್ ನಾಸ್ ಜಾಲ್ಲೆಂ.
ಸಾಂಜ್ ಜಾತಾನಾ ಜಾಕುನ್ ತಾಚೆ ದೋನ್ಯಿ ಜಿಬ್ಬೆ ಕಾಡ್ನ್ ಎಕಾ ವಯ್ರ್ ಏಕ್ ಆಂಗಾಂಕ್ ಶಿರ್ಕಾಯ್ಲೆ. ರಾಂದ್ಣಿಚ್ಯಾ ಖುರಾರ್ ವಿಶೆವ್ ಘೆಂವ್ಚಿ ಕಾಡಿಯಾಂ ಪೇಟ್ ಚಡ್ಡೆಚ್ಯಾ ಬೊಲ್ಸಾಂತ್ ಚೆಪ್ಲಿ. ವ್ಹಡ್ಲಿಮಾಂಯ್ ದೊಳೆ ಚುಕವ್ನ್ ಜಾಕು ಘರ್ಚಿಂ ಮೆಟಾಂ ದೆಂವ್ಲೊ.
ಝಲಾಚ್ಯಾ ಪೊಂತಾರ್ ರಾವೊನ್ ಏಕ್ ದೀಷ್ಟ್ ಆಪ್ಲ್ಯಾ ಕೊಲ್ವಾಚ್ಯಾ ಘರಾಚೆರ್ ಜೊಕ್ಲಿ ಜಾಕುನ್. ’ಆಪುಣ್ಯಿ ಆನಿಂ ಪರತ್ ಹ್ಯಾ ಘರಾಕ್ ಪಾಟಿಂ ಯೆಂವ್ಚೊಂ ನಾ’. ಮ್ಹಣ್ ಜಾಕುಕ್ ಕಳಿತ್ ಆಸ್ಲ್ಯಾರ್ಯಿ ಜಕುಚ್ಯಾ ದೊಳ್ಯಾಂತ್ ಥಾವ್ನ್ ಏಕ್ಯಿ ದೂಕ್ ಗಳ್ಳೆಂನಾ!
ವೊರಾಂ ರಾತ್ಚಿಂ ಆಟ್ ಜಾತಾನಾ ಜಾಕು ಹಳ್ತಾರ್ ಇಸ್ಕೊಲಾಚೆ ಕುಶಿನ್ ಥಾವ್ನ್ ಪಾದ್ರ್ಯಾಬಾಚ್ಯಾ ಘರಾ ಕುಶಿನ್ ಚಮ್ಕೊಂಕ್ ಲಾಗ್ಲೊ.
"ಡಬ್............ಡಬ್.....ಡಬ್............ಡಬ್..........." ಎಕಾ ಪಾಟ್ ಏಕ್ ಬಳಾನ್ ಮಾರ್ಲೆಲೆ ಜಲ್ಲಿ ಫಾತೊರ್ ಪಾದ್ರ್ಯಾಬಾಚ್ಯಾ ಘರ್ಚ್ಯಾ ಜನೆಲಾಂಚೆ ಆರ್ಸೆ ಫುಟಂವ್ಕ್ ಲಾಗ್ಲೆ!
ದುಸ್ರ್ಯೆ ಘಡ್ಯೆ ಜಾಕುನ್ ಥಂಯ್ ಥಾವ್ನ್ ಧಾಂವ್ ಮಾರ್ಲಿ. ಫಾ! ಡಿಸೋಜಾನ್ ಟೋರ್ಚ್ ಲಾಯ್ಟಾಚೊ ಉಜ್ವಾಡ್ ಆಂವ್ಸರಾನ್ ಭೊಂವ್ತಣಿಂ ಫಾಂಕಯ್ಲೊ. ಪುಣ್ ತಾಕಾ ಕಿತೆಂಚ್ ದಿಸ್ಲೆಂನಾ!
ಗುರ್ಕಾರಾಮಾಚ್ಯಾ ಘರಾಲಾಗಿಂ ಪಾವ್ತಾನಾ ಜಾಕುನ್ ಧಾಂವ್ಣಿ ರಾವಯ್ಲಿ. ಖರ್ಶೆಂವ್ಚೆ ಕುಡೀಕ್ ಆಧಾರ್ ದೀಂವ್ಕ್ ವಾಟೆ ದೆಗೆಲ್ಯಾ ರುಕಾಕ್ ಜಾಕುನ್ ಪಾಟ್ ತೆಂಕ್ಲಿ.
ಸವ್ಕಾಸ್ ಖೆರ್ಶೆವ್ಣಿ ಆಕೇರ್ ಯೆತಾನಾ.........ಬೊಲ್ಸಾಂತ್ಲಿ ಕಾಡಿಯಾಂ ಪೇಟ್ ಜಾಕುಚ್ಯಾ ಹಾತಾಂನಿ ಖೆಳೊಂಕ್ ಲಾಗ್ಲಿ!
’ಗಿರ್ರ್............’ ಕಾಡಿ ವೋಡ್ನ್ ಗುರ್ಕಾರಾಮಾಚ್ಯಾ ದರ್ಕಾಸಾ ಬಿತರ್ ಸುಕೊನ್ ರಾವ್ಲಲ್ಯಾ ಕರ್ಡಾಕ್ ಉಜೊ ಲಾಯ್ಲೊ ಜಾಕುನ್. ಉಜ್ಯಾಚೊ ಜೊಬೊ ಚಡೊನ್ ಯೆತಾನಾ ಜಾಕುನ್ ಪಾಯಾಂಕ್ ಬೂದ್ ಸಾಂಗ್ಲಿಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
