ಕವಿತಾकविताPoem
ನಿಯಾಳ್ಚೆಂ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕವಿತಾಪಾಠ್ - 17
ಹಾಂವ್ ಯೆತಾಂಗೊ ಘಾಟಿ ದೆಂವೊನ್
ವಿಲ್ಫಿ ರೆಬಿಂಬಸ್
ಹಾಂವ್ ಯೆತಾಂಗೊ ಘಾಟಿ
ದೆಂವೊನ್
ಮ್ಹಜ್ಯಾ ಮೊಗಾಚ್ಯಾ ಗಾಂವಾಕ್ ಪಾವೊಂಕ್
ತುಜ್ಯಾ ದೊಳ್ಯಾಂಚಿಂ ದುಃಖಾಂ ರಾವಂವ್ಕ್
ಹಾಂವ್ ಯೆತಾಂ ಧಾಂವೊನ್ ಧಾಂವೊನ್
ಯೇ ಮೊಗಾ, ಯೇ ಮೊಗಾ, ಮಂಗ್ಳುರಾಕ್
ಯೇ ಮೊಗಾ, ಯೇ ಮೊಗಾ, ಮಂಗ್ಳುರಾಕ್
ಯೇ ತುಜ್ಯಾ ಸೊಭೀತ್ ಶೆರಾ
ಆನಂದಾಚ್ಯಾ ತುಜ್ಯಾ ಘರಾ
ಮಯ್ಲಾಂ ಮಯ್ಲಾಂ, ಪಾಟ್ ಕರುನ್ ಧಾಂವ್ಲಿಂ
ಹಾಂವ್ ಯೆತಾಂ ಮುಖಾರ್ ಮುಖಾರ್ ತುಕಾ
ಧಾಂವ್ತೆಲಿಂ ತಿಂ ರೂಕ್-ಝಡಾಂ ಉಲಯ್ಲಿಂ
ತುಂ ರಾಕೊನ್ ಆಸಾಯ್ ಮ್ಹಣ್ ಮ್ಹಾಕಾ
ಅತ್ರೆಗಾಚಿ ತಿ ಘಡಿ ನಿಯಾಳ್ತಾಂ
ಭೆಟ್ ಮ್ಹಜಿ ತುಜಿ ಜಾತಾಸ್ತಾನಾ
ಮೆಟ್ ಮ್ಹಜೆಂ ಮ್ಹಜ್ಯಾ ಗಾಂವಾಂತ್ ದವರ್ತಾಂ
ಹಾಂವ್ ಪಾಟಿಂ ಪಳೆನಾಸ್ತಾನಾ
ಕವಿತಾಪಾಠ್ಚೆರ್ ಕೆಲ್ಲಿಂ ಅಧ್ಯಯನ್ ಲೇಕನಾಂ ಬುಕಾರುಪಾರ್ ಪರ್ಗಟ್ ಜಾಲ್ಯಾಂತ್
ವಲ್ಲಿ ಕ್ವಾಡ್ರಸಾಚೆಂ ಅಧ್ಯಯನ್ ಲೇಖನ್
ಸಂಬಂಧ್ ಆನಿ ಮೋಗ್ ನಿಯಾಳ್ಚೆಂ ಗೀತ್ - ಮೆಲ್ವಿನ್ ಜೆ. ವಾಸ್, ಕೆಲರಾಯ್
ಅಧ್ಯಯನಾಚಿ ಸುರ್ವಾತ್ ಕರ್ಚ್ಯಾಧಿಂ: ಕೊಂಕಣಾಚಾ ಹ್ಯಾ ಕೊಗುಳೆಕ್ ಅಖ್ಖ್ಯಾ ಕೊಂಕಣಾಂತ್ ಏಕ್ ಫಾಮಾದ್ ಗಾವ್ಪಿ ಮ್ಹಣ್ಂಚ್ ಲೆಖ್ಲ್ಲೆಂ ಚಡ್. ಬಾಬ್ ವಿಲ್ಫಿ ರೆಬಿಂಬಸ್ ಜಿತ್ಲೆಂ ಮಧುರಾಯೆನ್ ಗಾಯ್ತಾ ತಿತ್ಲೆಂಚ್ ಅಪ್ಲ್ಯಾ ಲಿಖ್ಣೆಂತ್ ತ್ಯಾ ತಾಚಾ ಪದಾಂಚಾ ಸಾಹಿತ್ಯಾಚೆರ್ ಜೀವ್ ಭರ್ತಾ. ಹಿಂ ಪದಾಂ ಜಾಂವ್ಕ್ ಪುರೊ ಪುಣ್ ಗಿತಾಂ/ಪದಾಂಯೀ ಸಾಹಿತ್ಯಾಚೊ ಏಕ್ ಪ್ರಕಾರ್ಚ್. ಹ್ಯಾಚ್ ಖಾತಿರ್ ಹ್ಯಾ ಸಾಹಿತಿಕ್, ಹ್ಯಾ ಕವಿಕ್, ಆಜ್ ತಾಣೆಂ ಕೊಂಕ್ಣಿ ಸಾಹಿತ್ಯಾಕ್ ದಿಲ್ಲ್ಯಾ ಸಾಹಿತಿಕ್ ದೇಣ್ಗೆಖಾತಿರ್ ಖಾಲ್ತೆಪಣಿಂ ಮಾನ್ ಬಾಗಾವ್ನ್ ಹೆಂ ಲೇಖನ್ ನಮೃತಾಯೆನ್ ಅರ್ಪಿತಾಂ.
ಅದ್ಯಯನ್:
ದೀಸ್ಭರ್ ಸಂಸಾರಾಚಾ ಕೊನ್ಶಾ ಕೊನ್ಶಾ ವಯ್ಲೊ ಕಾಳೊಕ್ ಧಾಂವ್ಡಾವ್ನ್ ಥಕ್ಲ್ಲೊ ಸುರ್ಯೊ ಆಪ್ಲ್ಯಾ ಅನ್ಭೋಗಾಕ್ ಘೆವ್ನ್ ದರ್ಯಾ ಉಸ್ಕ್ಯಾರ್ ಶಾಂತ್ ಜಾಂವ್ಚಾ ವಗ್ತಾ ತಾಣೆಂ ಅನುಭವ್ ಕರ್ಚೊ ಅನ್ಭೋಗ್ ತ್ಯಾ ತಾಚ್ಯಾ ಬದಲ್ಚಾ ರಂಗಾಂತ್ ದಿಸೊನ್ ಯೆತಾ. ಹ್ಯಾ ರಂಗಾಂತ್ ತ್ಯಾ ಸುರ್ಯಾ ಆನಿ ತ್ಯಾ ದರ್ಯಾ ಮಧ್ಲ್ಯಾ ಅನ್ಭೋಗಾಕ್ ಆನಿ ಅನ್ಭೋವಾಕ್ ಮೊಳುನ್ ಆಯಿಲ್ಲೆಂ ರೂಪ್ ಆಸಾ. ಹ್ಯಾ ರುಪಾಕ್ ಹಾಂವ್ ಹಾಂಗಾ ಸಂಬಂಧ್ ಮ್ಹಣ್ತಾಂ. ಹೊ ಸಂಬಂಧ್ಚ್
ಸಾಂಜೆಚ್ಯಾ ತ್ಯಾ ಆಸ್ತಮ್ತೆಚೊ ರಂಗ್. ಹೊ ರಂಗ್ ಥೊಡ್ಯಾಚ್ ವೆಳಾಚೊ ತರ್ಯೀ ಹ್ಯಾ ರಂಗಾಂತ್ ಜಿವಿತಾಚೊ ಅರ್ಥ್ ಆಸಾ. ಹ್ಯಾ ರಂಗಾಂತ್ ಜಿವಿತಾಚಿ ಸೊಭಾಯ್ ಆಸಾ. ಹ್ಯಾ ರಂಗಾಂತ್ ಜಿವಿತಾಂತ್ಲೊ ಸಂಬಂಧ್ ಆಸಾ. ಹೊ ಸಂಬಂಧ್ ಉತ್ರಾಂನಿ ಪಿಂತ್ರಾಂವ್ಚೆಂ ಪದ್ಚ್ ’ಹಾಂವ್ ಯೆತಾಂಗೊ ಘಾಟಿ ದೆಂವೊನ್’.
ಹೆಂ ವಯ್ಲೆಂ ವ್ಯಾಖ್ಯಾನ್ ವೈಗ್ಯಾನಿಕ್ ರುಪಾನ್ ಪರಿಪೂರ್ಣ್ ಭಿಲ್ಕುಲ್ ನ್ಹಂಯ್ ತೆಂ ಹಾಂವ್ಯೀ ಮಾಂದುನ್ ಘೆತಾಂ. ತಶೆಂ ಮನ್ಶ್ಯಾ ಜಿವಿತಾಂತ್ಲ್ಯೊ ಸರ್ವ್ ಸಂಗ್ತ್ಯೊಯೀ ವೈಗ್ಯಾನಿಕ್ ರುಪಾನ್ ಪರಿಪೂರ್ಣ್ ನ್ಹಂಯ್. ಜಶೆಂ ಸಂಬಂಧ್. ಜೀವ್ ಆಸ್ಲ್ಲಿ ಹರ್ಯೆಕ್ ಜೀವಿ ಕಾಂಯ್ ತರ್ಯೀ ಚಿಂತುಂಕ್ ಸಕ್ತಾ ಮ್ಹಳ್ಳೆಂ ಸತ್. ಪುಣ್ ಮನ್ಶ್ಯಾ ಮತ್ ಮಾತ್ರ್ ಫಕತ್ತ್ ಚಿಂತ್ನಾಂಕ್ ಸೀಮಿತ್ ಜಾವ್ನ್ ಉರೊಂಕ್ ನಾ. ತಾಚ್ಯಾ ವಿಕಾಸಾಂತ್ ತಿ ಜಿತ್ಲೆಂ ವಾಸ್ತವಾ ತೆವ್ಶಿಂ ಆಸಾ ತಿತ್ಲೆಂಚ್ ಕಾಲ್ಪನಿಕ್ ತೆವ್ಶಿಂಯೀ ಆಸಾ. ಕಾಲ್ಪನಿಕಾಂತ್ ಭಗ್ಣಾಂತ್ ಚಡ್ ರಾಜ್ಯ್ ಕರ್ತಾತ್. ಹ್ಯಾ ವಾಸ್ತವ್ ಆನಿ ಕಾಲ್ಪನಿಕತಾಂತ್ ಮನ್ಶ್ಯಾ ಜಿವಿತ್ ಆನಿ ಆಶಾ-ಅತ್ರೆಗ್ ಮುಖಾಮುಖಿ ಜಾವ್ನ್ ರಾವ್ತಾನಾ ಹೊ ಸಂಬಂಧ್ ಮ್ಹಳ್ಳೊ ವೈಗ್ಯಾನಿಕ್ ವ್ಯಾಖ್ಯಾನಾಕ್ ಸೊಡುನ್ ವಿಗ್ಯಾನಾಭಾಯ್ರ್ ಪಾವ್ತಾ. ಮ್ಹಳ್ಯಾರ್ ಭಾವಾರ್ಥ್, ಭರ್ವಸೊ, ಪಾತ್ಯೆಣಿ, ಮಾಂದ್ಣಿ ಇತ್ಯಾದಿ. ತಶೆಂಚ್ ಹಾಂಗಾಸರ್ಯೀ.
ಅನ್ಭೋಗ್ ’ಅನುಭವ್’ ಆನಿ ಅನ್ಭೋಗ್ ’ಭಗ್ಣಾಂ’ ದೋನ್ಯೀ ವೆವೆಗ್ಳೆ ಸಬ್ಧ್. ಜೆದ್ನಾಂ ಹೆ ದೊನ್ಯೀ ಸಬ್ಧ್ ಎಕಾಮೆಕಾಕ್ ವಿಲೀನ್ ಜಾತಾತ್ ತೆದ್ನಾಂ ಹ್ಯಾ ವಿಲೀನ್ಪಣಾಂತ್ ಸಂಬಂಧ್ ಜಲ್ಮಾತಾ. ಹ್ಯಾ ಸಂಬಂಧಾಕ್ಯೀ ನಾಂವ್ ದಿಂವ್ಚೆಂ ಚಡ್ ಗರ್ಜೆಚೆಂ. ಹಾಂಗಾಸರ್ಯೀ ಹ್ಯಾ ಪದಾಂತ್ಲ್ಯಾ ನಾಯಕಾನ್ ಏಕ್ ಸಂಬಂಧ್ ಸೊಧ್ಲಾ. ತೊ ಸಂಬಂಧ್ ಫಕತ್ತ್ ಅನ್ಭೋಗಾವರ್ವಿಂ ಮಾತ್ರ್ ವಿವರಣ್ ದೀಂವ್ಕ್ ಜಾಯ್ನಾಂ ಯಾ ಫಕತ್ತ್ ಅನ್ಭೋಗಾವರ್ವಿಂ ಮಾತ್ರ್ ಪಿಂತ್ರಾಂವ್ಕ್ ಜಾಯ್ನಾಂ. ಹ್ಯಾ ಸಂಬಂಧಾಕ್ ಸಮ್ಜೊಂಕ್ ಜಿಣೀಯೆಚೆಂ ಕಾಮ್ ತಿತ್ಲ್ಯಾ ಸುಲಭಾಯೆಚೆಂ ನ್ಹಂಯ್. ಹ್ಯಾ ಪದಾಂತ್ ತಿ ಸಮ್ಜಣಿ ಆಸಾ. ಹೆಂಚ್ ಹ್ಯಾ ಪದಾಚೆಂ ವಿಶೇಷ್ ತ್ರಾಣ್ ವಾ ವಿಶೇಷತಾ.
ಹ್ಯಾ ಪದಾಂತ್ ಸಮ್ಜಣೆಕ್ ಸಮ್ಜೊಂಚಿ ಗರ್ಜ್ ’ಗೋ’ ಮ್ಹಳ್ಳ್ಯಾ ಸಬ್ಧಾಂನ್ ವ್ಯಕ್ತ್ ಕೆಲಾ. ’ಗೋ’ ಮ್ಹಳ್ಳ್ಯಾ ಹ್ಯಾ ದೊಡಾ ಅಕ್ಷರಾಚಾ ಸೊಭಾಯೆಂತ್ ಸಗ್ಳ್ಯಾ ಕವಿತೆಚೊ ತಶೆಂಚ್ ಅನ್ಭೋಗ್ ಆನಿ ಅನುಭವ್ ಮಧ್ಲೊ ಅನೋನ್ಯ್ ಬಾಂಧ್ ವ್ಯಕ್ತ್ ಜಾಲಾ. ಭೋವ್ಶಾ ಕೊಂಕ್ಣೆಚಾ ಪ್ರಸ್ತುತ್ ವಿಮರ್ಶಕಾಂನಿ ಹ್ಯಾ ಸಬ್ಧಾ ಪಾಟ್ಲ್ಯಾ ಸಂಬಂಧಾಕ್ ಸಮ್ಜಾಲ್ಲಿ ರೀತ್ ಉಗ್ತ್ಯಾ ಚಿಂತ್ಪಾಚಿ ಆಸೊಂಕ್ ಪುರೊ. ತೊ ತಾಂಚೊ ಖಾಸ್ಗಿ ಅನುಭವ್. ಖಾಸ್ಗಿ ಅನುಭವಾಕ್ ಘೆವ್ನ್ ಹಾಂವ್, ಹಾವೆಂ ಮಹಾನ್ ಮ್ಹಣೊನ್ ಲೆಖ್ಚಾ ಸಾಹಿತ್ಯಾಕ್ ಮ್ಹಜ್ಯಾ ಖಾಸ್ಗಿ ಅನ್ಭೋಗಾಚೊ ಸಾಡೊ ನ್ಹೆಸಯ್ತಾಂಂ. ಅಸೊಂ.
ಜಶೆಂ ಅನ್ಭೋಗ್ ಆನಿ ಅನುಭವ್ ಸಂಬಂಧ್ ರಚ್ತಾ ತಶೆಂಚ್ ಸಂಬಂಧ್ ಆನಿ ಪ್ರವೃತ್ತಿ ಜಿವಿತಾಂತ್ ವಿಚಾರಾಂಕ್ ಜಾಗಯ್ತಾತ್. ಹ್ಯಾ ವಿಚಾರಾಂಕ್ ಸ್ವಷ್ಟ್ ಕರ್ಚೊ ಸಬ್ಧ್ ಹಾಂವ್ ಹಾಂಗಾಸರ್ ’ಘಾಟ್’ ಮ್ಹಣೊನ್ ಮಾಂಧ್ತಾಂ. ಆತಾಂ ಹ್ಯಾ ಪದಾಕ್ ಅಧ್ಯಯನಾಕ್ ಘೆವ್ಯಾಂ, ಪಯ್ಲಿ ಪಂಗತ್;
’ಹಾಂವ್ ಯೆತಾಂಗೊ ಘಾಟಿ ದೆಂವೊನ್
ಮ್ಹಜ್ಯಾ ಮೊಗಾಚಾ ಗಾಂವಾಕ್ ಪಾಂವೊಂಕ್
ತುಜ್ಯಾ ದೊಳ್ಯಾಂಚಿಂ ದುಃಖಾಂ ಜಿರಂವ್ಕ್
ಹಾಂವ್ ಯೆತಾಂ ಧಾಂವೊನ್ ಧಾಂವೊನ್’
ಹ್ಯಾ ಪಂಗ್ತೆಂತ್ ’ಘಾಟ್’ ಸೊಡ್ಲ್ಯಾರ್ ದುಸ್ರಿ ಪ್ರಭಲ್ ಪ್ರತಿಮಾ ವ ಇಮಾಜ್ ನಾ. ಪುಣ್ ಸಂಬಂಧ್ ಆಸಾ. ಭಗ್ಣಾಂ ಆಸಾತ್. ಭಗ್ಣಾಂಚಿ ಅಭಿವ್ಯಕ್ತಿ ಆಸಾ. ಅಭಿವ್ಯಕ್ತಿಚಾ ಕ್ರಿಯೆಕ್ ಸ್ವಷ್ಟ್ ಪ್ರತಿಕ್ರಿಯಾ ಆಸಾ.
ಹ್ಯಾ ಭಗ್ಣಾಂಕ್ ಆನಿ ತಾಂಚಾ ಪ್ರತಿಕ್ರಿಯಾಕ್ ತಾತ್ಕಾಲಾಕ್ ಮ್ಹಳ್ಯಾರ್ ಆಮ್ಚ್ಯಾ ಅಧ್ಯಯನಾಚಾ ಪಯ್ಲ್ಯಾ ಭಾಗಾಂತ್ ಥೊಡ್ಯಾ ವೆಳಾಕ್ ಕಾಡುನ್ ದೆಗೆನ್ನ್ ದವರ್ಲೆಂ ಜಾಲ್ಯಾರ್ ಖಂಯ್ಚರ್ ತರ್ಯೀ ತ್ಯಾ ಘಾಟಿಯೆ ವಯ್ರ್ ಬಸೊನ್ ಆಪ್ಲ್ಯಾ ಸಂಬಂಧಾಂಕ್ ನಿಯಾಳ್ಚೊ ಹೊ ಕವಿತಾನಾಯಕ್ ಹ್ಯಾ ಘಾಟ್ ಮ್ಹಳ್ಳ್ಯಾ ಇಮಾಜೆಂತ್ ಏಖ್ ಪ್ರಭಲ್ ವಿಚಾರ್ ಜಾಗಯ್ನಾಂ? ಆಸೊಂ ಹ್ಯಾ ವಿಚ್ರಾಂಕ್ ಫುಡೆಂ ಪಳೆವ್ಯಾಂ.
ಆತಾಂ ಹ್ಯಾ ಪದಾಚಿ ಫುಡ್ಲಿ ಪಂಗತ್ ಪಳೆಲಿ ತರ್;
’ಯೇ ಮೊಗಾ ಯೇ ಮೊಗಾ ಮಂಗ್ಳುರಾಕ್
ಯೇ ಮೊಗಾ ಯೇ ಮೊಗಾ ಮಂಗ್ಳುರಾಕ್
ಯೇ ತುಜ್ಯಾ ಸೊಭೀತ್ ಶ್ಹೆರಾಕ್
ಆನಂದಾಚಾ ತುಜಾ ಘರಾಕ್’
ಹ್ಯಾ ಪಂಗ್ತೆಂತ್ ಹ್ಯಾ ಪದಾಂತ್ಲ್ಯಾ ನಾಯಕಾಚಾ ಸಂಬಂಧಾಚಾ ಭಗ್ಣಾಂಚಿ ಅಭಿವ್ಯಕ್ತಿ ವ್ಯಕ್ತ್ ಜಾಲ್ಯಾ. ಹ್ಯಾ ಅಭಿವ್ಯಕ್ತಿಕ್ ಹಾಂಗಾಸರ್ ಚಡ್ ಕಾಂಯ್ ಅಲಂಕಾರ್ ದೀಂವ್ಕ್ ನಾ ಜಾಲ್ಯಾರ್ಯೀ ಸೊಭಾಯೆಚಾ ಶ್ಹೆರಾಂತ್ ಆನಿ ಘರಾಚಾ ಆನಂದಾನ್ ಸ್ವಷ್ಟ್ ರಿತಿರ್ ಸಗ್ಳೊ ಅಲಂಕಾರ್ ವ್ಯಕ್ತ್ ಜಾಲಾ.
ಫುಡ್ಲಿ ಪಂಗತ್ ಪಳೆವ್ಯಾಂ;
’ಮಯ್ಲಾಂ ಮಯ್ಲಾಂ ಪಾಟ್ ಕರುನ್
ಧಾಂವ್ಲಿಂ
ಹಾಂವ್ ಯೆತಾಂ ಮುಕಾರ್ ಮುಕಾರ್ ತುಕಾ
ಧಾಂವ್ತೆಲಿಂ ತಿಂ ರೂಕ್ ಝಡಾಂ ಉಲಯ್ಲಿಂ
ತುಂ ರಾಕೊನ್ ಆಸಾಯ್ ಮ್ಹಣ್ ಮ್ಹಾಕಾ’
ಹಾಂಗಾಸರ್ ಹ್ಯಾ ಕವಿಚಾ ಅಭಿವ್ಯಕ್ತಿಚಿ ಶ್ಯಾಥಿ ಪಳೆಯಾ. ತಾಚ್ಯಾ ಹ್ಯಾ ಪದಾಂತ್ಲ್ಯಾ ನಾಯಕಾಕ್ ಮಯ್ಲಾಂ ಮಯ್ಲಾಂ ತಾಕಾ ಪಾಟ್ ಕರುನ್ ಧಾಂವ್ತಾತ್ ಆನಿ ವಾಟೆ ವಯ್ಲಿಂ ಧಾಂವ್ಚಿಂ ರೂಕ್ ಝಡಾಂ ತಾಚ್ಯೆಲಾಗಿಂ ಉಲಯ್ತಾತ್ ಮ್ಹಳ್ಳ್ಯಾಪರಿಂ ಭಗ್ತಾ. ಹೆಂ ಭಗಾಪ್ ತಾಚ್ಯಾ ಗಾಂವಾಂತ್ ತಾಚೆಂ ಕೊಣ್ ರಾಕೊನ್ ಆಸಾ ಮ್ಹಳ್ಳ್ಯಾಚಿಂ ಭಗ್ಣಾಂ ಉಚಾರ್ತಾತ್. ಹಾಕಾ ಹಾಂವ್ ಹಾಂಗಾಸರ್ ಅನುಭವ್ ಮ್ಹಣ್ತಾಂ. ಏಕ್ ಸುಂದರ್ ಅನುಭವ್. ತ್ಯಾ ಘಾಟಿಯೆಕ್ ಪಾಟ್ ಕರುನ್ ದೆಂವೊನ್ ಯೆತಾನಾ ಜಾಂವ್ಚೊ, ಹ್ಯಾ ಪದಾಂತ್ಲ್ಯಾ ನಾಯಕಾಚೊ ಏಕ್ ಸುಂದರ್ ಅನುಭವ್.
ಫುಡ್ಲಿ ಪಂಗತ್ ಪಳೆಯಾ;
’ಅತ್ರೆಗಾಚಿ ತಿ ಘಡಿ ನಿಯಾಳ್ತಾಂ
ಭೆಟ್ ಮ್ಹಜಿ ತುಜಿ ಜಾತಾಸ್ತಾನಾ
ಮೇಟ್ ಮ್ಹಜೆಂ ಮ್ಹಜ್ಯಾ ಗಾಂವಾಂತ್ ದವರ್ತಾಂ
ಹಾಂವ್ ಪಾಟಿಂ ಪಳೆನಾಸ್ತಾನಾ.’
ಚ್ಯಾರ್ ದೊಳೆ, ಏಕ್ ದಿಷ್ಟಿಕ್ ರಾಕೊನ್ ರಾವ್ಲ್ಲಿ ಘಡಿ ಮ್ಹಳ್ಯಾರ್ ಹಾಂಗಾಸರ್ ಸ್ವಷ್ಟ್ ಅನ್ಭೋಗ್ ದಿಸ್ತಾ. ಆದಿಂ ಸಾಂಗಾತ್ ಸಾಂಡುನ್ ಗೆಲ್ಲಿಂ ತುಟ್ಲೆಲಿ ದೀಷ್ಟ್ ಆಜ್ ಪರ್ತ್ಯಾನ್ ಏಕ್ ಜಾಂವ್ಚಾ ವಗ್ತಾಂ ಜಾಂವ್ಕ್ ಆಸ್ಚಾ ತಾಂಚಾ ಭೆಟೆಕ್ ಚಿಂತುನ್ ಅನ್ಭೋಗಾಚಾ ದರ್ಯಾಂತ್ ಅನ್ಭೋಗಾಚಾ ಲ್ಹಾರಾಂನಿ ಉಪ್ಯೆತಾ.
ಹಾವೆಂ ಪಯ್ಲೆಂಚ್ ಸಾಂಗ್ಲ್ಲೆಪರಿಂ ಅನ್ಭೋಗ್ ಆನಿ ಅನುಭವ್ ಏಕ್ ಜಾತಾನಾ ಮಾತ್ರ್ ಸಂಬಂಧ್ ಉಭ್ಜಾತಾ. ಅನುಭವ್ ಜಾಯ್ನಾತ್ಲ್ಲೊ ಅನ್ಭೋಗ್ ಕ್ಷಣಿಕ್. ಹ್ಯಾ ಅನ್ಭೋಗಾಂತ್ ಸಂಬಂಧ್ಯೀ ಕ್ಷಣಿಕ್. ತೊ ಬಾಳ್ವನಾ ಪುಣ್ ಪದಾಂತ್ ಸಂಬಂಧಾಚೊ ಗಾಂಚ್ ಥಿರ್ ಆಸ್ಲಲೊ ದಿಸ್ತಾ.
ಹ್ಯಾ ಥಿರಾಸಣೆಕ್ ಪಳೆಂವ್ಚೆಂ ತರ್;
’ಹಾಂವ್ ಯೆತಾಂಗೊ ಘಾಟಿ ದೆಂವೊನ್
ತುಜ್ಯಾ ದೊಳ್ಯಾಂಚಿಂ ದುಃಖಾಂ ರಾವಂವ್ಕ್
ಹಾಂವ್ ಪಾಟಿಂ ಪಳೆನಾಸ್ತಾನಾ.’
ಅನ್ಭೋಗ್ ಆನಿ ಅನುಭವ್ ಎಕಾ ಸಂಬಂಧಾಕ್ ಘಟ್ ಕರ್ಚಾಂತ್ ಕಿತ್ಲೊ ಮಹತ್ವಾಚೊ ಪಾತ್ರ್ ಖೆಳ್ತಾತ್ ಮ್ಹಣೊನ್ ಹಾಂಗಾಸರ್ ಕಳ್ತಾ. ಸಂಬಂಧ್ ತೊ ಕಸಲೊಯ್ ಜಾಂವ್. ತಾಚೆಂ ರೂಪ್ ಕಸಲೆಂಯ್ ಜಾಂವ್. ಹ್ಯಾ ಪದಾಂತ್ ಸಾಂಗ್ಚೆಂ ತರ್, ಆಪ್ಲ್ಯಾ ಮೊಗಾಕ್ ಗಾಂವಾಂತ್ ಸಾಂಡುನ್ ಘಾಟ್ ಉತ್ರೊನ್ ಗೆಲ್ಲ್ಯಾ ಹ್ಯಾ ಗಿತಾಂತ್ಲ್ಯಾ ನಾಯಕಾನ್ ಅರ್ಥ್ ದಿಲ್ಲೊ ಸಂಬಂಧ್. ಸಂಬಂಧ್ ಆನಿ ಪ್ರವ್ರತ್ತಿ ಮೆಳೊನ್ ವಿಚಾರಾಂಕ್ ಜಾಗಯ್ತಾತ್ ದೆಕುನ್ ಹಾಂಗಾಸರ್ ಪಯ್ಸಲ್ ಆಸಾ. ಹಾಂಗಾಸರ್ ಹ್ಯಾ ಪದಾಂತ್ಲೊ ನಾಯಕ್ ನಿರ್ಣಾಯಕ್ ಜಾಲಾ.
ಹ್ಯಾ ತಾಚ್ಯಾ ನಿರ್ಣಯಾಕ್ ಪ್ರಮುಖ್ ಕಾರಾಣ್ಚ್ ಯೆದೊಳ್ ಆಮಿ ಅಧ್ಯಯನ್ ಕೆಲ್ಲೊ ತೊ ಸಂಬಂಧ್. ಹ್ಯಾ ಸಂಬಂದಾಚೆಂ ರೂಪ್ ಕಸಲೆಂ ಮ್ಹಳ್ಲೆಂ ತೆಂ ತಿತ್ಲ್ಯಾ ಮಹತ್ವಾಚೆಂ ನ್ಹಂಯ್. ಪುಣ್ ಹ್ಯಾ ಸಂಬಂಧಾಚೆಂ ಜಯ್ತ್ ಆನಿ ಸಲ್ವಣ್ ಮ್ಹಳ್ಯಾರ್ ಖಂಯ್ ಆನಿ ಕಶೆಂ ಮ್ಹಳ್ಳೆಂ ತೆಂ ಸಮ್ಜೊಂಚೆಂ ಚಡ್ ಗರ್ಜೆಚೆಂ.
ಆಪ್ಲ್ಯಾ ಗಾಂವ್ಚಾ ಸೊಭಾಯೆಕ್, ತಿಚ್ಯಾ ಸಂಸ್ಕೃತೆಕ್, ಯಾ ಆಪ್ಲ್ಯಾಚ್ ಮೊಗಾಕ್ ಸಾಂಡುನ್ ಹೊ ಆಯ್ಚೊ ನಾಯಕ್ ಘಾಟ್ ಉತ್ರೊನ್ ಗೆಲಾ ಮ್ಹಳ್ಯಾರ್ ಥಂಯ್ಚರ್ ತ್ಯಾ ತಾಚ್ಯಾ ಸಂಬಂಧಾಂತ್ ಕಿತೆಂ ತರ್ಯೀ ಉಣೆಂಪಣ್ ಆಸಾ. ಜಾಂವ್ ತೆಂ ಸಾಮಾಜಿಕ್, ಆರ್ಥಿಕ್ ವಾ ನೈತಿಕ್ ಯಾ ಕಸಲೆಂಯ್ ಉಣೆಂಪಣ್ ಜಾವ್ಯೆತಾ. ಹ್ಯಾ ವೆಳಾರ್ ಹ್ಯಾ ಉಣ್ಯಾಪಣಾಕ್ ಭರ್ತಿ ಕರುನ್ ಘೆಂವ್ಕ್ ’ಯೇ ಯೇ ಯೇ ಯೇ ಬೊಂಬಯ್’ (ಕವಿಚೆಂ ಅನ್ಯೇಕ್ ಲೊಕಾಮೊಗಾಳ್ ಪದ್). ಮ್ಹಳ್ಳ್ಯಾ ಪರ್ಕಿ ತಾಳ್ಯಾನ್ ತಾಕಾ ಸಾಂಗಾತ್ ದಿಲಾ ಆನಿ ಹ್ಯಾ ನಾಯಕಾನ್ ತ್ಯಾ ಸಾಂಗಾತಾಕ್ ಆಪ್ಲ್ಯಾ ಪರಿಗತೆಕ್ ಹೊಂದ್ವೊನ್ ಮಾಂಡುನ್ಯೀ ಘೆತ್ಲಾ.
ಹಾಂಗಾಸರ್ಯೀ ಫಯ್ಸಲ್/ನಿರ್ಣಯ್ ಆಸಾ ಪುಣ್ ತೆಂ ನಖ್ಖೆಂ ನ್ಹಂಯ್. ಹ್ಯಾ ನವ್ಯಾ ಸಂಬಂಧಾಚಿ ಗರ್ಜ್ ಆಸಾ ಪುಣ್ ಹೆಂಚ್ ಅಖ್ರೇಚೆಂ ನ್ಹಂಯ್. ಕಿತ್ಯಾಕ್ ಮ್ಹಳ್ಯಾರ್ ತಾಚ್ಯಾ ತ್ಯಾ ಪಯ್ಲ್ಯಾ ಸಂಬಂಧಾಂತ್ ತಾಣೆಂ ಘೆತ್ಲ್ಲೊ ಅನ್ಭೋಗ್ ಆನಿ ಭೊಗ್ಲ್ಲೊ ಅನುಭವ್ ತಾಚ್ಯಾ ಪ್ರವ್ರತ್ತಿ ವಯ್ರ್ ರಾಜ್ ಕರ್ತಾ ಆನಿ ಅಶೆಂ ತೊ ಸಂಬಂಧ್ ಘಟ್ ಆಸಾ. ಹ್ಯಾಚ್ ಖಾತಿರ್ ಹ್ಯಾ ನಾಯಕಾಕ್ ಆತಾಂ ಹ್ಯಾ ಘಾಟಿಯೆವಯ್ರ್ ’ಯೇ ಮೊಗಾ ಮಂಗ್ಳುರಾಕ್’ ಮ್ಹಣೊನ್ ಆಪಯಿಲ್ಲೆಂ ಆಯ್ಕತಾ. ಆನಿಂ ಆತಾಂ ಹಾಂಗಾಸರ್ ಉಭ್ಜಾತಾ ಸಂಘರ್ಷ್. ಹೊ ಸಂಘರ್ಷ್ ದೋನ್ ಮನಾಂ ಮಧ್ಲೊ ಜಾವ್ಯೆತ್. ದೋನ್ ಪ್ರವ್ರತ್ತಿಂ ಮಧ್ಲೊ ಜಾವ್ಯೆತ್ ಯಾ ದೋನ್ ಮನ್ಶ್ಯಾಂ ಮಧ್ಲೊ ವಾ ದೋನ್ ಸಮಾಜೆ ಮಧ್ಲೊ ಜಾವ್ಯೆತ್. ಹೆಂ ತ್ಯಾ ನಾಯಕಾಚಾ ಆಧ್ಲ್ಯಾ ಸಂಬಂಧಾ ಆನಿ ಆತಾಂಚಾ ನವ್ಯಾ ಸಂಬಂಧಾ ಮಧ್ಲ್ಯಾ ಜಿವಿತಾರ್ ನಿರ್ಭರ್ ಜಾವ್ನ್ ಆಸ್ತಾ. ಆತಾಂ ಹೊ ಸಂಘರ್ಷ್ ಎಕಾ ವಿಂಚವ್ಣೆಚೊ. ಸ್ವಷ್ಟ್ ವಿಂಚವ್ಣೆಚೊ ಮ್ಹಳ್ಯಾರ್ ನಿರ್ಣಯಾಚೊ. ಹ್ಯಾ ಸಂಘರ್ಷಾಂತ್ ಖಂಯ್ಚೊ ಅನ್ಭೋಗ್ ಆನಿ ಅನುಭವ್ (ಮ್ಹಳ್ಯಾರ್ ನವ್ಯಾ ಆನಿ ಪರ್ನ್ಯಾ ಸಂಬಂಧಾಚೊ) ಚಡ್ ಭಳಾಧಿಕ್ ಆಸಾ ತ್ಯಾ ಕುಶಿನ್ ಜಯ್ತ್ ವಾ ಜಯ್ತ್ ಸಾಂಗಾತ್ ದಿತಾ. ಹಾಂಗಾಸರ್ಯೀ ಹ್ಯಾ ಜಯ್ತಾಚೆಂ ದರ್ಶನ್ ’ಹಾಂವ್ ಯೆತಾಂಗೊ ಘಾಟಿ ದೆಂವೊನ್’ ಮ್ಹಳ್ಳ್ಯಾ ಉತ್ರಾಂನಿ ಸ್ವಷ್ಟ್ ದಿಸ್ತಾ. ಪುಣ್ ಆತಾಂಚಾ ನಿರ್ಣಯಾಕ್ ಅಂತಿಮ್ ನಿರ್ಣಯ್ ಮ್ಹಣೊನ್ ಕಶೆಂ ಸಾಂಗ್ಚೆಂ.
’ಮೇಟ್ ಮ್ಹಜೆಂ ಮ್ಹಜ್ಯಾ ಗಾಂವಾಂತ್ ದವರ್ತಾಂ
ಹಾಂವ್ ಪಾಟಿಂ ಪಳೆನಾಸ್ತಾನಾ.’
ಖರೆಂಚ್ ಅಂತಿಮ್ ನಿರ್ಣಯ್. ಹ್ಯಾ ಆಯ್ಚ್ಯಾ ನಿರ್ಣಯಾಂತ್ ಯಾ ವಿಂಚವ್ಣೆಂತ್ ದೋನ್ ಮನಾಂ ಮಧ್ಲೊ. ದೋನ್ ಕಾಳ್ಜಾಂ ಮಧ್ಲೊ ಆನಿ ದೋನ್ ಕುಡಿ ಮಧ್ಲೊ ಅನ್ಭೋಗಾನ್ ಆನಿ ಅನುಭವಾನ್ ಜೊಡ್ಲ್ಲೊ ಸಂಬಂಧ್, ’ಸಂಬಂಧ್’ ಮ್ಹಳ್ಳ್ಯಾ ದರ್ಯಾಚಾ ಕ್ಷಿತಿಜಾರ್ ಪಾವ್ಲಾ. ಅಶೆಂ ಸಂಬಂಧಾಚೆಂ ಮೋಲ್, ವರ್ತ್ಮಾನಾಂತ್ ಪ್ರಸ್ತುತ್ ಸಮಾಜೆಕ್ ಪ್ರತ್ಯಕ್ಷ್ ರುಪಾನ್ ದಾಖಯ್ತಾನಾ ಹ್ಯಾ ಸಂಬಂಧಾಕ್ ನೆಣಾಂ ಆಸ್ಲ್ಲ್ಯಾಂಚಿಂ ಕಾಳ್ಜಾಂ ಮನಾಂ ಪರೋಕ್ಷ್ಪಣಿಂ ಜಾಗಯ್ತಾ.
ಹೆಂ ವಯುಕ್ತಿಕ್ ರುಪಾನ್ ಜಾಲ್ಯಾರ್ ಜೆರಾಲ್ ರುಪಾನ್ಯೀ ಹೊ ಆಯ್ಚೊ ನಾಯಕ್ ಹಾಂಗಾಸರ್ ಸಮಾಜೆಚಾ ಮಧೆಂ ಜಿಯೆಂವ್ಚಾ ಮನ್ಶ್ಯಾಂ ಮಧ್ಲೊ ಸಂಬಂಧ್ ಕಸಲೊ ಮ್ಹಳ್ಳೆಂ ತೆಂ ಜಾಗಂವ್ಚೆಂ ಪ್ರಯತ್ನ್ ಕರ್ತಾ. ಹೆಂ ಪ್ರಯತ್ನ್ ಪ್ರತ್ಯಕ್ಷ್ಪಣಿಂ ನ್ಹಂಯ್ ಬಗಾರ್ ಪರೋಕ್ಷ್ಪಣಿ ಮ್ಹಣೊನ್ ಹಾಂವ್ ಮಾಂಧ್ತಾಂ. ಹ್ಯಾ ಪರೋಕ್ಷ್ಪಣಾಕ್ ಸಾಹಿತ್ಯಾಚಾ ಅಧ್ಯಯನಾಚಿ ಅಭಿರುಚಿ ಆಸ್ಲ್ಲ್ಯಾ ಸರ್ವಾಂನಿ ಸ್ವೀಕಾರ್ ಕರುಂಕ್ಚ್ ಜಾಯ್ ಮ್ಹಣೊನ್ ನಾ. ಪುಣ್ ಜಶೆಂ ಹರ್ಯೆಕಾ ಕ್ರಿಯೆಚಿ ಪ್ರತಿಕ್ರಿಯಾ ಆಸಾ ತಶೆಂಚ್ ಹರ್ಯೆಕಾ ಪ್ರತ್ಯಕ್ಷ್ ವಿಚಾರಾಚೆ ಪರೋಕ್ಷ್ ವಿಚಾರ್ಯೀ ಆಸಾತ್.
ಹ್ಯಾ ಅಧ್ಯಯನಾಂತ್ ಹಾವೆಂ ಪಯ್ಲೆಂಚ್ ಸಾಂಗ್ಲ್ಲೆಪರಿಂ ’ಘಾಟ್’ ಮ್ಹಳ್ಳ್ಯಾ ಸಬ್ಧಾಚಾ ಪಾಟ್ಲ್ಯಾನ್ ಮ್ಹಜ್ಯಾ ಅನ್ಭೋಗಾ ಫರ್ಮಾಣೆ ಏಕ್ ಪ್ರಭಲ್ ವಿಚಾರ್ ಆಟಾಪ್ಲಾ. ಹೊಫಕತ್ತ್ ಮ್ಹಜೊ ಅನ್ಭೋಗ್ ಮಾತ್ರ್ ನ್ಹಂಯ್ ಹ್ಯಾ ಅನ್ಭೋಗಾಕ್ ಹಾವೆಂಯೀ ಅನುಭವ್ ಕೆಲಾ.
’ಹಾಂವ್ ಯೆತಾಂಗೊ ಘಾಟಿ ದೆಂವೊನ್’
ಹಾಂಗಾಚೊ ಕವಿತಾನಾಯಕ್ ಘಾಟ್ ದೆಂವೊನ್ ಯೆತಾ ಮ್ಹಳ್ಯಾರ್ ಆಮ್ಚಾ ಕೊಂಕಣಾಕ್ ಘಾಟ್ ದೆಂವೊನ್ ಯೆಂವ್ಚಾ ಸಭಾರ್ ’ಘಾಟಿ’ ಮನ್ಶ್ಯಾಂಪರಿಂ. (ಹಾಂಗಾಸರ್ ಹಾವೆಂ ಹೊ ಸಬ್ಧ್ ಉಪ್ಯೋಗ್ಸಿಲ್ಲ್ಯಾಕ್ ಮಾಫಿ ಆಸೊಂ). ಮಂಗ್ಳುರ್ಚಾ ಕೊಂಕಣಾಂತ್ ಹೊ ’ಘಾಟಿ’ ಮ್ಹಳ್ಳೊ ಸಬ್ಧ್ ಆಯ್ಕೊಂಕ್ ಮೆಳಾನಾ ತರ್ಯೀ ಗೊಂಯ್ಚಾ ಕೊಂಕಣಾಂತ್ ಹೊ ಸಬ್ಧ್ ಚಡ್ ಪ್ರಚಲಿತ್. ಆನಿ ಚಡ್ ಹಿಣ್ಸಾಣೆಚೊ). ಕೊಣ್ ಕೊಂಕಣಾಕ್ ಪರ್ಕಿ ಜಾವ್ನ್ ಯೆತಾ ಜಾಲ್ಯಾರ್ ಕೊಣ್ ಹಾಂಗಾಚೊ ಆಪ್ಲೊ ಪರ್ಕಿ ಜಾಲ್ಲೊ ಆಪ್ಲೊ ಜಾವ್ನ್ ಯೆತಾ. ಜಶೆಂ ಆಮ್ಚಾ ಕೊಂಕಣಾಂತ್ಲೆ ಮನಿಸ್ ಘಾಟ್ ಚಡೊನ್ ಪರ್ಕಿ ಗಾಂವಾಕ್ ವೆತಾತ್ ತಶೆಂ, ತೆ ಘಾಟಿ ಘಾಟ್ ದೆಂವೊನ್ ಆಮ್ಚಾ ಕೊಂಕಣಾಕ್ ಪಾಂಯ್ ದವರ್ತಾತ್ ತರ್ ಹಾಂಗಾಸರ್ ಕೋಣ್ ಘಾಟಿ. ಮ್ಹಜ್ಯಾ ಗಾಂವಾಂತ್ ಮ್ಹಾಕಾ ತೆ ಘಾಟಿ. ತಾಂಚಾ ಗಾಂವಾಂತ್ ತಾಂಕಾಂ ಹಾಂವ್ ಘಾಟಿ.
ಹ್ಯಾ ವಗ್ತಾಂ ಮ್ಹಾಕಾ ಫಾಮಾದ್ ಕೊಂಕ್ಣಿ ಕವಿ ಮಾ|ಪ್ರತಾಪ್ ನಾಯ್ಕ್ ಹಾಚೆಂ ಕವಿತಾ ’ಘಾಟಿ’ ಉಡಾಸಾಕ್ ಯೆತಾ. ಹ್ಯಾ ಕವಿತೆಕ್ ಆನಿ ಆಯ್ಚಾ ಅಧ್ಯಯನಾಕ್ ಘೆತ್ಲೆಲ್ಯಾ ಕವಿತೆಕ್ ಕಾಂಯ್ ಸಂಬಂಧ್ ನಾಂ. ಮಾ|ಪ್ರತಾಪಾಚೆಂ ಕವಿತಾ ವಿಚಾರಾಂನಿ ಪ್ರಭಲ್ ಆಸಾ ಜಾಲ್ಯಾರ್ ಹೆಂ ವಿಲ್ಫಿ ರೆಬಿಂಬಸಾಚೆಂ ಗೀತ್ ಸಂಬಂಧಾಂತ್ ಪ್ರಭಲ್ ಆಸಾ.
ಹ್ಯಾ ಕವಿತೆಂತ್ಲ್ಯಾ ನಾಯಕಾನ್ ಘಾಟಿ ದೆಂವೊನ್ ಯೆತಾನಾ ಗಾಂವ್ಚೆಂ ಹೆಂ ಗೀತ್ ತಾಚ್ಯಾ ಮಾಂಯ್ಗಾಂವ್ಚಾ ಮೊಗಾಕ್ ತಾಚ್ಯಾ ಮೊಗಾಚಾ ಸೊಭಾಯೆಕ್, ತಾಚ್ಯಾ ಸಂಸ್ಕೃತೆಕ್ ಮೆಳೊಂಕ್ ಯೆಂವ್ಚೆಂ ತೆಂಯೀ ಎಕಾ ನಿರ್ದಿಷ್ಟ್ ನಿರ್ಣಯಾಂತ್ ಮ್ಹಣ್ತಾನಾ ಹೆಂ ಖಂಯ್ ನಾ ಖಂಯ್ ಆಮಿಂ ಘಾಟ್ ಚಡೊನ್ ಯೆಂವ್ಚಾಪರಿಂ ತಾಣಿಂ ಘಾಟಿ ದೆಂವೊನ್ ಯೆಂವ್ಚೆಂ ಹಿ ಚಡ್ಣಿ ಆನಿ ದೆಂವ್ಣಿಂ ಮನ್ಶ್ಯಾ ಜಿವಿತಾಚಿ ವಾಟ್. ಹ್ಯಾ ವಾಟೆರ್ ಸಗ್ಳ್ಯಾಂನಿ ಚಡೊಂಕ್ ಆಸಾ ತಶೆಂಚ್ ದೆಂವೊಂಕ್ಯೀ ಆಸಾ. ಚಡ್ಣಿ ನಾಸ್ತಾನಾ ತ್ಯಾ ದೆಂವ್ಣೆಕ್ಯೀ ಅರ್ಥ್ ನಾ. ಅಶೆಂ ಅರ್ಥ್ ನಾತ್ಲ್ಲ್ಯಾ ಜಿವಿತಾಂತ್ ಸಂಬಂಧಾಚೊ ಮಹತ್ವ್ಯ್ ಕಾಂಯ್ ನಾ. ಅಶೆಂ ಹಾಂವ್ ಮಾಂಧ್ತಾಂ.
ಸಾಹಿತ್ಯ್ ಕಸಲ್ಯಾಯ್ ಪ್ರಕಾರಾಚೆಂ ಜಾಂವ್, ತ್ಯಾ ಸಾಹಿತ್ಯಾಂತ್ ವಿಚಾರಾಂಕ್ ಸೊಧ್ಚೊಚ್ ಮ್ಹಜೊ ಹವ್ಯಾಸ್. ಹೊಚ್ಚ್ ಹವ್ಯಾಸ್ ಹೆರಾಂಕ್ಯೀ ಆಸೊಂಕ್ ಜಾಯ್ ಮ್ಹಣೊನ್ ಭಿಲ್ಕುಲ್ ನಾ. ತೊ ತಾಂಚೊ ಖಾಸ್ಗಿ ವಿಶಯ್. ಪುಣ್ ಸಾಹಿತ್ಯ್ ಮ್ಹಳ್ಯಾರ್ ಖಾಸ್ಗಿ ಭಿಲ್ಕುಲ್ ನ್ಹಂಯ್. ತೆಂ ವಯಕ್ತಿಕ್ ಅನುಭೂತಿ, ಅನ್ಭೋಗಾಚಿ ಅಭಿವ್ಯಕ್ತಿ ಜೆರಾಲ್ ಸಮಾಜ್ ಸಂಬಂಧ್ ಜೊಡ್ತಾ.
ಜಶೆಂ ಹೆಂ ಪದ್. ಹೆಂ ಪದ್ಯೀ ಆಪ್ಲ್ಯಾ ಸಂಬಂಧಾಕ್ ಜೆರಾಲ್ ಸಮಾಜೆಸವೆಂ ವಾಡಂವ್ಚಾಂತ್ ಜಯ್ತೆವಂತ್ ಜಾಲಾಂ. ಹಾಕಾ ಹೆಂಯೀ ಪ್ರಮುಖ್ ಕಾರಾಣ್ ಜಾಂವ್ಕ್ ಪುರೊಕೀ ಹೆಂ ಪದ್ ಫಕತ್ತ್ ಎಕಾ ಮುಖಾಕ್ ಮಾತ್ರ್ ಮ್ಹಳ್ಯಾರ್ ವರ್ತ್ಮಾನಾಕ್ ಮಾತ್ರ್ ಪ್ರಸ್ತುತ್ ಕರ್ತಾ. ಹ್ಯಾ ಪದಾಚೆಂ ಅತೀಥ್ ಆನಿ ಭವಿಶ್ಯತ್ ಹ್ಯಾ ಪದಾಂತ್ಲ್ಯಾ ನಾಯಕಾಚೆರ್ ಕಸಲೊ ಪರಿಣಾಮ್ ಘಾಲುಂಕ್ ಸಕ್ತಾ ಮ್ಹಳ್ಳೊ ಉಲ್ಲೇಕ್ ನಾ. ಹ್ಯಾ ಪದಾಕ್ ಅಭಿವ್ಯಕ್ತ್ ಕೆಲ್ಲ್ಯಾ ಕೊಂಕಣಾಚಾ ಕವಿ ಬಾಬ್ ವಿಲ್ಫಿ ರೆಬಿಂಬಸಾಚಾ ಲಿಖ್ಣೆ ಥಾವ್ನ್ ಫುಡಾರಾಕ್ ಸಾಹಿತ್ಯಾಚೊ ವ್ಹಾಳೊ ಅಸೊಚ್ ವ್ಹಾಳೊಂದಿ ಮ್ಹಣೊನ್ ತಾಕಾ ಸರ್ವ್ ಬರೆಂ ಮಾಗ್ತಾನಾ ಹ್ಯಾ ಅಧ್ಯಯನಾಚಾ ಲೇಖನಾಕ್ ಪ್ರಸ್ತುತ್ ಕರುಂಕ್ ಆವ್ಕಾಸ್ ದಿಲ್ಲ್ಯಾ ತುಮ್ಕಾಂ ದೇವ್ ಬರೆಂ ಕರುಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.