ಕವಿತಾकविताPoem
ನಿಡ್ಡೋಡಿಚಾ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತಿಂತೆರಾಂತ್ ಪಿಂತುರ್
ಪಿಂತುರ್ - 6
ವಿಶಯ್: ಪಾವ್ಸ್ ಆನಿ ಧಗ್
ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ
ಫುಟೊನ್ ಗೆಲ್ಲಿ ಧರ್ತಿ ಎಕಾ ಥೆಂಬ್ಯಾ ಉದ್ಕಾಕ್ ಆಶೆತಾ, ಜಶೆಂ ವಾಂಜೆಲಾಂತ್, ಕುರಾನಾಂತ್ ಯಾ ವೇದಾಂತ್ ಆಮ್ಕಾಂ ವಾಚುಂಕ್ ಮೆಳ್ತಾ. ಪರ್ನ್ಯಾ ಸೊಲ್ಲ್ಯಾಂತ್ ಹ್ಯಾಚ್ಚ್ ಉದ್ಕಾಖಾತಿರ್ ಮೊಯ್ಜೆನ್ ಅಪ್ಲಿ ಭೆತ್ಕಾಟಿ ಉಭಾರ್ಲಿ ಆನಿ ಎಕಾ ಖಡ್ಪಾಕ್ ಮಾರುನ್ ಉದ್ಕಾ ಝರ್ ಉಟಾಶೆಂ ಕೆಲ್ಲಿ ಕಾಣಿ ಪರ್ನಿ. ಹಿ ಭುಂಯ್ ಸುಕಿದಾಡೆಂತ್ ಹ್ಯಾ ಉದ್ಕಾತ್ ಅಶೆಂಯ್ ಲಾಲೆತಾ ಮ್ಹಳ್ಯಾರ್ ಜಿಯೆಂವ್ಚಿ ಎಕೆಕ್ ಜಿವಿ ಸಯ್ತ್ ಹ್ಯಾ ಉದ್ಕಾಕ್ ತಾನೆತಾ.
ಹ್ಯಾ ಮಯ್ನ್ಯಾಚೆಂ ಪಿಂತುರ್ ಆನಿ ಲಗ್ತಿ ಜಾಲ್ಲೊ ವಿಶಯ್ ’ಪಾವ್ಸ್ ಆನಿ ಧಗ್’ ಖರೆಂಚ್ ಸಭಾರ್ ಕವಿಂಕ್ ಖರ್ಶೆಂವ್ಕ್ ಕರ್ತಾ. ಪುಣ್ ಕವಿ ಧಯ್ರಾಧಿಕ್ ಜಾವ್ನ್ ಜಿಕೊನ್ ಯೆತಾನಾ ಕವಿತಾ ಖರಿಂಚ್ ಸೊಭ್ತಾತ್.
ಹ್ಯಾ ಪಿಂತುರಾಂನಿ ಸ್ವಪ್ಣಾಂಚೊ ವ್ಹೊರ್ ಆಸಾ ಮ್ಹಣ್ ಸಭಾರ್ ಕವಿಂನಿ ವೊಪುನ್ ಘೆತ್ಲಾಂ. ಕೊಣಾಕ್ ಹೆಂ ಪಿಂತುರ್, ರಾಜ್ಕಪೂರಾಚಾ ಶ್ರೀ 420 ಫಿಲ್ಮಾಂತ್ ಪಿಂತ್ರಾಯಿಲ್ಲ್ಯಾ ’ಪಾವ್ಸಾಕ್ ಎಕಾ ಸತ್ರೆಪಂದಾ ರಾಜ್ಕಪೂರ್ ಆನಿ ನರ್ಗಿಸ್ ದತ್ತ್ ಬಿಜೊನ್ - ಪ್ಯಾರ್ ಹುವಾ... ಮ್ಹಳ್ಳೆಂ ಮೊಗಾಚೆಂ ಪದ್ ಸಾಂಗ್ಚೆಂ ಅಪೂರ್ವ್ ದೃಶ್ಯಾಚೊ ನಿಯಾಳ್ ಕರುನ್ ದಿತಾ’. ಕವಿ ಆಸ್ಟಿನ್ ಪ್ರಭುಕ್ ಕಿತ್ಯಾಕ್ಗಿ ಹೆಂ ಚಿತ್ರಣ್ ಭೋವ್ ರೋಮ್ಯಾಂಟಿಕ್ ದಿಸೊನ್ ಯೆತಾನಾ ಕವಿಚಾ ಭಿತರ್ಲ್ಯಾ ಸೊಭಾಯೆಕ್ ಗೊವಾಯ್ ದಿತಾ. ಪಿಂತುರಾಂಚೊ ವಿಶಯ್ ಜಿತ್ಲೊ ಗಂಭೀರ್ಗೀ, ಕವಿ ತಿತ್ಲೆಂಚ್ ಮೊವಾಳಾಯೆನ್ ವಾಚ್ಪ್ಯಾಕ್ ಕುಚುಲ್ಯೊ ಕರುಂಕ್ ಪ್ರೇತನ್ ಕರ್ಚೆಂ ದಿಸೊನ್ ಯೆತಾ. ಖರೊ ಕಲಾಕರ್ ಹೊಚ್ಚ್ ನ್ಹಯ್ಗಿ? ಖುದ್ದ್ ಅಪುಣ್ ಜಾವ್ನ್ ದುಃಖ್ ಭೊಗುನ್ ಹೆರಾಂಕ್ ಹಾಸಂವ್ಕ್ ಪ್ರೇತನ್ ಕರ್ಚೊ?
ಕವಯತ್ರಿ ವಾಯ್ಲೆಟ್ ಜೆ. ಪಿರೇರಾಚೆಂ ಕವಿತಾ ಎಕಾ ಪ್ರಥ್ವಿಚೆಂ ರುದಾನ್ ಭೋವ್ ಸೊಭಿತ್ ರಿತಿನ್ ವೆಕ್ತ್ ಕರ್ತಾನಾ. ಕವಿಚಿಂ ಎಕೆಕ್ ಸ್ವಪ್ಣಾಂ ಹ್ಯಾ ಪಾವ್ಸಾನ್ ಹುಮ್ಟುನ್ ವೆಲ್ಲಿಂ ದಿಸೊನ್ ಯೆತಾತ್.
ಕವಯತ್ರಿ ಪ್ರಿಯಾ ಸಿಕ್ವೇರಾಚೆಂ ಪಯ್ಲೆಂ ಕವಿತಾ ಥೊಡ್ಯಾಚ್ ಉತ್ರಾಂಚೆಂ ತರ್ಯ್ ಮನಿಸ್ ಭಾಯ್ಲೆ ದೆಖಿಕ್ ಸೊಭಿತ್ ದಿಸೊಂಕ್ ಕಸಲೆ ಸರ್ವ್ ವೇಸ್ ಘೆತಾ, ಪುಣ್ ಭಿತರ್ಲೆ ಭಿತರ್ ವಿದ್ರೂಪ್ ಆಸೊನ್ ಸರ್ವ್ ಥರಾಂಚೆ ಕುಸಾಡಾಯೆನ್ ಜಿಯೆತಾ ಆನಿ ಹ್ಯಾ ಕುಸಾಡಾಯೆಕ್ ನಿತಳ್ ಕರುಂಕ್ ಪಾವ್ಸ್ ದೀಂವ್ಕ್ ಉಲೊ ದಿತಾ, ದುಸ್ರೆ ಕವಿತೆಂತ್ ಹ್ಯಾ ಸಂಸಾರಿಂ ಪಾವ್ಸ್ ಆನಿ ಧಗ್ ಹಾಂಚೆಮಧೆಂ ಝಗ್ಡೆಂ ಕರವ್ನ್ ಅಪ್ಲೆಂ ಬಳ್ ಧಾಖಂವ್ಚಾ ಮೊಡಾಂಚೆಂ ಬಳ್ ಪಿಂತ್ರಾಯ್ತಾ ಆನಿ ಸಾಂಕೇತಿಕ್ ರಿತಿನ್ ಸಂಸಾರಾಂತ್ ಭರೊನ್ ವೊಮ್ತೊಂವ್ಚಾ ಹಾಂಕಾರಾಕ್ ಸೊಭಿತ್ ರಿತಿನ್ ಚಿತ್ರಣ್ ಕರ್ಚೆಂ ದಿಸೊನ್ ಯೆತಾ.
ಕವಯತ್ರಿ ಅಶುಂತಾ ಪಿರೇರಾ ಅಪ್ಲೆ ಕವಿತೆಂತ್ ತಾತ್ವಿಕ್ ನಿಯಾಳ್ ದಿತಾಸ್ತಾನಾ ಮನ್ಶಾಂಕ್ ಜಿತ್ಲೊ ಪಾವ್ಸ್ ಗರ್ಜೆಚೊಗೀ ತಿತ್ಲಿಚ್ ಧಗ್ಯೀ ಗರ್ಜೆಚಿ ಮ್ಹಳ್ಳೊ ಉಲೊ ದಿತಾ. ಹಾಂಗಾಸರ್ ಧಗ್ ಮ್ಹಳ್ಯಾರ್ ಜಿಣ್ಯೆಂತ್ ಕಶ್ಟ್ ಆನಿ ಪಾವ್ಸ್ ಮ್ಹಳ್ಯಾರ್ ಜಿಣ್ಯೆಂತ್ಲೆಂ ಸುಃಖ್ ಮ್ಹಳ್ಳೊ ಸಾಂಕೇತಿತ್ ಅರ್ಥ್ ಕವಿತೆಂತ್ ದಿಸೊನ್ ಯೆತಾ.
ಕವಯತ್ರಿ ನಿರ್ಮಲಾ ಗೋವಿಯಸ್ ಹಿಕಾ ಪಾವ್ಸಾಕ್ ಭಿಜ್ಚಾ ಎಕಾ ಖಡ್ಪಾಚೆಂ ಪಿಂತುರ್ ದಿಸೊನ್ ಯೆತಾನಾ, ಮನಿಸ್ ಕಿತ್ಲೊಯ್ ಬೆಮಾಣ್ ಜಾಯ್ತ್ ತರ್ಯ್ ಖಡಾಪ್ ಅಪ್ಲ್ಯಾ ಜಾಗ್ಯಾರ್ ಥಿರ್ ಆನಿ ತೆಂ ಕೊಣಾಯ್ಚಾಯ್ಯ್ ಹಾಲಂವ್ಕ್/ಕರ್ಗಾಂವ್ಕ್ ಸಾಧ್ಯ್ ನಾ ಮ್ಹಳ್ಳೊ ಉಲೊ ದಿತಾ.
ಕವಿ ವಿನ್ಸಿ ಮೆಲ್ಕಾರ್ ಹಾಕಾ ಪಾವ್ಸಾಚಿ ಪದ್ವಿ ಆನಿ ಮಹಿಮಾ ದಿಸೊನ್ ಯೆತಾನಾ ಪಾವ್ಸಾಚೆಂ ಏಕ್ ಭಕ್ತಿಕ್ ಗೀತ್ (ಭಕ್ತಿ ರಸ) ಪ್ರಸ್ತುತ್ ಕರ್ತಾ.
ಕವಿ ಅನಿಲ್ ಪೆರ್ನಾಲ್ ಹಾಕಾ ಹೆಂ ಪಿಂತುರ್ ಆಪ್ಲ್ಯಾ ಪ್ರೇಮಿಕಾಚೊ ಉಡಾಸ್ ಕಾಡುನ್ ದಿತಾನಾ ವಾಚ್ಪ್ಯಾಂಕ್ ಆಪ್ಲ್ಯಾ ಭುರ್ಗ್ಯಾಪಣಾಚಾ ಮೊಗಾಚೊ ನಿಯಾಳ್ ಕರುನ್ ದಿತಾ.
ಕವಿ ಮೆಲ್ವಿನ್ ಜೆ. ವಾಸ್ ಹಾಣೆಂ ಉಭ್ಯೊ ಕೆಲ್ಲ್ಯೊ ಇಮಾಜ್ಯೊ ಕಾಂಯ್ ಗುಡೊಚ್ ಜಾಯ್ತ್. ಎಕೆಕಾ ಉತ್ರಾಂನಿ ಇಮಾಜ್ಯೊ ಪಿಂತ್ರಾಯಿತ್ತ್ ಗೆಲ್ಲೊ ಹೊ ಹ್ಯಾ ಪಿಂತುರಾಂತ್ ಕಾಂಯ್ ಸರ್ಗಾಕ್ ಆಯ್ಕೊಂವ್ಚಿ ಬೋಬ್ ಘಾಲ್ಚೆಂ ದಿಸೊನ್ ಯೆತಾ. ಪಿಂತುರ್ ಸಂಪೆಂ ತರ್ಯ್ ಹ್ಯಾ ಪಿಂತುರಾಂಚೆ ಸಾವ್ಳೆಂತ್ ಕವಿನ್ ದೆಖ್ಲ್ಲಿಂ ರಾವ್ಳೆರಾಂ ಅಪೂರ್ವ್ ಆನಿ ವಿಚಿತ್ರ್.
ಪುಣ್ ಹೊ ಪಾವ್ಸ್ ಆನಿ ಧಗ್ ಹಾಕಾ ಮೊಸೊರ್ ಆನಿ ಮೋಗ್ ಮ್ಹಳ್ಳ್ಯಾಕ್ ಸಾಂಕೇತಿಕ್ ರಿತಿಚೊ ಲೇಪ್ ದೀವ್ನ್, ಜಿಣ್ಯೆಲಿಸಾಂವಾಚೊ ಸಾರ್ ವೊತುನ್ ಕವಿತಾ ಸೊಭಯಿಲ್ಲ್ಯಾ ಕವಿ ಪ್ರಸನ್ನ್ ನಿಡ್ಡೋಡಿಚಾ ಕವಿತೆಂತ್ ವೆಗ್ಳೊಚ್ ಅನ್ಭೋಗ್ ಆಸಾ. ಆನಿ ಮಯ್ನ್ಯಾಚೆಂ ಕವಿತಾ ಜಾವ್ನ್ ಸಹಜ್ರಿತಿನ್ ಹೆಂ ಕವಿತಾ ಜಿಕೊನ್ ಯೆತಾ.
[ವಾಂಟೆಲಿ ಜಾಲ್ಲಿಂ]
2. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್
3. ಅಶುಂತಾ ಪಿರೇರಾ ಗಂಟಾಲ್ಕಟ್ಟೆ/ಯು.ಕೆ.
5. ನಿರ್ಮಲಾ ಗೋವಿಯಸ್ ಬೆಂದುರ್/ಮಸ್ಕತ್
6. ವಾಯ್ಲೆಟ್ ಜೆ. ಪಿರೇರಾ, ಮಂಗ್ಳುರ್
7. ಆಸ್ಟಿನ್ ಪ್ರಭು ನಂತೂರ್/ಚಿಕಾಗೊ
8. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್
9. ಮೆಲ್ವಿನ್ ಜೆ. ವಾಸ್ ಕೆಲರಾಯ್/ಕುವೇಯ್ಟ್
1. ಮೊಸೊರ್ ಆನಿ ಮೋಗ್? [ಮಯ್ನ್ಯಾಚೆಂ ಕವಿತಾ]
ಪ್ರಸನ್ನ್ ನಿಡ್ಡೋಡಿಕುಡಿಚ್ಯಾ
ಶಿರಾಂನಿ
ರಗ್ತಾ ಸ್ರಾವಾ-ಸಂಗಿಂ
’ಮೊಸೊರ್’ ಮ್ಹಳ್ಳಿ ’ಧಗ್’
ಚರೊನ್ ಭರೊನ್
ಉಜ್ಯಾ ಧಾವೆ ಸವೆಂ
ಭಾಯ್ರ್ ವೊಮ್ತತಾ ತೆನ್ನಾಂ
ಮನಿಸ್ ದುಸ್ರ್ಯಾಂಚ್ಯೊ ಕರ್ನ್ಯೊ
ಭುಧ್ವಂತ್ಕಾಯ್ - ಗ್ರೇಸ್ತ್ಕಾಯ್
ಬರೆಂ ಮನ್-ಆಧಾರ್
ಕಿತೆಂಚ್ ಸೊಸುಂಕ್ ಸಕಾನಾ
ಕಿತ್ಯಾಕ್ -
’ಮೊಸ್ರಾ ಧಗ್’ ತಾಚಾ
ಹರ್ಯೆಕಾ ವಿಶ್ವ್ಯಾಥಾವ್ನ್
ಉಜೊ ವೊಂಕ್ತಾ..
ಆನಿ ಜಾತಾ ಏಕ್ ’ಧಗಿ ಆಗ್ಟೆಂ’
ಸೊರ್ಮುಣ್ ಉಜ್ಯಾಚೆಂ
ವೊಡ್ತಾ ಸರ್ವಾಂಕ್ ತಾಚೆಮಧೆಂ
ನಾಸ್ ಕರ್ತಾ ಎಕ್ವಟ್ ದೆಣೆಂ
ತೆದ್ನಾಂ
’ಮೋಗ್’ ಮ್ಹಳ್ಳೊ ’ಪಾವ್ಸ್’
ಜರ್ ಪಡ್ಲೊ ತರ್
ವಾತಾವರಣ್ ಶಾಂತ್ ಜಾತಾ
ಉದ್ಕಾಚ್ಯೆ ಥಂಡಾಯೆಂತ್
ಉಜ್ಯಾ - ಆಗ್ಟೆಂ
ಪಾಲ್ವವ್ನ್ ಗೊಬೊರ್ ಕರುನ್
ಉದ್ಕಾಲೊಟಾಸವೆಂ
ವಿಲೀನ್ ಜಾತಾ ಶಾಂತತೆಂತ್
ದೆಕುನ್ ಸಾಂಗ್ಣೆಂ ಆಸಾ ಅಶೆಂ
’ಧಗ್ ಆಸಾ ಥಂಯ್ ಪಾವ್ಸ್ ಪಡ್ತಾ’
ಮೊಸ್ರಾ ಉಜೊ ’ಮೋಗ್ಚ್ ಪಾಲ್ವಯ್ತಾ..!’
2. ವಿದ್ರೂಪ್ [ಪ್ರಿಯಾ ಸಿಕ್ವೇರಾ, ಫೆರಾರ್]
ನಾ ದಿಸ್ಚಿ ಸೊಭಾಯ್ ಪೆಲ್ಯಾಕ್ ದಾಕಂವ್ಕ್
ನೆಸಾಣ್ ಕಿತೆಂ, ಶೃಂಗಾರ್ ಕಿತೆಂ
ಬಿತರ್ಲೆಂ ವಿದ್ರೂಪ್ಪಣ್ ದಾಂಪುಂಕ್
ಆಸಾಗಿ ಖಂಚೆಂ ಪುಣಿಂ ಸಾಧನ್
ಆಸ್ಲ್ಯಾರ್ ಮ್ಹಾಕಾ ಸಾಂಗಾಗಾ!
ವಿದ್ರೂಪಾಯೆಚಿ ಊಬ್ ಚಡ್ ಜಾವ್ನ್
ದುಸ್ರ್ಯಾಂಕ್ ಧಗ್ ಜಾಂವ್ಚಾ ಪಯ್ಲೆಂ
ಪಾವ್ಸ್ ಜಾವ್ನ್ ಬಿತರ್ಲಿ ಕುಸುಡಾಯ್
ನಿತಳ್ ಕರ್ನ್, ಸೊಭಾಯ್ ಚಡಂವ್ಕ್ ಸಕ್ತಿತ್
ಹಾಂವ್ ಯಾ ತುಂ!
3. ಪಾವ್ಸ್ ಆನಿ ಧಗ್? [ಅಶುಂತಾ ಪಿರೇರಾ]
ಸುಖ್-ದುಃಖ್ ಜಿಣಿಯೆಕ್ ನಿಯಮ್
ಪಾವ್ಸ್ ಅನಿ ಧಗ್ ಪ್ರಕೃತಿಕ್ ನಿಯಮ್
ದುಃಖ್ ನಾಂ ತರ್
ಸುಖಾಚೆ ಮೊಲ್ ಕಿತೆಂ?
ಧಗ್ ನಾಂ ತರ್
ಪಾವ್ಸಾಚೆಂ ಮೊಲ್ ಕಿತೆಂ?
ದೊಳ್ಯಾಂನಿ ದುಃಖಾಂ ಗಳಾನಾಂತ್ ತರ್
ಸುಖ್ ಆಶೆವ್ಚೆಂ ಕಶೆಂ?
ಧಗ್ ಅಂಗಾಕ್ ಧೊಸಾನಾ ತರ್
ಪಾವ್ಸಾಚಿ ಗೊಡ್ಸಾಣ್ ಚಾಕ್ಚೆಂ ಕಶೆಂ?
ಸುಖ್ ಮಾತ್ರ್ ಜಾಯ್
ದುಃಕ್ ನಾಕಾ ಮ್ಹಣ್ಶಿ ತರ್ ಕಶೆಂ?
ಪಾವ್ಸ್ ಮಾತ್ರ್ ಜಾಯ್
ಧಗ್ ನಾಕಾ ಮ್ಹಣ್ಶಿ ತರ್ ಕಶೆಂ?
ಧಗ್ ನಾಸ್ತಾಂ ಪಾವ್ಸ್ಚ್ಚ್ ಪಡಾತ್ ತರ್
ಸಗ್ಳೆಂ ವ್ಹಾಳ್ಚೆಂ ನಾಂಗಿ ಉದ್ಕಾಚಾ ಲೊಟಾಕ್
ದುಃಕ್ ನಾಸ್ತಾಂ ಸುಖ್ಚ್ಚ್ ಮೆಳಾತ್ ತರ್
ಜಿಣಿ ವೊಳ್ಚಿ ನಾಂಗಿ ಸಂಸಾರಿ ಖುಶಾಲಾಯೆಕ್?
4. ಪಾವ್ಸ್ ಆನಿ ಧಗ್! [ವಿನ್ಸಿ ಮೆಲ್ಕಾರ್]
ಧಗ್ ತುಂ ಗಳೊ ಸುಕಯ್ತಾಯ್
ಉದ್ಕಾ ಥೆಂಬ್ಯಾಕ್ ಗಾಂವ್ ಘುಂವ್ಡಾಯ್ತಾಯ್
ಆಂಗಾಂತ್ಲೆಂ ವಸ್ತುರ್ ಸಮೇತ್ ಕಾಡಯ್ತಾಯ್
ತಾನೆನ್ ಜೀವ್ ಮರ್ಣಾ ತಡಿರ್ ವೊಡ್ತಾಯ್
ತುಜ್ಯಾ ತ್ಯಾ ಉಜ್ಯಾಚ್ಯಾ ದಾವೆನ್
ಪಾಚ್ವಿ ತಿ ಭುಂಯ್ ಸುಕಾಶೆಂ ಕರ್ತಾಯ್
ಭುಂಯ್ಕ್ ತುಜೆಂ ರಾಜ್ ಚಲವ್ನ್
ಫಕಲ್ ಪಾವ್ಸಾ ಉದ್ಕಾಕ್ ರಾಕಯ್ತಾಯ್
ಪಾವ್ಸಾ ತುಂ ಹ್ಯಾ ಭುಮಿಕ್ ಪಡ್ತಾಯ್
ಸುಕೊನ್ ಗೆಲ್ಲಿ ತಿ ಣುಂಯ್ ಪಾಚ್ವಿ ಕರ್ತಾಯ್
ತುಜ್ಯಾ ತ್ಯಾ ಉದ್ಕಾನ್
ಬಾಂಯೊ, ನಂಯೊ, ಶೆತಾಂ, ಭಾಟಾಂ ಭಿಜವ್ನ್, ಭರಾಶೆಂ ಕರ್ತಾಯ್
ತುಜ್ಯಾ ಉದ್ಕಾನ್ ಬರೆಂ ಬೆಳೆಂ ಕರಯ್ತಾಯ್
ಚಡ್ ಪಾವ್ಸ್ ತುಂ ವೊತ್ತಾಯ್
ಆವ್ರ್ ಜಾವ್ನ್ ತುಂ ಯೆತಾಯ್
ಸಕ್ಡಾಂಚಿಂ ಘರಾಂ, ಜಾಗೊ, ಬೆಳೆಂ ವ್ಹಾಳವ್ನ್ ವರ್ತಾಯ್
ಮನ್ಶಾ ಜಿಣಿ ಸತ್ತ್ಯಾನಾಸ್ ಕರ್ತಾಯ್
ತುಮ್ಚ್ಯಾ ತ್ಯಾ ದೊಗಾಂಯ್ಚಾ ದಬಾಜಾನ್
ಮನಿಸ್ ಸುಕೊನ್ ಬಾವೊನ್ ಜೀವ್ ಭರ್ತಾ...
5. ಖಡಾಪ್ [ನಿರ್ಮಲಾ ಗೋವಿಯಸ್]
ಪಾವ್ಸಾಕ್ ಬಿಜ್ಲೊ ತರಿ
ಧಗಿಕ್ ಸುಕ್ಲೊ ತರಿ
ಫರಕ್ ಪಡ್ದಾನಾತ್ಲ್ಲೊ ಖಡಾಪ್ ಹಾಂವ್
ರುಕಾಡ್ ಮೊಲಾಕ್ ಘೆತ್ಲೆಂ ತರಿ
ಬಾಂಗಾರಾಚೆಂ ಮೊಲ್ ಅಕಾಸಾಕ್ ಸರಿ
ಗಿರಾಯ್ಕೆ ಬಗಾರ್ ಪಣ್ಗಿಲ್ ಪಡ್ಲ್ಲೊಂ ಖಡಾಪ್ ಹಾಂವ್
ಉಜೊ ಭಿರಾಂಕುಳ್ ಪೆಟ್ಲೊ ತರಿ
ವಾದಾಳ್ ಕಠೀಣ್ ಉಟ್ಲೆಂ ತರೀ
ಅಖಂಡ್ ಉರ್ಚೊ ಖಡಾಪ್ ಹಾಂವ್.
ವೊತಾಂತ್ ವಿವಿಧ್ ಉಪಾಯೊಗಾಂಚೊ ವ್ಹಾಳೊ
ಪಾವ್ಸಾಂತ್ ನಿಸರ್ನ್ ಪಡ್ಲೊಂ ತರ್ ಶಿರಾಪ್ ಕಸಲೊ
ಹಾಕಾ ಕೊಣ್ ಕಾರಾಣ್? ರಾಗಾನ್ ಪೆಟೊನ್
ಮನಿಸ್ ಕರಿತ್ ಮ್ಹಜೊ ಬೆಸಾಂ ಶಿಳೊ
ಧಗ್ ಸೊಸ್ಲ್ಯಾರೀ ಪರ್ವಾ ನಾ
ಪಾವ್ಸ್ ವೊತ್ಲ್ಯಾರೀ ಫಾಯ್ದೊ ನಾ
ಹಾಂವ್ ಕರ್ಗಾಚೊ ನಾ, ಖಂಡಿತ್ ಭಾಗ್ಚೊ ನಾ
ಭುಂಯ್ ಮಾತೆಕ್ ಕೆದಿಂಚ್ ಝಡ್ ಜಾಂವ್ಚೊಂ ನಾ
ಸ್ವಾರ್ತಿ ಮ್ಹನಿಸ್ ಮ್ಹಾಕಾ ಉರಂವ್ಕ್ ಸಕಾನಾ
6. ಪಾವ್ಸ್ ಆನಿ ಧಗ್ [ವಾಯ್ಲೆಟ್ ಪಿರೇರಾ]
ಪಾವ್ಸಾ ತುಕಾ ರಾವ್ಲಾ ದೇಶ್ ತೊ ರಾಕೊನ್
ಪಾವ್ಸಾ ರಾಯಾ ಯೇ ವೆಗ್ಗಿಂ ತುಂ ದಾಂವೊನ್
ತುಕಾ ರಾಕೊನ್ ಗೆಲ್ಯಾಂವ್ ಆಮಿಂ ಸರ್ವ್ ಥಕೊನ್
ಆಂಗ್ ತೆಂ ಕರ್ಪೊನ್ ವೆತಾ ಧಗಿನ್
ಬೆಳೆಂ ಆಮ್ಚೆಂ ಸರ್ವ್ ತೆಂ ವೆತಾ ಕರ್ಪೊನ್
ತುಜೆ ತಾವ್ನ್ ಪಾಲೆಲ್ಲಿ, ತುಜೆ ತಾವ್ನ್ ಕಿರ್ಲೊನ್ ವಾಡ್ಲ್ಲಿಂ
ಶೆತಾಂ-ಭಾಟಾಂ, ವೊಡ್ತಾ-ಝಡಾಂ ಸುಕೊನ್ ಗೆಲ್ಯಾಂತ್
ತುಂವೆಂಚ್ಚ್ ನಾಣಯಿಲ್ಲಿ, ತುಂವೆಂಚ್ಚ್ ಭಿಜವ್ನ್ ಜೀವ್ ದಿಲ್ಲಿಂ
ಪಾಚ್ವಿಂ ಶೆತಾಂ ಕರ್ಪೊನ್ ದಾಳಿ ಫುಟೊನ್ ಗೆಲ್ಯಾಂತ್
ನಂಯೊ-ಬಾಂಯೊ ಸುಕೊಣ್ ನಿತ್ರಾಣಿ ಜಾಲ್ಯಾತ್
ಬಾಂಯ್ಚೊ ಝರಿಂ ನಪಂಯ್ಚ್ ಜಾಲ್ಯಾತ್
ನಂಯ್ಚಿ ರುಂದಾಯ್ ರೇಂವ್ ಭರೊನ್ ಉಣಿ ಜಾಲ್ಯಾ
ತೊಡಾಂತ್ಲ್ಯೊ ಮಾಸ್ಳ್ಯೊ ಮೊರೊನ್ ಗೆಲ್ಯಾತ್
ರೈತ್ ಬಾವ್ಡೆ ದೆಧೆಸ್ಪೊರ್ ಜಾಲ್ಯಾತ್
ತುಜ್ಯಾ ಯೆಣ್ಯಾಕ್ ಆತುರಾಯೆನ್ ರಾಕೊನ್ ಆಸಾತ್
ತರ್ನ್ಯೊ ಚಲಿಯೊ ಹಾಂಡಿ ಅಪ್ಲೆ ಕೊಳ್ಶೆ ಘೆವುನ್
ಭಾಯ್ರ್ ಸರ್ಲ್ಯಾತ್ ಉದಾಕ್ ಸೊಧುನ್
ಹಾತ್, ಪಾಂಯ್ ತಾಂಚೆ ಗೆಲ್ಯಾತ್ ಸುಜೊನ್
ತರೀ ಕಿತ್ಯಾಕ್ ತುಂ ರಾವ್ಲಾಯ್ ಲಿಪೊನ್ ?
ಪಾವ್ ಭಿರ್ಮೊತ್, ವೋತ್ ತುಂ ಭರಾನ್
ಭುರ್ಗಿಂ ಇಸ್ಕೊಲಾಕ್ ವೆಚಿಂ ಜಾಲ್ಯಾಂತ್
ದೋಣ್ ಕರ್ನ್ ಉದ್ಕಾ ಸಂಗಿಂ ಸೊಡುಂಕ್ ರಾಕ್ತಾತ್
ಖಾಂದಿ ಪೊತೆ ಘೆವ್ನ್ ಸತ್ರಿ ಘೆವುನ್
ಭಿಜೊನ್ ಖೆಳೊನ್ ಇಸ್ಕೊಲಾಕ್ ತರೀ ವೆತಿತ್
ವೊತಾಚ್ಯಾ ಹ್ಯಾ ಧಾವೆ ತಾವ್ನ್ ಬಜಾವ್ ತರೀ ಜಾತಿತ್
ನಿರಾಶಿ ಆಮಿಂ, ಚಡ್ ಆನಿಂ ರಾಕಯ್ ನಾಕಾ
ಘಾಲ್ ಕಾಳೊಕ್ ವೆಗಿಂ ಹ್ಯಾ ಗಗನಾರ್ ನಿಳ್ಸ್ಯಾ
ದಾಕಯ್ ತುಜಿಂ ಮಹಿಮಾ ಹ್ಯಾ ಪ್ರಥ್ವಿರ್
ಭಿಜಯ್ ಧರ್ಣ್, ಪ್ರಸಾರುಂದಿ ಮಾತ್ಯೆ ಪರ್ಮಳ್
ವ್ಹಾಳೊ ಭರೊನ್ ಬಾಂಯೊ-ನಂಯೊ ಉದಾಕ್ ನಿರ್ಮಳ್
7. ಪಾವ್ಸ್ ಆನಿ ಧಗ್!? [ಆಸ್ಟಿನ್ ಪ್ರಭು ನಂತೂರ್]
ತೊ ಘಡ್ಘಡೊ ಆನಿಂ ತೆಂ ಝಗ್ಳಾಣೆಂ
ಮಾರ್ತಾ ರಭಸಾನ್ ತ್ಯಾ ಆಕಾಸಾರ್
ಥಂಡ್ ವ್ಹಾರೆಂ ಜ್ಯೊರಾನ್ ವ್ಹಾಳ್ತಾನಾ
ಝಾಲಾಂತ್ಲ್ಯೊ ಖೊಲ್ಯೊ ಧಾಂವ್ತಾತ್
ರಸ್ತ್ಯಾವಯ್ಲಿ ತಿ ಧುಳ್ ಉಭ್ತಾ
ಭೃಮಿದೆರ್ ಕಾಳೊಕ್ ಪಾಚಾರ್ತಾ
ಆನಿಂ ಘಡ್ಯೆನ್ ಶಿರಾಂಧಾರಿಂಚೊ ಪಾವ್ಸ್
ಆಕಾಸ್ ಪಾಕ್ಯಾಕ್ ಬುರಾಕ್ ಜಾಲ್ಲ್ಯಾಪರಿಂ
ಸಗ್ಳಿ ಭುಂಯ್ ಥಂಡ್ ಕರ್ತಾ ಉದ್ಕಾನ್
ನಳೆ, ಕೊಲ್ವಾ ಪಾಕಿಂ ರಡ್ತಾತ್
ದೆಂವೊನ್ ಪಾವ್ಸಾ ದು:ಖಾಂ ಸಗ್ಳ್ಯಾನ್
ವ್ಹಾಳ್ತಾ ಉದಾಕ್ ರಭಸಾನ್ ಧರ್ಣಿರ್
ಝಾಲಾಂ ಭರ್ತಾತ್, ತೋಡ್ ವ್ಹಾಳ್ತಾತ್
ಉದಾಕ್ ವೆತಾ ನೇತ್ರಾವತಿ ನಂಯ್ಕ್
ತೆಂ ತಾಂಬ್ಡ್ಯಾ ಬಣಾಚೆಂ ಚಿಕ್ಲಾಂಡೆ ಉದಾಕ್
ಭುರ್ಗ್ಯಾಂಕ್ ಸಂತೊಸ್ ಉದ್ಕಾಂತ್ ಖೆಳೊಂಕ್
ರೈತಾಂಕ್ ಉಲ್ಲಾಸ್ ಬಿಂಯಾಂ ವೊಂಪುಂಕ್
ಹಾಂವ್ ಸತ್ರಿ ಧರುನ್ ಹ್ಯಾ ಪಾವ್ಸಾ ಮಧೆಂ
ಚಲೊನ್ಂಚ್ ವೆತಾಂ ಕಿತೆಂಗಿ ಚಿಂತುನ್
ಆನಿಂ ತಿತ್ಲ್ಯಾರ್ ಮ್ಹಜ್ಯೆ ಮುಖ್ಲ್ಯಾನ್
ಪಾಶಾರ್ ಜಾತಾ ಏಕ್ ಮಧುರ್ ಸ್ತ್ರೀ
ನಾ ತಿಚ್ಯೆಲಾಗಿಂ ಪಾವ್ಸ್ ಆಡಾಂವ್ಕ್ ಸತ್ರಿ
ರಸ್ತ್ಯಾರ್ ಸಗ್ಳ್ಯಾನ್ ಉದ್ಕಾಚಿ ಭರ್ತಿ
ಮ್ಹಾಕಾ ಯೆತಾ ಖಂಯ್ಸರ್ ನಾಸ್ಲ್ಲಿ ಸ್ಪೂರ್ತಿ
ಥೊಡೊ ವೇಳ್ ಹಾಂವ್ ಪಾಟ್ಲ್ಯಾನ್ ವೆತಾಂ
ತಿಚಿ ಬಾಜು ಭಿಜ್ಲ್ಯಾ, ಪಾತಳ್ ಘಾಗ್ರೊಯೀ
ತಿಚೆಂ ತೆಂ ಮಾಸ್ ಮ್ಹಣ್ತಾ ಆಸ್ಟಿನಾ...
ಆನಿಂ ಹಾಂವ್ ತಿತ್ಲ್ಯಾರ್ ಲಾಗಿಂ ವೆತಾಂ
ಕಿತೆಂಚ್ ದಾಕ್ಷೆಣ್ ನಾಸ್ತಾಂ ತಿಕಾ ಸತ್ರಿ ಧರ್ತಾಂ
ಆನಿಂ ಹಾಂವ್ ಪಾವ್ಸಾ ಉದ್ಕಾಂತ್ ಭಿಜ್ತಾಂ
ಪಾಂಚ್ ಮಿನುಟಾಂನಿ ಭುಜ್ ಭುಜಾಕ್ ಲಾಗ್ತಾ
ದೊಗಾಂಯ್ ವ್ಹಳೂ ಉಲಂವ್ಕ್ ಲಾಗ್ತಾಂವ್
ತೆಂ ಕೊಂಕುಣ್ಲೆಂ ಆನಿಂ ಹಾಂವ್ ಕಿರಿಸ್ತಾಂವ್
ಲಲಿತಾ ಶೆಣಯ್ ಆನಿ ಆಸ್ಟಿನ್ ಪ್ರಭು
ಕುಡಿಂತ್ ಮ್ಹಜ್ಯಾ ಝಗ್ಳಾಣೆಂ ಯೆತಾ
ಘಡ್ಯೆನ್ ದಡಲ್ಲ್ ಬಡಲ್ಲ್ ಡಕ್ಕ್ ಡುಕ್ಕ್
ಕಠೀಣ್ ಆವಾಜಾಚೊ ತೊ ಘಡ್ಘಡೊ ಯೆತಾನಾ
ಲಲಿತಾ ಭಿಂಯಾನ್ ಮ್ಹಾಕಾ ಪೊಟ್ಲುನ್ ಧರ್ತಾ
ಏಕಾ ಲ್ಹಾನ್ ಸತ್ರೆ ಪಂದಾ ದೋನ್ ಕುಡಿ
ಕಿತೆಂಚ್ ಲಜ್ ನಾಸ್ತಾಂ ವೆಂಗ್ತಾತ್ ಏಕಾಮೆಕಾಕ್
ದೊಗಾಂಯ್ಚೆ ದೊಳೆ ಮೊಗಾ ಕಿಟಾಳಾಂ ಧಾಡ್ತಾತ್
ಧರ್-ರೆ ಮ್ಹಾಕಾ ತುಂ ಕಾಂಯ್ ಲಜೆನಾಕಾ
ಮ್ಹಾಕಾ ಘಡ್ಘಡ್ಯಾಚಿ ಭಿರಾಂತ್-ರೆ ದಿಸ್ತಾ
ತಿಚೊ ಏಕ್ ಪಾಂಯ್ ಮ್ಹಜ್ಯಾರ್ ಬಸ್ತಾಂ
ಹಾಂವ್ ದು:ಖಿನ್ ಬೊಬಾಟ್ ಮಾರ್ತಾಂ
ಹೇಯ್ ಸಾಂಬಾಳ್, ಮ್ಹಜೊ ತೊ ಪಾಂಯ್!
ಟ್ರೀಝಾ ಮ್ಹಜಿ ಜ್ಯೋರಾನ್ ಪಾಟ್ ಥಾಪುಡ್ತಾ
ಏಕ್ಚ್ಚ್ ಪಾವ್ಟಿಂ ಹಾಂವ್ ಜಾಗೃತ್ ಜಾತಾಂ
ತೊ ಪ್ರಕೃತೆಚೊ ಶಿರಾ-ಧಾರಿಂಚೊ ಪಾವ್ಸ್
ಆನಿಂ ತಿ ಮ್ಹಜ್ಯಾ ಕುಡಿಂತ್ಲಿ ಕಠೀಣ್ ಧಗ್
ಏಕಾಚ್ಚ್ ಸೆಕುಂದಾನ್ ನಪಂಯ್ಚ್ ಜಾತಾತ್!
8. ಮೊಡಾಂಚೆಂ ಬಳ್ [ಪ್ರಿಯಾ ಸಿಕ್ವೇರಾ]
ಮೊಗಾನ್ ರಾಗಾನ್ ಯಾ ಬಳಾನ್
ಎಕಾಮೆಕಾ ಅದಾಳ್ತಾನಾ
ರಾಜ್ ಘಡ್ಗಡ್ಯಾ ಝಗ್ಲಾಣ್ಯಾಚಿ
ಪಾವ್ಸಾಚಿ ಝಳಕ್ ನಾಂ!
ಘಡ್ಗಡೊ ಯೇವ್ನ್ ಮಾರ್ಲೊ ಕಾಜುಲ್ಯಾಕ್
ಝಗ್ಲಣ್ಯಾನ್ ಹುಲ್ಪಾವ್ನ್ ಸೊಡ್ಲೆಂ ಪಿಸೊಳ್ಯಾಕ್
ಮೊಡಾಂಚೆಂ ಬಳ್
ಅಸ್ಕತ್ಯಾಂಚೆಂ ದೂಃಕ್
ನಷ್ಟ್ ಕೊಣಾಕ್
ನ್ಹಂಯ್ ಮೊಡಾಂಕ್
ಗರ್ಜ್ ನಾಸ್ತಾನಾ ಉಜೊ ವೊಂಕ್ಲ್ಲ್ಯಾ
ಘಡ್ಗಡ್ಯಾ ಝಗ್ಲಣ್ಯಾಕ್
ಚೂಕ್ ನಾಸ್ತಾನಾ
ಉಜ್ಯಾಂಚಾ ದಗಿಂತ್ ಕರ್ಪೊಂಚಾ
ಅಸ್ಕತ್ ಜೀವಿಂಕ್
ಮೊಡಾಂ ತಿಂ ಜಾಲಿಂ ಏಕ್
ನಾಚೊಂಕ್ ಲಾಗ್ಲಿಂ ಸಾಂಗೊನ್
ಪಳೆ ಆಮ್ಚೆಂ ಬಳ್!
9. ವಾಸ್ತವ್ ಆನಿ ಲಿಸಾಂವ್! [ಮೆಲ್ವಿನ್ ಜೆ. ವಾಸ್]
ಫುಲ್ತ್ಯಾ ಸುರ್ಪಾಯೆಚಾ ಸುರ್ಯಾಕ್ ಮೋಗ್ ಪಾಚ್ವ್ಯಾ ತಣಾಚೊ
ದೋನ್ ಫಾಳಿಯಾಂ ಮಧೆಂ ಸಂಸಾರಿಚೊ ಬಾಂಧ್ ತುಟವ್ನ್ ಉಡಯ್ತಾ
ನಂಯ್ತ್ ದೆಂವ್ಲ್ಲ್ಯಾ ಖಾರ್ವ್ಯಾಕ್ ಆಶಾ ಪಾಗೆರ್ಭರ್ ಮಾಸ್ಳೆಚಿ
ತಡಿ ವಯ್ಲ್ಯಾ ದೆವಳಾಂತ್ ಪಾವ್ಸಾ ದೆವಾಕ್ ಭುಲೊಂಕ್ ಪಣ್ತಿ ಪೆಟಯ್ತಾ
ಚಲೊಂಕ್ ಶಿಕ್ಚಾ ಚೆಡ್ವಾಕ್ ಆಶಾ ಚಮ್ಚಮ್ ಪಾಯ್ಜಾಣಾಂಚಿ
ಧನ್ಯಾ ದೆವಾಚ್ಯಾ ಘರಾಚಿ ಮೆಟಾಂ ತಾಕಾ ಚಡಂವ್ಕ್ ಲಾಯ್ತಾ
ಚಿವೊ ದಿಂವ್ಚಾ ಬಾಯ್ಲೆಕ್ ಮೋಗ್ ಪಾಲ್ವಾ ಬಿತರ್ಲ್ಯಾ ಆಂತಾಚೊ
ಹಾತ್ಭರ್ ಸೊಭ್ಚಾ ಕಾಂಚಿ ಕಾಂಕ್ಣಾಂಕ್ ಮಾಂದ್ರೆ ಪೊಂತಾರ್ ನಿಕ್ಳಯ್ತಾ
ವೊರ್ ಘೆವ್ನ್ ಸುರ್ಯೊ ಫಾಳಿಯಾಂ ಮಧೆಂ ಪಾಂಪಾಳೆಂ ದವರ್ತಾನಾ
ಮೆಟಾರ್ ಬಸ್ಲ್ಲೆಂ ಚೆಡುಂ ಪಾಯ್ಜಣಾಂ ಕತ್ರ್ಯಾಂಕ್ ದುಃಖಾನಿಂ ಪೊಶೆತಾ
ನಂಯ್ತ್ ದೆಂವ್ಲ್ಲೊ ಖಾರ್ವಿ ಪಣ್ತೆಚಿ ಪೆಲಿ ಹಾತಾಂತ್ ಝಳಯ್ತಾನಾ
ಆಂತಾಕ್ ವೆಂಗ್ಲ್ಲೆಂ ಬಾಯ್ಲ್ ಕಾಂಕ್ಣಾಂ ಚುರ್ಯಾಕ್ ಪಾಲ್ವಂತ್ ಲಿಪಯ್ತಾ
ಚೆಡ್ವಾ ದುಃಖಾಂ ಊಬ್ ಘೆವ್ನ್ ಮೊಡಾಂ ಧರ್ತಾನಾ ಪಾಂಪಾಳೆಂ ನಿಸ್ರೊನ್ ಪಡ್ತಾ
ಬಾಯ್ಲೆ ರಗಾತ್ ಬೋಬ್ ಜಾವ್ನ್ ಘಡ್ಗಡೊ ಮಾರ್ತಾನಾ ಫಣ್ತೆಕ್ ಜಗ್ಲಾಣೆಂ ಪೆಟಯ್ತಾ
ದೆಕುನ್ಂಚ್ ಮೊಡಾಂ ಆದ್ಳೊನ್ ಘಡ್ಗಡೊ ಪಯ್ಲೊ ಉಟ್ಲ್ಯಾರಿ ಝಗ್ಲಾಣೆಂ ಮಾತ್ರ್ ಪಯ್ಲೆಂ ಪೆಟ್ತಾ
ತುಜ್ಯಾ ಹಾತಾಂತ್ಲ್ಯಾ ಪಣ್ತೆಕ್ ಪಾವ್ಸಾನ್ ಥಂಡ್ ಕರ್ಚಾ ಪಯ್ಲೆಂ ಉಜೊ ಜಾಂವ್ಕ್!!
10. ತುಂ [ಅನಿಲ್ ಪೆರ್ನಾಲ್]
ಮಂದಿರಾಂತ್ಲ್ಯಾ ಫಾತ್ರಾಂನಿ
ದೆವಾಳಾಂತ್ಲ್ಯಾ ಇಮಾಜ್ಯಾಂನಿ
ಮ್ಹಜ್ಯಾ ಜಿವಾಚಾ ಹರ್ ಕಣಾನಿಂ
ತುಂಚ್ ತುಂ ತುಂಚ್ ತುಂ
ಗುಲೊಬಾಚಾ ಪಾಕ್ಳ್ಯಾನಿಂ
ಮೊರಾಚಾ ಪಾವ್ಲಾನಿಂ
ಮ್ಹಜ್ಯಾ ಕಾಳ್ಜಾಚಾ ಉಸ್ವಾಸಾ ಶಿರಾನಿಂ
ತುಂಚ್ಚ್ ತುಂ ತುಂಚ್ ತುಂ
ತೋರೆಂಜಾಂಚಾ ಶಿರೆಬರಿಂ
ಮೌಳಿಂಗಾಂಚಾ ಬಿಯಾಂಬರಿಂ
ಮ್ಹಜಾ ಕಾಳ್ಜಾಚಾ ಹರ್ ಉಡಿಯಾನಿಂ
ತುಂಚ್ ತುಂ ತುಂಚ್ ತುಂ
ತುಂಚ್ ತೂಂಗೋ ಚೆಡ್ವಾ
ತುಂಚ್ ತುಂ..........
ಆಕಾಸಾ ಮಾಳೊ ವೆಂಗೊ ಕರುನ್
ಕಾಳ್ಜಾಕ್ ಮ್ಹಜ್ಯಾ ಖಿಳೊ ಮಾರುನ್
ಯೇಗೊ ಅನಿಕ್ಯ್ ಸತಯ್ನಾಕಾ
ಸುಕ್ಯಾ ಕಾಳ್ಜಾಕ್ ಥಂಡ್ ಕರ್
ಮೊಗಾ-ಪಾವ್ಸ್ ವೊತುನ್!!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.