ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ದೊಳ್ಯಾಂಚೆರ್ ಸಾಯ್ ಮಾಂಡೆಲ್ಯಾಂಕ್ ಆಪ್ಲ್ಯಾ ದೊಂಪ್ರಾವಯ್ಲೊ ಘಾಯ್ ದಿಸಾನಾ ಜಾಯ್ತ್, ಪುಣ್ ದೂಕ್ ಭೊಗಾನಾಯೆ ತರ್?
’ದಾಯ್ಜ್’ ಆನಿಂ ನವೆಸಾಂವ್
ವರಸ್ : 2005
ಅಂಕೊ : 12
ಮಯ್ನೊ : ಜೂನ್
ಸಂಪಾದಕೀಯ್ - 12 .
ವಲ್ಲಿ ಕ್ವಾಡ್ರಸ್
’ದಾಯ್ಜ್’ಚಿ ಸುರ್ವಾತ್ ಜಾವ್ನ್ ಏಕ್ ವರಸ್ ಸಂಪ್ಲೆಂ ತರ್ಯೀ ಸಭಾರಾಂಕ್ ’ದಾಯ್ಜ್’ ವಿಶಿಂ ಕಳಿತ್ ಜಾಲ್ಲೆಂ ಆಯ್ಲೆವಾರ್ಚ್. ಆನಿಂ ಸಭಾರಾಂನಿ ನವ್ಯೊ ನವ್ಯೊ ಸಲ್ಹಾ ಸುಚನಾಂ ದಿಲ್ಯೊ ಆನಿಂ ಥೊಡ್ಯಾಂನಿ ವಾಜ್ಬಿ ಸವಾಲಾಂಯ್ ವಿಚಾರ್ಲಿಂ. ಆನಿಂ ತಾಂತುಂ ಏಕ್ ಜಾವ್ನಾಸಾ;
’ದಾಯ್ಜ್’ ಂತ್ ಕೊಂಕ್ಣೆಕ್ ಕಿತೆಂ ನವೆಸಾಂವ್ ಆಸಾ?
ಕಿತ್ಯಾಕ್ಗೀ ಮ್ಹಾಕಾ ಪರತ್ ಪರತ್ ಎಕ್ಚ್ ಕಾಣಿಂ ಉಡಾಸಾಕ್ ಯೆತಾ - ಚಾರ್ ಕುಡ್ಡ್ಯಾಂನಿ ಎಕಾ ಹಸ್ತಿಕ್ ಪಳೆಂವ್ಕ್ ಗೆಲ್ಲಿ. ಎಕೆಕ್ಲೊ ಕುಡ್ಡೊ ಎಕಾ ಹಸ್ತೆಕ್ ಆಪಡ್ನ್ ಅಪ್ಲ್ಯಾ ಆಂತರಿಕ್ ದೊಳ್ಯಾಂನಿ ’ಹಸ್ತ್ ಮ್ಹಳ್ಯಾರ್ ಅಶಿ/ತಶಿ’ ಮ್ಹಣ್ ಸಮ್ಜಾತಾ.
ಪಯ್ಲೊ ಕುಡ್ಡೊ ಹಸ್ತೆಚಾ ಶಿಮ್ಟೆಕ್ ಆಪಡ್ನ್, "ಹಸ್ತ್ ಮ್ಹಳ್ಯಾರ್ ಎಕಾ ದೊರ್ಯೆಪರಿಂ" ಮ್ಹಳ್ಳೆಂ ಅಪ್ಲೆಂ ಫಯ್ಸಲ್ ದಿತಾ ತರ್ ದುಸ್ರೊ ಕುಡ್ಡೊ ಹಸ್ತೆಚಾ ಪಾಂಯಾಂಕ್ ಆಪಡ್ನ್ ’ಹಸ್ತ್ ಮ್ಹಳ್ಯಾರ್ ಎಕಾ ಖಾಂಬ್ಯಾಪರಿಂ’ ಮ್ಹಳ್ಳೆಂ ಫಯ್ಸಲ್ ದಿತಾನಾ ತಿಸ್ರೊ ಕುಡ್ಡೊ ಹಸ್ತೆಚಾ ನಾಕಾಕ್ (ಸೊಂಡಿಲಾಕ್) ಆಪಡ್ನ್ ಅಪ್ಲೆಂ ಫಯ್ಸಲ್ ಅಶೆಂ ದಿತಾ; "ಹಸ್ತ್ ಮ್ಹಳ್ಯಾರ್ ಎಕಾ ಪೆರ್ಮಾರೆಪರಿಂ" ಮ್ಹಣ್. ಅಖ್ರೇಚೊ ಕುಡ್ಡೊ ಹಸ್ತೆಚಾ ಪೊಟಾಕ್ ಆಪಡ್ನ್ ಸಾಂಗ್ತಾ; "ಹಸ್ತ್ ಎಕಾ ವೊಣದೆಪರಿಂ" ಮ್ಹಣ್.
’ದಾಯ್ಜ್’ ಮ್ಹಳ್ಯಾರ್ಯೀ ಅಸಲಿಂಚ್ ಫಯ್ಸಲಾಂ ದಿತಿತ್, ತಾಂತಾಂಚಾ ನದ್ರೆಂತ್, ತಾಂತಾಂಚಾ ಚಿಂತ್ಪಾಪ್ರಕಾರ್ ತಿಂ ಸಾರ್ಕಿಂಚ್ ಜಾವ್ಯೆತಾ. ಪುಣ್ ಜಶಿ ಇಂಗ್ಲಿಶಾಂತ್ ಏಕ್ ಸಾಂಗ್ಣಿಂ ಆಸಾ; We rate ourselves of what we are capable of doing, whereas others rate us on what we have done to them [ಆಮಿಂ ಆಮ್ಕಾಂ ಮೆಜ್ತಾಂವ್ - ಆಮ್ಚಾ ಶ್ಯಾತಿಯೆಚೆರ್ ತರ್, ಹೆರಾಂ ಆಮ್ಕಾಂ ಮೆಜ್ತಾತ್ - ಆಮಿಂ ಕೆಲ್ಲ್ಯಾ ಸಾಧನಾಂ ಖಾತಿರ್].
ದಾಯ್ಜಾಂತ್ ಕೊಂಕ್ಣೆಕ್ ಕಸಲೆಂ ನವೆಸಾಂವ್ ಆಸಾ ಮ್ಹಳ್ಳೆಂ ದಾಯ್ಜಾಚಿಂ ಎಕೆಕ್ ಪಾನಾಂ ವಾಚ್ಲ್ಯಾರ್ ತುಮ್ಕಾಂಚ್ ಸಮ್ಜಾತೆಲೆಂ. ಕೊಂಕ್ಣೆಚೊ ವಾವ್ರ್ ಚಡ್ತಾ ತರ್ ಶೆಂಭೊರಾಂನಿ ಸಂಚಾಲನಾಂ ಜಾಂವ್, ಹಜಾರಾಂನಿ ಸಾಯ್ಟಾಂ ಉದೆಂವ್. ಆಮ್ಚೊ ಇರಾದೊ ಕಸಲ್ಯಾಚ್ ನದ್ರೆನ್ ಮುನಾಫೊ ಜೊಡ್ಚೊ ನ್ಹಯ್. ದಾಯ್ಜ್ ಏಕ್ ಸಂಚಾಲನ್ ನ್ಹಯ್, ಬರಿಂ ಕಾಮಾಂ ಕರುಂಕ್ ’ಬರೆಂ ಮನ್, ಬರೆ ಇರಾದೆ, ಆನಿಂ ತೆ ಇರಾದೆ ಕಾರ್ಯಗತ್ ಕರ್ಚೆ ಬರೆ ಮನಿಸ್’ ಮಾತ್ರ್ ಗರ್ಜೆಚೆ ಶಿವಾಯ್ ಕಸಲೀಂಯ್ ಜಾಂವ್ ಸಂಚಾಲನಾಂ, ಹುದ್ದೆದಾರಾಂ ಫಕತ್ ಧಾಖವ್ಣೆಕ್ ಮಾತ್ರ್.
ಎಕ್ಲ್ಯಾ ದೊಗಾಂನಿ ವಿಚಾರ್ಲ್ಲಿಂ ಹೆರ್ ಥೊಡಿಂ ಸವಾಲಾಂ;
"ತುಮಿಂ ದಾಯ್ಜಾಕ್ ತಾಕಾ/ಹಾಕಾ/ತಿಕಾ/ಹಿಕಾ ಕಿತ್ಯಾಕ್ ಘೆಂವ್ಕ್ನಾ?"
ತಾಚಿ ಜಾಪ್ಯ್ ಹಾವೆಂ ಮಾಯಾಮೊಗಾನ್ಂಚ್ ದಿಲ್ಯಾ;
"ಭಾವಾ - ದಾಯ್ಜ್ ಕೊಂಕ್ಣೆಚೆಂ ಮಿಸಾಂವ್, ಆನಿಂ ಅಪುಣ್ ಕೊಂಕ್ಣೆಚಾಕೀ ವರ್ತೊಂ ನ್ಹಯ್ ಮ್ಹಳ್ಳೆಂ ಚಿಂತಾಪ್ ಆಸ್ಚಾ ಸರ್ವಾಂಕ್ ಹಾವೆಂ ಸಾಧ್ಯ್ ಆಸ್ಲ್ಲ್ಯಾ ಸರ್ವ್ ರಿತಿಂನಿ ಆಪವ್ಣೆಂ ಪಾಟಯ್ಲಾಂ, ಬ್ಯಾಂಡ್ ವಾಜ್ಪಾರ್ ಆಪವ್ನ್ ಹಾಡ್ಚೆತಿತ್ಲ್ಯಾ ಉಂಚಾಯೆರ್ ಕೊಣೀಂ ಮ್ಹಾಕಾ ತಾಂಚಾ ವಾವ್ರಾಧ್ವಾರಿಂ ದಿಸೊಂಕ್ನಾಂತ್ ದೆಕುನ್ ಕೊಂಕ್ಣೆಚಾಕೀ ವರ್ತೊ/ವರ್ತಿಂ ಕೊಣ್ಂಚ್ ನಾಂತ್ - ಹೆಂ ಮ್ಹಜೆಂ ಚಿಂತಾಪ್ ಆನಿಂ ಪಾತ್ಯೆಣಿ ಜಾವ್ನಾಸಾ"
ಮಾಫ್ ಕರಾ ಮ್ಹಜಿಂ ಉತ್ರಾಂ ಎಕಾಧಾವೆಳಾ ಹಾಂಕಾರ್ (Arrogant) ದಿಸ್ತಾತ್ ತರ್. ಕಿತ್ಯಾಕ್ ಮ್ಹಳ್ಯಾರ್, ಆಮ್ಕಾ ಮೆಳ್ಚಾ ಇಲ್ಲೆಶ್ಯಾ ವೆಳಾಕ್ ಆಮಿಂ ಸಂಸಾರಾಕ್ ಸ್ವಸ್ಟೀಕರಣ್ ದೀಂವ್ನ್ಂಚ್ ಬೊಸ್ಲ್ಯಾಂವ್ ತರ್ ಬರಿಂ ಕಾಮಾಂ ಜಾಂವ್ಚಿಂ ತರ್ಯೀ ಕಶಿಂ? ಆಮಿಂ ಉಲಂವ್ಚಾಕೀ ಆಮ್ಚಿಂ ಕಾಮಾಂಚ್ ಉಲಂವ್ದಿತ್, ’ದಾಯ್ಜ್’ ಕೊಂಕ್ಣಿ ವಾವ್ರಾಚೊ ನವ್ಯೊ ವಾಟೊ ಸೊಧುನ್ ತ್ಯಾ ವಾಟಾಂನಿ ಪಾವ್ಲಾಂ ಕಾಡ್ತಾನಾ ’ಆಮಿಂ ಸಗ್ಳಿಂ ಏಕ್’ ಮ್ಹಳ್ಳ್ಯಾ ಚಿಂತ್ಪಾನ್ ಫುಡೆಂ ಚಮ್ಕಾತೆಲಿ.
"ಕವಿತಾಪಾಠ್ - ಕೊಂಕ್ಣೆಂತ್ ಹೆಂ ಖಂಡಿತ್ ನವೆಸಾಂವ್ಂಚ್ ಜೆಂ ಖಂಚಾಯ್ ಭಾಸಾಂನಿ ಜಾಂವ್ಚೆಂ ಅಪ್ಣಾಕ್ ಕಳಿತ್ ನಾ" ಅಶೆಂ ಆಮಿಂ ಸಾಂಗಾನಾಂವ್ - ಬಗಾರ್ ಹ್ಯಾ ಕಾಮಾಸಾಳಾಕ್ ಆಯ್ಲೆಲ್ಯಾ ಮಾನ್ ಸಯ್ರ್ಯಾಂನಿ ಸಾಂಗ್ಲಾಂ, ಆನಿಂ ತೆ ಮಾನ್ ಸಯ್ರೆಯ್ ಕಾಂಯ್ ಉಧ್ಯಮಿ ನ್ಹಯ್, ಸಾಹಿತಿ/ಚಿಂತ್ಪಿಚ್ ಜಾವ್ನಾಸಾತ್. ಹ್ಯಾ ಕಾಮಾಸಾಳಾಂತ್ ಎಕ್ಲ್ಯಾ ಉಲಂವ್ಚೆಂ ಆನಿಂ ಹೆರಾಂನಿ ಆಯ್ಕೊಂವ್ಚೆಂ ಬಿಲ್ಕುಲ್ ನ್ಹಯ್, ಸರ್ವಾಂಕ್ ಅಪಾಪ್ಲೆ ವಿಚಾರ್ ವೆಕ್ತ್ ಕರುಂಕ್/ಭಾಸಾಭಾಸ್ ಕರುಂಕ್ ಆವ್ಕಾಸ್ ಆಸಾ.
’ಬೂಕ್ ಸಮೀಕ್ಶಾ’ - ಅನ್ಯೇಕ್ ರಿತಿಚೆಂ ಅಭ್ಯಾಸ್, ಹೆಂ ಅಭ್ಯಾಸ್ - ಫಕತ್ ಬುಕಾಚಾ ವಳ್ಕೆಕ್ ಮಾತ್ರ್ ಸೀಮಿತ್ ಜಾಯ್ನಾಸ್ತಾಂ ಬುಕಾಚಾ ಚಿಂತ್ಪಾಚೆರ್, ಸಾಹಿತ್ಯಾಚೆರ್ ಭಾಸಾಭಾಸ್ ಜಾಂವ್ಚೆಂ ನಿಜಾಯ್ಕೀ ಮಿನತೆಚೆಂ ಕಾಮ್.
’ಕೊಂಕ್ಣಿ ಅಭಿಯಾನ್ ಸಮಿತಿ’ ಎದೊಳ್ಚ್ ವರ್ಸಾಕ್ ಎಕಾ ಕೊಂಕ್ಣಿ ಪತ್ರಾಕ್ ಆಧಾರ್ ದಿಂವ್ಚಾ ವಾಟೆನ್ ಚಮ್ಕಾತಾನಾ ಕಸಲೊಚ್ ಮುನಾಫೊ ಆಶೆನಾಸ್ತಾಂ, ಘರಾನ್ಘರ್ ವಚೊನ್ ಪತ್ರಾಂಕ್ ವರ್ಗಣ್ಯೊ ಎಕ್ಟಾಯ್ತಾ - ಕಸಲೆಂಚ್ ಕಮಿಶನ್ ಯಾ ಫಾಯ್ದೊ ನಾಸ್ತಾನಾ’.
’ದಾಯ್ಜ್ ಸಾಹಿತಿಕ್ ಸ್ಪರ್ಧೊ’ - ಎದೊಳ್ಚ್ ಕೊಣೆಂಯ್ ಕರಿನಾತ್ಲ್ಲಿಂ ಕಾಮಾಂ ಕರುನ್ ಜಾಲ್ಯಾಂತ್.
ಅಸಲೆಚ್ ಸಭಾರ್ ಬರೆ ಇರಾದೆ ಆಮ್ಚಾ ಮತಿಂತ್ ಆಸಾತ್ ಪುಣ್ ಆಮ್ಚೊ ಶೆವೊಟ್ ಆನಿಂ ಆಮಿಂ ಎದೊಳ್ ಪಾವ್ಲ್ಲ್ಯಾ ವಾಟೆಮಧೆಂ ಕಿತೆಂಯ್ ಆಸಾ ತರ್ ತೊ ’ವೇಳ್ಕಾಳ್’ ಮಾತ್ರ್.
’ದಾಯ್ಜ್’ ವಿಶಿಂ ತುಜಿಂ ಉಗ್ತಿಂ ಭಗ್ಣಾಂ-ಠೀಕಾ ಕಿತೆಂಯ್ ಆಸ್ಲ್ಯಾರ್ ತಿಂ ಆಮ್ಕಾಂ ಧಾಡುನ್ ದಿವ್ಯೆತಾ.
ಮಾಯಾಮೊಗಾಸವೆಂ,
ವಲ್ಲಿ ಕ್ವಾಡ್ರಸ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
