ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಆಧ್ಯಾತ್ಮಿಕ್ ಚಿಂತಾಪ್ ಖಂಚ್ಯಾಯ್ ಧರ್ಮಾಕ್ ಲಗ್ತಿ ಜಾಲ್ಲೆಂ ನ್ಹಯ್ ಪುಣ್ ಸರ್ವ್ ಧರ್ಮಾಂಚೆಂ ಮೂಳ್" - ಆವಾ
ಭಾವಾಡ್ತಾ ದಾಯ್ಜ್[ಕೊಂಕ್ಣೆಂತ್
ಮಾ|ಜೋರ್ಜ್ ಒಲಿವೆರಾಚಿ ವಳೊಕ್ ಚಡ್ತಾವಾಂಕ್ ಆಸ್ಚಿನಾ. ಸೆವಕ್ ಪತ್ರಾಚೊ ಆಧ್ಲೊ ಸಂಪಾದಕ್ ಜಾವ್ನ್ ವಾವ್ರ್ ಕೆಲ್ಲೊ ಹೊ ಪ್ರಸ್ತುತ್ ಕಾಪುಚಿನ್ ಮೆಳಾಚ್ಯಾ ಇಂಗ್ಲಿಶ್ ಪತ್ರಾಚೊ ಸಂಪಾದಕ್ ಜಾವ್ನಾಸಾ. ಸದ್ದ್ಯಾಕ್ ಮಯ್ಸೂರಾಂತ್ ಯಾಜಕೀ ಸೆವಾ ಭೆಟವ್ನ್ ಆಸ್ಚೊ ಹೊ ಏಕ್ ಕೊಂಕ್ಣಿ ಬರವ್ಪಿ, ಕವಿ ಆನಿ ಚಿಂತ್ಪಿ. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಜೊಡ್ಲ್ಲೊ, ಹ್ಯಾ ಅಂಕಣಾಂತ್ ತವಳ್ ತವಳ್ ಆಧ್ಯಾತ್ಮಿಕ್ ಚಿಂತ್ಪಾಚ್ಯಾ/ಭಾವಾಡ್ತಾಕ್ ಲಗ್ತಿ ಜಾಲ್ಲ್ಯಾ ವಿಚಾರಾಂಕ್ ಆಟಾಪ್ಚಿಂ ಲೇಖನಾಂ ಬರಯ್ತಲೊ - ಪುಣ್ ಹೆಂ ಅಂಕಣ್ ಶೆರ್ಮಾಂವಾಂಚೆಂ ಭಿಲ್ಕುಲ್ ನ್ಹಯ್ ಮ್ಹಳ್ಳೆಂ ಆಧ್ಯಾತ್ಮಿಕ್ ಸಾಹಿತ್ಯಾಕ್ ವಳ್ಕತೆಲ್ಯಾಂಕ್ ಜರೂರ್ ಸಮ್ಜಾತೆಲೆಂ.]
ತುಮ್ಚಿಂ ಸವಾಲಾಂ/ವಿಚಾರ್ ಧಾಡುಂಕ್ ವಿಳಾಸ್: info@daaiz.com
ಮಾ|ಜೋರ್ಜ್ ಒಲಿವೆರಾ
ನವ್ಯಾ ವರ್ಸಾಕ್ ನವೆ೦ ಚಿ೦ತಾಪ್
ಏಕ್ ಘಟನ್:-
ತೆ೦ ಏಕ್ ಪಯ್ಣ್. ಟ್ಯಾಕ್ಸಿ ರಭಸಾನ್ ಮುಕಾರ್ ದಾ೦ವ್ತಾಲಿ. ಪಯ್ಣಾರಿ ಟ್ಯಾಕ್ಸೆರ್ ಬಸೊನ್ ಹೆಣೆ೦-ತೆಣೆ೦ ನದರ್ ಘಾಲ್ತಾಲೊ. ಏಕ್ ಪಾವ್ಟಿ ತಾಣೆ೦ ಟ್ಯಾಕ್ಸಿ ಡ್ರೈವರಾಚ್ಯಾ ಪಾಟಿಕ್ ವ್ಹಳೂ ಅಪಡ್ಲೆ೦. ತ್ಯಾಚ್ ಕ್ಷಣಾ೦ ಡ್ರೈವರಾನ್ ಬ್ರೇಕ್ ದಾ೦ಬ್ಲಿ. ಡ್ರೈವರ್ ಘಾಬರ್ಲೊ. ಟ್ಯಾಕ್ಸಿಚೆ ಬೆಲೆನ್ಸ್ ಚುಕ್ಲ್ಲೆ೦. ಟ್ಯಾಕ್ಸಿ ರೊಡ್ ಉತೊರ್ನ್ ಫುಟ್ಪಾತಿ ವಯ್ರ್ ಚಡ್ಲ್ಲೆ೦! ರೊದಾ೦ ಹೆಣೆ೦-ತೆಣೆ೦ ಘುಂವೊನ್ ಲಾಗ್ಸಿಲ್ಯಾ ರುಕಾಕ್ ಯೆವ್ನ್ ಲಾಗ್ಲೆ೦. ಅತಾಂ ಪಯ್ಣಾರಿ ಗಾಬರ್ನ್ ಉಲಯ್ಲೊ: “ಮ್ಹಜಿ ಚೂಕ್ ಜಾಲಿ, ಹಾ೦ವೆ೦ ತುಕಾ ಡಿಸ್ಟರ್ಬ್ ಕೆಲೆ೦.” ಅತಾ ಡ್ರೈವರ್ ಚುರ್ಚುಲೊ: “ ಹಾ೦ತುಂ ತುಜಿ ಚೂಕ್ ನಾ. ಪಾಟ್ಲ್ಯಾ ಚಾಳಿಸ್ ವರ್ಸಾ ಥಾವ್ನ್ ಹಾ೦ವ್ ಮೊರ್ನಾಚಿ ಗಾಡಿ ಧಾ೦ವ್ಡಾಯ್ತಾಲೊಂ. ಕಾಲ್ ಮ್ಹಾಕಾ ರಿಟಯರ್ಡ್ ಜಾಲೆ೦. ಅಜ್ ಪಯಿಲ್ಲೆ೦ ಪಾವ್ಟಿ ಹಾ೦ವೆ೦ ಪ್ಯಾಸೆ೦ಜರ್ ಗಾಡಿ ಧಾ೦ವ್ಡಾವ್ಚಿ.. ಮಾಫ್ ಕರ್!”
ಚಾಳಿಸ್ ವರ್ಸಾಂ ಗಾಡಿ ಚಲಯ್ತಾನಾ ಡ್ರೈವರಾಚಿ ಪಾಟ್ ಕೊಣೆಂಯ್ ಥಾಪ್ಡು೦ಕ್ ನಾತ್ಲ್ಲಿ. ಮೊಡಿ೦ ಕೊಣಾಯ್ಚಿ ಪಾಟ್ ಥಾಪ್ಡು೦ಕ್ ವ್ಹಚಾನಾ೦ತ್. ಸವಯೆಕ್ ಪಡೊನ್ ತೊ ಸಮ್ಜಾಲ್ಲೊ ತಾಚಿ ಪಾಟ್ ಎಕಾ ಮೊಡ್ಯಾನ್ ಅಜ್ ಥಾಪಡ್ಲಿ! ತ್ಯಾ ಭಿಂಯಾನ್ ತಾಣೆ೦ ಗಾಡಿಯೆಕ್ ಬ್ರೇಕ್ ಧಾ೦ಬ್ಲಿ.
ವೇಳ್-ಘಡಿ:- ವೇಳ್-ಘಡಿ ದಾಖ೦ವ್ಚೆ೦ ಹಾತೆರ್ ಜಾವ್ನಾಸಾ ಘಡಿಯಾಳ್. ವೇಗಾನ್ ಚಲ್ಚ್ಯಾ ಘಡಿಯಾಳಾಕ್ ಚಡ್ ಮಹತ್ವ್ ನಾ. ತಸೆ೦ಚ್ ಸವ್ಕಾಸ್ ಚಲ್ಚ್ಯಾಘಡಿಯಾಳಾಕ್ ಮಹತ್ವ್ ಚಡ್ ನಾ. ಪುಣ್ ಕಾಮ್ ಕರಿನಾತ್ಲ್ಲೆ೦ ಘಡಿಯಾಳ್ ಹರ್ಯೆಕ್ ಚೋವಿಸ್ ವ್ಹರಾ೦ಕ್ ದೋನ್ ಪಾವ್ಟಿಂ ಸಾರ್ಕೊ ವೇಳ್ ದಾಖಯ್ತಾ!
ಫ್ರೆ೦ಚ್ ಸಾಹಿತಿ ವೊಲ್ಟೆರ್ ತಾಚ್ಯಾ ಕಾದ೦ಬರಿ೦ತ್ ಏಕ್ ಲಾ೦ಬ್ ಸವಾಲ್ ವಿಚಾರ್ತಾ: “ಸ೦ಸಾರಾ೦ತ್ಲೆ೦ ಲಾ೦ಬಾಯೆಚಿ೦ ತಸೆ೦ಚ್ ಮಟ್ವಿ೦, ಚಡ್ ವೇಗಾಚಿ ತಸೆ೦ಚ್ ಸವ್ಕಾಸಾಯೆನ್ ಮುಕಾರ್ ವೆಚಿ, ಚಡ್ ಭಾಗ್ ಕರು೦ಕ್ ಸಕ್ಚಿ೦ ತಸೆ೦ಚ್ ಚಡ್ ವಿಸ್ತಾರ್ ಅಸ್ಚಿ, ಸಕ್ಟಾಂನಿ ನೆಗಾರ್ ಕರ್ಚಿ, ತಸೆ೦ಚ್ ಸಕ್ಟಾಂನಿ ಚುರ್ಚುರ್ಚಿ ವಸ್ತ್, ಹ್ಯಾ ವಸ್ತೆವಿಣೆ ಕೊಣಾಯ್ಕ್ ಕಾ೦ಯ್ ಕರು೦ಕ್ ಜಾಯ್ನಾ, ಕಿತೆ೦ ಅಸುಲ್ಲೆ೦ ಗಿಳ್ತಾ, ಅಸ್ಲ್ಲೆ೦ ಸರ್ವ್ ಮಹಾನ್ ಕರು೦ಕ್ ಸಕ್ತಾ. ತರ್ ತಿ ವಸ್ತ್ ಕಸಲಿ?”
ತಾಕಾ ತೊಚ್ ಅಪ್ಲ್ಯಾ ಕಾದ೦ಬರಿ೦ತ್ ತಾಚ್ಯಾ ಹೀರೊ ಮುಖಾ೦ತ್ರ್ ಅಸಿ ಜಾಪ್ ದಿತಾ: “ವೇಳ್-ಘಡಿ.. ತಾಚ್ಯಾ ಪ್ರಾಸ್ ಚಡ್ ಖ೦ಚೆಂಯೀ ನಾ, ಕಿತ್ಯಾಕ್ ವೇಳ್-ಘಡಿ ಸಾಸಣ್ ಮೆಜ್ಚೆ೦ ಹಾತೆರ್ ಜಾವ್ನಾಸಾ. ತಾಚೆ೦ ತಿತ್ಲೆ೦ ಮಟ್ವೆ೦ ಖ೦ಚೆಯೀ ನಾ, ಕಿತ್ಯಾಕ್ ಎಕಾ ಮಟ್ವ್ಯಾ ಘಡ್ಯೆನ್ ತುಕಾ ಚಡಿತ್ ಕರು೦ಕ್ ಅಸಾಧ್ಯ್. ಅಶೆತೆಲ್ಯಾ೦ಕ್ ಸವ್ಕಾಸ್ ಜಾವ್ನ್ ಚಲ್ತಾ. ದಾಧೊಸ್ ಭಗ್ತೆಲ್ಯಾ೦ಕ್ ಚಡ್ ವೆಗಿ೦ ಖಬಾರ್ ಜಾತಾ. ವರ್ತೆ೦ಪಣಾ೦ತ್ ಸಾಸಣ್ ಲಾಗಿ೦ ಜಾಲ್ಯಾಪರಿ೦ ಭಗ್ತಾ. ಪುಣ್ ಮಟ್ವೆ೦ ಕರು೦ಕ್ ಗೆಲ್ಯಾರ್ ಫಕತ್ತ್ ಏಕ್ ಘಡಿ ನಿರ೦ತರ್ ಘಡಿಯೆ-ಸಾ೦ಕಳ್ ಜಾ೦ವ್ಕ್ ಸಕ್ತಾ. ಸಕ್ಕಡಿ ನೆಗಾರ್ ಕರ್ತಾತ್, ಸಬಾರ್ ಅವ್ಚಿತ್ತ್ ಪಾಶಾರ್ ಜಾಲ್ಲ್ಯಾ ಘಡಿಯೆ ವಿಷ್ಯಾ೦ತ್ ಚಿ೦ತಾ ಕರ್ತಾತ್. ವೇಳ್-ಘಡ್ಯೆವಿಣೆ೦ ಕೊಣಾಯ್ಕಿ ಜಿಯೆ೦ವ್ಕ್ ಅಸಾಧ್ಯ್. ನಾಕಾ ಜಾಲ್ಲೆ೦ ಸ೦ಗ್ತಿ೦ ವೇಳ್-ಕಾಳಾಚ್ಯಾ ಸಮಾಧೆ೦ತ್ ಪುರೊನ್ ವೆತಾತ್, ಪೂಣ್ ವಿ೦ಚ್ಣಾರ್ ಸ೦ಗ್ತಿ೦ ವೇಳ್-ಕಾಳಾರ್ ಅಮರ್ ಜಾತಾತ್. ವೇಳ್-ಕಾಳ್ ಮನ್ಶ್ಯಾ-ಕುಳಾಚೆ೦ ಏಕ್ ವಿ೦ಚ್ಣಾರ್ ದಾಯ್ಜ್.” ನವ್ಯಾ ವರ್ಸಾಕ್ ಭಿತರ್ ರಿಗ್ಲ್ಲ್ಯಾ ಅಮಾ ಸರ್ವಾ೦ಕ್ ವೇಳ್-ಘಡಿ ಸದಾ೦ ಬರೊ ಯೆವ್ಕಾರ್ ಮಾಗ್ತಾ.
ಮತ್- ಏಕ್ ತಳೆ೦ ನ್ಹಯ್, ಏಕ್ ನ೦ಯ್ ಜಾವ್ನ್ ವ್ಹಾಳಾಜಯ್:-
ಕನ್ನಡಾ೦ತ್ ಏಕ್ ಉತಾರ್ ಅಸಾ: ಮಾನಸ ಸರೋವರ. ಅಮ್ಚಿ ಮತ್ ಉದ್ಕಾಚ್ಯಾ ತಳ್ಯಾಕ್ ಸರಿ ಕೆಲ್ಯಾ. ತಳ್ಯಾಚೆ೦ ಉದಾಕ್ ಭಾಯ್ರ್ ಥಾವ್ನ್ ಯೆತಾ ತರೀ ತೆ೦ ಉದಾಕ್ ಬಾಯ್ರ್ ವ್ಹಚಾನಾ. ತಶೆ೦ಚ್ ಅಮ್ಚೆ೦ ಚಿ೦ತಾಪ್ ಭಾಯ್ರ್ ಥಾವ್ನ್ ಅಯಿಲ್ಲೆಂ ಭಾಯ್ರ್- ಭಿತರ್ ಗೆಲ್ಯಾರ್ ನ೦ಯ್ ಬಾಶೆನ್ ವ್ಹಾಳೊನ್ ಗೆಲ್ಯಾರ್ ಅಮ್ಚ್ಯಾ ವ್ಯಕ್ತಿತ್ವಾಕ್ ಚಡ್ ಸೊಭಾಯ್ ದಿತಾತ್. ಭೌಧ ಸಮೊಡ್ತಿಚ್ಯಾ ಜಾಣ್ಯಾರಾಂನಿ ಸಾ೦ಗ್ಚ್ಯಾ ಫರ್ಮಾಣೆ೦ ಅಮ್ಚ್ಯಾ ಮ್ಹತಿ೦ತ್ ಹರ್ಯೆಕಾ ಚೊವೀಸ್ ವೊರಾ೦ ಲಾಗಿ೦ ಲಾಗಿ೦ ಪನ್ನಾಸ್ ಹಜಾರ್ ಚಿ೦ತ್ನಾ೦ ಅಶಾರ್-ಪಾಶಾರ್ ಜಾತಾತ್. ಹರ್ಯೆಕ್ ಚಿ೦ತ್ನಾ೦ ಮೆಜು೦ಕ್ ಘೆಲ್ಯಾರ್ ನಿಜಾಯ್ಕೀ ಅಮ್ಕಾ೦ ಬ್ರೇಕ್-ಡಾವ್ನ್ ಜಾತೆಲೆ೦. ದೆಕುನ್ ಅಮಿ ಮೆಜ್ಚೆ೦ ನಾಕಾ! ಹ್ಯಾ ಪನ್ನಾಸ್ ಹಜಾರ್ ಚಿ೦ತ್ನಾ೦ ಅಮ್ಕಾ ಪ್ರಭಾವ್ ಘಾಲ್ತಾತ್. ಸ೦ತೊಸಾಚಿ ಚಿ೦ತ್ನಾ೦ ಸ೦ತೊಸ್ ದಿತಾತ್, ಬೆಜಾರಾಯೆಚಿ ಚಿ೦ತ್ನಾ೦ ಬೆಜಾರಾಯ್ ದಿತಾತ್, ಖುಶಾಲಾಯೆಚಿ ಚಿ೦ತ್ನಾ೦ ಖುಶಾಲಾಯ್ ದಿತಾತ್. ಸಮಾಧಾನೆಚಿ ಚಿ೦ತ್ನಾ೦ ಸಮಾಧಾನ್ ದಿತಾತ್. ಅಮಿ ಅಮ್ಚಿ೦ ಚಿ೦ತ್ನಾ೦ ತಳ್ಯಾ ಉದ್ಕಾ೦ ಪರಿ೦ ಭಿತರ್ ದವ್ರುನ್ ಖರ್ಗೊ೦ಚೆ೦ ನ್ಹ೦ಯ್. ಪುಣ್ ನ೦ಯ್ ಬಾಶೆನ್ ನವೆ೦ ಉದಾಕ್ ಯೆತಾನಾ ಕಶೆ೦ ಪರ್ನೆ೦ ಉದಾಕ್ ತ್ಯಾ ಜಾಗ್ಯಾಥಾವ್ನ್ ಮುಕಾರ್ ವೆತಾಗೀ ತ್ಯಾಚ್ ಬಾಶೆನ್ ಪರ್ನ್ಯಾ ಚಿ೦ತ್ಪಾಕ್ ವಿದಾಯ್ ಕರುನ್ ನವ್ಯಾ ಚಿ೦ತ್ನಾ೦ಕ್ ಅಮಿ ಸ್ವಾಗತ್ ಕರಿಜಾಯ್. ಹರ್ಯೆಕ್ ಚಿ೦ತ್ನಾಚಿ ವೇಳ್-ಘಡಿ ಏಕ್ ಕ್ಷಣ್ ಮಾತ್ರ್. ಖ೦ಚೆಂಯ್ ಚಿ೦ತಾಪ್ ಚಡ್ ಕಾಳ್ ಅಮ್ಚ್ಯಾ ಮ್ಹತಿ೦ತ್ ದವರ್ಚೆ೦ ಸ್ವಾತ೦ತ್ರ್ ಅಮ್ಚ್ಯಾ ಹಾತಾ೦ತ್ ಅಸಾ. ಅಮ್ಕಾ೦ ಭರ್ವಸೊ ದಿ೦ವ್ಚಿಂ ಚಿ೦ತ್ನಾ೦ ಚಡ್ ಕಾಳ್ ಅಮ್ಚ್ಯಾ ಮ್ಹತಿ೦ತ್ ಅಟವ್ಯಾಂ ಅನಿಂ ಅಮ್ಕಾ೦ ನಿರಾಸ್ ದಿ೦ವ್ಚಿ೦ ಚಿ೦ತ್ನಾ೦ ಅಮಿ ಜಾತಾ ತಿತ್ಲ್ಯಾ ವೆಗಿ೦ ಮ್ಹತಿ೦ತ್ ಥಾವ್ನ್ ಭಾಯ್ರ್ ಘಾಲ್ಯಾಂ. ತುಮ್ಚೆ೦ ನವೆ೦ ವರಸ್ ತುಮ್ಕಾ೦ ಭರ್ವಾಸ್ಯಾನ್ ಭರು೦.
ಭಾವಾಡ್ತಾ ದಾಯ್ಜ್ 1: ಜಿವಿತಾ ಉಪ್ರಾಂತ್ ಜಿವಿತ್.
ಭಾವಾಡ್ತಾ ದಾಯ್ಜ್ 2: ಪಾಕ್ಸ್ ಅಮೇರಿಕನಾ ಕ್ರಿಸ್ಮಸ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
