ಕವಿತಾकविताPoem
ನವೆ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕವಿತಾಪಾಠ್ - 2006 ವರ್ಸಾಕ್ ಆನಿ ನವೆ ಸಂಯೋಜಕ್
ಜೊಮೇಲ್, ಬೊಂದೆಲ್
ಆಂಟನಿ ಮಿನೇಜಸ್, ಬೊಂದೆಲ್
ಪೀಟರ್ ಕ್ಯಾಸ್ತಲಿನೊ
ಮುಖೆಲ್ ಸಂಯೋಜಕ್
ಸಹ ಸಂಯೋಜಕ್
ಕವಿತಾಪಾಠ್ ಪೋಶಕ್
ಕವಿತಾಪಾಠ್ - ಗುಮಾಟ್ಗೀ ಧೊಲ್!!
ಸಾಹಿತ್ಯ್ ಏಕ್ ದರ್ಯೊ ತರ್ ಕವಿತಾ ತ್ಯಾ ದರ್ಯಾಂತ್ಲೊ ಏಕ್ ಘೊಟ್, ಹೊ ದರ್ಯೊಯ್ ಇತ್ಲೊ ವಿಸ್ತಾರ್
ಮ್ಹಳ್ಯಾರ್ ಹಾಂತ್ಲ್ಯಾ ಎಕೆಕಾ ಥೆಂಬ್ಯಾಂನಿ ಸಂಸಾರ್ ಕಿತ್ಯಾಕ್ ಸಗ್ಳೆಂ ಬ್ರಹ್ಮಾಂಡ್ಚ್ ಲಿಪ್ಲಾಂ. ಕವಿ ಮಾತ್
ನಿರಂತರ್ ರಿತಿನ್ ಹ್ಯಾ ಘೊಟಾಚಾ ಮಿಸ್ತೆರಾಂಚಾ ಗೊಂದೊಳಾಕ್ ತಿಳ್ತಾ, ರಿಗ್ತಾ, ಭಾಯ್ರ್ ಯೆತಾ, ಪರತ್
ತಿಳ್ತಾ, ರಿಗ್ತಾ - ಎಕೆಕಾ ನವ್ಯಾ ಜಿನೊಸಾರ್ ಭಾಯ್ರ್ ಯೆತಾ.
ಹೊ ಅನ್ಭೋಗ್, ಹಿ ಪರಿಪಿಕಾಯ್?, ಹಿ ಜಾಣ್ವಾಯ್?
ಅಪ್ಣಾಕ್ ಹ್ಯಾ ಘೊಟಾಂತ್ಲ್ಯಾ ಮಿಸ್ತೆರಾಚಾ ಕಾಳೊಕಾಂತ್ ಅಪ್ಲ್ಯಾ ಶೆವೊಟಾಕ್ ಪಾಂವ್ಚಿ ಶ್ಯಾಥಿ ಆಸಾಗೀ ಮ್ಹಳ್ಳ್ಯಾ
ಭೋವ್ಶಾ ದುಭಾವಿ ಪಾವ್ಲಾಂಕ್ ತೊ ಖರೆಂಪಣಿಂ ಸಮ್ಜೊಂಕ್ ಸಕಾನಾಸ್ತಾಂ ಪರತ್ ಪರತ್ ಭಾಯ್ರ್
ಯೆತಾ. ಎಕಾ ವಾಟೆರ್ ಎಕ್ಸುರ್ಪಣ್, ದುಸ್ರೆ ವಾಟೆರ್ ಅಪ್ಣಾಕ್ ಹೊಗ್ಡಾಂವ್ಕ್ ಪಡ್ಚೊ ಲೌಕಿಕ್ ಸಂಗ್ತ್ಯೊ,
ತಿಸ್ರ್ಯಾ ವಾಟೆರ್ ಹ್ಯಾ ವಾಟೆಕ್ಚ್ ವಿಸ್ರಾಲ್ಲ್ಯಾಂಚೆ ಹಿಶಾರೆ ಆನಿ ಅಖ್ರೇಕ್ ಭಾಯ್ರ್ ರೆಂವೆರ್ ಪಡ್ಲ್ಲ್ಯಾ
ಫಾತ್ರಾಂಚಾ ಭಾಯ್ಲ್ಯಾ ರುಪಾಂಕ್ಚ್ ’ಮೊತಿಯಾಂ’ ಮ್ಹಣ್ ಸೊಭಂವ್ಚಾ ಲೊಕಾಂಚೆಂ ಬೇಕೂಫ್ಪಣ್, ಫುಡ್ಲ್ಯಾ ಪಾವ್ಲಾಂನಿ ಬಿಲ್ಕುಲ್ ಉಜ್ವಾಡ್ ಫಾಂಕಯ್ನಾ. ತಾಚೆಮಧೆಂ ’ಕೊಣಾಕ್ ಕಿತೆಂ ಫಾಯ್ದೊ?’
ಮ್ಹಳ್ಳಿಂ ದೈವಿಕ್ ಸವಾಲಾಂ!! ತರ್ಯ್ ಹ್ಯಾ ಥೆಂಬ್ಯಾಂನಿ ಆಟಾಪ್ಚೆ ಎಕೇಕ್ ಮಿಸ್ತೆರ್ ಸಮ್ಜಾಜಾಯ್
ತರ್ ಕೊಣಾಚೆಂ ಆವ್ಕ್ ಸಂಪ್ತೆಲೆಂ ತರ್ಯ್ ಹಿ ಪ್ರಕ್ರಿಯಾ ನಿರಂತರ್ ರಿತಿನ್ ಜಾಯ್ಜಯ್ ಮ್ಹಳ್ಳೆಂ
ಮ್ಹಜೆಂ ಚಿಂತಾಪ್.
ಕೊಂಕ್ಣಿ ಕವಿತಾಶೆತಾಂತ್ ಸಭಾರ್ ರಿತಿಚೆಂ ನವೆಸಾಂವ್ ಜಾವ್ನ್ ಆಸಾ, ಆಸಾಜಯ್, ಆಸೊಂ. ಪುಣ್ ಕವಿತಾಪಾಠ್
ಹ್ಯಾ ಪ್ರಕಾರಾಂನಿ ವೆಗ್ಳಿ ವಾಟ್ ಚಲೊನ್ ಆಸಾ,
2005
ಇಸ್ವೆಂತ್ ಸಭಾರ್ ಕವಿತಾಜಮೆ ಆಯ್ಲೆ, ’ವ್ಹಳೂ ವ್ಹಳೂ ವ್ಹಾಳ್
ವ್ಹಾಳ್ಯಾ’, ’ಕಟ್ಪುತ್ಳಿ’, ’ಕಯ್ದ್ಯಾಚ್ಯೊ ಕವಿತಾ’,
’ಪಿಂತುರಾಂ’, ’ಮಂಥನ್’, ’ಮೊತಿಯಾಂ ಆನಿ ತಾರಾಂ’,
’ಕಾಳೊಕಾಂತ್ಲಿಂ ಕಾಂತಾರಾಂ’,
’ಕವಿತಾಪಾಠ್ ಪಯ್ಲೊ ಭಾಗ್’, ’ಪೆಟ್ನೊಳಿ’.
ಆಮ್ಕಾಂ ಧಾದೊಸ್ಕಾಯ್ ಆಸಾ ಹಾಂತ್ಲ್ಯಾ ಚಡ್ತಾವ್ ಬುಕಾಂಚೆರ್ ಆಮಿ ಸಮೀಕ್ಶಾ ಚಲಯ್ಲ್ಯಾ,
ಆನಿ ಹೆರ್ ಬುಕಾಂಚೆರ್ ಸಮೀಕ್ಶಾ ಚಲಂವ್ಚಿ ಪ್ರಕ್ರಿಯಾ ಚಾಲುಚ್ ಆಸಾ. ಆಮ್ಚೆಲಾಗಿಂ ಆಸ್ಚೊ ವೇಳ್, ದುಡು,
ಶಿಕ್ಚಿ ಉರ್ಭಾ ಆಸ್ಚೊ ಲೋಕ್ ಜರೂರ್ ಉಣೊಂ ಆಸಾ ತರ್ಯ್ ಎಕಾ ಸಂಗ್ತೆಚೆಂ ಆಮ್ಕಾಂ ಉಣೆಂಪಣ್
ಭೊಗಾನಾ - ಹುಮೆದ್, ಉರ್ಭಾ, ಆಸಕ್ತ್ ಆನಿ ಅಪ್ಣಾನ್ ಕೆಲ್ಲೆಂ ಯಾ ಕರ್ಚೆಂ ಕಾಮ್ ಬರೆಂ ಮ್ಹಳ್ಳೆಂ
ಸಮಧಾನ್.
ಥೊಡ್ಯಾಂನಿ ಕವಿತಾಪಾಠಾಚಾ ಅಸ್ತಿತ್ವಾಚೆರ್ ಸವಾಲಾಂ ಕೆಲ್ಲಿಂ ಆತಾಂ ತಾಳೊ ಬದ್ಲುನ್ ಪೆಂಪಾರೆಂ ವಾಜಯ್ತಾತ್
- ವಾಜಂವ್ ಆನಿ ಗಾಜಂವ್!, ಕವಿತಾಪಾಠ್ ಆನಿ ಕೊಣಾಕ್ ಅಜೂನ್ ನಾಂವಾಖಾತಿರ್ ಮ್ಹಣ್ ದಿಸೊಂಕ್ ಪುರೊ,
ಕೊಣಾಕ್ ಎಕೆಕಾ ಕವಿತಾಪಾಠಾಂತ್ ಆಮಿ ಕಾಡ್ಚಾ ವಾಂವ್ಟಿವಿಶ್ಯಾಂತ್ ಸಮ್ಜಣಿ ಸೊಡ್, ಪಳೆಂವ್ಚಿ ನದರ್ಚ್
ಕುಡ್ಡಿ ಜಾಲ್ಯಾ. ಪುಣ್ ಆಮ್ಚೊ ಇರಾದೊ ತೊ ನ್ಹಯ್, ಆಮ್ಚೊ ಇರಾದೊ ಆಮ್ಚಾ ಚಿಂತ್ಪಾಚಿ, ಆಮ್ಚಾ
ವಿಚಾರಾಂಚಿ ವ್ಹಾಡಾವಳ್. ಹೆಂ ಆಮ್ಚಾ ಅತ್ಮ್ಯಾಕ್ ಸರಿ ಜಾವ್ನ್ ಜಾಲಾಂ ವಾ ಜಾತಾ ತರ್ ಹೆರ್ ಸಗ್ಳೆಂ ನಶ್ವರ್.
ಸಂಸಾರಾಚಿಂ ಬಾಜಾರಿ ಚಿಂತ್ನಾಂ ಆಮ್ಕಾಂ ಕಿತ್ಯಾಕ್? ಅಪ್ಣಾಚೆಂ ಬರೆಂಪಣ್ ಜಾತಾ ತರ್ ಮಾತ್ರ್ ಹೆರಾಂಕ್
ವಾಖಣ್ಣುಂವ್ಚಿ ರಾಂಡ್ಬಾಜ್ ಮನೋಗತ್ ಆಮ್ಕಾಂ ತರ್ಯ್ ನಾಕಾ. ಅಸಲ್ಯಾಂಕ್ ಮ್ಹಜಿ ಸಂಪಿ ಜಾಪ್
ಹಿ; ’ಎಕಾ ಸುಭಾಗಿಚಾ ಘರಾ ಎಕ್ಲೊ ಚೋರ್ ಆಯ್ಲ್ಯಾರ್ಯ್ ತೊ ಸುಭಾಗಿ ತ್ಯಾ ಚೊರಾಕ್ ಸುಭಾಗಿಚೊ
ಮಾನ್ ದಿತಲೊ, ತಶೆಂಚ್ ಎಕಾ ಫಟ್ಟಿಂಗಾಚಾ ಘರಾ ಏಕ್ ಸುಭಾಗಿ ಆಯ್ಲೊ ತರ್ ತೊ ತಾಕಾಯ್
ಫಟ್ಟಿಂಗ್ ಮ್ಹಣ್ ಲೆಖ್ತಲೊ - ಹಾಂತುಂ ಆಪಾಪ್ಲ್ಯಾ ಚಿಂತ್ಪಾಚಿ ಚೂಕ್ ಶಿವಾಯ್ ಸಂಸರಾಚಿ ನ್ಹಯ್.
ಅಪ್ಣಾಚೆಂ ಚಿಂತಾಪ್ ತೀನ್ ಕಾಸಾಂಚೆಂ ತರ್ ಹೆರಾಂವಿಶಿಂ ಬರೆಂ ಚಿಂತಾಪ್ ಯೆಂವ್ಚೆಂ ತರ್ಯ್ ಕಶೆಂ?’
ಕವಿತಾಪಾಠ್ ಕೊಂಕ್ಣಿ ಸಾಹಿತ್ಯಾಚೊ ಏಕ್ ಪ್ರಕಾರ್ ಮ್ಹಣ್ತಚ್, ಆಮ್ಚಾ ಸಮಾಜೆಂತ್ ಕೊಂಕ್ಣಿ ಶೆತಾಚಾ
ವೆವೆಗ್ಳ್ಯಾ ಪ್ರಕಾರಾಂನಿ ವಾವ್ರ್ ದಿಲ್ಲ್ಯಾ/ದಿಂವ್ಚಾ ಮಾನೆಸ್ತಾಂಕ್ ಆಮಿಂ ಹ್ಯಾ ಕವಿತಾಪಾಠಾಂಕ್ ಆಪವ್ನ್
ಜೊಕ್ತೊ ಮಾನ್ ದಿಲಾ. ಹ್ಯಾ ಕವಿತಾಪಾಠಾಕ್ ಆಯಿಲ್ಲ್ಯಾ ಹೆರ್ ಭಾಸಾಂಚಾ ಸಾಹಿತಿಂನಿ ಹಾಂತುಂ ಚಲ್ಚಿ ಸಾಹಿತಿಕ್
ಭಾಸಾಭಾಸ್ ವಾಖಣ್ಲ್ಯಾ. ಆಯ್ಲೆವಾರ್ ಉದೆವ್ನ್ ಆಯಿಲ್ಲಿಂ ತರ್ಯ್ ಎದೊಳ್ಚ್ ಭರ್ವಶ್ಯಾಚಾ ಪಾವ್ಲಾಂನಿ
ಚಲ್ಚಾ ಥೊಡ್ಯಾಂಚೊ ತರ್ಯ್ ಉಲ್ಲೇಕ್ ಕೆಲೊನಾ ತರ್ ಮ್ಹಜಿಂ ಉತ್ರಾಂ ಸಂಪೂರ್ಣ್ ಜಾಂವ್ಚಿನಾಂತ್;
ಕವಿತಾ ಬರಂವ್ಚಾಂತ್ ’ಜೊಮೆಲ್ ಬೊಂದೆಲ್’, ’ಮೆಲ್ವಿನ್ ಜೆ ವಾಸ್ ಕೆಲರಾಯ್’ ಮುಖಾರ್ ಪಾವ್ಲ್ಯಾತ್
ತರ್ ಹೆರಾಂಯ್ ಕಾಂಯ್ ಪಾಟಿಂ ನಾಂತ್ ಮ್ಹಣ್ಚಾಕ್ ’ಪ್ರಿಯಾ ಸಿಕ್ವೇರಾ, ಫೆರಾರ್’ ದಾಖ್ಲೊ.
ಹೆಂ ತರ್ನ್ಯಾಂಕ್ ಮಾತ್ರ್ ನ್ಹಯ್, ಪರ್ನ್ಯಾಂಕ್ ಸಯ್ತ್ ಸೀಮಿತ್ ಮ್ಹಣ್ಚಾಕ್ ’ಐಡಾ ಡಿ’ಸಿಲ್ವಾ’,
’ಸಿರಿಲ್ ಪೆರಿಸ್’, ’ರೋಬರ್ಟ್ ಕ್ರಾಸ್ತಾ’. ಹಾಚೆಸವೆಂ ಹೆರಾಂಯ್ ಪ್ರೇತನ್ ಕರುನ್ ಆಸಾತ್ ಆನಿ ಹೆಂಚ್
ಪ್ರೇತನ್ ಜ್ಯಾರಿ ದವರ್ತಿತ್ ತರ್ ಫುಡ್ಲ್ಯಾ ದಿಸಾಂನಿ ಅಪ್ಲಿ ಅಸ್ಮಿತಾಯ್ ದೀಂವ್ಕ್ ಪಾವ್ತೆಲಿಂ.
ವಿಮರ್ಸೊ/ಸಮೀಕ್ಶಾಂತ್ ಭೋವ್ಶಾ ಮೆಲ್ವಿನ್ ಜೆ ವಾಸ್ ಹಾಣೆಂ ಭರ್ಪೂರ್ ಮಿನತ್ ಕರುನ್, ಬರ್ಯಾಂತ್ಲಿಂ
ಬರಿಂ ಲೇಕನಾಂ ಬರಯ್ಲ್ಯಾಂತ್ ಆನಿಂ ಅಪ್ಲ್ಯಾ ಮಿನತೆನ್ ಆಜ್ ಇತ್ಲೊ ಮುಖಾರ್ ಪಾವ್ಲಾ ಮ್ಹಣೊಂಕ್
ಮ್ಹಾಕಾ ಭೊವ್ ಸಂತೊಸ್ ಭೊಗ್ತಾ.
ಕವಿತಾಪಾಠಾಕ್ ಪರೋಕ್ಶ್ ರಿತಿನ್ ಪರ್ಗಾಂವ್ಚಾ ಸಭಾರ್ ಕವಿಂಚೊ ಪಾಟಿಂಬೊ ಮೆಳ್ಳಾ ತಶೆಂಚ್ ಮೆಳೊನ್ಂಚ್
ಆಸಾ, ಆಂಡ್ರು ಡಿ’ಕುನ್ಹಾ, ಮೆಲ್ವಿನ್ ರೊಡ್ರಿಗಸ್, ಆರ್ಥರ್ ಪಿರೇರ್, ರೋಬರ್ಟ್ ಫೆರ್ನಾಂಡಿಸ್ ಆನಿ ಹೆರ್
ಥೊಡಿಂ.
ಎದೊಳ್ಚ್ ಕವಿತಾಪಾಠ್ ಹಾಚೊ ಪಯ್ಲೊ ಬೂಕ್ ಪರ್ಗಟ್ಲಾ, ದುಸ್ರೊ ಬೂಕ್ ಯೆಂವ್ಚಾ ವರ್ಸಾ ಪರ್ಗಟ್
ಜಾತಲೊ, ತಾಚೆಸವೆಂ ಭರ್ವಶ್ಯಾಚಾ ಕವಿಂಚಾ ಕವಿತಾಂಕ್ ಎಕ್ಟಾಂವ್ನ್ ಪರ್ಗಟ್ತೆಲ್ಯಾಂವ್. ಹಾಚೆಸವೆಂ
ಕವಿತಾಂಚೆ ಹೆರ್ ಪ್ರಕಾರಾಂಚೆ ಬೂಕ್ಯ್ ಪರ್ಗಟ್ಚೊ ಆಮ್ಚೊ ವಾವ್ರ್ ಆಮಿ ಮುಖಾರ್ಸಿತೆಲ್ಯಾಂವ್.
ಕವಿತಾಪಾಠ್ ನವ್ಯಾ ವರ್ಸಾಕ್ ಪಾಂಯ್ ತೆಂಕ್ಚಾ ವಗ್ತಾ ನವ್ಯಾ ಸ್ಪಿರಿತಾನ್, ನವ್ಯಾ ದಿಶೆಂತ್ ಅಪ್ಲಿಂ ಪಾವ್ಲಾಂ
ಕಾಡುಂಕ್ ವೆಚಾರ್ ಆಸ್ತಾಂ, ನವ್ಯಾ ಚಿಂತ್ಪಾಚೆ ಕವಿ ಹಾಚೆಂ ಸಂಯೋಜಕ್ಪಣ್ ಘೆತೆಲೆಂ, ಹಾಚೆಸವೆಂ
ಕವಿತಾಪಾಠಾಂತ್ ಗರ್ಜೆಚಿ ಬದ್ಲಾವಣ್ ಜಾತೆಲಿ, ಹರ್ಯೆಕಾ ಮಯ್ನ್ಯಾಂತ್ ಎಕಾ ಪಿಂತುರಾಚೆರ್ ಪ್ರೇರಣ್
ಘೆವ್ನ್ ಕವಿತಾ ಬರಂವ್ಕ್, ಆನಿ ಹಾಂತ್ಲ್ಯಾ ಎಕಾ ಕವಿತೆಕ್ ’ಮಯ್ನ್ಯಾಚೆಂ ಕವಿತಾ’ ಜಾವ್ನ್ ಇನಾಮ್
ಮೆಳ್ತೆಲೆಂ ಆನಿ ’ತಿಂತೆರಾಂತ್
ಪಿಂತುರಾಂ’ ಅಂಕಣಾಂತ್, ಎಕಾ ಪಿಂತುರಾಚೆರ್ ಹೆರಾಂಚೆ ವಿಚಾರ್ ಎಕಾಮೆಕಾ ಸಮ್ಜೊಂಕ್ ಆವ್ಕಾಸ್ಯ್ ಮೆಳ್ತಲೊ.
ಕವಿತಾ ಎಕೆಕ್ಲ್ಯಾಚಾ ಮತಿರ್ ಎಕೆಕ್ ರಿತಿಚೊ ಅರ್ಥ್ ದಿತಾ ತರ್ಯೀ ಏಕ್ ಸತ್ ಮಾತ್ರ್ ಕೊಣ್ಯ್
ನೆಗಾರ್ ಕರಿಶೆನಾಂತ್ - ಕವಿತಾ ಸಾಹಿತಿಕ್ ಪ್ರಕಾರಾಂತ್ ಇತ್ಲೊಚ್ ಗರ್ಜೆಚೊ, ಜಿತ್ಲೊ ಹೆರ್ ಖಂಚೋಯ್
ಪ್ರಕಾರ್ ಆಸ್ಚೊ. ಹರ್ಯೆಕಾ ಕವಿತಾಪಾಠಾಚೆರ್ ಹ್ಯಾ ವರ್ಸಾ ಆಮಿಂ ಎಕಾ ಬುಕಾಚೆರ್ ಸಮೀಕ್ಶಾ, ತಶೆಂಚ್
ಎಕಾ ಕವಿತೆಕ್ ಲಿಸಾಂವ್ ಜಾವ್ನ್ ಘೆವ್ನ್ ತಾಚೆರ್ ಅಧ್ಯಯನ್ ಚಲಯ್ಲಾಂ, ಫುಡೆಂಯ್ ಹಿ ರಿವಾಜ್
ಪಾಳ್ತೆಲ್ಯಾಂವ್ ತರ್ಯೀ ಏಕ್ ಕವಿತಾ ಆನಿ ತಾಚಾ ಕವಿಥಾವ್ನ್ ತ್ಯಾ ಕವಿತೆಕ್ ಮೆಳ್ಲ್ಲ್ಯಾ ಪ್ರೇರಣಾಕ್
ಆಮಿಂ ಸಮ್ಜೊಂಕ್ ಪ್ರೇತನ್ ಕರ್ತೆಲ್ಯಾಂವ್.
ಕೊಣ್ಯ್ ಮ್ಹಣೊಂ ಹೆಂ ಆಮ್ಚೆಂ ಗುಮಾಟ್ ಯಾ ಧೊಲ್!!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.