ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಏಕ್ ಕ್ರಿಕೆಟ್ ಹೀರೊ
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್, ಆಯ್ಕೊಳ್), ಖಣ್ (ವಲ್ಲಿ ಕ್ವಾಡ್ರಸ್), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಕ್ರಿಸ್ಮಸ್ ಕಾಣಿಕ್.
ವಲ್ಲಿ ಕ್ವಾಡ್ರಸ್
ಕಂಗಾಲಾಚಾ ಶಿರಾಂ ಶಿರಾಂನಿ ವ್ಹಾಳ್ಚಾ ರಗ್ತಾಸವೆಂ ಕ್ರಿಕೆಟಿಚೆಂ
ಪಿಶೇಂಯ್ ವ್ಹಾಳ್ತಾಲೆಂ ಮ್ಹಣೊನ್ ತಾಕಾ ವಳ್ಕಾಲ್ಲೆ ಕುಕ್ಕೆಹಳ್ಳೆಂತ್ಲೆ
ಸರ್ವ್ ಸಾಂಗ್ತಾಲೆ. ಕ್ರಿಕೆಟ್ ಮ್ಹಳ್ಯಾರ್ ಜಾಲೆಂ; ಜಾಂವ್ ತೆಂ ರಣ್ಜಿ, ದುಲೀಪ್ ಟ್ರೋಫಿ, ಇರಾನಿ ಕಪ್, ಕೌಂಟಿ ಯಾ ಅಂತರ್ರಾಷ್ಟ್ರೀಯ್
ಮೆಚಾಂ, ಟೆಸ್ಟ್ ಯಾ ವನ್ಡೇ. ಟಿವಿಂತ್ ಯೆಂವ್ಚೆಂ ಹರ್ಯೆಕ್
ಮೇಚ್ ತೊ ಚುಕಾನಾಸ್ತಾಂ ಪಳೆತಾಲೊ. ಪತ್ರಾಂನಿ ಯೆಂವ್ಚಿ
ವರ್ದಿ ಚುಕಾನಾಸ್ತಾಂ ವಾಚ್ತಾಲೊ.
ಮಧ್ಯಮ್ ವರ್ಗಾಚೊ ಕಂಗಾಲ್ ತಾಚಾ ಆವಯ್ ಬಾಪಾಯ್ಚೊ ಎಕ್ಲೊಚ್
ಪೂತ್ ದೆಕುನ್, ಆಪ್ಣಾಪರಿಂ ತಾಣೆಂ ಕಾರ್ಖಾನ್ಯಾಂನಿ ಘೊಳ್ಚೆಂ
ನಾಕಾ, ಬಗಾರ್ ದೊತೊರ್ ಯಾ ಇಜ್ನೆರ್ ಜಾಂವ್ ಮ್ಹಳ್ಳ್ಯಾ ಇರಾದ್ಯಾನ್ ತಾಚಾ
ಬಾಪಾಯ್ನ್ ತಾಕಾ ಬರೆಂ ಶಿಕಾಪ್ ದಿಲ್ಲೆಂ. ಪುಣ್ ಶಿಕ್ಪಾಂತ್ ಕಂಗಾಲ್ ದಾಡ್ಡೊ
ನ್ಹಯ್ ತರ್ಯ್ ಏಕ್ದಮ್ ಹುಶಾರ್ಯ್ ನ್ಹಯ್. ತಾಚಿ
ವೋಡ್ ಮಾತ್ರ್ ಖೆಳ್, ತೋಯ್ ಕ್ರಿಕೆಟ್. ಲ್ಹಾನ್ ಆಸ್ತಾನಾಂಚ್ ತೊ ರೆಡಿಯೊರ್ ಗವಾಸ್ಕರಾನ್ ಖೆಳ್ಚೆಂ, ಕಪಿಲ್ ದೇವಾನ್ ಬೌಲಿಂಗ್ ಕರ್ಚೆವಿಶ್ಯಾಂತ್ ಆಯ್ಕೊನ್
ವಡ್ ಜಾಲ್ಲೊ ಮಾತ್ರ್ ನ್ಹಂಯ್, ಆಪುಣ್ಯ್ ವಡ್ಲೊ ಜಾತೆಚ್ ಏಕ್ ಖೆಳ್ಘಾಡಿ ಜಾತಲೊಂ ಮ್ಹಳ್ಳೆಂ ಚಿಂತಾಪ್
ಮತಿಂತ್ ಖಂಚವ್ನ್ ವಡ್ ಜಾಲ್ಲೊ.
ಇಸ್ಕೊಲಾಂತ್ ಜಾಲ್ಯಾರ್ಯ್ ತೊ ಏಕ್ ಆಲ್ರೌಂಡರ್ ಜಾಲ್ಲೊ, ಬೌಲಿಂಗ್ ಜಾಂವ್,
ಫೀಲ್ಡಿಂಗ್ ಯಾ ಬ್ಯಾಟಿಂಗ್, ತಿನಾಂಯ್ತಿ ಹುಶಾರ್ ಆಸ್ಲ್ಲೊ. ಕಿತ್ಯಾಕ್ ಮ್ಹಳ್ಯಾರ್ ತೊ
ಲ್ಹಾನ್ ಆಸ್ತಾನಾ ಥಾವ್ನ್ ಇಸ್ಕೊಲಾ ಥಾವ್ನ್ ಘರಾ ಆಯಿಲ್ಲೊಚ್, ಖೆಳಾಂಗ್ಣಾಕ್ ಧಾಂವ್ತಾಲೊ ಆನಿಂ ಭುಮಿಚೆರ್ ಕಾಳೊಕ್
ಪಡ್ತಾಪರ್ಯಾಂತ್ ಖೆಲ್ತಾಲೊ. ಇಸ್ಕೊಲಾಚಾ ಟಿಮಾಚೊ ತೊ ಕೆಪ್ಟನ್ ಜಾಲ್ಲೆವರ್ವಿಂ ತಾಲೂಕ್
ಹಂತಾರ್, ಜಿಲ್ಲಾ ಹಂತಾರ್ ಎದೊಳ್ಚ್ ತಾಣೆಂ ಆಪ್ಲೆಂ ನಾಂವ್ ಗಾಜಯಿಲ್ಲೆಂ.
ಕಂಗಾಲಾಚೆಂ ಖರೆಂ ನಾಂವ್ ಮಂಗಲ್ದಾಸ್ ಶಾಸ್ತ್ರಿ, ಪುಣ್ ಪಳೆಂವ್ಕ್
ಸಾವ್ಳೊ ಆನಿಂ ವಿದ್ರೂಪ್ ಜಾವ್ನ್ ಲಾಂಬ್ ಜಿವಾಚೊ ತೊ ಜಾಲ್ಲೆವರ್ವಿಂ ತಾಚಾ ಇಸ್ಟಾಂನಿ ತಾಕಾ ಕಂಗಾಲ್ ಕಂಗಾಲ್
ಮ್ಹಣ್ ವೊಲಾವ್ನ್ ತೊ ಆತಾಂ ಕಂಗಾಲ್ ಮ್ಹಳ್ಳ್ಯಾ ನಾಂವಾರ್ಚ್ ಫಾಮಾದ್ ಜಾಲ್ಲೊ. ಇಸ್ಕೊಲಾಚೆಂ ಶಿಕಾಪ್
ಸಂಪವ್ನ್ ಕೊಲೆಜಿಚೆಂ ಶಿಕಾಪ್ ಸುರು ಕರ್ತಾನಾ ಕ್ರಿಕೆಟ್ ಇತಿಹಾಸಾಂತ್
ನವೆಸಾಂವ್ ಘಡ್ಲ್ಲೆಂ. ತಾಚಾ ಬುರ್ಗ್ಯಾಪಣಾಚೆ ಖೆಳ್ಗಾಡಿ ಸರ್ವ್
ನಿವೃತ್ತ್ ಜಾಲ್ಲೆ. ಗವಾಸ್ಕರ್, ವೆಂಗಸರ್ಕಾರ್, ಮದನ್ಲಾಲ್, ರೋಜರ್ ಬಿನ್ನಿ, ಕಿರ್ಮಾನಿ, ಕಪಿಲ್ ದೇವ್,
ದಿಲಿಪ್ ದೋಶಿ, ರವಿ ಶಾಸ್ತ್ರಿ ಇತ್ಯಾದಿ. ಆಪ್ಣಾನ್ ಬರಿ ಮಿನತ್ ಕೆಲಿ ತರ್ ಆಪ್ಣಾಕ್ ರಾಜ್
ಮಟ್ಟಾರ್, ರಾಶ್ಟ್ರ್ ಮಟ್ಟಾರ್ ಖೆಳೊಂಕ್ ಆವ್ಕಾಸ್ ಜರೂರ್ ಮೆಳೊಂಕ್
ಪುರೊ ಮ್ಹಳ್ಳೆಂ ತೊ ಬರ್ಯಾನ್ ಜಾಣಾಸ್ಲ್ಲೊ.
ಕೊಲೆಜಿಚಾ ಟಿಮಾಂತ್ ತಾಕಾ ಪಯ್ಲ್ಯಾ ವರ್ಸಾಚ್ ಖೆಳೊಂಕ್ ಆವ್ಕಾಸ್ ಮೆಳ್ಳೊ ಆನಿಂ ತಾಣೆ ತೊ ಆವ್ಕಾಸ್ ಬರೊ ಕರ್ನ್ ಗಳ್ಸಿಲೊ ಆನಿಂ
ವೆಗಿಂಚ್ ಕೊಲೆಜ್ ಟಿಮಾಚೊ ವಾಯ್ಸ್ಕೆಪ್ಟನ್ ಜಾಲೊ. ಜಿಲ್ಲಾ
ಮಟ್ಟಾರ್ ಚಲ್ಲ್ಲ್ಯಾ ಅಂತರ್ ಕೊಲೆಜಿಚಾ ಮೆಚಾರ್ ಮ್ಯಾನ್ ಆಫ್ ದ ಸಿರೀಜ್ ಜಾಲ್ಲೆವರ್ವಿಂ, ಜಿಲ್ಲ್ಯಾಚಾ ಟಿಮಾಂತ್ ತಾಕಾ ಖೆಳೊಂಕ್ ಆವ್ಕಾಸ್
ಲಾಭ್ಲೊ. ದುಸ್ರ್ಯಾ ವರ್ಗಾಂತ್ ತಾಚೆಂ ನಶಿಬ್ ತಾಕಾ ರಾಜ್ಯ್
ಮಟ್ಟಾಚಾ ಅಂತರ್ ಜಿಲ್ಲಾ ಕ್ರಿಕೆಟ್ ಮೆಚಾಂನಿ ಖೆಳೊಂಕ್ ಮೆಳ್ಳೆಂ ಆನಿಂ ತೊ
ಬೆಸ್ಟ್ ಬ್ಯಾಟ್ಸ್ಮೆನ್ ಜಾವ್ನ್ ವಿಂಚೊನ್ ಆಯ್ಲೊ ದೆಕುನ್ ತಾಕಾ ರಾಜ್ಯಾಚಾ ರಣ್ಜಿ ಟಿಮಾಂತ್ ಆವ್ಕಾಸ್ ಮೆಳ್ಳೊ. ಇತ್ಲ್ಯಾ
ಲ್ಹಾನ್ ಪ್ರಾಯೆರ್ ತಾಕಾ ಮೆಳ್ಲ್ಲೆಂ ಜಯ್ತ್ ತಾಚಾನ್ ಪಾತ್ಯೆಂವ್ಕ್ ಕಶ್ಟಾಂಚೆಂ ಜಾಲೆಂ.
ತಾಣೆಂ ಲ್ಹಾನ್ ಭುರ್ಗೊ ಆಸ್ತಾನಾ ಆಯ್ಕಾಲ್ಲಿಂ ನಾಂವಾಂ ಆತಾಂ ತಾಕಾ ವಳ್ಕಿಚಿಂ ಜಾಲಿಂ, ಆತಾಂಚಿ ಕ್ರಿಕೆಟ್ ಪಿಳ್ಗೀಯ್ ಕಾಂಯ್ ಉಣಿಂ
ನಾತ್ಲ್ಲಿ, ಸಚಿನ್ ತೆಂಡೂಲ್ಕರ್, ದ್ರಾವಿಡ್, ಸೌರವ್ ಗಂಗೂಲಿ, ಅಶೆಂ ಜಾಯ್ತೆ ತಾಲೆಂತ್ವಂತ್ ತರ್ನಾಟೆ ಆಮ್ಚಾ ದೆಸಾಚಾ ಟಿಮಾಂತ್ ಖೆಳೊನ್ ಆಸ್ಲ್ಲೆ.
ಮಾಲ್ಘಡೆ ಖೆಳ್ಗಾಡಿಂನಿ ಕಂಗಾಲಾಕ್ ಬರಿ ದೇಕ್ ದಿಲಿ, ಖಾಸ್ಗಿ ಕೋಚ್
ನಮ್ಯಾರುಂಕ್ ಸಲ್ಹಾ ದಿಲಿ. ಪುಣ್ ಎದೊಳ್ಚ್ ಆಪ್ಲ್ಯಾ
ಮೆಚಾಂ ಖಾತಿರ್ ತಾಚಾ ಬಾಪಾಯ್ನ್ ಘೆತ್ಲ್ಲೆಂ ಲೋನ್ ಫಾರಿಕ್ ಕರುಂಕ್ ತೊ
ಸಕ್ಲ್ಲೊ ನಾ. ರಣ್ಜಿ ಟಿಮಾಂತ್ ತಾಚಿ ವಿಂಚವ್ಣ್ ಜಾಲ್ಲಿಚ್ ತಾಕಾ ಕಾಂಯ್ ಇಲ್ಲೆ
ಪೊಯ್ಶೆ ಮೆಳೊಂಕ್ ಲಾಗ್ಲೆ.
ಪುಣ್ ಕಂಗಾಲಾಕ್ ಕಶೆಂ ತರ್ಯ್ ಏಕ್ ಪಾವ್ಟಿಂ ಆಮ್ಚಾ ದೇಶಾಚಾ ಟಿಮಾಂತ್ ರಿಗಾಜಯ್ ಮ್ಹಳ್ಳಿ ಆಶಾ ಆಸ್ಲ್ಲ್ಯಾನ್ ತಾಣೆಂ ಆಪ್ಲಿ
ಮಿನತ್ ರಾವಯ್ಲಿನಾ. ಅಶೆಂ ತ್ಯಾ ವರ್ಸಾ ಬಾಂಗ್ಲಾ ದೇಶಾಸವೆಂ
ಸರ್ವ್ ಮೆಚಾಂ ಜಿಕೊನ್ ಆಯಿಲ್ಲ್ಯಾಂ ಸರ್ವಾಂ ಪಯ್ಕಿ ಪಾಂಚ್
ಸಾಂದೆ ಫುಡ್ಲ್ಯಾ ಪಾಕಿಸ್ತಾನ್ ಟೂರಾಕ್ ವೆಚಾಧಿಂ ಪಿಡೆಂತ್
ಪಡ್ಲೆ. ಎಕ್ಲ್ಯಾಚಾ ಪಾಂಯಾಂಚೆಂ ಬೋಟ್ ಮೊಡ್ಲೆಂ ಅನ್ಯೇಕ್ಲ್ಯಾಚಾ
ಪಾಟಿಚೊ ಖಣೊ ಬಾಗ್ವಲೊ, ಅನ್ಯೇಕ್ಲ್ಯಾಚಾ ಹಾತಾಚೆಂ ಬೋಟ್
ಮೊಡ್ಲೆಂ ಆನಿ ಎಕ್ಲ್ಯಾಕ್ ಎವರೇಜ್ ಸಾರ್ಕಿ ನಾತ್ಲ್ಲ್ಯಾನ್ ಭಾಯ್ರ್ ದವರ್ಲೊ. ಅಶೆಂ ಕಶೇಯ್
ಪಂದ್ರಾ ಖೆಳ್ಗಾಡಿ ಪಾಕಿಸ್ತಾನಾಕ್ ಪಾವ್ಲೆ.
ಪಯ್ಲೆಂ ಮೇಜ್ ಕರಾಚಿಂತ್, ವಸೀಮ್ ಅಕ್ರಮ್, ವಕಾರ್ ಯುನಿಸ್, ಅಬ್ದುಲ್ ರಜಾಕ್,
ಶೋಯೆಬ್ ಆಖ್ತರ್ ಹಾಂಚಾ ಬೌಲಿಂಗಾನ್ ಎದೊಳ್ಚ್ ಆಮ್ಚಾ ದೇಸಾಚಾ
ಬೆಟಿಂಗಾಚೆಂ ಪೆಂಕಾಡ್ ಮೊಡ್ಲ್ಲೆಂ. ಇತ್ಲೆಂ ಮಾತ್ರ್ ನ್ಹಂಯ್,
ಸಯೀದ್ ಅನ್ವರ್, ಇನ್ಜಮಾಮ್ ಉಲ್ ಹಕ್, ಶಹೀದ್ ಆಫ್ರಿದಿ
ಹಾಣಿಂ ಮೆಳೊನ್ ಆಮ್ಚಾ ದೆಸಾಚಾ ಬೌಲರಾಂಚೆ ಭಾರಾ ಬ್ರೇಸ್ತಾರ್ ತೆರಾ
ಸುಕ್ರಾರ್ ಕೆಲ್ಲೆ. ತೀನ್ ಟೆಸ್ಟ್ ಮೆಚಾಂ ಆನಿಂ ಪಾಂಚ್ ವನ್ಡೇ
ಪಯ್ಕಿ ದೋನ್ ಟೆಸ್ಟ್ ಎದೊಳ್ಚ್ ಖೆಳೊನ್ ಜಾಲ್ಲೆ ಆನಿಂ ದೊನಾಂಯ್ತೀ
ಪಾಕಿಸ್ತಾನ್ ಜಿಕ್ಲ್ಲೆಂ. ಪಾಕಿಸ್ತಾನ್ ಜಿಕ್ಲ್ಲೆಂ ಮ್ಹಳ್ಳೊ ಸಬ್ದ್
ಸಾರ್ಕೊ ನ್ಹಂಯ್ ತರ್ ಆಮ್ಚೊ ದೇಸ್ ಸಲ್ವಾಲ್ಲೊ ಮ್ಹಣ್ತಾಂ. ತಿಸ್ರ್ಯಾ ಟೆಸ್ಟಾಚಾ ಎಕಾ
ದಿಸಾಧಿಂ ಸೌರವ್ ಗಂಗೂಲಿಕ್ ಕಠೀಣ್ ಪೊಟಾಂತ್ ದೂಃಖ್ ಉದೆಲಿ ಆನಿಂ ದ್ರಾವಿಡಾನ್ ಕೇಪ್ಟನ್ಶಿಪ್ ಘೆಜಯ್
ಪಡ್ಲೆಂ. ತ್ಯಾ ಶಿವಾಯ್ ಬೌಲರಾಂಕ್ ಧುವ್ನ್ ಧುವ್ನ್ ಎದೊಳ್ಚ್ ಧೊಬಿ ಘಾಟಾಚಾ
ಪೆಟ್ಯಾಪರಿಂ ಜಾಲ್ಲೆ, ನಿತ್ರಾಣ್ ಆನಿಂ ಕಂಗಾಲ್.
ಖಬ್ರಾಳ್ಯಾ ಪತ್ರಾಂನಿ ತಶೆಂಚ್ ಟಿವಿ ಆನಿಂ ಹೆರ್ ಮಾಧ್ಯಮಾಂನಿ ಆತಾಂಚಾ ಕ್ರಿಕೆಟ್ ಟಿಮಾಕ್ ಎದೊಳ್ಚೆಂ ಭೋವ್ ದುರ್ಬೊಳ್ ಆನಿ ಅಸ್ಕತ್ ಟೀಮ್
ಮ್ಹಣ್ ವೊಲಾಯ್ಲೆಂ. ಇತ್ಲೆಂಚ್ ಪಾವಾನಾತ್ಲ್ಲ್ಯಾಕ್ ಅಗಾರ್ಕರಾಕ್
ನೆಟ್ ಪ್ರಾಕ್ಟಿಸಾ ವೆಳಾರ್ ಪಡೊನ್ ದೊಂಪೊರ್ ಸುಜ್ಲ್ಲೆಂ ಆನಿಂ ತಾಕಾ ಆಮ್ಚಾ ದೆಸಾಕ್
ಪಾಟಿಂ ಯೇಜಯ್ ಪಡ್ಲೆಂ ಆನಿಂ ಆತಾಂ ತಾಂಕಾ ಬದ್ಲೆಕ್ ಕೊಣಾಕ್ ದಾಡ್ಚೆಂ? ಅಶೆಂ
ಸೆಲೆಕ್ಟರಾಂಚಿ ನದರ್ ಕಂಗಾಲಾಚೆರ್ ಗೆಲಿ ಆನಿಂ ಕಂಗಾಲ್ ಉಟಾಉಟಿಂ ಭಾರತೀಯ್ ಟಿಮಾಕ್ ಭರ್ತಿ ಜಾಲೊ. ತಿಸ್ರೆಂ ಟೆಶ್ಟ್
ಮೇಚ್ ಸುರು ಜಾಲೆಂ ಆನಿಂ ಕಂಗಾಲಾಕ್ ಹಾಂತುಂ ಖೆಳೊಂಕ್ ಮೆಳ್ಳೆಂ
ನಾ ತರ್ಯ್ ಮೈದನಾರ್ ಖೆಳ್ಚಾಂಕ್ ಘಡ್ಯೆ ಘಡ್ಯೆ ಉದಾಕ್,
ಬೆಟಾಂ, ಗ್ಲಾವ್ಜ್ ದಿಂವ್ಚಾ ಉಪ್ಕಾರಾಕ್ ಪಡ್ಲೊ.
ಕಶೇಂಯ್ ತಿಸ್ರ್ಯಾ ಟೆಸ್ಟ್ ಮೆಚಾಂತ್ ಭೋವ್ಶಾ ಕೊಣಾಚಾ
ನಶಿಬಾನ್ಗೀ, ಟೆಸ್ಟ್ ಡ್ರಾ ಜಾಲೆಂ ಆನಿಂ ಥೋಡ್ಯಾಚ್ ದಿಸಾಂನಿ
ವನ್ಡೇ ಮೇಚ್ ಸುರು ಜಾಲೆಂ, ಪುಣ್ ಪಯ್ಲ್ಯಾ ತೀನ್
ವನ್ಡೇ ಮೆಚಾಂನಿ ಎಕಾಂತ್ ಆಮಿಂ ಜಿಕ್ಲ್ಯಾಂವ್ ಆನಿಂ ದೊನಾಂತ್
ಹಾರ್ಲ್ಯಾಂವ್. ಆತಾಂ ಲಕ್ಷ್ಮಣ್ ಘಾಯೆಲ್ಲೊ, ದೆಕುನ್ ಚೊವ್ತ್ಯಾ
ವನ್ಡೇಕ್ ಕಂಗಾಲಾಕ್ ಆವ್ಕಾಸ್ ಮೆಳ್ಳೊ. ತೆಚ್ಚ್ ವೆಳಾರ್
ಪತ್ರಾಂನಿ ಸೌರವಾಕ್ ಮುಖೇಲ್ಪಣಾಂತ್ಲೊ ಕಾಡಿಜಯ್ ಮ್ಹಣೊನ್
ವರ್ದಿ ಆಯಿಲ್ಲಿ ವಾಚುಂಕ್ ಮೆಳ್ಳಿ.
ಚೊವ್ತೆಂ ವನ್ಡೇ ಇಸ್ಲಾಮಾಬಾದಾಂತ್ ಆಸ್ಲ್ಲೆಂ ಆನಿಂ ಆಮ್ಚಾ ದೇಸಾನ್ ಟೋಸ್ ಜಿಕೊನ್
ಫಿಲ್ಡಿಂಗ್ ವಿಂಚ್ಲೆಂ ಆನಿಂ ಪಾಕಿಸ್ತಾನಾನ್ ಪನ್ನಾಸ್ ವೊವರಾಂನಿ ತಿನ್ಶಿಂ
ಸಾತ್ ರನ್ ಮಾರ್ಲೆ. ತಾಂತುಂ ಬರೆಂ ಬೌಲಿಂಗ್ ಚಲ್ಲೆಂ ಮ್ಹಳ್ಯಾರ್ ಕಂಗಾಲಾಚೆಂ
ಮಾತ್ರ್. 10-2-45-2 ಮ್ಹಳ್ಯಾರ್ ಧಾ
ವೊವರಾಂತ್ ದೋನ್ ಮೇಡನ್ ಆನಿಂ ಪಂಚಾಳಿಸ್ ರನ್
ದಿವುನ್ ದೋನ್ ವಿಕೆಟಿ ಘೆತ್ಲ್ಯೊ.
ಆತಾಂ ಆಮ್ಚಾ ಟಿಮಾಚಿ ಕಮಿಟಿ ಚಿಂತುಂಕ್ ಪಡ್ಲಿ. ಕಶೆಂ ತರ್ಯ್
ಸಚಿನಾಚಿ ವಿಕೆಟ್ ರಾಕಾಜಯ್ ಮ್ಹಣೊನ್ ತಾಣಿಂ ಲೇಕ್ ಘಾಲೆಂ ಆನಿಂ ಓಪನಿಂಗ್ ಕರುಂಕ್
ವೀರೆಂದ್ರ ಸೆವಾಗಾಸವೆಂ ಕಂಗಾಲಾಕ್ ಧಾಡ್ಳೊ. ಸಗ್ಳ್ಯಾಂಕ್ ಅಜ್ಯಾಪ್, ಆತಾಂ ವಾಸಿಮ್ ಅಕ್ರಮ್ ಬೌಲಿಂಗಾಕ್ ಯೆಂವ್ಚಾರ್ ಆಸ್ಲ್ಲೊ ಆನಿಂ ಕಂಗಾಲ್ ಆಪ್ಲಿ ಕಾಂಪ್ಚಿ ಕೂಡ್ ಸ್ಥಿಮೆತೆರ್ ದವ್ರುನ್ ಖೆಳೊಂಕ್
ಪ್ರೇತನ್ ಕರ್ತಾಲೊ.
ಪಯ್ಲೊ ಬೋಲ್ ವಾಸಿಮ್ ಅಕ್ರಮಾಚೊ ಸುಂಯ್ ಕರ್ನ್ ಕಂಗಾಲಾಚಾ ಕಾನಾಂತ್ಲ್ಯಾನ್
ಪಾಶಾರ್ ಜಾಲೊ. ಎದೊಳ್ಚ್ ಪೆಡಾಂ ಬಾಂಧುನ್ ತಾಚಾ ಕುಡಿರ್ ಉಗ್ತೊ ಜಾಗೊಚ್
ನತ್ಲ್ಲೊ. ಹಾತಾಂಕ್, ಹಾತಾಂಚಾ ಗಾಂಟಿಂಕ್, ತಕ್ಲೆಕ್, ಪಾಂಯಾಂಕ್, ಕುಸಳಾಂಕ್
ಮ್ಹಣ್ ಎದೊಳ್ಚ್ ತೊ ಫುಲ್ಲ್ ಪೇಕ್ ಜಾಲ್ಲೊ.
ದುಸ್ರೊ ಬೋಲ್ ಘಾಲುಂಕ್ ಅಕ್ರಮ್ ಆಯ್ತೊ ಜಾಲ್ಲೊ ಆನಿಂ ಕಂಗಾಲ್ಯ್. ದುಸ್ರೊ
ಬೋಲ್ಯ್ ಅಸೊಚ್ ಬೆಟಾಮಧೆಂ ರಿಗೊನ್ ವಿಕೆಟಿ ವಯ್ಲ್ಯಾನ್ ಗೆಲೊ. ಅಕ್ರಮಾನ್ ನಿರಾಶೆನ್ ತಕ್ಲೆಚೆರ್
ಹಾತ್ ದವರ್ಲೆ.
’ಶಾಬಾಸ್’ ಪಾಟ್ಲ್ಯಾನ್ ಮೊಯಿನ್ ಖಾನ್ ಬೋಬ್ ಮಾರ್ತಾಲೊ.
ಫಿಲ್ಡಿಂಗಾಕ್ ಎದೊಳ್ಚ್ ಚಾರ್ ಸ್ಲಿಪ್, ಏಕ್ ಗಲ್ಲಿ ಮ್ಹಣೊನ್ ಏಕ್ ರನ್ ಕಾಡುಂಕ್ಯ್ ಆವ್ಕಾಸ್
ನಾತ್ಲ್ಲೊ. ಕುಶಿಚಾ ಎಲೆಕ್ಟ್ರೋನಿಕ್ ಪರ್ಧ್ಯಾಂನಿ ಎದೊಳ್ಚ್
0/0 (.2 ಓವರ್ಸ್)
ಮ್ಹಣ್ ಸ್ವಶ್ಟ್ ದಿಸ್ತಾಲೆಂ.
ತಿಸ್ರೊ ಬೋಲ್ ಕಸೊ ತರ್ಯ್ ಸಾಂಬಾಳಿಜಯ್, ನಾಂ ತರ್ ಅಪ್ಣಾನ್
ಬೌಲ್ಡ್ ಜಾಂವ್ಚೆಂ ನಖ್ಖೆಂ ಮ್ಹಣೊನ್ ಕಂಗಾಲಾನ್ ಏಕ್ ಘಡಿ ಚಿಂತ್ಲೆಂ ಆನಿಂ ಏಕ್ ಘಡಿ ದೊಳೆ ದಾಂಪುನ್ ಆಸ್ಲ್ಲ್ಯಾ
ಸರ್ವ್ ದೆವಾಂಕ್ ಉಲೊ ಕೆಲೊ ಆನಿಂ ಆಪ್ಣಾಕ್ ಸಾಂಬಾಳುನ್ ರಾವ್ಲೊ. ಅಕ್ರಮಾಚೊ ತಿಸ್ರೊ
ಬೋಲ್ ಇತ್ಲೊ ಫಾಸ್ಟ್ ಆಸ್ಲ್ಲೊಕೀ, ಕಂಗಾಲಾನ್ ದವರ್ಲ್ಲ್ಯಾ
ಬೆಟಾಚಾ ವಯ್ಲ್ಯಾ ಕುಶಿಕ್ ಲಾಗೊನ್ ತಾಚಾ ಮುಟಿಭಿತರ್ಚ್
ಬೇಟ್ ಏಕ್ ಭಂವಾಡೊ ಘುಂವ್ಲೆಂ ಆನಿಂ ತೊ ಬೋಲ್ ತಿಸ್ರ್ಯಾ
ಸ್ಲಿಪ್ಪಾಚಾ ಫೀಲ್ಡರಾಚಾ ತಕ್ಲೆ ವಯ್ಲ್ಯಾನ್ ವಚೊನ್
ಬೌಂಡರಿಕ್ ಗೆಲೊ.
ಲೊಕಾಂಚಿ ಬೋಬ್ ಸರ್ಗಾಕ್ ಆಯ್ಕತ್, ಹೆಣೆ ತೆಣೆ ಇಂಡಿಯಾಚೊ
ಬಾವ್ಟೊ ಉಭ್ಲೊ. ಎಕಾಚ್ಫರಾಂ ಕೆಮರಾಮೆನಾಂನಿ ಅಪ್ಲೊ ಕೆಮರಾ ಕಂಗಾಲಾಚೆರ್ ಘುಂವ್ಡಾಯ್ಲೊ.
ಸೆವ್ಹಾಗ್ ಯೇವುನ್ ಕಂಗಾಲಾಚಾ ಮುಟಿಕ್ ಆಪ್ಲಿ ಮೂಟ್ ಮೆಳಯ್ಲಾಗ್ಲೊ.
ಆತಾಂ ಸ್ಕೋರ್ ಬೊರ್ಡಾರ್ ಸ್ಕೋರ್ ದಾಖಯ್ತಾಲೆ 4/0 (.3 ಓವರ್ಸ್). ಅಕ್ರಮ್ ಆತಾಂ
ಸುಂಯ್ಪಿತಾಲೊ, ರಾಗಾನ್ ತಾಚೆ ದೊಳೆ ಉಜೊ ವೊಂಕ್ತಾಲೆ. ಆತಾಂ
ಸೆವಾಗ್ ಯೆವುನ್ ಮ್ಹಣಾಲಾಗ್ಲೊ "ಪಳೆ ಆತಾಂ ಅಕ್ರಮ್
ಬೌನ್ಸರ್ ಘಾಲುಂಕ್ ಪುರೊ, ದೆಕುನ್ ಚತ್ರಾಯ್" ಮ್ಹಣ್. ಚೊವ್ತೊ
ಬೋಲ್ ಘಾಲುಂಕ್ ಆಯಿಲ್ಲ್ಯಾ ಅಕ್ರಮಾನ್ ತಶೆಂಚ್ ಕೆಲೆಂ,
ಬೋಲ್ ತಕ್ಲೆಕ್ ಲಾಗೊಂಕ್ ಆಯ್ಲೊ, ಆನಿಂ ಕಂಗಾಲಾನ್ ಜಿವಾ ಅಕ್ಲಾಸಾನ್
ಬೇಟ್ ಉಕಲ್ಲೆಂ, ಆನಿಂ ತೊ ಬೋಲ್ ಬೆಟಾಕ್ ಲಾಗೊನ್ ಅನಿಕ್ಯ್
ವಯ್ರ್ ಉಡ್ಲೊ ಆನಿಂ ವಿಕೆಟ್ ಕೀಪರಾಚಾ ಪಾಟ್ಲ್ಯಾನ್ ಪಡೊನ್ ಅನ್ಯೇಕ್
ಬೌಂಡ್ರಿ.
ಆತಾಂ ಲೋಕ್ ಉಚಾಂಬಳ್ ಜಾಲೊ ಆನಿಂ ಅಕ್ರಮ್ ಸಯ್ತ್. ಬೊರ್ಡಾರ್
ಸ್ಕೋರ್ ದಾಖಯ್ತಾಲೆ 8/0 (.4 ಓವರ್ಸ್). ಕಂಗಾಲ್
ಬಾವ್ಡೊ ಕಿತೆಂಚ್ ನೆಣಾಸ್ಲ್ಲೊ. ತಾಕಾ ಅಜೂನ್ ಬೋಲ್ ದಿಸ್ಲ್ಲೊಚ್
ನಾ.
ಪಾಂಚ್ವೊ ಬೋಲ್ ಶೀದಾ ಯೇವ್ನ್ ಕಂಗಾಲಾಚಾ ದೊಂಪ್ರಾ ಗಾಂಟ್ಯೆಕ್
ಲಾಗ್ತಾನಾ ಏಕ್ ಘಡಿ ಕಾಂಯ್ ಪಾಂಯಾಂಚಿ ಖಿಳ್ ಮೊಡ್ಲಿಗಾಯ್ ಮ್ಹಳ್ಳೊ ದುಭಾವ್ ಕಂಗಾಲಾಕ್ ಆಯ್ಲೊ.
ಸರ್ವಾಂನಿ ತಾಳಿಯೊ ಪೆಟ್ಲ್ಯೊ. ಆತಾಂ ಅಖ್ರೇಚೊ ಬೋಲ್ ಘೆವ್ನ್ ಅಕ್ರಮ್ ಆಯ್ಲೊ ಆನಿಂ ತಾಚಾ ದಾವ್ಯಾ
ಪಾಂಯಾಚಾ ಪಂದಾ ಯೋರ್ಕ್ ಕರುಂಕ್ ಪ್ರೇತನ್ ಕರ್ತಾನಾ ತೊ
ಬೋಲ್ ತಾಚಾ ಪಾಂಯಾಂಕ್ ಲಾಗೊನ್ ಶೀದಾ ಡೀಪ್ ಸ್ಕ್ವೇರ್
ಲೆಗ್ ಕುಶಿನ್ ಪರತ್ ಬೌಂಡ್ರೆಕ್ ಗೆಲೊ. ಬೊರ್ಡಾರ್ ಸ್ಕೋರ್ ದಾಖಯ್ತಾಲೆ
12/0 (1 ಓವರ್ಸ್).
ಲೊಕಾಂಚಾ ಬೊಬೆಕ್ ಕಾಂಯ್ ಮೀತ್ ನಾತ್ಲ್ಲಿ. ಮೆಚಾಚಿ ಸುರ್ವಾತ್ ಬರಿ ಜಾಲ್ಲಿ. ಆತಾಂ ದುಸ್ರೊ ಓವರ್
ಸೆವ್ಹಾಗಾನ್ ಮೇಡನ್ ಕೆಲೊ. ಆನಿಂ ದೋನ್ ವೊವರಾಂನಿ ಭಾರಾ ರನ್. ಆತಾಂ ತಿಸ್ರೊ ಓವರ್ ಅಕ್ರಮಾಚೊ ಆನಿ ಕಂಗಾಲಾಕ್ ಖೈಂ ಥಾವ್ನ್ ಧಯ್ರ್ ಆಯ್ಲೆಂ ತೆಂ ತೊಚ್
ನೆಣಾಂ ಶೀದಾ ಬೇಟ್ ಬಿಜಾವ್ನ್ ಖೆಳ್ಳೊ ಆನಿಂ ಪರತ್ ದೋನ್
ಬೌಂಡ್ರಿ ಮಾರ್ತಾನಾ ಸ್ಕೋರ್ ಜಾಲೆ ವೀಸ್. ಕಶೆಂ ಕಶೆಂ ಕೆಲ್ಯಾರೀ ಕಂಗಾಲಾಕ್
ಹೆಂ ಕಶೆಂ ಘಡ್ತಾ ಮ್ಹಳ್ಳೆಂ ಖುದ್ ಸಮ್ಜಾಲೆಂಚ್ ನಾ. ಅಕ್ರಮ್
ಬೌನ್ಸರ್ ಘಾಲುಂಕ್ ಭಿಂಯೆಲೊ. ಕಿತ್ಯಾಕ್ ಮ್ಹಳ್ಯಾರ್
ಬೌನ್ಸರ್ ಘಾಲ್ಲೆ ಹರ್ಯೆಕ್ ಬೋಲ್ ಕಂಗಾಲಾನ್ ಬೌಂಡ್ರೆಕ್ ಧಾಡ್ಲ್ಲೆ
(ಯಾ ಪಾವ್ಲ್ಲೆ).
ಧಾ ವೊವರಾಂತ್ ಎದೊಳ್ಚ್ ಇಂಡಿಯಾನ್ ಪಾವಣ್ಶೆಂ ರನ್ ಕಾಡ್ಲ್ಲೆ.
ಹಾಂತುಂ ಕಂಗಾಲಾಚೆ ೪೪ ಆನಿಂ ಸೆಹ್ವಾಗಾಚೆ ತೀಸ್ ಆನಿಂ ಏಕ್ ಎಕ್ಸ್ಟ್ರಾ. ಆತಾಂ ಇಕ್ರಾವೊ ಓವರ್ ಘಾಲುಂಕ್
ಶೋಯೆಬ್ ಅಖ್ತರ್ ಆಯ್ಲೊ ಆನಿಂ ಸೇಹ್ವಾಗ್ ಖೆಳ್ತಾಲೊ ಆನಿಂ
ಪಯ್ಲ್ಯಾ ಬೊಲಾಕ್ ಸಿಕ್ಸರ್ ಮಾರ್ಲೊ. ಲೊಕಾಂಚಿ ಪರತ್
ಬೋಬ್ ಸುರು ಜಾಲಿ. ಸ್ಕೋರ್ ಆತಾಂ 81/0 (10.1 ಓವರ್ಸ್) ಜಾಲ್ಲೆ. ದುಸ್ರೊ
ಬೋಲ್ ಘಾಲುಂಕ್ ಆಯಿಲ್ಲೊ ಶೋಯೆಬ್ ಆಖ್ತರ್ ಇತ್ಲೊ ರಾಗಾನ್ ಆಸ್ಲ್ಲೊಕೀ, ಆತಾಂ ತಾಚಾ ದುಸ್ರ್ಯಾ
ಬೊಲಾನ್ ಸೆಹ್ವಾಗಾಚಾ ಬೆಟಾಮಧೆಂ ರಿಗೊನ್ ಮಧ್ಲ್ಯಾ ವಿಕೆಟಿಕ್
ಪಂದ್ರಾ ಫುಟಿಂ ಪಯ್ಸ್ ಉಸ್ಳಾಯಿಲ್ಲಿ. ಅನ್ಯೇಕಾ ಕುಶಿಚಾ
ಲೊಕಾಂನಿ ಬೋಬ್ ಸುರು ಕೆಲಿ.
ಆತಾಂ ಬೇಟ್ ಕರುಂಕ್ ಸಚಿನ್ ಆಯ್ಲೊ. ಪುಣ್ ಕಂಗಾಲ್ ಕಸ್ಲ್ಯಾಯ್
ಸಂಗ್ತ್ಯಾಂಕ್ ಭಿಂಯೆಲೊನಾ, ಸಚಿನಾನ್ ಏಕ್ ರನ್ ಕಾಡ್ನ್ ಕಂಗಾಲಾಕ್ ಖೆಳೊಂಕ್
ದಿಲೆಂ ಆನಿಂ ಕಂಗಾಲಾನ್ ಆತಾಂ ತಾಚಾ ಪಾಟ್ಲ್ಯಾನ್ ಸುಂಯ್ ಕರುನ್
ವೆಚಾ ಬೊಲಾಕ್ ಕಾಂಯ್ ಪಾಟಿಕ್ ಆದ್ಳಾತ್ಕೀ ಮ್ಹಳ್ಳ್ಯಾ
ಭಿಂಯಾನ್ ಬೇಟ್ ಬಿಜಾಯ್ಲೆಂ ಆನಿಂ ತೊ ಬೋಲ್ ಪರತ್
ಬೇಟಾಕ್ ಇಲ್ಲೊ ಲಾಗ್ಲೊ ಆನಿಂ ಪರ್ತುನ್ ಬೌಂಡ್ರಿಕ್ ಗೆಲೊ.
ಸ್ಕೋರ್ ಜಾಲ್ಲೆ 86/1(10.4
ವೋವರ್ಸ್). ಆನಿಂ ಕಂಗಾಲ್ ಆತಾಂ 48 ರನ್ನಾರ್ ಆಸ್ಲ್ಲೊ. ಆತಾಂ
ಶೋಯೆಬ್ ರಾಗಾರ್ ಪೆಟ್ಲೊ ಆನಿಂ ಪಾಂಚ್ವೊ ಬೋಲ್ ಶೀದಾ ಫುಲ್ ಟೋಸ್ ಘಾಲೊ ಆನಿಂ ಕಂಗಾಲಾನ್ ಜಿವಾಚೆ ಆಶೆನ್ ತೊ ರಾವಯ್ಲೊ
ಪುಣ್ ಎದೊಳ್ಚ್ ಬೋಲ್ ಪಯ್ಸ್ ಪಾವ್ಲ್ಲೊ ಆನಿಂ ಕಂಗಾಲಾನ್ ಆನಿಂ
ಸಚಿನಾನ್ ದೋನ್ ರನ್ ಕಾಡ್ಲೆ ಆನಿಂ ಲೋಕ್ ಉಭೊ ರಾವ್ಲೊ. ಕಂಗಾಲಾಚೆ
ಪನ್ನಾಸ್ ರನ್. ಪನ್ನಾಸ್ ರನ್ ಜಾತೆಚ್ ತಾಣೆಂ ಆಪ್ಲೆಂ ಹೆಲ್ಮೆಟ್ ಕಾಡ್ನ್
ಬೇಟ್ ಉಕಲ್ಲೆಂ ಆನಿಂ ವಯ್ರ್ ಪಾವ್ಸ್ ಯೇತ್ಗೀ ಮ್ಹಣ್ ಪಳೆಲೆಂ. ಕಮೆಂಟೇಟರ್
ಮ್ಹಣಾಲೆ ’ಪಳೆ ದೆವಾಕ್ ಪಳೆತಾ, ಭೋವ್ಶಾ ದೇವ್ಭಿರಾಂತೆಚೊ
ಮನಿಸ್ ಜಾಯ್ಜಯ್’ ಮ್ಹಣ್.
ಆತಾಂ ಮೈದನಾರ್ ಆಸ್ಚೆ ಸಗ್ಳೆ ಕೆಮರಾಮೆನ್ ಕಂಗಾಲಾಚೆರ್ ಕೆಮರಾ ಫೋಕಸ್ ಕರಿಲಾಗ್ಲೆ. ಅಶೆಂ
ಪಯ್ಲೆ ಪಂಚ್ವೀಸ್ ವೋವರ್ ಜಾತಾನಾ ಇಂಡಿಯಾಚೆ ಸ್ಕೋರ್ ದೊನ್ಶಿಂ ಇಕ್ರಾ ಜಾಲ್ಲೆ. ಕಂಗಾಲಾಕ್ ಅಪ್ಲ್ಯಾ
ಸೆಂಚುರಿಕ್ ತೀನ್ ರನ್ ಜಾಯ್ ಆಸ್ಲ್ಲೆ ತರ್ ಸಚಿನಾಕ್ ಅಪ್ಲ್ಯಾ
ಸೆಂಚುರಿಕ್ ತೆವೀಚ್ ರನ್ ಜಾಯ್ ಆಸ್ಲ್ಲೆ. ಕಂಗಾಲಾಚೆಂ ಬ್ಯಾಟಿಂಗ್ ಇತ್ಲೆಂ ಬರೆಂ ರಾಯ್ಸತ್
ಮ್ಹಣ್ ಖುದ್ ತೊಚ್ ನೆಣಾಸ್ಲ್ಲೊ. ಎದೊಳ್ಚ್ ಪಾಕಿಸ್ತಾನಿ ಕ್ಯಾಪ್ಟನ್ ಇನ್ಜಮಾಮ್ ಉಲ್
ಹಕ್ಕಾನ್ ಸಾತ್ ಬೌಲರಾಂಕ್ ಹಾಡ್ಲ್ಲೆಂ ತರ್ಯ್ ಕೊಣಾಯ್ಕೀ
ಸಚಿನಾಕ್ ಜಾಂವ್ ಯಾ ಕಂಗಾಲಾಕ್ ಜಾಂವ್ ಔಟ್ ಕರುಂಕ್ ಜಾಲ್ಲೆಂ
ನಾ. ಫುಡ್ಲ್ಯಾ ಓವರಾಂತ್ ಕಂಗಾಲಾನ್ ಅಪ್ಲಿ ಸೆಂಚುರಿ ಮಾರ್ಲಿ ಆನಿ
ಪರತ್ ಅಪ್ಲೆಂ ಬೇಟ್ ವಯ್ರ್ ಉಕಲ್ಲೆಂ ಆನಿಂ ಕೆಮರಾಮೆನಾಂನಿ ತಾಚೊ ತಸ್ವೀರೊ ಕಾಡ್ಲ್ಯೊ.
ಇಲ್ಲ್ಯಾವೆಳಾರ್ ಥೊಡೆ ಘಡ್ಯೆ ಘಡ್ಯೆ, ಉದಾಕ್, ತುವಾಲೊ ಘೆವುನ್ ಯೆತಾಲೆ ಆನಿಂ ಥೊಡೆ ಕಂಗಾಲಾಚಾ
ಮೊಚ್ಯಾಂಚೆ ನಾಡೆ ಬಾಂದ್ತಾಲೆ.
ಅಜ್ಯಾಪ್ ಮ್ಹಳ್ಯಾರ್ ಸಗ್ಳೆ ಪಾಕಿಸ್ತಾನಿ ಖೆಳ್ಘಾಡಿ ಸಲ್ವೊನ್ ಚುನೊ ಜಾಲ್ಲೆ.
ಪನ್ನಾಸ್ ಓರವಾಂಚೆಂ ಮೇಚ್ ಸಾತ್ ಓವರ್ ಬಾಕಿ ಆಸ್ತಾನಾಂತ್
ಸಂಪ್ಲೆಂ ಆನಿಂ ಸಚಿನ್ ಎಕ್ಶೆಂ ತೆರಾ ರನ್ನಾರ್ ಆಸ್ಲ್ಲೊ ತರ್ ಕಂಗಾಲಾನ್ ಎಕ್ಶೆಂ
ಸಾಠ್ ರನ್ ಕೆಲ್ಲೆ. ಭಾರತ್ ಹೆಂ ಮೇಚ್ ನೋವ್ ವಿಕೆಟಿಂನಿಂ ಜಿಕ್ಲ್ಲೆಂ
ಮಾತ್ರ್ ನ್ಹಂಯ್ ಚಾರ್ ವನ್ಡೇ ಟೂರ್ನಮೆಂಟ್ ಆತಾಂ ದೋನ್ ದೋನ್ ಜಾವ್ನ್ ಬರಾಬರ್ ಜಾಲ್ಲೆಂ ಆನಿಂ ಕರಾಚಿಂತ್ ಖೆಳೊಂಕ್ ಆಸ್ಚಾ ಫೈನಲಾ ತೆವ್ಶಿನ್ ಗೆಲ್ಲೆಂ.
ಕಂಗಾಲಾಗ್ ಮ್ಯಾನ್ ಆಫ್ ದ ಮೇಚ್ ಮ್ಹಣ್ ವಿಂಚ್ಲೊ.
ದೀಸ್ಭರ್ ಖೆಳೊನ್ ಆಯಿಲ್ಲೊ ಕಂಗಾಲ್ ದೈಹಿಕ್ ರಿತಿನ್
ಸಲ್ವಾಲ್ಲೊ ಸಾಂಜ್ ಸಾತೆಚ್ ತೊ ಜೆವ್ಣಾಕ್ ಹೆರಾಂಸವೆಂ
ಹೊಟ್ಲಾಚಾ ಭಾಯ್ರ್ ಗೆಲ್ಲೊ ವಾಟೆರ್ ತಾಚೆಲಾಗಿಂ ಭಿಕ್ ಮಾಗ್ಚೊ
ಭಿಕಾರಿ ಮೆಳ್ಳೊ. ಹಾಚಾಯ್ ಬೊಲ್ಸಾಂತ್ ದೆಡ್ಕಿ ನಾತ್ಲ್ಲಿ
ಪುಣ್ ಕಂಗಾಲ್ ತ್ಯಾ ಭಿಕಾರಿಕ್ ಪಳೆವ್ನ್ ಬಿರ್ಮತ್ ಪಾವ್ಲೊ ತರ್ಯ್ ತಾಚಾನ್ ಕಿತೆಂಚ್ ಕರುಂಕ್ ಜಾಲೆಂನಾ. ತಕ್ಶಣ್ ಥಂಯ್ಸರ್
ಪೊಲಿಸಾಂನಿ ವೆಡೊ ಘಾಲೊ ಆನಿಂ ಭಿಕಾರಿಕ್ ಧಾಂವ್ಡಾಯ್ಲೊ ಆನಿಂ
ಪಾಟಾಪಾಟ್ ಪತ್ರ್ಕರ್ತಾಂನಿ ಕಂಗಾಲಾಚಿ ವಳೊಕ್ ಧರ್ನ್ ತಾಕಾ
ವೆಡೊ ಘಾಲೊ ಆನಿಂ ಎಕಾ ಪಾಟ್ಲ್ಯಾನ್ ಏಕ್ ಸವಾಲಾಂ ವಿಚಾರುಂಕ್ ಧರ್ಲಿಂ. ಆತಾಂ
ಸಾಂಜೆರ್ ಪತ್ರ್ಕರ್ತಾಂಲಾಗಿಂ ಉಲವ್ನ್ ಮಾನಸಿಕ್ ರಿತಿರ್ ಸಲ್ವಾಲೊ.
ಸರ್ವಾಂನಿ ಸೌರವ್ ಗಂಗೂಲಿಕ್ ಕಂಗಾಲಾಕ್ ಓಪನಿಂಗ್ ಧಾಡ್ಲ್ಲ್ಯಾಕ್
ಹೊಗ್ಳಿಕ್ ದಿಲ್ಲಿ. ಟಿವಿಂನಿ ಕಂಗಾಲಾಚಾ ಸಂಭಾಷಣಾಚಿ ಲೈವ್ ಕವರೇಜ್ ಆಸ್ಲ್ಲಿ, ಆನಿಂ ಎದೊಳ್ಚ್ ಕಂಗಾಲಾಕ್ ಆನಿಂ
ಸಚಿನ್ ತೆಂಡುಲ್ಕರಾಕ್ ತಾಣಿಂ ಎಕಾಮೆಕಾ ತಾಳ್ ಪಡ್ತಾತ್ಗೀ
ಮ್ಹಣ್ ಸಾಂಗೊಂಕ್ ಧರ್ಲ್ಲೆಂ.
ದೋನ್ ದಿಸಾಂ ಉಪ್ರಾಂತ್ ಜಾಂವ್ಕ್ ಆಸ್ಚಾ ಫೈನಲಾಕ್ ಎದೊಳ್ಚ್
ಪೆಪರಾಂನಿ, ಟಿವಿಂನಿ ಜಾಹೀರಾತ್ ತಯಾರ್ ಕೆಲ್ಲೆಂ, ಗಂಗೂಲಿ
ವರ್ಸಸ್ ವಕಾರ್, ಸಚಿನ್ ವರ್ಸಸ್ ವಸೀಮ್ ಅಕ್ರಮ್, ಕಂಗಾಲ್
ವರ್ಸಸ್ ಶೋಯೆಬ್ ಅಖ್ತರ್ ಮ್ಹಣ್. ಕಸೊಯ್ ತಿಸ್ರೊ
ದೀಸ್ ಉದೆಲೊ ಆನಿಂ ಅಖ್ರೇಚೆಂ ಮೇಚ್ ಪಳೆಂವ್ಕ್ ಆಯಿಲ್ಲೊ
ಲೋಕ್ ಇತ್ಲೊ ಭರ್ಲ್ಲೊಕೀ, ಥೊಡೆ ಉಭೆ ರಾವೊನ್ ಸಯ್ತ್
ಮೇಚ್ ಪಳೆಂವ್ಕ್ ಕಬೂಲ್ ಜಾಲ್ಲೆ.
ಇಂಡಿಯಾ ಟೋಸ್ ಸಲ್ವಾಲೆಂ ಆನಿಂ ಪಯ್ಲೆಂ ಫೀಲ್ಡಿಂಗ್ ಕರುಂಕ್
ಪಡ್ಲೆಂ. ಕಂಗಾಲಾಚೆಂ ಬೌಲಿಂಗ್ ಪರ್ತುನ್ ಬರೆಂ ಚಲ್ಲೆಂ ಆನಿಂ ಆಪ್ಲ್ಯಾ ಧಾ
ವೊವರಾಂನಿ ತಾಣೆಂ ತೀನ್ ವಿಕೆಟ್ಯೊ ಕಾಡ್ಲ್ಯೊ. ಆನಿಂ ಏಕ್ ಕೇಚ್ ಧರ್ಲೊ.
ಪಾಕಿಸ್ತಾನಾನ್ ದೊನ್ಶಿಂ ಚಾಳಿಸ್ ಸ್ಕೋರ್ ಕಾಡ್ಲೆ. ಆನಿಂ ಇಂಡಿಯಾನ್ ಹೆ
ಸ್ಕೋರ್ ಕಸ್ಟಾಂನಿ ಕಾಡ್ಲೆ ಆನಿಂ ತಾಂತುಂ ಕಂಗಾಲಾಚೆ ಸಾಟ್ ರನ್ ಆಸ್ಲ್ಲೆ.
ಪರ್ತುನ್ ಕಂಗಾಲಾಕ್ ಮ್ಯಾನ್ ಆಫ್ ದ ಮೇಚ್ ಪ್ರಶಸ್ತಿ ಮೆಳ್ಳಿ ಆನಿಂ
ಪಾಕಿಸ್ತಾನಾಂತ್ ಪಯ್ಲೆಪಾವ್ಟಿಂ ವನ್ಡೇ ಟೂರ್ನಮೆಂಟ್ ಜಿಕೊನ್
ಪಾಟಿಂ ಯೆತಾನಾ ಏರ್ಪೋರ್ಟಾರ್ ಪೊಲಿಸಾಂಚಿ, ಪತ್ರ್ಕರ್ತಾಂಚಿ,
ಲೊಕಾಂಚಿ, ರಾಸ್ ರಾಸ್. ಫುಲಾಂಚೆ ತುರೆ ಕಿತೆಂ. ಪತ್ರ್ಕರ್ತಾಂನಿ ಫೊಟೊ ಕಾಡ್ತಾನಾ ಅಶೆಂ ಭೊಗ್ತಾಲೆಂಕೀ ಕಾಂಯ್ ಝಗ್ಲಾಣೆಂ ಯೆತಾಶೆಂ.
ಪುಣ್ ತೆಚ್ ರಾತಿಂ ಆಂಧ್ರಾಂತ್ ಆಯಿಲ್ಲ್ಯಾ ವಿಪ್ರೀತ್ ಚಕ್ರಿವಾದಾಳಾಂತ್
ಸಭಾರ್ ಘರಾಂ ಕೊಸಾಳ್ಳಿಂ ಆನಿಂ ಜಾಯ್ತೊ ಲೋಕ್ ನಿರ್ಗತಿಕ್ ಜಾಲೊ.
ದುಸ್ರೆ ದಿಸಾ ತೊ ಕುಕ್ಕೆಹಳ್ಳೆಕ್ ಪಾವ್ತಾನಾ ಅಜ್ಯಾಪ್, ಎದೊಳ್ಚ್ ಥಂಯ್
ಪತ್ರ್ಕರ್ತಾಂನಿ ವೆಡೊ ಘಾಲ್ಲೊ ಆನಿಂ ತಾಚಾ ಆವಯ್ ಬಾಪಾಯ್ಚಿ ತಸ್ವೀರ್ ಕಾಡ್ನ್ ಜಾಲ್ಲಿ ಆನಿಂ ತಾಂಚೆಲಾಗಿಂ ಕಂಗಾಲಾಚಾ
ಬುರ್ಗ್ಯಾಪಣಾಚಾ ದಿಸಾಂವಿಶ್ಯಾಂತ್, ತಾಣೆಂ ಖಾಂವ್ಚಾ ಖಾಣಾವಿಶ್ಯಾಂತ್, ತಾಕಾ ಖಾಯ್ಸ್ ಜಾಂವ್ಚಾ ಖಾಣಾವಿಶ್ಯಾಂತ್ ವಿಚಾರ್ನ್ ಜಾಲ್ಲೆಂ.
ಸಗ್ಳ್ಯಾನ್ ಲೋಕ್ ಭರ್ಲ್ಲೊ ಪಳೆಲ್ಲ್ಯಾ ಕಂಗಾಲಾಕ್ ಅಜ್ಯಾಪ್. ಎಕ್ಲ್ಯಾ
ಪತ್ರ್ ಕರ್ತಾನ್
ತಾಕಾ ಸವಾಲ್ ಕೆಲೆಂ "ಇಂಡಿಯಾಚೊ ನವೊ ಸಚಿನ್ ಮ್ಹಣ್ ತುಕಾ
ಲೊಕಾಂನಿ ಆಪಂವ್ಚೆಂ ತುಕಾ ಕಶೆಂ ದಿಸ್ತಾ?"
ಕಂಗಾಲಾಕ್ ಕೆದ್ನಾಂ ಏಕ್ ಪಾವ್ಟಿಂ ಅಪುಣ್ ಘರಾ ವಚೊನ್ ಏಕ್ ಘಡಿ
ಶಾಂತಿ ಸಮಧಾನೆನ್ ಬೊಸ್ತಾಂ ಮ್ಹಣ್ ಭೊಗ್ತಾಲೆಂ.
ಪುಣ್ ನಾ! ತಾಚೆಸವೆಂ ಜಾಂವ್ಚೆಂ ಉಲವ್ಣೆಂ ಟಿವಿಂತ್ ಲೈವ್ ಕವರೇಜ್ ಆಸ್ಲ್ಲೆಂ.
ತ್ಯೇ ಸಾಂಜೆರ್ ಕಂಗಾಲಾಕ್ ಟಿವಿ ಚಾನಲಾರ್ ಯೆಂವ್ಚಾ ಖೆಳಾಚಾ ಖಬ್ರಾಂಚಾ ಕಾರ್ಯಾಕ್
ಮುಖೆಲ್ ಸಯ್ರೊ ಜಾವ್ನ್ ಆಪಯಿಲ್ಲೊ ಆನಿಂ ವಿಜ್ಮಿತ್ಕಾಯೆಚಿ ಗಜಾಲ್ ಮ್ಹಳ್ಯಾರ್
ಸಾಂಜೆರ್ ಟಿವಿಂತ್ ಕಂಗಾಲಾಕ್ ಆನಿಂ ಸಚಿನಾಕ್ ಎಕಾಮೆಕಾ ತುಲನ್ ಕರುನ್ ಆಸ್ಲ್ಲೆ. "ಪಳೆ
ಸಚಿನ್ಯ್ ಹಾತಾಂತ್ ಜೆವ್ತಾ ಆನಿಂ ಕಂಗಾಲ್ಯ್, ಸಚಿನ್ ಪಳೆ ಶಿತ್ ತೊಂಡಾಕ್ ಘಾಲ್ತಾ ಆನಿಂ ಕಂಗಾಲ್ಯ್,
ಸಚಿನ್ಯ್ ನಾಕಾಂತ್ ಉಸ್ವಾಸ್ ಘೆತಾ ಆನಿಂ ಕಂಗಾಲ್ಯ್, ಸಚಿನಾನ್
ಹಾತಾಂತ್ ಬೇಟ್ ಧರ್ಚೆಂ ಆನಿಂ ಕಂಗಾಲನ್ಯ್ ಹಾತಾನಿಂಚ್, ತರ್ ದೊಗೀ ಎಕ್ಚ್
ಮ್ಹಣ್ ಜಾಲೆಂ"
ದುಸ್ರೊ ಮ್ಹಣಾಲೊ "ಸಚಿನ್ ಬೌಲಿಂಗ್ ಕರ್ತಾ ಆನಿಂ ಕಂಗಾಲ್ಯ್,
ಸಚಿನ್ ಸಿಕ್ಸ್ ಮಾರ್ತಾ ಆನಿಂ ಕಂಗಾಲ್ಯ್, ಸಚಿನ್ ಪಾಂಯಾಂತ್ ಧಾಂವ್ತಾ ಆನಿಂ ಕಂಗಾಲ್ಯ್, ತರ್
ಸಚಿನ್ ಆನಿಂ ಕಂಗಾಲ್ ಎಕ್ಚ್"
ದುಸ್ರೆ ದಿಸಾ ಖಬ್ರಾಳ್ಯಾಂನಿ ಕಂಗಾಲಾಚಿ ವಡ್ಲಿ ತಸ್ವೀರ್ ಆಯಿಲ್ಲಿ. ಚಡುಣೆಂ
ಹರ್ಯೆಕಾ ಪಾನಾಂನಿ ತಾಚೆವಿಶ್ಯಾಂತ್ ಖಬಾರ್, ಇಂಡಿಯಾಚಾ ಕ್ರಿಕೆಟಿಚೊ
ನವೊ ಹೀರೊ ಮ್ಹಳ್ಳಿಂ ಶಿರೋನಾಂವಾಂ. ಫಕತ್ ಭಿತರ್ಲ್ಯಾ ಎಕಾ
ಪಾನಾರ್ ಲ್ಹಾನ್ ಖಬಾರ್ ಆಂಧ್ರಾಂತ್ ಆಯಿಲ್ಲ್ಯಾ ಚಕ್ರಿವಾದಾಳಾವಿಶ್ಯಾಂತ್. ಕಂಗಾಲಾಕ್ ಇಂಡಿಯಾಚೊ
ಮುಖ್ಲೊ ಕ್ಯಾಪ್ಟನ್ ಕರಿಜಯ್ ಮ್ಹಣ್ಯೀ ಬರಯಿಲ್ಲೆಂ.
ಕಂಗಾಲಾಕ್ ಕ್ರಿಕೆಟ್ ಶಿಕಯಿಲ್ಲೊ ಕೋಚ್ ಮ್ಹಣ್ ಸಾಂಗ್ಚೊ
ನತ್ತೂರಾಮಾಕ್ ಟಿವಿಂತ್ ಇಂಟರ್ವ್ಯೂ ದೀಂವ್ಕ್ ಆಪಯಿಲ್ಲೊ.
ಸತ್ ಸಾಂಗ್ಚೆಂ ತರ್ ನತ್ತೂರಾಮ್ ಕಂಗಾಲಾಕ್ ವಳ್ಕಾತಾಲೊ ಕೆನ್ನಾ ಕಂಗಾಲ್ ರಣ್ಜಿ ಖೆಳೊಂಕ್
ಲಾಗ್ಲ್ಲೊ ತೆದ್ನಾಂ ಥಾವ್ನ್ ಮಾತ್ರ್. ಟಿವಿಚೆರ್ ನತ್ತೂರಾಮಾಚಿ ಆನಿಂ ರಮಾಕಾಂತ್ ಅಚ್ರೇಕರಾಚಿ ಇಂಟರ್ವ್ಯೂ ಚಲ್ತಾಲಿ ಆನಿಂ ದೊಗೀ ತಾಂಚಾ ವಿಧ್ಯಾರ್ಥಿಂ
ವಿಶ್ಯಾಂತ್ ಅಪಾಪ್ಲೆ ವಿಚಾರ್ ದವರ್ತಾಲೆ. ರಮಾಕಾಂತ್ ಅಚ್ರೇಕರ್
ಸಚಿನಾವಿಶ್ಯಾಂತ್ ಆನಿಂ ನತ್ತೂರಾಮ್ ಕಂಗಾಲವಿಶ್ಯಾಂತ್. ನತ್ತೂರಾಮ್
ಸಾಂಗ್ತಾಲೊ "ಹಾಂವ್ ಪಯ್ಲೆಂಚ್ ಜಾಣಾಸ್ಲ್ಲೊಂ ಕಂಗಾಲ್
ಮೇಚ್ ಜಿಕಯ್ತಾ ಮ್ಹಳ್ಳೆಂ"
ದುಸ್ರೆ ದಿಸಾ ಕಂಗಾಲಾಕ್ ಟಿವಿಚಾ ಕಾರ್ಯಕ್ರಮಾಂತ್ ಇಂಟರ್ವ್ಯೂ
ಪ್ರಸಾರ್ ಜಾಲಿ. ತಿಸ್ರೆ ದಿಸಾ ಕಂಗಾಲಾಕ್ ಸೊಧುನ್ ವಿದೇಶಿ ಕಂಪ್ಣಿ ಆಯ್ಲಿ, ಕೋಕಕೋಲಾನ್ ಎಕಾ ಜಾಹಿರಾತಾಕ್ ಜಿತ್ಲೆ
ಪೊಯ್ಶೆ ಭಾಸಯ್ಲೆಕೀ ತಾಚಾಕೀ ದೊಡೆ ಪೆಪ್ಸಿನ್ ಭಾಸಾಯ್ಲೆ ಆನಿಂ ಕಂಗಾಲ್ ಆತಾಂ
ಪುರ್ತೊ ಗುಸ್ಪೊಡ್ಲ್ಲೊ. ತಿಂ ವೆತೆಚ್ಚ್ ರೋಯಲ್ ಫಿಲ್ಟರ್ ಸಿಗ್ರೆಟ್ ಕಂಪ್ಣೆಚೆ ಆಯಿಲ್ಲೆ ಆನಿಂ ಜಿಣ್ಯೆಂತ್ ಸಿಗ್ರೆಟ್
ವೊಡಿನಾತ್ಲ್ಲ್ಯಾ ಕಂಗಾಲಾಕ್ ಏಕ್ ಸಿಗ್ರೆಟ್ ವೊಡ್ಚೆಂ ಜಾಹಿರಾತ್
ದಿಲ್ಯಾರ್ ಪಾಂಚ್ ಲಾಕ್ ದಿತಾಂವ್ ಮ್ಹಣ್ ಭಾಸಾವ್ನ್ ಗೆಲೆ.
ಸಾಂಜೆರ್ ಶಾಭಾಸ್ ಗುಡ್ಕಾ ಕಂಪ್ಣೆಚೆ ಆಯಿಲ್ಲೆ.
ಕಂಗಾಲಾಚಿ ಕೊಲೆಜ್ ಬಂಧ್ ಜಾಲ್ಲಿ. ತಾಚಾ ಬಾಪಾಯ್ನ್ ಕಾಡ್ಲ್ಲೆಂ
ಲೋನ್ ಸಗ್ಳೆಂ ಬೆಂಕಾನ್ ಮಾಫ್ ಕೆಲ್ಲೆಂ. ಕಂಗಾಲಾನ್
ಬಾಪಾಯ್ಕ್ ಕಾಮ್ ಕರಿನಾಸ್ತಾಂ ಘರಾ ಬೊಸೊಂಕ್ ಸಾಂಗ್ಲೆಂ ಆನಿಂ ತೆಚ್ ವೆಳಾರ್
ಬೆಂಕಾನ್ ಕಾಮಾಕ್ ಅರ್ಜ್ಯೊ ಆಪಯಿಲ್ಲ್ಯೊ. ಮೆನೆಜರ್
ಹುದ್ದ್ಯಾಕ್ ಆಯಿಲ್ಲ್ಯೊ ಅರ್ಜ್ಯೊ ಸಭಾರ್, ಕೋಣ್ ಎಮ್.ಕೋಮ್ ಕೆಲ್ಲೆ ತರ್ ಕೋಣ್ ಎಮ್.ಬಿ.ಎ ಕೆಲ್ಲೆ,
ಪುಣ್ ಕಂಗಾಲಾಕ್ ಇಂಟರ್ವ್ಯೂ ನಾಸ್ತಾನಾಂಚ್ ಅಸಿಸ್ಟೆಂತ್ ಮೆನೆಜರಾಚೊ
ಹುದ್ದೊ ಮೆಳ್ಳೊ. ಪುಣ್ ತಾಕಾ ಸದಾಂಯ್ ಬೆಂಕಾಕ್ ಕಾಮಾಕ್
ವಚೊಂಕ್ ಜಾಲೆಂನಾ.
ಆಯ್ಲೆವಾರ್ ಬಿಜಾಪುರಾಂತ್ ಬರ್ಗಾಲ್ ಆಯಿಲ್ಲೊ. ಪಾವ್ಸ್ ನಾಸ್ತಾಂ
ಮನ್ಜಾತ್ಯೊ, ಮನ್ಶಾಂ ಮೊರೊಂಕ್ ಲಾಗ್ಲ್ಲಿಂ, ಜಿವಿಂ ಆಸ್ಚಿಂ ಥೊಡಿಂ
ಪೊಟಾಚೆ ಭುಕೆನ್ ವಳ್ವಳ್ತಾಲಿಂ ಮ್ಹಳ್ಳಿ ಖಭಾರ್ ಎಕಾ ದಿಸಾಳ್ಯಾಚಾ
ಭಿತರ್ಲ್ಯಾ ಪಾನಾರ್ ಖಂಯ್ಗೀ ಫಾಯ್ಸ್ ಜಾಲ್ಲಿ. ದಿಸಾಂಯ್ ಕಂಗಾಲಾಚಿ ರಂಗಾಳ್ ತಸ್ವೀರ್
ಪತ್ರಾಂನಿ ಮುಖ್ಲ್ಯಾ ಪಾನಾರ್ ಯೆತಾಲಿ, ದಿಸಾಕ್ ಎಕೇಕ್
ನವಿ ಖಬಾರ್ ಘೆವ್ನ್. ಕೆನ್ನಾ ತಾಚಾ ಕಾಜಾರಾ ವಿಶ್ಯಾಂತ್, ಕೆನ್ನಾ ತಾಚಾ ಆನಿಂ
ಹೆರ್ ಖೆಳ್ಗಾಡಿಂಕ್ ತುಲನ್ ಕರುನ್. ತೆಚ್ಚ್ ವೆಳಾರ್ ಶಾರ್ಜಾಂತ್ ಏಕ್ ಟೂರ್ನಮೆಂಟ್ ಆಯೊಜಿತ್ ಕೆಲ್ಲೆಂ ಆನಿಂ ಆತಾಂ ಕಂಗಾಲಾನ್ ಇಂಡಿಯಾಚಾ ಟಿಮಾಂತ್ ಅಪ್ಲೆಂ
ಸ್ಥಾನ್ ಥಿರ್ ಕೆಲ್ಲೆಂ. ಇಂಡಿಯಾ, ಜಿಂಬಾಬ್ವೆ, ಶ್ರೀಲಂಕಾ ಅಶಿಂ ತೀನ್ ಟಿಮಾಂ ಆಸ್ಲ್ಲ್ಯಾ
ಹ್ಯಾ ಟೂರ್ನಮೆಂಟಾಂತ್ ಕಂಗಾಲಾನ್ ತೀನ್ ಸೆಂಚುರಿ ಮಾರುನ್ ಇಕ್ರಾ ವಿಕೆಟ್ಯೊ ಘೆತ್ಲ್ಯೊ ಆನಿಂ
ಮ್ಯಾನ್ ಆಫ್ ದ ಸಿರೀಜ್ ಪ್ರಶಸ್ತಿ ಜಿಕ್ಲೊ. ಇಂಡಿಯಾನ್
ಶಾರ್ಜಾ ಕಪ್ ಜಿಕೊನ್ ಆಯಿಲ್ಲೆಂಚ್ ಹ್ಯಾ ಟಿಮಾಕ್ ಸಂಸಾರಾಂತ್ಲೆಂ
ಶ್ರೇಷ್ಟ್ ಟೀಮ್ ಮ್ಹಣ್ ಪತ್ರಾಂನಿ ಕರಾರ್ ದಿಲೆಂ.
ಮಲ್ನಾಡಾಂತ್ ಕಂಟ್ರಿ ಸೊರೊ ಪಿಯೆವ್ನ್ ಎಕ್ಚ್ ಪಾವ್ಟಿಂ ಸತ್ತರ್
ಲೋಕ್ ಮೆಲೊ ಮ್ಹಳ್ಳಿ ಖಬಾರ್ ಪತ್ರಾಚಾ ಭಿತರ್ಲ್ಯಾ
ಪಾನಾರ್ ಲ್ಹಾನ್ ಅಕ್ಶರಾಂನಿ ಛಾಪ್ಲ್ಲಿ. ಪುಣ್ ಶಾರ್ಜಾ ಕಪ್ಪಾಚಿ, ಖೆಳ್ಘಾಡ್ಯಾಂಚಿ ತಸ್ವೀರ್
ಮುಖ್ಲ್ಯಾ ಪಾನಾರ್. ಶಾರ್ಜಾಥಾವ್ನ್ ಪಾಟಿಂ ಯೆತೆಚ್ ತಾಚೆಂ
ಮೋಲ್ ಮೊಳ್ಬಾಕ್ ಚಡ್ಲ್ಲೆಂ. ಆತಾಂ ಪತ್ರ್ಕರ್ತ್ ಟಿವಿಚೆರ್ ಕಂಗಾಲಾಕ್ ಆನಿಂ ಡೋನ್
ಬ್ರಾಡ್ಮನಾಕ್ ತುಲನ್ ಕರ್ತಾಲೆ. ಕಸೊ ಬ್ರಾಡ್ಮನ್
ಬೌಲರಾಂಕ್ ಧುತಾಲೊಕೀ ತಶೆಂ ಕಂಗಾಲ್ ಮ್ಹಣ್ ಛಾಪ್ಲ್ಲೆಂ.
ಸಚಿನಾಕ್, ಸೆವ್ಹಾಗಾಕ್ ಯಾ ಸೌರವಾಕ್ ಆತಾಂ ತಿತ್ಲೊ ಭಾವ್ (ಮೋಲ್)
ನಾತ್ಲ್ಲೊ. ಏರ್ಪೋರ್ಟಾರ್ ಸಯ್ತ್ ತಾಂಕಾಂ ಘೆಂವ್ಕ್ ಆಯಿಲ್ಲೆ
ಪತ್ರ್ಕರ್ತ್ ಪಯ್ಲೆಂ ಕಂಗಾಲಾಚಿ ಇಂಟರ್ವ್ಯೂ ಘೆವ್ನ್ ಉಪ್ರಾಂತ್
ಸೌರವಾಕ್, ಸಚಿನಾಕ್, ಸೆಹ್ವಾಗಾಲಾಗಿಂ ಸವಾಲಾಂ ಕರ್ತಾಲೆ.
ದೇಸಾಚಾ ಗ್ರೇಸ್ತ್ ವೆಪಾರಿಂಚೊ ಧುವೊ ಅಮೆರಿಕಾ ಲಂಡನ್ ಥಾವ್ನ್ ಕಂಗಾಲಾಲಾಗಿಂ ಕಾಜಾರ್ ಜಾಂವ್ಕ್
ಸಯ್ರಿಕ್ಯೊ ಯೆತಾಲ್ಯೊ, ಬೊಲಿವುಡ್ ಥಾವ್ನ್ ಹಿರೊಯಿನೊ
ಸಯ್ತ್ ಕಂಗಾಲಾಸವೆಂ ಜೇಂವ್ಕ್ ಆಶೆತಾಲಿಂ. ಕಂಗಾಲ್ ಖರೊಚ್ ದೆಸಾಚೊ ಹಿರೊ ಜಾಲ್ಲೊ. ರಸ್ತ್ಯಾ ದೆಗೆಂನಿ
ಬ್ಯಾನರಾಂ ಕಂಗಾಲಾಚಿಂ, ಬೋರ್ಡಿಂಗ್, ಹೋರ್ಡಿಂಗಾಂಚೆರ್ ಕಂಗಾಲಾನ್
ಸುಟಾರ್, ಕೊಟಾರ್, ಖಾಂವ್ಚೆಂ, ಪಿಯೆಂವ್ಚೆಂ, ಬಿಡಿ ಸಿಗ್ರೆಟ್ ವೊಡ್ಚೆಂ,
ಪೆಪ್ಸಿ ಪಿಯೆಂವ್ಚೆಂ, ಗುಟ್ಕಾ ಖಾಂವ್ಚಾ ಜಾಹಿರಾತಾಂಕ್ ಕಾಂಯ್
ಲೇಕ್ ನಾತ್ಲ್ಲೆಂ. ಥೊಡ್ಯಾ ಚಾಲಿಂನಿ ವಸ್ತಿ ಕರ್ಚಾ ಪೊಕ್ರಿ ಬುರ್ಗ್ಯಾಂನಿ
ಸಯ್ತ್ ತಿಂ ಬೆನರಾಂ ಚೊರುನ್ ವಸ್ತ್ರಾಂ ಕೆಲ್ಲಿಂ. ಆನಿಂ ತಾಂಚಾ
ವಸ್ತ್ರಾಂಚೆರ್ಯ್ ಕಂಗಾಲ್ ಪರ್ಜಳ್ತಾಲೊ.
ಕಶೆ ದೀಸ್ ಪಾಶಾರ್ ಜಾತಾಲೆ ಮ್ಹಳ್ಳೆಂ ಕಂಗಾಲಾಕ್ ಕಳ್ಳೆಂನಾ. ಆತಾಂ ಇಂಡಿಯಾಚೆಂ ಟೀಮ್
ಸಂಸಾರಾಂತ್ಲೆಂ ವರ್ತೆಂ ಟೀಮ್ ಮ್ಹಣ್ ಪತ್ರಾಂನಿ ಛಾಪೊನ್ ಆಯ್ಲೆಂ.
ಪಾಟ್ಲ್ಯಾ ನೋವ್ ವನ್ಡೇಂತ್ ಇಂಡಿಯಾ ಎಕಾಂತ್ಯ್ ಸಲ್ವೊಂಕ್ನಾತ್ಲ್ಲೆಂ. ಫುಡ್ಲೆಂ ಟೂರ್ನಮೆಂತ್ ಆಸ್ಟ್ರೇಲಿಯಾಸವೆಂ ಖೆಳೊಂಕ್ ಇಂಡಿಯಾಕ್ ಆಸ್ಟ್ರೇಲಿಯಕ್
ವಚೊಂಕ್ ಆಸ್ಲ್ಲೆಂ. ಪುರ್ತಿ ತಯಾರಾಯ್ ಜಾಲ್ಲಿ. ಕಂಗಾಲಾಕ್ ದೇಸ್,
ಹವೊ, ಮನ್ಶಾಂ, ಭಾಸ್ ನವಿ ಆನಿಂ ಥಂಯ್ಚಿಂ ಪತ್ರ್ಕರ್ತಾಂ ಕಂಗಾಲಾಕ್ ಎಕಾ
ಪಾಟ್ಲ್ಯಾನ್ ಏಕ್ ಸವಾಲಾಂ ಕರ್ತಾಲಿಂ ಆನಿಂ ಕಂಗಾಲ್ ತಿಂ ಸಮ್ಜೊನ್ ಹಳೂ ಜಾಪಿ ದಿತಾಲೊ.
ಪ್ರಾಕ್ಟೀಸ್ ಮೆಚ್ ಜಾಲೆಂ ಆನಿಂ ಪಯ್ಲೆಂ ವನ್ಡೇ. ಪಯ್ಲ್ಯಾ ಓವರಾಂತ್ ಗ್ಲೆನ್
ಮೆಕ್ಗ್ರಾಥಾನ್ ಘಾಲ್ಲೊ ಬೋಲ್ ಕಂಗಾಲಾಚಾ ಬೆಟಾಕ್ ಲಾಗೊನ್ ವಿಕೆಟಿಚೆರ್
ಪಡ್ಲೊ ಆನಿಂ ಪಯ್ಲ್ಯಾ ಬೊಲಾಕ್ ಕಂಗಾಲ್ ಔಟ್. ಆನಿಂ ಹೆಂ
ಮೇಚ್ ಇಂಡಿಯಾ ಸಲ್ವಾಲೆಂ. ಆನಿಂ ಪತ್ರಾಂನಿ ಕಂಗಾಲಾಕ್ ’ಲಾ ಆಫ್ ಎವರೇಜ್’ ಮ್ಹಳ್ಳೆಂ
ನೀಬ್ ದಿಲೆಂ. ದುಸ್ರೆಂ ಮೇಚ್ಯ್ ಇಂಡಿಯಾ ಸಲ್ವಾಲೆಂ ಆನಿಂ
ಹಾಂತುಂ ಕಂಗಾಲಾನ್ ಫಕತ್ ತೀನ್ ರನ್ ಕಾಡ್ಲೆ. ಆನಿಂ ಹ್ಯಾ
ಮೆಚಾರ್ ಲಕ್ಷ್ಮಣ್ ಪರ್ತುನ್ ಘಾಯೆಲೊ. ಆನಿಂ ತಿಸ್ರೆ ಮೆಚಾರ್ ಅನ್ಯೇಕ್ಲೊ
ನವೊಚ್ ತರ್ನಾಟೊ ಖೆಳೊಂಕ್ ಆಯ್ಲೊ ಆನಿಂ ಬರೆಂ ಖೆಳ್ಳೊ ಆನಿಂ
92 ರನ್ ಕಾಡ್ನ್
ನೋಟೌಟ್ ಜಾವ್ನ್ ಉರ್ಲೊ. ಇಂಡಿಯಾ ಹೆಂ ಮೇಚ್ ಜಿಕ್ಲೆಂ.
ಪರತ್ ಪತ್ರ್ಕರ್ತಾಂ ಧಾಂವೊನ್ ಆಯ್ಲಿಂ, ಪುಣ್ ತಾಂಕಾ ಜಾಯ್ ಆಸ್ಲ್ಲೊ ಆತಾಂ
ನ್ಹಂಯ್ ಸಚಿನ್, ನ್ಹಯ್ ಸೆಹ್ವಾಗ್, ನ್ಹಂಯ್ ಸೌರವ್,
ನ್ಹಂಯ್ ದ್ರಾವಿಡ್, ನ್ಹಂಯ್ ಕಂಗಾಲ್.....
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
