ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 35. ಸೊಭಿನಾಮಿ
ಸನ್ನು ಮೊನಿಜ್: ಕೊಂಕ್ಣಿ ಸಾಹಿತ್ಯಾಂತ್ ಹೊ ಕಾಂಯ್ ಹೆಳ್ಲ್ಲೊ ನ್ಹಂಯ್ ಜಾವ್ಯೆತ್, ಪುಣ್ ತೀಕ್ಷ್ಣ್ ಚಿಂತಾಪ್, ವಿಚಾರ್ಧಾರಾ ವೆಕ್ತ್ ಕರ್ಚಿ ಶ್ಯಾಥಿ ಹಾಚಾ ಬರ್ಪಾಂಕ್ ಆಸ್ಚಿ ಕೊಣೆಂಯ್ ನೆಗಾರ್ ಕರ್ಚೆಪರಿಂ ನಾ. ಹಾಣೆಂ ಚಡಾವತ್ ಜಾವ್ನ್ ಸಾಮಾಜಿಕ್ ಕಾಣ್ಯೊ ಬರಂವ್ಚ್ಯೊ ತರ್ಯ್ ಅಸಾಮಾನ್ಯ್ ಸಂಗ್ತ್ಯಾಂಕ್ ಅಪ್ಲ್ಯಾ ಕಾಣ್ಯಾಂನಿ ಗುಂತುನ್ ಸಮಾಜೆಚಾ ಅಸ್ಕತ್ ಕೊನ್ಶ್ಯಾಂಚೆರ್ ಆರ್ಸೊ ಧರ್ಚಿ ಶ್ಯಾಥಿ ಹಾಚ್ಯಾ ಬರ್ಪಾಂಕ್ ಆಸ್ಚಿ ರೀತ್ ತುಕಾ ಜರೂರ್ ಹಿ ಕಾಣಿ ವಾಚ್ತಾಂ ವಾಚ್ತಾಂ ಸುಸ್ತಾತೆಲಿ.
ಸನ್ನು ಮೊನಿಜ್
ಕಾಲ್ಚೆ ಸಾಂಜೆರ್ ಸುರು ಜಾಲ್ಲೊ ಪಾವ್ಸ್ ಆಯ್ಚ್ಯಾ ಸಾಂಜೆ ಪರ್ಯಾಂತ್ ಏಕ್ ಲೇಕ್ ವೊತ್ತಾಲೊ. ಕಠೀಣ್ ಘಡ್ಗಡೊ ಝಗ್ಲಾಣೆಂ ಝಡ್ ವಾರೆಂ. ನಂಯ್ ಭರೊನ್ ಬೊಯ್ಲಾಂತ್ ಆವ್ರ್ ಚಡ್ಲ್ಲೆಂ..! ಏಕ್ ಸಾಗೊರ್ ತಶೆ ದಿಸ್ತಾಲೊ ಸಗ್ಳೊ ಗಾಂವ್. ಥೊಡ್ಯಾಂಚ್ಯಾ ಘರ್ಚ್ಯಾ ಆಂಗ್ಣಾಂತ್ ಪರ್ಯಾಂತ್ ಪಾವ್ಲ್ಲೆಂ ಆವ್ರ್..!
ಆನಿ ಥಂಯ್.. ಧಾ ಭಾರಾ ಮಾಡಾ ತೊಟಾಂ ಮಧೆಂ ಏಕ್ ಲ್ಹಾನ್ ಕೊಲ್ವಾಚೆಂ ಘರ್. ವಿಶೇಸ್ ರಿತಿರ್ ವೊತ್ಚ್ಯಾ ಪಾವ್ಸಾಕ್ ಸೊಸುಂಕ್ ತಾಂಕಾನಾಸ್ತಾನಾ ಸಗ್ಳ್ಯಾಂನಿ ಪೊಂವ್ತಾಲೆಂ. ಏಕ್ ಪಾವ್ಸಾಳ್ ಸೊಸುಂಕ್ ತಾಂಕಾನಾತ್ಲ್ಲೆಂ ತೆಂ ಪಾಕೆಂ. ವಯ್ಲ್ಯಾ ಘರ್ಚ್ಯಾ ಬೆದ್ಮಿನ್ ಆನಿ ಸೀನಾ ಪುಜಾರಿನ್ ಇಲ್ಲೆಂ ಸಮಾ ಕರುನ್ ದಿಲ್ಲೆಂ. ಸಗ್ಳ್ಯಾ ಪಾಕ್ಯಾಚೆ ವಾಶೆ ಸುರ್ಯೆಲ್ಯಾತ್, ಯೆಂವ್ಚಾ ವರ್ಸಾ ಪುಣಿ ಬದ್ಲಿ ಕರಿಜಾಯ್ ಮ್ಹಣ್ ಪಯ್ಲಿಚ್ ತಾಕಿದ್ ದಿಲ್ಲಿ ತಾಣಿಂ.
ಕೊನ್ಶಾಂತ್ ಏಕ್ ಕುಂಕ್ಡಾಂಚೊ ಗುಡ್, ದೋನ್ ಕೊಂಬಿಯೊ, ಚ್ಯಾರ್ ತಲ್ಕಾಂ, ಏಕ್ ಕೊಂಬೊ. ಚಾರ್ ಪಿಲಾಂ, ಗುಡಾ ಭಿತರ್ ಗೊಬ್ರಾರ್ ಕುರ್ವತಾಲಿಂ. ಬಾಗ್ಲಾಕ್ ಪೊಳೆಂ ಆಡ್ ದವರುನ್ ಫಾತೊರ್ ತಾಕಾ ವೊಣ್ಕೊನ್ ದವರ್ಲ್ಲೊ. ಪಾಂಚ್ ದಿಸಾಧಿಂ "ಅಲ್ಪುಚ್ಚೆನ್" ವಡ್ಲ್ಯಾ "ಕೆಂಚಿ ಉರ್ಯಾಕ್" ವೋಡ್ನ್ ವರ್ತಾನಾ, ಗುಡಾಕ್ ಪೊಳ್ಯಾಕ್ ಫಾತೊರ್ ಆಡ್ ದವರಿನಾತ್ಲ್ಲ್ಯಾಚೊ ಉಗ್ಡಾಸ್ ಜಿವೊಚ್ಚ್ ಆಸ್ಲ್ಲೊ..!
ಕುರ್ವ್ಯಾಂತ್ ಗೊಣಿ ಘಾಲ್ಲ್ಯಾ ಜಾಗ್ಯಾರ್, ಏಕ್ ಕೊಲ್ಗೆಂ ನಿದ್ಲಾಂ. ಪಾಂಚ್ ವರ್ಸಾಂಚೆಂ ತೆಂ. ತಾಚೊ ಜಾಗೊ ತೊಚ್ಚ್! ಸಾರ್ಕೆಂ ಪೊಟಾಕ್ ನಾಸ್ತಾನಾ ಭಾಗ್ಲಾಂ. ಭಿತರ್ ರಾಂದ್ಣಿ ಕೊನ್ಶಾಂತ್ ಏಕ್ ಮಾಜಾರ್ ನಿದ್ಲಾಂ. ಭಾಯ್ಲ್ಯಾ ಹಿಂವಾಕ್ ರಾಂದ್ಣಿಚಿ ಊಬ್ ಸುಶೆಗ್ ದಿತಾಲಿ ತಾಕಾ. ಭಾಯ್ರ್ ಕೊಟಾರ್ಲಿ, ಮಾಣ್ಕೆ ಅರಾಬ್ಬಾಯೊ ದಿತಾಲೆ. ದೆವಾಕ್ ಹೊಗಳ್ಸಿತಾತ್ ವ ದುರ್ಸತಾತ್ ತೆಂ ನೆಣಾಂ.
ಏಕ್ ಚಿಮ್ಣಿ, ತ್ಯಾ ಸಗ್ಳ್ಯಾ ಘರಾಂತ್ ಉಜ್ವಾಡ್ ಫಾಂಕಂವ್ಚೆಂ ಏಕ್ ವ್ಯರ್ಥ್ ಸಾಹಸ್ ಕರ್ತೇ ಆಸಾ. ಆನಿ ತಿ ಏಕ್ ಪಾವಣ್ಶಿಂ ವರ್ಸಾಂ ಉತ್ರಾಲ್ಲಿ ಭಾಗೆಟಿ ಕೂಡ್, ಕಾತಿ ಸಗ್ಳ್ಯೊ ಮಿರಿಯೊ ಪಡೊನ್ ಪಾಟ್ ಬಾಗ್ವಾಲ್ಲಿ ಏಕ್ ಸ್ತ್ರೀ. ಏಕ್ ಸುತಾಚೆಂ ಕಾಪಾಡ್, ಆಂಗ್ಭರ್ ರೆವ್ಡಾವ್ನ್ ಪಾಂಯ್ ಲಾಂಬ್ ಸೊಡುನ್ ಬಸ್ಲ್ಯಾ. ದೆಗೆನ್ ಪಾನ್ ಪೊಡಿಚೆಂ ಹರ್ವಣ್ ದವರುನ್, ಆಲ್ತಾರಿಕ್ ಮುಖ್ ಕರುನ್ ಆಮೊರಿ ಕರ್ನ್ ಆಸಾ.
ತಿ ಸೊಭಿನಾಮಿ..!
ಆಲ್ತಾರಿಕ್ ಸಾಂತ್ ಆಂತೊನಿಚಿ ಇಮಾಜ್. ಏಕ್ ಖುರಿಸ್ ಆನಿ ಏಕ್ ಕೊನ್ವೆಂಟಾಚಾ ಸಿಸ್ಟರಿನ್ ದಿಲ್ಲೆಂ ಕೊಂತ್. ರಾಮಾಚ್ಯಾ ಆಯ್ತಾರಾಚೊ ರಾಮ್ ಆನಿ ಕಣ್ಶಿಯ್ ತ್ಯಾಏ ಆಲ್ತಾರೆರ್ ಆಸಾ. ಪುಣ್ ಉಂದ್ರಾನ್ ಸಗ್ಳೆಂ ಭಾತ್ ಕರ್ಲಾಯ್ಲಾಂ. ಪವಿತ್ರ್ ತೆಂ. ತಾಚೊ ಜಾಗೊ ತೊಚ್ಚ್.. ಆಲ್ತಾರಿಚೊ..!
ಯೇ ಭಾಗೆವಂತ್ ಸಾಂತ್ ಆಂತೊನಿ.. ಪಾವ್ ತುಂ ಮ್ಹಾಕಾ..! ಆನಿಕೀ ಮ್ಹಾಕಾ ರಡಯ್ನಾಕಾ. ಕಿತ್ಲಿಂ ಜಾಯ್ತ್ ದುಃಖಾಂ ಹಾವೆಂ ಗಳಯಿಲ್ಲಿಂ. ಕಿತ್ಲಿಂ ಜಾಯ್ತ್ ಮಾಗ್ಣಿಂ ತುಕಾ ಭೆಟಯಿಲ್ಲಿಂ?!. ಕಿತ್ಯಾಕ್..., ತುಂ ತ್ಯಾ ಆಲ್ತಾರಿರ್ ಉಭೊ ಆಸಾಯ್?! ದೆವಾ ಚಾಕೊರ್ ತುಂ!. ಮ್ಹಜೊ ಪಾತ್ರೊನ್ ತುಂ.. ಹಾಂವೆಂ ಕೆಲ್ಲಿಂ ಮಾಗ್ಣಿಂ ತುಂ ದೆವಾ ಪರ್ಯಾಂತ್ ಪಾವಯ್ತಾಯ್ ವ ನಾ? ತುವೆಂ ತಾಕಾ ಸಾಂಗ್ಲಾಂಯ್ ವಾ ನಾ? ಹಾಂವ್ ಮಾಗ್ತಾಂ ಮ್ಹಣ್ ತುಜೆಲಾಗಿಂ? ಆನಿ ದೇವ್ ಕಿತ್ಯಾಕ್ ಮ್ಹಜೆಂ ಮಾಗ್ಣೆಂ ಆಯ್ಕಾನಾ?
ಕಿತ್ಲೆ ಜಾಯ್ತ್ ಏಕ್ ಆಲ್ತಾರೆವಯ್ಲ್ಯಾ ಸಾಂತಾ, ತುಜೆಲಾಗಿಂ ಕಾಡ್ಲ್ಲೆ ತೆ ಆಕ್ಲಾಸ್..?! ಸಂಸಾರಾಚ್ಯಾ ಸರ್ವ್ ರಚ್ನಾಂಕ್ ರಚ್ಲ್ಲ್ಯಾ ತ್ಯಾ ನಾಂ ದಿಸ್ಚ್ಯಾ ದೆವಾಕ್ ತರೀ ಕಳಿತ್ ನಾ. ಆಪ್ಲ್ಯಾ ರಚ್ನೆಕ್ ಕಿತೆಂ ಜಾಯ್ ಮ್ಹಳ್ಳೆಂ?!. ಹಾಂವೆಂ ತರ್ಯೀ ಕಸಲ್ಯಾಂತ್ ಚೂಕ್ ಆಧಾರ್ಲಿ? ಸಾಂಗ್ ಮ್ಹಾಕಾ. ಹಾಂವ್ ಜಲ್ಮಾಲ್ಲಿ ಚೂಕ್? ಮ್ಹಜ್ಯಾ ಆವಯ್ ಬಾಪಾಯ್ನ್ ಹ್ಯಾ ಸುಬ್ಳ್ಯಾ ಖೊಮ್ಟಾಂತ್ ಮ್ಹಾಕಾ ಕಾಜಾರ್ ಕರುನ್ ದಿಲ್ಲಿ ಚೂಕ್? ತಾಂತುಂಯ್ ಹಾಂವೆಂ ಸಾಕ್ರಾಮೆಂತ್ ಸ್ವಿಕಾರ್ ಕೆಲ್ಲೊ. ’ಸಾತ್ವೊ’ ತಿ ಮ್ಹಜಿ ಚೂಕ್? ಸಂಸಾರಾಕ್ ನಿಯಮ್ ತರೀ, ಆದಾಂವ್ನ್ ಆನಿ ಏವೆನ್ ಖೆಲ್ಲೆಂ ತೆಂಚ್ ಫಳ್.. ಮೀಟ್ ಮಿರ್ಸಾಂಗ್ ಖೆಲ್ಲ್ಯಾ ಹ್ಯಾ ಜಿವಾನ್ ಪರತ್ ಆನಿ ಪರತ್ ಖೆಲ್ಲೆಂ ಚೂಕ್? ತ್ಯಾ ಆಡ್ವಾರ್ಲೆಲ್ಯಾ ಫಳಾಚಾ ಎಕಾ ಭಿಂಯಾನ್ ಮ್ಹಜ್ಯಾ ಗರ್ಭಾಂತ್ ವಾಡಾವಳ್ ಘೆವ್ನ್ ನೋವ್ ಮಯ್ನ್ಯಾಚ್ಯಾ ಆವ್ದೆ ಉಪ್ರಾಂತ್ ಮನ್ಶಾ ರುಪಿಂ ಭುಂಯ್ ಪಡ್ತಾನಾ, ತಾಚಿ ಆವಯ್ ಜಾಲ್ಲಿ ಮ್ಹಜಿ ಚೂಕ್? ಆನಿ ತ್ಯಾ ತುಜ್ಯಾ ದೆವಾನ್ ರಚ್ಲ್ಲ್ಯಾ, ರಚ್ನಾ ಮಧ್ಲ್ಯಾ ಎಕಾ ಸೊರ್ಪಾನ್ ಮಹ್ಜ್ಯಾ ಘೊವಾಕ್ ಖೊಂಚಾಯಿಲ್ಲೆಂ, ತೊ ಮೆಲೊ, ಮ್ಹಾಕಾ ಸಾಂಡುನ್.. ಆನಿ ಮ್ಹಜ್ಯಾ ತಾಚ್ಯಾ ಮಧ್ಲ್ಯಾ ಆಡ್ವಾರ್ಲೆಲ್ಯಾ ಫಳಾಕ್ ಸಾಂಡುನ್ ಗೆಲೊ!
ಆಲ್ತಾರಿವಯ್ಲ್ಯಾ ಯೇ ಸಾಂತ್ ಅಂತೊನಿ, ಸಾಂಗ್ ಮ್ಹಾಕಾ, ದುಬ್ಳಿಕಾಯೆಂತ್ ಥಂಯ್ ಹಾಂಗಾ ಕಾಮ್ ಕರುನ್, ಕೊಣಾ ಘರಾ ಸಾರೆಂ ಕಾಡುಂಕ್, ಬೆಸಾಯ್; ಖೊಲಿ ಜಾಡುಂಕ್, ಕಾಂಟಿ ಕಾತ್ರುಂಕ್, ಭಾತ್ ಲುವೊಂಕ್, ದೀಸ್ ಆನಿ ರಾತ್. ಕುಟ್ಮಾ ಫಳಾಕ್ ಪೊಸ್ಚ್ಯಾ ಎಕಾಚ್ಚ್ ನಿಬಾನ್. ಜಿಯೆಲ್ಲಿ ಮ್ಹಜಿ ಚೂಕ್?
ಆನಿ ತೊ ಇಸ್ಕೊಲಾಚೆಂ ಬೇಗ್ ಖಾಂದ್ಯಾರ್ ಘೆವ್ನ್ ಚ್ಯಾರ್ ವರ್ಸಾಂ ಪರ್ಯಾಂತ್ ಗೆಲ್ಲೊ! ಹರ್ಯೆಕ್ ಪರಿಕ್ಶೆಂತ್ ತಾಂಬ್ಡೆ ಗೀಟ್ ಯೆತಾತ್ ಮ್ಹಣ್ ’ಶಾಸ್ತ್ರಿ’ ಮಾಸ್ಟೆರಾನ್ ಮಾರ್ಲ್ಲ್ಯಾ ಮಾರಾಂಕ್ ಭಿಂಯೆವ್ನ್, ಘರ್, ಇಸ್ಕೊಲ್, ಗಾಂವ್ ಸೊಡ್ನ್ ಧಾಂವ್ಲ್ಲೊ ಮ್ಹಜೊ ಕಾಳ್ಜಾ ಕುಡ್ಕೊ ’ವಿನ್ಸಿ’ ಪಾಟಿಂ ಯೇಂವ್ಕ್ ನಾ. ದೊಳ್ಯಾಂ ದಿಸ್ಟಿಕ್ ನಾ. ಆಕ್ಲಾಸಾಂತ್ ಹಾಂವ್ ರಡ್ಲ್ಲಿಂ ಕಿತ್ಲಿಂ? ತುಕಾಯ್ ಹಾಂವೆಂ ವಾತಿ ಪೆಟಯಿಲ್ಲ್ಯೊ ಸಾಂತಾ, ಉಗ್ಡಾಸ್ ಕರ್. ಹಾಂವೆಂ ತುಕಾ ಇಗರ್ಜೆಂತ್ ಆನಿ ಹಾಂಗಾ ದೊನ್ಯ್ ಕಡೆ ವಾತಿ ಪೆಟಯಿಲ್ಲ್ಯೊ. ತುಕಾ ಉಗ್ಡಾಸ್ ಜಾಂವ್ಚೊನಾ. ತುಂ ದಿಸಾಕ್ ಕಿತ್ಲ್ಯಾ ಲೊಕಾಚೆಂ ಮಾಗ್ಣೆಂ ಆಯ್ಕತಾಯ್ ಕೊಣ್ ಜಾಣಾಂ? ಕಿತ್ಲ್ಯಾ ಲೊಕಾಂಚ್ಯಾ ಗರ್ಜೆಕ್ ಪಾವ್ತಾಯ್ ಕೊಣ್ ಜಾಣಾಂ? ಪುಣ್ ಇತ್ಲ್ಯಾ ವರ್ಸಾಂನಿ ಮ್ಹಜ್ಯಾ ವಾಂಟ್ಯಾಚೆಂ ಮಾಗ್ಣೆಂ ಆಯ್ಕೊಂಕ್ ತುಕಾ ವೇಳ್ ನಾ?!.
ಸರ್ವ್ ಲೋಕ್ ತುಜ್ಯೆಲಾಗಿಂಚ್ ಮಾಗ್ತಾತ್ಗಿ ಕಿತೆಂ? ತಾಂಕಾಂ ದುಸ್ರೊ ಸಾಂತ್ ನಾ? ಪುಣ್ ಆಲ್ತಾರಿ ವಯ್ಲ್ಯಾ ಏ ಸಾಂತಾ.. ಹಾಂವೆಂ ಆಜ್ ನಿಚೆವ್ ಕೆಲಾ. ಎಕ್ಚ್ ಘರ್ ಆನಿ ಮ್ಹಾಕಾ ಸಾಂಡುನ್ ಗೆಲ್ಲ್ಯಾ ಮ್ಹಜ್ಯಾ ಪುತಾಕ್ ವಿನ್ಸಿಕ್ ಘರ್ಚಿ ವಾಟ್ ಪಾಟಿಂ ದಾಕಯ್..! ನಾಂ ತರ್, ಹ್ಯಾ ಚಿಂತ್ನಾಂ ಥಾವ್ನ್ ಮುಕ್ತಿ ಜೊಡುಂಕ್, ಮ್ಹಾಕಾ ಮೋರ್ನ್ ದಾಡ್! ಮ್ಹಾಕಾ ಮೋರ್ನ್ ಧಾಡ್!! ಹೆಂ ಸಾಧ್ಯ್ ನಾಂ ತರ್, ಫಾಲ್ಯಾಂಚ್ಯಾ ಸಾಂಜೆಚಿ ಆಮೊರಿ ಕರುಂಕ್ ತುಂ ತ್ಯಾ ಆಲ್ತಾರಿರ್ ಆಸ್ಚೊನಾಂಯ್!. ಮ್ಹಾಕಾ ನಾಕಾ ಧರ್ಮ್. ನಾಕಾ ತೆಂ ಮಾಗ್ಣೆಂ.! ಜಿಣ್ಯೆ ಅಕೇರಿ ಪರ್ಯಾಂತ್ ಫಳ್ ದೀಂವ್ಕ್ ಸಕಾನಾತ್ಲ್ಲೆಂ..! ಹಾಂವ್ ಭಾವಾಡ್ತಾವಿಣ್ ಜಾತೆಲಿಂ..!
ಚಿಮ್ಣೆಕ್ ಏಕ್ ಫುಂಕ್ ಮಾರ್ಲಿ ತಿಣೆಂ.. ಕಾಳೊಕ್ ಭರ್ಲೊ ತ್ಯಾ ಘರಾಂತ್. ಝಗ್ಲಾಣ್ಯಾಂತ್ ಘರಾಂತ್ ಉಜ್ವಾಡ್ ಭರ್ತಲೊ. ಪಾವ್ಸ್ ಶಿರಾಂಧಾರಿಂನಿ ವೊತ್ತಾಲೊ! ಝಡ್ವಾರೆಂ ವಾಳ್ತೆಲೆಂ.!
ಸೆಜಾರ್ಚೊ ಕೊಂಬೊ ಸಾದ್ ಘಾಲಿಲಾಗ್ಲೊ. ಹ್ಯಾ ಘರಾಂತ್ಲ್ಯಾ ಕೊಂಬ್ಯಾಂಚೊ ಸಾದ್ ಆಯ್ಕಾಲೊನಾ. ಘರಾಂತ್ ಕೊಲ್ಗೆಂ ನಾ! ಆಲ್ತಾರಿಚೆರ್ ಸಾಂತ್ ನಾ! ಜಿವಿ ಆಸ್ಲ್ಲಿ ಮ್ಹಾತಾರಿ ನಿರ್ಜಿವ್ ಕುಡಿರ್ ಪಾಕ್ಯಾ ಪಂದಾ ವಿಶೆವ್ ಘೆತಾ! ಸಸ್ಣಾಚೊ ವಿಶೆವ್!. ಪಾಕ್ಯಾ ವಯ್ರ್ ವ್ಹಡ್ ಜಯ್ತ್ ಮಾಡ್ ಕುಡ್ಕೆ ಜಾವ್ನ್ ಪಡ್ಲಾ!!
ಕೊಣ್ ಜಾಣಾ ಸಾಂತ್ ಭಿಂಯೆಲೊ?! ವ ತಾಣೆಂ ಸೊಭಿನಾಮ್ಯೆಚೆಂ ಮಾಗ್ಣೆಂ ಆಯ್ಕಾಲೆಂ..?!!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
