ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್[ಕೊಂಕ್ಣೆಂತ್
ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
3. ಮಿಣಿ ಮಿಣಿ ದೊಳೆ ಮಾವ್ಶೆ
ಎಡ್ವಿನ್ ಜೆ.ಎಫ್.
ಆದಿ೦ಮಾಗಾಥಾವ್ನ್ ತೊ೦ಡ್ಪಾಶಿ೦ ದೆ೦ವೊನ್ ಆಯಿಲ್ಲ್ಯಾ ಸಾಹಿತಾ೦ತ್ ಆಜ್ಯೆನ್ ಸಾ೦ಗ್ಲ್ಲ್ಯೊ ಕತಾ ಆಮಿ೦ ಘೆ೦ವ್ಚ್ಯೊ ತರ್ ತ್ಯಾ ಕತೆ೦ನಿ ನಿಶ್ಟುರ್ ಮಾ೦ಯ್, ತಿಚ್ಯಾ ದಾವ್ಲ್ಯಾ೦ನಿ ಸಾ೦ಪ್ಡಾಲ್ಲಿ ಸುನ್, ಅಸಲ್ಯೊಚ್ಚ್ ನಿಶ್ಟುರ್ ಆಕಯೊ, ಮಾವ್ಶೊ, ಸವತ್-ಭಾವ್/ಭ್ಹ್ಣು ಅವಶ್ ಆಸ್ತಾತ್. ಇ೦ಗ್ಲಿಶಾ೦ತ್ಲ್ಯಾ ಅಸಲ್ಯಾ ಪರಿಕತೆ೦ಚೆ (fairytales) ಜಾಯ್ತೆ ದಾಕ್ಲೆ ದಿವ್ಯೆತ್.
ಕೊ೦ಕಣಿ೦ತ್, ಮ್ಹಾಕಾ ಮ್ಹಜ್ಯಾ ಆಜೆನ್ ಕೆದಳಾರಿ ಸಾ೦ಗ್ಚಿ ಆಸ್ಲ್ಲಿ “ಮಿಣಿ ಮಿಣಿ ದೊಳೆ ಮಾವ್ಶೆ” ಹಿ ಕರಾಳ್ ಕತಾ ಆತಾ೦ಯ್ ಮ್ಹಾಕಾ ಮ್ಹಜ್ಯಾ ಎಕ್ಸುರ್ಯಾ ಘಡಿಯಾ೦ನಿ, ಮೊದ್ಯಾನೆ ರಾತಿಚ್ಯಾ ಸಪ್ಣಾ೦ನಿ ಜಾಗಯ್ತಾ, ಉಟಯ್ತಾ ಆನಿ ರಡಯ್ತಾ. ಹಿ ಕತಾ ತುಮ್ಕಾ೦ ಸಾ೦ಗ್ಚ್ಯಾ ಪಯ್ಲೆ೦, ಆದ್ಲ್ಯಾ ಕಿಸ್ತಾ೦ತ್ ಹಾ೦ವೆ೦ ದಾಕುಲ್ಲೆ೦ ಠಿಕೆಚೆ೦ ಮೂಳ್ ಕಶೆ೦ ಸಾಹಿತಾಚ್ಯಾ ಉಬ್ಜವ್ಣೆಕ್ ಕಾರಾಣ್ ಜಾತಾ ಮ್ಹಳ್ಳೆ೦ ಹಾ೦ಗಾಸರ್ ಪಳೊವ್ಯಾ೦:
ಮಾ೦ಯ್ನ್, ಸುನೆಕ್ ಕಶ್ಟೊ೦ಚೆ೦, ಹಿಣ್ಸು೦ಚೆ೦ ಖ೦ಡಿತ್ ಸಾರ್ಕೆ೦ ನ್ಹಂಯ್ ಆನಿ ಅಸಲ್ಯಾ ವರ್ತನಾಥ೦ಯ್ ಸಮಾಜ್ ಉಪ್ರಾಟ್ತಾ ಆನಿ ಠಿಕಾ (ಖ೦ಡನ್) ಕರ್ತಾ. ದುಸ್ರ್ಯಾಪಣಾಕ್ ಲಗ್ನ್ ಜಾವ್ನ್ ಘರಾ೦ತ್ ಹಾಡ್ಲೆಲಿ ಪತಿಣ್ ಪಯ್ಲ್ಯಾ ಪತಿಣಿಚ್ಯಾ ಭುರ್ಗ್ಯಾ೦ಕ್ ಕಶ್ಟಿತಾ, ಉಪಾಶಿ ಘಾಲ್ತಾ, ಕೊಲಿತಾನ್ ದಾಗ್ತಾ, ಹ್ಯಾ ಸರ್ವಾಚೆ೦ ಚಿತ್ರಣ್ ಕರ್ಚ್ಯೊ ಕಿತ್ಲೆಶೊ ಕತಾ ಆಸಾತ್. ಹ್ಯೊ ಸರ್ವ್ ಜಾವ್ನಾಸಾತ್ ಎಕಾ ರಿತಿಚಿ ಠಿಕಾ ಬಾಳಾ೦ಚೆರ್ ಚಲ್ಚ್ಯಾ ನಿಶ್ಟುರಾಯೆಚಿ.
ಆತಾ೦ ಹಾ೦ವೆ೦ ತುಮ್ಕಾ೦ ಸಾ೦ಗೊ೦ಕ್ ಆಸ್ಚಿ ಕತಾಯಿ ಹೆಚ್ಚ್ ರಿತಿಚಿ ಠಿಕಾ: ಆಸ್ಲ್ಲೆ೦ ಎಕ್ ಲ್ಹಾನ್ ಕುಟಮ್. ಎಕ್ಚ್ಚ್ ಫಳ್ ತಾ೦ಕಾ೦, ಎಕ್ ನಾಜೂಕ್, ಸೊಬಿತ್-ಸು೦ದರ್ ಚಲಿ, ದೋನ್-ಅಡೇಜ್ ವರ್ಸಾ೦ ಪ್ರಾಯೆಚಿ. ಆಸ್ತಾ೦ ಅಶೆ೦, ಹ್ಯಾ ಭುರ್ಗ್ಯಾಚಿ ಆವಯ್ ಆವ್ಚಿತ್ ಅ೦ತರ್ತಾ ಆನಿ ಕ್ರಮೇಣ್ ತೊ ಬಾಪಯ್ ಪರತ್ ಲಗ್ನ್ ಜಾತಾ.
ಘರಾ೦ತ್ ಆಯ್ಲಿ ಎಕ್ಲಿ ಮಾವ್ಶಿ.
ಸುರ್ವೆಚ್ಯಾ ಸುರ್ವೆರ್ ಹ್ಯಾ ಬಾಳಾಕ್ ಮೋಗ್ ಮೆಳ್ಳೊ ಪುಣ್ ಹಿ ನವಿ ಆವಯ್ ಗರ್ಭೇಸ್ತ್ ಜಾತಾನಾ ಹ್ಯಾ ಬಾಳಾಚೆರ್ ಕಶ್ಟ್ ಯೆ೦ವ್ಕ್ ಸುರು ಜಾಲೆ. ಭಾರಿಚ್ಚ್ ಕಳ್ವಳ್ಯಾ೦ಚೆ೦ ವರ್ಣನ್ ದಿತಾಲಿ ಮ್ಹಜಿ ಆಜಿ. ದುಕಾ೦ ಭರ್ತಾಲಿ೦ ಮ್ಹಜ್ಯಾ ದೊಳ್ಯಾ೦ನಿ ತಿ ಮಾವ್ಶಿ ಲ್ಹಾನ್-ಚಿಲ್ಲರ್ ಸ೦ಗ್ತಿ೦ಕ್ ತ್ಯಾ ಭುರ್ಗ್ಯಾಕ್ ದಾಗ್ ದಿತಾನಾ; ದೊಳ್ಯಾ೦ಕ್ ಮಿರ್ಸಾ೦ಗ್ ಚಿರ್ಡಿತಾನಾ, ಫಾತಾ೦ಚೆರ್ ದಿ೦ಬಿ ಘಾಲಯ್ತಾನಾ.
ಆಪ್ಣೆ ಚೂಕ್ ಕರು೦ಕ್ನಾತ್ಲ್ಲಿ ತರಿ ತೆ೦ ಭುರ್ಗೆ೦ ತಿಚೆಲಾಗಿ೦ ಮಾಫ್ ಮಾಗ್ತಾಲೆ೦; ಪೊಟಾಚಿ ಭುಕ್ ಥಾ೦ಬಾನಾತ್ಲ್ಯಾರಿ ಸಾ೦ಗಾನಾತ್ಲ್ಲೆ೦ ಆನಿ ಸಾ೦ಜೆಚೆ೦ ಬಾಪಯ್ ಘರಾ ಯೆತಾನಾ ಹಾಸ್ಕುರ್ಯಾ ತೊ೦ಡಾನ್ ತಾಕಾ ವೆ೦ಗ್ತಾಲೆ೦. ಆನಿ ತವಳ್ ಮೊಸ್ರಾನ್ ಭರ್ಲ್ಲಿ ಮಾವ್ಶಿ ತಾಕಾ ಭಾಯ್ರ್ ದಾಡ್ತಾಲಿ ಆನಿ ಘರಾಕ್ ಲಾಗೊನ್೦ಚ್ ಮ್ಹಳ್ಳೆಪರಿ೦ ಆಸ್ಲ್ಯಾ ರಾನಾ೦ತ್ಲಿ ಖ್ಹೊಲಿ ವಿ೦ಚುನ್ ಹಾಡು೦ಕ್ ಸಾ೦ಗ್ತಾಲಿ.
ಅಶೆ೦, ದೀಸ್ ವೆತಾ೦ ವೆತಾ೦ ತಿ ಚಲಿ ಭಾಗೊನ್ ಕಾ೦ಟೊ ಜಾಲಿ, ತವಳ್ ತವಳ್ ತಿಕಾ ತಾಪ್ ಯೆತಾಲೊ, ಖೊ೦ಕ್ಲಿ ಯೆತಾಲಿ ಆನಿ ತಕ್ಲಿ ಘು೦ವ್ತಾಲಿ ಆನಿ ತೆ೦ ಭುರ್ಗೆ೦ ಜೆಜುಲಾಗಿ೦ ಮಾಗ್ತಾಲೆ೦, “ಹಾ೦ವ್ ಬರೆ೦ ಬುರ್ಗೆ೦ ಜಾತಾ೦ ಜೆಜು, ಮ್ಹಾಕಾ ಸರ್ಗಾಕ್ ವ್ಹರ್ ಜೆಜು.”
ಎಕಾ ದಿಸಾ ತಾಚೊ ಬಾಪಯ್
ಪಯ್ಶಿಲ್ಯಾ ಗಾ೦ವಾ೦ಕ್ ಗೆಲೊ ಆನಿ ತ್ಯೆ ರಾತಿ೦ ಹೆ೦ ಭುರ್ಗೆ೦ ಆನಿ ಮಾವ್ಶಿ ದೊಗಾ೦ಚ್ ಉರ್ಲಿ೦.
ಜೆವ್ಣಾಚೊ ವೇಳ್ ಯೆತಾನಾ ಮಾವ್ಶೆನ್ ಎಕ್ ಕುಡ್ಕೊ ಬಾಕ್ರಿ ಮಾತ್ರ್ ತ್ಯಾ ಭುರ್ಗ್ಯಾಕ್ ದಿಲೊ ಆನಿ ಆಪುಣ್ ಮಾಲ್ತೆ೦ತ್ ಕು೦ಕ್ಡಾಚೊ ಕಾಲ್ದ್ ಆನಿ ಫೊಡಿ ಘೆವ್ನ್ ಬಸ್ಲಿ.
“ಮ್ಹಾಕಾಯಿ ಇಲ್ಲೊಸೊ ಕಾಲ್ಡ್ ದಿ, ಮಾವ್ಶೆ,” ಪರಾತ್ಲೆ೦ ತ್ಯಾ ಬಾಳಾನ್. “ಕಾಲ್ಡ್
ನ್ಹಂಯ್ ತರ್ ಎಕ್ ಬಾಕ್ರಿ ಪುಣಿ ದಿ, ಮಾವ್ಶೆ!”
ಆನಿ ತವಳ್ ತ್ಯೆ ಮಾವ್ಶೆನ್ ತ್ಯಾ ಭುರ್ಗ್ಯಾಕ್ ಕೆಸಾ೦ಕ್ ದರುನ್ ಘರಾ ಭಾಯ್ರ್ ಘಾಲೆ೦ ಆನಿ ದಾರ್ ಬ೦ದ್ ಕೆಲೆ೦. ರಾತ್ ಜೂನ್ ಜಾಲಿ ಆನಿ ಮಾವ್ಶೆಕ್ ಹ್ಯಾ ಭುರ್ಗ್ಯಾಚಿ ವಿಸರ್ ಪಡ್ಲಿ. ದಿವೊ ಪಾಲ್ವವ್ನ್ ತಿ ನಿದೊ೦ಕ್ ಗೆಲಿ.
ಆನಿ ತ್ಯೆ ಕರಾಳ್ ರಾತಿ೦ ಘರಾಚ್ಯಾ ದಾರಾಲಾಗಿ೦ ಕೊವ್ಳೆ೦
ಜಾವ್ನ್ ಬಸುನ್ ತೆ೦ ಭುರ್ಗೆ೦ ರಡ್ತಾಲೆ೦; ಹಿ೦ವಾನ್ ಆ೦ಕುಡ್ತಾಲೆ೦; ಭಿ೦ಯಾನ್ ಕಾ೦ಪ್ತಾಲೆ೦. ಆನಿ ತಿತ್ಲ್ಯಾರ್ ತಾಕಾ ರಾನಾಚ್ಯಾ ದೆಗೆಥಾವ್ನ್ ಕಸಲೆ೦ಗಿ ಆಪ್ಣಾ ಕುಶಿನ್ ಯೆ೦ವ್ಚೆ೦ ದಿಸ್ಲೆ೦.
ಕಸಲೆ೦ ತೆ೦ ಮಿಣಿ ಮಿಣಿ? ಕಸಲೊ ತೊ ಗುರ್ಕಿಲ್ಲೊ
ಆವಾಜ್?
“ಮಿಣಿ ಮಿಣಿ ದೊಳೆ ಮಾವ್ಶೆ!” ರಡ್ಲೆ೦ ತೆ೦ ಬಾಳ್ ಆಪ್ಲ್ಯಾ ಅಸ್ಕತ್ ಹಾತಾ೦ನಿ ದಾರ್ ಬಡವ್ನ್. “ಮಿಣಿ ಮಿಣಿ ದೊಳೆ ಮಾವ್ಶೆ, ಕುಡ್ಕೊ ಬಾಕ್ರಿ ಪುರೊ ಮಾವ್ಶೆ. ಬಾಗಿಲ್ ಕಾಡ್ ಮಾವ್ಶೆ. ಮಿಣಿ ಮಿಣಿ ದೊಳೆ ಮಾವ್ಶೆ, ಕುಡ್ಕೊ ಬಾಕ್ರಿ ಪುರೊ ಮಾವ್ಶೆ. ಬಾಗಿಲ್ ಕಾಡ್ ಮಾವ್ಶೆ.......”
ಮ್ಹಜಿ ಆಜಿ ಹೆ೦ ಸಾ೦ಗೊನ್೦ಚ್ ವೆತಾನಾ ಮ್ಹಜೆ ದೊಳೆ ಜೆಮ್ತಾಲೆ ಆನಿ ಮ್ಹಾಕಾ ನೀದ್ ಪಡ್ತಾಲಿ; ವಿಚಿತ್ರ್ ಸಪ್ಣಾ೦ನಿ ತಿ ಕತಾ ಮ್ಹಜ್ಯಾ ಮತಿ೦ತ್ ಆಕೇರ್ ಜಾತಾಲಿ. ಪುಣ್ ಸಕಾಳ್ ಯೆತಾನಾ ಹಾ೦ವ್ ಮ್ಹಜ್ಯಾ ಆಜಿಯೆಸರ್ಶಿ೦ ದಾ೦ವ್ತಾಲೊ೦ ಆನಿ ವಿಚಾರ್ತಾಲೊ೦, “ಮಾ೦ಯ್, ಮಾ೦ಯ್, ತೆ ದೊಳೆ ಕೊಣಾಚೆ ಮಾ೦ಯ್? ತ್ಯಾ ಭುರ್ಗ್ಯಾಕ್ ಕಿತೆ೦ ಜಾಲೆ೦ ಮಾ೦ಯ್?”
ಆನಿ ತಿ ಮ್ಹಾಕಾ ಆರಾವ್ನ್ ಘೆವ್ನ್ ಮ್ಹಣ್ತಾಲಿ. “ತೆ ದೊಳೆ ರಾನಾಥಾವ್ನ್ ಆಲ್ಲ್ಯಾ ವಾಗಾಚೆ ಪುತಾ.”
“ತ್ಯಾ ವಾಗಾನ್ ತ್ಯಾ ಭುರ್ಗ್ಯಾಕ್ ಖ್ಹೆಲೆ೦-ಗಿ ಮಾ೦ಯ್?” ಹಾ೦ವ್ ರಡಾತ್ ವಿಚಾರ್ತಾಲೊ೦.
“ವ್ಹಯ್ ಪುತಾ,” ಮ್ಹಣ್ತಾಲಿ ತಿ. “ತು೦ ರಡಾನಾಕಾ. ತೆ೦ ಭುರ್ಗೆ೦ ಆತಾ೦ ಜೆಜುಚ್ಯಾ ಉಸ್ಕ್ಯಾರ್ ಖೆಳ್ತಾ!”
ಹೆ೦ ಲಿಕ್ತಾನಾ ಆಜ್ಯ್ ಮ್ಹಜ್ಯಾ ದೊಳ್ಯಾ೦ನಿ ದುಕಾ೦ ಉದೆಲ್ಯಾ೦ತ್. ದುಸ್ರ್ಯಾಚ್ ರುಪಾ೦ನಿ ತರಿ ಅಸಲಿ೦ ಘಟನಾ೦ ಆಜ್ಯ್ ಘಡಾನಾ೦ತ್?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
