ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಂಕರ್ - 8
ಮಟ್ವಿ ವಳೊಕ್: ಕವಿ ಜಾವ್ನ್ ಉದೆಲ್ಲೊ ಜೊಮೆಲ್ ಬೊಂದೆಲ್ ಹಾಣೆಂ ಎದೊಳ್ಚ್ ಪನ್ನಾಸಾಂ ವಯ್ರ್ ಕವಿತಾ ಬರಯ್ಲ್ಯಾಂತ್ ಆನಿ ಹಿ ತಾಚಿ ಪಯ್ಲಿ ಮಟ್ವಿ ಕಾಣಿ ತರ್ಯ್ ಹ್ಯಾ ಕಾಣ್ಯೆಂತ್ ತಾಣೆಂ ವಿಂಚ್ಲ್ಲಿ ಕಥಾವಸ್ತ್ ಕಾಂಯ್ ಧಾರ್ಮಿಕ್ ದಿಸೊಂಕ್ ಪುರೊ ತರ್ಯ್ ಮನ್ಶಾ ಸಂಯ್ಬಾಚಾ ಅಸ್ಕತ್ ಚಿಂತ್ಪಾಸಕ್ತೆಚೆರ್ ತಶೆಂಚ್ ಪೊಕೊಳ್ ಭಾವಾರ್ಥಾಚೆರ್ ಎಕೊಡಿ ನದರ್ ಘಾಲ್ಲಿ ದಿಸೊನ್ ಯೆತಾ.
ಜೊಮೆಲ್ ಬೊಂದೆಲ್
ಕಥಾಂಕರ್ - 8. ಜೆಜು ಮೆಸ್ಸಾಯಾಗಿ?.
"ಟಕ್...ಟಕ್" ಬಾಗ್ಲಾರ್ ಕೊಣೆಂಗೀ ಟೊಕ್ಲೆಂ. ಹಾಂವ್ ಏಕ್ಚ್ಫರಾ ನಿದೆಂತ್ಲೊ ಉಟೊನ್ ಬಸ್ಲೊಂ. ಬಾಯ್ರ್ ಅನಿಕೀ ದಾಟ್ಟ್ ಕಾಳೊಕ್ ಆಸ್ಲ್ಲೊ. ಕಾಂಯ್ ಫಾಂತ್ಯಾಚಿಂ ಚಾರ್ ಯಾ ಸಾಡೆಚಾರ್ ವೊರಾಂ ಜಾತಿತ್. ಪಾದ್ದೆವ್ನ್ಶೆಂ ಹಾಂವೆಂ ವ್ಹಳೂ ಬಾಗಿಲ್ ಉಗ್ತೆಂ ಕೆಲೆಂ. ಪಲ್ತೊಡ್ಚೊ ಸಿಮಾಂವ್ ಬಗ್ಲಾರ್ ಉಭೊ ಆಸ್ಲ್ಲೊ ಪಳೆವ್ನ್ ಹಾಂವ್ ಥಟಾಕ್ಲೊಂ. ಶಿಮಾಂವ್ಚೊ ಉಜ್ವೊ ಪಾಂಯ್ ಮಟ್ವೊ. ತೊ ಜಲ್ಮಾ ಥಾವ್ನ್ ತಸೊಚ್ ಆಸ್ಲ್ಲೊ.
ಸಿಮಾಂವ್ ಜೊರಾನ್ ಕರ್ಶೆತಾಲೊ. ಪಾಟ್ಲ್ಯಾ ದಿಸಾನಿಂ ತಾಚಿ ಆವಯ್ಚಿ ಭಲಾಯ್ಕಿ ವೀಶೆಷ್ ಕಾಂಯ್ ಬರಿ ನಾತ್ಲ್ಲಿ. ತಾಚೆಂ ಬಿವ್ಕುರೆಂ ತೊಂಡ್ ಪಳೆವ್ನ್;
"ಕಾಂಯ್ ಪುಣಿ ತುಜಾ ಮಾಂಯ್ಕ್......." ಶೀದಾ ವಿಸಾರುನ್ ಹಾಂವೆ ತಾಕಾ
ಭಿತರ್ ಆಪಯ್ಲೆಂ.
"ನಾಂ ಜುವಾಂವ್, ಮಾಂಯ್ ಪುರ್ತಿ ಬರಿ ಜಾಲ್ಯಾ. ತಿಕಾ ಪೋರ್ ಸೊಮಾರಾ, ಹಾಂವೆಂ ನಜರೆತ್ಚಾ ಜೆಜುಲಾಗಿಂ ವೆಲ್ಲೆಂ. ತಾಣೆ ಫಕತ್ ತಿಚಾ ತಕ್ಲೆರ್ ಹಾತ್ ದವರ್ಲೊ ಆನಿ ತಿ ಸಂಪೂರ್ಣ್ ಬರಿ ಜಾಲ್ಯಾ." ಸಿಮಾಂವ್ನ್ ಮಟ್ವ್ಯಾನ್ ತಿಳ್ಸಿಲೆಂ.
"ಬರೆಂ ಕೆಲೆಂಯ್ ಸಿಮಾಂವ್, ತುಕಾ ಹಾಂವೆ ಹಾಚಾ ಪಯ್ಲೆಂಚ್ ಜೆಜುಕಡೆನ್ ವರುಂಕ್ ಸಾಂಗ್ಲೆಂ. ತೊ ನಿಜಾಯ್ಕೀ ದೆವಾಚೊ ಪೂತ್, ಸರ್ಗಿಂ ಥಾವ್ನ್ ಆಯ್ಲಾ ಮ್ಹಣೊನ್ ಸಾಂಗ್ಚಾಕ್ ಕಿತೆಂಚ್ ದುಬಾವ್ ನಾ. ಪೊರ್ಚಾ ಪೊರ್ಚ್ ತಾಣೆ ಗಾಲೆಲಿಯಾಚಾ ಲಾಜಾರಾಕ್ ಜಿವಂತ್ ಕೆಲಾ. ತುಂ ಜಾಣಾಂಯ್ಗಿ?" ವಿಚಾರ್ಲೆಂ ಹಾಂವೆ.
"ವ್ಹಯ್, ಹಿ ಖಬಾರ್ ಆಯ್ಕಾಲ್ಯಾ, ಪುಣ್.........." ತೊ ಸಾಂಗೊಂಕ್ ದರ್ವೊಡ್ಲೊ.
"ಪುಣ್ ಕಿತೆಂ ಸಿಮಾಂವ್, ತು ಇತ್ಲ್ಯಾ ಫಾಂತ್ಯಾರ್, ಘರಾ ಯೆಂವ್ಕ್ ಕಾರಣ್ ಕಿತೆಂ?" ವಿಚಾರ್ ಕೆಲೊ ಹಾಂವೆಂ.
"ಮ್ಹಾಕಾ ಆತ್ತಾಂ ಖಬಾರ್ ಮೆಳ್ಳಿ, ಕಿತೆಂಗೀ ಮ್ಹಳ್ಯಾರ್ ತ್ಯಾ ಜೆಜುಕ್ ಧರ್ನ್ ಬಂದಿ ಕರ್ನ್ ರಾವ್ಳೆರಾಕ್ ವೆಲಾ ಖಂಯ್" ಸಿಮಾಂವ್ನ್
ಭಿಂಯೆವ್ನ್ ಸಾಂಗ್ಲೆಂ.
"ಕಿತೆಂ!!!!"
ಹಾಂವ್ ಏಕಾಚ್ ಫರಾಂ ಉಡೊನ್ ಪಡ್ಲೊಂ, ಮ್ಹಕಾ ಪಾತ್ಯೆಂವ್ಕ್ ಕಷ್ಟ್ ಬೊಗ್ಲೆ.
"ತಾಣೆ ಕಿತೆಂ ಮ್ಹಣ್ ಚೂಕ್ ಕೆಲ್ಯಾ? ತಾಕಾ ಧರ್ನ್ ವರುಂಕ್ ಕಾರಣ್ ಕಿತೆಂ ಜಾವ್ಯೆತ್? ತಾಚೆ ಶಿಸ್ ನಾತ್ಲ್ಲೆಗಿ? ತಾಣಿಂ ಆಡಾಂವ್ಕ್ ನಾಂಗಿ? " ವಯ್ರ್ ವಯ್ರ್ ಹಾಂವೆ ಸವಾಲಾಂ ಘಾಲಿಂ.
"ಮಕಾ ಸಾರ್ಕೆಂ ಗೊತ್ತುನಾ, ತೊ ಸದಾಂಯ್ ಸಾಂಜೆಚೆ ಪಲ್ತಡಿ ಮೊಳ್ಯಾಂತ್ ಮಾಗ್ಣೆ ಕರ್ತಾಲೊ. ಜುದಾಸ್ ಮ್ಹಳ್ಳ್ಯಾನ್ ತಾಕಾ ತೀಸ್ ದಿನಾರಿಂಕ್ ಜೆಜುಕ್ ಘಾತ್ ಕೆಲೊ ಖಂಯ್, ಬಾಕಿಚೆ ಉರ್ಲೆ ಶಿಸ್ ಜೆಜುಕ್ ಸೊಡ್ನ್ ದಾವ್ಲ್ಯಾತ್." ಕಿತೆಂ ಗೊತ್ತು ಆಸ್ಲ್ಲೆಂ ತಾಣೆ ವಿವರ್ ದಿಲೊ.
"ಹಾಯ್ ದೆವಾ, ಕಿತೆಂ ಜಾಯ್ತ್ ಆತಾ ತ್ಯಾ ಜೆಜುಕ್" ಖಂತ್ ಉಚಾರ್ಲಿ ಸಿಮಾಂವಾನ್.
"ಕಾಂಯ್ ಜಾಂವ್ಚೆ ನಾ ಸಿಮಾಂವ್" ಧಯ್ರಾನ್ ಸಾಂಗ್ಲೆಂ ಹಾಂವೆಂ.
"ತೊ ಖಂಡಿತ್ ಜಾವ್ನ್ ಏಕ್ ಪ್ರವಾದಿ ಜಾವ್ನಾಸಾ. ಆನಿಂ ಜೆಜು ಥಂಯ್ ವಿಶೆಸ್ ಸಕತ್ ಆಸಾ. ತೊ ತ್ಯಾ ಪ್ರದಾನ್ ಯಾಜಾಕಾಂಕ್, ಆನಿಂ ತ್ಯಾ ರೊಮಾಚಾ ಅಧಿಪತಿ ಕಡೆನ್ ಸಯ್ತ್ ಧಯ್ರಾನ್ ಉಲಯ್ತಲೊ. ತೆ ತಾಕಾ ಕಿತೆಂಚ್ ಕರುಂಕ್ ಸಕ್ಚೆ ನಾಂತ್".
"ನಾಂ ಜುವಾಂವ್, ಹ್ಯಾ ಪಾವ್ಟಿಂ ತಶೆಂ ಜಾಂವ್ಚೆ ಬರಿ ಮ್ಹಕಾ ದಿಸಾನಾ. ಜುದೆವ್ ಕಶೆಯ್ ಪುಣಿ ತಾಚೆರ್ ಫಟ್
ಫಿರ್ಯಾದ್ ಮಾಂಡುನ್ ತಾಕಾ ಖುರ್ಸಾಯ್ತೆಲೆ. ಹೆಂ ಹಾಂವೆ ವಯ್ಲ್ಯಾ ವಯ್ರ್ ಆಯ್ಕಾಲಾಂ" ಉಲಯ್ಲೊ ಸಿಮಾಂವ್.
"ಕಿತೆಂ ಸಾಂಗ್ತಾಂಯ್ ಸಿಮಾಂವ್, ತಾಣೆ ಸಭಾರ್ ಜಣಾಂಕ್ ಜಿವಾಂತ್ ಕೆಲಾಂ, ಕುರ್ಡ್ಯಾಂಕ್ ದೀಶ್ಟ್ ದಿಲ್ಯಾ, ಥೊಂಟೆ ಬರೆ ಜಾಲ್ಯಾತ್, ಪಾಂಚ್ ಹಾಜಾರ್ ಲೊಕಾಂಕ್ ಜೆವ್ಣಾಚೆಂ ಆಜ್ಯಾಪ್ ಕೆಲಾಂ, ತಶೆಂ ಆಸ್ತಾ ತೊ ತಾಕಚ್ಚ್ ತೊ ಬಚಾವ್ ಕರ್ಚೊ ನಾಂಗಿ, ಆಮ್ಚೊ ದೇವ್ ತಾಕಾ ಬೆಶ್ಟೆಂಚ್ ಮೊರುಂಕ್ ಸೊಡಿತ್ಗಿ? ತಾಕಾ ಜಿವಿಶಿಂ ಮಾರುಂಕ್ ಕೊಣಾಚಾಂನಿ ಜಾಂವ್ಚೆನಾಂ" ಪ್ರತಿವಾದ್ ದಿಲೊ ಹಾಂವೆ.
ಏಕ್ ಘಂಟೊಭರ್ ಆಮ್ಚೆ ಮಧೆಂ ಉಲವ್ಣೆಂ ಜಾತೆಚ್ ಆಸ್ಲ್ಲೆಂ. ದೀಸ್ ಉಜ್ವಾಡ್ತೆಚ್ ಆಸ್ಲ್ಲೊ. ಸಿಮಾಂವ್ ಪಾಟಿಂ ತಾಚಾ ಘರಾ ವಚೊಂಕ್ ಆಯ್ತೊ ಜಾತಾನಾ,
"ಆಮಿ ರಾವ್ಳೆರಾ ತೆವ್ಶಿನ್ ಯಾಗಿ" ವಿಚಾರ್ಲೆಂ ಹಾಂವೆಂ.
"ಆಮಿ ವಚೊನ್ ಕಿತೆಂ ಕರ್ಚೆಂ ಜುವಾಂವ್, ಆಮಿ ಬೆಶ್ಚೆಂಚ್ ದಿಸ್ ಪಾಡ್ ಕರ್ಚೊ ನಾಕಾ". ವಚೊಂಕ್ ಮನ್ ನಾಸ್ತನಾ ಸಾಂಗ್ಲೆಂ ಸಿಮಾಂವ್ನ್.
"ತಶೆಂ ಮಣಾನಾಕಾ ಸಿಮಾಂವ್, ಜೆಜು ರಾವ್ಳೆರಾಂತ್ ತಾಂಚೆ ಮಧೆಂ ಕಿತೆಂಯ್ ಪುಣಿ ಆಜ್ಯಾಪ್ ಕರ್ತೊಲೊಚ್. ತೊ ತಾಂಚಿ ತೊಂಡಾಂ ಬಂದ್ ಕರ್ತಲೊ ತೆಂ ಖಂಡಿತ್. ತಶೆಂ ಆಮಿ ಪೊಳೊಂವ್ಕ್ ವೆಚೆ ಬರೆಂ, ಆನಿಂ ತುಂವೆಂಚ್ ಸಾಂಗ್ಲೆಂಯ್ ಜೆಜುನ್ ತುಜಾ ಮಾಂಯ್ಕ್ ಬರೆಂ ಕೆಲಾಂ ....."
"ಜಾಯ್ತ್, ಯಾ " ಮ್ಹನ್ ನಾಸ್ತಾನಾ ಸಿಮಾಂವ್ ವಚೊಂಕ್ ಆಯ್ತೊ ಜಾಲೊ.
ಆಮಿ ಅಮ್ಸೊರೊನ್ ದಾಂವೊನ್ ದಾಂವೊನ್ ರಾವ್ಳೆರಾ ತೆವ್ಶಿನ್ ಪಾವ್ಲ್ಯಾಂವ್. ಸಕಾಳಿಂಚಿ ನೋವ್ ವೊರಾಂ ಜಾತಿತ್. ಪಿಲಾತಾಚಾ ರಾವ್ಳೆರಾಚಾ ಜೆರಾಲ್ ಅಂಗ್ಣಾಂತ್ ವಿಶೇಷ್ ಲೊಕ್ ಜಮ್ಲಲೊ . ಲೊಕಾಂಚಿ ಖೆಟ್ಚ್ ಆಸ್ಲ್ಲಿ. ಹಾಂವ್ ಆನಿಂ ಸಿಮಾಂವ್ ಕರ್ನ್ ಕಶೆಂಯ್ ಪುಣಿ ಮುಕಾರ್ ಪಾವ್ಲ್ಯಾಂವ್. ಥಂಯ್ಚಿ ಪರಿಗತ್ ಭಿರಾಂಕುಳ್ ಆಸ್ಲ್ಲಿ. ಜೆಜುಕ್ ಎಕಾ ಖಾಂಬ್ಯಾಕ್ ಬಾಂಧುನ್ ಘಾಲ್ಲೆಂ ಆಮಿ ಪೋಳೆಲೆಂ. ದೋಗ್ ಜಣ್ ಪಹಿಲ್ವಾನ್ ಹಾತಾಂತ್ ಖೊಡೊ ಘೆವ್ನ್ ಜೆಜುಚಾ ಪಾಟಿಕ್ ಮಾರುಂಕ್ ಆಯ್ತೆ ಜಾಲ್ಲೆ. ಶಿಪಾಯಾನ್ ಮಾರುಂಕ್ ತಾಕಿದ್ ದಿಲಿ.
"ಏಕ್, ದೋನ್, ತೀನ್ ಚಾರ್..." ಶಿಪಾಯ್ ಮೆಜ್ತೆಚ್ ಆಸ್ಲ್ಲೊ. ಪಹಿಲ್ವಾನ್ ಮಾರ್ತೆಚ್ ಆಸ್ಲ್ಲೆ. ಜೆಜುಚಿ ಪಾಟ್ ಪಾಪ್ಸುನ್ ಗೆಲ್ಲಿ. ತಾಣೆಂ ದುಖಿನ್ ಬೋಬ್ ಮಾರ್ಚೆಂ ಕಿತ್ಯಾಕ್ಗೀ ಮ್ಹಜ್ಯಾನ್ ಪಳೆಂವ್ಕ್ ಜಾಂವ್ಕ್ ನಾ." ತೀಸ್, ಎಕ್ತೀಸ್, ಬತ್ತೀಸ್..."
ಪ್ರಧಾನ್ ಶಿಪಾಯ್ ಖಾಂಬ್ಯಾ ಸರ್ಶಿಂ ಗೆಲೊ. ಜೆಜುಕ್ ಮಾರ್ಚೆಂ ರಾವಯ್ಲೆಂ ಆನಿಂ ತಾಚೆಂ ಹಾತ್ ಸೊಡಯ್ಲೆ. ಜೆಜು
’ದಡ್ಡ್’ ಕರ್ನ್ ಧರ್ನಿರ್ಚ್ ಪಡ್ಲೊ. ದೊನೀ ಪಹಿಲ್ವಾನಾನಿ ಜೆಜುಕ್ ಭಳಾನ್ ಉಟವ್ನ್ ಉಭೊ ರಾವಯ್ಲೊ. ಜೆಜು ಥಂಯ್ ಮ್ಹಕಾ ದುಬಾವಾಚಿಂ ಚಿಂತ್ನಾಂ ಯೆಂವ್ಕ್ಲಾಗ್ಲಿಂ.
ಲೊಕಾಂಚೊ ಜಮೊ ಚಡ್ತೆಚ್ ಆಯ್ಲೊ. ಆಮ್ಚ್ಯಾನ್ ಚಡ್ ಮುಕಾರ್ ವಚೊಂಕ್ ಜಾಂವ್ಕ್ ನಾ. ಪಾಂಯ್ ತೆಂಕುನ್, ಗೊಮ್ಟಿ ವಯ್ರ್ ಕರ್ನ್ ಪಳೆಂವ್ಕ್ಯಿ ಕಷ್ಟ್ ಜಾತಾಲೆ.
ಜೆಜುಚಾ ಭಂವಾರಿಂ ಮಸ್ತ್ ಶಿಪಾಯ್ ಉಭೆ ಆಸ್ಲ್ಲೆ. ತಾಚಾ ತಕ್ಲೆಕ್ ಕಾಂಟ್ಯಾಂಚೊ ರೆಂವೊಡ್ ಘಾಲ್ನ್ ಶಿಪಾಯ್ ಖೆಳ್ಕುಳಾಂ ಕರ್ತಾಲೆ.
ಹೆರಾಂಚಾ ಬರೆಪಣಾಪಾಸತ್ ಇತ್ಲಿಂ ಆಜ್ಯಾಪಾಂ ಕೆಲ್ಲೊ ಜೆಜು ಆಜ್ ಕಿತ್ಯಾಕ್ಗಾಯ್ ವೊಗೊಚ್ ಆಸಾ? ತೊ ಕಿತ್ಯಾಕ್ ಬೆಶ್ಟೆಂಚ್ ಮಾರ್ ಖಾತಾ? ಕಾಂಯ್ ತೊ ದೆವಾಚೊ ಪೂತ್ ನ್ಹಂಯ್ ಆಸ್ತಲೊ? ತಾಕಾಚ್ ತೊ ದೆವಾಚೊ ಪೂತ್ ಮ್ಹಣ್ ದಾಕಯ್ತೊಲೊಗಿ? ಯಾ ತೊ ದೆಂವ್ಚಾರಾಚಾ ಸಕ್ತೆನ್ ಪುಣಿ ಆಜಾಪಾಂ ಕರ್ತೊಲೊಗಿ? ಹಾಂವೆ ಹ್ಯಾ ಮನ್ಶಾವಿಶ್ಯಾಂತ್ ಕಿತೆಂ ಚಿಂತ್ಲೆ ಆನಿಂ ಕಿತೆಂ ತಾಚೆಂ ಥಂಯ್ ಘಡ್ತಾ? ಮ್ಹಜೆ ಥಂಯ್ ಜೆಜು ವಿಶ್ಯಾಂತ್ ಮಸ್ತ್ ದುಬಾವಾಚಿಂ ಸವಾಲಾಂ ಉದೆತಾಲಿಂ. ಮ್ಹಜ್ಯಾ ಬಿತರ್ಚ್ ಜೆಜು ಶ್ರೇಷ್ಟ್ ಮನಿಸ್, ದೆವಾಚೊ ಮನಿಸ್ ಮ್ಹಣ್ ಇಲ್ಲಿ ಪಾತ್ಯೆಣಿಯಿ ಉಣಿ ಜಾವ್ನ್ ಯೆತಾಲಿ.
ಆತಾಂ ಜೆಜುಕ್ ವಯ್ರ್ ಪಿಲಾತಲಾಗಿಂ ವೆಲ್ಲೆಂ. ಪಿಲಾತ್ ಕಿತೆಂಗಿ ಸವಾಲಾಂ ಘಾಲ್ತಾಲೊ. ಲೊಕ್ ವ್ಹಡಾ ತಾಳ್ಯಾನ್ ಬೋಬ್ ಮಾರ್ತಾಲೊ.
"ಖುರ್ಸಾಯ್ ತಾಕಾ, ಖುರ್ಸಾಯ್ ತಾಕಾ"
ಲೊಕಾಚಿ ಬೊಬ್ ಅಯ್ಕೊನ್ ಹಾಂವ್ ಸಗ್ಳೊಚ್ ಕಾಂಪೊನ್ ಗೆಲೊ. ತಿತ್ಲ್ಯಾ ವೆಳಾರ್ ಏಕ್ಲ್ಯಾ ಚೊರಾಕ್ ಬಾಯ್ರ್ ಹಾಡ್ಲೊ. ಸಾಂಕ್ಳಿಂನಿ ತಾಕಾ ಬಾಂಧುನ್ ಘಾಲ್ಲೊ. ಪಿಲಾತ್ ಕಿತೆಂ ಸವಾಲಾಂ ಕರ್ತಲೊ ತೆಂ ಆಮ್ಕಾಂ ಆಯ್ಕನಾತ್ಲ್ಲೆ. ಲೊಕಾಂಚಿ ಖೆಟ್ ವಿಶೆಸ್ ಆಸ್ಲ್ಲಿ. ತಿತ್ಲ್ಯಾರ್ ಲೊಕಾಂಚೊ ಜಮೊ, "ಬಾರಬ್ಬಸಾಕ್ ಸೊಡ್, ಬಾರಾಬ್ಬಸಾಕ್ ಸೊಡ್"
ಶಿಪಾಯಾನಿಂ ಬಾರಬ್ಬಸಾಚ್ಯೊ ಸಾಂಕ್ಳ್ಯೊ ಸೊಡಯ್ಲ್ಯೊ, ತೊ ಕಿಂಕ್ರಾಟ್ಯೊ ಮಾರುನ್ ಸಕ್ಲಾ ಲೊಕಾಚಾ ಜಮ್ಯಾಂತ್ ಭರ್ಸಾಲೊ. ಪೂಣ್
"ಖುರ್ಸಾಯ್ ತಾಕಾ, ಖುರ್ಸಾಯ್ ತಾಕಾ" ಲೊಕ್ ವಿಶೆಸ್ ಥರಾನ್ ಬೋಬ್ ಮಾರ್ತಾಲೊ.
ಪಿಲಾತಾನ್ ಏಕಾ ಆಯ್ದಾನಾಂತ್ ತಾಣೆ ತಾಜೆ ಹಾತ್ ಧುಂವ್ಚೆ ಹಾಂವೆಂ ಪಳೆಲೆಂ. ತಾಣೆ ಜೆಜುಕ್ ಖುರ್ಸಾರ್ ಮಾರುಂಕ್ ಪರ್ವಣ್ಗಿ ದಿಲ್ಯಾ ಮ್ಹಣ್ ಮ್ಹಕಾ ಕಳೊಂಕ್ ವೇಳ್ ಜಾಂವ್ಕ್ ನಾ. ಮ್ಹಕಾ ಜೆಜು ಥಂಯ್ ಆಸ್ಲ್ಲಿ ಪಾತ್ಯೆಣಿ ಸಂಪೂರ್ಣ್ ಥರಾನ್ ಉಣಿ ಜಾಲಿ.
ಸಿಮಾಂವ್ ತಿಕೆ ಪಯ್ಸ್ ಏಕಾ ಸ್ತ್ರಿಯೆ ಸರ್ಶಿನ್ ಆಸ್ಲ್ಲೊ. ತಾಂಚೆ ಸಾಂಗಾತಾ ಆನ್ಯೇಕ್ಲೊ ಮನಿಸ್ಯ್ ಆಸ್ಲೊ. ಹಾತ್ ಬಾಶೆನ್ ಹಾಂವೆ ಸಿಮಾಂವ್ಕ್ ಲಾಗಿಂ ಆಪಯ್ಲೆಂ. ತೊ ಆಯ್ಲೊ.
"ಸಿಮಾಂವ್ ಆಮಿ ಘರಾ ಯಾ. ಆನಿಂ ಆಮಿ ಹಾಂಗಾ ರಾವೊನ್ ಕಾಂಯ್ ಫಾಯ್ದೊ ನಾ. ಜೆಜುಕ್ ತೆ ಖುರ್ಸಾಯ್ತೆಲೆ ತೆಂ ಖಂಡಿತ್. ಮ್ಹಜ್ಯಾ ಪ್ರಕಾರ್ ತೊ ಕಾಂಯ್ ದೆವಾಚೊ ಪೂತ್ ಮ್ಹಳ್ಳೊ ಡೊಂಗ್ ಮಾತ್ರ್ ಕರ್ತಾಲೊ ಕೊಣ್ಣಾ. ತೊ ಮೆಸ್ಸಯಾ ಜಾಲ್ಲೊ ಜಾಲ್ಯಾರ್, ತಾಕಾ ಆಮ್ಚೊ ದೇವ್ ಖುರ್ಸಾರ್ ಮೊರುಂಕ್ ಸೊಡ್ತೊಗಿ?" ನಿರಾಶಿ ಸವಲಾಂ ಘಾಲಿಂ ಆನಿಂ ಘರಾ ವಚೊಂಕ್ ಚಿಂತ್ಲೆಂ. ಸಿಮಾಂವ್ನ್ ಮ್ಹಜೊ ಹಾತ್ ಧರ್ನ್ ರಾವಯ್ಲೊ.
"ಮ್ಹಕಾ ಪಳೆ ಜುವಾಂವ್, ಮ್ಹಜ್ಯಾ ಪಾಯಾಂಕ್ ಪಳೆ" ಸೊಂತೊಸಾನ್ ಬೊಬಾಟಿಲಾಗ್ಲೊ ಸಿಮಾಂವ್. ಸಿಮಾಂವ್ಚೊ ಉಜ್ವೊ ಪಾಂಯ್ ಸಂಪೂರ್ಣ್ ಗೂಣ್ ಜಾಲ್ಲೊ. ಮ್ಹಜ್ಯಾನ್ ಪಾತ್ಯೆಂವ್ಕ್ ಕಷ್ಟ್ ಜಾಲೆ.
"ಜುವಾಂವ್, ತುಂವೆ ಸಕಾಳಿಂ ಮ್ಹಕಾ ಸಾಂಗ್ಲ್ಲೆಂ ಆತಾಂ ಸ್ಪಷ್ಟ್ ಜಾತಾ. ಹಾಂವ್ ಆತಾಂ ಪಾತ್ಯೆತಾಂಕೀ ತೊ ದೆವಾಚೊ ಪೂತ್ ತೆಂ ಖಂಡಿತ್. ಕಿತ್ಯಾಕ್ ಮ್ಹಳ್ಯಾರ್, ತಿ ಸ್ತ್ರೀ, ತ್ಯಾಚ್ ಜೆಜುಚಿ ಆವಯ್. ಆನಿಂ ತೊ ಜುವಾಂವ್, ಜೆಜುಚೊ ಆಪ್ತ್ ಮಿತ್ರ್". ಮ್ಹಕಾ ಸಮ್ಜಾಂವ್ಕ್ ಸಿಮಾಂವ್ ಪ್ರಯತನ್ ಕರ್ತಲೊ.
"ಆಳೆ, ಜುವಾಂವ್ ಆಯ್ಕ್, ತಿ ಸ್ತ್ರೀ ತಿಚಾ ಇತ್ಲ್ಯಾಕ್ ಅಶೆಂ ಸಾಂಗ್ತಲಿಕೀ ’ಅನಿಂ ಕಿತ್ಯಾಕ್ ಪುತಾ ವೇಳ್ ಕರ್ತಾಯ್, ಬಾಪಾಚಿ ಖುಶಿ ಕೆದಾಳಾ ಜಾರಿ ಕರ್ತಾಯ್? ಧಯ್ರ್ ಘೆ ಪುತಾ, ಮುಕಾರ್ ವಚ್, ಮನ್ಶಾಕುಳಾಕ್ ಪಾತ್ಕಾಂತ್ಲೆಂ ಸೊಡಯ್. ದೆಕುನ್ ಹಾವೆಂ ಮ್ಹನಾಂತ್ಚ್ ಜೆಜು ಕಡೆನ್ ಮಾಗ್ಲೆಂ, ಆನಿಂ ಸಂಪೂರ್ಣ್ ಥರಾನ್ ಬರೊ ಜಾಲೊ. ವ್ಹಯ್ ತೊ ನಿಜಾಯ್ಕ್ಯೀ ದೆವಾಚೊ ಪೂತ್ ತೊ ಆಮ್ಚೆ ಖಾತಿರ್ಚ್ ಹ್ಯಾ ಸಂಸಾರಾಕ್ ಆಯ್ಲೊ, ಕಷ್ಟಾಂಚೆ ಮರಣ್ ಸೊಸುನ್, ತೊ ಆಮ್ಕಾ ಪಾತ್ಕಾಂತ್ಲೆಂ ನಿವ್ರಾಂವ್ಕ್ ತೊ....."
ಸಿಮಾಂವ್ಚಾ ತೊಂಡಾ ಥಾವ್ನ್ ಘಣ್ಘಣ್ಚಿಂ ಉತ್ರಾಂ ಆಯ್ಕೊನ್ ಹಾಂವ್ ಮೊನೊಂ ಜಾಲೊಂ. ತಾಕ ಆಯ್ಕೊನ್ ಮ್ಹಜಾ ಕಾಳ್ಜಾಂತ್
‘ಕಸ್ಕ್’ ಜಾಲೆಂ. ಜೆಜುವಿಶ್ಯಾಂತ್ ಚಡಿತ್ ವಿಶೇಸ್ ಕಾಂಯ್ ನೆಣಾಂ ಆಸ್ಲೊಂ, ತಾಚಿ ಉತ್ರಾಂ ಆಯ್ಕೊನ್ ಬಾವೊನ್ ಗೆಲ್ಲ್ಯಾ ಮ್ಹಜಾ ಥೊಂಡಾರ್ ವಿಜ್ಮಿತ್ಕಾಯ್ ಉದೆಲಿ.
"ಆಮಿ ಕಶೆಂಯ್ ಇತ್ತುನ್ ಆಯ್ಲ್ಯಾಂವ್, ಆಮಿ ಕಟ್ಟ್ಯಾಚಾ ಜಾಗ್ಯಾಕ್ ಯಾಗಿ, ಮ್ಹಕಾ ತ್ಯಾ ಜೆಜುಚಿ ಆನಿಂ ತ್ಯಾ ಸ್ತ್ರೀಯೆಚಿ
ಭಿರ್ಮತ್ ದಿಸ್ತಾ. ಜೆಜುನ್ ಮ್ಹಜಾ ಆವಯ್ಕ್ ಗೂಣ್ಯೀ ಕೆಲಾಂ. ಮ್ಹಜೊ ಪಾಂಯ್ ಸಂಪೂರ್ಣ್ ಬರೊ ಜಾಲಾ. ತಶೆಂ ತಾಂಚಾ ಕಶ್ಟಂಚಾ ವೆಳಾರ್ ಆಮಿ ತಾಂಕಾಂ ತಾಂಚೆ ಇತ್ಲ್ಯಾಕ್ ಸೊಡ್ಚೆಂಗಿ?" ಸಿಮಾಂವ್ ಪರತ್ತಿಲಾಗ್ಲೊ.
ಆಮಿ ಜೆಜುಚಾ ಆವಯ್ ಪಾಟ್ಲ್ಯಾನ್, ಕಟ್ಟ್ಯಾಚಾ ಜಾಗ್ಯಾಕ್ ಚಲ್ಲ್ಯಾಂವ್. ಥೊಡೆ ಕಾರಾಣ್ ನಾಸ್ತಾನಾ, ಆನಿಂ ಥೊಡೆ ಆಜ್ಯಾಪಾಂ ಪಳೆಂವ್ಕ್ ಕಾಲ್ವರಿ ಗುಡ್ಯಾಕ್ ವೆತಾಲೆ. ಪೂಣ್ ಮ್ಹಕಾ ಸಿಮಾಂವ್ಚಿಂ ಉತ್ರಾಂ ಪರತ್ ಪರತ್ ಮ್ಹಜ್ಯಾ ಮ್ಹತಿಂತ್ ಗಾಜ್ತಾಲಿ.
ಜೆಜುಚಾ ಖಾಂದ್ಯಾರ್ ವ್ಹಡ್ಲೊ ಸಯ್ತ್ ರುಕಾಚೊ ಆಡ್ಬೊ ವಾವಂವ್ಕ್ ದಿಲ್ಲೊ. ತೊ ಖಂಡಿತ್ ಜಾವ್ನ್ಯೀ ಜಡ್ ಆಸ್ಲ್ಲೊ. ಶಿಪಾಯ್ ತಾಕಾ ಬುರ್ಬುರೆಂಚ್ ಬೊಕ್ರ್ಯಾಕ್ ಆಂಬುಡ್ನ್ ವೆಲ್ಲೆ ಬರಿಂ ಮಾರ್ನ್ ವರ್ತಾಲೆ.
ಸಾತಾಟ್ ಶಿಪಾಯ್ ಜೆಜುಕ್ ಧರ್ನ್ ಖುರ್ಸಾರ್ ನಿದಾಯ್ಲೊ. ದೊನ್ಯೀ ಹಾತಾಂಕ್ ಖುರ್ಸಾಕ್ ಬಾಂದ್ಲೆ. ಆನ್ಯೆಕ್ಲ್ಯಾನ್ ಯೇವ್ನ್ ಜೆಜುಚಾ ಹಾತಾಂಕ್ ತಶೆಂಚ್ ಪಾಯಾಂಕ್ ಖಿಳೆ ಮಾರ್ಲೆ. ಆನಿಂ ಖುರಿಸ್ ನಿಟ್ ಉಭೊ ಪುರ್ಲೊ. ಜೆಜು ತೀನ್ ಖಿಳ್ಯಾಂಚೆರ್ ಉಮ್ಕಾಳ್ತಾಲೊ. ಜಿವಾಚೆ ಆಕ್ಲಾಸ್ ವೆತಾಲೆ. ಮ್ಹಜ್ಯಾನ್ ಪಳೆಂವ್ಕ್ ಜಾಯ್ನಾತ್ಲೆಂ. ಜೆಜುಚಾ ಆವಯ್ಚ ದೊಳ್ಯಾಂತ್ಲಿ ದುಖಾಂ ಸುಕೊನ್ ಗೆಲ್ಲಿ. ತಿಚೆ ದೊಳೆ ಖುರ್ಸಾರ್ಚ್ ಖಂಚವ್ನ್ ಆಸ್ಲೆ. ಹಾಂವೆಂಯ್ ಕಶ್ಟಾಂನಿ ಖುರ್ಸಾರ್ ಉಮ್ಕಾಳ್ಚಾ ಜೆಜುಕ್ ಪಳೆಂವ್ಕ್ ಪ್ರಯತ್ನ್ ಕೆಲೆಂ.
"ಬಾಪಾ ತಾಂಕಾಂ ಬೊಗ್ಸಿ. ತೆ ಕಿತೆಂ ಕರ್ತಾತ್ ತೆ ನೆಣಾಂತ್" ಜೆಜುಚಾ ಥೊಂಡಾಂತ್ಲ್ಯಾನ್ ಯೆಂವ್ಚಿಂ ಉತ್ರಾಂ ಆಯ್ಕೊನ್ ಮ್ಹಜಾ ಆಂಗಾಂತ್ಲೊ ಕುಲ್ಕುಲೊ ಸುಟ್ಲೊ. ಮೊರ್ನಾಚಾ ಘಡಿಯೆರ್ ಜೆಜುನ್ ಸರ್ವಾಂಕ್ ಭಗ್ಸುಂಚೆಂ ತೆಂ ತಾಚ್ಯಾನ್ ಮಾತ್ರ್ ಸಾಧ್ಯ್ ಜಾಲೆಂ. ತೊ ದೆವಾಚೊ ಪೂತ್ ’ಮೆಸ್ಸಾಯಿಯಾ’ ಮ್ಹಣ್ ಮ್ಹಕಾ ಆತಾಂ ಕಸಲೊಚ್ ದುಭಾವ್ ನಾತ್ಲ್ಲೊ.
’ಜೆಜು ತುಂ ಜಾವ್ನಾಸಾಯ್ ದೆವಾಚೊ ಪೂತ್, ಮ್ಹಜೊ ಭಾವಾರ್ಥ್ ಘಟ್ ಕರ್. ತುಜೆರ್ ದುಭಾವ್ಲ್ಲ್ಯಾಕ್ ಮ್ಹಕಾ ಮಾಫ್ ಕರ್’. ಹಾಂವ್ ಮನಾಂತ್ಚ್ ಜೆಜುಲಾಗಿಂ ಉಲಂವ್ಚ್ಯಾಕ್ ಪ್ರಯತ್ನ್ ಕರ್ತೆಚ್ ಆಸ್ಲೊ.
ಆದ್ಲ್ಯಾ ಕಥಾಂಕರ್ ಪಾನಾಕ್: 1, 2, 3, 4, 5, 6, 7
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
