ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಮತಾಂತರ್
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್), ಖಣ್ (ಸ್ವ), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್, ಶನಿ, ಖುರ್ಸಾವಾಟ್, ಕಂಟ್ರಿ ಆವಯ್, ಭಾಂದ್, ಸುಟ್ಕಾ, ಅಜ್ಜಿಕುಂಜ, ಜಿಣ್ಯೆ ಸೂತ್ರ್, ಮಾರ್, ತೆಂ ಆನಿ ಹಾಂವ್, ಅನಾವರಣ್.
ಆಜ್ ಸಾಂಜೆರ್ ಆಸ್ಚಾ ಹಿಂದೂ ಜಾಗರಣ್ ಮಾಂಚಿಯೆಚಾ ತುರ್ತ್ ಜಮಾತೆಕ್ ಭಾಯ್ರ್ ಸರ್ಲ್ಲ್ಯಾ ವಾಸುದೇವ್ ಕಾಮ್ತಿಚಾ ಆಂಗಾಚಿ ಲೋಂವ್ ಕಿತ್ಯಾಕ್ಗೀ ನೀಟ್ ಜಾಲಿ. ಕುಕ್ಕೆಹಳ್ಳೆಂತ್ ಜಲ್ಮೊನ್ ಎಕುಣ್ಸಾಟ್ ವರ್ಸಾಂ ಉತ್ರಾಲಿಂ ತರೀ ಎದೊಳ್ ಪರ್ಯಾಂತ್ ಊಭ್ಜೊಂಕ್ ನಾತ್ಲ್ಲಿ ಭಿರಾಂತ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂ ಥಾವ್ನ್ ಉದೆಂವ್ಕ್ ಲಾಗ್ಲ್ಲಿ. ಅಶೇಂಚ್ ಜಾಯ್ತ್ ತರ್, ಆತಾಂ ಆಸ್ಚೆಪರಿಂ ಕುಕ್ಕೆಹಳ್ಳೆಂತ್ ಕ್ರೀಸ್ತಿ, ಮಾಪ್ಳೊ, ಜೈನಾಂಚೊ/ಹಿಂದ್ವಾಂಚೊ ಲೋಕ್ ಆಸ್ಚೊನಾ, ಬಗಾರ್ ಸಗ್ಳಿಂ ಮಾಪ್ಳಿಂ ಯಾ ಕ್ರೀಸ್ತಿ ಜಾತೆಲಿಂ ಆನಿಂ ಆಪ್ಣಾಚೆಂ ಸಂತಾನ್ ಅಖೇರ್ ಜಾತೆಲೆಂ ಮ್ಹಳ್ಳಿ ಕಾವ್ಜೆಣಿಂ ತಾಚಾ ಖಟ್ಟ್ಯಾಂತ್ ಆಯಿಲ್ಲಿಚ್ ತಾಚಿ ಲೋಂವ್ ಸಯ್ತ್ ಘಾಮೆಲಿ.
ಕುಕ್ಕೆ ಹಳ್ಳೆಂತ್ ಎಕಾ ಧರ್ಮಾಕ್ ಸೊಡುನ್ ಅನ್ಯೇಕಾಕ್ ಉಡ್ಕಿ ಮಾರ್ಚೆಂ ಹೆಂ ಪಯ್ಲೆಂ ನ್ಹಯ್. ಹಾಚಾಕೀ ಆಧಿಂಚ್, ಮ್ಹಣ್ಜೆ ತರ್ನಾಟೊ ಆಸ್ತಾನಾ ಕಾಮ್ತಿಚಾ ವೊಂಟಾರ್ ಮಿಶಿಯೊ ಫ಼ುಟೊನ್ ಯೆಂವ್ಚಾ ವೆಳಾರ್, ಇಮಾಮ್ ಸಾಯ್ಬಾನ್, ಘಾಟಾರ್ ಕಾಪಿಯೆ ತೊಟಾಂತ್ ಕಾಮ್ ಕರ್ಚಾ ಆದಾಂವ್ಚಾ ಧುವೆಕ್ ಆಪ್ಲಿ ದುಸ್ರಿ ಬಾಯ್ಲ್ ಕರ್ನ್ ಘೆತ್ಲ್ಲಿ ಗಜಾಲ್ ಕುಕ್ಕೆಹಳ್ಳೆಂತ್ ಏಕ್ ಚರಿತ್ರಾ ಉಭ್ಜಾಂವ್ಕ್ ಸಕ್ಲ್ಲಿ ಆಜೂನ್ ಪರ್ಯಾಂತ್ ಉಡಾಸ್ ಆಸ್ಲ್ಲಿ ಗಜಾಲ್. ಲೊಕಾಂಕ್ ಖಂಯ್ ಪ್ರಾಯ್ ಪನ್ನಾಸ್ ಉತರ್ಲ್ಲೊ ಇಮಾಮ್ ಸಾಯ್ಬ್ ಆನಿಂ ಖಂಯ್ ಬಾವಿಸ್ ವರ್ಸಾಂಚೆಂ ಅಲಿಸ್ ಮ್ಹಳ್ಳೆಂ ಏಕ್ ಮಿಸ್ತೆರ್ ಜಾಲ್ಲೊ. ತರೀ ಅಲಿಸಾನ್ ತ್ಯೇ ಉಪ್ರಾಂತ್ ಗಾಂವಾಂತ್ ಉಭೊನ್ ಆಸ್ಚಿ ಆಪ್ಲಿ ಮರ್ಯಾದ್ ಕಾಳ್ಯಾ ಭುರ್ಖಾಂತ್ ಲಿಪಯಿಲ್ಲಿ.
ಪುಣ್ ಆಯ್ಲೆವಾರ್ ಕುಕ್ಕೆಹಳ್ಳೆಂತ್ ನವೆಂಸಾಂವ್ ಉಭ್ಜಾಲ್ಲೆಂ. ತವಳ್ ತವಳ್ ಹಾಂಗಾ ಯೆಂವ್ಚಾ ಪೇಂಟಾಂಗಾರಾಂನಿ, ದಗ್ಲೆ ನೆಸೊನ್ ಯೆಂವ್ಚಾ ಮಾದ್ರಿಂನಿ ಹಳ್ಳೆಂತ್ಲ್ಯಾ ಲೊಕಾಂಕ್ ಪೊಯ್ಶಾಂಚಿ ಭುಲ್ ದೀವ್ನ್ ನಾಡ್ಲ್ಲೆಂ ಆನಿಂ ತಾಂಕಾಯ್ ಕ್ರೀಸ್ತಿ ಜಾವ್ನ್ ಬದ್ಲಿಲ್ಲೆಂ. ಹ್ಯೇ ವಿಶ್ಯಾಂತ್ ಎದೊಳ್ಚ್ ಹಿಂದು ಜಾಗರಣ್ ಮಾಂಚಿಯೆರ್ ತರ್ಕ್ಯ್ ಜಾಲ್ಲೊ. ನಾಂ ತರ್ ಕೊಲ್ವಾಚಾ ಪಾಕ್ಯಾಂತ್ ಆಸ್ಚಾಂಕ್, ಮೊಡ್ಲಾಚಾ ತಟ್ಟೆಚಿ ವೊಣದಿಚೆರ್ ಖುರ್ಸಾಚೆಂ ಕೆಲೆಂಡರ್ ದವರ್ಚೊ ಮತ್ಲಬ್ ಕಸಲೊ?
ಪುಣ್ ಕಾಮ್ತಿಚಾ ಮತಿಂತ್ ಎದೊಳ್ ಅಸಲೆಂ ಚಿಂತಾಪ್ ಆಯಿಲ್ಲೆಂಚ್ ನಾ. ತಾಚಾ ಆಂಗ್ಡೆಕ್ ಸಾಮಾನ್ ವರುಂಕ್ ಯೆಂವ್ಚೊ ಲೋಕ್ ಸರ್ವ್ ಧರ್ಮಾಚೊ, ಜಾವ್ಯೆತ್ ತೊ ಲೋಕ್ ಚಾಮಾದೊರ್ ಸಾಲು ಸೊಜಾ ಥಾವುನ್, ದಿವ್ಳಾಚೊ ವಿಠಲ್ ಭಟ್ ಪರ್ಯಾಂತ್, ಮಾಸ್ಳಿ ವಿಕ್ಚಾ ಜಮಾಲಿ ಸಾಯ್ಬಾ ಥಾವ್ನ್, ಸುಭ್ರಾಯ್ ಶೆಟ್ಟಿ ಪರ್ಯಾಂತ್ ಯಾ ಕೂಲಿ ಕಾಮ್ ಕರ್ಚಾ ದಾವಿದಾ ಥಾವುನ್ ನಿಂವ್ಣಿ ವೊಳ್ಚಾ ಕುಂರ್ಬಿಲು ಪರ್ಯಾಂತ್, ಸಗ್ಳೊ ಲೋಕ್ ಕಾಮ್ತಿಚಾ ಆಂಗ್ಡಿಚೊಚ್ ಸಾಮಾನ್ ವರ್ತಾಲೊ. ತರೀ ಎದೊಳ್ ಪರ್ಯಾಂತ್ ತಾಕಾ ತ್ಯಾ ಲೊಕಾಂಚೆರ್ ಕಸಲೊಚ್ ಶಿಣ್ ಜಾಂವ್ ಆಕ್ಶೇಪ್ ಜಾಂವ್ ಭೊಗಾನಾತ್ಲ್ಲೊ. ಶೆರಾ ಥಾವುನ್ ಕುಕ್ಕೆ ಹಳ್ಳೆಕ್ ಯೇವ್ನ್ ಅಶಿಕ್ಪಿ ಲೊಕಾಂಕ್ ಶಿಕಾಪ್ ದೀಂವ್ಕ್ ಮ್ಹಳ್ಳೆಂ ನೀಬ್ ಘೆವ್ನ್ ಯೆಂವ್ಚಿಂ ಸಭಾರ್ ಜಣಾಂಚಾ ಮತಿಂತ್ ಆಸ್ಚೊ ಉದ್ದೇಶ್ ಎಕ್ಚ್ - ಮತಾಂತರ್ ಕರ್ಚೊ. ಹೊ ಆಟೊವ್ ಕಾಮ್ತಿಚಾ ನಿದೆಕ್ ಸಂಚಿಕಾರ್ ಜಾವ್ನ್, ಕುಡಿಂತ್ ಶಿರ್ಶಿರೊ ಹಾಡಂವ್ಕ್ ಕಾರಣ್ ಜಾಲ್ಲೊ.
ಪುಣ್ ಆತಾಂ ಉಟ್ಲ್ಲೆಂ ವಾದಾಳ್ ಸಗ್ಳ್ಯಾ ಕುಕ್ಕೆಹಳ್ಳೆಕ್ ಮಾತ್ ನ್ಹಯ್, ಅಸಲ್ಯಾ ಕಿತ್ಲೆಶ್ಯಾ ಕುಕ್ಕೆಹಳ್ಳೆಂಕ್ ಲಗಾಡ್ ಕಾಡ್ತಾಮೂ ಮ್ಹಳ್ಳೆಂ ಕಾಮ್ತಿಚಾ ಮತಿಂತ್ ಸವಾಲ್ ಕೆಲ್ಲೆಂಚ್ ತಾಚೊ ಸುಶೆಗ್ ಉಭ್ಲ್ಲೊ.
ಹಿಂದು ಜಾಗರಣ್ ಮಾಂಚಿಯೆಚಾ ಕಾರ್ಭಾರ್ಯಾಂ ಪಯ್ಕಿ ಎಕ್ಲೊ ಜಾವ್ನಾಸ್ಚಾ ಕಾಮ್ತಿಚೊ ಪೂತ್ ಆರ್.ಎಸ್.ಎಸಾಚೊ ಮುಖೆಲಿ, ತಿತ್ಲೆಂಚ್ ನಂಯ್, ಬಾವೊಜೆಕ್ ಮೆಳೊಂಕ್ ಯೆಂವ್ಚೊ ಪ್ರಕಾಶ್ ಪ್ರಭು ಸಯ್ತ್ ಭಜರಂಗ್ ದಳಾಚೊ ಮುಖೆಲಿ ಜಾಲ್ಲೆವರ್ವಿಂ ಆತಾಂ ಕಾಮ್ತಿಚಾ ಮತಿಕ್, ಭಾಯ್ಲ್ ಲೀಲಾನ್ಯ್ ಆಪ್ಲ್ಯಾ ಸವಾಲಾಂನಿ ಕದ್ವಳೊಂಕ್ ಸುರು ಕೆಲ್ಲೆಂ. ತಿಂಚ್ ಊಂಚ್ ಜಾತ್ ಆನಿಂ ನೀಚ್ ಜಾತ್ ಮ್ಹಳ್ಳೊ ಭೇದ್ ತಾಂಚಾ ಜಿವಿತಾಚಾ ತತ್ವಾಂಕ್ ಸವಾಲ್ ಕರ್ತಾಲಿಂ.
ಪಾಟ್ಲ್ಯಾ ಥೊಡ್ಯಾ ದಿಸಾಂನಿ ಕೋಣ್ಗೀ ಘುಟಾನ್ ಯೆತಾಲಿಂ ಖೈಂ, ಖಾಂದ್ಯಾರ್ ಪೊತಿಂ ಘಾಲ್ನ್ ಯೆತಾತ್ ಖೈಂ. ಹಳ್ಳೆಕ್ ವೆತಾತ್ ಖೈಂ, ಸಗ್ಳ್ಯಾ ಕುಕ್ಕೆಹಳ್ಳಿಚಾ ಗಾಂವಾಂತ್ ಹಿ ಖಬಾರ್ ಆಸ್ಲ್ಲಿ. ತಿಂ ಸಕಾಳಿಂ ಉದೆಲ್ಲೆಪರಿಂಚ್ ಆಯಿಲ್ಲಿಂ, ಸಾಂಜೆಚಾ ಧರ್ತೆರ್ ಕಾಳೊಕ್ ಪಡೊನ್ ಆಯಿಲ್ಲೆಚ್ ಪಾಟಿಂ ಶೆರಾಕ್ ವೆಚೆಂ ಪಳೆಲ್ಲ್ಯಾ ಲೊಕಾಂಚಾ ಮತಿಂತ್ ನಾನಾ ರಿತಿಚಿಂ ಸವಾಲಾಂ ಉಟಯ್ತಾಲಿಂ.
"ತಿಂ ಕೋಣ್? ಕಿತ್ಯಾಕ್ ಯೆತಾತ್? ಖಂಯ್ ಥಾವ್ನ್ ಯೆತಾತ್? ಖಂಯ್ ವೆತಾತ್? ಕಿತ್ಯಾಕ್ ಯೆತಾತ್? ಕಿತೆಂ ಕರ್ತಾತ್?" ಮ್ಹಳ್ಳಿಂ ಸವಾಲಾಂ ಎಕ್ಲ್ಯಾ ಥಾವ್ನ್ ಎಕ್ಲ್ಯಾಚಾ ತೊಂಡಾರ್ ಪಾಶಾರ್ ಜಾತಾನಾ ಹ್ಯಾ ಸವಾಲಾಂಕ್ ಜಾಪಿ ಸೊಧ್ಚೆಂ ಕಾಮ್ ಆತಾಂ ಹಿಂದೂ ಜಾಗರಣ್ ಮಾಂಚಿಯೆಚಾ ಕಾರ್ಭಾರ್ಯಾ ಕಾಮ್ತಿಚಾ ಮಾತ್ಯಾಚೆಂ ವೊಜೆಂ ಜಾಲ್ಲೆಂ.
ತಾಚಿ ಮಾಲ್ಘಡಿ ಧುವ್ ಶಾಮ್ಲಿ ಸಯ್ತ್ ಕ್ರೀಸ್ತಿ ಚೆಡೊ ಬಾವ್ತಿಸಾಸವೆಂ ಬೊಂಬೊಯ್ ಧಾಂವೊನ್ ಲಗಿನ್ ಜಾಲ್ಲೆಂಚ್, ತಾಚಾ ಕಾಳ್ಜಾಂತ್ ಉಟಾನಾತ್ಲ್ಲೊ ಉಜೊ ಆತಾಂ ಉಟ್ಲ್ಲೊ. ರಾಗಾಚೊ, ಧ್ವೇಶಾಚೊ ಉಜೊ, ಆನಿ ತ್ಯಾ ಉಜ್ಯಾಕ್ ತವಳ್ ತವಳ್ ಲೊಕಾಂನಿ ಉಲಂವ್ಚಿಂ ಉತ್ರಾಂ ಆಯ್ಕಾತಾನಾ ಸೊರ್ಮುಣಾಪರಿಂ ತಾಚೆಂ ಕಾಳಿಜ್ ಲಾಸ್ತಾಲೆಂ.
ಜಮಾತೆಕ್ ಎದೊಳ್ಚ್ ಮುಂಡಾಸ್ಗಾರ್, ಮಾನಾಯ್ ತಕ್ಲೆರ್ ಕುಂಕುಮ್, ಲೇಪ್ ಘಾಲ್ನ್ ಆಯಿಲ್ಲೆ. ಗಳ್ಯಾರ್ ಮೊಟ್ಯಾ ಮೊಟ್ಯಾ ಮಣಿಯಾಂಚಾ ಹಾರಾಂಕ್ ಘಾಲುನ್.
"ಜಾಯ್ತೊ ದುಡು ತಾಂಚೆಲಾಗಿಂ ಆಸಾ ಖಂಯ್, ಕೊಣಾಯ್ಕೀ ಮೊಲಾಕ್ ಘೆಂವ್ಕ್ ತಾಂಕಾ ಜಾತಾ ಖಂಯ್. ತ್ಯಾ ಶಿವಾಯ್ ತಾಂಚೆಲಾಗಿಂ ಜಾದೂ ಕರ್ಚಿ ಸಕತ್ ಸಯ್ತ್ ಆಸಾ ಖಂಯ್" ಆಂಗ್ಡಿಕ್ ಆಯಿಲ್ಲ್ಯಾ ಲೊಕಾನ್ ಆಪಾಪ್ಲ್ಯಾ ಸಮ್ಜಣೆಪ್ರಕಾರ್ ಉಲಯಿಲ್ಲಿಂ ಉತ್ರಾಂ ಕಾಮ್ತಿಚಾ ಮತಿಂತ್ ಘುಣ್ಗುಣ್ತಾಲಿಂ.
"ತೆಂಚ್ ಜಾಯ್ಜಯ್, ಆತಾಂ ವರ್ಸಾನ್ ವರಸ್ ಕುಕ್ಕೆಹಳ್ಳೆಚಾ ಇಗರ್ಜೆಂತ್ ಜಾಂವ್ಚಾ ನೊವೆನಾಕ್ ಯೆಂವ್ಚಾ ಕ್ರೀಸ್ತಿ ಲೊಕಾಂಚಾಕೀ ಚಡ್ ಜಾವ್ನ್ ಹಿಂದ್ವಾಂ ವೆತಾತ್, ವಾತಿ ಪೆಟಯ್ತಾತ್, ಆಂಗವ್ಣ್ ಘಾಲ್ತಾತ್, ತೇಲ್ ಆನಿಂ ತೂಪ್ ವರ್ತಾತ್."
ತ್ಯಾ ಜಮಾತೆಂತ್ ಆಸ್ಚಾ ಎಕಾ ಮುಖೆಲಿನ್ ಖಡಕ್ಕ್ ಸಾಂಗ್ತಾನಾ ಕಾಮ್ತಿಚಾ ತೊಂಡಾರ್ ಉತ್ರಾಂ ಸುಕ್ಲ್ಲಿಂ. ತಾಣೆಂ ಶಿಂಪಿ ಗಿಳ್ಳಿ.
"ತಿಂ ಮಾರಾಂಗೆರ್ಯಿ ವೆತಾತ್, ಕೊರ್ಗ್ಯಾಂಗೆರ್ಯಿ ಜೆವ್ತಾತ್, ದೆಖುನ್ ತ್ಯಾ ಮಾರಾಂಕ್ ಆನಿಂ ಕೊರ್ಗ್ಯಾಂಕ್ ಜಾತ್ ಬದ್ಲುಂಕ್ ಬರೆಂ ಜಾತಾ. ಅಶೆಂಚ್ ಸೊಡ್ಲೆಂ ತರ್ ಉಪ್ರಾಂತ್ ಹಿಂದ್ವಾಂ ಜಾವ್ನ್ ಉರ್ಚಿಂ ಆಮಿಂ ಮಾತ್ರ್" ಗಣ್ಪತಿನ್ ಉಲಯಿತ್ತ್ ಆಪ್ಲ್ಯಾ ಮಾತ್ಯಾಚೊ ಮುಂಡಾಸ್ ಸುಟವ್ನ್ ಬಾಂದ್ಲೊ. ತಾಚೆ ದೊಳೆ ಉಜೊ ವೊಂಕ್ತಾಲೆ.
"ಕಿತೆಂ ಕರ್ಚೆಂ?..."
ಸಗ್ಳ್ಯಾಂನಿ ಹೆಂ ಸವಾಲ್ ಕೆಲ್ಲೆಂಚ್ ಅಖ್ರೇಕ್ ತ್ಯಾ ತೆಗಾಂಕ್ ಯಾ ಚೊವ್ಗಾಂಕ್ ಧರ್ಲ್ಲೆ ಶಿವಾಯ್ ಹೆರ್ ವಾಟ್ ತಾಂಕಾ ನಾತ್ಲ್ಲಿ.
"ತಾಂಕಾ ಧಾರ್ನ್ ಹಾಡ್ಲೊ ತರ್ ಉಪ್ರಾಂತ್ ತಿಂ ತೋಂಡ್ ಸೊಡ್ತಿತ್" ಮ್ಹಣೊನ್ ಪಟೆಲಾನ್ ಬೊಲ್ಮೆ ಸಾಂಗೊನ್ ಆಪ್ಲೊ ಜುಬ್ಬೊ ಪಾಪುಡ್ಲೊ.
ಜಮಾತೆರ್ ಆಸ್ಚಾ ಸರ್ವಾಂಕ್ ಹಿ ಅಲೋಚನ್ ರುಚ್ಲಿ.
ಗಣ್ಪತಿನ್ ವಿವರ್ ದಿಲೊ "ಸಕಾಳಿಂ ಭರ್ತಿ ಪಾವ್ಣೆಂ ಸ ವೊರಾಂಕ್ ಶೆರಾ ಥಾವ್ನ್ ಯೆಂವ್ಚಾ ಪಯ್ಲ್ಯಾ ಬಸ್ಸಾರ್ ತಿಂ ಯೆತಾತ್. ಆನಿಂ ಸಾಂಜೆರ್ ಸವಾಯ್ ಆಟ್ ವೊರಾಂಕ್ ಶೆರಾಕ್ ವೆಚಾ ಅಖ್ರೇಚಾ ಬಸ್ಸಾರ್ ತಿಂ ವೆತಾತ್."
"ತರ್ ಆತಾಂ ರಾಕ್ಚೆಂ ಕೊಣಾಕ್? ಧರಾ ತಾಂಕಾಂ, ಪೆಂಟೆಸಾಲಾಚಾ ರುಕಾಕ್ ಬಾಂಧುನ್ ಘಾಲಾ ಆನಿಂ ಆಂಗಾರ್ ಹುಂಬ್ಲೆ ಸೊಡಾ, ಆನಿಂ ಖಬಾರ್ ಗಾಂವಾನ್ಗಾಂವ್ ವಿಸ್ತಾರೊಂದಿ, ಆನಿ ಹಿ ಖಬಾರ್ ಆಯ್ಕೊನ್ ಆನಿ ಮುಖಾರ್ ಕೊಣೇಂಯ್ ಕುಕ್ಕೆಹಳ್ಳೆಕ್ ಮತಾಂತರ್ ಕರ್ಚಾ ಇರಾದ್ಯಾನ್ ಯೆಂವ್ಚೆಂ ಬಂಧ್ ಜಾಂವ್ದಿ" ಪಂಡಿತಾನ್ ತಾಳೊ ಮೆಳಯ್ಲೊ.
ಜಮಾತ್ ಜಾಲ್ಲಿಚ್, ರಾತಾರಾತ್ ತಯಾರಿ ಜಾಲಿ. ಗಾಂವ್ಚಾ ಥೊಡ್ಯಾ ಪಾರ್ಪೊಳ್ ತರ್ನಾಟ್ಯಾಂಕ್ ಎಕ್ಟಾಂಯ್ ಕೆಲೆಂ. ಎಕೆಕ್ಲ್ಯಾಕ್ ಪಾಂಯ್ಶಿಂ ರುಪಯ್ ಬಾಸಾಯ್ಲೆ. ತಾಂಕಾ ಗರ್ಜೆಚಿಂ ಹಾತೆರಾಂಯ್ ದಿಲಿಂ. ಸುರಿಯೊ, ತಾಲ್ವಾರಿ, ತೊಣ್ಕೆ, ದಾಂಡೆ ಆನಿ ದೊರಿ ಘೆವ್ನ್ ತರ್ನಾಟೆ ಆಯ್ತೆ ಜಾಲೆಚ್.
"ಧಯ್ರ್ ಸಾಂಡಿನಾಕಾತ್! ತಾಂಕಾ ಜಿವಂತ್ ಧರುನ್ ಆಮ್ಚೆಲಾಗಿಂ ಹಾಡಾ! ಹಾತ್ ಉಭ್ರಾಯ್ತಿತ್ ತರ್ ತಾಂಚೆ ಹಾತ್ ಪಾಂಯ್ ಯಾ ಪೆಂಕ್ಟಾಚೊ ಖಿಳಿ ಮೊಡುನ್ ಘಾಲಾ" ಗಣ್ಪತಿನ್ ಆಪ್ಲೆ ದೊಳೆ ತಾಂಬ್ಶೆ ಕರುನ್ ತಾಂಕಾ ಏಕ್ ಬೋತ್ಲ್ ದಿಲಿ.
ತರ್ನಾಟೆ ತ್ಯೇ ರಾತಿಂ ಬೋತ್ಲ್ ಮೆಳ್ತಚ್, ಗಾಂವ್ಚಾ ಬಸ್ತೆಕ್ ರಿಗ್ಲೆ ಆನಿಂ ತಿ ಬೋತ್ಲ್ ಖಾಲಿ ಜಾತೆಚ್ ಎಕ್ಲೆ ದೋಗ್ ಸಂಸಾರಾಚಿ
ಫಿಕಿರ್ ನಾಸ್ತಾಂ ಥಂಯ್ಚ್ ಪರ್ತಾಲೆ. ಉರುಲ್ಲೆ ರಾಗಾಚಾ ಆವೇಶಾನ್ ಭರೊನ್ ಸಕಾಳ್ ಉದೆತಾ ಪರ್ಯಾಂತ್ ರಾಕೊನ್ ರಾವ್ಲೆ.
ಸಕಾಳ್ ಉದೆಲೊಚ್, ಪಯ್ಸಿಲ್ಯಾನ್ ಆವಾಜ್ ಕರೀತ್ತ್ ಬಸ್ಸ್ ಆಯ್ಲೆಂಚ್. ಆನಿಂ ಕುಕ್ಕೆಹಳ್ಳೆಂತ್ ಸುರ್ಯಾಚಿಂ ಕಿರ್ಣಾಂ ಉದೆವ್ನ್ ಯೆಂವ್ಚಾಧಿಂಚ್ ಚಾರ್ ಜಣಾಂ ದೆಂವ್ಲಿಂ. ಎದೊಳ್ಚ್ ರುಕಾ ಆಡೊಸಾರ್ ರಾಖೊನ್ ಆಸ್ಚೆ ತರ್ನಾಟೆ ಜಾಗೆ ಜಾಲೆ. ತೊಣ್ಕೆ, ದಾಂಡೆ ಭಾಯ್ರ್ ಕಾಡ್ಲೆ, ಎಕ್ಲ್ಯಾನ್ ತಾಲ್ವಾರ್ ಕಾಡ್ಲಿ, ದೊಗಾಂನಿ ಸುರಿ ಕಾಡ್ಲಿ.
ವ್ಹಯ್ ಚಾರ್ ಜಣ್ ಶೀದಾ ಆಪ್ಲ್ಯಾ ವಾಟೆರ್ ಹಳ್ಳೆಚಾ ವಾಟೆರ್ ಚಲೊನ್ ಗೆಲಿಂ.
ತೇಗ್ ದಾದ್ಲೆ ಆನಿಂ ಏಕ್ ಬಾಯ್ಲ್. ಚಾರೀ ಜಣಾಂಚಾ ಖಾಂದ್ಯಾರ್ ಪೊತಿಂ ಆಸ್ಲ್ಲಿಂ. ಪಾಟ್ಲ್ಯಾನ್ ಆಯಿಲ್ಲ್ಯಾ ತರ್ಣಾಟ್ಯಾಂನಿ ಎಕಾಚ್ಫ಼ರಾಂ ಉಡಿ ಮಾರುನ್ ಆಯಿಲ್ಲೆಂಚ್ ತಾಂಚಾ ಪಾಟ್ಲ್ಯಾನ್ ಥಾವುನ್ ತಾಂಚಾ ತಕ್ಲೆಚೆರ್ ತೊಣ್ಕ್ಯಾಂನಿ ಮಾರ್ಲೆಂ ಆನಿಂ ಚಾರ್ಯೀ ಜಣಾಂ ಥಂಯ್ಚ್ ಗಳ್ಳಿಂ.
ತರ್ನಾಟೆ ಬೊಭಾಟ್ಲೆ "ಜೈ ಶ್ರೀರಾಮ್!"
ತಕ್ಲೆರ್ ಪಡ್ಲ್ಲ್ಯಾ ಮಾರಾಂಕ್ ತಾಂಚೊ ತಕ್ಲ್ಯೊ ಭೆತೊನ್ ರಗ್ತಾಚಿ
ವ್ಹಾಳ್ ಜಾಲಿಚ್.
ತರ್ನಾಟೆ ಬೊಭಾಟ್ತಾಲೆ "ಜೈ ಶ್ರೀರಾಮ್! ಜೈ ಶ್ರೀರಾಮ್!!"
ಪರ್ತಾಲ್ಲ್ಯಾಂಚಾ ಖಾಂದ್ಯಾರ್ ಆಸ್ಲ್ಲಿಂ ಪೊತಿಂ ಎದೊಳ್ಚ್ ಉದಾರಿಂ ಪಡ್ಲ್ಲ್ಯಾನ್ ತಾಂತುಂ ಆಸ್ಚೆ ಪೊಯ್ಶೆ ಲುಟುಂಕ್ ಆತಾಂ ತರ್ನಾಟೆ ಆಯ್ತೆ ಜಾಲೆಚ್.
ಪುಣ್! ತ್ಯಾ ಪೊತ್ಯಾನಿಂ ತಾಂಕಾ ಪೊಯ್ಶೆ ಮೆಳ್ಚಾ ಬದ್ಲಾಕ್ ಇಸ್ಕೊಲಾಚಾ ಬುರ್ಗ್ಯಾಂಕ್ ಶಿಕಂವ್ಚೆ ಬೂಕ್, ಸ್ಲೇಟ್ ಆನಿಂ ಪೆನ್ನಾಂ ಆಸ್ಲ್ಲಿಂ ಮೆಳ್ಳಿಂ. ಆತಾಂ ಥಂಯ್ ಉಭೊ ಆಸ್ಚೆ ತರ್ನಾಟೆ ರೂಕ್ ಜಾಲ್ಲೆ.
**********
[ಹಿ ಕಾಣಿ 2004 ಇಸ್ವೆಂತ್ ಪರ್ಗಟ್ಲ್ಲ್ಯಾ ’ಖಿಳೊ’ ಬುಕಾಂತ್ ಪರ್ಗಟ್ ಜಾಲ್ಯಾ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
