ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸವಾಲಾಂಕ್ ಜಾಪಿ
ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ
ದಿವೊ ಹಾಫ್ತ್ಯಾಳೆಂ
ಮಿತ್ರ್ ಹಾಫ್ತಾಳೆಂ
ಸೆವಕ್ ಮಯ್ನ್ಯಾಳೆಂ
ಯಾತ್ರಿ ವಿಶ್ಯಾಂತ್
ಕೊಂಕ್ಣೆಂತ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಉದೆವ್ನ್ ಆಯಿಲ್ಲ್ಯಾ ಥೊಡ್ಯಾ ಭರ್ವಶ್ಯಾಚ್ಯಾ ಬರವ್ಪ್ಯಾಂ ಪಯ್ಕಿಂತ್ಲೊ ಎಕ್ಲೊ ’ಮೆಲ್ವಿನ್ ಪೆರ್ನಾಲ್’ ಕವಿ, ನಾಟಕಿಸ್ತ್, ಕಾಣ್ಯೆಗಾರ್, ವಿಡಂಬನ್ಕಾರ್ ತಶೆಂಚ್ ವಾವ್ರಾಡಿ. ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಸಯ್ತ್ ಹಾಣೆಂ ಅಪ್ಲೊ ಹಾತ್ ಭಂವ್ಡಾಯ್ಲಾ ದೆಖುನ್ ಕೊಂಕ್ಣಿ ಲೊಕಾಂಚಾ ಕಾಳ್ಜಾಚೊ ಉಲೊ ಲಾಗ್ಶಿಲ್ಯಾನ್ ಆಯ್ಕೊಂಕ್ ಸಕ್ತಾ. ಹ್ಯಾ ವರ್ಸಾಂತ್ ವಾಚ್ಪ್ಯಾಂಚ್ಯಾ ಸವಾಲಾಂಕ್ ಅಪುರ್ಭಾಯೆಚ್ಯೊ ಜಾಪಿ ದೀಂವ್ಕ್ ಹೊ ಸಕ್ತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ.
[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]
ಜಾಪಿ ದಿತಾ: ಯಾತ್ರಿ
1. ಮಾಪ್ಳ್ಯಾಂನಿ ’ಬಕ್ರೀದ್’ ದಿಸಾ ಬೊಕ್ರೊ ಮಾರ್ಚೆಪರಿಂ ಕ್ರಿಸ್ತಾಂವಾಂ ’ದುಕೊರ್’ ಮಾರ್ಚೆ ದಿಸಾ ’ದುಕ್ರೀದ್’ ಕಿತ್ಯಾಕ್ ಮ್ಹಣಾನಾಂತ್ ಯಾತ್ರಿ? [ಬೊಂಬಿಲ್ ಬಾತ್ತು, ಬೊಳಿಯೆ]
ಜಾಪ್: ಪುಣ್ ಚಡ್ತಾವ್ ಕ್ರಿಸ್ತಾಂವಾಂ ದುಕೊರ್ ಜಾವ್ನ್ ಜಿಯೆತಾನಾ, ಖರೊ ದುಕೊರ್ ಸೊಧುಂಕ್ ತ್ರಾಸ್ ಜಾಯ್ನಾವೆಗಾ?
2. ಕೊಂಕ್ಣೆಚ್ಯೊ ಆತಾಂಚ್ಯೊ ಪಾಂಚ್ ಲಿಪಿ ಕಾಡುನ್ ಚೈನೀಸ್ ಲಿಪಿ ವಾಪ್ರಿಜೆ ಮ್ಹಣ್ತಾತ್ ಥೊಡೆ ಹಾಂಗಾ - ತುಂ ಕಿತೆಂ ಮ್ಹಣ್ತಾಯ್ಗಾ? [ಸೆವ್ರಿನ್, ಶಿರ್ವಾಂ]
ಜಾಪ್: ಬರಿ ಐಡಿಯಾ, ಆನಿ ತಾಂಕಾ ಚೈನೀಸ್ ಶಿಕೊಂಕ್ ಚೈನಾಕ್ ಧಾಡ್ಯಾಂ; ಅಕಾಡೆಮಿಚ್ಯಾ ಖರ್ಚಾರ್. ಪುಣ್ ಪಯ್ಲೆಂ ಜರ್ಲೆ, ಮಾಣ್ಕೆ, ದಿವೊಡ್ ಖಾವ್ನ್ ಧಾಖಂವ್ದಿ ತಿಂ.
3. ’ನಿಷ್ಪಕ್ಶ್, ನಿರ್ಭೀತ್ ಪತ್ರಿಕೋಧ್ಯಮ್’ ಚಲಯ್ತಾಂ ಮ್ಹಣ್ ಧಾಂಗ್ರೊ ಮಾರ್ಚೆ ಥೊಡೆ ದಾಯ್ಜಾಚೆಂ ಸಾಹಿತ್ಯ್ ಚೊರುನ್ ಪರ್ಗಟ್ತಾತ್ ಯಾತ್ರಿ - ಕಿತೆಂ ಮ್ಹಣ್ತಾಯ್ ಹಾಂಚೆವಿಶಿಂ? [ಬೋರಿ ಬಸವ, ಉಜ್ಜೋಡಿ]
ಜಾಪ್: ಅರೇ ಬೆಪ್ಪಾ, ಖರೊ ಮತ್ಲಬ್ ತುಕಾ ಸಮ್ಜಾನಾವೆ? ’ನಿರ್ಭೀತ್ ಆನಿ ನಿಷ್ಪಕ್ಶ್’ ತೆಂ ಫಟಂವ್ಕ್, ಪುಣ್ ನೀಜ್ ಜಾವ್ನ್ ನಿರ್ದಯ್ (ಕೊಣಾಚೆಂ ಚೊರುಂಕ್ ಕಸ್ಲಿಚ್ ದಯಾ ನಾ) ಆನಿ ನಿರ್ಲಜ್ಜ್ (ಹೆರಾಂಚೆಂ ಫಾರುಂಕ್ ಕಸಲಿಚ್ ಲಜ್ ನಾ) ಪತ್ರಿಕೋಧ್ಯಮ್. ಪೆಂಕ್ಟಾರ್ ಬಳ್ ನಾಸ್ತಾಂ ಭಂವ್ತೆಲ್ಯಾಂಕ್ ಪೆಂಕಾಡ್ ಬಾಗ್ಸುನ್ ಘೊಳೊಂಕ್ ಕಂಯ್ ಜಾತಾ?. ದೆಕುನ್ ಕೊಣಾ ಕೊಣಾಚೆಂ ಚೋರ್ನ್, ಫಾರ್ನ್ ಪತ್ರಿಕೋಧ್ಯಮ್ ಚಲಂವ್ಚೆಂ. ಪುಣ್ ಬುಧ್ವಂತ್ ವಾಚ್ಪ್ಯಾಂನಿ ಅಸಲ್ಯಾಂಕ್ ಎದೊಳ್ಚ್ಚ್ ಮೆಜ್ಲಾಂ, ಆಮಿಂ ಆಮ್ಚಿಂ ಕಾಮಾಂ ಕರುನ್ ಯಾ - ಕಿತೆಂ ಮ್ಹಣ್ತಾಯ್?
4. ಆಜ್ಕಾಲ್ ಕೊಂಕ್ಣೆಂತ್ಲೆ ಥೊಡೆ ಮಾತಾರೆ ಬರಯ್ಣಾರ್ ಸಯ್ತ್ ಓರ್ಕುಟಾರ್ ತರ್ನ್ಯಾ ಚಲಿಯಾಂಸವೆಂ ಚಂಗಾಯ್ ಮಾರ್ತಾತ್ಮುಂಗಾ, ಹಿ ಕಸಲಿ ಫಜಿಂತ್? [ಕುಮಾದ್ರ್, ಕುಂದಾಪುರ್]
ಜಾಪ್: ಶ್ಶ್! ಚಿಕ್ಕೆ ಲೋವ್ ಸಾಂಗ್ ಸಾಯ್ಬಿಣೆ, ಅಭಿಮಾನಿ ಸಂಘ್ ಘಡುನ್, ಕುರ್ಲ್ಯಾಂಚಿ ಮಾಂಚಿ, ಪಿರ್ಕ್ಯಾಂಚಿ ಮಾಂಚಿ, ಬೊಕ್ರಾಂಚಿ ಮಾಂಚಿ, ಅರೆ ಮರ್ಲಾಂಚೊ ಎಕ್ತಾರ್, ಮೊಗೊರ್ಲ್ಯಾಂಚೊ ಎಕ್ತಾರ್, ಚಾಮಾದೊರಾಂಚೊ ಎಕ್ತಾರ್ ಘಡುನ್ ಸಂಚಾಲಕ್ ಜಾಲ್ಲೆಂ ಪಾವಾನಾ ಆಸ್ತೆಲೆಂ, ಕಾಂಯ್ ’ಚಿರ್ಪ್ಯಾಂಚಿ ಮಾಂಚಿ’ (ಕೊಣಾ ಕೊಣಾಕ್ ಚಿರುಂಕ್) ಕರ್ಚಿ ಘುಟ್ಮಳ್ ಆಸೊಂಕ್ ಪುರೊ, ಅನ್ಯೇಕ್ ವಿಜಿಟಿಂಗ್ ಕಾರ್ಡ್ ಯೆತಾ ಪರ್ಯಾಂತ್ ರಾಕೊನ್ ರಾವ್ಯಾಂ. ಪುಣ್ ಕುಮಾದ್ರೆ ಸತ್ ಸಾಂಗ್ - ತುಕಾ ಕೊಣ್ಯೀ ಕುಂಪಾರ್ ಭೆಟಾನಾಂತ್ ಮ್ಹಣ್ ಮೊಸೊರ್ ಪುಣಿ ನಾಮೂ ತುಕಾ?
5. ವಿಮರ್ಸೊ ಮ್ಹಳ್ಳ್ಯಾ ನಾಂವಾರ್ ಆಜ್ಕಾಲ್ ಎಕಾಮೆಕಾ ’ಅಪುಣ್ಂಚ್ ಉಂಚ್ಲೊ’ ಮ್ಹಣ್ ಧಾಖಂವ್ಚೊ ಸ್ಪರ್ಧೊ ಚಲೊನ್ ಆಸಾ. ಹಾಂಕಾಂ ಸಮ್ಜೊಣಿ ಯೇಂವ್ಕ್ ಕಿತೆಂ ಕರಿಜಾಯ್? [ಸಿ.ಎಲ್.ಕರಾಮಾ]
ಜಾಪ್: ಸಮ್ಜಣಿ ನಾತ್ಲ್ಲ್ಯಾನ್ ಅಸಲೆಂ ತೀನ್ ಕಾಸಾಂಚೆ ಕಾಮ್ ಕರ್ತಾತ್. ಪಯ್ಲೆಂ ಹಾಂಕಾಂ ಗೊಮ್ಟೆ ಮ್ಹಣಾಸರ್ ರೆಂವೆಂತ್ ಪುರಿಜೆ. ಉಪ್ರಾಂತ್ ತಾಂಚ್ಯಾ ಮಾತ್ಯಾರ್ ತಾಣಿಂ ಛಾಪ್ಲ್ಲಿಂ ವಿಜಿಟಿಂಗ್ ಕಾರ್ಡಾಂ ಧಾಂಪಿಜೆ.
6. ಪತ್ರಾಂನಿ, ಸಾಯ್ಟಿಂನಿ ಆಡ್ ನಾಂವಾನಿ ಬರಂವ್ಚೆ ಕೊಣೆಂಗೀ ಆನಿ ಅಪ್ರಾದ್ ಘೆಂವ್ಚೊ ಸಂಪಾದಕಾಂನಿ - ಅಶೆಂ ಕಿತ್ಯಾಕ್ ಯಾತ್ರಿ ಮಾಮಾ? [ಸಹನಾ, ಕುವೇಯ್ಟ್]
ಜಾಪ್: ಕಿತ್ಯಾಕ್ ಮ್ಹಳ್ಯಾರ್ ಸಂಪಾದಕಾನ್ ಚುಕಾರಿ ಮಾರುಂಕ್ ಜಾಯ್ನಾ ನೆ? ತೊ ಮಾತ್ರ್ ಆಡ್ ನಾಂವಾಚೊ ಮನಿಸ್ ಕೋಣ್ ಮ್ಹಣ್ ಸಾಕ್ಸ್ ದೀಂವ್ಕ್ ಸಕ್ತಾ. ಹೆರಾಂಕ್ ಕಳಿತ್ ಆಸ್ಲ್ಯಾರೀ ರುಜು ಕರುಂಕ್ ಕಷ್ಟ್.
7. ವರ್ಸಾಚ್ಯಾ 365 ದಿಸಾಂನಿ ಗುಪಿತ್ ಕೊಂಕ್ಣಿ ವಾವ್ರ್ ಕರ್ಚೆ ವೊಗೆಚ್ಚ್ ಆಸಾತ್ ಆನಿ ವರ್ಸಾ ಏಕ್ ಪಾವ್ಟಿಂ ಕೊಂಕ್ಣಿ ದೀಸ್ ಆಚರಣ್ ಕರ್ಚೆ ಉಡಿ ಮಾರುಂಕ್ ಲಾಗ್ಲ್ಯಾತ್ - ಅಶೆಂ ಕಿತ್ಯಾಕ್ಗಾ? [ನಾಲಾಯಕ್ ಕುಲ್ಶೇಕರ್] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾಪ್: ’ಭರ್ಲ್ಲೊ ಕೊಳ್ಸೊ ಕೆದ್ನಾಂಯ್ ಅಲ್ಕಾಂದಾನಾ’; ಪುಣ್ ಥಳಾರ್ ಇಲ್ಲೆಂ ಉದಾಕ್ ಆಸ್ಚ್ಯಾ ಕೊಳ್ಶಾನ್ ಮಾಟ್ರ್. ಅಸಲಿಂ ನಾಲಾಯಕ್ ಕಾಮಾಂ ಕರ್ನ್ ಮಿಶಿಯೊ ವೊಳಾಂವ್ಚ್ಯೊ ಪೊಕೊಳ್ ಮೊಡ್ಕೆನ್ ಮಾತ್ರ್. ಆಸೊಂ - ತಿಂ ಮೊಡ್ಕ್ಯೊ ಬಡವ್ನ್ ಆವಾಜ್ ಕರುಂದಿ, ತಾಂಕಾಂ ತಾಂಚೆಯಿತ್ಲ್ಯಾಕ್ ಸೊಡುನ್ ತುಂ ತುಜಿಂ ಕಾಮಾಂ ಕರ್. ಪಯ್ಲೆಂಚ್ ಹ್ಯಾ ಸಂಸಾರಾಂತ್ ಇತ್ಲೆ ಪಿಶೆ ಜಿಯೆತಾತ್, ತಾಂಚೆ ಮಧೆಂ ಹಾಂಕಾಂಯ್ ಜಿಯೆಂವ್ಕ್ ಸೊಡ್ಯಾಂ.
8. ಪಯ್ಲೆಂ ಘುಟಾನ್ ಹೆರಾಂಚೆಂ ಸಾಹಿತ್ಯ್ ಚೊರಿ ಕರ್ತಾತ್ ಆನಿ ಆಪ್ಲ್ಯಾ ನಾಂವಾರ್ ಪತ್ರಾಂನಿ ಪರ್ಗಟ್ ಕರ್ತಾತ್, ಉಪ್ರಾಂತ್ ಬೂಕ್ ಛಾಪುನ್ ಲೊಕಾಂಕ್ ಮಾಂಕೊಡ್ ಕರ್ತಾತ್ - ಹೊ ಕಸಲೊ ಹೊರ್ಭೊಸ್ ಯಾತ್ರಿ? [ಅಲ್ಲು, ಪುತ್ತೂರ್]
ಜಾಪ್: ತಕ್ಲೆ ಭಿತರ್ ಶೆಣ್ ಆಸ್ಲ್ಯಾರ್ ಮಾಗಿರ್ ಕಾಲೆಂ ಕರ್ಚೆಂ..? ಸ್ವಂತ್ ಬರಯ್ಲ್ಯಾರ್ ಶೆಣ್ ಜಾತಾ, ಆನಿ ಶೆಣ್ ಬರಯ್ಲ್ಯಾರ್ ಎಚ್ಚೆಮ್ ಆನಿ ವಿಲ್ಸನ್ ಭಾಟಿ ಘೆವ್ನ್ ಯೆತಾತ್ನೇ..?
9. ಗಾಂವಾಂತ್ ರಾವ್ಲ್ಯಾರ್ ಗತ್ ನಾ ಬೊಂಬೊಯ್ ಗೆಲ್ಯಾರ್ ಬರ್ಕತ್ ನಾ ಮ್ಹಣ್ಚಾ ಥೊಡ್ಯಾಂಕ್ ಕಿತೆಂ ಸಲ್ಹಾ ದಿತಾಯ್ ಯಾತ್ರಿ? [ಗಂಗು, ಗಂಗೊಳ್ಳಿ]
ಜಾಪ್: ಗಾಂವಾಂತ್ ರಾಂವ್ಚ್ಯಾಕೀ, ಬೊಂಬಂಯ್ತ್ ಭಟ್ಕೊಂಚ್ಯಾಕೀ, ಗಲ್ಫಾಕ್ ಪಾವ್ಲ್ಯಾರ್ ಕಾಜಾರ್ ಜಾಂವ್ಕ್ ಏಕ್ ಸೊಭಿತ್ ಚೆಡುಂ ತರೀ ಮೆಳಾತ್..! ದೆಕುನ್ ವಿಜಾ ಜಾಯ್ ತರ್ ಮ್ಹಾಕಾ ತುರ್ತಾನ್ ಸಂಪರ್ಕ್ ಕರ್, ದರಬಸ್ತ್ ಕೊಂಕ್ಣಿ ಸಂಘಟನಾಂ ಆಸಾತ್, ತುಕಾ ಕೊಣ್ ತರೀ ಥಂಯ್ ವಚೊನ್ ಪೆಟ್ಯಾಪರಿಂ ಚಾಬೊನ್ ಪಡೊಂಕ್ ವರಿತ್.
10. ಆಜ್ಕಾಲ್ ಕೊಂಕ್ಣೆಂತ್ ಚಡ್ತಾವ್ ಪತ್ರಾಂನಿ ಸ್ತ್ರೀಯಾಂಕ್ ಹಲ್ಕ್ ಕರ್ಚಿ ವಾ ಸ್ತ್ರೀಯಾಂಕ್ ಮರ್ಯಾದ್ ದೀನಾಸ್ಚಿ ಭಾಸ್ ವಾಪಾರ್ ಜಾತೇ ಆಸಾ - ಹ್ಯೇ ವಿಶಿಂ ತುಜೆ ವಿಚಾರ್ ಕಸ್ಲೆ ಯಾತ್ರಿ? [ಬಿಂದು, ಬೆಂದುರ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾಪ್: ಅಪ್ಲ್ಯಾ ಜಲ್ಮ್ ದಿಲ್ಲ್ಯಾ ಆವಯ್ಕ್, ಸಾಂಗಾತ್ ದಿಂವ್ಚ್ಯಾ ಭಯ್ಣ್, ಬಾಯ್ಲೆಕ್ಚ್ ಮರ್ಯಾದ್ ದಿನಾತ್ಲ್ಲೆ ಥೊಡೆ ನಾಪಾಸಿ ಅಶೆಂ ಬರಯ್ತಾತ್ ಮ್ಹಣ್ ತುಂ ಬೆಜಾರ್ ಕರಿನಾಕಾ ಬಾಯೆ, ಸ್ತ್ರೀಯಾಂಚಿ ಮರ್ಯಾದ್ ತಾಂಚ್ಯಾ ಲೆಸಾಂತ್ ನಾಂ ಮ್ಹಣ್ಯಾಂ..!! ಪುಣ್ ಮ್ಹಾಕಾ ಸಾಂಗ್; ಥೊಡಿಂ ನಾಪಾಸ್ ಬಾಯ್ಲಾಂಚ್ ಬಾಯ್ಲಾಂಕ್ ದಾದ್ಲ್ಯಾಂ ಪ್ರಾಸ್ ಹಲ್ಕ್ ಕರ್ತಾತ್ಮೂ?
11. ಆಯ್ಚ್ಯಾ ಕಾಳಾರ್ ಥೊಡಿಂ ಬುಧ್ವಂತ್ ಭುರ್ಗಿಂ ಆಪ್ಲ್ಯಾ ಮಾಯ್ಭಾಸೆಕ್ ವೆಂಗುಂಕ್ ತಯಾರ್ ಆಸ್ಲ್ಯಾರೀ, ತಾಂಚಿಂ ಅಸ್ಕತ್ ವ್ಹಡಿಲಾಂ ತಾಂಕಾಂ ಅಡ್ಕಳ್ ಹಾಡ್ತಾತ್ ಕಿತ್ಯಾಕ್? [ಬೋರಿ ಬಸವ, ಅಬ್ಬಾಸಿಯಾ] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾಪ್: ಅಪ್ಲ್ಯಾ ಭುರ್ಗ್ಯಾಂನಿ ಕೊಂಕ್ಣೆಂತ್ ಉಲಯ್ಲ್ಯಾರ್ ಅಪ್ಲೆಂ ’ಮಟ್ಟ್’ ದೆಂವ್ತಾಂ; ವ್ಹಡಿಲಾಂಕ್ ಕೊಂಕ್ಣೆ ಶಿವಾಯ್ ಹೆರ್ ಭಾಸ್ ಯೇನಾಂ ಮ್ಹಣ್ ಹೆರಾಂ ಚಿಂತಾತ್ ಮ್ಹಣ್ ಹಾಂಚೆಂ ಭೊಗಾಪ್ ಆಸ್ತೆಲೆಂ. (ಮಿಂಜಾಸ್ಕೆಚಿ ಸಾಯ್ ದೊಳ್ಯಾಂಕ್ ಮಾಂಡ್ಲ್ಯಾರ್ ಅಶೆಂ ಜಾತಾ).
12. ಸರ್ವಾಂಚ್ಯಾ ಸವಾಲಾಂಕ್ ಜಾಪಿ ದಿಂವ್ಚ್ಯಾ ತುಕಾ ತ್ಯೊ ಜಾಪಿ ಕಶ್ಯೊ ಆನಿ ಖಂಯ್ ಮೆಳ್ತಾತ್ ಯಾತ್ರ್? ಕಾಂಯ್ ತುಂ ಹ್ಯೊ ಜಾಪಿ ಚೊರಿ ಪುಣಿ ಕರಿನಾಂಯ್ಮೂ? [ದುಕೊರ್ ಬೊಸ್ತ್ಯಾಂವ್]
ಜಾಪ್: ಛೆಕ್ಕ್! - ಚೊರಿ ಕರ್ಚಿ ಕಿತ್ಯಾಕ್? ದೊಳೆ ಉಗ್ತೆ ಕರ್ನ್ ಆಮ್ಚ್ಯಾ ಕೊಂಕ್ಣೆಂತ್ ಜಾಂವ್ಚ್ಯಾ ವೆವೆಗ್ಳ್ಯಾ ರಿತಿಚ್ಯಾ ಸರ್ಕಸಾಕ್ ಪಳೆ, ತುಕಾಯ್ ತ್ಯೊ ಜಾಪಿ ಅಪ್ಶ್ಯೊಚ್ಚ್ ಕಳ್ತೆಲ್ಯೊ.
ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ
’ಮಿತ್ರ್ ಹಾಪ್ತ್ಯಾಳೆಂ’
ನಾಲಾಯಕ್, ಕುಲ್ಶೇಕರ್
’ದಿವೊ ಹಾಪ್ತ್ಯಾಳೆಂ’
ಬಿಂದು, ಬೆಂದುರ್
’ಸೆವಕ್ ಮಯ್ನ್ಯಾಳೆಂ’
ಬೋರಿ ಬಸವ, ಅಬ್ಬಾಸಿಯಾ
(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.
ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: info@daaiz.com
ಅಧ್ಲಿಂ ಸವಾಲಾಂ-ಜಾಪಿ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
