ಮನ್ಶಾತತ್ವಾಚೊ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

’ಕಾಣಿಂ ಎಕಾ ವಾಚ್ಪ್ಯಾಕ್ ಸ್ವಪ್ಣಾಂಚಾ ಸಾಗೊರಾಲಾಗಿಂ ಪಾವಂವ್ಕ್ ಸಕ್ತಾ ತರ್ ಕವಿತಾ ತಾಂತುಂ ಉಪ್ಯೆಂವ್ಚೊ ಅನ್ಭೋಗ್ ದಿತಾ’

ಕವಿತಾಪಾಠ್ - 7

ಲಿಸಾಂವ್ -7. ಮನಿಸ್ ಮ್ಹಣ್ಜೆ ಕಿತೆಂ?

ಕವಿತಾ - ಮನಿಸ್ ಮ್ಹಣ್ಜೆ ಕಿತೆಂ

ಕವಿ: ಲುವಿಸ್ ಮಸ್ಕರೇಞ್

ಬೂಕ್: ಅಬ್ರಾಂವ್ಚೆಂ ಯಜ್ನ್‌ದಾನ್

ಪ್ರಕಾಶಕ್: ಪ್ರಗತಿ ಪ್ರಕಾಶನ್

ಪಾಠ್ ಚಲವ್ಪಿ: ವಲ್ಲಿ ಕ್ವಾಡ್ರಸ್

ತಾರಿಕ್: 12 ಅಗೋಸ್ತ್ 2005

ಜಾಗೊ: ಸಾಲ್ಮಿಯಾ, ಕುವೇಯ್ಟ್

’ಮನಿಸ್ ಮ್ಹಣ್ಜೆ ಕಿತೆಂ 

ಸಾಂಗ್ಶಾತ್ ಮ್ಹಾಕಾ 

ಮಾತಿಯೆಚೆಂ ಏಕ್ ಘರ್ ತೆಂ: 

ಧನಿ ಆಸ್ತಾಂ 

ಸೊಭೀತ್ ದಿಸ್ತಾ 

ನಾಂ ತರ್ ಬೆಸ್ಟೆಂ ರಿತೆಂ. 

ಆಪ್ಣೆ ಇತ್ಲ್ಯಾಕ್ ವಾಡ್ಟಾ 

ವಿಚಿತ್ರ್ ಭಾಂದಾಪ್ 

ಒಕಾಲ್ ನಾತ್ಲ್ಯಾರ್ ಪಡ್ಟಾ: 

ತ್ಯಾ ಭಿತರ್ 

ಏಕ್ ಪಯ್ಣಾರಿ 

ಆಪ್ಲೆಂ ಬಿಡಾರ್ ಕರ್ತಾ 

ಪರ್ಗಾಂವಾಂತ್ಲೊ ಏಕ್ ಜಣ್ 

ಅತ್ಮೊ ಸುಂದರ್! 

ಜಾತಚ್ ಆಪ್ಲೆಂ ಸ್ವಪಾಣ್ 

ಸಾಂಡ್ಟಾ ತೆಂ ಘರ್ 

ಆಬ್ಳೆ ಮೂಟ್‌ಭರ್ 

ಕುಸಡ್, ಕಿಡ್ಯಾಂ ಪರ್ವಣ್’

ಕವಿಚಿ ವ್ಹಳೊಕ್:

ದೆ|ಲುವಿಸ್ ಮಸ್ಕರೇಞ್ ಏಕ್ ದೇವ್ ಭಿರಾಂತೆನ್ ವ್ಹಡ್ ಜಾಲ್ಲೊ ಕೊಂಕ್ಣೆಚೊ ಪಯ್ಲೊ ಕವಿ ಮ್ಹಣ್ಂಚ್ ನಾಂವಾಡ್ಲಾ. ಮನ್ಶಾಪಣಾಚಾ ಮೊಲಾಂಕ್ ಅಪ್ಲ್ಯಾ ಜಿಣ್ಯೆಂತ್ ತಶೆಂಚ್ ಆಪ್ಲ್ಯಾ ಬರ್ಪಾಂನಿ ಉಕ್ಲುನ್ ದವರ್‌ಲ್ಲೊ ಹೊ ಕೊಂಕ್ಣೆಚೊ ’ವರಕವಿ’. ತಾಚೊ ’ಅಬ್ರಾಂವ್ಚೊ ಯಜ್ನ್‌ದಾನ್’ ಬೂಕ್ ಅಜೂನ್ ಕೊಂಕ್ಣೆಂತ್ ಕವಿತಾಚೆಂ ಅಧ್ಯಯನ್ ಕರ್ಚೆ ಶಿಕೊನ್ ಆಸಾತ್. ಮಂಗ್ಳುರಿ ಕೊಂಕ್ಣೆಂತ್ ಕವಿತಾಂಚೆಂ ವಾದಾಳ್ ಉಭ್ಜಾಯಿಲ್ಲೊ ಹೊ ಖರೊಚ್ ಏಕ್ ಮಹಾನ್ ಕವಿ.

(ತಸ್ವಿರೆಂತ್ ಆಸ್ಚಿಂ - ದಾವ್ಯಾ ಥಾವ್ನ್ ಉಜ್ವ್ಯಾಕ್)

ಬಸ್‌ಲ್ಲಿಂ: ಸಿರಿಲ್ ಪೆರಿಸ್, ಬೆನ್ನಾ ಫಜೀರ್, ಸಯಿದ್ ಕಮರ್ ಮಿಂಟೊ, ವಲ್ಲಿ ಕ್ವಾಡ್ರಸ್.

ಉಭಿಂ ಆಸ್ಚಿಂ: ಕ್ಯಾರಲ್ ಮಾರ್ಟಿಸ್, ಆಂಟನಿ ಮಿನೇಜಸ್, ಪ್ರಿಯಾ ಸಿಕ್ವೇರಾ, ಕ್ಲಾರಾ ಫೆರ್ನಾಂಡಿಸ್, ಲೆಸ್ಲಿ ನೊರೊನ್ಹಾ, ರೀನಾ ಕ್ವಾಡ್ರಸ್, ನವೀನ್ ಕ್ವಾಡ್ರಸ್, ಹೆನ್ರಿ ಲುವಿಸ್, ಎಲ್.ಜೆ.ಬ್ರಹ್ಮಾವರ್, ಮೆಲ್ವಿನ್ ಜೆ. ವಾಸ್, ರೋಬರ್ಟ್ ಕ್ರಾಸ್ತಾ, ಲಾರೆನ್ಸ್ ಪಿಂಟೊ, ಪೀಟರ್ ಕ್ಯಾಸ್ತಲಿನೊ, ವಿನ್ಸೆಂಟ್ ನೊರೊನ್ಹಾ.

ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್

ಕವಿತಾಪಾಠ್ - 6 . ಮ್ಹಜೊ ದಿವೊ (ಮಾವ್ರಿಸ್ ಶಾಂತಿಪುರ್)

ಕವಿತಾಪಾಠ್ - 5 . ಬಾಂಯ್  (ಆಂಡ್ರು ಎಲ್. ಡಿ’ಕುನ್ಹಾ)

ಕವಿತಾಪಾಠ್ - 4 . ಆಜ್ (ವಲ್ಲಿ ಕ್ವಾಡ್ರಸ್)

ಕವಿತಾಪಾಠ್ - 3 . ಸಲ್ವಣಿ (ಫ್ರೆಡ್ ಕುಮಾರ್)

ಕವಿತಾಪಾಠ್ - 2 . ಕಯ್ದ್ಯಾಚಿ ಕವಿತಾ (ಎಚ್ಚೆಮ್)

ಕವಿತಾಪಾಠ್ - 1 . ವಾಟ್ (ಮೆಲ್ವಿನ್ ರೊಡ್ರಿಗಸ್)

ಮನ್ಶಾತತ್ವಾಚೊ ನಿಹಾಳ್ ಹಾಡ್ಚೆಂ ಕವಿತಾ [ - ವಲ್ಲಿ ಕ್ವಾಡ್ರಸ್, ಅಜೆಕಾರ್] 

ಮನ್ಶಾತತ್ವಾಚೊ ನಿಹಾಳ್ ಹಾಡ್ಚೆಂ ಕವಿತಾ ಅಜಿಕ್ 93 ವರ್ಸಾಧಿಂ ಹೆಂ ಕವಿತಾ ಲಿಖ್ತಾಸ್ತಾನಾ, ಕವಿನ್ ಭೋವ್ಶಾ ಆಯ್ಚಾ ದಿಸಾ ಕುವೆಯ್ಟ್ ತಸಲ್ಯಾ ಪರ್ಕಿ ಶೆರಾಂತ್ ಸುಮಾರ್ ನೋವ್ ದಾಕ್ಡ್ಯಾ ಉಪ್ರಾಂತ್ ಹ್ಯಾ ಕವಿತಾಚೆರ್ ಅಧ್ಯಯನ್ ಚಲೊಂಕ್ ಆಸ್ತೆಲೆಂ ಮ್ಹಣ್ ಚಿಂತುಂಕ್ ಸಾಧ್ಯ್ ಆಸ್‌ಲ್ಲೆಂಗಿ? ಹ್ಯಾ ನೋವ್ ದಾಕ್ಡ್ಯಾಂನಿ ಜಾಯ್ತಿ ಬದ್ಲಾವಣ್ ಜಾಲ್ಯಾ; ಮನಿಸ್ ಬದಲ್ಲಾ, ಪ್ರಗತಿ ಬದಲ್ಲ್ಯಾ, ಮನ್ಶಾಚೆ ವಿಚಾರ್ ಬದ್ಲಲ್ಯಾತ್, ಮನ್ಶಾಚೆಂ ಚಿಂತಾಪ್ ಬದ್ಲಲಾಂ, ಮನಿಸ್ ಅಪ್ಲೊ ಗಾಂವ್, ಆಪ್ಲೊ ಧರ್ಮ್, ಆಪ್ಲಿ ಭಾಸ್, ಆಪ್ಲಿ ಜಾತ್ ಕಿತೆಂಯ್ ಘಡ್ಯೆನ್ ಬದ್ಲುಂಕ್ ಸಕ್ತಾ - ಅಪ್ಲೆಂ ಅಸ್ತಿತ್ವ್‌ಯೀ.

ಪುಣ್ ಮನ್ಶಾನ್ ಬದ್ಲುಂಕ್ ಸಕಾನಾತ್‌ಲ್ಲ್ಯೊ ಜಾಯ್ತ್ಯೊ ಸಂಗ್ತ್ಯೊ ಸಂಸಾರಾಂತ್ ಆಸಾತ್, ತಾಂತ್ಲೆಂ ಏಕ್ ಜಾವ್ನಾಸಾ ಚರಿತ್ರಾ. ಆನಿಂ ಹ್ಯಾ ಚರಿತ್ರೆಚಾ ಪಾನಾಚೆರ್ ಭಾಂಗ್ರಾಳ್ಯಾ ಅಕ್ಶರಾಂನಿ ಲಿಖ್‌ಲ್ಲೆಂ ಕೊಂಕ್ಣಿ ಕವಿತಾ ಶೆತಾಂತ್ಲೊ ಅಬ್ರಾಂವ್ ಲುವಿಸ್ ಮಸ್ಕರೇಞ್ ಹಾಚಿಂ ಕವಿತಾ ಆನಿಂ ತಾಂತ್ಲೆ ವಿಚಾರ್.

ಮನಿಸ್ ಆಯಿಲ್ಲ್ಯಾ ಘಡ್ಯೆಥಾವ್ನ್ ವೆಚಾ ಖಿಣಾಪರ್‍ಯಾಂತ್ಲೆ ಆವ್ದೆಕ್ ’ಜಿವಿತ್’ ಮ್ಹಣ್ ವೊಲಾಯ್ತಾ. ಹೆಂ ಸತ್ ಉಚಾರುಂಕ್ ಕಸಲೊಚ್ ತಾತ್ವಿಕ್ ನಿಹಾಳ್ ಗರ್ಜೆಚೊ ನ್ಹಯ್. ಆಯಿಲ್ಲ್ಯಾ ಘಡ್ಯೆಕ್ ಜಲ್ಮ್ ಮ್ಹಣ್ ವೊಲಾಯ್ತಾ ತರ್ ವೆಚಾ ಘಡ್ಯೆಕ್ ಮರಣ್ ಮ್ಹಣ್ ವೊಲಾಯ್ತಾ. ಹ್ಯಾ ಮಧ್ಲ್ಯಾ ಜಿವಿತಾಂತ್ ಮನಿಸ್ ಸಾಸ್ಣಾಕ್ ಬಾಳ್ವೊಂಚೆಪರಿಂ ಕಿತೆಂ ಸಕ್ಕಡ್ ಕರ್ತಾ? ಚಂದ್ರಾಕ್ ಉಡ್ತಾ, ದರ್‍ಯಾಕ್ ರಿಗ್ತಾ, ಕುಪಾಂ ಚಿರ್ತಾ, ವಾರ್‍ಯಾರ್ ಉಭ್ತಾ.

ಪುಣ್ ಮನಿಸ್ ಮ್ಹಳ್ಯಾರ್ ಕಿತೆಂ ಮ್ಹಣ್ ಚಿಂತುಂಕ್ ಸಕ್‌ಲ್ಲೊ ತರ್? ನಾಸ್ ಜಾವ್ನ್ ವೆಚಿ ಹಿ ಧುಳಿ ಥಾವ್ನ್ ಆಯಿಲ್ಲಿ, ಧುಳಿಕ್ ಪಾಟಿಂ ವೆಚಿ ಕೂಡ್ ವಳ್ಕೊಂಕ್ ಪಾವ್‌ಲ್ಲೊ ಯಾ ಸಕ್‌ಲ್ಲೊ ತರ್? ಭೋವ್ಶಾ ಕವಿನ್ ಇತ್ಲೆಂಚ್ ಚಿಂತ್‌ಲ್ಲೆಂ ಜಾವ್ಯೆತಾ ಹೆಂ ಕವಿತಾ ಬರಂವ್ಚಾ ವಗ್ತಾಂ;

’ಮನಿಸ್ ಮ್ಹಣ್ಜೆ ಕಿತೆಂ’ ಹ್ಯಾ ತೀನ್ ಪಂಗ್ತೆಚಾ ಕವಿತೆಂತ್ ತೀನ್ ನ್ಹಯ್, ತೀಸ್ ನ್ಹಯ್, ತಿನ್ಶಾಂ ವಯ್ರ್ ಕಾಣ್ಯೊ ಬರವ್ಯೆತಾ. ಅಶ್ವರ್ ಆನಿ ನಶ್ವರಾ ಮಧ್ಲೊ ಅಂತರ್ ಸೊಧ್ಯೆತಾ, ಸುರ್‍ವಾತೆ ಆನಿಂ ಸಂಪ್ಣೆ ಮಧ್ಲೊ ಅಂತರ್ ಮೆಜ್ಯೆತಾ. ತಿತ್ಲೆಂ ತ್ರಾಣ್ ಹ್ಯೆ ಕವಿತೆಂತ್ ಆಸಾ;

ಆತಾಂ ಪಯ್ಲಿ ಪಂಗತ್ ಹ್ಯಾ ಅಧ್ಯಯನಾಕ್ ಘೆವ್ಯಾಂ; 

ಮನಿಸ್ ಮ್ಹಣ್ಜೆ ಕಿತೆಂ ಸಾಂಗ್ಶಾತ್ ಮ್ಹಾಕಾ ಮಾತಿಯೆಚೆಂ ಏಕ್ ಘರ್ ತೆಂ: 

ಧನಿ ಆಸ್ತಾಂ ಸೊಭೀತ್ ದಿಸ್ತಾ ನಾಂ ತರ್ ಬೆಸ್ಟೆಂ ರಿತೆಂ. 

ಹಾಂಗಾಸರ್ ಇಮಾಜ್ಯೊ ’ಮನಿಸ್’, ’ಘರ್’, ’ಮಾತಿ’, ’ಧನಿ’ ಮ್ಹಳ್ಯಾರ್ ಕಿತೆಂ?

ಮಾತಿ ಮನ್ಶಾಚಿ ಸುರ್ವಾತ್, ಎಕಾ ಚಿಮ್ಟಿ ಮಾತಿಯೆಕ್ ಫುಂಕುನ್ ದೆವಾನ್ ಮನ್ಶಾಕ್ ರಚ್‌ಲ್ಲೊ ಮ್ಹಣ್ ಧಾರ್ಮಿಕ್ ಇತಿಹಾಸ್/ಚರಿತ್ರಾ ಸಾಂಗ್ತಾ. ಮನ್ಶಾಚಿ ಕೂಡ್ ಮ್ಹಳ್ಯಾರ್ ತೆಚ್ಚ್ ಮಾತಿಯೆಂತ್ ದೆವಾನ್ ರಚ್‌ಲ್ಲೆಂ ಬಿಡಾರ್ ಯಾ ಘರ್ ಮ್ಹಣ್ತಾ ಕವಿ.

ಧನಿ ಕೊಣ್? ಧನಿ ಉಸ್ವಾಸ್, ಧನಿ ಜೀವ್, ಧನಿ ಅತ್ಮೊ, ಧನಿ ವೆಕ್ತಿತ್ವ್, ಧನಿ ನೀತ್, ಧನಿ ಸತ್, ಧನಿ ಆದರ್ಶಾಂ.. ಆತಾಂ ಮುಖ್ಲಿ ಪಂಗತ್ ಪಳೆವ್ಯಾಂ; ಆಪ್ಣೆ ಇತ್ಲ್ಯಾಕ್ ವಾಡ್ಟಾ ವಿಚಿತ್ರ್ ಭಾಂದಾಪ್ ಒಕಾಲ್ ನಾತ್ಲ್ಯಾರ್ ಪಡ್ಟಾ: ತ್ಯಾ ಭಿತರ್ ಏಕ್ ಪಯ್ಣಾರಿ ಆಪ್ಲೆಂ ಬಿಡಾರ್ ಕರ್ತಾ.

ಹಾಂಗಾಸರ್ ಘರ್ ಆಸ್‌ಲ್ಲೆಂ ಭಾಂದಾಪ್ ಜಾತಾ, ಧನಿಯಾಕ್ ಸಾಂಗಾತ್ ದೀಂವ್ಕ್ ಎಕ್ಲೊ ಪಯ್ಣಾರಿ ಯೆತಾ, ವಯ್ರ್ ರಿತೆಂ ಜಾಂವ್ಚೆಂ ಆತಾಂ ಬಿಡಾರ್ ಜಾತಾ.. ತರ್ ಹೊ ಪಯ್ಣಾರಿ ಕೊಣ್?

ಪಯ್ಣಾರಿ ಮ್ಹಳ್ಯಾರ್ ಭಂವೊನ್ ಆಸ್ಚೊ, ಯಾತ್ರಿಕ್, ಪಯ್ಣಾರ್ ಆಸ್ಚೊ. ತಾತ್ವಿಕ್ ನಿಹಾಳಾಂತ್ ಸಾಂಗ್ಚೆಂ ತರ್ ಮನಿಸ್ ಏಕ್ ಪಯ್ಣಾರಿ. ಆನಿಂ ಹ್ಯಾ ಬಿಡಾರಾಂತ್ ಎಕ್ಲೊ ಪಯ್ಣಾರಿ ಯೆತಾ. ಆನಿಂ ಅಪಾಪಿಂಚ್ ವಾಡ್‌ಲ್ಲ್ಯಾ ತ್ಯಾ ವಿಚಿತ್ರ್ ಭಾಂದ್ಪಾಂತ್ ತ್ಯಾ ಧನಿಯಾಕ್ ಸಾಂಗಾತ್ ದಿತಾ. ಒಕಾಲ್ ಮ್ಹಳ್ಯಾರ್ ಹಾಜ್ರಿ, ಮ್ಹಳ್ಯಾರ್ ಹೆಂ ಮಾತಿಯೆಚೆಂ ಭಾಂದಾಪ್ ಬಿಡಾರ್ ಜಾಂವ್ಕ್ ತ್ಯಾ ಧನ್ಯಾಚಿ ತಶೆಂಚ್ ಪಯ್ಣಾರ್‍ಯಾಚಿ ಹಾಜ್ರಿ ಗರ್ಜ್ ಆಸಾ ಮ್ಹಣ್ತಾ ಕವಿ. ನಾವೇ ಹೆಂ ಬಿಡಾರ್ ಕೊಸೊಳ್ತಾ, ಯಾ ಸಂಪ್ತಾ ಮ್ಹಣ್ತಾ ಕವಿ.

ಆತಾಂ ಅಖೇರ್ಚಿ ಪಂಗತ್ ಪಳೆವ್ಯಾಂ;

ಪರ್ಗಾಂವಾಂತ್ಲೊ ಏಕ್ ಜಣ್ ಅತ್ಮೊ ಸುಂದರ್! ಜಾತಚ್ ಆಪ್ಲೆಂ ಸ್ವಪಾಣ್ ಸಾಂಡ್ಟಾ ತೆಂ ಘರ್ ಆಬ್ಳೆ ಮೂಟ್‌ಭರ್ ಕುಸಡ್, ಕಿಡ್ಯಾಂ ಪರ್ವಣ್’ ಹಾಂಗಾಸರ್ ಕವಿ ಮನ್ಶಾಚಾ ಅಖೇರ್ಚಾ ಶೆವೊಟಾಕ್ ಉಗ್ತಾಯ್ತಾ. ಹ್ಯಾ ಪಂಗ್ತೆರ್ ಕವಿನ್ ಉಭ್ಯೊ ಕೆಲ್ಲ್ಯೊ ಇಮಾಜ್ಯೊ ಕಾಂಯ್ ಸಾದ್ಯೊ ನ್ಹಯ್, ಪಳೆಯಾ;

ಪರ್ಗಾಂವಾಂತ್ಲೊ ಎಕ್ಲೊ ಜಣ್:

ವಯ್ರ್ ಪಯ್ಣಾರಿ ಜಾಲ್ಲೊ ಹಾಂಗಾ ಪರ್ಗಾಂವಾಂತ್ಲೊ ಏಕ್ ಜಣ್ ಜಾತಾ. ಅತ್ಮೊ ಸುಂದರ್ ಜಾತಚ್ - ಅತ್ಮೊ ಸುಂದರ್ ಜಾಂವ್ಚೊ ಮ್ಹಳ್ಯಾರ್? ಆಪ್ಲ್ಯಾ ಜಿಣ್ಯೆಂತ್ ಕೆಲ್ಲ್ಯಾ ಬರ್‍ಯಾ ಕರ್ತುವಾಂನಿ ಮಾತ್ರ್ ಅತ್ಮ್ಯಾನ್ ಸುಂದರ್ ಜಾವ್ಯೆತಾ, ಕೂಡ್ ಸುಂದರ್ ಜಾಂವ್ಕ್ ಬರೆಂ ನೆಸಾಪ್ ಪುರೊ.

ಮ್ಹಳ್ಯಾರ್ ಆಪ್ಲ್ಯಾ ಜಿಣ್ಯೆಂತ್ ಕೆಲ್ಲಿಂ ಬರಿಂ ಕರ್ತುವಾಂ ಘೆವ್ನ್ ಸ್ವಪಾಣ್ ಸಾಂಡ್ಟಾ. ಸ್ವಪಾಣ್ ಮ್ಹಳ್ಯಾರ್ ಕಲ್ಪನ್ - ಮ್ಹಣ್ಜೆ ನಶ್ವರ್, ನಾಸ್ ಜಾಂವ್ಚೆಂ, ತಾತ್ಕಾಲಿಕ್ ವ ಕ್ಷಣಿಕ್ ಸುಕ್ ಯಾ ಸಂತೊಸ್. ಮ್ಹಳ್ಯಾರ್ ತೊ ಪರ್ಕಿ ಗಾಂವ್ಚೊ ಪಯ್ಣಾರಿ ಹ್ಯಾ ಬಿಡಾರ್ ಜಾಲ್ಲ್ಯಾ ಮಾತಿಯೆಚಾ ಘರಾಕ್ ಯಾ ಭಾಂದ್ಪಾಕ್ ಸೊಡ್ನ್ ವೆತಾನಾ ಫಕತ್ ಅಪ್ಲೆಂ ಬರೆಂ ಮಾತ್ರ್ ಘೆವುನ್ ವೆತಾ - ಸ್ವಪಾಣ್ ಸೊಡ್ನ್.

ಅಖೇರ್ಚೊ ದೋನ್ ವ್ಹೊಳಿ ಪಳೆಯಾ;

ಅಬ್ಳೆ ಮೂಟ್‌ಭರ್ ಕುಸಡ್, ಕಿಡ್ಯಾಂ ಪರ್ವಣ್ 

ಮ್ಹಣ್ಜೆ ಜೀವ್ ವಾ ಅತ್ಮೊ (ಪಯ್ಣಾರಿ) ಸಾಂಡ್‌ಲ್ಲೆಂ ತೆಂ ಘರ್ (ಮಾತಿಯೆಚಿ ಕೂಡ್) ಉಪ್ರಾಂತ್ ಕೊಣಾಕ್ ಉರ್ಚಿ?

ಫಕತ್ ಕುಸೊಂಕ್ ಆನಿಂ ಕಿಡ್ಯಾಂಕ್ ಖಾಣ್ ಜಾಂವ್ಕ್ ಮ್ಹಣ್ತಾ ಕವಿ. ಕೆಂ ಕವಿತಾ ನೋವ್ ದಾಕ್ಡೆಚ್ ಕಿತ್ಯಾಕ್? ನೋವ್ ಶೆಕ್ಡ್ಯಾ ಉಪ್ರಾಂತ್‌ಯ್ ಮನಿಸ್ ಮ್ಹಳ್ಳೆ ಜಿಯೆವ್ನ್ ಆಸ್ತಿತ್ ತರ್ ಹ್ಯಾ ಸಂಸಾರಾಂತ್, ಹೆಂ ಕವಿತಾ ವಾಚುಂಕ್ ತಶೆಂಚ್ ಸಮ್ಜೊಂಕ್ ಸಕ್ತೆಲೆ ತೆಂ ಖಂಡಿತ್.

ಜಲ್ಮಾ ಥಾವ್ನ್ ಮರ್ಣಾ ಪರ್ಯಾಂತ್...! [ಮೆಲ್ವಿನ್ ಜೆ. ವಾಸ್, ಕೆಲರಾಯ್]

ಭೋವ್ ಸೊಂಪ್ಯಾ ಜವಾಬೆಕ್ ಏಕ್ ಸೊಭಿತ್ ರಿತಿಚಾ ವರ್ಣನಾಂತ್ ಲಿಖ್‌ಲ್ಲೆಂ ಮನಿಸ್ ಮ್ಹಣ್ಜೆ ಕಿತೆಂ? ಕವಿತಾ ಮನಿಸ್ ಆನಿ ಮನ್ಶ್ಯಾಪಣಾಚ್ಯಾ ಸಭಾರ್ ರುಪಾಂ ಪಯ್ಕಿ ದುದಾಪರಿಂ ಝಳ್ಕೊಂಚಾ ಎಕಾ ರೂಪಾಚೆಂ ಮಾತ್ರ್ ವರ್ಣನ್ ಕರ್ತಾ. ಕವಿನ್ ಕವಿತೆಂತ್ ದಾಖಯಿಲ್ಲೆಂ ರೂಪ್, ರೂಪ್ ರೂಪ್ ಝಳ್ಕಾತಾನಾ ಹ್ಯಾ ಕವಿತೆಚಾ ಗೂಂಡಾಯೆಕ್ ದೆಂವ್ಚಿ ಗರ್ಜ್ ನಾಂ ಮ್ಹಣೊನ್ ಮ್ಹಾಕಾ ಭೊಗ್ತಾ. ಗೂಂಡಾಯೆಕ್ ದೆಂವ್ಲೆಂ ತರ್‌ಯ್ ಮಾತಿಯೆ ಥಾವ್ನ್ ಧುಳಿಕ್ ಸೊಡ್ಲ್ಯಾರ್ ತ್ಯಾ ಮಧೆಂ ಕಿತೆಂ ಮ್ಹಳ್ಳೆಂ ನಾಂ. ಧುಳಿ ಥಾವ್ನ್ ಆಯಿಲ್ಲೊ ಧುಳಿಕ್ ಪಾಟಿಂ ವೆತಾ ಮ್ಹಣೊನ್ ಹರ್ಯೆಕ್ ಮನಿಸ್ ಮಾಂಧ್ತಾ ಜಾಲ್ಯಾರ್ ಹ್ಯಾ ಕವಿತೆಂತ್ ಕಾಂಯ್ ನವೆಸಾಂವ್ ನಾಂ.

"ಮಾತಿಯೆಚೆಂ ಏಕ್ ಘರ್ ತೆಂ"

"ಆಪ್ಣೆಯಿತ್ಲ್ಯಾಕ್ ವಾಡ್ಟಾ"

ಭೋವ್ಶಾ ಹೆಂ ಘರ್ ಆಪ್ಣಾಯಿತ್ಲ್ಯಾಕ್ ವಾಡ್ಟಾ ಜಾಲ್ಯಾರ್ ತ್ಯಾ ಘರಾಂತ್ ಒಕಾಲಾಚಿ ಗರ್ಜ್ ಕಿತೆಂ? ಒಕಾಲ್ ನಾತ್ಲೆಲಿಂ ಘರಾ ಹ್ಯಾ ಭುಂಯ್ ವಯ್ಲ್ಯಾ ಫಾತ್ರಾಂಪರಿಂ ಸದಾಂಚ್ ಅಮರ್ ಜಾವ್ನ್ ಉರ್ತಿಂ. ಆನಿ ಸಂಸಾರಾಚಾ ಆಯ್ಚಾ ಹ್ಯಾ ಪರಿಗತೆಕ್ ಖಂಡಿತ್ ಕಾರಾಣ್ ಜಾತಿಂ ನಾಂ. ಏಕ್ ಪಯ್ಣಾರಿ ಹ್ಯಾ ಘರಾಕ್ ಒಕಾಲ್ ದೀವ್ನ್ ಆಪ್ಲೆಂ ಬಿಡಾರ್ ಕರ್ತಾನಾ ಮಾತ್ರ್ ಹ್ಯಾ ಘರಾಚಿ ವಾಡಾವಳ್ ಆರಂಭ್ ಜಾತಾ. ಆನಿಂ ಹಿ ವಾಡಾವಳ್ ಖಂಯ್ಚಾ ರಿತಿರ್ ವಾಡ್ತಾ ತೆಂ ಸಾಂಗೊಂಕ್ ಗೆಲ್ಯಾರ್ ಭೋವ್ಶಾ ಮ್ಹಜೆಂಯ್ ಪಯ್ಣ್ ಆಶೆಂಚ್ ಕಾಬಾರ್ ಜಾಂವ್ಕ್ ಆಸಾ.

ಆತಾಂ ಮ್ಹಜ್ಯಾ ಲಿಸಾಂವಾಕ್ ಹಾಂವ್ ಹ್ಯಾ ಕವಿತೆಕ್ ಎಕಾ ದೆವಾಸ್ಪಣಾಚಾ ವಿಚಾರಾಂಕ್ ಸರಿ ಕರ್ತಾಂ. ಹೆಂ ಕವಿತಾ ಮನ್ಶ್ಯಾಕ್ ಎಕಾ ಘರಾಚೆಂ ರೂಪ್ ದೀವ್ನ್ ತಾಕಾ ತಾಚೊ ಜಲ್ಮ್, ತಾಚಿ ವಾಡಾವಳ್, ತಾಚೆಂ ಪಯ್ಣ್ ಆನಿ ತಾಚೆಂ ಅಂತ್ಯ್ ದಾಖವ್ನ್ ದಿತಾ ಸೊಡ್ಲ್ಯಾರ್ ಹ್ಯಾ ಘರಾಚಾ ಜಲ್ಮಾ ಥಾವ್ನ್ ಮರ್ಣಾ ಪರ್ಯಾಂತ್ ತಾಚ್ಯಾ ವಾಡಾವಳಿಚಾ ಪಯ್ಣಾಚೊ ವಿವರ್ ದೀನಾಂ. ಹೆಂ ಹ್ಯಾ ಕವಿತೆಚೆಂ ಉಣೆಂಪಣ್ ಮ್ಹಣೊನ್ ಮ್ಹಣ್ತಾಂ ಹಾಂವ್.

ದೇವ್ ರಚ್ತಾ ದೇವ್ ಪೊಸ್ತಾ ಮ್ಹಳ್ಳ್ಯಾಪರಿಂ ಕವಿತೆಂತ್ ಸಗ್ಳೆಂ ದೆವಾಚೆಂಚ್ ಕಾರ್ಭಾರ್. ಪರ್ಗಾಂವಾಂತ್ಲ್ಯಾ ಆತ್ಮ್ಯಾಚೆಂ ಸ್ಪಪಾಣ್ ಜ್ಯಾರಿ ಜಾತಚ್ಚ್ ಘರಾಚಿ ದೆಸ್ವಾಟ್. ಹಾಂಗಾಸರ್ ತ್ಯಾ ಆತ್ಮ್ಯಾಚಾ ಸ್ವಪಾಣಾಚೆಂಯ್ ಉಲ್ಲೇಖ್ ನಾಂ ಕಸಲೆಂ ತೆಂ ಸ್ವಪಾಣ್ ಮ್ಹಣೊನ್. ಸ್ವಪಾಣ್ ತೆಂ ಕಸಲೆಂಯ್ ಜಾಂವ್... ಪೂಣ್ ಮನಿಸ್ ಮಾತ್ರ್ ಹಾಂಗಾ ಕಟ್‌ಪುತ್ಳಿ ಜಾಲಾ.

ಹ್ಯಾ ಕವಿತೆಚೊ ಮೂಳ್ ಧ್ಯೇಯ್ ಮ್ಹನ್ಶ್ಯಾಕ್ ಆಪ್ಲ್ಯಾ ಮರ್ಣಾಚಿ ಪರಿಚಯ್ ಮಾತ್ರ್ ದಿಂವ್ಚಿ ನ್ಹಯ್ ಆಸ್ತಾಂ ತ್ಯಾ ಮರ್ಣಾಕ್ ಕಶಿ ಪಾಂವ್ಚಿ ಮ್ಹಳ್ಳಿ ನ್ಹಯ್. ಹಾಂವ್ ಚಿಂತಾಂ ಹೆಂ ಲಿಸಾಂವ್ ಚಡ್ ಗರ್ಜೆಚೆಂ.

ಜಲ್ಮಾಲ್ಲೊ ಮನಿಸ್ ಮೊರ್ತಾ ತೆಂ ಖಂಡಿತ್. ಪುಣ್ ಹ್ಯಾ ಮರ್ಣಾವಿಶಿಂ ಚಡಿತ್ ಕಾಂಯ್ ಮನಿಸ್ ಚಿಂತುಂಕ್ ವಚಾನಾಂ ಜಾಲ್ಲ್ಯಾನ್ ಮನ್ಶ್ಯಾ ಕುಡಿಚಿ ಖರಿ ವಳಕ್ ಕವಿ ಹಾಂಗಾಸರ್ ದಾಖಂವ್ಕ್ ಪೆಚಾಡ್ತಾ. ಪೂಣ್ ಹೊ ಏಕ್ ಸ್ವಾಭಾವಿಕ್ ವಿಚಾರ್ ಜಾಲ್ಲ್ಯಾನ್ ಕವಿ ಹಾಂಗಾಸರ್ ಪರತ್ ತ್ಯಾಚ್ ವಿಚಾರಾಕ್ ಮನ್ಶ್ಯಾ ಮತಿಂತ್ ಜಾಗಂವ್ಚ್ಯಾಂತ್ ಕಿತ್ಲೊ ಯಶಸ್ವಿ ಜಾತಾ ಮ್ಹಳ್ಳೆಂ ಸವಾಲ್ ಬೋವ್ಶಾ ಸವಾಲ್‌ಚ್ ಜಾವ್ನ್ ಉರ್ತೆಲೆಂ ಜಲ್ಮಾ ಥಾವ್ನ್ ಮರ್ಣಾ ಪರ್ಯಾಂತ್.

ಮಾತಿಯೆ ಥಾವ್ನ್ ಆಯಿಲ್ಲಿ ಮಾತಿಯೆಕ್ ಪಾಟಿಂ ವೆಚಿ ಕೂಡ್ [ಆಂಟನಿ ಮಿನೇಜಸ್, ಬೊಂದೆಲ್] 

ಸಂಸಾರಾಂತ್ ಮ್ಹನ್ಶಾಚೆಂ ಜಿವಿತ್ ಕಶೆಂ ಸುರು ಜಾವ್ನ್, ಕಶೆಂ ಆಖೇರ್ ಜಾತಾ ಮ್ಹಳ್ಳ್ಯಾಚೆಂ ಸುಂದರ್ ವರ್ಣನ್ ಹ್ಯಾ ಕವಿತೆಂತ್ ಅಟಾಪ್ಲಾಂ. ಹ್ಯಾ ಕವಿತಾಚಿ ಸುರ್ವಾತ್ ಕವಿ ಅಶಿ ಕರ್ತಾಗೀ ತಾಣೆಂಚ್ ವಿಚಾರ್‌ಲೆಲ್ಯಾ ಸವಾಲಾಕ್ ತೊಚ್ಚ್ ಜಾಪ್ ದೀವ್ನ್ ಮನಿಸ್ ಮ್ಹಳ್ಯಾರ್ ಮಾತ್ಯೆಚೆಂ ಘರ್ ಮ್ಹಣ್ ಸಾಂಗ್ತಾ. ಆನಿ ಅಸಲೆಂ ಮಾತ್ಯೆಚೆಂ ಘರ್, ಧನಿ ಆಸ್ಲ್ಯಾರ್ ಮಾತ್ರ್ ಸೊಭಿತ್ ದಿಸ್ತಾ ಮ್ಹಣ್ತಾ. ಹಾಂಗಾಸರ್ ಕವಿನ್ ಧನಿ ಮ್ಹಣ್ ಸಾಂಗುನ್ ಜಾಯ್ತ್ಯೊ ಇಮಾಜ್ಯೊ ಉಭ್ಯೊ ಕೆಲ್ಯಾತ್.

ಧನಿ ಮ್ಹಣ್ತಾನಾ ಮ್ಹಾಕಾ ದಿಸ್ಚೊ ಇಮಾಜಿ ಉಸ್ವಾಸ್, ಸೊಭಾಯ್, ಬರೆ ಗೂಣ್, ಧನ್ ಸಂಪತ್ತ್ ಮ್ಹಳ್ಯಾರ್ ಪಯ್ಶೆ ಆನಿ ಏಕ್ ಬರೆಂ ಕಾಳಿಜ್. ಆನಿ ಹೆಂ ಸಗ್ಳೆಂ ಎಕಾ ಮನ್ಶಾಕ್ ಲಾಬ್ಲೆಂ ತರ್ ಖಂಡಿತ್ ಜಾವ್ನ್ ತಾಚೆಂ ಜಿವಿತ್ ಸುಖಿ ಜಾತಾ ಆನಿ ತೊ ಕಷ್ಟಾಂವಿಣೆ ಜಿಯೆತಾ ಮ್ಹಣ್ಯೆತ್. ಆನಿ ಹೆಂ ಸರ್ವ್ ತಾಕಾ ಲಾಬ್ಲೆಂ ನಾ ತರ್, ಪ್ರತ್ಯೇಕ್ ಜಾವ್ನ್ ಧನಿ ಮ್ಹಳ್ಯಾ ಇಮಾಜಿಕ್ ಉಸ್ವಾಸ್ ಮ್ಹಣ್ ಉಭಿ ಕೆಲ್ಯಾರ್ ಮನ್ಶಾಚೆಂ ಜಿವಿತ್ ಭೆಷ್ಟೆಂ ರಿತೆಂ ಮ್ಹಣ್ ಸಾಂಗೊನ್ ಕವಿತಾ ಆಖೇರ್ ಕರ್ಯೆತಿ ಆಸ್‌ಲ್ಲಿ.

ಕಿತ್ಯಾಕ್ ಮ್ಹಳ್ಯಾರ್ ಪಯ್ಲ್ಯಾ ಪಂಗ್ತೆಂತ್ ತಾಣೆಂ ಮನಿಸ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಬರೆಂ ಕರ್ನ್ ಸಾಂಗ್ಲಾಂ. ತರೀಕಿ ತೊ ಮುಖಾರ್ಸುನ್ ಸಾಂಗ್ತಾ ಮ್ಹನ್ಶಾಚೆಂ ಜಿವಿತ್ ಆಪ್ಣಾ ಇತ್ಲ್ಯಾಕ್ ವಾಡ್ಚೆಂ ವಿಚಿತ್ರ್ ಭಾಂದಾಪ್ ಆನಿ ಅಸಲ್ಯಾ ಭಾಂದ್ಪಾಂತ್ ಜರ್ ಒಕಾಲ್ ನಾಂ ತರ್ ತೆಂ ಪಡ್ತಾ ಮ್ಹಣ್ತಾ. ಹಾಂಗಾಸರ್ ಕವಿನ್ ಮನ್ಶಾಚ್ಯಾ ತರ್ನಾಟ್ಪಣಾಕ್ ಪಿಂತ್ರಾಯ್ಲಾಂ. ಆನಿ ಒಕಾಲ್ ಮ್ಹಣ್ ಸಾಂಗೊನ್ ಬರೆ ಗುಣ್, ಬರಿ ಚಾಲ್ ಯಾ ದೇಕ್, ಜಿಣ್ಯೆಚೊ ಶೆವೊಟ್ ಅಸಲ್ಯೊ ಜಾಯ್ತ್ಯೊ ಇಮಾಜಿ ಉಭೊ ಕೆಲ್ಯಾತ್.

ಕಶೆಂ ಏಕ್ ಭಾಂದಾಪ್ ಯಾ ಘರ್ ಬಾಂದುಕ್ ಮಾತಿ, ಇಟೆ, ಸಿಮೆಂಟ್ ಆನಿ ರೆಂವ್ ಗರ್ಜ್ ಆಸಾಗೀ ತಶೆಂಚ್ ಎಕಾ ಮನ್ಶಾಕ್ ಬರೆಂ ಕರ್ನ್ ಜಿಯೆಜಾಯ್ ಜಾಲ್ಯಾರ್ ’ಒಕಾಲ್’ ಮ್ಹಳ್ಯಾರ್ ಸಂಯ್ಬಾ ಥಾವ್ನ್ ಯೆಂವ್ಚೆಂ ಗೂಣ್/ಅವ್ಗುಣ್ ಗರ್ಜೆಚೆ ಜಾವ್ನಾಸಾತ್. ನಾ ತರ್ ಮನಿಸ್ ಆಪ್ಲ್ಯಾ ಜಿವಿತಾಂತ್ ನಿಸರ್ನ್ ಪಡ್ತಾ ಆನಿ ನೀಟ್ ರಾವೊಂಕ್ ತೊ ಸಕಾನಾ. ಆನಿ ತ್ಯಾ ಭಿತರ್ ಎಕ್ ಪಯ್ಣಾರಿ ಆಪ್ಲೆಂ ಬಿಡಾರ್ ಕರ್ತಾ ಮ್ಹಣ್ ಸಾಂಗೊನ್ ಕವಿ ಆಪ್ಲೆಂ ಕವಿತಾ ಮುಖಾರ್ಸಿತಾ. ಪಳೆಯಾ ಆತಾಂ ಪಯ್ಣಾರಿ ಮನಿಸ್ ಮ್ಹಣ್ ಸಾಂಗೊನ್ ಜಾಯ್ತ್ಯೊ ಇಮಾಜ್ಯೊ ಉಗ್ತ್ಯೊ ಕೆಲ್ಯಾತ್.

ಮ್ಹಜ್ಯಾ ಚಿಂತ್ಪಾ ಪ್ರಕಾರ್ ಹಾಂಗಾಸರ್ ’ಪಯ್ಣಾರಿ’ ಮ್ಹಣ್ಜೆ ಮನ್ಶಾ ಜಿವಿತ್ ಜಾಂವ್ಕ್ ಪುರೊ. ಒಕಾಲ್ ನಾತ್‌ಲ್ಲ್ಯಾ ವೆಳಾರ್ ತಾಚೆ ಥಂಯ್ ಸುರು ಜಾಂವ್ಚೊ ವಾಯ್ಟ್ ಸವಯೊ ಯಾ ಜಾಂವ್ಕ್ ಪುರೊ ತಾಣೆ ವಿಂಚೊ ಖಂಚೊಯ್ ಭೆಸ್ ಆನಿ ಅಖೇರ್ ಜಾಂವ್ಕ್ ಸಕ್ತಾ ಪಯ್ಣಾಚ್ಯಾ ನಿಬಾನ್ ತಾಕಾ ಗ್ರಾಸುಂಚಿ ಪಿಡಾ. ಆನಿ ಹ್ಯಾ ವೆಳಾರ್ ಪರ್ಗಾಂವಾಂತ್ಲೊ ಏಕ್ ಜಣ್ ತಾಕಾ ಮೆಳ್ತಾ ಮ್ಹಳ್ಯಾರ್ ಹಾಂಗಾಸರ್ ಹಾಂವೆ ಸಮ್ಜೊಂಚೆ ಪ್ರಕಾರ್ ಪರ್ಗಾಂವಾಂತ್ಲೊ ಏಕ್ ಜಣ್ ಮ್ಹಳ್ಯಾರ್ ತೊ ದೇವ್ ಜಾಂವ್ಕ್ ಪುರೊ.

ಹಾಂಗಾಸರ್ ಕವಿನ್ ದೆವಾಕ್ ಪರ್ಗಾಂವಾಂತ್ಲ್ಯಾ ಮನ್ಶ್ಯಾಕ್ ಸರಿ ಕೆಲಾಂ. ಕಿತ್ಯಾಕ್ ಮ್ಹಳ್ಯಾರ್ ಪರ್ಗಾಂವಾಂತ್ಲ್ಯಾ ಮನ್ಶಾಂಕ್ ಆನಿ ದೆವಾಕ್ ಆಮಿ ಆಸ್‌ಲ್ಲೆ ಕಡೆನ್ ಥಾವ್ನ್ ಪಳೆಂವ್ಕ್ ಸಕಾನಾಂವ್. ಹೊ ಮನಿಸ್ ತ್ಯಾ ದೆವಾಕಡೆಂ ವಚೊನ್ ಆಪ್ಲ್ಯಾ ಕುಡಿಂತ್ಲ್ಯಾ ಆತ್ಮ್ಯಾಕ್ ಸುಂದರ್ ಕರ್ತಾ ಮ್ಹಳ್ಯಾರ್ ಮಾಗ್ಣೆಂ ಕರ್ನ್ ಧ್ಯಾನ್ ಕರ್ನ್ ಆನಿ ಬರಿ ಕಾಮಾಂ ಕರ್‍ನ್ ಆಪ್ಲ್ಯಾಚ್ ಕುಡಿಂತ್ಲ್ಯಾ ಆತ್ಮ್ಯಾಕ್ ಸುಂದರ್ ಮ್ಹಣ್ ಸಾಂಗ್ತಾನಾ ಮರಣ್ ಆಪ್ಣಾಕ್ ವೆಂಗ್ತಾ ಆನಿ ಆಪ್ಲೊ ಸುಂದರ್ ಆತ್ಮೊ ಕುಡಿ ಥಾವ್ನ್ ಭಾಯ್ರ್ ವೆತಾ ಆನಿ ಖಾಲಿ ಕೂಡ್ ಮಾತ್ಯೆಕ್ ಸಾರೆಂ ಜಾತಾ ಕಿಡ್ಯಾಚೆಂ ಖಾಣ್ ಜಾತಾ ಮ್ಹಣ್ ಸಾಂಗುನ್ ಕವಿನ್ ಹಿ ಕವಿತಾ 1912 ಇಸ್ವೆಂತ್ ಕಾಬಾರ್ ಕೆಲ್ಯಾ ಮ್ಹಳ್ಯಾರ್ ಹಿ ಕವಿತಾ ಬರವ್ನ್ ಆಜಿಕ್ ಲಗ್‌ಭಗ್ 100 ವರ್ಸಾಂ ಜಾತಾತ್. ತರೀ ಕಿತೆಂಚ್ ಆಸಾಗೀ ಫರಕ್ ಆದ್ಲ್ಯಾ ಮನ್ಶಾಕ್ ಆನಿ ಆತಾಂಚ್ಯಾ ಮನ್ಶಾಕ್?

ಹ್ಯಾ ಕವಿತೆಚ್ಯಾ ಆವ್ದೆಂತ್ ಕಿತೆಂಯ್ ಬದ್ಲಾವಣ್ ಪಳೆಂವ್ಕ್ ಮೆಳ್ತಾ?

ಕಿತ್ಲೊಯ್ ಸೊಭಿತ್ ಆಸ್ಲೊಲೊ ಮನಿಸ್ ಯಾ ಕಿತ್ಲೊಯ್ ಆಧುನಿಕ್ ಜಾಲ್ಯಾರೀ ಮನಿಸ್ ಮರಣ್ ಥಾವ್ನ್ ಪೊಳಾಪಳ್ ಘೆಂವ್ಕ್ ಸಕಾನಾ ಮ್ಹಳ್ಳಿ ಪವಿತ್ರ್ ಪುಸ್ತಾಕಾಂತ್ಲ್ಯೊ ಸಂಗ್ತಿ ಯೆದೊಳ್‌ವರೆಗ್ ಖರಿ ಜಾಂವ್ಕ್ ಪಾವ್ಲ್ಯಾ. ಮಾತಿಯೆ ಥಾವ್ನ್ ಆಯಿಲ್ಲೊ ತುಂ ಮಾತ್ಯೆಕ್ ಪಾಟಿಂ ವೆತಲೊಯ್.

ಮನ್ಶಾಪಣಾಚಿಂ ಮೊಲಾಂ ಉಕ್ಲುನ್ ಧರ್ಚಿ ಕವಿತಾ [- ಕ್ಲಾರಾ ಫೆರ್ನಾಂಡಿಸ್] 

"ಮನಿಸ್, ಮಾತಿಯೆಚೆಂ ಘರ್ ತೆಂ: ಧನಿ ಆಸ್ತಾಂ, ಸೊಭಿತ್ ದಿಸ್ತಾ, ನಾಂ ತರ್ ಭೆಸ್ಟೆಂ ರಿತೆಂ."

ಕವಿ ಹಾಂಗಾಸರ್ ಮನ್ಶ್ಯಾಕ್ ಎಕ್ ಮಾತಿಯೆಚಿ ಇಮಾಜೆಕ್ ಸಾರ್ಕೆಂ ಕರ್ತಾ. ಮನಿಸ್ ಏಕ್ ಮಾತಿಯೆಚಿ ಪುತ್ಳಿ. ಜಶೆಂ ಮಾತ್ಯೆಚಾ ಪುತ್ಳೆಕ್ ಆಮಿಂ ಬರೊ ರಂಗ್ ದಿಲ್ಯಾರ್ ಕಶಿ ತಿ ಸೊಭ್ತಾ, ತಶೆಂಚ್ ಮನ್ಶ್ಯಾಚಾ ಜಿಣ್ಯೆಂತ್ ಧನ್-ದಿರ್ವೆಂ ನಾಂ ಜಾಲ್ಯಾರ್ ಮನಿಸ್ ಭೆಷ್ಟೊ.

’ಆಪ್ಲೆ ಇತ್ಲ್ಯಾಕ್ ವಾಡ್ಟಾ ವಿಚಿತ್ರ್ ಭಾಂದಾಪ್ ಒಕಾಲ್ ನಾತ್ಲ್ಯಾರ್ ಪಡ್ಟಾ’

ಪರ್ತ್ಯಾನ್ ಕವಿ ಮನ್ಶ್ಯಾಕ್ ಏಕ್ ಬಾಂದ್ಪಾಕ್ ಸರಿ ಕರ್ತಾ. ಮನಿಸ್ ಲ್ಹಾನ್ ಆಸ್‌ಲ್ಲೊ ವ್ಹಡ್ ಜಾತಾ. ಬಾಳ್ಶ್ಯಾ ಥಾವ್ನ್ ವ್ಹಡ್ ಜಾವ್ನ್ ಜಾಂಟೊ ಜಾತಾ ಪರ್ಯಾಂತ್ ಮನ್ಶ್ಯಾಕ್ ಚಡ್ ಗರ್ಜೆಚೆಂ ’ಒಕಾಲ್’ ಮ್ಹಳ್ಯಾರ್ ಆಮಿಂ ಸೆವ್ಚೆಂ ನೈಸರ್ಗಿಕ್ ವಾರೆಂ. ಖೈಂಚ್ಯಾ ದಿಸಾ ಆಮಿಂ ನೈಸರ್ಗಿಕ್ ವಾರೆಂ ಸೆಂವ್ಚೆ ಬಂದ್ ಕರ್ತಾಂವ್, ತ್ಯಾ ದಿಸಾ ಆಮಿಂ ಹ್ಯಾ ಸಂಸಾರಾಕ್ ಆಧೇವ್ಸ್ ಮಾಗ್ತಾಂವ್.

"ತ್ಯಾ ಭಿತರ್ ಏಕ್ ಪಯ್ಣಾರಿ ಆಪ್ಲೆಂ ಬಿಡಾರ್ ಕರ್ತಾ"

"ಪರ್ಗಾವಾಂತ್ಲೊ ಏಕ್ ಜಣ್ ಆತ್ಮೊ ಸುಂದರ್! ಜಾತಚ್ಚ್ ಆಪ್ಲೆಂ ಸ್ವಪಾಣ್ ಸಾಂಡ್ಟಾ ತೆಂ ಘರ್"

ಹಾಂಗಾಸರ್ ಕವಿ ಮನ್ಶ್ಯಾಕ್ ಏಕಾ ಪಯ್ಣಾರಿಕ್ ಸರಿ ಕರ್ತಾ. ಆಮಿಂ ಹ್ಯಾ ಸಂಸರಾಂತ್ ಪಯ್ಣಾರಿ ಜಾವ್ನಾಸಾಂವ್. ಮಿತ್-ಮೇರ್ ನಾತ್‌ಲ್ಲ್ಯೆ ಆಮ್ಚೆ ಆಶೆನ್ ಆಮಿಂ ದೀಸ್ ರಾತ್ ಮ್ಹಿನತ್ ಕರುನ್ ಪಯ್ಶೆ ಪುಂಜಾಯ್ತಾಂವ್. ಆಮ್ಚಿಂ ಸಗ್ಳಿಂ ಸ್ವಪ್ಣಾಂ ಕಾರ್ಯಾ ರುಪಾರ್ ಹಾಡ್ತಾಂವ್ ಅನಿಂ ಆಮ್ಚೆಂ ಜಿವಿತ್ ಹ್ಯಾ ಸಂಸರಾಂತ್ ಚಾರ್-ದಿಸಾಂಚೆಂ ಮ್ಹಣ್ ವಿಸ್ರಾತಾಂವ್. ಅಮಿಂ ಪಯ್ಣಾರಿ, ಆಮ್ಚೆಂ ಪಯ್ಣ್ ಸಂಪ್ತಾಚ್ಚ್, ಫಕತ್ತ್ ಅಮ್ಚೊ ಹೊ ಪರ್ಗಾಂವ್ ನೈಂ ಬಗಾರ್ ಸೊಭಿತ್ತ್ ಸುಂದರ್ ಆಮ್ಚಿ ಕೂಡ್‌ಯೀ ಸಾಂಡುನ್ ವೆತಾಂವ್.

"ಆಬ್ಳೆ ಮೂಟ್‌ಭರ್ ಕುಸಡ್, ಕಿಡ್ಯಾಂ ಪರ್ವಣ್"

ಹಾಂಗಾಸರ್ ಮ್ಹಕಾ ನಿಜಾಯ್ಕೀ ಹಾಸೊಂಕ್ ಯೆತಾ. ಆಮಿಂ ಹ್ಯಾ ಸಂಸಾರಿ ಜಿಯೆತಾನಾಂ, ಆಮಿಂ ಕಿತ್ಲಿಂ ಊಂಚ್ ರಿತಿನ್ ಜಿಯೆತಾಂವ್. ಆಮ್ಕಾಂ ಮಾನ್ ಜಾಯ್, ಮರ್ಯಾದ್ ಜಾಯ್, ಪಯ್ಶೆ ಜಾಯ್, ನೆಸೊಂಕ್ ಸೊಭಿತ್ ಮುಸ್ತಾಯ್ಕಿ, ವಸ್ತಿ ಕರುಂಕ್ ಸೊಭಿತ್ ಘರ್ ಜಾಯ್, ಆನಿಂ ಆಮ್ಚ್ಯಾ ಹ್ಯಾ ತಾತ್ಕಾಲಿಕ್ ಕೂಡಿಚೆರ್ ಬಂಗಾರ್ ಶೃಂಗಾರ್ ಜಾಯ್. ಪುಣ್ ಕಿತೆಂ ಫಾಯ್ದೊ. ಜಶೆಂ ಆಮ್ಚೊ ಉಸ್ವಾಸ್ ಬಂದ್ ಜಾತಾ, ಹಿ ಅಮ್ಚಿ ಜೀವ್ ನಾತ್ಲೆಲಿ ಕೂಡ್ ಕೊಣಾಯ್ಕ್‌ಚ್ ನಾಕಾ. ಕೊಣ್ ಕೊಣಾಯ್ಕಿ ಕಿತ್ಲೊಯ್ ಮೊಗಾಚೊ ಜಾಂವ್ದಿ, ಎಕ್ ಪಾವ್ಟಿಂ ಮೆಲ್ಯಾ ಉಪ್ರಾಂತ್, ತಾಚೆಂ ಮೊಡೆಂ ಅಪ್ಲ್ಯಾ ಮನ್ಶ್ಯಾಂಕ್ ಘಾನ್ ಆನಿಂ ಕಿಡ್ಯಾಂಚೆ ಖಾಣ್.

ಮನ್ಶಾಕ್ ಮನ್ಶಾಂಥಾವ್ನ್ಂಚ್ ಸೊಧುನ್ ದಿಂವ್ಚಿ ಕವಿತಾ [ರೀನಾ ಕ್ವಾಡ್ರಸ್, ಪಾಂಗ್ಳಾ] 

ಹ್ಯಾ ಕವಿತಾಂತ್ ಕವಿನ್ ಮನ್ಶ್ಯಾಚಾ ಜಿಣ್ಯೆ ವಿಶ್ಯಾಂತ್ ಬರಯ್ಲಾಂ. ದೆವಾನ್ ಮನ್ಶ್ಯಾಕ್ ಮಾತ್ಯೆ ಥಾವ್ನ್ ನಿರ್ಮಿತ್ ಕೆಲ್ಲೆಂ ಆನಿ ಅಪ್ಲೊಚ್ ಉಸ್ವಾಸ್ ದೀವ್ನ್ ತಾಕಾ ಜೀವ್ ದಿಲ್ಲೊ. ದೆಕುನ್ ಕವಿನ್ ಮನ್ಶ್ಯಾಕ್ ಮಾತ್ಯೆಚ್ಯಾ ಘರಾಕ್ ಸರಿ ಕೆಲಾಂ.

ತೊ ಮ್ಹಣ್ತಾಕೀ ಧನಿ ಅಸ್ತಾಂ ತೆಂ ಘರ್ ಸೊಭಿತ್ ದಿಸ್ತಾ, ನಾಂ ತರ್ ಬೆಶ್ಟೆಂ ರಿತೆಂ, ಮಣ್ಜೆಂ ಜೆದ್ನಾಂ ಮನಿಸ್ ಬರ್‍ಯೊ ಕರ್ನ್ಯೊ ಆದಾರ್ತಾ ತೆದ್ನಾಂ ದೇವ್‌ಚ್ಚ್ ತಾಚೆಥಂಯ್ ವಸ್ತಿ ಕರ್‍ತಾ. ತೊ ಕೆದಳಾಯಿ ಉಲ್ಲಾಸ್‌ಬರಿತ್ ಅಸ್ತಾ. ಜರ್ ತರ್ ಮನಿಸ್ ಅಪ್ಣಾಕ್ ರಚ್‌ಲ್ಲ್ಯಾ ದೆವಾಕ್‌ಚ್ಚ್ ವಿಸ್ರಾತಾ ತರ್ ತಾಚೆಂ ಜಿವಿತ್ ಬೆಶ್ಟೆಂ ರಿತೆಂ ಮಣ್. ತಾಣೆಂ ಜಿಯೆಂವ್ಚ್ಯಾಕ್ ಕಾಯ್ಂಚ್ ಅರ್ಥ್‌ಚ್ ನಾ.

ದೆವಾನ್ ಮನ್ಶ್ಯಾಕ್ ಅಪ್ಣಾಚ್ಯಾ ಸರಿ ಕರ್ನ್ ರಚ್ಲಾಂ. ತಾಕ ಸೊಭಾಯ್, ಜಾಣ್ವಾಯ್ ಆನಿ ಸರ್ವ್ ತಾಲೆಂತಾನಿಂ ಭರ್‍ಲಾಂ. ಪುಣ್ ಮನಿಸ್ ಅಪ್ಲಿ ಜಾವಾಯ್ ಆನಿ ತಾಲೆಂತಾಂ ಬರ್‍ಯಾ ಕಾಮಾಕ್ ಗಳ್ಸುಂಚಾ ಬದ್ಲಾಕ್ ತಾಚೊ ದುರುಪಯೋಗ್ ಕರ್‍ತಾ ಆನಿ ದೆವಾಕ್‌ಚ್ಚ್ ವಿಸ್ರತಾ. ತೆದ್ನಾಂ ತಾಚೆಂ ಜಿವಿತ್ ಒಕಾಲ್ ನಾತ್‌ಲ್ಲ್ಯಾ ಘರಾಬಾಶೆನ್ ಮಣ್ಯೆತ್.

ಅಮ್ಚೊಂ ರಚ್ನಾರ್, ಅಮ್ಚ್ಯಾಂ ಜಿವಾಚೊ ಧನಿ ಸರ್ವ್ ಪದ್ವೆದಾರ್ ದೇವ್, ನಾತ್‌ಲ್ಲೆಂ ಘರ್ ದೆಂವ್ಚಾರಾಚೆಂ ಬಿಡಾರ್ ಜಾತಾ. ದೆಂವ್ಚಾರ್ ತ್ಯಾ ಮನ್ಶ್ಯಾಕ್ ಜಾತಾತಿತ್ಲೆ ಪಾಡ್ ಕರ್ನ್ಯೊ ಆಧಾರಿಶೆಂ ಕರ್ತಾ, ತಾಚೆ ಥಂಯ್ ವೊಡ್ಣ್ಯೊ ಹಾಡ್ತಾ. ಆನಿ ತ್ಯಾ ಮನ್ಶ್ಯಾಕ್ ಪಾತ್ಕಾಂಚ್ಯಾ ಕುಸಡಾಯೆಂತ್ ಕುಸೊಂಕ್ ಸದಾಂಚ್ ಸೊಡ್ತಾ.

ಮನ್ಶಾಜಿಣ್ಯೆಚಿಂ ಮೊಲಾಂ ಉಕ್ಲುನ್ ಧರ್ಚಿ ಕವಿತಾ [ಪ್ರಿಯಾ ಸಿಕ್ವೇರಾ, ಫೆರಾರ್]

ಮನ್ಶಾ ಜಿವಿತ್ ತಾತ್ಕಾಲಿಕ್, ತೆಂ ಶಾಶ್ವಿತ್ ನ್ಹಯ್ ಮ್ಹಣ್ ಕವಿತಾಂತ್ಲೊ ಕವಿ "ಮನಿಸ್ ಮ್ಹಣ್ಜೆಂ ಕಿತೆಂ’ ಮ್ಹಳ್ಳ್ಯಾ ಕವಿತಾಂತ್ ಸಾಂಗ್ತಾ.

ಎಕಾ ಘರಾಂತ್ ಧನಿ ಮ್ಹಳ್ಯಾರ್ ಕಟ್ಮಾಚೊ ವ್ಹಡಿಲ್ ಆನಿಂ ತಾಚೆಂ ಸಾಂದೆ. ಇತ್ಲೆಂಚ್ ಆಸ್ಲ್ಯಾರ್ ಪಾವನಾ. ತಾಂಚಾ ಮಧೆಂ ಸಮಾಧಾನ್ ಮೋಗ್, ಸೊಡ್‌ದೊಡ್ ಆಸ್ಲ್ಯಾರ್ ಮಾತ್ರ್ ತೆಂ ಘರ್ ಸೊಬಿತ್ ದಿಸ್ತಾ. ನಾಂ ತೆಂ ಘರ್ ಬೆಸ್ಟೆಂ ರಿತೆಂ. ತಶೆಂಚ್ ಮನ್ಶಾಚೊ ಉಸ್ವಾಸ್ ಆಸ್ತಾ ಮ್ಹಣಾಸರ್ ಮಾತ್ರ್ ಮನಿಸ್ ಸೊಬಿತ್ ದಿಸ್ತಾ.

ಆಶೆಂ ಮನ್ಶಾ ಜಿವಿತ್ ಚಾರ್ ದಿಸಾಚೆಂ ಮ್ಹಣ್ ಕವಿ ಸಾಂಗ್ತಾಂ. ಮನಿಸ್ ವಾಡ್ತಾನಾ ತಾಚೆ ಸಾಂಗಾಂತಾ ತಾಚ್ಯೊ ಆಶಾ, ಆಕಾಂಕ್ಶಾಯ್ ಚಡೊನ್ಂಚ್ ವೆತಾತ್. ಆನಿ ತಾಚಿ ಆಶಾ ಜ್ಯಾರಿ ಕರ್ಚಾ ಖಾತಿರ್ ತೊ ಕಿತೆಂಯಿ ಕರುಂಕ್ ಪಾಟಿಂ ಸರಾನಾ. ಜಾಂವ್ಕ್ ಪುರೊ ಥೊಡೆಂ ಬರ್‍ಯಾ ವಾಟೆನ್ ಆನಿ ಥೊಡೆಂ ವಾಂಕ್ಡ್ಯಾ ವಾಟೆಧ್ವಾರಿಂ. ಪುಣ್ ದ್ಯೇಯ್ ಏಕ್‌ಚ್. ಪಯ್ಶೆ ಕರ್ಚೆ, ಸರ್ವ್ ಗ್ರೇಸ್ತ್‌ಕಾಯ್ ಆಪ್ಣಾಂವ್ಚಿ. ಆಪ್ಲ್ಯಾ ಆಹಂಕಾರಾನ್, ರಾಗಾನ್ ಆಪುಣ್ ಕಿತೆಂಯಿ ಕರುಂಕ್ ಸಕ್ತಲೊಂ ಮ್ಹಳ್ಳೆಂ ತಾಚೆ ಚಿಂತಾಪ್. ಆಪುಣ್ ಆಪ್ಣಾಚೆ ಮ್ಹಳ್ಳೊ ಸ್ವಾರ್ಥ್. ದುಬ್ಳ್ಯಾ ದಾಕ್ಟ್ಯಾಂಕ್ ಕುಮೊಕ್ ಕರ್ಚಿ, ಗರ್ಜೆವಂತಾಂಕ್ ಪಾಂವ್ಚೆ ಹೆಂ ಬರೆಂ ಮನ್ ತಾಕಾ ನಾ. ಆನಿಂ ಆಶೆಂ ತಾಚ್ಯಾ ಜಿವಿತಾಂತ್ಲೆ ದೀಸ್ ಮಜಾ ಮಾರ್ನ್ ತೊ ಸಾರ್ತಾ.

ಪುಣ್ ಕಿತ್ಲೊಯಿ ತೊ ಗ್ರೇಸ್ತ್ ಜಾಂವ್ದಿ ತಾಕಾ ಯೆಂವ್ಚೆಂ ಮರಣ್ ಆಡಾಂವ್ಕ್ ಸಾದ್ಯ್ ಆಸಾಗಿ. ಗ್ರೇಸ್ತ್ ಯಾ ದುಬ್ಳೊ ಜಾಂವ್ದಿ ತಾಕಾ ಏಕ್ ದೀಸ್ ಹೊ ಸಂಸಾರ್ ಸಾಂಡುನ್ ವಚೊಂಕ್ ಆಸಾಚ್. ಆನಿಂ ತಿ ಕೂಡ್ ಮಾತಿಯೆಕ್ ಪಾವಂವ್ಕ್ ಆಸಾಚ್. ಆನಿ ಥಂಯ್ಸರ್ ತಿ ಕೂಡ್ ಕುಸೊನ್ ಕಿಡ್ಯಾಂಕ್ ಖಾಣ್ ಜಾತಾ. ತ್ಯಾ ಕುಸಾಡಾಯೆಕ್ ಆನಿಂ ತ್ಯಾ ಕಿಡ್ಯಾಂಕ್ ಗ್ರೇಸ್ತ್ ದುಬ್ಳೊ, ಲ್ಹಾನ್ ವ್ಹಡ್ ಮ್ಹಳ್ಳೊ ತಫಾವತ್ ನಾ. ಮನ್ಶಾ ಜಿವಿತ್ ನಶ್ವರ್. ಹೆಂ ಸತ್ ಜಾಣಾ ಆಸೊನ್ ತಾಚಿ ಚಾರ್ ದಿಸಾಂಚಿ ಜಿಣಿ ಬರಿ ಕರ್ನ್ ಜಿಯೆಜಾಯ್ ಮ್ಹಳ್ಳಿ ಶಿಕವ್ಣ್ ಕವಿ ಹ್ಯಾ ಕವಿತಾಧ್ವಾರಿಂ ದಿತಾ.

ದುಸ್ರೊ ಭಾಗ್ - ಕವಿತಾ ಅಧ್ಯಯನ್ [ಕವಿತಾಚೊ ಪ್ರಕಾರ್]: ’ಒಡೆ’ ಕವಿತಾ 

ಒಡೆ ಕವಿತಾಂಕ್ ಎಕಾ ನಿರ್ದಿಶ್ಟ್ ಸಂಗ್ತೆಚೆರ್, ವಸ್ತುಚೆರ್ ವಾ ಸಂದರ್ಭಾಚೆರ್ ಬರಯಿಲ್ಲಿ ಕವಿತಾ ಜಾವ್ನಾಸಾ. ಹ್ಯೊ ಕವಿತಾ ಹೆರ್ ಪ್ರಕಾರಾಂಚಾ ಕವಿತಾಂಚಾಕೀ ಅಥ್ವ್ಯೊಚ್ ಆಸ್ತಾತ್.

ಆಧ್ಲ್ಯಾ ಕಾಳಾರ್ ರಾಯಾಂಚಾ ಆಸ್ತಾನಾಂತ್ ಜಿಯೆವ್ನ್ ಆಸ್‌ಲ್ಲೆ ಕವಿ ರಾಯಾವಿಶ್ಯಾಂತ್, ತಾಚಾ ಜಲ್ಮಾದಿಸಾವಿಶ್ಯಾಂತ್ ವಾ ತಾಚಾ ಹೆರ್ ಸಂದರ್ಭಾಕ್ ವಾಖಣ್ಣುನ್ ಲಿಖ್ತಾಲೆ ಮ್ಹಳ್ಳೆ ಉಲ್ಲೇಕ್‌ಯ್ ವಾಚುಂಕ್ ಮೆಳ್ತಾತ್. ಹಿಂ ಪಾರಂಪರಿಕ್ ಒಡೆ ಕವಿತಾ ಜಾವ್ನಾಸಾತ್ ಆನಿಂ ನವಿಂ ಒಡೆ ಕವಿತಾ ಚಡ್ತಾವ್ ಜಾವ್ನ್ ವೆವೆಗ್ಳ್ಯಾ ಸಂಗ್ತ್ಯಾಂಚೆರ್ ಲಿಖ್ಲೆಲಿಂ ವ್ಯಂಗ್ಯ್ ಜಾವ್ನಾಸ್ತಾತ್. ಹೆ ವೆವೆಗ್ಳೆ ವಿಶಯ್ ವೆಕ್ತಿ ಜಾವ್ಯೆತ್, ವಸ್ತು ಜಾವ್ಯೆತ್ ವಾ ಫಳಾಂ-ಫುಲಾಂ ಜಾವ್ಯೆತ್.

ಒಡೆ ಕವಿತಾಚಾ ಪ್ರಾಸಾವಿಶಿಂ, ಅಲಂಕಾರವಿಶಿಂ ಥರಾವಳ್ ಥರಾಂಚೊ ಅಭಿಪ್ರಾಯೊ ಆಸಾತ್ ತರ್‌ಯೀ ಏಕ್ ಕವಿತಾ ಜೆಂ ಎಕಾ ನಿರ್ದಿಶ್ಟ್ ಸಂಗ್ತೆವಿಶಿಂ ಉಲಯ್ತಾ ಪುಣ್ ತ್ಯಾ ಕವಿತಾಚಾ ತಕ್ಲೆನಾಂವಾಂತ್ ’ಒಡೆ’ ಮ್ಹಳ್ಳೊ ಸಬ್ಧ್ ಜರೂರ್ ಆಸ್ತಾ, ತೆಂ ಮಾತ್ರ್ ಒಡೆ ಕವಿತಾ ಜಾಂವ್ಕ್ ಪಾವ್ತಾ.

ದಾಖ್ಲೆ;

* ರುಕಾಕ್ ಏಕ್ ಒಡೆ 

** ಒಡೆ ತುಕಾ ಅಮೆರಿಕಾ 

*** ಸಂಚಾಲಕಾಂಕ್ ಒಡೆ

ಪಾಟಿಂ ಕವಿತಾಪಾಠ್ ಪಾನಾಕ್ 

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications