ಕವಿತಾकविताPoem
ಲುಧ್ಯಾನ್ವಿ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾದಾಯ್ಜ್ - 3
ಸಾಹಿರ್ ಲುಧ್ಯಾನ್ವಿ
ನೀಜ್ ನಾಂವ್ : ಆಬ್ದುಲ್ ಹಯೀ
ಜನನ್ : 8 ಮಾರ್ಚ್ 1921
ಮರಣ್ : 25 ಅಕ್ತೋಬರ್ 1980
ಶಿಕಾಪ್: ಖಾಲ್ಸಾ ಹೈಸ್ಕೂಲ್, ಲುಧಿಯಾನಾ, ಆನಿಂ ಸರ್ಕಾರಿ ಕೋಲೆಜ್ ಪಂಜಾಬ್.
ವಳೊಕ್:
ಪರ್ಗಟ್ ಜಾಲ್ಲೆ ಬೂಕ್ :
’ತಲ್ಕಿಯಾಂ’ (ಕೊಡು ಆಸ್ಚೆಂ) -1943,
’ಪರ್ಚಾಯಿಯಾಂ’ (ಸಾವ್ಳ್ಯೊ) -1953,
’ತನ್ಹಾಯಿಯಾಂ ಆವೊ ಕೊಯಿ ಕ್ವಾಬ್ ಬೂನೆ’ (ಯೇ ವಿರಾರಾರಾಯೆ ಥೊಡಿಂ ಸ್ವಪ್ಣಾಂ ರಚ್ಯಾಂ),
’ಗಾತಾ ಜಾಯೆ ಬಂಜಾರಾ’ (ಗಾವ್ನ್ ರಾವಾ ಸ್ವತಂತ್ರ್ಪಣಿಂ) (ಫ಼ಿಲ್ಮಾಂತ್ಲಿಂ ಪದಾಂ)
ಸಾಹಿತಿಕ್ ವಾವ್ :
ಫ಼ಾಮಾದ್ ಉರ್ದು ಪತ್ರಾಂ ’ಆದಾಬ್-ಇ-ಲತೀಫ಼್’, ’ಶಹ್ಕಾರ್’,’ಸವೇರಾ’ ಹಾಂಚೆಂ ಸಂಪಾದಕ್ಪಣ್ ಚಲಯ್ಲಾಂ.
’ಸಾಹಿರ್’ ಮ್ಹಳ್ಳ್ಯಾ ಸಬ್ಧಾಚೊ ಖರೊ ಅರ್ಥ್ ಜಾತಾ - ’ಜಾದೂಗಾರ್’. ತಾಚಿಂ ಬರ್ಯಾಂತ್ಲಿಂ ಬರಿಂ ಪದಾಂ ಮೊಗಾಚಿಂ. ಪುಣ್ ಅಪ್ಲ್ಯಾ ನೀಜ್ ಜಿಣ್ಯೆಂತ್ ತೊ ಜಾಯ್ತೆಪಾವ್ಟಿಂ ಮೊಗಾರ್ ಪಡ್ಲಾ ಆನಿ ಹರ್ಯೆಕ್ ಪಾವ್ಟಿಂ ಸಲ್ವಾಲಾ. ದೆಕುನ್ಂಚ್ ತಾಚಾ ಪದಾಂನಿ ನಿರಾಶೆಚಿಂ ಸಿಂತಿಮೆಂತಾಂ ಉಟೊನ್ ದಿಸ್ತಾತ್.
ಸಾಹಿರ್ ಲುಧ್ಯಾನ್ವಿಚಾ ಜಿಣ್ಯೆಚೊ ಸಂಕ್ಶಿಪ್ತ್ ವಿವರ್ :
1921: ಬುರ್ಗ್ಯಾಪಣ್ :
ಹಾಚೆಂ ಬುರ್ಗ್ಯಾಪಣ್ ಭೋವ್ ನಿಶ್ಟುರ್ ಜಾವ್ನಾಸ್ಲ್ಲೆಂ. ಎಕಾ ವಾಟೆರ್ ತೊ ಎಕ್ಲೊಚ್ ಪೂತ್ ತಾಚಾ ಬಾಪಾಯ್ಕ್, ತರ್ಯ್ ಲುಧಿಯಾನಾಂತ್ ಏಕ್ ಗ್ರೇಸ್ತ್ ಜಮೀನ್ದಾರ್ ಜಾವ್ನಾಸ್ಲ್ಲ್ಯಾ ಆಪ್ಲ್ಯಾ ಬಾಪಾಯ್ಕ್ ಸಭಾರ್ ಭಾಯ್ಲೊ ಆಸ್ಲ್ಲ್ಯೊ.
1934: ಆಪ್ಲ್ಯಾ ತೆರಾ ವರ್ಸಾಂಚೆ ಪ್ರಾಯೆರ್, ತಾಚಿ ಆವಯ್ ಆಪ್ಲ್ಯಾ ಪತಿಚಾ ಸವಯಾಂಚೆರ್ ಕಾಂಠಾಳೊನ್ ತಾಚಿ ಸಗ್ಳಿ ಆಸ್ತ್ ಬದಿಕ್ ಸೊಡುನ್ ಅಬ್ದುಲ್ ಹಯೀಕ್ ಆಪ್ಣಾಸವೆಂ ಘೆವ್ನ್ ವೆತಾ. ಬಾಪುಯ್ ಕಾನೂನಾಚೊ ಆಸ್ರೊ ಘೆವ್ನ್ ಭೆಸ್ಟಾವ್ಣಿಂ/ದಗ್ದವ್ಣಿ ದಿವಯ್ತಾ. ಇತ್ಲೆಂಚ್ ನ್ಹಯ್, ಆವಯ್ ಸವೆಂ ಚಡ್ ತೇಂಪ್ ಜೀವ್ ಉರೊಂಕ್ ಆಪ್ಲ್ಯಾ ಪುತಾಕ್ ದಿಂವ್ಚೊನಾ ಮ್ಹಳ್ಳಿ ಧಮ್ಕಿಯ್ ದಿತಾ.
ಪುಣ್ ಹಾಚಾ ಆವಯ್ಚೆ ಬರೆ ಗೂಣ್ ಜಾಣಾಸ್ಚಿಂ ಥೊಡಿಂ ಇಶ್ಟಾಂ ಅಬ್ದುಲ್ ಹಯೀಕ್ ಕಿತೆಂಚ್ ಬಾದಕ್ ಯೇನಾಸ್ಚೆಪರಿಂ ಪಳೆತಾತ್. ಎಕಾ ವಾಟೆರ್ ಭಿರಾಂತ್, ಅನ್ಯೇಕಾ ವಾಟೆರ್ ಅಸ್ಪಷ್ಟ್ ರಿತಿನ್ ದಿಸ್ಚೆಂ ಭವಿಶ್ಯ್ ತರ್ ಅನ್ಯೇಕಾ ವಾಟೆರ್ ಕಠೀಣ್ ದುಬ್ಳಿಕಾಯ್ ಹಾಚಾ ಆವಯ್ಚಾ ಆದರ್ಶಿ ನಿರ್ಧಾರಾಂಕ್ ಸವಾಲಾಂ ಘಾಲ್ತಾಲಿಂ. ಅಸಲ್ಯಾ ಮನೋಸ್ಥಿಂತ್ ಆಪ್ಲೆಂ ಬುರ್ಗ್ಯಾಪಣ್ ಪಾಶಾರ್ ಕೆಲ್ಲ್ಯಾ ಅಬ್ದುಲ್ ಹಯೀಚೆಂ ಶಿಕಾಪ್ ತಿತ್ಲೆಂ ಪರಿಪೂರ್ಣ್ ರಿತಿನ್ ಜಾಲೆಂನಾ.
1939: ತೊ ಕೊಲೆಜಿಕ್ ವೆತಾ ತರ್ಯ್ ಶಿಕ್ಪಾಭಾಯ್ಲ್ಯೊ ಚಟುವಟಿಕೊ, ಪ್ರತ್ಯೇಕ್ ಜಾವ್ನ್ ಕವಿತಾ ಹಾಕಾ ಅಥ್ವ್ಯಾಚ್ ಸ್ವಭಾವಾಚೊ ಜಾವ್ನ್ ರೂಪಿತ್ ಕರ್ತಾತ್. ತೊ ಅಪ್ಲ್ಯಾ ಎಕಾ ಅಭಿಮಾನಿ ಚೆಡ್ವಾಚಾ ಮೊಗಾರ್ ಪಡ್ತಾ. ತೆಂ ಚೆಡುಂ ಲುಧಿಯಾನಾಚಾ ಎಕ್ಲ್ಯಾ ಗ್ರೇಸ್ತ್ ಘರಾಣ್ಯಾಚೆಂ ಜಾಲ್ಲೆನಿಮ್ತಿಂ, ಆಪ್ಲೊ ಮೋಗ್ ಉಗ್ತ್ಯಾನ್ ಪಾಚಾರುಂಕ್ ತೊ ಮಾತ್ಸೊ ಕಾವ್ಜೆತಾ. ಆನಿಂ ಕೆನ್ನಾ ತೊ ಉಗ್ತ್ಯಾನ್ ಪಾಚಾರ್ತಾ ತೆನ್ನಾ ತ್ಯಾ ಚೆಡ್ವಾಚೊ ಬಾಪುಯ್ ಹಾಚೆರ್ ಖುಬಾಳ್ತಾ ಆನಿಂ ಕೊಲೆಜಿಂತ್ಲೊ ಹಾಕಾ ನಿಕ್ಳಾಯ್ತಾ.
1943: ಅಶೆಂ ಸುರ್ವಾತ್ ಜಾತಾ ಎಕಾ ಕವಿಚಿ, ಅಬ್ದುಲ್ ಹಾಯೀ ಆಸ್ಚೊ ಆತಾಂ ಉಗ್ತ್ಯಾನ್ ’ಸಾಹಿರ್ ಲುಧಿಯಾನ್ವಿ’ ಜಾತಾ. ಎಕಾ ವಾಟೆರ್ ಆಪ್ಲ್ಯಾ ಬಾಪಾಯ್ಚೆಂ ವಿಲಾಸಿ ಜಿಣಿ ಆನಿ ಆಪ್ಲ್ಯಾ ಆವಯ್ಚೆ ವಳ್ವಳೆ, ಗರೀಬ್ಪಣ್, ತರ್ ಅನ್ಯೇಕಾ ವಾಟೆರ್ ಆಪ್ಣಾಕ್ ಲಾಭನಾತ್ಲ್ಲೊ ಮೋಗ್ - ಅಶೆಂ ಸುರ್ವಾತ್ ಜಾತಾ ಕವಿತಾಂಚಾ ಆಪ್ಲ್ಯಾ ಪಯ್ಲ್ಯಾ ಮೆಟಾಚಿ (ತಲ್ಕಿಯಾಂ- ಮ್ಹಳ್ಯಾರ್ ಕೊಡು ಜಾವ್ನಾಸ್ಚೆಂ). ಇತ್ಲ್ಯಾರ್ ತೊ ಲುಧಿಯಾನ್ ಸೊಡ್ನ್ ಎಕಾ ಪ್ರಕಾಶಕಾಚಾ ಸೊಧ್ನೆರ್ ಲಾಹೋರಾಕ್ ವೆತಾ ಆನಿಂ ದೋನ್ ವರ್ಸಾಂನಿ ಆಪ್ಲೊ ಬೂಕ್ ಛಾಪ್ತಾ.
1945: ತಲ್ಕಿಯಾಂ ಬೂಕ್ ಫ಼ಾಯ್ಸ್ ಜಾತಾ ಆನಿಂ ಲೋಕ್ ಹಾಕಾ ವಳ್ಕೊಂಕ್ ಲಾಗ್ತಾತ್ ಆನಿಂ ಅದಾಬ್-ಇ-ಲತೀಫ಼್, ಫ್ರಿತ್ಲರಿ, ಶಾಹ್ಕಾರ್ ಆನಿಂ ಉಪ್ರಾಂತ್ ಸವೇರಾ ಮ್ಹಳ್ಳ್ಯಾ ಉರ್ದು ಪತ್ರಾಂಚೊ ಸಂಪಾದಕ್ ಜಾವ್ನ್ ವಾವ್ರ್ ಕರ್ತಾ.
1949: ಸವೇರಾ ಪತ್ರಾಂತ್ ತವಳ್ಚಾ ಪಾಕಿಸ್ತಾನಿ ಸರ್ಕಾರಾಚಾ ಥೊಡ್ಯಾ ಧೋರಣಾಂಕ್ ಕಠೀಣ್ ರಿತಿನ್ ಖಂಡನ್ ಕರ್ತಾ ಆನಿಂ ಸರ್ಕಾರ್ ಹಾಚೆವಿರೋಧ್ ವಾರಂತ್ ಹಾಡ್ತಚ್ ತೊ ಲಾಹೋರ್ ಸೊಡ್ನ್ ಡೆಲ್ಹಿಕ್ ಯೆತಾ. ಪುಣ್ ಥೊಡ್ಯಾಚ್ ವರ್ಸಾಂನಿ ಡೆಲ್ಹಿ ಸೊಡ್ನ್ ತೊ ಬೊಂಬೊಯ್ ಯೆತಾ, ಆನಿಂ ಆಪ್ಲ್ಯಾ 31 ವರ್ಸಾಂಚಾ ಸಾಹಿತ್ಯಾಂತ್ 200 ವಯ್ರ್ ಬರ್ಯಾಂತ್ಲಿಂ ಬರಿಂ ಕವಿತಾ, ಪದಾಂ, ಘಜಲಾಂ ಲಾಖಾಂನಿ ಲೊಕಾಂಕ್ ಪಾವಾಶೆಂ ಕರ್ತಾ. ಉತ್ರಾಂಚಿ ಗುಂಡಾಯ್: ಸಾಹಿರ್ ಲುಧ್ಯಾನ್ವಿಚಾ ಕವಿತಾಂತ್ಲ್ಯಾ ಉತ್ರಾಂಚಿ ಸೊಭಾಯ್ ಆನಿ ಗ್ರೇಸ್ತ್ಕಾಯ್ ಪಾರ್ಕಿಜೆ ತರ್ ಹಿಂ ಥೊಡಿಂ ಕವಿತಾ ವಾಚಿಜಾಯಿಚ್;
"ತುಜಾ ಸಕ್ತೆಂತ್ ಹಾಂವ್ ತುಕಾ ವಾಟ್ ಧಾಕಯ್ತಲೊಂ ತುಂ ಬಾವ್ಟೊ ಹಾಲಯ್ತಾನಾ, ಸಾಂಗಾತಿ ಹಾಂವ್ ಕಂಗಾಲ್ ಪುಣ್ ಮೊನೊ ಆಜ್ ಥಾವ್ನ್ ಮ್ಹಜೊ ಇರಾದೊ ತುಜಾ ಸಾಂಖ್ಳೆಂಕ್ ಕರ್ಗಂವ್ಚೊ ಆಜ್ ಥಾವ್ನ್ ಮ್ಹಜಿ ಕವಿತಾ ಉಜ್ಯಾಚೊ ಪಾವ್ಸ್ ವೊತ್ತಲೊ" ಕವಿ ರಾಗಾನ್, ನಿರಾಶೆನ್ ಭರ್ಲಾ.
"ಅಖ್ರೇಚಿ ಘಡಿ, ಅಖ್ರೇಚೊ ಅತ್ರೆಗ್, ತುಕಾ ಸೊಧುನ್ ಆಸಾ ಬುಡ್ಚೊ ಉಸ್ವಾಸ್, ಪಾಲ್ವೊಂಚಿ ನದರ್, ತುಕಾ ಸೊಧುನ್ ಆಸಾ ದೊಳ್ಯಾಂ ಸಮೊರ್ ಯೇ ಏಕ್ ಪಾವ್ಟಿಂ ಯೇ, ಹಾಂವ್ ನಾಸ್ ಜಾವ್ನಾಸಾಂ; ತುಜೆರ್ ಆಶೆವ್ನ್ ತುಕಾ ಆಪಯ್ತಾ ಮ್ಹಜೊ ಮೋಗ್" ’ನೀಲ್ ಕಮಲ್’ ಫ಼ಿಲ್ಮಾಕ್ ಬರಯಿಲ್ಲ್ಯಾ ಎಕಾ ಪದಾಂತ್ಲಿಂ ವಯ್ಲಿಂ ಥೊಡಿಂ ಉತ್ರಾಂ ಸಾಂಗ್ತಾತ್ ಹಿಂ ಫ಼ಕತ್ ಮೊಗಾನ್ ನಿರಾಸ್ ಜಾಲ್ಲ್ಯಾ ಎಕಾ ಪ್ರೇಮಿಚಿಂ ಉತ್ರಾಂ ಮ್ಹಣ್.
ಪುಣ್ ತಾಚಿ ನೀಜ್ ಜಿಣಿ ಸಮ್ಜಲ್ಲ್ಯಾಂಕ್ ಕಳ್ತಾ ಹಿಂ ಉತ್ರಾಂ ನ್ಹಯ್, ತಾಚಾಚ್ ಜಿಣ್ಯೆಚಿಂ ಕಾಪಾಂ. ಜಶೆಂ ತೊ ಜಿಣ್ಯೆಂತ್ ಮೊಗಾಕ್ ಕಿತ್ಲೊ ಆಂವ್ಡೆತಾಲೊಕೀ ತೊಚ್ ಆವಡ್ ತೊ ಅಪ್ಲ್ಯಾ ಕವಿತಾ ಪದಾಂನಿ ವಾಳಯ್ತಾಲೊ. ಹ್ಯಾ ಫ಼ಿಲ್ಮಾಂತ್ ಆಸ್ಚಾ ದೋನ್ ಪದಾಂ ಪಯ್ಕಿ ’ತುಜ್ಕೋ ಪುಕಾರೆ ಮೇರಾ ಪ್ಯಾರ್’ ಏಕ್ ಪದ್ ಜಾವ್ನಾಸಾ - ಮಹಮ್ಮದ್ ರಫ಼ಿನ್ ಗಾಯ್ಲೆಲೆಂ.
ಸಾಹಿತ್ಯ್/ವೆಕ್ತಿತ್ವ್/ಚಿಂತಾಪ್ ತಾಚಿ ಶೈಲಿ ಸಾದಿ, ಶೀದಾ ಆನಿಂ ಕಸಲಿಚ್ ಮುಲಾಜ್ ನಾಸ್ತಾಂ ಸಾಂಗ್ಚೆಂ. ತೊ ಉತ್ರಾಂಚೊ ಚುರೊ ಕರಿನಾತ್ಲ್ಲೊ. ತೊ ಅಪ್ಲ್ಯಾ ಚಿಂತ್ನಾಂಕ್ ಕಸಲ್ಯಾಚ್ ಸಿಂತಿಮೆಂತಾಂನಿ ಭರ್ಶಿನಾಸ್ತಾಂ ಶೀದಾ ವೆಕ್ತ್ ಕರ್ತಾಲೊ. ಥೊಡೆಪಾವ್ಟಿಂ ತೊ ರಾಗಾನ್ ಪೆಟ್ಟಾಲೊ ತೊ ಜಾವ್ಯೆತ್ ಸಮಾಜೆಚೆರ್ ಯಾ ದೆವಾಚೆರ್. ತೊ ದೆವಾಕ್ಚ್ ಅಪ್ಲ್ಯಾ ಎಕಾ ಕವಿತೆಂತ್ ಅಶೆಂ ಸವಾಲ್ ಕರ್ತಾ;
"ಅರೇ ವೋ ಮೊಳ್ಬಾವಾಲ್ಯಾ! ಹಾಂತುಂ ಕಿತೆಂ ವಾಯ್ಟ್ ಆಸಾ ಸುಖಾಚೊ ಚಾರ್ ಚಿಮ್ಟ್ಯೊ ತರ್ಯ್ ಹೆವ್ಶಿನ್ ಪಾಶಾರ್ ಕರಯ್"
ಕವಿ ಜಾವ್ನ್ ತಾಣೆಂ ಜಾಯ್ತೊ ವಾವ್ರ್ ಕೆಲಾ. Progressive Writer's Movement (PWM) ಹಾಚೊ ಸಾಂದೊ ಜಾವ್ನಾಸ್ಲ್ಲೊ. ತಾಚೊ ಕವಿತಾ ಚಡ್ತಾವ್ ಜಾವ್ನ್ ರಾಜಕೀಯ್ ಯಾ ಆರ್ಥಿಕ್ ತತ್ವ್ಶಾಸ್ತ್ರಾ ತೆವ್ಶಿನ್ ಆಸ್ತಾಲೊ. ತೊ ಫ಼ಕತ್ ಮೊಗಾಚಿಂ ಕವಿತಾ ಮಾತ್ರ್ ನ್ಹಯ್ ಹೆರ್ ಪ್ರಕಾರಾಚ್ಯೊಯ್ ಕವಿತಾ ತಾಣೆಂ ಬರಯ್ಲ್ಯಾತ್. ನಿರಾಶೆಚೊ, ದುಃಖಾಳ್, ಮೊಗಾಚೊ, ರಾಜಕೀಯ್ ಚಿಂತ್ಪಾಚೊ, ಸಮಾಜೆಕ್ ಹಿಣ್ಸುನ್, ಖೆಂಡುನ್ ಬೆಂಡುನ್, ಮನ್ಶಾಪಣಾಚೊ, ಸ್ತ್ರೀವಾದಿ ಸಯ್ತ್.
ಸಾಹಿರ್ ಲುಧ್ಯಾನ್ವಿ ಜಿತ್ಲೊ ಪ್ರತಿಭಾವಂತ್ಗೀ ತಿತ್ಲೊಚ್ ರಾಗಿಶ್ಟ್ ಆನಿ ಜಿದ್ದಿ. ಹಾಕಾ ಅಪ್ಲ್ಯಾ ಜಿಣ್ಯೆಂತ್ ತಾಣೆಂ ಜೊಡ್ಲ್ಲೊ ಅನ್ಭೋಗ್ ಕಾರಾಣ್ಯ್ ಜಾವ್ಯೆತ್. ಜಿಣ್ಯೆಂತ್ ಮೊಗಾಖಾತಿರ್ ಜೀವ್ ಸೊಡ್ಲ್ಲೊ ಸಂಸಾರಾಂತ್ಲೊ ಖ್ಯಾತ್ ಪೇಂಯ್ಟರ್ ’ವಿನ್ಸೆಂಟ್ ವ್ಯಾನ್ಗೋ’ ಪರಿಂಚ್ ಹಾಚೊ ಮೋಗ್ಯ್ ಸಮ್ಜೊಂಕ್ ಕೊಣ್ಂಚ್ ಸಕೊಂಕ್ ನಾತ್ಲ್ಲೆವರ್ವಿಂ ತಾಚಾ ಕವಿತಾಂನಿ ಯೆಂವ್ಚಿಂ ಹರ್ಯೆಕ್ ಉತ್ರಾಂ ಉಜ್ಯಾಚಾ ಕಿಠಾಳಾಪರಿಂ ಯೆತಾಲಿಂ.
1957 ಇಸ್ವೆಂತ್ ಗುರುದತ್ತಾಚಾ ’ಪ್ಯಾಸಾ (ತಾನೆಲ್ಲೊ)’ ಮ್ಹಳ್ಳ್ಯಾ ಫ಼ಿಲ್ಮಾಚಿ ಕಾಣಿ ಚಡುಣೆಂ ಸಾಹಿರ್ ಲುಧ್ಯಾನ್ವಿಚಾ ಜಿಣ್ಯೆಕ್ ತಾಳ್ ಪಡ್ತಾಲಿ ಮ್ಹಣ್ಯೆತ್. ದೆಕುನ್ ಜಾಯ್ಜಯ್ ಹಾಂತ್ಲ್ಯಾ ಪದಾಂಕ್ ಸಾಹಿರಾನ್ ಅಸಲಿಂ ಉತ್ರಾಂ ದಿಲಿಂ ಮ್ಹಳ್ಯಾರ್ ಆಜ್ ಪರ್ಯಾಂತ್ ತಸಲಿಂ ಉತ್ರಾಂ ದಿಂವ್ಚಾಂತ್ ಕೊಣ್ಂಚ್ ಸಕೊಂಕ್ನಾ ಮ್ಹಣ್ತಾತ್ ಹೆರ್ ಪದಾಂ ಘಡ್ಪಿ. ಪುಣ್ ಹ್ಯಾ ಫ಼ಿಲ್ಮಾ ಉಪ್ರಾಂತ್ ತಾಣೆಂ ಕೆದಿಂಕ್ಚ್ ಎಸ್.ಡಿ.ಬರ್ಮನಾ ಖಾತಿರ್ ಪದಾಂ ಬರಂವ್ಕ್ನಾಂತ್.
ಹಾಂತ್ಲೆಂ ಏಕ್ ಪದ್ ಹೇಮಂತ್ ಕುಮಾರಾನ್ ಗಾಯ್ಲೆಲೆಂ ಅಶೆಂ ಆಸಾ;
"ಪಳೆಯಾ ತೊ ಕಸಲೊ ಲೋಗ್, ಜಾಂಕಾಂ ಮೊಗಾಕ್ ಮೋಗ್ ಮೆಳ್ಳಾ ಅಪ್ಣಾನ್ ಜೆನ್ನಾ ಬೊಂಗೊ ಆಶೆಲ್ಲೆವೆಳಾರ್ ಕಾಂಟ್ಯಾಂಚೊ ಹಾರ್ ಮೆಳ್ಳಾ"
ಮುಖಾರುನ್ ತೊ ಅಶೆಂ ಲಿಖ್ತಾ; "ಸಾಂಡುನ್ ಗೆಲೆ ಹರ್ಯೆಕ್ ಸಾಂಗಾತಿ, ಏಕ್ ದೋನ್ ಘಡ್ಯೆಚೊ ಸಾಂಗಾತ್ ದಿವುನ್ ಕೊಣಾಕ್ ಪುರ್ಸತ್ ಆಸಾ ಎಕಾ ಪಿಶ್ಯಾಚೊ ಹಾತ್ ಧರುಂಕ್? ಅಪ್ಣಾಕ್ ಅಪ್ಣಾಚಿ ಸಾವ್ಳಿ ಸಯ್ತ್ ಸದಾಂಯ್ ಬೆಜಾರಾಯೆಚಿಚ್ ಮೆಳ್ಳಾ" ಮುಖಾರುನ್ ಲಿಖ್ತಾ; "ಹಾಕಾಚ್ ಜಿಯೆಂವ್ಚೆಂ ಮ್ಹಣ್ತಾತ್ ತರ್ ಅಶೆಂಚ್ ಜಿಯೆವ್ಯಾಂ ಉಫ಼್ ಮ್ಹಣ್ಚೆಂನಾಂವ್, ಓಂಟ್ ಶಿಂವ್ತೆಲ್ಯಾಂವ್, ದುಃಖಾಂ ಪಿಯೆತೆಲ್ಯಾಂವ್. ದುಃಖಾಕ್ ಆತಾಂ ಕಿತ್ಯಾಕ್ ಭಿಯೆಂವ್ಚೆಂ, ದೂಃಖ್ ಶೆಂಬೊರ್ ಪಾವ್ಟಿಂ ಮೆಳ್ಳಾಂ"
1963 ಇಸ್ವೆಂತ್ ’ಗುಮ್ರಾಹ್’ ಫ಼ಿಲ್ಮಾಕ್ ಬರಯಿಲ್ಲೆಂ ಪದ್ ಆಯ್ಕಲ್ಲ್ಯಾ ಕೊಣೆಂಚ್ ವಿಸ್ರಂವ್ಚೆಪರಿಂ ನಾ;
ಸಾಹಿರ್ ಲುಧ್ಯಾನ್ವಿನ್ ಜಾಯ್ತಿಂ ಮೊಗಾಚಿಂ ಕವಿತಾ ಲಿಖ್ಲ್ಯಾಂತ್ ತರ್ಯ್ ಸಂಸಾರಾಂತ್ ’ಮೋಗ್’ ಆಸ್ಚಾ ರಿತಿಚೆರ್ ತಾಕಾ ಕಠೀಣ್ ತಾತ್ಸಾರ್, ಬೆಜಾರಾಯ್, ರಾಗ್, ಜಿಗುಪ್ಸಾ ಆನಿ ಅಸಮಧಾನ್ ಆಸ್ಲ್ಲೆಂ.
1976 ಇಸ್ವೆಂತ್, ಛೋಪ್ರಾಚಾ ’ಕಭಿ ಕಭಿ’ ಫ಼ಿಲ್ಮಾಂತ್ಲಿಂ ಉತ್ರಾಂ ಆಯ್ಕತಾನಾ ಕೋಣ್ ಸಾಂಗತ್ ಹಾಚಾಕೀ ಉತ್ತಿಮ್ ಮೊಗಾಚಿಂ ಕವಿತಾ ಆಸ್ಯೆತ್ ಮ್ಹಣ್?
ವೆಕ್ತಿತ್ವ್ :
’ಮೋಗ್’ ಹಾಚಿ ವೋಡ್ ಯಾ ಪಿಸಾಯ್ ಜಾವ್ನಾಸ್ಲ್ಲಿ. ಕಾಳ್ಜಾಂತ್ ತೊ ಭೋವ್ ರಸಿಕ್ ವೆಕ್ತಿತ್ವಾಚೊ ತರ್ಯ್ ತಾಚೆಂ ವೆಕ್ತಿತ್ವಾಚೊ ಸಾಹಿರ್ ಲುಧಿಯಾನ್ವಿ ಆಪ್ಲ್ಯಾ ಕವಿತಾಂನಿ ಉತ್ರಾಂಚೊ ಚುರೊ ಕರಿನಾತ್ಲ್ಲೊ. ತಶೆಂಚ್ ಭಾವನಾಂಕ್ ಎಕಾ ಹಂತಾ ಥಾವ್ನ್ ಅನ್ಯೇಕ್ಕಡೆ ಘುಂವ್ಡಾಯ್ನಾತ್ಲ್ಲೊ. ಆಪ್ಲಿಂ ಚಿಂತ್ನಾಂ ಶೀದಾ ಆನಿಂ ಸಂಪ್ಯಾ ಉತ್ರಾಂನಿ ವೆಕ್ತ್ ಕರ್ತಾಲೊ. ಹಾಚಾ ಚಡ್ತಾವ್ ಕವಿತಾಂ/ಪದಾಂನಿ ರಾಗ್ ಆನಿಂ ತಾತ್ಸಾರ್ ಉಟೊನ್ ದಿಸ್ತಾಲೊ.
ಹಾಚೆಂ ಚಿಂತಾಪ್ ಬಂಡಾಯ್ ತರ್ಯ್ ತೊ ಸ್ವಪ್ಣಾಂಗಾರ್ ಆನಿಂ ಆಪಾಪಿಂಚ್ ರುತಾಂ ಜಾತಾ ತಾಚಾ ವೆಕ್ತಿತ್ವಾಚಿ ಏಕ್ ಝಳಕ್; "ಮೋವ್ ಆನಿ ನಾಜೂಕ್ ತಾಳೊ, ಸಬ್ದಾಂಚೆಂ ಸೊಭೀತ್ ತರಾಶ್-ಕರಾಶ್ ಆನಿ ನಿದೆಂತ್ ಬುಡ್ಲ್ಲೆಂ ವಾತಾವರಣ್". ಹಾಚಿಂ ಕವಿತಾ/ಪದಾಂ ಇತ್ಲಿಂ ಆಪುರ್ಭಾಯೆಚಿಂ ಮ್ಹಳ್ಯಾರ್ ಹಿಂದಿ ಯಾ ಉರ್ದು ಕವಿತಾಚಾ ದರ್ಯಾಂತ್ ಹಾಚಿಂ ಕವಿತಾ ಖಂಡಿತ್ ಜಾವ್ನ್ ಏಕ್ ಫ಼ೊಲೆರ್ಚ್ ಮ್ಹಣ್ಯೆತ್.
ಕವಿತಾವಿಶ್ಯಾಂತ್ ತಾಚೆ ವಿಚಾರ್ :
ಕವಿತಾ ಭಿತರ್ಲ್ಯಾ ಉಜ್ಯಾಕ್/ಉಮಾಳ್ಯಾಂಕ್ ಭಾಯ್ರ್ ಕಾಡ್ಚೆಂ ಮಾಧ್ಯಮ್ ತರ್ಯ್, ಜೊ ಕವಿ ಅಪ್ಲ್ಯಾ ಭಿತರ್ ಆಸ್ಚೊ ಉಜೊ ಸೊಸುನ್ಯ್ ಹೆರಾಂಕ್ ಭರ್ವಸ್ಯಾಚೆಂ ಚಿಂತಾಪ್ ಹಾಡಂವ್ಚೊ ಆನಿಂ ಹೊ ಫ಼ಕತ್ ಏಕ್ ಕವಿ ಮಾತ್ರ್ ನ್ಹಯ್, ಏಕ್ ಕಲಾಕಾರ್ಯ್ ಜಾತಾ.
ಕವಿತಾದಾಯ್ಜ್ - 3 . ಸಾಹಿರ್ ಲುಧ್ಯಾನ್ವಿ
ಸಾಹಿರ್ ಲುಧಿಯಾನ್ವಿಚಾ ಸಭಾರ್ ಕವಿತಾಂ ಪಯ್ಕಿ ಮ್ಹಾಕಾ ಆಶಾವಾದಿ ಕುಪಾಂನಿ ಚಡಂವ್ಚೆಂ ಆನಿಂ ಭರ್ವಸ್ಯಾಚಾ ಸಾಗೊರಾಂತ್ ಉಪ್ಯೆಶೆಂ ಕರ್ಚೆಂ ಕವಿತಾ ಜಾವ್ನಾಸಾ "ವೋ ಸುಬಾ ಕಭಿ ತೊ ಆಯೆಗಿ" (’ಫ಼ಿರ್ ಸುಭಾ ಆಯೆಗಿ ಫಿಲ್ಮಾಂತ್ಲೆಂ’)
ತೊ ಸಕಾಳ್ ಕೆನ್ನಾ ತರ್ಯ್ ಯೆತಲೊ,
ತೊ ಸಕಾಳ್ ಕೆನ್ನಾ ತರ್ಯ್ ಯೆತಲೊ
ಹ್ಯಾ ಕಾಳ್ಕಿ ಘಡ್ಯೆಚಾ ಬಗ್ಲೆನ್,
ಜೆನ್ನಾ ರಾತಿಚೊ ಪಾಲಂವ್ ಹಾಲ್ತಲೊ
ಜೆನ್ನಾ ಮೊಳೊಬ್ ಉಡೊನ್ ನಾಚ್ತೆಲೆಂ,
ಜೆನ್ನಾ ಹಿ ಧರ್ತಿ ಪದಾಂ ಗಾಯ್ತೆಲಿ
ತೊ ಸಕಾಳ್ ಕೆನ್ನಾ ತರ್ಯ್ ಯೆತಲೊ...
ಹ್ಯಾ ಸಕಾಳಾಖಾತಿರ್ ಯುಗಾಂ ಯುಗಾಂ ಥಾವ್ನ್
ಆಮಿಂ ಮೊರೊನ್ ಮೊರೊನ್ ಜಿಯೆವ್ನಾಸಾಂವ್
ಹ್ಯಾ ಸಕಾಳಿಂಚಾ ಅಮೃತಾಕ್ ರಾಕೊನ್
ಆಮಿಂ ವಿಕಾಚೆ ಥೆಂಬೆ ಪಿಯೆವ್ನಾಸಾಂವ್
ಹ್ಯಾ ಭುಕೆಲ್ಲ್ಯಾ/ತಾನೆಲ್ಲ್ಯಾ ಘಡಿಯಾಂಕ್,
ಏಕ್ ದೀಸ್ ಮರಣ್ ದಾಡ್ತೆಲೊ
ತೊ ಸಕಾಳ್ ಕೆನ್ನಾ ತರ್ಯ್ ಯೆತಲೊ...
ಮಾನುನ್ ಘೆ ಆತಾಂ ತುಜಾ ಮ್ಹಜಾ ಅತ್ರೆಗಾಂಕ್
ಕಿತೆಂಚ್ ಮೋಲ್ ನಾ
ಮಾತ್ಯೆಕ್ ತರ್ಯ್ ಕಿತೆಂಯ್ ಮೋಲ್ ಆಸಾ ಪುಣ್
ಮನ್ಶಾಂಕ್ ಮಾತ್ರ್ ಮೋಲ್ ಕಿತೆಂಚ್ ನಾ
ಮನ್ಶಾಂಚಿ ಮರ್ಯಾದ್ ಕೆನ್ನಾ
ಮೋಲ್ ನಾತ್ಲ್ಲ್ಯಾ ಪಾವ್ಲ್ಯಾಂನಿ (ನಾಣ್ಯಾಂನಿ) ಮೆಜಿನಾಂತ್ಗೀ
ತೊ ಸಕಾಳ್ ಕೆನ್ನಾ ತರ್ಯ್ ಯೆತಲೊ
ಪೊಯ್ಶ್ಯಾಂ ಖಾತಿರ್ ಆತಾಂ
ಸ್ತ್ರೀಯಾಂಚೆಂ ನಿಸ್ಕಳ್ಪಣ್ ವಿಕೊನ್ ವೆಚೆಂನಾ
ಆಶಾಂಕ್ ದಾಂಭುನ್ ದರ್ಚಿಂನಾಂತ್,
ಮಾನ್-ಮರ್ಯಾದೆಕ್ ವಿಕುನ್ ಸೊಡ್ಚಿಂನಾಂತ್
ಆಪ್ಲ್ಯಾ ಕಾಳ್ಯಾ ಕರ್ತುಬಾಂಳಾತಿರ್
ಕೆನ್ನಾ ಹೊ ಸಂಸಾರ್ ಲಜೆತಲೊ
ತೊ ಸಕಾಳ್ ಕೆನ್ನಾ ತರ್ಯ್ ಯೆತಲೊ...."
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.