ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 27. ಲೊಟ್ರಿ
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಎಕಾ ಗಾಂವಾಂತ್ ಎಕ್ಲಿ ಬಾಯ್ಲ್ ಬರಿ ಜಿಣಿ ಜಿಯೆವ್ನ್ ಆಸ್ಲ್ಲಿ. ಆಪ್ಲ್ಯಾ ಕುಟ್ಮಾಕ್ ಬರ್ಯಾನ್ ಪೊಸುನ್, ಆಪ್ಲ್ಯಾ ಪೆಲ್ಯಾಂಚಾ ಗರ್ಜಾಂಕ್ ಪಾವೊನ್ ಕಶ್ಟಾಂತ್ ಆಸ್ಚಾ ಹರ್ಯೆಕ್ಲ್ಯಾಕ್ ಕುಮೊಕ್ ಕರುನ್ ಜಿಯೆವ್ನ್ ಆಸ್ಲ್ಲಿ ತರ್ಯ್ ತಿಚಾ ಜಿಣ್ಯೆಂತ್ ತಿಕಾ ಎಕಾ ಸಂಗ್ತಿಚೆಂ ಉಣೆಂಪಣ್ ದಿಸೊನ್ ಯೇಂವ್ಕ್ ಲಾಗ್ಲೆಂ - ಪಯ್ಶೆ.
ದೆಕುನ್ ದೆವಾಕ್ ತಿಣೆ ಉಲೊ ಮಾರ್ಲೊ "ದೆವಾ, ಹ್ಯಾ ಸಂಸಾರಾಂತ್ ಇತ್ಲಿ ದುಬ್ಳಿಕಾಯ್ ಅಜೂನ್ ಆಸಾ, ದೆಕುನ್ ಮ್ಹಾಕಾ ಏಕ್ ಪಾವ್ಟಿಂ ಏಕ್ ಲೊಟ್ರಿ ಉಟಾಶೆಂ ಕರ್ ಆನಿಂ ಹಾಂವ್ ಹೆರ್ ಕಿತೆಂಚ್ ಮಾಗಾನಾ. ತ್ಯಾ ಲೊಟ್ರೆಚಾ ಪೊಯ್ಶ್ಯಾಂತ್ ಹಾಂವ್ ದುಬ್ಳ್ಯಾಂಕ್ ತಾಂಚಾ ಶಿಕ್ಪಾಕ್, ವಸ್ತ್ರಾಂಕ್, ಘರಾಂಕ್ ತೆ ಪೊಯ್ಶೆ ಉಪ್ಯೋಗ್ ಕರ್ತಾಂ, ಆನಿಂ ಅಸಲಿಂ ಬರಿಂ ಕಾಮಾಂ ಕರುಂಕ್ ಖಂಡಿತ್ ಜಾವ್ನ್ ಪಯ್ಶ್ಯಾಂಚಿ ಗರ್ಜ್ ಆಸಾ"
ಅಶೆಂ ಸದಾಂ ತಿಣೆಂ ಮಾಗ್ಲೆಂ ತರ್ಯ್ ತಿ ಲೊಟ್ರಿ ಜಿಕ್ಲಿಚ್ ನಾ.
ಅಶೆಂ ಎಕಾ ದಿಸಾ ತಿ ಮೆಲಿ ಆನಿಂ ಸರ್ಗಾಕ್ ಪಾವ್ಲಿ. ಆನಿಂ ಧಯ್ರ್ ಕರುನ್ ದೆವಾಲಾಗಿಂ ಸವಾಲ್ ಕರಿಲಾಗ್ಲಿ; "ದೆವಾ ಹಾಂವ್ ಕೆದಿಂಕ್ಚ್ ಮ್ಹಜೆಖಾತಿರ್ ಪಯ್ಶೆ ಆಶೆಲ್ಲಿಂ ನ್ಹಯ್. ಮ್ಹಜೆಲಾಗಿಂ ಅನಿಕ್ಯೀ ಇಲ್ಲೆ ಪಯ್ಶೆ ಆಸ್ಲ್ಲೆ ತರ್ ಹಾಂವ್ ಅನಿಕ್ಯ್ ಬರಿಂ ಕಾಮಾಂ ಕರುಂಕ್ ಸಕ್ತಿಂ ಆನಿಂ ಅನಿಕ್ಯ್ ಥೊಡ್ಯಾಂ ಗರ್ಜೆವಂತಾಂಕ್ ಕುಮೊಕ್ ಕರುಂಕ್ ಸಕ್ತಿಂ ನ್ಹಯ್ಗೀ? ದೆಕುನ್ ತುವೆಂ ಮ್ಹಾಕಾ ಕಿತ್ಯಾಕ್ ಏಕ್ ಲೊಟ್ರಿ ಜಿಕಾಶೆಂ ಕೆಲೆಂನಾಂಯ್?"
ದೆವಾನ್ ತಿಕಾ ಜಾಪ್ ದಿಲೆಂ; "ಪುಣ್ ತುಂವೆಂ ಪಯ್ಲೆಂ ಏಕ್ ಲೊಟ್ರಿ ಘೆಜಯ್ ಆಸ್ಲ್ಲಿ"
ಸಂದೇಶ್: ಆಮ್ಚಾ ಜಿಣ್ಯೆಂತ್ಯ್ ಸಭಾರ್ ಪಾವ್ಟಿಂ ಆಮಿಂ ಮೂಳ್ ಉದ್ದೇಶ್ ವಿಸ್ರತಾಂವ್ ಆನಿಂ ಎಕಾಂಎಕಾಕ್ ಕುಮೊಕ್ ವಿಚಾರ್ನ್ ಹಾಕ್ ಬೋಬ್ ಮಾರ್ತಾಂವ್. ಪುಣ್ ಮೂಳ್ ಉದ್ದೇಶ್ ಸಾರ್ಕೊ ಆಸೊನ್ ಉಪ್ರಾಂತ್ ಜರ್ ಎಕಾಂಎಕಾಲಾಗಿಂ ಕುಮೊಕ್ ಮಾಗ್ಲಿ ತರ್ ಬರೆಂ ನ್ಹಯ್ಗೀ?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
