ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 16.
ನಾಂವ್: ಲಾರೆನ್ಸ್ ಪಿಂಟೊ.
ಜಲ್ಮಾಲ್ಲೊ ಗಾಂವ್: ಆಗ್ರಾರ್ (ಬಂಟ್ವಾಳ್).
ಜಲ್ಮಾಲ್ಲಿ ತಾರಿಕ್: 15 ನವೆಂಬರ್ 1948.
ಆವಯ್ ಬಾಪಾಯ್ಚೆಂ ನಾಂವ್: ದೆ|ಮೊಂತಿ ಪಿಂಟೊ ಆನಿ ದೆ|ಮಾರ್ಸೆಲ್ ಪಿಂಟೊ.
ಶಿಕಾಪ್: ಸಾತ್ವಿ ಪರ್ಯಾಂತ್ ಬಂಟ್ವಾಳಾಂತ್, ಉಪ್ರಾಂತ್ ಕೊಲೆಜೆಚೆಂ ಶಿಕಾಪ್ ಬೊಂಬೊಯಾಂತ್.
ಪತಿಣೆಚೆ ನಾಂವ್: ವರ್ಜೀನಿಯಾ ಪಿಂಟೊ.
ಭುರ್ಗಿಂ: ಕ್ರಿಸ್ಟೋಫರ್ ಆನಿ ಕ್ಲಿಫರ್ಡ್ ಪಿಂಟೊ.
[ಲೋರಿಯಾಬಾಸವೆಂ ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ಕುವೆಯ್ಟಾಂತ್ ಗರ್ಜೆವಂತಾಂಕ್ ಆಧಾರ್ ಜಾಂವ್ಚಾಂತ್ ದೋಗ್ ಲೊರಿಯಾಬ್ ಭೋವ್ ಫಾಮಾದ್ ತಶೆಂಚ್ ಲೊಕಾಮೊಗಾಳ್. ಎಕ್ಲೊ ಶಿರ್ವಾಂಚೊ ಲಾರೆನ್ಸ್ ಡಿ’ಸೋಜ್ ತರ್ ಅನ್ಯೇಕ್ಲೊ ಆಗ್ರಾರ್ಚೊ ಲಾರೆನ್ಸ್ ಪಿಂಟೊ. ಸಾಮಾಜಿಕ್ ವಾವ್ರ್, ಕೊಂಕ್ಣಿ ವಾವ್ರಾಕ್ ಪಾಟಿಂಬೊ ದಿಂವ್ಚಾಂತ್ ಕೆದಿಂಚ್ ಹಾಣಿಂ ಪಾಟಿಂ ಸರ್ಲ್ಲೆಂ ನಾ. ಪರ್ಗಾಂವಾಂತ್ ಆಸ್ಚಾ ಕಿತ್ಲೆಶ್ಯಾ ಗರ್ಜೆವಂತಾಂಕ್ ಹಾಣಿಂ ಆಧಾರ್ ದಿಲಾ ಆನಿ ದಿತೆಚ್ಚ್ ಆಸಾತ್. ಪ್ರತ್ಯೇಕ್ ಜಾವ್ನ್ ಕಾಮ್ ನಾಸ್ತಾಂ ಆಸ್ಚಾಂಕ್ ಹಾಣಿಂ ಕಾಮ್ ಮೆಳಾಶೆಂ ಕೆಲಾಂ. ಖರೆಂಚ್ ಜಾವ್ನ್ ದೆವಾನ್ ದಿಲ್ಲೆಂ ದೆಣೆಂ ಹೆಂ ಜಾವ್ನಾಸಾ.
ಲೊರಿಯಾಬ್ ಮಂಗ್ಳುರ್ಗಾರಾಂಚ್ಯಾ ಮಧೆಂ ಚಡ್ ಫಾಮಾದ್ ಆಸ್ಚ್ಯಾಕೀ, ಗೊಂಯ್ಕಾರಾಂ ಮಧೆಂ ಚಡ್ ಫಾಮಾದ್. ಕುವೆಯ್ಟಾಂತ್ ಆಸ್ಚಾ ಮಂಗ್ಲುರ್ಗಾರ್ ತಶೆಂಚ್ ಗೊಂಯ್ಕಾರಾಂ ಮಧ್ಲೊ ಗಾಂಚ್ ಹೊ ಮ್ಹಣ್ಯೆತಾ. ಕೆದಿಂಚ್ ನಾಂವಾ ಪಾಟ್ಲ್ಯಾನ್ ಧಾಂವ್ಚೊ ವಾ ಧಾಂವ್ಚಾಂತ್ಲೊ ಹೊ ನ್ಹಂಯ್. ಕೊಂಕ್ಣೆಚೊ ಹುಸ್ಕೊ ಹಾಕಾ ಆಸಾ ದೆಕುನ್ ಕೊಂಕ್ಣಿ ಕಾರ್ಯಿಂ ಖಂಯ್ಚರ್ ಆಸ್ತಿತ್ ತರ್ಯೀ, ತೊ ಅಪ್ಲ್ಯಾ ಕಿತ್ಲ್ಯಾ ರಾಟಾವಳಿಂಕ್ ಸಯ್ತ್ ದೆಗೆನ್ ದವರುನ್ ಮೆತೆರ್ ಜಾತಾ.
ಸಂವಾದ್ ಚಲವ್ಪಿ: ಮೆಲ್ವಿನ್ ಜೆ. ವಾಸ್.
1. ಲೊರಿಯಾಬ್ ತುಮಿಂ ಆಗ್ರಾರಾಂತ್ ಜಲ್ಮೊನ್ ವ್ಹಡ್ ಜಾಲ್ಲ್ಯಾತ್ ತರ್ಯೀ, ಬೊಂಬೊಯಾಂತ್ ಶಿಕೊನ್ ಕಾಮ್ ಕರ್ನ್, ಪರ್ಗಾಂವಾಕ್ ಪಾವ್ಲ್ಲೆ ತರ್ಯೀ, ಕೊಂಕ್ಣಿ ವಾವ್ರ್ ಕರ್ಚಾ ಸರ್ವಾಂಕ್ ಪಾಟಿಂಬೊ ದೀವ್ನ್ ಆಸಾತ್. ತುಮ್ಚಾ ಕೊಂಕ್ಣಿ ಮೊಗಾವಿಶಿಂ ಆಮ್ಕಾಂ ಥೊಡೆಂ ಸಾಂಗ್ಯೆತ್ಗಿ?
ಜಾ: ಖರೆಂ! ಹಾಂವ್ ಆಗ್ರಾರ್ ಫಿರ್ಗಜೆಂತ್ ಜಲ್ಮಾಲ್ಲೊಂ ತರ್ಯೀ, ಬೊಂಬೊಯಾಂತ್ ಮ್ಹಜೆಂ ಶಿಕಾಪ್ ತಶೆಂಚ್ ಕಾಮ್ ಕರ್ನ್ ಆಸ್ಲೊಂ. ಬೊಂಬೊಯಾಂತ್ ದಿಸಾಕ್ ಹಾಂವ್ ಲಾರ್ಸನ್ ಆಂಡ್ ಟರ್ಬೊ (L & T) ಕಂಪೆನಿಂತ್ ಕಾಮ್ ಕರ್ನ್ ರಾತಿಚೆಂ ಶಿಕ್ತಾಲೊಂ. ಪುಣ್ ಆಮ್ಚಾ ಘರಾಂತ್ ಕೊಂಕ್ಣಿ ಉಲವ್ಣೆಂ ಆಸ್ಲ್ಲೆಂ. ಹಾಂವ್ ಕೊಂಕ್ಣಿ ವಿಸ್ರೊಂಕ್ ನಾತ್ಲ್ಲೊಂ.
ಮ್ಹಜೆಂ ಶಿಕಾಪ್ ಸಂಪೊನ್ ಹಾಂವ್ ಕುವೆಯ್ಟಾಕ್ ಪಾವ್ಲೊಂ ಆನಿ ತಿಸ್ರೆ ದಿಸಾಚ್ಚ್ ಮ್ಹಾಕಾ ಕಾಮ್ ಮೆಳ್ಳೆಂ. ತರ್ಯೀ ಮ್ಹಾಕಾ ಕೊಂಕ್ಣಿ ಸಂಸ್ಥ್ಯಾಂತ್ ಮೆತೆರ್ ಜಾಂವ್ಕ್ ಆವ್ಕಾಸ್ ನಾತ್ಲ್ಲೊ. ಅಶೆಂ ಫುಡ್ಲ್ಯಾ ದಿಸಾಂನಿ ಜೆದ್ನಾಂ ಹಾಂವ್ ಕೆ.ಸಿ.ಡಬ್ಲ್ಯೂ.ಎ ಂತ್ ಮೆತೆರ್ ಜಾಲೊಂ, ತೆದ್ನಾಂ ಮ್ಹಾಕಾ ಕೊಂಕ್ಣಿ ಉಲಂವ್ಕ್ ಪರತ್ ಆವ್ಕಾಸ್ ಮೆಳ್ಳೊ ತಶೆಂಚ್, ಕೊಂಕ್ಣಿ ವಾವ್ರ್ ಕರ್ಚ್ಯಾ ಸಂಸ್ಥ್ಯಾಂನಿ ಮೆತೆರ್ ಜಾಂವ್ಚೊ ಆವ್ಕಾಸ್ ಲಾಭ್ಲೊ. ಅಶೆಂ ಹಾಂವ್ ಪರತ್ ಕೊಂಕ್ಣಿ ಭಾಸೆಕ್ ಲಾಗಿಂ ಆಯ್ಲೊಂ.
2. ಕುವೆಯ್ಟಾಂತ್ ಸಭಾರ್ ವರ್ಸಾಂ ಥಾವ್ನ್ ವೆವೆಗ್ಳ್ಯಾ ರಿತಿರ್ ಜಾಂವ್ಚಾ ವಾವ್ರಾವಿಶಿಂ ತುಮ್ಕಾಂ ಕಳಿತ್ ಆಸಾ. ತುಮ್ಕಾಂ ಜೆರಾಲ್ ರಿತಿರ್ ಕುವೆಯ್ಟಾಂತ್ಲ್ಯಾ ಕೊಂಕ್ಣಿ ಪರಿಗತೆವಿಶಿಂ ಕಿತೆಂ ಭಗ್ತಾ?
ಜಾ: ಕುವೆಯ್ಟಾಂತ್ ಖರೆಂಚ್ ಜಾವ್ನ್ ಬರೆಂ ತಾಲೆಂತ್ ಆಸಾ ಪುಣ್ ಜೊಕ್ತೆ ಆವ್ಕಾಸ್ ತಾಂಕಾಂ ಲಾಭಾನಾಂತ್. ಹಾಕಾ ಸಭಾರ್ ಕಾರಾಣಾಂ ಆಸ್ಯೆತಾ, ಪಯ್ಲೆಂ ಮನ್ಶಾಚೊ ಸ್ವಾರ್ಥ್ - ಕಾಂಯ್ ಹೆರಾಂಕ್ ಆವ್ಕಾಸ್ ದಿಲೊ ತರ್ ತಿಂ ಅಪ್ಣಾಚ್ಯಾಕೀ ಚಡ್ ಫಾಮಾದ್ ಜಾತಿತ್ಗಾಯ್ ಮ್ಹಳ್ಳೆಂ ಭ್ಯೆಂ ಆಸೊಂಕ್ ಪುರೊ. ಪುಣ್ ಕೊಂಕ್ಣೆಚಾ ಮಟ್ಟಾರ್ ಸಾಂಗ್ಚೆಂ ತರ್ ಹೆಂ ಭಲಾಯ್ಕೆಭರಿತ್ ಚಿಂತಾಪ್ ನ್ಹಂಯ್. ಜಾಂವ್ ಗೊಂಯ್ಕಾರ್ ವಾ ಮಂಗ್ಳುರ್ಗಾರ್, ಪುಣ್ ಆಮ್ಚೆ ಮಧೆಂ ಎಕಾಮೆಕಾಕ್ ರಾಗ್-ಮನಸ್ತಾಪ್ ಆಸಾ. ಮಂಗ್ಳುರ್ಗಾರಾಂ ಮಧೆಂ ತಿತ್ಲೊ ನಾ ಜಾವ್ಯೆತಾ, ತರ್ಯೀ ಎಕಾಮೆಕಾಚಾ ಮನಸ್ಥಾಪಾ ನಿಮ್ತಿಂ ಆಮ್ಕಾಂ ಎಕ್ವಟಿತ್ ವಾವ್ರ್ ಕರುಂಕ್ ಜಾಯ್ನಾ. ಹಾಚೆಂ ಪ್ರೇತನ್ ಹಾವೆಂ ಕೆಲ್ಲೆಂ ಆನಿ ಪಯ್ಲೆ ಪಾವ್ಟಿಂ ಮಂಗ್ಳುರ್ಚಾ ತಶೆಂಚ್ ಗೊಂಯ್ಚಾ ಕಲಾಕಾರಾಂಕ್ ಎಕ್ಟಾವ್ನ್ ಕಾರ್ಯೆಂ ಮಾಂಡುನ್ ಹಾಡ್ಲೆಂ ಆನಿ ತೆಂ ಹಾವೆಂ ಚಿಂತ್ಲ್ಲ್ಯಾಚ್ಯಾಕೀ ಚಡ್ ಫಾಮಾದ್ ಜಾಲ್ಲೆಂ.
3. ಆಮ್ಚಾ ಸಮಾಜೆಂತ್ ಆಸ್ಚಿಂ ಸಂಚಾಲನಾಂ, ಸಂಘ್ ಸಂಸ್ಥೆ ಆನಿ ಆಮ್ಚಾ ಕೊಂಕ್ಣಿ ಲೊಕಾಂವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ಕುವೆಯ್ಟ್ಚ್ಯಾ ಮಟ್ಟಾಕ್ ಸಾಂಗ್ಚೆಂ ತರ್ ಕುವೆಯ್ಟಾಂತ್ಲೆಂ ಪಯ್ಲೆಂ ಸಂಚಾಲನ್ ಜಾವ್ನಾಸಾ ಕೆ.ಸಿ.ಡಬ್ಲ್ಯೂ.ಎ. ಹ್ಯಾ ಸಂಸ್ಥ್ಯಾಚೊ ಮುಳಾವೊ ಇರಾದೊ ಆನಿ ಶೊವೊಟ್ ಏಕ್ಚ್ಚ್ ಆಸ್ಲೊ; ಸರ್ವ್ ಕೊಂಕ್ಣಿ ಲೊಕಾಂಕ್ ಎಕಾ ಬೊಂದೆರಾಖಾಲ್ ಹಾಡ್ಚೊ ಆನಿ ಎಕ್ವಟಿತ್ ರಿತಿನ್ ವಾವ್ರ್ ಕರ್ಚೊ. ಪುಣ್ ಜೆದ್ನಾಂ ಸಂಘ್ ಸಂಸ್ಥ್ಯಾಂನಿ ಸ್ವಾರ್ಥಿ ಆನಿ ಮತ್ಲಾಬಿ ಇರಾದ್ಯಾಚೆ ಮನಿಸ್ ಚಡೊನ್ ಯೆತೆಚ್ಚ್ - ಎಕೆಕ್ಲ್ಯಾಂನಿ ಅಪಾಪ್ಲೆಂ ನಾಂವ್ ವಯ್ರ್ ಹಾಡಂವ್ಚಾ ನಿಬಾನ್ ಎಕೆಕ್ ಸಂಚಾಲನ್, ಸಂಘ್ ಸಂಸ್ಥೊ ಸುರು ಕೆಲೊ. ಕೊಣೆ ಫಿರ್ಗಜೆಚ್ಯಾ ನಿಬಾನ್ ಆನಿ ಕೊಣೆ ಹೆರ್ ನಿಬಾಂನಿ.
4. ಪುಣ್ ಖರೆಂ ಜಾವ್ನ್ ಸಭಾರ್ ಪಾವ್ಟಿಂ ವಾವ್ರ್ ಕರುಂಕ್ ಸಂಘ್ ಸಂಸ್ಥೆ ಅಡ್ಕಳ್ಯೊ ಹಾಡ್ತಾತ್ ಮ್ಹಣ್ ತುಮ್ಕಾಂ ಭಗಾನಾಂಗಿ?
ಜಾ: ತೆಂ ಖರೆಂ! ಸಂಘ್ ಸಂಸ್ಥ್ಯಾಂತ್ ಆಸ್ಲ್ಯಾರ್ ಆಮ್ಚ್ಯಾನ್ ಸರ್ವ್ ಕಾಮಾಂ ಕರುಂಕ್ ಜಾತಾತ್ ಮ್ಹಳ್ಳೆಂ ನಖ್ಖೆಂ ಸಾಂಗೊಂಕ್ ಜಾಯ್ನಾ. ಪುಣ್ ಫಕತ್ತ್ ಕಾಮಾಂ ಕರ್ಚೆ ಪಾಸತ್ ಖಂಚೋಯ್ ಸಂಘ್ ಸಂಸ್ಥೊ ಮೊಡ್ಚೆಂ ಬರೆಂ ನ್ಹಂಯ್. ಆಮ್ಚಾ ಸಮಾಜೆಂತ್ ಅಸಲ್ಯಾ ಮತ್ಲಬಿ ಇರಾದ್ಯಾನ್ ಸುರು ಕೆಲ್ಲೆ ಖಂಚೇಯ್ ಸಂಸ್ಥೆ ಚಡ್ ತೇಂಪ್ ಬಾಳ್ವೊಂಕ್ ನಾಂತ್.
ಆಮ್ಚೊ ಲೋಕ್ಯೀ ವಿಚಿತ್ರ್ ಕಾಲೆತಿಚೊ. ತಾಂಕಾಂಯ್ ಖಂಚೀಯ್ ಕಾರ್ಯಿಂ ಜಾಯ್ಜಯ್ ತರ್ ಪೋಟ್ಭರ್ ಜೆವಾಣ್ ಆನಿ ಸೊರೊ. ತೇಂಯ್ ಧರ್ಮಾಕ್. ಅಶೆಂ ಆಸ್ತಾಂ ಅಸಲ್ಯಾ ಲೊಕಾಂ ಥಾವ್ನ್ ಚಡ್ತಿಕ್ ಹುಮೆದ್ ಕರ್ಚಿ ವ್ಯರ್ಥ್. ಆಮ್ಚಾ ಲೊಕಾಕ್ ಚ್ಯಾರ್ ಕಾಸ್ ಜಾತೆಚ್ಚ್ ಮಿಂಜಾಸ್ಕೆಂತ್ ಕೊಂಕ್ಣಿ ಯೇನಾ, ಉಲಂವ್ಕ್ ಬಟ್ಲರ್ ಇಂಗ್ಲಿಶ್ ತರ್ಯೀ ಇಂಗ್ಲಿಶ್ ಜಾಯ್. ತಾಂಚೆಂ ನೆಸಾಪ್, ಉಲವ್ಪ್ ಸಗ್ಳೆಂ ಫಿಂರ್ಗಿಂಚೆಂ. ಹ್ಯಾ ಮಟ್ಟಾಕ್ ಆಮ್ಚೊ ಮಲ್ಯಾಳಿ ಭಾಸೆಚೊ ಲೋಕ್ ದೆಖಿಭರಿತ್ ಜಾವ್ನಾಸಾ, ಕಿತ್ಲೋಯ್ ಶಿಕ್ಪಿ ತೊ ಆಸೊಂ, ಪುಣ್ ಜೆದ್ನಾಂ ದೋಗ್-ತೇಗ್ ಎಕ್ವಟ್ತಾತ್, ತೆದ್ನಾಂ ತಾಣಿಂ ಉಲಂವ್ಚಿ ಭಾಸ್ ಮಲ್ಯಾಳಿಚ್. ದೆಖುನ್ ತಾಂಚೆಲಾಗಿಂ ಆಸ್ಚೊ ಎಕ್ವಟ್ ಆಮ್ಚೆಲಾಗಿಂ ಭಿಲ್ಕುಲ್ ನಾ.
ಪುಣ್! ಸಗ್ಳೊ ಲೋಕ್ ಅಸಲೊ ನ್ಹಂಯ್. ಬರೆಂ ಕಾಮ್ ಕರ್ಚಾಂಕ್ ಬರೊ ಪಾಟಿಂಬೊ ದಿಂವ್ಚೊ ಜಾಯ್ತೊ ಲೋಕ್ ಆಮ್ಚೆ ಮಧೆಂ ಆಸಾ.
5. ದಾಯ್ಜ್ ಖಂಚ್ಯಾಯ್ ರಿತಿಚೆಂ ಸಂಚಾಲನ್ ನ್ಹಂಯ್, ಹಾಂಗಾಸರ್ ಕಸ್ಲೇಯ್ ಹುದ್ದೆ ನಾಂತ್, ಆಮ್ಚೊ ಇರಾದೊ ಫಕತ್ತ್ ಕೊಂಕ್ಣಿ ವಾವ್ರ್ ಕರ್ಚೊ. ದೆಕುನ್ ಕೊಂಕ್ಣೆ ಖಾತಿರ್ ಆಮ್ಚೆಂ ವೆಕ್ತಿಗತ್ ಮನಸ್ತಾಪ್ ಕಸ್ಲೋಯ್ ಆಸ್ಲ್ಯಾರ್ ತೊ ಬಗ್ಲೆನ್ ದವರುನ್ ಆಮಿಂ ವಾವ್ರಾಕ್ ದೆಂವ್ಲ್ಯಾಂವ್. ಆಮಿ ಕೊಣಾಯ್ಲಾಗಿಂ ಕಸ್ಲ್ಯಾಯ್ ಧಾಂವ್ಣೆರ್ ನಾಂವ್. ಇತ್ಲೊಚ್ಚ್ ತೇಂಪ್ ವಾ ಕಿತ್ಲೊ ತೇಂಪ್ ಮ್ಹಣ್ ಆಮಿ ಕೊಣಾಯ್ಲಾಗಿಂ ಕಸಲೋಯ್ ಧಾಂಗ್ರೊ ಮಾರುಂಕ್ ನಾ, ಮಾರ್ಚೆನಾಂವ್. ಆಮಿಂ ಎದೊಳ್ ಕೆಲ್ಲಿಂ ಕಾಮಾ ಹಾಚಿ ಗೊವಾಯ್. ಆಮ್ಕಾಂ ಆಮಿ ಕರ್ಚೆಂ ಹರ್ಯೆಕ್ ಸಂಸಾರಾಕ್ ಸಮ್ಜಾಂವ್ಕ್ ಸಾಧ್ಯ್ ನಾ. ಥೊಡ್ಯಾಂಕ್ ಆಮ್ಚೊ ವಾವ್ರ್ ಪಸಂದ್ ಜಾತಾ ತರ್ ಥೊಡ್ಯಾಂಕ್ ಪಸಂದ್ ಜಾಯ್ನಾ, ಥೊಡಿಂ ಬರೆಂ ಉಲಯ್ತಾತ್ ಆನಿ ಥೊಡಿಂ ಖೊಡಿ ಖುಲ್ಪಾಂ ಕಾಡ್ತಾತ್. ತುಮ್ಚೆ ಹ್ಯಾವಿಶಿಂ ವಿಚಾರ್ ಕಸ್ಲೆ?
ಜಾ: ಹೆಂ ಸತ್. ತುಮಿಂ ವಾ ಕೊಣ್ಯೀ ಜೆದ್ನಾಂ ಪರ್ಗಟ್ ರಿತಿಚೊ ಸಮಾಜಿಕ್ ವಾವ್ರ್ ಕರುಂಕ್ ದೆಂವ್ತಾತ್, ತೆದ್ನಾಂ ತುಮ್ಚೆರ್ ಖೊಡಿಂ ಕಾಡ್ಚಿಂ ಧಾರಾಳ್ ಆಸಾತ್, ಪುಣ್ ತಾಂತುಂ ತುಮಿಂ ವಾ ಕೊಣೆಂಯ್ ಭಿಂಯೆವ್ನ್ ವಾ ಲಜೆವ್ನ್ ಬಸ್ಚೆಂ ನ್ಹಂಯ್. ಆಮ್ಚಿ ಸಮಾಜ್ ಕುರ್ಲ್ಯಾಂಚಿ ಸಮಾಜ್ ಮ್ಹಣ್ತಾತ್. ಆಮಿಂ ಜಾವ್ನ್ ಕರಿನಾಂವ್ ತರ್ಯೀ, ಹೆರಾಂನಿ ಕರ್ಚೆಂ ಪಳೆಂವ್ಕ್ಯೀ ಸಕಾನಾಂವ್ ದೆಕುನ್ ಅಸಲ್ಯಾಂಕ್ ಕಸ್ಲೇಂಯ್ ಸ್ವಷ್ಟೀಕರಣ್ ದೀಂವ್ಕ್ ವೆಚ್ಯಾ ಬದ್ಲಾಕ್ ತುಮ್ಚಿಂ ಕಾಮಾಂ ಕರುನ್ಂಚ್ ವಚಾ. ತುಮ್ಕಾಂ ಹಿಚ್ಚ್ ಸಲ್ಹಾ ಮ್ಹಜಿ ಜಾವ್ನಾಸಾ.
6. ಪಯ್ಲೆಂಚ್ಯಾ ಆನಿ ಆತಾಂಚ್ಯಾ ವಾವ್ರಾಡ್ಯಾಂ ಮಧೆಂ ಕಸ್ಲೊ ಅಂತರ್ ಆಸಾ?
ಜಾ: ಜೆರಾಲ್ ರಿತಿನ್ ಸಾಂಗ್ಚೆಂ ತರ್, ಆತಾಂಚ್ಯಾ ಚಡಾವತಾಂಕ್ ಜಾಯ್ ಫಕತ್ತ್ ವೆದಿಚೆರ್ ಫುಲಾಂ, ಮಾನ್ ಆನಿ ನಾಂವ್ ಶಿವಾಯ್ ಕಾಮ್ ಕರುಂಕ್ ನಾಕಾ. ಪುಣ್ ಆಧ್ಲ್ಯಾ ಚಡಾವತಾಂನಿ (ಸರ್ವಾಂನಿ ನ್ಹಂಯ್) ಜಾಯ್ತೊ ವಾವ್ರ್ ಕೆಲಾ ತರ್ಯೀ, ತಾಂಕಾಂ ಜೊಕ್ತೊ ಮಾನ್ ಕೆದಿಂಚ್ ಮೆಳ್ಲ್ಲೊ ನಾ. ಹೆಂ ಮ್ಹಜೆಂ ಚಿಂತಾಪ್.
7. ಕೊಂಕ್ಣೆಚ್ಯಾ ನಾಂವಾನ್ ಅಪ್ಲೆಂ ಅಭಿಮಾನ್ ಸಂಘ್ ಭಾಂದುನ್ ಅಪ್ಲ್ಯಾ ನಾಂವಾಖಾತಿರ್ ಹೆರಾಂಕ್ ಗಳ್ಸಿತೆಲ್ಯಾಂವಿಶಿಂ ತುಮ್ಚೆ ವಿಚಾರ್ ಕಸ್ಲೆ?
ಜಾ: ಆಪ್ಲ್ಯಾ ಸ್ವಾರ್ಥಾ ಖಾತಿರ್ ಹೆರಾಂಕ್ ಗಳ್ಸುಂಚೆ (Exploit ಕರ್ಚೆ) ಥೊಡೆ ಆಮ್ಚಾ ಸಮಾಜೆಂತ್ ಆಸಾತ್, ಹಾಣಿಂ ಆಧಿಂಯೀ ಥೊಡೆ ಸಂಘ್ ಸಂಸ್ಥೆ ಫುಟವ್ನ್ ಅಪ್ಲೆಂ ನಾಂವ್, ಬೊಳ್ಕೆಂ ಭರುಂಕ್ ಹೆರ್ ಸಂಚಾಲನಾಂ ಸುರು ಕೆಲ್ಯಾಂತ್. ಪುಣ್ ಅಸಲ್ಯಾಂಕ್ ಚಡ್ ತೇಂಪ್ ಲೊಕಾಂಕ್ ಫಟಂವ್ಕ್ ಸಾಧ್ಯ್ ನಾ. ಲೋಕ್ ಥೊಡೊ ಬುದ್ದು ಆಸೊಂಕ್ ಪುರೊ ಪುಣ್ ಸಗ್ಳೊ ಲೋಕ್ ಮೂರ್ಖ್ ನ್ಹಂಯ್. ತಾಂಕಾಂ ಸರ್ವ್ ಕಳಿತ್ ಆಸಾ.
8. ಪ್ರಿಂಟ್ ಮಾಧ್ಯಮ್ ಆನಿ ಇ-ಮಾಧ್ಯಮ್ ಪಯ್ಕಿಂತ್ ಕೊಂಕ್ಣೆಚ್ಯಾ ವ್ಹಾಡಾವಳೆಕ್ ಖಂಚೆಂ ಚಡ್ ಮಹತ್ವಾಚೆಂ?
ಜಾ: ಕೊಂಕ್ಣಿ ಭಾಸೆಚಿ ಪರಿಗತ್ ಆಯ್ಲೆವಾರ್ ಬರಿ ಜಾವ್ನ್ ಆಯ್ಲ್ಯಾ, ಪುಣ್ ಕೊಂಕ್ಣಿ ಎದೊಳ್ ಜಿವಾಳ್ ಉರ್ಲ್ಯಾ ತರ್ ಹಾಕಾ ಕಾರಾಣ್ ಸಾದೊ ಲೋಕ್ ಶಿವಾಯ್ ಧವ್ಯಾ ಕೊಲರಾಚೊ (ಆಫಿಸಾಚೊ) ಲೋಕ್ ನ್ಹಂಯ್. ಪುಣ್ ಆತಾಂ ಕೊಂಕ್ಣಿ ಇಸ್ಕೊಲಾಂನಿ ಶಿಕಯ್ತಾತ್ ಆನಿ ಘರಾಂ ಘರಾಂನಿ ಕಂಪ್ಯೂಟರಾಂ ಯೇಂವ್ಕ್ ಸುರು ಜಾಲ್ಯಾಂತ್ ಮ್ಹಣ್ತಚ್ಚ್ - ಫುಡ್ಲೆ ದೀಸ್ ಕಂಪ್ಯೂಟರಾಚೆ ಮ್ಹಣ್ಚ್ಯಾಂತ್ ದುಭಾವ್ ನಾ. ದೆಕುನ್ ಅಂತರ್ಜಾಳಾಂನಿ ಕೊಂಕ್ಣಿ ಖರಿಚ್ ಜಾವ್ನ್ ಲೊಕಾಮೊಗಾಳ್ ಜಾಂವ್ಚ್ಯಾಂತ್ ದುಭಾವ್ ನಾ. ಪುಣ್ ಕೊಂಕ್ಣೆಚಿ ಖರಿ ವ್ಹಾಡಾವಳ್ ಜಾಯ್ಜಯ್ ತರ್ ಆಮಿ ಸರ್ವಾಂನಿ ಎಕ್ವಟಿತ್ ರಿತಿನ್, ಎಕ್ವಟಿತ್ ರಿತಿಚೊ ವಾವ್ರ್ ಕರುಂಕ್ ಜಾಯ್. ಆಮಿಂ ಆಮ್ಚೊ ವಯಕ್ತಿಕ್ ರಾಗ್-ಮನಸ್ಥಾಪ್ ಕಸ್ಲೋಯ್ ಆಸ್ಲ್ಯಾರ್ ತೊ ಬಗ್ಲೆಕ್ ದವರ್ನ್, ಕೊಂಕ್ಣೆಚೊ ವಾವ್ರ್ ಕರ್ಚೊ.
9. ದಾಯ್ಜ್.ಕೊಮಾನ್ ಚಲಂವ್ಚಾ ಸಭಾರ್ ಅಂಕಣಾಂ ಪಯ್ಕಿ ಲೊಕಾಮೊಗಾಳ್ ಅಂಕಣ್ ಜಾವ್ನಾಸಾ ’ಕೊಂಕ್ಣಿ ಕಾರ್ಭಾರಿ’ - ಆತಾಂ ಹಾಂತ್ಲೊ ಏಕ್ ಕಾರ್ಭಾರಿ ಜಾವ್ನ್ ತುಮ್ಕಾಂ ಆಪಂವ್ಚೆಂ ತುಮ್ಕಾಂ ಕಶೆಂ ಭಗ್ತಾ?
ಜಾ: ಸತ್ ಸಾಂಗ್ಚೆಂ ತರ್ ಮ್ಹಾಕಾಚ್ಚ್ ಅಜ್ಯಾಪ್ ಜಾತಾ ಹೆಂ ಚಿಂತುನ್ ’ಹಾಂವೆಂ ಕಸಲಿಂ ಕಾರ್ಭಾರಾಂ ಕೆಲ್ಯಾಂತ್?’ - ಹಾಂವೆಂ ಜರ್ ಕಿತೆಂಯ್ ಕೆಲಾಂ ತರ್ ತೆಂ ಫಕತ್ತ್ ಮನ್ಶ್ಯಾ ಮೊಗಾನ್ ಕೆಲಾಂ ಶಿವಾಯ್ ಹೆರ್ ಕಸ್ಲ್ಯಾರ್ ಇರಾದ್ಯಾನ್ ನ್ಹಂಯ್. ವಾ ಕೊಣೆಂಯ್ ಪಳೆಜಾಯ್ ಆನಿ ವಾಖಣ್ಣಿ ಕರಿಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ನ್ಹಂಯ್. ಮ್ಹಜ್ಯಾ ತಾಂಕಿಚೆಂ ಹಾವೆಂ ಕೆಲಾಂ. ಪುಣ್ ಹೆಂ ಅಂಕಣ್ ಭೋವ್ ಗರ್ಜೆಚೆಂ, ಕಿತ್ಯಾಕ್ ಮ್ಹಳ್ಯಾರ್ ಆಮ್ಚಾ ಸಮಾಜೆಂತ್ ಜಾಯ್ತೆ ಮುಖೆಲಿ ಅಜೂನ್ ಪರ್ದ್ಯಾ ಪಾಟ್ಲ್ಯಾನ್ ಆಸಾತ್ ಆನಿ ಅಪ್ಲೊ ವಾವ್ರ್ ಕರ್ತೇ ಆಸಾತ್. ತಸಲ್ಯಾಂಕ್ ಸೊಧುನ್ ಕಾಡ್ನ್ ತಾಂಕಾಂ ಆಮ್ಚಾ ಲೊಕಾಮುಖಾರ್ ಹಾಡ್ಚೆಂ ವಾಜ್ಬಿ. ಜೊನಿ ಸುರತ್ಕಲ್ ಪಳೆ - ಆಜ್ ಆಮ್ಚೆ ಮಧೆಂ ನಾ. ಆಜ್ ತಾಕಾ ಫುಲಾಂ ಘಾಲ್ಚೆ, ಫುಗಾರ್ಚೆ ಜಾಯ್ತೆ ಆಸ್ತಿತ್, ಪುಣ್ ತೊ ಜೀವ್ ಆಸ್ತಾನಾ ತಾಕಾ ಜಾಯ್ತ್ಯಾ ರಿತಿಂನಿ ಹಾಣಿಂಚ್ ಖುರ್ಸಾಯ್ಲಾಂ.
10. ಲೊಕಾಂಕ್ ಎಕ್ವಟಿತ್ ಕರ್ನ್ ಕೊಂಕ್ಣಿ ವಾವ್ರ್ ಕರ್ಚೆವಿಶಿಂ ತುಮ್ಚೆ ವಿಚಾರ್ ಕಸಲೆ? ಅಸಲ್ಯಾಂಕ್ ಕಿತ್ಲೊ ಪಾಟಿಂಬೊ ಮೆಳ್ತಾ?
ಜಾ: ಜೊಕ್ತೆ ಮನಿಸ್ ಮುಖೇಲ್ಪಣ್ ಘೆತ್ಲ್ಯಾರ್ ಹೆಂ ಖಂಡಿತ್ ಸಾಧ್ಯ್ ಆಸಾ. ಪುಣ್ ಸರ್ವಾಂಕ್ ಹೆಂ ಅಸಾಧ್ಯ್. ಜಶೆಂ ಜೊನಿ ಸುರತ್ಕಲ್ ತಸಲೆ ನಿರ್ವಾರ್ಥಿ ವಾವ್ರಾಡಿಂನಿ ಕೆದಿಂಚ್ ಅಪ್ಲೆವಿಶಿಂ ಚಿಂತ್ಲ್ಲೆಂ ನಾ. ಸದಾಂಚ್ ಖಾಲ್ತೊ ಆನಿ ಲೊಕಾಂಕ್ ಮಾನ್ವಂಚೆತಸಲೊ ಮನಿಸ್ ತೊ ಜಾವ್ನಾಸ್ಲೊ. ಆಮ್ಚಾ ಸಮಾಜೆಂತ್ ಅಸಲ್ಯಾಂಕ್ ಪಾಟಿಂಬೊ ಜರೂರ್ ಮೆಳ್ತಾ.
11. ದಾಯ್ಜ್.ಕೊಮ್ ಕೊಂಕ್ಣಿ ವಾವ್ರಾ ವಿಶಿಂ ಕಾಂಯ್ ಸಾಂಗೊಂಕ್ ಆಶೆತಾತ್?
ಜಾ: ದಾಯ್ಜ್.ಕೊಮ್ ಹಾಂವ್ ಸದಾಂಯ್ ವಾಚಿನಾ ತರ್ಯೀ, ತವಳ್ ತವಳ್ ವಾಚುನ್ ಆಸ್ತಾಂ ತಶೆಂಚ್ ಹೆರಾಂ ಥಾವ್ನ್ ದಾಯ್ಜ್ ಪಂಗ್ಡಾಚಾ ವಾವ್ರಾವಿಶಿಂ ಬರೆಂಚ್ ಆಯ್ಕೊನ್ ಆಸಾಂ. ತುಮಿ ತುಮ್ಚಾ ದೀಸ್ಪೊಡ್ತ್ಯಾ ವಾವ್ರಾಮಧೆಂ ಮೆಳ್ಚೊ ವೇಳ್ ಕೊಂಕ್ಣೆ ಖಾತಿರ್ ಖರ್ಚುಂಚೆಂ ನಿಜಾಯ್ಕೀ ಬರೆಂಚ್. ಅಶಿಚ್ ತುಮ್ಚಿ ಮಿನತ್ ಮುಖಾರುನ್ ವ್ಹರಾ, ತುಮ್ಚಾ ವಾವ್ರಾಕ್ ಮ್ಹಜೆ ಥಾವ್ನ್ ಕೆದ್ನಾಂಯ್ ಕಸಲೋಯ್ ಪಾಟಿಂಬೊ ಗರ್ಜ್ ಪಡ್ಲೊ ತರ್ ಹಾಂವ್ ಖಂಡಿತ್ ದಿತಲೊಂ.
12. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ದಾಯ್ಜ್.ಕೊಮ್ ಏಕ್ ಸುರ್ವಾತ್ ಮಾತ್ರ್, ಹಾಂತುಂ ಕೊಂಕ್ಣೆಚೊ ಹುಸ್ಕೊ ಆನಿ ಅಭಿಮಾನ್ ಆಸ್ಚಾ ಸರ್ವ್ ಕೊಂಕ್ಣಿ ಲೊಕಾಂನಿ ಮೆತೆರ್ ಜಾಯ್ಜಯ್, ಕೊಂಕ್ಣಿ ಆಮ್ಚಿ ಆವಯ್ಭಾಸ್ ದೆಕುನ್ ಆಮಿಂ ಆಮ್ಚೆ ಥಾವ್ನ್ ಕೊಂಕ್ಣಿ ಪ್ರಚಾರ್ ಕರ್ಚಾ ವಾವ್ರಾಕ್ ಲಾಗಾಜಯ್. ಹ್ಯಾ ಖಾತಿರ್ ಆಮಿ ಆಮ್ಚಾ ಘರಾಂನಿ, ಆಮ್ಚಾ ಸಯ್ರ್ಯಾಂಲಾಗಿಂ ಕೊಂಕ್ಣೆಂತ್ ಉಲಂವ್ಕ್ ಶಿಕಾಜಯ್. ಕೊಂಕ್ಣಿ ಉಲಯ್ಲ್ಯಾರ್ ಅಪ್ಲೆಂ ಮಟ್ಟ್ ಉಣೆಂ ಜಾತಾ ಮ್ಹಳ್ಳೆಂ ಅಶೀರ್ ಚಿಂತಾಪ್ ಸೊಡಿಜಾಯ್ - ಅಸಲೆಂ ಚಿಂತಾಪ್ ಆಸ್ಚೆಂ ಉಣಿಂ ಶಿಕ್ಪಿ ವಾ ನಾ-ಸಮ್ಜಣಿ ಆಸ್ಚಾ ಲೊಕಾಂಕ್ ಮಾತ್ರ್. ಖರೆಂ ಜಾವ್ನ್ ಸಮ್ಜಣೆಚಿಂ, ಖರಿಂ ಶಿಕ್ಪಿಂ ಕೆದಿಂಚ್ ಅಪ್ಲ್ಯಾ ಆವಯ್ಭಾಸೆಕ್ ನೆಗಾರ್ ಕರಿನಾಂತ್.
13. ದೇವ್ ಬರೆಂ ಕರುಂ ತುಮ್ಕಾಂ ಲೊರಿಯಾಬ್, ತುಮ್ಚೊ ಅಮೊಲಿಕ್ ವೇಳ್ ಆಮ್ಚೆ ಸಂಗಿಂ ಖರ್ಚಿಲ್ಲ್ಯಾಕ್.
ಜಾ: ತುಮ್ಕಾಂಯ್ ದೇವ್ ಬರೆಂ ಕರುಂದಿ, ತುಮಿ ವೇಳ್ ಕಾಡ್ನ್ ಕೊಂಕ್ಣಿ ಮನ್ಶ್ಯಾಂಕ್ ಸೊಧುನ್ ವೆತಾತ್ ಆನಿ ಪರ್ದ್ಯಾ ಪಾಟ್ಲ್ಯಾನ್ ಲಿಪೊನ್ ಆಸ್ಚಾಂಕ್ ಸೊಧುನ್ ಕಾಡ್ನ್ ತಾಂಚೆಂ ಸಂದರ್ಶನ್ ಘೆತಾತ್. ತುಮ್ಚಾ ಮಿನತೆಕ್ ಬರೊ ಫಳ್ ಲಾಭೊಂದಿ ಮ್ಹಣ್ ಆಶೆತಾಂ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11, 12, 13, 14, 15
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
