ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 14.
ಪುರ್ತೆಂ ನಾಂವ್: ಲಿಯೊ ರೊಡ್ರಿಗಸ್
ಜಲ್ಮಾಲ್ಲಿ ತಾರಿಕ್: 28 ಜೂನ್ 1954
ಜಲ್ಮಾಲ್ಲೊ ಗಾಂವ್: ಚಿಕ್ಮಂಗ್ಳುರ್
ಆವಯ್-ಬಾಪಾಯ್ಚೆಂ ನಾಂವ್: ಶ್ರೀಮತಿ ಆಲಿಸ್ ರೊಡ್ರಿಗಸ್ ಆನಿ ದೆವಾದೀನ್ ಎಲಿಯಾಸ್ ರೊಡ್ರಿಗಸ್
ಶಿಕಾಪ್: ಸುರತ್ಕಲ್ ವಿಧ್ಯಾದಾಯಿನಿ ಹೈಸ್ಕೂಲ್, ತ್ಯಾ ನಂತರ್ ಐ.ಟಿ.ಐ (ಆಟೊಮೋಬೈಲ್)
ಲಗ್ನ್: 1989 ಇಸ್ವೆಂತ್ ಲವೀನಾಲಾಗಿಂ ಕಾಜಾರ್ ಜಾವ್ನ್ ಆತಾಂ ಕೆರೊಲ್, ಕೊಲಿನ್, ಆನಿ ಕ್ಲೇರಾ ಮ್ಹಳ್ಳಿಂ ತೆಗಾಂ ಭುರ್ಗಿಂ ಆಸಾತ್.
[ಲಿಯಾಬಾಸವೆಂ ಬಾಯ್ ವಾಯ್ಲೆಟ್ ಜೆ. ಪಿರೇರಾ]
ಖತಾರಾಂತ್ ಸರ್ವ್ ಕೊಂಕ್ಣಿ ಲೊಕಾಂಕ್ ’ದಾಟ್ಟು’ ಮ್ಹಣ್ ಫಾಮಾದ್ ಜಾಲ್ಲ್ಯಾ ಮಾನೆಸ್ತ್ ಫೆಲಿಕ್ಸ್ ಲೋಬೊಕ್ ಭೆಟ್ಚೆಂ ಭಾಗ್ ಮ್ಹಾಕಾ ಲಾಭ್ಲೆಂ ಆನಿ ಖರೆಂಚ್ ಜಾವ್ನ್ ತಾಚ್ಯಾ ಕಾಳ್ಜಾಂತ್ಲೊ ಕೊಂಕ್ಣಿ ಹುಸ್ಕೊ, ಮೋಗ್ ಪಾರ್ಕಿಲೊ. ಅಸಲೊಚ್ಚ್ ಅನ್ಯೇಕ್ಲೊ ದಾಟ್ಟು ಅಭುಧಾಬಿಂತ್ ಆಸಾ ಮ್ಹಣ್ ಹಾಂವ್ ಜಾಣಾಂ, ಪಳೆಂವ್ಕ್ ಗಂಭೀರ್ ವದನಾಚೊ, ಕಾಳ್ಜಾಂತ್ ತಿತ್ಲೊಚ್ ಮೊವಾಳಾಯೆಚೊ, ಕೊಂಕ್ಣೆಚ್ಯಾ ಮೊಗಾನ್ ತೊಂವ್ಚೊ, ಕೊಂಕ್ಣಿ ವಾವ್ರಾಕ್ ಸದಾಂಚ್ ಪಾಟಿಂಬೊ ದಿಂವ್ಚೊ, ಅಪ್ಲ್ಯಾ ಕಾಮಾಚಾ ರಾಟಾವಳೆಮಧೆಂ ಸಯ್ತ್ ಕೊಂಕ್ಣೆ ಖಾತಿರ್ ಸದಾಂಚ್ ತಯಾರ್ ಆಸ್ಚಾ ಲಿಯಾಬಾವಿಶಿಂ ಹಾವೆಂ ಜಾಯ್ತೆಂ ಆಯ್ಕಲಾಂ ತರ್ಯೀ, ಮುಖಾಮುಖಿ ಜಾಂವ್ಚೆಂ ಭಾಗ್ ಅಜೂನ್ ಮ್ಹಾಕಾ ಲಾಭೊಂಕ್ ನಾ. ತರ್ಯೀ ಏಕ್ ದೋನ್ ಪಾವ್ಟಿಂ ಫೊನಾರ್ ತಾಚೆಲಾಗಿಂ ಉಲಯ್ಲಾಂ, ಹರ್ಯೆಕ್ ಪಾವ್ಟಿಂ ಮ್ಹಾಕಾ ತಾಣೆಂ ಕೊಂಕ್ಣಿ ವಾವ್ರಾಕ್ ಪ್ರೇರಣ್ ದಿಲಾಂ. ತುಮಿ ಮುಖಾರ್ ವಚಾ, ಕೊಂಕ್ಣಿ ವಾವ್ರ್ ಚಡಯಾ, ಕೊಂಕ್ಣಿ ವಿಸ್ತಾರಾಯಾ ಮ್ಹಳ್ಳೊ ಸಂದೇಶ್ ದಿಂವ್ಚಾ ಲಿಯಾಬಾಸವೆಂ ಆಯ್ಲೆವಾರ್ ವಾಯ್ಲೆಟ್ ಬಾಯೆನ್ ಘೆತ್ಲ್ಲೆಂ ಸಂದರ್ಶನ್ ಹೆಂ. - ಸಂ.
ಸಂವಾದ್ ಚಲವ್ಪಿಣ್: ವಾಯ್ಲೆಟ್ ಜೆ. ಪಿರೇರಾ, ದುಭಾಯ್.
1. ತುಮಿಂ ತುಮ್ಚಾ ಕಾಮಾಂತ್ ಕಿತ್ಲೆಂ ಮೆತೆರ್ ಆಸ್ಲ್ಯಾರ್ಯೀ, ಕೊಂಕ್ಣೆಖಾತಿರ್ ಸದಾಂಚ್ ಪಾಟಿಂಬೊ ದಿತಾತ್, ತಶೆಂಚ್ ತುಮ್ಚ್ಯಾ ತಾಂಕಿಚೊ ಕೊಂಕ್ಣಿ ವಾವ್ರ್ ಕರ್ನ್ ಆಸಾತ್. ತುಮ್ಕಾಂ ಕೊಂಕ್ಣಿ ವಾವ್ರಾಕ್ ಪ್ರೇರಣ್ ಕಶೆಂ ಲಾಭ್ಲೆಂ?
ಜಾ: ಹಾಂವ್ ಹೈಸ್ಕೂಲಾಂತ್ ಆಸ್ತಾನಾಂಚ್ಚ್ ಯುವ ಸಂಘಾಂತ್ ಆನಿ ಪ್ಯಾರಿಶ್ ಕೌನ್ಸಿಲಾಂತ್ ಆಸ್ಲ್ಲೊಂ. ಆನಿ ಕೊಂಕ್ಣಿ ಡ್ರಾಮಾಂತ್ ನಟನ್ ಕರ್ತಾಲೊಂ. ತಶೆಂ ಪಯ್ಲೆಂ ಥಾವ್ನ್ ಹಾಂವ್ ಕೊಂಕ್ಣೆಚೊ ಅಭಿಮಾನಿ. ಅಶೆಂ ಮ್ಹಜ್ಯಾ ಭುರ್ಗ್ಯಾಪಣಾ ಥಾವ್ನ್ಂಚ್ಚ್ ಮ್ಹಾಕಾ ಕೊಂಕ್ಣೆಚಿ ಉರ್ಭಾ ಆಸ್ಲ್ಲಿ. ಕೊಂಕ್ಣಿ ಆಮ್ಚಿ ಆವಯ್ಭಾಸ್ ದೆಕುನ್ ಆವಯ್ಚೆರ್ ಮೋಗ್ ಆಸ್ಚಾ ಸರ್ವಾಂಕ್ ಆವಯ್ಭಾಸೆಚೆರ್ ಅಭಿಮಾನ್ ಭಗ್ಚೊ ಸಹಜ್.
2. ಆಜ್ಕಾಲ್ ಕೊಣಾಯ್ಕೀ ವೇಳ್ ನಾಸ್ಚಾ ದಿಸಾಂನಿ , ತುಮಿಂ ಏಕ್ ಬಿಜಿ ಉಧ್ಯಮಿ ತರ್ಯೀ ಕೊಂಕ್ಣೆಚಿಂ ಖಂಚಿಂಯೀ ಕಾರ್ಯಿಂ ಆಸೊಂ, ತಾಂತುಂ ತುಮಿಂ ಚುಕಾನಾಸ್ತಾಂ ಪಾತ್ರ್ ಘೆತಾತ್? ತುಮ್ಕಾಂ ಪಾವ್ಟ್ ಕಶಿ ಮೆಳ್ತಾ?
ಜಾ: ಪಾವ್ಟ್ ಆಮಿಂ ಕರ್ನ್ ಕಾಣ್ಘೆಂವ್ಚಿ ಶಿವಾಯ್ ಆಮ್ಕಾಂ ಸೊಧುನ್ ಯೇನಾ. ಜರ್ ತರ್ ಆಮ್ಕಾಂ ಮನ್ ಆಸಾ ತರ್ ಖಂಡಿತ್ ಪಾವ್ಟ್ ಮೆಳ್ತಾ. ಜರ್ ಮ್ಹಜೆ ಥಂಯ್ ಕೊಂಕ್ಣೆಚೊ ಮೋಗ್ ಆಸಾ ತರ್ ಖಂಚಿಯ್ ಕಾಮಾ ಆಸೊ ತಿಂ ದೆಗೆನ್ ದವರ್ನ್ ಕೊಂಕ್ಣೆಚ್ಯಾ ಕಾರ್ಯಾಂಕ್ ಹಾಜರ್ ಜಾಂವ್ಚೆ. ಆನಿಂ ಮ್ಹಾಕಾ ಕೊಂಕ್ಣಿ ಭಾಶೆಚೆರ್ ಮ್ಹಣ್ಜೆ ಮ್ಹಜ್ಯಾ ಮಾಂಯ್ ಭಾಶೆಚೆರ್ ವರ್ತೊ ಅಭಿಮಾನ್ ಆಸಾ. ತಶೆ ಜಾಲ್ಲ್ಯಾನ್ ಹಾಂವ್ ಕೊಂಕ್ಣೆಚ್ಯಾ ಚಡಾವತ್ ಕಾರ್ಯಾಂಕ್ ಹಾಜರ್ ಜಾತಾಂ.
3. ತುಮಿಂ ಕೊಂಕ್ಣಿ ಬೂಕ್, ಪತ್ರಾಂ ಪರ್ಗಟ್ ಕರ್ತಾನಾ ವಾ ಖಂಚ್ಯಾಯ್ ಕೊಂಕ್ಣಿ ಕಾರ್ಯಾಂಕ್ ತುಮ್ಚೊ ಕುಮ್ಕೆಚೊ ಹಾತ್ ದಿತಾತ್. ತುಮ್ಕಾಂ ಹೆಂ ಗರ್ಜೆಚೆಂ ಮ್ಹಣ್ ಕಿತ್ಯಾಕ್ ಭಗ್ತಾ?
ಜಾ: ಮ್ಹಜ್ಯಾ ಚಿಂತ್ಪಾ ಫರ್ಮಾಣೆ ಕೊಂಕ್ಣಿ ಕಲಾಕರಾಂಕ್ ಯಾ ಬರೆಯ್ಣಾರಾಂಕ್ ಹೆರಾಂ ಥಾವ್ನ್ ಆಧಾರ್ ಮೆಳ್ಚೊ ಭಾರಿಚ್ಚ್ ಉಣೊ. ಕೊಂಕ್ಣಿ ಬೂಕ್ ಬರಯ್ಲ್ಯಾರ್ ವಿಖುನ್ ವಚೊಂಕ್ ಕಷ್ಟ್ - ಹೆಂ ಹಾಂವ್ ಬರ್ಯಾನ್ ಜಾಣಾಂ. ಬೂಕ್ ಪರ್ಗಟ್ ಕರ್ತಾನಾ ಖರ್ಚಿಲ್ಲೆ ಪಯ್ಶ್ಯೆ ಪಾಟಿ ಮೆಳಾನಾಂತ್. ಬೂಕ್ ಜಾಂವ್ದಿ, ಯಾ ಸಿ.ಡಿ. ಜಾಂವ್ದಿ ಕಾಡ್ತೆಲ್ಯಾಕ್ ಫಾಯ್ದೊ ಸೊಡ್ ತಾಂಕಾ ತಾಣಿಂ ಖರ್ಚಿಲ್ಲೊ ದುಡು ಸಯ್ತ್ ಮೆಳ್ಚೊ ಅಸಾಧ್ಯ್ ಜಾವ್ನಾಸಾ. ಹರ್ಯೇಕಾ ಮನ್ಶ್ಯಾಕ್ ವಿವಿಧ್ ಥರಾಚಿ ತಾಲೆಂತಾ ಆಸ್ತಾತ್. ತಿಂ ತಾಲೆಂತಾ ಆಸ್ಲ್ಯಾರೀ ತಿಂ ಉಜ್ವಾಡಾಕ್ ಹಾಡುಂಕ್ ದುಡ್ವಾಚಿ ತಾಂಕ್ ಆಸಾನಾ. ಮ್ಹಜ್ಯಾ ಚಿಂತ್ಪಾ ಪ್ರಕಾರ್, ಹಾಂವೆ ಮ್ಹಜೆ ಏಕ್ ಲ್ಹಾನ್ಶೆ ಫುಲ್ ನ್ಹಂಯ್ ತರೀ ಫುಲಾಚಿ ಪಾಕ್ಳಿ ದೀವ್ನ್ ಕಲಾಕರಾಂಚಿ ತಾಲೆಂತಾ ಊರ್ಜಿತ್ ಕರ್ಯೆತ್, ಹ್ಯಾಚ್ಚ್ ಇರಾದ್ಯಾನ್ ಹಾಂವ್ ಪಾಟಿಂಬೊ ದಿತಾಂ. ಹ್ಯಾ ಸಾಂಗಾತಾಚ್ಚ್ ಕೊಂಕ್ಣಿ ಬೂಕ್ ಲೊಕಾಕ್ ವಾಚುಂಕ್ ಮೆಳ್ತಿತ್ ಮ್ಹಳ್ಳೊ ಮ್ಹಜೊ ಸಂತೊಸ್.
4. ಕೊಂಕ್ಣೆಂತ್ ಆಯ್ಚಾ ಕಾಳಾರ್ ಜಾಯ್ತಿಂ ಪತ್ರಾಂ, ಬೂಕ್ ಪರ್ಗಟ್ ಜಾತಾತ್ ತರ್ಯೀ ಕೊಂಕ್ಣೆಂತ್ ಅಜೂನ್ಯೀ ಕಸಲೆಂ ಉಣೆಪಣ್ ಆಸಾ ಮ್ಹಣ್ ತುಮ್ಕಾಂ ಭಗ್ತಾ? ಆನಿ ಹೆಂ ಕಶೆಂ ನಿವ್ರಾಂವ್ಕ್ ಸಾಧ್ಯ್?
ಜಾ: ಕೊಂಕ್ಣೆಂತ್ಲೆಂ ಉಣೆಂಪಣ್ ಮ್ಹಳ್ಯಾರ್ ಕೊಂಕ್ಣಿ ವಾಚ್ಪಿ ಚಡ್ ನಾಂತ್, ಪಯ್ಲ್ಯಾ ಸುವಾತೆರ್ ಕೊಂಕ್ಣೆಂತ್ ವಾಚ್ಪಿ ಚಡೊಂಕ್ ಜಾಯ್. ಕಶ್ಟ್ ಕಾಡ್ನ್ ಪತ್ರಾಂ ಛಾಪ್ತಾತ್, ಬೂಕ್ ಕಾಡ್ತಾತ್ ಪುಣ್ ತಿಂ ಪತ್ರಾಂ ವಾ ಬೂಕ್ ಘೆವ್ನ್ ವಾಚ್ತೆಲೆ ಉಣೆ ಜಾಲ್ಯಾತ್. ಚಡ್ ಲಾಂಬ್ ನ್ಹಂಯ್ ಆಸ್ತಾಂ ಮಟ್ವ್ಯೊ ಕಾಣ್ಯೊ ಬರವ್ನ್, ಬರಿಂ ವಾಚ್ಪಾಂ ಸಾಮಾಜಿಕ್ ಥರಾನ್ ಲೊಕಾಕ್ ವಾಚ್ಯಾ ಮ್ಹಣ್ ಭಗ್ಚೆ ತಸಲಿಂ ಬರ್ಪಾ ಬರಯ್ತಿತ್ ಆನಿ ಪರ್ಗಟ್ ಜಾತಿತ್, ಆನಿ ಸರ್ವ್ ಕೊಂಕ್ಣಿ ಲೊಕಾಂನಿ ಹಾಂತುಂ ಮೆತೆರ್ ಜಾಲೆಂ ತರ್ ಖಂಡಿತ್ ಜಾವ್ನ್ ಕೊಂಕ್ಣೆಂತ್ಲೆಂ ಉಣೆಪಣ್ ನಿವಾರ್ತೆಲೆಂ.
5. ತುಮಿ ತುಮ್ಚಾ ತಾಂಕಿಭಿತರ್ಲಿ ಸಮಾಜ್ ಸೆವಾ ಕರ್ನ್ ಆಸಾತ್. ಹ್ಯಾ ಸಮಾಜ್ ಸೆವಾ ವಾ ಕೊಂಕ್ಣೆಚೊ ವಾವ್ರ್ ಕರ್ತಾನಾ ತುಮ್ಕಾ ಕಾಂಯ್ ಕರ್ಕರೆ ವಾ ದುರ್ಸೊಣೆಂ ಆಯ್ಕೊಂಕ್ ಮೆಳ್ಳಾಂಗೀ ?
ಜಾ: ಸಮಾಜ್ ಸೆವಾ ವಾ ಕೊಂಕ್ಣೆಚೊ ವಾವ್ರ್ ಕರ್ತಾನಾ ದುರ್ಸೊಣೆಂ ಮೆಳ್ಚೆಂ ಸಹಜ್ಚ್ಚ್. ತೆಂ ದುರ್ಸೊಣೆಂ ಕಾನಾಕ್ ಘೆನಾಸ್ತಾಂ ಹಾಂವೆಂ ಮ್ಹಜೆಂ ಕಾಮ್ ಕರ್ನ್ ವೆಚೆಂ. ಸಮಾಜ್ ಸೆವಾ ಕರುಂಕ್ ವೆಚ್ಯಾಧಿಂ ಆಮಿಂ ಜರ್ ಕಸಲೆಂಯ್ ಆಯ್ಕೊಂಕ್ ವಾ ಸೊಸುಂಕ್ ತಯಾರ್ ಆಸಾಂವ್ಗಿ ಮ್ಹಳ್ಳೆಂ ಸಮ್ಜೊಂಚೆಂ ಭೋವ್ ಗರ್ಜೆಚೆಂ. ಆಸಾಂವ್ ತರ್ ಮಾತ್ರ್ ಆಮಿ ವಾವ್ರಾಕ್ ದೆಂವ್ಚೆಂ ಆನಿ ಉಪ್ರಾಂತ್ ಕಿತೆಂಯ್ ಆಯ್ಕೊಂಕ್ ವಾ ಸೊಸುಂಕ್ ತಯಾರ್ ಆಸಾಜಯ್. ನಾಂವೇ ಆಮಿಂ ವೊಗೆಚ್ಚ್ ರಾವೊನ್ ಕುಜ್ನಾಂತ್ ವಾ ಲಿಪೊನ್ ಬಸಾಜಯ್, ಖಂಚ್ಯಾಯ್ ಕಾಮಾಕ್ ಹಾತ್ ಘಾಲುಂಕ್ ನಜೊ. ಸಮಾಜ್ ಸೆವಾ ಎಕಾ ರಿತಿಚೆಂ ಮುಖೇಲ್ಪಣ್, ಏಕ್ ಜವಾಬ್ಧಾರಿ ಆನಿ ಹುಸ್ಕೊ.
6. ಕೊಂಕ್ಣಿ ವಾವ್ರಾಂತ್ ತುಮ್ಕಾಂ ಕಾಂಯ್ ಉಡಾಸಾಕ್ ಉರ್ಚೆಂ ಘಡಿತ್ ಆಸಾಗೀ?
ಜಾ: ವ್ಹಯ್, ಹಾಂವ್ ಮುಕ್ಕ ಫಿರ್ಗಜೆಚ್ಯಾ ಯುವಕ್ ಸಂಘಚೊ ಅಧ್ಯಕ್ಷ್ ಜಾವ್ನಾಸ್ತಾ ಆಮಿಂ ಆಮ್ಚಾ ಕ್ರಿಸ್ತಾಂವ್ ದುಬ್ಳ್ಯಾ ಕೊಂಕ್ಣಿ ಕುಟ್ಮಾಕ್ ಶ್ರಮಾಧಾನ್ ಕರ್ನ್ ಘರಾಂ ಬಾಂದುನ್ ದಿತಾಲ್ಯಾಂವ್, ಉದಾಕ್ ನಾತ್ಲ್ಲ್ಯಾಂಕ್ ಬಾಂಯೊ ಖೊಂಡುನ್ ದಿತಾಲ್ಯಾಂವ್. ಹೆಂ ಮ್ಹಾಕಾ ಅತಾಂಯ್ ಮ್ಹಜ್ಯಾ ಮತಿ ಪಡ್ದ್ಯಾರ್ ತವಳ್ ತವಳ್ ಯೆತಾ. ಆಮ್ಚಾ ಯುವ ಸ್ಪಿರಿತಾ ಥಾವ್ನ್ ಕೊಣಾಯ್ಚೆಂಯೀ ಬರೆಂ ಜಾಲ್ಲೆಂ ಚಿಂತಾನಾ ಸಮಧಾನ್ ಜಾತಾ. ಮನಿಸ್ ಹ್ಯಾ ಸಂಸಾರಾಂತ್ ಕಿತ್ಯಾಕ್ ಯೆತಾ? ಅಪ್ಣಾಖಾತಿರ್ ಕೊಣ್ಯೀ ಜಿಯೆಂವ್ಕ್ ಸಕ್ತಾ - ತಿ ಜಿಣಿ ಜಾಯ್ನಾ. ಪುಣ್ ಜೊ ಕೊಣ್ ಹೆರಾಂ ಪಾಸತ್ ಥೊಡ್ಯೊ ಘಡ್ಯೊ ಜಿಯೆಂವ್ಕ್ ಸಕ್ತಾ - ತಿ ಜಿಣಿ ಭೋವ್ ಸೊಭಿತ್.
7. ಹಾಂವೆ ಆಯ್ಕಾಲ್ಲ್ಯಾ ಪ್ರಕಾರ್ ಅಬುಧಾಬಿಂತ್ ಕೆ.ಸಿ.ಒ ಮ್ಹಳ್ಲೊ ಸಂಘ್ ಕಾರ್ಯಾಳ್ ನಾಸ್ತಾ ಆಸ್ಲ್ಲೊ. ತೊ ಪುನರುಜ್ಜೀತ್ ಕರುಂಕ್ ತುಮಿ ಪೆಚಾಡ್ತಾನಾ ತುಮ್ಕಾ ಸಬಾರ್ ಆಡ್ಕಳಿ ಆಯ್ಲ್ಯೊ. ಹ್ಯಾ ವಿಶ್ಯಾಂತ್ ತುಮಿಂ ಕೆತೆಂಯ್ ಸಾಂಗೊಂಕ್ ಆಶೆತಾತ್?
ಜಾ: ವ್ಹಯ್, 1994 ಂತ್ ಅಬುಧಾಬಿಂತ್ ಕೊಂಕಣಿ ಸಾಂಸ್ಕ್ರತಿಕ್ ಸಂಘ್ ಪುನರುಜ್ಜೀತ್ ಕರ್ತಾನಾ ಮ್ಹಾಕಾ ಆಮ್ಚಾಚ್ಚ್ ಕ್ರೀಸ್ತಾಂವ್ ಭಾವಾಂನಿ ಜಾಯಿತ್ಯಾ ರಿತಿನ್ ವಿರೋಧ್ಪಣ್ ದಾಕಯಿಲ್ಲೆಂ. ಥೊಡ್ಯಾಂ ಆಕ್ರಿಸ್ತಾಂವಾನಿ ’ಪ್ಯಾರಲ್ಲಲ್ ಸಂಘ್’ ಅಬುಧಾಬಿಂತ್ ಆಸೊಂಕ್ ನ್ಹಜೊ ಮ್ಹಣ್ ತಾಕಿದ್ ದಿಲಿ. ಆನಿ ಸಭಾರ್ ವಿರೋಧಿ ಆಸ್ಲ್ಲೆ, ತರೀ ಧಯ್ರ್ ಘೆವ್ನ್ ತ್ಯಾ ಸರ್ವ್ ವಿರೋಧಾಂ ಮಧೆಂ 1995 ಫೆಬ್ರೆರಾಚ್ಯಾ 13 ತಾರಿಕೆರ್ ಹೊ ಸಂಸ್ಥೊ ಪುನರುಜ್ಜೀತ್ ಕೆಲೊ. ಸುರ್ವೆರ್ ಹಾಂವ್ ತಾಚೊ ಸ್ಥಾಪಕ್ ಅಧ್ಯಕ್ಶ್ ಜಾವ್ನ್ ವಾವುರ್ಲೊಂ. ತ್ಯಾ ವರ್ಸಾ ಆಮಿ ಅಬುಧಾಬಿಂತ್ ಮೊಂತಿ ಸಾಯ್ಬಿಣಿಚೆ ಫೆಸ್ತ್ ಮೀಸ್ ಕೊಂಕ್ಣೆಂತ್ ಆಸಾ ಕೆಲೆಂ. ಆನಿ ಸಗ್ಳ್ಯಾ ಭುರ್ಗ್ಯಾಂಕ್ ಗಾಂವಾ ಥಾವ್ನ್ ಫುಲಾಂ ಹಾಡವ್ನ್ ವಾಂಟ್ಲಿಂ. ಆನಿ ತ್ಯಾ ದಿಸಾ ಮರಿಯೆಮಾಯೆಕ್ ಫುಲಾ ಆರ್ಪುಂಕ್ ಸರ್ವ್ ಭುರ್ಗ್ಯಾಂಕ್ ಆವ್ಕಾಸ್ ಕರ್ನ್ ದಿಲೊ. ಇತ್ಲೆಂಚ್ ನ್ಹಂಯ್ - ಹಾಚೆ ಉಪ್ರಾಂತ್ ಸಕ್ರಿಯ್ ರಿತಿನ್ ಸಭಾರ್ ರಿತಿಚೊ ವಾವ್ರ್ ಆಮ್ಚಾ ಸಾಂದ್ಯಾಂನಿ ಕೆಲಾ.
8. ತುಮಿ ಭುರ್ಗ್ಯಾ ಪಣಾರ್ ಭೋವ್ಚ್ಚ್ ಪೊಕ್ರಿ ಆಸ್ಲ್ಲ್ಯಾತ್ ಮ್ಹಣ್ ಆಯ್ಕಾಲಾಂ, ತುಮ್ಚಾ ಪೊಕ್ರಿಪಣಾಚೊ ಆತಾಂಯ್ ತುಮ್ಕಾ ಉಡಾಸ್ ಹಾಡಂವ್ಚೆ ಘಡಿತ್ ಕಾಂಯ್ ಆಸಾಗೀ?
ಜಾ: ವ್ಹಯ್, ಹಾಂವ್ ಕಠಿಣ್ ಪೊಕ್ರಿ ಆಸ್ಲ್ಲೊ. ಹಾಂವ್ ಆಲ್ತಾರ್ ಭುರ್ಗೊ ಜಾವ್ನ್ ಆಸ್ಲ್ಲೊ. ಏಕ್ ದೀಸ್ ಮೀಸ್ ಜಾಲ್ಯಾ ನಂತರ್ ಹಾಂವ್ ಪಾಧ್ರ್ಯಾಬಾಚ್ಯಾ ಘರಾ ಗೆಲೊ ಆನಿ ತಾಚ್ಯಾ ಇಸಿಚೆರಾರ್ ಬಸೊನ್ ಧಲೊನ್ ಖೆಳ್ತಾಲೊಂ. ತಾಚೆರ್ ಖೆಳೊನ್ ಆಸ್ತಾನಾ ತ್ಯಾ ಇಸಿಚೆರಾಚ್ಯಾ ಇಡ್ಯಾಕ್ ಮ್ಹಜೆ ಉಜ್ವ್ಯಾ ಹಾತಾಚೆ ನಿಮಾಣಿಂ ಬೋಟ್ ಶಿರ್ಕೊನ್ ಕುಡ್ಕೆ ಜಾಲ್ಲಿಂ. ಆತಾಂ ದೂಕ್ ನಾಂ ತರ್ಯೀ ಜರೂರ್ ಉಡಾಸ್ ಆಸಾ.
9. ಅಂತರ್ಜಾಳ್ ಆನಿಂ ಪತ್ರಾಂ ಕೊಂಕ್ಣೆಚ್ಯಾ ಉದರ್ಗತೆಕ್ ಉಪ್ಕಾರ್ತಿತ್ಗೀ? ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಅಂತರ್ಜಾಳ್ ಆನಿ ಪತ್ರಾಂ ವಾ ಮಾದ್ಯಮಾ ಮುಖಾಂತ್ರ್ ಕೊಂಕ್ಣಿ ಜಿವಿ ದವರ್ಚಿ ಗರ್ಜೆಚೆ. ಆನಿಂ ಕೊಂಕ್ಣೆಚೆ ಉದರ್ಗತ್ ಹ್ಯಾ ವರ್ವಿ ಜಾಯ್ತ್ ಮ್ಹಳ್ಳೆಂ ಸಾಂಗೊಂಕ್ ಕಶ್ಟ್. ತರೀ ಆಮ್ಚೆ ಸಾಧನ್ ಸೊಡಿನಾಸ್ತಾಂ ಆಮ್ಚೆ ಬರೆಂ ಕಾಮ್ ಮುಖಾರ್ಸುನ್ ವರ್ಚೆಂ ಗರ್ಜೆಚೆಂ. ಕಿತ್ಯಾಕ್ ಮ್ಹಳ್ಯಾರ್ ಖಂಚೇಂಯ್ ಜಡ್ ಲಾಯ್ತಾನಾ ಹರ್ಯೆಕ್ಲೊ ಚಿಂತಾ, ಹೆಂ ಜಡ್ ವ್ಹಡ್ ಜಾಂವ್, ಫುಲಾಂ ಫಳಾಂ, ಸಾವ್ಳಿ ದೀಂವ್ಕ್ ಆನಿ ಲಾಂಬ್ ಕಾಳ್ ವಾಂಚೊಂಖ್. ತೆಚ್ಚ್ಪರಿಂ ಆಮ್ಚಾ ಪತ್ರಾಂನಿ, ಸಾಯ್ಟಾಂನಿ ತಾಂತಾಂಚಿಂ ಮಿಸಾಂವಾಂ ಮುಖಾರುನ್ ವರುನ್ ಕೊಂಕ್ಣೆಚಿ ಜೆರಾಲ್ ವ್ಹಾಡಾವಳ್ ಜಾಂವ್ಚಾ ದಿಸೆನ್ ಎಕ್ವಟಿತ್ ರಿತಿನ್ ವಾವ್ರ್ ಕರ್ಚಿ ಗರ್ಜ್ ಆಸಾ.
10. ಆತಾಂ ಆಮ್ಕಾಂ ಮಂಗ್ಳುರ್ಚಾ ಇಸ್ಕೊಲಾಂನಿ ಕೊಂಕ್ಣಿ ಶಿಕಂವ್ಕ್ ಧರ್ಲಾಂ. ಕೊಂಕ್ಣೆಚ್ಯಾ ಉದರ್ಗತೆಕ್ ಆಮಿ ಆನಿಕೀ ಚಡ್ ಕಶೆಂ ವಾವುರ್ಯೆತ್?
ಜಾ: ಆಮ್ಚ್ಯಾ ಇಸ್ಕೊಲಾಂನಿ ಕೊಂಕ್ಣಿ ಆಯಿಲ್ಲಿ ಸಂತೊಸಾಚಿ ಗಜಾಲ್. ಹೆಂ ಏಕ್ ಬರೆಂ ಕಾಮ್. ಕೊಂಕ್ಣೆಚಿ ಉದರ್ಗತ್ ಜಾಯ್ಜೆ ತರ್ ಪಯ್ಲೆಂ ಆಮಿಂ ಆಮ್ಚಾ ಘರಾ ಥಾವ್ನ್ ಕೊಂಕ್ಣಿ ಉಲಂವ್ಕ್ ಸುರು ಕರಿಜಯ್. ಆಶೆಂ ಆಮಿ ಕೊಂಕ್ಣಿ ಊರ್ಜಿತ್ ಕರ್ಯೆತ್. ತಶೆಂಚ್ಚ್ ಆಮ್ಚಿ ಖಂಚಿಂಯೀ ಕಾರ್ಯಿಂ, ಕಾಜಾರಾಂ, ಸೊಭಾಣಾ ಜಾತಾನಾ ಕೊಂಕ್ಣೆತ್ಚ್ಚ್ ಆಸಾ ಕೆಲಿಂ ಜಾಲ್ಯಾರ್, ಕೊಂಕ್ಣಿ ಭಾಸ್ಚ್ಚ್ ವಾಪಾರ್ಲಿ ಜಾಲ್ಯಾರ್ ಬರೆಂ ಮ್ಹಣ್ ಮ್ಹಾಕಾ ದಿಸ್ತಾ. ಗಾಂವಾಂತ್ ಪಳೆಂವ್ಕ್ ಗೆಲ್ಯಾರ್ ಸಭಾರಾಂ ಇಂಗ್ಲಿಷ್ ಮಿಸಾಕ್ಚ್ಚ್ ವೆತಾತ್. ಪಾದ್ರ್ಯಾಬಾಂನಿ ಕೊಂಕ್ಣೆಂತ್ಚ್ಚ್ ಮೀಸ್ ಬೆಟಯ್ಲೆ ತರ್ ಥೊಡ್ಯಾ ಮಟ್ಟಾಕ್ ತರೀ ಲೋಕ್ ಕೊಂಕ್ಣಿ ಶಿಕೊಂಕ್ ಪ್ರಯತನ್ ಕರ್ತಿತ್. ಕೊಂಕ್ಣಿ ಭಾಸ್ ಏಕ್ ಮೊಗಾಳ್ ಭಾಸ್. ಎಕ್ಲೊ, ದೋಗ್ ವಾ ಧಾ ಜಣಾಂನಿ ಸಾಂಗಾತಾ ಮೆಳೊನ್ ಕೊಂಕ್ಣಿ ಉರೈಜಯ್ ಮ್ಹಳ್ಳೊ ಮನೋಭಾವ್ ಆಸ್ಲ್ಯಾರ್ ಖಂಡಿತ್ ಜಾವ್ನ್ ಕೊಂಕ್ಣಿಚಿ ಉದರ್ಗತ್ ಜಾತೆಲಿ.
11. ಕೊಂಕ್ಣೆ ಥಂಯ್ ಉಣೆಪಣ್ ಉಲೈತೆಲ್ಯಾ ವಿಶ್ಯಾಂತ್ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಕೊಂಕ್ಣೆ ವಿಶ್ಯಾಂತ್ ಉಣೆಪಣ್ ಉಲೊಂವ್ಚೆಂ ಮೂರ್ಖ್ಪಣ್. ಕೊಂಕ್ಣಿ ಕಿತ್ಲಿ ಮ್ಹಳ್ಯಾರೀ ಆಮ್ಚಿ ಭಾಸ್. ಆಮಿಂಚ್ಚ್ ಕೊಂಕ್ಣೆಚೆಂ ಉಣೆಪಣ್ ಉಲೈಲ್ಯಾರ್ ಆಮ್ಚಿ ಭುರ್ಗಿಂ ಕೊಂಕ್ಣೆಚೊ ಮೋಗ್ ಕರ್ತಿತ್ಗೀ ಯಾ ಕೋಂಕ್ಣಿ ಉಲೈತಿತ್ಗಿ?
12. ದಾಯ್ಜ್.ಕೊಮ್ ತುಮಿಂ ಪಳೆಲಾಂಗಿ? ಹ್ಯಾ ಸಾಯ್ಟಿವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ವ್ಹಯ್ ಪಳೆಲಾಂ ತಶೆಂಚ್ ಜಾಯ್ತೆಂ ಆಯ್ಕಲಾಂ. ದಾಯ್ಜ್.ಕೊಮ್ ಅಂತರ್ಜಾಳಿ ಮುಖಾಂತ್ರ್ ನಿಜಾಯ್ಕ್ಯೀ ಬರೆಂ ವಾಚಪ್ ಲೊಕಾಕ್ ದಿತಾ. ತಾಂಚೆ ಹೆಂ ಬರೆಂ ಕಾಮ್ ಮುಖಾರುನ್ ವಚೊಂದಿ ಮ್ಹಣ್ ಆಶೆತಾಂ. ಆಮ್ಚಾ ಕೊಂಕ್ಣಿ ಲೊಕಾಕ್ ಬರೆಂ ವಾಚಪ್ ಹ್ಯಾ ವೆಬ್ಸಾಯ್ಟಾ ಮುಖಾಂತ್ರ್ ಮೆಳೊನ್ ಆಸಾ. ತಿತ್ಲೆಂಚ್ಚ್ ನ್ಹಂಯ್ ಆಸ್ತಾ ಹ್ಯಾ ವೆಬ್ಸಾಯ್ಟಾದ್ವಾರಿ, ಕೊಂಕ್ಣೆಚೊ ವಾವ್ರ್ ಕೆಲ್ಲ್ಯಾಂಚಿ ಆನಿ ಕರ್ನ್ ಆಸ್ಚ್ಯಾಂಚಿ ವಳಕ್ ಲೊಕಾಕ್ ಕರ್ನ್ ದಿಂವ್ಚೆ ಕಾಮ್ ತಾಣೆ ಹಾತಿಂ ಧರ್ಲಾಂ. ತಾಕಾ ಹಾಂವ್ ಸರ್ವ್ ಬರೆಂ ಮಾಗ್ತಾ.
13. ದಾಯ್ಜ್ ಡಾಟ್ ಕೊಮ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ದಾಯ್ಜ್ ಏಕ್ ಸಂಪೂರ್ಣ್ ಕೊಂಕ್ಣೆಕ್ ಸಮರ್ಪುನ್ ದಿಲ್ಲಿ ವೆಬ್ಸಾಯ್ಟ್ ಜಾವ್ನಾಸಾ. ಹ್ಯಾ ವೆಬ್ಸಾಯ್ಟಾ ಮುಖಾಂತ್ರ್ ಬರೆಂ ಜಾಣ್ವಾಯೆ ಬರಿಂ ವಾಚಾಪ್ ಆಮ್ಕಾ ಕೊಂಕ್ಣಿ ಉಲೈತೆಲ್ಯಾಂಕ್, ವಾಚ್ತೆಲ್ಯಾಂಕ್ ಫಾವೊ ಜಾತಾ. ಆಮಿ ಸಗ್ಳಿಂ ಕೊಂಕ್ಣಿ ಮೋಗಿ ಹ್ಯಾ ವೆಬ್ಸಾಯ್ಟಾಕ್ ಏಕ್ ನ್ಹಂಯ್ ತರ್ ಆನ್ಯೇಕಾ ರಿತಿನ್ ಆಧಾರ್ ದಿವ್ಯಾಂ. ಆನಿ ದಿಸಾನ್ ದೀಸ್ ದಾಯ್ಜ್ ವಾಚ್ಪಿ ಚಡೊಂದಿತ್ ಮ್ಹಣ್ ಆಶೆತಾ.
14. ದೇವ್ ಬರೆಂ ಕರುಂ ಲಿಯಾಬ್ ತುಮ್ಚೊ ಆಮೊಲಿಕ್ ವೇಳ್ ಆಮ್ಚೆಸಂಗಿಂ ಸಂದರ್ಶ್ಯಾನಾಕ್ ಖರ್ಚಿಲ್ಲ್ಯಾಕ್?
ಜಾ: ದೇವ್ ಬರೆ ಕರುಂ ತುಕಾಯ್ ವಾಯ್ಲೆಟ್. ದಾಯಿದ್ ತಾವ್ನ್ (250 ಕಿಲೊ ಮೀಟರ್) ಹಾಂಗಾಸರ್ ಅಬುಧಾಬಿ ಪರ್ಯಾಂತ್ ಪಯ್ಣ್ ಕರ್ನ್ ಯೇವ್ನ್ ಆಸಲೆ ಏಕ್ ಬರೆ ಕಾಮ್ ಕರುಂಕ್ ತುವೆ ತುಜೊ ಮೊಲಾಧಿಕ್ ವೇಳ್ ಖರ್ಚಿಲ್ಲ್ಯಾಕ್ ತುಕಾ ಮ್ಹಜ್ಯಾ ಕುಟ್ಮಾಸವೆಂ ಹಾಂವ್ ಕಾಳ್ಜಾಂ ಥಾವ್ನ್ ದೇವ್ ಬರೆಂ ಕರುಂ ಮ್ಹಣ್ತಾಂ. ತಶೆಂಚ್ಚ್ ದಾಯ್ಜಾಚ್ಯಾ ವಲ್ಲಿಕ್ ತಶೆಂಚ್ಚ್ ಪಂಗ್ಡಾಕ್ ಸರ್ವ್ ಬರೆಂ ಮಾಗ್ತಾಂ.
ಲಿಯಾಬಾವಿಶಿಂ ಥೊಡಿಂ ಉತ್ರಾಂ ಮ್ಹಜಿಂ: ಲಿಯಾಬಾಸವೆಂ ಭುರ್ಗ್ಯಾಪಣಾರ್ ಆಲ್ತಾರ್ ಭುರ್ಗೊ ಜಾವ್ನ್, ಈಶ್ಟ್ ಜಾವ್ನ್ ಸಮಾಜ್ ಸೆವಾ ಕರ್ಚಾ ಪಾಸ್ಕಲ್ ಪಿಂಟೊಚಿ ವಳೊಕ್ ಕುವೆಯ್ಟಾಂತ್ ಆಸ್ಚಾಂಕ್ ಮಾತ್ರ್ ನ್ಹಂಯ್, ಅಖ್ಖ್ಯಾ ಕೊಂಕಣ್ ಶೆತಾಂತ್ ಕರ್ಚಿ ಗರ್ಜ್ ನಾ. ಕುವೆಯ್ಟಾಂತ್ ಆಮ್ಕಾಂ ಕೊಂಕ್ಣಿ ವಾವ್ರ್ ಕರ್ಚಾಂಕ್ ಪಾಟಿಂಬೊ ದಿಂವ್ಚಾಂತ್ ಪಾಸ್ಕಲ್ ಪಿಂಟೊ ಪಯ್ಲೊ. ಪಾಸ್ಕಲ್ ಪಿಂಟೊಚೆಂ ಸಂದರ್ಶನ್ ವಾಚುಂಕ್ ಹೆಂ ಪಾನ್ ಭೆಟ್ ದಿಯಾ.
"ಲಿಯಾಬ್ ಖರೆಂಚ್ ಜಾವ್ನ್ ಜಾಯ್ತ್ಯಾ ರಿತಿನ್ ಅಜೂನ್ ಸಮಾಜ್ ಸೆವಾ ಕರುನ್ ಆಸಾ ಆನಿ ತಾಕಾ ಕೊಂಕ್ಣೆಚೆರ್ ವರ್ತೊ ಅಭಿಮಾನ್ ಆನಿ ಮೋಗ್ ಆಸಾ. ತೊ ಫಕತ್ತ್ ಉತ್ರಾಂನಿ ವರ್ಣುಂಕ್ ಸಾಧ್ಯ್ ನಾ. ಮ್ಹಾಕಾ ಲಿಯಾಬಾಚೆಂ ಮುಖೇಲ್ಪಣ್, ಧಯ್ರ್ ಆನಿ ಸಂಯಮ್ ಭೋವ್ ಪಸಂದ್ ಜಾತಾ. ಜಾಂವ್ಕ್ ಮ್ಹಜೊ ಆಪ್ತ್ ಮಿತ್ರ್ ತೊ ತರ್ಯೀ, ಭುರ್ಗ್ಯಾಪಣಾರ್ ಮಾತ್ರ್ ಆಮಿ ಸಾಂಗಾತಾ ಆಸ್ಲ್ಲ್ಯಾಂವ್, ಉಪ್ರಾಂತ್ ತೊ ಮುಕ್ಕ ಫಿರ್ಗಜೆಕ್ ಗೆಲೊ ತರ್ಯೀ, ಆಮ್ಚೆಮಧೆಂ ಕಾಳ್ಜಾಂತ್ ಅಜೂನ್ ತೊಚ್ಚ್ ಭಾಂದ್ ಆಸಾ. ತಾಚ್ಯಾ ಸಮಾಜ್ ಸೆವೆಚೆರ್ ಮ್ಹಾಕಾ ಅಭಿಮಾನ್ ಆನಿ ಮೋಗ್ ಆಸಾ. ತುಮಿಂ ತಾಚೆಂ ಸಂದರ್ಶನ್ ಘೆವ್ನ್ ಖರೆಂಚ್ ಜಾವ್ನ್ ಬರೆಂ ಕಾಮ್ ಕೆಲೆಂ - ದೇವ್ ತುಮ್ಚೆರ್ ಬೆಸಾಂವ್ ಘಾಲುಂ, ಕೊಂಕ್ಣೆಚೆಂ ನಂದನ್ ಜಾಂವ್."
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11, 12, 13
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
