ಲಾಟೊ,

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.

ಅಂಕಣ್‌ಕಾರಾ ವಿಶ್ಯಾಂತ್: ಜಶೆಂ ಸಾಹಿತ್ಯ್ ಏಕ್ ಹವ್ಯಾಸ್ ಹೆರ್ ಭಾಸಾಂನಿ, ತಶೆಂಚ್ ಕೊಂಕ್ಣೆಂತ್ ಹವ್ಯಾಸ್ ಜಾವ್ನ್ ಸಾಹಿತ್ಯ್ ರಸ್ಚೆ ದರಬಸ್ತ್. ಕೊಣ್ ಮರನಂಜನಾಕ್, ಕೊಣ್ ವೇಳ್ ಪಾಶಾರ್ ಕರ್ಚಾಕ್ ತರ್ ಬೋವ್ ಥೊಡೆ ಚಿಂತ್ಪಿ ಸಮಾಜ್ ಜಾಗರಣ್ ಹಾಡಂವ್ಚ್ಯಾ ಇರಾದ್ಯಾನ್ ಸಾಹಿತ್ಯ್ ರಚ್ತಾತ್. ಸಮಾಜೆಚೊ ಹುಸ್ಕೊ, ಮೋಗ್ ಆಸ್‌ಲ್ಲೆನಿಮ್ತಿಂ, ಸದಾಂಚ್ ಅಸಲೆ ಜಾಗೆ ಆಸ್ತಾತ್ ಆನಿ ಮೊನೆ ಜಾವ್ನ್ ತರ್‌ಯೀ ಸಮಾಜೆಚ್ಯಾ ಪೊಕೊಳ್‌ಪಣಾಚೆರ್ ತವಳ್ ತವಳ್ ಆಪ್ಲ್ಯಾ ಲಿಖ್ಣೆಂತ್ ದಾಗ್ ದೀವ್ನ್ ಆಸ್ತಾತ್. ಎಕಾ ಖರ್‍ಯಾ ಸಾಹಿತಿಚಿ ಜವಾಬ್ಧಾರಿಯೀ ಹಿಚ್ಚ್.

ಪ್ರೀತಮ್ ಕಿರೆಂ ಅಸಲ್ಯಾಚ್ ವರ್ಗಾಚೊ ಸಾಹಿತಿ, ದಾಕ್ಡ್ಯಾಂಧಿಂ ಕ್ರಿಯಾತ್ಮಕ್ ರಿತಿನ್ ವಾವ್ರ್ ಕೆಲ್ಲೊ ಹೊ ಪರತ್ ಅಪ್ಲಿ ಲಿಖ್ಣಿ ಧರ್ನ್ ಜೆಮೆಂವ್ಚ್ಯಾ ಸಮಾಜೆಕ್ ಜಾಗಂವ್ಚೆಂ ಪ್ರೇತನ್ ಕರುಂಕ್ ಆಯ್ಲಾ, ಹೆಂ ಕೊಂಕ್ಣೆಂತ್ ಖಂಡಿತ್ ಜಾವ್ನ್ ಭೋವ್ ಸಂತೊಸಾಚೆಂ. ಏಕ್ ಪ್ರಭುದ್ದ್ ಲೇಖಕ್, ಕವಿ ಆನಿ ಅಂಕಣ್‌ಕಾರ್ ಜಾವ್ನಾಸ್ಚೊ ಪ್ರೀತಮ್ ಪ್ರಸ್ತುತ್ ಶಾರ್ಜಾಂತ್ ವಸ್ತಿ ಕರುನ್ ಆಸಾ ತಶೆಂಚ್ ಜೆಬೆಲ್ ಅಲಿಂತ್ ಕಾಮ್ ಕರುನ್ ಆಸಾ. ಕೊಂಕ್ಣೆಂತ್ ಆಪ್ಲ್ಯಾ ವಿಚಾರ್‌ಭರಿತ್ ಸಾಹಿತ್ಯಾಕ್ ಭೋವ್ ಫಾಮಾದ್ ಜಾಲ್ಲ್ಯಾ ದೆ|ಜೊರ್ಜಿ ಪೀಂತ್ ಆಯ್ಕೊಳಾಚಾ ಸಾಹಿತ್ಯಾಕ್ ಹಾಚೆಂ ಸಾಹಿತ್ಯ್ ಲಾಗ್ಸಿಲ್ಯಾನ್ ತಾಳ್ ಪಡ್ತಾ. ಭೋವ್ಶಾ ಹೆ ದೊಗ್‌ಯೀ ಖಾಸ್ ಮಿತ್ರ್ ಜಾವ್ನಾಸ್‌ಲ್ಲೆನಿಮ್ತಿ ಆಸ್ಯೆತ್.

ಖಾಕಿಯೆಂತ್ಲಿ ಕೆಸೊಳಿ - 5. ಲಾಟೊ, ದೊರಿ ಆನಿ ’ಶಿದಿ’

ಪ್ರೀತಮ್ ಕಿರೆಂ

ಖಾಕಿಯೆಂತ್ಲ್ಯಾ ಸವ್ಯಾ ಕೆಸೊಳೆಚೆಂ ಯೆಣೆಂ ಜಾತಾನಾಂ ಥೊಡ್ಯಾ ನವೀನ್ ಚಿಂತ್ಪಾಂಕ್ ಆವ್ಕಾಸ್ ಮೆಳ್ಳೊ. ಎಕಾ ವಾಟೆನ್ ಕುಟ್ಮಾ ಸಂಗಿಂ ಲಾಂಬ್ ಆವ್ದೆ ಉಪ್ರಾಂತ್ ಮಾಂಯ್ ಗಾಂವಾಕ್ ಪಾಂಯ್ ತೆಂಕ್ಚೊ ಆತ್ರೇಗ್ ತರ್, ದುಸ್ರ್ಯಾ ವಾಟೇನ್ ಮಾಂಯ್ ಗಾಂವಾಕ್ ಬಾಯ್ರ್ ಸರ್ಚಾ ವ್ಹಗ್ತಾ, ಸಯ್ರ್ಯಾಂ - ದಯ್ರ್ಯಾಂಕ್ ಕಾಂಯ್ ತರ್ ಚಿಂದಿ ವಸ್ತುರ್, ಓಫರಾಚೆಂ ಕಿತೆಂಯ್, ಸವಾಯ್ ಮೊಲಾರ್ ಘೆಂವ್ಚೊ ಹೊರ್ಬೊಸ್.

ದಫ್ತಾರಾಂತ್ಲಿ ಜವಾಬ್ದಾರಿ, ಫರತ್ ಪಾಟಿಂ ಯೆತಾಂ ಮ್ಹಣಾಸಾರ್ ಸಾಂಬಾಳ್ನ್ ವರುಂಕ್ ಸಹಾಪಾಟಿಂಕ್ ವಯ್ಸುನ್ ದಿಂವ್ಚೊ ಕಾಯ್ದೊ ವೆಗ್ಳೊ.

ಹ್ಯಾಚ್ಚ್ ವ್ಹಗ್ತಾ, ಮ್ಹಜ್ಯಾ ಖಾಕಿಯೆಂತ್ಲ್ಯಾ ಕೆಸೊಳೆಕ್ ಪಿಕೊಂವ್ಚೆಂ ಪ್ರಯತ್ನ್ ಕೆಲೆಂ. ದಿಲ್ಲೆ ಹಿಶಾರೆ ಫಾವೊತೆ ತರೀ, ಪಿಕ್ಲೆಲ್ಲ್ಯಾ ಕೆಸೊಳೆಕ್ ಕೊಣೇಂಯ್ ಕೊಂಕುನ್ ಮ್ಹೆಳೆಂ ರಗಾತ್ ಭಾಯ್ರ್ ಕಾಡ್ಚೆಂ, ತೆಂ ಸಾಧನ್ ಮ್ಹಜ್ಯಾ ಶಿರಾಂ ಶಿರಾಂನಿಂ ಗೊಮ್ಲೆಂ. ತಶೆಂ ಮ್ಹಣೊನ್, ಆನಾವಶ್ಯೆಂ ಖಾಕಿಯೆಂತ್ ಬೊಟಾಂ ಘಾಲುನ್, ಕೆಸೊಳಿ ಚಿಡ್ದುಂಚಾ ನಿಬಾನ್, ಕುಚುಲ್ಯೊ ಕರ್ಚೆಂ, ಮ್ಹಾಕಾ ವೊಂಬಾಲ್ನಾಂ ತರೀ, ಗುಪಿತ್ತ್ ಇಲ್ಲಿ ಮ್ಹಝಾ ಭಗ್ಲಿ ಮ್ಹಳ್ಳ್ಯಾ ಶಿವಾಯ್ ದುಸ್ರಿ ವಾಟ್ ಆಸಾ?

ಕುವಾಳ್ಯಾಕ್, ಆವಾಳೊ ಮ್ಹಣೊನ್ ತೊಂಡಾಂತ್ ದವ್ರುನ್ ಚಿಂವೊಂಕ್ ಆನಿಂ, ಆವಾಳ್ಯಾಕ್, ಕುವಾಳೊ ಮ್ಹಣ್ ಲೆಕುನ್ ಆದಾಳ್ಯಾರ್ ಸಿಂದ್ಚೆಂ ವ್ಯರ್ಥ್ ಪ್ರಯಾಸ್ ಕರ್ಚಿ ಕಾಲೆತ್ ಮ್ಹಜ್ಯಾ ಅಂಕಣಾಚಿ ನ್ಹಂಯ್. ಗಾಯ್ಚಾ ದುದಾಕ್ ಆನಿಂ ಮಾಂಯ್ಚಾ ದುದಾಚೊ ಫರಕ್ ಹಾಂವ್ ಬುರ್ಗ್ಯಾ ಪಣಾರ್ ಥಾವ್ನ್ಂಚ್ಚ್ ಸಮ್ಜೊಂಕ್ ಸಕ್ಲಾಂ. ಚಡ್ತಿಕ್ (ಯಾನೆ, ಆಮುಲ್ - ನಂದಿನಿ - ಮಂಗಳ ದುದಾಚಿ) ಜಾಣ್ವಾಯ್ ಜಮಂವ್ಚೆಂ ಪ್ರಯತ್ನ್ ಜಾರಿಯೆರ್ ಆಸಾ. ಮ್ಹಜ್ಯಾ ಮಿಸಾಂವಾಂನಿಂ ಹಾತ್ ದಿಲ್ಲ್ಯಾಂಕ್ ಆಭಾರಿ ಮ್ಹಳ್ಳ್ಯಾ ಶಿವಾಯ್ ಜಾತಾ!

ಹ್ಯಾ ಸರ್ವಾಂಕ್ ಸುದಾರ್ಸಿತಾನಾಂ, ಮ್ಹಜ್ಯಾ ದಾಕ್ಟ್ಯಾ ಭಯ್ಣಿಚೆಂ ಇ-ಮೈಲ್: 
ತುಂ ಗಾಂವಾಕ್ ಯೆತಾನಾಂ, ದುಸ್ರೆಂ ಕಿತೇಂಯ್ ಹಾಡಿ ನಾಂಯ್ ಜಾಶಿ ತರ್ ವ್ಹಡ್ ನಹಿಂ. ಪುಣ್ ಚಾರ್ ಕಾಣಿಯೊಂ ಹಾಡುಂಕ್ ವಿಸ್ರಾನಾಕಾ. ಬುರ್ಗಿಂ ಸಳ್ ಕರ್ತಾತ್. ತುಜ್ಯೊ ತ್ಯೊ ಆಬಾಚೊ, ವಾಗಾಚ್ಯೊ ಆನಿಂ ಪರ್ನ್ಯಾ ತೆಸ್ತಾಮೆಂತಾತ್ಲ್ಯಾ ರಾಯಾಂಚ್ಯೊ ಬೆಳ್ಶೆಲ್ಲ್ಯೊ ಪೊಟ್ಟು ಕಾಣಿಯೊಂ ತಿಂ ಆತಾಂ ಖಾಯ್ಸ್ ಕರಿನಾಂತ್ ಮ್ಹಳ್ಳೊ ಉಗ್ಡಾಸ್ ದವರ್. ಕಾಂಯ್ ಸ್ಪೆಡರ್ ಮ್ಯಾನ್ - 3, ಯಾ ಫೆಂಟಾಸ್ಟಿಕ್ 4, ಯಾ ಇತರ್ ಕಿತೆಂಯ್ ರೊಮ್ಯಾನ್ಸಾಚೊ ಹಾಡ್ಶಿ ತರ್, ತುಂ ವಾಂಚ್ಲೊಯ್. ನಾಂ ತರ್ ತುಜ್ಯಾ ಬುರ್ಗ್ಯಾಂಸಂಗಿಂ ಮ್ಹಜ್ಯಾ ಭುರ್ಗ್ಯಾಂಕೀ ಕೆಂಟಕಿ ಶಿವಾಯ್ ಶಿತ್ ರುಸ್ಚೆಂ ನಾಂ. ಗಾಂವಾಕ್ ಆಯ್ಲೆಲ್ಯಾ ಉಪ್ರಾಂತ್ ಬುರ್ಗ್ಯಾಂಕ್ ಸುಧಾರ್ಸುಂಚೆಂ ಕಾಮ್ ತುಜೆಂ.

ಮ್ಹಜಿ ತಕ್ಲಿ ಗಿರ್ಗಿರುಂಕ್ ಲಾಗ್ಲಿ, ಗಿರ್ಗಿಟೆಪರಿಂ. ಚಾರ್ ಹಾಫ್ತ್ಯಾಂಚಾ ಸುಟಿಯೆರ್ ವೆತೆಲ್ಯಾ ಮ್ಹಾಕಾ, ಉಣ್ಯಾರ್ ಉಣೆಂ ಚಾರ್ ಕಾಣಿಯೊಂ ಮ್ಹಣಿಂ ಬರೊಂವ್ಚಿ ಪರಿಸ್ಧಿತಿ ಖಂಚ್ಯಾನ್ ಉದೆಲಿಗಾಯ್. ಕಾಣಿಯೊಂ ತಯಾರ್ ಕೆಲ್ನ್ಯಾಂತ್ ತರ್ ಭಯ್ಣಿ-ಬುರ್ಗ್ಯಾಂಕ್ ಸೊಡ್, ಮ್ಹಜೆಂ ಕೆಲ್ಲೆಂ ಶಿತ್ ಜಿರ್ವತ್‌ಗಾಯ್? ಏಕಾ ವಾಟೆನ್ ಬಿರಾಂತ್ ತರ್, ದುಸ್ರ್ಯಾ ವಾಟೆನ್ ಆತ್ರೆಗ್ ಅನಿಂ ಉಮೆದ್‌ಯೀ ಚಡ್ಲಿ. ತ್ಯಾ ಉಮೆದೆ ತೆಕಿದ್, ಮ್ಹಜ್ಯಾ ಖಾಕಿಯೆಂತ್ಲ್ಯಾ ಕೆಸೊಳೆಕ್ ನವೆಂ ಭಳ್ ಆಯ್ಲೆಂ.

ಬುರ್ಗ್ಯಾಂಕ್ ಕಾಣಿಯೊಂ ತಯಾರ್ ಕರ್ಚಾ ವಾವ್ರಾಂತ್, ಮ್ಹಜ್ಯಾಚ್ಚ್ ಜಿಣಿಯೆಚೆಂ ಏಕ್ ಖಾಸ್ಗಿ ಸನ್ನಿವೇಶ್ ಮುಖಿಂ ದವರ್ಚಾ ಅಯಿನ್ನ್ ವ್ಹಗ್ತಾ, ಏಕ್ ರೊಮ್ಯಾಂಟಿಕ್ ಕೆಸೊಳೆಚೆಂ ಜನಮ್ ಜಾಲೆಂ, ಮ್ಹಜ್ಯಾ ಜಿಣಿಯೆಚಾ ಪಯ್ಲ್ಯಾ ಮೊಗಾಚೆಂ!!

ಪಯ್ಲೊ ಮೋಗ್!! 
ದೊರಿ - ಲಾಟೊ ಆನಿಂ "ಶಿದಿ".

ಕೊಣೇಂಯ್ ಆಪ್ಲ್ಯಾ ಆಪ್ತ್ ಮಿತ್ರ್ - ಮಿತ್ರಿಣ್ಯ್ಯಾಂ ಸಾಂಗಾತಿ ಏಕ್ ಸಾಂಜ್ ಪಾಶಾರ್ ಕೆಲ್ಯಾ ಜಾಲ್ಯಾರ್ ಖಂಡಿತ್‌ಯೀ, ತುಜೆಂ - ಮ್ಹಜೆಂ ಸಂಭಾಶಣ್, ನೆಣ್ತ್ಯಾಪಣಾರ್ ಥಾವ್ನ್ ಧರ್ಲೆಲೆಂ, ಬುರ್ಗ್ಯಾ ಪ್ರಾಯ್ ಅನಿಂ ಮುಖಾರ್ ಮುಖಾರ್ ವಚೊನ್, ಹೈಸ್ಕೂಲ್ - ಕೊಲೆಜ್, ಉಪ್ರಾಂತ್ ತರ್ನಾಟ್ಪಣ್, ಕಾಮಾಚಿ ತಲಾಶ್ ಆನಿಂ ಕಾಜಾರಾ ಮ್ಹಣಾಸಾರ್ ತೆಂಕ್ತಾತ್. ಹ್ಯಾ ಗಜಾಲಿಂನಿಂ ತರ್ನಾಟ್ಪಣಾಚಾ ಉಂಬ್ರಾರ್ ಘಡ್ಲೆಲಿಂ ಏಕ್ - ದೋನ್ ಘಡಿತಾಂ, ತಾಚೆ ಥಾವ್ನ್ ಉಬ್ಜಾಲ್ಲ್ಯೊ ಘುಂವ್ಡ್ಯೊ ಚಡ್ ಪ್ರಮುಖ್ ಸ್ಥಾನ್ ಘೆತಾತ್. ಹ್ಯಾ ಘುಂವ್ಡ್ಯಾ ಮಧೆಂ, ತರ್ನಾಟ್ಪಣಾಚಾ ಪಯ್ಲ್ಯಾ ಮೊಗಾಚೊ, ಜೊ ತೆದ್ನಾಂ ’ನೆಣಾರ್ಪಣಾನ್ ಆಧಾರ್ಲಲೊ’ ಪಯಿಲ್ಲೆಂ ಸ್ಥಾನ್ ಘೆತಾತ್ ಮ್ಹಳ್ಳ್ಯಾರ್ ಅತಿಶೇಯ್ ಜಾಂವ್ಚೆಂ ನಾಂ. ಅಶೆಂಚ್ಚ್ ಘಡ್ಲೆಂ ಮ್ಹಜ್ಯಾ ಉಣ್ಯಾ ಭಾವಾಡ್ತಾಚ್ಯಾ ಗುಂಡಾಯೆಂತ್.

ಕಾಂಯ್ ತೀಸ್ ವರ್ಸಾಂ ಆದ್ಲೆಂ ಘಡಿತ್, ತೆದ್ನಾಂ ಮ್ಹಜೆಂ ಪಿ.ಯು.ಸಿ. ಚೆಂ ಪಂಚಾಂಗ್ ಸೊಡುನ್, ಜಾವ್ನ್ ಮುಖ್ಲ್ಯಾ ಶಿಕ್ಪಾಚಿ ಬುನ್ಯಾದಿ ತೆವ್ಶಿಂ ಪಾವ್ಲಾಂ ಕಾಡ್ಚಾ ಉಮೆದೆಂತ್, ಮ್ಹಜ್ಯಾಕೀ, ಏಕ್ - ದೋನ್ ತೀನ್ ವರ್ಸಾಂ ಮುಖಾರ್ ಆಸ್ಲೆಲ್ಯಾ ಮ್ಹಜ್ಯಾ ಇಷ್ಟಾಚಾ ಘರ್ಚೆಂ ಆನಿಂ ತಾಂಚ್ಯಾ ಆಂಗ್ಣಾಚ್ಯಾ ಕೊನ್ಶಾರ್ ರಾಜ್ ಕರ್ಚಾ ಭಾಗೆವಂತ್ "ಬಾಂಯ್ಚೆಂ" ದರ್ಶನ್ ಸದಾಂಚ್ಚ್ ಜಾತೆ ಆಸ್ಲೆಲೆಂ.

ಇಷ್ಟಾಕ್ ಮ್ಹೆಳ್ಚಾ ಉಮೆದಿಚಾಕೀ, ಬಾಂಯ್ಚಾ ಕಾಟ್ಯಾರ್ ಎಕ್ಸುರೆಂ ರಾಜ್ ಕರ್ಚಾ ತಾಂಬ್ಯಾನ್ ವೋಪ್ ಕಾಡುನ್ ಥಳ್-ಥಳ್ಚಾ "ಶಿದಿ"ಯೆಕ್ ದೆಖ್ಚಿ ಉಮೆದ್ ಚಡ್ಪಡ್ತಾಲಿ, ಜಸೆಂಗೀ ಪಯ್ಲ್ಯಾನ್ ಪಯ್ಲೆಂ ಸಯ್ರಿಕೆಕ್ ಗೆಲ್ಲ್ಯಾ ತರ್ನಾಟ್ಯಾಪರಿಂ!!

ಭುರ್ಗಿ ಪಿರಾಯ್, ಜಿವಿತಾಂತ್ ಕಿತೆಂ ಕಿತೆಂ ಜಾತಾ!

ಮ್ಹತಿಂತ್ ಕಿತೆಂಗೀ ಆಪಾ-ಲಿಪಾ ಘುಂವ್ತಾ!!

ಹರ್ದ್ಯಾಂತ್ ಕಿತೆಂ ತರೀ ಕಾಂಡ್ತಾ!!!

ದೊಳ್ಯಾಂಕ್ ಗಯ್ರೆಂ ಗಯ್ರೆಂ ಲಾಗ್ತಾ!!!

ತೆಂ ಸಾಂಗೊಂಕೀ ಎಕಾ ಥರಾಚಿ ಲ್ಹಜ್ ಆನಿಂ ದಾಕ್ಶೆಣ್.

ತಾಕಾ ಲಾಗಯ್ತ್ ಶಿರಾಂ - ಶಿರಾಂನಿಂ ರಾಜ್ ಕರ್ಚಿ ಏಕ್ ಆಡ್ಹೂಕ್ ಭಿರಾಂತೆಚಿ ಕಾಂತವ್ಣಿ.

ಹ್ಯೊ ಸಗ್ಳ್ಯೊ ಆಡ್ಕಳ್ಯೊ ಉತರ್ತಾನಾಂ, ವೇಳ್-ಕಾಳ್ ರಾವ್ತಾ??? ಬಾಂಯ್ಚಾ ಕಾಟ್ಯಾರ್ ಸೊಬ್ಚಾ "ಶಿದಿ"ಯೆಕ್ ಕೊಣಿಂ ಎಕ್ಸುರೊ ಸೊಡಿತ್??

ಏಕೆ ಸಾಂಜೆರ್ "ಶಿದಿ" ಲಾಟ್ಯಾರ್ ಉಮ್ಕಳ್ತಾ. 
ಹಾಂವ್ ಪುರ್ಸತ್ ಸೊಧುನ್, ಮ್ಹಜ್ಯಾ ಇಷ್ಟಾಚಿ ನದರ್ ಚುಕವ್ನ್ ಬಾಂಯ್ಚಾ ಕಾಟ್ಯಾರ್ ಪಾವ್ತಾಂ.

"ಶಿದಿ" ಬಾಂಯ್ತ್ ದೆವೊಂ...? ವಿಚಾರಿ ಹಾಂವ್. 
"ಶಿದಿ" ದಾಕ್ಶೆಣೆನ್ ದೊಡ್ತಾ, ಹಾಂವ್ ಸವ್ಕಾಸ್ ಬಿಂಯಾನ್ ಬಿಂಯಾನ್ ದೊರಿಯೆಸಂಗಿ "ಶಿದಿ"ಯೆಕ್ ಬಾಂಯ್ತ್ ದೆಂವಯ್ತಾಂ.

"ದೊರಿ ತಿಕ್ಕೆಶೆ ಹಾಲಾಂವ್, ಉದಾಕ್ ಭರ್ತೆಲೆಂ...!" ಹಾಂವ್ ಪಾದ್ದೆವ್ನ್, ಪಾದ್ದೆವ್ನ್ ಘುಣ್ಗುಣ್ತಾಂ.
"ಶಿದಿ" ಬಾಂಯ್ತ್‌ಲ್ಯಾ ಉದ್ಕಾಚಿ ಮ್ಹಝಾ ಭಗುನ್ ಬುಳ್ಬುಳೆ ಸೊಡ್ತಾ.

ತ್ಯಾ ಬುಳ್ಬುಳ್ಯಾಂಚಾ ಭಳಾನ್, ಹಾಂವ್ ದೊರಿಯೆಕ್ ಧರುನ್ ಲಾಟ್ಯಾಕ್ ಉಮ್ಕಾಳ್ತಾಂ.
"ಶಿದಿ" ವಯ್ರ್ ವಯ್ರ್ ಯೆತಾ, ಕಾಟ್ಯಾ ಪರ್ಯಾಂತ್. 
ಉದ್ಕಾನ್ ಭರ್ಲೆಲ್ಯಾ "ಶಿದಿ"ಯೆಚಿ ಸೊಭಾಯ್ ಪಳಂವ್ಚಾ ನಿಬಾನ್, "ಶಿದಿ"ಯೆಕ್ ಆನೀಕೀ ಥೊಡೊ ವೇಳ್ ಲಾಟ್ಯಾರ್ ಉಮ್ಕಾಳೊಂಕ್ ಸೊಡ್ತಾಂ.

ಮ್ಹಜ್ಯಾ ಜಿವಾಂತ್ ಉಲ್ಲಾಸ್ ಭರ್ತಾ, ಫುಗ್ಗ್ಯಾಂತ್ ವ್ಹಾರೆಂ ಭರ್ಲೆಲೆಪರಿಂ!

ಆತಾಂ "ಶಿದಿ" ಎಕ್ಸುರಿ ನ್ಹಂಯ್, ಉದ್ಕಾಸಾಂಗಾತಿಂ "ಶಿದಿ" ಖೂಬ್ ಸೊಭ್ತಾ, ಥಂಡ್ ಉದ್ಕಾಚಾ ವೆಂಗೆಂತ್ ತಿಕ್ಕೆಶೆ ಆಂಕುಡ್ತಾ ತರೀ, ಆಂಭೊರ್- ಪಿಕಿ ಹಾಸ್ತಾ!!

ಶಿದಿ ಧರ್ಚಾ ನಿಭಾನ್ ದೊರಿಯೆಚೊ ಸ್ಪರ್ಷ್ ಭೆಷ್ಟೆಂಚ್ಚ್ ಕರ್ತಾಂ.

ಎಕಾ ಥರಾಚಿ ಧಾದೊಸ್ಕಾಯ್ ಭಗ್ತಾ. "ಶಿದಿ"ಯೆಕ್ ಎಕ್ ಸಾಂಗಾತ್ ದಿಲೊ ನ್ಹಂಯ್ ಹಾವೆಂ? ಹಿಂವೆನ್ ಆಂಕುಡ್ಲೆಲ್ಯಾ "ಶಿದಿ"ಯೆಕ್ ಬಾಂಯ್ಚಾ ಗುಂಡಾಯೆಂತ್ಲೆ ವಯ್ರ್ ಕಾಡ್ಲೆಂ ನ್ಹಂಯ್ ಹಾವೆಂ? ಮ್ಹಜ್ಯಾ ಹಾತಾಚಾ ಉಭೆನ್, ಬಿಜ್ಲೆಲ್ಯಾ "ಶಿದಿ"ಯೆಕ್ ಜೀವ್ ಭರ್ತಾ. ಮ್ಹಜೆ ಹಾತ್ ಕಾಂಪ್ತಾತ್, ಆಲ್ತಾರಿರ್ ತುರಿಫುಲ್ ಧಲಯ್ತಾನಾಂ ಆಲ್ತಾರ್ ಭುರ್ಗೆ ಕಾಂಪ್ಲೆಲ್ಲ್ಯಾಪರಿಂ.

ಹಾಂವ್ "ಶಿದಿ" ಧಂಯ್ಚ್ ಸೊಡುನ್ ಮ್ಹಜ್ಯಾ ಇಷ್ಟಾಚಾ ಘರಾ ತೆವ್ಶಿಂ ಉಡ್ಕಿ ಮಾರ್ತಾಂ. "ಶಿದಿ" ಪರತ್ ಬಾಂಯ್ತ್ ದೆವಂವ್ಚಿ ಗರಜ್ ಪಡನಾಂ ಜಾಂವ್ಚಾಕ್.

ತಿತ್ಲ್ಯಾರ್, ಮ್ಹಜ್ಯಾ ಇಷ್ಟಾಚಿ ವ್ಹಡ್ಲಿ ಭಯ್ಣ್ ಬಾಂಯ್ಚಾ ಕಾಟ್ಯಾಕ್ ಪಾವ್ತಾ. "ಶಿದಿ"ಯೆಂತ್ಲೆಂ ಉದಾಕ್ ಕೊಳ್ಶಾಂತ್ ಭರುನ್, ಪರತ್ ದೋನ್-ತೀನ್ ಪಾವ್ಟಿಂ ಬಾಂಯ್ತ್‌ಲೆಂ ಉದಾಕ್ ವೋಡ್ನ್ ಕಾಡುನ್, ಕೊಳ್ಶಾಂತ್ ಭರ್ತಾ.

ವ್ಹಡ್ ಜಯ್ತ್ ರೆಡೊ ಕೊಳ್ಸೊ ತಿಚ್ಯಾ ಹಾಂಡಿಯೆರ್ ಚಡ್ಲೆಲಿ ಸೊಭಾಯ್ ಪಳವ್ನ್ಂಚ್ಚ್ ಅಭಲ್ "ಶಿದಿ" ಎಕ್ಸುರಿ ರಡ್ತಾ, ಫರತ್, ಕೆದ್ನಾಂ ಮ್ಹಜೆಂ ಸ್ಪರ್ಶ್ ಮೆಳಾತ್".

ಪುಣ್ ಫರತ್ "ಶಿದಿ"ಯೆರ್ ದೀಷ್ಟ್ ಘಾಲ್ಚಾ ಪಯ್ಲೆಂ, "ಶಿದಿ" ಬಾಂಯ್ತ್ ಲಕ್ತಾ, ದೊರಿಯೆಚೊ ಆಧಾರ್ ನಾತ್ಲೆಲಿ "ಶಿದಿ" ಥಂಯ್ಚ್ ಮೌನ್‌ಪಣಿಂ ಉದ್ಕಾಚಾ ವೆಂಗೆಂತ್ ಥಳಾಕ್ ಪಾವ್ತಾ ಅನಿಂ ಬುಳ್ಬುಳ್ಯಾನಿಂ ಜಾಹೀರ್ ಕರ್ತಾಂ, ಹಾಂವ್ ಪಾವ್ಲ್ಯಾಂ ಥಳಾಕ್!!

ಇತ್ಲ್ಯಾರ್ ಸಂಪ್ತಾ, ಹ್ಯಾ ಮ್ಹಜ್ಯಾ ’ಪಯ್ಲ್ಯಾ ಮೊಗಾಚೆಂ’ ಬಾಂಯ್ಚಾ ಕಾಟ್ಯಾ ವ್ಹಯ್ಲ್ಯಾ ಎಕ್ಸುರ್‍ಯಾ ನಿರ್ಭಲ್ ಮ್ಹಜ್ಯಾ ಮೊಗಾಳ್ "ಶಿದಿ"ಯೆಚೆಂ ಜಿಣೆಂ.

ಕಾಗ್ದಾಚಿ ದೋಣ್ ರಚುನ್ ಸಾಸ್ಣಾಚ್ಯಾ ವಿಶೆವಾಚೆ ದೋನ್ ಸಂದೇಶ್ ವಿಣುನ್, ಬಾಂಯ್ತ್ ಸೊಡ್ತಾಂ. ಮ್ಹಜ್ಯಾ ಅಧುರ್ ಯಾ ಮೊಗಾ ಜಿವಿತಾಚಾ ಉಂಡಿಯೆಕ್ ಧರ್ಚಾ ವಾವ್ರಾಂತ್ "ಶಿದಿ" ಸುಫಳ್ ಜಾಂವ್ಕ್!!

ಹಿ "ಶಿದಿ" ಬಾಂಯ್ತ್‌ಲಿ, ವಯ್ರ್ ಯೆಂವ್ಚಾ ವಗ್ತಾ, ಕಾಕಿಯೆಂತ್ಲಿ ಕೆಸೊಳಿ ಪರತ್ ಉಸ್ಕೆತೆಲಿ.

ರಾಕೊನ್ ರಾವಾ, "ಪಯ್ಲ್ಯಾ ಮೊಗಾಚ್ಯಾ ಪೋಸ್ಟ್ ಮೊರ್ಟಮಾಕ್", ಯೆಂವ್ಚಾ ಕಿಸ್ತಾಂತ್.

ಖಾಕಿಯೆಂತ್ಲಿ ಕೆಸೊಳಿ: 1, 2, 3, 4, 5

ಸಾಹಿತಿಲಾಗಿಂ ಸಂವಾದ್

ದಾಯ್ಜ್ ಪಾನಾಂಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications