ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 7. ಕ್ರಿಸ್ಮಸ್ ಕಾಣಿಕ್
ಪಾಟ್ಲ್ಯಾ ವೀಸ್ ವರ್ಸಾಂ ಥಾವ್ನ್ ಕೊಂಕ್ಣಿ, ಕನ್ನಡ ಭಾಸಾಂನಿ ಲಗ್ಭಗ್ 175 ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್, ಥೊಡ್ಯಾಂಕ್ ಇನಾಮಾಂ ಲಾಭ್ಲ್ಯಾಂತ್, ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಮ್ಹಳ್ಳೆ ತೀನ್ ಮಟ್ವ್ಯಾ ಕಾಣ್ಯಾಂಚೆ ಬೂಕ್ ಪರ್ಗಟ್ಲ್ಯಾತ್. ಹಾಣೆಂಚ್ ಸಂಪಾದನ್ ಕೆಲ್ಲ್ಯಾ ’ಕುಳ್ವಾರ್ಚೆಂ ದಾಯ್ಜ್’, ’ಕುವೇಯ್ಟ್ಗಾರಾಂಚೊ ಝೆಲೊ ವಿಶೇಸ್ ಅಂಕೊ’ ಬುಕಾಂನಿ ಕಾಣ್ಯೊ ಪರ್ಗಟ್ ಜಾಲ್ಯಾತ್. ಆಕಾಶ್ವಾಣಿಚೆರ್ ಮಟ್ವ್ಯೊ ಕಾಣ್ಯೊ ಪ್ರಚಾರ್ ಜಾಲ್ಯಾತ್, ’ಕಥಾದಾಯ್ಜ್’ ತಶೆಂಚ್ ಪಾಟ್ಲ್ಯಾ ತೀನ್ ವರ್ಸಾಂ ಥಾವ್ನ್ ’ಮುಖಾಂ’ ಮ್ಹಳ್ಳೆಂ ಮಟ್ವ್ಯಾ ಕಾಣ್ಯಾಂಚೆ ಅಂಕಣ್ ಚಲವ್ನ್ ಆಸಾ. ಸಾಮಾಜೆಚಾ ಪ್ರಸ್ತುತ್ ಘಟನಾಂಚೆರ್ ಕಾಣ್ಯೊ ಬರಂವ್ಚೆಂಚ್ ಹಾಕಾ ಪಸಂದ್.
ವಲ್ಲಿ ಕ್ವಾಡ್ರಸ್
ತಾರಿಕ್: ದಸೆಂಬರ್ 24
ವೇಳ್: ರಾತಿಚಿಂ ಇಕ್ರಾ ವೊರಾಂ
ಥಂಡಿಯೆನ್ ಎದೊಳ್ಚ್ ಗುಟ್ಲೊನ್ ನಿದ್ಲೆಲ್ಯಾ ಪ್ರಥ್ವೆಕ್ ಅನಿಕ್ಯ್ ಗುಟ್ಲಾಶೆಂ ಕರುಂಕ್ ಯೆವ್ಜಣ್ ಘಾಲ್ಲಿ ಜಾಯ್ಜಯ್, ಹಾಕಾ ಸಾಂಗಾತ್ ದಿಂವ್ಚಾ ವಾರ್ಯಾಚೆಂ ವಾರೆಂಯ್ ಆಜ್ ಚಡ್ ಥಂಡ್ ಮ್ಹಣ್ ಭೊಗ್ಲೆಂ, ಥೊಡ್ಯಾಚ್ ಘಡಿಯಾಂನಿ ಇಗರ್ಜೆಂತ್ ವ್ಹಡಾ ಸಂಭ್ರಮಾಚೆಂ ಮೀಸ್ ಆಸ್ತೆಲೆಂ, ಫೆಸ್ತಾಚೆಂ ಮುಡ್ದೊಮ್ ಮ್ಹಜಾಚ್ ನಾಂವಾರ್ ಆಸ್ಲ್ಲೆಂ, ಎದೊಳ್ಚ್ ಇಗರ್ಜೆಂತ್ ಮಿಸಾಚಿ ಘಾಂಟ್ ಜಾಲ್ಲಿ ಆನಿ ಕ್ಸಿಸ್ಮಸ್ ಕ್ಯಾರಲ್ಸ್ ಆಯ್ಕೊಂಕ್ ಮೆಳ್ತಾಲಿಂ. ತ್ಯಾ ಶಿವಾಯ್ ಹೆಂ ಕ್ರಿಸ್ಮಸ್ ಮ್ಹಜಾ ಜಿಣ್ಯೆಂತ್ ಸಭಾರ್ ಕಾರಾಣಾಂಕ್ ಲಾಗೊನ್ ಚಡ್ ಸಂಭ್ರಮಾಚೆಂಚ್.
ಪಯ್ಲೆಂ - ಪರ್ಗಾವಾಂತ್ ಪಾಟ್ಲಿಂ ಇಕ್ರಾ ವರ್ಸಾಂ ಖರ್ಚುನ್ ಪಯ್ಲೆ ಪಾವ್ಟಿಂ ಗಾಂವ್ಚೆಂ ಕ್ರಿಸ್ಮಸ್ ಆಚರಣ್ ಕರ್ಚೊ ಆವ್ಕಾಸ್.
ದುಸ್ರೆಂ - ಮ್ಹಜಾ ಪರ್ಗಾಂವಾಂತ್ ಜಲ್ಮೊನ್ ವ್ಹಡ್ ಜಾಲ್ಲ್ಯಾ ಬಾಯ್ಲೆಕ್ ಹೆಂ ಪಯ್ಲೆಂ ಗಾಂವ್ಚೆಂ ಕ್ರಿಸ್ಮಸ್.
ಇಗರ್ಜೆಚಾ ಲಾಗಿಂಚ್ ಮ್ಹಜೆಂ ಘರ್ ತರ್ಯ್ ಎಕಾ ಮಯ್ನ್ಯಾಚಾ ರಜೆರ್ ಆಯಿಲ್ಲ್ಯಾ ಮ್ಹಾಕಾ ಮ್ಹಾಕಾ ಜಾಯ್ತಿಂ ಕಾಮಾಂ ಕರುಂಕ್ ಆಸ್ಲ್ಲಿಂ, ಗಾಂವಾಂತ್ ಏಕ್ ಹಾಫ್ತೊ ರಾವ್ತಾಂ ತರ್ಯೀ ಉಪ್ರಾಂತ್ ಮಾರಿಶಸ್, ಸಿಂಗಾಪುರ್, ಆಸ್ಟ್ರೇಲಿಯಾ ವಚೊಂಕ್ ಚಿಂತ್ಲ್ಲೆಂ. ಗಾಂವ್ ಸೊಡ್ನ್ ದಾಕ್ಡೆಚ್ ಉತರ್ಲೆ ಮ್ಹಣ್ತಾನಾ ಗಾಂವ್ಚೊ ಹವೊ, ಜಿನೊಸ್, ಕಾಲೆತಿ ಬದಲ್ಲ್ಯಾ, ಆನಿ ಗಾಂವ್ಚಾ ಧುಳಿಂತ್ ಮ್ಹಜಾ ಬಾಯ್ಲೆಕ್ ಹೊಂದ್ವೊನ್ ಜಾಂವ್ಚಿನಾ ದೆಕುನ್ ಕಾಂಯ್ ತ್ರಾಸ್ ಜಾಯ್ನಾಯೆ ಮ್ಹಣೊನ್ ಹಾವೆಂ ಹೊಟೆಲಾಂತ್ಚ್ ರಾಂವ್ಚಿ ವೆವಸ್ತಾ ಕೆಲ್ಲಿ, ಆನಿ ಭಾಡ್ಯಾಚಿ ಮರ್ಸಿಡಿಸ್ ಗಾಡಿಯ್ ಕೆಲ್ಲಿ.
ರಾತಿಚೆಂ ಸಂಭ್ರಮಿಕ್ ಮೀಸ್ ಆಯ್ಕೊಂಕ್ ಹಾಂವ್ ಎದೊಳ್ಚ್ ಸೂಟ್ ಬೂಟ್ ನೆಸೊನ್, ಆಂಗ್ಭರ್ ಪರ್ಮಳಿಕ್ ಸೆಂಟ್ ವೊತುನ್, ಹಾತಾಕ್ ರೋಲೆಕ್ಸ್ ವಾಚ್ ಭಾಂದುನ್, ಬೊಟಾಂನಿ ಚಾರ್ ಮುದಿಯೊ ಘಾಲುನ್, ದೊಳ್ಯಾಂಕ್ ರಾತಿಚೆಂ ವೋಕ್ಲ್ ಘಾಲ್ನ್, ಪಾಂಯಾಂಕ್ ಪೋಲಿಶ್ಡ್ ಕಾಳೆ ಮೊಚೆ ಘಾಲ್ನ್ ಸೊಭ್ತಾಲೊಂ. ತೆಚ್ಚ್ ಪರಿಂ ಮ್ಹಜಿ ವಕಾಲ್ಯ್ ಕಾಂಯ್ ಪಾಟಿಂ ನಾತ್ಲ್ಲೆಂ, ಗಳೊಭರ್ ವಿಸ್ತಾರ್ಲ್ಲೆಂ ವಜ್ರಾಚೆಂ ನೆಕ್ಲೆಸ್, ಸ್ಲೀವ್ಲೆಸ್ ಬ್ಲಾವ್ಜಾಕ್ ವೆಂಗೊನ್ ಕಾಳೊ ಕೋಟ್ ತಾಣೆಂಯ್ ಶಿರ್ಕಾಯಿಲ್ಲೊ, ಹೀಲ್ಸಾಚೆ ಮೊಚೆ ಆನಿ ಆಂಗ್ಭರ್ ಶಿಂಪ್ಡಾಯಿಲ್ಲ್ಯಾ ಪರ್ಮಳಿಕ್ ಸೆಂಟಾನಿಮ್ತಿಂ ಸಗ್ಳೆಂ ಕಾರ್ ಪರ್ಮಳ್ತಾಲೆಂ.
ಇಗರ್ಜೆಕ್ ರಿಗ್ಲ್ಲೆಪರಿಂಚ್ ಸಭಾರಾಂಚೆ ದೊಳೆ ಆಮ್ಚೆರ್ ಖಂಚ್ಲೆ. ಎದೊಳ್ಚ್ ಮ್ಹಾಕಾ ರಾಕೊನ್ ಆಸ್ಚಾ ಲಿತುರ್ಜಿಕ್ ಮಂಡಳಿಚಾ ಎಕ್ಲ್ಯಾನ್ ವಾಚಾಪ್ ವಾಚುಂಕ್ ಮ್ಹಾಕಾಚ್ ನಮ್ಯಾರ್ಲ್ಲೊ.
ಹಾಂವ್ ಗಾಂವಾಕ್ ಆಯಿಲ್ಲಿ ಖಬಾರ್ ಸರ್ವಾಂಕ್ ಸಂತೊಸ್ ಹಾಡುಂಕ್ ಪಾವ್ಲ್ಲಿ ಮ್ಹಣ್ ಫಿರ್ಗಜೆಚಾ ವೆವೆಗ್ಳ್ಯಾಜಮಾತೆಚಾ ಅಧ್ಯಕ್ಶಾಂನಿ ಹುದ್ದೇದರಾಂನಿ ಮೆಳೊಂಕ್ ಯೆತಾನಾಂಚ್ ಕಳ್ತಾಲೆಂ. ಇಗರ್ಜೆಮುಖಾರ್ ವ್ಹಡ್ಲೊ ಜಯ್ತ್ ಕ್ರಿಸ್ಮಸ್ ಗೊಟೊ ಭಾಂದಯಿಲ್ಲೊ, ತ್ಯಾ ಶಿವಾಯ್ ಎದೊಳ್ಚ್ ಹಾವೆಂ ಯುವಜಣಾಂಚಾ ಸಂಘಾಕ್, ಫಿರ್ಗಜ್ ಮಂಡಳೆಕ್, ಕ್ರಿಸ್ಮಸ್ ಕ್ಯಾರಲ್ಸಾಕ್, ಆಲ್ತಾರ್ ಬುರ್ಗ್ಯಾಂಚಾ ಸೊಡಿಲಿಟಿಕ್ ಮ್ಹಣ್ ದರಬಸ್ತ್ ದಾನ್ ದಿಲ್ಲೆಂ ದೆಕುನ್ ಇಗರ್ಜೆಚಾ ಆಯ್ಚಾ ಸಂಭ್ರಮಾಕ್ ನವೊ ಜೀವ್ ಭರ್ಲ್ಲೊ ಮ್ಹಣ್ ಪಾದ್ರ್ಯಾಬಾಚಾ ತೊಂಡಾಚೊ ಜಿನೊಸ್ ಉಚಾರ್ತಾಲೊ.
ಮೀಸ್ ಜಾಲೆಂ, ಹಾಂವೆಂ ವಾಂಜೆಲ್ ವಾಚ್ಲೊ, ಮಿಸಾಕ್ ಹಾಜರ್ ಆಸ್ಲ್ಲ್ಯಾ ಪಾಂಯ್ಶಿಂ ಲೊಕಾಂಕ್ ಹಾಂವ್ ಘಡ್ಯೆನ್ ವಳ್ಕಿಚೊ ಜಾಲೊಂ. ಮೀಸ್ ಜಾತಚ್ ಕ್ರಿಸ್ಮಸಾಚಿ ಕೇಕ್ ಏಲಮ್ ಆಸ್ಲ್ಲಿ, ಹಾವೆಂಚ್ ತಿ ಕೇಕ್ ಧಾ ಹಜಾರ್ ರುಪ್ಯಾಂಕ್ ಘೆತ್ಲಿ ಆನಿ ಫಿರ್ಗಜೆಂತ್ ದುಬ್ಳ್ಯಾ ಖಾತಿರ್ ವಾವ್ರ್ ಕರ್ಚಾ ಸಾಂತ್ ವಿಶೆಂತ್ ಪಾವ್ಲ್ ಸಭೆಚಾಂಕ್ ದಿಲಿ. ಸಾಂತಾಕ್ಲೋಸಾಕ್ ಹಾವೆಂ ಹಜಾರಾಂನಿ ಇನಾಮಾಂ ದಿಲ್ಲಿಂ ತಿಂ ತಾಣೆಂ ಮ್ಹಜಾಚ್ ನಾಂವಾರ್ ಲೊಕಾಂಕ್ ವಾಂಟ್ಲಿಂ, ಮೀಸ್ ಭಾರಿಚ್ ಸಂಭ್ರಮಾನ್ ಜಾಲೆಂ.
ಪುಣ್ ಮೀಸ್ ಸಂಪ್ತಚ್ ಲೋಕ್ ಆಪಾಪ್ಲ್ಯಾ ಘರಾ ಪಾಟಿಂ ಗೆಲೊ ತಶೆಂ ಹಾಂವ್ ಮ್ಹಜಾ ಬಾಯ್ಲೆಕ್ ಘೆವ್ನ್ ಆಮ್ಚಾ ಘರಾ ಪಾಟಿಂ ಗೆಲೊಂ. ಮ್ಹಜಾ ಬಾಯ್ಲೆಕ್ ಹೆಂ ಕ್ರಿಸ್ಮಸ್ ಕಿತ್ಯಾಕ್ಗೀ ಚಪ್ಪೆ ಲಾಗ್ಲೆಂ ಮ್ಹಣ್ ತಾಚಾ ತೊಂಡಾಚೊ ಜಿನೊಸ್ ಸಾಂಗ್ತಾಲೊ. ಖಂಚೆಂ ತೆಂ ವಿದೇಶಿ ಕ್ರಿಸ್ಮಸ್, ಸಗ್ಳ್ಯಾನ್ ಮ್ಯೂಸಿಕ್, ಡ್ಯಾನ್ಸ್, ಪಾರ್ಟಿ, ಡೆಕೊರೇಶನ್. ವಾ! ಕಸಲೊ ಸಂಭ್ರಮ್? ಕಿತ್ಲಿಂ ಡ್ರಿಂಕ್ಸ್, ಕಿತ್ಲೆ ನಾಚ್! ಕಸಲಿ ಮಝಾ ತಿ ಪರ್ಗಾಂವ್ಚಿ ಆನಿ ಖಂಯ್ ಹೆಂ ಗಾಂವ್ಚೆಂ ಚಪ್ಪೆ ಕ್ರಿಸ್ಮಸ್?
’ಲೆಟ್ ಅಸ್ ಸೆಲೆಬ್ರೇಟ್ ದ ಪಾರ್ಟಿ ನೈಸ್ಲಿ ಡಾರ್ಲಿಂಗ್’ ಮ್ಹಣ್ ಹಾವೆಂ ಮ್ಹಜಾ ಬಾಯ್ಲೆಕ್ ಪೊಟ್ಲುನ್ ಕೀಸ್ ದಿತಾನಾ ಉಚಾರ್ಲೆಂ. ಕಿತ್ಯಾಕ್ ಕ್ರಿಸ್ಮಾಚಾಚಿ ಪಾರ್ಟಿ ಆಜ್ ರಾತಿಂ ಹೊಟೆಲಾಂತ್ ಹಾವೆಂಚ್ ಆಸಾ ಕೆಲ್ಲಿ, ತ್ಯಾ ಪಾರ್ಟೆಕ್ ಇಗರ್ಜೆಚಾ ಪಾದ್ರಿ ಥಾವ್ನ್ ಕೊನ್ವೆಂಟಾಚಾ ಸಿಸ್ಟರಾಂಕ್, ಫಿರ್ಗಜ್ ಮಂಡಳೆಚಾ ಅಧ್ಯಕ್ಶಾ ಥಾವ್ನ್ ತಾಲೂಕ್ ಅಫಿಸಾಚಾ ಅಧ್ಯಕ್ಶಾಚಾ ಸಾಂದ್ಯಾಂಕ್, ಬ್ಯಾಂಕಾಚಾ ಮೆನೆಜರಾಂ ಥಾವ್ನ್ ಪೋಸ್ಟ್ ಅಫಿಸಾಚಾ ಮೆನೆಜರಾಂಕ್, ಡಾಕ್ತರಾ ಥಾವ್ನ್ ವಕೀಲಾ ಪರ್ಯಾಂತ್ ಸರ್ವಾಂಕ್, ಸಮಾಜೆಚಾ ಗಣ್ಯ್ ವೆಕ್ತಿಂಕ್ ಆಪಯಿಲ್ಲೆಂ. ಇಕ್ರಾ ವರ್ಸಾಂ ಉಪ್ರಾಂತ್ ಗಾಂವಾಕ್ ಯೆಂವ್ಚೆಂ ಮ್ಹಣ್ತಾನಾ ಹಿ ಪಾರ್ಟಿ ಕಸಲ್ಯಾಚ್ ರಿತಿನ್ ವೆಸ್ಟಾರ್ನ್ ಪಾರ್ಟಿಚಾಕೀ ಉಣಿ ಜಾವ್ನ್ ಆಸಾನಾಯೆ ಮ್ಹಣೊನ್ ಶೆರಾಚಾ ಸ್ಪೆಶಲ್ ರಾಂದ್ಪ್ಯಾಂಕ್ ನಮ್ಯಾರುಂಕ್ ಮ್ಹಣ್ ಹಾವೆಂ ಪ್ರತ್ಯೇಕ್ ಹಿಶಾರೆ ದಿಲ್ಲೆ.
ತಾರಿಕ್: ದಸೆಂಬರ್ 25
ವೇಳ್: ಸಾಂಜೆಚಿಂ 7
ವೊರಾಂ
ಜಶೆಂ ಕ್ರಿಸ್ಮಸಾಚೊ ದೀಸ್ ಜೂನ್ ಜಾವ್ನ್ ಆಯ್ಲೊಗೀ ತಶೆಂ ಕ್ರಿಸ್ಮಸ್ ಪಾರ್ಟೆಚೊ ರಂಗ್ - ಜೀವ್ ಭರೊನ್ ಯೆತಾಲೊ, ಸಗ್ಳ್ಯಾಂನಿ ಸಂಗೀತ್, ಶೆರಾಚೆ ಎಮ್ಸಿ ಎದೊಳ್ಚ್ ಸುಟಾರ್ ಹಿಶಿನ್ ತಿಶಿನ್ ಪಾಸಾಯೊ ಮಾರ್ತಾಲೆ. ಖಾಂವ್ಚೆ ತಿತ್ಲೆಂ ಖಾಂವ್ಕ್, ಪಿಯೆಂವ್ಚೆ ತಿತ್ಲೆಂ ಪಿಯೆಂವ್ಕ್ ಕೊಣಾಕ್ಯ್ ಉಣೆಂ ಕರಿನಾಯೆ ಮ್ಹಣ್ ಹಾವೆಂ ಎದೊಳ್ಚ್ ತಾಕೀದ್ ದಿಲ್ಲಿ. ಹಿ ಪಾರ್ಟಿ ಮ್ಹಜಾ ಜಿಣ್ಯೆಂತ್ ಏಕ್ ಯಾದ್ಗಾರ್ ಪಾರ್ಟಿ ಜಾಂವ್ಕ್ ಹಾವೆಂ ಹರ್ಯೆಕಾ ರಿತಿನ್ ತಯಾರಾಯ್ ಕೆಲ್ಲಿ.
ಸಾಂಜೆರ್ ಸಾಡೆ ಸಾತ್ ವೊರಾಶೆಂ ಹಾಂವ್ ಬಾಯ್ಲೆಸವೆಂ ಹೊಟೆಲಾಕ್ ಪಾವ್ಲ್ಲೊಂ, ಎದೊಳ್ಚ್ ಥೊಡೆ ಸಯ್ರೆ ಥಂಯ್ ಪಾವ್ಲ್ಲೆ ಆನಿ ಮ್ಹಜಾ ಯೆಣ್ಯಾಕ್ ರಾಕ್ತಾಲೆ. ಥೊಡ್ಯಾಚ್ ವೆಳಾನ್ ಬಾಕಿಚೆ ಸಯ್ರೆ ಯೇಂವ್ಕ್ ಲಾಗ್ತಾನಾ ಸಂಗೀತ್ಕಾರಾಂನಿ ಅಪ್ಲೆಂ ಕಾಮ್ ಸುರು ಕೆಲ್ಲೆಂ. ಎಮ್ಸಿ ತವಳ್ ತವಳ್ ಮೈಕಾಚೆರ್ ಮ್ಹಜೆವಿಶ್ಯಾಂತ್ ತಾರಿಫೊ ಕರ್ತಾಲೊ.
ಎದೊಳ್ ಸಗ್ಳೆಂ ಹಾವೆಂ ಯೆವ್ಜಣ್ ಘಾಲ್ಲೆಪರಿಂಚ್ ಚಲ್ತಾಲೆಂ, ತಿಚ್ ಜಯ್ತಾಚಿ ಕೇಕ್ ಹಾವೆಂ ಖಾತರ್ಲಿ ಆನಿ ಲೊಕಾಂಕ್ ವಾಂಟ್ಲಿ, ಗಾಂವ್ಚೆ ಗಣ್ಯ್ ವೆಕ್ತಿ ಎದೊಳ್ಚ್ ಹಾತಾಂನಿ ಗ್ಲಾಸ್ ಘೆವ್ನ್ ಪಿಯೆತಾಲೆ, ಥೊಡೆ ನಾಚ್ತಾಲೆ, ಥೊಡೆ ಹಾಸ್ತಾಲೆ..
ಸಗ್ಳೆಂ ಚಿಂತ್ಲ್ಲೆಪರಿಂಚ್!!
ಥೊಡ್ಯಾಚ್ ವೆಳಾನ್ ಎಮ್ಸಿನ್ ಮ್ಹಾಕಾ ದೋನ್ ಸಬ್ದ್ ಉಲಂವ್ಕ್ ಮೈಕಾ ದೀವ್ನ್ ಸ್ಟೇಜಿಕ್ ಆಪಯ್ತಾನಾ ಮ್ಯೂಜಿಕ್ ರಾವ್ಲೆಂ, ಹಾವೆಂ ಉಲಂವ್ಕ್ ಸುರು ಕೆಲೆಂ, ಪರ್ಗಾಂವಾಂತ್ ಕಶೆಂ ಹಾಂವ್ ವರ್ಸಾನ್ ವರಸ್ ಕ್ರಿಸ್ಮಸ್ ಆಚರಣ್ ಕರ್ತಾನಾ ಗಾಂವ್ಚಾಂಚೊ ಉಡಾಸ್ ಕಾಡ್ತಾಂ ಮ್ಹಳ್ಳೆವಿಶಿಂ ಉಲವ್ನ್ ಅಪ್ಣಾಥಾವ್ನ್ ಗಾಂವಾಂತ್ ಜಾಯ್ತೆಂ ಬರೆಂಪಣ್ ಕರುಂಕ್ ಹ್ಯಾ ವರ್ಸಾಚಾ ಕ್ರಿಸ್ಮಾಸಾ ಲೆಖಾರ್ ಇಗರ್ಜೆಚಾ ವಿಧ್ವಿಂಚಾ ಆಶ್ರ್ಯಾಕ್ ಏಕ್ ಲಾಕ್, ಪ್ರಾಯೆಸ್ತಾಂಚಾ ಘರಾ ಏಕ್ ಲಾಕ್, ಅನಾಥ್ ಆಶ್ರ್ಯಾಕ್ ಏಕ್ ಲಾಕ್, ಇಸ್ಕೊಲಾಚಾ ಭಾಂದ್ಪಾಕ್ ದೋನ್ ಲಾಕ್, ಇಗರ್ಜೆಚಾ ಹೊಲಾಕ್ ದೋನ್ ಲಾಕ್ ದಾನ್ ದಿತಾ ಮ್ಹಣ್ ಪರ್ಗಟ್ಣಿ ಕರ್ತಾನಾ ಹೊಲಾಂತ್ ಭರ್ಲ್ಲ್ಯಾ ಲೊಕಾಂನಿ ತಾಳಿಯಾಂಚಾ ಆವಾಜಾನ್ ಸಗ್ಳೆಂ ಹೊಲ್ಚ್ ಹಾಲಯ್ಲೆಂ.
ತಿತ್ಲ್ಯಾರ್ ಹೊಲಾಚಾ ಮುಖ್ಲ್ಯಾನ್ ಹೊಲಾಭಿತರ್ ಆಯಿಲ್ಲಿ ಎಕ್ಲಿ ಮಧ್ಯಮ್ ಪ್ರಾಯೆಚಿ ಬಾಯ್ಲ್ ಎಕ್ಲ್ಯಾ ದೊಗಾಂಲಾಗಿಂ ಸವಾಲಾಂ ಕರುನ್ ಶೀದಾ ಮ್ಹಜೆಸರ್ಶಿಂ ಆಯ್ಲಿ. ತಿಣೆಂ ಅಪ್ಲಿ ವಳೊಕ್ ಸಾಂಗ್ತಚ್ ಮ್ಹಾಕಾ ಕಳ್ಳೆಂ ಹಿ ಪ್ರಾಯೆಸ್ತಾಂಚಾ ಆಶ್ರ್ಯಾಚಿ ವಡೀಲ್ನ್ ಮ್ಹಣ್. ಭೋವ್ಶಾ ಹಾವೆಂ ಭಾಸಾಯಿಲ್ಲೊ ಏಕ್ ಲಾಕ್ ರುಪ್ಯಾಕ್ ಅರ್ಗಾಂ ಪಾಟಂವ್ಕ್ ತಿ ಆಶೆತಾ ಆಸ್ಯೆತಾ ಮ್ಹಣ್ ಎಮ್ಸಿಕ್ ಆಪಂವ್ನ್ ತಿಕಾ ದೋನ್ ಸಬ್ಧ್ ಉಲಂವ್ಕ್ ಆವ್ಕಾಸ್ ಮಾಗ್ಲೊ.
ತಿಣೆಂ ದಾಕ್ಶೆವ್ನ್ ತರ್ಯ್ ಉಲಂವ್ಕ್ ಸುರು ಕೆಲೆಂಚ್;
’ಮೊಗಾಚಾನೊ, ಪಯ್ಲ್ಯಾ ಸುವಾತೆರ್ ನತಾಲಾಂ ಫೆಸ್ತಾಚೆ ಶುಭಾಶಯ್ ತುಮ್ಕಾಂ ಸಮೇಸ್ತಾಂಕ್, ಆಜ್ ಹಜಾರೊಂ ವರ್ಸಾಂಧಿಂ ಜೆಜುನ್ ಜಲ್ಮಾಲ್ಲ್ಯಾ ದಿಸಾಚೊ ಉಗ್ಡಾಸ್ ಆಮಿ ಕಾಡುನ್ ಹೆಂ ಫೆಸ್ತ್ ಭೋವ್ ಸಂಭ್ರಮಾನ್ ಆಚರಣ್ ಕರ್ಚಾ ಸಂದರ್ಭಾರ್ ಹಾಂವ್ ಏಕ್ ಅಥ್ವಿಚ್ ಗರ್ಜ್ ಘೆವ್ನ್ ಆಯ್ಲ್ಯಾಂ ತುಮಿಂ ಮ್ಹಾಕಾ ಕುಮೊಕ್ ಕರ್ತೆಲ್ಯಾತ್ ಮ್ಹಳ್ಳ್ಯಾ ಭರ್ವಶ್ಯಾನ್.
ಆಮ್ಚಾ ಪ್ರಾಯೆಸ್ತಾಂಚಾ ಆಶ್ರ್ಯಾಂತ್ ಎಕ್ಲಿ ಪ್ರಾಯೆಸ್ತ್ ಬಾಯ್ಲ್ ಆಸಾ, ಅಪ್ಲಿ ಸಗ್ಳಿ ಜೀಣ್ ತಿಣೆಂ ಅಪ್ಲ್ಯಾ ಎಕ್ಲ್ಯಾಚ್ ಪುತಾಕ್ ವ್ಹಡ್ ಕರುಂಕ್, ತಾಕಾ ಶಿಕಾಪ್ ದೀಂವ್ಕ್ ಖರ್ಚಿಲಿ, ಕೆದ್ನಾಂ ಬಿಡಿ ಬಾಂಧುನ್, ಕೆದ್ನಾಂ ಕೊಣಾ ಕೊಣಾಚಾ ಘರಾಂನಿ ಕಾಮ್ ಕರುನ್. ತಿಚೊ ಪತಿ ತಿಕಾ ತರ್ನೆ ಪ್ರಾಯೆರ್ ಸಾಂಡುನ್ ಗೆಲೊ ತರ್ಯ್ ತಿಣೆಂ ಅಪ್ಲೆಂ ಸಗ್ಳೆಂ ಆವ್ಕ್ ಪುತಾಚಾ ಸುಖಾಖಾತಿರ್ ಖರ್ಚಿಲೆಂ ಎಕಾ ದಿಸಾ ಅಪ್ಲೊ ಪೂತ್ ಆಪ್ಲೊ ಆಧಾರ್ ಜಾತಲೊ ಮ್ಹಳ್ಳ್ಯಾ ಆಶೆನ್. ತಾಚೊ ಪೂತ್ ಶಿಕ್ಪಿ ಜಾಲೊ, ಪರ್ಗಾಂವಾಕ್ ಪಾವ್ಲೊ, ಆಪ್ಲ್ಯಾ ಆವಯ್ಚಿ ವಿಸರ್ ಪಡೊನ್ ತಿಕಾ ಆಶ್ರ್ಯಾಶಿವಾಯ್ ಆಸ್ಚ್ಯೊ ಹೆರ್ ವಾಟೊ ತಾಣೆಂ ಧಾಂಪ್ಲ್ಯೊ. ಆಜ್ ತಿ ಬಾಯ್ಲ್, ಅಪ್ಲ್ಯಾ ನಶಿಬಾಂತ್ ಆಸ್ಚೆ ಬಾಕಿಚೆ ಥೊಡೆ ದೀಸ್ ಸಂಪ್ಚಾಕ್ ದೆವಾಲಾಗಿಂ ಮಾಗೊನ್ ಮರಣಾಕ್ ರಾಕೊನ್ ಆಸಾ, ಮಾಫ್ ಕರಾ ಆಯ್ಚಾ ಹ್ಯಾ ಸಂಭ್ರಮಿಕ್ ಪಾರ್ಟೆವೆಳಾರ್ ಸಿಂತಿಮೆಂತಾಳ್ ಭಗ್ಣಾಂ ಘೆವ್ನ್ ಆಯಿಲ್ಲ್ಯಾ ಮ್ಹಾಕಾ, ಮ್ಹಾಕಾ ಹೆರ್ ವಾಟೊ ನಾಂತ್, ಏಕ್ ವ್ಹಡಿಲ್ನ್ ಜಾವ್ನ್ ತಿಕಾ ಮ್ಹಜಾ ತಾಂಕಿಭಿತರ್ ತಿಚಾ ವಖ್ತಾಕ್ ಖರ್ಚಿಲೆ, ತರ್ಯ್ ತಿಕಾ ಜಾಯ್ ಮತಿಚೆಂ ವ್ಹಕಾತ್ ಶಿವಾಯ್ ಕುಡಿಚೆಂ ನ್ಹಯ್. ಆಜ್ ತುಮಿಂ ಪರ್ಗಾಂವಾಂತ್ ವ್ಹಡ್ಲಿಂ ವ್ಹಡ್ಲಿಂ ಕಾರ್ಭಾರಾಂ ಕೆಲ್ಲೆ ಗಾಂವಾಂತ್ ಲಾಖಾಂನಿ ದಾನ್ ದಿತಾತ್, ಭಾರಿ ಬರೆಂ! ತುಮ್ಚೆಂ ನಾಂವ್ ಸದೆಂವ್ ಜಾಂವ್. ತುಮಿಂ ಏಕ್ ಲಾಕ್ ರುಪಯ್ ದಾನ್ ದಿಲ್ಲಿ ಭೋವ್ ಸಂತೊಸಾಚಿ ಖಬಾರ್, ದೇವ್ ತುಮ್ಚೆರ್ ಧಾರಾಳ್ ಮಾಪಾನ್ ಬೆಸಾಂವಾ ಘಾಲುಂದಿ ಮ್ಹಣ್ ಮಾಗ್ತಾಂ ತಾಚೆಸವೆಂ ಮ್ಹಜೆಂ ಅನ್ಯೇಕ್ ಮಾಗ್ಣೆಂ ಜಾವ್ನಾಸಾ ದಯಕರುನ್ ಆಮ್ಚಾ ಆಶ್ರ್ಯಾಂತ್ ಆಸ್ಚಾ ತ್ಯಾ ಪ್ರಾಯೆಸ್ತ್ ಬಾಯ್ಲೆಕ್ ಏಕ್ ಭೆಟ್ ದಿಯಾ, ತಿಕಾ ಖಂಡಿತ್ ವಳೊಕ್ ಮೆಳ್ತೆಲಿ, ಇತ್ಲೆಂಚ್ ಪುರೊ ತಿಕಾ ಕ್ರಿಸ್ಮಸಾಚಿ ಕಾಣಿಕ್’
ಕೊಣಾಕ್ ಸಮ್ಜೊಂದಿ ಯಾ ನಾ, ಪುಣ್ ಮ್ಹಾಕಾ ಮಾತ್ರ್ ತ್ಯಾ ಪ್ರಾಯೆಸ್ತ್ ಬಾಯ್ಲೆಚೆಂ ರುಪ್ಣೆಂ ಮತಿಚಾ ಪಡ್ದ್ಯಾರ್ ಖಂಚೊನ್ ಯೇಂವ್ಕ್ ಲಾಗ್ಲೆಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
