ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 25. ಲಾರೆನ್ಸ್ ಕುವೆಲ್ಹೊ
ನಾಂವ್ : ಲಾರೆನ್ಸ್ ಕುವೆಲ್ಹೊ
ಜಲ್ಮಾಲಿ ತಾರಿಕ್ : 18 ಜನೆರ್ 1947
ಜಲ್ಮಾಲ್ಲೊ ಗಾಂವ್ : ಇನ್ನಾ (ಸಾಂತುರ್)
ಪತಿಣ್ : ಶ್ರೀಮತಿ ಸುಸಾನ್ನಾ ಕುವೆಲ್ಹೊ
ಸಾಹಿತ್ಯ್ ರವನ್: ಇಂಗ್ಲಿಷ್ ತಶೆಂಚ್ ಕೊಂಕ್ಣಿ ಭಾಸೆಂನಿ ಸಭಾರ್ ಲೇಖನಾಂ ಬರಯ್ಲ್ಯಾಂತ್ (ಪಯ್ಣಾರಿ ಪತ್ರಾಚೆರ್)
ಸನ್ಮಾನ್ : ದೇಶ್ ವಿದೇಶಾಂತ್ ಸಭಾರ್ ಸಂಸ್ಥ್ಯಾ ಥಾವ್ನ್ ಮಾನ್ ಸಮ್ಮಾನ್
[ಮಾನೆಸ್ತ್ ಲಾರೆನ್ಸ್ ಕುವೆಲ್ಹೊ ಪತಿಣ್ ಸುಸಾನ್ನಾ ಕುವೆಲ್ಹೊ ಸವೆಂ]
ಹ್ಯಾ ಸಂಸಾರಾಂತ್ ಹಾಂವೆಂ ವ್ಹಳ್ಕಲ್ಲ್ಯಾ ಭೋವ್ ಥೊಡ್ಯಾ ಸಾದ್ಯಾ ಚಾಲಿಚ್ಯಾ ಮಹಾನ್ ವೆಕ್ತಿಂಚ್ಯಾ ಮೆಳಿಂತ್ ಹಾಂವ್ ಹಾಕಾ ಮಾಂದ್ತಾಂ. ಪ್ರಾಯೆಂತ್, ಜಿಣ್ಯೆ ಅನ್ಭೋಗಾಂತ್, ತಾಚೆಮುಖಾರ್ ಹಾಂವ್ ಪಿಲೊ ತರ್ಯೀ, ತಾಣೆಂ ದಿಂವ್ಚ್ಯಾ ಮಾಯಾಮೊಗಾಕ್ ಪಳೆಲ್ಯಾರ್ ಖರೆಂಚ್ ಜಾವ್ನ್ ಫಾತೊರ್ ಸಯ್ತ್ ಮೋಗ್ ಕರುಂಕ್ ಶಿಕ್ತಲೊ. ಜೆದ್ನಾಂ ಹಾಂವ್ ಕುವೆಯ್ಟಾಕ್ ಪಾವೊನ್ ಕೊಂಕ್ಣಿ ಅಭಿಯಾನ್ ಸಮಿತಿ ಘಡುನ್ ’ದಿವೊ’ ಪತ್ರಾ ಖಾತಿರ್ ಲೊಕಾಂಚ್ಯೊ ವರ್ಗಣ್ಯೊ ಎಕ್ಟಾಂಯ್ ಕರ್ತಾನಾ, ತಾಕಾ ಮುಖಾಮುಖಿ ಮೆಳೊಂಕ್ ನಾಂ ತರ್ಯೀ, ತಾಕಾ ಏಕ್ ಇಮೇಯ್ಲ್ ಘಾಲುನ್ ವಿನತಿ ಕೆಲಿ; ’ಮೊಗಾಳ್ ಲೊರಿಯಾಬ್, ದಿವೊ ಪತ್ರಾಖಾತಿರ್ ಸಭಾರ್ ವರ್ಗಣ್ಯೊ ಎಕ್ಟಾಂಯ್ ಕರ್ಚೆಂ ಕಾಮ್ ಭರಾನ್ ಚಾಲು ಆಸಾ, ಪುಣ್ ಹ್ಯಾ ವರ್ಗಣೆಂಚೆ ಪಯ್ಶೆ ಮ್ಹಾಕಾ ಅಜೂನ್ ಸರ್ವಾಂನಿ ದೀಂವ್ಕ್ ನಾ ದೆಕುನ್, ತುಮ್ಕಾಂ ಹಾಂವ್ ಗಾಂವಾಕ್ ಯೆತಾನಾ ತೆ ಸರ್ವ್ ಪಯ್ಶೆ ದಿತಲೊಂ. ದೆಕುನ್ ದಯಕರುನ್ ಹಾಂಕಾಂ ಪತ್ರಾಚಿ ವರ್ಗಣಿ ಚಾಲು ಕರಾ’. ಮ್ಹಜ್ಯಾ ಹ್ಯಾ ಎಕಾ ಇಮೇಯ್ಲಾಕ್ ಮಾಂದುನ್, ತಾಣೆಂ ಸರ್ವಾಂಕ್ ವರ್ಗಣಿ ಧಾಡುಂಕ್ ಧರ್ಲಿ. ಪುಣ್ ತಾಚೆ ಪಯ್ಶೆ ಹಾಂವೆಂ ಸುಮಾರ್ ತೀನ್ ಮಯ್ನ್ಯಾಂ ಉಪ್ರಾಂತ್ ಪಾವಿತ್ ಕೆಲೆ ತರ್ಯೀ, ತಾಚ್ಯಾ ತೊಂಡಾರ್ ಮಾಯಾಮೊಗಾಚೊ ಶಿಂವೊರ್ ಆಸ್ಲ್ಲೊ ಶಿವಾಯ್ ಕುಸ್ಕುಟ್ ನಿರಾಸ್ ನಾತ್ಲ್ಲೊ. ಖರೆಂಚ್ ಮ್ಹಾಕಾ ಭಗ್ಲೆಂ - ಹ್ಯಾ ಸಂಸಾರಾಂತ್ ಮನ್ಶಾಪಣಾಕ್, ಮೊಗಾಕ್ ಮಾಂದ್ತೆಲಿಂ ಥೊಡಿಂ ತರ್ಯೀ ಆಸಾತ್ ಮ್ಹಣ್.
[ದಿವೊ ಸಂಪಾದಕೀಯ್ ಮಂಡಳಿ]
ಲೊರಿಯಾಬ್ - ಸಂಯ್ಬಾನ್ ಖಾಲ್ತೊ, ಸಾದೊ, ಹೆರಾಂಕ್ ಗೌರವ್ ದಿಂವ್ಚ್ಯಾಂತ್ ಹಾಚೆಪ್ರಾಸ್ ಉಂಚ್ಲೊ ಕೊಣ್ಯೀ ಮ್ಹಾಕಾ ಅಜೂನ್ ಪಾಸೊನ್ ಮೆಳೊಂಕ್ ನಾ. ಭರ್ಲ್ಲೊ ಕೊಳ್ಸೊ ಕೆದಿಂಚ್ ಆಲ್ಕಾಂದಾನಾ ಮ್ಹಳ್ಳ್ಯೆ ಸಾಂಗ್ಣೆಕ್ ಭೋವ್ಶಾ ಹೊ ಏಕ್ ನಿದರ್ಶನ್. ಹ್ಯೇ ಉಪ್ರಾಂತ್ ಹಾಚೆಸವೆಂ ಹಾವೆಂ ಸಭಾರ್ ಪಾವ್ಟಿಂ ಸಂಪರ್ಕ್ ಕೆಲಾ, ಥೊಡೊ ವಾವ್ರ್ ಕೆಲಾ. ಪುಣ್ ಹರ್ಯೆಕ್ ಪಾವ್ಟಿಂ ಹಾಂವ್ ತಾಚೆಥಾವ್ನ್ ಜಾಯ್ತೆಂ ಶಿಕ್ಲಾಂ. ದೆಕುನ್ ಹಾಂವ್ ಕಿತ್ಲ್ಯಾ ಮಟ್ವ್ಯಾ ರಜೆರ್ ಮಾಂಯ್ಗಾಂವಾಕ್ ಗೆಲ್ಯಾರ್ಯೀ, ಹಾಕಾ ಏಕ್ ಭೆಟ್ ದಿಂವ್ಚೆಂ ಮ್ಹಜೆಂ ಭಾಗ್ ಮ್ಹಣ್ ಲೆಕ್ತಾಂ. ಆಧ್ಲೆಪಾವ್ಟಿಂ ರಜೆರ್ ಗೆಲ್ಲೆವೆಳಾರ್ ತಾಚೆಲಾಗಿಂ ಚಲಯಿಲ್ಲೆಂ ಸಂವಾದ್ ಜಾವ್ನಾಸಾ.
- ಸಂ
ಸಂವಾದ್ ಚಲವ್ಪಿ: ವಲ್ಲಿ ಕ್ವಾಡ್ರಸ್.
1. ಎಕಾ ಕೊಂಕ್ಣಿ ಪತ್ರಾಚೆ ಸಂಪಾದಕ್ ಜಾವ್ನಾಸ್ಚ್ಯಾ ತುಮಿಂ ಸಾಹಿತ್ಯ್ ರಚ್ಲಾಂ?
ಜಾಪ್: ವ್ಹಯ್, ಹಾಂವೆಂ ಇಂಗ್ಲಿಶ್ ಭಾಸೆಂತ್ ಸಭಾರ್ ಲೇಖನಾಂ ಬರಯ್ಲ್ಯಾಂತ್. ಇಂಗ್ಲಿಶ್ ಭಾಸೆಸವೆಂ ಕೊಂಕ್ಣೆಂತ್ ಸಯ್ತ್ ಸಭಾರ್ ಲೇಖನಾಂ ಬರಯ್ಲ್ಯಾಂತ್ ಆನಿ ತಿಂ ’ಪಯ್ಣಾರಿ’ ಚೆರ್ ಪರ್ಗಟ್ಯೀ ಜಾಲ್ಯಾಂತ್. ಪುಣ್ ಪತ್ರಿಕೋಧ್ಯಮಾಂತ್ ಸಂಪಾದಕಾನ್ ಸರ್ವ್ ರಿತಿಚೆಂ ಸಾಹಿತ್ಯ್ ರಚಿಜಾಯ್ಚ್ಚ್ ಮ್ಹಳ್ಳಿ ರೂಗ್ರ್ ನಾ ಪಳೆ.
2. ಸಾಹಿತ್ಯ್ ಮ್ಹಳ್ಯಾರ್ ಕಶೆಂ ಆಸೊಂಕ್ ಜಾಯ್ ಮ್ಹಣ್ತಾತ್ ತುಮಿ?
ಜಾಪ್: ಲೊಕಾಕ್ ಪಾಂವ್ಚೆಂ ತಶೆಂಚ್ ಉಪ್ಕಾರಾಕ್ ಪಡ್ಚೆಂ ಸಾಹಿತ್ಯ್ ಗರ್ಜೆಚೆಂ. ಕಾಣ್ಯೊ, ಕವಿತಾ ಬರೆಂ. ತಾಂತ್ರಿಕತಾ, ವಿಗ್ಯಾನ್, ವೆವೆಗ್ಳ್ಯಾ ವಿಶ್ಯಾಂಚೆಂ ಸಾಹಿತ್ಯ್ ಲೊಕಾಕ್ ಪಾವ್ತಾ ಆನಿ ಉಪ್ಕಾರ್ತಾ. ಸದ್ದ್ಯಾಕ್ ಇಂಗ್ಲಿಶ್ ವಾ ಹೆರ್ ಭಾಸಾಂಕ್ ರೆಫರ್ ಕರಿಜಯ್ ಪಡ್ತಾ, ಜಾಂವ್ ಭಲಾಯ್ಕೆಕ್, ಫುಡಾರ್, ವಿಗ್ಯಾನ್, ವೃತ್ತಿಶಿಕ್ಷಣಾಕ್ ಲಗ್ತಿ ಜಾಲ್ಲ್ಯಾ ಮಾಹೆತಿಕ್. ಚಡಿತ್ ಕಶ್ಟಾಂಚ್ಯಾ ಸಾಹಿತ್ಯಾ ಥಾವ್ನ್ (Complexity) ಲೋಕ್ ಪಯ್ಸ್ ರಾವ್ತಾ. ಹಾಂತುಂ ಭಾಸ್ ವ್ಹಾಡಾನಾ.
ಕೊಂಕ್ಣೆಂತ್ ಚಡ್ತಾವ್ ಲೇಖಕ್ ಫಕತ್ತ್ ಕಾಣ್ಯೊ, ಕಾದಂಬರಿ ಆನಿ ಕವಿತಾ ಇತ್ಲ್ಯಾಕ್ಚ್ಚ್ ಸಾಹಿತ್ಯ್ ಮ್ಹಣ್ ಸಮ್ಜತಾ.
3. ಕೊಂಕ್ಣಿ ಭಾಸ್, ಲಿಪಿ, ಬೊಲಿ - ಹ್ಯಾ ವಿವಾದಾಂಚೆರ್ ತುಮ್ಚೆ ವಿಚಾರ್?
ಜಾಪ್: ಖಂಚೀಯ್ ಭಾಸ್ ಪ್ರಾಕೃತಿಕ್ ರಿತಿನ್ ಫುಲಾಜಯ್, ಜೆದ್ನಾಂ ಮಾತ್ರ್ ಪರ್ಮಳ್ ಆಸ್ತಾ. ದೆಕುನ್ ಕೊಣೆಂಯ್ ಧಾಡಾವ್ನ್, ಬಡವ್ನ್ ಫುಲಂವ್ಕ್ ಅಸಾಧ್ಯ್. ಸಂಸೋದ್ ಸಾಹಿತ್ಯ್ ಲೊಕಾಂಕ್ ಪಾವೊಂಕ್ ನಾ. ಸರ್ವಾಂಕ್ ಸಮಧಾನ್ ಕರ್ಚೆಂ ಸಾಹಿತ್ಯ್ ಎದೊಳ್ ಕೊಣೆಂಯ್ ರಚುಂಕ್ ನಾ, ಅನಿ ರಚುಂಕ್ಯೀ ಸಾಧ್ಯ್ ನಾ. ಆಮ್ಕಾಂ ವಾದ್ ಕರುಂಕ್ ಮಾತ್ರ್ ತಾಂಕ್ತಾ ಶಿವಾಯ್ ವಾವ್ರ್ ಕರುಂಕ್ ನ್ಹಯ್. ದೆಕುನ್ ಹೊ ವಿವಾದ್ ಇತ್ಲ್ಯಾರ್ಚ್ ಸೊಡ್ಲ್ಯಾರ್ ಬರೊ.
4. ಕೊಂಕ್ಣಿ ಲೋಕ್ ಕೊಂಕ್ಣೆಂತ್ ಕಿತೆಂ ಖಾಯ್ಸ್ ಕರ್ತಾ?
ಜಾಪ್: ಕೊಂಕ್ಣೆಂತ್ಲೆಂ ವಿಪರ್ಯಾಸ್, ಪುಣ್ ಸತ್. ಆಮ್ಚೊ ಕೊಂಕ್ಣಿ ಲೋಕ್ ಮಾಯ್ಗಾಂವಾ ಥಾವ್ನ್ ಜಿತ್ಲೊ ಪಯ್ಸ್ ಆಸಾಗೀ, ತಿತ್ಲೊ ಕೊಂಕ್ಣಿ ಭಾಸೆಕ್ ಖಾಯ್ಸ್ ಕರುಂಕ್ ಲಾಗ್ಲಾ. ತಾಂಕಾಂ ಸರ್ವಾಂಕ್ ಜೊಕ್ತೊ ಆವ್ಕಾಸ್ ಮೆಳಾನಾ ತರ್ಯೀ, ಸಂದರ್ಭಾ ವೆಳಾರ್ ತೆ ಆಪ್ಲೊ ಮೋಗ್ ಉಚಾರ್ತಾತ್. ಮಾಯ್ಗಾಂವಾಂತ್ ಆವ್ಕಾಸ್ ಆಸ್ಲ್ಯಾರೀ ತೊ ಗಳ್ಸಿನಾ.
ಸಂಘಟನಾಂ ರಾಜಕೀಯ್ ರಿತಿನ್ ನ್ಹಯ್ ತರ್ಯೀ ಧಾರ್ಮಿಕ್ ಸಂಸ್ಥ್ಯಾಂನಿ ಭಾಸಾಂಕ್ ಚಡ್ ಪಾಟಿಂಬೊ ದಿಲೊ ತರ್ ಖಂಡಿತ್ ಲೊಕಾಕ್ ಲಾಗಿಂ ದವ್ರುಂಕ್ ಸಾಧ್ಯ್. ಭಾಸ್-ಸಂಸ್ಕೃತಿ, ಆಚಾರ್-ವಿಚಾರ್, ರಿತಿ-ರಿವಾಜ್ಯೊ... ಸರ್ವ್ ಭಾಂದ್, ಭಾಸೆಂತ್ಚ್ಚ್ ಭಾಂದುನ್ ಹಾಡ್ಯೆತಾ.
5. ಧಾ ವರ್ಸಾಂ ಥಾವ್ನ್ ’ದಿವೊ’ ಪತ್ರ್ ಚಲವ್ನ್ ಆಸಾತ್, ತುಮ್ಚೊ ಅನ್ಭೋಗ್ ಮಟ್ವ್ಯಾನ್ ಉಚಾರ್ಶ್ಯಾತ್?
ಜಾಪ್: ಪತ್ರಾಚೊ ಪ್ರಚಾರ್ ಜರೂರ್ ಏಕ್ ಶರ್ತ್ ಜಾವ್ನಾಸಾ. ಕೊಂಕ್ಣೆಂತ್ ’ಸೃಜನಶೀಲತಾ’, ’ನವೆಂಸಾಂವ್’ ಹಾಡ್ಚೆ ದಿಶೆಂತ್ ’ದಿವೊ’ ಪತ್ರಾನ್ ಸಭಾರ್ ವಾವ್ರ್ ಕೆಲಾ, ತಶೆಂಚ್ ಕರುನ್ ಆಸಾ. ’ಸಕ್ಕಡ್ ಸಾಂಗಾತಾ ಮೆಳ್ಯಾಂ’ - ವಿಶೇಸ್ ಅಂಖೆ, ’ದಿವೊ ಸಾಹಿತಿಕ್ ಸ್ಪರ್ಧೆ’, ’ಹೆರ್ ಸಾಹಿತಿಕ್ ಸ್ಪರ್ಧೆ’, ನವಿಂ ತಾಲೆಂತಾಂ ಸೊಧ್ಚೆಂ/ಉತ್ತೇಜನ್ ದಿಂವ್ಚೆಂ ಕಾಮ್ ಆಮಿ ಕರುನ್ ಆಸಾಂವ್. ಗಾಂವಾಂತ್ ತಶೆಂಚ್ ಪರ್ಗಾಂವಾಂತ್ ಸಭಾರ್ ಅಸಲ್ಯಾ ಪ್ರತಿಭೆಕ್ ಕೊಂಕ್ಣೆಂತ್ ಆಜ್ ಜೊಕ್ತೊ ಆವ್ಕಾಸ್ ದಿವುನ್ ಪ್ರೋತ್ಸಾವ್ ದಿಲಾ.
6. ಹರ್ಯೆಕಾ ಜಯ್ತೆವಂತ್ ದಾದ್ಲ್ಯಾ ಪಾಟ್ಲ್ಯಾನ್ ಏಕ್ ಸ್ತ್ರೀ ಆಸ್ತಾ ಕಂಯ್. ತುಮ್ಚ್ಯಾ ಜಯ್ತಾಂತ್ ಬಾಯ್ ಸುಸಾನ್ನಾಚೊ ಪಾತ್ರ್ ಕಿತ್ಲೊ?
ಜಾಪ್: ಸತ್ ಸಾಂಗೊಂ ತರ್, ಹಾಂವ್ ಪರ್ದ್ಯಾ ಮುಖ್ಲ್ಯಾನ್ ಆಸಾಂ ತರ್, ತಿ ಪರ್ದ್ಯಾ ಪಾಟ್ಲ್ಯಾನ್ ಆಸಾ. ಅಜೂನ್ ಪರ್ಯಾಂತ್ ತಿಣೆಂ ಥಕಾನಾಸ್ತಾಂ, ಹರ್ಯೆಕಾ ವಾವ್ರಾಂತ್ ಸಮಾಸಮ್ ಪಾಟಿಂಬೊ ದಿಲಾ, ದಿವುನ್ ಆಸಾ.
7. ಕೊಂಕ್ಣಿ ಪತ್ರಾಂ, ಪತ್ರಿಕೋಧ್ಯಮ್ ಆನಿ ಲೋಕ್ - ಹಾಂಚೆ ಮಧೆಂ ಅಂತರ್ ಆಸಾಗೀ?
ಜಾಪ್: ಲೊಕಾಲಾಗಿಂ ಲಾಗ್ಸಿಲೊ ಸಂಬಂಧ್ ಆಸಾ ಮ್ಹಣೊಂಕ್ ಸಾಧ್ಯ್ ನಾ. ಎದೊಳ್ ಪರ್ಯಾಂತ್ ಅಶೆಂ ಕರುಂಕ್ ಚಡ್ತಾವ್ ಪತ್ರಾಂ ಸಂಪೂರ್ಣ್ ರಿತಿನ್ ಸಕೊಂಕ್ ನಾಂತ್. ಲೋಕ್ ಆನಿ ಪತ್ರ್ ಹಾಂಚೆಮಧೆಂ ಜರೂರ್ ಅಂತರ್ ಆಸಾ.
8. ಕೊಂಕ್ಣಿ ಪತ್ರಾಂ - ಏಕ್ ಹವ್ಯಾಸ್? ವ್ಹವಹಾರ್? ವಾ ಜವಾಭ್ದಾರಿ?
ಜಾಪ್: ಕೊಂಕ್ಣಿ ಪತ್ರಾಂ ಅಜೂನ್ ಸ್ವತಂತ್ರ್ ರಿತಿಚೆಂ ಪತ್ರಿಕೋಧ್ಯಮ್ ಹಂತಾಕ್ ಪಾವೊಂಕ್ ನಾ. ಹಾಚಿಂ ಕಾರಾಣಾಂ ಸಭಾರ್ ಆಸಾತ್; ಜೊಕ್ತೆಂ ಸಾಹೆತ್ ಕೊಂಕ್ಣೆಂತ್ ನಾ. ಪತ್ರಾಕ್ ಜೊಕ್ತೊ ಪಾಟಿಂಬೊ ಸಯ್ತ್ ನಾಸ್ತಾಂ ಪತ್ರಾಂ ಸುರು ಜಾತಾತ್ ಆನಿ ಕ್ರಮೇಣ್ ಬಂಧ್ ಪಡ್ತಾತ್. ಜಾಹಿರಾತಾಂ ಲಾಭ್ಚಿಂ ಭೋವ್ ಕಶ್ಟಾಂನಿ. ದೆಕುನ್ ಕೊಂಕ್ಣೆಂತ್ ಅಜೂನ್ ಪತ್ರಾಂ ಚಲ್ತಾತ್ ಕೊಣಾಚ್ಯಾ ದಯೆನ್, ಕೊಣಾಚ್ಯಾ ಕಾಕುಳ್ತಿನ್. ಹಿ ಪರಿಗತ್ ಬದ್ಲಾಜೆ. ಕೊಂಕ್ಣೆಂತ್ ಪತ್ರಿಕೋಧ್ಯಮ್ ನಾ, ಪತ್ರಾಂ-ಪತ್ರಾಂ ಮಧೆಂ ಸಯ್ತ್ ಎಕ್ವಟ್ ನಾ. ಆಮ್ಚೊ ಸ್ಪರ್ಧೊ ಕೊಣಾಲಾಗಿಂ ಆಸೊಂಕ್ ಜಾಯ್ ಸಮಾಜೆಚ್ಯಾ/ಲೊಕಾಂಚ್ಯಾ ಹಿತಾಕ್ ಭಾದಕ್ ಕರ್ಚ್ಯಾ ದುಶ್ಟ್ ಸಕ್ತೆಸವೆಂ, ಪುಣ್ ದುರ್ಭಾಗ್ಪಣಾನ್ ಆಮ್ಚಿಂ ಪತ್ರಾಂ ಎಕಾಮೆಕಾಲಾಗಿಂಚ್ ಝುಜೊನ್ ಆಸಾತ್. ಪತ್ರಾಂನಿ ಆಧುನಿಕ್ ಸವ್ಲತಾಯ್ ನಾ. ಏಕ್ ಜೊಕ್ತಿ ವಿತರಣ್ ವೆವಸ್ತಾ ಸಯ್ತ್ ನಾ. ದೆಕುನ್ ಚಡುಣೆಂ ಸರ್ವ್ ಪತ್ರಾಂ ಚಲ್ತಾತ್ ಫಕತ್ತ್ ಸ್ವ-ತೃಪ್ತೆಖಾತಿರ್.
9. ಅಂತರ್ಜಾಳಿಂ ವಿಶಿಂ ತುಮ್ಚೆ ವಿಚಾರ್?
ಜಾಪ್: ಜೊ ಲೋಕ್ ಪರ್ಗಾಂವಾಂನಿ ಆಸಾ, ತಸಲ್ಯಾಂಕ್ ಜರ್ ಪತ್ರಾಂ ಪಾವಾನಾಂತ್, ತರ್ ಅಂತರ್ಜಾಳಿ ಜರೂರ್ ಏಕ್ ಗರ್ಜೆಚೆಂ ಮಾಧ್ಯಮ್. ಅಸಲಿಂ ಹ್ಯಾ ಅಂತರ್ಜಾಳಿಂಚೊ ಫಾಯ್ದೊ ಜೊಡ್ತಾತ್. ಪುಣ್ ಗಾಂವ್ಚೊ ಚಡ್ತಾವ್ ಲೋಕ್, ಅಂತರ್ಜಾಳಿಕ್ ವಳ್ಕಾನಾಂತ್. ಫುಡಾರಾಕ್ ಅಂತರ್ಜಾಳ್ ಜರೂರ್ ಉಪ್ಕಾರಾಕ್ ಪಡಾತ್.
10. ’ಶೆಣ್ ಚಳ್ವಳ್’ ವಿಶಿಂ ತುಮ್ಚೆ ವಿಚಾರ್?
ಜಾಪ್: ಲೇಖಕಾಚೆಂ ಚಿಂತ್ಪಾ ಧೋರಣ್ ಆನಿ ಸಂಪಾದಕಾಚೆಂ ಚಿಂತ್ಪಾಧೋರಣ್ ಏಕ್ ಸಾರ್ಕೆಂ ಆಸಾಜಯ್ ಮ್ಹಣ್ ನಾ. ಎಕಾ ಸಂಪಾದಕಾಕ್ ಬ್ಯಾಲನ್ಸ್ ಕರ್ಚಿ ಗರ್ಜ್ ಆಸಾ. ಫಕತ್ತ್ ಎಕಾ-ದೊಗಾ ವಿಮರ್ಶಕಾಂ ಖಾತಿರ್ ಪತ್ರ್ ಚಲಂವ್ಕ್ ಸಾಧ್ಯ್ ನಾ. ಕೊಂಕ್ಣೆಂತ್ಲೆ ಚಡ್ತಾವ್ ವಿಮರ್ಶೆ ವೆಕ್ತಿಗತ್ ಆಸಾತ್ ಶಿವಾಯ್ ಸಾಹಿತಿಕ್ ವಿಮರ್ಶೆ ಬರಂವ್ಚಿ ಶ್ಯಾಥಿ ಆಸ್ಚೆ ಭೋವ್ ಥೊಡೆ ವಾ ನಾಂಚ್ ಮ್ಹಣ್ಯೆತಾ.
11. ಕೊಂಕ್ಣೆಂತ್ ಎಕಾಮೆಕಾ ವಯ್ರ್ ಯೆತಾನಾ ಸಕ್ಲಾ ವೊಡ್ಚೆಂ ಕಿತ್ಯಾಕ್?
ಜಾಪ್: ಕುರ್ಲ್ಯಾಂಚ್ಯಾ ಕುಳ್ಯೆಚಿ ಪರ್ಜಾ ಕೆದಿಂಚ್ ಅಪ್ಲ್ಯಾ ಮುಳಾವ್ಯಾ ಸಂಯ್ಬಾಕ್ ವಿಸರ್ತಾವೆ? ಅಸಲ್ಯಾಂಕ್ ಮಹತ್ವ್ ದಿಂವ್ಚೊ ನ್ಹಯ್.
12. ದಾಯ್ಜ್.ಕೊಮ್ ವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾಪ್: ಸಾಹಿತ್ಯ್ ರಚ್ಪಾಕ್ ಬರೆಂ ಮೇಟ್ ಮ್ಹಣ್ಚ್ಯಾಂತ್ ದುಭಾವ್ ನಾ. ಆಮ್ಚೆಂ ಸಾಹಿತ್ಯಾಚೆ ವಿಶಯ್ ವೈವಿಧ್ಯತಾ ಗರ್ಜೆಚಿ. ನಾಂತರ್ ಸಾಹಿತ್ಯ್ ಕೊನ್ಶ್ಯಾಕ್ ಪಡ್ತಾ. ಲೊಕಾಕ್ ಗರ್ಜೆಚೆಂ ಸಾಹಿತ್ಯ್ ರಚಾ. ಹರ್ಯೆಕಾ ಬರವ್ಪ್ಯಾನ್ ಆಪ್ಲ್ಯಾ ಬರ್ಪಾ ಮುಖಾಂತ್ರ್ ಹೆರಾಂಚ್ಯಾಕೀ ವೆಗ್ಳೊ ಮ್ಹಣ್ ರುಜು ಕರ್ಚಿ ಗರ್ಜ್ ಆಸಾ.
13. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂಧೇಶ್ ಕಸಲೆ?
ಜಾಪ್: ಸಂಸ್ಕೃತಿಚೆಂ ಪುನರ್ ಜೀವನ್ ಜಾಲ್ಯಾರ್ ಬರೆಂ (ಪರ್ನೆಂ ಸಾಹಿತ್ಯ್). ತೆಂ ಬುಕಾರುಪಾರ್ ಪರ್ಗಟೊನ್ ಯೇಜಾಯ್, ಲೊಕಾಕ್ ಪಾವ್ಲ್ಯಾರ್ ಭೋವ್ ಬರೆಂ ಆಸ್ತೆಂ. ಆಮ್ಚೆಂ ಸಾಹಿತ್ಯ್ ಫಕತ್ತ್ ವಾಚ್ಪ್ಯಾಖಾತಿರ್ ಸೀಮಿತ್ ಜಾಯ್ನಾಸ್ತಾಂ ಲೊಕಾಕ್ ಉಪ್ಕಾರಾಕ್ ಪಡ್ಚೆ ತಸಲೆಂ ಜಾಯ್ಜಯ್.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
