ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 64. ಆಬ್ ಮೆಲೊ
ನವೀನ್ ಕುಂರ್ಬಿಲ್: ಕೊಂಕ್ಣೆಂತ್ ಹಾಣೆಂ ಬರಯಿಲ್ಲ್ಯೊ ಮಟ್ವ್ಯೊ ಕಾಣ್ಯೊ ಭೋವ್ ಥೊಡ್ಯೊ ಆನಿ ಅಪ್ರೂಪ್ ತರ್ಯೀ, ಕಾನಡಿ ಲಿಪಿಯೆಚ್ಯಾ ಕೊಂಕ್ಣೆಂತ್ ಉಂಚ್ಲ್ಯೊ ಶೆಂಬೊರ್ ಕಾಣ್ಯೊ ವಿಂಚುಂಕ್ ಗೆಲ್ಯಾರ್ ಹಾಚಿ ಕಾಣಿ ತಾಂತುಂ ಜರೂರ್ ಆಸ್ತೆಲಿ. ಹ್ಯಾ ಕಾಣ್ಯೆಕ್ 2001 ಇಸ್ವೆಂತ್ ಕಾಣಿಕ್ ಪತ್ರಾನ್ ಆಸಾ ಕೆಲ್ಲ್ಯಾ ’ಮಟ್ವ್ಯಾ ಕಾಣ್ಯಾಂಚೊ ಸ್ಪರ್ಧೊ’ ಹಾಚೆರ್ ಪಯ್ಲೆಂ ಇನಾಮ್ ಲಾಭ್ಲಾಂ.
ನವೀನ್ ಕುಂರ್ಬಿಲ್
ಆಬ್ ಮೆಲೊ ಮ್ಹಳ್ಳಿ ಖಬಾರ್ ಆಮ್ಚ್ಯಾ ಘರಾ ಪಾವ್ತಾನಾ ಹಾಂವ್ ಕಾಂಯ್ ಘಾಬರ್ಲೊಂ ನಾ. ಆಬಾಕ್ ಮೊರ್ಚಿ ಪ್ರಾಯ್ ಜಾವ್ನಾಸ್ಲ್ಲಿ. ತಾಣೆ ಮೊರಾಜೆಚ್ ಆಸ್ಲ್ಲೆಂ ತಸಲಿ ಪರಿಗತ್ ತಾಚಿ ಜಾವ್ನಾಸ್ಲ್ಲಿ. ನೊವೊದ್ ಆನಿ ಆಟ್ ಪ್ರಾಯ್ ಮೊರ್ಚಿ ಪ್ರಾಯ್ ನ್ಹಯ್ ಆಸ್ತಾನಾ ಆನಿ ಕಿತೆಂ? ತಾಚಿ ಮರ್ನಾಚಿ ಖಬಾರ್ ಆವ್ಚಿತ್ ನ್ಹಯ್. ಚ್ಯಾರ್ ಪಾಂಚ್ ದಿಸಾಂ ಪಯ್ಲೆಂ ಹಾಂವ್ ತಾಕಾ ಪಳೆವ್ನ್ ಆಯಿಲ್ಲೊಂ. ಸಕ್ಡಾಂ ತಾಚ್ಯಾ ತಾಚ್ಯಾ ಮರ್ಣಾಚೆ ನಿರೀಕ್ಶಣಾಚೆರ್ ಆಸ್ಲ್ಲಿಂ. ಪರ್ಗಾಂವಾಂತ್ ಆಸ್ಲ್ಲಿಂ ಪೂರಾ ಯೇವ್ನ್ ತಾಕಾ ಪಳವ್ನ್ ಗೆಲ್ಲಿಂ. ತರಿಪುಣ್, ಆಬ್ ಆಪ್ಲೆ ಜಿಣೆಯೆಚೆಂ ಶತಕ್ ಮಾರ್ತಾಗೀ ಮ್ಹಳ್ಳಿ ಆಶಾ ಮಾತ್ ಸಕ್ಡಾಂಕ್ ಆಸ್ಲ್ಲಿ.
ಉಮ್ಮಾಕ್ ಹಿ ಖಬಾರ್ ಸಾಂಗ್ತಾನಾ ಮಾತ್ರ್ ತಿ ಘಾಬರ್ಲಿ. ಆಪ್ಣಾಚೆಂ ರಡ್ಣೆಂ ಭಾಯ್ರ್ ಆಯ್ಕೊಂಕ್ ನ್ಹಜೊ ಮ್ಹಳ್ಳೆ ಪರಿಂ ತಿ ಕ್ಷೀಣ್ ತಾಳ್ಯಾನ್ ರಡೊಂಕ್ ಲಾಗ್ಲಿ. ಹಾವೆಂ ಸಮಾದಾನ್ ಸಾಂಗ್ಲ್ಯಾರ್ಯ್ ತಿ ರಡ್ಣೆಂ ರಾವಯ್ನಾ ಮ್ಹಳ್ಳೆಂ ಮ್ಹಾಕಾ ಕಳಿತ್ ಅಸ್ಲ್ಲೆಂ. ತ್ಯಾ ದೆಕುನ್ ವೊಗೆಚ್ಚ್ ರಾವೊನ್ ತಿಕಾಚ್ ಪಳಂವ್ಕ್ ಪಡ್ಲೊಂ. ಕಾಪ್ಡಾಚೊ ಪಾಲಂವ್ ದೊಳ್ಯಾಂಕ್ ಆಡೊಸ್ ಕರುನ್ ತಿ ರಡ್ತಾನಾ ಹಾವೆಂ ದೊಳೆ ಧಾಂಪ್ಲೆ ಥೊಡೊಸೊ ವೇಳ್. ದೊಳೆ ಧಾಂಪ್ಲ್ಲ್ಯಾ ತ್ಯಾ ಆಂದ್ಕಾರಾಂತ್ ಆಬಾಚೆಂ ರುಪ್ಣೆಂ ಪಾಶಾರ್ ಜಾಲೆಂ. ಸಸ್ಣಾಕ್ ಮ್ಹಳ್ಳ್ಯಾಪರಿಂ ತೆಂ ರುಪ್ಣೆಂ ಪಯ್ಸ್ ಪಯ್ಸ್ ವೆತಾಲೆಂ. ಎಕಾ ವಿಶಯಾಚೆರ್ ಮಾತ್ರ್ ಆಮ್ಚೆ ಮಧೆಂ ತೀವ್ರ್ ಭಿನ್ನಾಭಿಪ್ರಾಯ್ ಆಸ್ಲ್ಲಿ. ತರ್ಯೀ ಮ್ಹಜೆ ಆನಿ ಆಬಾ ಮಧೆಂ ಎಕಾ ಥರಾಚೊ ವಿಶೇಸ್ ಮೊಗಾಚೊ ಬಾಂದ್ ಆಸ್ಲ್ಲೊ. ಪುಣ್ ತೊ ಬಾಂದ್ ಆಜ್ ಅಶಾಶ್ವತ್ ರುಪಾರ್ ತುಟ್ಲೊ ಮ್ಹಳ್ಳೆಂ ಚಿಂತುನ್ ವಾಸ್ತವಾಕ್ ಪಾಟಿಂ ಯೇಂವ್ಕ್ ದೊಳೆ ಉಗ್ತೆ ಕರ್ತಾನಾ ಉಮ್ಮಾ ಲ್ಹಾನ್ ದೊಳ್ಯಾಂನಿ ಮ್ಹಾಕಾಚ್ ಪಳೆತಾಲಿ. ಮ್ಹಜ್ಯಾ ದೊಳ್ಯಾಂಚಾ ಖಾಂಚಿಂನಿ ದುಃಖಾಂ ಜಮೊ ಜಾಲ್ಲಿಂ ಪಳವ್ನ್ ತಿ ಮ್ಹಜ್ಯಾ ಬಾವ್ಳ್ಯಾಚೆರ್ ತಕ್ಲಿ ದವರ್ನ್ ಜ್ಯೊರಾನ್ ರಡ್ಲಿ. ಕಾಪ್ಡಾಚ್ಯಾ ಪಾಲ್ವಾನ್ ದೊಳೆ ಪುಸಿತ್ ತಿಣೆಂ ಮ್ಹಾಕಾ ಭಾಯ್ರ್ಸರ್ ಮ್ಹಳೆಂ.
"ಖಂಯ್.....?"
"...... ತುಜ್ಯಾ ಆಬಾಕ್ ಪಳಂವ್ಕ್"
"ಪುಣ್...... ಉಮ್ಮಾ......"
"ಪುಣ್..... ಪುಣ್ ಕಿತೆಂ? ಆಜ್ ಮ್ಹಾಕಾ ಆಡಾಂವ್ಚಿ ಕೊಣ್ಯ್ ನಾಂತ್. ಆಜ್ ಖಂಡಿತ್ ಜಾವ್ನ್ಯ್ ತಾಚೆಂ ಮೊಡೆಂ ಪುಣಿ ಹಾವೆಂ ದೊಳೆಭರ್ ಪಳಯ್ಜೆ...." ತಿಚೊ ತಾಳೊ ಗದ್ಗದೀತ್ ಜಾಲ್ಲೊ.
"ಉಮ್ಮಾ...... ಮೋರ್ನ್ ಬಾಯ್ರ್ ಕಾಡ್ಚೆಂ ಸಾಂಜೆರ್ ಚ್ಯಾರ್ ವೊರಾಂಚೆರ್ ಖಂಯ್. ಆನಿಕೀ ತೀನ್ ಚ್ಯಾರ್ ವೊರಾಂಚೊ ವೇಳ್ ಆಸಾ. ದರ್ವಡ್ನಾಕಾ."
"ಕಿತ್ಯಾಕ್ ದರ್ವಡೊಂಕ್ ನ್ಹಜೊ? ಆಮಿ ವಚೊನ್ ಪಾಂವ್ಚೆ ಪಯ್ಲೆಂಚ್ ಮಾತ್ಯೆಕ್ ಪಾಯ್ಲ್ಯಾರ್?" ಉಮ್ಮಾಕ್ ಅಜೂನ್ಯ್ ತಿಚ್ಯಾ ಬಾಪಾಯ್ಚೆರ್ ಕಿತ್ಲೊ ಮೋಗ್ ಆಸಾ ಮ್ಹಣ್ ತಿಚ್ಯಾ ಉತ್ರಾಂನಿ ವೆಕ್ತ್ ಜಾತಾಲೆಂ. ಪುಣ್ ಆಬಾನ್ ಹೆಂ ಕಿತ್ಯಾಕ್ ಸಮ್ಜೊನ್ ಘೆಂವ್ಕ್ ನಾ ಮ್ಹಳ್ಳೆಂ ಮ್ಹಾಕಾ ವಿಚಿತ್ರ್ ದಿಸ್ತಾಲೆಂ!
ಆಬಾಚ್ಯಾ ಘರಾ ವಚಾಜೆ ತರ್ ಆಮ್ಚ್ಯಾ ಘರಾ ಥಾವ್ನ್ ಕಾರಾರ್ ವೆಚೆಂ ತರ್ ಸುಮಾರ್ ದೋನ್ ವೊರಾಚೆಂ ಪಯ್ಣ್. ಪಯ್ಣ್ ಮಾವ್ನಾತೆನ್ ಪಾಶಾರ್ ಜಾವ್ನ್ ಆಸ್ಲ್ಲೆಂ. ಉಮ್ಮಾ ತವಳ್ ತವಳ್ ಆಪ್ಲ್ಯಾ ಪಾಲ್ವಾನ್ ದೊಳ್ಯಾಂತ್ಲಿಂ ದುಃಖಾಂ ಪುಸುನ್ ಕಾಡ್ತಾಲಿ. ಪಾಂಚ್ ಸ ಮಹಿನ್ಯಾ ಥಾವ್ನ್ ಆಬ್ ಪಿಡೆಂತ್ ಆಸ್ಲ್ಲೊ. ಉದಾಕ್, ಶಿತ್ ಪೊಟಾಕ್ ಪಡೊಂಕ್ ಕಶ್ಟ್ ಮಾರ್ತಾಲೆ. ಚಲೊಂಕ್ ಬಳ್ ಪಾವಾನಾತ್ಲ್ಲೆಂ. ಗೂ-ಮೂತ್ ನಿದ್ಲ್ಲ್ಯಾ ಕಡೆಚ್ ವೆತಾಲೆಂ. ತ್ಯಾ ಪ್ರಾಯೆಚ್ಯಾ ಮನ್ಶ್ಯಾ ಥಾವ್ನ್ ಆನ್ ಕಿತೆಂ ಜಾತಾ? ಪಯ್ರ್ ಪಯ್ರ್ ಮ್ಹಣಾಸರ್ ಆಪ್ಲೆಂ ದಿಸ್ಪಡ್ತೆಂ ಕಾಮ್ ತೊಚ್ ಕರುನ್ ಆಸ್ಲ್ಲೊ.
ಪಿಡೆಂತ್ ಪಡ್ಲ್ಯಾ ಉಪ್ರಾಂತ್ ತಾಚ್ಯಾ ಕುಡಿಚ್ಯಾ ಎಕಾ ಕುಶಿಕ್ ಬಳ್ಚ್ ನಾತ್ಲ್ಲೆಂ. ಯೇವ್ನ್ ಪಳವ್ನ್ ವೆಚಿಂ ಪೂರಾ ಎಕ್ಚ್ ಸಾಂಗ್ತಾಲಿಂ-"ಹೆ ಪ್ರಾಯೆರ್ ಆಮಿ ಖಂಯ್ ಆಸ್ತಾಂವ್ಗೀ, ತೊ ದೇವ್ಚ್ ಜಣಾ, ಆಶೆಂ ದವರ್ಚ್ಯಾಕ್ಯೀ, ದೆವಾನ್ ವೆಗಿಂ ಉಡಾಸ್ ಕಾಡ್ಲ್ಲೊ ತರ್......."
ಆಬ್ ಗಾಂವ್ಚ್ಯಾಂಕ್, ಏಕ್ ನ್ಹಂಯ್ ಏಕ್ ಥರಾನ್ ಜಾಯ್ಜೆ ಆಸ್ಲ್ಲೊ ಜಾಲ್ಲ್ಯಾನ್, ಘರಾ ಭಿತರ್ ಆನಿ ಆಂಗ್ಣಾಂತ್ಯ್ ಮೊಸ್ತ್ ಲೋಕ್ ಜಮೊ ಜಲ್ಲೊ. ಜಾತ್-ಕಾತ್ ಮ್ಹಣ್ ಲೆಕಿನಾಸ್ತಾಂ ಚಡ್ತಾವ್ ಲೋಕ್ ಥಂಯ್ ಆಸ್ಲ್ಲೊ. ಮದ್ಲ್ಯಾ ಕುಡಾಂತ್ ಆಬಾಚಿ ನಿರ್ಜೀವ್ ಕೂಡ್ ಪೆಟೆಂತ್ ಘಾಲ್ನ್ ದವರ್ಲ್ಲಿ. ಫುಲಾಂನಿ ಪೇಟ್ ಸುಂರ್ಗಾರಾಯಿಲ್ಲಿ. ದೊನೀ ಕುಶಿಂನಿ ಭುರ್ಗಿಂ, ವ್ಹಡಾಂ ಬಸೊನ್ ಮಾಗ್ಣೆಂ ಕರುನ್ ಆಸ್ಲ್ಲಿಂ. ಥೊಡೆ ದಾದ್ಲೆ ಆಂಗ್ಣಾಚ್ಯಾ ಕೊನ್ಶಾಂನಿ ರಾವೊನ್ ಬಿಡಿ ಸಿಗ್ರೆಟ್ ವೊಡ್ತಾಲೆ. ಆನಿ ಥೊಡೆ ಕಸಲ್ಯಾಗೀ ವಿಶೇಸ್ ವಿಶಯಾಂಚೆರ್ ವಿಚಾರ್ ವಿನಿಮಯ್ ಕರ್ಚ್ಯಾ ಪರಿಂ ಉಲವ್ಣ್ಯಾಂತ್ ಮಗ್ನ್ ಜಾಲ್ಲೆ. ಥೊಡೆ ಮಾತ್ರ್ ಮುಕ್ಲ್ಯಾ ಕಾರ್ಯಾಕ್ ತಯಾರಾಯ್ ಕರ್ಚೆ ಪರಿಂ ಹೆವ್ಶಿನ್ ತೆವ್ಶಿನ್ ಘುಂವ್ತಾಲೆ.
ಮುಸ್ಲಿಮ್ ರಿತಿ ರಿವಾಜೆ ಪರ್ಮಾಣೆಂ ಹಾಂವೆಂ ತಕ್ಲೆರ್ ಧೊವಿ ತೊಪಿ ದವರ್ಲ್ಲಿ. ಆಮ್ಕಾಂ ದೊಗಾಂಯ್ಕ್ಯೀ ಪಳಯಿಲ್ಲೆಂಚ್ ಆಂಗ್ಣಾಂತ್ ಜಮೊ ಜಾಲ್ಲೆ ಪೂರಾ ವಿಜ್ಮಿತ್ ಜಾಲ್ಲೆ ಪರಿಂ ಉಭೆ ರಾವ್ಲೆ. ಆಪ್ಲ್ಯಾ ತೊಂಡಾಂತ್ಲಿ ಜಳ್ಚಿ ಬಿಡಿ, ಸಿಗ್ರೆಟ್ ಉಡಯ್ಲಿ ಥೊಡ್ಯಾಂನಿ. ಸಕ್ಡಾಂಚಿ ದೀಶ್ಟ್ ವಿಶೇಸ್ ಜಾವ್ನ್ ಉಮ್ಮಾಚೆರ್ ಖಂಚ್ಲ್ಲಿ. ಭಿತರ್ ಯೆಯಾ ಮ್ಹಣ್ ಆಮ್ಕಾಂ ಕೊಣೆಂಯ್ ಆಪಯಿಲ್ಲೆಂ ನಾ. ಘರಾ ಭಿತರ್ ಪಾಂಯ್ ದವರ್ಚೆಂ ಧಯ್ರ್ ನಾತ್ಲ್ಲ್ಯಾ ಪರಿಂ ಉಮ್ಮಾ ಥೊಡೊಸೊ ವೇಳ್ ಆಪ್ಲಿ ದೀಶ್ಟ್ ಧರ್ಣಿಕ್ ಲಾವ್ನ್ ಮೆಟಾಂ ಪಳವ್ನ್ಚ್ ರಾವ್ಲ್ಲಿ. ಹಾವೆಂ ತಿಚ್ಯಾ ಭುಜಾಂಕ್ ಧರ್ಲೆಂ ಆನಿ ಭಿತರ್ ಆಪವ್ನ್ ವೆಲೆಂ. ಸ್ತ್ರೀಯಾಂನಿ ಏಕ್ ಘಡಿ ಮಾಗ್ಣೆಂ ರಾವವ್ನ್ ಆಮ್ಕಾಂ ಆಪರಿಚಿತ್ ಮ್ಹಳ್ಳೆ ಪರಿಂ ಪಳಯ್ಲೆಂ.
ಖಂತಿವಿಣೆಂ ನಿದ್ಲ್ಲ್ಯಾಪರಿಂ ದಿಸ್ಚಿ ಆಬಾಚಿ ಕೂಡ್ ಪಳವ್ನ್, ಮತಿಚ್ಯಾ ಭಾವನಾಂಚೆರ್ ಲಗಾಮ್ ನಾಸ್ತಾಂ, ಉಮ್ಮಾ ಜ್ಯೋರಾನ್ ರಡ್ಲಿ. ಆಬಾ ಸಾಂಗಾತಾ ಹಾವೆಂ ಖರ್ಚಿಲ್ಲ್ಯೊ ತ್ಯೊ ಥೊಡ್ಯೊ ಮಧುರ್ ಘಡಿಯೊ, ಘಡಿತಾಂ ಉಡಾಸಾಕ್ ಯೇವ್ನ್, ಆನಿ ಆಜ್ ತ್ಯಾಚ್ ಆಬಾಚಿ ನಿರ್ಜೀವ್ ಕೂಡ್ ಪಳವ್ನ್ ಹಾಂವ್ಯ್ ರಡ್ಲೊಂ.
ಉಮ್ಮಾಚೆಂ ರಡ್ಣೆಂ ಚಡ್ ಜಾಲೆಂ ತರ್ಯ್, ತಿಕಾ ಸಮಾಧಾನ್ ಸಾಂಗ್ಚೆ ಖಬ್ರೆಕ್ ಕೊಣ್ಯ್ ಆಯ್ಲೆಂ ನಾ. ಆಮ್ಕಾಂ ಕೊಣೆಂಯೀ ಜಾಗೊ ಸೊಡುನ್ ದಿಲೊ ನಾ. ಉಮ್ಮಾಕ್ ಬಸೊಂಕ್ ಕೊಣೆಂಯ್ ಜಾಗೊ ಸೊಡುನ್ ದಿಲೊ ನಾ. ತಿಣೆ ಮುಕಾರ್ ಬಾಗ್ವೊನ್ ಆಬಾಚ್ಯಾ ಕಪಾಲಾಚೆರ್ ಉಮೊ ದಿಲೊ. ಆಮ್ಚ್ಯಾ ಸಂಪ್ರದಾಯಾಪರಿಂ ಹಾವೆಂ ಆಬಾಚ್ಯಾ ಪಾಯಾಂಚೊ ಉಮೊ ಘೆತ್ಲೊ. ಉಮ್ಮಾಕ್ ಬಸೊಂಕ್ ಹಾವೆಂಚ್ ಏಕ್ ಕದೆಲ್ ಹಾಡ್ನ್ ದಿಲೆಂ. ತಿ ಪರ್ತ್ಯಾನ್ ಪರ್ತ್ಯಾನ್ ಆಬಾಚೆ ಕುಡಿಕ್ ಪಳವ್ನ್ ರಡ್ತಾಲಿ.
ಮೊಡೆಂ ಎಕ್ಪಾವ್ಟಿಂ ಆಂಗ್ಣಾಕ್ ವ್ಹರ್ನ್ ಕುಟ್ಮಾಚ್ಯಾಂಕ್ ಸಾಂಗಾತಾ ರಾವವ್ನ್ ಪೋಟೊ ಕಾಡ್ಲೊ. ಉಮ್ಮಾ ಯೆಂವ್ಕ್ ನಾ. ತಿಕಾ ಕೊಣೆಂಯ್ ಆಪಯ್ಲೆಂಯ್ ನಾ. ತಿ ಬಲ್ಲ್ಯಾ ಕಡೆಸ್ ಆಸ್ಲ್ಲಿ. ಪುಣ್ ಹಾಂವ್ ಮಾತ್ ಮುಲೆ ಲಾಯ್ನಿಚೆರ್ ಆಬಾಚೆ ತಕ್ಲೆ ಸರ್ಶಿಂ ರಾವ್ಲೊಂ. ಥೊಡ್ಯಾಂಕ್ ಹೆಂ ಸಮಾ ಲಾಗೊಂಕ್ ನಾ ಮ್ಹಳ್ಳೆಂ ತಾಂಚೆಂ ವರ್ತನ್ ದಾಕವ್ನ್ ದಿತಾಲೆಂ. ಪುಣ್ ಹಾವೆಂ ಕಿತೆಂ ಕರ್ಚೆಂ. ಕಿತ್ಲೆಂ ಮ್ಹಳ್ಯಾರ್ಯಿ ಮ್ಹಜೊಯಿ ತೊ ಆಜೊ ನ್ಹಯ್ಗೀ ಮ್ಹಾಕಾ ಆಬಾಚೆಂ ಲಾಗ್ಶಿಲೆಂಪಣ್ ಜಾಯ್ಜೆ ಆಸ್ಲ್ಲೆಂ. ತಾಂಕಾಂ ಕಿತೆಂ ಗೊತ್ತು, ಆಮಿ ಕಿತ್ಲೆ ಲಾಗ್ಶಿಲೆ ಜಾವ್ನಾಸ್ಲ್ಲ್ಯಾಂವ್ ಮ್ಹಣ್? ಆಮ್ಚೆ ಮಧೆಂ ಆಸ್ಲ್ಲ್ಯಾ ಮೊಗಾಚ್ಯಾ ಬಾಂದಾವಿಶಿಂ ದುಸ್ರ್ಯಾಂಕ್ ಕಿತೆಂ ಕಳಿತ್?
ಫೋಟೊ ಕಾಡುನ್ ಜಾಲ್ಲೆಂಚ್ ಮೊಡೆಂ ಪರ್ತ್ಯಾನ್ ಭಿತರ್ ಹಾಡ್ಲೆಂ. ಪರ್ತ್ಯಾನ್ ಮಾಗ್ಣೆಂ ಸುರು ಜಾಲೆಂ. ಗಾಂವ್ಚೊ ಗುರ್ಕಾರ್ ವ್ಹಡ್ಲ್ಯಾ ತಾಳ್ಯಾನ್ ಮೊರ್ನಾಚಿಂ ಕಾಂತಾರಾಂ ಗಾಯ್ತಾಲೊ. ಥೊಡ್ಯಾ ವೆಳಾನ್ ಪಾದ್ರ್ಯಾಬ್ ಆನಿ ಖುರಿಸ್ ಧರ್ಚೊ ಆಯ್ಲೆ ಮ್ಹಣ್ ಧಾಕ್ಟೊ ಚೆಡೊ ಎಕ್ಲೊ ಧಾಂವೊನ್ ಯೇವ್ನ್ ಖಬಾರ್ ದೀವ್ನ್ ಗೆಲೊ. ಪಾದ್ರ್ಯಾಬ್ ಯೆಂವ್ಚಿ ಖಬಾರ್ ಆಯ್ಕೊನ್ ಥೊಡ್ಯಾಂಚೆಂ ರಡ್ಣೆಂ ಚಡ್ಲೆಂ. ರಿತಿ ರಿವಾಜಿ ಫರ್ಮಾಣೆಂ ಥೊಡೆ ತಾಂಕಾ ಸಮಾದಾನ್ ಸಾಂಗ್ತಾಲೆ. ಪಾದ್ರ್ಯಾಬ್ ಆಂಗ್ಣಾಂತ್ ಯೇವ್ನ್ ರಾವ್ತಾನಾ, ಬಸೊನ್ ಆಸ್ಲ್ಲಿಂ ಪೂರಾ, ಪಾದ್ರ್ಯಾಬಾಚ್ಯಾ ನಿರೀಕ್ಶಣಾಚೆರ್ ಮೊಡ್ಯಾಚಾ ದೊನೀ ಕುಶಿನಿಂ ಉಬಿಂ ರಾವ್ಲಿಂ. ಉಮ್ಮಾ, ಮಾತ್ ಪಾಟಿಂ ನಿಸ್ರಾಲಿ.. ತಿಣೆಂ ರಡ್ಣೆಂ ರಾವಯಿಲ್ಲೆಂ ತರೀ ದೊಳ್ಯಾಂ ಥಾವ್ನ್ ದುಕಾಂ ದೆಂವ್ತಾಲಿಂ.
ಪಾದ್ರ್ಯಾಬಾನ್ ಬೆಂಜಾರ್ ಕೆಲ್ಲೆಂ ಉದಾಕ್ ಮೊದ್ಯಾ ವಯ್ರ್ ಶಿಂಪ್ದಾಯ್ಲೆಂ. ಮಾಗ್ಣ್ಯಾಚೆಂ ನಿಮಾಣೆಂ ವಿದಿ ವಿದಾನ್ ಜಾಲ್ಲೆಂಚ್, ಚಾರ್ ಪಾಂಚ್ ತರ್ನಾಟ್ಯಾಂನಿ, ಮುಕ್ಲ್ಯಾ ಕಾರ್ಯಾ ಖಾತಿರ್ ಮೊಡ್ಯಾಚಿ ಪೇಟ್ ಉಕ್ಲುನ್ ಕಾಣ್ಘೆಲಿ. ಹಾವೆಂಯ್ ತಾಂಕಾಂ ಕುಮಕ್ ಕೆಲಿ. ಮೊರ್ಣಾಚಿ ಪೇಟ್ ಘರಾ ಭಾಯ್ರ್ ಹಾಡ್ತಾನಾ ವ್ಹಡಾ ಲ್ಹಾನಾಂಚೆಂ ರಡ್ಣೆಂ ಆನಿಕೀ ಚಡ್ಲೆಂ.
ಆಶೀರ್ ವಾಟ್ ಜಾಲ್ಲ್ಯಾನ್ ಮೊರ್ನಾಚಿ ಪೇಟ್ ಘಟ್ ದೊಗಾಂ ತರ್ನಾಟ್ಯಾಂನಿ ಆಪ್ಲ್ಯಾ ಮಾತ್ಯಾರ್ ಘೆತ್ಲಿ. ಖುರಿಸ್ ಘೆತ್ಲ್ಲೊ ಸಕ್ಡಾಂ ವರ್ನಿಂ ಮುಕ್ಲ್ಯಾನ್ ಚಲ್ತಾಲೊ ತರ್ ಪಾಟ್ಲ್ಯಾನ್ ಲೋಕ್ ಅನಿ ಪಾದ್ರ್ಯಾಬ್. ಚಲೊಂಕ್ ತಾಂಕಾನಾತ್ಲ್ಲ್ಯಾ ಥೊಡ್ಯಾ ಪ್ರಾಯೆಸ್ತಾಂಕ್ ವಾಹನಾಂಚೆರ್ ಬಸವ್ನ್ ಆನ್ಯೇಕ್ ಲಾಂಬ್ ವಾಟೆನ್ ಇಗರ್ಜೆಕ್ ವ್ಹೆಲೆಂ. ಉಮ್ಮಾಕ್ ವಾಹನಾಚೆರ್ ಯೆ ಮ್ಹಣ್ ಕೊಣೆಂಯ್ ಆಪಯ್ಲೆಂ ನಾ. ತಿ ತೆ ಆಶೆರ್ಯ್ ನಾತ್ಲ್ಲಿ. ಸುಮಾರ್ ದೇಡ್ ಮಯ್ಲಾಂಚಿ ವಾಟ್ ಆಮಿ ಹೆರ್ ಲೊಕಾ ಸಾಂಗಾತಾ ಚಲೊನ್ ಗೆಲ್ಯಾಂವ್. ಉಮ್ಮಾಚೆರ್ ಉಗ್ತ್ಯಾನ್ ದಾಕಂವ್ಚೆಂ ತಿರಸ್ಕಾರ್ ಆಜ್ ಹಾವೆಂ ಪಳಯಿಲ್ಲ್ಯಾನ್ ಮಸ್ತ್ ಬೆಜಾರ್ ಭೊಗ್ಲೆಂ. ಪುಣ್ ಆಬಾ ವಯ್ಲ್ಯಾ ಮೊಗಾನ್ ತೆಂ ಆಮಿ ಸೊಸುನ್ ವ್ಹರಿಜೆ ಆಸ್ಲ್ಲೆಂ.
ಮೊರ್ನಾಚಿ ಪೇಟ್ ಇಗರ್ಜೆ ಭಿತರ್ ವ್ಹರ್ನ್ ದವರ್ಲ್ಯಾ ಉಪ್ರಾಂತ್ ಮೀಸ್ ಸುರು ಜಾಲೆಂ. ಉಮ್ಮ ಇಗರ್ಜೆ ಭಿತರ್ ಯೇಂವ್ಕ್ ನಾ. ಹಾಂವ್ ಇಗರ್ಜೆ ಭಿತರ್ ವಚೊನ್ ಮುಕ್ಲ್ಯಾ ಬಾಂಕಾರ್ ಬಸ್ಲ್ಲೊಂ. ಹಾವೆಂ ಇಗರ್ಜೆ ಭಿತರ್ ಆಯಿಲ್ಲೆಂ ಥೊಡ್ಯಾಂಕ್ ಬರೆಂ ದಿಸೊಂಕ್ ನಾ ಮ್ಹಳ್ಳೆಂ, ಮ್ಹಜೆರ್ ಕೇಂದ್ರೀಕೃತ್ ಜಾಲ್ಲಿ ತಾಂಚಿ ತೀಕ್ಶ್ಣ್ ದೀಶ್ಟ್ ಕಳಿತ್ ಕರ್ತಾಲಿ. ಪಾದ್ರ್ಯಾಬ್ಯಿ ತವಳ್ ತವಳ್ ಮ್ಹಾಕಾಚ್ ಪಳೆತಾಲೊ.
ಪಾದ್ರ್ಯಾಬಾನ್ ಆಬಾಚೆ ಥೊಡೆ ಗೂಣ್, ತಾಚಿ ಬುದ್ವಂತ್ಕಾಯ್, ನಿಸ್ವಾರ್ಥ್ಪಣ್ ಆನಿ ತಾಚೆ ಸೆವೆಚ್ಯಾ ಗುಣಾವಿಶ್ಯಾಂತ್ ಹೊಗಳ್ಸಿಲೆಂ. ಮಾತ್ಯೆ ಥಾವ್ನ್ ಆಯಿಲ್ಲ್ಯಾ ಮನ್ಶಾನ್ ಪರ್ತ್ಯಾಕ್ ಮಾತ್ಯೆಕ್ ವಚಾಜೆ, ಜಲ್ಮ್ ಘೆತ್ಲ್ಲ್ಯಾ ಮನ್ಶಾಕ್ ಮರಣ್ ಚುಕ್ಲ್ಲೆಂ ನಾ, ಚೊರಾಪರಿಂ ಯೆಂವ್ಚ್ಯಾ ಮರ್ಣಾಕ್ ಸದಾಂಚ್ ತಯಾರ್ ರಾವಾಜೆ, ಆಮೆ ಮೊಗಾಚೆ ವೆಕ್ತಿ ಮರಣ್ ಪಾವ್ತಾನಾ ಅಮಿ ವಿಚಲಿತ್ ಜಾಯ್ನಾಶೆಂ ತಾಂಚೆ ಖಾತಿರ್ ಮಾಗಾಜೆ ಮ್ಹಳ್ಳೆಂ ಪಾದ್ರ್ಯಾಬಾನ್ ವಿವರ್ಸಿಲೆಂ. ಪಾದ್ರ್ಯಾಬಾನ್ ದೊನೀ ಹಾತ್ ವಯ್ರ್ ಉಕ್ಲುನ್ "......ಬಾಪಾ, ತಾಚಿಂ ಪಾತ್ಕಾಂ ತಾಚೆ ಖಾತಿರ್ ಭೊಗ್ಸಿ, ತಾಕಾ ಸರ್ಗಾ ಸುಖ್ ತುಜೆ ಸಾಂಗಾತಾ ಫಾವೊ ಕರ್......." ಮ್ಹಣ್ ಮೊರ್ನಾ ಕುಶಿಂ ಪಳವ್ನ್ ಮಾಗಾಲಾಗ್ಲೊ.
ಆಬಾಚಿಂ ಪಾತ್ಕಾಂ ಭೊಗ್ಸುಂಕ್ ಆಬಾನ್ ಇತ್ಲಿಂ ಪಾತ್ಕಾಂ ಕೆಲ್ಲಿಂಗೀ? ತಾಚೆ ವಯುಕ್ತಿಕ್ ವಿಶಯ್ ಮ್ಹಾಕಾ ಕಳಿತ್ ನಾಂತ್. ಮ್ಹಾಜಿ ಪ್ರಾಯ್ ಬಾವೀಸ್ ತರ್ ತಾಚಿ ಶೆಂಬೊರಾಕ್ ದೋನ್ ಉಣೆಂ. ತಾಣೆಂ ಕೊಣಾಯ್ಕಿ ವಾಯ್ಟ್ ಕರುಂಕ್ ನಾ ಮ್ಹಳ್ಳೊ ಮ್ಹಜೊ ಭರ್ವಸೊ. ಮನಿಸ್ ಮ್ಹಳ್ಳ್ಯಾ ಮಾಗಿರ್ ಪಾತ್ಕಾಂ ಮನ್ಶಾಂಚಾ ಜಲ್ಮಾ ಸಾಂಗಾತಾಚ್ ಯೆತಾತ್. ಪರೋಪ್ಕಾರಿ ಜಿಣಿ ಜಿಯೆಲ್ಲ್ಯಾ ಆಬಾನ್ ತಸಲಿಂ ವ್ಹಡ್ಲಿಂ ಪಾತ್ಕಾಂ ಕರುಂಕ್ ನಾಂತ್ ತರ್ಯಿ, ಮ್ಹಜ್ಯಾ ಉಮ್ಮಾಕ್, ಆಪ್ಲೆಚ್ ಧುವೆಕ್ ಕೆಲ್ಲೊ ಮಾತ್ ಬೋವ್ ವ್ಹಡ್ ಆನ್ಯಾಯ್ ಮ್ಹಣ್ ಮ್ಹಜೊ ಆತ್ಮೊ ಸಾಂಗ್ತಾಲೊ.
ಥೊಡೆ ಪಾವ್ಟಿಂ ಚಿಂತಾನಾ, ಆಬಾನ್ ಕೆಲ್ಲೆಂಚ್ ಅಮಾ ಮ್ಹಣ್ ಭೊಗ್ತಾ. ಜಲ್ಮ್ ದಿಲ್ಲ್ಯಾ ಆವಯ್ ಬಾಪಾಯ್ಕ್, ರಗ್ತಾಚೊ ವಾಂಟೊ ಘೆವ್ನ್ ಜಲ್ಮಾಲ್ಲ್ಯಾ ಭಾವಾಂ ಭಯ್ಣ್ಯಾಂಕ್ ಲ್ಹಾನ್ ವ್ಹಡ್ ಜಾಲ್ಲ್ಯಾ ಘರಾಕ್ ಪಯ್ಸ್ ಕರುನ್, ಅಸೇಕಾ ಜಾತಿಚ್ಯಾ ಚೆಡ್ಯಾ ಸಾಂಗಾತಾ ಕಾಜಾರ್ ಜಾಯ್ಜಯ್ ತರ್ ಉಮ್ಮಾಚೆಂ ಕಾಳಿಜ್ ಕಿತ್ಲೆಂ ಘಟ್ ಆಸಾಜೆ. ತ್ಯಾ ಕಾಳ್ಜಾಚೆಂ ಕಿತ್ಲೆಂ ಧಯ್ರ್?
ಆಬಾಚ್ಯಾ ಘರ್ಚಿ ಸೆಜಾರಿ ಲುಸಿಬಾಯ್ ಹಾಂವ್ ಗೆಲ್ಲ್ಯಾ ತವಳ್ ಕೆದ್ನಾಂಯ್ ಸಾಂಗೊನ್ ಆಸ್ಲ್ಲಿ. ತರ್ನಾಟ್ಪನಾರ್ ತುಜಿ ಆವಯ್ ಬಾಂಗಾರಾಚ್ಯಾ ಬೊಂಬ್ಯಾಪರಿಂ ಪರ್ಜಾಳ್ತಾಲೆಂ. ಖಂಚ್ಯಾ ಉತ್ರಾಂಕ್ ಭುಲ್ಲೆಂಗೀ, ಕೊಣಾಯ್ಕೀ ಸಂಗಾನಾಸ್ತಾಂ, ರಾತೊ ರಾತ್ ಘರ್ ಸೊಡುನ್ ಧಾವೊನ್ ತಾಚೆಲಾಗಿಂ ಕಾಜಾರ್ ಜಾಲೆಂ. ತಾಚ್ಯಾ ಮೊಗಾಖಾತಿರ್, ಜಲ್ಮಾ ಥಾವ್ನ್ ಮಾಂದುನ್ ಆಯಿಲ್ಲ್ಯಾ ಜಾತಿಧರ್ಮಾಕ್ ಧಿಕ್ಕಾರ್ ಕೆಲೊ. ತುಜ್ಯಾ ಬಾಪಾಯ್ಕಿ ಕಳಿತ್ ನಾತ್ಲ್ಲೆಂಗೀ? ಎಕೆ ಕ್ರೀಸ್ತಾಂವ್ ಚಲಿಯೆನ್ ಮುಸ್ಲಿಮ್ ಚಲ್ಯಾಲಾಗಿಂ ತ್ಯಾ ವೆಳಾರ್ ಕಾಜಾರ್ ಜಾಂವ್ಚೆಂ ಮ್ಹಳ್ಯಾರ್? ತುಜ್ಯಾ ಆವಯ್ಕ್ ತರ್ನಾಟ್ಪಣಾಚೆ ಪ್ರಾಯೆಚೆಂ ಪಿಶೆಂ. ಆನಿ ತಾಕಾ ಕಾಜಾರಾಚೆಂ ಪಿಶೆಂ! ತುಜ್ಯಾ ಆವಯ್ಕ್ ಮತಾಂತರ್ ಕರವ್ನ್, ದೊಗಾಂಯ್ ಕಾಜಾರ್ ಜಾಲಿಂ. ಹೆಂ ಕಾಮ್ ಬರೆಂ ನ್ಹಯ್ ಮ್ಹಳ್ಳೆಂ ಕಳ್ಚೆ ತಿತ್ಲಿ ಬೂದ್ ತುಜ್ಯಾ ಆವಯ್ಕ್ ನಾತ್ಲ್ಲಿಗೀ? ಚಾರ್ ಜಣಾಂಕ್ ನ್ಯಾಯ್ ಸಾಂಗೊನ್ ದಿಂವ್ಚಾ ಗಾಂವ್ಚಾ ನಾಂವಾಡ್ದಿಕ್ ವೆಕ್ತಿಚೆ ಧುವೆಕ್ ಘೆವ್ನ್ ಫಳಾಫಳ್ ಘೆಂವ್ಚೆ ತಿತ್ಲೆಂ ಹರ್ದೆಂ ತುಜ್ಯಾ ಬಾಪಾಯ್ಕ್ ಖಂಯ್ ಥಾವ್ನ್ ಆಯ್ಲೆಂ? ಅಸಲಿಂ ತೊಪ್ಚೆ ತಸಲಿಂ ಉತ್ರಾಂ ಆಯ್ಕಾತಾನಾ ಮ್ಹಾಕಾ ಬೆಜಾರ್ ಭೊಗ್ತಾಲೆಂ. ಹ್ಯಾ ಜೊಡ್ಯಾಚೊ ಪೂತ್ ಜಾವ್ನ್ ಮ್ಹಾಕಾ ಆಲ್ಲಾಹುನ್ ಕಿತ್ಯಾಕ್ ದಾಡ್ಲಾ ಮ್ಹಳ್ಳೆಂ ಸವಾಲ್ ಮ್ಹಜೆ ಮತಿಂತ್ ಉದೆತಾಲೆಂ.
ಅಬ್ಬಾ ಆನಿ ಉಮ್ಮಾ ಅಂತರ್ಜಾತಿಚೆಂ ಕಾಜಾರ್ ಜಾಲ್ಲಿಂ ನ್ಹಯ್. ಪುಣ್ ಅಲ್ಲಾಹುಕ್ಯಿ ಹೆಂ ಬರೆಂ ದಿಸೊಂಕ್ ನಾ ಕೊಣ್ಣಾ? ಅಬ್ಬಾ ಕಾಜಾರ್ ಜಾವ್ನ್ ಮಸ್ತ್ ವರ್ಸಾಂ ವಾಂಚೊಂಕ್ಯಿ ನಾ. ಪಾಂಚ್ ಸ ವರ್ಸಾಂ ಜಾಯ್ಜೆ ತರ್ ಆವ್ಘಡಾಂತ್ ಸಾಂಪ್ಡೊನ್ ಆಮ್ಕಾಂ ದೊಗಾಂಕ್ಚ್ ಸೊಡುನ್ ಗೆಲ್ಲೊ. ಪಯ್ಶಾಂಕ್ ಕಾಂಯ್ ಬರ್ಗಾಲ್ ನಾತ್ಲ್ಲೊ. ಪುಣ್ ಹೆಂ ಕಾಜಾರ್ ಜಾಲ್ಲ್ಯಾಕ್, ಉಮ್ಮಾನ್ ಅಜೂನ್ಯಿ ನಿಂದಾ ಕರ್ಚಿಂ ಆಸಾತ್. ಉಮ್ಮಾ ಮಾತ್ರ್ ನಿರ್ಲಿಪ್ತ್ ಜಾವ್ನಾಸಾ.
ಅಬ್ಬಾ ಮೆಲ್ಯಾ ಉಪ್ರಾಂತ್ ತರ್ಯಿ, ಆಬಾನ್ ಉಮ್ಮಾಕ್ ಲಾಗಿಂ ಕಾಣ್ಘೆಲ್ಲೆಂ ತರ್ ಉಮ್ಮಾ ಪರ್ತ್ಯಾನ್ ಕ್ರಿಸ್ತಾಂವ್ ಧರ್ಮಾಕ್ ಪಾಟಿಂ ಪರ್ತತಿ ಕೊಣ್ಣಾ? ಪುಣ್ ಆಬಾನ್ ಹಾಕಾ ಆಸ್ಪದ್ಚ್ ಕರ್ನ್ ದೀಂವ್ಕ್ ನಾ. ಉಮ್ಮಾಕ್ ಕೆದ್ನಾಂಯ್ ಕುಟ್ಮಾಲಾಗಿಂ ಯೆಂವ್ಚೊ ಆವ್ಕಾಸ್ಚ್ ಮೆಳಾನಾತ್ಲ್ಲ್ಯಾ ಪರಿಂ ಕೆಲೊ. ಕಾಜಾರ್ ಜಾಲ್ಲೆ ಸುರ್ವೆರ್ ಆನಿ ಆಬ್ಬಾ ಮೆಲ್ಯಾ ಉಪ್ರಾಂತ್ ಸುಮಾರ್ ಪಾವ್ಟಿಂ ಉಮ್ಮಾ ಘರಾ ಗೆಲ್ಲಿ ತರ್ಯಿ, ಘರ್ಚೆಂ ಮೇಟ್ ವಯ್ರ್ ಚಡೊಂಕ್ ಆಬಾನ್ ಸೊಡುಂಕ್ ನಾ ಖಂಯ್.
ಪಯ್ರ್ ಪಯ್ರ್ ಮ್ಹಳ್ಯಾರ್ ಸುಮಾರ್ ವೀಸ್ ದಿಸಾಂ ಪಯ್ಲೆಂ ಹಾವೆಂಚ್ ಒತ್ತಯ್ ಕರುನ್, ಉಮ್ಮಾಕ್ ಸಾಂಗಾತಾ ಘೆವ್ನ್ ಆಬಾಕ್ ಪಳಂವ್ಕ್ ಆಯಿಲ್ಲೊಂ. ಪುಣ್ ತೆದ್ನಾಂಯಿ, ಉಮ್ಮಾಚೆಂ ಮುಕಾಮಳ್ ಪಳಂವ್ಕ್ ಆಬಾನ್ ನಿರಾಕರ್ಸಿಲ್ಲೆಂ. ಆಬಾನ್ ದೊಳೆ ದಾಂಪುನ್ಚ್, ಉಮ್ಮಾಕ್ ಥಂಯ್ ಥಾವ್ನ್ ಪಯ್ಸ್ ವಚೊಂಕ್ ಫರ್ಮಾಯಿಲ್ಲೆಂ. ಏಕ್ ಉತರ್ಯ್ ಉಲಯ್ನಾಸ್ತಾಂ ತೋಂಡ್ ಘುಂವ್ಡಾವ್ನ್ ಅಕ್ಮಾನ್ ಕೆಲ್ಲೊ. ಉಮ್ಮಾ ದುಕಾಂ ಗಳಯಿತ್ತ್ ಪಾಟಿಂ ಯೆಂವ್ಕ್ ನಾಂಗೀ....? ಆಪ್ಲೆ ಜಿಣಿಯೆಚ್ಯಾ ಅಕ್ರೇಚ್ಯಾ ದಿಸಾಂನಿಚ್ ಆಬಾಕ್ ಉಮ್ಮಾಚೆರ್ ಆಸ್ಚೊ ರಾಗ್ ಕಿಕ್ಕೆಸೊಯ್ ಉಣೊ ಜಾಂವ್ಕ್ ನಾತ್ಲ್ಲೊ. ಉಮ್ಮಾನ್ ಭಗ್ಸಾಣೆಂ ಮಾಗ್ಲ್ಲೆಂ ತರ್ಯೀ ಆಬಾನ್ ಭಗ್ಸುಂಕ್ ನಾ. ಆಬಾಕ್ ಜಾಯ್ಪುರ್ತಿ, ಆಸ್ತ್-ಪಾಸ್ತ್ ಆಸ್ಲ್ಲಿ. ಆಪ್ಲೆ ಧುವೆಕ್ ಮ್ಹಣ್ ತಾಣೆ ಕಿತೆಂಯ್ ದೀಂವ್ಕ್ ನಾತ್ಲ್ಲೆಂ. ಹಾಂವ್ ಹಾಯ್ಸ್ಕೂಲಾಂತ್ ಶಿಕ್ತಾಸ್ತಾನಾ ಆಬಾಗೆರ್ ವಚೊಂಕ್ ಸುರು ಕೆಲೆಂ. ಆಮ್ಚಿ ದೊಗಾಂಯ್ಚಿ ಪಯ್ಲಿ ಭೆಟ್ ಮ್ಹಾಕಾ ಅಜೂನ್ಯಿ ಉಡಾಸ್ ಆಸಾ. ಮುಸ್ಲಿಮ್ ಸಂಪ್ರದಾಯಾ ಪರ್ಮಣೆಂ ಹಾವೆಂ ತಾಕಾ ’ಅಜ್ಜಾ’ ಮ್ಹಣ್ ಪಯ್ಲೆ ಪಾವ್ಟಿಂ ಉಲೊ ಕರ್ತಾನಾ ತಾಕಾ ಕಠೀಣ್ ರಾಗ್ ಆಯಿಲ್ಲೊ. ಆಬಾ ಮ್ಹಣ್ ಮರ್ಯಾದಿನ್ ಆಪಯ್ ನಾ ತರ್ ಜಾಗ್ರುತ್ ಮ್ಹಣ್ ಧಮ್ಕಿ ದಿಲ್ಯಾ ಉಪ್ರಾಂತ್ ಕೆದ್ನಾಂಯ್ ಹಾಂವ್ ಚುಕೊನ್ಯಿ ’ಆಬಾ’ ಮ್ಹಳ್ಳ್ಯಾ ಸಬ್ದಾ ಶಿವಾಯ್ ದುಸ್ರ್ಯಾ ಸಬ್ದಾನ್ ತಾಕಾ ಆಪಯ್ನಾತ್ಲ್ಲೊಂ. ಪಯ್ಲೆಂ ಪಯ್ಲೆಂ ಹಾಂವ್ ತಾಚೊ ನಾತು ಮ್ಹಣ್ ಮಾಂದುನ್ ಘೆಂವ್ಕ್ ನಿರಾಕರ್ಸಿತಾಲೊ. ಪುಣ್ ಹಾವೆಂಯ್ ಹಟ್ ಸೊಡುಂಕ್ ನಾ.
"ತುಂ ಕೋಣ್......? ಮ್ಹಾಕಾ ಕಿತೆಂ ಜಾಯ್ಜೆ?" ತ್ಯಾ ಎಕಾ ದಿಸಾ ತಾಣೆ ಮ್ಹಾಕಾ ರಾಗಾನ್ ಸವಾಲ್ ಘಾಲ್ಲೆಂ!
"......ಹಾಂವ್...... ಹಾಂವ್ ತುಜೊ ನಾತು ನ್ಹಯ್ಗೀ ಆಬಾ?"
"......ವ್ಹಯ್ ತರ್ ಹೆಂ ಪೂರಾ ಖಾವ್ನ್ ಸೊಡ್" ತಾಣೆ ಮ್ಹಜ್ಯಾ ಮುಕಾರ್ ಹಾಡುನ್ ದವರ್ಲ್ಲೆಂ ಬೊಶಿಭರ್ ದುಕ್ರಾಮಾಸ್ ಹಾವೆಂ ಅಲ್ಲಾಹುಕಡೆ ಮಾಫ್ ಮಾಗಾತ್ ಖಾವ್ನ್ ಸೊಡ್ಲೆಂ!
"ಆತಾಂ ಸಮಾಧಾನ್ ಜಾಲೆಂಗೀ ಆಬಾ? ತುಜ್ಯಾ ಹಾತಾಂನಿ ತುವೆಂ ವೀಕ್ ದಿಲ್ಯಾರ್ಯ್ ಹಾಂವ್ ಪಿಯೆತಾಂ..... ಕಿತ್ಯಾಕ್ ತುಕಾ ಮ್ಹಜೆರ್ ಆನ್ ಉಮ್ಮಾಚೆರ್ ಅಸಮಾದಾನ್? ಸ್ವಂತ್ ಧುವೆಚಿ ಚೂಕ್ ಭಗ್ಸುಂಚೆ ತಿತ್ಲೆ ವ್ಹಡ್ ಗೂಣ್ ತುಜೆ ಥಂಯ್ ನಾಂತ್ಗೀ.....?"
’ತುಜೆ....... ತುಜೆ ಕುಡಿಂತ್ ವ್ಹಾಳ್ಚೆಂ ರಾಗಾತ್ ಆಮ್ಚೆಂಚ್ ಕುಳಿಯೆಚೆಂ ಧಯ್ರಾಧೀಕ್ ರಾಗಾತ್ರೇ.... ದುಸ್ರೆಂ ಖಂಚೆಂಯ್ ಹಲ್ಕಟ್ ರಗಾತ್ ನ್ಹಯ್......" ಮ್ಹಣ್ ಆಬಾನ್ ಮ್ಹಾಕಾ ಪೊಟ್ಲುನ್ ದರ್ಲ್ಲೆಂ. ಆಬಾಚ್ಯಾ ಉತ್ರಾಂನಿ ಮ್ಹಾಕಾ ರಾಗ್ ಆಯಿಲ್ಲೊ. ಬೆಜಾರ್ ಜಾಲೆಂ. ಹಿಂಚ್ ಉತ್ರಾಂ ದುಸ್ರ್ಯಾ ಕೊಣೆಂಯಿ ಸಾಂಗ್ಲ್ಲಿಂ ತರ್ ಹಾಂವ್ ತಾಂಕಾಂ ಚಿರುನ್ ಘಾಲ್ತೊಂ. ಜಾಲ್ಯಾರ್ಯ್ ಆಬಾಕ್ ಮ್ಹಜೆರ್ ಕಿತ್ಲೊ ಅಭಿಮಾನ್ ಆಸಾ ಮ್ಹಣ್ ತಾಚ್ಯಾ ಉತ್ರಾಂನಿ ತೊ ಸಾಂಗ್ತಾಲೊ ಜಾಲ್ಲ್ಯಾನ್ ಸಂತೊಸ್ಯಿ ಭಗ್ತಾಲೊ.
ಹಾಂವ್ ಆಬಾ ಕಡೆ ಸುಡಾಳ್ ಜಾವ್ನ್ ಕೊಂಕ್ಣಿಚ್ ಉಲಯ್ತಾಲೊಂ. ತ್ಯಾಚ್ ಖಾತಿರ್ ತಾಕಾ ಮ್ಹಜೆರ್ ವಿಶೇಸ್ ಅಭಿಮಾನ್. "ಪುತಾ.... ಆಮ್ಚ್ಯಾ ಹಳ್ಳೆಚಿ ಹಿ ಪ್ರಕೃತಿ ಪಳೆ. ಕೆದ್ನಾಂಯ್ ಪಾಚ್ವಿ, ವರ್ಸ್ ಭರ್ ವ್ಹಾಳ್ಚ್ಯೊ ತ್ಯೊ ನಿತಳ್ ಉದ್ಕಾಚ್ಯೊ ಝರಿ, ಮೊಳ್ಬಾಚೆ ಉಬಾರಾಯೆ ಮ್ಹಣಾಸರ್ ಉಭೆ ರಾವ್ಲ್ಲೆ ತೆ ಗುಡೆ ದೊಂಗೊರ್, ಸುರ್ಯಾಚೊ ಉಜ್ವಾಡ್ ದೆಕಾನಾತ್ಲ್ಲಿಂ ತಿಂ ರಾನಾಂ, ತಾಂತುಂ ವಸ್ತಿ ಕರ್ಚಿಂ ತಿಂ ಸುಕ್ಣಿಂ, ಮಾನ್ಜಾತಿ, ಕಿತ್ಲೆಂ ಸೊಭಿತ್ ವಾತಾವರಣ್ ಹಾಂಗಾಚೆಂ. ಶ್ಹೆರಾಂತ್ ಕಿತೆಂ ಆಸಾ? ತುಂ ಹಾಂಗಾಚ್ ರಾವ್. ಪಾದ್ರ್ಯಾಬಾಕ್ ಸಾಂಗೊನ್ ಬಾಪ್ತಿಜ್ಮ್ ಆನಿ ಕುಮ್ಗಾರ್ ದಿಂವ್ಚಿ ವೆವಸ್ತಾ ಕರ್ತಾಂ. ತುಜೆ ಖಾತಿರ್ ನವೆಂ ಘರ್ ಬಾಂದುನ್, ಆಮ್ಚಾಚ್ ಹಳ್ಳೆಂತ್ಲೆಂ ಚೆಡುಂ ಪಳೆವ್ನ್ ಕಾಜಾರ್ ಕರಯ್ತಾಂ. ದಾವಿದ್ ಪೊರ್ಬುಚಿ ಧುವ್, ಲೀನಾ ಬಾಂಗಾರಾಚೆ ಬಾವ್ಲೆಪರಿಂ ಸೊಬಿತ್ ಆಸಾ. ತೆಂಚ್ ತುಕಾ ಸಾಂಗ್ಲ್ಲೆಂ ಚೆಡುಂ....."
".......ಮ್ಹಾಕಾ ಕಿತೆಂ ಚೆಡ್ವಾಚಿ ಆಶಾ ದಾಕಯ್ತಾಯ್ಗೀ ಆಬಾ? ಸತ್ ಸಾಂಗ್ತಾಂ ಆಬಾ...... ತುಜೆ ಸಾಂಗಾತಾಚ್ ರಾವಜೆ, ಹೆ ಮಾತ್ಯೆಚೊ ಪೂತ್ ಜಾವ್ನ್ ಜಿಯೆಜೆ ಮ್ಹಳ್ಳಿ ಆಶಾ ಮ್ಹಾಕಾಯೀ ಆಸಾ. ಹೆಚ್ ಹಳ್ಳೆಂತ್ಲ್ಯಾ ಎಕೆ ನೆಣ್ತೆ ಚಲಿಯೆಲಾಗಿಂ ಕಾಜಾರ್ ಜಾವ್ನ್ ಸುಖಿ ಕುಟ್ಮಾ ಜಿಣಿ ಜಿಯೆಜೆ ಮ್ಹಳ್ಳಿ ಜಬ್ಬೊರ್ ಆಶಾ ಆಸಾ. ಪುಣ್.... ಉಮ್ಮಾ ಎಕ್ಸುರಿ ತ್ಯಾ ಶ್ಹೆರಾಂತ್ ಜಿಯೆತ್ಗೀ?"
"ತುಜೆ ಆವಯ್ಚೊ ವಿಶಯ್ ಮ್ಹಜೆಲಾಗಿಂ ಉಲಯ್ನಾಕಾ. ತ್ಯಾ ಕಾಳೊಕಾಚೆ ರಾತಿಂ ಘರ್ ಸೊಡ್ನ್ ತಾಚೆ ಸಾಂಗಾತಾ ದಾಂವ್ತಾನಾ ಎಕ್ಸುರೆಂ ವಚೊಂಕ್ ನಾಂಗೀ...? ಆತಾಂಯ್ ಎಕ್ಸುರೆಂ ಜಿಯೆಂವ್ದಿ. ಗಾಂವ್ಚ್ಯಾಂಕ್ ನ್ಯಾಯ್ ಸಾಂಗ್ಚ್ಯಾ ಮ್ಹಜೆಂ ನಾಂವ್ ಪಾಡ್ ಕೆಲೆಂ ಶಿವಾಯ್ ದುಸ್ರೆಂ ಕಿತೆಂ ಜೊಡ್ಲೆಂ ತಾಣೆ? ತುಂ ಆಮ್ಚೊ. ಆಮ್ಚಾ ರಗ್ತಾಚೊ ವಾಂಟೊ ತುಂ. ದುಸ್ರ್ಯಾ ಜಾತಿಚ್ಯಾನ್ ತುಕಾ ಜಲ್ಮಾಯ್ಲಾಂ ಮ್ಹಣ್ತಚ್ ತುಂ ದುಸ್ರೊ ಜಾತಾಯ್ಗೀ? ತುಜೆ ಕುಡಿಂತ್ ಆಮ್ಚೆ ಜಾತಿಚೆಂ ರಗಾತ್ ವ್ಹಾಳ್ತಾ......."
".......ಅಬಾ, ಉಮ್ಮಾಕ್ ಪಯ್ಸ್ ಕರುನ್, ಹಾಂವ್ ಎಕ್ಲೊ ಮಾತ್ರ್ ಹ್ಯಾ ಗಾಂವಾಂತ್ ರಾಂವ್ಚೊ ನಾ. ಉಮ್ಮಾಕ್ಯೀ ಲಾಗಿಂ ಕರ್ಚೆಂ ಮನ್ ತುವೆಂ ಕೆಲ್ಯಾರ್ ಖಂಡಿತ್ ಜಾವ್ನ್ಯ್ ಆಮಿ ದೊಗಾಂಯ್ ತುಜೆ ಸಾಂಗಾತಾಚ್ ರಾವ್ತಾಂವ್. ಜಾಯ್ ಜಾಲ್ಯಾರ್ ಆತಾಂಚೆಂ ಧರ್ಮ್ ಸೊಡುನ್ ತುವೆಂ ಸಾಂಗ್ಲ್ಲ್ಯಾ ಪರಿಂಚ್ ಕರ್ತಾಂವ್."
".... ನಾ ಪುತಾ. ಹೆಂ ಪುರಾ ತುಕಾ ಹೆ ಪ್ರಾಯೆರ್ ಸಮ್ಜಾನಾ. ತುಜಿ ಆವಯ್, ಮ್ಹಜ್ಯಾ ವಾಂಟ್ಯಾಕ್ ಕೆದ್ನಾಂಗೀ ಮೊರೊನ್ ಗೆಲ್ಯಾ. ಕಿತ್ಯಾ ತಾಕಾ ಆಮ್ಚೆ ಜಾತಿಂತ್ ಫಾವೊತೊ ಚಲೊ ಮೆಳೊಂಕ್ನಾಂಗೀ.....? ವಚೊನ್ ವಚೊನ್ ಪರ್ಕಿ ಜಾತಿಚ್ಯಾಂಚೆ ಕಡೆನ್ ಕಾಜಾರ್ ಜಾಲೆಂ. ಆಮ್ಚೆ ಜಾತಿಂತ್ಲೊ ಖಂಚೊಯೀ ಭಿಕಾರಿ ಜಾಲ್ಲೊ ತರ್ಯೀ, ಜಾವಂಯ್ ಮ್ಹಣ್ ತಾಕಾ ಒಳ್ಕೊನ್ ಘೆತೊಂ......."
"......ಪುಣ್, ತುವೆಂ ಆತಾಂ ತರ್ಯೀ ತಿಕಾ ಭೊಗ್ಸಿಯೆತ್ ನ್ಹಯ್ಗೀ ಆಬಾ......."
"........ತಾಣೆ ಕೆಲ್ಲೆ ಚುಕಿಕ್, ತಾಣೆ ಆದಾರ್ಲ್ಲ್ಯಾ ಪಾತ್ಕಾಕ್ ದೆವಾನ್ ಭೊಗ್ಸಿಲ್ಯಾರ್ಯೀ ಹಾಂವ್ ಭೊಗ್ಸಾಣೆಂ ದಿಂವ್ಚೊಂ ನಾ. ಕೊಣಾಕ್ ಕಿತೆಂ ವಾಯ್ಟ್ ಕೆಲಾಮ್ ಹಾವೆಂ? ಮ್ಹಜೆಂ ನಾಂವ್ ಪಾಡ್ ಕರುನ್, ಚ್ಯಾರ್ ಜಣಾಂ ಮುಕಾರ್ ತಕ್ಲಿ ಉಕ್ಲುನ್ ಚಲಾನಾತ್ಲ್ಲ್ಯಾ ಪರಿಂ ಕರುನ್ ಗೆಲೆಂ. ಪಾತ್ಕಾಕ್ ಪ್ರಾಜಿತ್ ಕರಿಜೆಗೀ ನಾಕಾ? ತುಂಚ್ ಸಾಂಗ್?" ತೊ ತೀಕ್ಷ್ಣ್ ದಿಶ್ಟಿನ್ ಮ್ಹಾಕಾಚ್ ಪಳಯ್ತಾಲೊ. ಮ್ಹಜ್ಯಾ ಉಮ್ಮಾನ್ ಕರುಂಕ್ ನ್ಹಜೊ ತಸಲೆಂ ಪಾತಕ್ ಕಿತೆಂ ಕೆಲಾಂ ಮ್ಹಣ್ ವಿಚಾರ್ಚಿ ಆಶಾ ಉದೆಲಿ ತರ್ಯೀ ಮನಾಭಿತರ್ಚ್ ದವರ್ನ್ ಘೆತ್ಲಿ.
ಥೊಡ್ಯಾ ವೆಳಾನ್ ಭಿತರ್ ವಚೊನ್ ಥೊಡೆ ಧಾಕ್ಲೆ-ದಾಸ್ತಾವೆಜಾಂ ಹಾಡುನ್ ಮ್ಹಜೆ ಮುಕಾರ್ ಸೊಡವ್ನ್ ವಾಚ್ ಮ್ಹಣಾಲೊ. ಸುಮಾರ್ ಧಾ ಎಕ್ರೆ ಭುಂಯ್ ಸುವಾತ್ ಮ್ಹಜ್ಯಾ ನಾಂವಾರ್ ಬರಯಿಲ್ಲಿ. "ಪಳೆ... ಹೆಂ ಪೂರಾ ಮ್ಹಜೆ ಧುವೆಕ್ ಮ್ಹಣ್ ಕರ್ನ್ ದವರ್ಲ್ಲೆಂ. ಆತಾಂ ಹೆಂ ಪೂರಾ ತುಜ್ಯಾ ನಾಂವಾರ್....." ಇತ್ಲೆಂ ಸಾಂಗ್ತಾನಾ ತಾಚ್ಯಾ ದೊಳ್ಯಾಂನಿ ದುಖಾಂ ಜಮೊ ಜಾಲ್ಲಿಂ ಮ್ಹಜ್ಯಾ ಗಮನಾಕ್ ಗೆಲೆಂ.
ಆನ್ ಮಸ್ತ್ ಖುಶಾಲಾಯೆಚೊ ಮನಿಸ್ ಜಾವಾಸ್ಲ್ಲೊ. ತಾಚಿಂ ತಮಾಶೆಚಿಂ ಉತ್ರಾಂ ಆಯ್ಕೊಂಕ್, ಲ್ಹಾನ್ ವ್ಹಡ್ ಮ್ಹಳ್ಳೊ ಭೇದ್ ನಾಸ್ತಾಂ ಕಿತ್ಲಿಶಿಂ ಜಣಾಂ ತಾಚೆ ಸರ್ಶಿನ್ ಜಮೊ ಜಾತಾಲಿಂ. ತಾಚೆ ತಾವ್ನ್ ಸಲಹಾ ಸೂಚನ್ ಘೆತ್ಲ್ಲಿಂ, ಘೆವ್ನ್ ಆಸ್ಲ್ಲಿಂ ತಾಕಾ ಕೆದ್ನಾಂಯ್ ವಿಸ್ರೊಂಚಿಂ ನಾಂತ್.
ತಾಚೊ ನಾತು ಮ್ಹಣ್ ಸಾಂಗೊಂಕ್ ಮ್ಹಾಕಾ ಎಕೆ ರಿತಿಚೊ ವಿಶೇಸ್ ಅಭಿಮಾನ್ ಭಗ್ತಾಲೊ. ಹರ್ಯೆಕ್ ಪಾವ್ಟಿಂ ತೊ, ತಾಚ್ಯೊ ಆನಿ ಮ್ಹಜ್ಯೊ ಮಿಶಿಯೊ ತುಲನ್ ಕರ್ತಾಲೊ. ಹಾಂವ್ ಮೆಲ್ಯಾ ಉಪ್ರಾಂತ್ ತುಂ, ತುಜ್ಯಾ ಉಪ್ರಾಂತ್ ತುಜೊ ಪೂತ್...... ಆಶೆಂ ಹ್ಯಾ ವಂಶಚ್ಯೊ ಮಿಶಿಯೊ ಲಾಂಬ್ ಲಾಂಬ್ ಜಾವ್ನ್ ವಾಡೊನ್ಚ್ ವಚಾಜೆ ಮ್ಹಳ್ಳೆಂ ಪಿಶೆಂ ಕಲ್ಪನ್ ಮ್ಹಜೆಲಾಗಿಂ ಸಾಂಗ್ತಾಲೊ. ತಾಕಾ ಮ್ಹಜ್ಯಾ ಮಿಶಿಯಾಂಚೆರ್ ತಿತ್ಲೊ ಅಭಿಮಾನ್ ಅಸ್ಲ್ಲೊ. ಥೊಡೆ ಪಾವ್ಟಿಂ ಲ್ಹಾನ್-ವ್ಹಡ್ ಜಾವ್ನ್ ವಾಡ್ಲ್ಲ್ಯೊ ಮ್ಹಜ್ಯೊ ಮಿಶಿಯೊ ಎಕಾಚ್ ಲೆಕಾರ್ ಕಾತ್ರುನ್ ತೇಲ್ ಸಾರಯ್ತಾಲೊ.
....... ಮೀಸ್ ಮುಗ್ದೊನ್ ಕಂತಾರಾಂ ಸವೆಂ ಮೋರ್ನ್ ಸಿಮೆಸ್ತ್ರಿಕ್ ಹಾಡ್ಲೆಂ. ಉಮ್ಮಾ ಪೊಂಡಾ ಸರ್ಶಿನ್ಚ್ ರಾವೊನ್ ಆಸ್ಲ್ಲಿ. ಪಾದ್ರ್ಯಾಬಾನ್ ಪರ್ತ್ಯಾನ್ ಏಕ್ಪಾವ್ಟಿಂ ಮೊಡೆಂ ಬೆಂಜಾರ್ ಕೆಲೆಂ. ಮೊರ್ಣಾಚೆ ಪೆಟೆಚೆಂ ಧಾಂಪ್ಣೆಂ ಧಾಂಪುನ್ ದೊರಿಯೆಚೆ ಕುಮ್ಕೆನ್ ಪೊಂಡಾಕ್ ದೆಂವಯ್ತಾನಾ, ಸಕ್ಡಾಂಚಾ ದೊಳ್ಯಾಂನಿ ಆಕ್ರೇಚಿಂ ದುಖಾಂ ಪಾಜಾರ್ಲಿ. ಹಾವೆಂ ಉಮ್ಮಾಚ್ಯಾ ಭುಜಾಂಕ್ ಧರುನ್ ತಿಕಾ ಕುಮಕ್ ಕೆಲೆಂ. ಉಮ್ಮಾ ರಡೊನ್ಚ್ ಆಸ್ಲ್ಲಿ.
"ಪುತಾ....... ಬಾಬಾನ್ ಮ್ಹಾಕಾ ಆನಿಕೀ ಭೊಗ್ಸುಂಕ್ ನಾ ಪಳೆ. ಮ್ಹಾಕಾ ತಾಚೆ ಥಾವ್ನ್ ಆನಿಕೀ ಭೊಗ್ಸಾಣೆಂ ಮೆಳೊಂಕ್ ನಾ. ಹಾಂವ್ ಪಾತ್ಕಿ ಪುತಾ..... ಹಾಂವ್ ಪಾತ್ಕಿ. ಬಾಬಾ ಮ್ಹಾಕಾ ಭೊಗ್ಸಿ.... ಮ್ಹಾಕಾ ತುಜೆಂ ಭೊಗ್ಸಾಣೆಂ ದೀ....." ಉಮ್ಮಾಚಿಂ ಉತ್ರಾಂ ಜ್ಯೋರಾನ್ ವ್ಹಾಳ್ಚ್ಯಾ ವಾರ್ಯಾ ಸಾಂಗಾತಾ ಭರ್ಸುನ್ ಪಯ್ಸ್ ವೆತಾಲಿಂ. ತಿಣೆ ಮ್ಹಾಕಾ ಪೊಟ್ಲುನ್ ಧರ್ಲೆಂ. ದೋನ್ ಮೂಟ್ ಮಾತಿ ತಿಚ್ಯಾ ಹಾತಾಂತ್ ದೀವ್ನ್ ಪೊಂಡಾಕ್ ಉಡಯ್ಲಿ.
ಜಮ್ಲ್ಲಿಂ ಪೂರಾ ಪಾಟಿಂ ಪರ್ತಾತಾನಾ, ಆಬಾಚೆ ಜಿಣ್ಯೆಚೊ ಅದ್ಯಾಯ್ ಮುಗ್ದಾಲೊ ಮ್ಹಳ್ಳೆಂ ಧೃಡ್ ಕರುಂಕ್ ದೊಗಾಂನಿ ಯೇವ್ನ್ ಖೊರ್ಯಾನ್ ಮಾತಿ ನಿಸ್ರಾಂವ್ಕ್ ಸುರು ಕೆಲೆಂ. ಡಬ್..... ಡಬ್...... ಆವಾಜ್ ಕರಿತ್ ಮೊರ್ನಾಚೆ ಪೆಟೆ ವಯ್ರ್ ಪಡ್ಚ್ಯಾ ಫಾತ್ರಾ ಮಾತಿಯೆಚೊ ಆವಾಜ್ ತ್ಯಾ ಶಾಂತ್ ವಾತಾವರಣಾಂತ್ ಸುಮಾರ್ ಪಯ್ಸ್ ಮ್ಹಣಾಸರ್ ಆಯ್ಕಾತಾಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
