ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಕೊಂಕ್ಣಿ ಆವಯ್ ಕೊಣಾಗೆರ್ ಆಸಾ? ಕೊಣ್ ತಿಕಾ ಪೊಸ್ತಾ? ಕೊಣ್ ತಿಚೆ ಸ್ವತಾಚೆ/ ಪೊಸ್ಕೆ ಪೂತ್? ಖಂಚ್ಯಾ ಗಾಂವಾಂತ್ ತಿ ವಸ್ತಿ ಕರ್ನ್ ಆಸಾ?’
ಕೊಂಕ್ಣಿ ಆವಯ್ ಕೊಣಾಗೆರ್ ಆಸಾ?
ವರಸ್ : 2007
ಅಂಕೊ : 37
ಮಯ್ನೊ : ಜುಲಾಯ್
ಸಂಪಾದಕೀಯ್ - 37.
ವಲ್ಲಿ ಕ್ವಾಡ್ರಸ್
ಮ್ಹಜ್ಯಾ ತಾಂಕಿಚೊ ಕಾಂಯ್ ಇಲ್ಲೊ ಚಿಲ್ಲರ್ ಕೊಂಕ್ಣಿ ಸಾಹಿತಿಕ್ ವಾವ್ರ್ ಸುರು ಕೆಲ್ಲೆಥಾವ್ನ್ ಆಯ್ಕೊನ್ ಆಯ್ಲಾಂ ’ಕೊಂಕ್ಣಿ ಆವಯ್ಚಿ ಸೆವಾ’ ಮ್ಹಣೊನ್. ತರ್ಯೀ ’ತಿ ಆವಯ್’ ಕೊಣಾಗೆರ್ ಆನಿ ಖಂಯ್ಚಾ ಗಾಂವಾಂತ್ ಆಸಾ ಮ್ಹಳ್ಳೆಂ ಅಜೂನ್ ಸೊಧುನ್ ಆಸಾಂ.
ಕೊಂಕ್ಣಿ ಸಂಸಾರಾಂತ್ ಕಿತೆಂ ಉಣೆಂ ಆಸ್ಲ್ಯಾರ್ಯೀ, ಕೊಂಕ್ಣಿ ಕೊಂಕ್ಣಿ ಮ್ಹಣ್ ಪರ್ಗಟ್ ರಿತಿರ್ ಹರ್ಧೆಂ ಪೆಟುನ್ ಅಪ್ಲ್ಯಾ ಘರಾಂನಿ ಫಿಂರ್ಗಿ ಸಂಸ್ಕೃತಿ, ಫಿಂರ್ಗಿ ಆಚಾರ್ ವಿಚಾರಾಂಚೆ ಗುಲಾಮ್ ಜಾವ್ನ್ ಜಿಯೆಂವ್ಚೆ ಹಿಪೊಕ್ರೆತ್, ಆನಿ ಫುಂಕ್ಯಾಚೆ ಶಿಫಾರಸ್ ಉಚಾರ್ಚೆ ಮಾತ್ರ್ ಯಥೇಶ್ಟ್ ಮಾಪಾನ್ ಆಸಾತ್. ವ್ಹಾ! ತುವೆಂ ಭಾರಿ ಬರೆಂ ಕಾಮ್ ಕೆಲೆಂಯ್ (ಗುಡೆ/ದೊಂಗೊರ್ ಪರ್ತಿಲೆಯ್ ವಾ ಫಂಡ್/ದರ್ಯೆ ಪುರ್ಲೆಯ್), ಕೊಂಕ್ಣಿ ಆವಯ್ಚಿ ಸೆವಾ ಕರುನ್ ತಿಕಾ ಗ್ರೇಸ್ತ್ ಕೆಲೆಂಯ್, ತುಜಿ ಸೆವಾ ಅಶಿಚ್ಚ್ ಮುಖಾರುನ್ ವ್ಹರ್ ಮ್ಹಣ್ ಶಿಫಾರಸ್ ಉಚಾರ್ಚೆ, ನಿಜಾಯ್ಕೀ ಕಾಂಯ್ ಅಸಲ್ಯಾಚ್ ಕೊಂಕ್ಣಿ ವಾವ್ರಾಕ್ ಕಾಂಯ್ ಏಕ್ ರುಪಯ್ ಕುಮೊಕ್ ಕರ್ಶಿಗೀ ಮ್ಹಳ್ಳೆಂ ಸವಾಲ್ ವಿಚಾರ್ಲೆಂ ತರ್ ಪಣಾಂದೆ ಪದ್ರಾಡ್. ಮಾಗಿರ್ ಹಾಂಕಾ ದಿಸಾಚೆಂ ಚುಡಿ ಘೆವ್ನ್ ಸೊಧುಂಕ್ ಗೆಲ್ಯಾರ್ಯೀ ಮೆಳ್ಚಿಂನಾಂತ್. ಆಸೊಂ! ಹ್ಯಾ ಸಂಸಾರಾಂತ್ ಇತ್ಲ್ಯಾ ಸರ್ವ್ ಪಿಡೆಂತ್ ಮನಿಸ್ ವಳ್ವಳ್ತಾನಾ ಹಿ ಏಕ್ ಪಿಡಾಯ್ ತಾಂಚೆಮಧೆಂ ಸೊಭೊಂದಿ.
ಮ್ಹಜ್ಯಾ ಮತಿಂಕ್ ಖಾಂತಂವ್ಚೆಂ ಸವಾಲ್ ಇತ್ಲೆಂಚ್ - ಕೊಂಕ್ಣಿ ಆವಯ್ ಕೊಣಾಗೆರ್ ಆಸಾ? ಕೊಣ್ ತಿಕಾ ಪೊಸ್ತಾ? ಕೊಣ್ ತಿಚೆ ಸ್ವತಾಚೆ ಪೂತ್ ಆನಿ ಕೊಣ್ ಪೊಸ್ಕೆ ಪೂತ್? ಆನಿ ಖಂಚ್ಯಾ ಗಾಂವಾಂತ್ ತಿ ವಸ್ತಿ ಕರ್ನ್ ಆಸಾ? ಮ್ಹಳ್ಳೆಂ.
ಪುಣ್ ತಾಚ್ಯಾಧಿಂ ಹೆಂ ಸವಾಲ್ ಕಿತ್ಲೆಂ ವಾಜ್ಬಿ ಮ್ಹಳ್ಳ್ಯಾಚೆರ್ ಎಕೊಡೊ ನಿಯಾಳ್ ಕರ್ಯಾಂ;
ಆಜ್ ಆಮ್ಚೊ ದೇಸ್ ಎಕಾ ಭಿರಾಂಕುಳ್ ಸ್ಥಿತೆಕ್ ಫುಡ್ ಕರುನ್ ಆಸಾ, ಸಮಾಜೆಚ್ಯಾ ಹರ್ಯೆಕಾ ವರ್ಗಾಂತ್ ಶಾಂತಿ ಸಮಧಾನ್ ಉಣಿ ಜಾವ್ನ್ ಆಯ್ಲ್ಯಾ. ಖಂಚೊಯ್ ದೇವ್ ಖಂಚೊಚ್ ಧರ್ಮ್ ವಾ ಖಂಚಿಚ್ ಜಾತ್ ಮನ್ಶ್ಯಾಕ್ ’ಸಂಯಮಾನ್’ ಜಿಯೆಂವ್ಕ್ ಸೊಡಿನಾ ಜಾಲ್ಯಾ. ಮನಿಸ್ ದಿಸಾನ್ ದೀಸ್ ಲಾಚಾರ್ ಜಾಲಾ. ಜಾಂವ್ಕ್ ಪುರೊ ಆಮ್ಚೊ ದೇಸ್ ಸಂಸಾರಾಂತ್ ಆಸ್ಚಾ ಚಡ್ ಭರ್ವಶ್ಯಾಚ್ಯಾ ದೇಶಾಂ ಪಯ್ಕಿಂತ್ ಏಕ್. ಆಸೊಂಕ್ ಪುರೊ ಆಮ್ಚಾ ದೇಶಾಚಿ ಆರ್ಥಿಕ್ ಪರಿಗತ್ ಭೋವ್ ಬರಿ ಆಸಾ. ಜಾಂವ್ಕ್ ಪುರೊ ಸೆನ್ಸೆಕ್ಸ್ ಪಂದ್ರಾ ಹಜಾರಾಂಕ್ ಪಾಂವ್ಚಾರ್ ಆಸಾ. ಜಾಂವ್ಕ್ ಪುರೊ ಆಮ್ಚಾ ದೇಸಾನ್ ಸೋಫ್ಟ್ವೇರ್ ತಾಂತ್ರಿಕತೆಂತ್ ಸಂಸ್ರಾಕ್ ವಾಟ್ ಧಾಖಯ್ಲ್ಯಾ - ಪುಣ್ ವ್ಯತಿರಿಕ್ತ್ ಜಾವ್ನ್ ಆಮಿ ತಿತ್ಲಿಂಚ್ ದೆಧೆಸ್ಪೊರ್ ಜಾವ್ನ್ ಜಿಯೆತಾಂವ್. ಆಮ್ಚಾ ಸಮಾಜೆಂತ್ ಜಾತಿಚಾ ನಿಬಾನ್ ಮನಿಸ್ ಮನ್ಶಾಕ್ ಖಾತಾ, ಎಕಾಮೆಕಾಚೆಂ ರಗಾತ್ ಪಿಯೆತಾ ಆನಿ ತ್ಯಾ ರಗ್ತಾನ್ ನ್ಹಾತಾ. ತರ್ಯೀ ತಿ ತಾನ್ ಭಾಗಾನಾ. ಹ್ಯಾ ಮಧೆಂ ಖಬ್ರಾಂ ಮಾಧ್ಯಮಾಂ ಅಪಾಪ್ಲ್ಯಾ ಖಾಸ್ಗಿ ಚಾನೆಲಾಂಚಾ ಪ್ರಚಾರಾಶಿವಾಯ್ ಹೆರ್ ಸಂಗ್ತ್ಯಾಂಕ್ ಗಮನ್ ದೀನಾಂತ್, ದೆಕುನ್ ಎಕಾ ದಿಸಾ ಅಟ್ಟಾಂಗ್ ಫಟ್ಟಿಂಗ್ ಮ್ಹಣ್ ಎಕ್ಲ್ಯಾಕ್ ತಾಚಾ ಸಂತಾನ್ ಕುಟ್ಮಾಚೆರ್ ಕರಿ ಪುಸ್ಚಿಂ ಮಾಧ್ಯಮಾಂ ದುಸ್ರೆಚ್ ದಿಸಾ ತಿ ಕರಿ ಪುಸುನ್ ತಾಕಾ ಭಾಗೆವಂತ್ ಮ್ಹಣ್ ವೊಲಾವ್ನ್ ತಾಕಾ ಜಿವೊ ಸಾಂತ್ಚ್ ಕರ್ತಾನಾ - ಹೊ ತಮಾಸೊ ಪಳೆಂವ್ಚೊ ಸಾದೊ ಅಮಾಯಕ್ ಲೋಕ್ ಖರೊಚ್ ಬೆಕೂಫ್ ಜಾವ್ನ್ ಜಿಯೆತಾ.
ಖಂಯ್ ಆಸಾ ಆಮ್ಚಾ ಧರ್ಮಾಚಿಂ ಮುಳಾವಿಂ ಸತಾಂ? ಭುರ್ಗ್ಯಾಪಣಾರ್ ಇಸ್ಕೊಲಾಂತ್ ಆಯ್ಕೊನ್ ಆಯಿಲ್ಲೆ ’ಮೋಗ್, ಅಹಿಂಸಾ, ತ್ಯಾಗ್, ಸಂಯಮ್’ ಫಕತ್ತ್ ಬುಕಾಂನಿ ’ಸಬ್ಧ್’ ಮಾತ್ರ್ ಜಾವ್ನ್ ಉರ್ಲ್ಯಾತ್? ವಾ ಫುಡೆಂ ಹ್ಯಾ ಸಭ್ದಾಂಕ್ ನವೆ ಅರ್ಥ್ ಮೆಳೊಂಕ್ಯೀ ಪುರೊ.
ಹ್ಯಾ ಪರಿಗತೆಂತ್ ದುರ್ಸೊಂಚ್ಯಾಧಿಂ ಆಮ್ಚೆಭಿತರ್ ಪಯ್ಲೆಂ ತಿಳ್ಚೆಂ ತರ್ - ಆಮ್ಚಾ ಧರ್ಮಾಭಿತರ್ ಶೆಂಭೊರಾಂನಿ ಫಾಂಟೆ. ಕೊಣಾಚ್ಯಾ ಖಟ್ಟ್ಯಾಂತ್ ರಿಗೊನ್ ಗೆಲಾಂ - ಜರ್ತರ್ ಕೊಣಾಯ್ಕ್ಯೀ ಆಮಿ ಕನ್ವಡ್ತರ್ ಕರಿನ್ ತರ್ ಆಮಿ ಸಾಲ್ವಾರ್ ಜಾತಾಂವ್ ಮ್ಹಣ್. ದೆಕುನ್ ಕೊಣಾ ಕೊಣಾಕ್ ಫುಸ್ಲಾವ್ನ್ ಕೊಣಾ ಕೊಣಾಕ್ ಬನಾವ್ನ್, ತಾಂಕಾಂ ಧರ್ಮ್ ಪರಿವರ್ತನ್ ಕರುಂಕ್ ಲಾಗ್ಚೆ ಕೊಣ್ಗೀ ಆನಿ ಹಾಚೊ ಪರಿಣಾಮ್ ಭಗ್ಚೆ ಕೊಣ್ಗೀ. ಧರ್ಮ್ ಪರಿವರ್ತನ್ ಕಶೆಂ ಆಸಾಜಯ್? ಮದರ್ ತೆರೆಜಾಚಿ ಜಿಣಿ ಪಳೆವ್ನ್ ಕ್ರಿಸ್ತಾಂವ್ ಧರ್ಮಾಕ್ ಆಯಿಲ್ಲಿಂ ಹಿಂದ್ವಾಂ ಕಿತ್ಲಿಂ? ಪುಣ್ ಮದರ್ ತೆರೆಜಾನ್ ಕೊಣಾಕ್ಯೀ ಕಸಲೇಯ್ ರಿತಿರ್ ಪುಸ್ಲಾವ್ನ್ ಧರ್ಮ್ ಪರಿವರ್ತನ್ ಕರುಂಕ್ ಕೆಲ್ಲೆಂ ಪ್ರೇತನ್ ಕೊಣೆಂಯ್ ಆಯ್ಕಲಾಂ? ಹೆಂ ಪರಿವರ್ತನ್ ಕಾರ್ಯರುಪಾಚೆಂ ಪ್ರೇರಣ್ (Practical inspiration) ದಿತಾ. ಕೊಣ್ಯೀ ಮನಿಸ್ ವಾಯ್ಟಾ ಥಾವ್ನ್ ಬರ್ಯಾಕ್ ಪರ್ತತಾ ತರ್ ತೆಂ ಖಂಡಿತ್ ಜಾವ್ನ್ ಬರೆಂಚ್. ಪುಣ್ ಆಮ್ಚಿ ಸಮಾಜ್ ತಸಲ್ಯಾಂಕ್ ಬರ್ಯಾನ್ ಜಿಯೆಂವ್ಕ್ ಸೊಡಿನಾ. ತಾಚೆಬದ್ಲಾಕ್ ದಿಸಾಕ್ ಎಕಾ ಜೆವ್ಣಾಕ್ ಗತ್ ನಾಸ್ಚಾಂಕ್ ಭಾಕ್ರಿ ದಿಂವ್ಚ್ಯಾಂಧಿಂ ’ತುಜೊ ಧರ್ಮ್ ಬದ್ಲಿ, ತುಕಾ ಖಾಂವ್ಕ್ ಭಾಕ್ರಿ ದಿತಾಂ’ ಮ್ಹಣ್ಚಾಂಕ್ ಪಯ್ಲೆಂ ಧರ್ನ್ ತಾಂಚ್ಯಾ ಗಳ್ಯಾಕ್ ದಾಂತ್ಯಾಚೊ ಫಾತೊರ್ ಬಾಂಧುನ್ ಗುಂಡ್ಯೆಕ್ ಲೊಟುನ್ ಘಾಲಿಜಾಯ್. ಪಯ್ಲೆಂ ಅಸಲ್ಯಾಂಕ್ ಕನ್ವಡ್ತರ್ ಕರ್ಚಿ ಗರ್ಜ್ ಆಸಾ.
ಧಾರ್ಮಿಕ್ ವಿಚಾರ್ ಸದ್ದ್ಯಾಕ್ ಬಗ್ಲೆನ್ ದವರ್ಯಾಂ, ಭಾಗೆವಂತ್ ಮನಿಸ್ ಮ್ಹಜೆರ್ ತಾಪ್ಚಾಧಿಂ ಹಾಂವೆಂ ಸಾಂಗೊಂಕ್ ಆಶೆಂವ್ಚೆಂ ಕಿತೆಂ ಮ್ಹಳ್ಳೆಂ ಪಳೆಯಾ; ಹೆಚ್ಚ್ ಪರಿಗತೆಂತ್ ಆಮಿಂ ಕೊಂಕ್ಣಿ ಕೊಂಕ್ಣಿ ಮ್ಹಣ್ ವೆವೆಗ್ಳೆ ಸರ್ಕಸ್ ಕರ್ತಾಂವ್. ಆಮಿಂಚ್ ಆಮ್ಕಾಂ ಅಭಿಶಿಕ್ತ್ ರಾಯ್ ಮ್ಹಣ್ ಪಾಟೊಸಾರ್ ಚಡಯ್ಲಾಂ. ದೆಕುನ್ ಆಮ್ಚಾ ವಠಾರಾಂತ್ ಕೊಣೆಂಯ್ ಕೊಂಕ್ಣೆಚಿ ಏಕ್ ಪುಸ್ಕಿ ಸೊಡಿಜಾಯ್ ತರ್ಯೀ, ಆಮ್ಚಾ ಪರ್ವಣ್ಗೆನ್ ಮ್ಹಳ್ಳೆಂ ಚಿಂತಾಪ್ ಆಮ್ಚೆಂ. ಆಮಿ ಸಾಂಗ್ಲ್ಲಿ ಅಮಾಸ್ ಆನಿ ಆಮಿ ವೊಪ್ಲ್ಲೊ ಪುನೊವ್. ಆಮ್ಚಾ ವಟಾರಾಂತ್ ಆಮಿ ಮಾರ್ಚೊ ಉಂದಿರ್ ಸಯ್ತ್ ವಾಗ್ ಜಾತಾ. ದೆಕುನ್ ಆಮಿ ಕೆಲ್ಲಿ ಮಾತ್ರ್ ಸೆವಾ ಹೆರಾಂಚೆಂ ನಾಂವಾ ಖಾತಿರ್ ಮ್ಹಳ್ಳೆಂ ಮಾಲ್ದಿಸಾಂವ್ ಚಿಂತಾಪ್ ಆಮ್ಚಾ ಕಟ್ಟ್ಯಾಂತ್ ಆಸಾ. ದೆಕುನ್ ಆಮ್ಚಾ ವಟಾರಾಂತ್ ಆಮ್ಚೊಚ್ಚ್ ಕೊಂಕ್ಣಿ ವ್ಯಾರ್ ಆನಿ ಆಮ್ಚೊಚ್ಚ್ ಕೊಂಕ್ಣಿ ದಂಧೊ! ಹ್ಯಾ ಕುಸಾಟ್ ಚಿಂತ್ಪಾಕ್ ಲೊಕಾನ್ ಖಾಯ್ಸ್ ಕರ್ಚೆಂ ತರ್ಯೀ ಕಶೆಂ ಪಳೆಯಾ? ಪಯ್ಲೆಂ ಅಸಲ್ಯಾ ಕೊಲ್ಯಾ ಖಾಸ್ತಾಂಚಾ ರಾಯಾಂಕ್ ಧರ್ನ್ ಖೊಟಾಯ್ಜಯ್. ಕೊಂಕ್ಣಿ ಕೊಂಕ್ಣಿ ಮ್ಹಣ್ ಪಾಟೊಸಾರ್ ಖರ್ಶೆತೆಲ್ಯಾಂನಿ ಕೊಂಕ್ಣೆಕ್ ಕಿತೆಂ ದಿಲಾಂ ಮ್ಹಳ್ಳೆಂ ಪ್ರಾಮಾಣಿಕ್ ಸವಾಲ್ ಕೆಲೆಂ ಜಾಲ್ಯಾರ್ ಮಾತ್ರ್ ಕೊಂಕ್ಣೆಕ್ ಕಾಂಯ್ ಬರೆಂ ಜಾಯ್ತ್ ನಾಂವೇ ಹಿ ಕೊಂಕ್ಣಿ ಆಜಿಯೆಚ್ಯಾ ’ಮಾಂಡ್ ಕುರ್ಪೊಣ್’ ಕಾಣಿ ಜಾಂವ್ಚಾಂತ್ ಮ್ಹಾಕಾ ತರ್ಯೀ ಕಾಂಯ್ ದುಭಾವ್ ನಾ.
ಸತ್ ಗಜಾಲ್ ಭೋವ್ ಅಡ್ಹೂಕ್ ದಿಸೊಂಕ್ ಪುರೊ - ಆಜ್ ಆಮ್ಚಾ ಕೊಂಕ್ಣಿ ಸಮಾಜೆಂತ್ ಕೊಣೆಂಯ್ ಎಕ್ಲ್ಯಾನ್ ಅಪ್ಲೆಂ ಬರೆಂ ಫಾಲೆಂ ಕಶೆಂ ಜಾಯ್ ತಶೆಂ ಕೆಲೆಂ ತರ್ ತಸಲ್ಯಾಂಕ್ ಕೊಣೆಂಯ್ ಆಡಾಂವ್ಕ್ ಸಾಧ್ಯ್ ಆಸಾ? ಆಮ್ಕಾಂ ಕಾಯ್ದೆ ಕಾನುನಾಂ, ರುಲಿ ರೆಗ್ರೊ ಕರ್ಯೆತಾ, ಪುಣ್ ಹಾಂತ್ಲೆಂ ಜ್ಯೆ ಕಿತೆಂ ಆಸಾ ತೆಂ ದುಡ್ವಾನ್ ಮೊಲಾಂವ್ಕ್ ಅಸಾಧ್ಯ್ ಜಾಲ್ಲೆಂ? ಫಿರ್ಗಜ್ ಹೊಲಾಂಕ್ ದಾನ್ ದಿಲ್ಯಾರ್ ರಾತಿಚೆಂ ರೆಸ್ಪೆರ್ಯೀ ಸಾಧ್ಯ್. ಕಾಜಾರಾಂ ಆಸ್ಯೆತಾ, ಸೊಭಾಣಾಂ ಆಸ್ಯೆತಾ, ಫೆಸ್ತಾಂ ಆಸ್ಯೆತಾ ವಾ ಹೆರ್ ಕಸಲೀಂಯ್ ಸಂಭ್ರಮಾಂನಿ ಕಿತ್ಲಿ ಕೊಂಕ್ಣಿ ಸಂಸ್ಕೃತಿ ಆಸೊಂಕ್ ಜಾಯ್? ಕಿತ್ಲ್ಯಾ ಮಾಪಾನ್ ಆಸೊಂಕ್ ಜಾಯ್? ಕಶಿ ಆಸೊಂಕ್ ಜಾಯ್? ಮ್ಹಳ್ಳೆಂ ಕೊಣೆಂಯ್ ಕೊಣಾಯ್ಕ್ಯೀ ವಿಚಾರ್ಲ್ಲೆಂ ಆಸಾ?. ತರ್ ಹಿ ಕೊಂಕ್ಣಿ ಕೊಂಕ್ಣಿ ಮ್ಹಳ್ಳಿ ಸುಕಿ ಖೊಂಕ್ಲಿ ಕೊಣಾಕ್ಗಾ? ರುಲಿ ರೆಗ್ರೊ ಆಸಾತ್ ತರ್ ತ್ಯೊ ಗರಿಬಾಂಕ್ ಮಾತ್ರ್ - ಹೆಂ ಕೊಣಾಕ್ ಪಡೊನ್ ಗೆಲಾಂ?
ಹ್ಯಾ ಆಮ್ಚಾ ಮತಿಚ್ಯಾ ಕಿಡ್ಯಾಂ ನಿಮ್ತಿಂ ಆಮ್ಚೆಂಚ್ ಬೊಳ್ಕೆಂ ಆನಿ ಆಮ್ಕಾಂಚ್ ಕೊಳ್ಕೆಂ. ಆಮಿಂ ಆಮ್ಚಾ ಗಾಂವ್ಚೆ ತುಂಡುರಾಯ್ ಆನಿ ಆಮ್ಚಿಚ್ ಹಾಂಗಾಸರ್ ರಾಜ್ವಟ್ಕಿ. ದೆಕುನ್ ಅತ್ತೂರ್ಚಿ ಕೊಂಕ್ಣಿ ವೆಗ್ಳಿ ಆನಿ ಪುತ್ತೂರ್ಚಿ ಕೊಂಕ್ಣಿ ವೆಗ್ಳಿ. ಕಳತ್ತೂರ್ಚಿ ಕೊಂಕ್ಣಿ ವೆಗ್ಳಿ ಆನಿ ಸಾಲೆತ್ತೂರ್ಚಿ ಕೊಂಕ್ಣಿ ವೆಗ್ಳಿ. ಕುವೆಯ್ಟ್ಚಿ ಕೊಂಕ್ಣಿ ವೆಗ್ಳಿ ಆನಿ ದುಭಾಯ್ಚಿ ಕೊಂಕ್ಣಿ ವೆಗ್ಳಿ. ಮಸ್ಕತಾಚಿ ಕೊಂಕ್ಣಿ ವೆಗ್ಳಿ ಆನಿ ಬಾಹ್ರೇಯ್ನಾಂತ್ಲಿ ಕೊಂಕ್ಣಿ ವೆಗ್ಳಿ. ಬೊಂಬೊಯ್ಚಿ ಕೊಂಕ್ಣಿ ವೆಗ್ಳಿ ಆನಿ ಮಂಗ್ಳುರ್ಚಿ ಕೊಂಕ್ಣಿ ವೆಗ್ಳಿ. ಆಮ್ಕಾಂ ಆನಿಂ ತಾಂಕಾಂ ಫರಕ್ ಆಸಾ; ಆಮಿ ಖಾಸ್ ಭುರ್ಗಿಂ ಆನಿ ತಿಂ ಪೊಸ್ಕಿಂ. ಆಮಿಂ ವಿಂಚುನ್ ಕಾಡ್ಲೆಲಿ ಪರ್ಜಾ ಆನಿ ತಿಂ ದೆವಾಕ್ ಸೊಡ್ಲೆಲಿಂ ಗೊರ್ವಾಂ?.
ಜರ್ತರ್ ಆಮಿಂಯೀ ಸುರ್ಯಾಚಾ ವೊತಾಂತ್ ಜಿಯೆತಾನಾ ತೊಚ್ಚ್ ಸುರ್ಯೊ ಥಂಯ್ಚರ್ಯೀ ವೋತ್ ದಿತಾನಾ ಹಾಂಗಾ ದೀಸ್ ಆನಿ ಥಂಯ್ ರಾತ್ ಕಶಿಗಾ ಜಾಂವ್ಚಿ? ಆಮ್ಚಿ ಮತ್ ಕಶಿ ಸಯ್ರ್ಭಯ್ರ್ ಜಾಲ್ಯಾ? ತರ್ ಕಶೆಂಗಾ ಕೊಂಕ್ಣಿ ಆಮ್ಚಿ ಮಾತ್ರ್ ಮಾಂಯ್ ಆನಿ ತಾಂಚಿ ಮೌಶಿ? ಖಂಯ್ ಆಸಾಗಾ ಕೊಂಕ್ಣಿ ಸ್ಪಿರಿತ್? ಹಲೋ - ಹಾವೆಂ ಕೊಂಕ್ಣಿ ಸ್ಪಿರಿತ್ ಮ್ಹಳೆಂ, ವಿಸ್ಕೆಚೊ ವಾ ಕಂಟ್ರೆಚೊ ಸ್ಪಿರಿತ್ ನ್ಹಂಯ್. ಹ್ಯಾ ಪರಿಗತೆಂತ್ ಪಯ್ಲೆಂಚ್ ತುಟೊನ್ ಪಡ್ಲೆಲ್ಯಾ ಆಮ್ಚಾ ಕೊಂಕ್ಣಿ ಸಮಾಜೆಕ್ ಚುರಾನ್ ಚೂರ್ ಕರ್ಚೆ ಭಡ್ವೆ (ಆಂಜ್ ಭಡ್ವೆ ನ್ಹಂಯ್) ಯಥೇಶ್ಟ್ ಮಾಪಾನ್ ಆಸಾತ್, ಸಕ್ಕಡ್ ಅಪಾಪ್ಲೆಂ ಬೊಳ್ಕೆಂ ಭರುನ್ ಆಸಾತ್, ದೆಕುನ್ ಆಮ್ಚಾ ಗಾಂವಾಂತ್ ಮಾತ್ರ್ ಕೊಂಕ್ಣಿ ಜಿಯೆತಾ, ದೆಕುನ್ ಕೊಂಕ್ಣೆಕ್ ಮ್ಹಣ್ ಜ್ಯೆ ಕಿತೆಂ ಆಸಾ ಆಮ್ಚಾ ಗುದಾಂವಾಕ್ ಯೇಜಾಯ್, ಕೊಂಕ್ಣೆಚ್ಯೊ ಜಿತ್ಲ್ಯೊ ಪ್ರಶಸ್ಥ್ಯೊ ಆಸಾತ್ ತ್ಯೊ ಸಕ್ಕಡ್ ಆಮ್ಚಾಂಕ್ ಮೆಳಾಜಯ್ - ಆಮ್ಚಾಂನಿ ಕೆಲ್ಲಿಂ ಗೊಂಯ್ಟಾಂ ನಾತ್ಲ್ಯಾರೀ ಪರ್ವಾನಾ, ಆಮ್ಚಾಂನಿ ಕೆಲ್ಲಿಂ ಘಾಣ್ ತರ್ಯೀ ವ್ಹಡ್ ನಾ. ಆಮಿ ಕಾಡ್ಲ್ಲ್ಯಾ ಬುಕಾಂನಿ ಮಾತ್ರ್ ವಾಂವ್ಟ್ ಆಸಾ, ಹೆರಾಂಕ್ ತೆ ಬೂಕ್ ಸರ್ಗಿಂ ಥಾವ್ನ್ ಮಾನ್ನಾ ಪಡ್ಲ್ಲೆಪರಿಂ ಪಡ್ಲ್ಲೆಂ ದೆಕುನ್ ಕೊಣೆಂಯ್ ಆಮ್ಕಾಂ ಕೊಂಕ್ಣೆಚೆ ಬೂಕ್ ಫುಂಕ್ಯಾಕ್ ಧಾಡ್ಲೆ ತರ್ಯೀ, ಬೂಕ್ ವಾಸ್ಚೆಂ ಸೊಡ್, ತೆ ಬೂಕ್ ಪಾವ್ಲ್ಯಾತ್ ಮ್ಹಣ್ ಸಾಂಗೊಂಕ್ ಸಯ್ತ್ ಫುಟ್ವನಾ - ಹೊ ಆಮ್ಚೊ ಕೊಂಕ್ಣಿ ಮೋಗ್. ಆಮ್ಕಾಂ ಹೆರಾಂವಿಶಿಂ ಚಿಂತುಂಕ್ ವೇಳ್ ನಾ - ಆಮಿ ಬಿಜಿ. ಪುಣ್ ಹೆರಾಂನಿ ಕರ್ಚೆಂ ಕಿತ್ಯಾಕ್ ಮ್ಹಳ್ಯಾರ್ ತಾಂಕಾಂ ದುಸ್ರೆಂ ಕಾಂಯ್ ಕಾಮ್ ನಾ. ದೆಕುನ್ ಆಮಿಂ ಕೊಂಕ್ಣೆಚೊ ಧೆಂಕ್ ಕಾಡ್ಲ್ಯಾರೀ ಹರ್ಸಿಜಾಯ್! ವ್ಹಾ! ಆಮ್ಚಿ ಕೊಂಕ್ಣಿ ಪಳೆಯಾ!! ಥುಕ್ಕ್ ಅಸಲ್ಯಾ ಕೊಂಕ್ಣೆಕ್!!!. ಹ್ಯಾ ಪರಿಗತೆಂತ್ ಮ್ಹಜೆತಸಲ್ಯಾ ಎಕಾ ಬಾವ್ಡ್ಯಾನ್ ಜರ್ ’ಕೊಂಕ್ಣಿ ಆವಯ್ ಖಂಯ್ ಆಸಾ?’ ಮ್ಹಳ್ಳೆಂ ಸವಾಲ್ ಕರ್ಚಾಂತ್ ನವಾಲ್ ಆಸಾ?
ಹಾಂವ್ ರಿತ್ಯಾ ಹಾತಾಂನಿ ಹಾಂಗಾಂ ಆಯಿಲ್ಲೊಂ, ರಿತ್ಯಾ ಹಾತಾನಿಂಚ್ ವೆತಲೊಂ (ಭೊವ್ಶಾ ಮ್ಹಾಕಾಚ್ ಕಾಂಯ್ ದೀಂವ್ಕ್ ಪಡಾತ್). ಚಾರ್ ದಿಸಾಂಕ್ ಹಾಂಗಾ ಆಯ್ಲಾಂ - ಕೋಣ್ ಹಾಸೊಂದಿ, ಕೋಣ್ ಸೊಸುಂದಿ. ಕಸಲೆಂಚ್ ಧನ್ ದಿರ್ವೆಂ ಪುಂಜಾಂವ್ಕ್ ನ್ಹಂಯ್. ಕೊಣಾಸವೆಂಯ್ ಕಸಲ್ಯಾಯ್ ರಿತಿಚ್ಯಾ ಧಾಂವ್ಣೆಕ್ ಆಯಿಲ್ಲೊಂ ನ್ಹಂಯ್. ದೆಕುನ್ ಎದೊಳ್ ಅಪ್ಲಿ ತಕ್ಲಿ ಖೊರ್ಪುನ್ ತಕ್ಲೆಚಿ ಕಾತ್ ಗೆಲ್ಲ್ಯಾಂನಿ ಪರತ್ ಆಟೊವ್ ಕರ್ಯೆತಾ.
ಆತಾಂ ಕೊಣಾಯ್ಕ್ ತರೀ ’ಹೊ ಕಿತೆಂ ಉಲಯ್ತಾ’ ಮ್ಹಳ್ಳೆಂ ಸವಾಲ್ ಮತಿಂತ್ ಉದೆಲೆಂ ತರ್ ಖಂಡಿತ್ ತೊ ಸ್ಪಿರಿತ್ ಖಂಯ್ ಥಾವ್ನ್ ಆಯಿಲ್ಲೊ ಮ್ಹಳ್ಳೆಂ ಸವಾಲ್ ಕರಾ, ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣಿ ಸ್ಪಿರಿತ್ ಖಂಚ್ಯಾಯ್ ಗಡಂಗಾನಿ ವಾ ಆಂಗ್ಡ್ಯಾಂನಿ ವಿಖ್ರ್ಯಾಕ್ ನಾ.
ಆತಾಂ ತುಮಿಂಚ್ ವಿಚಾರಾ ’ಹಾಂಗಾಂ ಆತಾಂ ಹೊ ಸ್ಪಿರಿತ್ ಖಂಯ್ ಥಾವ್ನ್ ಆಯ್ಲೊ?’
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
