ಕವಿತಾकविताPoem
ಕೊಣಾಚಿಂ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತಿಂತೆರಾಂತ್ ಪಿಂತುರ್
ಪಿಂತುರ್ - 3
ವಿಶಯ್: ಲಜ್ ಆನಿ ಭಿರಾಂತ್
ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ
ಕೊಣಾಚಿಂ ತಿಂತೆರಾಂ ಕೊಣಾಚಿಂ ಪಿಂತುರಾಂ?
ತಿಂತೆರಾಂತ್ ಪಿಂತುರಾಂ ಉಭಿಂ ಕರ್ಚಿ ಕಲಾ ಕವಿ ಜಾಲ್ಲ್ಯಾಕ್ ಸಾರ್ಕಿ ಸಮ್ಜಾತಾ ತರ್ಯ್ ವಾಚ್ಪ್ಯಾಂಕ್ ಭೋವ್ಶಾ ಥೊಡೆಂ ಘುಸ್ಪಡಾಯ್ತಾ ಆನಿ ತೆದ್ನಾಂ ತಾಂಚಾ ಮತಿಂತ್ ಉದೆತಾ ಹೆಂಚ್ ಸವಾಲ್ ಹಿಂ ಕೊಣಾಚಿಂ ತಿಂತೆರಾಂ ಕೊಣಾಚಿಂ ಪಿಂತುರಾಂ?
ಲಿಖ್ಣಿ ಏಕ್ ಹಾತೆರ್ ತರ್ಯ್ ಲಿಖ್ಣಿ ಸಮಾಜೆಚೆರ್ ಅರ್ಸೊ ಧರ್ಚಿ ಏಕ್ ಹಾತೆರ್ ಮ್ಹಣ್ ಹಾಂವ್ ತರ್ಯೀ ಕಾಳ್ಜಾ ಮನಾನ್ ವೊಪುನ್ ಘೆತಾಂ. ಅಶೆಂ ಆಸ್ತಾಂ ಆಮ್ಚಾ ಸಮಾಜೆಚಾ ಭಂವ್ತೊಣೆಚೆರ್ ಆಮಿಂ ನದರ್ ಘುಂವ್ಡಾಯ್ತಾನಾ ಆಮ್ಚಾ ನದ್ರೆಕ್ ಕಿತೆಂ ದಿಶ್ಟಿಕ್ ಪಡ್ತಾ?
’ಫುಲ್ ಆನಿ ಭಂವರ್’
’ಸೊಭಾಯ್ ಆನಿ ಪಿಸೊಳಿಂ’
’ಗುಲೊಬ್ ಆನಿ ಆಬೊಲಿಂ’
’ಚಲಿ ಆನಿ ಮೋಗ್’
ಹಾಂತುಂ ಕಾಂಯ್ ಕೊಣಾಯ್ಚಿಯ್ ಚೂಕ್/ಗುನ್ಯಾಂವ್ ಆಸಾ ಮ್ಹಣ್ಚೊ ಮ್ಹಜೊ ಇರಾದೊ ಭಿಲ್ಕುಲ್ ನ್ಹಯ್. ಕುಡ್ಡ್ಯಾಂಚಾ ದರ್ಭಾರಾಂತ್ ಎಕಾ ದೊಳ್ಯಾಚೊಚ್ ರಾಯ್ ಸಯ್! ಮ್ಹಳ್ಳ್ಯಾ ಸಾಂಗ್ಣೆಪರಿಂ ಚಿಂತುಂಕ್ಚ್ ನಾಕಾ ಜಾಲ್ಲ್ಯಾ ಪರಿಗತೆಂತ್ ಹ್ಯಾ ವಯ್ಲ್ಯಾ ಸಂಗ್ತೆಂಕ್ ಕೊಣ್ಯ್ ಚಿಂತಾ ತರ್ ಬರೆಂಚ್. ಪುಣ್ ಆಮ್ಚಿ ಚಡ್ತಾವಾಂಚಿ ನದರ್ ಇತ್ಲಿಚ್ ಪಯ್ಸ್ ವಚೊಂಕ್ ಸಕ್ತಾ? ಬಿಲ್ಕುಲ್ ಆಪ್ಲ್ಯಾ ತಳಾತಾಪರ್ಯಾಂತ್ ಮಾತ್ರ್? ಯಾ ಹಾಚಾಕ್ಯ್ ಪಯ್ಸ್ ಪಾವೊಂಕ್ ಸಾಧ್ಯ್ ಆಸಾ?
ಆಸಾ?
ಕಶೆಂ??
ಆಸ್ಯೆತಾ, ಪುಣ್ ತ್ಯಾ ಖಾತಿರ್ ಆಸ್ಚ್ಯೊ ವಾಟೊ ಮಸ್ತ್ ಉಣ್ಯೊ. ಆನಿ ಹ್ಯಾ ಮಧೆಂ ಆಮ್ಚೊ ಇರಾದೊ ಇತ್ಲೊಚ್, ಜ್ಯೆ ಕೊಣ್ ಪಳೆಂವ್ಕ್ ಸಕ್ತಾತ್, ಚಿಂತುಂಕ್ ಸಕ್ತಾತ್, ತಾಂಚಾ ಚಿಂತ್ಕಾಕ್ ಏಕ್ ಅಮ್ಕಿ ದಿಶಾ ದಿಂವ್ಚಿ ಮ್ಹಳ್ಯಾರ್ - ಎಕಾ ನಿರ್ದಿಶ್ಟ್ ಸಂಗ್ತೆಚೆರ್ ಚಿಂತ್ಚಾಕ್ ಆವ್ಕಾಸ್ ಕರುನ್ ದಿಂವ್ಚೊ. ಹಾಂಗಾಸರ್ ಫುಲಾಂ ಫುಲ್ಚಿಂನಾಂತ್, ಭಂವರ್ ಯೆಂವ್ಚೆನಾಂತ್, ಚಲಿ ಯಾ ಪಿಸೊಳಿಂ ಹಾಂಗಾಚಾ ಧಾವೆಕ್ ಲಾಸೊಂಕ್ ಆಸಾತ್.
ತಶೆಂ ಮ್ಹಣೊನ್ ಆಮಿಂ ಕವಿಚಾ ಚಿಂತ್ಪಾಚ್ ಶ್ಯಾಥಿಯೆಕ್ ಕಸಲಿಚ್ ಬಂದಡ್ ಘಾಲುಂಕ್ ವಚಾನಾಂವ್. ಕವಿ ಜಿತ್ಲೊಚ್ ಸ್ವತಂತ್ರ್ ಜಿತ್ಲೊ ಉಭ್ಚಾ ಎಕಾ ಸುಕ್ಣ್ಯಾತಿತ್ಲೊ. ಪಯ್ಲ್ಯಾ ಆಂಕ್ಡ್ಯಾಂತ್ ಆಸ್ಲ್ಲ್ಯಾ ’ಭುಕ್ ಆನಿ ಸೊಧ್ನಾಂ’ ಪಿಂತುರಾಕ್ ಪಳೆವ್ನ್ ಹಾಂಗಾಸರ್ ’ಜೆಜುನ್ ಉದಾಕ್ ಆಸ್ಚೆಂ ವಾಯ್ನ್’ ಕೆಲ್ಲೆತಸಲೆಂ ಅಜ್ಯಾಪ್ ಘಡ್ತಾ ಆನಿ ಮನ್ಶಾಚಿ ’ಭುಕ್’ ಸಂಪ್ತಾ ಮ್ಹಣ್ ಕೊಲ್ಯಾಚೆಂ ಚಿಂತಾಪ್ ಚಿಂತ್ಲ್ಲೆಯ್ ಆಸ್ತಿತ್ - ಆಸೊಂ!
ದುಸ್ರ್ಯಾ ಅಂಕ್ಡ್ಯಾಚಾ ’ರಸ್ತೊ ಆನಿ ಮಿಸ್ತೆರ್’ ಹಾಂತುಂ ಜಿತ್ಲ್ಯೊ ಬರ್ಯೊ ಕವಿತಾ ಆಯ್ಲ್ಯೊಗೀ, ಆತಾಂ ತಿಸ್ರೊ ಆಂಕ್ಡೊ ’ಲಜ್ ಆನಿ ಭಿರಾಂತ್’ ಹಾಂಗಾಸರ್ ಮ್ಹಜಾ ಸಮ್ಜಣೆಪ್ರಕಾರ್ ಭಳಿಶ್ಟ್ ಕವಿತಾ ಆಯ್ಲ್ಯಾತ್ ಮ್ಹಳ್ಳೆಂ ಕವಿತಾರಸಿಕ್ ಜಾಲ್ಲ್ಯಾ ತುಕಾ ಜರೂರ್ ಗೊಮ್ತೆಲೆಂ. ಥೊಡ್ಯೊ ಬಂಡಾಯ್ ಕವಿತಾ ವಾಚ್ತಾನಾ ತುಮ್ಚಾ ಮತಿಂತ್ ಸವಾಲ್ ಉದೆತ್, ಬಂಡಾಯ್ ಮ್ಹಳ್ಯಾರ್ ಕಿತೆಂ? ಗಾಜ್ಚಾ ಮತಿಚಾ ಮಧೆಂ ಉದೆಂವ್ಚಾ ಮತಿಚೊ ಉಲೊಚ್ ಬಂಡಾಯ, ತಿ ಮತ್ ಗಾಜೊಂಕ್ ಜಾಯ್ತಿಂ ಕಾರಾಣಾಂ ಆಸ್ಯೆತ್, ಗರೀಬಾಂಚಿ/ಅಸ್ಕತಾಂಚೆರ್ ಚಲ್ಚೆಂ ಶೋಷಣ್/ದಣ್ಸವ್ಣಿ ಜಾವ್ಯೆತಾ ಯಾ ಹೆರ್. ಕವಿ ಆಸ್ಟಿನಾಚಾ ಕವಿತೆನ್ ಅಪ್ರೂಪ್ ’ಬಂಡಾಯ್’ ರೂಪ್ ಘೆವ್ನ್ ಕಶೆಂ ಎಕಾ ಲ್ಹಾನ್ ಅಸ್ವಶ್ಟ್/ಕಾಲ್ಪನಿಕ್ ಪಿಂತುರ್
(Abstract art) ಚೆರ್ ಅಪ್ಲ್ಯಾ ತಿಂತೆರಾಂತ್ ಕಿತ್ಲ್ಯೊ ಸಕ್ತೆವಂತ್ ಇಮಾಜ್ಯೊ ಉಭ್ಯೊ ಕೆಲ್ಯಾತ್ ಪಳೆಯಾ.
ಪುಣ್ ಕವಿತಾ ಮಾತ್ಸೆಂ
ಲಾಂಬ್ ಜಾವ್ನ್ ವಾಚ್ಪ್ಯಾಚ್ಚ್ಯಾ
ಸಯ್ರಾಣಾಚಿ ಪರಿಕ್ಶಾ ಜರೂರ್
ಕರ್ತಾ. ತೆಚ್ಚ್ಪರಿಂ ಎಚ್ಚೆಮಾಚಾ ಕವಿತೆಚಿ ಬೋಬ್ ಕಾಂಯ್ ಮೊಳ್ಬಾಕ್ ಪಾವತ್, ಹಾಂಗಾಸರ್ ಜಿಯೆತೆಲಿಂ ಖಾಕುಸ್ ನಾತ್ಲ್ಲಿಂ ಮೆಲ್ಲ್ಯಾ ಜಾನ್ವಾರಾಂಕ್ ಖಾವ್ನ್ ಜಿಯೆತೆಲಿಂ ಕಶೆಂ ’ಯೆಮ್ಕೊಂಡ್’ ಭೊಗುನ್ ಆಸ್ತಾನಾ ಥೊಡಿಂ ಮಾಟ್ ಪಡ್ಲ್ಲಿಂ ಕಾನೆಸ್ಮರೆಕ್ ಯೇವ್ನ್ ’ಯೆಮ್ಕೊಂಡಾಚೊ’ ಪಾಠ್ ಕರ್ತಾತ್. ಅಸಲೆಂಚ್ ಯೆಮ್ಕೊಂಡ್ ಚಿಂತುನ್ ಬಾಯ್ ವಾಯ್ಲೆಟ್ ಪಿರೇರ್ ವಿಡಂಬನಾತ್ಮಕ್ ರಿತಿಚೆಂ ಕವಿತಾ ಬರಯ್ತಾ - ಬರೆಂಚ್. ಮೆಲ್ವಿನ್ ವಾಸ್ ಹಾಚಾ ನದ್ರೆಕ್ ಹೆಂ ಪಿಂತುರ್ ಎಕಾ ಕೊಂಕ್ಣಿ ಆವಯ್ಚೆಂ ಚಿತ್ರಣ್ ದಿತಾನಾ ಕವಿ ವಾಚ್ಪ್ಯಾಲಾಗಿಂ ತಿಚೆರ್ ಬೋಟ್ ಜೊಕುನ್ ಸವಾಲ್ ಕರ್ತಾ ’ಕೊಣಾಯ್ಕ್ಯ್ ಕಳಿತ್ ಆಸಾ ತಿ ಕಿತೆಂ ಕರ್ತಾ?’ ಮ್ಹಣ್ತಾ.
ನವೊ ತರ್ಯ್ ಜಿಣ್ಯೆಅನ್ಭೋಗಾಂತ್ ಪ್ರಭುದ್ದ್ ಚಿಂತಾಪ್ ಚಿಂತ್ಚೊ ವಿನ್ಸಿ ಮೆಲ್ಕಾರ್ ತಾತ್ವಿಕ್ ಚಿಂತ್ಪಾಚೊ ನಿಯಾಳ್ ಅಪ್ಲ್ಯಾ ಕವಿತೆಂತ್ ದೀಂವ್ಕ್ ಪ್ರೇತನ್ ಕರ್ಚೆಂ ದಿಸೊನ್ ಯೆತಾ. ಬಾಯ್ ಅಸುಂತಾಕ್ ಹೆಂ ಪಿಂತುರ್ ಗ್ರೇಸ್ತ್-ದುಬ್ಳ್ಯಾಂ ಮದ್ಲ್ಯಾ ಸಂಘರ್ಶಾಂಕ್ ಅಭಿವ್ಯಕ್ತ್ ಕರ್ತಾ.
ಪುಣ್ ಸರ್ವಾಂಚಾಕೀ ವೆಶಿಶ್ಟ್ ರಿತಿಚಿ ಸೊಭಾಯ್ ಮಾ|ಜೋರ್ಜ್ ಒಲಿವೆರಾಚಿ ಆಧ್ಯಾತ್ಮಿಕ್ ನದರೆಂತ್ ಉದೆಲ್ಲಿ ಇಮಾಜ್ ತಶೆಂಚ್ ಮಾ|ಮ್ಯಾಕ್ಸಿಮ್ ಲೋಬೊಚಾ ಕವಿತಾಚಿ ಸಕತ್ ಪಳೆಯಾ, ಇಮಾಜೆಚೆಂ ಅಂತಸ್ಕರ್ನ್ ಸಯ್ತ್ ಅಪ್ಲ್ಯಾ ಕರ್ತುವಾಂಚೆರ್ ಬೌತಿಕ್ ಸಂಸಾರಾಮುಖಾರ್ ಲಜೆನ್ ಭಿರಾಂತೆನ್ ದೊಡ್ಚೆಂ ಚಿತ್ರಣ್ ದಿತಾ. ಆನಿ ಮಯ್ನ್ಯಾಚೊ ಕವಿ ಜಾವ್ನ್ ವಿಂಚೊನ್ ಆಯಿಲ್ಲ್ಯಾ ಮ್ಯಾಕ್ಸಿಮ್ ಲೋಬೊಕ್ ಉಲ್ಲಾಸ್.
ಲಜ್ ಆನಿ ಭಿರಾಂತ್ ಅಶೇಂಯ್ ಕವಿತಾರಸಿಕಾಂಕ್ ಪಿಸ್ವಾಯ್ತಾ ಮ್ಹಣ್ಚಾಕ್ ಹಾಂತ್ಲಿಂ ಕವಿತಾ ಭಳ್ವಂತ್ ರುಜ್ವಾತ್ ದೀಂವ್ಕ್ ಸಕ್ತಾತ್ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್.
[ವಾಂಟೆಲಿ ಜಾಲ್ಲಿಂ]
4. ನಿರ್ಮಲಾ ಗೋವಿಯಸ್ ಬೆಂದುರ್/ಮಸ್ಕತ್
5. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್
7. ಮಾ|ಜೋರ್ಜ್ ಒಲಿವೆರಾ, ಬೆಂಗ್ಳುರ್
8. ವಾಯ್ಲೆಟ್ ಜೆ. ಪಿರೇರಾ, ದುಭಾಯ್
9. ಅಸುಂತಾ ಪಿರೇರಾ, ಗಂಟಲ್ಕಟ್ಟೆ/ಲಂಡನ್
11. ವಲ್ಲಿ ಕ್ವಾಡ್ರಸ್ ಅಜೆಕಾರ್/ಕುವೇಯ್ಟ್
13. ರೆಮ್ಸಿ ಫೆರ್ನಾಂಡಿಸ್, ದುಭಾಯ್
15. ವಾಯ್ಲೆಟ್ ಜೆ. ಪಿರೇರಾ [ದುಸ್ರೆಂ ಕವಿತಾ]
1. ರೂಪ್ [ಮಯ್ನಾಚೆಂ ಕವಿತಾ]
ಮ್ಯಾಕ್ಸಿಮ್ ಲೋಬೊ
ಮ್ಹಾಕಾ ಲಜ್,
ಕೊಣೀಂ ಪಳೆತ್, ಗುಪ್ತಿಂ ತಿಳಿತ್?
ಮ್ಹಾಕಾ ಭಿರಾಂತ್,
ಲೇಸ್ ನಿಸ್ರಾತ್, ವೇಸ್ ಉಸ್ಳಾತ್?
ಲಜ್ ಮ್ಹಜಿಚ್
ಮ್ಹಜಾ ರುಪಾಚಿ, ಆನಂತ್ ಸಾರ್ಕ್ಯಾಚಿ
ಊಂಚ್ಲಿ ಆಕೃತಿ
ಹಾಂವ್ ದೆಕ್ತಾಂ ದಳ್ದಿರ್ ವಿಕೃತಿ
ಭಿರಾಂತ್ ತಿಚ್ಚ್
ತೊ ಸೊಭಾತ್ ಮ್ಹಜೆ
ಪ್ರಾಸ್?
ಉಜಳ್ ತಾಚೊ
ಹಾಂವ್ಪಣಾಕ್ ಹಾಡಿತ್ ತ್ರಾಸ್?
ಜೀಣ್ಭರ್ ಪೆಚಾಡ್ತಾಂ
ರಂಗ್ ಲೆಪುನ್ ಲಜ್ ದಾಂಪುಕ್
ಮನ್ಶಾಸ್ತ್ರ್ ರಗಡ್ತಾಂ
ಗುಳೆ ಯೆಟುನ್ ಭೈಂ ಸುಟೊಂಕ್
ಲಜ್ ಸಾಂಡ್
ನೀಜ್ ಸೊಭಾಯೆ ಪುತ್ಳಿ ತುಂಚ್
ಭಿರಾಂತ್ ತಾಂಡ್
ತೆಂಚ್ ಸಾರ್ಕೆಂ ಭಂವಾರ್ ರಚ್.
2. ದೆವಾ ತುಕಾ ಲಜ್ ನಾ? [ಆಸ್ಟಿನ್ ಪ್ರಭು, ಚಿಕಾಗೊ]
ಲಜ್?
ಖಂಚ್ಯಾ ನಮೂನ್ಯಾಚಿ ಲಜ್?
ಕೊಣಾಕ್ ಲಜ್, ಮ್ಹಾಕಾ?
ಜೇಂವ್ಕ್ ನಾ ಮಾತ್ಶಿ ಪೇಜ್
ಆನಿಂ ತುಂ ಮ್ಹಣ್ತಾಯ್ ಮ್ಹಾಕಾ ಲಜ್?
ಮ್ಹಾಕಾ ಲಜ್ ನಾ, ಮ್ಹಾಕಾ ಭಿರಾಂತ್ ನಾ!
ಮ್ಹಾಕಾ ಕೋಣ್ಂಚ್ ನಾಂತ್
ಆವಯ್ ನಾ, ಬಾಪಯ್ ನಾ;
ಭುರ್ಗೆಂ ನಾ, ಬಾಳ್ ನಾ
ಭಾವ್ ನಾ, ಭಯ್ಣ್ ನಾ,
ಆನಿಂ ಮ್ಹಾಕಾ ಲಜ್ಯೀ ನಾ!
ಲಜ್ ನಾಸ್ತಾಂಚ್ ಹಾಂವ್ -
ವಿಣ್ಗಿಂ ಹ್ಯಾ ಸಂಸಾರಾಕ್ ಆಯಿಲ್ಲಿಂ
ಆನಿಂ ಆತಾಂ ಹಾಂವ್ ಆಸಾಂ ತಶಿಂಚ್
ಆಂಗಾರ್ ಏಕ್ಚ್ ಸುತ್ ನಾ
ಆಸ್ಲ್ಲೆಂ ಥೊಡೆಂ,
ಥೊಡ್ಯಾ ದಿಸಾಂ ಆದಿಂ
ಪಿಂಜುನ್, ಪಿಂಜುನ್ ಚಿಂದಿ ಜಾಲ್ಲೆಂ
ಘಾಣಿನ್ ಸಗ್ಳೆಂಚ್ ವಿಭಾಡುನ್ ಗೆಲ್ಲೆಂ
ಹಾಂವೆ ಸಗ್ಳೆಂಚ್ ಸೊಡ್ಲೆಂ
ಆನಿಂ ಹಾಂವ್ ವಿಣ್ಗಿಂಚ್ ರಾವ್ಲಿಂ
ಹಾತಾಂತ್ ನಾಸ್ತಾಂ ಏಕ್ಚ್ಚ್ ಏಕ್ ಪಾವ್ಲಿ
ಸುಣೆಂ ಸಯ್ತ್ ಮ್ಹಾಕಾ ಹುಂಗಾನಾ ಹಾಂಗಾ
ಖಂಚೊಚ್ಚ್ ಏಕ್ ದಾದ್ಲೊ ಪಳಯ್ನಾ ಮ್ಹಾಕಾ
ವರ್ಸಾಂ ಆದಿಂ ಮ್ಹಜೆರ್ ಆಂಯ್ಡೊ ಘಾಲ್ಲೆ
ಮ್ಹಾಕಾ ಹೊಟೆಲಾಂಕ್ ವ್ಹರುನ್
ನಾನಾಂತೆಂ ಖಾಂವ್ಕ್-ಪಿಯೆಂವ್ಕ್ ದೀವ್ನ್
ಮ್ಹಜೆ ಸಂಗಿಂ ವೊಮ್ತೆಂ-ಉದಾರೆಂ ನಿದೊನ್
ಆಪ್ಲಿ ಕುಡಿಚಿ ತಾನ್ ಭಾಗಯಿಲ್ಲೆ
ತೆ ವ್ಯಾಪಾರಿ, ತೆ ಮಣಿಯಾರಿ
ಮ್ಹಾಕಾ ಏಯ್ಡ್ಸ್ ಪಿಡಾ ದೀವ್ನ್
ಧಾಂವ್ಲ್ಯಾತ್ ತಾಂಚ್ಯಾ ಬಾಪಾಯ್ಗೆರ್
ಹಾಂವ್
ಹ್ಯಾ ರಸ್ತ್ಯಾರ್ ಬಸೊನ್ ಆಸಾಂ
ತರೀ ಮ್ಹಾಕಾ ಕಿತೆಂಚ್ ಭಿರಾಂತ್ ನಾ!
ಹಾಂವ್ ಕೊಣಾಕ್ಚ್ಚ್ ಗುಮಾನ್ ಕರಿನಾ
ದೆವಾಕ್ ಪರ್ಯಾಂತ್ ನಮಾನ್ ಮ್ಹಣಾನಾ
ಮ್ಹಾಕಾ ತಾಚೆರ್ ಭಾರಿಚ್ ರಾಗ್
ತಾಚೆಂ ನಾಂವ್ ಕಾಡ್ತಾನಾ ಜಾತಾಂ ವಾಗ್
ನಹಿಂ
ಜಾಲ್ಯಾರ್,
ಹೆರಾಂ
ಸರ್ವಾಂಕ್
ಮಜೆನ್ ಜಿಯೆಂವ್ಕ್ ಸೊಡ್ತಾಂ
ಮ್ಹಾಕಾ ಕಿತ್ಯಾ ಭಿಕಾರಿ ಕೆಲಾಂ?
ಹಾಂವೆ ಕಿತೆಂ ತಾಕಾ ಧುಂಪಂವ್ಕ್ ನಾ?
ಇಗರ್ಜೆಕ್ ವಚೊನ್ ಮಾಗೊಂಕ್ ನಾ?
ಪಾದ್ರಿಚ್ಯಾ ಡಬ್ಬ್ಯಾಂತ್ ಘಾಲುಂಕ್ ನಾ?
ಸಾಂಗ್ ದೇವಾ -
ಹಾಂವೆ ಕಿತೆಂ ತುಕಾ ದೀಂವ್ಕ್ ನಾ?
ಆಸಾಯ್ ಕಿತ್ಯಾ ವೊಗೊಚ್ಚ್ ತುಂ
ಹಾಂವೆ ಸಾಂಗ್ಲ್ಲೆಂ ತುಕಾ ಆಯ್ಕಾನಾ?
ದೀಸ್-ರಾತ್ ತುಂ ಪಳೆತಾಯ್ ಮ್ಹಾಕಾ
ತುಕಾಯ್ ಹಾಂವ್ ದಿಸಾನಾ?
ಮ್ಹಾಕಾ ತುಂ ಮರಣ್ ದೀ
ಹಾಂವ್ ಸಂಸಾರಿಂ ಮೊರ್ತಾಂ
ತ್ಯಾ ಮಾತ್ಯೆ ಪಂದಾ ಕುಸ್ತಾಂ
ಸರ್ಗಾರ್ ಮ್ಹಾಕಾ ಕಾಂಯ್ ಜಾಗೊ ನಾ
ಹಾಂವ್ ಯಮ್ಕೊಂಡಾಕ್ ತರೀ ಪಾವ್ತಾಂ
ಥಂಯ್ಸರ್ ಸರ್ವಾಂ ವಿಣ್ಗಿಂಚ್ ಖಂಯ್
ಕೋಣಾಯ್ಚಿ ಭಿರಾಂತ್ ನಾ ಖಂಯ್
ಆಯ್ಕಾಲೆಂಮೂ ತುಕಾ ಹಾಂವೆ ಸಾಂಗ್ಲ್ಲೆಂ
ವ್ಹರ್ ಮ್ಹಾಕಾ, ವ್ಹರ್ ವೆಗಿಂ
ವಯ್ರ್ ವ ಸಕಯ್ಲ್,
ಮ್ಹಾಕಾ ತಾಚಿ ಪರ್ವಾ ನಾ!
ಹಾಂವ್ ಭುಕೆನ್ ವಳ್ವಳ್ತಾಂ
ಕರಂದಾಯೇನ್ ಕಳ್ವಳ್ತಾಂ
ರಾತಿಕ್ ಹಿಂವೆನ್ ಉಳ್ವುಳ್ತಾಂ
ಲುಸಿಫೆರಾಕ್ ಪುಣಿ ಈ-ಮೇಯ್ಲ್ ಕರ್ ತುಂ
ಸಂಸಾರ್ ಸಾಂಡುಂಕ್ ಹಾಂವ್ ಪ್ರಾರ್ಥಿತಾಂ
ವ ತುಕಾಯ್ ಮ್ಹಜೆಂ ಆಯ್ಕೊಂಕ್
ಲಜ್ ನಾ, ಭಿರಾಂತ್ ನಾ?
3. ಏಕ್ ಆವಯ್ [ಮೆಲ್ವಿನ್ ಜೆ. ವಾಸ್]
ತಿ ಚಲ್ತಾ ಯಾ ಥಕೊನ್ ರಾವ್ಲ್ಯಾ
ಹ್ಯಾ ವಿಶಾಲ್ ರಾಜ್ರಸ್ತ್ಯಾರ್
ಕೊಣಾಯ್ಕ್ಯ್ ದಿಸ್ತಾ ತಿ ಕಿತೆಂ ಕರ್ತಾ?
ತಿ ಚಡ್ತಾ ಯಾ ವ್ಹಳೂ ದೆಂವ್ತಾ
ಹ್ಯಾ ಉಭಾರ್ ದೊಮ್ಸಾ ಪಾಟ್ಲ್ಯಾ ಝಿರಿಯೆಂತ್
ಕೊಣಾಯ್ಕ್ಯ್ ದಿಸ್ತಾ ತಿ ಕಿತೆಂ ಕರ್ತಾ?
ತಿ ಲುಂವ್ತಾ ವಾ ಮೊಗಾನ್ ಅಸುಡ್ತಾ
ಹ್ಯಾ ವಿಶಾಲ್ ಮೊಳಾಬಾ ಪಂದ್ಲ್ಯಾ ದೊಣ್ಪ್ಯಾರ್
ಕೊಣಾಯ್ಕ್ಯ್ ದಿಸ್ತಾ ತಿ ಕಿತೆಂ ಕರ್ತಾ?
ತಿ ಹಾಸ್ತಾ ವಾ ದುಖಾಂ ಗಳಯ್ತಾ
ಹ್ಯಾ ವಾಟೆ ವಯ್ಲ್ಯಾ ಮಯ್ಲಾ ಫಾತ್ರಾರ್
ಕೊಣಾಯ್ಕ್ಯ್ ದಿಸ್ತಾ ತಿ ಕಿತೆಂ ಕರ್ತಾ?
ತಿ ಭುಕೆಲ್ಯಾ ವ ತಾನೆನ್ ಖರ್ಶೆತಾ
ಹ್ಯಾ ಕುಪಾಂ ವಯ್ಲ್ಯಾ ತಾರಾಂ ಪ್ರಕಾಸಾನ್
ಕೊಣಾಯ್ಕ್ಯ್ ದಿಸ್ತಾ ತಿ ಕಿತೆಂ ಕರ್ತಾ?
ಸಾಂಗ್ರೆ ಅಪಾ
ವೇಳ್ ಧಾಂವ್ಲ್ಯಾರ್
ದೀಶ್ಟ್ ಮಾಜ್ವೊನ್ ದಿಸಾನಾ ಜಾಯ್ತ್
ಪಾವೆಂ ಥಕ್ಲ್ಯಾರ್ ಋಣಾಂತ್
ಬುಡೊನ್ ಜಿವಿತ್ ರಡಾತ್
ಸುರ್ಯೊ
ಬುಡೊನ್ ಕಾಳೊಕ್ ಪಡೊನ್ ಯೆಂವ್ಚೊ ಜಾಲೊ
ತರೀ
ಭಿರಾಂತೆವಿಣೆ ತಿ ಕಿತೆಂ ಕರ್ತಾ?
4. ಲಜ್ ಆನಿ ಭಿರಾಂತ್ [ನಿರ್ಮಲಾ ಗೋವಿಯಸ್]
ಲಜ್ ಆನಿ
ಭಿರಾಂತ್ ಜಿವಾನಾಂತ್ಲಿ ಆಕಾಂತ್, ಮ್ಹನ್ಶಾ ಜಿವಿತಾಂತ್ ಅಟೆವಿಟ್ಯಾಂಚಿ
ಸಾಂತ್
ಲಜೆನ್ ಚಿರ್ಮುಟೊನ್ ಕಾಂಟ್ಯಾಬರಿ, ಕೊವಳ್ಳಿ ಜಿಣಿ ಕೊಟಾರ್ಲೆಕ್
ಸರಿ, ಅಕಾಂತ್ ಪಾಚಾರ್ತೆಲಿ ಭಂವಾರಿಂ,
ಜಿಣ್ಯೆ ಪಯ್ಣಾರಿ, ಲಜ್ ಅನಿ ಭಿರಾಂತೆಸಾರ್ಕ್ಯಾ ಪ್ರಯೊಗಾ ಬರಾಬರಿ
ಜಿಣ್ಯೆ ಥಾರುಂ ಬುಡೊಂಕ್ ಲಾಗ್ಲ್ಯಾರೀ, ಧಯ್ರ್ ಸಾಂಡಿನಾಸ್ತಾಂ
ಪಾವ್ತೆಲ್ಯಾಂವ್ ತಡಿರೀ
ಸುರ್ಯೊ ಬುಡೊನ್ ದರ್ಯಾಕ್ ವೆತಾಂ ವೆತಾಂ.....
ಸುರ್ಯೊ ದರ್ಯಾ ಮಿಲನಾ ದೀಸ್ ತೊ ಬುಡ್ತಾಂ ಬುಡ್ತಾಂ, ಕಾಳ್ಕ್ಯಾ ರಾತಿಂ
ನಾಚ್ತಾಂವ್ ಮ್ಹಾರುನ್
ಉಡ್ಕಾಣಾಂ
ಕಸಲಿಂ ಪ್ಯಾಶನಾಂ, ಕಾಮುಕಿಂ ಚಿಂತ್ನಾಂ, ಲಜ್ ಭಿರಾಂತ್ ನಾಸ್ತಾನಾ
ರಾತ್ ಅಪಯ್ತಾ ಸಂಗಿಂ ಘೆವುನ್ ಮಾರೆಕಾರ್ ಸುಚನಾಂ, ಕ್ಷಣಿಕ್ ಧಾದೊಸ್ ಕುಡಿ, ಕಾಳ್ಜಾ
ಮನಾಂ
ಕಾಳ್ಕ್ಯಾ ಭಿರಾಂತೆಚಿ ರಾತ್ ಜಾಗಯ್ತ್ ಲಜೆವಿಣ್ ಗೊಪಾಂತ್
ಲಿಪೊಂಕ್ ದೊಗಾಂ ಮೊಗಿಂಕ್
ಭಿರಾಂತೆಚಿ ರಾತ್ ಸಂತೊಸ್ ಸಂಭ್ರಮ್ ದೀಸ್ಪಡ್ತೊ ಗ್ರಾಸ್ ಜೊಡ್ತೆಲ್ಯಾ ಚೊರಾಂಕ್
ಲಜ್ ಸಾಂಡುನ್ ಚಲಯ್ತ್ ಕಾರ್ಭಾರ್ ಘರ್ಚೊ ಧನಿ ಲಜೆನ್ ಭಂವಾತ್
ಮಾರ್ಗಾರ್
ಅಸಲೊ ಕಾಳೊಕ್ ಭಿಯಾರ್ ....ವಾಂಕ್ಡಿಂ ಕಾಮಾಂ ಕರುಂಕ್
ಸದಾಂಚ್ ತಯಾರ್
ಫಾಲೆಂ ಜಾತಾಂ ಜಾತಾಂ ಲಜೆನ್ ಶೆರ್ಮೆಲ್ಲ್ಯಾ ಮುನ್ಶಾಂಕ್ ಜಾಗಯ್ತ್ ಉದೆಂತಿ
ಸುರ್ಯೊ
ಉಜ್ವಾಡಾಕ್ ಭಿಂಯೆವ್ನ್, ಕಾಳೊಕಾಂತ್ಲ್ಯಾ ಪಾತ್ಕಾಕ್ ಚುರ್ಚುರಿ
ಲೊಕಾ ಜಮೊ
ದಿಸಾ ಉಜ್ವಾಡಾಕ್ ಮಾಗೊನ್ ಭೊಗ್ಸಾಣೆ ಜಿಯೆತ್ ಸಾಂತಾಂಬರಿಂ
ಪರತ್ ಸುರ್ಯೊ ಬುಡ್ತಾನಾ ಲಜೆವಿಣೆ ಪಾತ್ಕಾ ಕಾಳೊಕ್
ವೆಂಗೆವ್ನ್, ಭಿರಾಂತಿವಿಣೆಂ ಮಜಾ ಮಾರಿತ್ ಸರ್ವ್
ಸಾಂಡುನ್
ಕಾಳೊಕಾಂತ್ಲೆಂ ಪಾತಾಕ್ ಝಳ್ಕಾತ್ ದಿಸಾ ಉಜ್ವಾಡಾಕ್, ತರ್ ಕೀಳ್
ಲೆಕ್ತಾಲೊ ಸಂಸಾರ್
ಮಾರುನ್ ಖುರ್ಸಾರ್ ಲಜ್ ಭಿರಾಂತ್ ದಿಸ್ ರಾತ್ ಜಿಣಿ ಸರಾಸರ್
ಸುರ್ಯೊ ನಿದೊನ್ ಪಡ್ಲ್ಲೊ ತರ್, ದಿಸಾಚಿ ಝಳಕ್ ವಳೊಕ್, ಭ್ಯೆಂ ಅನಿ ಲಜ್ ಕೊಣಾಕ್ ದಿಸ್ತಿ?
ಚಂದ್ರಾನ್ ದೊಳೆ ಧಾಂಪ್ಲೆನಾ ತರ್, ಉಜ್ವಾಡ್ ದೆಕ್ಚಿ ಅಶಾ ಮನ್ಶಾಕ್ ಅಸ್ತಿ?
ದೀಸ್ ಅನಿ ರಾತ್, ಲಜ್ ಅನಿ ಭಿರಾಂತ್
ಸಾರ್ಕ್ಯಾ ಪ್ರಯೊಗಾವಿಣೆಂ, ಸಂಸಾರಿಂ ರಿತೆಂ ಜಿಣೆಂ.
5. ಬಾವ್ಲಿ [ಪ್ರಿಯಾ ಸಿಕ್ವೇರಾ, ಫೆರಾರ್]
ಸುರ್ಯೊ ತೊ ಬುಡೊನ್ ಗೆಲೊ
ಜಿಣ್ಯೆಕ್ ಹ್ಯಾ ಕಾಳೊಕ್ ಫಾಂಕವ್ನ್
ಅನಿರ್ಧಿಶ್ಟ್ ಮೆಟಾಂ ಕಾಳೊಕಾಂತ್ ಸಾಸ್ಪಲಿಂ
ವಾಟ್ ತಿ ಅಂಧ್ಕಾರಾನ್ ಭರಲ್ಲ್ಯಾನ್
ನೆಕೆತ್ರಾ ಮೊಡಾಂ ಮಧೆಂ ಲಿಪ್ಲ್ಲಿಂ
ತಾತ್ಸಾರ್ ಮ್ಹಜೆರ್ ಬೊಗುನ್
ಚಂದ್ರ್ ತೊ ಉದೆಲ್ಲೊಚ್ಚ್ ನಾ
ರಾಗಾನ್ ಮ್ಹಜೆರ್ ತಾಪೊನ್
ಫಾತ್ರಾಕ್ ದಾಂಟೊನ್ ಪಡ್ಲಿಂ
ಸಂತಸ್ಲೊ ಮ್ಹಜೊ ದುಸ್ಮಾನ್
ಲಜೆನ್ ಅವ್ಮಾನಾನ್ ಬುಡ್ಲಿಂ
ಉಟೊಂಕ್ ವದ್ದಾಡ್ಲಿಂ ಭಿರಾಂತೆನ್
ಆಂಗ್ ಶಿರ್ಶಿರ್ಲೆಂ ಭಿಂಯಾನ್
ಚಿಂತುನ್ ಉಭಾರ್ ತಗ್ಗ್ ವಾಟೆಚೆರ್
ದೊಳ್ಯಾಂನಿ ಭರ್ಲಿಂ ದುಃಖಾಂ
ನಿಯಾಳುನ್ ಮುಖ್ಲಿ ವಾಟ್ ಆಶೀರ್
ಫಾವೊ ಜಾಲ್ಯೊ ಗಾಳಿ ಶಿರಾಪ್
ದಿಲ್ಲ್ಯಾಕ್ ಖರೊ ಮೋಗ್
ಪಾಟ್ಲ್ಯಾನ್ ನಿಂದಾ ಮುಖಾರ್ ಸಯ್ಲಾಪ್
ಉತ್ರಾಂನಿಚ್ ದಿಲೊ ದಾಗ್
ಜೆಜು ಕ್ರಿಸ್ತಾಕ್ಯೀ ಫಾವೊ ಜಾಲ್ಲೆ
ಖೆಬ್ಡಾಯೊ ನಿಂದಾ ಜೆರ್ಬಾದಾಂಚೆ ಮಾರ್
ಜೆಜುನ್ ಸೊಸ್ಲೆಂ ಸಬ್ದ್ಯ್ ಉಚಾರಿನಾಸ್ತಾಂ
ಜಾವ್ನ್ ಮೊಗಾಚೊ ರುಪ್ಕಾರ್
ಆಧಾರ್ ಮಾಗ್ತಾಂ ದೆವಾಲಾಗಿಂ ಕುರ್ಪೆಚೊ
ಜಿಯೆಂವ್ಕ್ ಹ್ಯಾ ಘಾತ್ಕಿ ಸಂಸಾರಾಂತ್
ಮನಿಸ್ ಮ್ಹಳ್ಳಿ ಬಾವ್ಲಿ ಜಾವುನ್
ಸಾಂಡುನ್ ಲಜ್ ಭ್ಯೆಂ ಭಿರಾಂತ್
6. ಲಜ್ ಆನಿ ಭಿರಾಂತ್ [ವಿನ್ಸಿ, ಮೆಲ್ಕಾರ್]
ದೆವಾನ್ ಘಾಲ್ಲ್ಯಾ ಶಿರಾಪಾವರ್ವಿಂ
ಆದಾಂವ್ ಎವೆನ್ ಕೆಲ್ಲ್ಯಾ
ಪಾತ್ಕಾಮುಖಾಂತ್ರ್
ಸಗ್ಳ್ಯಾ ಮನ್ಶಾಕುಳಾ
ಪರ್ಯಾಂತ್
ದಿಸೊನ್ ಆಯ್ಲಿ ಲಜ್ ಆನಿ
ಭಿರಾಂತ್
ದೀಸ್ಭರ್ ಮನಾಂತ್ ಕೊಸಾವ್ನ್
ಶಿರಾಂ ಶಿರಾಂಚ್ಯಾ ರಗ್ತಾ ವ್ಹಾಳಾಂತ್
ಆಪ್ಲೊ ಅಧಿಕಾರ್ ಚಲವ್ನ್
ಕುಲ್ಕುಲೊ ಹಿಂವಾಂತ್ಯ್ ಘಾಮ್ ದೆಂವಯ್ತಾತ್.
ಹಾಂವ್ ಮ್ಹಜೊ ಮ್ಹಳ್ಳ್ಯಾ ಅಭಿಮಾನಾಥಾವ್ನ್
ಹ್ಯಾ ಜಿವಾಚ್ಯಾ ಅಭಿಮಾನಾ
ಪರ್ಯಾಂತ್
ಸದಾಂನೀತ್ ಪಿಡಾ ಮ್ಹಳ್ಳ್ಯಾ ಭಾಶೆನ್ ಆಸ್ಚ್ಯಾ
ಹ್ಯಾ ಲಜ್ ಆನಿ ಭಿರಾಂತೆಕ್
ಸೊಡ್ವಣ್ ಖಂಯ್..?
ಸೊಡ್ನ್ ವಚ್ ಮ್ಹಳ್ಯಾರ್ ಸೊಡಿನಾತ್ಲ್ಲ್ಯಾ
ಜಾಯ್ ಮ್ಹಳ್ಯಾರ್ ಯೇನಾತ್ಲ್ಲ್ಯಾ
ಹ್ಯಾ ಸ್ವಭಾವಾಕ್ ಹೊಂದ್ವೊನ್
ಕಾಂಪೊನ್ ಆಸ್ಚ್ಯಾ ಹ್ಯಾ ಜಿವಾಕ್ ಸೊಡ್ವಣ್ ಖಂಯ್..?
ಪುಂಜವ್ನ್ ದವರ್ಲೆಲೆಂ
ನಾಂವ್, ದುಡು, ಪದ್ವಿ
ವೆತಾ ಮ್ಹಳ್ಳಿ ಭಿರಾಂತ್.
ಗೆಲ್ಲ್ಯಾ ಉಪ್ರಾಂತ್ ಲಜ್
ಕಾಳ್ಜಾಚಾ ಗುಂಡಾಯೆಂತ್ ಅಧಿಕಾರ್ ಚಲಂವ್ಚಾ
ಹ್ಯಾ ಚಡ್ಣೆ-ದೆಂವ್ಣೆಕ್
ಸೊಡ್ವಣ್ ಖಂಯ್..?
ಹೊ ಜೀವ್ ಸಾಸ್ಣಿಕ್ ನ್ಹಯ್ ಮ್ಹಳ್ಳೆಂ ಸಮ್ಜೊನ್
ಅಭಿಮಾನ್ ಮ್ಹಳ್ಳೊ ಹಾಂಕಾರ್ ಸೊಡುನ್
ಅತ್ಮೊಚ್ ಸತ್, ಅತ್ಮೊಚ್ ಸದಾಂಕಾಳ್ ಮ್ಹಣ್ ಸಮ್ಜಾಲ್ಯಾರ್
ಆಸ್ಚಿನಾ ಲಜ್ ಆನಿ ಭಿರಾಂತ್, ಸೊಡ್ವಣ್ ಸದಾಂಕಾಳ್
7. ಲಜ್ ಆನಿ ಭಿರಾಂತ್ [ಮಾ|ಜೋರ್ಜ್ ಒಲಿವೆರಾ, ಬೆಂಗ್ಳುರ್]
ಲಜ್ ಆನಿ ಭಿರಾಂತ್
ಮಾಸೂಮ್ ಜಿವಿತಾಚ್ಯೊ ದೋನ್ ಕುಶಿ;
ಲಜ್ ಜಿವಿತಾಚೆಂ ಅಲಂಕಾರ್ ತರ್, ಭಿರಾಂತ್ ನಾ ಅಲಂಕಾರ್.
ಲಜ್ ಸ್ತ್ರೀ-ಅಲಂಕಾರ್ ಪುಣ್ ಭಿರಾಂತ್ ಜಿವಿತಾಚೆಂ ಕೊಡು ಖತ್.
ಲಜೆನ್ ವಾಡ್ಚ್ಯಾ ಜಿವಿತಾಕ್ ಭಿರಾಂತ್ ಏಕ್ ಕಳಂಕ್.
ಆಕಾಂತ್ ಮತಿಚೊ,
ಭಿರಾಂತ್ ಸನ್ನಿವೇಶಾಂಚೊ -
ದಿಸ್ತ್ಯಾ ನಾದಿಸ್ತ್ಯಾ ವ್ಯಕ್ತಿ ಪರಿಸರಾಚೊ.
ಫುಲ್ ತೆಂ ಫುಲೊಂಕ್ ಜಾಯ್,
ನ್ಹಯ್ ಬಾವೊಂಕ್,
ಮತಿ-ಆಕಾಂತಾಂತ್ ಆಧೇವ್ಸ್ ಮಾಗೊನ್,
ಭಿರಾಂತ್ ಕೊಡು ಅನ್ಭೋಗಾಕ್ ಪಾಟ್ ಕರುನ್,
ಭಯ್ಣಿ, ತುವೆಂ ಮುಕಾರ್ ಸರುಂಕ್ ಜಾಯ್.
ಲಜ್ ತುಜೆಂ ಹಾತೆರ್ ಜಾವ್ನ್ ಘೆ,
ಪುಣ್ ವಿಸರ್ ಭಿರಾಂತ್,
ಜಾಣ್ತೆಂ ಜಾ ಸಮಾಜೆಂತ್ ತುಜೆಂ ಸ್ಥಾನ್-ಮಾನ್ ಸಮ್ಜೊನ್,
ಭಯ್ಣಿ, ಲಜ್ ಸ್ತ್ರೀ-ಸೊಭಾಯ್ ಜಾಲ್ಯಾರ್, ಭಿರಾಂತ್ -
ಎಕ್ ಕಿಡೊ ಮತಿಚೊ, ಸ್ತ್ರೀ-ಸಂಯ್ಬಾಕ್ ಮಾರೆಕಾರ್ ಥಿಬೊ.
8. ಯೆಮ್ಕೊಂಡಾ ಥಾವ್ನ್ [ -ವಾಯ್ಲೆಟ್ ಜೆ. ಪಿರೇರಾ]
ಜಿಯೆತಾಲೊ ವರ್ತ್ಯಾ ಮಜೆನ್
ನಾತ್ಲ್ಲ್ಲಿ ಭಿರಾಂತ್ ಖಂಚಾಯ್ ರಿತಿನ್
ಮಾಗ್ಣೆಂ ರಜಾರ್ ನೆಣಾಸ್ಲೊ ಕರುನ್
ದೆಂವ್ಚಾರ್ ನಾಡ್ತಾಲೊ ಹರ್ಯೇಕಾ ವಾಟೆನ್
ಚಿಂತಾಲೊ ಕರಿಜಯ್ ಮ್ಹಣ್ ಕಾಮಾಂ ಬರಿಂ
ಸಯ್ತಾನ್ ನಾಡ್ತಾಲೊ ಕರ್ ಮ್ಹಣ್ ಚೊರಿ
ದೆವಾಚೆಂ ಭ್ಯೆಂ ನಾಕಾ ತುಕಾ ಜರಿ
ದೇವ್ ಭಿರಾಂತೆನ್ ಕಷ್ಟಾತಾ ತುಜೊ ಸೆಜಾರಿ
ಪಯ್ಲೆಂ ಪಯ್ಲೆಂ ದಿಸ್ತಾಲಿ ಭಿರಾಂತ್
ಚೊರಿ ಕರುಂಕ್ ರಿಗ್ಚೆಂ ಕೊಣಾಚಾ ಘರಾಂತ್
ಸೈತಾನಾನ್ ಘಾಲಿ ಶಿಮ್ಟಿ ಮ್ಹಜಾ ಕಾನಾಂತ್
ದಾಕಯ್ಲಿ ವಾಟ್, ಪಯ್ಸ್ ಕೆಲಿ ಖಂತ್
ಚೊರಿ ಗಳ್ಯಾಕ್ ದೊರಿ, ಜಾಳಾಂತ್ ಸಂಪ್ಡಾಲೊ
ಪೊಲಿಸಾಚ್ಯಾ ಗುಳ್ಯಾಕ್ ಜೀವ್ ಹೊಗ್ಡಾಯ್ಲೊ
ಝಡ್ತೆಚ್ಯಾ ವಾಟೆರ್ ಪೆದ್ರು ಉಭೊ ಜಾಲೊ
ಪಾತ್ಕಾಂಖಾತಿರ್ ಖೊಟಾವ್ನ್ ಯೆಮ್ಕೊಂಡಾಕ್ ಘಾಲೊ
ಪಾವ್ಲೊ ಯೆಮ್ಕೊಂಡಾಕ್, ಉಭೊ ಸೈತಾನ್ ಬಗ್ಲಾರ್
ದಿಲೊ ಹಾಸೊನ್, ತಾಚ್ಯಾ ಘರಾ ಯೆವ್ಕಾರ್
ಕಿತೆಂ ಪಳೆಂವ್ಚೆಂ ವಳ್ವಳ್ತಾಲೆ ಈಶ್ಟ್ ಸಭಾರ್
ಸೈತಾನ್ ಸಾಂಗಾತ್ ದಿತಾ ವಾಯ್ಟ್ ಕರ್ತಾ ಮ್ಹಣಾಸರ್
ಆತಾಂ ಬುಡ್ಲಾಂ ಹಾಂವ್ ಖಂತಿನ್
ಲಾಸೊನ್ ಗೆಲಾಂ ಎಕಾ ದಿಸಾಚಾ ಉಜ್ಯಾನ್
ಆಜ್ ಆಸ್ಲ್ಲಿ ತರ್ ಮ್ಹಾಕಾ ದೇವ್ ಭಿರಾಂತ್
ಲಾಸ್ತೊನಾ ಹ್ಯಾ ಯಮ್ಕೊಂಡಾಚ್ಯಾ ಉಜ್ಯಾಂತ್
9. ಲಜ್ ಅನಿ ಭಿರಾಂತ್ [ -ಅಸುಂತಾ ಪಿರೇರಾ]
ಗಿರೇಸ್ತ್ ಮನ್ಶ್ಯಾ ಭಿಯೆ ದೆವಾಕ್
ಅನಿತೆಚೊ ಸಾಂಗಾತ್ ಘಾಲುಂ ಲಜೆಕ್
ತುಕಾ ನಾಂ ಜಾಲ್ಯಾ ಲಜ್
ನಾಂ ಜಾಲ್ಯಾ ಭಿರಾಂತ್
ಸಂಸಾರ್ ತುಜೆ ಮುಟಿಂತ್
ತುಜಾ ಗಿರೇಸ್ತ್ ದುರಾಕ್
ಕೊಲ್ವಾ ಪಾಕೆಂ ಗೊಬೊರ್
ತುಜಿ ಅನಿತಿಚಿ ಕಾಮಾಂ
ದುಬ್ಳ್ಯಾ ಪೊಟಾಕ್ ತಾಲ್ವಾರ್
ಖಂತಿನ್ ಮುದೊ ಜಾಲಾಂ ಹಾಂವ್
ಲಜ್ ಭಿರಾಂತ್ ಭಗ್ತಾ
ಫೊಟಾ ಭುಕೆಕ್ ಅನಿತ್
ಜಾತಾನಾಂ ಶಿತಾಂ ವಾಟ್ಲಿ
ಲಜ್ ಭಗ್ತಾ ತುಜೆಂ ಥಂಯ್
ಲಜ್ ಭಗ್ತಾ ಮ್ಹಜೆಂ ಥಂಯ್
ಅನಿತೆಚೊ ಸಾಂಗಾಂತ್ ಜಾಲಾ
ಅಮ್ಕಾಂ ಭಾಂಗಾರಾಚಿ ವಾಟ್ಲಿ
10. ಯೆಮ್ಕೊಂಡಾ ದಾರ್ [ -ಎಚ್ಚೆಮ್]
ಮಾಟ್
ಪಡ್ಲ್ಲ್ಯಾ ಆಮ್ಚ್ಯಾ ಗಾಂವಾಕ್
ಯೇನಾಂತ್ ಕೊಣ್ - ಖಾನಿಸ್ಮಾರೇ ಶಿವಾಯ್
ಮೆಜುಂಕ್ ಕಿತ್ಲಿಂ ಉರ್ಲ್ಯಾತ್ ಗೊರುಂ
ವಾಸ್ರುಂ ರೆಡೆ
ತುಮಿಂ ಆಯ್ಲ್ಯಾತ್ - ಅರ್ಗಾಂ ತುಮ್ಕಾಂಗಾಂವಾಂತ್
ಆಮ್ಚ್ಯಾ
ಹಾಗೊಂಕ್ ಕಾಕುಸ್ ನಾಂತ್
ದೆಕುನ್ ಭುರ್ಗಿಂ ಬಾಳಾಂ ಆಮ್ಚಿಂ ವಾಟೆರ್ ಬಸ್ತಾತ್
ಬಾಯ್ಲೊ ಸುರ್ಯೊ ಬಡ್ಚಾವರೇಗ್ ಧಾಂಬೂನ್ ಧರ್ತಾತ್
ಪುನ್ವೆ ರಾತಿಂ ತರ್ ಅಡೊಸಾಕ್ ಗುರೊಮ್ ಘೆತಾತ್
ಗಾಂವಾರ್ ಗೊರುಂ
ಮೆಲ್ಯಾರ್ ಆಮ್ಕಾಂ ಫೆಸ್ತ್
ಚಾಮ್ಡೆಂ
ವೋಡ್ನ್ ತಾಚೆಂ ಮುಸ್ತಾಯ್ಕಿ ಕರ್ತಾಂವ್
ಮಾಸ್ ರಾಂದುನ್
ವಾಡ್ಯಾಕ್ ವೊವ್ಳೀಗ್ ದಿತಾಂವ್
ಹಾಡಾಂಚೆಂ
ನಗ್ ಕರ್ನ್ ಗಳ್ಯಾಕ್ ಘಾಲ್ನ್ ನಾಚ್ತಾಂವ್ಸೊಮಿಯಾಂನೊ,
ಆತಾಂ ಆಯಿಲ್ಲೆಂ ಕಾಮ್
ಸಾಂಗಾ
ದಯಕರ್ನ್ ಮ್ಹಣಾನಾಕಾತ್ ’ಗೊರುಂ ದೇವ್’ ಖಾಯ್ನಾಕಾತ್
ವೆತೆಲ್ಯಾಂವ್ ಯೆಮ್ಕೊಂಡಾಕ್. ತೆಂ ಖಂಯ್ ಆಸಾ?
11. ಕೊಣ್ ಮ್ಹಣ್ತಾ? [- ವಲ್ಲಿ ಕ್ವಾಡ್ರಸ್ ]
ಕೊಣ್ ಮ್ಹಣ್ತಾ
ಮ್ಹಾಕಾ ಲಜ್ ನಾ
ನೆಸೊನ್ ಧಾಖಯ್ನಾ ವಿಣ್ಗೆಂ ತರ್ಯ್ ಲಿಪಯ್ತಾಂ
ವಿಚಾರ್ ಆತಾಂ ಕೊಣಾಕ್ ಲಜ್ ನಾ
ಕೊಣ್
ಮ್ಹಣ್ತಾ ಮ್ಹಾಕಾ ಸ್ಥಾನ್ ನಾ
ಉಗ್ತ್ಯಾ ರಸ್ತ್ಯಾರ್ ಹಾಂವ್ ಬೊಸ್ತಾನಾ
ವಚೊನ್ ವಿಚಾರ್ ಕರಾ ಅಸ್ಥಾನಾಂತ್ಲ್ಯಾಂಕ್
ಕೊಣ್
ಮ್ಹಣ್ತಾ ಮ್ಹಾಕಾ ಕೊಣ್ಯ್ ನಾ
ಉಜ್ವಾಡಾಕ್ ನಾಂ ತರ್ಯ್ ರಾತಿಕ್ ತರ್ಯ್
ವಿಚಾರ್ ಹ್ಯಾ ರಿಕಾಮ್ಯಾ ರಸ್ತ್ಯಾಂಕ್
ಕೊಣ್
ಮ್ಹಣ್ತಾ ಮ್ಹಾಕಾ ಭ್ಯೆಂ ನಾ
ವಾಗಾಕ್ ಜಾನ್ವಾರಾಂಕ್ ನ್ಹಯ್ ತರ್ಯ್
ಮನಿಸ್ ಜಾಲ್ಲ್ಯಾಂಕ್ಚ್ ಭಿಯೆತಾಂ
ಕೊಣ್
ಮ್ಹಣ್ತಾ ಮ್ಹಜೆಲಾಗಿಂ ಕಾಂಯ್ ನಾ
ಆಶೆಕ್ಯ್ ಆಸಾಂ ಭುಕೆಕ್ಯ್ ಜಾತಾನಾ
ವಿಚಾರಾ ಕೊಣಾಲಾಗಿಂ ಧನ್ ನಾ
ಕೊಣ್
ಮ್ಹಣ್ತಾ ಮ್ಹಾಕಾ ಮಾನ್ ನಾ
ಮಾನ್ ಮನ್ಶಾಂಕ್ ತಾನೆಕ್ ದಿತಾನಾ
ವಿಚಾರಾ ದೇವ್ ದರ್ಮಾಕ್ ವಿಖ್ತೆಲ್ಯಾಂಕ್
12. ಧಾನಿಂ [ - ಜೊಮೆಲ್, ಬೊಂದೆಲ್]
ಬಂದ್ ಕರ್ಲಾಂತ್ಲೆ ಧಾನಿಂ
ಪುರ್ಪುರಿ ಮನಾಭಿತರಿ
ಮ್ಹಜೊ ಕುಡಿಚೊ ಆಕಾರ್
ಜಾಯ್ತ್ ಕಸೊ ಕೊಣಾಕ್ ಆಧಾರ್
ದೆಕುನ್ ನಾಕಾ ’ಹೊ’
ಸಂಸಾರ್
ನಾಕಾ ತೊ ತಕ್ರಾರ್
ಮ್ಹಜೊಚ್ ಸಂಸಾರ್
ಸೊಭಿತ್ತ್ ಸುಂದರ್
ಗಿಮಾ ಉಪ್ರಾಂತ್ಲ್ಯಾ ಪಾವ್ಸಾಕ್
ಧಾನಿ ದೆಂವ್ಲೆಂ ಅನಂತಾಚ್ಯಾ ವಿಶೆವಾಕ್
ಕರ್ಲಾ ಸಂಗಿ ಕುಸ್ಲೆಂ ಮಾತ್ಯೆಂತ್
ಭರ್ವಸ್ಯಾಚ್ಯಾ ಥೆಂಬ್ಯಾಂತ್ ಭಿಜ್ಲೆಂ
ಸಾರ್ಯಾಂತ್
ಆತಾಂ ಕೊಠಾರಾಂನಿ ತುಪ್ಯಾಂನಿ
ಧಾನಿಂಚ್ ಧಾನಿಂ, ಸಗ್ಳ್ಯಾಂನಿ ಧಾನಿಂ
ಲಜ್ ಆನಿ ಭಿರಾಂತ್ ಪೊಳ್ಳಿ ಪಾತಾಳಿಂ
ಪಕತ್ತ್ ತೃಪ್ತೆಚಿ ದುಃಖಾಂ
ಮನಾಭಿತರಿ
ಆತಾಂ ನಾಕಾ ’ತೊ’
ಸಂಸಾರ್
ನಾಕಾ ತೊ ತಕ್ರಾರ್
ಭಾಯ್ಲೊ ಸಂಸಾರ್
ಮ್ಹಕಾ ಸರ್ಗ್ ಆನಿ
ಸಂಸಾರ್
13. ಲಜ್ ಆನಿ ಭಿರಾಂತ್ [ - ರೆಮ್ಸಿ ಫೆರ್ನಾಂಡಿಸ್, ದುಭಾಯ್]
ರಚ್ಲೊ ದೆವಾನ್ ಆದಾಂವಾಕ್ ಜಾವ್ನ್ ಆಪ್ಲ್ಯಾಚ್
ಸುರುಪಾಯೆಚೊ
ರಚ್ತಚ್ ಸಾಂಗಾತಿಣ್, ಕೆಲೊ ಸಾಂಗಾತಿ ತಾಕಾ ಏವೆಚೊ
ದಾಕಯ್ಲೊ ಖಾವ್ನ್ ಜಿಯೆಂವ್ಕ್, ರೂಕ್ ಸುಂದರ್ ತೊಟಾಚೊ
ತಾಕಿದ್ ದಿಲಿ ಖಾಂವ್ಕ್ ನಜೊ ಮ್ಹಣ್ ಫಳ್ ತ್ಯಾ ಎಕಾ ರುಕಾಚೊ
ನಾಡ್ಲೆಂ ಸರ್ಪಾನ್, ಖೆಲೆಂ ಫಳ್ ಆಡ್ವಾರ್ಲೆಲ್ಯಾ ರುಕಾಚೆಂ ತಾಣಿಂ
ಗಿನ್ಯಾನ್ ಭರ್ಲಿ ತಾಂಚಿ ಮತ್ ಥೊಡ್ಯಾಚ್ ಥೊಡ್ಯಾ ಖಿಣಾನಿಂ
ದೆಖ್ಲಿ ವಿಣ್ಗಿ ಕೂಡ್ ದೊಗಾಯ್ನಿಂ ಅಪಾಪ್ಲ್ಯಾ ದೊಳ್ಯಾನಿಂ
ಧಾಂಪ್ಲಿಂ ಕೂಡ್ ಲಜೆನ್ ಗುಂತುನ್ ರುಕಾಚ್ಯಾ ಖೊಲ್ಯಾನಿಂ
ಆಯ್ಕಾಲೊ ತಾಳೊ ರಚ್ಣಾರಾಚೊ, ಭಿರಾಂತ್ ತಾಂಕಾ ದಿಸ್ಲಿ
ರುಕಾ ಇಡ್ಯಾಂತ್ ಲಿಪ್ಲಿಂ ತಿಂ, ಲಿಪಂವ್ಕ್, ಕೆಲ್ಲಿ ಚೂಕ್ ಆಪ್ಲಿ
ಆದಾಂವ್ಕ್ ಏವ್ ಕಾರಾಣ್ ತರ್, ಚೂಕ್ ತಿ ಸರ್ಪಾಚಿ ಆಸ್ಲಿ
ತಾಂಚ್ಯಾ ಚುಕಿಕ್, ಶಿಕ್ಷಾ ಮಾತ್ರ್ ಮನ್ಶಾಕುಳಾಚೆರೀ ಭೆಜ್ಲಿ
ರಚ್ತಾನಾ ಸುರ್ಪಾಯೆಚೊ, ಯೇವ್ನಾ ಉಡಾಸ್ ತುಕಾ ತೊಟಾಚೊ
ಮನ್ಶ್ಯಾಕುಳಾಕ್ ರಚ್ತಾನಾ, ಕಿತ್ಯಾ ರಚುಂಕ್ನಾ ರೂಕ್ ಆಡ್ವಾರ್ಲಲೊ
ದೆಖ್ತಾನಾ ಕೂಡ್, ದಿಸ್ತಿ ಲಜ್ ಉಗ್ಡಾಸ್ ಕಾಡ್ತಾನಾ ಪಾತ್ಕಾಂಚೊ
ದಿಸಾತ್ ತರೀ ಭಿರಾಂತ್, ವಿಸರ್ತಾನಾ ತೊ ಶಿರಾಪ್ ತುಜೊ
14. ಲಜ್ ಆನಿ ಭಿರಾಂತ್ [ರೊನಿ ಸುವಾರಿಸ್]
ರಚ್ಲೆಂಯ್ ತಾಂಕಾ ಅಪ್ಲ್ಯಾಚ್ ಸುರ್ಪಾಯೆಂತ್
ಕೆಲೊಯ್ ಮೋಗ್ ತಾಂಚೊ ಅಪರಿಮಿತ್
ಸೊಡ್ಲೆಂಯ್ ತುಜ್ಯಾ ಭುಮಿ ವೈಕುಂಟಾಂತ್
ಥಂಯ್ಸರ್ ಜಿಯೆಂವ್ಚ್ಯಾಕ್ ತಾಣಿಂ ನಿಶ್ಚಿಂತ್
ಜಿವಿತ್ ಜಾವ್ನಾಸ್ಲೆಂ ತಾಂಚೆ ಸಂತೊಸಾಚೆಂ
ನಾತ್ಲೆಲೆಂ ಕಾಮ್ ಕಾಂಯ್ ಕಸ್ಟಾ ಭರಾಚೆಂ
ದೀಸ್ ಜಾವ್ನಾಸ್ಲೆಲೆ ಭೊವ್ ಅಪುರ್ಭಾಯೆಚೆ
ಶಿವಾಯ್ ಎಕಾ ಅಡ್ವಾರ್ಲೆಲ್ಯಾ ಫಳಾಚೆ
ಪಡ್ಲಿ ದೀಸ್ಟ್ ತ್ಯಾ ಅಬ್ಲೆಸಿ ಸೈತಾನಾಚಿ
ಪಾವ್ಲೊ ಥಂಯ್ ಘೆವ್ನ್ ಶಿಮ್ಟಿ ನಸ್ಟ್ಯಾಚಿ
ಖದ್ವಳಾಯ್ಲಿ ಮತ್ ಮಾಸೂಮ್ ಏವೆಚಿ
ಸಮ್ಜಣಿ ದೀವ್ನ್ ತ್ಯಾ ವಿಚಿತ್ರ್ ಫಳಾಚಿ
ಚಡ್ಲೆ ತೆ ಏವೆಚೆ ತಳ್ಮಳೆ ಕುಡಿಂತ್
ಆಡ್ಚಿಲೆಂ ಆದಾಂವ್ಕ್ ಅಪ್ಲ್ಯಾ ತ್ಯಾ ವೆಂಗೆಂತ್
ಲಾಸ್ಲಿಂ ದೊಗಾಂಯ್ ಮೊಗಾಚಾ ಧಾವೆಂತ್
ಸಂತೊಸ್ಲಿಂ ಖೂಬ್ ಅಡ್ವಾರ್ಲೆಲ್ಯಾ ಫಳಾಂತ್
ದೆಖೊಂಕ್ ಲಾಗ್ಲಿಂ ಎಕಾಮೆಕಾ ಉಪ್ರಾಂತ್
ಲಜೆನ್ ಮಾನ್ ಧಾಂಪುಂಕ್ ಲಾಗ್ಲಿಂ ಖೊಲ್ಯಾಂತ್
ಸಾಂಗಾತಾಚ್ ಸುರು ಜಾಲಿ ತುಜಿಯ್ ಭಿರಾಂತ್
ತರ್ ಹಿಚ್ಚ್ಗಿ ತಿ ಲಜ್ ಅನಿಂ ಭಿರಾಂತೆಚಿ ಸುರ್ವಾತ್?
15. ಲಜ್ ಅನಿ ಭಿರಾಂತ್ [ ವಾಯ್ಲೆಟ್ ಪಿರೇರಾ, ದುಭಾಯ್]
[ಬಾಯ್ ವಾಯ್ಲೆಟ್ ಪಿರೇರ್ ಹಿಣೆಂ ಹ್ಯಾ ಅಂಕ್ಡ್ಯಾಕ್ ಧಾಡ್ಲೆಲೆಂ ಹೆಂ ದುಸ್ರೆಂ ಕವಿತಾ ತರ್ಯ್ ಇತ್ಲೆಂ ಅಪುರ್ಭಾಯೆಚೆಂ ಕವಿತಾಯ್ ಫಾಯ್ಸ್ ಕೆಲೆಂ ತರ್ ಕವಿತಾ ರಸಿಕಾಂಕ್ ಖಂಡಿತ್ ರುಚ್ತೆಲೆಂ ದೆಖುನ್ ಪರ್ಗಟ್ಲಾಂ - ಸಂ]
ಸಗ್ಳ್ಯಾನ್ಯೀ ಭರ್ಲಾ ಇಂಗ್ಲೀಷಾಚೊ ವ್ಹಾಳೊ
ಕೊಂಕ್ಣೆಚೊ ಆಯ್ಕೊಂಕ್ ಮೆಳ್ತಾ ಅಪ್ರೂಪ್ ತಾಳೊ
ಲಜ್ ತಿ ಕಿತ್ಲಿ ಉಲಂವ್ಕ್ ಮಾಂಯ್ಭಾಸ್
ನಾತ್ರಾಂನಿ ಅಜ್ಯೆಕ್ ಶಿಕಯ್ಲಾಂ ಮ್ಹಣೊಂಕ್ "ನೊ, ಯೆಸ್"
ಆಧುನಿಕ್ ಕಾಳ್ ಹೊ ನಾ ವ್ಹಡಿಲಾಂಕ್ ಮಾನ್
ನಾಂವ್ ಕಾಡ್ನ್ ವಿಚಾರಿ "ತುಂ ಮ್ಹಜೊ ಕೋಣ್"
ಘರಾಂತ್ ಉಣೆಂ ಜಾಲಾಂ ಮಾಗ್ಣೆಂ ರಜಾರ್
ಪಳಯಿಲ್ಲೆಂ ಜಾಯ್ ವ್ಹಡಿಲ್ಹಾಂಕ್ ಕರ್ತಾತ್ ವಿರಾರ್
ಮಾನ್ ಧಾಂಪುಂಕ್ ಆಸ್ಲ್ಯಾರ್ ಪುರೊ ಏಕ್ ಕುಡ್ಕೊ
ವ್ಹಡಿಲಾಂಚೊ ಭುರ್ಗ್ಯಾಂಕ್ ನಾ ಜಾಲಾ ಹುಸ್ಕೊ
ಕ್ಲಬ್ಬಾಂನಿ, ಬಾರಾಂನಿ ವಚೊನ್ ನಾಸ್ತಾತ್ ಡಿಸ್ಕೊ
ವಿಭಾಡ್ತಾತ್ ದುಡು ಪಿಯೆವ್ನ್ ಮೊಲಾಧಿಕ್ ವಿಸ್ಕ್ಯೊ
ಮಾತಾರ್ಯಾಂಚೊ ಆತಾಂಚಾಂಕ್ ಯೆತಾ ಕಾಂಟಾಳೊ
ಖಾಲ್ತೆಪಣಾಕ್ ಹಾಂಚಾ ಮಾಂಡ್ಲಾ ಶೆಳೊ
ಖಂತಿನ್ ವ್ಹಡಿಲಾಂ ದೆವಾಕ್ ಮಾರ್ತಾತ್ ಉಲೊ
ಮೊರ್ತಾ ಪರ್ಯಾಂತ್ ಹಾತ್-ಪಾಂಯ್ ಪಡನಾ ತರ್ ಪುರೊ
ದೇವ್ಭಿರಾಂತೆನ್ ಆಸ್ಲ್ಲಿಂ ಸರ್ವಾಂ ಆದ್ಲಿಂ
ಎಕ್ ಕುಟಾಮ್ ಜಾವ್ನ್ ಜಿಯೆತಾಲಿಂ ಸಗ್ಳಿಂ
ಆತಾಂ ಕಾಜಾರ್ ಜಾಲ್ಲೆಂಚ್ಚ್ ರಾವ್ತಾತ್ ವೆಗ್ಳಿಂ
ಸಂಸ್ಕೃತೆಕ್ ಹಾಣಿಂ ಜಿವಿಚ್ಚ್ ಪುರ್ಲಿಂ
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.