ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 9.
[ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್]
ಬಾಬ್ ಎರಿಕ್ ಒಝೆರಿಯೊ
ಮಟ್ವ್ಯಾನ್ ವಳೊಕ್ಕೊಂಕ್ಣೆಂತ್
ಹಾಚಿ ವಳೊಕ್ ಸಾಂಗ್ಚಿ ಮ್ಹಳ್ಯಾರ್ ಖಂಡಿತ್ ಮೊಳ್ಬಾಚೆರ್ ಪ್ರಕಾಸ್ ಫಾಂಕಂವ್ಚಾ ಚಂದ್ರಾಚಿ ವಳೊಕ್ ಧಾಖಯಿಲ್ಲೆಪರಿಂ. ಏಕ್ ಭಳಿಷ್ಟ್ ಸಂಘಟಕ್, ಏಕ್ ಮುಖೆಲಿ, ಕೊಂಕ್ಣೆಚಾ ಮೊಗಾನ್ ತೊವ್ಲ್ಲೊ ಏಕ್ ಪ್ರಭುದ್ದ್ ಸಂಗೀತ್ಕಾರ್, ಗಾವ್ಪಿ, ಸಾಹಿತ್ಯ್ ಮೊಗಿ ಆನಿ ಕೊಂಕ್ಣಿ ಫುಡಾರಿ.
ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಶ್ ಜಾವ್ನ್ ಹ್ಯಾ ಥೊಡ್ಯಾಚ್ಚ್ ಆವ್ದೆಂತ್ ಹಾಣೆಂ ಕೆಲ್ಲಿಂ ಕಾರ್ಭಾರಾಂ ಖರೆಂಚ್ ಜಾವ್ನ್ ಕೊಂಕ್ಣೆಚೊ ಖರೊ ಹುಸ್ಕೊ ಆಸ್ಚಾಂಕ್ ಭೋವ್ ಧಾದೊಸ್ ಕರುಂಕ್ ಪಾವ್ಲ್ಯಾಂತ್. ಉತ್ರಾನ್ ಶೀದಾ ಆನಿ ಕಡಕ್ಕ್ ತರ್ಯ್ ಕಾಳ್ಜಾಂತ್ ತಿತ್ಲೊಚ್ ಮೊವಾಳ್ ಆನಿ ಸಾದೊ. ಕೊಂಕ್ಣಿ ಹಾಚಿ ಭಾಸ್, ಸಂಗೀತ್ ಹಾಚೊ ಉಸ್ವಾಸ್ ತರ್ಯ್ ಕೊಂಕ್ಣಿ ವಾವ್ರಾಡಿ ಕೊಣ್ಯ್ ಜಾಂವ್ - ತೆ ಹಾಚೆ ಖಾಸ್!
ಸಂದರ್ಶಕಿ: ವಾಯ್ಲೆಟ್ ಜೆ. ಪಿರೇರಾ, ಮಂಗ್ಳುರ್
1. ತುಮಿಂ ಏಕ್ ಕ್ರಾಂತಿಕಾರಿ ಮುಖೆಲಿ, ಏಕ್ ಸಂಗೀತ್ಗಾರ್ ತರ್ಯ್ ತುಮ್ಕಾಂ ಸಾಹಿತ್ಯಾಚಿ ವೋಡ್ ಕಶಿ ಆಯ್ಲಿ?
ಜಾ: ಸಂಧರ್ಭಾಕ್ ಲಾಗೊನ್ ಮ್ಹಾಕಾ ಆಜ್ ’ಕೊಂಕಣಿ ಸಾಹಿತ್ಯ್ ಅಕಾಡೆಮಿ’ಚಿ ಜವಾಬ್ದಾರಿ ಸಾಂಬಾಳಿಜಯ್ ಪಡ್ಲ್ಯಾ. ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ತರೀ ಹಾಂವ್ ಏಕ್ ಸಾಹಿತಿ ನ್ಹಂಯ್. ಆತಾಂ ಕೊಂಕ್ಣಿ ಅಕಾಡೆಮಿಕ್, "ಕೊಂಕಣಿ ಸಾಹಿತ್ಯ್ ಅಕಾಡೆಮಿ" ಮ್ಹಣ್ ನಾಂವ್ ಕಿತ್ಯಾಕ್ ದಿಲಾಂ ತೆಂ ಹಾಂವ್ ನೆಣಾಂ, ಪುಣ್ ಹಾಂವ್ ಇತ್ಲೆಂ ಜಾಣಾಂಕೀ ಕರ್ನಾಟಕ್ ಸರ್ಕಾರಾನ್ ಕೊಂಕ್ಣೆಚ್ಯಾ ಸಮಗ್ರ್ ಅಭಿವ್ರದ್ಧೆ ಖಾತಿರ್ ಏಕ್ ಅಕಾಡೆಮಿ ರಚ್ಲ್ಯಾ. ಆನಿಂ ಹ್ಯಾ ಅಕಾಡೆಮಿಚೆ ಕಾಮ್ - ಕೊಂಕ್ಣಿ ಭಾಸ್, ಕೊಂಕ್ಣಿ ಸಂಸ್ಕ್ರತಿ, ಕೊಂಕ್ಣಿ ಲೋಕ್ ವೇದ್, ಕೊಂಕ್ಣಿ ದಾಯ್ಜ್ ತಶೆಂಚ್ಚ್ ಕೊಂಕ್ಣಿ ಸಾಹಿತ್ಯಚ್ಯಾ ಅಭಿವ್ರದ್ಧೆಕ್ ವಾವುರ್ಚೆ. ತ್ಯಾ ದೆಖುನ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೆ ಹರ್ಯೆಕ್ ಅಧ್ಯಕ್ಷ್ ಸಾಹಿತಿಚ್ಚ್ ಜಾಯ್ಜಯ್ ಮ್ಹಣ್ ನಾ. ದೆಕಿಕ್ ಹಾಂವ್ ಏಕ್ ಸಾಹಿತಿ ನ್ಹಂಯ್.
2.
ಕೊಂಕ್ಣಿ ಸಾಹಿತ್ಯ್, ಕೊಂಕ್ಣಿ ಸಂಗೀತ್, ಕೊಂಕ್ಣಿ ನಾಟಕ್, ಕೊಂಕ್ಣಿ ಕಲಾ ಹಾಂತುಂ ತುಮ್ಚಾ ಪಸಂದೆಚೆಂ ಖಂಯ್ಚೆಂ?
ಜಾ: ಹಾಂತು ಮ್ಹಜಾ ಪಸಂದೆಚೆ ಕೊಂಕ್ಣಿ ಮ್ಹಳ್ಯಾರ್ ಕೊಂಕ್ಣೆಚ್ಯಾ ಸಂಪೂರ್ಣ್ ವಾಡವಳೆಂತ್ ಮಾತ್ರ್ ಕೊಂಕ್ಣೆಚೆ ಬರೆಂಪಣ್ ಆಸಾ. ಕೊಂಕ್ಣಿ ಜರ್ ಉರಾಜಯ್ ಆನಿಂ ಮುಖ್ಲೆ ಪಿಳ್ಗೆಕ್ ಕೊಂಕ್ಣಿ ದಾಯ್ಜ್ ಪಾವಯ್ಜಾಯ್ ಜಾಲ್ಯಾರ್ ಕೊಂಕ್ಣೆಚ್ಯಾ ಹರ್ ವಿಭಾಗಾಚಿ ಅಭಿವೃದ್ಧಿ ಜಾಯ್ಜಯ್. ಸಾಹಿತ್ಯ್ ವಾಡಾಜಯ್. ನಾಟಕಾಚೆ ಮಟ್ಟ್ ಉಂಚಾಯೆಕ್ ಪಾವಾಜಯ್. ಕೊಂಕ್ಣಿ ಸಂಗೀತ್ ಅಂತಾರಾಷ್ಟೀಯ್ ಸಂಗೀತಾಚ್ಯಾ ಮಟ್ಟಾಕ್ ಯೇಜಯ್.
ಕೊಂಕ್ಣಿ ಲೋಕ್ ವೇದ್, ಸಂಪ್ರದಾಯ್, ರಿತಿ ರಿವಾಜಿ ಏಕ್ ಉತ್ರಾನ್ ಸಾಂಗ್ಚೆ ತರ್ ಕೊಂಕ್ಣಿ ದಾಯ್ಜ್
ಜಾಗಯ್ಜಾಯ್, ವಾಗಾಯ್ಜಯ್, ಸುರ್ಗಾಂರಾಯ್ಜಯ್. ಆನಿಂ ಆಶೆಂ ಮಾತ್ರ್ ಕೊಂಕ್ಣಿ ಉರ್ತೆಲಿ. ಮ್ಹಜೊ ಪಯ್ಲೊ ಮೋಗ್ ಸಂಗೀತ್ ಆನಿಂ ಗೆಲೆತ್ಯಾ ವೀಸ್ ವರ್ಸಾಂ ಥಾವ್ನ್ ಕೊಂಕ್ಣಿ ಸಂಸ್ಕ್ರತೆಚ್ಯಾ ಉದರ್ಗತೆ ಖಾತಿರ್ ಮಾಂಡ್ ಸೊಭಾಣಾ ಮುಖಾಂತ್ರ್ ಹಾಂವ್ ವಾವ್ರ್ ಕರ್ನ್ ಆಸಾ. ಆನಿಂ ಹ್ಯಾಚ್ಚ್ ಖಾತಿರ್ ಆಮಿಂ ’ಕಲಾಂಗಣ್’ ಸ್ಥಾಪನ್ ಕೆಲಾಂ. ಸಾಹಿತ್ಯಾಂತ್ ಮ್ಹಜಾ ಮೊಗಾಚೊ ಪ್ರಕಾರ್ ಕವಿತಾ. ಕವಿತಾಂ ಖಾತಿರ್ಯೀ ಆಮ್ಚೊ ವಾವ್ರ್ ಚಲ್ಲಾ. ಕಲಾಂಗಣಾ ಮುಖಾಂತ್ರ್ ಆಮಿಂ ಕೊಂಕ್ಣಿ ಸಾದರ್ ಕಲಾ ಜಿವಿ ದವರ್ಚೆಂ ಪ್ರಯತನ್ ಆಮಿಂ ನಿರಂತರ್ ಕರ್ನ್ ಆಸಾ. ಅಕಾಡೆಮಿ ಮುಖಾಂತ್ರ್ ಮ್ಹಜೊ ಮೊಟೊ ವಾವ್ರ್ ಸಾಹಿತ್ಯಾ ಖಾತಿರ್ ಆಸಾ.
3.
ಕೊಂಕ್ಣೆಕ್ ತುಮ್ಚಿ ದೇಣ್ಗಿ ವರ್ತಿ ತರ್ಯ್ ತುಮ್ಕಾಂ ಫಾವೊ ಆಸ್ಲ್ಲೊ ಜೊಕ್ತೊ ಪಾಟಿಂಬೊ ಕೊಂಕ್ಣಿ ಲೊಕಾಂ ಥಾವ್ನ್ ಮೆಳ್ಳಾ ಮ್ಹಣ್ ತುಮ್ಕಾಂ ಭಗ್ತಾ? ಕಿತ್ಯಾಕ್?
ಜಾ: ಕೊಂಕ್ಣಿ ಲೊಕಾಂಚೊ ಪಾಟಿಂಬೊ ಆಮ್ಚಾ ಹರ್ ಕಾಮಾಕ್ ಬರ್ಪೂರ್ ಮೆಳ್ಳಾ. ಗೆಲೆತ್ಯಾ ವೀಸ್ ವರ್ಸಾಂನಿ ಫಕತ್ ಕೊಂಕ್ಣಿ ಸಾಂಸ್ಕ್ರತಿಕ್ ಕಾರ್ಯಕ್ರಮಾಂ ಖಾತಿರ್ ಆನಿಂ ಸಾಂಸ್ಕ್ರತಿಚ್ಯಾ ವಾಡಾವಳೆ ಖಾತಿರ್ ಉಣ್ಯಾರ್ ರುಪೊಯ್ ಏಕ್ ಕೊರೊಡ್ ಕೊಂಕ್ಣಿ ಲೊಕಾನಿ ಆಮ್ಕಾಂ ದಿಲಾ. ತ್ಯಾ ಶಿವಾಯ್ 85 ಲಾಖ್ ಯೆದೊಳ್ಚ್ಚ್ ಕೊಂಕ್ಣಿ ಲೊಕಾಚಿ ದೇಣ್ಗಿ ದುಸ್ರ್ಯಾ ಕೊಂಕ್ಣಿ ವಾವ್ರಾಡ್ಯಾಂಕೀ ಲಾಭ್ಲ್ಯಾ. ತ್ಯಾ ದೆಕುನ್ ಜರ್ ಕೋಣ್ ನಿತಿನ್, ನಿಸ್ವಾರ್ಥ್ ಥರಾನ್ ಕೊಂಕ್ಣೆಚೊ ವಾವ್ರ್ ಕರ್ತಾ, ತಾಕಾ ಕೊಂಕ್ಣಿ ಲೋಕ್ ಬಿಲ್ಕುಲ್ ಸೊಡ್ನ್ ಘಾಲ್ಚೊಂನಾ.
4. ಇಸ್ಕೊಲಾಂನಿ ಕೊಂಕ್ಣಿ ಶಿಕಂವ್ಕ್ ಸುರ್ವಾತ್ ಕೆಲ್ಯಾ, ಹಾಚೊ ಪ್ರತಿಫಳ್ ಫುಡಾರಾಂತ್ ಕಿತ್ಲೊ ಆಸಾ ಮ್ಹಳ್ಳೆಂ ತುಮ್ಚೆಂ ಚಿಂತಾಪ್?
ಜಾ: ಕಾಲ್ ಮ್ಹಣಾಸರ್ ಏಕ್ ರಡ್ಣೆಂ ಆಸ್ಲ್ಲೆ, "ಕೊಂಕ್ಣೆಕ್ ಫುಡಾರ್ ನಾ" ಮ್ಹಳ್ಳೆಂ. ಪುಣ್ ಜ್ಯೆ ಘಡ್ಯೆ ಶಾಳಾನಿಂ ಕೊಂಕ್ಣಿ ಆಯ್ಲಿ, ಕೊಂಕ್ಣೆಕ್ ಫುಡಾರ್ ಆಸಾ ಮ್ಹಣ್ ಸಗ್ಳೆ ಸಾಂಗೊಂಕ್ ಲಾಗ್ಲೆ. ತೆಣೆಂ ಇಂಗ್ಲೀಷಾಚೊ ಪ್ರಭಾವ್ ವಾಡ್ಲ್ಲ್ಯಾನ್ ಆನಿಂ ಕೊಂಕ್ಣಿ ಲೋಕ್ ಜಾಗತೀಕರಣಾಚ್ಯಾ ವಾದಾಳಾಕ್ ಶಿರ್ಕಾಲ್ಲ್ಯಾನ್ ಕೊಂಕ್ಣೆಕ್ ಫುಡಾರ್ ನಾ ಆಶೆಂ ದಿಸ್ತಾಲೆಂ. ಪೂಣ್ ಆತಾಂ ಲೊಕಾಂಚಿ ಹುಮೆದ್ ವಾಡ್ಲ್ಯಾ. ಭುರ್ಗಿಂ ಕೊಂಕ್ಣಿ ಶಿಕ್ತಾತ್. ತ್ಯಾ ದೆಖುನ್ ಕೊಂಕ್ಣಿ ಭಾಸೆಕ್, ಸಾಹಿತ್ಯಾಕ್ ಆನಿಂ ಸಂಸ್ಕ್ರತೆಕ್ ಬರೊ ಫುಡಾರ್ ಆಸಾ ತಸೊ ದಿಸ್ತಾ. ತ್ಯಾಚ್ಚ್ ದೆಖುನ್ ಹ್ಯಾ ವರ್ಸಾ ಕೊಂಕ್ಣಿ ಮಾನ್ಯಾತಾ ದಿವಸ್ ಆಗಸ್ಟ್ ವೀಸ್ ತಾರಿಕೆರ್ ಆಮಿಂ "ಕೊಂಕ್ಣಿ ಫುಡಾರಾ ದಿವಸ್" ಮ್ಹಣ್ ಆಚರಣ್ ಕೆಲೊ.
5.
’ಕಲಾಂಗಣ್’ ವಿಶ್ಯಾಂತ್ ತುಮ್ಚೆಂ ಸ್ವಪಾಣ್ ಕಸಲೆಂ?
ಜಾ: ಕೊಂಕ್ಣಿ ದಾಯ್ಜ್ ಜೊಗಾಸಾಣೆನ್ ಸಾಂಬಾಳ್ನ್ ಆಧುನಿಕ್ ಕಾಳಾರ್ ತಾಕಾ ನವೊ ಅರ್ಥ್ ದೀವ್ನ್ ಲೊಕಾಚ್ಯಾ ಜಿವಿತಾಂತ್ ಕೊಂಕ್ಣಿ ಭಾಸ್ ಆನಿಂ ಸಂಸ್ಕ್ರತಿ ಜಿವಾಳ್ ದವರ್ಚಾಕ್ ಆನಿಂ ಭಾಸ್, ಸಂಸ್ಕ್ರತಿ, ಕಲಾ ಅನಿಕೀ ಗಿರೇಸ್ತ್ ಕರ್ನ್, ಸುರ್ಗಾಂರುನ್ ಮುಖ್ಲ್ಯಾ ಪಿಳ್ಗೆಕ್ ಹಾತಾಂತರ್ ಕರ್ಚಾಕ್ ಏಕ್ ಪುರ್ತೊ ವೇಳ್ ವಾವುರ್ಚೊ ಸಂಸ್ಥೊ ಜಾಯ್ಜೆ. ಚಾ.ಫ್ರಾ ಬಾಬ್, ಆನಿಂ ಆಮಿಂ ಮಾಂಡ್ ಸೊಭಾಣಾಂತ್ಲೆ ಕಾರ್ಬಾರಿ
1992 ಇಸ್ವೆಂತ್ಚ್ ಸ್ವಪ್ಣೆಲ್ಲ್ಯಾಂವ್. ತ್ಯಾ ಉಪ್ರಾಂತ್ ಆಂಮ್ಚಾ ಭಂವ್ಡೆ ಯಾತ್ರಾಂನಿ ಲೊಕಾಚೊ ಸಹಕಾರ್ ಮಾಗೊನ್ ಆಮ್ಚೆಂ ಸ್ವಪಾಣ್ ಖರೆಂ ಕರುಂಕ್ ಆಮಿಂ ವಾವ್ರಾಕ್ ದೆವ್ಲ್ಯಾಂವ್. ತ್ಯಾ ವಾವ್ರಾಚೊ ಫಳ್ ಜಾವ್ನ್ ಏಕ್ ಉಗ್ತೊ ರಂಗ್ ಮಂಚೊ, ಏಕ್ ಸಭಾಂಗಣ್, ಏಕ್ ದಾಯ್ಜ್ ಪುಂಜೊ (ಮ್ಯೂಸಿಯಂ). ಏಕ್ ಪುಸ್ತಕ್ ಭಂಡಾರ್ , ಏಕ್ ಪ್ರತಿಭಾಶಾಳಾ ಆನಿಂ ತಾಂಕಾ ಜಾಯ್ ಜಾಲ್ಲ್ಯೊ ಸವ್ಲತಾಯೊ ಆಮಿಂ ಆಜ್ ಮ್ಹಕಾಳೆ ಶಕ್ತಿನಗರಾಂತ್ ಉಬೆಂ ಕೆಲಾ.
2001 ದಸೆಂಬ್ರಾ ತಾವ್ನ್ ಆಜ್ ಪರ್ಯಾಂತ್ ಖಳಾನಾಸ್ತಾನಾ ಹರ್ ಮಹಿನ್ಯಾಚ್ಯಾ ಪಯ್ಲ್ಯಾ ಆಯ್ತಾರಾ ಆಮಿಂ "ಮಹಿನ್ಯಾಳಿ ಮಾಂಚಿ" ಕಾರ್ಯಿಂ ಮಾಂಡುನ್ ಹಾಡ್ಲ್ಯಾಂತ್ ಮಾತ್ರ್ ನ್ಹಂಯ್ ಆಸ್ತಾಂ ಭುರ್ಗ್ಯಾಂಕ್ ಸಾಂಸ್ಕ್ರತಿಕ್ ಆನಿಂ ಕಲಾ ಶಿಬಿರಾಂ ತಶೆಂಚ್ಚ್ ಸಕ್ಡಾಂಕ್ ವಿಚಾರ್ ಸಾತಿಂ, ಕಾರ್ಯಾಗಾರಾಂ ಥಂಯ್ಚರ್ ಚಲಯ್ಲ್ಯಾಂತ್, ತರೀ ಹೆಂ ಸ್ವಪಾಣ್ ಅಜೂನ್ಯೀ ಆಧುರೆಂ. ದುಸ್ರ್ಯಾ ಹಂತಾಚೆ ಕಾಮ್ ಆಗಸ್ಟ್ ಬಾವೀಸ್ ತಾರಿಕೆರ್ ಸುರ್ವಾತ್ ಜಾತಾ.
65 ಲಾಖ್ ರುಪ್ಯಾಂಚಿ ಗರ್ಜ್ ಆಸಾ. ಕೊಂಕ್ಣಿ ಲೋಕ್ ದಿತೊಲೊಯ್ ಮ್ಹಣ್ ಭರ್ವಸೊ ಆಸಾ.
6.
ಕೊಂಕ್ಣಿ ಅಕಾಡೆಮಿನ್ ಎದೊಳ್ ಪರ್ಯಾಂತ್ ಕರುಂಕ್ ಚಿಂತಿನಾತ್ಲ್ಲಿಂ ಕಾಮಾಂ ತುಮಿಂ ಕರ್ನ್ ಧಾಖಯ್ಲಿಂ ಆನಿ ಕರ್ನ್ಂಚ್ ಆಸಾತ್, ತುಮ್ಚಿ ಕೊಂಕ್ಣೆಂತ್ಲಿ ವ್ಹಡ್ಲಿ ಆಶಾ ಖಂಯ್ಚಿ?
ಜಾ: ಅಕಾಡೆಮಿ ಮುಖಾಂತ್ರ್ ಪಾಠ್ ಕ್ರಮಾಭಿತರ್ ಭುರ್ಗ್ಯಾಂಕ್ ಕೊಂಕ್ಣಿ ಶಿಕಾಪ್, ಕಾಲೇಜ್ ಮಟ್ಟಾರ್, ಪದವಿಪೂರ್ವ್ ಮಟ್ಟ್, ಆನಿಂ ಡೊಕ್ಟರೇಟ್ (ಪಿ.ಹೆಚ್.ಡಿ) ಮಟ್ಟಾರ್ ಸೈತ್ ಕೊಂಕ್ಣಿ ಯೇಜಯ್ ಆಶೆಂ ಏಕ್ ಪ್ರಯತನ್. ತ್ಯಾಚ್ ವೆಳಾ ಕೇಂದ್ರ್ ಸಾಹಿತ್ಯ್ ಅಕಾಡೆಮಿನ್ ನೆಗಾರ್ ಕೆಲ್ಲ್ಯೊ, ತರೀ ಹಕ್ಕಾನ್ ಲಾಬಾಜಯ್ ಜಾಲ್ಲ್ಯೊ ಸವ್ಲತಾಯೊ ಕನ್ನಡಲಿಪಿ ಖಾತಿರ್ ಅಪ್ಣಾಂವ್ಚ್ಯೊ. ಹಿಂ ಸ್ವಪ್ಣಾಂ ಮ್ಹಣ್ ಹಾಂವ್ ಸಾಂಗಾನಾ ಬಗಾರ್ ಹಿಂ ಪ್ರಯತನಾಂ. ವಿಶ್ವ್ ಮಟ್ಟಾರ್ ಕೊಂಕ್ಣೆಕ್ ಫುಡಾರ್ಪಣ್ ದಿಂವ್ಚೆ ಏಕ್ ಸಂಘಟನ್ ಸ್ಥಾಪನ್ ಕರಿಜಯ್ ಆಶೆಂ ಏಕ್ ಸ್ವಪಾಣ್ ಆಸಾ.
7.
ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೆ ಅಧ್ಯಕ್ಶ್ ತುಮಿಂ - ತುಮ್ಕಾಂ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ಸಂಸ್ಥ್ಯಾಂನಿ ಕರ್ಚ್ಯಾ ವ ಕೆಲ್ಲ್ಯಾ ವಾವ್ರಾಚೆರ್ ಕಿತ್ಲೊ ಸಂತೊಸ್ ಆಸಾ? ಕಿತ್ಯಾಕ್?
ಜಾ: ಕೊಂಕ್ಣಿ ಸಂಸ್ಥಾ ಖಾತಿರ್ ಎಕೇಕ್ ವ್ಯಕ್ತಿನಿಂ ಝರೊನ್ ಮರಣ್ ಪಾವಲ್ಲೆ ಹಾಂವೆ ಪಳೆಲಾಂ. ಪುಣ್ ಮ್ಹಜ್ಯಾ ಜಾಣ್ವಾಯೆ ಪ್ರಕಾರ್ ಕೊಂಕ್ಣಿ ಸಾಹಿತ್ಯಾ ಖಾತಿರ್, ಖಂಚಾಯ್ ಏಕಾ ಸಂಸ್ಥಾನ್ ವ್ಹಡ್ಲೊ ವಾವ್ರ್ ಕೆಲ್ಲೊ ಮ್ಹಾಕಾ ದಿಸಾನಾ. ಥೊಡೆ ಪ್ರಕಾಶನ್, ಥೊಡೆ ಪ್ರಕಾಶಕ್ ಯಾ ಥೊಡ್ಯಾ ಪ್ರಕಾಶಕಾಂನಿ ಜಿವಿತ್ಭರ್ ಗೊಳೊನ್ ಜಾಯ್ತಿಂ ಪುಸ್ತಕಾಂ ಪ್ರಕಾಶಿತ್ ಕೆಲ್ಯಾಂತ್. ಹೊಚ್ಚ್ ಕೊಂಕ್ಣಿ ಸಾಹಿತ್ಯಾಂತ್ ಜಾಲ್ಲೊ ವ್ಹಡ್ಲೊ ವಾವ್ರ್. ಪುಣ್ ಬೆಜಾರಾಯೆಚಿ ಸಂಗತ್ ಕಿತೆಂಗೀ ಮ್ಹಳ್ಯಾರ್ ಕೊಂಕ್ಣಿ ಭಾಷಾ ಮಂಡಳ್, ವಾ ಅಖಿಲ್ ಭಾರತ್ ಕೊಂಕ್ಣಿ ಪರಿಶದ್ ಅಸಲ್ಯಾ ಸಂಸ್ಥಾನಿ ಭಾಷೆ, ಸಾಹಿತ್ಯಾ ಖಾತಿರ್ ಕಾಂಯ್ ಪುಣೀ ಕರ್ಚೆ ಬದ್ಲಾಕ್ ಪಕತ್ ರಾಜಕಾರಣ್ ಕರ್ನ್ ದೀಸ್ ಕಾಡ್ತೇ ಆಸಾತ್. ಅಕಾಡೆಮಿ ಹೆಂ ಉಣೆಪಣ್ ಭರ್ತಿ ಕರುಂಕ್ ಪ್ರಯತನ್ ಕರ್ತೇ ಆಸಾ. ಹ್ಯಾಚ್ಚ್ ವರ್ಸಾಚ್ಯಾ ಆಖ್ರೇ ಭಿತರ್ ತೀನ್ ಸಂಶೋಧ್ ಗ್ರಂಥ್, ದೋನ್ ಶಬ್ದ್ಕೋಶ್, ದೋನ್ ಅಲಭ್ಯ್ ಮೊಲಾದಿಕ್ ಕ್ರತಿಯೊ, ಆನಿಂ ದೋನ್ ಸಂಗ್ರಹ್ ಗೃಂಥ್ ಛಾಪೊನ್ ಯೆತೆಲೆ.
8. ಆಮ್ಚಾ ಕೊಂಕ್ಣೆಂತ್ ಕುರ್ಲ್ಯಾಂಚೊ ಸ್ವಭಾವ್ ಸಗ್ಳ್ಯಾಂನಿ ಭರೊನ್ ಆಸಾ - ತೆ ಜಾವ್ನ್ ವಯ್ರ್ ಯೇನಾಂತ್ ಆನಿ ವಯ್ರ್ ಯೆಂವ್ಚಾ ಹೆರಾಂಕ್ ವೋಡ್ನ್ ಸಕಯ್ಲ್ ಘಾಲ್ತಾತ್ - ಅಶೆಂ ಕಿತ್ಯಾಕ್?
ಜಾ: ಕುರ್ಲ್ಯಾಂಚೊ ಸ್ವಭಾವ್ ಕೊಂಕ್ಣಿ ಲೊಕಾಮಧೆಂ ಮಾತ್ರ್ ನ್ಹಂಯ್ ಹರ್ ಲ್ಹಾನ್ ಸಮುದಾಯ್ ಮಧೆಂಯ್ ಆಸಾ. ಹೊ ಸ್ವಭಾವ್ ಮನ್ಶ್ಯಾಚ್ಯಾ ಲ್ಹಾನ್ಪಣಾ ತಾವ್ನ್ಂಚ್ಚ್ (ಇನ್ಫೆರಿಯರಿಟಿ ಕೊಂಪ್ಲೆಕ್ಸ್) ಉಬ್ಜಾತಾ. ಲ್ಹಾನ್ ಮನಿಸ್ ವ್ಹಡ್ಪಣ್ ಸೊಸಾನಾ. ದುಸ್ರ್ಯಾಂಚಿ ಯಶಸ್ವಿ ತಾಕಾ ಸೊಸುಂಕ್ ಜಾಯ್ನಾ. ಆಸಲೆ ಲ್ಹಾನ್ ಮನಿಸ್ ಆಂಮ್ಚೆ ಸಮಾಜೆಂತ್ ಜಾಯ್ತೆ ಆಸಾತ್ ತರೀ ವ್ಹಡ್ ಕಾಳ್ಜಾಚೆ, ವ್ಹಡ್ ಮನಾಚೆ, ದುಸ್ರ್ಯಾಂಕ್ ಥೆಂಕೊ, ಪಾಟಿಂಬೊ ಆನಿಂ ಪ್ರೋತ್ಸಾಹ್ ದಿತೆಲೆಯ್ ಆಮ್ಚೆ ಮಧೆಂ ಜಾಯ್ತೆ ಆಸಾತ್. ಹಾಂವೆ ಮ್ಹಜ್ಯಾ ಸಗ್ಳ್ಯಾ ಜಿವಿತಾಂತ್ ಮ್ಹಜ್ಯಾ ತಾಂಕಿಭಿತರ್ ದುಸ್ರ್ಯಾಂಕ್ ಕುಮೊಕ್, ಪಾಟಿಂಬೊ ಆನಿಂ ಪ್ರೋತ್ಸಾಹ್ ದಿಲಾ. ಹಾಂವ್ ವ್ಯಾಪಾರಾಂತ್ ನಾ ದೆಕುನ್ ಕೊಂಕ್ಣಿ ಖಾತಿರ್ ವಾವುರ್ಚೆ ಸಗ್ಳೆ ಮ್ಹಾಕಾ ಮ್ಹಜೆ ಸಹವಾವ್ರಾಡಿ ದಿಸ್ಲ್ಯಾತ್. ಮ್ಹಾಕಾ ಕೊಣಾಯ್ಲಾಗಿಂ ಸ್ಪರ್ಧೊ ಕರುಂಕ್ ನಾ. ತ್ಯಾ ದೆಕುನ್ ಮ್ಹಾಕಾ ಕೊಣಾಯ್ ಮುಕಾರ್ ಲ್ಹಾನ್ಪಣ್ ಭಗಾನಾ. ಆನಿಂ ಲ್ಹಾನ್ ಮನ್ಶ್ಯಾನ್ ಮ್ಹಾಕಾ ವೋಡ್ನ್ ಘಾಲುಂಕ್ ಪಳಯ್ತಾನಾ ಹಾಂವ್ ಲ್ಹಾನ್ ಜಾಂವ್ಕ್ನಾ.
9. ಕೊಂಕ್ಣಿ ಭಾಸೆಕ್ ’ಏಕ್ ಲಿಪಿ’ - ಹ್ಯಾ ವಾದಾವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ಕೊಂಕ್ಣಿ ಭಾಸೆಕ್ ಏಕ್ ಲಿಪಿ - ಹೊ ವಾದ್ ಫಟ್ಕಿರೊ ವಾದ್, ಕೊಂಕ್ಣಿ ಭಾಸೆಕ್ ಏಕ್ ಲಿಪಿ ಕೆದಾಳಾಚ್ಚ್ ನಾತ್ಲ್ಲಿ ಆನಿಂ ಕೆದಿಕ್ಂಚ್ಚ್ ಜಾಂವ್ಚಿನಾ. ಕಶೆಂ ಪಳೆಂ ಕೊಂಕ್ಣಿ ಲೊಕಾಕ್ ಏಕ್ ಧರ್ಮ್ ಮ್ಹಳ್ಳೆ ಸಾರ್ಕೆಂ ನಾ, ತಶೆಂಚ್ಚ್ ಕೊಂಕ್ಣಿ ಭಾಸೆಕ್ ಏಕ್ ಲಿಪಿ - ಕೊಂಕ್ಣಿ ಭಾಸೆಂತ್ ವಿವಿಧತಾ ಆಸಾ - ಲಿಪಿಂತ್, ಬೊಲಿಂತ್ ಹಿಂ ವಿವಿಧತಾ ಆಮಿಂ ಮಾನುನ್ ಘೆವ್ನ್ ಎಕಾಮೆಕಾ ಸಾಂಗಾತಾ ಸಂಬಂಧ್ ಜೊಡ್ಯೆತ್ ಶಿವಾಯ್ ಏಕ್ ರೂಪ್ ಹೆರಾಂಚೆರ್ ಥಾಪುನ್ ಎಕ್ವಟ್ ಘಡ್ತಾ ಮ್ಹಣ್ತೆಲೆ ತಕ್ಲೆಂತ್ ಸಾರ್ಕೆನಾಂತ್. ಕೊಂಕ್ಣೆಕ್ ಏಕ್ ಲಿಪಿ; ೬೬ ವರ್ಸಾಂಧಿಂ ಖಂಚಾಗೀ ಎಕಾ ಬರ್ಯಾ ಮನ್ಶ್ಯಾನ್ ಖಂಚಾಗೀ ಎಕಾ ಸಂಧರ್ಭಾರ್ ಸಾಂಗ್ಲ್ಲೆಂ ಮ್ಹಣೊನ್ ಆತಾಂ ೬೬ ವರ್ಸಾಂ ಉಪ್ರಾಂತ್ ಥೊಡೆ ಮನಿಸ್ ಅಖಿಲ್ ಭಾರತ್ ಪರಿಷದ್ ಮ್ಹಣ್ ಬೋರ್ಡ್ ಘೆವ್ನ್ ಕೊಂಕ್ಣಿ ಸಂಸಾರಾಚೆರ್ ರಾಜ್ ಕರುಂಕ್ ಪಳೆತಾತ್ ತಾಂಚೆ ದೀಸ್ ಮುಗ್ದಾಲೆ.
10. ಕೊಂಕ್ಣಿ ಪತ್ರಾಂ ಆನಿ ಕೊಂಕ್ಣಿ ವೆಬ್ಸಾಯ್ಟ್ ಕೊಂಕ್ಣೆಚಾ ಖರ್ಯಾ ವ್ಹಾಡಾವಳೆಕ್ ಕಿತ್ಲಿಂ ಮಹತ್ವಾಚಿಂ?
ಜಾ: ಕೊಂಕ್ಣೆಚಿ ಸಮಗ್ರ್ ಅಭಿವೃದ್ಧಿ ಜಾಯ್ಜಯ್ ತರ್ ಹರ್ ವಿಭಾಗಾಂನಿ ಕಾಮ್ ಚಲಾಜಯ್. ತೆದಳಾ ಮಾತ್ರ್ ಕೊಂಕ್ಣಿ ಜಿವಾಳ್ ಉರ್ತಾ. ಆಧುನಿಕ್ ಕಾಳಾರ್ ಸಂಪರ್ಕ್ ಮಾಧ್ಯಮ್ ಜಾಂವ್, ಪ್ರಿಂಟ್ ವಾ ಎಲೆಕ್ಟ್ರೋನಿಕ್ ಖಂಚಾಯ್ ಎಕಾ ಭಾಶೆಚಾ ವಾಡಾವಳೆಂತ್ ಮಹತ್ವಾಚೊ ಪಾತ್ರ್ ಖೆಳ್ತಾತ್. ಆಮ್ಚಾ ಇತ್ಲ್ಯಾ ದಾಕ್ಟ್ಯಾ ಸಮುದಾಯೆಕ್ ಇತ್ಲಿ ಪತ್ರಾಂ ಗರ್ಜ್ಗೀ ಮ್ಹಣ್ ವಿಚಾರ್ಲ್ಲ್ಯಾ ಸವಾಲಾಕ್ ಮ್ಹಜಿ ಜಾಪ್ ಕಿತೆಂಗೀ ಮ್ಹಳ್ಯಾರ್, ಆಮ್ಚಾ ಸಮಾಜೆಕ್ ಆತಾಂ ಆಸ್ಲ್ಲೆ ತಿತ್ಲಿಂಚ್ಚ್ ಪತ್ರಾಂ ಆನಿಕೀ ಜಾಯ್ ಮಾತ್ರ್ ನ್ಹಂಯ್ ಏಕ್ ಕೊಂಕ್ಣಿ ದಿಸಾಳ್ಯಾಚಿ ಗರ್ಜ್ ಆಮ್ಕಾಂ ಆಸಾ. ವೆಬ್ಸಾಯ್ಟಾಂನಿ ಆಜ್ ಕೊಂಕ್ಣಿ, ಕೊಂಕ್ಣೆಚಿ ವಳೊಕ್ ಸಂಸಾರಾಕ್ ಕರ್ನ್ ದಿಲ್ಯಾ ಆನಿಂ ಸಂಸಾರಾಚಿ ವಳೊಕ್ ಕೊಂಕ್ಣಿ ಲೊಕಾಕ್ ಕರ್ನ್ ದಿಂವ್ಚ್ಯಾಂತ್ ವೆಬ್ಸಾಯ್ಟಾಂಚೊ ಪಾತ್ರ್ ಆಮ್ಚಾ ವಾಡಾವಳೆಂತ್ ಚಡ್ ಆನಿಂ ಚಡ್ ಪ್ರಮುಖ್.
11. ಕೊಂಕ್ಣೆಂತ್ ಆಯ್ಚಾ ಕಾಳಾರ್ ಪತ್ರಾಂ, ಸಾಯ್ಟಾಂ, ಪ್ರಶಸ್ತ್ಯೊ, ಸ್ಪರ್ಧೆ, ಮಾನ್-ಸಮ್ಮಾನ್, ಅಧ್ಯಯನಾಂ, ಬೂಕ್ ಪರ್ಗಟ್ಣಿ ಇಲ್ಲ್ಯಾ ಮಾಪಾನ್ ಚಡ್ಲ್ಯಾಶೆಂ ಭಗ್ತಾ ತರ್ಯ್ ಕಸಲೆಂ ಉಣೆಂಪಣ್ ಅಜೂನ್ ಆಮ್ಚಾ ಕೊಂಕ್ಣೆಂತ್ ಆಸಾ?
ಜಾ: ಕೊಂಕ್ಣಿ ನಾಟಕಾಂಚೆಂ ಮಟ್ಟ್ ಅಜೂನ್ ಅಭಿವೃದ್ಧಿ ಜಾಂವ್ಕ್ನಾ. ಕೊಂಕ್ಣಿ ಫಿಲ್ಮಾ ಅಪ್ರೂಪ್ ಜಾಲ್ಯಾಂತ್, ಕೊಂಕ್ಣೆಚೆ ಗಾಂವಾಂತ್ ಏಕ್ ದಿಸಾಳೆ ನಾ. ಕೊಂಕ್ಣಿ ಕಾರ್ಯಕ್ರಮಾಂಕ್ ಲೋಕ್ ಜಮೊಂವ್ಕ್ ಅಜೂನ್ ಸಂಘಟಕಾರಾಂಕ್ ಖರಸ್ ಯೆತಾ. ಕೊಂಕ್ಣಿ ಕೊವ್ಳ್ಯೊ, ಸಿ.ಡಿ, ಅನಿಂ ಪುಸ್ತಕಾಂ ವಿಖುಂಕ್ ಅಜೂನ್ ಏಕ್ ವ್ಯವಸ್ಥಿತ್ ಮಾಂಡವಳ್ ನಾ. ತರೀ ಇತ್ಲ್ಯಾ ಉಣ್ಯಾಪಣಾ ಮಧೆಂಯ್ ಕೊಂಕ್ಣೆಚಿ ಪರಿಸ್ಥಿತಿ ಬರಿ ಜಾಲ್ಯಾ ಆಶೆಂ ದಿಸ್ತಾ.
12. ದಾಯ್ಜ್.ಕೊಮ್ ಸಾಯ್ಟಿವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ಹಾಂವ್ ಖುದ್ಧ್ ಕಂಪ್ಯೂಟರ್ ಅಶಿಕ್ಪಿ, ತರ್ಯೀ ಅಂತರ್ಜಾಳ್ ಪಳೈತೆಲ್ಯಾಂ ಥಾವ್ನ್ ದಾಯ್ಜ್.ಕೊಮವಿಶಿಂ ಬರೆಂ ಆಯ್ಕಾಲಾಂ. ತಿತ್ಲೆಂ ಮಾತ್ರ್ ನ್ಹಂಯ್ ಕೊಂಕ್ಣೆ ಖಾತಿರ್ ಆನಿಂ ಕೊಂಕ್ಣಿ ಲೊಕಾಖಾತಿರ್ ಆಸಾ ಕೆಲ್ಲ್ಯಾ ಅಂತರ್ಜಾಳಿಂ ಪೈಕಿ ದಾಯ್ಜ್.ಕೊಮ್ ಉಂಚ್ಲ್ಯಾ ಪಾಂವ್ಡಾರ್ ಆಸಾ. ದಾಯ್ಜಾಕ್ ಆನಿಂ ತಾಚ್ಯಾ ಕಾರ್ಬಾರ್ಯಾಂಕ್ ತಾಂಚ್ಯಾ ವಾವ್ರಾಂತ್ ಹಾಂವ್ ಸರ್ವ್ ಬರೆಂ ಮಾಗ್ತಾ.
13. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ಕೊಂಕ್ಣೆಂತ್ ಬೆಳೆ ಜಾಯ್ತೆಂ ಆಸಾ, ಪುಣ್ ವಾವ್ರಾಡಿ ಥೊಡೆಚ್ಚ್. ಸಕ್ಡಾಂಕ್ಯೀ ವಾವ್ರ್ ಕರುಂಕ್ ಜಾಯ್ನಾ ತರ್ಯೀ ಕೊಂಕ್ಣೆ ಖಾತಿರ್ ವಾವುರ್ತೆಂಲ್ಯಾಂಕ್ ಆಧಾರ್ ದಿಯಾ. ಖಂಡಿತ್ ಕೊಂಕ್ಣೆಚೆಂ ಬರೆಂ ಜಾತೆಲೆಂ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
