ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 8.
[ಸಂದರ್ಶಕ್: ವಲ್ಲಿ ಕ್ವಾಡ್ರಸ್, ಸಂದರ್ಶನ್ ಲೇಖನ್: - ಪ್ರಿಯಾ ಸಿಕ್ವೇರಾ, ಫೆರಾರ್]
ವೆರೋನಿಕಾ ಫೆರ್ನಾಂಡಿಸ್
ಮಟ್ವ್ಯಾನ್ ವಳೊಕ್
ಹೊ ಮಾನೆಸ್ತ್ ಕೊಂಕ್ಣಿ ಖಾತಾ, ಕೊಂಕ್ಣಿ ಪಿಯೆತಾ, ಉಲಂವ್ಣ್ಯಾಂತ್ ಶೀದಾ ಅನಿ ಕಡಕ್ಕ್,
ಪುಣ್ ಕೊಂಕ್ಣಿ ಮನ್ಶಾಂಕ್ ಹೊ ಬರೊ ವಳ್ಕಾತಾ ತಶೆಂಚ್
ಮಾನ್ ದಿತಾ. ಪಾಟ್ಲ್ಯಾ ತೀಸ್ ವರ್ಸಾಂನಿ ಹಾಣೆಂ, ಗೊಂಯಾಂತ್ ತಶೆಂ ಕುವೇಯ್ಟಾಂತ್ ಭರ್ಪೂರ್ ಕೊಂಕ್ಣಿ
ವಾವ್ರ್ ಕೆಲಾ, ಕರುನ್ ಆಸಾ. ಕೊಂಕ್ಣಿ ವಾವ್ರಾಸವೆಂ ಕೊಂಕ್ಣಿ
ಸಂಘ್-ಸಂಸ್ಥ್ಯಾಂನಿಂ ಸಯ್ತ್ ಹೊ ವಾಂಟೆಲಿ ಜಾತಾ. ಏಕ್
ಸಮಾಜ್ಸೆವಕ್ ಜಾವ್ನ್, ಏಕ್ ಚಿಂತ್ಪಿ ಜಾವ್ನ್, ಬರವ್ಪಿ ಜಾವ್ನ್ ಅನ್ನ್ಯಾಯಾ ವಿರೋಧ್
ಸದಾಂಯಿ ಅವಾಜ್ ಉಟಯ್ತಾ.
ಕೊಂಕ್ಣಿಂತ್ ಅಜೂನ್ ಹಾಣೆಂ ಕೊಣಾಯ್ಕ್ಯಿ ಆಪ್ಲೆಂ ಸಂದರ್ಶನ್
ದೀಂವ್ಕ್ ನಾ, ಹೆಂಚ್ ತಾಚೆ ಪಯ್ಲೆಂ ಸಂದರ್ಶನ್ www.daaiz.com ಹಾಕಾ. ಹೊ ಶಿಸ್ತೆಚೊ ಶಿಪಾಯ್, ಶೀದಾ ಆನಿಂ ಸಾದೆಂ ಉಲಯ್ತಾ,
ಮಂಗ್ಳುರ್ಗಾರ್ ತಶೆಂ ಗೊಂಯ್ಕಾರ್ ಮಧ್ಲೊ ಹೊ ಏ.
ವೆರೊನಿಕಾ ಫೆರ್ನಾಂಡಿಸ್ ನಾಂವಾನ್ ವಳ್ಕಿಚೊ ಜಾಲಾ.
ಹಾಣೆಂ ವಾವ್ರ್ ಕೆಲ್ಲಿಂ
ಪತ್ರಾಂ/ಸಾಯ್ಟಾಂ:
’ಗೊಂಯ್ಚೊ ಮೋಗ್’ (ಹಾಫ್ತ್ಯಾಳೆಂ)
’ನವೆಂ ಗೊಯೆಂ’ (ದಿಸಾಳೆಂ)
’ಗುಲೊಬ್’ (ಮಯ್ನ್ಯಾಳೆಂ)
’ಗೋವನ್ ರಿವ್ಯೂ’ (ಮಯ್ನ್ಯಾಳೆಂ)
’ಗೋವನ್ ಮೈಲ್’
’ಗೋವಾ ಟೈಮ್ಸ್’
’ಸಿನೆ ಟೈಮ್ಸ್’
’ಇಷ್ಟ್’ (ಮಯ್ನ್ಯಾಳೆಂ)
1.
ವೆರೋನಿಕಾ ಬಾಬ್ 30
ವರ್ಸಾಂಚಾಕೀ ಚಡ್ ಕೊಂಕ್ಣಿ ವಾವ್ರ್ ಕರ್ನ್ ಅನ್ಭೋಗ್ ಆಸ್ಚಾ ತುಕಾ - ಆಜ್ ತುಮ್ಚಾ
ವಾವ್ರಾವಿಶ್ಯಾಂತ್ ಕಿತೆಂ ಭಗ್ತಾ.
ಮ್ಹಾಕಾ ಭರ್ಪೂರ್ ದಾದೊಸ್ಕಾಯ್ ಆನಿಂ ಸಂತೊಸ್ ಬೊಗ್ತಾ.
30
ವರ್ಸಾಂ ಪಯ್ಲೆಂ ಕುವೇಯ್ಟಾಂತ್ ಕೊಂಕ್ಣಿ ಭಾಸ್ ಫಕತ್ತ್ ಘರ್ ಕಾಮೆಲ್ಯಾಂಚಿ, ಆಯಾ-ಬೊಯಾಂಚಿ ಭಾಸ್
ಮ್ಹಣ್ ಲೋಕ್ ಸಮ್ಜಾತಾಲೊ, ಕೊಂಕ್ಣಿ ಉಲಂವ್ಕ್ ಲೋಕ್ ಲಜೆತಾಲೊ. ಚಡ್ತಾವ್ ಆಮ್ಚೊ
ಲೋಕ್ ಫಿಂರ್ಗಿ ಭಾಶೆಚೊ ಗುಲಾಮ್ ತಶೆಂ ಆಸ್ತಾಲೊ;
ನೆಸ್ಪಾಂತ್, ಉಲೊವ್ಣ್ಯಾಂತ್, ಆಚಾರ್-ವಿಚಾರಾಂತ್ ಯಾ ಸಂಭಾಶಣಾಂತ್.
ಪುಣ್ ಅತಾಂ ಕುವೇಯ್ಟಾಂತ್ ಜ್ಯೀ ಕಿತೆಂ ಕೊಂಕ್ಣಿ ವಾಡಾವಳ್ ಜಾಲ್ಯಾ ತಾಂತುಂ
ಮ್ಹಾಕಾ ಭರ್ಪೂರ್ ಸಂತೊಸ್ ಆಸಾ.
2. ತುಕಾ
ಹ್ಯಾ ತೀಸ್ ವರ್ಸಾಂನಿ ಕೊಂಕ್ಣಿ ಭಾಶೆಖಾತಿರ್ ತುವೆಂ ಬೊಗ್ಲ್ಲೆಂ
ಪಶ್ಚತಾಪ್, ಕರ್ಕರೆ ಕಿತೆಂಯ್ ಅಸಾತ್?
ನಾ - ಬಿಲ್ಕುಲ್ ನಾ. ಪಯ್ಲೆಂ ಕುವೇಯ್ಟಾಂತ್ ಆಯಿಲ್ಲೊ ತೆದ್ನಾಂ
ಮ್ಹಜಾ ಕೊಂಕ್ಣಿ ವಾವ್ರಾಕ್ ಪಳೆವ್ನ್, ಮ್ಹಜೆರ್ ಹೆರ್
ಸಗ್ಳೆ ಹಾಸ್ತಾಲೆ, ಹೊ ಪಳೆ ಪೊರ್ಚುಗೀಸ್, ಇಂಗ್ಲಿಶ್
ಸೊಡ್ನ್ ಕೊಂಕ್ಣಿ ಪಾಟ್ಲ್ಯಾನ್ ಧಾಂವ್ಲಾ. ತೆದ್ನಾಂ ಹಾಂವ್ ’ಕುವೇಯ್ಟ್ ಟೈಮ್ಸ್’
ಹ್ಯಾ ಪತ್ರಾಂತ್ ಇಂಗ್ಲಿಶಾಂತ್ ಬರಯ್ತಾಲೊಂ, ಆಶೆಂ ಹಳ್ತಾರ್ ಕೊಂಕ್ಣಿ
ಬಾಶೆಕ್ ಎಕೆಕ್ಲ್ಯಾನ್ ಉಲಂವ್ಕ್ ಸುರು ಕೆಲೆಂ, ಕೊಂಕ್ಣಿ
ಸಂಘ್ - ಸಂಸ್ಥೆ ಸುರು ಜಾಲೆ, ಕೊಂಕ್ಣಿ ತಿಯಾತ್ರ್, ಕೊಂಕ್ಣಿ ಕಾರ್ಯಕ್ರಮಾಂ, ಕೊಂಕ್ಣಿ
ಸಂಗೀತ್ ಸುರು ಜಾಲೆಂ. ಫಕತ್ತ್ ಗೊಂಯ್ಕಾರ್ ನ್ಹಯ್ ಆಸ್ತಾಂ, ಕೊಂಕ್ಣಿಚೆ ಆಮ್ಚೆಂ
ಹೆರ್, ಬೊಂಬಯ್ಕಾರ್, ಮಂಗ್ಳುರ್ಕಾರ್ ಭಾವ್ ಸಯ್ತ್ ಆಮ್ಚೆ
ಸವೆಂ ಮೆಳೊನ್ ಭರ್ಪೂರ್ ವಾವ್ರ್ ಕೆಲಾ. ತಶೆಂ ಆಸ್ತಾನಾ
ಮ್ಹಾಕಾ ಕೊಂಕ್ಣೆಂತ್ ಕಿತೆಂಚ್ ಕರ್ಕರೆ ಭೊಗುಂಕ್ ನಾಂತ್.
3. ಕೊಂಕ್ಣಿಂತ್ ತುಜ್ಯಾ
ವಾವ್ರಾಂತ್ ಆಜೂನ್ ಪರ್ಯಾಂತ್ ಉಡಾಸಾಂತ್ ಆಸ್ಚೆಂ ಘಡಿತ್ ವಾ ಘಟನ್ ಕಿತೆಂಯ್ ಆಸಾ?
ಖಂಡಿತ್ ಆಸಾ! - ಗೊಂಯಾಂತ್ ಪೊಲಿಸಾಂಚೆ ಲಾಠಿ ಚಾರ್ಜಾಚೆ ಮಾರ್ ಕೆಲ್ಲೆ. ಗೊಂಯಾಂತ್ ಕೊಂಕ್ಣಿಖಾತಿರ್ ಚಳ್ವಳ್ ಜಾತಾನಾ,
ಹಾಂವ್ ಕುವೇಯ್ಟಾಂತ್ ಆಸಲ್ಲೊ ತರ್ಯೀ, ಗೊಂಯಾಕ್ ರಜೆರ್ ಗೆಲ್ಲ್ಯಾ ವೆಳಾರ್, ಗೊಯಾಂತ್ಲ್ಯಾ ಚಳ್ವಳೆಂತ್
ವಾಂಟೆಲಿ ಜಾಲ್ಲ್ಯಾಕ್ ಪೊಲಿಸಾಂನಿ ಮ್ಹಾಕಾ ಧರ್ನ್ ಖೂಬ್
ಮಾರ್ಲೆಂ. ಕಿತ್ಯಾಕ್ ಹಾಂವ್ ಎಕ್ಲೊಂ ಮಾತ್ರ್ ಕುವೇಯ್ಟ್ಗಾರ್ ತಾಂಚೆ
ಮಧೆಗಾತ್ ಆಸ್ಲ್ಲೊಂ.
4. ಕೊಂಕ್ಣಿಚ್ಯಾ ಆತಾಂಚ್ಯಾ
ಪರಿಗತೆ ವಿಶ್ಯಾಂತ್ ತುಜಿಂ ಭಗ್ಣಾಂ ಕಸಲಿಂ?
ಆಯ್ಚೊ ಕೊಂಕ್ಣಿ ಲೋಕ್ ಅಪ್ಲ್ಯಾ ಮಾಯ್ಗಾಂವಾಂತ್ ಪರ್ಕಿ ತಸೊ ಜಾಲಾ. ಆಮ್ಚಾಂ ಆಯ್ಚಾ ಆವಯ್
ಬಾಪಾಯಾಂನಿ ಆಪ್ಲ್ಯಾ ಭುರ್ಗ್ಯಾಂಕ್ ಸಗ್ಳೆಂ ದಿಲಾಂ, ಪುಣ್ ಆಮ್ಚಿ ಕೊಂಕ್ಣಿ
ಸಂಸ್ಕ್ರತಿ ದೀಂವ್ಕ್ನಾ, ದೆಕುನ್ ತಿಂ ಭುರ್ಗಿಂ ಆಪ್ಲ್ಯಾ ಪ್ರಾಯೆಸ್ತ್ ಆವಯ್
ಬಾಪಾಯ್ಕ್ ಆಶ್ರಾಮಾಂನಿ ಘಾಲ್ತಾತ್. ಹಾಂತುಂ ತ್ಯಾ ಭುರ್ಗ್ಯಾಂಚೊ ಗುನ್ಯಾಂವ್
ನಾ. ಆಯ್ಚ್ಯಾ ಕೊಂಕ್ಣಿ ಲೊಕಾನ್ ಉಟಾಜಾಯ್, ಆನಿಂ ತೆದ್ನಾಂ
ಮಾತ್ರ್ ಕೊಂಕ್ಣಿಚಿ ಪರಿಗತ್ ಬರಿ ಜಾತೆಲಿ.
ಪುಣ್ ಹ್ಯಾ ಮಧೆಂ ಇಲ್ಲೆಂ ಸಮಧಾನ್ ಕಿತೆಂಗೀ ಮ್ಹಳ್ಯಾರ್, ಆಜ್ ಕೊಂಕ್ಣಿ ಭಾಸ್ ಫಕತ್ತ್ ಆಶಿಕ್ಪ್ಯಾಂ
ಮಧೆಂ ನಾ, ಆಜ್ ಕೊಂಕ್ಣಿಕ್ ಜಾಯ್ತೆ ಶಿಕ್ಪಿ ತರ್ನಾಟೆಂ ಖಾಂದ್
ಮಾರ್ತಾತ್, ಆಶೆಂ ಕೊಂಕ್ಣಿ ಫುಲಾಜಯ್, ಪಾಲೆಜಾಯ್ ಆನಿ ಸದಾಂಕಾಳ್ ಬಾಳ್ವಾಜಯ್.
5. ಕೊಂಕ್ಣಿ ಭಾಶೆವಿಶಿಂ ಉಣೆಂಪಣ್ ಉಲಯ್ತೆಲ್ಯಾಂ
ವಿಶೆಂ ತುಜಿ ಅಭಿಪ್ರಾಯ್ ಕಸಲಿ?
ಕೊಂಕ್ಣಿ ಭಾಶೆವಿಶಿಂ ಥೊಡೆ ಉಣೆಂಪಣ್ ಉಲಯ್ತಾತ್, ತಾಂಚೆರ್
ಬಿರ್ಮತ್ ಪಾಂವ್ಚಿ ನ್ಹಯ್, ತಾಂಕಾ ಸಾರ್ಕಿ ಜವಾಬ್ ದಿಂವ್ಚಿ ಗರ್ಜ್ ಆಸಾ.
ನಾ ತರ್ ತೆ ಆಪ್ಲ್ಯಾ ಮತಿಚೆ ವೀಕ್ ಹೆರಾಂಚೆರ್ ಥಾಪ್ತೆಲೆ.
6. ಆಜ್ಕಾಲ್
ವೆಬ್ಮಾಧ್ಯಮಾಂ ಮುಖಾಂತ್ರ್ ಜಾಯ್ತೊ ವಾವ್ರ್ ಚಲೊನ್ ಆಸಾ, ಇ-ಮಿಡಿಯಾ
ವಿಶ್ಯಾಂತ್ ತುಜಿ ಅಭಿಪ್ರಾಯ್ ಕಸಲಿ?
ಖರೆಂ! ಆಜ್ಕಾಲ್ ಅಂತರ್ಜಾಳಾಂನಿ ಜಾಯ್ತೊ ಕೊಂಕ್ಣಿ ವಾವ್ರ್ ಚಲ್ತಾ, ಭೋವ್ ಬರೆಂ!
ಪುಣ್ ಹೆಂ ಅಂತರ್ಜಾಳಿಚೆಂ ಮಾಧ್ಯಮ್ ಸರ್ವ್ ಕೊಂಕ್ಣಿ
ಲೊಕಾಂಕ್ ಪಾವಾನಾ. ಕೊಂಕ್ಣಿ ಚಡ್ ವಾಡಾಜಾಯ್ ತರ್, ತಾಕಾ ಚಡ್ ಆನಿಂ ಚಡ್
ಲೊಕಾಂಚೊ ಸಹಾಕಾರ್ ಮೆಳಾಜಾಯ್. ಆನಿ ಹೆಂ ಪ್ರಿಂಟ್ ಮಾಧ್ಯಮಾಕ್
ಮಾತ್ರ್ ಸಾಧ್ಯ್. ಪುಣ್ ಪರ್ಗಾಂವಾಂತ್ ಆಸ್ಚಾ ಆಮ್ಚಾ ಕೊಂಕ್ಣಿ ಭಾವಾಂಕ್ ಭಯ್ಣ್ಯಾಂಕ್ ಇ-ಮಾಧ್ಯಮಾಧ್ವಾರಿಂ ಖೂಬ್
ವಾವ್ರ್ ಕರುಂಕ್ ಸಾಧ್ಯ್ ಆಸಾ - ತೆಂ ಭೋವ್ ಬರೆಂಚ್.
7. ದಾಯ್ಜ್ ಸಾಯ್ಟಿವಿಶಿಂ ತುಜಿ ಅಭಿಪ್ರಾಯ್ ಕಸಲಿ?
ದಾಯ್ಜ್ವಿಶಿಂ, ತಾಂಚಾ ವಾವ್ರಾವಿಶಿಂ ಮಸ್ತ್ ಆಯ್ಕಾತಾಂ, ದಾಯ್ಜ್ ಕುವೇಯ್ಟಾಂತ್ ಕೊಂಕ್ಣಿಖಾತಿರ್ ಜಾಯ್ತೆಂ ಬರೆಂ ಕರ್ತಾಂ. ತೆಂ ಆಶೆಂಚ್ ಬರ್ಯಾ ಥರಾನ್ ಚಾಲು ದವರಿಜಾಯ್, ಕೊಂಕ್ಣಿ ಭಾಶೆಚ್ಯಾ
ಹೆರ್ ಲಿಪಿಯಾಂಚಿಂ ಆಂಕಣಾಂ ತುಮಿಂ ಚಾಲು ಕೆಲಾಂ ತೆಂ ಚಡ್ ಬರೆಂ. ಆಸೊಚ್ ತುಮ್ಚೊ
ವಾವ್ರ್ ಮುಖಾರುನ್ ವ್ಹರಾ.
8. ದೇವ್ ಬರೆಂ ಕರುಂ ತುಕಾ, ತುಂವೆಂ ಆಮ್ಕಾಂ
ದಿಲ್ಲ್ಯಾ ವೆಳಾಕ್.
ಕೊಂಕ್ಣಿ ಖಾತಿರ್ ಹಾಂವ್ ಸದಾಂಚ್ಚ್ ಆಸ್ತಲೊಂ, ಕೆದ್ನಾಂಯಿ ಮ್ಹಜೆ ಥಾವ್ನ್ ತುಮ್ಕಾಂ ಕಸಲೀಯೀ ಗರ್ಜ್
ಪಡ್ಲಿ ತರ್, ಹೆಂ ಘರ್ ತುಮ್ಕಾಂ ಸದಾಂಚ್ಚ್ ಉಗ್ತೆಂ ಆಸ್ತೆಲೆಂ, ದೇವ್ ಬರೆಂ ಕರುಂ ತುಮ್ಕಾಂ, ತುಮಿಂ
ಮ್ಹಾಕಾ, ಮ್ಹಜ್ಯಾ ವಾವ್ರಾಕ್ ವಳ್ಕಾಲ್ಲ್ಯಾಕ್.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
