ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಆಮ್ಚೆ ಸಬಾರ್ ಸಂಘ್-ಸಂಸ್ಥೆ ಕೊಂಕ್ಣಿ ಭಾಸ್, ಸಂಸ್ಕೃತಿ... ಖಾತಿರ್ ವಾವುರ್ತಾಂವ್ ಮ್ಹಣ್ ಪೆಂಪಾರೆ ವ್ಹಾಜಯ್ತಾತ್’ ನವೀನ್
ಕೊಂಕ್ಣಿ ಕಾರ್ಭಾರಿ
ಸಂದರ್ಶಕ್: ವಲ್ಲಿ ಕ್ವಾಡ್ರಸ್ (ಕುವೇಯ್ಟ್)
ಕೊಂಕ್ಣಿ ಕಾರ್ಭಾರಿ - 5
ನವೀನ್ ಸಿಕ್ವೇರಾ
ಜನನ್ : 1976 ಇಸ್ವೆಚಾ ಸಪ್ತೆಂಬ್ರಾಚಾ 22 ತಾರಿಕೆರ್ ಬ್ರಹ್ಮಾವರ್ ಫಿರ್ಗಜೆಂತ್ ಜಲ್ಮಾಲೊ.
ವೆಬ್ಸಾಯ್ಟ್ : www.maibhas.com
ಇಮೇಯ್ಲ್ : navmelsha@rediffmail.com
ಶರೊ: ಕೊಂಕ್ಣಿ ಸಮಾಜೆಕ್ ಪಯ್ಲೆಂ ಕೊಂಕ್ಣಿ ವೆಬ್ಸಾಯ್ಟ್ ದಿಲೊ ಮಾನೆಸ್ತ್ ನವೀನ್ ಸಿಕ್ವೇರ್, ಏಕ್ ಖರೊ ಕೊಂಕ್ಣಿ ಮೊಗಿ ಆನಿ ವಾವ್ರಾಡಿ ಜಾವ್ನಾಸಾ. ತಾಚಾ ವಾವ್ರಾಕ್ ಆನಿ ತಾಣೆಂ ಕೆಲ್ಲ್ಯಾ/ಕರ್ಚಾ ಕೊಂಕ್ಣಿ ಮೊಗಾಕ್ ಕಸಲ್ಯಾಯ್ ಪ್ರಶಸ್ತೆಂನಿ ಮೆಜುಂಕ್ ಜಾಂವ್ಚೆಂನಾ ತರ್ಯ್ ಕೊಂಕ್ಣಿ ವಾವ್ರ್ ಆಪ್ಲೆಂ ಕರ್ತವ್ಯ್ ಮ್ಹಣ್ ತಾಣೆಂ ಸಾಂಗ್ತಾನಾ, ಮ್ಹಾಕಾ ಶ್ರವಣಕುಮಾರಾನ್ ಅಪ್ಲ್ಯಾ ಆವಯ್ ಬಾಪಾಂಯ್ಕ್ ಖಾಂದ್ಯಾರ್ ಬಸವ್ನ್ ವೆಚೆಂ ಉಡಾಸ್ ಯೆತಾ. ದಾಯ್ಜ್ ಪಾನಾಚೆಂ ಸುರ್ವಿಲ್ಲೆಂ ವಿನ್ಯಾಸ್ ತಾಣೆಂಚ್ ಕರುನ್ ದಿಲ್ಲೆಂ ಮ್ಹಣ್ತಾನಾ ತಾಚಾ ಕೊಂಕ್ಣಿ ಮೊಗಾಚಿ ಅಂದಾಜ್ ತುಮಿಂ ಘಾಲ್ಯೆತಾ.
1. ಪಯ್ಲೆಂ
ಸಾಂಗ್ ತುಂ ಆತಾಂ ಸೆಟಲ್ ಜಾಲಾಯ್? ಕಿತ್ಯಾಕ್ ಮ್ಹಳ್ಯಾರ್ ಜೆದ್ನಾಂ ತುಂ ದುಭಾಯ್
ಪಾವ್ಲೊಯ್ ತೆದ್ನಾಂ ತುವೆಂ ಕೊಂಕ್ಣೆಕ್ ಸರ್ವಾಂ ಪ್ರಾಸ್ ಚಡ್
ಪ್ರಮುಖ್ಯತಾ ದಿಲ್ಲಿಯ್.
ಸತ್. ದುಬಾಂಯ್ತ್ ಜಾಯ್ತೆಂ ಹಾಂವೆಂ ಜೊಡ್ಲಾ ತಶೆಂಚ್ ಥೊಡ್ಯಾ
ಮಟ್ಟಾನ್ ಹೊಗ್ಡಾಯ್ಲಾಂ. ಜಿವಿತಾಚ್ಯಾ ಕಠಿಣಾಯೆಚ್ಯಾ ಘುಂವ್ಡೆರ್,
ಹಾಂವೆಂ ಕೊಂಕಣಿ ಖಾತಿರ್ ಕಾಮ್ ಕೆಲಾ ಮ್ಹಳ್ಳೊ ಸಂತೊಸ್
ಮ್ಹಾಕಾ ಆಸಾ. ಎಕಾವಾಟೆನ್ ಮ್ಹಜ್ಯಾ ಖಾಸ್ಗಿ ಜಿಣ್ಯೆಚೆರ್ ಹೆಂ
ಮ್ಹಾರಗ್ ಪಡ್ಲೆಂ. ಜಾಯ್ತೆ ಅವ್ಕಾಸ್ ಮ್ಹಜ್ಯಾ ಥಾವ್ನ್ ಚುಕೊನ್ ಗೆಲೆ. ಜಾಲ್ಯಾರ್ಯೀ ವೇಳ್ ಉತ್ರೊನ್
ವೆಚ್ಯಾ ಪಯ್ಲೆಂ ಕೊಂಕಣಿಚ್ಯಾ ಮಾಲ್ಘಡ್ಯಾ ಮಾನೇಸ್ತಾಂನಿ
(ಎಡ್ವಿನ್, ಜೆಮ್ಮಾ ಆನಿ ಸಿಜ್ಯೆಸ್) ಜೊಕ್ತಿ ಬೂದ್ಬಾಳ್ ಸಾಂಗ್ಲ್ಲ್ಯಾ
ವರ್ವಿಂ ಆಜ್ ಹಾಂವ್ ಮ್ಹಜ್ಯಾ ಜಿವಿತಾಂತ್ ಬರ್ಯಾ ಸ್ಥಿತೆರ್ ಪಾವ್ಲಾಂ. ಕಿತೆಂಯ್ ಜಾಂವ್ ಜಿವಿತ್ ಏಕ್ ಧಾಂವ್ಣಿ.... ಆಜ್
ಮ್ಹಜಿಂ ಸರ್ವ್ ಸಮಸ್ಯೆ ನಿವಾರ್ ಜಾಲ್ಲ್ಯಾನ್ ಮಾಯ್ಭಾಸ್.ಕೊಮ್ ಥಂಯ್ ಚಡಿತ್ ಗಮನ್
ದೀಂವ್ಕ್ ಸಾಧ್ಯ್ ಜಾಲಾಂ.
2. ತುಂ ಕೊಂಕ್ಣೆಚಿ
ಸೆವಾ ಕರ್ಯಾಯ್ಗಿ? ವಾ ಕೊಂಕ್ಣಿ ಸೆವಾ ಮ್ಹಳ್ಳ್ಯಾಚೆರ್ ತುಕಾ
ಪಾತ್ಯೆಣಿ ಆಸಾಗಿ?
ನಾಂ, ಹಾಂವ್ ಹಿ ಸೆವಾ ಮ್ಹಣ್
ಲೆಕಿನಾ. ಮ್ಹಜ್ಯಾ ಪ್ರಕಾರ್ ಹೆಂ ಮ್ಹಜೆಂ ಕರ್ತವ್ಯ್. ಜಲ್ಮ್
ದಿಲ್ಲ್ಯಾ ಆವಯ್ಚಿ ಚಾಕ್ರಿ ಕರ್ಚಿ ವ ಸಹಾಯ್ ಕರ್ಚೆಂ ಸೆವಾ
ನ್ಹಯ್. ಮ್ಹಜ್ಯಾ ಭಾಸೆ ಥಂಯ್ ಮ್ಹಾಕಾ ಗೌರವ್ ಆಸಾ, ತಿಚ್ಯಾ
ಸರ್ವ್ ಗುಣಾಂ ಥಂಯ್ ವಡ್ವಿಕಾಯ್ ಆಸಾ ತಶೆಂಚ್ ತಿಚ್ಯೆ ದುಸ್ಥಿತೆ ಥಂಯ್ ದೂಖ್ ಆಸಾ.
ಮ್ಹಜ್ಯಾ ನಿಮ್ತಿಂ ತಿಚಿ ದುಸ್ಥಿತಿ ಥೊಡ್ಯಾ ಮಟ್ಟಾನ್ ತರ್ಯೀ
ನಿವಾರ್ ಜಾತಾ ಜಾಲ್ಯಾರ್ ಹಾಂವ್ ಧಾದೊಶಿ.
3. ತುಜೆಪ್ರಕಾರ್
ಮಾಯ್ಭಾಸ್.ಕೊಮ್ ಮ್ಹಳ್ಯಾರ್ ಕಿತೆಂ?
ಆಪ್ಲಿ ಮಾಯ್ಭಾಸ್,
ಮಾಯ್ಗಾಂವ್, ಸಂಸ್ಕೃತಿ ವಿಸ್ರೊನ್ ಫಿಂರ್ಗಿ ಭಾಸೆ
ಪಾಟ್ಲ್ಯಾನ್ ಧಾಂವೊನ್, ’ಕೊಂಕ್ಣೆಂತ್ ಕಿತೆಂ ಆಸಾ?’ ಮ್ಹಣ್ ವಿಚಾರ್ಚ್ಯಾ
ಸ್ವಾಭಿಮಾನ್ ವಿಕುನ್ ಖೆಲ್ಲ್ಯಾ, ಆಬ್ಲೆಶಿ ಕೊಂಕಣಿ ಲೊಕಾಂಕ್,
’ಕೊಂಕಣಿಂತ್ ಕಿತೆಂ ನಾ? ಮಾಯ್ಭಾಸ್.ಕೊಮ್ ಪಳೆಯ್..’
ಮ್ಹಣ್ ಮ್ಹಜ್ಯಾಚ್ ಶೈಲೆರ್ ಹಾಂವೆಂ ದಿಂವ್ಚಿ ಜವಾಬ್.
4. ತುಜಾ ಕೊಂಕ್ಣಿ
ವಾವ್ರಾಚೆರ್ ತುಕಾ ಕೊಂಕ್ಣಿ ಸಮಾಜೆಥಾವ್ನ್ ಮೆಳ್ಲ್ಲ್ಯಾ/ಮೆಳ್ಚಾ
ಪ್ರತಿಕ್ರಿಯೆಥಂಯ್ ತುಂ ಸಂತೊಸ್ ಆಸಾಯ್?
ಹಾಕಾ ಸಲೀಸಾಯೆನ್ ಜವಾಬ್
ದೀಂವ್ಕ್ ಜಾಯ್ನಾ. ಜೆಂ ಕಿತೆಂ ಆತಾಂ ಆಸಾ ತಾಂತುನ್ ಹಾಂವ್
ಸಂತುಷ್ಟ್ ಆಸಾ. ಪುಣ್ ಏಕ್ ಮಾತ್ರ್ ಸತ್, ಖಂಚಾಯ್ ಪರಿಸ್ಥಿತೆರ್, ಖಂಚಾಯ್ ಒತ್ತಡಾಚೆರ್ಯೀ
ಮಾಯ್ಭಾಸ್.ಕೊಮ್ ಚಲ್ತೆಲೆಂ.
5. ಅಜೀಕ್ ದೋನ್
ವರ್ಸಾಂ ಉಪ್ರಾಂತ್ ಮಾಯ್ಭಾಸ್ ಖಂಯ್ಸರ್ ಪಾವ್ತೆಲೆಂ ಮ್ಹಳ್ಳಿ ತುಜಿ ಆಶಾ?
ಆಮ್ಚ್ಯಾ ಮತಿಂತ್
ಸಭಾರ್ ಯೋಜನಾಂ ಆಸಾತ್. ಆಮಿಂ ಕಾರ್ಯಾ ರುಪಾಕ್ ಹಾಡ್ಚ್ಯಾ
ದಿಶೆನ್ ಎದೊಳ್ಚ್ ಮೇಟ್ ದವರ್ಲಾಂ. ಇ_ಮಾಧ್ಯಮಾಂತ್ ಕೊಂಕ್ಣೆಕ್
ಬೊರ್ಯಾ ರಿತಿನ್ ಉಪಯೋಗ್ಸುನ್, ಕೊಂಕ್ಣಿ ವಾಚ್ಪ್ಯಾಂಕ್, ಆಕರ್ಷಿತ್ ಕರ್ಚೆಂ ತಸಲಿಂ
ಸಬಾರ್ ಯೋಜನಾಂ ಆಮಿಂ ಚಿಂತುನ್, ಅಭಿವೃದ್ಧಿ ಕೆಲ್ಯಾಂತ್. ಥೊಡ್ಯಾಚ್
ದಿಸಾಂನಿ ಹ್ಯೆ ವಿಶಿಂ ಚಡಿತ್ ಮಾಹೆತ್ ಆಮಿ ದಿತೆಲ್ಯಾಂವ್.
6. ದಾಯ್ಜ್ ಪಂಗ್ಡಾವಿಶಿಂ, ಸಾಯ್ಟಾವಿಶಿಂ ತುಜಿ ಅಭಿಪ್ರಾಯ್ ಕಸಲಿ?
ಆಮ್ಚೊ ಸರ್ವಾಂಚೊ ಉದ್ದೇಶ್ ಎಕ್ಚ್ಚ್.
ಮಾಯ್ಭಾಸೆಚಿ ಅಭಿವೃದ್ಧಿ. ತಿ ಬೊರ್ಯಾನ್ ಆನಿ ಜೊರಾನ್ ಚಲ್ತೆಚ್ ಆಸಾ. ತೆಂ
ಪ್ರಮುಖ್ ಜಾವ್ನಾಸಾ. ಕೊಂಕ್ಣೆಚಿ ಜಾಗ್ಮಾಗ್ ವಿವಿಧ್ ಪ್ರದೇಶಾಂನಿ, ವಿವಿಧ್
ಪಂಗ್ಡಾಂನಿ ಜಾಲ್ಲ್ಯಾ ನಿಮ್ತಿಂ, ಕೊಂಕ್ಣೆಕ್ ಫಾಯ್ದ್ಯಾಚೆಂ ಜಾಲಾಂ. ಕೊಂಕ್ಣೆಂತ್ ಕಾಮ್ ಕರ್ತೆಲ್ಯಾಂಕ್ ಕಿತೆಂ
ಮುನಾಫೊ ಜಾತಾ ಮ್ಹಳ್ಳೆಂ ಹಾಂವ್ ಬೊರ್ಯಾನ್ ಜಾಣಾಂ ಆಸ್ತಾಂ, ಕೊಂಕಣಿ ಖಾತಿರ್ ದಾಯ್ಜ್
ಪಂಗ್ಡಾಚೊ ವಾವ್ರ್ ಮೆಚ್ವಾಜಾಯ್ ಜಾಯ್ ತಸಲೊ.
ಮ್ಹಜಿ ಏಕ್ ಲ್ಹಾನ್ಶಿ ಸಲಾಹಾ ಕಿತೆಂಗೀ ಮ್ಹಳ್ಯಾರ್, ಆತಾಂ ಚಡಿತ್ ಚರ್ಚೆರ್ ಆಸ್ಚೊ ’ವಿಮರ್ಸೊ’ ಥಂಯ್ ತಾಂಚೆ ಗಮನ್
ದಿಲ್ಲೆಂ ಜಾಲ್ಯಾರ್, ಕೊಂಕಣಿಂತ್ ಆನ್ಯೇಕ್ ಸಾಹಿತ್ಯ್ ಪ್ರಕಾರಾಚೆಂ ಬೆಳೆಂ ಪಿಕ್ತೆಂ ಆಸ್ಲ್ಲೆಂ. ಕೊಂಕಣಿ
ಸಾಹಿತ್ಯಾಚಿ ಮಟ್ಟ್ ನಿಜಾಯ್ಕೀ ಚಡ್ತಾ ಆಸ್ಲ್ಲಿ. ಕಿತೆಂಯ್ ಜಾಂವ್,
ಮಾಯ್ಭಾಸ್.ಕೊಮ್ ಇತರ್ ಥೊಡ್ಯಾ ಕಾಮಾಂನಿ ಮೆತೆರ್ ಜಾವ್ನ್ ಆಸ್ಲ್ಲ್ಯಾ
ವರ್ವಿಂ ದಾಯ್ಜ್ ಪಂಗ್ಡಾನ್ ವಾ ಹೆರ್ ಕೊಣೆಂಯ್ ಹ್ಯೆ ದಿಶಿಂ ತಾಂಚೆ ಗಮನ್
ದಿಲ್ಯಾರ್ ಬರೆಂ ಆಸ್ಲ್ಲೆಂ.
7. ತುಜಿ
ಮಹತ್ವಾಕಾಂಕ್ಶಾ ಕಸಲಿ?
ಕೊಂಕಣಿಕ್ ಥೊಡ್ಯಾ
ಮಟ್ಟಾನ್ ತರ್ಯೀ ಜೀವ್ ಭರ್ಚೊ. ಹ್ಯಾ ಖಾತಿರ್ ಆಧುನಿಕ್ ತಶೆಂಚ್
ನವಿಂ ವಿಧಾನಾಂ ಸವ್ಲತಾಯೊ ಕಿತೆಂ ಆಸಾತ್ ತ್ಯೊ ಜೊಕ್ತ್ಯಾ ರಿತಿಂನಿ
ವಾಪಾರ್ಚ್ಯೊ.
8. ತುಕಾ, ತುಜಾ ಕೊಂಕ್ಣಿ
ವಾವ್ರಾಕ್ ಏಕ್ ಎಕ್ತಾರ್/ಸಂಚಾಲನ್ ಖಂಚಾ ರಿತಿಚೊ ಪಾಟಿಂಬೊ ದೀಂವ್ಕ್
ಸಕತ್ ಮ್ಹಳ್ಳೆಂ ತುಜೆಂ ಚಿಂತಾಪ್?
ಹ್ಯಾ ಸವಾಲಾಕ್ ಇಲ್ಲಿ
ಲಾಂಬ್ ಜಾಪ್ ದೀಂವ್ಕ್ ಜಾಯ್ ಮ್ಹಣ್ ಮ್ಹಾಕಾ ಭಗ್ತಾ. ಆಮ್ಚೆ
ಸಬಾರ್ ಸಂಘ್ ಸಂಸ್ಥೆ ಕೊಂಕ್ಣಿ ಭಾಸ್, ಸಂಸ್ಕೃತಿ... ಖಾತಿರ್
ವಾವುರ್ತಾಂವ್ ಮ್ಹಣ್ ಪೆಂಪಾರೆ ವ್ಹಾಜಯ್ತಾತ್. ಲಾಕಾಂನಿ ದಾನ್
ದಿಲೊ ಮ್ಹಣ್ ಗಾಜಯ್ತಾತ್. ಪುಣ್ ಭಾರಿಚ್ ಬೆಜಾರಾಯೆಚಿ ಗಜಾಲ್ ಕಿತೆಂಗೀ ಮ್ಹಳ್ಯಾರ್ ತ್ಯಾ
ಸಂಸ್ಥ್ಯಾಚ್ಯಾ ವ್ಹಡಿಲಾಂಕ್, ಕೊಂಕಣಿಂತ್ಚ್ ಕಿತ್ಲಿಂ ಪತ್ರಾಂ/ಸೈಟಾಂ ಆಸಾತ್, ತೆಂ
ಮೊರೊಂದಿ ಮಾಯ್ಭಾಸ್.ಕೊಮ್ ಚೆಂ ಸ್ಪಷ್ಟ್ ಸ್ಪೆಲ್ಲಿಂಗ್
ಸಯ್ತ್ ಕಳಿತ್ ನಾ. ಹಾಕಾ ಕಿತೆಂ ಮ್ಹಣ್ಯಾಂ? ತಾಂಕಾ ಇಂಗ್ಲೀಷ್ ಕಳಿತ್
ನಾ? ಕಂಪ್ಯೂಟರ್ ವಿಶಿಂ ಮಾಹೆತ್ ನಾ? ವ ಕಿತೆಂಚ್ ಗೊತ್ತು
ನಾತ್ಲ್ಲೆ ಪಾಪಾರಿ? ವ ಕೊಂಕ್ಣೆಚ್ಯಾ ನಾಂವಾನ್ ನಾಂವ್ ಜೊಡ್ಚೆ ಫುಡಾರಿ? ಅಸಲ್ಯಾ
ಸಂಘ್ ಸಂಸ್ಥ್ಯಾ ಥಾವ್ನ್ ಆಮಿ ಕಿತೆಂ ಆಶೆವ್ಯೆತ್? ಭೋವ್ ಥೊಡೆ
ಸಂಸ್ಥೆ ಹ್ಯೆ ದಿಶೆನ್ ಸಹಾಯ್ ಕರಿತ್ತ್ ಆಸಾತ್. ಆಮಿಂ ಆಮ್ಚೆರ್ಚ್
ಪಾತ್ಯೆವ್ನ್ ಆಸಾಂವ್...
9.
ಸತ್ ಸಾಂಗ್ - ಅಜೂನ್ ತುಂ ಸಾಯ್ಟಾಚೊ ಖರ್ಚ್ ತುಜಾಚ್
ಬೊಲ್ಸಾಂತ್ಲೊ ಘಾಲ್ತಾಯ್?
ಮಾಯ್ಭಾಸ್.ಕೊಮ್ಚೊ
ಪ್ರಮುಖ್ ಪೋಷಕ್ ಮಾಯ್ಭಾಸ್.ಕೊಮ್ಚ್. ಇಲ್ಲೊಸೊ
ವಾಂಟೊ ಥೊಡೆ ದಾನಿಂನಿ ಸಹಾಯ್ ಕೆಲ್ಲ್ಯಾನ್ ವೊಜೆಂ ಇಲ್ಲೆಂ
ಹಗುರ್ ಜಾಲ್ಯಾ.
10. ತುಕಾ ಕೊಂಕ್ಣಿ
ವಾವ್ರ್ ಕರುಂಕ್ ಆವ್ಕಾಸ್ ದಿಲೊ ತರ್ ಕಸಲೊ ಹುದ್ದೊ/ಆವ್ಕಾಸ್ ತುಂ ಅಶೆತಾಯ್?
ಹಾಂವ್ ಚಿಂತಾ, ಆತಾಂ ಹಾಂವ್ ಕಿತೆಂ ಕರ್ನ್ ಆಸಾ, ತೊ ಮ್ಹಕಾ ಮೆಳ್ಲ್ಲೊ ಏಕ್ ಅವ್ಕಾಸ್. ಹೊ ಅವ್ಕಾಸ್ ಬರ್ಯಾನ್ ಗಳ್ಸುಂಚೊಚ್ ಮ್ಹಜೊ ಇರಾದೊ. ಹಾಚ್ಯಾಕ್ಯೀ ಚಡಿತ್ ಮ್ಹಾಕಾ ಬರೊ ಅವ್ಕಾಸ್ ಮೆಳ್ಚೊ ನಾ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
