Column - Daaiz

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

’ತುಂ ಹೆರಾಂಚೆಂ ಬರೆಂಪಣ್ ಚೀಂತ್, ತುಜೆಂ ಬರೆಂಪಣ್ ಅಪಾಪಿಂಚ್ ಜಾತೆಲೆಂ’ - ಡಯಾನ್ ಡಿ’ಸೊಜ್, ಮುಕಾಮಾರ್ (ದುಭಾಯ್)

ಕೊಂಕ್ಣಿ ಕಾರ್ಭಾರಿ

ಸಂದರ್ಶಕಿ: ಪ್ರಿಯಾ ಸಿಕ್ವೇರಾ, ಫೆರಾರ್ (ಕುವೇಯ್ಟ್)

ಕೊಂಕ್ಣಿ ಕಾರ್ಭಾರಿ - 3

ರೋಶನ್ ಡಿ’ಸೊಜ್

ಜನನ್ : 1975 ಇಸ್ವೆಚಾ ನವೆಂಬ್ರಾಚಾ 15 ತಾರಿಕೆರ್ ಫೆರಾರ್ ಫಿರ್ಗಜೆಂತ್ ಜಲ್ಮಾಲೊ.

ಆವಯ್-ಬಾಪಾಯ್ಚೆಂ ನಾಂವ್ : ರೀಟಾ ಡಿ’ಸೋಜ್ ಆನಿಂ ರೋಬರ್ಟ್ ಡಿ’ಸೊಜ್.

ಇಮೇಯ್ಲ್ : info@mangalorean.com

ಸಂಚಾಲಕ್ - ಮ್ಯಾಂಗಲೋರಿಯನ್.ಕೊಮ್ / ಫೆರಾರ್‌ಆನ್‌ಲಾಯ್ನ್.ಕೊಮ್

ಶರೊ: ಹಾಕಾ ಎದೊಳ್ ಕೊಣಾಯ್ ಥಾವ್ನ್ ಕಸಲೊಚ್ಚ್ ಮಾನ್-ಸಮ್ಮಾನ್ ಮೆಳೊಂಕ್ ನಾ ಜಾವ್ಯೆತ್. ಕಸಲೆಯ್ ಪುರಸ್ಕಾರ್ ಜಾಂವ್ ಕೊಣೆಂಯ್ ದೀಂವ್ಕ್ ನಾ ಜಾವ್ಯೆತ್. ತಶೆಂ ಮ್ಹಣೊನ್ ಕಾಂಯ್ ಹೊ ನಾಂವಾಪಾಟ್ಲ್ಯಾನ್ ವಾ ಮಾನಾಪಾಟ್ಲ್ಯಾನ್ ಕೆದಿಂಕ್‌ಚ್ ಗೆಲ್ಲೊಯ್ ನಾ. ಆಪ್ಲ್ಯಾ ಕಾಮಾಸವೆಂ ಮೆಳ್ಚೊ ಅಪ್ಲೊ ಸಗ್ಳೊ ವೇಳ್/ಮಿನತ್ ತೊ ಘಾಲ್ನ್ ಆಸಾ ಕೆಲ್ಲೆಂ ಮ್ಯಾಂಗಲೋರಿಯನ್.ಕೋಮ್, ಪ್ರಸ್ತುತ್ ಕೊಂಕ್ಣಿ ಸಮಾಜೆಂತ್ ಆಸ್ಚಾ ಉಂಚ್ಲ್ಯಾ ಸಾಯ್ಟಾಂಪಯ್ಕಿ ಏಕ್ ಜಾವ್ನಾಸಾ.

ಪುಣ್ ’ದಾಯ್ಜ್’ ಎದೊಳ್ ಕೊಣೆಂಯ್ ಕರುಂಕ್ ನಾತ್‌ಲ್ಲೆಂ ’ಕಿತ್ಯಾಕ್ ಕರುಂಕ್ ನಾ’ ಮ್ಹಳ್ಳೆಂ ಸವಾಲ್ ವಿಚಾರಿನಾ, ಬಗಾರ್ ಎದೊಳ್ ಪರ್‍ಯಾಂತ್ ತಾಣೆಂ ಕೊಂಕ್ಣಿ ಸಮಾಜೆಕ್ ದಿಲ್ಲ್ಯಾ ತಶೆಂಚ್ ದೀವ್ನ್ ಆಸ್ಚಾ ನಿಸ್ವಾರ್ಥಿ ವಾವ್ರಾಖಾತಿರ್ ’ದಾಯ್ಜ್ ಪಂಗಡ್’ ಮಾನ್ ಭಾಗಾಯ್ತಾ ತಶೆಂಚ್ ಅಪ್ಲೊ ವಾವ್ರ್ ಅಸೊಚ್ಚ್ ಮುಖಾರುನ್ ವರುಂಕ್ ಆನಿಂ ಅಪ್ಲೊ ಸದಾಂಚೊ ಮಾಯಾಮೊಗಾಳ್, ಖಾಲ್ತೆ ಶೆಗುಣ್ ಮುಖಾರುಂಕ್ ಉಲೊ ದಿತಾ.

1 . ತುಕಾ ಅಪ್ಣಾಕ್‌ಯೀ ಏಕ್ ಸಾಯ್ಟ್ ಆಸಾ ಕರುಂಕ್ ಕಶೆಂ ಪ್ರೇರಣ್ ಮೆಳ್ಳೆಂ? ಆನಿಂ ಕಶೆಂ ತುವೆಂ ಮ್ಯಾಂಗಲೋರಿಯನ್.ಕೊಮ್ ಸಾಯ್ಟಾಚಿ ಬುನ್ಯಾದ್ ಘಾಲಿಯ್?

ಹಾಂವ್ 1997 ಇಸ್ವೆಂತ್ ಬೊಂಬೊಯಾಂತ್ ಡೋಟ್ ಕೋಮಾಂತ್ ಕಾಮ್ ಕರುನ್ ಆಸ್ತಾನಾಂಚ್ ಮ್ಹಜೆಂಚ್ ಮ್ಹಳ್ಳೆಂ ಏಕ್ ವೆಬ್‌ಸಾಯ್ಟ್ ಆಸಾ ಕರುಂಕ್ ಚಿಂತುನ್ ಆಸ್‌ಲ್ಲೊಂ. ತರ್‌ಯೀ ಕಾಮಾಚಿ ರಾಟಾವಳೆ ಮಧೆಂ ಮ್ಹ್ಲಜಾ ಮತಿಂತ್ ಆಸ್‌ಲ್ಲ್ಯಾ ಹ್ಯಾ ಚಿಂತ್ಪಾಕ್ ಕಾರ್ಯಗತ್ ಕರುಂಕ್ ಗಂಭೀರ್ ರಿತಿನ್ ಹಾವೆಂ ಆಟೊವ್ ಕೆಲ್ಲೊಚ್ ನಾ. ಜೆನ್ನಾ ಹಾಂವ್ ಅಮೆರಿಕಾ ಪಾವ್ಲೊಂ, ತೆನ್ನಾಂ ಹಾಂವ್ ಸಿಸ್ಟಮ್ ಇಂಜಿನಿಯರ್ ಜಾವ್ನ್ ಕಾಮ್ ಕರುಂಕ್ ಲಾಗ್ತಾನಾ ಮ್ಹಜಾ ಮತಿಂತ್ ಆಸ್‌ಲ್ಲಿ ಆಶಾ ಹಾವೆಂ ಮ್ಹಜಿ ಇಸ್ಟಿಣ್ (ಅಜೂನ್ ತಿಕಾ ಮೆಳೊಂಕ್ ನಾ) ಜಾವ್ನಾಸ್‌ಲ್ಲ್ಯಾ ಕ್ವೀನಿ ಮೆಂಡೊನ್ಸಾಲಾಗಿಂ ಉಚಾರ್ತಚ್, ತಿಣೆಂ ಮ್ಹಾಕಾ ನಿಶ್ಶರ್ಥ್ ಪಾಟಿಂಬೊ ಭಾಸಾಯ್ಲೊ ಮಾತ್ರ್ ನ್ಹಯ್ ಮ್ಹಾಕಾ ಸುರ್ವಿಲೆಂ ಉತ್ತೇಜನ್‌ಯೀ ದಿಲೆಂ ಆನಿಂ ಅಶೆಂ ಮ್ಹಜಾ ಮತಿಚಾ ಆಶೆಕ್ ಜ್ಯಾರಿ ಕರುಂಕ್ ಮ್ಹಜಾನ್ ಸಾಧ್ಯ್ ಜಾಲೆಂ, ಆನಿಂ ಅಶೆಂ ಹಾವೆಂ ಮ್ಯಾಂಗಲೋರಿಯನ್.ಕೊಮ್ ಸಾಯ್ಟಾಚಿ ಬುನ್ಯಾದ್ ಘಾಲಿ.

2 . ತುಕಾ ಮ್ಯಾಂಗಲೋರಿಯನ್.ಕಾಮ್ ಮ್ಹಳ್ಳೆಂ ನಾಂವ್ (ಡೊಮೇಯ್ನ್ ನಾಂವ್) ಕಶೆಂ ಪಸಂದ್ ಜಾಲೆಂ ಆನಿಂ ಹ್ಯಾ ನಾಂವಾಚಾ ಸಾಯ್ಟಾಧ್ವಾರಿಂ ತುಜೆ ಅತ್ರೆಗ್ ಕಸಲೆ?

ಹಾಂವ್ ಎಕ್ಲೊಂ ಮಂಗ್ಳುರ್‌ಗಾರ್. ಜಾಂವ್ಕ್ ಪುರೊ ಆಜ್ ಹಾಂವ್ ಅಮೆರಿಕಾಂತ್ ಕಾಮ್ ಕರುನ್ ಆಸಾಂ, ಪುಣ್ ಮ್ಹಜೆಂ ಕಾಳಿಜ್, ಮನ್, ಸಗ್ಳೆಂ ಮಂಗ್ಳುರ್ಚೆಂಚ್ ಆಸ್ತಾನಾ ಮ್ಯಾಂಗಲೋರಿಯನ್.ಕೋಮ್ ಮ್ಹಳ್ಳೆಂ ನಾಂವ್ ಮೆಳ್ಚೆಖಾತಿರ್ ಚಡುಣೆಂ ಸ ಮಯ್ನ್ಯಾಥಾವ್ನ್ ರಾಕೊನ್, ಅಖ್ರೇಕ್ ಮ್ಹಜಾ ಕಾಮಾಚಾ ರಾಟಾವಾಳೆ ಮಧೆಂ ಮೆಳ್‌ಲ್ಲೊ ಸಗ್ಳೊ ವೇಳ್ ಹ್ಯಾ ಸಾಯ್ಟಾಕ್ ಘಾಲುನ್ ಹೆಂ ಸಾಯ್ಟ್ ಆಸಾ ಕೆಲೆಂ.

ಹ್ಯಾ ನಾಂವಾಧ್ವಾರಿಂ ಹಾಂವ್ ಸಂಸಾರ್‌ಭರ್ ಶಿಂಪಡ್ಲೆಲ್ಯಾ ಮಂಗ್ಳುರ್ಗಾರಾಂಕ್ ಎಕಾಮೆಕಾಲಾಗಿಂ ಸಂಪರ್ಕ್ ಸಾದರ್ ಕರ್ಚೊ ಆನಿಂ ಎಕ್ವಟಿತ್ ರಿತಿನ್ ಕೊಣಾಯ್ಕ್‌ಯೀ ವಾವ್ರ್ ಕರುಂಕ್ ಏಕ್ ಆವ್ಕಾಸ್ ಕರುನ್ ದಿಂವ್ಚೊ ಜಾವ್ನಾಸಾ.

3. ಮ್ಯಾಂಗಲೋರಿಯನ್.ಕೋಮ್ ಹೆರ್ ಸಾಯ್ಟಾಂಚಿ ನಕಲ್ ಪುಣೀಂ ನ್ಹಯ್‌ಮೂ?

ಟಿಮ್ ಬರ್ನರ್ಸ್ ಲೀ ಹಾಣೆಂ ಸಂಸಾರಾಂತ್ಲೆಂ ಪಯ್ಲೆಂ ವೆಬ್‌ಸಾಯ್ಟ್ ಚಾಲು ಕೆಲೆಂ. ಪುಣ್ ಅಜೂನ್ ಪರ್‍ಯಾಂತ್ ತಾಣೆಂ ಅಶೆಂ ಉಚಾರ್‌ಲ್ಲೆಂ ಹಾಂವ್ ನೆಣಾಂ. ತುಕಾ www.cnn.com ಆನಿಂ www.bbc.com ಸಾಯ್ಟಾಂ ಎಕಾಮೆಕಾ ತಾಳ್ ಪಡ್ತಾತ್ ಮ್ಹಣೊನ್ ತಿಂ ದೊನೀಂಯ್ ಸಾಯ್ಟಾಂ ನಕ್ಕಲ್ ಮ್ಹಣ್ತಾಯ್‌ಗೀ? ತುಕಾ www.yahoo.com ಆನಿಂ www.google.com ಸಾಯ್ಟಾಂ ಎಕಾಮೆಕಾ ತಾಳ್ ಪಡ್ತಾತ್ ಮ್ಹಣೊನ್ ತಿಂ ದೊನೀಂಯ್ ಸಾಯ್ಟಾಂ ನಕ್ಕಲ್ ಮ್ಹಣ್ತಾಯ್‌ಗೀ?

ಹಹ!  ನಕ್ಕಲ್ ಮ್ಹಳ್ಯಾರ್ ಕಿತೆಂ? ಎಕ್ಲ್ಯಾನ್ ಕೆಲ್ಲೆಂ ದುಸ್ರ್ಯಾನ್ ಕರ್ಚೆಂ? ತಶೆಂ ಪಳೆಂವ್ಕ್ ಗೆಲ್ಯಾರ್ ಆಮಿಂ ಜಿಯೆಂವ್ಚೆಂ, ಕಾಜಾರ್ ಜಾಂವ್ಚೆಂ, ಭುರ್ಗಿಂ ಕರ್ಚಿಂ ಸಕ್ಕಡ್ ನಕ್ಕಲ್‌ಚ್ ನ್ಹಂಯ್‌ಗೀ? ತರ್ ಎಕ್ಲ್ಯಾನ್ ಘರ್ ಭಾಂದ್ಲೆಂ ಮ್ಹಣ್ ಹೆರಾಂನಿ ರಸ್ತ್ಯಾರ್ ಪಡಾಜಯ್‌ಗೀ? ಎಕ್ಲ್ಯಾನ್ ಗಾಡಿ ಘೆತ್ಲಿ ತರ್ ದುಸ್ರ್ಯಾಂನಿ ಚಲೊನ್ ವಚಾಜಯ್‌ಗೀ?

ಕೊಣೆಂಯ್ ಎಕ್ಲ್ಯಾನ್ ಬರೆಂ ಕಾಮ್ ಕೆಲೆಂ ತರ್ ತಶೆಂಚ್ ಹೆರಾಂನಿಂಯ್ ಕೆಲಾಂ/ಕರ್ತಾತ್ ತರ್ ತಾಂತುಂ ಕೊಣಾಕ್ ಲುಕ್ಸಾಣ್ ಆಸಾ? ಪುಣ್ ಅಪ್ಣಾನ್ ಧವೆಂ ಶರ್ಟ್ ಮೊಲಾಕ್ ಘೆತ್ಲಾಂ ಮ್ಹಣ್ ಹೆರಾಂನಿ ಧವೆಂ ಶರ್ಟ್ ಘೆಂವ್ಕ್ ನಜೊ ಮ್ಹಳ್ಳೆಂ ವಾರ್ಜಿಕ್ ಮ್ಹಜೆಪ್ರಕಾರ್ ಪಿಶೆಂಪಣ್. ತ್ಯಾ ರಿತಿನ್ ಪಳೆಲ್ಯಾರ್ ಏಕ್ ಬರವ್ಪಿಯ್ ನಕ್ಕಲ್ ಕರ್ತಾ, ಏಕ್ ಕಲಾಕಾರ್‌ಯ್ ನಕ್ಕಲ್ ಕರ್ತಾ.

4 . ತುಂ ಹೆರ್ ಸಾಯ್ಟಾಂಲಾಗಿಂ ಸ್ಪರ್ಧ್ಯಾರ್ ಆಸಾಯ್‌ಗೀ?

ಮ್ಹಜೊ ಸ್ಪರ್ಧೊ ವಿಂಗಡ್‌ಚ್; ಮ್ಹಜೊ ಸ್ಪರ್ಧೊ ಅಪುಣ್ ವಡ್ಲೊ ಮ್ಹಣ್ ಧಾಖಂವ್ಚೊ ನ್ಹಯ್, ಮಾಯಾಮೊಗಾಚೊ. ಹೆರಾಂನಿ ಕೆಲ್ಲೆಂ ಕಶೆಂ ಅನಿಕ್‌ಯೀ ಬರೆಂ ಕರ್ಯೆತ್ ಮ್ಹಣ್ ಕರ್ನ್ ಧಾಖಂವ್ಚೊಚ್ ಮ್ಹಜೊ ಸ್ಪರ್ಧೊ. ಹಾಂವ್ ಪಯ್ಲೆಂ ಮ್ಹಜಾಚ್ ಅಂತಸ್ಕರ್ನಾಲಾಗಿಂ ಸವಾಲ್ ಕರುನ್, ಹಾವೆಂ ಸುರು ಕರ್ಚೆಂ ಖಂಚೇಂಯ್ ಕಾಮ್ ಕೊಣಾಕ್‌ಯೀ ಕಸಲೇಂಯ್ ಲುಕ್ಸಾಣ್ ಕರಿನಾಸ್ತಾನಾ ಹೆರಾಂಕ್ ಫಾಯ್ದ್ಯಾಚೆಂ ಜಾತಾ ತರ್ ಮಾತ್ರ್ ತೆಂ ಕಾಮ್ ಸುರು ಕರ್ತಾಂ.

5 . ತುಜೆಂ ಮಿಸಾಂವ್ ಕಸಲೆಂ? ಮ್ಯಾಂಗಲೋರಿಯನ್.ಕೊಮ್‌ಕ್ ಸಮಾಜೆ ಥಾವ್ನ್ ತುಂ ಕಿತೆಂ ಆಶೆತಾಯ್?

ಮಾಫ್ ಕರ್ - ಮ್ಹಜೆಂ ಚಿಂತಾಪ್ ಸಮಾಜೆಥಾವ್ನ್ ಅಶೆಂವ್ಚಾಕೀ ಸಮಾಜೆಕ್ ಹಾಂವ್ ಕಿತೆಂ ದೀಂವ್ಕ್ ಸಕ್ತಾಂ ಮ್ಹಳ್ಳೆಂ ಸಮ್ಜಂವ್ಚೆಂ ಜಾವ್ನಾಸಾ. ಸಾಯ್ಟಾಚಿ ಸುರ್ವಾತ್ ಕೆಲ್ಲೆಥಾವ್ನ್ ಅಜೂನ್ ಪರ್ಯಾಂತ್ ಹಾವೆಂ ಮ್ಹಜೊ ವೇಳ್, ಮಿನತ್, ದುಡು, ನೀದ್ ಆನಿಂ ಥೊಡೆಪಾವ್ಟಿಂ ಮತಿಚೊ ಸುಶೆಗ್; ಹೆಂ ಸರ್ವ್ ಹೊಗ್ಡಾಯ್ಲಾಂಚ್ ಶಿವಾಯ್ ಕೊಣಾಯ್‌ಥಾವ್ನ್ ಕಸಲೊಚ್ ಪ್ರತಿಫಳ್ ಆಶೆಂವ್ಕ್ ನಾ. ದೆಕುನ್ಂಚ್ ದಿಸಾನ್‌ದೀಸ್ ವಾಚ್ಪಿ ಚಡೊನ್ಂಚ್ ಯೆತಾತ್ ಆನಿಂ ಮ್ಹಾಕಾ ವಾಚ್ಪಿಚ್ ಸರ್ವಾಂಚಾಕೀ ಮೊಗಾಚೆ ಜಾವ್ನಾಸಾತ್, ತಾಂಕಾಂ ಹಾಂವ್ ಆಯ್ಕತಾಂ, ಮಾನ್ ದಿತಾಂ ತಶೆಂಚ್ ಮೋಗ್ ಕರ್ತಾಂ.

6 . ತುಕಾ ಕೊಂಕ್ಣಿ ಸಾಹಿತ್ಯಾಚಿಂ ಅಂಕಣಾಂ ಸುರ್ವಾತ್ ಕರುಂಕ್ ಕಶೆಂ ಪ್ರೇರಣ್ ಲಾಭ್ಲೆಂ?

ಹಾಂವ್ ಸಾಹಿತ್ಯ್ ಬರಯ್ನಾಂ ತರ್‌ಯೀ ವಾಚ್ತಾಂ. ಆನಿಂ ಮ್ಹಜೆ ಥೊಡೆ ಸಾಹಿತಿಕ್ ಮಿತ್ರ್ ಮ್ಹಾಕಾ ಕೊಂಕ್ಣಿ ಭಾಸೆಖಾತಿರ್ ಕಿತೆಂಯ್ ತರೀ ಅಪ್ಲ್ಯಾ ತಾಂಕಿಭಿತರ್ಲೆಂ ಕರುಂಕ್ ಸಲ್ಹಾ ದೀವ್ನ್ ಆಸ್‌ಲ್ಲೆ. ಆನಿಂ ಜೆದ್ನಾಂ ಹಾವೆಂ ತಾಂಕಾಂ ತಿ ಜವಾಬ್ಧಾರಿ ಘೆಂವ್ಕ್ ವಿಚಾರ್ತಾನಾ ತಾಣಿಂ ಕಸೆಲಿಂಚ್ ಶರ್ತಾಂ ನಾಸ್ತಾನಾ, ತಿ ಖುಶೇನ್ ಘೆತ್ಲಿ. ಪ್ರತ್ಯೇಕ್ ಜಾವ್ನ್ ವಲ್ಲಿ ಕ್ವಾಡ್ರಸ್ ಅಜೆಕಾರ್ ಹಾಣೆಂ. ದೆಕುನ್ ಮ್ಹಜಾನ್ ತೆಂಯ್ ಮಿಸಾಂವ್ ಮುಖಾರ್ಸುಂಕ್ ಸಾಧ್ಯ್ ಜಾಲೆಂ. ಆಜ್ ಆಮ್ಚಾ ಕೊಂಕ್ಣಿ ಅಂಕಣಾಂಕ್ ಹಜಾರಾಂನಿ ವಾಚ್ಪಿ ಆಸ್ಚಿ ಗಜಾಲ್ ಮ್ಹಾಕಾ ಭೋವ್ ಧಾದೊಸ್ಕಾಯೆಚಿ ಜಾವ್ನಾಸಾ. ಹ್ಯಾ ಧ್ವಾರಿಂ ಮ್ಹಜೊ ಇಲ್ಲೊ ಚಿಲ್ಲರ್ ವಾವ್ರ್ ಮ್ಹಜಾ ಮಾಯ್‌ಭಾಸೆ ಖಾತಿರ್ ಮ್ಹಳ್ಳಿ ತೃಪ್ತಿ ಮ್ಹಾಕಾ ಆಸಾ.

6 . ಮ್ಯಾಂಗಲೋರಿಯನ್.ಕೋಮ್ ಹಾಚೆ ಇಂಗ್ಲಿಶ್ ವಾಚ್ಪಿ ಆನಿಂ ಕೊಂಕ್ಣಿ ವಾಚ್ಪಿ ಕಿತ್ಲೆ ಆಸಾತ್?

ಇಂಗ್ಲಿಶ್ ಅಂಕಣಾಂಕ್ ಆನಿಂ ಕೊಂಕ್ಣಿ ಅಂಕಣಾಂಕ್ ತುಲನ್ ಕರ್ಚೆಂ ತರ್, ಕೊಂಕ್ಣಿ ವಾಚ್ಪಿ ಇಂಗ್ಲಿಶ್ ವಾಚ್ಪ್ಯಾಚಾಕೀ ಕಾಲ್ದೆಚ್. ತರ್‌ಯೀ ಮ್ಯಾಂಗಲೋರಿಯನ್.ಕೊಮ್‌ಚಿಂ ಅಂಕಣಾಂ ಸರಾಗ್ ವಾಸ್ಚೆ ವಾಚ್ಪಿ ಆಸಾತ್ ಆನಿಂ ತವಳ್ ತವಳ್ ತಿಂ ತಾಂಚಿಂ ಭಗ್ಣಾಂ ಆಮ್ಕಾಂ ಧಾಡ್ತಾತ್ ಆನಿಂ ತಾಂಕಾಂ ಆಮ್ಚಿಂ ಬರ್ಪಾಂ ರುಚ್ತಾತ್ ತೆಂ ಆಯ್ಕೊನ್ ಸಂತೊಸ್ ಭೊಗ್ತಾ.

7 . ದಾಯ್ಜ್ ವಿಶಿಂ ತುಜಿಂ ಭಗ್ಣಾಂ ಕಸಲಿಂ?

ದಾಯ್ಜ್ ಖಂಡಿತ್ ಜಾವ್ನ್ ಕೊಂಕ್ಣೆಂತ್ಲೆಂ ಏಕ್ ನವೆಂಚ್ ವೆಬ್‌ಸಾಯ್ಟ್. ಆನಿಂ ದಾಯ್ಜ್ ಪಂಗ್ಡಾನ್ ಎದೊಳ್‌ಚ್ ಸಭಾರ್ ಅಸಂಭವ್ ಕಾಮಾಂ ಕರ್ನ್ ನವಿ ಸುರ್ವಾತ್ ಕೆಲ್ಯಾ. ಆನಿಂ ಹಿಚ್ ಸುರ್ವಾತ್ ಮುಖಾರುನ್ ವರ್ಚಿ ಗರ್ಜ್ ಆಸಾ. ಆನಿಂ ಅಶೆಂಚ್ ಮುಖಾರುನ್ ಗೆಲ್ಯಾರ್ ಮಾತ್ರ್ ಕೊಂಕ್ಣಿ ಭಾಸೆಕ್ ನವೊ ಜೀವ್ ಭರಾತ್ ಆನಿಂ ಕೊಂಕ್ಣಿ ಸಂಸ್ಕೃತಿ ಜಿವಾಳ್ ಉರಾತ್ ಮ್ಹಳ್ಳೊ ಮ್ಹಜೊ ಅಭಿಪ್ರಾಯ್.

8 . ತುಜಾ ಪಸಂದೆಚೆಂ ಸಾಯ್ಟ್ ಖಂಚೆಂ ಆನಿಂ ಕಿತ್ಯಾಕ್?

ಮ್ಹಜಾ ಪಸಂದೆಚೆಂ ಸಾಯ್ಟ್ ಗೂಗ್‌ಲ್.ಕಾಮ್ (www.google.com) ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಸಾಯ್ಟಾಚಾ ತಾಂತ್ರಿಕತೆಥಾವ್ನ್ ಹಾಂವ್ ಜಾಯ್ತೆಂ ಶಿಕ್ಲಾಂ ತಶೆಂಚ್ ಶಿಕೊನ್ ಆಸಾಂ. ಖಂಡಿತ್ ಮ್ಹಜೆಪರಿಂ ಹಜಾರೊಂ ಜಣಾಂಚಿ ಅಭಿಪ್ರಾಯ್ ಅಶಿಚ್ಚ್ ಆಸ್ತೆಲಿ ಮ್ಹಳ್ಳೆಂ ಮ್ಹಜೆಂ ಭಗಾಪ್.

9 . ಏಕ್ ಬರಿ ಸಮಾಜ್ ಬಾಂಧುನ್ ಹಾಡ್ಚಾಕ್ ವೆಬ್‌ಸಾಯ್ಟಾಚಾಂನಿ ಕಸಲೊ ವಾವ್ರ್ ಕರ್‍ಯೆತಾ?

ಎಕಾ ಮನಾನ್, ಎಕ್ವಟಿತ್ ಜಾವ್ನ್ ವಾವ್ರ್ ಕೆಲೊ ತರ್ ಖಂಡಿತ್ ಆಮ್ಚಾನ್ ಜಾಯ್ತಿಂ ಕಾಮಾಂ ಕರುಂಕ್ ಸಾಧ್ಯ್ ಆಸಾ. ಪುಣ್ ಆಮ್ಚೊ ವಾವ್ರ್ ಹೆರಾಂಕ್ ಲ್ಹಾನ್ ಕರುಂಕ್ ಪೆಚಾಡ್ಚೊ ಜಾಯ್ನಾಸ್ತಾಂ ಆಮ್ಚಾ ಸಮಾಜೆಚಾ ಉದರ್ಗತೆಚಾ ಚಿಂತ್ಪಾಚೊ ಜಾವ್ನಾಸಾಜಯ್.

ಹ್ಯಾ ಆಧ್ಲೆ ಕಾರ್ಭಾರಿ: 1, 2

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications