ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಸಂಬಂಧ್
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್, ಆಯ್ಕೊಳ್), ಖಣ್ (ವಲ್ಲಿ ಕ್ವಾಡ್ರಸ್), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಕ್ರಿಸ್ಮಸ್ ಕಾಣಿಕ್, ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ.
ಫಾಂತ್ಯಾಚಾ ಸಾಡೆ ಪಾಂಚಾಂಕ್ ಯೇಂವ್ಕ್ ಆಸ್ಚೆಂ ವಿಮಾನ್ ಆಜ್ ಹರ್ಶೆಂಚಾಕೀ ದೇಡ್ ವೋರ್ ತಡವ್ ಕರ್ನ್ ಅಪ್ಣಾಚಾ ಸಯ್ರಣಾಚಿ ಪರಿಕ್ಶಾ ಕರುನ್ ಅಖ್ರೇಕ್ ತರ್ಯ್ ಚಿಕಾಗೊಚಾ ವಿಮಾನ್ ಸ್ಥಳಾರ್ ದೆಂವ್ಲೆಂ. ಅಸಲೊಚ್ ಅತ್ರೆಗ್ ಭೋವ್ಶಾ ಅಜಿಕ್ ಚಡುಣೆಂ ಪಾಂಚ್ ವರ್ಸಾಂಧಿಂ ಮ್ಹಾಕಾ ಆಸ್ಲ್ಲೊ, ತವಳ್ ಮ್ಹಜಿ ನವಿ ಹೊಕಾಲ್ ಬಾಯ್ಲ್ ಪಯ್ಲೆಪಾವ್ಟಿಂ ಇಂಡಿಯಾಥಾವ್ನ್ ಅಮೆರಿಕಾಕ್ ಆಯಿಲ್ಲಿ.
ಅಮೆರಿಕಾಂತ್ಚ್ ವ್ಹಡ್ ಜಾವ್ನ್, ಅಮೆರಿಕಾಂತ್ಚ್ ಶಿಕೊನ್, ಅಮೆರಿಕಾಂತ್ಚ್ ಕಾಮ್ ಕರ್ನ್ ಆಸ್ಲ್ಲ್ಯಾ ಮ್ಹಾಕಾ ಮ್ಹಜಾ ಸರ್ವ್ ಇಸ್ಟಾಂನಿ ಕಾಜಾರ್ ಜಾಂವ್ಚೆಂ ಚೆಡುಂ ಇಂಡಿಯಾಚೆಂಚ್ ಆಸೊಂಕ್ ಜಾಯ್ ಮ್ಹಳ್ಳಿ ಸಲ್ಹಾ ದಿಲ್ಲಿ. ಇಂಡಿಯಾಂತ್ ಆಸ್ಚಾ ಎಕಾ ಪಯ್ಸಿಲ್ಯಾ ಮಾವ್ಶೆಚಾ ಮೊರ್ನಾಧಿಂ ತಿಚಾ ವಳ್ಕೆಚಾ ಚೆಡ್ವಾಲಾಗಿಂ ಮ್ಹಜಿ ಸಯ್ರಿಕ್ ಕಸಲಿಚ್ ಘಳಾಯ್ ನಾಸ್ತಾನಾ ನಿಘಂಟ್ ಜಾಲ್ಲಿಚ್ಚ್ ಹಾಂವ್ ಚಾಳಿಸ್ ದಿಸಾಂಚಾ ರಜೆರ್ ಗಾಂವಾಕ್ ಗೆಲ್ಲೊಂ. ಕಾಜಾರ್ ಜಾವ್ನ್ ಹನಿಮೂನಾಕ್ ಅಖ್ಖೊ ಇಂಡಿಯಾ ಭಂವೊನ್ ಪಾಟಿಂ ಆಯ್ಲೊಂ. ಮ್ಹಜಾ ಮೌಶೆಕ್ ಜಾಲ್ಲ್ಯಾ ಸಂತೊಸಾಕ್ ಆನಿ ಅಭಿಮಾನಾಕ್ ಸಾಂಗೊನ್ ಫಾಯ್ದೊ ನಾ. ಸಗ್ಳ್ಯಾ ಗಾಂವಾರ್ ಮ್ಹಜಿಚ್ ಚರ್ಚಾ, ಮ್ಹಜಾ ಶಿಕ್ಪಾಚಿ, ಮ್ಹಜಾ ಸುರುಪಾಯೆಚಿ, ಮ್ಹಜಾ ಶೆಗುಣಾಂಚಿ, ಮ್ಹಜಾ ನೆಸ್ಪಾಚಿ, ಮ್ಹಜಾ ಚಾಲಿಚಿ ಚರ್ಚಾ. ಗಾಂವಾಂತ್ ಮೌಶೆಕ್ ಮ್ಹಜೆಥಾವ್ನ್ ಇತ್ಲೊ ಗೌರವ್?
ಕಾಜಾರ್ ಜಾವ್ನ್ ದೋನ್ ಮಯ್ನ್ಯಾಂ ಭಿತರ್ ಮ್ಹಜಾ ಬಾಯ್ಲೆಕ್ ಅಮೆರಿಕಾಕ್ ವರ್ಚಿ ಭಾಸ್ ದೀವ್ನ್ ಹಾಂವ್ ಪಾಟಿಂ ಪರ್ತಾಲ್ಲೊಂ. ಸಗ್ಳೆ ಮ್ಹಜೆ ಈಶ್ಟ್ ಮ್ಹಜೆರ್ ಸಂತೊಸ್ಲೆ. ’ಸಾದೆಂ ಚೆಡುಂ, ಮಾಣ್ಸುಗೆಚೆಂ ಚೆಡುಂ ತುಕಾ ಲಾಭ್ಲ್ಲೆಂ ತುಜೆಂ ನಶಿಬ್’ ಅಶೆಂ ಉಲವ್ನ್ ಮ್ಹಾಕಾ ಪುಸ್ಲಾಯ್ತಾಲೆ. ಹಾಂವ್ಯ್ ಫುಲ್ಲ್ಲೊಂ ಜಶೆಂ ವಾರ್ಯಾರ್ ಫುಗ್ಗೊ ಫುಲ್ತಾ ತಶೆಂ.
ದೊನ್ ಮಯ್ನೆ ಮ್ಹಳ್ಳೆಕಡೆ ಸಾಡೆ ತೀನ್ ಮಯ್ನೆ ಜಾಲೆ ಆನಿ ಕಶೆಂಯ್ ಮ್ಹಾಕಾ ಮ್ಹಜಾ ಬಾಯ್ಲೆಕ್ ಅಮೆರಿಕಾಕ್ ಹಾಡಂವ್ಕ್ ಜಾಲೆಂ. ಮ್ಹಜಾ ಮೌಶೆಕ್ ಗಾಂವಾಂತ್ ತಕ್ಲಿ ಉಕಲ್ನ್ ಜಿಯೆಂವ್ಕ್ಯೀ.
************
ಆಜ್ ’ಮ್ಹಜಾ ಬಾಯ್ಲೆಚಿ ಆವಯ್ ಯೇಂವ್ಕ್’ ಮ್ಹಳ್ಯಾರ್ ಸಾರ್ಕೆಂ ಜಾಯ್ತ್ ಕೊಣ್ಣಾ, ಕಿತ್ಯಾಕ್ ಮ್ಹಳ್ಯಾರ್ ಆತಾಂ ತಿಕಾ ’ಮಾಂಯ್’ ಮ್ಹಣ್ ಆಪಯಿಲ್ಲೊ ಫಕತ್ತ್ ಸಬ್ಧ್ ಅಪ್ಲೆಂ ಅಸ್ತಿತ್ವ್ ಹೊಗ್ಡಾಂವ್ಚಾರ್ ಆಸ್ಲ್ಲೊ. ಎಕಾಚ್ ಮಯ್ನ್ಯಾಚೆಂ ಶರ್ತ್ ಹಾವೆಂ ಪಾಳುಂಕ್ ಆಸ್ಲ್ಲೆಂ, ಹೆರ್ ಕಸಲೊಚ್ ನಿರ್ವೋಗ್ ನಾಸ್ತಾಂ ಹಾಂವೆಂ ಒಪ್ವಾಜಯ್ ಪಡ್ಲ್ಲೆಂ ದೆಖುನ್ ಸಕಾಳಿಂಚಾ ಹಿಂವೆಕ್ ಸೊಸುನ್ ಹಾಂವ್ ಘಂಟೆಭರ್ ರಾಕೊನ್ ಆಸ್ಲ್ಲೊಂ. ಎನ್ಕ್ವಾಯ್ರಿ ಕೌಂಟರಾಂತ್ ಹ್ಯಾವಿಶಿಂ ನಖ್ಖೊ ವಿವರ್ ಲಾಭೊಂಕ್ ನಾತ್ಲ್ಲೊ ತರ್ಯ್ ಘಳಾಯ್ ಜರೂರ್ ಆಸಾ ಮ್ಹಣ್ ಸಾಂಗ್ಲ್ಲೆಂ ತರ್ಯೀ ಹಾಂವ್ ಮಾತ್ರ್ ವೆಗಿಂಚ್ ಪಾವ್ಲ್ಲೊಂ.
ದೇಡ್ ವೊರಾಂ ತಡವ್ ಕರ್ನ್ ಕಶೆಂಯ್ ಪಾವ್ಲ್ಲೆಂ ವಿಮಾನಾನ್ ಮ್ಹಜಾ ಮತಿಕ್ ಪಾಂಚ್-ಸ ವರ್ಸಾಂ ಪಾಟಿಂ ಧಾಂವ್ಡಾವ್ನ್ ಜಾಲ್ಲೆಂ.
ನವೆಂ ಕಾಜಾರ್ ಜಾಲ್ಲಿ ನವಿ ವ್ಹಕಾಲ್ ಯೆಂವ್ಚಾರ್ ಆಸಾ ಮ್ಹಣ್ ಹಾವೆಂಯ್ ನವೆಂ ಘರ್ ಘೆತ್ಲ್ಲೆಂ, ಘರ್ಚೊ ಅರ್ಧೊ ಖರ್ಚ್ ಹಾವೆಂ ಜೊಡ್ಲ್ಲೊ ತರ್ ಅರ್ಧೊ ಮ್ಹಜಾ ಕಂಪೆನಿನ್ ವಾಡಿಶಿವಾಯ್ ರಿಣಾರುಪಾರ್ ದಿಲ್ಲೊ. ಹಳ್ತಾಚೆಂ ಘರ್ ದೋನ್ ಬೆಡ್ರುಮಾಚೆಂ ಘರ್, ಸೊಭಿತ್ ವಿಶಾಲ್ ಹೋಲ್, ಸಗ್ಳೆಂ ಮ್ಹಜಾ ಬಾಯ್ಲೆಕ್ ಪಸಂದ್ ಜಾಲ್ಲೆಂ. ತಿಕಾ ಘರಾ ಸ್ವಾಗತ್ ಕರ್ಚಿ ಮಾಂಡವಳ್ಯ್ ಮ್ಹಜಾ ಇಸ್ಟಾಂನಿಂಚ್ ಕೆಲ್ಲಿ, ತಿ ಇಂಡಿಯಾ ಥಾವ್ನ್ ಥಕೊನ್ ಆಯಿಲ್ಲಿ, ತಿಚಿ ಪೇಟ್ ಕಾರಾರ್ಚ್ ಆಸ್ಲ್ಲಿ, ಹಾಂವ್ ಮ್ಹಜಾ ಬಾವ್ಳ್ಯಾಂನಿ ತಿಕಾ ಕಾರಾಥಾವ್ನ್ ಉಕಲ್ನ್ ಘರಾಭಿತರ್ ಹಾಡ್ತಾನಾ ಎದೊಳ್ಚ್ ಭಿತರ್ ರಾಕೊನ್ ಆಸ್ಲ್ಲ್ಯಾ ಇಸ್ಟಾಂನಿ ಫುಲಾಂಚೊ ಶಿಂವೊರ್ ಆಮ್ಚೆರ್ ವೊತುಂಕ್ ಧರ್ತಾನಾ ಮ್ಹಜಿ ಬಾಯ್ಲ್ ಲಜೆನ್ ಮುದೊ ಜಾಲ್ಲಿ. ಮ್ಹಜಾ ಭಳಿಶ್ಟ್ ಬಾವ್ಳ್ಯಾಂತ್ ತೆಂ ಎಕಾ ಲ್ಹಾನ್ ಬುರ್ಗ್ಯಾಪರಿಂ ಮ್ಹಾಕಾ ಭೊಗ್ತಾಲೆಂ.
ಮ್ಹಾಕಾ ಅಜೂನ್ ಉಡಾಸ್ ಆಸ್ಲ್ಲೊ. ಪುಣ್ ಆತಾಂ ತೊ ಫಕತ್ತ್ ಉಡಾಸ್ ಮಾತ್ರ್...
ಉಪ್ರಾಂತ್ಲ್ಯಾ ದಿಸಾಂನಿ ಮ್ಹಜಾ ಬಾಯ್ಲೆಚಾ ಹಾತಾಚೆಂ ರಾಂದಾಪ್ ಖಾವ್ನ್, ಜೇವ್ನ್ ಬೊಟಾಂ ಚಿಂವೊನ್ ಮ್ಹಜಾ ಇಸ್ಟಾಂನಿ ಕಿತ್ಲಿ ತಾರಿಫ್ ಕೆಲ್ಲಿನಾ?
ನವೆಂ ಘರ್ ಆಸ್ಲ್ಲೆಂ ಘರಾಣೆಂ ಕರುಂಕ್ ಮ್ಹಜಾ ಬಾಯ್ಲೆನ್ಯ್ ಸುರ್ವೆರ್ ಕೆಲ್ಲಿ ಮಿನತ್ ಕಿತ್ಲಿ? ಕಿತ್ಲಿ ನಿತಳಾಯ್? ವೆವಸ್ತಿತ್ ರಿತಿನ್ ವಸ್ತುಂಚಿ ಮಾಂಡವಳ್? ಜೆವ್ಣಾಚೆಂ ಮೇಜ್, ಕದೆಲಾಂ, ಕುಜ್ನಾಂತ್ ಆಯ್ದಾನಾಂ, ಸರ್ವ್ ವೆವಸ್ತಿತ್ ರಿತಿನ್ ಸಜಯಿಲ್ಲಿಂ. ಘರ್ ಕಾಮಾಕ್ ಕೊಣಾಯ್ಕೀ ಆಪವ್ಯಾಂ ಮ್ಹಣ್ ಹಾವೆಂ ಮ್ಹಳ್ಳೆಂ ತರ್ಯ್ ತಿ ಜವಾಬ್ಧಾರಿ ಮ್ಹಜಾ ಬಾಯ್ಲೆನ್ಂಚ್ ಘೆತ್ಲ್ಲಿ.
ಜಿಣ್ಯೆರೊದಾಂ ಅಶಿಂಚ್ ಘುಂವ್ತಾಲಿಂ, ದೀಸ್, ಹಾಫ್ತೆ, ಮಯ್ನೆ, ವರ್ಸಾಂ - ಕೊಣಾಕ್ಚ್ ಕಿತೆಂಚ್ ಫಿಕಿರ್ ನಾಸ್ತಾಂ.
ಹಾಂವ್ ಮ್ಹಜಾ ಕಾಮಾಂತ್ ಎಕಾ ಪಾಟ್ಲ್ಯಾನ್ ಎಕಾ ಪ್ರೊಮೋಶನಾಚಾ ಪಾಟಿಕ್ ಪಡ್ಲ್ಲೊಂ, ತ್ಯಾ ಖಾತಿರ್ ಮಿಟಿಂಗಾಂ, ಕೋನ್ಫರೆನ್ಸಾಂ, ಪ್ರೆಸೆಂಟೇಶನ್ಸ್, ಬಿಜ್ನೆಸ್ ಮಿಟಿಂಗಾಂ ಮ್ಹಣ್ತಾನಾ ಮ್ಹಜೊ ದಿಸಾಚೊ ಚಡ್ತಾವ್ ವೇಳ್ ಕಸೊ ವೆತಾಲೊ ಮ್ಹಳ್ಳೆಂಚ್ ಕಳಾನಾತ್ಲ್ಲೆಂ.
ಹಾಚೆಮಧೆಂ ಹಾವೆಂ ಜಿಮ್ಮಾಕ್ ವೆಚೆಂ ರಾವಯ್ಲೆಂ, ದಿಸಾಳಿಂ ವಾಸ್ಚಿಂ ರಾವಯ್ಲಿಂ - ಸಕಾಳಿಂ ಉಟೊನ್ ನಾಣ್ಯೆಂತ್ ನಾತಾನಾ ಧುತಾನಾ ಜಿತ್ಲೆಂ ಚಿಂತುಂಕ್ ಜಾತಾ ತಿತ್ಲೆಂ ಚಿಂತಾಲೊಂ ಸೊಡ್ಲ್ಯಾರ್ ಚಿಂತುಂಕ್ಯ್ ವೇಳ್ ಮೆಳಾನಾತ್ಲ್ಲೊ.
ಥೊಡಿಂಚ್ ವರ್ಸಾಂ ಪಾಶಾರ್ ಜಾತಾನಾ ಪರತ್ ಮ್ಹಜಾ ತರ್ನಾಟ್ಪಣಾಚ್ಯೊ ಯಾದಿ ಎಕೆಕ್ಚ್ ಜಿವಾಳ್ಳ್ಯೊ, ತೆ ಪಾಶಾರ್ ಕೆಲ್ಲೆ ಯಾದ್ಗಾರ್ ಉಡಾಸ್ ಪರತ್ ಜಿವಾಳ್ಳೆ. ತ್ಯೊ ಪಾರ್ಟ್ಯೊ, ತಿಂ ಪಿಕ್ನಿಕಾಂ, ತಿಂ ಡೇಟಿಂಗ್ ಸಗ್ಳೆಂ ಉಡಾಸ್.. ಕಿತ್ಲಿಂ ಸೊಭಿತ್ ಸೊಭಿತ್ ಚೆಡ್ವಾಂ ಮ್ಹಾಕಾ ವೆವೆಗ್ಳ್ಯಾರ್ ರುಪಾಂನಿ ಮೆಳ್ಲ್ಲಿಂ? ಕಿತ್ಲೆಂ ಸುಖ್ ಹಾವೆಂ ಭೊಗ್ಲ್ಲೆಂ? ಸರ್ವ್ ಮ್ಹಜಾ ಮತಿಚಾ ಪಿಂತುರಾಂತ್ ಅಜೂನ್ ಖಂಚ್ಲ್ಲೆಂ.
ಪುಣ್ ಆತಾಂ ಅಪ್ಣಾನ್ ತಶೆಂ ಚಿಂತಿನಾಯೆ ಮ್ಹಣ್ ಕಾಳಿಜ್ ಸಾಂಗ್ತಾಲೆಂ ಪುಣ್ ಮತ್ ಆಯ್ಕಾನಾತ್ಲ್ಲಿ. ಆನಿ ಅಸ್ಕತ್ ಮ್ಹಜೆಥಾವ್ನ್ಯ್ ಚೂಕ್ ಘಡ್ಲ್ಲಿ. ಪುಣ್ ತಿ ಚೂಕ್ ಮ್ಹಣ್ ಮ್ಹಜೆಂ ಪ್ರೇಮಿಕಾ ಬಿಲ್ಕುಲ್ ವೊಪುನ್ ಘೆಂವ್ಕ್ ತಯಾರ್ ನಾತ್ಲ್ಲೆಂ. ತಾಚಿಂ ಉತ್ರಾಂಯ್ ಅಜೂನ್ ಮ್ಹಜಾ ಉಡಾಸಾಂತ್ ಆಸ್ಲ್ಲಿಂ; "ತುಜೆಂ ಅಮಾಲಿ ದೊಳೆ ತುಜಾ ವೆಕ್ತಿತ್ವಾಚೆಂ ವ್ಹಜಾನ್ ಚಡಯ್ತಾತ್, ತುಜೆ ಭಳಿಶ್ಟ್ ಬಾವ್ಳೆ ಖಂಚಾಯ್ ಚಡ್ವಾಕ್ ಅಪ್ಲಿ ತಕ್ಲಿ ದವ್ರುಂಕ್ ನಾಡ್ತಾತ್, ತುಜೆ ಜಿಣ್ಯೆಚೆಂ ಜಯ್ತ್ ಖಂಚಾಯ್ ಚೆಡ್ವಾಕ್ ತುಜೆರ್ ಭುಲೊಂಕ್ ಕಾರಾಣ್ ಜಾತಾತ್"
ಅಸಲೆಂಚ್ ಉತಾರ್ ಮ್ಹಜಾ ಬಾಯ್ಲೆನ್ ಅಜೂನ್ ಪಾಸೊನ್ ಸಾಂಗೊಂಕ್ ನಾತ್ಲ್ಲೆಂ.
ಪುಣ್ ಮ್ಹಜೆಂ ಪ್ರೇಮಿಕಾ ಮ್ಹಜಾ ಬಾಯ್ಲೆಚೆರ್ ಬಿಲ್ಕುಲ್ ತಾಪ್ತಾಲೆಂ "ತುಜಿ ಬಾಯ್ಲ್ ಖಂಚ್ಯಾ ನದ್ರೆನ್ ತುಕಾ ಸೊಭ್ತಾ ತೆಂ ಮ್ಹಾಕಾಚ್ ಸಮ್ಜಾನಾ, ಸಾವ್ಳೊ ರಂಗ್? ಗುಂಗುರ್ ಕೇಸ್? ಮಟ್ವೊ ಜೀವ್? ಉಲಂವ್ಚಿ ಏಕ್ ರೀತ್ ನಾ, ನೆಸ್ಪಾಕ್ ಏಕ್ ಮೀತ್ ನಾ, ಕೊಣ್ಯ್ ಆಯ್ಲ್ಯಾರ್ ಕಶೆಂ ಮೋಡರ್ನ್ ರಿತಿರ್ ವೆವ್ಹಾರ್ ಕರ್ಚೆಂ ತೆಂ ತಾಕಾ ಕಳಿತ್ ನಾ - ಬಿಲ್ಕುಲ್ ಹಳ್ಳೆಚೆಂ ಬೊಂಬೆಂ". ಕಿತ್ಯಾಕ್ಗೀ ಮ್ಹಜಿ ಮತ್ಯ್ ಹೆಂ ಚಿಂತುಂಕ್ ಒಪ್ವಾಲಿ ಆನಿ ಹಾಂವ್ಯ್ ಹೆಂ ಸತ್ ಮಾಂದುನ್ ಜಿಯೆಂವ್ಕ್ ಲಾಗ್ಲೊಂ.
ತಶೆಂ ಮ್ಹಣ್ ಹಾಂವ್ ಹ್ಯಾ ’ಕಮಿಟ್ಮೆಂಟ್’ ಮ್ಹಳ್ಳ್ಯಾ ಸಬ್ಧಾಚೆರ್ ಬಿಲ್ಕುಲ್ ಪಾತ್ಯೆನಾತ್ಲ್ಲೊಂ. ಬಿಜ್ನೆಸ್ ಮ್ಯಾನೆಜ್ಮೆಂಟಾಂತ್ ಎಮ್.ಬಿ.ಯೆ ಕೆಲ್ಯಾ ಮ್ಹಜಾ ಮತಿಚೆಂ ಚಿಂತಾಪ್ ಸಾದೆಂ - ಜಿತ್ತುನ್ ಪರ್ಯಾಂತ್ ತುಂ ಧಾಂವೊಂಕ್ ಸಕ್ತಾಯ್ ತಿತ್ತುನ್ ಪರ್ಯಾಂತ್ ಧಾಂವ್ಣೆಕ್ ರಾವ್. ಹಾಂಗಾ ಕೊಣಾಕ್ಚ್ ಕೊಣ್ಂಚ್ ನಾ. ಕೊಣಾಯ್ಕ್ಯ್ ಹಿಂ ಸಿಂತಿಮೆಂತಾಂ ಪಡೊನ್ ಗೆಲ್ಲಿಂ ನಾಂತ್. ಆಜ್ ಹಾಂವ್ ಜಿಕ್ಚೊ ಘೊಡೊ ಕಿತ್ಯಾಕ್ ಮ್ಹಜಾ ಮತಿಕ್ ಚಿಂತುಂಕ್ ಜಾತಾ, ಮ್ಹಜಾ ಮತಿಕ್ ಜಯ್ತ್ ಆನಿ ಸಲ್ವಣೆಕ್ ಕಶೆಂ ಗಳ್ಸುಂಕ್ ಮ್ಹಳ್ಳೆಂ ಕಳಿತ್ ಆಸಾ ದೆಖುನ್ ಹಾಂವ್ ಆಜ್ ಜಯ್ತಾಚಾ ಘೊಡ್ಯಾಚೆರ್ ಬೊಸೊಂಕ್ ಸಕ್ತಾಂ.
ದೀಸ್ ಗೆಲ್ಲೆಪರಿಂ ಹ್ಯಾ ಸಂಬಂಧಾಚಾ ಬಂಧನಾಂತ್ಲಿ ಮ್ಹಾಕಾ ಸುಟ್ಕಾ ಜಾಯ್ ಆಸ್ಲ್ಲಿ. ಹೊ ’ಸಂಬಂಧ್’ ಮ್ಹಾಕಾ ಕಿತ್ಯಾಕ್ಗಿ ಪವಿತ್ರ್ ಮ್ಹಣ್ ದಿಸ್ಚಾ ಬದ್ಲಾಕ್ ಎಕಾ ರಿತಿಚೊ ಕಾಂಠಾಳೊ ಹಾಡಂವ್ಕ್ ಲಾಗ್ಲೊ. ಚಿಂತುಂಕ್ ನಾಕಾಸ್ಲ್ಲೆಂ ತರ್ಯ್ ’ಡೈವೋರ್ಸ್’ ವಿಶ್ಯಾಂತ್ ಚಿಂತುಂಕ್ ಮ್ಹಜಾ ಪ್ರೇಮಿಚಾ ಸಾಂಗಾತಾನ್ ಮಜ್ಬೂರ್ ಕೆಲ್ಲೆಂ.
ಪುಣ್ ಕಶೆಂ ಸಾಂಗೊಂ? "ಅಪ್ಲಿ ಎಕ್ಲಿಚ್ ಧುವ್ ಪುತಾ ಮ್ಹಾಕಾ ಮುಖಾರ್ ಪಾಟಿಂ ಕೊಣ್ಂಚ್ ನಾ, ದೆಕುನ್ ತುಂಚ್ ತಾಚೊ ಸರ್ವಸ್ವ್" ಮ್ಹಣ್ ಮ್ಹಜಾ ಮೌಶೆನ್ ಉಚಾರ್ಲ್ಲಿಂ ಉತ್ರಾಂ ಎಕಾ ವಾಟೆರ್ ತರ್, ಮ್ಹಜಿ ಇತ್ಲಿ ಬರಿ ಜತನ್ ಘೆತ್ಲ್ಲ್ಯಾ ಮ್ಹಜಿ ಬಾಯ್ಲ್ ದುಸ್ರ್ಯಾ ವಾಟೆನ್ ಮ್ಹಜಾ ತೊಂಡಾಂತ್ಲ್ಯಾ ಉತ್ರಾಂಕ್ ಕಾಟ್ ಘಾಲುಂಕ್ ಸಕ್ಲ್ಲಿಂ.
ಪುಣ್ ಕಿತ್ಲೊ ತೇಂಪ್?
ಎಕಾ ದಿಸಾ ಮ್ಹಜಾ ಬಾಯ್ಲೆಕ್ ಡೈವೋರ್ಸ್ ದಿಂವ್ಚಾಕ್ ಡೈವೋರ್ಸ್ ಪೆಪರ್ ಡ್ರಾಫ್ಟ್ ಕರುಂಕ್ ಬಸ್ಲೊಂ. ಆನಿ ತಾಂತುಂ ಮ್ಹಜೆಂ ನವೆಂ ಘರ್, ತಾಂತ್ಲ್ಯೊ ಸರ್ವ್ ವಸ್ತು, ಮ್ಹಜಾ ಬೆಂಕಾಂತ್ ಆಸ್ಚಾ ದುಡ್ವಾಂತ್ಲೊ ಚಾಳಿಸ್ ಠಕ್ಕೊ (೪೦%) ದುಡು, ಸಗ್ಳೊ ತಾಚಾ ನಾಂವಾರ್ ಬರಯ್ಲೆಂ, ತಶೆಂಚ್ ಎದೊಳ್ಚ್ ಮೊಲಾಕ್ ಘೆತ್ಲ್ಲೆಂ ಇತ್ಲೆಂ ಭಾಂಗಾರ್, ತಶೆಂಚ್ ಮ್ಹಜಾ ಇಸ್ಟಾಂನಿ ದಿಲ್ಲ್ಯೊ ಮೊಲಾಧಿಕ್ ಕಾಣಿಕ್ಯೊ ಸಗ್ಳೆಂ ತಾಕಾ ಮ್ಹಣ್ ಬರವ್ನ್ ಎಕಾ ಸಕಾಳಿಂ ನಾಸ್ಟೊ ಕೆಲ್ಲ್ಯಾ ಮೆಜಾರ್ ದವ್ರುನ್ ಹಾಂವ್ ಕಾಮಾಕ್ ಗೆಲ್ಲೊಂ.
ಸಾಂಜೆರ್ ಪಾಟಿಂ ಯೆತಾನಾ ಮ್ಹಜಾ ಬಾಯ್ಲೆಚಿ ಕಸಲಿಚ್ ಪ್ರತಿಕ್ರಿಯಾ ನಾತ್ಲ್ಲಿ ಪಳೆವ್ನ್ ಹಾಂವ್ ಅಜ್ಯಾಪ್ಲೊಂ. ಹಾಂವ್ ವಚೊನ್ ನ್ಹಾಂವ್ನ್ ಯೆತಾನಾ ತಿಣೆಂ ಹುನ್ ಹುನ್ ಕಾಫಿ ಮೆಜಾರ್ ಮಾಂಡುನ್ ದವರ್ಲಿ ಆನಿ ಹಾಂವ್ ತಿ ಪಿಯೆಂವ್ಕ್ ಧರ್ತಾನಾ ಸಕಾಳಿಂ ಹಾಂವ್ ಸೊಡ್ನ್ ಗೆಲ್ಲೆಂ ಡ್ರಾಫ್ಟ್ ಎನ್ವಲಪ್ ಮ್ಹಾಕಾ ದೀವ್ನ್ ಮ್ಹಣಾಲೆಂ "ತುಂ ಸಕಾಳಿಂ ಹೆಂ ವಿಸ್ರೊನ್ ಗೆಲ್ಲೊಯ್". ಮ್ಹಜಾ ತೊಂಡಾಂತ್ ಉತ್ರಾಂ ಸುಟ್ಲಿಂ ನಾಂತ್ ದೆಖುನ್ ನಿರ್ವೋಗ್ ನಾಸ್ತಾಂ ತೆಂ ಎನ್ವಲಪ್ ಘೆತ್ಲೆಂ.
ಕಾಫಿ ಪಿಯೆವ್ನ್ ಯೇವ್ನ್ ಸೊಫಾಚೆರ್ ಬಸೊನ್ ಟಿವಿ ಪಳೆವ್ನ್ ಆಸ್ಲ್ಲೊಂ ತರ್ಯ್ ಮ್ಹಜಿ ಮತ್ ಖಂಯ್ಗೀ ಆಸ್ಲ್ಲಿ. ಮತ್ಭರ್ ಹಿಂಚ್ ಚಿಂತ್ನಾಂ ಭರೊನ್ ಆಸ್ತಾನಾ "ತುಜಿ ಭಲಾಯ್ಕಿ ಬರಿ ಆಸಾಮೂ? ಕಿತೆಂ ಪುರಾಸಣ್ ಭೊಗ್ತಾಗೀ?" ಮ್ಹಣೊನ್ ಮ್ಹಜಿ ಬಾಯ್ಲ್ ಯೆವ್ನ್ ಮ್ಹಜಿ ತಕ್ಲಿ ಪೊಶೆಂವ್ಕ್ ಲಾಗ್ತಾನಾ ಹಾವೆಂ ಎಕಾಚ್ಚ್ ಧಮ್ಮಾರ್ ಸರ್ವ್ ಧರ್ಯ್ನ್ ಎಕ್ಟಾಂವ್ನ್ ಸಾಂಗೊನ್ ಸೊಡ್ಲೆಂ "ಮ್ಹಾಕಾ ಡೈವೋರ್ಸ್ ಜಾಯ್.. ಧರ್ ಹೆಂ ವಾಚ್..." ಮ್ಹಣೊನ್ ಹಾವೆಂ ತೆಂ ಎನ್ವಲೊಪ್ ತಾಚಾ ಹಾತಾಂತ್ ದಿಲೆಂ.
ತೆಂ ಸೊಡವ್ನ್ ವಾಚುನ್ ಥಂಯ್ಂಚ್ ಗಳ್ಳೆಂ...
ಮ್ಹಾಕಾ ತಾಚೆರ್ ಶೀದಾ ದೀಶ್ಟ್ ಘಾಲುಂಕ್ ನಾಕಾಸ್ಲ್ಲಿ ದೆಖುನ್ ಮ್ಹಜೆಂ ತೋಂಡ್ ಬಗ್ಲೆಕ್ ಘುಂವ್ಡಾವ್ನ್ ಬಸ್ಲ್ಲೊಂ ತರ್ಯೀ ಮ್ಹಜೆಂ ಗಮಾನ್ ತಾಚೆರ್ಚ್ ಆಸ್ಲ್ಲೆಂ. ಇಲ್ಲ್ಯಾ ವೆಳಾನ್ ತೆಂ ಮ್ಹಜಾ ಮುಖಾರ್ ಉಭೆಂ ಜಾಲೆಂ ಆನಿ ಮ್ಹಜೆಂ ಡೈವೋರ್ಸ್ ಪೆಪರಾಚೆಂ ಡ್ರಾಫ್ಟ್ ದೊನ್ಯೀಂ ಹಾತಾಂನಿ ಪಿಂಜುನ್ ಘಾಲೆಂ.
ಹಾಂವ್ ಶಿಂಪಿ ಗಿಳಿಲಾಗ್ಲೊಂ, ಮ್ಹಜೆಂ ಸಗ್ಳೆಂ ಲೇಕ್ ಚುಕ್ಲ್ಲೆಂ. ಉಪ್ರಾಂತ್ಲಿ ಎಕೆಕ್ ಘಡಿ ಎಕೆಕ್ ವೋರ್ ಜಾಲೆಂ. ಆಮ್ಚೆಮಧ್ಲೆಂ ಉಲವ್ಣೆಂ ಸುಕ್ಲೆಂ, ತೆಂಯ್ ಜೆವ್ಲೆಂನಾ, ಹಾಂವ್ಯ್ ಜೆವ್ಲೊಂನಾ. ರಾತಿಂ ಮ್ಹಜಾ ಬಗ್ಲೆನ್ ತೆಂ ಯೇವ್ನ್ ನಿದ್ತೆಲೆಂ ಮ್ಹಣ್ ಚಿಂತ್ಲ್ಲೆಂ ನಾ ಪುಣ್ ತೆಂ ಆಯ್ಲೆಂ ಆನಿ ರಾತ್ಭರ್ ಹುಸ್ಕಾರ್ನ್ ಹುಸ್ಕಾರ್ನ್ ರಡ್ಚೆಂ ಮ್ಹಜಾ ನಿದೆಂತ್ಯೀ ಆಯ್ಕಾತಾಲೆಂ.
ಸಕಾಳ್ ಜಾತಾನಾ ಹಾಂವ್ ಹರ್ಶೆಂಚೆಪರಿಂ ಉಟೊನ್ ನ್ಹಾವ್ನ್ ಆಜ್ ನಾಸ್ಟೊ ಕರಿನಾಸ್ತಾನಾ ವೆಚೆಂ ಮ್ಹಣ್ ಲೇಕ್ ಘಾಲ್ತಾನಾ ತೆಂ ಚಾಯೆಚೆಂ ಕೋಪ್ ಹಾಡ್ನ್ ಮ್ಹಣಾಲೆಂ.
"ತುಂ ಮ್ಹಾಕಾ ಡೈವೋರ್ಸ್ ದೀಂವ್ಕ್ ಆಶೆತಾಯ್ ತರ್ ಕಾಂಯ್ ಅಡ್ಡಿನಾ, ಕಿತ್ಯಾಕ್ ತುಜಿ ಆಸ್ತ್ ಸರ್ವ್ ಮ್ಹಜಾ ನಾಂವಾರ್ ಬರಯ್ಲ್ಯಾ? ಮ್ಹಾಕಾ ಕಿತೆಂಚ್ ನಾಕಾ, ಮ್ಹಜೆಂ ಏಕ್ ಶರ್ತ್ ಪಾಳ್ಳ್ಯಾರ್ ಜಾಲೆಂ"
"ಕಸಲೆಂ?" ಹಾವೆಂ ಮಾತ್ಶ್ಯಾ ಅಜ್ಯಾಪಾನ್ ಸವಾಲ್ ಕೆಲೆಂ.
"ತುಂ ಜಾಣಾಂಯ್ ಮ್ಹಜಿ ಆವಯ್ ಕಾಳ್ಜಾಪಿಡೆಚಿ. ತಿ ಚಡ್ ತೇಂಪ್ ವಾಂಚಾನಾ. ದೆಖುನ್ ಎಕಾ ಮಯ್ನ್ಯಾಖಾತಿರ್ ಮ್ಹಜಾ ಆವಯ್ಕ್ ಹಾಂಗಾ ಹಾಡಯ್, ಆನಿ ಏಕ್ ಮಯ್ನೊ ಮ್ಹಜೆಲಾಗಿಂ ಮೊಗಾನ್ ರಾವ್, ಉಪ್ರಾಂತ್ ಆಮಿಂ ದೊಗಾಂಯ್ ಹಾಂಗಾಥಾವ್ನ್ ವೆತಾಂವ್, ತುಜಾ ಜಿಣ್ಯೆಥಾವ್ನ್ ಭೋವ್ ಪಯ್ಸ್."
ಮ್ಹಾಜಾ ಕಾಳ್ಜಾಕ್ ಆಯ್ಕೊಂಕ್ ಜಾಲೆಂನಾ. ಹಾಂವ್ ಜಿಣ್ಯೆಂತ್ ಸಿಂತಿಮೆಂತಾಳ್ ಜಾಲ್ಲೊಂ ನ್ಹಯ್ ತರ್ಯ್ ಹಿಂ ಉತ್ರಾಂ ಮ್ಹಾಕಾ ಆಯ್ಕೊಂಕ್ ಜಾಲಿಂ ನಾಂತ್. ಕಸಲೆಂ ವಿಪರ್ಯಾಸ್? ಪಾಟ್ಲ್ಯಾ ಇತ್ಲ್ಯಾ ವರ್ಸಾಂನಿ ಎಕಾಮೆಕಾಚಾ ಸಾಂಗಾತಾಂತ್ ಜಿಯೆವ್ನ್ ಆಸ್ಚಿಂ ಆಮಿಂ ಆಜ್ ಎಕಾಮೆಕಾ ಪರ್ಕಿಂ?
"ಕಸಲೆಂ ಪಿಶೆಂ ಶರ್ತ್?, ಹಿ ತುಜಾ ಬಾಯ್ಲೆಚಿ ನವಿ ಚಾಲ್..." ಮ್ಹಜೆಂ ಪ್ರೇಮಿ ತಕ್ಶಣ್ ಅಪ್ಲೆಂ ಫಯ್ಸಲ್ ದೀಲಾಗ್ಲೆಂ.
"ಬಟ್ ಯು ಕ್ಯಾನ್ ಡು ಇಟ್ ಡಾರ್ಲಿಂಗ್, ಗಿವ್ ಹರ್ ಅ ಮಂತ್" - ಭೋವ್ಶಾ ಎಕಾ ಮಯ್ನ್ಯಾಚೊ ವೇಳ್ ದಿಲ್ಯಾರ್ ಹೊಗ್ಡಾಂವ್ಕ್ ಆಸ್ಚಿ ಆಸ್ತ್ ತರ್ಯ್ ಉರ್ತೆಲಿ ಮ್ಹಳ್ಳ್ಯಾ ಭರ್ವಶ್ಯಾನ್ ಆಸ್ತೆಲೆಂ, ಪ್ರೇಮಿಕಾನ್ ಸಾಂಗ್ಲ್ಲಿಂ ಉತ್ರಾಂ ಸತ್ ದಿಸ್ಲಿಂ.
*****************************
ಸಕಾಳಿಂಚಿ ಧುಂವ್ರಿ ಚಡ್ಲ್ಲ್ಯಾನ್ ಏರ್ಪೊರ್ಟಾಥಾವ್ನ್ ಘರ್ಚಾ ವಾಟೆರ್ ಯೆತಾನಾ ಹರ್ಶೆಂಚಾಂಕೀ ಹಳೂ ಕಾರ್ ಚಲಂವ್ಕ್ ಲಾಗ್ಲೊಂ. ಮ್ಹಜಾ ಬಾಯ್ಲೆಚಿ ಆವಯ್ ತಿಶಿನ್ ಹಿಶಿನ್ ಪಳೆಂವ್ಚಾರ್ ಪಡ್ಲ್ಲಿ. ಪುರಾಸಣೆನ್ಗಿ ವಾ ಧುವೆನ್ ಎದೊಳ್ಚ್ ಸಾಂಗೊನ್ಗೀ ತಿ ಚಡ್ ಉಲಯ್ನಾಸ್ತಾನಾ ವೊಗೆಚ್ಚ್ ಬೊಸ್ಲ್ಲಿ.
ಪಂದ್ರಾ ವೀಸ್ ಮಿನುಟಾಂನಿ ಘರಾ ಪಾವ್ಲ್ಯಾಂವ್. ಮ್ಹಜಾ ಎಕಾ ಮಯ್ನ್ಯಾಚಾ ಜಯ್ಲಾಚೊ ಆಜ್ ಪಯ್ಲೊ ದೀಸ್. ಹಾಂವ್ ಘರಾಬಗ್ಲೆನ್ ಕಾರ್ ಪಾರ್ಕ್ ಕರ್ನ್ ದೆಂವ್ಲೊಂ ಆನಿ ಮ್ಹಜಾ ಬಾಯ್ಲೆಚಾ ಆವಯ್ಚಿ ಪೇಟ್ ಉಕಲ್ನ್ ಘರಾ ಹಾಡ್ನ್ ಆಯ್ಲೊಂ, ಮ್ಹಜೆ ಬರಾಬರ್ ತಿ ಘರಾಭಿತರ್ ಆಯ್ಲಿ.
ಹಾಂವ್ ನೆಸೊನ್ ಕಾಮಾಕ್ ಗೆಲೊಂ ಪುಣ್ ಮತಿಂತ್ ಹಜಾರ್ ಚಿಂತ್ನಾಂ ಘೆವುನ್. ಆಜ್ ಕಾಮಾಕ್ ಇಲ್ಲೊ ತಡವ್ ಜಾಲ್ಲೊ ದೆಖುನ್ ಥೊಡ್ಯಾ ವೊರಾಂಚೊ ಸಾಂಬಾಳ್ ಉಣೊಂ ಮೆಳೊಂಕ್ ಪುರೊ ಮ್ಹಣ್ ಮತಿಂತ್ ಲೇಕ್ ಘಾಲೆಂ. ದನ್ಪಾರಾಂ ಜೇಂವ್ಕ್ ಮನ್ ಆಯ್ಲೆಂನಾ ದೆಖುನ್ ಸಾಂಜೆರ್ ಕಾಮ್ ಜಾತೆಚ್ಚ್ ಪಬ್ಬಾಕ್ ವಚೊನ್ ಏಕ್ ಬೋತ್ಲ್ ಬಿಯೆರ್ ಪಿಯೆವ್ನ್ ಘರ್ಚಿ ವಾಟ್ ಧರ್ನ್ ಗೆಲೊಂ. ಘರಾ ವಚೊಂಕ್ ಮನ್ ನಾತ್ಲ್ಲೆಂ, ಕಿತ್ಯಾಕ್ಗಿ ಆಜ್ ಮ್ಹಜೆಂ ಘರ್ ಪರ್ಕಿ ಘರಾಪರಿಂ ಭೊಗ್ತಾಲೆಂ. ಅಪುಣ್ ಅಪ್ಲ್ಯಾ ಘರಾ ನ್ಹಂಯ್ ಬಗಾರ್ ಪರ್ಕ್ಯಾಂಗೆರ್ ವಚೊನ್ ಆಸಾಂ ಮ್ಹಳ್ಳೆಂ ಭೊಗಾಪ್ ಯೇಂವ್ಕ್ ಲಾಗ್ಲೆಂ. ತಾಕಾ ಸಾಂಗಾತ್ ದೀಂವ್ಕ್ ಮ್ಹಜಿ ತಕ್ಲೀಯ್ ವಿಪ್ರೀತ್ ರಿತಿನ್ ಫಡ್ತಾಲಿ ದೆಖುನ್ ಘರಾ ಗೆಲ್ಲೊಂಚ್ ಶೀದಾ ವಚೊನ್ ನಿದ್ಲೊಂಚ್.
ಮ್ಹಜಿ ಬಾಯ್ಲ್ ಅಪ್ಲ್ಯಾ ಆವಯ್ಲಾಗಿಂ ಉಲವ್ನ್ ಆಸ್ಲ್ಲಿ ತಿತ್ಲ್ಯಾರ್ ಮ್ಹಜೆಸರ್ಶಿಂ ಯೇವ್ನ್ ಮ್ಹಜಾ ಕಪಲಾಚೆರ್ ಹಾತ್ ಲಾವ್ನ್ ಪಳೆಲಾಗ್ಲಿ. ಮ್ಹಜಿ ತಕ್ಲಿ ಫಡಾಫಡೆವಿಶಿಂ ಜಾಣಾಂ ಜಾತೆಚ್ಚ್ ಆವಯ್ಕ್ ಏಕ್ ಕೋಪ್ ಚಾ ಕರುಂಕ್ ಸಾಂಗೊನ್ ಮ್ಹಜಿ ತಕ್ಲಿ ಧಾಂಬುಂಕ್ ಲಾಗ್ಲಿ. ಹಾವೆಂ ವೊಗೆಚ್ಚ್ ರಾವ್ಲ್ಲೆಶಿವಾಯ್ ನಿರ್ವೋಗ್ ನಾತ್ಲ್ಲೊ. ಹೊ ಪಯ್ಲೊ ದೀಸ್, ಕಾಳ್ಜಾಂತ್ ಮೋಗ್ ನಾತ್ಲ್ಯಾರೀ ಮೋಗ್ ಆಸ್ಚೆಪರಿಂ ಕರುಂಕ್ಚ್ ಆಸ್ಲ್ಲೆಂ.
ಪುಣ್ ಕಿತ್ಯಾಕ್ಗೀ ಆಜ್ ಪುರಾಸಣೆಂತ್ ವ ಚಡಿತ್ ಚಿಂತುನ್ ಜಾಯ್ಜಯ್ ತಕ್ಲಿ ಇತ್ಲಿ ಜ್ಯೊರಾನ್ ಫಡ್ತಾಲಿ ಮ್ಹಳ್ಯಾರ್ ಸಾಂಗೊನ್ ಫಾಯ್ದೊ ನಾತ್ಲ್ಲೊ. ಇಲ್ಲ್ಯಾ ವೆಳಾನ್ ಮ್ಹಜ್ಯಾ ಬಾಯ್ಲೆಚಿ ಆವಯ್ ಚಾ ಕರ್ನ್ ಹಾಡ್ಲ್ಲಿ ಮ್ಹಜ್ಯಾ ಬಾಯ್ಲೆನ್ ಮ್ಹಾಕಾ ದಿಲಿ. ಹಾಂವ್ ತಿ ಪಿಯೆವ್ನ್ ಥೊಡ್ಯಾಚ್ ವೆಳಾನ್ ಪೊಟಾಂತ್ ಚಾಳಲ್ಲೆಪರಿಂ ಜಾವ್ನ್ ವೊಂಕ್ಲೊಂ. ಭೋವ್ಶಾ ಪಿಯೆಲ್ಲಿ ಬಿಯೆರೆಚೊ ಪರಿಣಾಮ್. ಹಾಂವ್ ಆತಾಂ ಖರೊಂಚ್ ಕಾಂಪ್ತಾಲೊಂ ಆನಿಂ ರಾತ್ ಜೂನ್ ಜಾವ್ನ್ ಯೇಂವ್ಕ್ ಲಾಗ್ತಾನಾ ಮ್ಹಾಕಾ ನಿದೆನ್ ವೆಂಗ್ತಾನಾ ಸಯ್ತ್ ಮ್ಹಾಕಾ ಉಡಾಸ್ ಆಸ್ಚೆಪರಿಂ ಮ್ಹಜಿ ತಕ್ಲಿ ಅಪ್ಲ್ಯಾ ಉಸ್ಕ್ಯಾಚೆರ್ ಘೆವ್ನ್ ಮ್ಹಜಿ ಬಾಯ್ಲ್ ಮ್ಹಜಿ ತಕ್ಲಿ ಪೊಶೆತಾಲಿ.
ದುಸ್ರೆ ದಿಸಾ ಸಕಾಳಿಂ ಉಟೊಂಕ್ ಪ್ರೇತನ್ ಕರ್ತಾನಾ ಮ್ಹಜೆ ದೊಳೆ ಸುಟಾನಾತ್ಲ್ಲೆ. ತಕ್ಲಿ ಜ್ಯೊರಾನ್ ಫಡ್ತಾಲಿ. ಹಿಂವ್ಯೀ ಖಾತಾಲೆಂ. ಹಾಂವ್ ಉಟ್ಲ್ಲೆಂಚ್ ಮ್ಹಜಾ ತಕ್ಲೆರ್ ಅಪ್ಲೊ ತ್ಹಳಾತ್ ದವ್ರುನ್ ಪಳೆಲ್ಲ್ಯಾ ಮ್ಹಜಾ ಬಾಯ್ಲೆನ್ ತಾಪ್ ಆಸ್ಚೊ ನಖ್ಖಿ ಕೆಲೆಂ. ಜಿಬೆಕ್ ರೂಚ್ ನಾತ್ಲ್ಲಿ ತರ್ಯ್ ಇಲ್ಲಿ ಹುನ್ ಕೊಫಿ ಪಿಯೆಲೊಂ ಆನಿ ತೀನ್ ದೀಸ್ ಪರ್ಯಾಂತ್ ಖಟ್ಲ್ಯಾರ್ಚ್ ಉರ್ಲೊಂ.
ದೀಸ್ ಮ್ಹಣ್ ನಾ, ರಾತ್ ಮ್ಹಣ್ ನಾ ಮ್ಹಜಿ ಬಾಯ್ಲ್ ಆನಿ ತಿಚಿ ಆವಯ್ ಮ್ಹಜಾ ಚಾಕ್ರೆಕ್ ಲಾಗ್ಲ್ಲಿಂ. ಎಕ್ಲೆಂ ಮ್ಹಜಿ ತಕ್ಲಿ ಪೊಶೆತಾನಾ ದುಸ್ರಿ ಮ್ಹಜಾ ಪಾಂಯಾಂಕ್ ಧಾಂಬ್ತಾಲಿ. ಎಕೆಕ್ ಘಡಿ ತಾಣಿಂ ಮ್ಹಜೆಸರ್ಶಿಂ ರಾವೊನ್ ಮ್ಹಾಕಾ ಸಾಂಗಾತ್ ದಿಲೊ. ಎದೊಳ್ಚ್ ಅಫಿಸಾಕ್ ಖಬಾರ್ ಧಾಡುನ್ ದಿಲ್ಲಿ.
ತೀನ್ ದಿಸಾಂಚಾ ತಾಪಾ ಉಪ್ರಾಂತ್ ಮಾತ್ಸೊಂ ನಿತ್ರಾಣಿ ಜಾಲ್ಲೊಂ, ಪುಣ್ ಹ್ಯಾ ನಿತ್ರಾಣಿ ಸ್ತಿತೆಂತ್ಯೀ ಮ್ಹಜ್ಯಾ ಬಾಯ್ಲೆನ್ ದಿಲ್ಲೊ ಸ್ಪರ್ಶ್ ವಿಚಿತ್ರ್. ಪಯ್ಲೆಂ ಹಾಂವ್ ಕಾಂಠಾಳ್ಳೊಂ ತರ್ಯೀ ಉಪ್ರಾಂತ್ ಕಿತ್ಯಾಕ್ಗಿ ಹೊ ಸ್ಪರ್ಶ್ ರುಚೊಂಕ್ ಲಾಗ್ಲೊ. ತಾಚಾ ಬಾವ್ಳ್ಯಾಂಚಿ ವೇಂಗ್, ತಾಚಾ ಖಾಕಿಯೆಚಾ ಘಾಮಾಚೊ ವಾಸ್ ಹರ್ಯೆಕ್ ಮ್ಹಾಕಾ ನವೊ ಅನ್ಭೋಗ್ ದೀಂವ್ಕ್ ಲಾಗ್ತಾನಾ ಹಾಂವ್ ’ಡೈವೋರ್ಸ್’ ವಿಶಿಂ ಕಾಂಯ್ ಮತ್ ಬದ್ಲುಂಕ್ ಪುರೊಗೀ ಮ್ಹಳ್ಳೊ ದುಭಾವ್ಯೀ ಆಯ್ಲೊ.
ತೀನ್ ದಿಸಾಂಚಾ ತಾಪಾಉಪ್ರಾಂತ್ ಪಯ್ಲೆ ದಿಸಾ ಅಫಿಸಾಕ್ ಗೆಲ್ಲೊಂಚ್ ಮ್ಹಜ್ಯಾ ಬಾಯ್ಲೆಚಿ ತಶೆಂಚ್ ತಿಚ್ಯಾ ಆವಯ್ಚಿ ಇಂಡಿಯಾಚಿ ಟಿಕೆಟ್ ಬುಕ್ ಕರ್ನ್ ಆಯ್ಲೊಂ.
ಶರ್ತಾಚಾ ಮಯ್ನ್ಯಾಚೆ ದೀಸ್ ಅಶೆಚ್ ಪಾಶಾರ್ ಜಾಲೆ.
ಮ್ಹಜಾ ಜಿಣ್ಯೆಂತ್ ಚೆಡ್ವಾಂ ಸಭಾರ್ ರಿತಿಂನಿ ಮ್ಹಜಾ ಜಿಣ್ಯೆಂತ್ ಆಯ್ಲ್ಯಾಂತ್ ಆನಿ ಗೆಲ್ಯಾಂತ್, ಕೊಣ್ ಆವಯ್ ಜಾವ್ನ್, ಕೊಣ್ ಇಶ್ಟಿಣ್ ಜಾವ್ನ್.. ಪುಣ್ ಕೊಣ್ಂಚ್ ಶಾಸ್ವತ್ ಜಾವ್ನ್ ರಾವೊಂಕ್ ನಾತ್ಲ್ಲಿಂ, ಆವಯ್ ಮ್ಹಜೊ ಬಾಪುಯ್ ಮೊರ್ತಚ್ಚ್ ಎಕಾ ನೈಜೀರಿಯನಾಲಾಗಿಂ ದುಸ್ರೆಂ ಕಾಜಾರ್ ಜಾವ್ನ್ ಗೆಲ್ಲಿ. ಆತಾಂ ಬಾಯ್ಲ್ ಆನಿ ತಾಚಿ ಆವಯ್. ಇಸ್ಟಿಣ್ಯೊ ಸಯ್ತ್ ಶಾಸ್ವತ್ ನ್ಹಂಯ್... ಹಾಂವ್ ಚಿಂತುನ್ ಆಸ್ಲ್ಲೊಂ..
ಆತಾಂ ಹ್ಯಾ ಬಂಧನಾಂತ್ಲಿ ಮುಕ್ತಿ ಮ್ಹಾಕಾ ಭೋವ್ ಗರ್ಜ್ ಆಸ್ಲ್ಲಿ. ಮ್ಹಾಕಾ ಪರತ್ ಸ್ವತಂತ್ರ್ ಸುಕ್ಣೆಂ ಜಾವ್ನ್ ಉಭೊಂಕ್ ಆಸ್ಲ್ಲೆಂ, ಕಸಲಿಚ್ ಬಂದಡ್ ನಾಸ್ತಾನಾ, ಕಸಲ್ಯೊಚ್ ಅಡ್ಕಳ್ಯೊ ನಾಸ್ತಾನಾ.
ತ್ಯೇ ದೀಸ್ ಅವ್ಚಿತ್ ಪಾವ್ಸ್ ಯೇಂವ್ಕ್ ಲಾಗ್ಲೊ ಆನಿ ಸಾಂಜೆರ್ ವೆಗಿಂಚ್ ಕಾಳೊಕ್ ಜಾಲೊ. ಹಾಂವ್ ಘರಾ ವಚೊನ್ ಹರ್ಶೆಂಚಾಕೀ ವೆಗಿಂಚ್ ನಿದೊಂಕ್ ಗೆಲ್ಲೊಂ. ಭಾಯ್ರ್ ಪಾವ್ಸ್ ವೊತ್ಚೊ ಅನಿಕ್ಯೀ ಸಂಪೊಂಕ್ ನಾತ್ಲ್ಲೊ, ಆಜ್ ರಾತಿಂ ಕಿತ್ಯಾಕ್ಗೀ ಮ್ಹಜಿ ಬಾಯ್ಲ್ ಮ್ಹಾಕಾ ವೆಗ್ಳಿಚ್ ದಿಸೊಂಕ್ ಲಾಗ್ಲಿ. ಜೆದ್ನಾಂ ಹಾಂವ್ ಮ್ಹಜಾ ಪ್ರೇಮಿಕಾಲಾಗಿಂ ಸಳಾವಳೆಕ್ ಆಯ್ಲೊಂಗೀ ತವಳ್ ಥಾವ್ನ್ ಆಜ್ ಪರ್ಯಾಂತ್ ಮ್ಹಜಾ ಬಾಯ್ಲೆಲಾಗಿಂ ಕಸಲೊಚ್ ದೈಹಿಕ್ ಸಂಬಂದ್ ದವ್ರುಂಕ್ ನಾತ್ಲ್ಲೊ. ಫುಡ್ಲೊ ವೇಳ್ ನಿಶ್ಶಬ್ದ್ ಜಾವ್ನ್ ಅಪ್ಲ್ಯಾ ಮುಖ್ಲ್ಯಾ ದೋನ್ ಕುಡಿಂಚಾ ಖೆಳಾಕ್ ಸಾಕ್ಸ್ ದಿತಾನಾ ಮ್ಹಾಕಾ ಆಜ್ ಕಿತ್ಯಾಕ್ಗಿ ಹ್ಯಾ ಸಂಬಂಧಾಕ್ ಮನ್ಶಾಕೂಡ್ ಏಕ್ ಸಾಂಕೇತ್ ಮಾತ್ರ್ ಮ್ಹಳ್ಳೆಪರಿಂ ದಿಸೊನ್ ಆಯ್ಲೆಂ. ಪುಣ್ ಮ್ಹಜಾ ಬಾಯ್ಲೆನ್ಯ್ ಕಸಲೊಚ್ ಪ್ರತಿರೋಧ್ ಧಾಖಯ್ಲೊನಾ.
ಅಸಲ್ಯೊಚ್ ಘಡಿಯೊ ಕಾಜಾರಾ ಆಧ್ಲ್ಯೊ ಪರತ್ ಉಡಾಸಾಕ್ ಆಯ್ಲ್ಯೊ. ತರ್ ಅಜೂನ್ ಕಸಲಿಚ್ ಬದ್ಲಾವಣ್ ಜಾಂವ್ಕ್ ನಾ - ಸಗ್ಳೆಂ ತಶೆಂಚ್ ಆಸಾ, ಫಕತ್ ವೇಳ್ ಕಾಳ್ ಉತರ್ಲಾ, ಚಿಂತ್ಪಾಚಿ ದಿಶಾ ಬದಲ್ಲ್ಯಾ, ಭೋವ್ಶಾ ಥೊಡೆ ಕೇಸ್ ಝಡ್ಲ್ಯಾತ್. ಪುಣ್ ಹೆರ್ ಕಸಲಿಚ್ ಬದ್ಲಾವಣ್ ನಾ??
******
ಎಕೆಕ್ ದೀಸ್ ಸಂಪೊನ್ ಹಾಪ್ತೆ ಜಾಲೆ ಆನಿ ಹಾಫ್ತೆ ಸಂಪೊನ್ ಆಯಿಲ್ಲೆಪರಿಂಚ್ ಮ್ಹಜಾ ಮತಿಚೊ ಉದ್ವೇಗ್ಯೀ ಚಡೊನ್ ಯೆತಾಲೊ. ಆನಿ ಉರ್ಲ್ಯಾತ್ ಥೊಡೆಚ್ ದೀಸ್ ಅಪ್ಲ್ಯಾ ಜಯ್ಲಾಚೆ.
ಉಪ್ರಾಂತ್ ಹ್ಯಾ ಪಿಂಜ್ರ್ಯಾಂತ್ಲೆಂ ಸುಕ್ಣೆಂ ಉಭೊನ್ ವೆತೆಲೆಂ. ಕಸಲಿಚ್ ಬಂದಡ್ ನಾತ್ಲೆಲ್ಯಾ ಗಾಂವಾಕ್, ಸ್ವತಂತ್ರ್ ಜಿಣಿ ಜಿಯೆಂವ್ಕ್. ತ್ಯೇ ಸಾಂಜೆರ್ ಹಾವೆಂ ಎದೊಳ್ಚ್ ಬುಕ್ಕ್ ಕೆಲ್ಲಿ ಟಿಕೆಟ್ ಹಾಡ್ಲಿ ಆನಿ ಮ್ಹಜಾ ಕೊಟಾಚಾ ಬೊಲ್ಸಾಂತ್ ದವರ್ಲಿ. ಬಾಯ್ಲೆಚಾ ಆವಯ್ಕ್ ಸಗ್ಳೆಂ ಸಾಂಗೊಂಕ್ ಮನ್ ಆಯ್ಲೆಂ ತರ್ಯ್ ತಶೆಂ ಕರುಂಕ್ ಮ್ಹಜಾ ಬಾಯ್ಲೆನ್ ಸೊಡ್ಲೆಂನಾ.
"ತಿ ಕಾಳ್ಜಾಚಾ ಪಿಡೆಂತ್ ವಳ್ವಳ್ತಾ, ಕಶೀಯ್ ಚಡ್ ತೇಂಪ್ ತಿ ವಾಂಚಿನಾ, ದೆಖುನ್ ತಿಣೆಂ ಮೊರ್ಚಾಧಿಂಚ್ ತಿಚೆಂ ಆವಯ್ಕ್ ಸಂಪಂವ್ಚೆಂ ನಾಕಾ, ತ್ಯಾ ಖಾತಿರ್ ಅಪುಣ್ ಕಸಲ್ಯಾ ಸಾಕ್ರಿಫಿಸಾಕ್ಯ್ ತಯಾರ್, ತಿಣೆಂ ಮೊರ್ಚಾಧಿಂ ಏಕ್ ಪಾವ್ಟಿಂ ಹಾಂವ್ ಹಾಂಗಾ ಸುಖಾನ್ ಜಿಯೆವ್ನ್ ಆಸಾಂ ಮ್ಹಳ್ಳಿ ಖಾತ್ರಿ ದಿಂವ್ಚಾಕ್ ತಿಕಾ ಎಕಾ ಮಯ್ನ್ಯಾಕ್ ಆಪವ್ನ್ ಹಾಡ್ಲೆಂ ಮಾತ್ರ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್"
ವಿಚಿತ್ರ್ ಚಿಂತಾಪ್, ಹಾಂವೆಂ ಎದೊಳ್ ಖಂಯ್ಸರ್ಯ್ ಆಯ್ಕಾಲ್ಲೆಂ ನಾ, ಪಳೆಲ್ಲೆಂ ನಾ.
ಹ್ಯಾ ಇತ್ಲ್ಯಾ ದಿಸಾಂನಿ ಆಮಿಂ ಜಾಯ್ತೆಂ ಭಂವ್ಲ್ಯಾಂವ್, ಜಾಯ್ತೆಂ ಉಲಯ್ಲ್ಯಾಂವ್, ಜಾಯ್ತೆಂ ಹಾಸ್ಲ್ಯಾಂವ್.. ಹಾಂವ್ ಚಡ್ ಆಯ್ಕಾತಾಲೊಂ ದೆಖುನ್ ಚಡ್ ಸಮ್ಜೊಂಕ್ ಸಕ್ಲೊಂ. ಲಾಗಿಂ ಯೇವ್ನ್ ಎಕೆಕಾ ಸಂಬಂಧಾಕ್ ಪಳೆಂವ್ಕ್, ಭೊಗುಂಕ್ ಸಕ್ಲೊಂ. ಚೆಡುಂ ಮ್ಹಜಾ ನದ್ರೆನ್ ಫಕತ್ ಎಕ್ ನದ್ರೆನ್ ಸಮ್ಜಾತಾನಾ ಆತಾಂ ಚೆಡ್ವಾಚಿಂ ವೆವೆಗ್ಳಿಂ ರುಪಾಂ ದಿಸೊಂಕ್ ಲಾಗ್ಲಿಂ.. ಆತಾಂ ಬಾಕಿ ಉರ್ಲ್ಯಾತ್ ತೀನ್ ದೀಸ್, ತೀನ್ ದಿಸಾಂ ಉಪ್ರಾಂತ್ ಮ್ಹಜಿ ಬಾಯ್ಲ್ ಆನಿ ತಾಚಿ ಆವಯ್ ಪಾಟಿಂ ಇಂಡಿಯಾಕ್ ವೆತೆಲಿಂ ಭೋವ್ಶಾ ಸಾಸ್ಣಾಕ್...
ಹಾಂವ್ ಅಜೂನ್ ದೀಸ್ ಮೆಜುನ್ ಆಸ್ಲ್ಲೊಂ. ತ್ಯೇ ದೀಸ್ ಮ್ಹಜಾ ಪ್ರೇಮಿಕಾನ್ ಮ್ಹಕಾ ಏಕ್ ಫುಲಾಂಚೊ ವ್ಹಡ್ಲೊ ಬುಕ್ಕೊ ಧಾಡ್ನ್ ದಿಲ್ಲೊ ಮ್ಹಜಾ ಅಫಿಸಾಕ್. ಸವೆಂ ಏಕ್ ಸೊಭಿತ್ ಕಾರ್ಡ್, ತಾಂತುಂ ಬರವ್ನ್ ಆಸ್ಲ್ಲಿಂ ಉತ್ರಾಂ ’ಮೊಜಾ ಅನಂತ್ ಮೊಗಾಚಾ ರಾಕೊಣೆಚಾ ಉಡಾಸಾಚಿಂ ಹಿಂ ಫುಲಾಂ ಸಾಕ್ಸ್ ಜಾಂವ್’. ಸಾಂಜೆರ್ ಘರಾ ಗೆಲ್ಲ್ಯಾ ಹಾವೆಂ ಮ್ಹಜಾ ಬಾಯ್ಲೆಕ್ ಶೊಪಿಂಗ್ ಕರುಂಕ್ ಸಾಂಗ್ಲೆಂ ಪುಣ್ ತೆಂ ವಚೊಂಕ್ ಕಬೂಲ್ ಜಾಲೆಂಚ್ ನಾ. ದೆಖುನ್ ’ತುಕಾ ನ್ಹಂಯ್ ತರ್ಯೀ ತುಜ್ಯಾ ಆವಯ್ಕ್ ಯಾ ಹೆರಾಂಕ್ ತರ್ಯೀ ಕಿತೆಂ ತರೀ ಘೆ’ ಮ್ಹಣೊನ್ ತಾಚಾ ಹಾತಾಂತ್ ಹಾವೆಂ ಪಾಂಯ್ಶಿಂ ಡೊಲರ್ ದಿಲೆ. ಆನಿ ಅಪುಣ್ ಘರಾಚ್ಚ್ ಬಸ್ತಲೊಂ ಮ್ಹಳೆಂ.
ಬಾಯ್ಲ್ ಆನಿ ತಿಚಿ ಆವಯ್ ಭಾಯ್ರ್ ಗೆಲ್ಲಿಂ ರಾತಿಂ ತಡವ್ ಕರ್ನ್ ಆಯ್ಲಿಂ ಆನಿಂ ಕಿತೆಂ ಹಾಡ್ಲೆಂ ತೆಂ ಮ್ಹಾಕಾ ಸಾಂಗ್ಲೆಂಚ್ ನಾ. ಹಾಂವ್ಯ್ ತಿತ್ಲ್ಯಾ ಅತ್ರೆಗಾನ್ ಉರ್ಲೊಂನಾ. ಕಿತೆಂಯ್ ಹಾಡುಂದಿ, ಮ್ಹಾಕಾ ಕಿತ್ಯಾಕ್? ಮ್ಹಣೊನ್ ಮ್ಹಜೆಯಿತ್ಲ್ಯಾಕ್ಚ್ ರಾವ್ಲೊಂ.
ದುಸ್ರೊ ದೀಸ್ ಉದೆಲೊ, ಭೊವ್ಶಾ ಅಸಲೊ ಅನ್ಯೇಕ್ ದೀಸ್ ಮಾತ್ರ್ ಆಸಾ - ಹಾವೆಂ ಮತಿಂತ್ ಚಿಂತ್ಲೆಂ ಆನಿ ಅಫಿಸಾಕ್ ಗೆಲೊಂ. ಗಾಂವಾಕ್ ವೆಚಿ ತಯರಾಯ್ ಎದೊಳ್ಚ್ ಜಾಲ್ಲಿ. ಆಫಿಸಾಕ್ ಆಜ್ ಅನ್ಯೇಕ್ ಬುಕ್ಕೊ ಆಯಿಲ್ಲೊ. ’ತೀಸ್ ದೀಸ್ ಮ್ಹಜಾ ಜಿಣ್ಯೆಂತ್ ತೀಸ್ ವರ್ಸಾಂಪರಿಂ ದಿಸ್ತಾತ್, ಹ್ಯಾ ತೀಸ್ ದಿಸಾಂಚಿ ವ್ಹಾಡ್ ತುಜೆಥಾವ್ನ್ ಘೆತೆಲಿಂ’ ಮ್ಹಳ್ಳೊ ಸಂಧೇಶ್ ಆಟಾಪ್ಚೆಂ ಕಾರ್ಡ್ ಆಜ್ ಮ್ಹಜ್ಯಾ ಪ್ರೇಮಿಕಾನ್ ಧಾಡ್ಲ್ಲೆಂ.
ಮ್ಹಾಕಾ ಅನ್ಯೇಕಾ ದಿಸಾಕ್ ರಾಕೊಂಕ್ ಆಸ್ಲ್ಲೆಂ. ಸಾಂಜೆರ್ ಕಾಮ್ ಸಾಂಪವ್ನ್ ಘರಾ ಪಾವ್ತಾನಾ ಮ್ಹಾಕಾ ಅಜ್ಯಾಪ್, ಸಗ್ಳೆಂ ಘರ್ ನಿತಳ್ ಕರ್ನ್ ದವರ್ಲೆಲೆಂ. ವಸ್ತ್ರಾಂ ಸಗ್ಳಿಂ ಘಡಿ ಕರುನ್, ಬರಿಂ ಕರ್ನ್ ಮಾಂಡುನ್ ದವರ್ಲೆಲಿಂ. ಬರೆಂ ರಾಂದಾಪ್ಯೀ ರಾಂದುನ್ ದವರ್ಲಾಂ ಮ್ಹಣ್ ಕುಜ್ನಾಂತ್ ಯೆಂವ್ಚೊ ಪರ್ಮಳ್ಚ್ ಸಾಂಗ್ತಾಲೊ. ಜೇವ್ನ್ ಜಾವ್ನ್ ಹಾಂವ್ ಬೆಡ್ರುಮಾಕ್ ರಿಗ್ತಾನಾ ಮ್ಹಜಿ ಬಾಯ್ಲ್ ಕಿತೆಂಗೀ ಬರವ್ನ್ ಆಸ್ಲ್ಲಿ. ಹಾಂವ್ ತಿಕಾ ಥಂಯ್ಚ್ ಸೊಡ್ನ್ ನಿದೊಂಕ್ ಗೆಲೊಂ.
ಪುಣ್ ನಿದ್ಲ್ಲೆಕಡೆ ಮ್ಹಜಾ ಮತಿನ್ ಪರತ್ ಚಿಂತುಂಕ್ ಧರ್ಲ್ಲೆಂ. ಎಕೆಕಾ ದಿಸಾಕ್.. ಮ್ಹಜೆ ಭುರ್ಗ್ಯಾಪಣಾಲೆ ದೀಸ್, ಮ್ಹಜಾ ಬಾಪಾಯ್ಚೆಂ ಮರಣ್, ಆವಯ್ಚೆಂ ದುಸ್ರೆಂ ಕಾಜಾರ್, ಮ್ಹಜೆಂ ಶಿಕಾಪ್, ಕಾಮ್, ಈಶ್ಟ್, ಕಾಜಾರ್, ಮೌಶಿ, ಬಾಯ್ಲ್, ಪ್ರೇಮಿಕಾ, ಮ್ಹಜಾ ಬಾಯ್ಲೆಚಿ ಆವಯ್...
ತಾಪ್.. ಫುಲಾಂಚೆ ಬುಕ್ಕೆ.. ಕಾರ್ಡಾಂ....
ಅಚಾನಕ್ ಮ್ಹಜಾ ದೊಳ್ಯಾಂಕ್ ನೀದ್ ಪಡ್ಲಿನಾ ದೆಖುನ್ ಹಾಂವ್ ಉಟೊನ್ ಉದಾಕ್ ಪಿಯೆಂವ್ಕ್ ಮ್ಹಣ್ ಭಾಯ್ರ್ ಆಯ್ಲೊ... ಭಾಯ್ರ್ ಯೆತಾನಾ ಕಿತ್ಯಾಕ್ಗೀ ಮ್ಹಾಕಾ ಜೆವ್ಣಾಚಾ ಮೆಜಾಚೆರ್ ಆಸ್ಚೆಂ ಬಾಯ್ಲೆನ್ ಕಿತೆಂಗೀ ಬರಯಿಲ್ಲೆಂ ಕಾಗಾದ್ ಝಳ್ಕಾಲೆಂ. ತಾಂತುಂ ಸುಡಾಳ್ ಬರಯಿಲ್ಲೆಂ;
’ತುಜೆಥಾವ್ನ್ ಕಿತ್ಲಿಂ ಪಯ್ಸ್ ಆಸ್ಲ್ಯಾರ್ಯ್ ಹಾಂವ್ ತುಜೆಸವೆಂ ಸದಾಂ ಆಸ್ತೆಲಿಂ, ದೆಖುನ್ ತುಕಾ ಕೆದಾಳಾಯ್ ಮ್ಹಜಿ ಗರ್ಜ್ ಮ್ಹಣ್ ಭೊಗ್ತಾನಾ ಆಪಯ್ ಹಾಂವ್ ಸಂತೊಸಾನ್ ತುಜೆಸರ್ಶಿಂ ಧಾಂವೊನ್ ಯೆತೆಲಿಂ.. ಕಸಲೆಂಚ್ ಲೇಕ್ ತುಜೆಥಾವ್ನ್ ಹಾಂವ್ ವಿಚಾರ್ಚಿಂನಾ..’
ಫುಡ್ಲಿಂ ಉತ್ರಾಂ ಮ್ಹಚಾ ದೊಳ್ಯಾಂಕ್ ದಿಸ್ಚಾಧಿಂ ಥೊಡೆ ಥೆಂಬೆ ದುಃಖಾಂ ಮ್ಹಜ್ಯಾ ನಿರ್ದಯಿ ದೊಳ್ಯಾಂನಿ ಉದೆಲಿಂ. ಹಾಂವ್ ಉದಾಕ್ ಪಿಯೆವ್ನ್ ಪಾಟಿಂ ಯೇವ್ನ್ ಖಟ್ಲ್ಯಾರ್ ಆಡ್ ಪಡ್ಲೊಂ. ಕಶೆಂ ಕಶೆಂ ನಿದ್ಲ್ಯಾರ್ಯ್ ನೀದ್ ಪಡ್ಲಿನಾ. ಕಶೀಯ್ ರಾತ್ ಫಾಲೆಂ ಕೆಲಿ.
ದುಸ್ರೆ ದಿಸಾ ಸಕಾಳಿಂ ದೊಗಾಂಯ್ಕ್ಯ್ ಪಾಟಿಂ ವಚೊಂಕ್ ಆಸ್ಲ್ಲೆಂ, ತಿಂ ಸಕಾಳಿಂಚ್ ನೆಸೊನ್ ಆಯ್ತಿಂ ಜಾಲ್ಲಿಂ. ಬಾಯ್ಲೆಚಾ ಆವಯ್ನ್ ಪೇಟ್ ವರ್ನ್ ಕಾರಾನ್ ದವರ್ಚಾಧಿಂ ಮ್ಹಜೊ ಉಪ್ಕಾರ್ ಮಾಗೊನ್ ತಶೆಂಚ್ ’ಕೆದ್ನಾಂ ಗಾಂವಾಕ್ ಯೆತಾಯ್ ಪುತಾ’ ಮ್ಹಣ್ ವಿಚಾರ್ತಾನಾ ಮ್ಹಜಾನ್ ಸೊಸುಂಕ್ಂಚ್ ಜಾಲೆಂನಾ...
ಹಾವೆಂ ಕೊಟಾಚಾ ಬೊಲ್ಸಾಂತ್ ಆಸ್ಲ್ಲಿ ಟಿಕೆಟ್ ಕಾಡ್ಲಿ ಆನಿ ಮ್ಹಜಾ ಬಾಯ್ಲೆನ್ ಡೈವೋರ್ಸ್ ಪೆಪರಾಚೆಂ ಡ್ರಾಫ್ಟ್ ಪಿಂಜ್ಲ್ಲೆಪರಿಂ ಪಿಂಜುನ್ ಉಡಯ್ಲಿ.. ಆನಿ "ಮ್ಹಾಕಾ ಎಕ್ಲ್ಯಾಕ್ ಹಾಂಗಾ ರಾವೊಂಕ್ ಜಾಂವ್ಚೆಂ ನಾ...." ಮ್ಹಣೊನ್ ಬಾಯ್ಲೆಕ್ ವೇಂಗ್ ಮಾರ್ನ್ ರಡೊಂಕ್ ಲಾಗ್ಲೊಂ. ಮ್ಹಜಾ ದುಖಾಂನಿ ಮ್ಹಜಾ ಬಾಯ್ಲೆಕ್ ಪಾಟ್ಲ್ಯಾ ದಿಸಾಂನಿ ದಿಲ್ಲ್ಯಾ ದುಖಿಕ್ ಪುಸುಂಕ್ ಧರ್ತಾನಾ ಪಯ್ಸ್ ರಾವೊನ್ ಪಳೆಂವ್ಚಿ ’ಮ್ಹಜಿ ಸಾಸು ಮಾಂಯ್’ ಮಾತ್ರ್ ಮಿಟಾಖಾಂಬೊ ಜಾಲ್ಲಿ.
***********
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
