ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಕುಡ್ಡೊ
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್, ಆಯ್ಕೊಳ್), ಖಣ್ (ವಲ್ಲಿ ಕ್ವಾಡ್ರಸ್), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಕ್ರಿಸ್ಮಸ್ ಕಾಣಿಕ್, ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್.
ಅಜಿಕ್ ಸಭಾರ್ ಶೆಕ್ಡ್ಯಾಧ್ಲೊ ಕಾಳ್ ತೊ. ಆನಿಂ ತೆದ್ನಾಂ ಎಕಾ ಗಾಂವಾಂತ್ ಜಿಯೆವ್ನಾಸ್ಲ್ಲೊ ಕಂಗಾಲ್, ಜಲ್ಮಾಥಾವ್ನ್ಂಚ್ ಕುಡ್ಡೊ ದೆಕುನ್ ಹ್ಯಾ ಸಂಸಾರಾನ್ ವೊಲಾಯಿಲ್ಲೆಂ ಸರ್ವ್ ಬರೆಂ ತಾಚಾ ಮತಿಂತ್ ಎಕೆಕ್ ಪಿಂತುರಾರುಪರಿಂ ಮಾತ್ರ್ ಆಸ್ಲ್ಲೆಂ ಶಿವಾಯ್ ಹೆರ್ ಕಿತೆಂಚ್ ನ್ಹಯ್.
’ದೆವಾಚಿಂ ರಚ್ನಾಂ ಸೊಭಿತ್!’ ಹೆಂ ತಾಣೆಂ ಜಾಯ್ತೆ ಪಾವ್ಟಿಂ ಆಯ್ಕಾಲ್ಲೆಂ, ಮಾತ್ರ್ ನ್ಹಯ್ ತಾಚಾ ಮತಿನ್ ಎದೊಳ್ಚ್ ತೆಂ ಒಪುನ್ಯೀ ಘೆತ್ಲ್ಲೆಂ ಸತ್ ಜಾವ್ನಾಸಾ. ಸೊಭಿತ್ ಸುಕ್ಣಿಂ ಸಾವ್ಜಾಂ, ತಾಂಚೊ ಚಿಲಿಪಿಲಿ ತಾಳೊಚ್ ಇತ್ಲೊ ಮಧುರ್ ಜಾವ್ನಾಸ್ತಾನಾ ಸುಕ್ಣಿಂ ಕಿತ್ಲಿಂ ಸೊಭಿತ್ ಆಸಾನಾಯೆ? ಸೊಭಿತ್ ಫುಲಾಂ, ಇತ್ಲ್ಯಾ ಸುವಾಧಿಕ್ ಪರ್ಮಳಾಚಿಂ ಫುಲಾಂ ಕಿತ್ಲಿಂ ಸೊಭಿತ್ ಆಸಾನಾಯೆ? ತೊ ಮತಿಂತ್ ಲೇಕ್ ಘಾಲುನ್ ಆಸ್ಲ್ಲೊ ತರ್ಯೀ ಅಜೂನ್ ಪರ್ಯಾಂತ್ ತಾಕಾ ಕೆದಿಂಕ್ಚ್ ಅಪ್ಲ್ಯಾ ಮತಿಂತ್ ಆಸ್ಚಾ ಹ್ಯಾ ಪಿಂತುರಾಂಕ್ ದೆಖ್ಚೆಂ ಭಾಗ್ ಮೆಳ್ಳೆಂಚ್ ನಾ.
ದೆವಾನ್ ರಚ್ಲಾಂ ರಾನ್, ತಾಂತುಂ ಆಸಾತ್ ರೂಕ್ ಝಡಾಂ, ವಾಲಿ ಫುಲಾಂ, ರಾನಾಂತ್ ತಶೆಂ ಗಾಂವಾಂತ್ ಖಾಂವ್ಕ್ಯೀ ಮೆಳ್ತಾತ್ ಫಳಾಂ, ಆಂಬೆ, ಲಿಂಬೆ, ಪೊಣೊಸ್, ದಾಕೊ, ಸಿತಾಫೊಳಾಂ. ತರ್ಯೀ ತಾಚಾ ಜಿಣ್ಯೆಂತ್ ದೀಸ್ ಯಾ ರಾತ್ ದೊನಾಂಕೀ ಆಸ್ಚೊ ಅರ್ಥ್ ಎಕ್ಚ್. ದೆವಾನ್ ರಚ್ಲಾಂ ಇತ್ಲೆಂ ಸೊಭಿತ್, ಜಿಯೆಂವ್ಚೊ ಜಿವಿ, ಮನ್ಜಾತಿ, ಮಾಜ್ರಾಂ, ಸುಣಿಂ, ಗೊರ್ವಾಂ, ಬೊಕ್ರೆ ಯಾ ಹೆರ್. ಹಾಂಚಾಕೀ ಸೊಭಿತ್ ಆನಿಂ ಬುಧ್ವಂತ್ ಮನಿಸ್.
ಪುಣ್ ಕಂಗಾಲಾಚಾ ವಾಂಟ್ಯಾಕ್ ಉರ್ಲಾಂ ಮಾತ್ರ್ ಗೈರೆಂ ಗೈರೆಂ ಜಿವಿತ್ - ಸರ್ವ್ ಕಾಳೆಂ ಆನಿಂ ಕಾಳೊಕ್.
ತರ್ಯೀ ತೊ ಜಿಯೆಲಾ ಆನಿಂ ಜಿಯೆತಾ, ತಾಕಾ ದೆವಾನ್ ನಾಕ್ ದಿಲಾಂ ಉಸ್ವಾಸ್ ಸೆಂವ್ಕ್, ಕಾನ್ ದಿಲ್ಯಾತ್ ಹೆರಾಂಕ್ ಆಯ್ಕೊಂಕ್, ಜೀಬ್ ದಿಲ್ಯಾ ಹೆರಾಂಕ್ ಉಲೊ ಮಾರುಂಕ್, ತಕ್ಲಿ ದಿಲ್ಯಾ ಚಿಂತುಂಕ್, ದೀಶ್ಟ್ ಏಕ್ ನಾ ದೆಕುನ್ ತಾಕಾ ತಾಣೆ ಜಿಯೆಂವ್ಚಿ ಜಿಣಿ ಮ್ಹಳ್ಯಾರ್ ಖರೊಚ್ ಏಕ್ ಖುರಿಸ್ ಶಿವಾಯ್ ಹೆರ್ ಕಿತೆಂಚ್ ನ್ಹಯ್. ತರ್ಯೀ ತಾಚಾಯ್ ಚಿಂತ್ನಾಂನಿ, ಸೊಭಿತ್ ಸ್ವಪ್ಣಾಂ ಯೆತಾತ್ ತವಳ್ ತವಳ್, ತಾಕಾಯ್ ಭುಕ್ ಆಸಾ, ಆಶಾ ಆಸಾ, ವೊಡ್ಣಿ ಆಸಾ, ಜಿರ್ವಣ್ ಆಸಾ. ತಾಕಾಯ್ ಆಶಾ-ಅತ್ರೆಗ್ ಆಸಾತ್. ತಾಚಾಯ್ ಆಂಗಾರ್ ಆಸ್ಚೆಂ ರಗಾತ್ಚ್.
ತ್ಯಾ ಕಾಳಾರ್, ದೊಳೆ ಆಸ್ಚೆ ಜಾಯ್ತೆ ಮನಿಸ್ ಹಿಮಾಲಯಾಂತ್ ಬೊಸೊನ್ ತಪಸ್ ಕರುಂಕ್ ಅಪ್ಲ್ಯಾ ಕುಟ್ಮಾಕ್ ಸೊಡ್ನ್ ವೆತಾಲೆ. ಥೊಡೆ ದೈವಿಕ್ ಚಿಂತ್ನಾಂನಿ ತರ್ ಥೊಡೆ ಪೊಳ್ಕುರ್ಯಾ ಚಿಂತ್ನಾಂನಿ. ಅಶೆಂ ಗೆಲ್ಲೆ ತೆ ಮಯ್ನೆ/ವರ್ಸಾಂ ಉತ್ರೊನ್ ಪಾಟಿಂ ಯೆತಾನಾ ತಾಂಚಾ ತೊಂಡಾಚೆ ಖಾಡ್ ತಾಂಚಾ ಪೊಟಾಚೆರ್ ಲಾಂಬ್ತಾಲೆ. ಸಾದೆಂ ನೆಸಾಪ್ ತೆ ನೆಸೊನ್, ಗಳ್ಯಾರ್ ಮಣ್ಯಾಂಚೆ ಹಾರ್ ಗುಂತುನ್ ಲೊಕಾಂಕ್ ಮೆಳ್ತಾಲೆ, ತಾಂಚಾ ಗರ್ಜಾಂಕ್ ಸಮ್ಜೊನ್ ಸಲ್ಹಾ ದಿತಾಲೆ ತಶೆಂಚ್ ತಾಂಚಾ ಕಸ್ಟಾಂಕ್ ಸಮ್ಜೊನ್ ತಾಂಚೊ ಪರಿಹಾರ್ ದಿತಾಲೆ.
ಕಂಗಾಲ್ ಅವೆಕ್ತ್ ಚಿಂತ್ಪಾಚೊ ಜಾಲೊ, ತಾಕಾ ಹೆರಾಂಚಾ ಭಿರ್ಮತೆಚೆರ್ ಮಾತ್ಸೊ ಕಾಂಠಾಳೊ ಯೇಂವ್ಕ್ ಲಾಗ್ಲೊ. ತಾಕಾಯ್ ಸ್ವತಂತ್ರ್ ಉಭ್ಚಾ ಸುಕ್ಣ್ಯಾಪರಿಂ ಉಭ್ಚಿ ಆತುರಾಯ್ ಆನಿಂ ವೋಡ್ ಭಳ್ ಜಾವ್ನ್ ಆಯಿಲ್ಲಿಚ್ ತಾಣೆ ಅಪ್ಲ್ಯಾ ಜಿಯೆಂವ್ಚಾ ಜಿಣ್ಯೆಚೆರ್ ಕಾಂಠಾಳೊಂಕ್ ಧರ್ಲೆಂ. ತಾಕಾ ತಾಚಾ ಭುಕೆಚೆರ್ ಲಜ್ ದಿಸೊಂಕ್ ಲಾಗ್ಲಿ. ತಾಚಾಯ್ ಮತಿಂತ್ ಅಪ್ಣಾನ್ಯೀ ಅಶೆಂಚ್ ಕಶೆಂ ಪುಣೀಂ ಕರ್ನ್ ಹಿಮಾಲಯಾಕ್ ವಚೊನ್ ತಪಸ್ಸ್ ಕರಿಜಾಯ್, ಅಪ್ಣಾಕ್ಯೀ ಅಪ್ಣಾಚಿ ಆಶಾ ಸುಫಳ್ ಕರಿಜಾಯ್ ಮ್ಹಳ್ಳಿಂ ಚಿಂತ್ನಾಂ ಖಾಂತಂವ್ಕ್ ಲಾಗ್ಲಿಂ.
ಹಿಮಾಲಯಾಕ್ ವಚೊನ್ ಪಾಟಿಂ ಆಯಿಲ್ಲ್ಯಾ ಎಕಾ ಸನ್ನ್ಯಾಸಿಲಾಗಿಂ ಕಂಗಾಲಾನ್ ಅಪ್ಲಿ ಆಶಾ ಉಚಾರ್ತಚ್ ತೊ ಸನ್ನೇಸಿ ಹಾಸೊಂಕ್ ಲಾಗ್ಲೊ ಆನಿಂ ಮ್ಹಣಾಲೊ;
"ಅಳೆ ಪುತಾ, ಪಯ್ಲೆಂ ಸನ್ನ್ಯಾಸಿ ಭೆಸ್ ಜೊಡುಂಕ್ ಎಕಾ ರಿತಿಚೊ ವೈರಾಗ್ ಗರ್ಜೆಚೊ, ಮತಿಂತ್ ಫಕತ್ ಆಶಾ ಘೆವ್ನ್ ಕೊಣಾಯ್ಚಾನೀ ಸನ್ನ್ಯಾಸಿ ಜಾಂವ್ಕ್ ಸಾಧ್ಯ್ ನಾ. ತ್ಯಾ ಭಾಯ್ರ್ ತುಂ ತೆಂ ವೈರಾಗ್ಪಣ್ ಆಸಾ ತರ್ ಹಿಮಾಲಯ್ ಕಿತ್ಯಾಕ್? ಸಂಸಾರಾಚಾ ಖಂಚಾಯ್ ಕೊನ್ಶಾರ್ ತಪಸ್ಸ್ ಕರ್ಯೆತ್. ಫಕತ್ ಎಕಾ ಮನಾನ್ ಸರ್ವ್ ಧ್ಯಾನ್ ಎಕ್ಟಾಂವ್ನ್ ಬೊಸ್ಲ್ಯಾರ್ ಜಾಲೆಂ"
ಸನ್ನ್ಯಾಸಿ ಅಪ್ಲಿ ವಾಟ್ ಧರುನ್ ಗೆಲೊ. ಕಂಗಾಲ್ ಅಪ್ಲೇಸ್ತಕಿಂ ಚಿಂತುಂಕ್ ಪಡ್ಲೊ;
"ಅಪ್ಣಾಕ್ ಜರ್ ಅಪ್ಣಾಚಿ ಆಶಾ ಸುಫಳ್ ಕರಿಜಾಯ್ ತರ್, ಪಯ್ಲೆಂ ಅಪ್ಣಾಕ್ ವೈರಾಗ್ಪಣ್ ಗರ್ಜೆಚೆಂ - ವೈರಾಗ್ಪಣ್ ಮ್ಹಳ್ಯಾರ್ ಸಂಸಾರಿ ಸಂಗ್ತ್ಯಾಂಚೆರ್ ಕಾಂಟಾಳೊ, ಆನಿಂ ತೆದ್ನಾಂ ಹ್ಯಾ ಬೌತಿಕ್ ಚಿಂತ್ನಾಂತ್ಲೊ ಮೆಕ್ಳೊ ಜಾಂವ್ಕ್ ಅಸಾಧ್ಯ್, ಪುಣ್ ಸಂಸಾರಾಂತ್ಲಿ ಖಂಚಿಯ್ ಸುವಾತ್ ಅಪ್ಣಾಕ್ ಎಕಾ ಮನಾನ್ ತಪಸ್ಸ್ ಕರುಂಕ್ ದಿಂವ್ಚಿನಾ, ಕಿತ್ಯಾಕ್ ಮ್ಹಳ್ಯಾರ್ ತಶೆಂ ಆಸ್ತೆಂ ತರ್ ಹಿಮಾಲಯಾಕ್ ಮಹತ್ವ್ ಉದೆತೊಚ್ ನಾ. ಬುರ್ಗ್ಯಾಂಕ್ ವಿಧ್ಯಾ ಶಿಕ್ಚಾಕ್ ಇಸ್ಕೊಲಾಕ್ ವೆಚಿ ಗರ್ಜ್ ಯೆತಿನಾ, ಲೊಕಾಂಕ್ ಪುಜಾ ಕರ್ಚಾಕ್ ದಿವ್ಳಾಂಕ್, ಯಾ ಪುಜಾ ಜಾಂವ್ಚಾ ಜಾಗ್ಯಾಂಕ್ ವೆಚಿ ಗರ್ಜ್ ಉದೆತಿನಾ"
ತಾಚಾ ಮತಿನ್ ಲೇಕ್ ಘಾಲುಂಕ್ ಧರ್ಲ್ಲೆಂ. ತಾಕಾ ವೈರಾಗ್ಪಣ್ ಆಸ್ಲ್ಲೆಂ, ಅಪ್ಣಾನ್ ಜಿಯೆಂವ್ಚಾ ಜಿಣ್ಯೆಚೆರ್. ಆನಿಂ ಹೊ ತಾತ್ಸಾರ್ ಇತ್ಲೊ ಆಸ್ಲ್ಲೊಕೀ, ತಾಚಾ ಮತಿಕ್ ಚಡಿತ್ ತೇಂಪ್ ರಾವೊಂಕ್ ಜಾಲೆಂನಾ. ತರ್ಯೀ ಸುಮಾರ್ ತೇಂಪ್ ಪರ್ಯಾಂತ್ ತೊ ಅಪ್ಣಾಕ್ ಹಿಮಾಲಯಾಚಿ ವಾಟೆ ಪರ್ಯಾಂತ್ ಕೊಣೀಂ ಪಾವಯ್ತ್ಗಾಯ್ ಮ್ಹಣ್ ರಾಕೊನ್ ರಾವ್ಲೊ.
ಸಭಾರ್ ತೆಂಪಾ ಉಪ್ರಾಮ್ತ್ ತವಳ್ ತವಳ್ ತ್ಯಾ ಗಾಂವಾಕ್ ಯೆಂವ್ಚೊ ಎಕ್ಲೊ ಸನ್ನ್ಯಾಸಿಕ್ ಕಂಗಾಲಾಚಿ ಸುಪ್ತ್ ಆಶಾ ಸಮ್ಜತೆಚ್, ತಾಚೆಂ ಹಠ್ ಪಳೆವ್ನ್ ಇಲ್ಲೊ ಕಾವ್ಜೆಲೊ.
"ತಪಸ್ ಕರುಂಕ್ ಫಕತ್ ಹಟ್ ಆಸ್ಲ್ಯಾರ್ ಪಾವಾನಾ, ಸಮಧಾನ್ ಆನಿಂ ಸೊಸ್ಣಿಕಾಯ್ ಭೋವ್ ಗರ್ಜೆಚಿ."
ಕಂಗಾಲಾಕ್ ಕಿತೆಂ ಸಾಂಗ್ಚೆಂ ಮ್ಹಳ್ಳೆಂ ಕಳ್ಳೆಂನಾ. ತೊ ಮೌನ್ ರಾವ್ಲೊ ಆನಿಂ ಸನ್ನೇಸಿಕ್ ತಾಚೆಂ ಮೌನ್ ಪಸಂದ್ ಜಾಲೆಂ ಆನಿಂ ಅಪ್ಣಾಸವೆಂ ತಾಣೆಂ ಕಂಗಾಲಾಕ್ ಹಿಮಾಲಯಾಕ್ ಆಪವ್ನ್ ವೆಲೆಂ.
ಸುಮಾರ್ ದಿಸಾಂಚಿ ವಾಟ್ ಚಲೊನ್ ಹಿಮಾಲಯಾಕ್ ಪಾವ್ಲ್ಲೊ ಕಂಗಾಲ್ ಹೆರ್ ಸನ್ನ್ಯಾಸಿಂ ಸವೆಂ ಎಕಾ ಸುವಾತೆರ್ ತಪಸ್ಸ್ ಕರುಂಕ್ ಧರ್ಲೆಂ. ಅಟ್ಟಾಂಗ್ ರಾನ್ ಆನಿಂ ತ್ಯಾ ರಾನಾಮಧೆಂ ಏಕ್ ಲ್ಹಾನ್ ಗುಡ್ಸುಲ್ ಆನಿಂ ತ್ಯಾ ಗುಡ್ಸುಲಾಚಾ ಬಗ್ಲೆನ್ ಆಸ್ಚಾ ವ್ಹಡ್ಲ್ಯಾ ರುಕಾಚಾ ಮುಳಾಂಕ್ ಕಂಗಾಲ್ ಮಾತ್ರ್ ನ್ಹಯ್ ತಾಚೆಸವೆಂ ಸಭಾರ್ ತಪಸ್ಸ್ ಕರ್ಚಾರ್ ಪಡ್ಲ್ಯಾತ್.
ದೀಸ್ ಮ್ಹಣ್ ನಾ, ರಾತ್ ಮ್ಹಣ್ ನಾ, ಭುಕ್ ಯಾ ಪಿಡಾ ಕಸಲಿಚ್ ಹಾಂಚಾ ತಪಸ್ಸಾಕ್ ಭಂಗ್ ಕರುಂಕ್ ಆಯ್ಲ್ಯೊನಾಂತ್. ದೀಸ್ ಹಾಪ್ತೆ ಜಾಲೆ, ಹಾಪ್ತೆ ಮಯ್ನೆ ಜಾಲೆ, ತೊಂಡಾರ್ ಖಾಡ್ ಲಾಂಬ್ಲೆ, ಹ್ಯಾ ಇತ್ಲ್ಯಾ ದಿಸಾಂನಿ ತಾಂಕಾ ತಾಳುಂಕ್ ಆಯಿಲ್ಲ್ಯಾ ಭುಕೆಕ್, ಪುರಾಸಣೆಕ್, ತಾಳ್ಣೆಕ್, ವೊಡ್ಣೆಕ್, ನಿದೆಕ್ ಅಪ್ಲ್ಯಾ ಎಕಾ ಮನಾಚಾ ಚಿಂತ್ಪಾನ್ ಮುಟಿಂತ್ ಧರ್ಲ್ಲೆಂ. ಕುಡಿಚಾಕೀ ಮತ್ ವ್ಹಡ್ ಮ್ಹಳ್ಳೆಂ ತಾಂಚಾನ್ ಕಾರ್ಯಗತ್ ಕರುಂಕ್ ಆಸ್ಲ್ಲೆಂ.
ಎಕೆಕಾ ತಪಸ್ಸ್ ಕರ್ಚಾಕ್ ಎಕೆಕ್ ಮಿಸಾಂವ್ ಆಸಾ, ಕಂಗಾಲಾಚೆಂ ಮಿಸಾಂವ್ ಭೋವ್ ವೆಗ್ಳೆಂ. ತೊ ಕುಟ್ಮಾಚೆರ್ ಜಾಂವ್, ಸಂಬಂಧಾಂಕ್ ಜಾಂವ್ ಯಾ ಸಂಸಾರಾಚಾ ಕಸ್ಲ್ಯಾಯ್ ಸಂಗ್ತ್ಯಾಂಕ್ ಕಾಂಠಾಳೊನ್ ಆಯಿಲ್ಲೊ ಬಿಲ್ಕುಲ್ ನ್ಹಯ್. ತೊ ಆಯ್ಲಾ ಫಕತ್ ಎಕಾ ಇರಾದ್ಯಾನ್ - ಹೆರಾಂನಿ ಕಾಂಟಾಳ್ಚಾ ಸಂಗ್ತ್ಯಾಂಕ್. ರಚ್ನಾಂಕ್ ವ್ಹಡಾ ಮೊಗಾನ್ ಪಳೆಂವ್ಕ್. ತಾಕಾ ಸೊಭಾಯೆಚೆರ್ ಪಿಸಾಯ್ ಉದೆಲ್ಲಿ, ದೆವಾನ್ ರಚ್ಲ್ಲಿ ಸೊಭಾಯ್ ಪಳೆಂವ್ಕ್ ತಾಚೆಂ ಮನ್ ಅತ್ರೆಗ್ತಾಲೆಂ. ತಾಕಾ ಮನ್ಜಾತೆಂಕ್, ಮನ್ಶಾಂಕ್ ಪಳೆಂವ್ಚಿ ಖತ್ಕತಿ ಆಶಾ ಆಸ್ಲ್ಲಿ. ದೆವಾನ್ ರಚ್ಲ್ಲಿ ಹಿ ಪ್ರಥ್ವಿ ಕಶಿ ಆಸಾ, ಮನಿಸ್ ಕಿತ್ಲೊ ಸೊಭಿತ್, ಸುಂದರ್? ಏಕ್ ಕುಟಾಮ್ ಕಿತ್ಲೆಂ ಸೊಭಿತ್ ಆಸ್ಯೆತ್? ಏಕ್ ಆವಯ್, ಬಾಪುಯ್, ಭಾವ್-ಭಯ್ಣ್ಯೊ, ಸಂಬಂದ್ ಪಳೆಜಾಯ್ ಆಸ್ಲ್ಲೆಂ.
ತಾಚಾ ಮತಿಂತ್ ದೀಸ್ ಗೆಲ್ಲೆಪರಿಂ ಅಪ್ಣಾಚಾ ತಪಸ್ಸಾಕ್ ಮಾಂಧುನ್ ಘೆವ್ನ್ ದೇವ್ ಅಪ್ಣಾಸಮೊರ್ ಝಳ್ಕಾತಲೊ ಆನಿಂ ಅಪ್ಣಾಚಿ ಆಶಾ ಸುಫಳ್ ಕರ್ತಲೊ ಮ್ಹಳ್ಳೊ ಅಖಂಡ್ ಭರ್ವಸೊ ತಾಕಾ ಆಸ್ಲ್ಲೊ.
ತರ್ನಾಟೊ ತೊ ದೆಕುನ್ ಕಠೀಣ್ ಸಕತ್ ತಾಚಾ ಕುಡಿಂತ್ ಆಸ್ಲ್ಲಿ, ಧಯ್ರ್ ತಾಚಾ ಕಾಳ್ಜಾಂತ್ ಆಸ್ಲ್ಲೆಂ, ಹಟ್ ತಾಚಾ ಮನಾಂತ್ ಆಸ್ಲ್ಲೆಂ. ಹಟ್ ಆನಿಂ ಆಶಾ ಎಕಾಮೆಕಾ ಪರಿಪೂರಕ್. ಜಿತ್ಲಿ ಚಡ್ ಆಶಾಗೀ ತಿತ್ಲೆಂ ಹಟ್ ಮಾತ್ರ್ ತ್ಯಾ ಆಶೆಕ್ ಸುಫಳ್ ಕರುಂಕ್ ಸಕ್ತಾ.
ಮಯ್ನೆ ವರ್ಸಾಂ ಜಾವ್ನ್ ಬದಲ್ಲಿಂ. ತರ್ಯೀ ಕಂಗಾಲಾಚಾ ತಪಸ್ಸಾಚೊ ಸ್ಪಿರಿತ್ ಉಣೊ ಜಾಲೊನಾ. ಆತಾಂ ತಾಕಾ ನಾಡುಂಕ್ ಸಂಸಾರಾಚೊ ರಚ್ನಾಂ ಆಯ್ಲ್ಯೊ, ಮುಸಾರುಪಾರ್, ಝಳಾರೆರುಪಾರ್, ಸುಕ್ಣ್ಯಾಂ ರುಪಾರ್, ರುಕಾಚಾ ಖೊಲಿಯೆರುಪಾರ್. ತರ್ಯೀ ತೊ ಜಾಣಾಸ್ಲ್ಲೊ ಹೆಂ ಸರ್ವ್ ಘಡ್ತಾ ಫಕತ್ ಎಕಾ ಪರಿಕ್ಶಾ ರುಪಾರ್ ಮಾತ್ರ್. ಅಪ್ಣಾನ್ ಹ್ಯಾ ಪರಿಕ್ಶೆಂತ್ ಸಲ್ವಾನಾಯೆ ಮ್ಹಳ್ಳೆಂ ಚಿಂತಾಪ್ ತಾಚಾ ಮತಿಂತ್ ಖಡ್ಪಾಪರಿಂ ಪಾಳಾಂ ರೊಂಭಯ್ಲಾಗ್ಲೆಂ. ತಾಚಾ ಮತಿಂತ್ಲ್ಯಾ ದೊಳ್ಯಾಂನಿ ಎದೊಳ್ಚ್ ಧೊವ್ಸಾಣೆಚೆರ್ ಬೊಸೊನ್ ಯೆಂವ್ಚಾ ಸೊಭಿತ್ ವೊರಾಕ್ ಪಳೆಲೆಂ. ಸಂಗಿತಾಚಾ ನಾದಾನ್ ಸಕ್ಲಾ ದೆಂವ್ಚೊ ಪರ್ಜಳಿತ್ ಮುಖಮಳಾಚೊ. ಭೋವ್ಶಾ ದೇವ್ ಜಾಯ್ಜಯ್ - ತಾಣೆಂ ಮತಿಂತ್ ಲೇಕ್ ಘಾಲೆಂ.
ಹೆಂ ರುಪ್ಣೆಂ ಜೆಂ ತಾಚಾ ಮತಿಚಾ ದೊಳ್ಯಾಂನಿ ದೆಖ್ಲ್ಲೆಂ ಪಳೆಲ್ಲ್ಯಾ ತಾಚಾ ಕುಡಿಂತ್ ನವೊ ಜೀವ್ ಭರೊನ್ ಆಯ್ಲೊ. ದೀಸ್ ಗೆಲ್ಲೆಪರಿಂಚ್ ತಾಚಾ ಕುಡಿಂತ್ ನವೊ ಉಲ್ಲಾಸ್ ಭರೊನ್ ಆಯ್ಲೊ. ತೊ ಆತಾಂ ತರ್ನಾಟ್ಪಣ್ ಉತ್ರೊನ್ ವೆಚಾ ಪಾಂವ್ಡಾರ್ ಆಸ್ಲ್ಲೊ. ತಾಚೆಸವೆಂ ಆಸ್ಲ್ಲೆ ಎಕೆಕ್ಲೆಚ್ ಮೆಕ್ಳೆ ಜಾಲೆ ತರ್ಯೀ ಹ್ಯಾ ಕಸಲ್ಯಾಯ್ ಸಂಗ್ತ್ಯಾಂಚಿ ಜಾಣ್ವಾಯ್ ತಾಕಾ ನಾತ್ಲ್ಲಿ.
ಅಶೆಂ ಎಕಾ ಸುಭಾಗಿ ದಿಸಾ ತಾಚಿ ಆಶಾ ಜ್ಯಾರಿ ಜಾಂವ್ಚೊ ದೀಸ್ ಉದೆಲೊ, ಮಧ್ಯಾನೆ ರಾತಿಂ ತಾಚೆಮುಖಾರ್ ಉಭೊ ಆಸ್ಲ್ಲ್ಯಾ ಎಕಾ ಪರ್ಜಳಿತ್ ಮನ್ಶಾನ್ ಅಪ್ಲ್ಯಾ ಹಾತಾಂತ್ ಆಸ್ಚಾ ಎಕಾ ಬೊಡಿಯೆಂತ್ ಕಂಗಾಲಾಚಾ ದೊಳ್ಯಾಂಕ್ ಆಪಡ್ಲೆಂ. ಆನಿಂ ಕಂಗಾಲಾಚಾ ದೊಳ್ಯಾಂಚಿಂ ಖೊವ್ಳಾಂ ಝಡೊನ್ ಪಡ್ಲಿಂ. ತಾಣೆ ಅಪ್ಲೆ ಹಾತ್ ದೊಳ್ಯಾಂಕ್ ಆಡ್ ಧರ್ಲೆ. ಸುಮಾರ್ ವೇಳ್ ಜಾತೆಚ್ ತಾಣೆಂ ದೊಳೆ ಸೊಡ್ಲೆ ಆನಿಂ ಸೊಡ್ಟಾನಾ ಕಿತೆಂ ಪಳೆತಾ ತೊ?
ಥೊಡೊಸೊ ವೇಳ್ ತಾಚಾ ಮುಖ್ಲ್ಯಾನ್ ಆಸ್ಚಾ ಎಕೆಕಾ ರಚ್ನಾಂಕ್ ತಾಚಾ ಮತಿನ್ ಒಪುನ್ ಘೆತ್ಲ್ಲೊ ಅರ್ಥ್ ತಾಣೆ ದಿಲೊ. ವಾಲಿ, ರೂಕ್, ಝಡಾಂ, ಫುಲಾಂ, ಫಳಾಂ. ಪಯ್ಲೆಂ ಅಪ್ಲೆ ಹಾತ್-ಪಾಂಯ್, ಅಪ್ಲ್ಯಾ ಕುಡಿಚೆ ವಿಸ್ವೆ ತಾಣೆ ಚೊಯ್ಲೆ. ತಾಚಾ ಭಂವಾರಿಂ ಬೊಸೊನ್ ತಪಸ್ಸ್ ಕರ್ಚೆ ದೊಳೆ ಧಾಂಪುನ್ ಬೊಸ್ಲ್ಲೆ. ಕಂಗಾಲ್ ಸಂತೊಸಾನ್ ಬೊಭಾಟ್ಲೊ, ಪುಣ್ ತಾಚೊ ತಾಳೊ ತ್ಯಾ ರಾನಾಂತ್ ವಾಟೊ ಸೊಧುನ್ ರಿಗ್ಲ್ಯೊ ಆನಿಂ ನಾಂವ್ ನಾಸ್ತಾಂಚ್ ಲಿಪೊನ್ ಗೆಲೊ.
ತೊ ಉಟ್ಲೊ ಆನಿಂ ಶೆವೊಟ್ ನಾತ್ಲ್ಲ್ಯಾ ವಾಟೆರ್ ಸಂತೊಸಾನ್ ಚಲೊನ್ ವಚಾಲಾಗ್ಲೊ. ಥೊಡ್ಯಾ ದಿಸಾಂನಿ ತೊ ಎಕಾ ಪರ್ಕಿ ಗಾಂವಾಕ್ ಪಾವ್ಲೊ. ತಾಣೆ ಅಪ್ಲ್ಯಾಂಕ್ ಎದೊಳ್ ಪಳೆಂವ್ಕ್ ನಾತ್ಲ್ಲೆಂ ದೆಕುನ್ ಹಾಕಾ ಪರ್ಕಿ ಕಶೆಂ ಮ್ಹಣ್ ತೊ ಲೆಖ್ತಲೊ? ಮನ್ಶಾಂನಿ ಉಲಂವ್ಚೆಂ, ಹಾಸ್ಚೆಂ ರಡ್ಚೆಂ, ಉಲಂವ್ಚೆಂ ಪಳೆವ್ನ್ ಸಂತೊಸ್ಲೊ.
ಹ್ಯಾ ಸರ್ವ್ ದಿಸಾಂನಿ ತಾಣೆಂ ಖಾಂವ್ಚೆಂ ಖಾಣ್, ಪಿಯೆಂವ್ಚೆಂ ಉದಾಕ್ ಸಯ್ತ್ ತಾಣೆಂ ದೊಳೆಭರ್ ಪಳೆಂವ್ಕ್ ಧರ್ಲೆಂ. ದೆವಾನ್ ರಚ್ಲ್ಲಿ ಮಾತಿ, ಫಾತೊರ್, ರೂಕ್, ಸುಕ್ಣಿಂ, ಮೊಳಾಬ್, ಮೊಡಾಂ ಹರ್ಯೆಕ್ ತಾಕಾ ಸೊಭಿತ್ ದಿಸ್ಲಿಂ. ತೊ ಜಿಯೆಂವ್ಕ್ ಆಶೆತಾಲೊ ಆನಿಂ ತಾಚಾ ಆಶಾ-ಅತ್ರೆಗಾಂನಿ ತಾಕಾ ಜಿಯೆಂವ್ಕ್ ಸೊಡ್ಲ್ಲೆಂ.
ಆತಾಂ ತಾಕಾ ತಾಚಿ ಜಿಣಿ ಸೊಭಿತ್ ದಿಸಾಲಾಗ್ಲಿ. ತಾಣೆಂ ನೆಸ್ಚೆಂ ನೆಸಾಪ್, ತಾಣೆಂ ಮೆಳ್ಚೊ ಲೋಕ್, ತಾಣೆಂ ರಾಂವ್ಚಿ ಸುವಾತ್ ಸಯ್ತ್ ತಾಕಾ ಸೊಭಿತ್ ದಿಸೊಂಕ್ ಲಾಗ್ಲಿ. ಅಶೆಚ್ ದೀಸ್ ಮಯ್ನೆ ಜಾಲೆ ಮಯ್ನೆ ವರ್ಸಾಂ ಜಾವ್ನ್ ಆಯ್ಲಿಂ.
ತೊ ಜಿಯೆಲೊ ಇತ್ಲೆ ದೀಸ್, ಆನಿಂ ಎದೊಳ್ಚ್ ತಾಕಾ ದೆವಾಚಾ ರಚ್ನಾಂಕ್ ಲಾಗ್ಸಿಲ್ಯಾನ್ ಪಳೆಂವ್ಕ್ ಸಾಧ್ಯ್ ಜಾಲೆಂ. ತಾಕಾ ಆತಾಂ ಮೋಗ್ ಆನಿಂ ರಾಗ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸಮ್ಜೊನ್ ಆಯ್ಲೆಂ.
ಎಕಾ ದಿಸಾ ದೋಗ್ ಎಕಾಮೆಕಾ ಉಲವ್ನ್ ಆಸ್ತಾನಾಂಚ್ ಎಕಾಮೆಕಾಲಾಗಿಂ ಝಗ್ಡೊನ್ ಪಡಾಲಾಗ್ಲೆ. ದುಡ್ವಾಚೊ ವಾದ್ ತಾಂಚೊ ಎಕಾಮೆಕಾ ಇತ್ಯಾರ್ಥ್ ಜಾಂವ್ಚಾರ್ ನಾತ್ಲ್ಲೊ. ಎಕ್ಲ್ಯಾನ್ ರಾಗಾನ್ ದುಸ್ರ್ಯಾಚಾ ಪೊಟಾಕ್ ಸುರಿ ಘಾಲಿ ಆನಿಂ ಅಪ್ಣಾಚಿ ವಾಟ್ ಧರ್ನ್ ಗೆಲೊ. ಕಾಯ್ದೆ ಕಾನುನಾನ್ ಅಪ್ಲೆಂ ಕಾಮ್ ಸುರು ಕೆಲೆಂ.
ಕಂಗಾಲಾಚಿ ಮತ್ ಅವ್ಚಿತ್ ಘಡಿತಾಂನಿ ಮಾತ್ಸಿ ಕಾವ್ಜೆಲಿ, ಆತಾಂ ರಸ್ತ್ಯಾರ್ ಕಂಗಾಲ್ ಚಲೊನ್ ವೆತಾಲೊ. ವಾಟೆರ್ ಭಿಕ್ ಮಾಗ್ಚೊ ಲೋಕ್ ಪಾಂಯ್ ನಾಸ್ತಾಂ, ಹಾತ್ ನಾಸ್ತಾಂ, ಪಡೊನ್ ರಡ್ತಾಲೊ, ವಿಳಾಪ್ ಕರ್ತಾಲೊ. ಭುಕೆನ್ ಆಸ್ಚಿಂ ಥೊಡಿಂ ನಾಗ್ಡಿಂ ಬುರ್ಗಿಂ ತಾಂಚೆ ಭಂವಾರಿಂ ನಾಕಾರ್ ಕಿರ್ಮೆಂ ದೆಂವವ್ನ್ ರಡ್ಟಾಲಿಂ. ತಿತ್ಲ್ಯಾರ್ ರಸ್ತ್ಯಾ ದೆಗೆಚಾ ಖಚ್ರ್ಯಾ ಡಬ್ಬ್ಯಾಂತ್ ಕೊಣೆಂಗೀ ಎಕ್ಲ್ಯಾನ್ ಏಕ್ ಪೊಟ್ಲಿ ಉಡಯ್ಲಿ. ತಕ್ಶಣ್ ಹಿಂ ಬುರ್ಗಿಂ ಧಾಂವ್ಲಿಂ ಆನಿಂ ಥಂಯ್ ಆಸ್ಚಾ ಥೊಡ್ಯಾ ಸುಣ್ಯಾಂಸವೆಂ ತಿ ಪೊಟ್ಲಿ ಸುಟವ್ನ್ ತಾಂತ್ಲೆಂ ಖಾಂವ್ಕ್ ಲಾಗ್ಲಿಂ. ತಾಂಚೆ ಮಧೆಂ ಆತಾಂ ಎಕ್ಲೊ ವಡ್ಲೊ ಬುರ್ಗೊ ಆಯ್ಲೊ ಆನಿಂ ಹ್ಯಾ ಬುರ್ಗ್ಯಾಂಚಾ ಹಾತಾಂತ್ ಆಸ್ಚಿ ಪೊಟ್ಲಿ ವೋಡ್ನ್ ವರ್ನ್ ಗೆಲೊ. ಬುರ್ಗಿಂ ಪರತ್ ರಡ್ಲಿಂ.
ಕಂಗಾಲಾನ್ ಎದೊಳ್ಚ್ ಸಮಾಜೆಂತ್ ಜಿಯೆವ್ನ್ ಆಸ್ಚಾಂಕ್ ಪಳೆಲೆಂ. ವಳ್ಕೊಂಕ್ ಧರ್ಲ್ಲೆಂ. ಎಕಾ ಸಾಂಜೆರ್ ತಾಣೆಂ ಎಕಾ ತರ್ನಾಟ್ಯಾಕ್ ಆನಿಂ ಎಕಾ ಬಾಯ್ಲೆಕ್ ಎಕಾಮೆಕಾಚಾ ವೆಂಗೆಂತ್ ಪಳೆಲೆಂ. ತರ್ನಾಟೊ ಅಂಕ್ವಾರ್ ಆನಿಂ ಬಾಯ್ಲ್ ಕಾಜಾರಿ.
ತಾಣೆಂ ಜಲ್ಮಾಲ್ಲೊ ಗಾಂವ್ ಹೊಗ್ಡಾವ್ನ್ ಆತಾಂ ಪರ್ಕಿ ಗಾಂವಾಕ್ ಅಪ್ಲೊ ಗಾಂವ್ ಕರ್ನ್ ಜಿಯೆಂವ್ಚಾ ಕಂಗಾಲಾಕ್ ಪಯ್ಲೆ ಪಾವ್ಟಿಂ ಹ್ಯಾ ಗಾಂವಾಚೆರ್ ಶಿಣ್ ಯೇಂವ್ಕ್ ಲಾಗ್ತಾನಾ ಪಯ್ಲೆ ಪಾವ್ಟಿಂ ತಾಣೆ ಕೆಲ್ಲ್ಯಾ ತಪಸ್ಸಾಚೆರ್ ತಾಕಾ ದುಭಾವಿ ಚಿಂತಾಪ್ ಆಯ್ಲೆಂ.
ತರ್ಯೀ ತಾಣೆಂ ಅನಿಕೀ ಇಲ್ಲೆ ದೀಸ್ ಕಾಡ್ಲೆ ಆನಿಂ ಹ್ಯಾ ದಿಸಾಂನಿ ತಾಣೆಂ ದೆವಾನ್ ಆನಿಂ ಮನ್ಶಾನ್ ರಚ್ಲ್ಲೆಂ ಸರ್ವ್ ಪಳೆಲೆಂ, ಫುಲಾಂ, ಫಳಾಂ, ಸುಕ್ಣಿಂ ಸಾವ್ಜಾಂ, ಮನ್ಜಾತ್ಯೊ, ಧರ್ತಿ, ಕುಪಾಂ, ಮೊಳಾಬ್, ತಾರಾಂ, ದರ್ಯೊ, ಲ್ಹಾರಾಂ, ಮಾಸ್ಳ್ಯೊ, ವಾಲಿ, ಮನ್ಶಾಂ, ಸರ್ವ್ ಬರೆಂ ತಾಣೆಂ ಪಳೆಲೆಂ, ಭೊಗ್ಲೆಂ. ತಶೆಂಚ್ ಹೆರ್ಯೀ - ಚೊರಿ ಪಳೆಲಿ, ಝಗ್ಡಿಂ - ಖುನ್ ಪಳೆಲ್ಯೊ, ವ್ಯಭಿಚಾರ್ ಪಳೆಲೊ, ಬಾಸ್ಕಳ್ ಜಿಣಿ ಪಳೆಲಿ, ಮನ್ಶಾಪಣ್ ಹೊಗ್ಡಾಂವ್ಚಾ ಮನ್ಶಾಂಕ್ ಪಳೆಲೆಂ.
********
ಆತಾಂ ಪರತ್ ಏಕ್ ದಾಕ್ಡೊ ಉತರ್ಲಾ, ಕಂಗಾಲ್ ಆತಾಂ ಪರತ್ ಕಂಗಾಲ್ ಜಾಲಾ, ತೊ ಗಾಂವ್ ಸೊಡ್ನ್ ಪಯ್ಸ್ ಪಾವ್ಲಾ, ಭೋವ್ಶಾ ತೊಚ್ ಖುದ್ ನೆಣಾಂ ಖೈಂ ಮ್ಹಳ್ಳೆಂ. ತೊಯ್ ರಸ್ತ್ಯಾರ್ ಭಂವೊನಾಸಾ. ತಾಚಾ ಕಾಳ್ಜಾಂತ್ ಆತಾಂ ಬರೆಂ ಯಾ ವಾಯ್ಟ್ ಹಾಚೆಮಧೆಂ ಅಂತರ್ ನಾ. ತಾಚಿ ಆಶಾ-ಅತ್ರೆಗ್ ಆತಾಂ ಮೆಲ್ಯಾ. ತಾಚೊ ಜೀವ್ ಏಕ್ ಸೊಡ್ಲ್ಯಾರ್ ಹರ್ಯೆಕಾಚೆರ್ ಥಾಕಾ ಕಾಂಠಾಳೊ ಆಸಾ. ಹಿಮಾಲಾಯಾಚೆ ವಾಟೆಕ್ ತಾಣೆಂ ಕೆದ್ನಾಂಗೀ ಪಾಟ್ ಕೆಲ್ಯಾ. ತಾಕಾ ಹ್ಯಾ ಮನಿಸ್ ಜಾವ್ನ್ಯೀ ಮನ್ಜಾತೆಪರಿಂ ಜಿಯೆತೆಲ್ಯಾಂಚೆರ್ ಕಠೀಣ್ ಕಾಂಠಾಳೊ ಭೊಗ್ಲ್ಲೊ. ಭೋವ್ಶಾ ತೊ ಕಾಂಠಾಳೊ ತಾಣೆ ಅಪ್ಣೆ ಜಿಯೆಜಾಯ್ ಮ್ಹಳ್ಳ್ಯಾ ಆಶೆಚಾಕೀ ವರ್ತೊ ಜಾವ್ನಾಸಾಜಯ್, ದೆಕುನ್ಂಚ್ ತಾಣೆಂ ಸಭಾರ್ ವರ್ಸಾಧಿಂಚ್ ಅಪ್ಲೆ ದೊಳ್ಯಾಂಕ್ ವಿಕಾಳ್ ದೀಕ್ ಘಾಲ್ನ್ ಘೆತ್ಲಾ. ಪರ್ತುನ್ ತೊ ಕುಡ್ಡೊ ಜಾವ್ನ್ ಜಿಯೆಂವ್ಕ್ ಲಾಗ್ಲಾ - ಭೋವ್ಶಾ ವ್ಹಡಾ ಸಮಧಾನೆನ್.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
