ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಖಣ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್, ಆಯ್ಕೊಳ್), ಖಣ್ (ವಲ್ಲಿ ಕ್ವಾಡ್ರಸ್), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಕ್ರಿಸ್ಮಸ್ ಕಾಣಿಕ್, ಏಕ್ ಕ್ರಿಕೆಟ್ ಹೀರೊ, ಬಾಂಯ್.
ವಲ್ಲಿ ಕ್ವಾಡ್ರಸ್
ಮಲ್ನಾಡಾಂತ್ ವರ್ಸಾನ್
ವರಸ್ ಜಾಂವ್ಚಾ ಜಾತ್ರ್ಯಾಕ್ ಯೆಂವ್ಚೊ ಚಡ್ತಾವ್ ಲೋಕ್ ಕುಕ್ಕೆಹಳ್ಳೆಚೊಚ್. ಕುಕ್ಕೆಹಳ್ಳಿ ಥಾವ್ನ್ ಮಲ್ನಾಡಾಕ್ ಚಡುಣೆಂ ಸಾತ್ ಮೈಲಾಂಚೊ ಅಂತರ್ ಆಸ್ಲ್ಲ್ಯಾನ್, ಪಯ್ಣಾಕ್ ಬೊಯ್ಲಾಗಾಡಿ ಮೆಳ್ತಾಲಿ ಯಾ ಚಡ್ತಾವ್ ಲೋಕ್ ಚಲೊನ್ಂಚ್ ವೆತಾಲೊ. ತೊ ಜಾತ್ರೊ ಹರ್ಯೆಕ್ಲ್ಯಾಂಕ್ ಭೋವ್ ಅತ್ರೆಗಾಚೊ, ಲ್ಹಾನಾಂಕ್ ಜಶೆಂ ವ್ಹಡಾಂಕ್, ಲ್ಹಾನಾಂಕ್ ತ್ಯಾ ಜಾತ್ರ್ಯಾವೆಳಾರ್ ವೊಡ್ಚೆಂ ತೇರ್ ಆನಿಂ ತಾಚೆವಯ್ರ್ ಪುಜಾಪಾಟ್ ಕರ್ಚೆ ಪುಜಾರಿ, ಆನಿಂ ತಾಣಿಂ ಫುಲಾಂಚೊ ಪ್ರಸಾದ್ ಉಡಯಿಲ್ಲೊ ವಿಂಚುಂಕ್ ಲೊಕಾಂಚೊ ಪುರ್ಶ್ಯಾಂವ್.
ತೇರ್ ಸಂಪ್ತಚ್ ದಾರು ಲಾಸ್ಚೊ, ಪಟಾಕ್ಯೊ ಫೊಡ್ಚ್ಯೊ, ಇತ್ಲೆಂಚ್ ನ್ಹಯ್, ರಸ್ತ್ಯಾರ್ ವಿವಿಧ್ ವೆಸಾರ್ ನಾಸ್ಚೆ, ಖೆಳ್ಚೆ ಮನಿಸ್, ವಾಗಾಚೊ ವೇಸ್, ಕರಡಿಚೊ ವೇಸ್ ಪಳೆಂವ್ಕ್ ಬುರ್ಗ್ಯಾಂಕ್ ಮಜಾಚ್ಚ್ ಮಜಾ.
ಹ್ಯಾ ವರ್ಸಾಯ್ ದಿವ್ಳಾಂತ್ ವಾಂಟ್ಚೊ ಪ್ರಸಾದ್, ಪಂಚಗಜ್ಜಾಯ್, ಕಾಲಯಿಲ್ಲೊ ಪೊವ್, ಕೆಳ್ಯಾಚೊ ಕುಡ್ಕೊ, ಗೋಡ್, ನಾರ್ಲ್... ಅಶೆಂ ತೊ ಜಾತ್ರೊ ಏಕ್ ಜಾತ್ರೊ ಮಾತ್ರ್ ನ್ಹಯ್, ಲೊಕಾಂಚಾ ವಾಂಟ್ಯಾಚೆಂ ಏಕ್ ಫೆಸ್ತ್ಯ್ ಜಾಲ್ಲೆಂ.
ಥೊಡೆ ಪಾರ್ಪೊಳ್ ಮನಿಸ್ ಸುರ್ ಪಿಯೆವ್ನ್ ಯೆವುನ್ ಶಿಲೊಣ್ಯೊ ಘಾಲ್ತಾಲೆ, ಗಾಂವ್ಚಾ ಬಾಯ್ಲಾಂಚೆ ಪಾಲಂವ್, ಪಾಂತಿ ವೊಡುನ್ ಚಿಡಾಯ್ತಾಲೆ ಆನಿಂ ತಿಂ ಬಾಯ್ಲಾಂಯ್ ಶೇಲೆ ಕರುನ್ ಹಾಂಚೆ ಭಂವಾರಿಂ ಭಂವ್ತಾಲಿಂ, ಗೊಡಾ ಭಂವಾರಿಂ ಮೂಸ್ ಭಂವ್ಚೆಪರಿಂ.
ಸಾಂಜೆರ್ ಚಡುಣೆಂ ಸಾತ್ ವೊರಾಶೆಂ ಸುರು ಜಾಂವ್ಚೊ ಹೊ ಜಾತ್ರೊ ಅಖೇರ್ ಜಾತಾನಾ ಇಕ್ರಾ ಉತಾರ್ತಾಲಿಂ. ರಸ್ತ್ಯಾರ್ ಉಭೆಚ್ ಮಾಂಡುನ್ ದವರ್ಲ್ಲೆ ಟ್ಯೂಬ್ ಲಾಯ್ಟ್, ಆಂಬ್ಯಾಂ ಖೊಲ್ಯಾಂನಿ ಸಜಯಿಲ್ಲೆ ರುಕಾಚೆ ಖಾಂಬೆ, ಕುಶಿಂನಿ ವೆವೆಗ್ಳ್ಯಾ ನಮುನ್ಯಾರ್ ಸೊಭಯಿಲ್ಲೆ, ಸಜಯಿಲ್ಲೆ ಬ್ಯಾನರ್ ರಾತ್ ಜೂನ್ ಜಾವ್ನ್ ಆಯಿಲ್ಲೆಪರಿಂಚ್, ತೆ ಚೊರುನ್ ವರ್ಚಾಕ್ ಥೊಡೆ ರಾಕ್ತಾಲೆ.
ಲೊಕಾಂಚಿ ಖೆಟ್ ಉಣಿಂ ಜಾವ್ನ್ ಆಯಿಲ್ಲೆಪರಿಂಚ್ ಜಾತ್ರ್ಯಾಚಿ ಗವ್ಜ್, ಆನಿ ಗಲಾಟೊ, ದಬಾಜೊ ಅಖೇರ್ ಜಾವ್ನ್ ಆಯಿಲ್ಲೊಚ್ ಲೋಕ್ ಅಪಾಪ್ಲ್ಯಾ ಘರ್ಚಿ ವಾಟ್ ಧರುನ್ ಪಾಟಿಂ ಯೆತಾಲೊ. ಥೊಡ್ಯಾಂಚಾ ಹಾತಾಂನಿ ಲಾಂಪ್ಯಾಂವ್, ದಿವೆ, ಥೊಡ್ಯಾಂಚಾ ಹಾತಾಂನಿ ಮೊಡ್ಲಾಂಚಿ ಚೂಡ್, ಥೊಡ್ಯಾಂಚಾ ಹಾತಾಂನಿ ಟೋರ್ಚ್, ತರ್ ಥೊಡೆ ಕಾಳೊಕಾಂತ್ಚ್ ಉಜ್ವಾಡ್ ಆಸ್ಚಾಂಚೊ ಪಾಟ್ಲಾವ್ ಕರುನ್ ವೆತಾಲೆ.
ಕುಕ್ಕೆಹಳ್ಳೆಂಚ್ ಆಸ್ಚಾ ಜೀವ್-ನಿರ್ಜೀವ್ ಜಿವಿಂ ಪಯ್ಕಿ ಕಂಗಾಲ್ಯ್ ಎಕ್ಲೊ. ಕಂಗಾಲ್ ಕುಕ್ಕೆಹಳ್ಳೆಂತ್ ಖೈಂ ಥಾವ್ನ್ ಕಸೊ ಕೆದಾಳಾ ಪಡ್ಲೊ ಮ್ಹಳ್ಳೆಂ ಖುದ್ದ್ ತೋಯ್ ನೆಣಾ. ಕಸೊ ತೊ ಕುಕ್ಕೆಹಳ್ಳೆಂತ್ ಪಡ್ಲೊ ತೆಂ ಮಾತ್ರ್ ನ್ಹಯ್,ಕಶೆಂ ತಾಚೆಂ ನಾಂವ್ಯ್ ತಾಚೆರ್ ಪಡ್ಲೆಂ ಮ್ಹಳ್ಳೆಂ ಕುಕ್ಕೆಹಳ್ಳೆಂತ್ಲೊ ಏಕ್ ಮಿಸ್ತೆರ್ಚ್ ಜಾವ್ನಾಸ್ಲ್ಲೊ. ಕುಕ್ಕೆಹಳ್ಳೆಚಾ ದಿವ್ಳಾಚಿ ನಿತಳಾಯ್ ಕರುನ್ ತೆಚ್ಚ್ ದಿವ್ಳಾಚಾ ಸೊಪ್ಯಾರ್ ತೊ ನಿದ್ತಾಲೊ ಆನಿಂ ದಿವ್ಳಾ ಪಾಟ್ಲ್ಯಾ ನ್ಹಂಯ್ತ್ ನಾತಾಲೊ ಧುತಾಲೊ. ತಶೆಂ ಮ್ಹಣ್ ತೊ ಹಿಂದ್ವಾಂಚೊಗೀ? ಮಾಪ್ಳೊಗೀ ಯಾ ಕಿರಿಸ್ತಾಂವ್ಗೀ ತೆಂ ತೊಚ್ ನೆಣಾಸ್ಲ್ಲೊ. ತರ್ಯ್ ತೊ ಜಾತ್ರೊ ಜಾಂವ್, ಅಲ್ಲಾಹು ಅಕ್ಬರ್ ಜಾಂವ್ ಯಾ ಕ್ರಿಸ್ಮಸ್ ಸಕ್ಕಡ್ ಜಾಗ್ಯಾಂನಿ ವೆತಾಲೊ.
ಜಾತ್ರೊ ಅಖೇರ್ ಜಾಂವ್ಕ್ ಅನಿಕ್ಯ್ ಇಲ್ಲೊ ವೇಳ್ ಆಸ್ಲ್ಲೊ. ಕುಕ್ಕೆಹಳ್ಳೆಚಾ ವಾಟೆರ್ ಸುಮಾರ್ ದೇಡ್ ಮೈಲಾಂಚಾ ಅಂತರಾರ್, ರಸ್ತ್ಯಾಚಾ ದೆಗೆಚಾ ಖಣಿಂತ್ ಎಕ್ಲೊ ಪಡ್ಲ್ಲೊ. ಕುಶಿನ್ಂಚ್ ಏಕ್ ಘರ್ ಆಸ್ಲ್ಲೆಂ ತರ್ಯ್ ಘರ್ಚೆ ದಿವೆ ನಾತ್ಲ್ಲೆ; ಭೋವ್ಶಾ ಘರ್ಚಿಂ ಎದೊಳ್ಚ್ ನಿದ್ಲ್ಲಿಂ ಜಾಯ್ಜಯ್. ಆನಿಂ ಹಾಂಗಾ ಭಾಯ್ರ್ ರಸ್ತ್ಯಾರ್ ಪಾಶಾರ್ ಜಾಂವ್ಚೊ ಲೋಕ್ ಸಗ್ಳೊ ಖಣಿಂತ್ ಪಡ್ಲ್ಲ್ಯಾ ಮನ್ಶಾಕ್ ಪಳೆತಾಲೊ ಆನಿಂ ಪಾಶಾರ್ ಜಾತಾಲೊ. ಎಕೆಕ್ಲೆಚ್ ಚೂಡ್, ಲಾಂಪ್ಯಾಂವ್ ಉಕಲ್ನ್, ಖಣಿಂತ್ ಪಡ್ಲೆಲ್ಯಾಚಾ ಮುಸ್ಕರಾಚೆರ್ ಘಾಲ್ತಾನಾ ತಾಂಕಾಂ ಕಳೊನ್ ಆಯ್ಲೆಂಕೀ ತೊ ಕಂಗಾಲ್ಚ್ ಮ್ಹಳ್ಳೆಂ. ಕಾಂಯ್ ಪಿಯೆವ್ನ್ ಟಾಯ್ಟ್ ಜಾವ್ನ್ ಪಡ್ಲಾಸ್ತಲೊ, ಆಮ್ಕಾಂ ಕಿತ್ಯಾಕ್ ಹಿ ರಾಟಾವಳ್ ಮ್ಹಣೊನ್ ಅಪ್ಲಿ ವಾಟ್ ಮುಖಾರುನ್ ಗೆಲೆ.
ಪಾಟ್ಲ್ಯಾನ್ ಎಕಾ ಪಾಟ್ಲ್ಯಾನ್ ಲೋಕ್ ಪಾಶಾರ್ ಜಾತಾಲೊ, ಥೊಡೆ ಅದಿಕಪ್ರಸಂಗಿ ಮನಿಸ್ ಕಂಗಾಲಾಚಿ ಅವಸ್ತಾ ಪಳೆಲಾಗ್ಲೆ, ತಾಚೆ ಪಾಂಯ್ ಖಣಿಂತ್ ಆಸಾತ್ ಆನಿಂ ತೊ ಉಭೊಚ್ ನಿದ್ಲಾ, ವಸ್ತುರ್ ಅಸ್ತ್ವೆಸ್ತ್ ಆಸಾ, ಜಶೆಂ ಸದಾಂ ಆಸ್ಚೆಪರಿಂ, ತೆಣೆ ಹೆಣೆಂ ಪೊವಾಚೊ ಪೊಟ್ಲ್ಯೊ ಶಿಂಪಡ್ಲ್ಯಾತ್. ಎಕ್ಲ್ಯಾನ್ ಅಪ್ಲ್ಯಾ ಬೊಲ್ಸಾಂತ್ ಆಸ್ಲ್ಲಿ ಸೊರ್ಯಾಚಿ ಲ್ಹಾನ್ ಸಿಸ್ಲಿ ಕಾಡ್ನ್ ತಾಂತುಂ ಆಸ್ಲ್ಲೊ ಅಖ್ರೇಚೊ ಘೊಟ್ ಪಿಯೆವ್ನ್, ತಿ ಸಿಸ್ಲಿ ಥಂಯ್ಚ್ ಗಳವ್ನ್ ಹಳ್ತಾಚಿ ಏಕ್ ಖೊಂಕ್ಲಿ ಕಾಡ್ನ್ ’ಪಳೆತಾಂ ತೊ ಜೀವ್ ಆಸಾಗೀ ಮೆಲಾಗೀ’ ಮ್ಹಣ್ ಪಳೆಂವ್ಕ್ ತ್ಯೇ ಖಣಿಕ್ ದೆಂವ್ಲೊ. ಧಯ್ರ್ ಆರಾವ್ನ್ ಕಂಗಾಲಾಚಾ ಹರ್ಧ್ಯಾರ್ ಕಾನ್ ದವರ್ಲೆ. ಕಂಗಾಲಾನ್ ಫಿಂರ್ಗೊಂಕ್ ಲಾಗ್ತಾನಾ "ಅಬ್ಬಾ ಜೀವ್ ಆಸಾ, ಹಾಚೆಂ ಆಮಾಲ್ ಪಯ್ಲೆಂ ಫಿರ್ವೊಂದಿ, ಉಪ್ರಾಂತ್ ಸಾರ್ಕೊ ಜಾತಲೊ" ಮ್ಹಣೊನ್ ವಯ್ರ್ ಆಯ್ಲೊ ಆನಿಂ ಅಪ್ಲಿ ವಾಟ್ ಧರುನ್ ತೆ ಗೆಲೆ.
ಕಂಗಾಲ್ ದಿವ್ಳಾಂತ್ ಕಾಮ್ ಕರ್ತಾಲೊ ದೆಕುನ್ ತಾಕಾ ಹಿಂದ್ವಾಂಚೊ ಮ್ಹಣ್ಂಚ್ ಲೋಕ್ ವಳ್ಕತಾಲೊ.
ಪಾಟ್ಲ್ಯಾನ್ ಕುಕ್ಕೆಹಳ್ಳೆಚಾ ಮಸಿದಿಚೊ ಮುಖ್ರಿ ಆನಿ ತಾಚೆ ಸಾಂಗಾತಿ ಯೆತಾಲೆ, ತಾಂಕಾಂಯ್ ಕಂಗಾಲ್ ದಿಸ್ಲೊ, ಪುಣ್ ತಾಂಕಾಂ ಚಡ್ ವೇಳ್ ರಾವೊಂಕ್ ಧಯ್ರ್ ಮೆಳ್ಳೆಂನಾ. ಅಧ್ಲೆ ವರ್ಸಾಚಾ ಶಿವರಾತ್ರೆಚಾ ರಾತಿಂ ಪಿಯೆವ್ನ್ ಪಡ್ಲ್ಲ್ಯಾ ಭೊಟಾಚಾ ಪುತಾಕ್ ಉಕ್ಲುಂಕ್ ಗೆಲ್ಲ್ಯಾಕ್ ಪಳೆಲ್ಲ್ಯಾ ಥೊಡ್ಯಾಂನಿ ಮುಖ್ರಿಕ್ ಧರ್ನ್ ಸುಶೆಗಾತ್ ಮಾರ್ಲ್ಲೊ ಮಾತ್ರ್ ನ್ಹಯ್, ಮುಖ್ರಿನ್ ಭಟಾಚಾ ಪುತಾಕ್ ಜಿವ್ಶಿಂ ಮಾರುಂಕ್ ಯೆವ್ಜಣ್ ಘಾಲ್ಲಿ ಮ್ಹಳ್ಳೊ ಗುನ್ಯಾಂವ್ ಮುಖ್ರಿಚಾ ಮಾತ್ಯಾರ್ ಥಾಪ್ಲ್ಲೊ. ಹಾಚೊ ಪರಿಣಾಮ್ ಜಾವ್ನ್ ಹಿಂದ್ವಾಂಚೊ ಆನಿ ಮುಸ್ಲಿಮಾಂಚೊ ಗಲಾಟೊಯ್ ಜಾಲ್ಲೊ. ದೆಕುನ್ ಏಕ್ ಪಾವ್ಟಿಂ ಪಡ್ಲ್ಲ್ಯಾ ಫೊಂಡಾಂತ್ ಪರ್ತುನ್ ಪಡೊಂಕ್ ಮುಖ್ರಿಕ್ ನಾಕಾಸ್ಲ್ಲೆಂ. ತೋಯ್ ಅಪ್ಲ್ಯಾ ಸಾಂಗಾತ್ಯಾಂಕ್ ಘೆವ್ನ್ ಅಪ್ಲಿ ವಾಟ್ ಧರುನ್ ಗೆಲೊ.
ಪಾಟ್ಲ್ಯಾನ್ ಕುಕ್ಕೆಹಳ್ಳೆಚಾ ಇಸ್ಕೊಲಾಚೊ ಮೆಸ್ತ್ರಿ ಆಯ್ಲೊ, ತಾಚೆಸವೆಂ ತಾಚಿ ಧುವ್ ಆನಿಂ ಪೂತ್ ಆಸ್ಲ್ಲಿಂ, ತಾಣೆಂ ಅಪ್ಲ್ಯಾ ಹಾತಾಂತ್ ಆಸ್ಚಾ ಲಾಂಪ್ಯಾಂವಾಚಿಂ ವಾತ್ ವಡ್ ಕರುನ್ ಉಜ್ವಾಡ್ ಚಡವ್ನ್ ಪಳೆಲೆಂವ್ಕ್ಯ್ ಧುವೆನ್ "ಅಪ್ಪಾ ತೊ ಕಂಗಾಲ್ ಅಪ್ಪಾ" ಮ್ಹಣೊಂಕ್ಯ್ ಸಾರ್ಕೆಂ ಜಾಲೆಂ. "ಇಶ್ಶಪ್ಪೆ, ಕಂಗಾಲ್ಗೀ? ತಾಚಿ ಮುಸ್ತಾಯ್ಕಿ ಪಳೆತಾನಾಂಚ್ ಹಾಂವ್ ಸಮ್ಜಾಲೊಂ"
ಮೆಸ್ತ್ರಿನ್ ಇತ್ಲೆಂಚ್ ಮ್ಹಳೆಂ. ಆನಿಂ ಮತಿಂತ್ ಚಿಂತಿಲಾಗ್ಲೊ; ಹಾಂವ್ ಕಾಂಯ್ ಹಾಕಾ ಉಕ್ಲುಂಕ್ ಗೆಲೊಂ ತರ್ ಬೆಸ್ಟೆಂಚ್ ಅಪ್ಲೆಂ ಧೊವೆಂ ಪುಡ್ವೆಂ ಮೆಳ್ತೆಲೆಂ ಆನಿಂ ತೆಂ ಪುಡ್ವೆಂ ನಿತಳ್ ಕರುಂಕ್ ಧಣಾಕ್ ದೀಜಯ್ ಪಡಾತ್, ತ್ಯಾ ಶಿವಾಯ್ ಹಾಂಗಾ ಇಲ್ಲೊ ಚಡ್ ವೇಳ್ ಹಾಚೆಸರ್ಶಿಂ ರಾವ್ಲೊಂ ತರ್ ಪಳೆಲ್ಲೊ ಲೋಕ್ ಕಿತೆಂ ಸಾಂಗೊಂಕ್ ಆಸಾ ಆಪ್ಲ್ಯಾ ಮರ್ಯಾದಿಚೆರ್ ಮ್ಹಣೊನ್ ಅಪ್ಲಿ ವಾಟ್ ಧರುನ್ ಗೆಲೊ.
ದಿವ್ಳಾಚೊ ಪುಜಾರಿ ಪಾಟ್ಲ್ಯಾನ್ ಯೆತಾಲೊ ಆನಿಂ ಎಕ್ಲೊಚ್ ಆಸ್ಲ್ಲೊ ತರ್ಯ್ ಭಕ್ತೆನ್ಗೀ ಭಿಂಯಾನ್ಗೀ, ಜ್ಯೊರಾನ್ ಮಂತ್ರಾಂ ಘಾಲುನ್ ಯೆತಾಲೊ ಆನಿಂ ಸರಾರಾಂ ಮೆಟಾಂ ಕಾಡ್ನ್ ಚಲ್ತಾಸ್ತಾನಾ ಮುಖ್ಲ್ಯಾನ್ ಗೆಲ್ಲ್ಯಾ ಸಗ್ಳ್ಯಾಂನಿ ತೀಳ್ನ್ ಪಳೆಂವ್ಚೆಪರಿಂ ಪುಜಾರಿನ್ಯ್ ತಿಳ್ಳೆಂ. ತಾಚಾ ಹಾತಿಂ ಚೂಡ್ ಆಸ್ಲ್ಲಿ, ವಾರ್ಯಾರ್ ವಯ್ರ್ ಸಕಯ್ಲ್ ಮಾರುನ್ ಪಡ್ಲ್ಲ್ಯಾಚಾ ತೊಂಡಾಲಾಗಿಂ ಹಾಡ್ನ್, ಏಕ್ ಘಡ್ಯೆ ಕಂಗಾಲಾಕ್ ಹ್ಯೇ ಸ್ತಿತೆರ್ ಪಳೆವ್ನ್ ಕಾವ್ಜೆಲೊ ತರ್ಯ್ ತಾಕಾ, ಮಾಸ್-ಮಾಸ್ಳಿ ಖಾಂವ್ಚಾ ಹಡ್ಬ್ಯಾಕ್ ಉಕ್ಲುಂಕ್ ಗೆಲೊಂ ತರ್ ಅಪ್ಲೆಂ ಜನಿವಾರ್ ಮೆಳತ್, ದೆಕುನ್ ವೆಗಿಂಚ್ ಹಾಂಗಾಥಾವ್ನ್ ನಿಕಳ್ಚೆಂಚ್ ಬರೆಂ ಮ್ಹಣ್ ಚಿಂತಿಲಾಗ್ಲೊ. ಪುಣ್ ಪಳೆಲ್ಲೊ ಮನಿಸ್ ಮ್ಹಜಾ ಮರ್ಯಾದೆಚೆರ್ ಸವಾಲ್ ಉಡಂವ್ಕ್ ಆಸಾ ಮ್ಹಣ್ ಅಪ್ಲ್ಯಾ ಖಾಂದ್ಯಾರ್ ಆಸ್ಚೆಂ ಧವೆಂ ಬಾಯ್ರಾಸ್ ತಾಚಾ ತೊಂಡಾರ್ ಧಾಂಪುನ್ ’ಯೆಂವ್ದಿ ಫಾಲ್ಯಾಂ ಖಂಯ್ಚಾಕೀ, ತಾಕಾ ಶಿಕಯ್ತಾಂ ಬೂದ್’ ಮ್ಹಣ್ ಚಿಂತುನ್ ಆಪ್ಲಿ ವಾಟ್ ಧರುನ್ ಗೆಲೊ.
ರಾತ್ ಜೂನ್ ಜಾಲ್ಲಿ, ಪಾಶಾರ್ ಜಾಂವ್ಚೊ ಲೋಕ್ಯ್ ಉಣೊ ಜಾವ್ನ್ ಯೆತಾಲೊ. ಖಣಿಕ್ ಪಡ್ಲ್ಲೊ ಕಂಗಾಲ್ ಅಜೂನ್ ಫಿಂರ್ಗೊನ್ ಆಸ್ಲ್ಲೊ. ತೆಚ್ಚ್ ವಾಟೆರ್ ಥೊಡೆ ಭೊಟ್ ಆಯ್ಲೆ, ಆನಿಂ ರಸ್ತ್ಯಾ ದೆಗೆನ್ ತಾಂಕಾಂ ಕಿತೆಂಗೀ ಝಳ್ಕಾಲೆಂ ದೆಕುನ್ ಕಾಂಯ್ ಜಿವ್ದಾಳ್ಕೀ ಮ್ಹಣೊನ್ ಏಕ್ ಪಾವ್ಟಿಂ ಆಂಗ್ ಕಾಡುನ್ ಪಳೆಲಾಗ್ಲೆ. ಲಾಗಿಂ ಯೆವುನ್ ಪಳೆತಾನಾ ಕಾಂಯ್ ಕೊಣಾಚೆಂಗೀ ಮೊಡೆಂ ಮ್ಹಣ್ ಭಿಂಯೆಲೆ, ಪುಣ್ ಕಂಗಾಲಾಚಿ ಪಿಂರ್ಗೊಣ್ ಆಯ್ಕಾಲ್ಲೆಚ್ ಇಲ್ಲ್ಯಾ ಧಯ್ರಾನ್ ಭರ್ಲೆ ಆನಿಂ ತಾಂಚೆಪಯ್ಕಿ ಎಕ್ಲ್ಯಾನ್ ತೊಂಡಾವಯ್ಲೆಂ ಭಾಯ್ರಾಸ್ ಉಕ್ಲುನ್ ಪಳೆಲೆಂ ತರ್ಯ್ "ಕಾಂಯ್ ನಾಡ್ ಪುಣೀಂ ನ್ಹಯ್ಮೂ?" ತೆ ಎಕಾಮೆಕಾಲಾಗಿಂ ಉಲಯ್ಲಾಗ್ಲೆ; "ಆಧ್ಲ್ಯಾ ವರ್ಸಾ ಜಾತ್ರ್ಯಾ ಥಾವ್ನ್ ಪಾಟಿಂ ಯೆಂವ್ಚಾ ವಾಟೆರ್ ಪಟೆಲಾಕ್, ತೀನ್ ವರ್ಸಾಧಿಂ ಜೀವ್ಘಾತ್ ಕರ್ನ್ ಮೆಲ್ಲೆಂ ಪಂಡಿತಾಚಿ ಧುವ್ ದಿಶ್ಟಿಕ್ ಪಡ್ಲ್ಲೆಂ ಖೈಂ". ಎಕ್ಲ್ಯಾನ್ ಆಪ್ಲ್ಯಾ ಹಾತಾಂತ್ಲೊ ಉಜ್ವಾಡ್ ಖಣಿಂತ್ ಪಡ್ಲ್ಲ್ಯಾಚೆರ್ ಘಾಲೊ ಆನಿಂ ಕಂಗಾಲಾಚಿ ಏಕ್ ವ್ಹಾಣ್ ರಸ್ತ್ಯಾರ್ಚ್ ಆಸ್ಲ್ಲಿ ದೆಕುನ್ "ಹೊ ಕಾಂಯ್ ದಿವ್ಳಾಚೊ ವ್ಹಾಣೊ ಚೊರುನ್ ಪುಣೀಂ ಆಯ್ಲಾಗಾಯ್?" ಮ್ಹಣ್ ಸಾಂಗಾಲಾಗ್ಲೆ.
ತಾಂಚೆಮಧ್ಲ್ಯಾ ಎಕ್ಲ್ಯಾನ್ ವಿಚಾರ್ಲೆಂ "ತಾಕಾ ಉಕಲ್ಯಾಂಗೀ?"
"ನಾಕಾರೆ" ಅನ್ಯೇಕ್ಲ್ಯಾನ್ ಪಯ್ಲ್ಯಾಚೆಂ ಉತಾರ್ ಅಖೇರ್ ಜಾಂವ್ಚಾಧಿಂಚ್ ಸಾಂಗ್ಲೆಂ,
"ತಾಚಿ ಮುಸ್ತಾಯ್ಕಿ ಪಳೆ, ಮೆಳಿ, ತಾಚೆ ಬಗ್ಲೆನ್ ಪಳೆ ಸೊರೊ, ಆನಿ ಪೊಟ್ಲ್ಯೊ ಪಳೆ, ಕಾಂಯ್ ಮಾಸ್ ಮಾಸ್ಳ್ಯಾಂಚೊ ಜಾಯ್ಜಯ್, ತೊ ಚರ್ಬೆನ್ ಪಡ್ಲಾ ಆನಿಂ ಆಮ್ಕಾಂ ಕಿತ್ಯಾಕ್ ವಾಟೆನ್ ವೆಚಾ ವಾಗಾ ಆಮ್ಕಾಂ ಯೇವ್ನ್ ಖಾಗಾ" ಮ್ಹಣ್ತಾನಾ ಹೆರ್ ಸಗ್ಳೆ ಸಯ್ ಮ್ಹಣೊನ್ ಅಪ್ಲಿ ವಾಟ್ ಧರುನ್ ಗೆಲೆ.
ಪಾಟ್ಲ್ಯಾನ್ ಶೆರಾ ಥಾವ್ನ್ ತವಳ್ ತವಳ್ ಕುಕ್ಕೆಹಳ್ಳೆಕ್ ಯೆವುನ್ ಕ್ರಿಸ್ತಾಚಾ ಉಪಾದೆಸಾಂವಿಶ್ಯಾಂತ್ ಲೊಕಾಂಕ್ ಶಿಕವ್ಣ್ ದಿಂವ್ಚೊ ಬ್ರದರ್ ಅಪ್ಲ್ಯಾ ಸಾಂಗಾತ್ಯಾಂಸವೆಂ ಯೆತಾಲೆ. ತಾಂಕಾಂಯ್ ಏಕ್ ಘಡಿ ಆಂಗಾಚಿ ಲೋಂವ್ ಉಭಿ ಜಾಲಿ, ಕಾಂಯ್ ಮೆಲ್ಲೆಂಗೀ ಮ್ಹಣ್. ಎಕ್ಲ್ಯಾಕ್ ವಚೊನ್ ತಾಚಾ ತೊಂಡಾವಯ್ಲೆಂ ವಸ್ತುರ್ ಕಾಡ್ಲ್ಲೆಂಚ್ ಕಂಗಾಲ್ ಪಿಂರ್ಗಾಲೊ. ಉಪ್ರಾಂತ್ ಪಡ್ಲ್ಲ್ಯಾಚೆರ್ ಆನಿ ತಾಚಾ ಆವಸ್ತೆಚೆರ್ ಹಾಸೊನ್ಶೆಂ ತಾಂಚೆಲಾಗಿಂಚ್ ಎಕಾಮೆಕಾ ಮ್ಹಣಾಲೆ "ಪಳೆಯಾ ಸೊರ್ಯಾಚೊ ಪರಿಣಾಮ್, ಬರೆಂ ಚಿಂತಾಪ್, ಬರಿ ಕರ್ನಿ, ಬರೆ ವಿಚಾರ್ ನಾತ್ಲ್ಲ್ಯಾಂಚಿ ಅವಸ್ಥಾ ಹಿಚ್ಚ್ ಜಾತಾ, ಬರೆಂ ಕೆಲ್ಲೆ ಬರೆಂ ಖಾತಾತ್" ಮ್ಹಣೊನ್ ಆಪ್ಲಿ ವಾಟ್ ಮುಖಾರುನ್ ಗೆಲೆ.
ಪಾಟ್ಲ್ಯಾನ್ ಥೊಡ್ಯಾ ಬಾಯ್ಲಾಂಚೊ ಪಂಗಡ್ ಆಯ್ಲೊ, ಇಸ್ಕೊಲಾಚಿ ಟಿಚೆರ್ ಆನಿಂ ಹೆರಾಂ, ಟಿಚೆರ್ ಕ್ರೀಸ್ತಾಂವ್ ದೆಕುನ್ ಸದಾಂಯ್ ಮೀಸ್ ಆನಿಂ ಪಾಂಚ್ ಖಣೆ ತೇರ್ಸ್ ಚುಕಯ್ನಾತ್ಲ್ಲಿ. ಮಯ್ನ್ಯಾಂತ್ ಏಕ್ ಉಪಾಸ್ ತಿ ಚುಕಯ್ನಾತ್ಲ್ಲಿ. ತಿಕಾ ಪಾಟಿಂ ಮುಖಾರ್ ಕೋಣ್ಂಚ್ ನಾತ್ಲ್ಲಿಂ ಆನಿಂ ಅಪ್ಲ್ಯಾ ಸಾಂಬಾಳಾಚಾ ಧಾಂತ್ಲೊ ಏಕ್ ವಾಂಟೊ ತಿ ಪ್ರಾಯೆಸ್ತಾಂಚಾ ಅಸ್ರ್ಯಾಕ್ ದಿತಾಲಿ. ಪ್ರಾಯೆಸ್ತಾಂಚೊ ಆಸ್ರೊ ಬಾಂಧ್ತಾನಾ ಸಯ್ತ್ ತಿಣೆಂ ಮೊಟೊ ದುಡ್ವಾಚೊ ಆಧಾರ್ ದಿಲ್ಲೊ ಆನಿಂ ದುದಾ ಫಾತ್ರಾಚೆರ್ ತಿಚೆಂ ನಾಂವ್ಯಿ ಖಂಚ್ಲ್ಲೆಂ. ವರ್ಸಾನ್ ವರಸ್ ಜಾತ್ರೊ ತಿ ಚುಕಯ್ನಾತ್ಲ್ಲಿ ಆನಿಂ ಸಗ್ಳೊ ಜಾತ್ರೊ ಅಖೇರ್ ಜಾವ್ನ್ ತಿ ಸೆಜಾರ್ಚಾಂ ಸವೆಂ ಪಾಟಿಂ ಯೆತಾನಾ ಖಣಿಂತ್ ಪಡ್ಲ್ಲ್ಯಾಕ್ ಪಳೆವ್ನ್ ಶೆರ್ಮೆಲಿ.
ವಯ್ರ್ ಥಾವ್ನ್ ಸಕಯ್ಲ್ ಪರ್ಯಾಂತ್ ತಾಕಾ ಪಳೆವ್ನ್ ದೊನೀಂ ಹಾತ್ ಜೊಡುನ್ ದೆವಾಲಾಗಿಂ ಮಾಗಾಲಾಗ್ಲಿ; "ದೆವಾ ಆಯ್ಚಾ ತರ್ನಾಟ್ಯಾಂಕ್ ತುಂ ಸಾರ್ಕಿ ಬೂದ್ ದೀ, ಅಪ್ಲ್ಯಾ ಜಿಣ್ಯೆಂತ್ ತಾಣಿಂ ಘೆಂವ್ಚೆ ನಿರ್ದಾರ್ ಖಂಯ್ಚೆ ಬರೆ ಖಂಯ್ಚೆ ವಾಯ್ಟ್ ಮ್ಹಳ್ಳೆಂ ಪಾರ್ಕುಂಚಿ ಶ್ಯಾಥಿ ತಾಂಚಾ ಮತಿಕ್ ದೀ" ಅಶೆಂ ಮಾಗೊನ್ ಅಪುಣ್ ಫಾಲ್ಯಾಂಚೊ ತೇರ್ಸ್ ಖಣಿಂತ್ ಪಡ್ಲೆಲ್ಯಾ ಖಾತಿರ್ ಭೆಟಯ್ತೆಲಿಂ ಮ್ಹಣೊನ್ ಅಪ್ಲಿ ವಾಟ್ ಧರುನ್ ಗೆಲಿ.
ತೆಚ್ಚ್ ವೆಳಾರ್ ಗಾಂವ್ಚೆ ಥೊಡೆ ಪಾರ್ಪೊಳ್ ಚೆಡೆ ಆಯ್ಲೆ, ಜಾತ್ರಾವೆಳಾರ್ ಬಾಯ್ಲಾಂಕ್ ತಮಾಶೆ ಕರುನ್ ತಾಂಕಾಂ ಥಂಯ್ ಕೋಣ್ಂಚ್ ನಾತ್ಲ್ಲಿಂ ದೆಕುನ್ ಪಾಟಿಂ ಯೆತಾನಾ ತಾಂಕಾ ರಸ್ತ್ಯಾರ್ ಪಡ್ಲ್ಲೊ ಕಂಗಾಲ್ ದಿಸ್ಲೊ, ತಕ್ಶಣ್ ದೋಗ್ ಖಣಿಕ್ ದೆಂವ್ಲೆ ಆನಿಂ ಕಂಗಾಲಾಕ್ ಉಕ್ಲುನ್ ಧರಿಲಾಗ್ಲೆ ಆನಿಂ ವಯ್ರ್ ಆಸ್ಚಾಂನಿ ತಾಕಾ ವಯ್ರ್ ವೊಡ್ಲೊ ಆನಿಂ ರಸ್ತ್ಯಾರ್ ನಿದಾಯ್ಲೊ. ಕಂಗಾಲ್ ಪಿಂರ್ಗತಾಲೊ ಆನಿಂ ತೆ ಪಾರ್ಪೊಳ್ ಚೆಡೆ ಎಕ್ಲೊ ಕುಶಿನ್ ಆಸ್ಚಾ ಬೊತ್ಲೆಂತ್ ಕಾಂಯ್ ಆಸಾಗೀ ಮ್ಹಣ್ ಸೊಧ್ತಾಲೊ ತರ್ ಅನ್ಯೇಕ್ಲೊ ಕಂಗಾಲಾಚಾ ಬೊಲ್ಸಾಂನಿ ಕಿತೇಂಯ್ ಆಸಾಗೀ ಮ್ಹಣ್ ಸೊಧ್ತಾಲೊ. ಎಕ್ಲ್ಯಾನ್ ಕಂಗಾಲಾಚಾ ಹಾತಾಂತ್ಲಿ ಪೊಟ್ಲಿ ಸೊಡಯ್ಲಿ ಆನಿಂ ತಾಂತ್ಲೊ ಪೊವ್ ಖಾಂವ್ಕ್ ಧರ್ಲೊ, ದುಸ್ರೊ ಅಪ್ಲ್ಯಾ ಹಾತಾಂತ್ ಆಸ್ಲ್ಲಿ ಶರ್ಬತಾಚಿ ಬೋತ್ಲ್ ಕಂಗಾಲಾಚಾ ತೊಂಡಾರ್ ವೊಮ್ತಿ ಘಾಲುನ್ ಗೆಲೆ.
ರಾತ್ಭರ್ ತ್ಯಾ ಉಗ್ತ್ಯಾ ರಸ್ತ್ಯಾರ್ ಪಾಶಾರ್ ಕೆಲ್ಲ್ಯಾ ಕಂಗಾಲಾನ್ ದುಸ್ರೆ ದಿಸಾ ದೊಳೆ ಸೊಡ್ಟಾನಾ ತಾಕಾ ಪಯ್ಲೆಂ ಸಮ್ಜಾಲ್ಲಿ ಮ್ಹಳ್ಯಾರ್ ಸಗ್ಳ್ಯಾ ತಾಚಾ ಆಂಗಾಚಿ ದೂಃಕ್ ಮಾತ್ರ್. ಕಾಲ್ಚೆ ರಾತಿಚೊ ಮಿಸ್ತೆರ್ ಮಾತ್ರ್ ಜಾಣಾ ಜಾಂವ್ಕ್ ಸಗ್ಳ್ಯಾ ಕುಕ್ಕೆಹಳ್ಳೆಂತ್ ಕೊಣ್ಂಚ್ ಆಶೆನಾತ್ಲ್ಲೊ ದೆಕುನ್ ಹೊ ಮಿಸ್ತೆರ್ ಏಕ್ ಮಿಸ್ತೆರ್ ಜಾವ್ನ್ಂಚ್ ಉರ್ಲೊ.
ಹಾಚೆ ಉಪ್ರಾಂತ್ ಥೊಡಿಂ ವರ್ಸಾಂ ಪಾಶಾರ್ ಜಾಲಿಂ... ಕಸಲ್ಯಾಚಿಚ್ ಬದ್ಲಾವಣ್ ನಾಸ್ತಾಂ...
ಆತಾಂ ಆಯ್ಲೆವಾರ್ ಕುಕ್ಕೆಹಳ್ಳೆಕ್ ಉದ್ಕಾಚಿ ನಳ್ ಘಾಲಯ್ತಾಂ ಮ್ಹಣ್ ಇಕ್ರಾ ವರ್ಸಾಧಿಂ ಭಾಸ್ ದಿಲ್ಲ್ಯಾ ಮಂತ್ರಿನ್ ಕುಕ್ಕೆಹಳ್ಳೆಚಾ ರಸ್ತ್ಯಾಂನಿ ಖಣ್ ಖೊಂಡಂವ್ಕ್ ಸುರು ಕೆಲ್ಲೆಂ. ಕಂಗಾಲ್ ಮಾತ್ರ್ ಅಪ್ಲೇಸ್ತಕಿಂ ಹಾಸ್ತಾಲೊ, ಖಂಡಿತ್ ಜಾವ್ನ್ ಹ್ಯೇ ಪಾವ್ಟಿಂಯ್ ಕೊಣಾಕ್ ತರೀ ಮಾರ್ನ್, ಹ್ಯಾಚ್ ಖಣಿಂತ್ ಘಾಲ್ನ್ ವೆತೆಲೆ ಮ್ಹಳ್ಳೊ ಭರ್ವಸೊ ತಾಕಾ ಆಸ್ಲ್ಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
