ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಕಥಾ: ಜಾಗೊ
ಮೆಲ್ವಿನ್ ಪಿಂಟೊ ನೀರುಡೆ, ಕೊಂಕ್ಣೆಂತ್ ಆಯ್ಲೆವಾರ್ ಉದೆಲ್ಲೊ ತರ್ಯ್ ಏಕ್ ಕವಿ ಜಾವ್ನ್, ಕಾಣ್ಯೆಗಾರ್ ಜಾವ್ನ್, ವಿಮರ್ಶಕ್ ಜಾವ್ನ್ ಅಪ್ಲಿ ಪ್ರಭುದ್ದತಾ ಪಾಚಾರ್ಲ್ಯಾ. ಎದೊಳ್ಚ್ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಂನಿ ಅಪ್ಲ್ಯಾ ಕಾಣ್ಯೆಕ್ ತಶೆಂಚ್ ಕವಿತಾಂಕ್ ಇನಾಮಾಂ ಜೊಡ್ಲ್ಯಾಂತ್. ಕೊಂಕ್ಣಿ ಕಾಣ್ಯಾಂಕ್ ನವೆಂಸಾಂವ್ ಹಾಡ್ಚಾ ಮಿಸಾಂವಾಕ್ ಮೆಲ್ವಿನ್ ಪಿಂಟೊ ಥಾವ್ನ್ ಭರ್ಪೂರ್ ದೇಣ್ಗಿ ಆಶೆವ್ಯೆತ್.
ಮೆಲ್ವಿನ್ ಪಿಂಟೊ
ಲುಸಿಬಾಯ್ ದುಃಕಿನ್ ಪಿಂರ್ಗಾಲಿ. ಎಕಾ ಹಾಪ್ತ್ಯಾ ಥಾವ್ನ್ ತಿಚ್ಯಾ ಗಾಂಟಿಂಚಿಂ ದೂಕ್ ಚಡ್ ಜಾವ್ನ್ ಯೆತಾಲಿ. ಗಾಂಟಿ ದುಕಿನ್ ತಿಕಾ ಬಸ್ಲ್ಯಾರ್ ಉಟೊಂಕ್ ತಾಂಕಾನಾ, ಉಟ್ಲ್ಯಾರ್ ಬಸೊಂಕ್ ತಾಂಕಾನಾತ್ಲ್ಲೆಂ. ಒಟ್ಟಾರೆ ಆಪ್ಣಾಚೆ ಕಷ್ಟ್ ಕೊಣಾಕಡೆ ಸಾಂಗೊನ್ ಹಳೂ ಕರ್ಚೆ ತೆಂ ಕಳಿತ್ ನಾಸ್ತಾಂ ತಿ ಸರ್ವ್ ಆಪ್ಣಾ ಬಿತರ್ಚ್ ಜಿರವ್ನ್ ಘೆತಾಲಿ.
ಗಾಂಟಿಂಚಿ, ಆಂಗಾ-ಪಾಂಗಾಂಚಿ ದೂಕ್ ತಿ ಕಶಿಯಿ ಸೊಸುನ್ ಘೆತಿ ಕೊಣ್ಣಾ! ಪುಣ್ ಲೊರ್ಸುನ್ ಆಜ್ ಸಕಾಳಿಂ ಮ್ಹಳ್ಳಿಂ ಉತ್ರಾಂ ತಿ ಕಶಿ ಸೊಸುನ್ ಘೆತಾಲಿ? ಲೊರ್ಸು ಸಾತಾಟ್ ಲೊರಿಯಾಂಚೊ ಮ್ಹಾಲಕ್. ದೆಕುನ್ಂಚ್ ಗಾಂವ್ಚೊ ಲೋಕ್ ತಾಕಾ ಲೊರಿಯಾಂಚೊ ಲೊರ್ಸು ಮ್ಹಣ್ ವಳ್ಕಾತಾ. ವ್ಹಡ್ಲೆಂ ತಾಚೆಂ ಬಿಸ್ನೆಸ್. ಮಂಗ್ಳುರ್ ಬಂದ್ರಾರ್ ತಾಚೊ ವಯ್ವಾಟ್. ವಯ್ಲ್ಯಾನ್ ಕಾಳೊ ದಂದೊಯೀ ಚಲಯ್ತಾ ಮ್ಹಳ್ಳೆಂ ಆಯ್ಕಾಲ್ಲೆಂ ಲೂಸಿ ಬಾಯೆನ್. ಪುಣ್ ವ್ಹಡಾಂಗೆಲೆಂ ಕಸಲೆಂ ಕಾಳೆಂಯೀ ದವೆಂ ಜಾತಾ ಜಾಲ್ಲ್ಯಾನ್ ಲೊಕಾಕ್ ಹ್ಯಾ ವಿಶಿಂ ಚಡಿತ್ ಗಣ್ಣೆಂ ನಾತ್ಲ್ಲೆಂ. ತಶೆಂ ಗಾಂವಾರ್ ಲೊರ್ಸುಕ್ ವ್ಹಡ್ಲೆಂ ನಾಂವ್. ಫಿರ್ಗಜೆ ಫೆಸ್ತಾಕ್ ವರ್ಸಾ ವರ್ಸಾ ತೊಚ್ ಪ್ರಮುಖ್ ಫಿರ್ಜೆಂತ್. ಇಗರ್ಜೆಚ್ಯಾ ನವ್ಯಾ ಬಾಂದ್ಪಾಕ್ ತಾಣೆಂ ಸುಮಾರ್ ಪಯ್ಶೆ ದಿಲ್ಯಾತ್ ಆನಿಂ ಪರ್ಗಾಂವಾಂ ಥಾವ್ನ್ಯಿ ಬರೆಂ ದಾನ್ ಒಟ್ಟುಕ್ ಕರ್ನ್ ದಿಲಾಂ ಮ್ಹಳ್ಳಿ ಖಬಾರಾಯೀ ಆಸ್ಲ್ಲಿ. ತಶೆಂ ಫಿರ್ಗಜೆಂತ್ ತಾಕಾ ವಿಶೇಸ್ ಮಾನ್. ದುಡು ಕಾಳೊ ಯಾ ದವೊ ಜಾಲ್ಯಾರ್ ಕಿತೆಂ? ದುಡು ದುಡುಚ್ಮೂ? ಆಶೆಂ ಚಲ್ತಾಲೆಂ ರಾಜಾಂವ್ ಫಿರ್ಗಜೆಂತ್.
ಪುಣ್ ತೆದ್ಯಾ ವ್ಹಡ್ ಸಾವ್ಕಾರಾಕ್ಯಿ ಕುಸ್ಕುಟ್ ಆಶಾ ಆಪ್ಲ್ಯಾ ಮುಕ್ಕಾಲ್ ಎಕ್ರೊ ಜಾಗ್ಯಾಚೆರ್. ತಾಚೆಂ ನಿಸ್ಸಂತಾನ್ ಜಾಂವ್ಕ್, ಲುಸಿಬಾಯ್ ಶಿರಾಪ್ತಾಲಿ. ಸಕಾಳಿಂ ಲೊರ್ಸುನ್ ಯೇವ್ನ್ ತಿಕಾ ಧಮ್ಕಿ ದಿಲ್ಲಿ:
"ಪಳೆ ಲುಸಿಬಾಯೆ, ತುಜ್ಯೆ ಕಡೆ ಮಯ್ಪಾಸಾನ್ ವಿಚಾರ್ನ್ ವಿಚಾರ್ನ್ ಮ್ಹಾಕಾ ಪುರೊ ಜಾಲೆಂ. ಆನಿಂ ಕಶೆಂ ವಿಚಾರಿಜೆ ಕಳಾನಾ. ತಶೆಂ ತುಂವೆಂ ಮ್ಹಾಕಾ ತುಜೊ ಜಾಗೊ ಫುಂಕ್ಯಾಕ್ ದಿಂವ್ಚೊ ನಾಕಾ ತೆಂ ಪಯ್ಲೆಂಚ್ ತುಕಾ ಹಾಂವೆಂ ಸಾಂಗ್ಲಾಂ. ಪೆಂಟೆಂತ್ ಕಶೆಂ ಮೋಲ್ ಆಸಾ ತಾಚ್ಯಾಕ್ಯಿ ಥೊಡೆ ಚಡ್ಚ್ ದಿತಾಂ ಹಾಂವ್ ತುಕಾ. ಮ್ಹಾಕಾ ಜಾಯ್ ತರ್ ಹಾಂವ್ ತೊ ಜಾಗೊ ಭಲತ್ಕಾರಾನ್, ತುಕಾ ಅನ್ನ್ಯಾಯ್ ಕರ್ನ್ ಮ್ಹಜ್ಯಾ ನಾಂವಾರ್ ಕರುಂಕ್ ಸಕ್ತಾಂ. ಮ್ಹಜ್ಯಾ ಒಳ್ಕಿಚೆ ಪಂಚಾಯತಾಂತ್ ಸಬಾರ್ ಜಣ್ ಆಸಾತ್. ಪುಣ್ ಮ್ಹಾಕಾ ತಶೆಂ ಕರುಂಕ್ ನಾಕಾ. ಕಿತ್ಯಾಕ್, ಗಾಂವಾರ್ ಮ್ಹಾಕಾಯಿ ಬರೆಂ ನಾಂವ್ ಆಸಾ, ಆನಿಂ ತೆಂ ನಾಂವ್ ಪಾಡ್ ಕರ್ನ್ ಘೆಂವ್ಕ್ ಮ್ಹಾಕಾ ಆಶಾ ನಾಂ. ಚಿಂತುನ್ ಪಳೆ. ತುಕಾ ಆನ್ಯೇಕಾ ಹಾಪ್ತ್ಯಾಚೊ ವಾಯ್ದೊ ದಿತಾಂ. ಎಕಾ ಹಪ್ತ್ಯಾನ್ ತುಂ ನಿರ್ಧಾರಾಕ್ ಯೇನಾಂಯ್ ತರ್ ಹಾಂವೆಂ ದುಸ್ರಿ ಕಿತೆಂ ಪುಣ್ಯಿ ವಾಟ್ ಸೊಧಿಜೆ ಪಡ್ತೆಲಿ...."
ಖೆಲ್ಲ್ಯಾಂಕ್ ಅಂಗಲಾಪ್ ಚಡ್ ನಾಲ್ಲ್ಯಾಂಕ್ ಚಿಕೊಲ್ ಚಡ್. ಸಗ್ಳೊ ಗಾಂವ್ಚ್ ಮೊಲಾಕ್ ಘೆಂವ್ಚಿ ತಾಂಕ್ ಆಸ್ಚ್ಯಾ ಲೊರಿಯಾಂಚಾ ಲೊರ್ಸುಕ್ ತಾಚ್ಯಾ ಘರ್ಚ್ಯಾ ಒತ್ವಾಕ್ಚ್ ಆಸ್ಚ್ಯಾ ಆಪ್ಣಾಚ್ಯಾ ಮುಕ್ಕಾಲ್ ಎಕ್ರೊ ಜಾಗ್ಯಾಚೆರ್ ದೊಳೊ! ಆಫ್ಲೊ ಮ್ಹಾಲ್ ದಾಸ್ತಾನ್ ಕರುಂಕ್ ಥಂಯ್ಸರ್ ತೊ ಏಕ್ ಗೋಡಾವ್ನ್ ಭಾಂದುಂಕ್ ಆಶೆತಾಲೊ. ತಾಚ್ಯಾ ತೀನ್ ಕಾಸಾಂಚ್ಯಾ ವಯ್ವಾಟಾಕ್ ಆಪ್ಣಾಚ್ಯಾ ಜಾಗ್ಯಾದ್ವಾರಿಂ ಸಾಲ್ವಾಸಾಂವ್ ಮೆಳಾಜಯ್ಗಿ? ಜೀವ್ ಗೆಲ್ಯಾರ್ಯಿ ದಿಂವ್ಚಿಂನಾ, ಲುಸಿಬಾಯ್.
ಪುಣ್ ಆಪ್ಣೆಂ ಚಿಂತ್ಲ್ಲ್ಯಾಬರಿ ಘಟ್ಟ್ ರಾವೊಂಕ್ ಸೊಡ್ಚೊ ಮನಿಸ್ ಲೊರ್ಸು ನ್ಹಂಯ್ ತೆಂ ತಿಕಾ ಕಳಿತ್ ಆಸ್ಲ್ಲೆಂ. ಎಕಾ ವಸ್ತುಚೆರ್ ತಾಚೆ ದೊಳೆ ಪಡ್ಲೆ ತರ್ ತಿರ್ಸಾಲೆಂ. ತಿ ವಸ್ತ್ ಕಶಿ ಪುಣ್ಯಿ ಸ್ವಾದೀನ್ ಕೆಲ್ಯಾ ಶಿವಾಯ್ ತೊ ಥಂಡ್ ಬಸನಾತ್ಲ್ಲೊ. ಆಶೆಂಚ್ ತಾಣೆಂ ಲೊಕಾಮಾಯೆಚೊ ಎಕ್ರ್ಯಾಂಗಟ್ಲ್ಯಾನ್ ಜಾಗೊ ಫುಂಕ್ಯಾ - ಸವಾಯ್ ಬಿತರ್ ಘಾಲಾ ಮ್ಹಣ್ ಗಾಂವ್ಚ್ ಉಲಯ್ತಾಲೊ. ಪುಣ್ ಆಪ್ಣೆಂ ಖಂಡಿತ್ ಆಶೆಂ ಜಾಂವ್ಕ್ ಸೊಡುಂಕ್ ನಜೊ!
ಮಾದ್ರಿಂಚೆಂ ಕೊವೆಂತ್ ಆನಿಂ ಲೊರ್ಸುಚ್ಯಾ ಆಸ್ತಿಚ್ಯಾ ಮಧೆಂ ಆಸ್ಲ್ಲೊ ಲುಸಿಬಾಯೆಚೊ ಮುಕ್ಕಾಲ್ ಎಕ್ರೊ ಜಾಗೊ. ಕಶೆಂ ತೊ ಜಾಗೊ ವಿಕುನ್ ಕಾಂಯ್ ಥೊಡೊ ದುಡು ಮೆಳ್ಳ್ಯಾರ್ ಎಕ್ಸುರಿಂ ಆಪ್ಣಾಕ್ಯಿ ಥೊಡೊ ಆಧಾರ್ ಜಾಯ್ತ್ ತೆಂ ತಿಕಾ ಖಂಡಿತ್ ಕಳಿತ್ ಆಸ್ಲ್ಲೆಂ. ಪುಣ್ ಪಾತ್ಕಾಚೊ ದುಡು ಘೆವ್ನ್ ಆಪ್ಣೆಂ ಉದ್ದಾರ್ ಜಾಂವ್ಚೆಂ ನಾಕಾ ಮ್ಹಣ್ ತಿಚೆಂ ಮನ್ ಬೊಬಾಟ್ತಾಲೆಂ. ಆಪ್ಣಾಚೆ ಚಡ್ ದೀಸ್ ಗೆಲೆ ಆನಿಂ ಉಣೆಂ ದೀಸ್ ಉರ್ಲೆಂ. ಘೊವಾಚಾ ಪೆನ್ಶನಾಚೆ ಕಾಂಯ್ ಥೊಡೆ ಪಯ್ಶೆ ಯೆತಾತ್. ಆಪ್ಣಾಕ್ ಪುರೊ. ಪುಣ್ ಹೊ ಜಾಗೊ ಮಾತ್ರ್ ಆಪ್ಣೆಂ ಲೊರ್ಸುಕ್ ದೀಂವ್ಕ್ ನಜೊ.
ಲುಸಿಬಾಯೆಚ್ಯಾ ಮಾಂವಾಂಕ್, ಜಾಕಿಯಾಬಾಕ್, ತೆದಾಳಾಚೊ ವಿಗಾರ್ ರಾಯ್ಮಂದ್ ಮೊನಿಸಾನ್ ಉಣ್ಯಾ ಮೊಲಾಕ್ ಘೆವ್ನ್ ದಿಲ್ಲೊ ಜಾಗೊ ತೊ. ತಿಚೊ ಮಾಂವ್ ಸಭಾರ್ ವರ್ಸಾಂ ಫಿರ್ಗೆಜೆಚೊ ಮಿರ್ನ್ಯಾಮ್ ಜಾವ್ನ್ ಕಾಮ್ ಕೆಲ್ಲೊ ದೆವೊತ್ ಮ್ಹನಿಸ್. ವಿಗಾರ್ ಮೊನಿಸಾಚ್ಯಾ ಪಯ್ಲೆಂ ತೆಗಾಂ ಹೆರ್ ವಿಗಾರಾಂಕ್ಯಿ ತೊಚ್ ಮಿರ್ನ್ಯಾಮ್ ಜಾವ್ನಾಸ್ಲ್ಲೊ. ಆಪ್ಣಾಕ್ ಕಿತ್ಲೆ ಕಷ್ಟ್ ಆಸ್ಲ್ಯಾರ್ಯ್ ಮಿರ್ನಿಚೆಂ ಕಾಮ್ ದೆವಾಚೆಂ ಕಾಮ್ ಮ್ಹಣ್ ಚಿಂತುಂನ್ ಜಾಕಿಯಾಬ್ ಕಸಲೊಚ್ ಸಾಂಬಾಳ್ ಘೆನಾತ್ಲ್ಲೊ. ಆಪ್ಲೆಂ ಕಾಮ್ ಮಾತ್ರ್ ವಿಶೇಸ್ ಭಕ್ತೆನ್ ಆನಿಂ ಎಕೀಣ್ಪಾನಾನ್ ಕರ್ತಾಲೊ ತೊ. ವಿಗಾರ್ ಮೊನಿಸಾಚ್ಯಾ ಆವ್ದೆಂತ್ ಮಾತ್ರ್ ಜಾಕಿಯಾಬಾಚಿ ಭಲಾಯ್ಕಿ ಮಾತ್ಸಿ ಬಿಗ್ಡೊನ್ ಆಯ್ಲಿ ಜಾಲ್ಲ್ಯಾನ್ ಆನಿಂ ಪ್ರಾಯ್ಯಿ ಜಾಲ್ಲಿ ಜಾಲ್ಲ್ಯಾನ್ ತಾಣೆಂ ಆಪ್ಣಾಕ್ ಆನಿಂ ಮಿರ್ನಿಚೆಂ ಕಾಮ್ ಆಸಾಧ್ಯ್ ದೆಕುನ್ ರಾಜಿನಾಮೆ ದಿಲ್ಲೆಂ. ಜಾಕಿಯಾಬಾನ್ ಫಿರ್ಗಜೆಕ್ ಭೆಟಯಿಲ್ಲ್ಯಾ ನಿಸ್ವಾರ್ಥ್ ಸೆವೆ ಖಾತಿರ್ ವಿಗಾರಾನ್ ತಾಚ್ಯಾ ಕುಟ್ಮಾಕ್ ಮ್ಹಣ್ ಪೆಂಟೆಂತ್ ಮುಕ್ಕಾಲ್ ಎಕ್ರೊ ಜಾಗೊ ಘೆವ್ನ್ ದಿಲ್ಲೊ.
ಲುಸಿಬಾಯೆಚ್ಯಾ ಘೊವಾನ್, ಇತ್ತಾಬಾನ್, ತ್ಯಾ ಜಾಗ್ಯಾರ್ ಬರಿಚ್ ಕೃಷಿ ಕೆಲ್ಲಿ. ತ್ಯಾ ಜಾಗ್ಯಾರ್ ವಿಗಾರಾನ್ಂಚ್ ಏಕ್ ಬಾಂಯ್ಯಿ ಖೊಂಡುನ್ ದಿಲ್ಲಿ ಜಾಲ್ಲ್ಯಾನ್ ತಾಣೆಂ ಥಂಯ್ಸರ್ ಮಾಡ್ ಲಾಯಿಲ್ಲೆ ಆನಿಂ ತೊ ರಾಂದ್ವಯ್ಯಿ ಕರ್ತಾಲೊ. ಪುಣ್ ಇತ್ತಾಬ್ ಪಿಡೆಂತ್ ಪಡ್ಲ್ಯಾ ಉಪ್ರಾಂತ್ ಲುಸಿಬಾಯೆನ್ ಥಂಯ್ಸರ್ "ಕಸಲಿಯಿ ರಾಂದ್ವಯ್ ಕರುಂಕ್ ನಾತ್ಲ್ಲಿ. ಮಾಡಾಂನಿ ಕಾಂಯ್ ಥೊಡೆ ನಾರ್ಲ್ ಮೆಳ್ತಾಲೆ. ತೆ ತಿ ತೆದಾಳಾ ತೆದಾಳಾ ಕಾಡವ್ನ್ ವಿಕ್ತಾಲಿ.
ಸಬಾರ್ ತೇಂಪಾ ಥಾವ್ನ್ ಲೊರ್ಸುಕ್ ತ್ಯಾ ಜಾಗ್ಯಾಚೆರ್ ದೊಳೊ ಆಸ್ಲ್ಲೊ. ದೆಕುನ್ಂಚ್ ಇತ್ತಾಬ್ ಪಿಡೆಂತ್ ಪಡ್ತಾನಾ ನಾಕಾ ನಾಕಾ ಮ್ಹಳ್ಳ್ಯಾರ್ಯಿ ತಾಣೆಂಚ್ ಯೇವ್ನ್ ಭುಜಾವಣ್ ದೀವ್ನ್ ಥೊಡೆ ಪಯ್ಶೆಯಿ ದಿಲ್ಲೆ.
ಆರ್ ಮಾರ್ನ್ ಮಾಂಡ್ರೆರ್ ಪಡ್ಲ್ಲ್ಯಾ ಇತ್ತಾಬಾಚಿ ಭಲಾಯ್ಕಿ ಸುಧ್ರಾಲಿಚ್ ನಾ. ತೊ ದೀಸ್ ವೆತಾಂ ಚಡಿತ್ ಪಿಡೆಸ್ತ್ ಜಾವ್ನ್ ಸಂಪೂರ್ಣ್ ಮಾಂದ್ರೆರ್ ಶೆವ್ಟಾಲೊ. ಲುಸಿಬಾಯೆನ್ ತಾಕಾ ಥೊಡೆ ದೀಸ್ ಆಸ್ಪತ್ರೆಂತ್ ದವರ್ನ್ ಘರಾ ಆಪವ್ನ್ ಹಾಡ್ಲ್ಲೊ. ಆಕೇರ್ ಆಕೇರಿಕ್ ಇತ್ತಾಬಾಚಿ ವಾಚಾಚ್ ಬಂದ್ ಪಡ್ಲಿ. ಮೊರ್ಚಾ ಘಡೀಯೆ ಮಾತ್ರ್ ತೊ ವಿಶೇಶ್ ವಳ್ವಾಳ್ಲ್ಲೊ.
ಘೊವ್ ಸರೊನ್ ಆತಾಂ ವರ್ಸ್ ಜಾತಾ. ಹ್ಯಾ ಎಕಾ ವರ್ಸಾ ಲುಸಿಬಾಯ್ ಮಸ್ತು ಕಷ್ಟಾಲ್ಯಾ. ತಿಕಾ ಆಸ್ಲ್ಲೊ ಆದಾಯ್ ಮ್ಹಳ್ಯಾರ್ ಘೊವಾಚೆ ಪೆನ್ಶಾನಾಚೆ ಆಟ್ಶಿಂ ರುಪಯ್ ಮಾತ್ರ್. ಆಸ್ಲ್ಲೊ ಎಕ್ಲೊಚ್ ಪೂತ್ ಥೊಡ್ಯಾ ವರ್ಸಾಂ ಆದಿಂ ಬಾಪಯ್ ಲಾಗಿಂ ಝಗಡ್ನ್ ದೇಶಾಂತರ್ ಗೆಲ್ಲೊ. ಬಾಪಾಯ್ಚ್ಯಾ ಮೊರ್ಣಾಕ್ ಆಪಯಾಂ ಮ್ಹಳ್ಳ್ಯಾರ್ಯಿ ತೊ ಖಂಯ್ ಆಸಾ ಮ್ಹಣ್ ಕಳೀತ್ ನಾಸ್ತಾಂ ತಿ ಆಪಯ್ತಾಲಿ ತರ್ಯಿ ಕಶೆಂ?
ಇತ್ತಾಬ್ ಸರ್ಲ್ಲ್ಯಾ ಥೊಡ್ಯಾಚ್ ದಿಸಾಂನಿ ಉದೆಲ್ಲೊ ಲೊರ್ಸು ತಿಚ್ಯಾ ಘರಾ. "ಲುಸಿಬಾಯೆ" ತಾಣೆಂ ಮ್ಹಳ್ಳೆಂ. "ಇತ್ತಾಬಾಚೆಂ ಮರಣ್ ಮ್ಹಾಕಾಯಿ ವ್ಹಡಾ ದುಕಾಚೆಂ. ಪುಣ್ ಕಿತೆಂ ಕರ್ಚೆಂ! ಜಲ್ಮಾಲ್ಲ್ಯಾ ಮನ್ಶಾನ್ ಮೊರುಂಕ್ ಆಸಾ. ಕಷ್ಟಾಂತ್ ಆಸ್ತಾನಾ ಎಕಾಮೆಕಾ ಕುಮಕ್ ಕರ್ಚೆಂಚ್ ಖರೆಂ ಮನ್ಶಾಪಣ್ ಮ್ಹಣ್ ಲೆಕುನ್ ಹಾಂವೆಂ ತುಕಾ ಥೊಡಿ ಕುಮಕ್ ಕೆಲಿ. ತಶೆಂ ತುಜ್ಯಾ ಘೊವಾಕ್ಯಿ ಹಾಂವೆಂ ಥೊಡಿ ಕುಮಕ್ ಕೆಲ್ಯಾ ತೆಂ ತುಕಾ ಕಳಿತ್ ಆಸ್ಚೆಂನಾ. ಆಸೊಂ, ಪಯ್ಶೆ ಆಜ್ ಆಸ್ತಾತ್, ಫಾಲ್ಯಾಂ ಚಲ್ತಾತ್. ಪುಣ್ ಮ್ಹಾಕಾಯಿ ತುಜೆ ಥಾವ್ನ್ ಏಕ್ ಗರ್ಜ್ ಜಾಯ್ ಆಸ್ಲ್ಲಿ ಲುಸಿಬಾಯೆ.
"ಗಜಾಲ್ ಇತ್ಲಿಚ್" ತಾಣೆಂ ಮುಕಾರುನ್ ಮ್ಹಳ್ಳೆಂ. "ಪಳೆ ಪೆಂಟೆಂತ್ ಮ್ಹಜ್ಯಾ ಜಾಗ್ಯಾಚ್ಯಾ ಒತ್ವಾಕ್ ತುಜೊ ಥೊಡೊ ಜಾಗೊ ಆಸಾ. ತಾಂತುಂ ಸದ್ಧ್ಯಾಕ್ ವಿಶೇಸ್ ಕಾಂಯ್ ಹುಟ್ವಳ್ ನಾಂ. ಮ್ಹಾಕಾ ದಾಸ್ತಾನ್ ಕರುಂಕ್ ಏಕ್ ಗೋಡಾವ್ನ್ ಬಾಂದುಂಕ್ ಸುವಾತ್ ಜಾಯ್ಜಯ್ ಆಸ್ಲ್ಲಿ. ಗೋಡಾವ್ನ್ ಮ್ಹಜ್ಯಾ ಘರಾಲಾಗಿಂಚ್ ಆಸ್ಲ್ಯಾರ್ ಬರೆಂ ಪಳೆಂ. ತಶೆಂ ತುಂ ಮ್ಹಾಕಾ ತೊ ಜಾಗೊ ವಿಕ್ಶಿ ತರ್ ವ್ಹಡ್ ಉಪ್ಕಾರ್. ತುಕಾ ಹಾಂವ್ ಬರೆಂ ಮೋಲ್ ದಿತಾಂ. ತ್ಯಾ ವಿಶಿಂ ತುಂವೆಂ ಭಿಯೆಜಾಯ್ ಮ್ಹಣ್ ನಾಂ"
ಲುಸಿಬಾಯೆಕ್ ತೆದ್ನಾಂ ಕಿತೆಂ ಜಾಪ್ ದಿಂವ್ಚಿ ತೆಂ ಕಳೊಂಕ್ ನಾತ್ಲ್ಲೆಂ.
"ಸದ್ದ್ಯಾಕ್ ಮ್ಹಾಕಾ ತೊ ಜಾಗೊ ವಿಕ್ಚಿ ಆಲೋಚನ್ ನಾ ಲೊರ್ಸು" ತಿಣೆಂ ಸಾಂಗ್ಲ್ಲೆಂ. "ತಶೆಂ ಕಾಂಯ್ ವಿಕ್ಚೆಂ ತರ್ ಹಾಂವ್ ತುಜೊ ಉಡಾಸ್ ದವರ್ತಾಂ."
"ತುಂ ಚಿಂತುನ್ ಪಳೆ ಲುಸಿಬಾಯೆ", ಲೊರ್ಸುನ್ ಮ್ಹಳ್ಳೆಂ " ತಶೆಂ ಹಾಂವ್ಯ್ ಥೊಡೊ ತೇಂಪ್ ರಾಕೊಂಕ್ ಸಕ್ತಾಂ"
ತಾಚೆ ಉಪ್ರಾಂತ್ ಲೊರ್ಸು ತಿಕಾ ತೆದಾಳಾ ತೆದಾಳಾ ಸತಾವ್ನ್ಂಚ್ ಆಸ್ಲ್ಲೊ ಆನಿಂ ಆಯ್ಲೆವಾರ್ ತಾಚಿ ವಿನಂತಿ ಸವ್ಕಾಸ್ ದಮ್ಕೆಕ್ ಪರಿವರ್ತನ್ ಜಾಲ್ಲಿ. ಆಜ್ ಸಕಾಳಿಂ ಮಾತ್ರ್ ಆಪ್ಲಿ ದವ್ಲತ್, ಅಧಿಕಾರ್ ಸರ್ವ್ ದಾಖಂವ್ಕ್ ಮ್ಹಳ್ಳಾಬರಿ ತಾಣೆಂ ತಿಕಾ ಕಠೀಣ್ ಚೆತಾವ್ಣಿಂ ಕಶಿ ದಿಲ್ಲಿ.
ಹೆಂ ಸರ್ವ್ ಚಿಂತುನ್ ಆಸ್ಲ್ಲೆಬರಿಚ್ ಲುಸಿಬಾಯೆನ್ ಕಷ್ಟಾಂನಿ ಉಟೊನ್ ರಾಂದಾಪ್ ಕೆಲೆಂ. ಘೊವ್ ಸರ್ಲ್ಲ್ಯಾ ಉಪ್ರಾಂತ್ ತಿ ಎಕ್ಸುರಿ ಘರಾಂತ್. ಹ್ಯಾ ದಿಸಾಂನಿ ತಿಚೆಂ ಖಾಣ್ - ಜೆವಾಣ್ ಮಸ್ತು ಉಣೆಂ ಜಾಲ್ಲೆಂ. ಘೊವ್ ಸರ್ಲ್ಯಾ ಉಪ್ರಾಂತ್ ಘರ್ ಖಾಲಿ ಖಾಲಿ ದಿಸ್ತಾಲೆಂ. ಜಿಣ್ಯೆಂತ್ ಉರ್ಬಾಯಿ ಉಣೆಂ ಜಾಲ್ಲಿ. ಘೊವ್ ತಿಚೊ ಪೋಸ್ಟ್ಮ್ಯಾನಾಚೆಂ ಕಾಮ್ ಕರ್ನ್ ರಿಟಾಯರ್ಡ್ ಜಾಲ್ಲೊ. ಎಕ್ಲೊಚ್ ಪೂತ್, ಬಾತ್ತಿಕ್ ಬಾಪಾಯ್ನ್ ಜಾತಾ ತಿತ್ಲೆಂ ಶಿಕಾಪ್ ದಿಂವ್ಚೆಂ ಪ್ರೇತನ್ ಕೆಲೆಂ ತರ್ಯಿ ಶಿಕಾಪ್ ತಾಚ್ಯಾ ಮತಿಕ್ ಗೆಲೆಂಚ್ ನಾಂ.
ಧಾವೆಂತ್ ತೀನ್ ವರ್ಸಾಂ ಪರೀಕ್ಶಾ ಬಾಂದ್ಲಿ ತರ್ಯಿ ಪಾಸ್ ಜಾಂವ್ಚೆಂ ತಾಕಾ ಆಸಾಧ್ಯ್ ಜಾಲೆಂ. ಆಶೆಂ ತಾಚೆಂ ಇಸ್ಕೊಲ್ ತಿತ್ಲ್ಯಾರ್ಚ್ ಸಂಪ್ಲೆಂ. ಏಕ್ ದೋನ್ ವರ್ಸಾಂ ತಾಣೆಂ ಆಶೆಂಚ್ ಪೋಲಿ ಭಂವೊನ್ ದೀಸ್ ಕಾಡ್ಲೆ. ಬಾಪಾಯ್ನ್ ತಾಕಾ ಯೆಟ್ಚೆಂ ಸದಾಂಚೆಂ ಜಾಲೆಂ. ಪೆಂಟೆಂತ್ ಖಂಯ್ಚೆಂ ಪುಣ್ಯಿ ಕಾಮ್ ಕರ್ ಮ್ಹಳ್ಳ್ಯಾರ್ ತೊ ಆಯ್ಕಾಲೊಚ್ ನಾ.
ತ್ಯಾ ಎಕಾ ದಿಸಾ ತಾಣೆಂ ಬಾಪಾಯ್ಚ್ಯಾ ಶರ್ಟಾಚಾ ಬೊಲ್ಸಾಂತ್ಲೆ ಸುಮಾರ್ ಪಯ್ಶೆಂ ಕಾಡ್ಲ್ಲೆ. ತಾಣೆಂಚ್ ತೆ ಕಾಡ್ಲ್ಯಾತ್ ಮ್ಹಣ್ ಕಳೊಂಕ್ ಇತ್ತಾಬಾಕ್ ವೇಳ್ ಗೆಲೊನಾ. ತಾಣೆಂ ಬಾತ್ತಿಚೊ ವಿಚಾರ್ ಕೆಲೊ. ಆಪ್ಣಾಕ್ ಕಸಲಿಗಿ ಗರ್ಜ್ ಆಸ್ಲ್ಲಿ ದೆಕುನ್ ಕಾಡ್ಲೆ ಮ್ಹಣಾಲಾಗ್ಲೊ ತೊ. ಇತ್ತಾಬಾಚೊ ತಳ್ಮಾಟ್ಯಾಕ್ ಚಡ್ಲ್ಲೊ.
"ತೀನ್ ಕಾಸಾಂಚ್ಯಾ" ತಾಣೆಂ ಬಾತ್ತಿಚ್ಯಾ ಕಾನ್ಸುಲಾಕ್ ಥಾಪಾಡಾಯಿಲ್ಲೆಂ. "ಪೋಲಿ ಭಂವ್ತಾಯ್ ಆನಿಂ ಘರ್ಚ್ಯಾ ಖರ್ಚಾಚೆ ಪಯ್ಸೆ ಚೋರ್ನ್ ಮಜಾ ಮಾರ್ತಾಯ್ಗಿ? ತುಕಾ ಕಾಮ್ ಕರ್ನ್ ಖುದ್ದ್ ಜೊಡುಂಕ್ ಪಾಟ್ ಬಾಗ್ವಾನಾಂಗಿ? ಹಾಂವೆಂ ಜೋಡ್ನ್ ಆನಿಕ್ಯಿ ತುಜೆಂ ಪೋಟ್ ಭರಿಜಾಯ್ಗಿ.............?"
ಆಶೆಂ ಇತ್ತಾಬಾನ್ ತಾಕಾ ಝಡ್ಪಿತಾನಾ ಕಠೀಣ್ ಆಕ್ಮಾನ್ ಭಗ್ಲ್ಲೊ ಬಾತ್ತಿ "ಆಪುಣ್ ಆನಿಂ ಹ್ಯಾ ಘರ್ಚೆಂ ಮೇಟ್ ಚಡಾನಾ" ಮ್ಹಣೊನ್ ಬಾಯ್ರ್ ಪಡ್ಲ್ಲೊ. ಆತಾಂ ವರ್ಸಾಂ ಭಾರಾ ಜಾತಾತ್. ಗೆಲ್ಲ್ಯಾ ಸುರ್ವೆರ್ ಆವಯ್ಕ್ ಏಕ್ - ದೋನ್ ಕಾಗ್ದಾಂ ತಾಣೆಂ ಘಾಲ್ಲಿಂ ತರ್ಯಿ ವಿಳಾಸ್ ದೀಂವ್ಕ್ ನಾತ್ಲ್ಲೊ. ತಾಚೆ ಉಪ್ರಾಂತ್ ಆಜೂನ್ ತಾಚಿ ಖಬಾರ್ ನಾತ್ಲ್ಲಿಂ.........
ದೀಸ್ ಬುಡೊನ್ ಯೆತಾನಾ ಲುಸಿಬಾಯೆನ್ ನ್ಹಾಣ್ ತಿರ್ಸುನ್ ಸದಾಂಚೆಬರಿ ತೇರ್ಸ್ ಮ್ಹಳೊಂ. ಏಕ್ ಘಾಸ್ ಪೊಟಾಕ್ ಘೆವ್ನ್ ತಿ ನಿದೊಂಕ್ ಗೆಲಿ. ಪುಣ್ ಹ್ಯಾ ದಿಸಾಂನಿಂ ನೀದ್ ತಿಕಾ ಬಿಲ್ಕುಲ್ ಪಡಾನಾತ್ಲ್ಲಿಂ. ಮತಿಂತ್ ಸಬಾರ್ ಮಾರೆಕಾರ್ ಚಿಂತ್ನಾಂ. ಆಪ್ಣಾಕ್ ಆನಿಂ ಆಧಾರ್ ಕೋಣ್? ಪಟ್ಟ್ ಕರ್ನ್ ಪಡೊನ್ ಮೆಲ್ಯಾರ್ ವ್ಹಡ್ ನ್ಹಂಯ್. ಪುಣ್ ಘೊವಾಬರಿ ಮಾಂದ್ರಿ ಧರಿನ್ ತರ್ ಕೋಣ್ ಆಸ್ರೊ? ಚಿಂತಾನಾ ತಿಕಾ ಕಠೀಣ್ ಭಿರಾಂತ್ ದಿಸ್ತಾಲಿ. ವಯ್ಲ್ಯಾನ್ ಹ್ಯಾ ದಿಸಾಂನಿ ಲೊರ್ಸುಚ್ಯೊ ಧಮ್ಕ್ಯೊ! ಜಾಗೊ ಆಪ್ಣಾಚಾ ಹಕ್ಕಾಚೊ ತರ್ಯಿ ಲೊರ್ಸುಕ್ ಪಯ್ಶಾಂಚೊ ರುಬಾವ್. ಎಕಾ ಹಾಪ್ತ್ಯಾನ್ ಕಾಂಯ್ ತರ್ಯಿ ನಿರ್ಧಾರ್ ಕರ್ ಮ್ಹಣ್ತಾ ತೊ. ನಿರ್ಧಾರ್ ಕಸಲೊ ಕರ್ಚೊ? ಆಪ್ಣಾಚೊ ಜಾಗೊ ಕೆದಳಾ ವಿಕ್ಚೊ ಕೆದಾಳಾ ಸೊಡ್ಚೊ ಹಾಕಾ ಕಿತ್ಯಾಕ್ ಪಡೊನ್ ಗೆಲಾಂ? ಆಪುಣ್ ಎಕ್ಸುರಿಂ ಮ್ಹಳ್ಳ್ಯಾಕ್ ನ್ಹಂಯ್ ತೊ ಆಪ್ಣಾಚ್ಯಾ ಆಸ್ಕತ್ಕಾಯೆಚೊ ಫಾಯ್ದೊ ಉಟಂವ್ಕ್ ಪಳೆಯ್ತಾ? ಜೀವ್ ಗೆಲ್ಯಾರ್ಯಿ ವ್ಹಡ್ ನ್ಹಂಯ್, ತಾಕಾ ಮಾತ್ರ್ ಜಾಗೊ ದೀಂವ್ಕ್ ನಜೊ.
ಫಾಂತ್ಯಾರ್ ತಿಕಾ ಮಾತ್ಸೊ ದೊಳೊ ಆಡ್ ಜಾಲೊ. ಕೊಣೆಂಗಿ "ಮಾಂಯ್" ಮ್ಹಣ್ ಆಪಯ್ತಾನಾಂಚ್ ತಿಕಾ ಎಕಾಚ್ಚಾಣೆಂ ಜಾಗ್ ಜಾಲಿ. ಕೋಣ್ಗಾಯ್ ಹ್ಯಾ ಸಕಾಳಿಂ ಫುಡೆಂ ಮ್ಹಣ್ ಚಿಂತುನ್ಂಚ್ ತಿಣೆಂ ಬಾಗಿಲ್ ಕಾಡ್ಲೆಂ.
ಬಾಗ್ಲಾರ್ ರಾವ್ಲ್ಲ್ಯಾ ದಿಂಡ್ಯಾ ತರ್ನಟ್ಯಾಚಿ ಒಳೊಕ್ ಮೆಳ್ಳಿ ನಾಂ. ಹಾತಾಂತ್ ತಾಚ್ಯಾ ಏಕ್ ದೋನ್ ಬ್ಯಾಗಾಂ ಆಸ್ಲ್ಲಿಂ.
"ಮಾ......ಮಾಂಯ್...........ಹಾಂವ್ ಮಾಂಯ್ ಬಾತ್ತಿ..........." ತಾಣೆಂ ಮ್ಹಳೆಂ.
"ಬಾ.......ತ್ತಿ....!?"
ಆಪುಣ್ ಕಾಂಯ್ ಸ್ವಪಾಣ್ ಪಳೇವ್ನ್ ಆಸಾಂ? ತಿ ಆಪ್ಣಾಕ್ಚ್ ಪಾತ್ಯೆಲಿನಾ.
"ಹಾಂ...........ಹಾಂವ್ ಮಾಂಯ್ ಬಾತ್ತಿ ತುಜೊ ಪೂತ್......? ತರ್ನಾಟ್ಯಾನ್ ಪರ್ತುನ್ ಸಾಂಗ್ತಾನಾ ಲುಸಿಬಾಯೆನ್ ತಾಕಾ ದೊಳೆ ಸೊಡ್ನ್ ಪಳೆಯ್ಲೆಂ. ವ್ಹಯ್ ಬಾತ್ತಿ.......ಆಪ್ಣಾಚೊ ಪೂತ್. ಬಾರಾ ವರ್ಸಾಂನಿ ಒಳೊಕ್ ಕಳನಾತ್ಲ್ಲ್ಯಾ ಬರಿ ದಿಂಡೊ ಮಾನಾಯ್ ಜಾಲಾ.
"ದೆವಾ ಮ್ಹಜ್ಯಾ" ಲುಸಿಬಾಯ್ ಆಕ್ಲಾಸ್ಲಿ. "ಒಳೊಕ್ ಕಳೊಂಕ್ ನಾಂಮೂ ಪುತಾ. ಖಂಯ್ ಗೆಲ್ಲೊಯ್ ಪುತಾ ಇತ್ಲಿಂ ವರ್ಸಾಂ? ಬಾಪಾಯ್ಕ್ ಮೂಟ್ ಮಾತಿ ಘಾಲುಂಕ್ಯಿ ಆಯ್ಲೊನಾಂಯ್, ಆತಾಂ ಮ್ಹಾಕಾ ತರ್ಯಿ ಮಾತಿ ಘಾಲುಂಕ್ ಆಯ್ಲೊಯ್ಗಿ ಪುತಾ" ತಿಣೆಂ ತಾಕಾ ಪೊಟ್ಲುನ್ ಧರ್ನ್ ದುಃಖಾಂ ಗಳಯ್ಲಿಂ.
"ಬಾಬಾಚ್ಯಾ ಮೊರ್ಣಾಂವಿಶಿಂ ಮ್ಹಾಕಾ ಪೋರ್ಚ್ ಕಳ್ಳೆಂ ಮಾಂಯ್. ಪಯ್ಲೆಂ ಕಳ್ಲ್ಲೆಂ ತರ್ ಹಾಂವ್ ಖಂಡಿತ್ ಯೆತೊಂ. ಮ್ಹಾಕಾ ಬೊಗ್ಸಿ ಮಾಂಯ್" ಬಾತ್ತಿಯಿ ಸುಸ್ಕಾರ್ಲೊ.
"ಹಾಂವೆಂ ಕಶೆಂ ಭಗ್ಸುಂಚೆಂ ಪುತಾ? ತುಜೊ ಬಾಪಯ್ ತುಕಾ ಭಗ್ಸುಂದಿ ಮ್ಹಣ್ ತಾಚ್ಯೆಲಾಗಿಂ ಮಾಗ್. ತೊ ಆಸಾ ಪಳೆ ಥಂಯ್ ಸರ್ಗಾರಾಜಾಂತ್."
ತಿಣೆಂ ತಾಕಾ ಬಿತರ್ ಆಪವ್ನ್ ಹಾಡ್ಲೊಂ. ತಿಚೆಂ ಆವಯ್ ಕಾಳಿಜ್ ಜಾಗೆಂ ಜಾಲೆಂ.
"ಪುರಾಸಾಣೆನ್ ಆಯ್ಲಾಯ್ ಪುತಾ. ವಚ್ ಪಯ್ಲೆಂ ನಾವ್ನ್ ಯೇ. ರಾತಿಂ ತಾಪ್ಯಿಲ್ಲೆಂ ಉದಾಕ್ ಆಸ್ತಲೆಂ ಭಾಣಾಂತ್"
ಬಾತ್ತಿ ನಾಂವ್ಕ್ ಗೆಲ್ಲ್ಯಾಬರಿಚ್ ತಿಣೆಂ ಚಾ ಕೆಲಿ ಆನಿಂ ಪೆಜೆಕ್ ಆದಾನ್ ಚಡಯ್ಲೆಂ. ಕಾಳ್ಜಾ ಮನಾಂನಿ ತಿಚಾ ಉಮಾಳೆ ಭರೊನ್ ಯೆತಾಲೆ.
ತೊ ನ್ಹಾವ್ನ್ ಆಯಿಲ್ಲೊಚ್ ತಿಣೆಂ ತಾಕಾ ಚಾ ದಿಲಿ.
"ಖಂಯ್ ಆಸ್ಲ್ಲೊಯ್ ಪುತಾ ಇತ್ಲಿಂ ವರ್ಸಾಂ ತುಂ? ತಿಣೆಂ ತಾಚೊ ವಿಚಾರ್ ಕೆಲೊ.
"ಬೊಂಬಯ್ ಆಸ್ಲ್ಲೊಂ ಮಾಂಯ್. ಪಯ್ಲೆಂ ವ್ಹಡ್ಲ್ಯಾ ಹೊಟ್ಲಾಂತ್ ಕಾಮ್ ಕೆಲೆಂ. ಥೊಡೆ ಪಯ್ಶೆ ಜಮಯ್ಲ್ಯಾ ಉಪ್ರಾಂತ್ ಮ್ಹಜೆಂಚ್ ಲ್ಹಾನ್ ಹೋಟೆಲ್ ಸುರು ಕೆಲಾಂ. ಯಾರ್ ಬರೊ ಆಸಾ".
ತಾಣೆಂ ಸಾಂಗ್ಚೆಂ ಕಿತ್ಲೆಂ ಪಾತ್ಯೆಂವ್ಚೆಂ ಕಿತ್ಲೆಂ ಸೊಡ್ಚೆ ತಿಕಾ ಸುಸ್ತಾಲೆಂನಾಂ.
"ಕಾಜಾರ್ ಪುಣ್ಯಿ ಜಾಲಾಯೆರೆ ಪುತಾ? ತಿಚಿ ಅತುರಾಯ್ ಚಡ್ಲಿ.
"ನಾಂ ಮಾಂಯ್. ಕಾಜಾರ್ ಸವ್ಕಾಸ್ ಜಾಲ್ಯಾರ್ ಸಯ್.."
"ಪಳೆಂಯಾಂ ಮಾಂಯ್. ಚಡ್ ದೀಸ್ ರಾವೊಂಕ್ ಜಾಂವ್ಚೆಂ ನಾಂ. ಪೋರ್ ಮಿಂಗೆಲ್ ದಾಟ್ಟುಚೊ ಪೂತ್ ಲ್ಯಾನ್ಸಿ ಮೆಳ್ಲ್ಲೊ. ತಾಣೆಂಚ್ ಮ್ಹಾಕಾ ಬಾಬಾಚಾ ಮರ್ಣಾಂ ವಿಶಿಂ ಖಬಾರ್ ದಿಲಿ. ತಶೆಂ ಹೊಟ್ಲಾಚಿ ಖಬಾರ್ ಚಿಕ್ಕೆ ಘೆ ಮ್ಹಣ್ ತಾಕಾ ಸಾಂಗೊನ್ ಹಾಂವ್ ಹೆವ್ಶಿನ್ ಆಯ್ಲಾಂ"
ತುಂ ಹಾಂಗಾಸರ್ಚ್ ರಾವ್ಲೊಯ್ ತರ್ ಮ್ಹಾಕಾ ಥೊಡೊ ಆಧಾರ್ ಜಾತೊ ಪುತಾ. ಆಸೊಂ, ಸರ್ವ್ ಖುಶಿ ತ್ಯಾ ಸರ್ವೆಸ್ಪರಾಚಿ ವ್ಹಚ್, ತುಂ ಥೊಡೊ ವಿಶೆವ್ ಘೆ"
ತಿಣೆಂ ತಾಕಾ ಮಾಂದ್ರಿ ಸೊಡವ್ನ್ ದಿಲಿ ಆನಿಂ ತಿ ತಿಚ್ಯಾ ಸದಾಂಚ್ಯಾ ಕಾಮಾರ್ ಪಡ್ಲಿ.
ಸಾಂಜೆರ್ ಬಾತ್ತಿ ಪೆಂಟೆಂಕ್ ವಚೊನ್ ಯೆತಾಂ ಮ್ಹಣ್ ಗೆಲೊ. ಪೆಂಟೆಂತ್ ತಾಕಾ ಲೊರ್ಸು ಮೆಳ್ಲ್ಲೊ ಜಾಯ್ಜಾಯ್. ಪಾಟಿಂ ಆಯಿಲ್ಲೊಚ್ ತೊ ಆವಯ್ಲಾಗಿಂ ಜಾಗ್ಯಾಚೊ ಪ್ರಸ್ತಾಪ್ ಕಾಡುಂಕ್ ಲಾಗ್ಲೊ.
"ಮಾಂಯ್ ಮ್ಹಾಕಾ ಪೆಂಟೆಂತ್ ಲೊರ್ಸು ದಾಟ್ಟು ಮೆಳ್ಲ್ಲೊ"
"ಆಯಿಲ್ಲ್ಯಾ ದಿಸಾಚ್ ಮೆಳ್ಳೊಗಿ ಪುತಾ!" ತಿಣೆಂ ಸುಸ್ಕಾರ್ ಸೊಡ್ಲೊ.
"ಮಾಂಯ್ ತೊ ಆಮ್ಚ್ಯಾ ತ್ಯಾ ಜಾಗ್ಯಾವಿಶಿಂ ಉಲಯ್ತಾಲೊ"
"ಕಿತೆಂ ಕಂಯ್?"
"ನ್ಹಂಯ್, ಆಮಿಂ ವಿಕ್ಚೊ ಜಾಲ್ಯಾರ್ ತಾಕಾ ಜಾಯ್ಜಾಯ್ ಕಂಯ್"
"ತುಂವೆಂ ಕಿತೆಂ ಮ್ಹಳೆಂಯ್?"
"ಹಾಂವೆಂ ಕಿತೆಂ ಮ್ಹಣ್ಚೆಂ ಮಾಂಯ್? ತುಕಾ ಸಮ್ಜಾಯ್ತಾ ಮ್ಹಳೆಂ. ಪುಣ್ ಮಾಂಯ್ ಮ್ಹಾಕಾ ಭಗ್ತಾ ಆಮಿಂ ತೊ ಜಾಗೊ ಆನಿಂ ಘರ್ ಹಾಂಗಾಚೊ ಥೊಡೊ ಜಾಗೊಯಿ ವಿಕ್ಲ್ಯಾರ್ ಬರೆಂ ಮ್ಹಣ್. ಮ್ಹಾಕಾ ಚಡ್ ತೇಂಪ್ ಹಾಂಗಾಂ ರಾವೊಂಕ್ ಜಾಂವ್ಚೆಂ ನಾಂ. ತುಂಯಿ ಎಕ್ಸುರಿ ಕಿತ್ಲಿ ಮ್ಹಣ್ ರಗಡ್ತಲಿಯ್? ತುಕಾ ಹಾಂವ್ ಬೊಂಬಯ್ ವ್ಹರ್ತಾಂ. ಮ್ಹಜಿ ಲ್ಹಾನ್ ಕೊಟ್ರಿ ಆಸಾ ಥಂಯ್."
ಎಕಾ ಘಡ್ಯೆ ಪುತಾನ್ ಸಾಂಗ್ಚೆಂ ಸಾರ್ಕೆಂ ಮ್ಹಣ್ ಭಗ್ಲೆಂ ತಿಕಾ. ಆಫುಣ್ ತರ್ಯಿ ಕಿತ್ಲೆ ದೀಸ್ ಮ್ಹಣ್ ಎಕ್ಸುರಿಂಚ್ ರಾವ್ತಾಲಿಂ. ಫಾಲ್ಯಾಂ ಮಾಂದ್ರೆರ್ ಪಡ್ಲ್ಯಾರ್ ಕೋಣ್ ಪಳೆತ್? ಬೊಂಬಯ್ ಗೆಲ್ಲ್ಯಾರ್ ಪೂತ್ ಕಾಂಯ್ ಥೊಡೊ ಆಧಾರ್ ಜಾಯ್ತ್. ಪುಣ್ ಜಾಗೊ ಮಾತ್ರ್ ಲೊರ್ಸುಕ್ ವಿಕುಂಕ್ ತಿಕಾ ಮನ್ ನಾತ್ಲ್ಲೆಂ.
"ಪಳೆ ಪುತಾ, ಜಾಗೊ ವಿಖ್ಚೊ ತರ್ ವಿಕ್ಯಾಂ. ಪುಣ್ ಲೊರ್ಸುಕ್ ಮಾತ್ರ್ ದಿಂವ್ಚೊಂ ನಾಕಾ. ಎದೊಳ್ಚ್ ತಾಣೆಂ ಲೊಕಾಮಾಯೆಚೊ ಕಿತ್ಲೊ ಜಾಗೊ ಬಿತರ್ ಘಾಲಾ ತೆಂ ಗಾಂವಾಕ್ ಕಳಿತ್ ಆಸಾ"
"ತುಂ ಕಶೆ ಮ್ಹಣ್ತಾಯ್ ತಶೆಂ ಮಾಂಯ್" ಬಾತ್ತಿನ್ ಮ್ಹಳೆಂ.
ತೊ ದೀಸ್ ತಸೊ ಪಾಶಾರ್ ಜಾಲೊ.
ದುಸ್ರ್ಯಾ ದಿಸಾ ಪೇಂಟೆಕ್ ಗೆಲ್ಲ್ಯಾ ಲುಸಿಬಾಯೆಕ್ ದಖೊ ದಿಂವ್ಚಿ ಖಬಾರ್ ದಿಲ್ಲಿ ಮಿಂಗೆಲ್ ದಾಟ್ಟುನ್.
"ಕುಮಾದ್ರಿ, ತುಕಾ ಏಕ್ ಖಬಾರ್ ದೀಂವ್ಕ್ ಆಸ್ಲ್ಲಿ" ತಾಣೆಂ ಮ್ಹಳೆಂ.
"ಕಹಲಿ ಖಬಾರ್ ಮಿಂಗೆಲಿ?"
"ಕುಮಾದ್ರಿ ಆಯ್ಕೊನ್ ತುಕಾ ಬೆಜಾರ್ ಜಾಯ್ತ್. ಪುಣ್ ತುಂವೆಂ ಸಮಾಧಾನ್ ಘೆಜೆ", ತಾಣೆಂ ತಶೆಂ ಸಾಂಗ್ತಾನಾ ಲುಸಿಬಾಯೆಚೆಂ ಕಾಳಿಜ್ ದಡ್ದಡೊಂಕ್ ಲಾಗ್ಲೆಂ.
"ಕಿತೆಂ ತೆಂ ವೆಗಿಂ ಸಾಂಗ್ ಮಿಂಗೆಲಿ."
"ಪಳೆ ಕುಮಾದ್ರಿ, ಕಾಲ್ ಮ್ಹಜ್ಯಾ ಪುತಾಚೆಂ ಲ್ಯಾನ್ಸಿಚೆಂ ಬೊಂಬಯ್ ಥಾವ್ನ್ ಫೋನ್ ಆಯಿಲ್ಲೆಂ. ತಾಣೆಂ ತುಜ್ಯಾ ಪುತಾ ಬಾತ್ತಿವಿಶಿಂ ಥೊಡೆಂ ಥೊಡೆಂ ಸಾಂಗ್ಲೆಂ. ಪೋರ್ಚ್ ಕೊಣ್ಣಾ ಪಯಿಲ್ಲೆ ಪಾವ್ಟಿಂ ಬಾತ್ತಿ ಲ್ಯಾನ್ಸಿಕ್ ಆಚಾನಕ್ ಮೆಳ್ಲ್ಲೊ ಕಂಯ್. ಬಾತ್ತಿ ಗಾಂವಾಕ್ ಆಯ್ಲ್ಯಾ ಉಪ್ರಾಂತ್ ತಾಕಾ ಬಾತ್ತಿನ್ ಕೊಣ್ಣಾ ಬೊಂಬಯ್ ಕೆಲ್ಲ್ಯಾ ಕಾಮಾಂ ವಿಶಿಂ ಥೊಡ್ಯೊ ಸಂಗ್ತಿಂ ಕಳ್ಳಾತ್ ಮ್ಹಣ್ತಾಲೊ. ಬಾತ್ತಿನ್ ಕೊಣ್ಣಾ ಖಂಯ್ಚಾಗಿ ಎಕಾ ಮರಾಠಿ ಚೆಡ್ವಾಕ್ ಕಾಜಾರ್ ಜಾತಾ ಮ್ಹಣ್ ಭಾಸ್ ದೀವ್ನ್ ಗುರ್ವಾರ್ ಕರ್ನ್ ಫಸಯ್ಲೆಂ ಕಂಯ್. ತಾಚ್ಯಾ ಘರ್ಚಿಂ ಹಾಕಾ ಸೊಧುನ್ ಆಸಾತ್ ಕಂಯ್. ತಶೆಂ ದೋನ್ - ತೀನ್ ಕಡೆಂ ಮಸ್ತು ರೀಣ್ ಘೆವ್ನ್ ಹೊ ಚುಕೊನ್ ಘೆತಾಲೊ ಕಂಯ್. ಪೋರ್ ಲ್ಯಾನ್ಸಿನ್ ಕುಂಪಾದ್ರಿಚ್ಯಾ ಮರ್ಣಾಚಿ ಖಬಾರ್ ದಿಲ್ಲಿಚ್ ತಾಕಾ ಗಾಂವಾಕ್ ಯೇಂವ್ಕ್ ಬರೆಂ ನೀಬ್ ಜಾಲೆಂ. ತಶೆಂ ತೊ ಗಾಂವಾಕ್ ಆಯ್ಲಾ. ಪಾಟಿಂ ಬೊಂಬಯ್ ವಚಾತ್ ತರ್ ತಾಚೆಂ ನಶಿಬ್ ಸಾರ್ಕೆಂ ಉರ್ಚೆಂ ನಾ ಮ್ಹಣ್ತಾಲೊ ಲ್ಯಾನ್ಸಿ...."
ಆಯ್ಕೊನ್ ಅವಾಕ್ಕ್ ಜಾಲಿ ಲುಸಿಬಾಯ್. ತಿಚೊ ಪೂತ್ ಹ್ಯಾ ಮಟ್ಟಾಕ್ ಪಾವ್ಲಾ ಮ್ಹಣ್ ಪಾತ್ಯೆಂವ್ಚೆಂ ಕಷ್ಟಾಂಚೆಂ ಜಾಲೆಂ ತಿಕಾ.
"ಪುಣ್ ಆಪ್ಣೆಂ ಹೊಟೆಲ್ ಘಾಲಾಂ, ಲ್ಯಾನ್ಸಿಕ್ ಸದ್ದ್ಯಾಕ್ ಖಬಾರ್ ಕಾಡುಂಕ್ ಸಾಂಗ್ಲಾಂ ಮ್ಹಣ್ತಾಲೊ ಮಿಂಗೆಲಿ ತೊ," ತಿಣೆಂ ಮ್ಹಳೆಂ.
"ಪೂರಾ ಫಟಿ ಕುಮಾದ್ರಿ. ಬೊಂಬಯಾಂತ್ ತಶೆಂ ಹೊಟೇಲ್ ಘಾಲ್ಚೆಂ ತಿತ್ಲೆಂ ಸಲೀಸ್ ಮ್ಹಣ್ ಚಿಂತಾಯ್ವೇ ತುಂ? ವಯ್ಲ್ಯಾನ್ ಮ್ಹಜ್ಯಾ ಪುತಾಕ್ ತಾಚಿಚ್ ಕಾಮಾಂ ಚಡ್ ಜಾಲ್ಯಾಂತ್ ಆನಿಂ ತಾಣೆಂ ಕಶೆಂ ಬಾತ್ತಿಚ್ಯಾ ಹೂಟ್ಲಾಚಿ ಖಬಾರ್ ಘೆಂವ್ಚಿ? ತೊ ಸಾಂಗೊಂಕ್ ಆನಿಂ ತುಂ ಪಾತ್ಯೆಂವ್ಕ್! ಕಿತೆಂಯ್ ಜಾಂವ್ ಬಾತ್ತಿಚೊ ವಿಚಾರ್ ಕರ್" ಮಿಂಗೆಲ್ ದಾಟ್ಟುನ್ ತಿಕಾ ಸಮ್ಜಾಯ್ಲೆಂ.
ಲುಸಿಬಾಯ್ ಖರಿಚ್ ಗಳೊನ್ ಗೆಲಿ. ಕಿತ್ಯಾಕ್ಗಿ ಆಪ್ಣಾಚೆಂ ನಶಿಬ್ಚ್ ಸಾರ್ಕೆಂ ನಾಂ. ಆತಾಂ ತಿಕಾ ಕಳ್ಳೆಂ, ಬಾತ್ತಿ ಕಿತ್ಯಾಕ್ ಜಾಗೊ ವಿಕ್ಚೆ ವಿಶಿಂ ಚಡಿತ್ ಉರ್ಭಾ ದಾಖಯ್ತಾಲೊ ಮ್ಹಣ್. ಜಾಗೊ ವಿಕುನ್ ಆಪ್ಣಾಕ್ಯಿ ಬೊಂಬಯ್ ವರ್ತಾಂ ಮ್ಹಣ್ತಾಲೊಮೂ ತೊ? ವರ್ನ್ ಪೊಂಡಾಂತ್ ಘಾಲ್ತೊ ಆಸ್ಲ್ಲೊ. ಸರ್ವೆಸ್ಪರಾ, ಅರ್ಗಾಂ ತುಕಾ, ಆಯಿನ್ನ್ ಘಡ್ಯೆ ಮ್ಹಾಕಾ ಖರಿ ಗಜಾಲ್ ಕಳಿತ್ ಕೆಲಿಯ್, ತಿಣೆಂ ದೆವಾಕ್ ಅರ್ಗಾಂ ದಿಲಿಂ.
ಘರಾ ಪಾವ್ಲ್ಲ್ಯಾ ತಿಣೆಂ ಪುತಾಚೊ ವಿಚಾರ್ ಕೆಲೊನಾ. ಕಿತೆಂಚ್ ಜಾಂವ್ಕ್ ನಾತ್ಲ್ಲೆಬರಿ ನಟನ್ ಕರ್ನ್ ಪುತಾಕ್ ವಾಡುನ್ ನಿದೊಂಕ್ ಮಾಂದ್ರಿ ಘಾಲಿ ಆನಿಂ ತಿಯಿ ನಿದೊಂಕ್ ಗೆಲಿ. ಪುಣ್ ನೀದ್ ಮಾತ್ರ್ ತಿಚೆಲಾಗಿಂ ಸರ್ಲಿನಾ. ಚಿಂತ್ನಾಂನಿ ಮತ್ ಪಿಶಿ ಕಶಿ ಜಾಲ್ಲಿ. ಜಾಲ್ಯಾರ್ಯಿ ಏಕ್ ಖರೊ ನಿರ್ಧಾರ್ ತಿಚೆ ಮತಿಂತ್ ತಿಣೆಂ ಕರ್ನ್ ಜಾಲ್ಲೊ.
ದುಸ್ರೊ ದೀಸ್ ಸಕಾಳಿಂ ಸುಮಾರ್ ಧಾ ವೊರಾರ್ ತಿ ಪೆಂಟೆಂತ್ಲ್ಯಾ ಮುಕ್ಕಾಲ್ ಎಕ್ರೊ ಜಾಗ್ಯಾಚಿಂ ಸರ್ವ್ ದಸ್ತಾವೇಜಾಂ ಘುಟಾನ್ ಘೆವ್ನ್ ಭಾಯ್ರ್ ಸರ್ಲಿಂ. ಪುತಾಕ್ ಘರಾ ಕಡೆ ರಾವ್, ವೆಗಿಂ ಥೊಡೊ ಸಾಮಾನ್ ಹಾಡ್ನ್ ಯೆತಾಂ ಮ್ಹಣ್ ಸಾಂಗ್ಲೆಂ.
ತಿ ಶೀದಾ ಮಾದ್ರಿಂಚ್ಯಾ ಕೊವೆಂತಾಕ್ ಗೆಲಿ. ತಿಣೆಂ ಸಿಸ್ಟರ್ ಸುಪೀರಿಯರಾಕ್ ವಿಚಾರ್ಲೆಂ. ಥೊಡ್ಯಾ ವೆಳಾನ್ ಸಿಸ್ಟರ್ ಸುಪೀರಿಯರ್ ಭಾಯ್ರ್ ಆಯ್ಲಿ.
ಲುಸಿಬಾಯೆಕ್ ತಿಚೆರ್ ಚಡಿತ್ ಮೋಗ್, ಆಪ್ಲೊ ಘೊವ್ ಸರ್ತನಾ, ತಾಚ್ಯಾಕಿ ಪಯ್ಲೆಂ ತೊ ಪಿಡೆಂತ್ ಪಡ್ತಾನಾಂಯಿ, ತಿಣೆಂ ಮಸ್ತು ಭುಜಾವಣ್ ದಿಲ್ಲಿ. ಮಯ್ಪಾಸಿ ಮಾದ್ರ್ ತಿ. ತಿ ಮಾತ್ರ್ ನ್ಹಂಯ್, ಹೆರ್ ಮಾದ್ರಿಂಕ್ಯಿ ಲುಸಿಬಾಯೆ ವಿಶಿಂ ವಿಶೇಸ್ ಹುಸ್ಕೊ. ಭೋವ್ಶಾ ತಿ ಎಕ್ಸುರಿ ಮ್ಹಳ್ಳ್ಯಾ ಖಾತಿರ್ ಜಾಯ್ಜಾಯ್!
"ಹೊ ಲುಸಿಬಾಯ್, ಕಿತೆಂ ಆಮ್ಕಾಂ ಬೆಟೊಂಕ್ ಆಯ್ಲಿಯ್?" ಸಿಸ್ಟರ್ ಸುಪೀರಿಯರಾನ್ ತಿಕಾ ಯೆವ್ಕಾರ್ ಮಾಗ್ಲೊ.
"ವ್ಹಯ್ ಸಿಸ್ಟರ್, ತುಂಮ್ಚಾ ಕಡೆ ಥೊಡೆಂ ಉಲಂವ್ಕ್ ಆಸ್ಲ್ಲೆಂ." ಲುಸಿಬಾಯೆನ್ ಮ್ಹಳೆಂ.
"ಜರೂರ್ ಲುಸಿಬಾಯೆ; ಯೇ ಪಾರ್ಲರಾಕ್ ಯಾ"
ತಿಣೆಂ ಲುಸಿಬಾಯೆಕ್ ಪಾರ್ಲರಾಕ್ ಆಪವ್ನ್ ವ್ಹೆಲೆಂ.
"ಆತಾಂ ಸಾಂಗ್ ಲುಸಿಬಾಯ್, ಕಿತೆಂ ಸಾಂಗೊಂಕ್ ಆಸಾ ತುಕಾ"
"ಸಿಸ್ಟರ್ ತುಂಮ್ಚ್ಯಾ ಕಂಪಂವ್ಡಾಚ್ಯಾ ಕುಶಿನ್ ಆಸ್ಚೊ ಜಾಗೊ ಮ್ಹಜೊ ತೆಂ ತುಮ್ಕಾಂ ಕಳಿತ್ ಆಸಾ. ಹೊ ಜಾಗೊ ಹಾಂವೆಂ ತುಮ್ಕಾಂ ದಾನ್ ದಿಂವ್ಚೊ ಮ್ಹಣ್ ನಿರ್ಧಾರ್ ಕೆಲಾ".
ಲುಸಿಬಾಯೆನ್ ಸಾಂಗ್ತಾನಾ ಸಿಸ್ಟರ್ ಘಡ್ಯೆಕ್ ಅಜ್ಯಾಪ್ಲಿ.
"ಪುಣ್ ಲುಸಿಬಾಯೆ, ತುಜೊ ಪೂತ್ ಆಯ್ಲಾ ಮ್ಹಣ್ ಆಯ್ಕಾಲೆಂ ಹಾಂವೆಂ!"
"ತೊ ಆಯ್ಲಾ ವ್ಹಯ್ ಸಿಸ್ಟರ್, ಪುಣ್ ಜಾಗೊ ಮ್ಹಜ್ಯಾ ನಾಂವಾರ್ ಆಸಾ ಜಾಲ್ಲ್ಯಾನ್ ಹಾಂವ್ ತೊ ತುಂಮ್ಕಾಂ ದೀಂವ್ಕ್ ಆಶೆತಾ. ಹ್ಯಾ ಜಾಗ್ಯಾಚೆರ್ ಲೊರ್ಸುಚೊ ದೊಳೊ ಆಸಾ. ತೊ ಮೊಲಾಕ್ ಘೆಂವ್ಕ್ ಆಪೇಕ್ಶಿತಾ. ಪುಣ್ ತಾಕಾ ದೀಂವ್ಕ್ ಮ್ಹಾಕಾ ಬಿಲ್ಕುಲ್ ಮನ್ ನಾ. ಮ್ಹಜ್ಯಾ ಪುತಾಚಿ ವೆಗ್ಳಿಚ್ ಗಜಾಲ್..." ತಿಣೆಂ ಮಿಂಗೆಲ್ ದಾಟ್ಟು ಥಾವ್ನ್ ಆಯ್ಕಾಲ್ಲಿ ಖಬಾರ್ ಸರ್ವ್ ಸಿಸ್ಟರಿಕ್ ಸಾಂಗ್ಲಿಂ. "ಮ್ಹಜ್ಯಾ ಪುತಾಕ್ ಮ್ಹಜ್ಯಾಕ್ಯಿ ಚಡ್ ತ್ಯಾ ಕುಡ್ಕ್ಯಾ ಭುಂಯ್ಚೆರ್ ಮೋಗ್ ಚಡ್ ಆಸಾ ಮ್ಹಣ್ ಭಗ್ತಾ ಮ್ಹಾಕಾ. ಘರ್ ಆನಿಂ ಆಸ್ಲ್ಲೊ ಸರ್ವ್ ಜಾಗೊ ವಿಕುನ್ ಮ್ಹಾಕಾ ತಾಣೆಂ ವಾಟೆರ್ ಘಾಲ್ಚೆ ವಿಶಿಂ ಕಾಂಯ್ಚ್ ದುಬಾವ್ ನಾಂ. ದೆಕುನ್ ಸಿಸ್ಟರ್ ಹೊ ಜಾಗೊ ಕಸಲ್ಯಾಯಿ ಬರ್ಯಾ ಕಾರ್ಯಾಕ್ ಗಳ್ಸಿಲ್ಲೆಬರಿ ಜಾಂವ್ದಿ. ದಯಾಕರ್ನ್ ನಾಕಾ ಮ್ಹಣಾನಾಕಾತ್"
"ಪಳೆ ಲುಸಿಬಾಯೆ, ತುಜಿ ಆಲೋಚನ್ ತಶಿ ತರ್ ಖಂಡಿತ್ ಆಮಿಂ ಹೊ ಜಾಗೊ ಸ್ವೀಕಾರ್ ಕರ್ತಾಂವ್. ಆಮ್ಕಾಂಯಿ ಏಕ್ ಅನಾಥ್ ಆಸ್ರೊ ಉಘಡ್ಚಿ ಆಶಾ ಆಸಾ. ತಶೆಂ ಹೊ ಜಾಗೊ ಗರ್ಜೆಕ್ ಪಡ್ತಲೊ. ಪುಣ್ ತುಂವೆಂ ಕಾಂಯ್ ಥೊಡೆ ಪಯ್ಶೆ ಘೆಜಾಯ್ ಪಡ್ತೆಲೆ," ಸಿಸ್ಟರಿನ್ ಸಾಂಗ್ಲೆಂ.
"ಸದ್ದ್ಯಾಕ್ ನಾಕಾ ಸಿಸ್ಟರ್", ಲುಸಿಬಾಯೆನ್ ಮ್ಹಳೆಂ. ಗರ್ಜ್ ಪಡ್ತಾನಾ ಹಾಂವ್ಚ್ ವಿಚಾರ್ತಾ. ಘೆಯಾ, ಹಿಂ ಜಾಗ್ಯಾಚಿಂ ದಸ್ತವೇಜಾಂ. ಜಾಗೊ ಕಸೊ ತುಮ್ಚ್ಯಾ ನಾಂವಾರ್ ಕರ್ಚೊ ಹ್ಯಾ ವಿಶಿಂ ಮ್ಹಾಕಾ ಚಡಿತ್ ಮಾಹೆತ್ ನಾಂ. ತೆಂ ಸರ್ವ್ ತುಮಿಂಚ್ ಪಳೆಯಾ."
"ಖಂಡಿತ್ ಲುಸಿಬಾಯೆ", ಸಿಸ್ಟರಿನ್ ದಸ್ತವೇಜಾಂ ಘೆತ್ಲಿಂ.
"ತ್ಯಾ ವಿಶಿಂ ತುಂ ಪಿಕಿರ್ ಕರಿನಾಕಾ. ವ್ಹಡ್ ದಾನ್ ತುಂ ಆಮ್ಕಾಂ ಕರ್ನ್ ಆಸಾಯ್; ಉಪ್ಕಾರ್ ತುಜೊ. ದೇವ್ ತುಜೆರ್
ಬೆಸಾಂವಾಂ ವೊತುಂ"
ಸಿಸ್ಟರಿನ್ ದಿಲ್ಲಿ ಚಾ ಪಿಯೆವ್ನ್ ಭಾಯ್ರ್ ಯೆತಾನಾ ಲುಸಿಬಾಯೆಚಿ
ಮತ್ ಮಾತ್ಸಿ ಶಾಂತ್ ಜಾಲ್ಲಿ. ಕಿತ್ಯಾಕ್ಗಿ ತಿಕಾ ಆತಾಂ ಲೊರ್ಸುಚಿ
ಭಿರಾಂತ್ ದಿಸ್ಲಿನಾಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
