ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 56. ನಿರಾಧಾರ್
ಕ್ಲೆರೆನ್ಸ್ ಪಿಂಟೊ, ಪಡೀಲ್: ಕೊಂಕ್ಣೆಂತ್ ಆಯ್ಲೆವಾರ್ ಉದೆಲ್ಲ್ಯಾ ಥೊಡ್ಯಾ ಭರ್ವಶ್ಯಾಚ್ಯಾ ಕಾಣ್ಯೆಗಾರಾಂಚಾ ಮೆಳಿಂತ್ ಹಾಚೆಂ ನಾಂವ್ ಜರೂರ್ ಆಸಾ, ವೆವೆಗ್ಳ್ಯಾ ಶೈಲೆಚ್ಯಾ ಕಾಣ್ಯಾಂನಿ ಹಾಣೆಂ ಎದೊಳ್ಚ್ ಅಪ್ಲಿ ಕುರುಃ ಸೊಡ್ಲ್ಯಾ. ಫುಡೆಂಯೀ ಅಪ್ಲಿ ಮಿನತ್ ಮುಖಾರುನ್ ವರಿತ್ ತರ್ ಕೊಂಕ್ಣೆಚೊ ಬರೊ ಕಾಣ್ಯೆಗಾರ್ ಜಾಯ್ತ್ ಮ್ಹಳ್ಳೆಂ ಸಾಂಗ್ಯೆತಾ.
ಕ್ಲೆರೆನ್ಸ್ ಪಿಂಟೊ
ತ್ಯಾ ಹಳ್ಳೆಚೆಂ ನಾಂವ್ ಬೆಲ್ತಾಬೆಟ್ಟು. ತ್ಯಾ ಹಳ್ಳೆಂತ್ ಆಮ್ಚೆಂ ಏಕ್ ಲ್ಹಾನ್ ಗುಡ್ಸುಲ್. ಮ್ಹಜೊ ಬಾಬ್ ಪಿಡೇಸ್ತ್ ಜಾವ್ನ್ ಆಸ್ಲ್ಲೊ. ಮಾಂಯ್ ಚಿಂಚುಕ್ ಗುರ್ವಾರ್ ಆಸ್ತಾನಾಂಚ್ ತೊ ಅಂತರ್ಲೊ. ಕುಟ್ಮಾಚೆಂ ಜ಼ೂಂ ಮಾಂಯ್ಚಾ ಖಾಂದ್ಯಾರ್ ಬಸ್ತಾನಾ ತಿಣೆ ಆಮ್ಕಾಂ ಪೊಸುಂಕ್ ಕರಿನಾತ್ಲ್ಲೆಂ ಕಾಮ್ ನಾ. ಕಾಡಿನಾತ್ಲೆಲೆ ಕಶ್ಟ್ ನಾಂತ್. ಪುಣ್ ತಾಂತು ತಿ ಕುಟಾಮ್ ಚಲೊನ್ ವರುಂಕ್ ಸಕ್ಲಿ ನಾ. ಅಖೇರಿಕ್ ನಿರ್ವೊಗ್ ನಾಸ್ತಾಂ ತಿಚೊ ಏಕ್ ವ್ಯಾರ್ ಸುರು ಜಾಲೊ ಸೊರ್ಯಾಚೊ ವ್ಯಾರ್!
********
ಘರಾ ಥಾವ್ನ್ ತೀನ್ ಮಯ್ಲಾಂ ಪಯ್ಸ್ ಆಸ್ಲೆಲ್ಯಾ ತ್ಯಾ ಸರ್ಕಾರಿ ಇಸ್ಕೊಲಾಂತ್ ಹಾಂವ್ ಸಾತ್ವ್ಯಾ ವರ್ಗಾಂತ್ ಶಿಕ್ತಾಂ. ನಾಂವ್ ಅಲೆಕ್ಸ್. ಪುಣ್ ಮ್ಹಕಾ ಮೊಗಾನ್ ಸಗ್ಳಿಂ ಅಲ್ಲು ಮ್ಹಣ್ತಾತ್. ಮ್ಹಜೆಂ ಭಯ್ಣ್ ಬೇಲಾ ತಾಕಾ ಮೊಗಾನ್ ಬೈಯು ಮ್ಹಣೊನ್ ಆಪಯ್ತಾತ್.... ತೆಂ ಪಾಂಚ್ವೆಂತ್ ಶಿಕ್ತಾ. ಆನಿ ತಿಸ್ರೆಂ ಶೈಲಾ ತಾಕಾ ಮೊಗಾನ್ ಚಿಂಚು ಮ್ಹಣೊನ್ ಆಪಂವ್ಚೆಂ ತಾಕಾ ಆಜೂನ್ಯ್ ಇಸ್ಕೊಲಾಕ್ ದಾಖಲ್ ಕರುಂಕ್ ನಾ.
ಜಿಣಿಯೆಂತ್ ಪಿಡಾ, ಆನ್ವಾರಾಂ, ಕಷ್ಟ್ ಸೊಸುನ್ ಲಾಚಾರ್ ಜಾಲ್ಲಿ ಮ್ಹಜಿ ಪಾಂತ್ತೀಸ್ ವರ್ಸಾಂಚಿ ಮಾಂಯ್ ಸಾಟ್ ಆನಿ ಪಾಂಚ್ ವರ್ಸಾಂಚಾ ಪ್ರಾಯೆಸ್ತಾ ಪರಿಂ ದಿಸ್ತಾಲಿ. ಹಿ ಆಮ್ಚಾ ನಿರ್ಭಾಗಿ ಕುಟ್ಮಾಚಿ ಮಟ್ವಿ ಪರಿಚಯ್.
*********
"ಅಲೆಕ್ಸ್..... ಸಮಾಛೇದ್ ಮ್ಹಳ್ಯಾರ್ ಕಿತೆಂ?" ಟಿಚೆರಿನ್ ಸವಾಲ್ ಕೆಲೆಂ.
ಹಾಂವ್ ಮೊನೊ ಆಸ್ಲ್ಲೊಂ ಪಳವ್ನ್ ಬೆತಾಚೊ ಏಕ್ ಮಾರ್ ಮ್ಹಜ್ಯಾ ಪಾಟಿರ್ ಬಸ್ಲೊ.
"ಏಕ್ಯೀ ಕಳಿತ್ ನಾ ತುಕಾ....? ಮಾರಿ ಖಂಯ್ಚೊ! ಇಸ್ಕೊಲಾಕ್ ಕಿತ್ಯಾಕ್ ಯೆತಾತ್? ಬಾಂಕ್ ಹುನ್ ಕರುಂಕ್...? ಬಾಂಕಾರ್ ಉಭೆ ರಾವ್!" ತಿಣೆ ಫರ್ಮಾಯ್ಲೆಂ.
ಹಾಂವ್ ಬಾಂಕಾರ್ ಉಭೊ ರಾವೊಂಕ್ ನರ್ಗಾಲೊಂ. ಮ್ಹಜೊ ಕಾನ್ ಧರುನ್ ವೊಳಾಯ್ಲೊ. ನಾ ಖುಶೆನ್ ಬಾಂಕಾರ್ ಚಡ್ಲೊಂ. ಸಗ್ಳಿ ಕ್ಲಾಸ್ ಮ್ಹಾಕಾ ಪಳವ್ನ್ ಹಾಸ್ಲಿ.
ಮ್ಹಜಿ ಚಡ್ಡಿ ಮುಕ್ಲ್ಯಾನ್ ತಶೆಂ ಪಾಟ್ಲ್ಯಾನ್ ಪಿಂಜ್ಲ್ಲಿ. ಮ್ಹಜೊ ಜೀವ್ ಲಜೆನ್ ಅವ್ಮಾನಾನ್ ಮುಯೆತೆದೊ ಜಾಲೊ.
"ಲಜ್ ನಾತ್ಲ್ಲಿ ಜಾತ್ ಖಂಯ್ಚಿ! ಕಾಲ್ ಕಿತ್ಯಾಕ್ ಇಸ್ಕೊಲಾಕ್ ಯೇಂವ್ಕ್ ನಾಂಯ್....? ಸಕ್ಲಾ ದೇಂವ್...!"
ಹಾಂವ್ ಬಾಂಕಾರ್ ಥಾವ್ನ್ ಸಕ್ಲಾ ದೆಂವ್ಲೊಂ.
"ಭಯ್ಣ್ ಹುಶಾರ್ ನಾತ್ಲ್ಲೆಂ!" ಹಾವೆಂ ಜವಾಬ್ ದಿಲಿ.
"ಏಕ್ ದೀಸ್ ಭಯ್ಣ್ ಹುಶಾರ್ ನಾ! ಏಕ್ ದೀಸ್ ಘರಾ ಕಾಮ್ ಆಸ್ಲ್ಲೆಂ!" ತಿಣೆ ಪರತ್ ಮ್ಹಜೊ ಕಾನ್ ವೊಳಾಯ್ಲೊ. ಆಶೆಂ ದೋನ್ ದಿಸಾಂಕ್ ಏಕ್ ಪಾವ್ಟಿಂ ರಜಾ ಕರ್ಚಿ ತರ್ ತುಕಾ ಇಸ್ಕ್ಲೊಲ್ ಸೊಡ್ನ್ ಘರಾಚ್ ಬಸೊಂಕ್ ಜಾಯ್ನಾ? ಆವಯ್ ಸಾಂಗಾತಾ ಸೊರ್ಯಾಚೊ ದಂದೊ ಚಲವ್ಯೆತ್....!"
ತಿಣೆ ಮಾರ್ಲ್ಯಾರ್ಯ್ ಕಾನ್ ವೊಳಾಯ್ಲ್ಯಾರ್ಯೀ ಮ್ಹಾಕಾ ತಿತ್ಲೆಂ ದುಖೊಂಕ್ ನಾತ್ಲ್ಲೆಂ. ಪೂಣ್ ತಿಚ್ಯಾ ಹ್ಯಾ ಉತ್ರಾಂತ್ ಮ್ಹಜ್ಯಾ ದೊಳ್ಯಾಂತ್ ದುಖಾಂ ಭರ್ಲಿಂ.
"ಮಾಂಯ್ ಸೊರ್ಯಾಚೊ ದಂದೊ ಕರ್ತಾ ಆಮ್ಕಾಂ ಪೊಸುಂಕ್ ಆನಿ ಆಮ್ಚಾ ಪೊಟಾ ಭುಖೆ ಖಾತಿರ್....!" ಮುಕಾರ್ ಮ್ಹಜ್ಯಾನ್ ಉಲಂವ್ಕ್ ಜಾಲೆಂ ನಾ. ಮ್ಹಜೊ ಗಳೊ ಭರೊನ್ ಆಯ್ಲೊ. ಜರ್ ತಿ ಹೊ ದಂದೊ ಕರಿನಾತ್ಲ್ಲಿ ತರ್ ಮ್ಹಾಕಾ ಹಿ ಪಿಂಜ್ಲ್ಲಿ ಚಾಡ್ಡಿ ಪಾಸೊನ್ ಫಾವೊ ಜಾತಿನಾ. ಭುಖೆ ಖಾತಿರ್ ಎಕ್ಚ್ ಚೊರಿಜಾಯ್ ಆಸ್ಲ್ಲೆಂ! ನಾಂ ತರ್ ಮೊರಾಜಾಯ್ ಆಸ್ಲ್ಲೆಂ!
*******
ತೊ ದೀಸ್ ಆಮ್ಚ್ಯಾ ಜಿಣಿಯೆಂತ್ ಆಂದ್ಕಾರ್ ಹಾಡ್ಲ್ಲೊ ದೀಸ್! ನಿರ್ಭಾಗಿ ಆಸ್ಲ್ಲ್ಯಾ ಆಮಿಂ ನಿರಾಧಾರ್ ಜಾಲ್ಲೊ ದೀಸ್. ಸೊರ್ಯಾ ದಂದೊ ಕರ್ಚಾ ಮಾಂಯ್ಕ್ ಪೊಲಿಸಾಂನಿ ಕುಡಾಯ್ಲೆಂ ಮಾತ್ರ್ ನ್ಹಂಯ್ ತಿಕಾ ಮಾರ್ನ್ ತಿಚೆ ಸಂದ್ ಮೊಡ್ಲ್ಲೆ! ಖಾಲಿ ತೀನ್ ದೀಸ್ ತಿ ಆಸ್ಪತ್ರೆಂತ್ ವಳ್ವಳೊನ್ ಚವ್ತ್ಯಾ ದಿಸಾ ತಿ ಅಂತರ್ಲಿ. ಆಮ್ಕಾಂ ನೆಣ್ತ್ಯಾಂಕ್ ಸೊಡುನ್ ಗೆಲಿ. ಆಮ್ಕಾಂ ನಿರಾಧಾರ್ ಕರುನ್ ಮೆಲಿ!
ಆಜ್ ಹಾಂವ್ ಸಗ್ಳೊಂ ಪಿಸಾಂತುರ್ ಜಾಲ್ಲೊಂ. ಆಸ್ಪತ್ರೆಂತ್ ಸಭಾರ್ ಲೋಕ್ ಜಮ್ಲ್ಲೊ. ತಾಂಚೆಸಂಗಿಂ ಎಸ್.ಪಿ. ಎಮ್. ಎಲ್. ಎ ಮಾಜಿ ಫುಡಾರಿ ಆಸ್ಲ್ಲೆ. ಮೆಲ್ಲ್ಯಾ ಮಾಂಯ್ಚಿ ಸೊಭಾಯ್ ಪಳಂವ್ಕ್.....? ಅಸಹಾಯಕ್ ಕುಟ್ಮಾಕ್ ಭುಜವ್ನ್, ನ್ಯಾಯ್ ದೀಂವ್ಕ್....? ವಾ ತಾಂಚ್ಯಾಚ್ ರಾಜಕೀಯಾ ಫಾಯ್ದ್ಯಾ ಖಾತಿರ್ ಮ್ಹಣೊನ್ ಮ್ಹಾಕಾ ಕಳೊಂಕ್ ನಾ. ಹಾಂವ್ ತಾಳೊ ಪಿಂಜುನ್ ಬೊಬಾಟ್ತಾನಾ ಪತ್ರ್ಕರ್ತ್ ಮ್ಹಜೆ ಲಾಗಿಂ ಜಮ್ಲೆ.
"ಪೊಟಾ ಭುಖೆ ಖಾತಿರ್ ತಶೆ ಆಧಾರ್ ನಾತ್ಲ್ಲ್ಯಾ ಕುಟ್ಮಾಕ್ ಪೊಸ್ಚೆ ಖಾತಿರ್ ಸೊರ್ಯಾಚೊ ದಂದೊ ಕರ್ಚಾ ಎಕಾ ಲಾಚಾರ್ ಸ್ತ್ರೀಯೆಕ್ ತುಮಿ ಜಿವೆಶಿಂ ಮಾರ್ಲೆಂ. ತುಮಿ ಖಂಡಿತ್ ಭರ್ಕಾತ್ ಜಾಂವ್ಚೆ ನಾಂತ್. ಘರಾಂನಿ ರಿಗೊನ್ ಬಾಗ್ಲಾಂ ಫೊಡ್ನ್ ಹಜಾರಾಂನಿ ಬಾಂಗಾರ್ ದುಡು ಚೊರ್ತೆಲ್ಯಾಂಕ್ ಸೈತ್ ಶಿಕ್ಶಾ ದಿನಾಸ್ತಾನಾ ಸೊಡ್ತಾತ್. ಅಪ್ರಾಪ್ತ್ ಚೆಡ್ವಾಂ ಭುರ್ಗ್ಯಾಂಚೆರ್ ಸೈತ್ ಅತ್ಯಾಚಾರ್ ಚಲವ್ನ್ ಗೊಮ್ಟಿ ಚಿಡ್ಡಿತಾತ್ ತಸ್ಲ್ಯಾಂಕ್ ಕೋಣ್ ಶಿಕ್ಶಾ ದಿತಾ? ಜಾತಿ ಕಾತಿಕ್ ಲಾಗೊನ್ ರಾಗ್ ದ್ವೇಶಾ ಖಾತಿರ್ ಗೊಮ್ಟಿ ಲುಂವ್ತಾತ್ ತಸಲ್ಯಾಂಕ್ ಕಸ್ಲಿ ಶಿಕ್ಶಾ ದಿತಾತ್?
ಹಾಂಗಾ ನೀಜ್ ಖುನಿಗಾರಾಂಕ್, ಭೃಷ್ಟಾಚಾರಿಂಕ್, ರಾವ್ಡಿಂಕ್, ಚೊರಾಂಕ್ ಕಾನೂನ್ ಜಾಂವ್ ಪೊಲಿಸ್ ಜಾಂವ್ ಕಾಂಯ್ ಕರ್ನಾಂತ್. ಪುಣ್ ಮ್ಹಜ್ಯಾ ಆವಯ್ನ್ ಕೆಲ್ಲೊ ಆಪ್ರಾದ್ ಜಾಲ್ಯಾರ್ಯ್ ಕಸಲೊ? ಕೊಣಾಯ್ಚೆಂ ಕಾಂಯ್ ಲುಟ್ಲೆಂ? ಆಸ್ತ್ ಭಿತರ್ ಘಾಲ್ಯಾ? ಖುಣ್ ಕೆಲ್ಯಾ? ಚೊರ್ಲಾಂ? ಜರ್ ತಿಣೆ ಹೊ ದಂದೊ ಕರುಂಕ್ ನಾತ್ಲ್ಲೊ ತರ್ ತಿ ಆಮ್ಕಾಂ ಪೊಸುಂಕ್ ಸಕ್ತಿ ನಾ. ತೆದ್ನಾಂ ತಿ ಜೀವ್ಘಾತ್ ಕರ್ನ್ ಕಾಣ್ಘೆತಿ ವಾ ಆಮ್ಕಾಂ ಉಪಾಶಿಂ ಘಾಲುನ್ ಜಿವೆಶಿಂ ಮಾರ್ತಿ. ತೆದ್ನಾಂ ತೊ ಆಪ್ರಾದ್ ಜಾತೊ ನಾ....?
ತೆದೊಳ್ ಪರ್ಯಾಂತ್ ಮೌನ್ ಆಸ್ಲ್ಲ್ಯಾ ಲೊಕಾ ಮಧೆಂ ಗುಸು ಗುಸು ಆರಂಭ್ ಜಾಲೆಂ. ವಿರೋಧ್ ಪಾಡ್ತಿಚೊ ಎಕ್ಲೊ ಫುಡಾರಿ ಯೇವ್ನ್ ಮ್ಹಾಕಾ ಆಧಾರ್ ಜಾವ್ನ್ ರಾವ್ಲೊ ಆನಿ "ಹ್ಯಾ ಭುರ್ಗ್ಯಾನ್ ಸಾಂಗ್ಚ್ಯಾಂತ್ ಸತ್ ಆಸಾ ತ್ಯಾ ಪೊಲಿಸಾಂಕ್ ಸಸ್ಪೆಂಡ್ ಕರಿಜಾಯ್!" ಮ್ಹಣ್ ಪತ್ರ್ಕರ್ತಾಂಕ್ ಪಳಂವ್ಕ್ ಲಾಗ್ಲೊ. ತೆ ತಾಂಕಾ ಸಮ್ಜಾಲ್ಲ್ಯಾ ಪರಿಂ ತಾಚ್ಯೊ ತಸ್ವೀರ್ಯೊ ಕಾಡುನ್ ಕಾಗ್ದಾರ್ ಕಿತೆಂಗೀ ಬರಂವ್ಕ್ ಲಾಗ್ಲೆಂ. ಆತಾಂ ಮಾಜಿ ಎಂ.ಎಲ್.ಎ ಫುಡಾರಿ ಮುಕಾರ್ ಯೇವ್ನ್ ಮ್ಹಾಕಾ ಆಧಾರ್ ಭಾಸವ್ನ್, ಭುಜಾವಣ್ ದೀಂವ್ಕ್ ಲಾಗ್ಲೆಂ. ಆನಿ ಧೊಡ್ಯಾಂನಿ ನ್ಯಾಯ್ ದಿವಯ್ತಾಂ ಮ್ಹಣೊನ್ ಪಾಚಾರ್ಲೆಂ.
**********
ದೀಸ್ ಗೆಲೆ. ಹಪ್ತೆ ಉಬ್ಲೆ. ಮಹಿನೆ ಸಂಪ್ಲೆ. ನ್ಯಾಯ್ ದಿವಂವ್ಚೆಂ ಜಾಂವ್ ಆಧಾರ್ ದಿಂವ್ಚೆಂ ಜಾಂವ್ ಖಬ್ರೆರ್ ನಾತ್ಲ್ಲೆಂ ತಾಂಕಾ ಸೊಧುನ್ ತಾಂಚಾ ಪಾಂಯಾಂ ಮುಳಾಂತ್ ಗೆಲ್ಯಾರ್ಯ್ ಥೊಡ್ಯಾಂನಿ ಆಮ್ಕಾ ನೆಗಾರ್ ಕೆಲೆ. ಥೊಡೆ ವಳ್ಕಾಲೆಚ್ ನಾಂತ್ ಆನಿ ಥೊಡ್ಯಾಂನಿ ಮಾಗ್ತೆಲ್ಯಾಂಕ್ ಧಾಂವ್ಡಾಂವ್ಚೆ ಪರಿಂ ಧಾಂವ್ಡಾಯ್ಲೆಂ. ತ್ಯಾ ದೀಸ್ ಪತ್ರಾಂನಿ ತಾಂಚೊ ಪ್ರಚಾರ್ ಜಾಂವ್ಚೆ ಖಾತಿರ್, ಫೋಟೊ ಯೆಂವ್ಚೆ ಖಾತಿರ್ ತೆ ಘೊಂಕ್ಲ್ಲೆ ಶಿವಾಯ್ ಆಮ್ಚ್ಯಾ ಭಿರ್ಮತೆನ್ ವಾ ಮನ್ಶ್ಯಾಪಣಾನ್ ನ್ಹಂಯ್ ಮ್ಹಣ್ ಮ್ಹಕಾ ಆಜ್ ಕಳ್ಲ್ಲೆಂ.
**********
ಆಮ್ಚಿ ಫಿರ್ಗಜ್ ಸಾಂತ್ ಆಂತೊನಿಕ್ ಸಮರ್ಪಿಲ್ಲಿ. ಭಾಯ್ಲ್ಯಾ ಫಿರ್ಗಜಿಚೊ, ಗಾಂವ್ಚೊ ಲೋಕ್ ನವೆನಾಕ್ ಯೆತಾಲೊ. ತೊ ದೀಸ್ ಸಾಂತ್ ಅಂತೊನಿಚಾ ನೆವೆನಾಚೊ. ಎಕಾಚ್ ಫರಾ ಮ್ಹಕಾ ಫಿರ್ಗಜ್ ವಿಗಾರಾಚೊ ಉಡಾಸ್ ಆಯ್ಲೊ. ತೊ ಖಂಡಿತ್ ಆಮ್ಕಾಂ ಆಧಾರ್ ದೀತ್ ಮ್ಹಳ್ಳ್ಯಾ ಭರ್ವಸ್ಯಾನ್ ಮ್ಹಜ್ಯಾ ನೆಣ್ತ್ಯಾ ಭಾಂವ್ಡಾಂಕ್ ಘೆವ್ನ್ ವಿಗಾರಾಕ್ ಮೆಳೊಂಕ್ ಗೆಲೊಂ.
ವಿಶೇಸ್ ಕಿತೆಂಗೀ ಮ್ಹಳ್ಯಾರ್ ಆಮಿಂ ತಾಚ್ಯಾಚ್ ಫಿರ್ಗಜೆಚೆ ಜಾವ್ನ್ ಪರಿಸ್ಥಿತಿ ಜಾಣಾ ಜಾಲ್ಲ್ಯಾ ವಿಗಾರಾನ್ಚ್ ಹಾತ್ ವಯ್ರ್ ಕೆಲ್ಲೆ!
"ಅಳೆ ಹಾವೆಂ ಇಗರ್ಜ್ ಮೊಡುನ್ ನವ್ಯಾ ಇಗರ್ಜೆಚೆಂ ಕಾಮ್ ಸುರು ಕೆಲಾಂ. ತೆಂ ಜಾತಚ್ ಹಾಲಾಚೆಂ ಕಾಮ್ ಹಾತಿಂ ಧರಿಜಾಯ್. ದೆಕುನ್ ಹಾಂವ್ ಕೊಣಾಯ್ಚಿಯ್ ಕುಮಕ್ ದಿಂವ್ಚಾ ಸ್ಥಿತೆರ್ ನಾ"
ಹೆಂ ಆಯ್ಕೊನ್ ಮ್ಹಾಕಾ ಘಡ್ಗಡೊ ಮಾರ್ಲೆಪರಿಂ ಜಾಲೆಂ ಆಮಿಂ ಜಿಯೆಂವ್ಕ್ ಆಸ್ಲ್ಲೆ ನಿಮಾಣೆ ಏಕ್ ಆಶೆಚೆಂ ಕೀರ್ಣ್ಯ್ ಪಾಲ್ವಾಲ್ಲೆಂ. ಆಮಿಂ ನಿರಾಶೆನ್ ತಶೆಂ ಪುರಾಸಾನೆನ್ ಭಾಯ್ರ್ ಆಯ್ಲ್ಯಾಂವ್. ಪೊಟಾಕ್ ನಾಸ್ತಾಂ ಆಮಿಂ ನಿತ್ರಾಣ್ ಜಾಲ್ಲ್ಯಾಂವ್. ಮ್ಹಜ್ಯಾ ಭಾಂವ್ಡಾಂಕ್ ರಡೊಂಕ್ ಸಮೇತ್ ತ್ರಾಣ್ ನಾತ್ಲ್ಲೆಂ. ಭುಕೆನ್ ಆನಿ ಥಕೊನ್ ತಾಂಚಾ ದೊಳ್ಯಾಂತ್ ದುಖಾಂ ಮಾತ್ರ್ ದೆಂವ್ತಾಲಿಂ ಶಿವಾಯ್ ಸಬ್ದ್ ಆಯ್ಕಾನಾತ್ಲ್ಲೊ.
ಗೆಟಿಲಾಗಿಂ ಪಾವ್ಲ್ಲ್ಯಾ ಆಮ್ಕಾಂ ಮುಕಾರ್ ಮೆಟಾಂ ಕಾಡುಂಕ್ ಜಾಲಿಂ ನಾಂತ್. ಹಾಂವ್ ಥಂಯ್ಚರ್ಚ್ ಗಳ್ಳೊಂ. ಮ್ಹಜ್ಯಾ ಬಗ್ಲೆನ್ ಏಕ್ ಮಾಗ್ತಲೊ ಬಸ್ಲಲೊ ಮಾತ್ರ್ ಮ್ಹಾಕಾ ಗಯ್ರೊ ಗಯ್ರೊ ದಿಸ್ಲೊ.
**********
ಹಾವೆಂ ದೊಳೆ ಉಘಡ್ತಾನಾ ಬೈಯು ಮ್ಹಜ್ಯಾ ಉಜ್ವ್ಯಾಕ್ ಬಸೊನ್ ರಡ್ತಾಲೆಂ.
"ದಾಟ್ಟು ಭುಕ್ ಲಾಗ್ತಾ...?" ದಾವ್ಯಾಕ್ ಚಿಂಚು ಬಸೊನ್ ಆಸ್ಲ್ಲೆಂ. ತಾಕಾ ರಡೊಂಕ್ಯ್ ತ್ರಾಣ್ ನಾತ್ಲ್ಲೆಂ. ತೋಂಡ್ ದೊಳೆ ಸಗ್ಳೆ ಕಾಳೆ ಜಾಲ್ಲೆ. ತೆಂ ಬಸ್ಲೆಲ್ಯಾ ಕಡೆನ್ ಥರ್ಣಿರ್ ಥೊಡ್ಯೊ ಪಾವ್ಲ್ಯೊ ಆಸ್ಲ್ಲ್ಯೊ. ಹಾವೆಂ ತ್ಯೊ ಆಶೆನ್ ಆರಾಯ್ಲ್ಯೊ.
ವ್ಹಯ್! ನೊವೆನಾಕ್ ಯೆತೆಲ್ಯಾಂನಿ ಆಮಿ ಮಾಗ್ತೆಲಿಂ ಮ್ಹಣ್ ಚಿಲ್ಲಾರ್ ಉಡಯ್ಲೆ! ಮೆಜ್ತಾನಾ ತಾಂತುಂ ಪಂದ್ರಾ ರುಪಯ್ ಆಸ್ಲ್ಲೆ. ಹಾಂವ್ ಉಭೊ ಜಾಲೊಂ.
"ಬೈಯು, ಚಿಂಚು, ತುಮ್ಕಾಂ ಭುಕ್ ಲಾಗ್ತಾಮೂ ಹಾಂವ್ ಹೊಟೆಲಾಕ್ ವಚೊನ್ ಖಾಂವ್ಕ್ ಹಾಡುನ್ ಯೆತಾಂ"
ಇತ್ಲೆಂ ಸಾಂಗೊನ್ ಹಾಂವ್ ಮುಕಾರ್ ಗೆಲೊ. ಚ್ಯಾರ್ ಮೆಟಾಂ ಪಾವ್ತಚ್ ತಟಕ್ಕ್ ಕರುನ್ ರಾವ್ಲೊಂ.
ಆಜ್ ಹ್ಯಾ ಘಡಿಯೆ ಹಾವೆಂ ಏಕ್ ನಿರ್ದಾರ್ ಕೆಲ್ಲೊ!
ಶೀದಾ ಪಾಟಿಂ ಗೆಲೊಂ ತಾಂತ್ಲ್ಯೊ ದೋನ್ ಪಾವ್ಲ್ಯೊ ಚಿಂಚುಚಾ ಮ್ಹಾಕಾರ್ ಉಡಯ್ಲ್ಯೊ. ಆನಿ ಮ್ಹಜ್ಯ ಬೊಲ್ಸಾಂತ್ಲೊ ತುವಾಲೊ ಕಾಡುನ್ ಬೈಯುಚಾ ಮುಕಾರ್ ಸೊಡಯ್ಲೊ ಆನಿ ದೋನ್ ಪಾವ್ಲ್ಯೊ ತಾಂತು ಗಳಯ್ಲ್ಯೊ. ಉಪ್ರಾಂತ್ ಹೊಟೆಲಾ ಕುಶಿಕ್ ಮೆಟಾಂ ಕಾಡುಂಕ್ ಲಾಗ್ಲೊಂ.
************
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
