ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 19. ಏಕ್ ಅಸ್ಪಶ್ಟ್ ವಾಟ್
ವಿಲ್ಸನ್ ಕಟೀಲ್: ಕೊಂಕ್ಣಿ ಸಾಹಿತ್ಯಾಂತ್ ಉದೆವ್ನ್ ಆಯಿಲ್ಲೊ ಆಯ್ಲೆವಾರ್ ತರ್ಯ್ ಎದೊಳ್ಚ್ ಆಪ್ಲ್ಯಾ ಪರಿಪಕ್ವ್ ಬರ್ಪಾಂನಿ ಕೊಂಕ್ಣಿ ಸಾಹಿತ್ಯಾಂತ್ ಅಪ್ಲಿ ಅಸ್ಮಿತಾಯ್ ರುತಾಂ ಕರ್ಚಾಂತ್ ಜಿಕ್ಲಾ. ಕವಿತಾ ಜಾಂವ್ ಕಾಣ್ಯೊ ಜಾಂವ್, ಅಪ್ಲಿಚ್ ಶೈಲಿ ಆಸಾ ಕರುನ್ ಲಿಖ್ಚೊ ಹೊ ಕೊಂಕ್ಣಿ ಸಾಹಿತ್ಯಾಂತ್ ಅಪ್ಲಿ ಮಿನತ್ ಮುಖಾರುನ್ ವರಿತ್ ತರ್ ಭರ್ವಶ್ಯಾಚೊ ಸಾಹಿತಿ ಜಾಂವ್ಚಾಂತ್ ಕಾಂಯ್ ದುಭಾವ್ ನಾ. ತಶೆಂಚ್ ಜಾಂವ್ ಮ್ಹಣ್ ಹಾಂವ್ ಅಪೇಕ್ಷಿತಾಂ.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಹಾಂತುಂ ವೊರಾಯ್ಣಾರಾಂಚಿ ಶಿಫಾರಾಸ್ ಅಪ್ಣಾಯಿಲ್ಲಿ ಕಾಣಿ]
ವಿಲ್ಸನ್ ಕಟೀಲ್
ಆನಿ ಥೊಡಿಂಚ್ ಮಿನುಟಾಂ ಉರ್ಲ್ಯಾಂತ್-ತೆಂ
ಬಸ್ಸ್ ಯೇಂವ್ಕ್. ಮ್ಹೊಂವಾಚ್ಯಾ ವೊಳಿಯೆಕ್ ಮೂಸ್ ಚಿಟ್ಕಾಲ್ಲೆಬರಿ ಉಮ್ಕೊಳ್ಚ್ಯಾ ಲೊಕಾಕ್ ಘೆವ್ನ್ ಯೆಂವ್ಚ್ಯಾ ಬಸ್ಸಾಕ್ ಎಕಾ ಖಿಣಾಚಿಯ್ ಪುರ್ಸತ್ ಆಸಾನಾ. ಧಾಂವ್ತಾಂ-ಧಾಂವ್ತಾನಾಂಚ್ ಹಾತಾನ್ ಸರಳ್ ಆರಾಯ್ಜಾಯ್ ಪಡ್ತಾ. ಉಪ್ರಾಂತ್ಲೊ ಆವ್ಕಾಸ್ ಪಾಂಯಾಕ್ ಪಾಂಯ್ ಭರೊನ್ ವೊಮ್ತೊಂವ್ಚ್ಯಾಚ್ ಫುಟ್ ಬೊರ್ಡಾಚೆರ್ ಎಕಾ ಮೆಟಾಚಿ ಸುವಾತ್ ಆಪ್ಣಾಯ್ಜಯ್ ತರ್ ಅರ್ಧೊ ಜೀವ್ ಜಾತಾ. ಪಾಂಯಾಂವಯ್ರ್ ಪಾಂಯ್ ದವರ್ಲ್ಯಾರ್ ಗಾಳಿ, ಶಿರಾಪ್. ಕಿತ್ಲೆಂ ಉಡ್ಡಲ್ಯಾರೀ ಏಕ್ ಹಾತ್ ಏಕ್ ಪಾಂಯ್ ವಾರ್ಯಾರ್ಚ್.
ಶೆರಾಂತ್ಲ್ಯಾ ಹ್ಯಾ ಥಿರ್ ನಾತ್ಲ್ಲ್ಯಾ ಜಿಣ್ಯೆಕ್ ಹಾಚ್ಯಾಕಿ ಚಡ್ತಿಕ್ ವರ್ಣನ್ ಗರ್ಜ್ ನಾ. ಮ್ಹಜೆಲಾಗಿಂ ಫಕತ್ತ್ ಪಾಂಚ್ ರುಪಯ್ ಉರ್ಲ್ಯಾತ್-ಬಸ್ಸಾಕ್ ಜಾಯ್ ತಿತ್ಲೆಚ್. ಬೊಲ್ಸಾಂತ್ಲಿ ಪಾವ್ಲಿ ಭಾಯ್ರ್ ಕಾಡ್ಲಿ. ದಾಟಿಮೊಟಿ ಪುಡ್ಪುಡಿತ್ ಪಾಂಚ್ ರುಪಯಾಂಚಿ ಪಾವ್ಲಿ. ಹ್ಯೊ ಪಾವ್ಲ್ಯೊ ಅಶ್ಯೊಯ್ ಕಿತ್ಯಾಕ್ ಖೆಳಯ್ತಾತ್? ಹಾತಾಂ ಥಾವ್ನ್ ಹಾತಾಕ್ ಉಡ್ಚ್ಯಾ ಹಾಂಚಿ ಪಾಟ್ ಧರುಂಕ್ ದೊನ್ ಪಾಯಾಂಚೊ ಮನಿಸ್ ಖರ್ಯೆತಾ.
ಭಿಕ್ ಮಾಗ್ತೆಲೆಂ ಚೆಡುಂ ಭುರ್ಗೆ ಎಕ್ಲೆಂ ಸರ್ಯಿಂ ಯೆವುನ್ ಪರಾತ್ತಿಲಾಗ್ಲೆಂ. ಹಾಂವೆ ಪಾವ್ಲಿ ಮುಟಿಂತ್ ಲಿಪಯ್ಲಿ. ಸುಮಾರ್ ಸ-ಸಾತ್ ವರ್ಸಾಂ ಪ್ರಾಯೆಚೆಂ ತೆಂ ಭಾಣ್ಯಿರ್ಯಾ ತಸಲೆಂ ವಸ್ತುರ್ ನ್ಹೆಸ್ಲ್ಲೆಂ. ದಾಂತೊಣಿ ರಿಗಾನಾತ್ಲ್ಲೆ ಕೇಸ್ ವೊಡಾ ರುಕಾಕ್ ಉಮ್ಕಳ್ಚ್ಯಾ ಪಾಳಾಂಬರಿ ಝಂಟರಾಂ ಜಾಲ್ಲೆಂ. ತಾಚಿಂ ತರ್ನಿಂ ಬೊಟಾಂ ಮ್ಹಜಿ ಮೂಟ್ ಪೊಶೆತಾನಾ ಅಥ್ವೊಚ್ ಅನ್ಬೊಗ್ ಜಾತಲೊ. ಪುಣ್ ಮ್ಹಾಕಾ ತೊ ನಾಕಾಸ್ಲೊ. ಬಸ್ಸಾಚ್ಯಾ ಪಾಂಚ್ ರುಪಯಾಂಶಿವಾಯ್ ಮ್ಹಜೆಲಾಗಿಂ ರುವಿ ಲೆಗುನ್ ನಾತ್ಲ್ಲಿ. ತೊಡಾರ್ ಫಟ್ಕಿರೊ ರಾಗ್ ಹಾಡವ್ನ್ ಆನಿ ಕಿತೆಂ ಥೆಂಕ್ಣೊ ಘಾಲಿಜಯ್ ಮ್ಹಣ್ತಾನಾ.....
ಮ್ಹಜೆ ಕುಶಿನ್ ರಾವ್ಲ್ಲೊ ಎಕ್ಲೊ ಆಪ್ಣೆಂಚ್ ಉಡಯಿಲ್ಲ್ಯಾ ಕೆಳ್ಯಾ ಸಾಲಿರ್ ಪಾಂಯ್ ನಿಸ್ರೊನ್ ಪಡ್ತಾನಾ ’ಕಿಸ್ಕ್’ ಕರುನ್ ಹಾಸ್ಲೆಂ ತೆಂ. ತಿ ಹಾಸ್, ಹಾಸ್ತಾನಾ ಗಾಲಾರ್ ಧಲ್ಚೆ ಫೊಂಡ್ಕುಲೆ ಚೊಯ್ತಚ್ಚ್ ನಿತಳ್ ತಳ್ಯಾ ಜಶೆಂ ಆಸ್ಲ್ಲೆಂ ಮನ್ ಮ್ಹಜೆಂ ಕದ್ವಳ್ಳೆಂ. ಆನಿಂ ದೊಳ್ಯಾಂಕ್ ಉಚಾಂಬಳ್ ಲ್ಹಾರಾಂ ಅಪ್ಟೊಂಕ್ ಲಾಗ್ಲಿಂ. ಶಿರಾಂಶಿರಾಂನಿ ಕಸಲೆಂಗೀ ಆವ್ರ್ ರಿಗ್ಲ್ಲ್ಯಾಬರಿ ಭೊಗುನ್ ಆಸ್ಲ್ಲೆ ಪಾಂಚ್ ರುಪಯ್ ತಾಚ್ಯಾ ಹಾತಿಂ ದೀವ್ನ್ ಚಲ್ತಚ್ಚ್ ರಾವ್ಲೊಂ. ತ್ಯಾ ಖಿಣಾ ತಾಚ್ಯಾ ದೊಳ್ಯಾಂನಿ ಏಕ್ ವಿಶೇಸ್ ಪರ್ಜಳ್
ದಿಸ್ಲೊ.
******
ಪಾಟ್ಲ್ಯಾ ಕುಶಿನ್ ಉಭಾರಾಯೆಚೊ ಏಕ್ ರಸ್ತೊ ಪಾವ್ಲಾಂ ಗಿಳ್ಚ್ಯಾ ಸಾಳ್ಕ್ಯಾ ಸರ್ಪಾಬರಿ ನೀಟ್ಚ್ ನಿದ್ಲ್ಲೊ. ರಾಜ್ ರಸ್ತ್ಯಾಬರಿ ರೂಂದ್ ಆಸ್ಲೊ ತರೀ ಮೊಟಾರ್ ಗಾಡಿಯಾಂಕ್ ಪ್ರವೇಶ್ ನಾತ್ಲೊ. ಫಕತ್ತ್ ವಾಟ್ಸುರ್ಯಾಂಕ್ ಆಶಾರ್ ಪಾಶಾರ್ ಜಾಂವ್ಕ್ ಹೊ ನಮಿಯಾರ್ಲ್ಲೊ. ಹೊ ಉತ್ರೊನ್ ಗೆಲ್ಯಾರ್ ಮೆಟಾಂಕ್ ಖರಸ್ ಯೆತಾ. ವೆವೆಗ್ಳ್ಯಾ ಜಾತಿ-ಕಾತಿಂಚೊ, ಸಂಸ್ಕ್ರತೆಚೊ, ಗಾಂವ್ಚೊ, ವೆವೆಗ್ಳ್ಯಾ ಭಾಶೆಚೊ ಲೋಕ್ ಹಾಂತ್ಲ್ಯಾನ್ ಪಾಶಾರ್ ಜಾತಾ. ಕೋಣ್ ಕೊಣಾಕ್ ವಳ್ಕತಾ ಆನಿಂ ಕೋಣ್ ಕೊಣಾಕ್ ಆಪ್ಟಾತಾ.
ಹ್ಯಾ ರಸ್ತ್ಯಾಚ್ಯಾ ದೋನ್ಯೀ ಕುಶಿಂನಿ ವಿಕ್ರೊ ಚಲ್ತಾ. ವಸ್ತುರ್, ವ್ಹಾಣೊಂ, ಖಬ್ರೆಪತ್ರಾಂ, ಫುಲಾಂ, ಲೊಟ್ರಿ ಟಿಕೆಟ್ಯೊ, ಕೊಬಾರೋಸ್, ಚಣೆಂ, ಉಕಡ್ಲೆಲಿಂ ತಾಂತ್ಯಾಂ,....ಆನಿಂ ಕಿತೆಂ ಕಿತೆಂ. ಘೆತೆಲ್ಯಾಸಂಗಿ ವಾದ್-ವಿವಾದ್. ಘೆತ್ಲ್ಯಾರ್ ಹಾಸೊ; ನಾಂ ತರ್ ಪುರ್ಪುರೆ. ಹಾಂಗಾಚೆ ವ್ಹಡ್ ವಿಪರ್ಯಾಸ್ ಹೆ - ವಸ್ತುರ್ ವಿಕ್ತೆಲ್ಯಾಕ್ ಬರಿ ಮುಸ್ತಾಯ್ಕಿ ನಾ, ವ್ಹಾಣೊಂ ವಿಕ್ತೆಲ್ಯಾಚೆ ಪಾಂಯ್ ರಿತೆ, ಪತ್ರಾಂ ವಿಕ್ತಲೊ ಆಪ್ಲೆಂ ನಾಂವ್ಯಿ ವಾಚುಂಕ್ ನೆಣಾಂ, ಕೊಬಾರೋಸ್ ವಿಕ್ತೆಲ್ಯಾಚೊ ತಾಳೊ ಸುಕ್ಲಾ, ಖಾಣಾ ವಿಕ್ತೆಲ್ಯಾಕ್ ಭುಕ್ ಆನಿ ಲೊಟ್ರಿ ವಿಕ್ತೆಲ್ಯಾಚೊ ತಾಳೊ ಸುಕ್ಲಾ, ಖಾಣಾಂ ವಿಕ್ತೆಲ್ಯಾಕ್ ಭುಕ್ ಆನಿ ಲೊಟ್ರಿ ವಿಕ್ತೆಲ್ಯಾಚೆಂ ನಶೀಬ್ ಫುಟ್ಲಾಂ.
ಹಾಂಗಾಸರ್ ಏಕಾ ಮೆಟಾಕ್ಯಿ ಅಸ್ಮಿತಾಯ್ ನಾ; ಫಕತ್ತ್ ಪಾಂಯಾಂಚಿ ರಾಸ್. ಮೊಚಾಂನಿ ಕುಸ್ಲ್ಲೆ ಹೆ ಪಾಂಯ್ ಗಾಂವ್ಚ್ಯಾ ಮಾತಿಯೆಚಿ ರೂಚ್ ಚಾಕನಾಸ್ತಾನಾಂ ವರ್ಸಾಂ ಕಿತ್ಲಿ ಜಾತಿತ್?
ಯಾದ್ ಯೆತಾ ಮ್ಹಾಕಾ ಗಾಂವ್ಚಿ ಮ್ಹಜಿ ಸದಾಂಚಿ ವಾಟ್. ತಾಂತ್ಲ್ಯೊ ಅಶೀರ್ ಘುಂವ್ಡ್ಯೊ, ಸಾಕಾಳಿಂಚೆಂ ಮಿಸಾಕ್ ವೆತಾನಾ ದೊವಾ ಥೆಂಬ್ಯಾಂಚೆಂ ಆಗ್ಮೆಂತ್ ಶೆಣಾವ್ನ್ ಪಾಂಯ್ ಬಿಜಂವ್ಚೆಂ ಬಗ್ಲೆಚೆಂ ತಣ್, ಸುಕ್ಣ್ಯಾಂಚಿ ಕಾಂತಾರಾಂ..... ತ್ಯಾ ವಾಟೆರ್ ತೊಪ್ಲ್ಲ್ಯಾ ಕಾಂಟ್ಯಾಂನಿ ದುಕ್ಯಿ ಆಜ್ ಚಿಂತಾನಾ ಕಸಲೆಂಗೀ ಸುಕ್ ದಿತಾ. "ಬ್ರುಂ... ಬ್ರೂಂ...." ಮ್ಹಣೊನ್ ತೊಂಡಾನ್ ಆವಾಜ್ ಉಟವ್ನ್ ಹಾತ್ ಘುಂವ್ಡಾವ್ನ್ ’ಬಸ್ಸ್ ಸೊಡ್ಲ್ಲ್ಯಾಬರಿ ಉಡೊನ್ ಪಡೊನ್ ಧಾಂವ್ಲ್ಯಾಂತ್ ಆಸ್ಲ್ಲಿ ಸುಡ್ಸುಡಾಯ್, ಸಂತೊಸ್ ಹಾಂಗಾ ಮೆಳಾನಾ.
ಹೊ ರಸ್ತೊ ಎಕ್ದಮ್ ನೀಟ್. ಆಕರ್ಷಣ್ ಫುಂವ್ಡ್ಯೊ ನಾಂತ್. ಜಿಣಿಯೆಕ್ ಕಸಲೊಚ್ ರಂಗ್ ನಾ. ದೊಳೆ ಉಘಡ್ತಾನಾ ಖಂಯ್ಚಾಗೀ ಕಟ್ಟಣಾ ಇಡ್ಯಾಂತ್ ಸಾಕಾಳಿಂಚೊ ಸುರ್ಯೊ ದಿಸ್ತಾ. ತೊ ತಾಪ್ತಾನಾ ಶ್ಹೆರ್ಯೀ ಭಿತರ್ಲ್ಯಾ ಭಿತರ್ ಶಿಜ್ತಾ. ನಿವ್ತಾನಾ, ಆನಿಂ ಖಂಯ್ಚಾಗೀ ಕಟ್ಟಣಾ ಥಾವ್ನ್ ಉಡೊನ್ ಜೀವ್ಘಾತ್ ಕೆಲ್ಲ್ಯಾಬರಿ ನಾಂಚ್ ಜಾತಾ. ಹಾಂಗಾ, ಕವಿಕ್ಯಿ ಸ್ವತಂತ್ರ್ ನಾ. ಶೋಶಣಾ ವಿರೋದ್ ತಾಳೊ, ಬಂಡಾಯ್, ಕ್ರಾಂತಿ ಮ್ಹಣೊನ್ ತಾಚ್ಯಾ ಖಾಂದ್ಯಾರ್ ಜವಬ್ದಾರಿ ದಿಲ್ಯಾ. ತಾಚಿ ಕವಿತಾ ಹರ್ತಾಳ್ ಕರ್ತೆಲ್ಯಾಂಕ್ ಹಾತೆರ್ ಜಾಂವ್ಕ್ ಪಾಯ್ಲ್ಯಾ. ಹಾಚೆಮಧೆಂಯ್ ಮೋಗ್, ಪ್ರಥ್ವೆವಿಶಿಂ ಕೊಣೆಂ ತರೀ ಲಿಕ್ಲ್ಯಾರ್ ತೆಂ ಕಿರ್ಕೊಳ್ ದಿಸ್ತಾ.
ಚಿಂತ್ನಾಂಚೆಂ ವ್ಹೊಜೆಂ ಜಡ್ ಜಾವ್ನ್ ಯೆತಾನಾ ದೊಡೊ ವೇಳ್ ವಿಶೆವ್ ಘೆಂವ್ಚ್ಯಾಕ್, ರಸ್ತ್ಯಾ ಬಗ್ಲೆಚ್ಯಾ ಪೆಳಿಯೆಕ್ ಕುಲೆ ತೆಂಕ್ಲೆ. ಆನಿಂ ಥೊಡ್ಯಾ ವೆಳಾನ್ ದೀಸ್ ಧರ್ಣಿಕ್ ಮಾತೆಂ ತೆಂಕ್ತಾ; ರಾತ್ ಜಿಡೆಂ ಫುಲಯ್ತಾ. ಫಾಲ್ಯಾಚಿ ಖಂತ್ ತಕ್ಲಿ ವಿರಾರ್ ಕರಿಲಾಗ್ಲಿ. ಕೊಣಾಲಾಗಿಂ ರೀಣ್ ವಿಚಾರ್ಚೆಂ? ಕುಡಾಚ್ಯಾ ಧನಿನೆಲಾಗಿಂ ವಿಚಾರುಂಕ್ ದಾಕ್ಶೆಣ್ ಭೊಗ್ತಾ.
ತೆನ್ನಾ ವಾರ್ಯಾರ್ಚ್ ಆಯಿಲ್ಲೆಬರಿ ಲಕೊನ್ ಲಕೊನ್ ಆಯಿಲ್ಲೊ ಎಕ್ಲೊ ಮ್ಹಜೆಕುಶಿನ್ ಬಸ್ಲೊ. ವೇಳ್ ವಿಚಾರ್ಚ್ಯಾಕ್ ತೋಂಡ್ ಉಗಡ್ತಾನಾ, ತಾಚ್ಯಾ ಉತ್ರಾಂಸವೆಂ ಉಟ್ಲ್ಲಿ ಸೊರ್ಯಾಚಿ ಆನಿಂ ಬಿಡಿಯೆಚೆ ಘಾಣ್ ವಾದಾಳ್ ಜಾವ್ನ್ ಮ್ಹಜ್ಯಾ ಪೊಪ್ಸಾಂನಿ ರಿಗ್ಲಿ; ಆನಿಂ ಘೆಟೆ ಜಾಲ್ಲ್ಯೊ ಯಾದಿ ಥೆಂಬ್ಯಾ-ಥೆಂಬ್ಯಾನಿ ಪೊವೊಂಕ್ ಸರ್ವಾತ್ಲ್ಯೊ.
***********
ಮ್ಹಜೊ ಬಾಬ್ ಬೆಬ್ದೊ. ಸೊರ್ಯಾಚ್ಯಾ ದರ್ಯಾಂತ್ ಬುಡ್ಲ್ಲೊ. ಹಾಂವ್ ತೆನಾಂ ಧಾಕ್ಟೊ; ಸುಮಾರ್ ನೊವ್-ಧಾ ವರ್ಸಾಂಚೊಂ. ಕುಟ್ಮಾಂ ಹೊಡೆಂ ತಾಂಡ್ಚೆ ತ್ರಾಣ್ ಮ್ಹಜ್ಯಾ ಬಾವ್ಳ್ಯಾಂಕ್ ಆನಿಕೀ ಯೆಂವ್ಕ್ ನಾತ್ಲ್ಲೆಂ. ಮಾಂಯ್ ಬೋವ್ ಕಶ್ಟಾಂನಿ ಕುಟಾಮ್ ಸಾಂಬಾಳ್ತೆಲಿ. ಹೆ ಕಷ್ಟ್ ಕಶೆಂ ಪುಣಿ ಸೊಸುನ್ ವರ್ಯೆತೆ. ಪುಣ್ ಸೊಸುಂಕ್ ಜಾಯ್ನಾತ್ಲ್ಲಿ ಗಜಾಲ್ ಮಾತ್ರ್ ಹ್ಯಾ ಕಾಣಿಯೆಂತ್ಯೀ ಕಾಣಿ ಜಾಂವ್ಕ್ ಲಜೆಂವ್ಚಿ; ಕೊಣಾಯಿಲಾಗಿಂ ಸಾಂಗೊಂಕ್ ನಾಲಿಸಾಯ್ ಬೊಗ್ಚಿ.
ಮ್ಹಾಕಾ ಎಕ್ಲೆಂ ಮೊಗಾಚೆಂ ಭಯ್ಣ್ ಆಸ್ಲ್ಲೆಂ. ಮ್ಹಜೆಪ್ರಾಸ್ ದೋನ್-ತೀನ್ ವರ್ಸಾಂಕ್ ಲ್ಹಾನ್. ಸಾವ್ಳೆಂ ತರ್ಯೀ ಬೋವ್ಚ್ಚ್ ಲಕ್ಶಣ್. ದೊಳ್ಯಾಂನಿ ನಿಂವಾನಾತ್ಲ್ಲೊ ಪರ್ಜಳ್. ಹಾಸ್ತಾನಾ ಗಾಲಾರ್ ಫುಲ್ಚೆ ಪೊಂಡ್ಕುಲೆ.... ಬಿಲ್ಕುಲ್ ತ್ಯಾ ಭಿಕ್ ಮಾಗ್ತೆಲ್ಯಾ ಚೆಡ್ವಾಬರಿಂಚ್!
ಪುಣ್ ಬಾಬಾಕ್ ಭಯ್ಣಿಚ್ಯಾ ಜಲ್ಮಾಚೆರ್ ದುಭಾವ್ ಆಸ್ಲೊ. ತೆಂ ಆಪ್ಣಾಕ್ ನ್ಹಂಯ್; ಬಗಾರ್ ಕೊಣ್ಗಿ ಪೆಲ್ಯಾ ದಾದ್ಲ್ಯಾಕ್ ಜಲ್ಮಾಲ್ಲೆಂ ಮ್ಹಣೊನ್ ಘಟ್ ಪಾತ್ಯೆಲ್ಲೊ. ಹೊ ದುಭಾವ್ ಕಸೊ ಕಿತ್ಯಾಕ್ ರಿಗ್ಲೊ ಮ್ಹಣ್ ಮ್ಹಾಕಾ ಕಳಿತ್ ನಾ. ಹ್ಯಾ ವಿಶಿಂ ಮಾಂಯ್ಲಾಗಿಂ ವಿಚಾರುಂಕ್ಯಿ ಧಯ್ರ್ ಮೆಳೊಂಕ್ ನಾ. ಪುಣ್ ಬಾಬಾಚೆ ಮಾರ್ ಸೊಸುಂಕ್ ಜಾಯ್ನಾಸ್ತಾಂ, ಅಂಕ್ವಾರ್ ಮಾರಿಯೆಚ್ಯಾ ಇಮಾಜಿಚೆರ್ ಹಾತ್ ದವ್ರುನ್ ’ಹಾಂವೆಂ ಕಸಲಿಚ್ ಚೂಕ್ ಕರುಂಕ್ ನಾ...’ ಮ್ಹಣ್ ಮಾಂಯ್ ಬೊಬಾಟ್ತಾನಾ ಕೊಣಾಚೊಯಿ ದುಭಾವ್ ಇರೊನ್ ವಚಾಜಯ್ ಆಸಲ್ಲೊ. ಪುಣ್ ಮ್ಹಜ್ಯಾ ಬಾಬಾಚೊ ಘೆಟೊ ಜಾಯಿತ್ ಗೆಲೊ. ಮ್ಹಜ್ಯಾ ಭಯ್ಣಿಕ್ ತ್ಯಾ ವೆಳಾ ನೆಂಟಿ ಪ್ರಾಯ್. ಕಿತೆಂಚ್ ಕಳಾನಾತ್ಲೆಂ ತಾಕಾ. ಮಾರ್ - ಬೊಬಾಟ್ ಜಾತಾನಾ ವೊಗೊ ಬಸೊನ್ ರಡ್ತಾಲೆಂ.
ಮಾಂಯ್ ಆನಿ ಭಯ್ಣಿಚೆರ್ ಆಸ್ಲ್ಲೊ ಶಿಣ್ ದಾಕಂವ್ಚ್ಯಾಕ್ ಬಾಬಾಕ್ ಹಾಂವ್ ಹಾತೆರ್ ಚಾಲೊಂ ತೊ ತಾಂಚೆ ಮುಖಾರ್ ಮ್ಹಜೊ ಭಿರಾಂಕುಳ್ ಮೋಗ್ ಕರ್ತಲೊ. ಉಸ್ಕ್ಯಾರ್ ಬಸವ್ನ್ ಮ್ಹಜೆಂ ಮಾತೆಂ ಆಪ್ಲ್ಯಾ ಹರ್ದ್ಯಾಕ್ ದಾಂಭ್ತಾಲೊ; ಉಮೊ ದಿತಲೊ. ಮ್ಹಕಾ ಆಂಗ್ಭರ್ ಕಾಂಟೆ ತೊಪ್ಲ್ಲೊ ಅನ್ಬೋಗ್ ಜಾತಲೊ. ಭಯ್ಣಿಕ್ ದೆಂಕ್ಣೆ ಘಾಲ್ತಾಲೊ, ಮಾರ್ತಾಲೊ ಜಾಲ್ಲ್ಯಾನ್ ತೆಂ ಬಾಬಾಸರ್ಶಿಂ ಯೇಂವ್ಕ್ ಬಿಂಯೆತಾಲೆಂ.
ಬಿರ್ಮತ್ ಮ್ಹಜ್ಯಾ ಭಯ್ಣಿಚಿ. ತಾಕಾ ಹಾಸೊಂಕ್ ಏಕ್ ನೀಬ್ ಲೆಗುನ್ ಮೆಳನಾತ್ಲ್ಲೆಂ. ತಾಚ್ಯಾ ಗಾಲಾವಯ್ಲೆ ಪೊಂಡ್ಕುಲೆ ದುಕಾಥೆಂಬ್ಯಾನಿ ಲಿಪೊನ್ ವೆತಲೆ. ಹಾಂವೆಂ ತೆನ್ನಾಂಚ್ ಮತಿಂತ್ ಏಕ್ ಖರೊ ನಿಚೆವ್ ಕೆಲ್ಲೊ- ಹ್ಯಾ ಮ್ಹಜ್ಯಾ ಮೊಗಾಚ್ಯಾ ಭಯ್ಣಿಕ್ ರಾಣಿಯೆಬರಿ ಪಳಯ್ತಲೊಂ ಮ್ಹಣ್. ಪುಣ್ ಮ್ಹಜೆಂ ಸಪಣ್ ದೊಳೆ ಉಗಡ್ಲ್ಯಾ ಆದಿಂಚ್ ವಾಟ್ ಚುಕ್ಲೆ.
ಕಾರ್ಕೊಳ್ ಫೆಸ್ತಾಚೊ ಪಯ್ಲೊ ದೀಸ್ ತೊ. ಖಂಯ್ ಗೆಲ್ಯಾರೀ ಆಪ್ಣಾಸಂಗಿಂ ಮ್ಹಾಕಾ ಎಕ್ಲ್ಯಾಕ್ಚ್ ಘೆವ್ನ್ ವೆಚೊ ಬಾಬ್, ತ್ಯಾ ಪಾವ್ಟಿಂ ಭಯ್ಣಿಕ್ಯಿ ಘೆವ್ನ್ ಫೆಸ್ತಾಕ್ ಭಾಯ್ರ್ ಸರ್ಲೊ. ಪತ್ತೊ ನಾತ್ಲ್ಲೊ ಖಂಯ್ಚೊಗಿ ಏಕ್ ಸಂತೊಸ್ ತ್ಯಾ ಖಿಣಾಂ ಆಮ್ಚಾ ಘರಾಚೆಂ ದಾರ್ ಠೊಕ್ತಾಲೊ. "ಹಾಂವೆಂ ಸಾಂ. ಲೊರೆಸಾಕ್ ಆಂಗೊವ್ಣ್ ಘಾಲ್ಲಿರೆ ಪುತಾ.... ತಾಣೆಂಚ್ ತುಜ್ಯಾ ಬಾಬಾಕ್ ಬರಿ ಬೂದ್ ದಿಲ್ಯಾ" ಆಶೆಂ ಮ್ಹಣೊನ್ ಪಾಲ್ವಾಪೊಂತಾಚಿ ಗಾಂಟ್ ಸುಟವ್ನ್ ಮ್ಹಜ್ಯಾ ಹಾತಿಂ ಪಾಂಚ್ ರುಪಯಾಂಚೊ ಪರ್ನೊ ನೋಟ್ ದಿತಾನಾ ಮಾಂಯ್ಚೆ ದೊಳೆ ಬಿಜ್ಲ್ಲೆ.
ಇಗರ್ಜೆಂತ್ ಮ್ಹಾಕಾ ಬಸವ್ನ್ "ಆತ್ತಾ ಯೆತಾಂ.." ಮ್ಹಣೊನ್ ಭಯ್ಣಿಕ್ ಘೆವ್ನ್ ಗೆಲ್ಲೊ ಬಾಬ್ ಸಬಾರ್ ವೆಳಾ ಉಪ್ರಾಂತ್ ಎಕ್ಲೊಚ್ಚ್ ಪಾಟಿಂ ಆಯಿಲ್ಲೊ. ಹಾಂವೆಂ ಭಯ್ಣಿವಿಶಿಂ ವಿಚಾರ್ ಕೆಲ್ಲ್ಯಾಕ್ ’ತೆಂ ಖಂಯ್ಗಿ ವಾಟ್ ಚುಕೊನ್ ಗೆಲೆಂ’ ಆಶೆಂ ಕಿತೆಂಚ್ ಘಡಾನಾತ್ಲ್ಯಾಬರಿ ನಿರ್ಲಿಪ್ತ್ ತಾಳ್ಯಾನ್ ಸಾಂಗ್ತಾನಾ ಹಾಂವ್ ಸಗ್ಳೊಚ್ಚ್ ಥರ್ಥರ್ಲೊಂ. ವ್ಹಡಾ ತಾಳ್ಯಾನ್ ಬೊಬಾಟುನ್, ತ್ಯಾ ಗಡ್ದೆಂತ್, ಸಾಂತೆಂತ್, ಭಿಕರ್ಯಾಮಧೆಂ ಪಿಸಾಂತುರ್ ಜಾವ್ನ್ ಸೊಧ್ಲೆಂ. ಮಾಗ್ಣೆಂ ಕೆಲೆಂ, ದಿಂಬಿಯೆರ್ ಗಳ್ಳೊಂ. ಪುಣ್ ಮ್ಹಜ್ಯಾ ವಾಂಟ್ಯಾಕ್ ಸಾಂ. ಲೊರೆಸ್ ಫಕತ್ತ್ ಇಮಾಜ್ ಜಾವ್ನ್ ಉರ್ಲೊ. ಪಾತ್ಯೆಣೆಕ್ ಜೀವ್ ಆಯ್ಲೊನಾ.
ಉಪ್ರಾಂತ್ಲ್ಯಾ ವರ್ಸಾಯ್ ಫೆಸ್ತಾಕ್ ಗೆಲೊಂ. ಪೊಲ್ಯಾರ್ ಪೊಂಡ್ಕುಲೆ ಆಸಲ್ಲೆಂ ಸೊಬಿತ್ ಮ್ಹಜೆಂ ಭಯ್ಣ್ ದಿಸತ್ಗಾಯ್ ಮ್ಹಳ್ಳ್ಯಾ ಆಶೆನ್ ತಾನೆಲ್ಲ್ಯಾ ದೊಳ್ಯಾಂನಿ ಸೊಧ್ಲೆಂ. ಪುಣ್ ತೆಂ ಮೆಳ್ಳೆಂಚ್ ನಾ. ಖಂಯ್ಚಾ ಪೊಂತಾಕ್ ಪಾವ್ಲಾಂಗಿ? ಆಸ್ಲ್ಲೆಂ ತರ್ ಆಜ್ ಆಂಗಭರ್ ತರ್ನಾಟ್ಪಣ್ ಫುಲೊವ್ನ್ ಆಂಜಾ ಸಾರ್ಕೆಂ ಸೊಭ್ತೆಂ ಆಸ್ಲ್ಲೆಂ.
ದುಭಾವಾಚೆಂ ಪೀಲ್ ತೆಂ ಬಾಬಾಕ್ ದೊಳ್ಯಾಂ ಫುಡೆಂ ಪಳೆಂವ್ಕ್ ನಾಕಾಸ್ಲ್ಲೆಂ. ದೆಕುನ್ ತಾಣೆಂ ಆಸಲಿ ವಾಟ್ ವಿಂಚುನ್ ಸೊಡ್ನ್ ಆಯ್ಲೊ ವಾ ಕೊಣಾಕ್ ತರೀ ವಿಕುನ್ ಆಯ್ಲೊ ಮ್ಹಳ್ಳೆಂ ಸತ್ ಆಮ್ಚಾ ಗುಮಾನಾಕ್ ಯೇನಾಸ್ತಾನಾ ಗೆಲೆಂನಾ. ಅಸಲೊ ಮ್ಹಜೊ ಬಾಬ್ ಪಿಯೆವ್ನ್ ಪಿಯೆವ್ನ್ ಆಕ್ರೇಕ್ ವಾಟೆರ್ ಪಡೊನ್ಂಚ್ ಮೆಲೊ.
****
ಹಾಂವೆಂ ದೊಳೆ ಪುಸುನ್ ತಕ್ಲಿ ಉಕಲ್ಲಿ. ದೊಗಾಂ- ತೆಗಾಂ ಗೊರ್ಯಾ ಕಾತಿಚೆಂ ಅರ್ದಿಂ ವಿಣ್ಗಿಂ ಚೆಡ್ವಾಂ, ಸಿಗ್ರೆಟ್ ಪಿಯೆವ್ನ್ ಲೆಕಾವರ್ತೆಂ ಹಾಸೊನ್ ವೆತಾಲಿಂ.
ಸಂಸಾರ್ ಖಿಣಾಖಿಣಾ ಬದ್ಲಾತಾ. ಕೋಣ್ ಕೋಣ್ ಹ್ಯಾ ಬದ್ಲಾವಣೆ ತೆಕಿದ್ ವೇಸ್ ಪಾಂಗುರ್ತಾ. ಪುಣ್ ಹಾಂವ್ ಮಾತ್ರ್ ಹಿ ಬದ್ಲಾವಣ್ ಜಿರಂವ್ಕ್ ಸಕನಾಸ್ತಾಂ ಫಿಂರ್ಗತಾಂ. ಮ್ಹಾಕಾ ಮ್ಹಜಿ ಮಾಂಯ್ ಉಗ್ಡಾಸ್ ಯೆತಾ...
ಧುಂವರ್ ಉಟಂವ್ಚಿ ಶೆಳೆಲ್ಲಿಂ ಲಾಂಕ್ಡಾಂ ಖೊಂಕುನ್ ಖೊಂಕುನ್ ತರೀ ಫುಂಕುನ್ ರಾಂದ್ಚೆಂ ಕೂಡ್ ಉಜ್ವಾಡಾಯ್ತೆಲಿ. ದೀಸ್ ಸಾರ್ಚಾಕ್ ಪೆಲ್ಯಾಂ-ಘರಾ ಕಾಮಾಕ್ ವೆತಾಲಿ. ಇಗರ್ಜ್ ಝಾಡ್ತಾಲಿ. ಬಿಡಿಯೊ ಭಾಂದ್ತಾಲಿ. ಬಾಂದ್ಲ್ಲ್ಯೊ ಅರ್ದ್ಯೊ ಬಿಡಿಯೊ ಬಾಬಾಚ್ಯಾ ವೊಂಟಾರ್ ಗೊಬೊರ್ ಜಾತಲ್ಯೊ ತರೀ ಉರ್ಲ್ಯಾಂತ್ ಘರ್ಚಿ ರಾಂದಣ್ ಪೆಟ್ತಾಲಿ.
ಏಕ್ ನಿಶ್ಟುರ್ ಸತ್ ಸಾಂಗ್ಚೆ ತರ್, ಬಾಬ್ ಮೆಲ್ಯಾ ಉಪ್ರಾಂತ್ಚ್ ಮತಿಕ್ ಶಾಂತಿ ಲಾಭ್ಲ್ಲಿ. ಪುಣ್ ಅರ್ಥಿಕ್ ಪರಿಗತ್ ಸುಧ್ರಾಲಿನಾ. ಪಿರ್ಗಜ್ ಮಂಡಳೆ ಥಾವ್ನ್ ಮಯ್ನ್ಯಾಕ್ ಏಕ್ ಕಿಲೊ ತಾಂದುಳ್ ಮೆಳ್ತಾಲೊ ತರೀ ವರ್ಸಾಚ್ಯಾ ವರ್ದೆಂತ್ ಸಗ್ಳ್ಯಾಂ ಮುಖಾರ್ ವಾಚುನ್ ಸಾಂಗ್ತಾನಾ, ಮ್ಹಜ್ಯಾ ಪ್ರಾಯೆಚೆ ಚೆಡೆ ಗೊಮ್ಟಿ ವೊಳಾವ್ನ್ ಮ್ಹಾಕಾ ಚೊಯ್ತಾನಾ ಜೀವ್ ಮುಯೆತೆದೊ ಜಾತಾಲೊ.
ಏಕಾ ಸಾಂಜೆರ್ ವಿಗರಾಲಾಗಿಂ ವಚೊನ್ "ಹಾಂವ್ ಇಸ್ಕೊಲ್ ಸೊಡುನ್ ಖಂಯ್ ಪುಣಿ ಕಾಮಾಕ್ ಲಾಗ್ತಾಂ. ತುಮಿ ದಿಂವ್ಚೊ ತಾಂದುಳ್ ನಾಕಾ ಫಾದರ್" ಮ್ಹಣ್ತಾನಾ ಖರಿ ಗಜಾಲ್ ಜಾಣಾ ಜಾಲ್ಲ್ಯಾ ತಾಣೆಂ, ಇತ್ಲ್ಯಾ ಲ್ಹಾನ್ ಪ್ರಾಯೆರ್ಚ್ ಮ್ಹಜೆ ಥಂಯ್ ಆಸ್ಲ್ಲ್ಯಾ ಸ್ವಾಭಿಮಾನಾಕ್ ಹೊಗ್ಳಿಕ್ ಉಚಾರ್ಲಿ ಮಾತ್ರ್ ನ್ಹಂಯ್ ಮುಕ್ಲ್ಯಾ ಶಿಕ್ಪಾಚೊ ಖರ್ಚ್ ತಾಣೆಂಚ್ ಭರ್ಲೊ. ಬರೆ ಬರೆ ಬೂಕ್ ಮ್ಹಜೆ ಕರ್ನಾಂ ವಾಚುಂಕ್ ಲಾಯ್ಲೆ. ಆಯ್ತಾರಾಚ್ಯಾ ದುಕ್ರಾಮಾಸಾಚ್ಯಾ ಜೆವ್ಣಾಕ್ ಮ್ಹಾಕಾ ಆನಿಂ ಮಾಂಯ್ಕ್ ಆಪವ್ನ್ ಧಾಡ್ತಲೊ. ಹೊ ಉಪ್ಕಾರ್ ತಾಣೆಂ ಕೊಣಾಯ್ಲಾಗಿಂ ವಾಚುನ್ ಸಾಂಗ್ಲೊನಾ.
ಪುಣ್ ಕಿತ್ಯಾಕ್ಗೀ ಕೊಣ್ಣಾಂ ಹ್ಯಾ ವಿಶ್ಯಾಂತ್ ಬೊಟ್ಲೆರಾಕ್ ಮಾತ್ ಪೊಟಾಂತ್ ಆಡ್ವಾಳ್ತಾಲೆಂ. ಹಾಂಗಾಸರ್ ಪ್ರಸ್ತುತ್ ಕರುಂಕ್ ಸಕನಾತ್ಲ್ಲಿಂ ಹಳ್ಶಿಕ್ ಉತ್ರಾಂ ಗಾಂವ್ಚ್ಯಾ ಕಾನಾಂನಿ ವೊಂಕ್ತಾಲೊ. ಕೊಣ್ಯಿ ಕಿತೆಂಯ್ ಮ್ಹಣೊಂ - ಮ್ಹಾಕಾ ಮಾತ್ ತೊ ವಿಗಾರ್ ಬಾಬಾಪ್ರಾಸ್ ವರ್ತೊ.
ಧಾವಿ ಸಂಪವ್ನ್ ಗಾಂವಾಂತ್ಚ್ ಥಂಯ್ ಹಾಂಗಾ ಕಾಮ್ ಕರುನ್ ಆಸ್ಲ್ಲೊಂ. ಆಬ್ಳೆ ಹ್ಯಾ ಶ್ಹೆರಾಂತ್ ಎಕಾ ಬುಕಾಚ್ಯಾ ಛಾಫ್ಖಾನಾಂತ್ ಕಾಮಾಕ್ ಲಾಗ್ಲಾಂ. ಮಾಂಯ್ಕ್ ತ್ಯಾಚ್ ವಿಗಾರಾಚಿ ಶಿಫಾರಾಸ್ ಕರುನ್ ಆಶ್ರಮಾಕ್ ಭರ್ತಿ ಕೆಲ್ಯಾ. ಕುಂಬು ಘರಾಂತ್ ಎಕ್ಸುರಿ ಆಸ್ಚ್ಯಾಕಿ ಥಂಯ್ಸರ್ ಸರ್ವಾಸಂವೆಂ ಮಿಸ್ಳೊನ್, ಉಬ್ಗೊಣೆವಿಣೆಂ ಸಮಧಾನೆನ್ ಆಸ್ತೆಲಿ ಮ್ಹಳ್ಳಿ ಪಾತ್ಯೆಣಿ ಮ್ಹಜಿ.
******
ಆನಿಂ ಹಾಂಗಾ ಬಸ್ಲ್ಯಾರ್ ಜಾಯ್ನಾ. ಎದೊಳ್ಚ್ಚ್ ಕಾಳೊಕ್ ದಾಟೊನ್ ಆಯ್ಲಾ. ಉಟೊನ್ ಕುಲೆ ಪಾಪುಡ್ನ್ ರಸ್ತ್ಯಾಕ್ ದೆಂವೊಂ ಆನಿಂ ಲೊಕಾಜಮ್ಯಾಂತ್ ಭಾಯ್ರ್ ಪಡ್ಲೊಂ. ತೆನ್ನಾ ಮುಖ್ಲ್ಯಾನ್ ಆಯಿಲ್ಲಿ ಆಂಗ್ ವಿಕ್ಚಿ ಸ್ತ್ರೀ ಎಕ್ಲಿ ಮ್ಹಜ್ಯಾ ಬಾವ್ಳ್ಯಾಕ್ ಆಪ್ಲೆಂ ಹರ್ದೆಂ ಘಾಸುನ್ಂಚ್ ಪಾಶಾರ್ ಜಾಲಿ. ಪಾಟಿಂ ಪಳೆಂವ್ಕ್ ನಜೊ ಆಸ್ಲ್ಲೆಂ. ತರಿಪೂಣ್ ಪಳೆಯ್ಲೆಂ ಹಾಂವೆಂ. ಬಾವ್ಲ್ಲೆ ಕಳೆ ಮಾಳ್ಲ್ಲಿ ತಿ ಏಕ್ ವಿಚಿತ್ರ್ ಹಾಸೊ ಹಾಸ್ಲಿ - ರಸ್ತ್ಯಾಬಗ್ಲೆಚೆ ವೀಜ್ ದಿವೆ ಪೆಟ್ಲ್ಲ್ಯಾಬರಿ. ಪಾಟ್ಲಿ ದೀಶ್ಟ್ ಘುಂವ್ಡಾಯ್ನಾಸ್ತಾನಾಂಚ್ ಮುಕ್ಲೆಂ ಮೇಟ್ ದವರ್ಲ್ಯಾನ್ ತೆಂ ಅವ್ಘಡ್ ಘಡೊನ್ ಗೆಲೆಂ.....
ರಸ್ತ್ಯಾರ್ಚ್ ಕಾಂಕ್ಣಾ ಪಾತ್ಳಾವ್ನ್ ಬಸ್ಲ್ಲ್ಯಾ ಕಾಂಕ್ಣಾವಾಲಿಚೆಂ ಥೊಡಿಂ ಕಾಂಕ್ಣಾಂ ಮ್ಹಜ್ಯಾ ಪಾಂಯಾಪಂದಾ ಖೆಂವ್ಚ್ಯೊ ಜಾಲಿಂ. ಎಕಚ್ಛಾಣೆಂ ವ್ಹಡಾ ತಾಳ್ಯಾನ್ ತಿ ಬೊಬಾಟುಂಕ್ ಲಾಗ್ಲಿ. ಪಯ್ಲೆಂಚ್, ಚಾಳ್ವಲ್ಲ್ಯಾ ಚಿಂತ್ಪಾನಿ ಮೆಂದ್ವಾಂತ್ ಕೆಸೊಳ್ಯೊ ಫುಟ್ಲ್ಯೊ. ಆಬ್ಳೆಂ ಅತಾಂ ಮ್ಹಜ್ಯಾ ಆವಯ್ ಸಾಂಗ್ಡ್ಯಾ ತಿಚೆ ಥಾವ್ನ್ ಪೊಜ್ಡ್ಯೊ ಗಾಳಿ ಆಯ್ಕತಾನಾ ತೊ ಕೆಸೊಳ್ಯೊ ವ್ಹಾವೊನ್ ಗೆಲ್ಯೊ. ಹಾಂವ್ ಗಳ್ಗಳ್ಯಾನ್ ರಡ್ಲೊಂಚ್. ಪರಿಹಾರ್ ಜಾವ್ನ್ ತಿಕಾ ದಿಂವ್ಚ್ಯಾಕ್ ವೋಚ್ ಸುಟಯ್ತಾನಾ....
ಗಾಲಾರ್ ಪೊಂಡ್ಕುಲೆ ಫುಲಯಿಲ್ಲೆಂ, ಭಿಕ್ ಮಾಗ್ತೆಲೆಂ ಮ್ಹಜ್ಯಾ ಭಯ್ಣಿಚ್ಯಾ ಸುರ್ಪಾಚೆಂ ಚೆಡುಂ ಧಾಂವೊನ್ ಆಯೆಲ್ಲೆಂಚ್ ಪೊತಿಯೆಂತ್ಲೆಂ, ಚಿಲ್ಲರ್ ತಿಚ್ಯಾ ಪಾಂಯಮುಳಿಂ ವೊತುನ್ ವೆಗ್ಳಿಚ್ ದವರ್ಲೆಲಿ ಪಾಂಚ್ ರುಪಯಾಂಚಿ ಪಾವ್ಲಿ ಹಾತಿಂ ದಿವುನ್, ಮಾಕಾ ಬೋಟ್ ಜೊಕುನ್ ಕಿತೆಂಗಿ ಗುಣ್ಗುಣ್ಲೆಂ.
ದುಸ್ರ್ಯಾಚ್ ಖಿಣಾ ತ್ಯೆ ಕಾಂಕ್ಡಾವಾಲಿಚಿಂ ಉತ್ರಾಂ, ಹಾವ್ ಭಾವ್ ಬದ್ಲೆಲೆ. "ವ್ಹಡ್ ನಾ ಪುತಾ ತುವೆಂ ವೋಚ್ ದಿಂವ್ಚೆ ತಸಲೊ ನಷ್ಟ್ ಮ್ಹಾಕಾ ಜಾಂವ್ಕ್ ನಾ. ತಿಂ ಫುಟಲ್ಲಿಂ ಕಾಂಕ್ಣಾ ಕಾಂಯ್ ಬರಿ ನ್ಹಂಯ್. ವೊತಾಕ್ ರಂಗ್ ಮಾಜ್ವೊನ್ ಉಪ್ಕಾರಾಕ್ ಪಡನಾತ್ಲಿಂ..." ಪರ್ಕ್ಯಾ ಭಾಶೆನ್ ತೆಣೆಂ ಆಶೆಂ ಸಾಂಗ್ತಾನಾ ಮ್ಹಾಕಾ ಕಿತೆಂ ಮ್ಹಣಾಜೆ ಮ್ಹಳ್ಳೆಂ ಕಳ್ಳೆಂನಾ. "ಹೆಂ ಚೆಡುಂ ತುಮ್ಚಿ ಧುವ್ಗಿ?" ಮ್ಹಣ್ ವಿಚಾರುಂಕ್ ಜಾಯಾಸ್ಲೆಂ. ಪೂಣ್ ಉಮಾಳ್ಚ್ಯಾ ಬೊಗ್ಣಾಂನಿ ಗಳೊ ಆಡ್ಚಾಲ್ಲೊ ಜಾಲ್ಲ್ಯಾನ್ ಕಿತೆಂಚ್ ಉಲಂವ್ಕ್ ಸಕ್ಲೊಂನಾ. ತಶೆಂ ವಿಚಾರ್ಲ್ಲೆಂ ತರೀ ಹ್ಯಾ ಕಾಣಿಯೆ ಮಧೆಂ ದುಸ್ರ್ಯಾಚ್ ಏಕಾ ಕಾಣಿಯೆಚಿ ಸುರ್ವಾತ್ ಜಾತಿ ಕೊಣ್ಣಾ. ಹಾಂವೆಂ ಮುಕ್ಲಿಂ ಮೆಟಾಂ ವಿಂಚ್ಲಿಂ.
ಕಳೆ, ಕಾಂಕ್ಣಾಂ, ಗಾಳಿ - ಹ್ಯೊ ಸರ್ವ್ ವಸ್ತು ಮ್ಹಜ್ಯಾ ಮತಿಚೊ ಆನ್ಯೇಕ್ ಕೊನ್ಸೊ ಉಸ್ತಿತಾನಾ....
ಮುರ್ಯಾ ತಸಲೊ ಮೆಂದು ಮ್ಹಜೊ ಮೊವಾಳ್ ಉತ್ರಾಂನಿ ಕೊಸುನ್ ಭಾಂಗ್ರಾಳ್ಯಾ ಕಣ್ಶೆಚಿಂ ಸಪ್ಣಾಂ ವೊಂಪುನ್ ಗೆಲ್ಲೆ, ಹಾಂವೆಂ ಘಾಲ್ಲಿಂ ಮಾತ್ಯೆಚಿಂ ಕಾಂಕ್ಣಾಂ ಬೋವ್ ಜೊಗಾಸಾಣೆನ್ ವರ್ಸ್ಭರ್ ಸಾಂಬಾಳ್ಳಲೆ, ಮ್ಹಜೆಂ ಆಂಗ್ಪಾಂಗ್ ಪೊಶೆವ್ನ್ ತರ್ನಟ್ಪಣಾಕ್ ಜೀವ್ ದಿಲ್ಲೆ - ತೆ ಹಾತ್ ಹಾಂವ್ ವಿಸ್ರೊಂ ಕಸೊಂ?
ಧಾವಿ ಶಿಕ್ತಾನಾ ಬೋವ್ಚ್ ತರ್ನ್ಯಾ ಪ್ರಾಯೆರ್ ಹಾಂವ್ ಮೊಗಾಕ್ ಒಳಗ್ ಜಾಲ್ಲೊಂ. ಘರ್ಚಿಂ ಅತಂತ್ರ್ ಸ್ಥಿತಿಯ್ ಹಾಕಾ ಕಾರಣ್ ಮ್ಹಣ್ಯೆತ್. ಫುಗ್ರ್ಯಾಗಾಲಾಂಚೆಂ, ಲಾಂಬ್ ಪಾಂತಿಯೆಚೆಂ, ಸುಡ್ಸುಡಾಯೆಚೆಂ ತೆಂ ಚೆಡುಂ ದುಸ್ರೆಂ ಕೊಣ್ಂಚ್ ನ್ಹಂಯ್ - ಪಿರ್ಗೆಜೆಚ್ಯಾ ಬೊಟ್ಲೆರಾಚಿ ಧುವ್.
ಮ್ಹಜೆವಿಶಿಂ ಲಾಗ್ಶಿಲ್ಯಾನ್ ಜಾಣಾ ಆಸ್ಲ್ಲ್ಯಾನ್, ಘರಾ ಕೆಲ್ಲ್ಯಾ ಖಾಣಾಂತ್ಲೊ ಏಕ್ ವಾಂಟೊ ಉರವ್ನ್ ಮ್ಹಾಕಾ ಹಾಡ್ತಲೆಂ. ಇಸ್ಕೊಲಾಂತ್ ಚಡಾವತ್ ದನ್ಪರಾಚೆಂ ಮ್ಹಜೆಂ ಜೆವಾಣ್ ತಾಚ್ಯಾಚ್ ಭುತಿಯೆಂತ್. ತಾಚ್ಯಾ ಮೊಗಾಂತ್ ಆವಯ್ಚೊ ಮಯ್ಪಾಸ್ ಆಸ್ಲ್ಲೊ. ತಾಚ್ಯಾ ಉಸ್ಕ್ಯಾರ್ ಕಿರ್ಲ್ಲಿಂ ಮ್ಹಜಿಂ ದುಕಾಂ ಕಿತ್ಲೆಂ ಜಾತಿತ್? ಬಿರ್ಮತ್ ಪಾವ್ತಾಲೆಂ, ಧಯ್ರ್ ದಿತಾಲೆಂ. ತಾಣೆಂ ಮಾತೆಂ ಪೊಶೆಲ್ಯಾರ್ ಮ್ಹಜ್ಯಾ ಮತಿಂತ್ ಮ್ಹೊಂವ್ ವ್ಹಾಳ್ಲ್ಲ್ಯಾಬರಿ ಬೊಗ್ತಲೆಂ. ಆನಿಂ ತಾಣೆಂ ದಿಲ್ಲೊ ಪಯ್ಲೊ ಉಮೊ.... ವೋಂಟ್ ಫುಲವ್ನ್ ಮ್ಹಜ್ಯಾ ಪೊಲ್ಯಾರ್ ಧಾಂಬ್ತಾನಾ ಹಾಂವ್ ಲಜೆಕಾಂಟಿಯೆಚ್ಯಾ ಪಾನಾಬರಿ ದೊಡುನ್ ಮುದೊ ಜಾಲ್ಲೊಂ. ತೆದೊಳ್ ಪರ್ಯಾಂತ್ ಬಾಬಾಚ್ಯಾ ಸೊರ್ಯಾ ತೊಂಡಾಚ್ಯಾ, ಬಿಡಿಯೆ ಘಾಣಿಚ್ಯಾ, ಉಮ್ಯಾಂನಿ ಕಾಂಟಾಳ್ಲ್ಲೊಂ. ಉಮೊ ಇತ್ಲೊ ಮಧುರ್ ಮೊವಾಳ್, ಪಾಕ್ಳೆಕ್ ಪಾಕ್ಳೆ ಪೊಶೆಲ್ಲ್ಯಾಬರಿ ಆಸ್ತಾ ಮ್ಹಣ್ ಕಳ್ಲ್ಲೆಂ ತ್ಯಾಚ್ ದಿಸಾ.
ಹಾಂವ್ ಕಾಮಾಕ್ ಲಾಗ್ತಾನಾ ತಾಣೆ ಶಿಕಾಪ್ ಮುಂದರಿಲೆಂ. ಮೆಳ್ಚೆಂ ಆಪ್ರೂಪ್ ಜಾಲ್ಯಾರೀ ಅಪ್ರೂಪಾಚ್ಯೊ ಘಡಿಯೊ ಅನ್ಮೋಲ್ ಜಾಂವ್ಕ್ ಪಾವ್ಲ್ಯೊ. ಆಶೆಂ ವಾಟ್ ಏಕ್ ನಾತ್ಲ್ಯಾರೀ ಮೊಗಾ ಶೆತಾಂತ್ ದೊಗಾಂಯ್ಚಿಂ ಪಾವ್ಲಾಂ ರೊಂಬಯ್ಲಿಂ. ಎಕಾಚ್ಛಾಣೆಂ ಫುಡಾರಾಚೊ ಅಕಾಡೊ ಮುಖಾರ್ ಯೆತಾನಾ...
ಫೆಸ್ತ್ ಮೀಸ್ ಸಾಂಗೊಂಕ್ ಆಯಿಲ್ಲ್ಯಾ ಸಯ್ರ್ಯಾ ಪಾದ್ರ್ಯಾಬಾನ್ ಹಾಕಾ ಪಳೆವ್ನ್ ಆಪ್ಲ್ಯಾ ಕುಟ್ಮಾ ಭಿತರ್ಲಿ ಸಯ್ರಿಕ್ ಹಾಡ್ಲಿ. "ಘರಾ ಯೆವುನ್ ಬಾಬಾಲಾಗಿಂ ಉಲಯ್’ ಮ್ಹಣೊನ್ ತೆಂ ಒತ್ತಾಯ್ ಕರಿಲಾಗ್ಲೆಂ. ಹಾಂವ್ ಖಂಯ್ಚಾ ತೊಂಡಾನ್ ತಾಚ್ಯಾ ಬಾಬಾಮುಖಾರ್ ವಚೊಂ? ಕಿತೆಂ ಮ್ಹಣೊಂ? ತಕ್ಲಿ ವಿರಾರ್ ಜಾಲಿ. ತರಿಪೂಣ್ ತಾಚ್ಯಾ ಒತ್ತಾಯೆಕ್ ಲಾಗೊನ್ ಬೊಟ್ಲೆರಾಚೊ ಹುಂಬರ್ ಚಡ್ಲೊಂ.
"ಹಾಂವ್ ತುಚ್ಯಾ ಧುವೆಚೊ ಮೋಗ್ ಕರ್ತಾಂ... ಎಕಾ ಬರ್ಯಾ ಜೊಡಿಕ್ ಪಾವೊನ್ ಆನಿ ಚಾರ್-ಪಾಂಚ್ ವರ್ಸಾಂನಿ ಕಾಜಾರ್ ಜಾತಾಂ ತೆದೊಳ್ ಪರ್ಯಾಂತ್..." ಹಾಂವೆಂ ಮ್ಹಜೆಂ ಮಾಗ್ಣೆಂ ಮುಕಾರ್ ದವರ್ತಾನಾ ತಾಚ್ಯಾ ಅಂಗಾಂತ್ ದೆಂವ್ಚಾರ್ ರಿಗ್ಲೊ.
"ಹಾಂವೆಂ ರಾಂದ್ಲ್ಯಾಂತ್ ಉರ್ಲ್ಲೆಂ, ಮ್ಹಜೆಂ ಉಶ್ಟೆಂ ಖಾವ್ನ್ ವಾಡ್ಲ್ಲ್ಯಾ ಪೆಟ್ಯಾ ಹುಂಬೊರ್ ಉತ್ರೊಂಕ್ ಧಯ್ರ್ ಮೆಳ್ಳೆಂಗಿ ತುಕಾ?...." ಆಶಿ ಸುರು ಜಾಲ್ಲಿಂ ತಾಚಿಂ ಉತ್ರಾಂ ಪೊಜ್ಡೆಂಪಣ್, ಬುರ್ಶೆಂ, ಗಾಳಿಯೆಂನಿ ಮುಂದರುನ್ .." ಲಜ್ಮಾಂಡೆಂ, ಮಾನ್ ಮರ್ಯಾದ್ ಹೊಗ್ಡಾಯಿಲ್ಲೆಂ, ಶಿರಾಪ್ ಪಡ್ಲ್ಲೆಂ ಕುಟಾಮ್ ತುಮ್ಚೆಂ" ಆಶೆಂ ಅಖೇರ್ ಜಾಲ್ಲಿಂ. ಆಕ್ರೇಕ್ ಗಳ್ಯಾಕ್ ಹಾತ್ ಘಾಲುನ್ ಲೊಟ್ಲ್ಲ್ಯಾ ಪೊರ್ಸಾರ್ ಜಾಲಾಂತ್ ವೊಮ್ತೊಂಚ್ ಪಡ್ಲೊಂ. ಹಾತಿಂ ವಿಂಚ್ಲ್ಲೊ ಫಾತರ್ ಮ್ಹಜ್ಯಾಚ್ ಹರ್ದ್ಯಾಕ್ ಮಾರುನ್ ಪಾಟಿಂ ಆಯ್ಲೊಂ. ಘರಾ ಬಗ್ಲೆಚ್ಯಾ ಖಡ್ಪಾರ್ ಬಸೊನ್ ರಡ್ಲೊಂ, ರಡ್ಲೊಂ. ರಡೊನ್ ರಡೊನ್ ತ್ಯಾ ಫಾತ್ರಾಬರಿಚ್ ನಿರ್ಲಿಪ್ತ್ ಜಾಲೊಂ.
ಹಾಚ್ಯಾ ಉಪ್ರಾಂತ್ ತೆಂ ಮೆಳ್ಲ್ಲೆಂ ಏಕ್ಚ್ಚ್ ಪಾವ್ಟಿಂ. ದರ್ಯಾವೆಳೆರ್ ಬಸ್ಲ್ಲ್ಯಾಂವ್. ಗೊಡ್ಶೆ, ಗೊಡ್ಶೆ ಉಮೆ ಲಾಯಿಲ್ಲ್ಯಾಕ್ ಕೊಡ್ಶಿಂ ಉತ್ರಾಂ ಪಾಟಿಂ ದಿಲಿಂ ಹಾಂವೆಂ. ಮ್ಹಜೊ ಏಕ್ ಹಾತ್ ಆಪ್ಲ್ಯಾ ಉಸ್ಕ್ಯಾರ್ ಘೆವ್ನ್, ಬಾವ್ಳ್ಯಾಂಕ್ ಪೊಲೆ ದಾಂಬುನ್ ತೆಂ ಸುಸ್ಕರ್ತಾನಾ ತಾಚ್ಯಾ ದುಕಾಂ ಥೆಂಬ್ಯಾಂಕ್ ಮ್ಹಜ್ಯಾನ್ ವ್ಹಾವಂವ್ಕ್ ತಾಂಕ್ಲೆಂನಾ.
"ತುಜೆವಿಣೆಂ ಕಶೆಂ ಜಿಯೆಂವ್? ಮನ್ ಎಕ್ಲ್ಯಾಕ್ ಕೂಡ್ ಆನಿಯೆಕ್ಲ್ಯಾಕ್..." ತಾಚೆಸವೆಂ ಉತ್ರಾಂಯ್ ರಡ್ತಾನಾ ಕಾಳ್ಜಾಕ್ ಘಾಸ್ ಮಾರ್ಲ್ಲೊ ಅನ್ಭೋಗ್ ಜಾತಾಲೊ ತರೀ ಬೋವ್ ಕಷ್ಟಾಂನಿ ಸಮ್ಜಯ್ಲೆಂ; ಭುಜಯ್ಲೆಂ. ಆಖ್ರೇಕ್ ತೆಂ ಗೆಲೆಂ... ದೊಳ್ಯಾಂನಿ ದರ್ಯೊ ವ್ಹಾವಾಯಿಲ್ಲೆಬರಿ ಜಡಾಯೆಚ್ಯಾ ಪಾವ್ಲಾಂನಿ ತೆಂ ಗೆಲೆಂ.
ಹೆಂ ಜಾಲ್ಲೆಂಚ್ ತಾಚ್ಯಾ ಬಾಬಾನ್ ತಾಕಾ ಆಮ್ಸರಾನ್ ಆಮ್ಸರಾನ್ ಕಾಜಾರ್ ಕೆಲೆಂ. ಚಿಂತಿನಾಸ್ತಾಂ ಘೆತ್ಲ್ಲೆ ನಿರ್ದಾರ್ ಪಸ್ಚಾತಾಪ್ ಪಾಂವ್ಕ್ ಲಾಯ್ತಾತ್. ಹಾಂಗಾಸರ್ಯೀ ತಶೆಂಚ್ ಜಾಲೆಂ.
***
ಇತ್ಲ್ಯಾರ್ಚ್ ಕುಡಾಸರ್ಶಿಂ ಪಾವ್ಲೊಂ. ಬೀಗ್ ಘಾಲ್ಲ್ಯಾ ದಾರಾಚ್ಯಾ ಖಿಳಿಕ್ ಏಕ್ ಕಾಗಾದ್ ಶಿರ್ಕೊನ್ ಆಸ್ಲ್ಲೆಂ. ಪಳೆವ್ನ್ ಹಾಂವ್ ವಿಜ್ಮಿತ್ ಪಾವ್ಲೊಂ ನಾ. ಸದಾಂಚೆಂ ಮ್ಹಳ್ಳೆಬರಿ ಹಾತಿ ಘೆವ್ನ್ ದಾರ್ ಉಗಡ್ನ್ ಬಿತರ್ ರಿಗ್ಲೊಂ. ದೀಸ್ಭರ್ ಬಂದ್ ಆಸ್ಲ್ಲ್ಯಾ ಕುಡಾಚಿ ಘಾಣ್ ಭಾಯ್ರ್ ವೆಚ್ಯಾಕ್ ಜನೆಲ್ ಉಗ್ತೆಂ ಕೆಲೆಂ. ಭಾಯ್ಲೆಂ ಥಂಡ್ ಥಂಡ್ ವ್ಹಾರೆಂ ಭಿತರ್ ರಿಗ್ತಾನಾ, ಹಾತಾಂತ್ಲ್ಯಾ ಕಾಗ್ದಾಚೆರ್ ಏಕ್ ನಿಷ್ಟುರ್ ದೀಷ್ಟ್ ಶಿಂಪ್ಲಿಂ.
ಹೆಂ ಕಾಗತ್ ತಾಚೆಂಚ್ - ಹಾವೆಂ ಮೋಗ್ ಕೆಲ್ಲ್ಯಾ ಚೆಡ್ವಾಚೆಂ. ಕಿತ್ಲಿಶಿಂ ಕಾಜಾರ್ ಜಾತೆಚ್ಚ್ ನೊವ್ರ್ಯಾಚ್ಯಾ ವೆಂಗೆಂತ್ ವಸ್ತುರ್ ನಿಕ್ಳಾಯಿಲ್ಲೆಬರಿ ಆದ್ಲೆಂ ಸಗ್ಳೆಂ ವಿಸ್ರೊನ್ ಸೊಡ್ತಾನಾ ಹೆಂ ಮಾತ್ರ್ ವಿಸ್ರೊಂಕ್ ಸಕ್ಲೆಂ ನಾ. ಪಾಟಿಂ ಹಾಂವ್ ಜಾಪ್ ಬರಯ್ನಾತ್ಲ್ಯಾರೀ ವಯ್ರ್ ವಯ್ರ್ ಕಾಗ್ದಾಂ ಲಿಕ್ತಾ. ಮ್ಹಜೊ ವಿಳಾಸ್ ಕಸೊ ಆಪ್ಣಾಯ್ಲೊ ಮ್ಹಳ್ಳೆಂಯ್ ಹಾಂವ್ ನೆಣಾಂ.
ಎದೊಳ್ಚ್ಚ್ ತಕ್ಲಿ ಫಡಾಫಡ್ ಸುರು ಜಾಲ್ಲಿ. ಆನಿಂ ಹೆಂ ಕಾಗಾದ್ ವಾಚ್ಲ್ಯಾರ್ ....ಇತ್ಲ್ಯಾಕಿ ಹಾಂತು ಆಸಾತ್ ತರೀ ಕಿತೆಂ? ತೆಂಚ್ ನ್ಹಯ್ ಹಾಚೆಂ ಆದಿಂ ಆಸ್ಲ್ಲೆಂ; ಹಾಚೆ ಆದಿಂ ವಾಚ್ಲ್ಲೆಂ...
’ಮ್ಹಜೊ ನವ್ರೊ ಮ್ಹಸ್ತ್ ಸೊರೊ ಪಿಯೆತಾ, ಮಾರ್ತಾ. ತಾಚ್ಯಾ ಇಷ್ಟಾಂ ಮುಖಾರ್ ಅಕ್ಮಾನ್ ಕರ್ತಾ. ಥೊಡೆ ಪಾವ್ಟಿಂ ರಾತಿಂ ಘರಾಚ್ ಯೇನಾ. ಮ್ಹಾಕಾ ಮ್ಹಸ್ತ್ ಭಿರಾಂತ್ ದಿಸ್ತಾ...’ ಆಶೆಂ ಪಯ್ಲೆಂಚ್ಯಾ ವೊಳಿಂನಿ ಆಪ್ಲೆಂ ಕಷ್ಟ್ ಉಚಾರ್ತಾ ತರ್ ಉಪ್ರಾಂತ್ಲ್ಯಾ ವೊಳಿಂನಿ ಮ್ಹಜೆವಯ್ಲ್ಯೊ ಶಿಣ್ ದಾಕಯ್ತಾ.
’ತುಂವೆಂ ಮನ್ ಕೆಲ್ಲೆಂ ತರ್ ಮ್ಹಾಕಾ ಹಿ ಗತ್ ಯೆತಿನಾ. ಆಮ್ಕಾಂ ದೊಗಾಂಯ್ಕಿ ಕಾಜಾರ್ ಜಾವ್ನ್ ಖಂಯ್ ಪುಣಿ ಸುಖಾನ್ ಜಿಯೆತೆಂ. ತುವೆಂ ಕಾಂಟಾಳ್ಳೆಲೆ ತೆಚ್ ಸೊರ್ಯಾ ತೊಂಡಾಚೆ ಉಮೆಂ ಆಜ್ ಮ್ಹಜ್ಯಾ ಗಾಲಾಂಕ್ ಚಾಬೊನ್ ಆಸಾತ್...’
ವ್ಹಡ್ ಏಕ್ ಆವ್ರ್ ಯೇವ್ನ್ ಗೆಲ್ಯಾ ಉಪ್ರಾಂತ್ ಗುಂಡಾಯೆಚ್ಯಾ ಸುವಾತೆಂನಿ ಉರ್ಲ್ಲ್ಯಾ ಉದ್ಕಾಜಶೆಂ ಉಪ್ರಾಂತ್ಲ್ಯಾ ವೊಳಿಂನಿ ಮೋಗ್ ವ್ಹಾಳ್ತಾ...
’ಗಾಂವಾಂತ್ ಬರೊ ಪಾವ್ಸ್ ವೊತ್ತಾ... ಮ್ಹಾಕಾ ತುಜಿಚ್ ಯಾದ್. ತುವೆಂ ದಿಲ್ಲೆಂ ಪಯ್ಲೆಂ ಕಾಗಾದ್ ಪರತ್ ಪರತ್ ವಾಚ್ತಾಂ. ಝಗ್ಲಣ್ಯಾಧಾರಿನ್ ಆಸ್ಡ್ಯೊ ಶಿಂದ್ಲ್ಯಾರೀ, ಘಡ್ಗಡ್ಯಾಂನಿ ಉಡಿಯೊ ಗಿಳ್ಳ್ಯಾರೀ ಥೊಡೆಂ ಥೆಂಬೆಂ ಮಾತ್ರ್ ತುಜ್ಯಾ ನಾಂವಿ ಅಜೂನ್ ವ್ಹಾಳೊನ್ ಆಸಾತ್.. ಥಾಪ್ಡಾಂ ಖಾತಾನಾ ರಡ್ತಾಂ ಹಾಂವ್- ಮ್ಹಾಕಾ ದುಕ್ತಾ ಮ್ಹಳ್ಳ್ಯಾ ಖಾತಿರ್ ನ್ಹಂಯ್; ಬಗಾರ್ ವ್ಹಡಾ ದಾಕ್ಶೆಣೆಚ್ಯಾ ತುಜ್ಯೆಥಾವ್ನ್ ರಂದೂನ್ ರಂದುನ್ ಹಾಂವೆಂ ಘೆತ್ಲ್ಲ್ಯಾ ಪಯ್ಲ್ಯಾ ಉಮ್ಯಾಕ್ ದುಕ್ಲೆಂ ಕೊಣ್ಣಾ ಮ್ಹಣೊನ್ ಹಾಂವ್ ರಡ್ತಾಂ...’
ಮ್ಹಜ್ಯಾ ವಾಟೆರ್ ತಣ್ ಲೆಗೂನ್ ಕಿರ್ಲನಾ. ಪುಣ್ ಆಸಲ್ಲ್ಯೊ ವೊಳಿ ಚಿವೆ ಧಲಂವ್ಚಿ
ವೊಡ್ಣಿ ಹಾಡಯ್ತಾತ್. ದೆಕುನ್ ಹೆಂ ಉತ್ರಾಂ ಮ್ಹಾಕಾ ಸೊಸನಾಂತ್;
ವಾಚುಂಕ್ ನಾಕಾತ್. ಹ್ಯಾ ಕಾಗ್ದಾರ್ ಆನಿಂ ಕಿತ್ಲಿಂ ಆಸಾತ್ಗಿ? ವಾಚುನ್ ತಕ್ಲಿ ವಿರಾರ್ ಜಾಂವ್ಚ್ಯಾ ಆದಿಂಚ್ ಕಾಗಾದ್ ಪಿಂಜ್ಲೆಂ.
ಮತಿಕ್ ಸಮಾಧಾನ್ ಮೆಳ್ತಾ ಪರ್ಯಾಂತ್ ಪಿಂಜುನ್ ಪಿಂಜುನ್ ತೀನ್ ತಿರ್ಕುಟ್ ಕರುನ್ ಥಂಡ್
ವಾರ್ಯಾರ್ ಏಕ್ ನೀಳ್ ಸ್ವಾಸ್ ಸೊಡ್ತಾನಾ ಝಳ್ಕಲಿ ತಿ ಗಜಾಲ್....
ಮಯ್ನ್ಯಾಕ್ ದೋನ್ - ತೀನ್ ಪುಣಿ ಯೆಂವ್ಚಿ ಕಾಗ್ದಾಂ
ಪಾಟ್ಲ್ಯಾಂ ದೋನ್ ಮಯ್ನ್ಯಾ ಥಾವ್ನ್ ಯೇಂವ್ಕ್
ನಾತ್ಲ್ಲಿಂ. ದೋನ್ ಮಯ್ನ್ಯಾ ಉಪ್ರಾಂತ್ ಲಿಕ್ಲ್ಲೆಂ ಕಾಗಾದ್
ಹೆಂ - ಕಿತೆಂ ತರೀ ವಿಶೇಷ್? ’ಮ್ಹಜ್ಯಾ ನೊವ್ರ್ಯಾನ್ ಸೊರೊ ಪಿಯೆಂವ್ಚೊ
ಸೊಡ್ಲಾ... ಏಕಾ ಕಾಮಾಕ್ ಲಾಗ್ಲಾ...ಮ್ಹಾಕಾ ಬರ್ಯಾನ್ ಪಳೆಯ್ತಾ.... ಆಮಿಂ ದೊಗಾಂಯ್
ಮೊಗಾನ್ ಆಸಾಂವ್...’ ಅಸಲಿ ಕಾಂಯ್ ಪುಣಿ ಬರಿ ಖಬಾರ್? ಕಿತ್ಯಾಕ್ ಆಸೊಂಕ್
ನಜೊ?! ಹೆಂ ಚಿಂತಾಪ್ ಆಯಿಲ್ಲೆಂಚ್..
ಹೊರ್ಬೊಸಾಕ್ ಪಡ್ಲ್ಲೆಬರಿ ಹಾತಾಂತ್ಲೆ ಕಾಗ್ದಾಚುರೆ ಮೆಜಾರ್
ಪಾತ್ಳಾವ್ನ್ ಘುಡ್ಸುಂಕ್ ಲಾಗ್ಲೊಂ. ಪುಣ್ ಕಾಗಾತ್ ಇತ್ಲೆಂಯ್ ಪಿಂಜುನ್ ಗೆಲ್ಲೆಂಕೀ ಏಕ್
ಸಬ್ದ್ಯಿ ರಚುಂಕ್ ಸಕ್ಲೊಂ ನಾ. ವ್ಹಡಾ ನಿರಾಶೆನ್ ಕಾಗ್ದಾಂ ಚುರೆ
ಮುಟಿಂತ್ ಘೆವ್ನ್ ಖಟ್ಲ್ಯಾರ್ ಉದಾರೊಚ್ ಪಡ್ಲೊಂ.
ತ್ಯಾ ರಾತಿಂ ಏಕ್ ಅರ್ಥಾಭರಿತ್ ಸಪಣ್ ಪಡ್ಲೆಂ
ವ್ಹಳೂ ವಾರ್ಯಾರ್ ಉಬೊನ್ ಗೆಲ್ಲೊಂ ಹಾಂವ್, ಸಾಂಜೆರ್ ಚಲೊನ್ ಆಯಿಲ್ಲ್ಯಾ ರಸ್ತ್ಯಾಮಧೆಂಚ್ ದೆಂವ್ಲೊಂ. ರಾವೊನ್ ಭಂವ್ತಿ ಚೊಯ್ಲೆಂ.
ಮದ್ಯಾನ್ ರಾತಿಚ್ಯಾ ತ್ಯಾ ರಿತ್ಯಾ ರಸ್ತ್ಯಾರ್, ತುಟ್ಲ್ಲ್ಯೊ
ವ್ಹಾಣೊಂ, ಖಾವ್ನ್ ಉಡಯಿಲ್ಲಿ ಕಾಳಿಂಗಾಚಿ ಸಾಲ್, ಕೊಂವಾ ಚಿಂವೊಡ್,
ವಸ್ತು ಶಿಂಪ್ಡಾಲ್ಲ್ಯೊ. ಹಾಂವೆಂ ಹಾತ್ ಮುಖಾರ್ ಧರುನ್
ಮೂಟ್ ಸೊಡಯ್ಲಿ ತೆನ್ನಾ.... ಪಿಂಜ್ಲ್ಲೆ ಕಾಗ್ದಾಂ ಚುರೆ ಹಳೂ
ವ್ಹಾರ್ಯಾಕ್ ಉಬೊನ್, ಕಿರ್ಕೊಳಾಂತ್ಲೆ ಕಿರ್ಕೊಳ್ ಜಾವ್ನ್ ರಸ್ತೊಭರ್ ಶಿಂಪ್ಲೆ.
ಸಂಗಿ ಆಸ್ಲ್ಯಾರೀ ಕಸಲೊಚ್ ಅರ್ಥ್ ಸೊಡ್ನ್ ದೀನಾತ್ಲೆ ತೆಂ ಕಾಗ್ದಾಂ-ಚುರೆಂ ಮ್ಹಾಕಾ ಆಶೆಂ ದಿಸ್ಲೆಕೀ - ತಾಂತ್ಲೆಂ ಹರ್ಯೇಕ್ ಪಿಂಜ್ಲ್ಲೆಂ ಅಕ್ಶರ್ಯಿ ಆಪಾಪ್ಲಿ ನಿಗೂಡ್ ಕಾಣಿ ಸಾಂಗ್ಚೆಬರಿ....
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
