ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 18. ಗಡ್ ಆನಿ ತಡ್
ಚಡಾವತ್ ರಾಜಕೀಯ್ ಲೇಖನಾಂ ಬರವ್ನ್ ಲೊಕಾಂಕ್ ವಳ್ಕೆಚೊ ಜಾಲ್ಲೊ ಮಾನೆಸ್ತ್ ಎಡಿ ನೆಟ್ಟೊ ಏಕ್ ಕವಿ, ಲೇಖಕ್ ಸಯ್ತ್. ಕೊಂಕ್ಣೆಂತ್ ಅಪ್ಲ್ಯಾಚ್ ಶೈಲೆರ್ ಮಟ್ವಿ ಕಾಣಿ ಬರಂವ್ಚೊ ಎಡಿ ನೆಟ್ಟೊ ಉಂಚ್ಲ್ಯಾ ಕಾಣ್ಯೆಗಾರಾಂ ಪಯ್ಕಿ ಎಕ್ಲೊ. ಎದೊಳ್ಚ್ ಕರ್ನಾಟಕ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ಥಿ, ದಿವೊ ಸಾಹಿತ್ಯ್ ಪ್ರಶಸ್ಥಿ ಆಪ್ಣಾಯಿಲ್ಲೊ ಎಡಿ ನೆಟ್ಟೊ ಭಾರತೀಯ್ ಭೂಸೈನ್ಯಾಂತ್ ವಾವ್ರ್ ಕರ್ನ್ ಅನ್ಭೋಗ್ ಜೊಡ್ಲ್ಲೊ ದೆಖುನ್ ಹ್ಯಾ ಕಾಣ್ಯೆಂತ್ ತಾಚೊ ಅನ್ಭೋಗ್ ವ್ಹಾಳಯಿಲ್ಲೊ ದಿಸೊನ್ ಯೆತಾ.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಹಾಂತುಂ ವೊರಾಯ್ಣಾರಾಂಚಿ ಶಿಫಾರಾಸ್ ಅಪ್ಣಾಯಿಲ್ಲಿ ಕಾಣಿ]
ಎಡಿ ನೆಟ್ಟೊ
ಡೆಲ್ಲಿ ಥಾವ್ನ್ ಮ್ಹಾಕಾ
ಪಾವವ್ನ್ ಆಯಿಲ್ಲಿ ಮಂಗಳಾ ಎಕ್ಸ್ ಪ್ರೆಸ್ಸ್ ಗಾಡಿ ರಾತಿಂ ಅಡೇಜ್
ವ್ಹೊರಾರ್ ಕಂಕ್ನಾಡಿ ಸ್ಟೇಶನಾಕ್ ಪಾವ್ಲಿ ಆನಿ ಪಯ್ಲೆಂಚ್ ತಯಾರ್ ಜಾಲ್ಲೊಂ
ಹಾಂವ್, ಸೂಟ್ಕೇಸಿ ಸವೆಂ ಸವ್ಕಾಸ್ ದೆಂವ್ಲೊಂ. ಪ್ರಾಯ್ ಚಡ್
ನ್ಹಂಯ್, ಖಾಲಿ ಪನ್ನಾಸಾಂಚಿ ತರೀ ಕುಡೀನ್ ಎಕ್ದಮ್
ಲಾಚಾರ್ ಜಾಲ್ಲ್ಯಾನ್ ಸೂಟ್ಕೇಸ್ ವ್ಹಾವವ್ನ್ ಸರಾರಾಂ ಚಲೊಂಕ್ ಜಾಯ್ನಾಸ್ತಾಂ
ಸವ್ಕಾಸ್ ವೇಯ್ಟಿಂಗ್ ರೂಮಾ ಸರ್ಶಿಂ ಗೆಲೊಂ. ಥಂಯ್
ಬಾಗ್ಲಾರ್ಚ್ಚ್ ಎಕ್ಲಿ ಚಲಿ ದೊಳೆ ರುಂದಾವ್ನ್ ಹೆಣೆಂ - ತೆಣೆಂ ಪಳೆವ್ನ್ ಆಸ್ಚಿ
ಮ್ಹಜೆರ್ ದೀಷ್ಟ್ ಪಡ್ತಾನಾ ನೀಟ್ ಜಾಲಿ ಆನಿ ಹಾತಿಂ ಧರ್ಲೆಲ್ಯಾ ಎಕಾ ತಸ್ವೀರೆ
ವ್ಹಯ್ರ್ ಆನಿ ಮ್ಹಜೆರ್ ಪಾಟಿಂ ಮುಖಾರ್ ದೊಳೆ ಚರವ್ನ್, "ಪಪ್ಪಾ"
ಮ್ಹಣ್ ಹಾಂಕ್ರೆಲಿ.
ಹಾಂವ್ಯಿ "ಹಾಂ" ಮ್ಹಣ್ ಉದ್ಗಾರುನ್ "ಹೊ!" ಮ್ಹಣ್ ಆಕ್ಲಾಸ್ಲೊ ಆನಿ,
ಮ್ಹಜಿ ಧು, ವೀಸ್ ವರ್ಸಾಂ ಉಪ್ರಾಂತ್ ಮ್ಹಾಕಾ ಮೆಳ್ಚೆಂ
ಮ್ಹಜೆಂ ಮಾಣ್ಕುಲೆಂ!" ಮ್ಹಣ್ ತಳ್ಮಳ್ಳೊಂ. ಸರಾರಾಂ ತಾಚಾಲಾಗಿಂ
ಪಾವೊಂಕ್ ಅತ್ರೆಗ್ತಾನಾ ಸೂಟ್ಕೇಸಿಚೆಂ ವಜಾನ್ ಆಡ್ ಆಯ್ಲೆಂ ಜಾಲ್ಲ್ಯಾನ್ ತೆಂ ಥಂಯ್ಚ್ ಗಳವ್ನ್
ಮುಖಾರ್ ಸರ್ಲೊ. ತಿತ್ಲ್ಯಾರ್ ಎಕಾ ಬಕ್ಕಾರಾನ್ ಲಾಗಿಂ ಪಾವುಲ್ಲೆಂ ತೆಂ "ಪಪ್ಪಾ"
ಮ್ಹಣ್ ಮ್ಹಜ್ಯಾ ಗಳ್ಯಾಕ್ ವೆಡ್ಕೊಳ್ಳೆಂ. ಆನಿ ಮ್ಹಜ್ಯಾ
ಹರ್ದ್ಯಾರ್ ತೋಂಡ್ ಲಿಪವ್ನ್ ರಡಲಾಗ್ಲೆ. ಭಾರಿಚ್ಚ್ ಅಪ್ರೂಪ್ ಘಡಿತ್ ಜಾಲ್ಲ್ಯಾನ್ ಆನಿ ಕಾಳ್ಜಾಂತ್ಲೆ
ಸರ್ವ್ ತಳ್ಮಳೆ - ಕಳ್ವಳೆ ವಿಶಿಷ್ಟ್ ಬೊಗ್ಣಾಂನಿ ಕಡಂವ್ಚೆಂ ಘಡಿತ್ ಜಾಲ್ಲ್ಯಾನ್
ಹಾಂವ್ಯಿ ರಡ್ಲೊಂ. ಥೊಡ್ಯಾ ವೆಳಾನ್ ಮನ್ ಶಾಂತ್ ಜಾವ್ನ್
ಮತಿಕ್ ತೃಪ್ತಿ ಲಾಭ್ತಾನಾ ಹಾಂವೆಂ ವ್ಹಳೂ ವಿಚಾರ್ಲೆಂ. "ಮಾಮ್ಮಿ ಯೇಂವ್ಕ್
ನಾಂಗಿ"?
"ನಾಂ" ಮ್ಹಳೆಂ ಧುವೆನ್ ದುಃಖಾಳ್ ತಾಳ್ಯಾನ್,
"ತ್ಯಾ ವಿಶಿಂ ಮಾಗಿರ್ ಸಾಂಗ್ತಾಂ" ಮ್ಹಣ್ ಮ್ಹಜಿ ಸೂಟ್ಕೇಸ್ ಉಕಲ್ಲಿ.
ಪುತ್ತೂರ್ ವೆಚೆಂ ಪಯ್ಲೆಂ ಬಸ್ಸ್ ಸಕಾಳಿಂ ಸ ವ್ಹೊರಾರ್ ಮೆಳ್ತಾ, ತೆಂ ಧರುಂಕ್
ಹಾಂಗಾ ಲಾಗಿಂ ಪಂಪ್ವೆಲ್ ಯಾ ಪಡೀಲ್ ಜಂಕ್ಶನ್, ಆತಾಂ ರಿಕ್ಶಾ ಕೆಲ್ಲ್ಯಾರ್
ಪನ್ನಾಸ್ - ಸಾಟ್ ರುಪಯ್ ವಿಚಾರ್ತಾತ್. ಥಂಯ್ ಮಾರ್ಗಾರ್
ಸುಕ್ಚಾ ಬದ್ಲಾಕ್ ಹಾಂಗಾಂ ವೇಯ್ಟಿಂಗ್ ರೂಮಾಂತ್ ರಾವ್ಯಾಂ, ತೀನ್
ವ್ಹೊರಾಂ ಪಾಶಾರ್ ಪಾಶಾರ್ ಕರುನ್ ಆನಿ ನಿತಳ್ ಜಾವ್ನ್
ದೀಸ್ ಉಜ್ವಾಡ್ತಾನಾ ಗೆಲ್ಯಾರ್ ಸವಾಯೆನ್ ಜಾತಾಂ, ಸವ್ಕಾಸಾಯ್ ಮೆಳ್ತಾ.
"ತುಂ ಕಿತೆಂ ಮ್ಹಣ್ತಾಯ್" ಮ್ಹಣ್ ವಿಚಾರಿಲಾಗ್ಲೆಂ. "ಬಾರಿ ಬರಿ ಆಲೋಚನ್, ತಶೆಂಚ್ ಕರ್ಯಾಂ" ಮ್ಹಳೆಂ
ಹಾಂವೆಂ ಆನಿ ಮತಿಂ "ಧುವ್ ಮ್ಹಜಿ ಹುಶಾರ್ ಆಶಾ, ಕಶಿಸಿ ಕರುಂಕ್ ಶಿಕ್ಲ್ಯಾ, ನಿರ್ಣಯ್ ಘೆಂವ್ಕ್
ಸಕ್ತಾ" ಮ್ಹಣ್ ಸಂತೊಸ್ ಪಾವ್ಲೊಂ ಆನಿ ತಾಚಾ ಪಾಟ್ಲ್ಯಾನ್
ವೇಯ್ಟಿಂಗ್ ರೂಮಾ ತೆವ್ಶಿ ಚಲ್ಲೊಂ.
ಸತಾಚಿ ಗಜಾಲ್ ಜಾವ್ನ್ ತಿತ್ಲ್ಯಾ ಕಶಿಸೆನ್ ಚಾಳೀಸ್ ರುಪಯ್ ಉರಂವ್ಚಿ ಗರ್ಜ್
ಮ್ಹಾಕಾ ನಾತ್ಲ್ಲಿ, ದೊನ್ಶಿಂ ರುಪಯ್ ಉಡವ್ನ್ ರಾತಿಂಚ್
ಪುತ್ತೂರಾಕ್ ಕಾರ್ ಕರ್ಚಿ ತಾಂಕ್ ಮ್ಹಾಕಾ ಆಸ್ಲ್ಲಿ. ಭಾರತೀಯ್ ಭೂ
ಸೇನಾನ್ ತೀನ್ ಮಹಿನ್ಯಾಚಿ ರಜಾ ಮಂಜೂರ್ ಕರುನ್
ದಿಲ್ಲೆ ಸಾಂಬಾಳಾಚೆ ಆನಿ ಜೆವ್ಣಾಚೆ ಬಾರಾ ಹಜಾರ್ ರುಪಯ್
ಸೂಟ್ ಕೇಸಿಂತ್ ಆಸ್ಲ್ಲೆ. ತಾಚಾಕ್ ವರ್ತೊ ಐವಜ್ ಮ್ಹಜ್ಯಾ ಝುಜಾ
ಸೆವೆಚಾ ವೀಸ್ ವರ್ಸಾಂತ್ ಲಗ್ತಿ ಜಾಲ್ಲೊ ಸಾಂಬಾಳ್ನ್ ಎಕಾ ಗಾಂಟಿನ್ ಧಾ
ಲಾಖ್ ರುಪ್ಯಾಂಚಿ ಚೆಕ್ ರೂಪಾನ್ ಆನಿ ಭುಸೇನಾ ನ್ ಪುತ್ತುರ್ಚಾ
ಸ್ಟೇಟ್ ಬೇಂಕಾಕ್ ಲಿಖ್ಲೆಲ್ಯಾ ಶಿಫಾರಸ್ ಪತ್ರಾ ಸಂಗಿಂ ಎಕಾ ಲಕಾಟ್ಯಾಂತ್
ಮ್ಹಜ್ಯಾ ಬಿತರ್ಲ್ಯಾ ಬನಿಯನಾಕ್ ಶಿವೊನ್ ಆಸ್ಲ್ಲೊ. ಭುಸೇನಾನ್
ಮ್ಹಜಿ ವಳಕ್, ಸೆವೆಚೊ ವಿವರ್, ಸಾಂಬಾಳಾಚೆಂ ಲೇಖ್ ಆನಿ ಆದಾಯ್
ಸುಂಕಾ ಥಾವ್ನ್ ಮಾಫಿ ವಿಶಿಂ ಬೆಂಕಾಕ್ ಕಳಯಿಲ್ಲೆ.
"ದುಡು ಆಸಾ, ಬೊಲ್ಸಾಂತ್ ಖೊರ್ಜುತಾ ಮ್ಹಣ್ ಆತ್ತಾಂಚ್ ಉಡಂವ್ಚಿ
ಸುರ್ವಾತ್ ನಾಕಾ" ಮ್ಹಣ್ ಚಿಂತ್ಲೆಂ ಹಾಂವೆಂ, ಬಸೊನ್ ಖಾತಾನಾ
ಹಾಂಡಿಭರ್ ಭಾಂಗಾರ್ಯಿ ಪಾವಾನಾ ಮ್ಹಳ್ಳ್ಯಾ ಗಾದಿ ಸಂಗಿಂ
ಸವ್ಕಾಸ್ ಆನಿ ಧೃಡ್ ಮೆಟಾಂನಿಂಚ್ ಪಂತಾಟ್ ಜಿಕ್ಯೆತ್ ಮ್ಹಣ್ಚೆಂಯ್ ಆಸ್ತಾನಾ
ಹಾಂವೆಯ್ ಚತ್ರಾಯೆನ್ ಫುಡ್ಲ್ಯಾ ಜಿಣಿಯೆಕ್ ಬುನ್ಯಾದ್ ಘಾಲ್ಚಿ
ವಾಜ್ಬಿ ಜಾವ್ನಾಸಾ". ವೇಯ್ಟಿಂಗ್ ರೂಮಾಂತ್ ಬಸ್ಲೆಲ್ಯಾ ಉಪ್ರಾಂತ್ ಕುಡಾಂತ್ಲ್ಯಾ ಬರ್ಯಾ ಉಜ್ವಾಡಾನ್
ಹಾಂವೆಂ ಮ್ಹಜ್ಯಾ ಧುವೆಕ್ ಸಾರ್ಕೆಂ ಪಳೆಯ್ಲೆ; ಸೊಬಿತ್ ಮುಖಾಮಳ್, ಫುಡ್ಪುಡಿತ್ ಕೂಡ್ ಆನಿ
ಮೆಚ್ವೊಣಿಚೊ ರುಪಾಲಂಕಾರ್ ದೆಕ್ತಾನಾ ಮ್ಹಾಕಾ ಸಂತೊಸ್ ಭೊಗ್ಲೊ.
ವೀಸ್ ವರ್ಸಾಂ ಆದಿಂ ಹಾಂವೆಂ ಪಳೆಯಿಲ್ಲೆಂ ಚಾಳೀಸ್ ದಿಸಾಂಚೆಂ ಬಿಟ್ಟೆಂ ಕಿತ್ಲ್ಯಾ ಬರ್ಯಾನ್ - ಫುಲವ್ನ್
ವಾಡ್ಲಾಂ ಮ್ಹಣ್ ತೃಪ್ತಿ ಭಗ್ಲಿ.
ತೆಂಯಿ ಮ್ಹಾಕಾಚ್ಚ್ ದೆಕ್ತಾಲೆಂ ಆನಿ ಸವ್ಕಾಸ್ ತಾಚಾ ಮುಖಮಳಾಚೊ ಛಾರೊ ಬದಲ್ತಾಲೊ,
ಸುರ್ವೆರ್ ರಡ್ಕುರೆಂ ಜಾಲ್ಲೆಂ ತೆಂ ಉಪ್ರಾಂತ್ ಹಾಸ್ಕುರೆಂ ಆನಿ ಉಲ್ಲಾಸಿತ್ ಜಾವ್ನಾಸ್ಲೆಂ, ಆತಾಂ ಘಡಿಯೆ
ಪಾಟ್ಲ್ಯಾನ್ ದುಃಖೆಸ್ತ್ ಜಾವ್ನ್ ಯೆತಾಲೆಂ. ಭೋವ್ಶಾ ತಾಕಾ ತಡ್ವೊಂಕ್ ಜಾಂವ್ಕ್
ನಾ, ಆಶೆಂ ಉಲಂವ್ಚೆಂ - ತಶೆಂ ವಿಚಾರ್ಚೆಂ ಸಾರ್ಕೆಂ ನ್ಹಂಯ್ ಆನಿ
ಶಿಶ್ಟಾಚಾರಾ ವಿರೋಧ್ ಮ್ಹಣ್ಚೆಂಯ್ ಸಮ್ಜಾಲೆಂನಾ, ದೆಕುನ್ ತಾಣೆಂ ಶೀದಾ
"ಕಿತೆಂ ಜಾಲಾಂ ಪಪ್ಪಾ ತುಕಾ, ತುಜೆಂ ತೋಂಡ್ ರಗಾತ್
ನಾತ್ಲೆಲ್ಯಾಬರಿ ಧವ್ಸಾಣೆನ್ ಭರ್ಲಾಂ, ತುಜೊ ಜೀವ್ ಪೊಟಾಕ್
ನಾತೆಲ್ಯಾ ಬರಿ ಭಾಗೆಟೊ ಜಾಲಾ, ತಶೆಂ ಕಿತೆಂ ಜಾಲೆಂ, ತುಕಾ ಕಸಲಿ ಪಿಡಾ?"
ಮ್ಹಣ್ ವಿಚಾರ್ಲೆಂ, ಭಾರಿಚ್ ಕಳ್ವಳೆಲ್ಲ್ಯಾ ತಾಳ್ಯಾನ್.
"ಮ್ಹಾಕಾ ಕಸಲಿಚ್ಚ್ ಪಿಡಾ ನಾ, ಮ್ಹಜಿ ಭಲಾಯ್ಕಿ ಬರಿ ಆಸಾ,
ಮಿಲಿಟ್ರಿ ದಾಕ್ತೆರಾಂನಿ ಗೂಂಡ್ ಪರೀಕ್ಶಾ ಕರುನ್ ಉತ್ತಿಮ್ ಚಿಕಿತ್ಸಾ
ದಿಲ್ಯಾ. ವ್ಹಯ್, ಮ್ಹಜೆಂ ರಗಾತ್ ಆಟ್ಲಾಂ ಆನಿ ಜೀವ್ ಸುಕ್ಲಾ, ತಾಕಾ ಕಾರಣ್
ಪಾಟ್ಲಿ ವೀಸ್ ವರ್ಸಾಂಚಿ ಜಿಣಿಂ. ಹಾಂವೆಂ ಮಾಮ್ಮಿಕ್ ಬರಯಿಲ್ಲ್ಯಾ
ಪತ್ರಾಂತ್ ತ್ಯಾ ವಿಶಿಂ ಸವಿಸ್ತಾರ್ ಕಳಯಿಲ್ಲೆಂ ಆನಿ ಮ್ಹಜ್ಯಾ ಆತಾಂಚಾ ರುಪಾಚಿ ವಳಕ್ ಧರುಂಕ್ - ತಸ್ವೀರ್ಯಿ ದಾಡ್ಲಿ. ತಿ ತಸ್ವೀರ್ ಆತಾಂ ತುಜ್ಯಾ
ಹಾತಿಂ ಆಸಾ ಆನಿ ಮ್ಹಾಕಾ ಮುಕಾರ್ ಮೆಳೊಂಕ್ ತುಂ ಆಯ್ಲಾಂಯ್
ಮ್ಹಣ್ತಾನಾ ಪತ್ರಾಂತ್ ಬರಯಿಲ್ಲ್ಯಾ ಪರ್ಮಾಣೆಂ ಹಾಂವ್
ವೀಸ್ ವರ್ಸಾಂ ಹಾಂವೆಂ ಪಾಕಿಸ್ತಾನಿ ಜಯ್ಲಾಂತ್ ವಳ್ವಾಳ್ತಾಲೊಂ ಮ್ಹಳ್ಳಿಂ
ಸಂಗತ್ಯಿ ತುಂ ಜಾಣಾಂಯ್" ವಿಚಾರ್ಲೆಂ ಹಾಂವೆಂ ಸವ್ಕಾಸ್.
"ಆತಾಂ ಗಾವಾಕ್ ಆಯ್ಲಾಂ, ಮ್ಹಜ್ಯಾ ಕುಟ್ಮಾ ಸವೆಂ ಸಂತೊಸಾನ್ ರಾವ್ತಾಂ,
ಮ್ಹಜ್ಯಾ ಪತಿಣೆಚಾ ಆನಿ ಧುವೆಚಾ ಮೊಗಾ - ಮಯ್ಪಾಸಾಚಾ ಚಾಕ್ರೆನ್ ಬರೊ ಜಾತಲೊಂ."
ಧುವ್ ಪರ್ತ್ಯಾನ್ ಹಾಂಕ್ರೆಲಿ ಆನಿ ಘಡಿಭರ್ ತಕ್ಲಿ ಬಾಗಾವ್ನ್ ಬಸ್ಲಿ, ಉಪ್ರಾಂತ್ ತಿಣೆಂ ಮ್ಹಳೆಂ"
ಮೊಗಾ - ಮಯ್ಪಾಸಾನ್ ಧುವ್ ಚಾಕ್ರಿ ಕರ್ತಲಿ ವ್ಹಯ್,
ಪುಣ್ ಪತಿಣ್ ನ್ಹಂಯ್"
ತಶೆಂ ಮ್ಹಳ್ಯಾರ್? ಹಾಂವ್ ಹಾಂಕ್ರೆಲೊಂ" ಮಾಮ್ಮಿ ಕಿತ್ಯಾ ಚಾಕ್ರಿ ಕರ್ಚಿನಾ, ತಿ ಕಿತ್ಯಾ
ಹಾಂಗಾಂ ಯೇಂವ್ಕ್ ನಾ , ಹುಶಾರ್ ನಾಂಗಿ ಯಾ ಕಾಂಯ್ ರಗ್ಳೆ ಆಸಾತ್ಗಿ? ವಿಚಾರ್ಲೆಂ.
ತಿ ಹುಶಾರ್ ಆಸಾ, ಪುಣ್ ಹಾಂಗಾ ಯೆಂವ್ಚಿಂ ನಾಂ, ವ್ಹಯ್ ರಗ್ಳೆ ಆಸಾತ್; ಆಮ್ಕಾಂ
ಪುಣ್ ತಿಕಾ ನ್ಹಂಯ್, ತಿ ಮ್ಹಜಿ ಮಾಮ್ಮಿ ತರಿ ಆತಾಂ ತುಜಿ
ಪತಿಣ್ ನ್ಹಂಯ್..."
"ಕಿತೆಂ ಉಲಯ್ತಾಯ್ ತುಂ, ಮ್ಹಾಕಾ ಸಮ್ಜಾನಾ, ಸ್ವಷ್ಟ್
ಸಾಂಗ್, ತುಜಿ ಮಾಮ್ಮಿ ಆತಾಂ ಮ್ಹಜಿ ಪತಿಣ್ ನ್ಹಂಯ್ ಮ್ಹಳ್ಯಾರ್ ಕಿತೆಂ? "
ಹಾಂವ್ ಎಕ್ದಮ್ ಘಡ್ಬಡೊನ್ ಉಲಯ್ಲೊಂ.
"ಕಿತೆಂ ಮ್ಹಳ್ಯಾರ್ ತಿ ಆತಾಂ ದುಸ್ರ್ಯಾ ಸಂಗಿಂ ಜಿಯೆತಾ,
ಹಾಂವ್ ಪಾಂಚ್ ವರ್ಸಾಂಚಿಂ ಜಾವ್ನಾಸಾಂ ತಿ ಎಕಾ ಹಿಂದು ದಾದ್ಲ್ಯಾ
ಪಾಟ್ಲ್ಯಾನ್ ಗೆಲಿ, ದಿವ್ಳಾಂತ್ "ಕೈ ಪತ್ತಿ" ಕರುನ್ ತಾಚಿ
ಬಾಯ್ಲ್ ಜಾಲಿ, ಆತಾಂ ತಾಚಾ ಸಾಂಗಾಂತಾ ಜಿಯೆತಾ ಆನಿ ದೊಗಾಂ ಭುರ್ಗ್ಯಾಂಚಿ ಆವಯ್ ಜಾಲ್ಯಾ.
ಮ್ಹಾಕಾ ಆಪವ್ನ್ ವರುಂಕ್ ಆಯಿಲ್ಲಿ, ಆಬಾನ್ ಆನಿ ಮಾಂಯ್ನ್ ಇನ್ಕಾರ್ ಕೆಲೆಂ, ಆತಾಂ
ಹಾಂವ್ ಆಬಾ- ಮಾಂಯ್ ಸಂಗಿಂ ಆಸಾ, ಸಂತೊಸಾನ್ ಜಿಯೆತಾಂ...."
ಮ್ಹಾಕಾ ತಳ್ಮಾಟ್ಯಾಕ್ ಮಾರ್ಲೆಲ್ಯಾಬರಿ ಆಘಾತ್ ಜಾಲೊ, ಉಲಂವ್ಕ್ ಜಾಯ್ನಾತ್ಲೆಲ್ಯಾಬರಿ ಉಸ್ತುರೆಂ ಆಯ್ಲೆಂ ಆನಿ ಕಾಳ್ಜಾಕ್ ಧಖೊ
ಲಾಗ್ಲೆಲ್ಯಾ ಬರಿ ಲಾಚಾರ್ ಕೂಡ್ ಕಾಂಪೊಂಕ್ ಲಾಗ್ಲಿ. ಕಷ್ಟಾಂನಿ
ಹಾಂವೆಂ "ಹಾಂ!", ಮ್ಹಳೆಂ, ತಶೆಂ ಮ್ಹಳ್ಯಾರ್, ತಶೆ ಮ್ಹಳ್ಯಾರ್, ತಶೆಂ ಕಿತ್ಯಾ ಕೆಲೆಂ" ವಿಚಾರ್ಲೆಂ.
"ತಿಕಾ ಚರಾಬ್, ವೆಚೊ ಕಾಲ್ ಆನಿ ಕಿತೆ ಮ್ಹಣ್ಯೆತ್?" ಖೆಂವ್ಡಾಲಿ
ಮ್ಹಜಿ ಧುವ್ ಮ್ಹಾಕಾ ಪಾಂಚ್ ವರ್ಸಾಂ ಭರ್ತಾ ಪರ್ಯಾಂತ್
ಸಮಾಂ ಆಸ್ಲ್ಲಿ, ಘೊವ್ ತುಜೊ ಪಾಕಿಸ್ತಾನ್ ಜಯ್ಲಾಂತ್ ಆಸಾ ಖಂಯ್ -
ವೆಗ್ಗಿಂ ಸುಟೊನ್ ಪಾಟಿಂ ಯೆಂವ್ಚಾ ಖಾತಿರ್ ಆಮಿಂ ಮಾಗ್ತಾವ್"
ಮ್ಹಣ್ ವಳ್ಕಿಚಿಂ ಭುಜಾವಣ್ ಉಚಾರ್ತಾನಾ ರಡ್ತಾಲಿ, ಸದಾಂ ರಾತಿಂ
ಮಾಗ್ಣೆಂ ಮ್ಹಣ್ತಾನಾ ಆಬ್ ಮ್ಹಜೆಂ ಕರ್ನಾಂ "ಜೆಜು,
ಪಪ್ಪಾಕ್ ಬರ್ಯಾ ಭಲಾಯ್ಕೆಂತ್ ದವರ್, ವೆಗ್ಗಿಂಚ್ ಸುಟ್ಕಾ
ಲಾಭವ್ನ್ ಘರಾ ಧಾಡ್" ಮ್ಹಣೊಂಕ್ ಲಾಯ್ತಾನಾ
ವಿಳಾಪ್ ಕರ್ತಾಲಿ. ಸವ್ಕಾಸ್ ತೆಂ ಸರ್ವ್ ಬದಲ್ಲೆಂ, ಆಮ್ಚಾಂ ದೊಳ್ಯಾಂ
ಮುಖಾರ್ ತಿಚೊ ಜಿನೊಸ್ ಬದಲ್ಲೊ.
ಹಾಂವ್ ಪರ್ತ್ಯಾನ್ ಹಾಂಕ್ರೆಲೊಂ", ಜಿನೊಸ್ ಬದಲ್ಲೊ ಮ್ಹಳ್ಯಾರ್, ತಶೆಂ ಕಿತೆಂ ಜಾಲೆಂ?" ಮ್ಹಳೆಂ
"ತಿತ್ಲ್ಯಾರ್ ಹಾಂಗಾ ಸಗ್ಳ್ಯಾನ್ ಫಟಿ ಖಬಾರ್ ಪಾಸಾರ್ತಾಲಿ, ತುಂ
ಪಾಕಿಸ್ತಾನಾ ಜಯ್ಲಾಂತ್ ಆಸಾಯ್ ಮ್ಹಳ್ಳೊ ದುಬಾವ್
ಮಾತ್ರ್ ಖಂಯ್, ಮಿಲಿಟ್ರಿಕ್ಯಿ ಸಮಾ ಕಳಿತ್ ನಾಂ ಕಂಯ್, ತುಂ ಜೈಲಾಂತ್
ಮೆಲೊಯ್ ಜಾಂವ್ಕ್ ಪುರೊ ಕಂಯ್, ನಾಂ ಜಾಲ್ಯಾರ್ ತೀನ್ - ಚಾರ್
ವರ್ಸಾಂನಿ ಪಾಟಿಂ ಯೆತೊ ಆಸ್ಲ್ಲೊಯ್ ಕಂಯ್, ಪಾಂಚ್
ವರ್ಸಾಂ ಉಪ್ರಾಂತ್ ಮಾಮ್ಮಿಯ್ ತಶೆಂ ಉಲಂವ್ಕ್ ಲಾಗ್ಲಿ. ಆಬಾನ್
ಮಾಂಯ್ನ್ ತಿಚೆಂ ತೋಂಡ್ ದಾಂಪಯ್ಲೆಂ, ಅನಿಷ್ಟ್ ಉಲಯ್ನಾಕಾ
ಮ್ಹಣ್ ಧಮ್ಕಿ ದಿಲಿ, ಗಾಳಿ ಮಾರುನ್ ಬೆಂಡ್ಲೆಂ ಸಯ್ತ್, ತರಿ ತುಂ
ಮೆಲಾಯ್ ಮ್ಹಣ್ಚೆಂ ತಿಚೆಂ ಉಲವ್ಣೆಂ ಚಡ್ಚ್ ಜಾಲೆಂ."
ಮ್ಹಾಕಾ ಕಾಳ್ಜಾಕ್ ಕಸ್ಕ್ ಕರುನ್ ತೊಪ್ಲೆಲ್ಯಾ ಬರಿಂ ಬೊಗ್ಲೆಂ ಆನಿ ಕಷ್ಟಾಂನಿ "ಲೋಕ್ ಖಬ್ರೊ ಕರ್ತಾ,
ಮರ್ಯಾದ್ ಕಾಡ್ತಾ ಆನಿ ಸೊಭಾಯ್ ಪಳೆಯ್ತಾ ಮ್ಹಣ್ ತಿಂ ತಾಂಕಾ
ಪಾತ್ಯೆಲಿ ಕಿತ್ಯಾ" ಮ್ಹಳೆಂ.
"ಲೊಕಾಂಕ್ ಪಾತ್ಯೆಂವ್ಕ್ ನೀಬ್ ಜಾಯ್ ಆಸ್ಲ್ಲೆಂ, ತಶೆಂ ಜಾಲ್ಯಾರ್ ಬರೆಂ
ಮ್ಹಣ್ ಚಿಂತುಂಕ್ ಕಾರಣ್ ಆಸ್ಲ್ಲೆಂ, ತಿಕಾ ಧಯ್ರ್ ದೀಂವ್ಕ್ ಏಕ್ ದಿಗೊ ಮೆಳ್ಲ್ಲೊ, ಹಿಂದು ದಾದ್ಲ್ಯಾ ಕಡೆ ಇಷ್ಟಾಗತ್ ಜಾಲ್ಲಿ."
"ಆನಿ ತ್ಯಾ ವರ್ವಿಂ ಸತ್ತ್ಯಾನಾಸ್ ಜಾಲೆಂ" ಮ್ಹಣ್ ಹಾಂವ್
ಪುಸ್ಪುಸ್ಲೊಂ. "ತಿಕಾ ದುರ್ಸೊಂಕ್ ಜಾಯ್ನಾ. ತಿ ಸಂಪೂರ್ಣ್
ಮಾಪಾನ್ ಅಪ್ರಾಧಿ ನ್ಹಂಯ್, ಏಕ್ ಸ್ತ್ರೀಯೆಕ್ ಚಡಾವತ್ ಎಕಾ ದಾದ್ಲ್ಯಾಚೊ ಆಸ್ರೊ ಜಾಯ್
ಪಡ್ತಾ - ಜಿಣಿಯೆಂತ್ ತೃಪ್ತಿ ಆನಿ ಭದ್ರತಿ ಜೊಡುಂಕ್. ತಿಣೆಂ ತಶೆಂಚ್ ಕೆಲೆಂ. ಭೋವ್ಶಾ
ಪಾಂಚ್ ವರ್ಸಾಂ ಉತರ್ತಾನಾ ತಿ ಮ್ಹಜ್ಯಾ ಮೊರ್ನಾ ವಿಶಿಂ ಪಾತ್ಯೆಲಿ, ತಿಚಿ ಚೂಕ್
ನಾಂ"
"ಏಕ್ ಚೂಕ್ ಆಸಾ" ಸಟ್ಟ್ ಕರುನ್ ಉಡ್ಲೆಂ ಮ್ಹಜಿ ಧುವ್. "ತಿ ಏಕಾ
ಲೆಕಾನ್ ಅಪ್ರಾಧಿ ಜಾವ್ನಾಸಾ ತಿ ಪರ್ತ್ಯಾನ್ ಕಾಜಾರ್ ಜಾಲಿ ತರಿ, ಆತಾಂಯ್ ತುಜಿ
ಪತಿಣ್ ಮ್ಹಣ್ ಪೆನ್ಶನ್ ಕಾಣ್ಘೆತಾ..."
"ಹಾಂ!", ವ್ಹಯ್ ತೆ ಮಿಲಿಟ್ರಿ ಪೆನ್ಶನ್ ಹಾಂವ್ ಜಯ್ಲಾಂತ್ ಆಸ್ಲ್ಯಾರಿ ಭೂಸೇನಾಚೊ
ಸಾಂದೊ ಮ್ಹಣ್ ಸರ್ಕಾರಾನ್ ದಿಂವ್ಚೆಂ, ಮ್ಹಜ್ಯಾ ಕುಟ್ಮಾಕ್
ಪರಿಹಾರ್ ಜಾವ್ನ್ ಮೆಳ್ಚೆಂ. ಮಿಲಿಟ್ರಿಂತ್ ಪಂದ್ರಾ ವರ್ಸಾಂ ಜಾಲ್ಲ್ಯಾಂಕ್,
ಮೆಲ್ಲ್ಯಾಂಚಾ ಯಾ ಝುಜಾ ಕಯ್ದಿ ಜಾಲ್ಲ್ಯಾಂಚಾ ಕುಟ್ಮಾಚಾ
ಹಕ್ಕಾಚೆಂ. ಆತಾಂ ಹಾಂವ್ ಪಾಟಿಂ ಆಯ್ಲೊಂ, ಫುಡೆಂ ಪೆನ್ಶನ್
ಮ್ಹಾಕಾ ಮೆಳ್ತೆಲೆಂ, ತಿಚೆಂ ಬಂಧ್ ಜಾತೆಲೆಂ"
"ತೆಂ ಆತಾಂ ಪುಣಿ ಅನ್ಯೇಕ್ ಕಾಜಾರ್ ಜಾಲ್ಯಾ ಉಪ್ರಾಂತ್ ಯಾ
ಮಿಲಿಟಿ ಪೆನ್ಶನ್ ಕಾಣ್ಘೆವ್ನ್ ತಿಣೆಂ ಅಪ್ರಾಧ್ ಆಧಾರುಂಕ್ ನಾಂಗಿ? ತಿಕಾ ಶಿಕ್ಷಾ ಮೆಳಾಜಾಯಿಚ್" ಧುವ್ ರಾಗಿಷ್ಟ್ ದಿಸ್ಲಿ.
ರಾಗ್ ಖಂಡಿತ್ ಆಸ್ತಲೊ ಭೋವ್ಶಾ ಆತಾಂ ಖತ್ಕತ್ತಾಲೊ; ಎಕಾ ಕುಶಿನ್ ದಾಕ್ಟುಲ್ಯಾ ಆಪ್ಣಾಕ್
ಸಾಂಡುನ್ ಗೆಲ್ಲ್ಯಾ ಖಾತಿರ್ ದುಃಖ್ ಆನಿ ದುಸ್ರ್ಯಾ ಕುಶಿನ್ ಜೀವಂತ್
ಪಪ್ಪಾಕ್ ಮೊರ್ನಾಂತ್ ದಾಕಲ್ ಕೆಲ್ಲ್ಯಾಕ್ ಕ್ರೋಧ್ ಭರ್ಸಾತಾನಾ ಶಿಂತಿದ್ ಉಜ್ಯಾ ಆಗ್ಟೆಂ ಜಾಂವ್ಚೆಂಚ್.
ಪುಣ್ ಹಾಚಾ ಕಾಳ್ಜಾಂತ್ಲ್ಯಾ ಆಗ್ಟ್ಯಾಕ್ ಹಾಂವೆಂ ತೇಲ್
ವೊತುಂಕ್ ನಜೊ, ಉಜೊ ಜಬ್ಬೊರ್ ಜಾಲ್ಯಾರ್ ಹಗೆಂ ಜಲ್ಮೊನ್
ಹಾಚಿ ಜಿಣಿಂಚ್ ಪಾಡ್ ಜಾಯ್ತ್, ಮಯ್ಪಾಸಾ ಬದ್ಲಾ ಕಠೋರ್
ಸ್ವಭಾವ್ ರಾಜ್ ಕರಿತ್.
"ತಿಚೆಂ ಕರ್ಮ್ ತಿಕಾ ಮೆಳ್ತೆಲೆಂ ಪುತಾ, ಆಮಿಂ ಆಮ್ಚೆಂ
ಸಮಧಾನ್ ಪಾಳ್ಯಾಂ" ಮ್ಹಳೆಂ ಹಾಂವೆಂ. ತಿತ್ಲ್ಯಾರ್ ವ್ಹೊರಾಂ
ಸ ಜಾಂವ್ಕ್ ಜಾಲ್ಲಿಂ. ದೀಸ್ ಉಜ್ವಾಡೊನ್ ಯೆತಾಲೊ, ಧುವ್ ನಿತಳ್ ಜಾಂವ್ಕ್
ಭಿತರ್ ಗೆಲೆಂ ಆನಿ ಹಾಂವ್ ಮಿಲಿಟ್ರಿ ಸವಯೆ ಪರ್ಮಾಣೆಂ ಚಾ ಘೆವ್ನ್
ಬಸ್ಲೊಂ. ತೆಂ ಭಾಯ್ರ್ ಆಯ್ಲ್ಯಾ ಉಪ್ರಾಂತ್ ಹಾಂವ್ಯ್ ನಿತಳ್ ಜಾಲೊಂ ಆನಿ ತಾಚೆಂ
ಸಂಗಿಂ ರಿಕ್ಶಾ ಧರುಂಕ್ ಗೆಲೊಂ. ಪಡೀಲ್ ಜಂಕ್ಶನಾಲಾಗಿಂ ದೆಂವ್ತಾನಾಂ
ಪಂದ್ರಾ ರುಪಯ್ ಜಾಲೆಂ ಆನಿ ಆಪ್ಣೆಂ ಪಾಂಚ್ವೀಸ್ ರುಪಯ್ ಉರಯ್ಲೆ
ಮ್ಹಣ್ ಕಿಡ್ಕಿಡ್ಚಾ ಧುವೆಕ್ ಪಳೇವ್ನ್ ಹಾಂವ್ಯ್ ಸಂತೊಸ್
ಪಾವ್ಲೊಂ. ಥೊಡ್ಯಾ ವೆಳಾನ್ ಆಯಿಲ್ಲ್ಯಾ ಪುತ್ತುರ್ಚಾ
ಸರ್ಕಾರಿ ಬಸ್ಸಾಂತ್ ಬಸೊನ್ ಪಯ್ಣ್ ಕರ್ತಾನಾ, ಮಾರ್ಗಾಚಾ ರುಂದಾಯೆ
ಸವೆಂ ಸರ್ವ್ ಸಂಗ್ತಿಂ ಮ್ಹಳ್ಯಾರ್ ಜಾಗೆಂ- ಬಾಂದ್ಪಾಂ - ಪ್ರಕೃತಿ ಬದ್ಲೆಲ್ಯಾಬರಿಂ ಭೊಗ್ಲೆಂ, ಬಿ.ಸಿ. ರೋಡ್
ವ್ಹಡ್ಲ್ಯಾ ಪೆಂಟೆಂ ಬರಿ ಜಾಲ್ಲೆಂ ಆನಿ ಪಾಣೆಮಂಗ್ಳೂರ್ ರಸ್ತ್ಯಾ
ಸಾಂಕೊ ಉತರ್ತಾನಾ ನಂಯ್ ಎಕ್ದಮ್ ಭಾಗೆಟಿ ದಿಸ್ಲಿ, ಬಿರ್ಮತ್.
ವ್ಹಯ್, ವೀಸ್ ವರ್ಸಾಂ ಮ್ಹಳ್ಯಾರ್ ಲಾನ್ಸೊ ವಾಯ್ದೊ
ನ್ಹಂಯ್, ಸವ್ಕಾಸ್ ಜಾಲ್ಯಾರಿ ಬರ್ಪೂರ್ ಬದ್ಲಾವಣ್ ಕರ್ಚೊ ತೇಂಪ್, ತೆಂಯಿ
ವ್ಯಾಪಾರ್ - ಕೈಗಾರಿಕ್ ಜಿವಾಳ್ಚಾ ಮಂಗ್ಳುರ್ ಪ್ರದೇಶಾಂತ್.
ವೀಸ್ ವರ್ಸಾಂಚಾ ಲಾಂಬ್ ಆವ್ದೆಕ್ ಹಾಂವ್ ಹ್ಯಾ ಸೊಬಿತ್ ಆನಿ ಫುಲೊರಿ ಕರಾವಳಿ ಥಾವ್ನ್
ವಂಚಿತ್ ಜಾಲ್ಲೊಂ, ಖಂಯ್ಚಾಗಿ ಬಿಳಾಂತ್ ಸರಳಾಂ ಪಾಟ್ಲ್ಯಾನ್ ಉಸ್ವಾಸ್ ಕಾಡ್ತಾಲೊಂ,
ವಾಂಚ್ತಾಲೊಂ ಫಕತ್ತ್ ಎಕಾ ಭರ್ವಶ್ಯಾನ್; ಎಕಾ ದಿಸಾ ಪುಣಿಂ
ಪಾಟಿಂ ಯೆಂವ್ಚೆಂ ಭಾಗ್ ಲಾಭ್ತೆಲೆಂ ಮ್ಹಳ್ಳ್ಯಾ ಅತ್ರೆಗಾನ್.
ವೀಸ್ ವರ್ಸಾಂ ಆದಿಂ ಮ್ಹಜ್ಯಾ ಫುಡ್ಲದ್ ಬಾಳಾಚಾ ವೊಲಾಕ್ ಆಯಿಲ್ಲೊಂ, ತಾಕಾ
ಶೆಂಬರ್ ಉಮೆ ದೀವ್ನ್ ಆನಿ ವ್ಹೊಕ್ಲೆಚ್ಯಾ ಹಾತಿಂ ಒಪ್ಸುನ್
ಪಾಟಿಂ ಅಮ್ರತ್ಸರ್ ಮಿಲಿಟ್ರಿ ಕೇಂಪಾಕ್ ಪಾಟಿಂ ಗೆಲ್ಲೊಂ. ಫುಡ್ಲ್ಯಾ
ವರ್ಸಾಂ ದೋನ್ ಮಹಿನ್ಯಾಚಾ ರಜೆರ್ ಯೇವ್ನ್ ತಾಕಾ
ವ್ಹಾವಂವ್ಚಾ - ಖೆಳಂವ್ಚಾ ಆಶೆನ್.
ಪುಣ್ ಕೇಂಪಾಕ್ ಪಾವ್ಲೆಲ್ಯಾ ದುಸ್ರ್ಯಾ ಮಹಿನ್ಯಾಂತ್, ಮ್ಹಳ್ಯಾರ್
1984 ಒಕ್ಟೋಬರ್
31
ವೆರ್ ಡೆಲ್ಲಿಂತ್ ಪ್ರಧಾನಿ ಇಂಧಿರಾಗಾಂಧಿಚಿ ಖುನಿ ಜಾಲಿ ಆನಿ ಬಡ್ಗಾ ಭಾರತಾಂತ್ ಹಿಂಸಾಚಾರ್ ಅಶಿಸ್ತ್ ರಾಜ್ ಕರಿಲಾಗ್ಲಿ. ತಸಲ್ಯಾ ರಾಜಕೀಯ್ ಗೊಂದೊಳಾಚೊ ಫಾಯ್ದೊ ಘೆವ್ನ್
ಪಾಕಿಸ್ತಾನ್ ಕಾಶ್ಮೀರ್ - ಪಂಜಾಬ್ - ರಾಜಸ್ತಾನ್ ಗಡಿರ್ ಪಾರೊತ್
ಮಾಂಡಿಜಾಯ್ ಮ್ಹಳ್ಳಿ ಹುಕುಮ್ ಆಯ್ಲಿ. ತಿತ್ಲೆಂಚ್, ರಾತಾರಾತ್ ಆಮ್ಚಾಂ ಕಂಪೆನಿನ್
ಪೊಟ್ಲಿ ಭಾಂದ್ಲಿಂ, ಮಿಲಿಟ್ರಿ ಗಾಡಿಯೆನಿಂ ಸಾಮಾನ್ ಭರ್ಲೊ ಆನಿ
ಪನ್ನಾಸ್ ವಾಹನಾಂಚೊ ಪುರ್ಶಾಂವ್ ಬಾಂದುನ್ ಕಾಶ್ಮೀರಾಂತ್
ಪಾಕಿಸ್ತಾನಿ ಗಡಿರ್ ಆಸ್ಚಾ ಪೂಂಚ್ ವಿಭಾಗಾಚಿ ವಾಟ್ ಧರ್ಲಿ, ಭಾರಿಚ್ ಧಯ್ರಾಚಿ
ನಿಶ್ಟಾ ಉಸವ್ನ್.
ಅಮ್ರತಸರಾ ಥಾವ್ನ್ ಭಾಯ್ರ್ ಸರ್ತಾನಾ, "ಪಾರೊತಾಚಿ ಜವಾಬ್ದಾರಿ
ಲಾಂಬ್ ಆವ್ದೆಚಿ ನ್ಹಂಯ್, ಚಡ್ ಮ್ಹಳ್ಯಾರ್ ದೋನ್ ಮಹಿನ್ಯಾನಿ
ಸಂಪತ್ ಮ್ಹಳ್ಳೆಂ ಆಮ್ಚಾಂ ಆಡಳ್ತ್ಯಾ ಅಧಿಕಾರಿನ್. ದೆಕುನ್
ಪೂಂಚ್ ಗಡಿರ್ ತಂಬು ಮಾರ್ತಾನಾ ಆನಿ ದೀಸ್ - ರಾತ್ ಗಸ್ತಿ ಚಲಯ್ತಾನಾ ಆಮಿಂ " ಆನಿ ಥೊಡೆ
ದೀಸ್" ಮ್ಹಳ್ಳ್ಯಾ ಚಿಂತಾನ್ ಆನಿ ಉರ್ಭೆಸ್ತ್ ಥರಾನ್ ಚಲ್ಲ್ಯಾಂವ್. ತ್ಯಾ ಶಿವಾಯ್ ಹೆಲಿಕೊಪ್ಟರಾಂ ಆಮ್ಚಿಂ ಕಾಗ್ದಾಂ
ವ್ಹರ್ತಾಲಿಂ ಗಾಂವಾಂ ಥಾವ್ನ್ ಆಯಿಲ್ಲಿಂ ಸದಾಂ ಹಾಡ್ತಾಲಿಂ ಜಾಲ್ಲ್ಯಾನ್ ಕುಟ್ಮಾಕಡೆಂ ಆಮ್ಚೆಂ
ಸಂಪರ್ಕ್ ಜಿವಾಳ್ ಆಸ್ಲ್ಲೊ, ದೇಶ್ ಪ್ರೇಮಾನ್ ಆಮ್ಚೊ
ಪಾರೊತ್ ಉಂಚ್ಲ್ಯಾ ಮಟ್ಟಾನ್ ಚಲ್ತಾಲೊ ಆನಿ ಖೆಳಾಂನಿ -
ಪಟ್ಟಾಂಗಾನಿಂ ವೇಳ್ ಬರೊ ಪಾಶಾರ್ ಜಾತಾಲೊ. ಆಮಿಂ ಭಾರಿಚ್ಚ್ ಅತ್ರೆಗಾನ್
ಪಾರೊತ್ ಬಂಧ್ ಜಾಂವ್ಚಾ ಘಡಿಯೆಕ್ ರಾಕ್ತೆಲ್ಯಾಂವ್.
ಗಡಿರ್ ತುರ್ತ್ ಪರಿಗತಿಚೊ ಪಾರೊತ್ ಬಂಧ್ ಜಾಂವ್ಚಾ ಆದಿಂಚ್
ಹಾಂವ್ ಚಿಂತಿನಾತ್ಲೆಲ್ಯಾ ರಿತಿನ್ ಪಾಕಿಸ್ತಾನಿ ಸೊಜೆರಾಂಚಾ ಹಾತಿಂ ಶಿರ್ಕಾಲೊಂ ಆನಿ ಜಯ್ಲಾಂತ್ ಬಂಧ್ ಜಾಲೊಂ.
ಪೂಂಚ್ ಗಡಿರ್ ಗುಡ್ಯಾ ಪ್ರದೇಶಾಂತ್ ಆಮ್ಚಾ ಮಿಲಿಟ್ರಿನ್
ನೆಟಯಿಲ್ಲ್ಯಾ ಕಾಂಟ್ಯಾ ಸರಿಯಾಂಚಾ ಪಾಗೊರಾ ಹೆವ್ಶಿನ್ ಆಮಿಂ ಗಸ್ತಿ ಚಲಯ್ತೆಲ್ಯಾಂವ್. ಆಮಿಂ ಮ್ಹಳ್ಯಾರ್ ಎಕಾ
ಸುಬೇದರಾಖಾಲ್ ಸ ಸೊಜೆರಾಂಚೊ ಪಂಗಡ್ ಹಾತಿಂ ಎಕಾ ೫೬ ರಾಯ್ಫಲಾಂ ಘೆವ್ನ್ ಆನಿ ಝುಜಾ
ನೆಸೊಣ್ ಘಾಲುನ್ ಆಮಿಂ ಸಾಲಾನ್ ಚಡೊನ್ - ದೆಂವೊನ್ ಚಲ್ತಾಲ್ಯಾಂವ್. ರಾತ್ ಜಾಲ್ಲ್ಯಾನ್
ಮುಖ್ಲ್ಯಾನ್ ಚಲ್ಚೊ ಸುಬೆದಾರ್ ಟೋರ್ಚ್ ಉಸವ್ನ್ ಆನಿ
ಹೆಣೆಂ - ತೆಣೆಂ ಉಜ್ವಾಡ್ ಫಾಂಕವ್ನ್ ದೀಷ್ಟ್ ಘಾಲ್ತಾಲೊ. ಗಸ್ತೆವೆಳಾ ಕಾಂಟ್ಯಾ
ಸರಿಯಾಂಲಾಗಿಂ ಭಾರಿಚ್ ಗರ್ಜೆಚಿ ಸಂಗತ್ ತಿ, ಕಿತ್ಯಾ ವ್ಹಯ್ರ್ -
ಸಕಯ್ಲ್ ಜಾಗೊ ಜಾಲ್ಲ್ಯಾನ್ ಸರಿಯಾಂ ಪಂದ್ಲ್ಯಾನ್ ಧರ್ಣ್
ಪೊಕರ್ನ್ ಆಕಾಂತ್ವಾದಿಂ ಬಿತರ್ ರಿಗ್ಚಿ ಘಡಿತಾಂ ಆಸ್ಲ್ಲಿಂ. ರಾತ್ಚಾ ವೆಳಿಂ ಖಂಯ್ಪುಣಿಂ ಕಿತೆಂಯ್ ಘಡುಂಕ್
ಸಾಧ್ಯ್ ಆಸ್ಲ್ಲೆಂ.
ಚಲ್ಚೊ ಸುಬೆದಾರ್ ಎಕಚ್ಛಾಣೆಂ ರಾವ್ಲೊ, ಏಕ್ ಘಡಿ ಕಾಂಟ್ಯಾ
ಸರಿಯೆ ತೆವ್ಶಿಂ ಉಜ್ವಾಡ್ ಫಾಂಕವ್ನ್ ದುಸ್ರ್ಯಾ ಘಡಿಯೆ "ನೀಚೆ"
ಮ್ಹಣ್ ಹುಕುಮ್ ದೀವ್ನ್ ದರ್ಣಿರ್ ಪಡ್ಲೊ. ತಾಚಾ
ಪಾಟ್ಲ್ಯಾನ್ ಪಡ್ಲೆಲ್ಯಾ ಆಮ್ಕಾಂ ತಾಣೆಂ ಕಾಂಟ್ಯಾ ಸರಿಯೆ
ಪಂದಾ ಪೊಕೊರ್ಲೆಲಿ ಧರ್ಣ್ ದಾಕಯ್ಲಿ ಆನಿ "ನಝ್ದಿಕ್ ಕೊಯಿ
ಹೊ ಸಕ್ತಾ ಹೆ (ಲಾಗಿಂ ಕೊಣಿಂ ಆಸೊಂಕ್ ಪುರೊ)" ಮ್ಹಣ್ಚಿ ಚತ್ರಾಯ್
ಪಾಟಯ್ಲಿ. ಪಾಂಚ್ ಮಿನುಟಾಂ ಆಮಿಂ ಆಡ್ ಪಡೊನ್ ಪಾಶಾರ್ ಕೆಲಿಂ, ಜಾಗ್ಮಾಗ್
ನಾತ್ಲ್ಲಿ ಪಳೆವ್ನ್ ಸುಬೆದಾರಾನ್ ಮ್ಹಾಕಾ ತಿಕ್ಕೆಂ ಲಾಗಿಂ
ವಚೊನ್ ದೀಷ್ಟ್ ಲಾಂವ್ಕ್ ಫರ್ಮಾಯ್ಲೆಂ. ಆನಿ ಹಾಂವ್
ಪೋಟ್ ವೊಡಿತ್ ಮುಖಾರ್ ಸರ್ತಾನಾ ತೆವ್ಶಿನ್ ಕಿತೆಂಗಿ ಚರ್ಲೆಲ್ಯಾಬರಿ ಜಾಲೆಂ.
ಹಾಂವೆಂ ತಕ್ಶಣ್ "ಸಾವಧಾನ್, ಕೊಯಿ ಹೈ!" ಮ್ಹಣ್
ಬೊಬಾಟ್ತಾನಾ ಏಕ್ ಗ್ರೇನೆಡ್ ಉಭೊನ್ ಆಯ್ಲೊ.
ಗ್ರೇನೆಡ್(ಹಾತ್ ಬೋಂಬ್) ವಯ್ರ್ ಆಸೆಲ್ಯಾ ಮಧೆಂ ಫುಟ್ಲೊ ಆನಿ
ಸಕಯ್ಲ್ ಆಸ್ಲೆಲ್ಯಾ ಮ್ಹಾಕಾ ಸಯ್ರ್-ಭಯ್ರ್ ಕರುಂಕ್
ಪಾವ್ಲೊ. ದುಸ್ರ್ಯಾ ಘಡಿಯೆ ಪೊಕರ್ಲೆಲ್ಯಾ ಇಡ್ಯಾಂತ್ಲ್ಯಾನ್
ಭಿತರ್ ಸರ್ಚಾ ತೆಗಾಂ - ಚೊವ್ಗಾಂಕ್ ಹಾಂವೆಂ ಅಸ್ವಷ್ಟ್ ದೆಕ್ಲೆಂ, ಥೊಡೆಂ
ವಯ್ರ್ ಚಡೊನ್ ರಾಯ್ಫಾಲಾಂ ಆರಾಯ್ತಾನಾ ಎಕ್ಲೊ ಮ್ಹಜೆಂ
ಪಾಂಯ್ ಧರುನ್ ವೊಡೀತ್ ತ್ಯಾ ಇಡ್ಯಾಂತ್ಲ್ಯಾನ್ ತೆವ್ಶಿನ್ ಗೆಲೊ.
ಮೆಂದ್ವಾ ಆಘಾತಾನ್ ಹಾಂವ್ ಲ್ಹಾನ್ ಭುರ್ಗ್ಯಾಬರಿಂ "ಮುಜೆ ಚೋಡೊ, ಚೋಡೋ"
ಮ್ಹಣ್ ಹುಳ್ವುಳ್ತಾನಾ ತಾಣೆಂ ಮ್ಹಜ್ಯಾ ಕುಸುಳಾಕ್ ಖೊಟ್ ಘಾಲಿ,
ಮ್ಹಾಕಾ ಮತಿಹೀನ್ ಕೆಲೊ. ಪರ್ತ್ಯಾನ್ ಮತಿರ್ ಯೆತಾನಾ
ಹಾಂವ್ ಸಭಾರಾಂಸಂಗಿಂ ಸರಳಾಂ ಪಾಟ್ಲ್ಯಾನ್ ಆಸ್ಲ್ಲೊಂ ಆನಿ ಎಕಾ
ಮುಲ್ಯಾಂತ್ ಗುಟ್ಲಿ ಜಾವ್ನ್ ಪಡ್ಲ್ಲೊಂ, ಮ್ಹಜ್ಯಾ ಭೊಂವ್ತಿಂ
ಬಸಲ್ಲೆ ಹಿಂದಿ ಉಲಯ್ತಾಲೆ.
ತ್ಯಾ ರಿತಿನ್ ಹಾಂವ್ ತೀಸ್ ವರ್ಸಾಂಚೊ ಪುತ್ತೂರ್ಚೊ ಮರ್ವಿನ್ ಪಿಂಟೊ, ಭೂಸೇನಾಚಾ ಗ್ರನೆಡಿಯರ್ ವಿಭಾಗಾಂತ್ಲೊ
ನಾಯಕ್, ಚಿಂತಿನಾತ್ಲೆಲ್ಯಾ ಥರಾನ್ ಪಾಕಿಸ್ತಾನ್ ಜಯ್ಲಾಂತ್ ಶಿರ್ಕಾಲ್ಲೊಂ.!
ಜಯ್ಲಾಂತ್ಲಿ ಜಿಣಿ ಎಕ್ದಮ್ ಕಷ್ಟಾಂಚಿ ಜಾವ್ನಾಸ್ಲಿ, ಸದಾಂನೀತ್ ವಿಚಾರಣ್ -
ಮಾರ್ - ಗಾಳಿ ಸರ್ವ್ ಮಿಲಿಟ್ರಿ ಘುಟ್ ಜಾಣಾಂ ಜಾಂವ್ಚಾ ಖಾತಿರ್ ಕುಡಿಕ್ ಧಣ್ಸಿತಾನಾ
ಮತಿಂತ್ ಏಕ್ ಆಶಾ ಜಿವಾಳ್ ಆಶ್ಲಿ. ಎಕಾ ದಿಸಾ ಹೆ ವಳ್ವಳೆ ಸಂಪ್ತೆಲೆಂ, ಆಮ್ಚೆಂ ಭೂಸೇನಾ
ಮ್ಹಜಿ ಸೊಧ್ನಾಂ ಚಲವ್ನ್ ಹ್ಯಾ ಜಯ್ಲಾ ವಿಶಿಂ ಜಾಣಾಂ ಜಾತೆಲೆಂ ಆನಿ ತುರ್ತಾನ್
ಮ್ಹಾಕಾ ಸುಟ್ಕಾ ದಿಂವ್ಚೆಂ ಕಾರ್ಯೆಂ ರುತಾ ಜಾತೆಲೆಂ. ತ್ಯಾ ಎಕಾ ಜಿವಾಳ್ ಕಿರ್ಣಾ
ವರ್ವಿಂ ಹಾಂವ್ ಕೂಡ್ ಆನಿ ಮತ್ ಸಾರ್ಕ್ಯಾ ಪರಿಧೆ ಬಿತರ್ ಆನಿ ಭಲಾಯ್ಕೆಚಾ
ಪಾಂವ್ಡಾ ವಯ್ರ್ ಉರಂವ್ಕ್ ಸಕ್ಲೊಂ. ಪುಣ್ ವೆಗ್ಗಿಂಚ್
ಸುಟ್ಕಾ ಲಾಭ್ತೆಲಿ ಮ್ಹಣ್ಚೊ ಭರ್ವಸೊ ಸವ್ಕಾಸ್ ನಿಂವ್ಲೊ,
ಮ್ಹಜೆ ಸಂಗಿಂ ಭಾರತೀಯ್ ಭೂಸೇನಾಚೆ ಸಬಾರ್ ಆಸಲ್ಲೆ, ಥೊಡೆ
1971
ಬಾಂಗ್ಲಾ ಝುಜಾವೆಳಿಂ ಶಿರ್ಕಾಲ್ಲೆ ಆನಿ ಥೊಡೆಂ ರಾಜಸ್ತಾನ್ - ಕಾಶ್ಮೀರ್ ಗಡಿಕ್ ಕಯ್ದಿ ಜಾಲ್ಲೆ. ಆಬ್ಳೆ! ತಾಂಚೆಂ
ಪಯ್ಕಿ ಸಬಾರ್ ಶಿಂತಿದ್ ಹೊಗ್ಡಾವ್ನ್ಯ್ ಆಸ್ಲೆ!
ಆನಿ ತಾಂಚೆಂ ಮಧೆಂ ಹಾಂವ್ಯ್ ಕಯ್ದಿ ಜಾವ್ನ್ ಉರ್ಲೊಂ -
ಸುಮಾರ್ ವೀಸ್ ವರ್ಸಾಂ, ವಳ್ವಳೆ - ಕಳ್ವಳೆ ಆಶ್ಲ್ಯಾರಿ ಕುಟ್ಮಾ ದಾರಾಂಚೊ ಉಡಾಸ್ ಕಾಡೂನ್,
ಮ್ಹಜೆಂ ಬಾಳ್ ಕಶೆಂ ವಾಡ್ಲಾಂಗಿ ಮ್ಹಳ್ಳೆಂ ಚಿಂತುನ್, ಮ್ಹಜಿ
ಪತಿಣ್ ಕಿತ್ಲಿ ರಡ್ತಾಗಿ ಮ್ಹಣ್ ದುಃಖ್ ಪಾವೊನ್ ಆನಿ ಮ್ಹಜ್ಯಾ
ವ್ಹಡಿಲಾಂಕ್ ಆಧಾರ್ ದಿತಾ ಕೋಣ್ ಮ್ಹಣ್ಚಿ ಖಂತ್ ಕರುನ್.
ಪುಣ್ ಹಾಂವ್ ರಾವ್ಲೊಂ ವ್ಹಡಾ ಭರ್ವಾಶ್ಯಾನ್, ಎಕಾ
ದಿಸಾ ಪುಣಿ ಸುಟ್ಕಾ ಲಾಭ್ತೆಲಿ ಮ್ಹಣ್ ಚಿಂತ್ನಾನ್, ಗಾಂವಾಕ್
ಪಾವ್ತಾಲೊಂ, ಕುಟ್ಮಾ ಸಂಗಿಂ ಎಕ್ವಟ್ತೊಲೊಂ ಮ್ಹಳ್ಳ್ಯಾ ಅತ್ರೆಗಾನ್ ಆನಿ ಖಂಡಿತ್ ಥರಾನ್ ಭಲಾಯ್ಕಿ ಸಾಂಬಾಳುನ್, ಶಿಂತಿದ್
ಸಾರ್ಕಿ ದವರುನ್.
ಹೆವ್ಶಿಲ್ಯಾ ತೀನ್ - ಚಾರ್ ವರ್ಸಾಂನಿ ಭಾರತ್ - ಪಾಕಿಸ್ತಾನಿ
ಮ್ಹಧೆಂ ಶಾಂತಿ ಸಂವಾಂದ್ ಚಲೊನ್ ಆಸಾ ಆನಿ ತ್ಯಾ ವರ್ವಿಂ ಗಡಿವಿವಾದ್ - ಕಾಶ್ಮೀರ್ ರಗ್ಳೆ
ಸಂಪ್ತೆಲೆ ಮ್ಹಣ್ ಆಮಿಂ ಆಯ್ಕಾಲ್ಲೆಂ. ತ್ಯಾ ಪರ್ಮಾಣೆಂಚ್ ಭಾರತೀಯ್
ಪ್ರತಿನಿಧಿ ಪಾಕಿಸ್ತಾನಾಕ್ ಆಯಿಲ್ಲೆ, ಸಂವಾದ್ - ಸೊಲ್ಲೊ ರಚ್ಲೆಲ್ಯಾ ಬರಿಚ್
ವೆವೆಗ್ಳ್ಯಾ ಜಯ್ಲಾಂತ್ ಬೆಟ್ ದೀವ್ನ್ ಭಾರತೀಯ್ ಕಯ್ದಿಂಚಾ
ಸುಟ್ಕಾಕ್ ಕಾರಣ್ ಜಾಲೆಂ ಮ್ಹಣ್ಚೆಂಯ್ ಆಯ್ಕಾತಾಲೆಂ.
ಪುಣ್ ಆಮ್ಚಾ ಜಯ್ಲಾಕ್ ಕೋಣಿ ಭೆಟ್ ದೀತ್, ಕೆದಳಾ ಆಮ್ಕಾಂ
ಸುಟ್ಕಾ ಲಾಭಾತ್ ಮ್ಹಣ್ ಆಶೆವ್ನ್ ಆಸ್ತಾನಾ ಅಗೋಸ್ತ್
14
ಪಾಕಿಸ್ತಾನ್ ಸ್ವತಂತ್ರ್ ದಿಸಾ ಪನ್ನಾಸ್ ಝುಜಾ ಕಯ್ದಿಂಕ್
ಸುಟ್ಕಾ ದೀಂವ್ಕ್ ಪಾಕಿಸ್ತಾನ್ ಒಪ್ಲಾಂ ಮ್ಹಳ್ಳಿ ಸಂತೊಸಾಚಿ ಖಬಾರ್ ಆಯಿಲ್ಲಿ.
ತ್ಯಾ ಪನ್ನಾಸ್ ಕಯ್ದಿಂ ಪಯ್ಕಿ ಭಾಗಿ ಹಾಂವ್ ಎಕ್ಲೊಂ ಜಾಂವ್ಕ್
ಪಾವ್ಲೊಂ; ಜಯ್ಲಾ ಥಾವ್ನ್ ಪಂಜಾಬಾಚಾ ವಾಘಾ ಗೆಟಿಂತ್ಲ್ಯಾನ್ ಭಾರತಾಕ್, ಥಂಯ್ ಥಾವ್ನ್ ಆಮ್ರತ್ಸರ್ ಕೇಂಪಾಕ್, ಉಪ್ರಾಂತ್ ಢೆಲ್ಲಿ ಭೂಸೇನಾ ಕೇಂದ್ರಾಕ್ ಆನಿ ಥಂಯ್ಸರ್ ವಿಚಾರಣ್,
ಲೇಖ್ ಆನಿ ಸಲಹಾ - ಹಿಶಾರೊ ಘೆವ್ನ್, ನಿವ್ರತ್ತಿ ಕರುನ್
ಪೆನ್ಶನ್ ದೀವ್ನ್ ಸರ್ವಾಂಕ್ ಆಪಾಪ್ಲ್ಯಾ ಮಾಂಯ್ಗಾವಾಕ್.
ಹಾಂವ್ ಡೆಲ್ಲಿ ಥಾವ್ನ್ ಪತಿಣೆಕ್ ಕಾಗಾದ್ ಬರವ್ನ್, ತಸ್ವೀರ್ ಲಕವ್ನ್ ಗಜಾಲ್ ಕಳಯಿಲ್ಲಿ ಆನಿ ಧುವೆನ್ ತೆಂ
ಪತ್ರ್ ಘೆವ್ನ್ ವಾಚುನ್ ಮ್ಹಾಕಾ ಮುಕಾರ್ ಮೆಳೊಂಕ್ ಯೆಂವ್ಚೊ ನಿಚೆವ್ ಕೆಲ್ಲೊ.
ಪುತ್ತೂರ್ಚಾ ಬಸಾಂತ್ ಬಸೊನ್ ಆಮಿಂ ಪೆಂಟೆಂಕ್ ಪಾವ್ಲ್ಯಾಂವ್ ಆನಿ ಥಂಯ್ಸರ್ ರಿಕ್ಶಾ ಧರುನ್ ಘರಾ ಗೆಲ್ಯಾಂವ್.
ಹಾಂವ್ ಮೆಟಾಂ ಚಡ್ತಾನಾ ಪ್ರಾಯೆಸ್ತ್ ಬಾಪಯ್ ಮ್ಹಜೊ ಕುಡ್ಕ್ಯಾ ಉತ್ರಾಂನಿ
ಸ್ವಾಗತ್ ಕರುನ್ ರಡ್ಲೊ ಆನಿ ಆವಯ್ ವೇಂಗ್ ಮಾರುನ್
ವಿಳಾಪ್ ಕರಿಲಾಗ್ಲಿ. ಮ್ಹಜ್ಯಾ ಅಸ್ಕತ್ - ಲಾಚಾರ್ ಕುಡಿ ವ್ಹಯ್ರ್
ದೀಷ್ಟ್ ಘಾಲುನ್ ತಾಂಚೆಂ ರುದಾನ್ ಚಡ್ತಾನಾ ಧುವೆನ್ಂಚ್ ತಾಂಕಾಂ ಸಾಂಬಾಳ್ಳೆಂ ಆನಿ "ಪಪ್ಪಾಚಿ ಚಾಕ್ರಿ ಕರ್ಯಾಂ, ತಾಚಿ ಭಲಾಯ್ಕಿ
ಪಾಟಿಂ ಜೊಡ್ಯಾಂ ಆನಿ ಹ್ಯಾ ಫುಡೆಂ ಸಂತೊಸಾನ್ ಸಾಂಗಾಂತಾ ಜಿಯೆಂವ್ಯಾಂ"
ಮ್ಹಣ್ ಧಯ್ರ್ ದೀಲಾಗ್ಲೆಂ.
ಸಾಂಜೆರ್ ಹಾಂವೆಂ ಬಾಬಾಕ್ ಮಾಂಯ್ಕ್ ಆನಿ ಧುವೆಕ್ ಲಾಗಿಂ
ಬಸವ್ನ್ ಫುಡೆಂ ಆಮ್ಚೆಂ ದೀಸ್ ಬರ್ಯಾನ್ ಚಲ್ಚಾ ವಿಶಿಂ,
ಮ್ಹಾಕಾ ಮಹಿನ್ಯಾವಾರ್ ಮೆಳ್ಚಾ ಚಾರ್ ಹಜಾರ್ ರುಪ್ಯಾಂಚಾ
ಪೆನ್ಶನಾವಿಶಿಂ ಭೂಸೇನಾನ್ ಮ್ಹಾಕಾ ಬೆಟಯಿಲ್ಲ್ಯಾ ಧಾ
ಲಾಖ್ ಪರಿಹಾರಾ ವಿಶಿಂ ಸವಿಸ್ತಾರ್ ರಿತಿನ್ ಕಳಯಿಲ್ಲೆಂ. ನಿಮಾಣೆಂ
ಸವ್ಕಾಸ್ ಮ್ಹಜ್ಯಾ ಪತಿಣೆಚಿ ಖಭಾರ್ಯಿ ವಿಚಾರ್ಲಿ, ಸಂಯಮಾನ್.
ತಿತ್ಲೆಂಚ್ ಎಕಾಚ್ಫರಾ ಉತ್ರಾಂ ಫಾಸಾಳ್ಳಿಂ, ಘಡ್ಘಡೊ ಮಾರ್ಲೊ ಆನಿ ಆವಾಜ್ ಫುಟ್ಲೊ.
"ತ್ಯಾ ದಳ್ದಿರ್ ಸ್ತ್ರೀಯೆವಿಶಿಂ ಆಮಿಂ ಉಲಂವ್ಚೆಂ ನಾಕಾ" ಮ್ಹಳೆಂ ಧುವೆನ್.
"ತಿಚೆಂ ಕರ್ಮ್ ಆತಾಂ ವಾಡಿ ಸಮೇತ್ ಉಬೆಂ ಜಾಲಾಂ" ಉಚಾರ್ಲೆಂ
ಬಾಬಾನ್ ಆನಿ "ದೆವಾನ್ ತಾಚಾ ಪಾತ್ಕಾಕ್ ಫಾವೊತಿ ಶಿಕ್ಶಾ
ದಿಲ್ಯಾ" ಪಾಚಾರ್ಲೆಂ ಮಾಂಯ್ನ್. ಪರ್ತ್ಯಾನ್ ಪರ್ತ್ಯಾನ್ ವಿಚಾರ್ತಾನಾ ಗಜಾಲ್
ಸವ್ಕಾಸ್ ಭಾಯ್ರ್ ಆಯ್ಲಿ : ತಿಕಾ ಫುಸ್ಲಾವ್ನ್ ವೆಲ್ಲೊ ತಿಕಾ
ಪಾಡಾರಿ ಜಾವ್ನ್ ಆಸ್ಲ್ಲೊ, ತಾಣೆಂ ಆಪ್ಲ್ಯಾ ಖರ್ಯಾ ಮಸ್ತೆಚಿ
ಲೈಂಗಿಕ್ ಪಿಡಾ ತಿಕಾ ದಿಲ್ಲಿ ಆನಿ ಸವ್ಕಾಸ್ ಪಿಡಾ ಬಳ್ ಜಾವ್ನ್ ಆತಾಂ ತಿಂ ಕಂಕ್ನಾಡಿ ಆಸ್ಪತ್ರೆಂತ್ ಆಸಾ.
ಆನಿ ತಿ ಗೂಣ್ ಜಾಂವ್ಚಿನಾ, ಕೂಡ್ ಕರ್ಗೊನ್ ಮೊರ್ನಾಚಾ ತಡಿರ್ ಆಸಾ ಮ್ಹಳ್ಳೆಂ
ಸಮ್ಜೊನ್ ಹಾಂವ್ ತಿಕಾ ಭೆಟ್ ದೀಂವ್ಕ್ ಚಿಂತ್ಲೆಂ. ಕ್ರಿಸ್ತಾಂವ್ಪಣಾಚಾ ತತ್ವಾ ಫರ್ಮಾಣೆಂ ಭಗ್ಸುಂಕ್ ಆನಿ ಭುಜಂವ್ಕ್.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
