ಕವಿತಾकविताPoem
[ಹಾಂತುಂ ಇನಾಮಾಂ ಜಿಕ್ಲ್ಲಿಂ ಕವಿತಾ]
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ದಾಯ್ಜ್ ಕವಿತಾ ಸ್ಪರ್ಧೊ 2005 ಹಾಂತುಂ ಇನಾಮಾಂ ಜಿಕ್ಲ್ಲಿಂ ಕವಿತಾ"
ಎಚ್ಚೆಮ್, ಮುಂಬಯ್
[ಪಯ್ಲೆಂ ಇನಾಮ್]
[ರುಪಯ್ 5000]
ಮಾತ್ಯೆಚೆಂ ರುದಾನ್
ಫಾಂತ್ಯಾಫಾರಾಚಾ ದೊವಾ ಥೆಂಬ್ಯಾಕ್ ಮಾತಿ ಮ್ಹಣ್ತಾ
ಗರ್ಭಾಂತ್ ಮ್ಹಜ್ಯಾ ಉದ್ಕಾ ಥೆಂಬೊ ರಗಾತ್ ಜಾತಾ
ಖಳಾನಾಸ್ತಾನಾ ಮಾಗ್ತಾಂ ಸುರ್ಯಾ ದೆವಾಕ್ ಸದಾಂ
ಕುಸ್ವೇಕ್ ಮ್ಹಜ್ಯಾ ಉಸ್ಣೆಂ ದೀ ದೆವಾ ಏಕ್ ಭಿಂ
ಸುರ್ಯೊ ಮ್ಹಣ್ಟಾ, ಬಾಯೆ ಮ್ಹಾಕಾಯ್ ತಾನ್ ರಗ್ತಾಚಿ
ಖಂತ್ ಕರಿನಾಕಾಗೆ ತುಂ ಎಕಾ ಭಿಯಾಳ್ಯಾಚಿ
ಮೊಳ್ಬಾಂತುಲೆಂ ಹರ್ ನೆಕೆತ್ರ್ ಪಾರ್ಕುನ್ ಪಳೆ
ಹರ್ಯೆಕ್ಲ್ಯಾಕ್ ಮ್ಹಜೇಚ್ಚ್ ವೋಂಟ್, ಪೊಲೆ, ನಾಕ್, ದೊಳೆ
ಹಾಂವ್ಗೊ ಬಾಯೆ, ಕಿರ್ಕೊಳ್ ಥೆಂಬೊ ದೊವಾಚೊ
ಉಸ್ಕ್ಯಾರ್ ತುಜ್ಯಾ ಸಯ್ರೊ ಫಕತ್ ಎಕಾ ಘಡಿಯೆಚೊ
ಖಂತ್ಗೊ ತುಜಿ ಥೆಂಬೊ ಕಿರ್ಲಾನಾತ್ಲ್ಲ್ಯಾ ವೊಂಟಿಯೆಚಿ
ಸುರ್ಯಾ ದೆವಾಕ್ ಪಿಸಾಯ್ ತಾರಾಂನಿ ರುಪ್ಣಿಂ ಮೆಜ್ಚಿ
ಹಾಂವ್ಗೊ ದುಬ್ಳೊ ಕಿತೆಂ ಕರುಂ?
ತಕ್ಲೆರ್ ಮ್ಹಜ್ಯಾ ಉಮ್ಕಳ್ತಾ ಕೊಯ್ತಿ ಮೊರ್ನಾಚಿ.
^ ವಯ್ರ್
ಮೆಲ್ವಿನ್ ಪಿಂಟೊ, ನೀರುಡೆ
[ದುಸ್ರೆಂ ಇನಾಮ್]
[ರುಪಯ್ 3000]
ದುಕಾಳ್ ಗಿತಾಂ ಆನಿ..
ಗುಲೊಬಾ ಪಾಕ್ಳೆರ್ ದುಕಾಂ ಪಾವ್ಳೆ
ಭಿಯೆವ್ನ್ ಗೆಲ್ಯಾತ್ ಅಕಾಶಿಂ ಕಾವ್ಳೆ
ದಿಗಾಯೆ ಮಾಡಾಚೊ ಅಭದ್ರ್ ಗುಣ್ಗುಣೊ
ಸೊಭಾಯೆ ದೊಂಗ್ರಾಕ್ಯೀ ಅರ್ಗಾಂಟಿ ಯೆಣೊ
ಅಸ್ಕತ್ ಜಾಲ್ಯಾ ಸೃಷ್ಟಿ ಅಸ್ಕತ್ ಜಾಲ್ಯಾ
ಪಳೆಂವ್ಕ್ ಸಲ್ವೊನ್ ದೀಷ್ಟ್ ಗಯ್ರಿ ಜಾಲ್ಯಾ
ದರ್ಯಾ ರಾಯಾ ಸುಕ್ತೆ ಗರ್ಬಾಂತ್
ಬಾಂಳ್ತೆರಾಕ್ ಆತಾಂ ರಾಕ್ಪಾ ಲ್ಹಾರಾಂ
ತುರ್ಭೆಂತ್ ವ್ಹಾಜಾವ್ನ್ ಸಮ್ದಿರಾ ಸರ್ದಾರ್
ಉಚಾಂಬಳ್ ಆತಾಂ ಗಿಳ್ಚಾಕ್ ಪೊರಾಂ
ಧಾರುಣ್ ಜಾಲಾ ಸಮ್ದಿರ್ ಧಾರುಣ್ ಜಾಲಾ
ಕಠೀಣ್ ಪ್ರತಿಕಾರಾಕ್ ಶರಣ್ ಜಾಲಾ
ಸಾದ್ಯಾ ಭೊಳ್ಯಾ ಧರ್ತೆ ರಾಣ್ಯೆಕ್
ಪೊಟಾಂತ್ ಕಿತ್ಯಾಕ್ ಚಾಬ್ಣಿ ಅಶಿ?
ಜೀವ್ ದಿಂವ್ಚ್ಯಾ ಮಾತ್ಯೆ ಮಾಯೆಕ್
ಪ್ರಾಣ್ ಕಾಡ್ಚಿ ಗಿರಾಂತ್ ಕಶಿ?
ಥಕೊನ್ ಗೆಲ್ಯಾ ಧರ್ತಿ ಥಕೊನ್ ಗೆಲ್ಯಾ
ಮನ್ಶಾ ಪಾತ್ಕಾಂನಿ ಶಿಂಜೊನ್ ಗೆಲ್ಯಾ
ಪಾವ್ಸಾ ಪಾವ್ಳೆಯೀ ಧಾರುಣ್ ಜಾಲ್ಯಾತ್
ತಾಂಚ್ಯಾ ಯೆಣ್ಯಾನ್ ಭಿರಾಂತ್ ವಾಡ್ಲ್ಯಾ
ಭರ್ಲ್ಲ್ಯಾ ಉದ್ಕಾಂತ್ ಸ್ವಪ್ಣಾಂ ಕದ್ವಳ್ಳ್ಯಾಂತ್
ದುಕಾಂ ಝರಿಂತ್ ಅಸ್ಡಿ ಕಡ್ಲ್ಯಾ
ಪಾವ್ಸ್ ಉಜೊ ಜಾಲಾ ಉಜೊಚ್ ಪಾವ್ಸ್ ಜಾಲಾ
ಪೆಜೆಮೂಟ್ ಅಳ್ಣಿ ಕರ್ನ್ ಪೊಟಾಂ ಧುವ್ನ್ ಗೆಲಾ
ಎಕೇಕ್ ವಾದಾಳ್ ಎಕೇಕ್ ಅನ್ವಾರ್
ಸ್ವಾರ್ಥಿ ಸಂಯ್ಬಾಚೆರ್ ಫಯ್ಸಲ್ ಉಡಯ್ತಾ
ಅನ್ವಾರಾಂ, ವಾದಾಳಾಂ ಮಧೆಂ ಮಧೆಂ
ತಾಳ್ಯಾಂತ್ ಪಡ್ಚೊ ಸ್ವಾದಿಕ್ ನೀಸ್
ಧಯ್ರ್, ಪಾತ್ಯೆಣಿ ಶ್ವಾಸ್
ಭರ್ವಶ್ಯಾಕ್ ಚಿಮ್ಟಿ ಈಟ್ ಘಾಲ್ತಾ
ವಿಲ್ಸನ್ ಕಟೀಲ್
[ತಿಸ್ರೆಂ ಇನಾಮ್]
[ರುಪಯ್ 2000]
ಏಕ್ ಕವಿತಾ ಅಶಿ
ಕಾಳ್ಜಾಥೆಂಬೆ ಆಟವ್ನ್ ಆಟವ್ನ್
ಪಾನಾ ಕಪಾಲಿಂ ತಿಳೊ ಲಾಯಿಲ್ಲ್ಯಾಜಶೆಂ
ಕವಿತೆಕ್ ದಿಲ್ಲೆಂ ನಾಂವ್
ತುಜ್ಯಾ ದೊಳ್ಯಾಂತೂನ್ ಝಡ್ಲ್ಲ್ಯಾ
ಎಕಾ ದುಕಾ ಥೆಂಬ್ಯಾಂತ್ ಭಿಜೊನ್
ತೀಂತ್ ಭಂವ್ತಿಂ ಪಾಸಾರ್ಲೆಂ
ಶಿರಾಂದಾರಿಂನಿ ವೊತ್ಲ್ಲ್ಯಾ ಪಾವ್ಸಾಂತ್
ಉಟ್ಲ್ಲ್ಯಾ ಆವ್ರಾಂತ್
ಪೊಸ್ಕೆಂ ಶೆರ್ ಬುಡ್ಲೆಂ
ಉಜೊ ದೀಂವ್ಕ್ ಮನ್ ಯೇನಾಸ್ತಾಂ
ಸಾರಿಯೆವಯ್ಲಿ ಕೂಡ್ ದೆಂವವ್ನ್ ಪುರ್ಲ್ಲೆಂ ಘಡಿತ್
ವೊಳಿ ವೊಳಿಂನಿ ಜಿವಂತ್ ಉಟ್ತಾಂ
ಆಂಗಾಪಾಂಗಾರ್ ಊಬ್ ಚರೊನ್
ಕರಿಯೆಕ್ ಆಂಕ್ರ್ಯೊ ಫುಲ್ಲ್ಲ್ಯಾಜಶೆಂ
ಲೊಂವೆನ್ ಲೋಂವ್ ನೀಟ್ ಜಾಲಿ
ರಾನಾಕ್ ಪೆಟ್ಲ್ಲ್ಯಾ ಉಚಾಂಬಳ್ ಉಜ್ಯಾಕ್
ರಾಂದ್ಣಿಂತ್ಲ್ಯಾ ಲಾಂಕ್ಡಾಲಾಗಿಂ ಸಳ್ಗಿ ಮೆಳೊನ್
ಘಾರಾನ್ ಘರ್ ಲಾಸ್ಲಿಂ
ಉತ್ರಾನ್ ಉತರ್ ಉಟೊನ್ ಯೆವುನ್
ಪಾಟಿರ್ ಬೊಟಾಂ ಹರ್ಧ್ಯಾರ್ ವೋಂಟ್
ಚರಯಿಲ್ಲೆಂ ವರ್ಣನ್ ವಾಚ್ತಾಂ
ಪೊಪ್ಸಾಂನಿ ಸಯ್ರೊ ಅತ್ಮೊ ರಿಗ್ಲ್ಲ್ಯಾಜಶೆಂ
ಉಸ್ವಾಸಾವಾರ್ಯಾಂತ್ ಪರ್ಮಳ್ ಭರೊನ್
ಅತ್ರೆಗಾಚಿ ಖರಸ್ ಆಯ್ಲಿ
ಬೊಂಬ್ಲಿ ಫುಲವ್ನ್ ಆಯಿಲ್ಲೆಂ ವಾದಾಳ್ ಆಪ್ಟೊನ್
ವಾರ್ಯಾರ್ ಕಾಂಣಾಂ ಧಲಯ್ತೆಲೆ ಫಾಂಟೆ
ಮೊಡೊನ್ ಪಡೊನ್ ಕೋಯ್ರ್ ಜಾಲೆ
ಕವಿತೆಕ್ ಬುನ್ಯಾದ್ ಘಾಲ್ಲ್ಯಾಜಶೆಂ
ಅಖ್ರೇಕ್, ಪಾನಾಪೊಂತಾರ್
ಗಿಚ್ಚಿಲ್ಲೆಂ ಕವಿತೆಕ್ ನಾಂವ್
ಆಪ್ಲ್ಯಾ ಕಾಂಪ್ಚ್ಯಾ ವೊಂಟಾಂನಿ
ಪರತ್.. ಪತರ್..
ಉಚಾರ್ಲೆಂಯ್ ತುವೆಂ
ಮಾಂಯ್ಗಾಂವಾಂತ್ ಭುಂಯ್ಕಾಂಪೊನ್
ಮಾತ್ಯೆ ಆಂಗ್ ಥಾಪೊನ್
ಖಡ್ಪಿ ಕಾಳ್ಜಾಂಕ್ ಶಿರೊ ಫುಟ್ಲ್ಯೊ
ಏಕ್ ಉಂಚ್ಲಿ ಪ್ರತಿಮಾ ತುಂ
ತುಜೆಥಂಯ್ ಲ್ಹಾನ್ಶೆಂ ಬದ್ಲಾಪ್
ವ್ಹಡಾ ಅವ್ಗಡಾಂಕ್ ತಾಳ್ ಪಡ್ತಾ
ದೆಕುನ್, ಉಮಾಳೊನ್ ಉಮಾಳೊನ್
ವಾಚ್ಪ್ಯಾ ಅತ್ರೆಗಾನ್
ಚೂಕ್ ಸಮ್ಜನಾಕಾಗೊ
ಕಸೊಗೀ ವಾಂಚೊನ್ ಉರ್ಲಾ
ಬಾವ್ಡೊ ಅಸ್ಕತ್ ಕಾಳ್ಜಾಚೊ ಕವಿ
ಕಾಳ್ಜಾಘಾತ್ ಜಾಯ್ತ್
^ ವಯ್ರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.