ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ಪ್ರೀತಮ್ ಕಿರೆಂ ಅಸಲ್ಯಾಚ್ ವರ್ಗಾಚೊ ಸಾಹಿತಿ, ದಾಕ್ಡ್ಯಾಂಧಿಂ ಕ್ರಿಯಾತ್ಮಕ್ ರಿತಿನ್ ವಾವ್ರ್ ಕೆಲ್ಲೊ ಹೊ ಪರತ್ ಅಪ್ಲಿ ಲಿಖ್ಣಿ ಧರ್ನ್ ಜೆಮೆಂವ್ಚ್ಯಾ ಸಮಾಜೆಕ್ ಜಾಗಂವ್ಚೆಂ ಪ್ರೇತನ್ ಕರುಂಕ್ ಆಯ್ಲಾ, ಹೆಂ ಕೊಂಕ್ಣೆಂತ್ ಖಂಡಿತ್ ಜಾವ್ನ್ ಭೋವ್ ಸಂತೊಸಾಚೆಂ. ಏಕ್ ಪ್ರಭುದ್ದ್ ಲೇಖಕ್, ಕವಿ ಆನಿ ಅಂಕಣ್ಕಾರ್ ಜಾವ್ನಾಸ್ಚೊ ಪ್ರೀತಮ್ ಪ್ರಸ್ತುತ್ ಶಾರ್ಜಾಂತ್ ವಸ್ತಿ ಕರುನ್ ಆಸಾ ತಶೆಂಚ್ ಜೆಬೆಲ್ ಅಲಿಂತ್ ಕಾಮ್ ಕರುನ್ ಆಸಾ. ಕೊಂಕ್ಣೆಂತ್ ಆಪ್ಲ್ಯಾ ವಿಚಾರ್ಭರಿತ್ ಸಾಹಿತ್ಯಾಕ್ ಭೋವ್ ಫಾಮಾದ್ ಜಾಲ್ಲ್ಯಾ ದೆ|ಜೊರ್ಜಿ ಪೀಂತ್ ಆಯ್ಕೊಳಾಚಾ ಸಾಹಿತ್ಯಾಕ್ ಹಾಚೆಂ ಸಾಹಿತ್ಯ್ ಲಾಗ್ಸಿಲ್ಯಾನ್ ತಾಳ್ ಪಡ್ತಾ. ಭೋವ್ಶಾ ಹೆ ದೊಗ್ಯೀ ಖಾಸ್ ಮಿತ್ರ್ ಜಾವ್ನಾಸ್ಲ್ಲೆನಿಮ್ತಿ ಆಸ್ಯೆತ್.
ಖಾಕಿಯೆಂತ್ಲಿ ಕೆಸೊಳಿ. ಕಿಸ್ತ್ - 7. ಪ್ರೇಜ಼್ ದ ಲಾರ್ಡ್... ಆಲ್ಲೆಲೂಯಾ..!
ಪ್ರೀತಮ್ ಕಿರೆಂ
ವರ್ಸಾಚ್ಯಾ ಸುಟಿಯೆರ್ ಗಾಂವಾಕ್ ವೆಚ್ಯಾ ಪಾಟ್ಲ್ಯಾ ವರ್ಸಾಂಚೊ ಹೊರ್ಭೊಸ್ ಹ್ಯಾ ಪಾವ್ಟಿಂಚ್ಯಾ ಸುಟಿಯೆಕ್ ಲಾಗ್ಲೊನಾಂ. ಕಾರಣ್ ಬೊಲ್ತೆಂ ನ್ಹಯ್. ಆಯ್ಲೆವಾರ್ ಜಾಲ್ಲೆಲೆಂ ವಿಮಾನ್ ದುರಂತ್ ಆತಾಂಯೀ ಮತಿಂತ್ ಉಸ್ಮೊಡ್ತಾ.
ಆಮಾಂ ಮಂಗ್ಳುರ್ಚಾಂಕ್ ದುಸ್ರೀ ಕಿತೇಂಯ್ ಗತ್ ನಾಂ, ಫಕತ್ತ್ ಏಕ್ಚ್ಚ್ ವಿಮಾನ್, ತೆಂಚ್ಚ್ ತೆಂ ಏರ್ ಇಂಡಿಯಾ ಎಕ್ಸ್ಪ್ರೆಸ್ಸ್!
ದುಭಾಯಾಂತ್ಲ್ಯಾಂಕ್ ಮಂಗ್ಳುರ್ಚ್ಯಾ ಧರ್ತೆಕ್ ಥೆಂಕ್ಚೆಂ!
ಶೆಂಭೊರಾಂ ವಯ್ರ್ ಜೀವ್ ಕಾಡ್ಲೆಲೆಂ, ಹಜಾರಾಂ ವಯ್ರ್ ಕುಟ್ಮಾಚ್ಯಾ ಹಿಶೆಧಾರಾಂಕ್ ಆನಾಥ್ ಕೆಲ್ಲೆಲೆಂ, ಲಾಖಾಂ ಲಾಖಾಂನೀ ದುಡು ನಷ್ಟ್ ಕೆಲ್ಲೆಲೆಂ ತೆಂಚ್ಚ್ ತೆಂ ಸೊಭಿತ್ತ್ ಏರ್ ಇಂಡಿಯಾ ಎ಼ಕ್ಸ್ಪ್ರೆಸ್ಸ್!
ಕಿತೆಂಗೀ ಫರಾಮಸ್ ಜಾಲಿ ಪೈಲೆಟಾ ಥಾವ್ನ್ ಆನಿಂ ನಿರ್ಮಿಲ್ಲೆಲೆಂ ಚುಕಂವ್ಕ್ ಆಸಾ! ಮ್ಹಣೊನ್ ಸಮಾಧಾನ್ ಕರಿಜಾಯ್ ಶಿವಾಯ್ ದುಸ್ರೀ ವಾಟ್ ತರೀ ಆಸಾ!
ಪತ್ರಾಂನೀಂ, ಅಂತರ್ಜಾಳಿನೀಂ, ಟಿ.ವಿ. ಚ್ಯಾ ಹ್ಹರ್ ಏಕ್ ಚಾನೆಲಾಂನಿಂ ಏಕ್ಚ್ಚ್ ಖಬಾರ್, ತಾಚೊಚ್ಚ್ ಅಧಿಕ್ ಪ್ರಸಾರ್!
ಖಬ್ರೊ ಹುನೋನಿಂ, ನಿವೊಂಕ್ ಇಲ್ಲೊ ಪಾವ್ಟ್ ಲಾಗ್ಲೊ!
ನಿಂವ್ತಾ ಪರ್ಯಾಂತ್ ತಿಚ್ಚ್ ಆನಿಂ ತಿಚ್ಚಾಚಿಚ್ಚ್ ಖಬಾರ್!
ವಿಮಾನ್ ಚಾಲಕಾನ್ ದುಭಾಯ್ ಧರ್ತೆಚ್ಯಾ ಉಭ್ಲೆಲ್ಲ್ಯಾ ಘಡಿಯೆ ಥಾವ್ನ್, ಬಜ್ಪೆಚ್ಯಾ ಕೆಂಜರಾಂತ್ ಹುಲ್ಫೊನ್ ಚ್ಯುರಾನ್ ಚ್ಯೂರ್ ಜಾತಾಂ ಮ್ಹಣಾಸಾರ್ ಜಾಲ್ಲೆಲ್ಯಾ ಸರ್ವ್ ಘಡಾವಳಿಂಚೊ ಉಜ್ವಾಡ್ ಹ್ಯಾ ಪ್ರಚಾರ್ ಮಾಧ್ಯಾಮಾಂನಿಂ ದಿಲೊ. ಆಕಾಂತಾಚಿಂ ಕಿಟಾಳಾಂಚ್ಚ್ ಉಸಾಳ್ಳಿಂ.
ಕೋಣ್ ಸಾಂಗ್ತಾ, ಚಾಲಕ್ ನಿದೊನ್ ಆಸ್ಲೊಲೊ, ಆನಿಂ ಕೋಣ್ ಮ್ಹಣ್ತಾ ವಿಮಾನ್ ಚಾರ್ ಬಕ್ಕರಾಂ ಪಯ್ಸ್ ದೆಂವ್ಲೆಂ, ಇಮಾನಾಚಿ ಬ್ರೇಕ್ ಲಾಗ್ಲಿ ನಾಸ್ತಾಂ, ರೊದಾಂ ಫುಟ್ಲಿಂ, ಆನಿಂ ಕೋಣ್ ವಿಮಾನಾಚೆ ಪಾಕಾಟೆ ಸಮಾಂ ಧಲ್ಲ್ನಾಂತ್, ಆನಿಂ ಕಿತೆಂ, ಆನಿಂ ಕಿತೆಂ!
ತಾಂತ್ರಿಕ್ ದೋಷಾ ಥಾವ್ನ್ ಚಾಲಾಕಾಚ್ಯಾ ಅನಿಂ ವಿಮಾನ್ ಶಿಬಂಧೆಚ್ಯಾ ಖಾಸ್ಗಿ ಗಜಾಲಿ/ಜಿಣಿಯೆ ಪರ್ಯಾಂತ್ ಹ್ಯಾ ದುರಂತಾಕ್ ಕಾರಾಣ್ ಜಾಲ್ಲೆಲ್ಯಾ, ಜಾಂವ್ಕ್ ಆಸ್ಲೆಲ್ಲ್ಯಾ ಆನಿಂ ಮುಖಾರ್ ಜಾಂವ್ಕ್ ಸಾಧ್ಯ್ ಆಸ್ಲೆಲ್ಲ್ಯಾಂವಿಶಿಂ ಸವಿಸ್ತಾರ್ ವಿವರ್, ವಿಮರ್ಸೊ ಆನಿಂ ತಾಂಚೆರ್ ಹರ್ ಏಕ್ ಥರಾಚೊ ಹಲ್ಲೊಚ್ಚ್ ಹಲ್ಲೊ!
ತ್ಯಾಚ್ಚ್ ದೆಕುನ್ ಕೊಣ್ಣಾ, ಆಜ್ ಆಮ್ಚ್ಯಾ ಚಡ್ತಾವ್ ಭುರ್ಗ್ಯಾಂ ಥಾವ್ನ್, ಉತರ್ ಪಿರಾಯೆಚಾಂಕ್ ಪರ್ಯಾಂತ್, ವಿಮಾನಾಚ್ಯಾ ಚಾಲೊಣೆಚಿಂ ಆನಿಂ ತಾಂತ್ರಿಕತೆಚಿಂ ಮುಳಾಂ ಜಾಣಾಂ ಜಾಂವ್ಕ್ ಸಕ್ತಾತ್!
ಪೊರ್ಚ್ಯಾ ಪೋರ್ ಮ್ಹಣಾಸಾರ್ ಆಂಗ್ಣಾಂ ಥಾವ್ನ್ಂಚ್ಚ್ ವಿಮಾನ್ ಆಕಾಸಾರ್ ಪಳವ್ನ್ ಜಾಣಾಂ ಆಸ್ಚೊ ಚಾಮಾದೊರ್, ಆಜ್ಕಾಲ್ ತೋಯಿ ಸಾಂಗ್ತಾ: "ವಿಮಾನಾಚೆಂ ಟೇಕ್ ಆಫ್, ಆನಿಂ ಲೇಂಡಿಂಗ್"! "ಏರ್ ಹೋಯ್ಟ್ಸ್ ಆನಿಂ ರನ್ನ್ ವೇ"!
ತೊಚ್ಚ್ ನ್ಹಯ್, ಕೊಂಕ್ಣ್ಯಾಚ್ಯಾ ಹೊಟೆಲಾಂತ್ಲ್ಯಾ ಗ್ಲಾಸ್ ಕ್ಲೀನರಾ ಥಾವ್ನ್ ಡಾಕ್ಟೆರಾಚಾ ಕಂಪಂವ್ಡರಾ ಪರ್ಯಾಂತ್ ವಿಮಾನಾಚ್ಯಾ ಶಿರಾಂ ಶಿರಾಂಚಿ ಜಾಣ್ವಾಯ್ ಆಮ್ಚ್ಯಾ ಗಾಂವಾಕ್ ಲಾಬ್ಲ್ಯಾ!
ಆಜ್ ಕೊಣೀಂ "ಕೌನ್ ಬನೇಗಾ ಕ್ರೋರ್ಪತಿಚ್ಯಾ ಹೋಟ್ ಸಿಟಿರ್" ತಾವ್ನ್ "ಫೋನ್ ಎ ಫ್ರೆಂಡ್", ’ಲಾಯ್ಫ್ ಲಾಯ್ನಿಕ್’ ಮಂಗ್ಳುರ್ಚ್ಯಾ "ಮಿತ್ರಾಕ್" ಪೋನ್ ಲಾಗಾವ್ನ್, ವಿಮಾನ್ ಆನಿಂ ತಾಚ್ಯಾ ಟೇಕ್ ಆಫ್ ಆನಿಂ ಲೇಂಡಿಂಗ್ಗಾ ವಿಶ್ಯಾಂತ್ ಸಸಾಯ್ ಮ್ಹಾಗತ್, ಜವಾಬ್ ಶೆಂಭರ್ ಠಕ್ಕೆ ಸಾರ್ಕಿ ಜಾಯ್ತ್ ಮ್ಹಳ್ಳೆಲಿ ಮ್ಹಜ್ಯಾ ಉಣ್ಯಾ ಭಾವಾಡ್ತ್ಯಾಚಿ ಪಾತಿಯೆಣಿಂ!
ಆಮ್ಕಾಂ, ಮಂಗ್ಳುರಿ ಸಮುದಾಯಕ್, ಪಯ್ಸಿಲ್ಲ್ಯಾ ಗಾಂವಾಂತ್ ಹ್ಹರ್ ಆವ್ಘಡಾಂ, ಬೋಂಬ್, ಹಲ್ಲೆ, ಚೊರಿಯೊ ಆಯ್ಕೊನ್ ಸವಯ್ ಜಾಲ್ಯಾ. ತೆಂ ಪಯ್ಸಾನ್ ಪಯ್ಸ್ ಜಾಲ್ಲ್ಯಾ ನಿಮ್ತಿ ತಿತ್ಲೆಂ ಫರಕ್ ಪಡಾನಾಂ ಆನಿಂ ತಾಚೊ ಧಾವ್ಯೀ ಆಮ್ಕಾಂ ಲಾಗಾನಾಂ!
ಹ್ಯಾ ಆಮ್ಚ್ಯಾಚ್ ಗಾಂವಾಂತ್, ಆಮ್ಕಾಂ ಗರ್ಭಂತ್ ಘೆವ್ನ್ ಉಬ್ಲೆಲ್ಲ್ಯಾ ಹ್ಯಾ ವಿಮಾನಾಕ್ ಅಶೆಂಯ್ ನಿರ್ಮಿಲ್ಲೆಲೆಂ ಆಮ್ಕಾಂ ಹೊ ಏಕ್ ವ್ಹಡ್ ಆಘಾತ್ ಆನಿಂ ಕ್ರೂರ್ ಶೋಕ್!
ತ್ಯಾಚ್ಚ್ ಸಂಧರ್ಬಾರ್ ತ್ಯಾಚ್ಚ್ ಲಗ್ತಿಂ ಆನ್ಯೇಕ್ ಶೋಕ್ ಮ್ಹಾಕಾ ಆಸೊ ಲಾಗ್ಲೊ!
ಮ್ಹಜ್ಯಾಚ್ಚ್ ಮಂಗ್ಳುರ್ ಗಾಂವ್ಚೊ - ಇಂಗ್ಲೀಷ್ ಖಾತರ್ಚೊ, ಮ್ಹಾಗ್ಣ್ಯಾ ಜಮಾತೆಂಚೊ ಕಾಯಾಮ್ ಸಾಂದೊ, ಹಾಣೆಂ ಹೋ ಶೋಕ್ ಅಸೊ ಉಲ್ಲೇಖ್ ಕೆಲೊ: "ದೆವಾಕ್ ಅರ್ಗಾಂ, ಆಮ್ಚ್ಯಾ ಕುಟ್ಮಾಚಿಂ ಕೊಣೀಂಯ್ ತ್ಯಾ ವಿಮಾನಾರ್ ನಾತ್ಲೆಲಿಂ" ಕಾಂಯ್ "ಸ್ಪಿರಿತ್ ಸ್ವಾರ್ಥಚೆಂ" ಪ್ರೇರಣ್ ಜಾಂವ್ಕೀ ಪುರೊ!
ಬಾಪಾ ಮ್ಹಾಕಾ ಆಯ್ಕಾಲ್ಯಾಕ್ ಭಗ್ಸಿ, ಪ್ರೇಯ್ಸ್ ದ ಲೋರ್ಡ್!! ಅಲ್ಲೆಲೂಯಾ!!
ಸುಟಿಯೆಚ್ಯಾ ಹಂತಾ ಥಾವ್ನ್ ಪ್ರಾರಂಭ್ ಕರುನ್, ಹಾಂವ್ ವಾಟ್ ಚುಕೊನ್ ಗೆಲಾಂ ಮ್ಹಣೊನ್ ಲೆಖ್ಚೆ ನಾಂತ್ ಮ್ಹಣ್ ಮ್ಹಣ್ ಭರ್ವಸ್ತಾಂ!
ಸುರ್ವೆರ್ಚ್ಚ್ ಸಾಂಗ್ಲೆಲ್ಲೆಪರಿಂ, ಹ್ಯಾ ಪಾವ್ಟಿಚಿ ಸುಟಿ, ಸುಟಿ ನ್ಹಯ್, ತಿ ಏಕ್ ಶಿಕ್ಷ್ಯಾ!
ಆರ್ಥಿಕ್ ಸುಸ್ತೆಚೊ ಮಾರ್ ಆನಿಂ ತಾಚೆ ಥಾವ್ನ್ ಹಾಂವೆಂ ಕಾಮ್ ಹೊಗ್ಡಾಯ್ಲೆಲ್ಯಾಚೊ ಜೋರ್, ಆನಿಂ ಕುಟ್ಮಾಚ್ಯಾ ಜವಾಬ್ದಾರೆಚೊ ಭೋರ್ ಹೆಂ ಸರ್ವ್ ಚಿಂತಾಸ್ತಾನಾಂ, ಕಿತೆಂಗೀ ಹಾವೆಂ ಪಾಟ್ಲ್ಯಾ ಜಿವಿತಾಂತ್ ಪಾಪ್ ಕೆಲಾಂಗಾಯ್, ಕೊಣಾಚೋಯಿ ಶಿರಾಪ್ ಭೆಜ್ಲಾಗಾಯ್? ಮಾಟ್ ಮಂತ್ರಾ ಮ್ಹಣೀಂ....? ಅಸೆಂ - ತಶೆಂ ಮ್ಹಜ್ಯಾ ಮತಿ ಪಟಲಾರ್ ಸವಲಾಂಚಿ ಕುಸ್ತಿಚ್ಚ್ ಚಲ್ಲಿ .
ಹ್ಯಾ ಸರ್ವ್ ಸವಲಾಂಕ್ ಜವಾಬಿ ಮೆಳ್ತಾಸ್ತಾಂ ಹಾಂವ್ ಮ್ಹಜ್ಯಾ ಲ್ಹಾನ್ ಕುಟ್ಮಾ ಸವೆಂ, "ಆನಂದ್ ಬಾಪಾ" ಸಂಗಿ ಏರ್ ಇಂಡಿಯಾರ್ ಎಕ್ಸ್ಪ್ರೆಸ್ಸಾರ್ ಬಜ್ಪ್ಯಾಂ ಯೇವ್ನ್ ದೆಂವ್ಲೊಂ!
ದೆವಾಕ್ ಅರ್ಗಾಂ, ಆಮ್ಕಾಂ ಕಿತೇಂಯ್ ಜಾಲ್ನಾಂ, ಪ್ರೇಯ್ಸ್ ದ ಲೊರ್ಡ್, ಅಲ್ಲೆಲೂಯಾ!
ಮಂಗ್ಳುರ್ ಶ್ಹಹರಾ ತಾವ್ನ್ ಕಾಂಯ್ ಪಂಚ್ವಿಸ್ - ತೀಸ್ ಮ್ಹಯ್ಲಾಂಚ್ಯಾ ಪರಿಸರಾಂತ್ ಸೊಭ್ಚೊ ಮ್ಹಜೊ ಗಾಂವ್.
ಹಳ್ಳಿಯೀ ನ್ಹಹಿಂ, ಶಹರೀ ನ್ಹಹಿಂ!
ಬೇಂಕಾಂ, ಬೇಕರಿ ಆನಿಂ ಬಾರ್ ಆಂಡ್ ರೆಸ್ಟೊರೆಂಟಾಂನಿಂ ಭರೊನ್ ವಮ್ತೊಂಚೊ ಮ್ಹಜೊ ಗಾಂವ್!
ವ್ಹಡ್ ಏಕ್ ಮಾರ್ಕೆಟ್, ದುಕ್ರಾ ಮಾಸಾಂಚಿಂಚ್ಚ್ 4-5 ಸ್ಟಾಲಾಂ!
ಲ್ಹಾನ್ಶ್ಯಾ ಪರಿಸರಾಂತ್ ತೀನ್ ಚಾರ್ ಚಾಫ್ಖಾನೆ, ಭರ್ಪೂರ್ ದಾಕ್ತೆರ್, ದಾಂತಾಂಚೆ, ಹಾಡಾಂಚೆ, ಕಾಳ್ಜಾಚೆ, ಬಾಂಳ್ತಿಚೆ ಅನಿಂ ಜಿವಾಚ್ಯಾ ಹ್ಹರ್ ಏಕ್ ಸಂದ-ಸಂದಾಂಚೆ ಸರ್ವ್ ಜಾತಿ-ಕಾತಿ ಸಾಂಗಾತಾ ‘ಸೊಡ್ದೊಡೆನ್ ಜಿಯೆಂವ್ಚಿ ಕುಟ್ಮಾಂ’ ಹ್ಯಾ ಗಾಂವ್ಚಿ ಗಿರೇಸ್ತ್ಕಾಯ್!
ಧಾ ಮ್ಹಯ್ಲಾಂಚಾ ಹಂತರಾರ್ ಚ್ಹಡ್ ಉಣೆಂ ಸ - ಸಾತ್ ಮಜ್ಬೂತ್ ಬಾಂದ್ಪಾಚ್ಯೊ ಇಗರ್ಜೊ! ಹ್ಯಾ ಗಾಂವ್ಚೊ ಭಖ್ತ್ ಚಡಯ್ತಾ!
ಇಗರ್ಜಾಂಕ್ ಲಾಗೊನ್ಂಚ್ ಮಣಿಯಾರ್ಯಾಂಚೆಂ ವ್ಹಸ್ತೆಚೆಂ ಘರ್, ತೆಂ ಪಿರ್ಗಜಾಂಚೆಂ ಮಟ್ಟ್ ಸಮ್ಜಾಯ್ತಾ ಆನೀಂ ತಾಕಾ ಲಾಗ್ಸಾರ್ಚ್ ಲಾಗೊನ್ ಆಸ್ಚೆಂ "ಹೋಲ್" ಫಿರ್ಗಜಾಂಚೆಂ ರಟ್ಟೆಂ ಫುಲಾಯ್ತಾ! ಹ್ಯಾಚ್ಚ್ ಪರಿಸರಾಂತ್ ಸೊಬ್ಚಿಂ ಇಸ್ಕೊಲಾಂ ಆನಿಂ ಕೊವೆಂತಾಂ ಫಿರ್ಗಜಾಂಚಿ ಸೊಭಾಯ್ ವ್ಹಾಡಯ್ತಾ!
ಸಾಂಗಾತಾಚ್ಚ್ ಇಗರ್ಜೆ ಮುಖಾರ್ ವ್ಹಡ್ ಜಯ್ತ್ ಗಾಂಟಿ ತೋರ್, ಮಾಗ್ಣ್ಯಾಕ್ ಉಲೊ ದಿತಾ!
ಕೊನ್ಶ್ಯಾರ್ ನಿದೊನ್ ಆಸ್ಚಿ ಕಾಂಟಿಯಾನಿಂ ಭರ್ಲೆಲಿ ತಿ ಸಿಮೆತಿರ್, ಆಮಾಂ ಪಾಪಿಯಾಂಕ್ ಮೊರ್ನಾಕ್ ಜಾಗಯ್ತಾ!
ಇತ್ಲ್ಯಾ ಸರ್ವ್ ಸುಂರ್ಗರಾಯಾನಿಂ ಸೊಭ್ಚೊ ಮ್ಹಜೊ ಗಾಂವ್!
ತಾಂತುಂ ಸೊಭ್ಚ್ಯೊ ಮ್ಹಜ್ಯೊ ಫಿರ್ಗಜ್ಯೊ!
ಪ್ರೇಯ್ಜ್ ದ ಲೋರ್ಡ್, ಆಲ್ಲೆಲೂಯಾ!
ಹ್ಯಾ ಸರ್ವ್ ಸಂಪನ್ನ್ ಗಾಂವಾಕ್, ಪರ್ದೆಶ್ಯಾ ಥವ್ನ್ ಭಿವ್ಕುರ್ಯಾ ಮೆಟಾನಿಂ ಪಾಂಯ್ ತೆಂಕ್ಲೆಲ್ಲ್ಯಾ ಮ್ಹಾಕಾ ಏಕ್ ಸ್ವಪಾಣ್ಂಚ್ಚ್ ಜಾಗೆ ಜಾಲೆಂ!
ಕೆಸೊಳೆಂಚ್ಯಾ ಮುಖ್ಲ್ಯಾ ಕಿಸ್ತಾನಿಂ, ಹೆಂ ಮ್ಹಜೆಂ "ಜಾಗೆಂ ಜಾಲ್ಲೆಂ ಸ್ವಪಾಣ್" ಮುರ್ಮುರ್ತೆಲೆಂ!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
