ಖುರ್ಸಾವಾಟ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ವಿಂಚ್ಣಾರ್ ಮಟ್ವಿಕಾಣಿ: ಕಂಟ್ರಿ ಆವಯ್

ವಲ್ಲಿ ಕ್ವಾಡ್ರಸ್

ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್, ಆಯ್ಕೊಳ್), ಖಣ್ (ವಲ್ಲಿ ಕ್ವಾಡ್ರಸ್), ಗೂಂಡಾ (ಮೆಲ್ವಿನ್ ಜೆ. ವಾಸ್).

ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್, ಶನಿ, ಖುರ್ಸಾವಾಟ್.

ಪರ್ಗಾಂವಾಂತ್ಲೊ ಹಾಂವ್ ಜೆದ್ನಾಂಯ್ ಗಾಂವಾಕ್ ಪಾವ್ತಾಂ, ಸಾವಿಯೊಗೆರ್ ಏಕ್ ಭೆಟ್ ಜರೂರ್ ದಿತಾಂ.

ಆಮ್ಚೊ ಭಾಂಧ್ ಆಜ್‌ಕಾಲ್ಚೊ ನ್ಹಂಯ್, ಭುರ್ಗ್ಯಾಪಣಾರ್ ಥಾವ್ನ್!

ಸಾವಿಯೊಚಿ ಆವಯ್ ಪರ್ಗಾಂವಾಂತ್ ಘರ್ ಕಾಮಾಚೆಂ ಕಾಮ್ ಕರ್ತಾಲಿ ಆನಿ ತಿಚೊ ಎಕ್ಲೊಚ್ ಪೂತ್ ಜಾವ್ನಾಸ್ಚೊ ಸಾವಿಯೊ ಮ್ಹಜೆಸವೆಂ ಬೊರ್ಡಿಂಗಾಂತ್ ಶಿಕ್ತಾಲೊ.

ಎಕಾಚ್ ಕ್ಲಾಶೆಂತ್ ಆಮಿ ಶಿಕ್‌ಲ್ಲ್ಯಾಂವ್, ವ್ಹಡ್ ಜಾಲ್ಲ್ಯಾಂವ್, ಪಳೆಂವ್ಕ್‌ಯೀ ಎಕ್‌ಚ್ ಸಾರ್ಕೆ ಆಮಿ ದೊಗ್‌ಯೀ ಆಸ್ಲ್ಯಾಂವ್ ದೆಖುನ್ ಜೆದ್ನಾಂಯ್ ತಿ ರಜೆರ್ ಗಾಂವಾಕ್ ಯೆತಾನಾ ಜಶೆಂ ಸಾವಿಯೊಕ್ ತಶೆಂ ಮ್ಹಾಕಾಯ್ ವಸ್ತ್ರಾಂ ಹಾಡ್ತಾಲಿ, ಆಮಿ ದೊಗ್‌ಯ್ ತಿಚೆ ಪೂತ್ ಮ್ಹಳ್ಳೆಪರಿಂ ತಿ ಲೆಖ್ತಾಲಿ.

ಇಸ್ಕೊಲಾಚೆ ಪೊಕ್ರಿ ದೀಸ್ ಕಿತ್ಲೆ ವೆಗ್ಗಿಂ ಕಾಬಾರ್ ಜಾಲೆ ಮ್ಹಳ್ಳೆಂ ಜಾಯ್ತೆಪಾವ್ಟಿಂ ಪರ್ಗಾಂವಾಕ್ ಪಾವ್‌ಲ್ಲ್ಯಾ ಹಾವೆಂ ಚಿಂತ್ಚೆಂ ಆಸಾ.

ಆಜ್ ತೊ ವಾಣಿಜ್ಯ್ ಶಾಸ್ತ್ರಾಂತ್ ಎಮ್.ಬಿ.ಯೆ ಶಿಕೊನ್, ಮುಂಬಯ್ಚಾ ಎಕಾ ಖಾಸ್ಗಿ ಕಂಪ್ಣೆಚೊ ಲೇಖ್ ತಪಸ್ಣಾರ್ - ಕಠೀಣ್ ಶಿಸ್ತೆಚೊ ಮನಿಸ್. ಕಶ್ಟಾರ್ ಪುತಾಕ್ ವ್ಹಡ್ ಕಾರ್ನ್ ಕಶೆಂಯ್ ಗರ್ಜೆಚೆಂ ಶಿಕಾಪ್ ದೀವ್ನ್ ಪರ್ಗಾಂವ್ ಸೊಡ್ನ್ ಯೆತಾನಾ ಅಪ್ಣಾಲಾಗಿಂ ಆಸ್ಚೆಂ ಭಾಂಗಾರ್ ದುಡು ಎಕ್ಟಾಂವ್ನ್ ಏಕ್ ಲ್ಹಾನ್ ಕೊಟ್ರಿ ಘೆವ್ನ್ ಸಾಂಗಾತಾ ರಾವ್ತಾಲಿಂ.

ಸಾವಿಯೊಕ್ ಶೇರ್ ಮಾರ್ಕೆಟಿಚಿ ಬರಿ ಜಾಣ್ವಾಯ್ ಆಸಾ - ಕಶೆಂ ದುಡು ವ್ಹಾಪಾರ್ಚೊ, ಕಸೊ/ಕಿತ್ಲೊ ಖರ್ಚ್ ಕರ್ಚೊ - ಹೆಂ ಪರಿಪೂರ್ಣ್ ತೊ ಜಾಣಾ ದೆಖುನ್ ದುಡ್ವಾಕ್ ದುಡು ಮೆಳವ್ನ್ ತೊ ದೀಸ್ ಕಾಡ್ತಾಲೊ.

ಪುಣ್ ಭುರ್ಗ್ಯಾಪಣಾರ್ ಸಯ್ತ್ ಆಮ್ಚೆಮಧೆಂ ಚಿಂತ್ಪಾಚೊ ತಫಾವತ್ ಆಸ್‌ಲ್ಲೊ! ಪುಣ್ ತಿ ಪ್ರಾಯ್ ತಸಲಿ! ಸಕಾಳಿಂ ಝಗ್ಡೆಂ ತರ್‌ಯೀ ಸಾಂಜೆರ್ ಆಮಿ ಏಕ್. ಮತಿಂತ್ ಕಿತೆಂಚ್ ನಾ. ರಾಗ್ ವಾ ಮೋಗ್ ಮ್ಹಳ್ಳೆ ಫಕತ್ತ್ ಸಬ್ಧ್ ಜಾವ್ನ್ ಉರ್‌ಲ್ಲೆ.

ಹಾಂವ್ ಸಂಯ್ಬಾನ್ ಪೊಕ್ರಿ - ಶಿಕಾಪ್ ಮತಿಕ್ ವಚಾನಾಸ್ತಾಂ, ಕಸೊಯ್ ಪಾಸ್‌ಪೋರ್ಟ್ ಕರ್ನ್ ಬೊಂಬೊಯ್ಚಾ ಯೇಜಂಟಾಂಕ್ ಪೊಯ್ಶೆ ಖಾವವ್ನ್ ಎಕಾ ಆಪತ್ರೆಂತ್ ನಿತಳಾಯ್ ಕರ್ಚ್ಯಾ ಕಾಮಾರ್ ಪರ್ಗಾಂವಾಕ್ ಆಯಿಲ್ಲೊಂ. ಮ್ಹಾಕಾಯ್ ದೋನ್ ವರ್ಸಾಂಕ್ ಏಕ್ ಪಾವ್ಟಿಂ ಗಾಂವಾಕ್ ವಚೊಂಕ್ ಟಿಕೆಟ್ ಮೆಳ್ತಾಲಿ. ಅಶೆಂ ಗಾಂವಾಕ್ ಗೆಲ್ಲೊಂ ಹರ್‍ಯೆಕಾ ಸಂದರ್ಭಾರ್ ಸಾವಿಯೊಕ್ ಮೆಳ್ತಾಲೊಂ. ತಾಚ್ಯಾ ಆವಯ್ಚೆಂ ಬೆಸಾಂವ್ ಘೆತಾಲೊಂ.

ಥೊಡ್ಯಾ ವರ್ಸಾಧಿಂ ತಾಕಾ ಹಾಂವ್ ಭೆಟ್‌ಲ್ಲೆವೆಳಾರ್ ಆಮಿಂ ದೊಗ್‌ಯೀ ಎಕಾ ಹೊಟೆಲಾಂತ್ ಬಸೊನ್ ಪರ್ಗಾಂವಾಂಚ್ಯೊ ಗಜಾಲಿ ಕರ್ತಾಲ್ಯಾಂವ್. ತೊ ಅಪ್ಲ್ಯಾ ಮತಿಚೆ ಉಭ್ದೇಸ್ ಸಾಂಗೊನ್ ವೆತಾಲೊ;

"ಅಪ್ಣಾಕ್ ಇತ್ಲೆಂ ಬರೆಂ ಕಾಮ್ ಆಸಾ, ಆಪ್ಣಾಕ್ ಕಂಪೆನಿಂತ್ ಮಾಂದ್ಚೆ ಜಾಯ್ತೆ ಆಸಾತ್, ತರ್‌ಯ್ ತಾಕಾ ಹಾಂಕಾಂ ಫೆಸ್ತಾ ಸೊಭಾಣಾಂಕ್ ಘರಾ ಆಪಂವ್ಕ್ ಬರೆಂ ದಿಸಾನಾ. ಕಿತ್ಯಾಕ್ ಮ್ಹಜಿ ಆವಯ್ ಅನ್ನಾಡಿ, ತಿಕಾ ಮ್ಹಜ್ಯಾ ಇಷ್ಟಾಂಲಾಗಿಂ ಸಾರ್ಕೆಂ ಉಲಂವ್ಕ್ ಕಳಾನಾ, ಮ್ಯಾನರ್ಸ್ ಮ್ಹಳ್ಳೆ ನಾಂತ್, ಮ್ಹಾಕಾಚ್ ಲಜ್ ದಿಸ್ತಾ ಕೊಣಾಯ್ಕ್‌ಯ್ ಆಪವ್ನ್ ಹಾಡುಂಕ್. ತಿಕಾ ಸಾರ್ಕೆಂ ರಾಂದುಂಕ್ ಕಶೆಂಯ್ ಕಳಾನಾ, ಪುಣ್ ತಿಕಾ ಕೆದಾಳಾ, ಕೊಣಾಲಾಗಿಂ, ಆನಿ ಕಿತೆಂ ಉಲಯ್ಜಾಯ್ ಮ್ಹಳ್ಳೆಂ ಸಯ್ತ್ ಕಳಿತ್ ಆಸಾನಾ"

ಆಯ್ಕೊನ್ ಮ್ಹಜ್ಯಾ ಕಾಳ್ಜಾಂತ್ ಕೊಣೆಂಗೀ ಮುಸ್ಳಾಂತ್ ಕಾಂಡ್‌ಲ್ಲೆಪರಿಂ ಜಾಲೆಂ.

ಹಾಂವ್ ತಾಕಾ ಸಮ್ಜಾಂವ್ಚೆಂ ಪ್ರೇತನ್ ಕರಿಲಾಗ್ಲೊಂ;

"ಅಳೆ ಸಾವಿಯೊ, ತುಂ ಶಿಕ್ಪಿ ಮ್ಹಣ್ ತಿ ಶಿಕ್ಪಿ ನ್ಹಂಯ್, ದೆಖುನ್ ಸುಧಾರ್ಸುನ್ ವ್ಹರ್.."

"ಥಿಯೊ.. ತುಂ ನೆಣಾಂಯ್.. ಘರಾ ಆಯಿಲ್ಲ್ಯಾ ಸಯ್ರ್ಯಾಂಕ್ ಗುಡ್ ಮೋರ್ನಿಂಗ್ ಮ್ಹಣೊಂಕ್ ಕೊಲೆಜಿಚಿ ಡಿಗ್ರಿ ಗರ್ಜ್ ನಾ.. ಅಕ್ಕಲ್ ಅಸ್ಲ್ಯಾರ್ ಪಾವ್ತಾ.. ತಿಕಾ ಪುತಾಚಿಂ ದುರಾಂ ಸೆಜಾರ್ಚ್ಯಾ ಬಾಯ್ಲಾಂಲಾಗಿಂ ಸಾಂಗೊಂಕ್ ಅಕ್ಕಲ್ ಆಸಾ, ತರ್‌ಯೀ ಮ್ಹಜ್ಯಾ ಘರಾ ಆಯಿಲ್ಲ್ಯಾ ಇಶ್ಟಾಂಕ್ ಮರ್‍ಯಾದೆಚಿಂ ದೋನ್ ಉತ್ರಾಂ ಉಲಂವ್ಕ್ ತಿಕಾ ಫುಟ್ವಾನಾ.."

ಮ್ಹಜೆಲಾಗಿಂ ಸಾವಿಯೊಲಾಗಿಂ ವಾರ್ಜಿಕ್ ಕರುಂಕ್ ಉತ್ರಾಂ ನಾತ್‌ಲ್ಲಿಂ.

"ಕಶೆಂಯ್ ಜಾಂವ್, ಸಾವಿಯೊ.. ತಿಕಾ ಕಾಂಯ್ ದುಸ್ರಿಂ ಭುರ್ಗಿಂ ಆಸಾತ್‌ವೆ? ತುಂಚ್ ನ್ಹಂಯ್‌ವೆ ತಿಚೊ ಆಧಾರ್?.. ಕಶಿಯ್ ತಿಚಿ ಚಡ್ ಪ್ರಾಯ್ ಗೆಲಿ.. ಆತಾಂ ಬಾಕಿಚಿಂ ಥೊಡಿಂ ವರ್ಸಾಂ ತಿಚ್ಯಾ ಮರ್ಜೆಪ್ರಕಾರ್ ಜಿಯೆಂವ್ದಿ..."

"ವ್ಹಯ್‌ರೆ.. ತುಂ ಪರ್ಗಾಂವಾಂತ್ ಆಸೊನ್ ದೋನ್ ವರ್ಸಾಂಕ್ ಏಕ್ ಪಾವ್ಟಿಂ ಗೆಸ್ಟ್ ಎಪಿಯರೆನ್ಸ್ ಕರುನ್ ಯೆತಾಯ್.. ತುಕಾ ಸಗ್ಳೆಂ ಬರೆಂ ದಿಸ್ತಾ.. ಹಾಂಗಾ ಜಿಯೆತಾಂ ಹಾಂವ್.. ದೆಖುನ್ ಮ್ಹಜೆ ಕಷ್ಟ್ ತುಕಾ ಕಿತೆಂ ಕಳಿತ್? ಮ್ಹಾಕಾ ಕಂಪೆನೆನ್ ಫ್ಲೇಟ್ ದಿತಾಂ ಮ್ಹಳ್ಯಾರ್‌ಯೀ ಮ್ಹಾಕಾ ಹಜಾರ್ ಪಾವ್ಟಿಂ ಚಿಂತುಂಕ್ ಪಡ್ತಾ ಹಿಚೆವರ್ವಿಂ. ಮ್ಹಜ್ಯಾ ಹೆರ್ ಇಶ್ಟಾಂಗೆರ್ ವೆತಾನಾ ಪಳೆ ತಾಂಚ್ಯೊ ಆವಯಾಂ ಕಿತ್ಲಿಂ ಬರಿಂ ಕರ್ನ್ ಉಲಯ್ತಾತ್... ಆನಿ ಆಮ್ಘೆರ್ ಪಳೆ.. ತುಂ ವ್ಹಡ್ ನ್ಹಂಯ್, ಆಮ್ಚೊಚ್ಚ್. ಪುಣ್ ಹೆರಾಂ ಕಶೆಂ ಸಮ್ಜತಿತ್ ಮ್ಹಜೆ ಭಾಂದ್ಪಾಸ್?"

ಹಾಂವ್ ತಾಚ್ಯಾ ತಾಳ್ಯಾಚಿ ದೂಕ್ ಸಮ್ಜಲ್ಲೊಂ ತರ್‌ಯ್ ಮ್ಹಜ್ಯಾ ಮತಿಂತ್ ಹಾಚೆರ್ ಎಕಾರಿತಿಚೊ ಅರ್ಥ್ ನಾತ್‌ಲ್ಲೊ ರಾಗ್ ಚಡೊನ್ ಯೆತಾಲೊ.

ತ್ಯಾ ಉಪ್ರಾಂತ್ ಆಮ್ಚೊ ಸಂಪರ್ಕ್ ಜಾಲ್ಲೊಚ್ಚ್ ಮೊಸ್ತ್ ತೆಂಪಾ ಉಪ್ರಾಂತ್.

******

ಹ್ಯಾ ಇತ್ಲ್ಯಾ ವರ್ಸಾಂನಿ ಸಾವಿಯೊಕ್ ಭಡ್ತಿ ಮೆಳ್ಳ್ಯಾ, ತಾಣೆಂ ತಾಚ್ಯಾ ಕೊಟ್ರೆಚ್ಯಾ ಕುಶಿಚಿ ಕೊಟ್ರಿ ಘೆವ್ನ್, ಪರ್ನಿ ಆನಿ ನವಿ ಅಶೆಂ ದೊನ್‌ಯ್ ಕೊಟ್ರ್ಯೊ ಮೆಳವ್ನ್ ವ್ಹಡ್ ಘರ್ ಕೆಲಾಂ. ಆತಾಂ ತೊ ಕಾಜಾರ್ ಜಾಲಾ.. ಮ್ಹಾಕಾ ಆಪವ್ಣೆಂ ಪತ್ರ್ ಆಯಿಲ್ಲೆಂ. ಫೋನ್ ಕರ್ಚೆತಸಲೊ ತೊ ನ್ಹಂಯ್, ಫೊನ್ ಕೆಲ್ಯಾರ್ ಕಾಗ್ದಾಚ್ಯಾಕೀ ಚ್ಯಾರ್ ವಾಂಟೆ ಖರ್ಚ್ ಚಡ್ ಜಾತಾ.. ಹೆಂ ಸರ್ವ್ ತೊ ಮತಿಂತ್ ಲೇಕ್ ಘಾಲ್ತಾ ಮ್ಹೆಳ್ಳೆಂ ಹಾಂವ್ ಬರ್‍ಯಾನ್ ಜಾಣಾ. ತಾಚೆಂ ಹರ್‍ಯೆಕ್ ಕಾಮ್ ಲೆಖಾಚೆಂ.

ಹಾಂವ್ ಸಾವಿಯೊಚ್ಯಾ ಕಾಜಾರಾಕ್ ಗೆಲೊಂ ನಾ - ಪುಣ್ ತಾಚೆಂ ಕಾಜಾರ್ ಗಡ್ದಾಯೆನ್ ಜಾಲೆಂ ಮ್ಹಳ್ಳೆಂ ಆಯ್ಕಾಲೆಂ. ಗ್ರೇಸ್ತ್ ಚೆಡ್ವಾಲಾಗಿಂ ಕಾಜಾರ್ ಜಾಲ್ಲ್ಯಾ ಹಾಚಾ ಕಾಜಾರಾಚೊ ಸಗ್ಳೊ ಖರ್ಚ್ ಚೆಡ್ವಾಂಗೆಲ್ಯಾಂನಿ ಕೆಲ್ಲೊ ಕಂಯ್.

ಕಾಜಾರಾಕ್ ಯೇನಾತ್‌ಲ್ಲ್ಯಾಕ್ ಬೆಜಾರ್ ಜಾವ್ನ್ ಏಕ್ ಕಾಗಾದ್ ಸಾವಿಯೊನ್ ಬರಯಿಲ್ಲೆಂ ತರ್‌ಯೀ ಮ್ಹಜ್ಯಾ ಕಾಳ್ಜಾಕ್ ದುಖ್ಲೆಂನಾ, ಪುಣ್ ಹಿಂ ಉತ್ರಾಂ ಮ್ಹಜ್ಯಾ ಕಾಳ್ಜಾಕ್ ಕಠೀಣ್ ದುಖ್ಲಿಂ;

"ಪರಿಗತ್ ಬದ್ಲಲ್ಯಾ.. ಎದೊಳ್ ಸೊಸ್ಲೆಂ ಪಾನೊ ದಿಲ್ಲಿ ಆವಯ್ ಮ್ಹಣೊನ್. ಆತಾಂ ಮ್ಹಜ್ಯಾ ಪ್ರತಿಷ್ಟೆಚೆಂ ಸವಾಲ್ ಉದೆಲಾಂ.. ಮ್ಹಜ್ಯಾ ಆವಯ್ಕ್ ಥೊಡ್ಯಾ ತೆಂಪಾಕ್ ತರ್‌ಯೀ ಖಂಯ್ ತರ್‌ಯ್ ಆಶ್ರ್ಯಾಂತ್ ಘಾಲ್ಚೆಂ, ಥಂಯ್ ಪುಣಿಂ ಕಾಂಯ್ ಶಿಕ್ತೆಲಿ. ಮ್ಹಾಕಾ ಪುರೊ ಜಾಲಾಂ.. ಫಾಲ್ಯಾಂ ಮ್ಹಾಕಾ ಭುರ್ಗಿಂ ಜಾತೆಲಿಂ ಆನಿ ಮ್ಹಜ್ಯಾ ಭುರ್ಗ್ಯಾಂನಿ ತಿಚೆಪರಿಂ ಜಾಂವ್ಚೆಂ ನಾಕಾ..."

ಹೆಂ ವಾಚುನ್ ಹಾಂವ್ ಶಿರಿಂ ಚುಕ್‌ಲ್ಲೊಂ.

ಮ್ಹಾಕಾಯ್ ತಿಚೆರ್ ಅಪಾರ್ ಮೋಗ್ ಆಸಾ, ತಿಣೆಂ ಕೆದಿಂಚ್ ಮ್ಹಾಕಾ ಸಾವಿಯೊಸವೆಂ ಆಸ್ತಾನಾ ಹಾಂವ್ ಪೆಲೊ ಮ್ಹಣ್ ಲೆಖ್‌ಲ್ಲೆಂ ನಾ. ಎಕಾ ಪುತಾಚೊ ಮೋಗ್ ತಿಣೆ ದಿಲಾಸ್ತಾಂ ಮ್ಹಾಕಾ ತರ್‌ಯ್ ಕಸಲೆಂಚ್ ಕಾರಾಣ್ ನಾತ್‌ಲ್ಲೆಂ ತಿಚೆರ್ ರಾಗಾರ್ ಜಾಂವ್ಕ್.

ಹಾಂವೆಂ ಸಮಧಾನೆನ್ ಅಶೆಂ ಬರಯ್ಲೆಂ;

"ಮೊಗಾಳ್ ಸಾವಿಯೊ,

ರಗ್ತಾ ಮಾಸಾಂತ್ ಜಾಂವ್ ಸಂಬಂಧಾಂತ್ ಜಾಂವ್ ಹಾಂವ್ ತುಮ್ಚೊ ಕೊಣ್ಂಚ್ ನ್ಹಂಯ್ ತರ್‌ಯೀ ಕಾಳ್ಜಾಂತ್ ಹಾಂವ್ ತುಕಾ ಮ್ಹಜೊಚ್ ಭಾವ್ ಮ್ಹಣ್ ಮಾಂದುಂಕ್ ತುಜಿಚ್ ಆವಯ್ ಕಾರಾಣ್ - ದೆಖುನ್ ತಿಕಾ ಮ್ಹಜ್ಯಾಚ್ ಆವಯ್ ಸಾರ್ಕೊ ಮಾನ್ ದಿತಾಂ. ತುಜೆಂ ಕಾಗಾದ್ ಮೆಳ್ಳೆಂ ವಾಚುನ್ ಭೋವ್ಶಾ ತುವೆಂ ಲೆಖ್ಚೆಪರಿಂಚ್ ವರ್ತೊ ಸಂತೊಸ್ ಜಾಲೊ.

ಸಂತೊಸ್ ಜಾಲೊ ತುಜ್ಯಾ ಸಮಾಜೆಚ್ಯಾ ಪ್ರತಿಷ್ಟೆವಿಶಿಂ ಆಯ್ಕೊನ್,
ಸಂತೊಸ್ ಜಾಲೊ ತುಜ್ಯಾ ಆವಯ್ಕ್ ಆಶ್ರ್ಯಾಂತ್ ಥೊಡೆ ದೀಸ್ ದವ್ರುಂಕ್ ಚಿಂತ್‌ಲ್ಲೆಂ ಆಯ್ಕೊನ್,
ಸಂತೊಸ್ ಜಾಲೊ ತುಜ್ಯಾ ಆವಯ್ಕ್ ಶಿಕಂವ್ಕ್ ಆತಾಂ ತರ್‌ಯ್ ಚಿಂತ್‌ಲ್ಲೆಂ ಆಯ್ಕೊನ್.

ತುಕಾ ಸರ್ವ್ ಬರೆಂಚ್ ಮಾಗ್ಚ್ಯಾದಿಂ ಥೊಡಿಂ ಸವಾಲಾಂ ವಿಚಾರುಂಕ್ ಆಶೆತಾಂ;

ತುಜ್ಯಾ ಘರಾ ಆಯಿಲ್ಲ್ಯಾ ವಾ ಯೆಂವ್ಚ್ಯಾ ಇಷ್ಟಾಂಕ್ ತುಜ್ಯಾ ಆವಯ್ನ್ ಮರ್‍ಯಾದ್ ದೀಂವ್ಕ್ ನಾ ಮ್ಹಣ್ಚ್ಯಾ ತುಜೆ ಮಿತ್ರ್ ತುಜೆ ಕಿತ್ಲೆ ಅಪ್ಲೆ?
ತುಜ್ಯಾ ಆವಯ್ಕ್ ಮಾತಾರ್‍ಯಾ ಪ್ರಾಯೆರ್ ಶಿಕಂವ್ಕ್ ಭಾಯ್ರ್ ಸರ್ಚ್ಯಾ ತುಕಾ ಶಿಕಾಪ್ ದಿಲ್ಲೆಂ ತ್ಯೆಚ್ ಆವಯ್ನ್ ಮ್ಹಳ್ಳೆಂ ವಿಸರ್ಲೊಯ್?
ಸಮಾಜೆಂತ್ಲಿ ತುಜಿ ಪ್ರತಿಷ್ಟಾ ಮಾಗಿರ್ ಆಯಿಲ್ಲಿ, ಪಯ್ಲೆಂ ತುಜೊ ಜಲ್ಮ್ ಜಾಲ್ಲೊ ಕೊಣಾಥಾವ್ನ್ ಮ್ಹಳ್ಳೆಂ ವಿಸರ್ಲೊಯ್?

ಹಾಂವ್ ತುಜೆಪರಿಂ ಲೆಖಾಚೊ ಮನಿಸ್ ನ್ಹಂಯ್, ಕಾಳ್ಜಾಚೊ ಮನಿಸ್ - ಮ್ಹಜೆಂ ಸರ್ವ್ ಲೇಕ್ ಕಾಳ್ಜಾಚೆಂ. ದೆಕುನ್ ಮತಿಂತ್ ಲೇಖ್ ಕರ್ಚ್ಯಾ ತುಜ್ಯಾ ಮತಿಕ್ ರಿಗೊಂಕ್ ನಾತ್‌ಲ್ಲೆಂ ಇಲ್ಲೆಂ ಆಯ್ಕ್;

ತುಕಾ ಬರೆಂ ವಾಯ್ಟ್ ಮ್ಹಣ್ಚೆ ಮಿತ್ರ್ ಆಸಾತ್ - ಪುಣ್ ಮ್ಹಾಕಾ ಆಸ್ಚೊ ಮಿತ್ರ್ ತುಂ ಎಕ್ಲೊಚ್!
ತುಕಾ ಸಾರ್ಕೆಂ ರಾಂದುನ್ ದೀನಾತ್ಲಿ ಆವಯ್ ತರ್‌ಯ್ ಆಸಾ - ಪುಣ್ ಹಾಂವ್ ಖುದ್ದ್ ರಾಂದುನ್ ಜೆವ್ತಾಂ!
ತುಕಾ ತುಜ್ಯಾ ಇಶ್ಟಾಂಕ್ ಮರ್ಯಾದ್ ದೀಂವ್ಕ್ ಕಳಾನಾತ್‌ಲ್ಲಿ ಆವಯ್ ತರ್‌ಯ್ ಆಸಾ - ಪುಣ್ ಮ್ಹಾಕಾ ಜಿಣ್ಯೆಂತ್ ಆವಯ್‌ಚ್ ನಾ!

ಆನಿ ಅಖೇರ್ ಕರ್ಚ್ಯಾಧಿಂ ಏಕ್ ಉತಾರ್ ಆಯ್ಕ್ - ಮೋಗ್, ಮಾಯ್ಪಾಸ್, ಸಂತೊಸ್, ಸಮಧಾನ್ ಸೊಧುಂಕ್ ಹೆರಾಂಕ್ ಪಳೆನಾಕಾ, ತುಜೆಭಿತರ್ ಸೊಧ್ - ತುಕಾ ತೆಂ ಧಾರಾಳ್ ಮಾಪಾನ್ ಮೆಳ್ತೆಲೆಂ.

ತುಂ ಹೆಂ ಪತ್ರ್ ವಾಚುಂಕ್ ಲಾಗ್ಚ್ಯಾ ವೆಳಾಚಿಯೀ ಪರ್ವಾ ಕರ್ತಲೊಯ್ ಮ್ಹಳ್ಳೆಂ ಹಾಂವ್ ಜಾಣಾಸ್ಲೊಂ ದೆಕುನ್ ಹೆಂ ಕಾಗಾದ್ ಹಾವೆಂ ಪಾಂಚ್ ಪಾವ್ಟಿಂ ಬರವ್ನ್ ಪಿಂದುನ್ ಘಾಲ್ಲೆಂ.

ಹ್ಯಾ ಸಂಸಾರಾಂತ್ ಮಾನ್, ಸ್ಥಾನ್, ಪ್ರತಿಷ್ಟಾ, ಗೌರವ್ ತುಕಾ ಭಾಯ್ರ್ ಥಾವ್ನ್ ಯೆತಾ ಆನಿ ಮೋಗ್ ಮಾತ್ರ್ ಭಿತರ್ ಥಾವ್ನ್ ಯೆತಾ. ಆನಿ ಎದೊಳ್ ಪರ್‍ಯಾಂತ್ ತುಜೊ ಮೋಗ್‌ಚ್ ಕೆಲ್ಲ್ಯಾ ತುಜ್ಯಾ ಆವಯ್ಚಾ ಮೊಗಾಕ್ ತುಂ ಸಮ್ಜೊಂಕ್ ಸಕಾನಾಸ್ಚಿ ತುಜಿ ಅಸ್ಕತ್ಕಾಯ್ ಮ್ಹಳ್ಳೆಂ ಒಪುನ್ ಘೆ - ಇತ್ಲೆಂಚ್ ಮ್ಹಜೆಂ ಮಾಗ್ಣೆಂ.

ಮ್ಹಜ್ಯಾ ಕಾಳ್ಜಾಂತ್ಲೆಂ ಸತ್ ಬರವ್ನ್ ತುಕಾ ದುಖಯಿಲ್ಲ್ಯಾಕ್ ಮಾಫಿ ಮಾಗೊನ್ ಅಖೇರ್ ಕರ್ತಾಂ,

ಮೊಗಾಚೊ
ಥಿಯೊ

ಇತ್ಲೆಂ ಬರವ್ನ್ ಮತ್ ಇಲ್ಲಿ ಹಗುರ್ ಜಾತೆಚ್ಚ್ ಸಭಾರ್ ವೇಳ್ ಚಿಂತುನ್ ಬೊಸ್ಲೊಂ. ಆನಿ ಹಳ್ತಾರ್ ತೆಂ ಕಾಗಾದ್ ಘೆವ್ನ್ ಹಾಂವ್ ಉಟ್ಲೊಂ, ಭೋವ್ಶಾ ಸವೆಪಾವ್ಟಿಂ ಹೆಂ ಪಿಂಜುಂಕ್!

ಅನೇಕ್

ವ್ಯಾ

ಕಾಣ್ಯೆಗಾರ್]