ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಪರತ್ ಏಕ್ ಖುರ್ಸಾಚಿ ವಾಟ್
ಪ್ರಗತಿ ಕೊಣಾಕ್ ನಾಕಾ? ವಾಡಾವಳ್ ಆಶೆನಾತ್ಲ್ಲೊ ಕೋಣ್ ಆಸಾ ಹ್ಯಾ ಸಂಸಾರಾಂತ್? ವಾಡಾವಳ್ ಬರಿಚ್ ಆನಿಂ ಬರ್ಯಾದಿಶೆನ್ ವೆಚಿ ವಾಡಾವಳ್ ಮಾತ್ರ್ ಬರೊ ಸಮಾಜ್ ಬಾಂಧುನ್ ಹಾಡ್ಚಾಕ್ ಉಪ್ಕಾರಾಕ್ ಪಡ್ತಾ. ಸಂಸಾರ್ಯ್ ಹ್ಯಾ ವಾಡಾವಳೆಕ್ ಆಶೆತಾ, ತಾಂತ್ರಿಕತಾ ಹ್ಯಾ ಸಂಸಾರಾಚಾ ವಾಡಾವಳೆಂತ್ ವಡ್ಲೊ ಪಾತ್ರ್ ಘೆತಾ. ಆಜ್ಕಾಲ್ ಚಡ್ತಾವ್ ಸಂಗ್ತ್ಯೊ ಥೊಡ್ಯಾ ದಾಕ್ಡ್ಯಾಧ್ಲ್ಯಾ ಸಂಗ್ತ್ಯಾಂಚಾಕೀ ತುರ್ತಾನ್ ಜಾತಾತ್. ಹೆಂ ’ಫಾಸ್ಟ್ಲಾಯ್ಫ್’ ಹ್ಯಾ ಸಂಸಾರಾಚೆಂ ಆನಿಂ ಸಂಸಾರಾಂತ್ ಜಿಯೆತೆಲ್ಯಾಂಚೆಂ. ಆನಿಂ ಹ್ಯಾ ಫಾಸ್ಟ್ಲಾಯ್ಫಾಕ್ ಪರೋಕ್ಶ್ ರಿತಿರ್ ಆಮಿಂ ವೊಲಾಯ್ಲಾಂ ’ಪ್ರಗತಿ’ ಮ್ಹಣ್. ಕಿತ್ಯಾಕ್ ಮ್ಹಳ್ಯಾರ್ ಜಿತ್ಲೆ ವೆಗಿಂ ಕಾಮಾ ತಿತ್ಲಿಂ ಚಡ್ ಕಾಮಾ ಆಮ್ಚಾನ್ ಕರುಂಕ್ ಸಾಧ್ಯ್.
ಪ್ರಗತಿ ಪ್ರಗತಿ ಮ್ಹಳ್ಳ್ಯಾ ತಾಂತ್ರಿಕತೆಚಾ ವಾಸ್ತವ ಮಧೆಂ ಶಿರ್ಕಲ್ಲ್ಯಾ ಆಮ್ಚೆಂ ಚಿಂತಾಪ್ ದಿಸಾನ್ ದೀಸ್ ವಿಸ್ತಾರ್ ಜಾತಾ ತರ್ಯ್ ಕೊಂಕ್ಣೆ ತೆವ್ಶಿಲೆಂ ಚಿಂತಾಪ್ ದಿಸಾನ್ ದೀಸ್ ಸಂಕೀರ್ಣ್ ಜಾಯಿತ್ ಯೆತಾ. ಆಮ್ಚಿ ಭಾಸ್, ಆಮ್ಚಿ ಸಂಸ್ಕ್ರತಿ, ಆಮ್ಚೆ ವಿಚಾರ್ ಆಮ್ಚಾಚ್ ಉಣ್ಯಾ ಭಾವಾಡ್ತಿ ಚಿಂತ್ಪಾಚಾ ವ್ಹೊಜ್ಯಾಪಂದಾ ಚಿರ್ಡತಾ, ಉರ್ಡತಾ ಆನಿಂ ದೀಸ್ ಮೆಜ್ತಾ. ಆಮಿಂ ಸಗ್ಳಿಂ ಅಪ್ಣಾಕ್ ಕಿತೆಂಚ್ ಪಡೊನ್ ವಚೊಂಕ್ನಾ ಮ್ಹಳ್ಳ್ಯಾ ಖಡ್ಪಾತಸಲ್ಯಾ ಚಿಂತ್ಪಾನ್ ಹಾತ್ ಬಾಂಧುನ್ ರಾವ್ಲ್ಯಾಂವ್ ತರ್ ಥಂಯ್ಸರ್ ಅಪಾಪೆಂಚ್ ಉದೆತಾ ಏಕ್ ಸವಾಲ್ ’ತರ್ ಹೆಂ ಕಾಮ್ ಕೊಣಾಚೆಂ?’.
ಕೊಂಕ್ಣೆಚೊ ಏಕ್ ಫಾಮಾದ್ ಕವಿ ಮಾನೆಸ್ತ್ ಆಂಡ್ರು ಎಲ್ ಡಿ’ಕುನ್ಹಾ ಅಶೆಂ ಮ್ಹಣ್ತಾ; "ಭಾಸ್ ಫಕತ್ ಉಲಯಿಲ್ಯಾ ವರ್ವಿಂ ಜಿವ್ಹಾಳ್ ಉರಾನಾ. ಭಾಷೆಚಾ ಭಲಾಯ್ಕೆಭರಿತ್ ವ್ಹಾಡವಳಿಕ್ ತ್ಯಾ ಭಾಷೆಂತ್ಲೆಂ ಸಾಹಿತ್ಯ್ ಜಿವ್ಹಾಳ್ ಅಸೊಂಕ್ ಜಾಯ್. ಪತ್ರಿಕೋಧ್ಯಮ್ ಸಾಹಿತ್ಯಾಚೆ ದೊಳೆ ಆಸ್ಲ್ಲ್ಯಾಪರಿಂ. ಕೂಡಿಚಿ ಸುಡ್ಸುಡಾಯ್ ದೊಳ್ಯಾಂನಿ ಪಾರ್ಕಿವ್ಯೆತ್ ತಶೆಂ ಸಾಹಿತ್ಯಾಚಿ ಜಿವ್ಸಾಣ್ ತ್ಯಾ ಪತ್ರಿಕೋಧ್ಯಮಾಂತ್ಲ್ಯಾ ಭಾಸೆಚೊ ಪರ್ಜಳ್ ಪಳೆವ್ನ್ ಪಾರ್ಕಿವ್ಯೆತ್."
ಕೊಂಕ್ಣಿ ವಾವ್ರ್ ಕಿತ್ಯಾಕ್?
ಮನಿಸ್ ಕಿತ್ಯಾಕ್ ಜಿಯೆತಾ ಮ್ಹಳ್ಳೆಂ ಸವಾಲ್ ವಿಚಾರ್ಲೆಂ ತರ್ ಎಕೆಕ್ಲೆ ಎಕೆಕಾ ರಿತಿನ್ ಜಾಪಿ ದಿತಿತ್, ಧಾರ್ಮಿಕ್ ಚಿಂತ್ಪಾಚೊ ಮನಿಸ್ ಸಾಂಗತ್ ’ಮನಿಸ್ ಜಿಯೆತಾ ಕಿತ್ಯಾಕ್ ಮ್ಹಳ್ಯಾರ್ ತಿ ಜಾವ್ನಾಸಾ ದೆವಾಚಿ ಖುಶಿ’, ವಿಗ್ಯಾನ್ ಚಿಂತ್ಪಾಚೊ ಮನಿಸ್ ಸಾಂಗತ್ ’ಮನಿಸ್ ಜಿಯೆತಾ ಜೆನ್ನಾ ಪರ್ಯಾಂತ್ ತಾಚೊ ಜೀವ್ ಆಸ್ತಾ’, ತತ್ವ್ವಾದಿ ಸಾಂಗ್ತಿಕ್ ’ಮನಿಸ್ ಜಿಯೆತಾ ಕಿತ್ಯಾಕ್ ಮ್ಹಳ್ಯಾರ್ ತೊ ಜಲ್ಮಾಲಾ, ಆನಿಂ ತಾಚೆಂ ಮರಣ್ ಯೆಂವ್ಚಾ ಘಡ್ಯೆಪರ್ಯಾಂತ್ ತಾಕಾ ಜಿಯೆಲ್ಲೆಶಿವಾಯ್ ಹೆರ್ ನಿರ್ವೋಗ್ ನಾ’, ತಾರ್ಕಿಕ್ ಚಿಂತ್ಪಾಚೆ ಮನಿಸ್ ಹ್ಯಾ ವಾದಾಕ್ ಸವಾಲ್ ಕರ್ತಿತ್ ’ತರ್ ಮನ್ಶಾಚಿ ಜಿಣಿ ಹಾತಾಂತ್ ನಾ ಮ್ಹಣ್ ಜಾಲೆಂ. ತಶೆಂ ಜಾಲ್ಯಾರ್ ಜೊ ಜೀವ್ಘಾತ್ ಕರ್ಚಾ ವೆಕ್ತಿಕ್?’ ಆನಿಂ ಹ್ಯಾ ಸವಾಲಾಕ್ ಪರ್ಯಾಯ್ ರಿತಿನ್ ಜಾಪ್ಯ್ ಆಸಾ ’ಜೀವ್ಘಾತ್ ಕರ್ಚಾ ಮನ್ಶಾಚಿ ಜಿಣಿ ಥಂಯ್ ಮ್ಹಣಾಸರ್ ಮಾತ್ರ್ ಮ್ಹಣ್ ಆಸಾ’. ಕಿತೆಂಯ್ ಆಸೊಂ ಮನಿಸ್ ಜಿಯೆತಾ ಕಸೊಯ್, ಕಿತೇಂಯ್ ಜಾವ್ನ್.
ಬರೆಂ, ಆಮಿಂ ಇತ್ತುನ್ ಪಾವ್ಲ್ಯಾಂವ್ ತರ್ ಏಕ್ ಘಡಿ ಜಿಯೆಂವ್ಚಾ ಮನ್ಶಾಕ್ ಆನಿಂ ಹೆರ್ ಜಿವಿಕ್ ಆಸ್ಚೊ ತಫಾವತ್ ಸೊಧ್ಯಾಂಗೀ? ಹೆಂ ಸವಾಲ್ ಭೋವ್ ಸಲೀಸ್ ಸವಾಲ್ - ದುಸ್ರ್ಯಾ ಕ್ಲಾಸೆಚಾ ಬುರ್ಗ್ಯಾಕ್ಯ್ ಜಾಪ್ ದಿವ್ಯೆತಾ. ಮನಿಸ್ ಬರೆಂ ವಾಯ್ಟ್ ಚಿಂತುಂಕ್ ಸಕ್ತಾ ಆನಿಂ ಮನ್ಜಾತ್ ಸಕಾನಾ. ಮ್ಹಣ್. ಬರೆಂ ವಾಯ್ಟ್ ಮ್ಹಳ್ಯಾರ್ ಕಿತೆಂ?
ದೆವಾನ್ ಸಂಸಾರಾಕ್ ಜಾಂವ್, ಮನ್ಶಾಕ್ ಜಾಂವ್ ರಚ್ತಾನಾ ಕಿತೆಂಚ್ ಬರೆಂ ಯಾ ವಾಯ್ಟ್ ಮ್ಹಳ್ಳೊ ಭೇಧ್ ಕರುಂಕ್ ನಾ. ತರ್ ಹೆ ಭೇದ್ ಕಶೆ ಉದೆಲೆ? ಖೈಂ ಥಾವ್ನ್? ಏಕ್ ಘಡಿ ಆಮಿಂ ಹ್ಯಾ ಸವಾಲಾಂಚೆರ್ ನದರ್ ಚರಯ್ಲ್ಯಾರ್ ಆಮ್ಕಾಂ ಜಾಪ್ ಮೆಳ್ತಾ;
ಸುರ್ವಾತ್ ಜಾಲ್ಲಿ ಮನ್ಶಾಚಾ ಅಬ್ಲೇಸ್ಪಣಾ ಥಾವ್ನ್, ಸುರಾತಾ ಥಾವ್ನ್, ಭಡ್ಕಾವ್ಣೆ ಥಾವ್ನ್ ಸುರು ಜಾಲಾ ಹೊ ಪ್ರಭೇಧ್. ಜಾಂವ್ ತೊ ಸುರಾತ್, ತಿ ತಾಳ್ಣಿಂ ಸೊರೊಪಾನ್ ಹಾಡ್ಲ್ಲಿ. ತೊ ಸೊರೊಪ್ ಜಾವ್ಯೆತ್ ಮನ್ಶಾಚಿಂತ್ಪಾಚಿ ಅಸ್ಕತ್ಕಾಯ್. ಯಾ ಕಿತೇಂಯ್. ಪುಣ್ ತ್ಯಾ ದಿಸಾಂ ಥಾವ್ನ್ ಮನಿಸ್ ಬರೆಂ ಮ್ಹಳ್ಯಾರ್ ಹೆಂ, ವಾಯ್ಟ್ ಮ್ಹಳ್ಯಾರ್ ತೆಂ ಮ್ಹಳ್ಳೆಂ ಚಿಂತಾಪ್ ಘೆವ್ನ್ ಆಯ್ಲೊ. ಮುಖಾರುನ್ ಕಾಯ್ನ್ - ಅಬೆಲಾ ಮಧೆಂ ಸಯ್ತ್ ಆಜ್ ಕಾಲ್ಚಾ ದಿಸಾಂನಿ ಘಡ್ಚೆಪರಿಂ ಝಗ್ಡೆಂ ಚಲ್ಲೆಂ.
ಮಾಫ್ ಕರಾ - ಹಾಂವ್ ಕಾಂಯ್ ಏಕ್ ಧಾರ್ಮಿಕ್ ಲೇಕನ್ ಯಾ ಮನ್ಶಾಚಾ ಅಸ್ಮಿತಾಯೆಚಿಂ ಸೊದ್ನಾಂ ಕರ್ಚೆಂ ಲೇಕನ್ ಬರಂವ್ಕ್ ಧರುಂಕ್ ನಾ. ಫಕತ್ ಬರೆಂ ವಾಯ್ಟ್ ಕೆದ್ನಾಂ ಉದೆಲೆಂ ಮ್ಹಳ್ಳೆಂ ಚಿಂತಾಪ್ ತುಮ್ಚೆಸವೆಂ ಹಾಡ್ಚೆಂ ಪ್ರೇತನ್ ಮಾತ್ರ್ ಕೆಲೆಂ. ತರ್ ದೆವಾನ್ ಬರೆಂ ಯಾ ವಾಯ್ಟ್ ಮ್ಹಳ್ಳೊ ಪ್ರಭೇಧ್ ಕರುಂಕ್ ನಾ ಮ್ಹಳ್ಳೆಂ ಸ್ವಷ್ಟ್ ಜಾಲೆಂ ಆಮ್ಕಾಂ. ತೆಂ ಮನ್ಶಾನ್ ಆಪ್ಲ್ಯಾ ಸುರಾತಾಖಾತಿರ್, ಆಪ್ಲ್ಯಾ ಇರಾದ್ಯಾಂ ಖಾತಿರ್ ವೊಲಾಯಿಲ್ಲೆಂ ಯಾ ವೊಲಾಂವ್ಚೆಂ ನಾಂವ್. ಹೆಚ್ ಚಿಂತ್ಪಾಚಾ ಸಮಾಜೆಂತ್ ಜಲ್ಮೊನ್ ವ್ಹಡ್ ಜಾತಾನಾ ತರ್ಯ್ ಹೆಂಚ್ ಚಿಂತಾಪ್ ಮುಕಾರುನ್ ವರುಂಕ್ ಆಮ್ಕಾಂ ಜಾಯ್ತೆ ಆವ್ಕಾಸ್ ಮೆಳ್ತಾತ್. ಆನಿಂ ಹೆಚ್ ಚಿಂತ್ಪಾಚೆಂ ಪರಿಣಾಮ್ ಜಾವ್ನ್ ಜಾತ್-ಧರ್ಮಾಂತ್ ಜಾಂವ್, ಕುಳಿ-ಆಲ್ಕುಂಜಾಂತ್ ಜಾಂವ್, ಶಿಕಾಪ್-ವ್ರತ್ತೆಂತ್ ಜಾಂವ್, ತೊ ಬರೊ ಹೊ ವಾಯ್ಟ್ ಮ್ಹಳ್ಳೆ ದೊರೆ ಉಭ್ಜಾತಾತ್. ಪುಣ್ ಏಕ್ ಸವಾಲ್ ಜರೀ ತರೀ ವಿಚಾರ್ಲೆಂ ’ಹಾಂವ್ ಬರೊ ಯಾ ವಾಯ್ಟ್?’ ಹಾಕಾ ’ಹಾಂವ್ ವಾಯ್ಟ್’ ಮ್ಹಳ್ಳಿ ಜಾಪ್ ದಿತೆಲೆ ಭೋವ್ಶಾ ಸಂಸಾರಾಂತ್ ಕೊಣ್ಂಚ್ ಆಸ್ಚೆನಾಂತ್. ಸಗ್ಳೆ ಬರೆ ಆನಿಂ ವಾಯ್ಟ್ ಕೊಣ್ಯ್ ಆಸಾ ತರ್ ತೊ ಪೆಲೊ.
ಹೆಂಚ್ ಚಿಂತಾಪ್ ಮುಖಾರುನ್ ವೆತಾನಾ ಅಪುಣ್ ಕಸೊ ಬರೊಗೀ, ತೆಚ್ಚ್ ಪರಿಂ ಬರೆಂ ಆಸ್ಚೆಂ, ಬರೆಂ ದಿಸ್ಚೆಂ ಆಪ್ಲೆಂ ಜಾಯ್ಜಯ್ ಮ್ಹಳ್ಳಿ ಅನ್ಯೇಕ್ ಜಬ್ಬೊರ್ ಆಶಾಯ್ ಉದೆತಾ. ಮನ್ಶಾಜೀಣ್ ದಾಕ್ಟಿ, ಆನಿಂ ಹ್ಯಾ ದಾಕ್ಟ್ಯಾ ಜಿಣ್ಯೆಂತ್ ಜಿತ್ಲೆಂ ಜಾತಾ ತಿತ್ಲೆಂ ಬರೆಂ ಆಸ್ಚೆಂ ಸರ್ವ್ ಅಪ್ಣಾಚೆಂ ಕರಿಜಾಯ್ ಮ್ಹಳ್ಳೊ ಪಿಸೊ ಹೊರ್ಭೊಸ್. ಝೊಪ್ಡ್ಯಾಂನಿ ಜಿಯೆಂವ್ಚೊ ಬಂಗ್ಲ್ಯಾಂನಿ ಜಿಯೆಂವ್ಕ್ ಸೊಧ್ತಾ, ಬಂಗ್ಲ್ಯಾಂನಿ ಜಿಯೆಂವ್ಚೊ ಆಪ್ಲ್ಯಾ ಬೊಂಗ್ಲ್ಯಾಕ್ ಮಾಳಯ್ ಭಾಂಧುಂಕ್ ಚಿಂತಾ. ಆನಿಂ ಅಪುಣ್ ವಡ್ಲೊಂ ಮ್ಹಣ್ ಸಮಾಜೆಕ್/ಸಂಸಾರಾಕ್ ಧಾಖಂವ್ಚಾಕ್ ಎಕೆಕ್ ವಿಧ್ಯಾ ವಾಪಾರ್ತಾ.
ಹ್ಯಾ ವಾಟೆರ್ ಚಮ್ಕಾಲ್ಲ್ಯಾ ಲೊಕಾಂಕ್ ಆಪ್ಲಿ ಚಾಲ್ ಚಮ್ಕೊಣ್ ಮಾತ್ರ್ ನ್ಹಯ್, ರಿತಿ ರಿವಾಜ್ಯೊ ಸಯ್ತ್ ಬದ್ಲುಂಕ್ ಪಡ್ತಾ. ವೇಸ್- ದೇಸ್ ಥೊಡೆಪಾವ್ಟಿಂ ಬದ್ಲುಂಕ್ ಪಡ್ತಾ. ಕಿತ್ಯಾಕ್ ಮ್ಹಳ್ಯಾರ್ ಆಮ್ಚಾ ಖಟ್ಟ್ಯಾಂತ್ ಇತ್ಲೆಂಚ್ ಭರೊನ್ ಗೆಲಾಂ - ಆಪ್ಲ್ಯಾ ಆಂಗಾರ್ಯ್ ಆಮಿಂ ಖೆಲ್ಲ್ಯಾ ದುಕ್ರಾಚಾ ವೊಬಾಪೊಡಿಚೊ ರಂಗ್ ಯೇಜಯ್, ಆಮ್ಚಾ ಗ್ಲಾಸಾಂನಿ ಸಯ್ತ್ ಪಾಶ್ಚಾತ್ಯ್ ಲೊಕಾಂನಿ ಪಿಯೆಂವ್ಚಾ ರಂಗಾಳ್ ಆಮಾಲಾಚೊ ರಂಗ್ ಆಸಾಜಯ್. ಆಪ್ಲ್ಯಾ ಬಾಯ್ಲೆ-ಬುರ್ಗ್ಯಾಂನಿ ಸಯ್ತ್ ಅರ್ಧೆಂ ನೆಸಾಜಯ್, ಆಪ್ಲ್ಯಾ ಬುರ್ಗ್ಯಾಂನಿ ಸಯ್ತ್ ಪಾಶ್ಚಾತ್ಯ್ ಲೊಕಾಂಪರಿಂ ಇಂಗ್ಲಿಶಾಂತ್ ಯಾ ಹೆರ್ ಭಾಸೆನ್ ಉಲಯ್ಜಾಯ್ - ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣಿ ಮ್ಹಳ್ಯಾರ್ ಏಕ್ ಕಾಟ್ ಭಾಸ್, ತಿ ಉಲಂವ್ಕ್ ಆಮ್ಚೆಂ ಮಟ್ಟ್ ದೆಂವ್ತಾ. ಆಮ್ಚಾ ಬುರ್ಗ್ಯಾಂನಿ ಆಮ್ಕಾಂ ಕೊಣಾಯ್ ಮುಖಾರ್ ’ಆನಾ ಯಾ ಪಪ್ಪಾ’ ಮ್ಹಳ್ಯಾರ್ ಆಮ್ಕಾಂ ಕಸಲಿಗೀ ಲಜ್ ಯಾ ಉಣೆಂಪಣ್. ತಾಚಾ ಬದ್ಲಾಕ್ ’ಡಾಡಾ ಯಾ ಪೋಪ್’ ಮ್ಹಳ್ಯಾರ್ ಆಮ್ಚೆಂ ಮಟ್ಟ್ ವ್ಹಡ್ ಜಾತಾ. ಆಮ್ಚಾ ಆವಯಾಂಕ್ಯ್ ತಾಂಚಾ ಬುರ್ಗ್ಯಾಂನಿ ’ಮಾಂಯ್’ ಮ್ಹಳ್ಯಾರ್ ಕಿತೆಂಗೀ ಉಣೆಂಪಣ್ ಜೆಂ ಆಮ್ಚಾ ಅರ್ಧ್ಯಾ ವಿಣ್ಗ್ಯಾ ಕುಡಿಕ್ ವಸ್ತ್ರಾಂ ಸಯ್ತ್ ಉಣಿಂ ಮ್ಹಣ್ ಭೊಗಾನಾತ್ಲ್ಲೆಂ ಚಿಂತಾಪ್. ತಾಚಾ ಬದ್ಲಾಕ್ ’ಮೋಮ್ ಯಾ ಮಮ್ಮಿ’ ಮ್ಹಳೆಂ ತರ್ ಸರ್ಗಾಕ್ ಏಕ್ ಗೇಣ್. ಆಮ್ಚಾ ಬುರ್ಗ್ಯಾಂಕ್ ಪೊಟಾಂತ್ ಆಸ್ತಾನಾ ಶಿಕೊಂಕ್ ಕಾಂಯ್ ಇಸ್ಕೊಲಾಂ ನಾಂತ್. ಹಿಂ ಆಮಿಂಚ್ ಆಮ್ಚಾ ಅಶಿರ್ ಚಿಂತ್ಪಾನ್ ಆಮ್ಚಾ ಬುರ್ಗ್ಯಾಂಚೆರ್ ಥಾಪ್ಲ್ಲೆಂ ಚಿಂತಾಪ್. ಆಮ್ಚಾ ಬುರ್ಗ್ಯಾಂಕ್ ಇಂಗ್ಲಿಶ್ ಸೊಡ್ಲ್ಯಾರ್ ದುಸ್ರೆಂ ಕಿತೆಂಚ್ ಯೇನಾ. ಆಮ್ಚಾ ದೆವಾಕ್ ಇಂಗ್ಲಿಶ್ ಭಾಸ್ ಮಾತ್ರ್ ಯೆತಾ ಶಿವಾಯ್ ಕೊಂಕ್ಣಿ ನ್ಹಯ್.
ಹೆಂ ಕಿತ್ಯಾಕ್? ಕಸಲಿ ತಿ ಮಿಂಜಾಸ್ಕೆಚಿ ಸಾಯ್ ಜಿ ಆಮ್ಚಾ ಕೊಂಕ್ಣಿ ಲೊಕಾಂಚಾ ದೊಳ್ಯಾಂಕ್ ಮಾತ್ರ್ ಚಡ್ಲ್ಯಾ? ಜಿ ಸಾಯ್ ಹೆರ್ ಖಂಚಾಯ್ ಭಾಸಾಂಚಾ ಲೊಕಾಂಚಾ ದೊಳ್ಯಾಂನಿ ನಾಸ್ಚಿ? ಹ್ಯೇ ವಿಶಿಂ ಇಲ್ಲೊ ಆಟೊವ್ ಕರ್ಚೊ ಭೋವ್ ಗರ್ಜೆಚೊ. ಹ್ಯಾ ಚಿಂತ್ಪಾಚೆರ್ ಜರ್ತರ್ ಆಮಿಂ ಆಟೊವ್ ಕರಿನಾಸ್ತಾಂ ಹೆರ್ ಕಿತೆಂಯ್ ಕೆಲೆಂ ತರ್ ತೆಂ ’ಅಸ್ಟಮಿ ಪರ್ಭೆಕ್ ಆನಿಂ ಇಸ್ಮಾಯಿಲ್ ಸಾಯ್ಬಾಚಾ ಸಂಭಂಧಾಪರಿಂ’ ಜಾಯ್ತ್.
ಆಧ್ಲ್ಯಾ ವರ್ಸಾ ಚಲ್ಲ್ಲ್ಯಾ ಕೊಂಕ್ಣಿ ಅಭಿಯಾನಾಚಾ ವೆಳಾರ್ ಎಕ್ಲ್ಯಾ ಮಾನೆಸ್ತಾನ್ ಮ್ಹಾಕಾ ತಾಚೆ ವಿಚಾರ್ ಅಶೆ ಬರಯ್ಲೆ;
"ವಲ್ಲಿ - ತುಂ ಸಾಂಗ್ತಾಯ್ ಆಮ್ಚಾ ಬುರ್ಗ್ಯಾಂಕ್ ಕೊಂಕ್ಣಿ ಶಿಕಯಾ, ಆಮ್ಚಾ ಘರಾಂನಿ ಕೊಂಕ್ಣಿ ಉಲಯಾ... ಪುಣ್ ಮ್ಹಜಾ ಬುರ್ಗ್ಯಾಂಕ್ ಹಾಂವ್ ಕೊಂಕ್ಣಿ ಶಿಕವ್ನ್ ಬಸ್ಸಾಚೊ ಕಂಡಕ್ಟರ್ ಯಾ ರಿಕ್ಶಾ ಡ್ರಾಯ್ವರ್ ಜಾಂವ್ಕ್ ಆಶೆನಾ... ತುಜಿಂ ಭೊಗ್ಣಾಂ ಕಳಯ್" ಮ್ಹಣ್.
ಹಾವೆಂ ತಾಕಾ ದಿಲ್ಲಿ ಜಾಪ್ ಅಶಿ;
"ಆಮಿಂ ಆಮ್ಚಾ ಬುರ್ಗ್ಯಾಂಕ್ ಫಕತ್ತ್ ಪೊಯ್ಶೆ ಕರ್ಚಿಂ ಯಂತ್ರಾಂ ಕರುಂಕ್ ಶಿಕಯ್ತಾಂವ್, ತಿಂ ಕಿತೆಂಯ್ ಕರುಂದಿತ್, ಯಾ ಕಸೀಂಯ್ ಜಿಯೆಂವ್ದಿತ್ - ಆಮ್ಕಾಂ ಪರ್ವಾನಾ, ಆಮ್ಕಾಂ ಪರ್ವಾ ಆಸಾ ಫಕತ್ ತಾಂಕಾಂ ಸಮಾಜೆನ್ ’ಬರೊ’ ಮ್ಹಣ್ ವೊಲಾಯಿಲ್ಲ್ಯಾಂ ಪಯ್ಕಿ ಎಕ್ಲೊ ಮ್ಹಳ್ಯಾರ್ ’ದೊತೊರ್’, ಯಾ ’ಇಜ್ನೆರ್’, ಯಾ ’ವಕೀಲ್’ ಕೆಲ್ಯಾರ್ ಜಾಲೆಂ, ತ್ಯಾ ಖಾತಿರ್ ಕಸಲೊಯ್ ಸಾಕ್ರಿಫಿಸ್ ಕರುಂಕ್ ಆಮಿಂ ತಯಾರ್. ಪುಣ್ ಚುಕೊನ್ಯ್ ಆಮ್ಚಾ ಸಮಾಜೆನ್ ’ವಾಯ್ಟ್’ ಮ್ಹಣ್ ವೊಲಾಯಿಲ್ಲೊ ’ಡ್ರಾಯ್ವರ್’, ’ಕಂಡೆಕ್ಟರ್’, ’ಕುಲಿ’ ಜಾಯ್ನಾಯೆ. ಬರೆಂ ಚಿಂತಾಪ್ ಬರೆಂ.
ಪುಣ್ ಏಕ್ ಘಡಿ ಚಿಂತ್ಯಾಂ - ಸಮಾಜೆನ್ ಖೊಟೆ/ಬರೆ ಮ್ಹಣ್ ವೊಲಾಯಿಲ್ಲೆ ವರ್ಗ್ ಪಳೆಯಾಂ. ಸಾದ್ಯಾ ಪೊಟಾಚಾ ದುಖಿನ್ ಆಸ್ಪತ್ರೆಕ್ ಗೆಲ್ಲ್ಯಾವೆಳಾರ್ ತಾಚೆಂ ಪೋಟ್ ಚಿರುನ್ ಕಿಡ್ನಿ ಚೊರುನ್ ವಿಖ್ಚೆ ದೊತೊರ್ ಜಾವ್ಯೆತ್, ಆಮ್ಚಾ ದೇಸಾಕ್ ಎಕಾಚ್ ಘಡ್ಯೆನ್ ವಿಖ್ಚೆ ಫುಡಾರಿ ಜಾವ್ಯೆತ್, ಯಾ ಸತಾಕ್ ಫಟ್ ಕರ್ಚೆ, ಫಟಿಂಕ್ ಸತ್ ಕರ್ಚೆ ವಕೀಲ್ ಜಾವ್ಯೆತ್ - ತೆ ಹ್ಯಾ ’ಡ್ರಾಯ್ವರ್’ ಯಾ ’ಕಂಡೆಕ್ಟರ್’ ಹಾಂಚಾ ವರ್ಗಾಕ್ ಯೇನಾಂತ್. ಕಿತ್ಯಾಕ್ ಮ್ಹಳ್ಯಾರ್ ತೆ ಇಂಗ್ಲಿಶ್ ಉಲಯ್ತಾತ್, ಆಮಿಂ ಆಮ್ಚೆ ಭಾವ್ ಕೊಂಕ್ಣಿ ಉಲಯ್ತಾತ್. ಆಮ್ಚಾ ಬುರ್ಗ್ಯಾಂಕ್ ಕುಟ್ಮಾಚಿಂ ಮೊಳಾಂ ಕಳಿತ್ ನಾಂತ್ ತರ್ ವಡ್ ನಾ - ಕಾಜಾರ್ ಜಾಲ್ಲ್ಯಾ ದುಸ್ರೆ ದಿಸಾ ಡೈವೋರ್ಸ್ ದೀಂವ್, ವಡ್ ನಾ, ಅಪ್ಲಿಂ ಪೆಲಿಂ, ಸಯ್ರಿಂ-ಧಯ್ರಿಂ ಮ್ಹಳ್ಳಿ ವಳೊಕ್ ನಾತ್ಲ್ಯಾರ್ಯ್ ವಡ್ ನಾ.
ಆಮ್ಚಿಂ ಬುರ್ಗಿಂ ಇಂಗ್ಲಿಶ್ ಉಲಂವ್ದಿತ್. ಆಮ್ಚೊ ಇರಾದೊ - ಆಮ್ಚಾ ಬುರ್ಗ್ಯಾಂಕ್ ಬರಿಂ ಮನ್ಶಾಂ ಕರ್ಚಿ ಗರ್ಜ್ ಪಯ್ಲಿ, ಆನಿಂ ಬರಿ ಭಾಸ್, ಬರೆಂ ಲಿಸಾಂವ್, ಬರೆ ಶೆಗುಣ್ ಶಿಕಂವ್ಚಿ ಗರ್ಜ್ ಪಯ್ಲಿ, ಉಪ್ರಾಂತ್ ತಾಂಕಾಂ ಬರಿ ವಿಧ್ಯಾ ಶಿಕವ್ಯೆತ್. ಪುಣ್ ಆಮ್ಚಾ ವಡಿಲಾಂಕ್ ಹಾಕಾ ವೇಳ್ ಖೈಂ ಆಸಾ? ಆಮ್ಚಾ ಬುರ್ಗ್ಯಾಂನಿ ಇಂಗ್ಲಿಶ್ ಉಲಂವ್ಚಾ ಬೇಬಿ ಸಿಟ್ಟರಾಲಾಗಿಂ ವ್ಹಡ್ ಜಾಯ್ಜಯ್, ’ಕೊಕ್ಕೊ, ನೆನ್ನೆ, ಮೆಮ್ಮೆ’ ಶಿಕಂವ್ಚಿ ಬೆಬಿ ಸಿಟ್ಟರ್ ಕಂಟ್ರಿ, ತಿ ಆಮ್ಚಾ ಬುರ್ಗ್ಯಾಂಕ್ ನಾಕಾ, ಆಮ್ಚಾ ಬುರ್ಗ್ಯಾಂಕ್ ’ಪಿಸ್, ಡೇಡಿ, ಮೋಮ್’ ಶಿಕಂವ್ಚಿ ಬೆಬಿ ಸಿಟ್ಟರ್ ಜಾಯ್. ಪರ್ಗಾಂವಾಕ್ ವೆತೆಚ್ ಆಮ್ಕಾಂ ಕೊಂಕ್ಣಿ ಮೀಸ್ ರುಚಾನಾ, ಇಂಗ್ಲಿಶ್ ಮೀಸ್ ಮಾತ್ರ್ ಆಯ್ಕಾತಾ. ಇಗರ್ಜೆಂತ್ ಸಯ್ತ್ ’ದ ಲೋರ್ಡ್ ಬಿ ವಿತ್ ತೂ’ ಮ್ಹಣ್ತಾನಾ ’ಆಲ್ಸೋ ವಿತ್ ಯೂ’ ಮ್ಹಣ್ತಾಂವ್ ಶಿವಾಯ್ ’ಆಲ್ಸೋ ಬಿ ವಿತ್ ಯೂ’ ಮ್ಹಣ್ ನ್ಹಯ್.
ಕಿತೆಂ ಸಾಂಗ್ತಾಂವ್, ಕಿತ್ಯಾಕ್ ಸಾಂಗ್ತಾಂವ್ ತೆಂ ಕೊಣಾಕೀ ಕಳೊಂಕೀ ನಾ ಕಳ್ಚೆಂಯ್ ನಾ. ಆಮ್ಚಿಂ ಜಿಣಿ, ಆಮ್ಚಿಂ ಚಿಂತ್ನಾಂ ಇತ್ಲಿಂ ಯಾಂತ್ರಿಕ್ ಜಾಲ್ಯಾಂತ್. ಕಿತ್ಯಾಕ್ ಮ್ಹಳ್ಯಾರ್ ’ತುಮ್ಚೆ ಸವೆಂ ಆಸೊಂ’ ಮ್ಹಣ್ತಾನಾ ಆಮ್ಚಿ ಜಾಪ್ ’ತುಮ್ಚೆಯ್ ಸವೆಂ ಆಸೊ’ ಮ್ಹಳ್ಳಿ ಜಾಪ್ ಆಸಾ ತಶೆಂ ಸಾಂಗ್ಚೆಂ.
ಆಮಿಂ ಹೈ ಸೊಸಾಯ್ಟಿಚಿಂ ಮನ್ಶಾಂ, ಕಾರಾಂನಿ ಯೆಂವ್ಚಿಂ, ಬಂಗ್ಲ್ಯಾಂನಿ ರಾಂವ್ಚಿಂ, ಸೂಟ್ ಬುಟಾರ್, ಅರ್ಧೆಂ ನಾಗ್ಡೆಂ ನೆಸೊನ್, ಗಲಾಟೊ ಆಮ್ಚಿ ಸಂಸ್ಕ್ರತಿ, ಪಿಯೊವ್ಣೆಂ, ಬೆಬ್ದೆಪಣ್ ಆಮ್ಚೊ ಸಂಕೇತ್. ಪೊಜ್ಡೆ ನಾಚ್ ಆಮ್ಚಿಂ ಫೆಸ್ತಾಂ, ಹೆಂ ಸರ್ವ್ ವೆವಸ್ತಿತ್ ರಿತಿನ್ ಚಲ್ತಾ ಆಮ್ಚಾ ಜಿಣ್ಯೆಂತ್, ಆಮ್ಚಿ ಹೈ ಸೊಸಾಯ್ಟಿ, ಆಮ್ಚಾ ಸಳಾವಳೆಂತ್ ಫಕತ್ ಉಂಚ್ಲ್ಯಾ ವರ್ಗಾಚಿಂ ಮಾತ್ರ್ ಆಸಾತ್, ಕೊಂಕ್ಣಿ ಉಲಂವ್ಚೆಂ, ಕೊಂಕ್ಣಿ ವಾಸ್ಚೆಂ ಕಾಮ್ ಆಯಾ-ಬೊಯಾ ಯಾ ಘರ್ಚಾ ಮೆಸ್ತಾಚೆಂ ಕಾಮ್." ಹ್ಯಾ ಜಾಪಿಕ್ ಆಯ್ಚಾ ದಿಸಾ ಪರ್ಯಾಂತ್ ತ್ಯಾ ಮಾನೆಸ್ತಾಚಿ ಜಾಪ್ ನಾ.
ಆಮ್ಕಾಂ ಚಿಂತುಂಕ್ ನಾಕಾ, ಆಮ್ಕಾಂ ಸಂಸಾರಿ ರಾಟಾವಳ್ ಆಸಾ, ಆಮಿಂ ಥಕ್ತಾಂವ್, ಆಮ್ಕಾಂ ಕಾಮಾಚಿ ರಾಟಾವಳ್ ಆಸಾ, ಪುರಾಸಣ್ ಆಸಾ, ಆಮ್ಕಾಂ ಆಸ್ಲ್ಲಿ ತಕ್ಲಿ ಫಡಾಪಡ್ ಆಸಾ. ಕೊಂಕ್ಣೆಚೊ ವಾವ್ರ್ ಕರುಂಕ್ ಜಾಯ್ತೆ ಬೆಕಾರಿ ಆಮ್ಚೆ ಮಧೆಂ ಆಸಾತ್.
’ಕಾಂಯ್ ಕಾಮ್ ನಾತ್ಲ್ಲೊ ಸುತಾರ್ ಆಪ್ಲ್ಯಾಚ್ ಬುರ್ಗ್ಯಾಚೆ ಕುಲೆ ತಾಸ್ತಾಲೊ ಖೈಂ’ ತಶೆಂ ಹೆ ಕಾಮ್ ನಾತ್ಲ್ಲೆ ಥೊಡೆ ’ಕೊಂಕ್ಣಿ, ಕೊಂಕ್ಣಿ’ ಮ್ಹಣ್ ಕೆದಾಂತ್ ಮಾಣ್ಕೆ ಉಡ್ಲ್ಲೆಪರಿಂ ಉಡ್ತಾತ್. ಉಡೊಂದಿ - ಆಮಿಂ ತಾಂಚಿ ಸೊಭಾಯ್ ಪಳೆಯಾಂ’.
ನಿರಾಸ್ವಾದೆಚಿಂ ವೊಕ್ಲಾಂ ಘಾಲ್ನ್ ಪೆಳೆಲ್ಯಾರ್ ಸಗ್ಳೊ ಸಂಸಾರ್ ವೆಗಿಂಚ್ ಅಖೇರ್ ಜಾಂವ್ಚೊ ದಿಸೊನ್ ಯೆತಾ, ತರ್ಯ್ ಆಮಿಂ ಎಕಾ ಮನಾನ್ ಹೆಂ ಚಿಂತಾಪ್ ವೊರಾವ್ನ್ ಪಳೆಂವ್ಕ್ ಆಸಾ. ಆಧ್ಲ್ಯಾ ವರ್ಸಾ ಆಮಿಂ ಚಿಂತ್ಲ್ಲ್ಯಾಚಾಕೀ ಚಡ್ ಸಹಕಾರ್ ಆಮ್ಚಾ ಕೊಂಕ್ಣಿ ಲೊಕಾಂ ಥಾವ್ನ್ ಮೆಳ್ಳಾ. ಹ್ಯಾ ಖಾತಿರ್ ಹಾಂವ್ ಕುವೆಯ್ಟ್ಚಾ ಸರ್ವ್ ಕೊಂಕ್ಣಿ ಲೊಕಾಂಕ್ ಗೌರವಾನ್ ತಕ್ಲಿ ಭಾಗಾಯ್ತಾಂ. ತರ್ಯ್ ಆಮ್ಕಾಂ ಜ್ಯೆ ಕಿತೆಂ ಆಯ್ಕೊಂಕ್ ಮೆಳ್ಳಾಂ, ಭೊಗುಂಕ್ ಮೆಳ್ಳಾಂ ತೇಂಯ್ ಆಮ್ಚಾಚ್ ಮನ್ಶಾಂ ಥಾವ್ನ್ - ತಿ ಏಕ್ ಪರಿಕ್ಶಾ ಮ್ಹಳ್ಳ್ಯಾ ಅರ್ಥಾನ್ ಆಮಿಂ ಘೆತ್ಲಾಂ.
ಕಸ್ಟಾಂಕ್ ಆಮಿಂ ಭಿಯೆನಾಂವ್. ಕಸ್ಟ್ ಧಾರಾಳ್ ಯೇಂವ್, ಕಸ್ಟಾಂ ಪಟ್ಲ್ಯಾನ್ ಯೆಂವ್ಚಾ ಸುಖಾಚೊ ಅತ್ರೆಗ್ ಆಮಿಂ ನಿಯಾಳ್ತಾನಾ ಕಾಂದ್ಡ್ಯಾಂಕ್ ಆಸ್ಚಾ ಎಕಾ ಪದಾಚೊ ಉಡಾಸ್ ಯೆತಾ;
"ಕಸ್ಟ - ನಸ್ಟಗಳು ಬರಲಿ ದೇವರ ಕೃಪೆಯೊಂದಿರಲಿ"
ಕೊಂಕ್ಣಿ ಅಭಿಯಾನ್ ಸಮಿತಿ ಹ್ಯಾ ವರ್ಸಾಯ್ ಕೊಂಕ್ಣಿ ಲೊಕಾಲಾಗಿಂ ವೆತೆಲಿ, ತಾಂಚೆ ವಿಚಾರ್ ಆಯ್ಕೊನ್ ತಾಂಚಾ ಸುಚನಾಂಕ್ ಆಯ್ಕತೆಲಿ, ಕೊಂಕ್ಣಿ ಲೊಕಾಲಾಗಿಂ ವೆತಾನಾ ಕೊಂಕ್ಣಿ ಬುಕಾಂಕ್, ಕೊಂಕ್ಣಿ ಕೆಸೆಟಿಂಕ್ ಘೆವ್ನ್ ವೆತೆಲಿಂ, ಕೊಂಕ್ಣಿ ಪ್ರಚಾರ್ ಜಾಂವ್ - ಇತ್ಲೆಂಚ್ ಆಮಿಂ ಆಶೆತಾಂವ್ ಶಿವಾಯ್ ಆಮಿಂ ಅತಿರೇಕ್ವಾದಿ (Extremist) ನ್ಹಯ್. ಹೆರ್ ಖಂಚಾಯ್ ಭಾಸಾಂನಿ ಉಲಯಾ, ವಾಪಾರ್ ಕರಾ ತರ್ಯ್ ಕೊಂಕ್ಣಿ ಭಾಸೆಕ್ ಕಿರ್ಕೊಳ್ ಭಾಸ್ ಮ್ಹಣ್ ಲೆಕಿನಾಕಾತ್.
ಹೆಂಚ್ ಆಮ್ಚೆಂ ಮಾಗ್ಣೆಂ ಆನಿಂ ಹೆಚ್ ದಿಶೆನ್ ಆಮ್ಚೊ ವಾವ್ರ್ ಚಲ್ತಲೊ. ಎಕಾ ಮನಾನ್, ಎಕಾ ಉದ್ದೇಶಾನ್ ವಾವ್ರ್ ಕರ್ಯಾಂ, ಲ್ಹಾನ್ ವ್ಹಡ್ ಮ್ಹಳ್ಳೆ ಭೇದ್ ಆಮ್ಚೆ ಮಧೆಂ ನಾಕಾತ್. ಆಮಿಂ ಸಗ್ಳಿಂ ಏಕ್, ಎಕಾ ಆವಯ್ಚಿಂ ಬುರ್ಗಿಂ; ಕಿತ್ಯಾಕ್ ಮ್ಹಳ್ಯಾರ್ ಆಮ್ಚೊ ಧ್ಯೇಯ್ ಜಾವ್ನಾಸಾ ’ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್’.
ಪುಣ್ ಸುರ್ವಾತ್ ಜಾತೆಚ್ ಕಾಮಾಂ ಜಾಯ್ನಾಂತ್, ಕಾಮಾಂ, ತೀಂಯ್, ಕೊಂಕ್ಣೆಚಿಂ ಕಾಮಾಂ ಮ್ಹಳ್ಯಾರ್ ನಿಜಾಯ್ಕೀ ಏಕ್ ಖುರ್ಸಾಚಿ ವಾಟ್ ಮ್ಹಣ್ಯೆತ್. ತರ್ಯ್ ಕ್ರಿಸ್ತಾಕ್ ವರ್ತೊ ಕೆಲ್ಲ್ಯಾ ಖುರ್ಸಾಕ್ ಪಾತ್ಯೆಂವ್ಚಿ ಗರ್ಜ್ ಆಸಾ, ಕಾಂಟ್ಯಾಂಚೊ ಮುಕುಟ್, ಜೆರ್ಭಾಂದಾಚೆ ಮಾರ್, ಶಿಂಪಿ, ಚಾಬುಕಾಂಚೆ ಮಾರ್, ಉತ್ರಾಂ-ಗಾಳಿ ಹ್ಯಾ ಸರ್ವಾಂಕ್ ಆಮಿಂ ಸೊಸುಂಕ್ ಸಕ್ತಾಂವ್ - ಕಿತೆಂ ಗರ್ಜೆಚೆಂ ಮ್ಹಳ್ಯಾರ್ ಸಿರೆನಾಚೆ ಸಿಮಾಂವ್. ಫಕತ್ ಥೊಡ್ಯಾ ಪಾವ್ಲಾಂಕ್ ತರ್ಯ್. ತವಳ್ ಮಾತ್ರ್ ಹಿ ಖುರ್ಸಾಚಿ ವಾಟ್ ಫಳಾಭರಿತ್ ಜಾಯ್ತ್.
ಆಮಿಂ ಸೆವಾ ನ್ಹಯ್ ವಾವ್ರ್ ಕರ್ಯಾಂ
ಸೆವಾ ಕರ್ಚಿ ಪಿಡೆಸ್ತಾಂಚಿ ಆನಿಂ ಗತ್ಆಧಾರ್ ನಾತ್ಲ್ಲ್ಯಾಂಚಿ ಮಾತ್ರ್, ಕೊಂಕ್ಣಿ ಎದೊಳ್ ತ್ಯಾ ಸ್ತಿತೆಕ್ ಪಾವೊಂಕ್ನಾ ದೆಕುನ್ ಆಮಿಂ ಕೊಂಕ್ಣೆಚಿ ಸೆವಾ ಕರ್ಚಿ ನಾಕಾ. ಬಗಾರ್ ವಾವ್ರ್ ಕರ್ಯಾಂ, ಎಕಾ ಮನಾಂತ್, ಎಕಾಮೆಕಾ ಹಾತಾಕ್ ಹಾತ್ ದಿವುನ್ ವಾವ್ರ್ ಕರ್ಯಾಂ. ಆಮ್ಚಿ ವಾಟ್ ಮುಖಾರ್ ಆಸಾ ದೆಕುನ್ ಪಾಟಿಂ ಪಳೆಂವ್ಚೆಂ ನಾಕಾ. ಆಮ್ಚಿಂ ಕಾಮಾಂ ಕರುನ್ಂಚ್ ಯಾ ಶಿವಾಯ್ ಆಮಿಂ ಎದೊಳ್ ಕಿತೆಂ ಕೆಲಾಂ ಮ್ಹಳ್ಳೆಂ ಲೇಕ್ ಪಳೆಂವ್ಕ್ ಯಾ ದೀಂವ್ಕ್ ವೆಚೆಂಚ್ ನಾಕಾ.
ಪ್ರಗತೆಚಾ ಪಾವ್ಲಾಂನಿ ಆಮ್ಚೆಂ ಕೊಂಕ್ಣೆತೆವ್ಶಿಲೆಂ ಚಿಂತಾಪ್ ಸಂಕೀರ್ಣ್ ಜಾವ್ನ್ ವೆತಾ ಮ್ಹಣ್ ವಯ್ರ್ ಹಾಂವೆಂ ಸಾಂಗ್ಲಾಂ; ಹ್ಯಾ ಸಂಕೀರ್ಣತೆಚಿಂ ಕಾರಾಣಾಂ ಸೊಧುಂಕ್ ವೆಚಿಂ ತರ್ ಮೆಳ್ಚೊ ಅಢೂಕ್ ಜಾಪಿ ಜಿಯಾಯ್ಕೀ ನಿರಾಶೆಚೊ ತರ್ಯ್ ನಿರಾಶಿ ಸುಸ್ಕಾರ್ ಆಮಿ ಸೊಡ್ಚಿ ಗರ್ಜ್ ನಾ. ಬಗಾರ್ ಆತಾಂ ತರ್ಯ್ ವೇಳ್ ಉತ್ರೊಂಕ್ನಾ ಮ್ಹಳ್ಳೆಂ ಚಿಂತಾಪ್ ಮತಿಂತ್ ದವ್ರುನ್, ಕೊಂಕ್ಣೆಚೆಂ ಕಾಮ್ ಮುಖಾರುನ್ ವರ್ಚೆಂ ಮಿಸಾಂವ್ ಹಾತಿಂ ಧರುಯಾಂ.
ಕೊಂಕ್ಣೆಕ್ ಕೊಣೆ ತಾರುಂ ಕೆಲಾಂ ವ್ಹಾಳಾಂತ್ ಬುಡ್ಚಾ ವಗ್ತಾಂ,
ಕೊಂಕ್ಣೆಕ್ ಕೊಣೆ ನಿಸಣ್ ಕೆಲ್ಯಾ ಸಮಾಜೆಂತ್ ವಯ್ರ್ ಯೆಂವ್ಚಾಕ್,
ಕೊಂಕ್ಣೆಕ್ ಕೊಣೆ ವಾತ್ ಕೆಲ್ಯಾ ಆಪ್ಲ್ಯಾ ಸಂಸಾರಾಚೊ ಕಾಳೊಕ್ ಧಾಂವ್ಡಾಂವ್ಚಾಕ್,
ಕೊಂಕ್ಣೆಕ್ ಕೊಣೆ ಖುಂಟೊ ಕೆಲಾ ಆಪ್ಲಾ ಜಾಲಾಕ್ ನಿತಳ್ ಕರ್ಚಾಕ್,
ಪುಣ್ ಹ್ಯಾ ಸರ್ವ್ ಸಂದಿಗ್ದ್ ಪರಿಗತೆಂಕ್ ಮಿಕ್ವೊನ್ ಅಜೂನ್ ಕೊಂಕ್ಣಿ ಜಿವಿಚ್ ಉರ್ಲ್ಯಾ, ತಾರುಂ ಜಾವುನ್, ನಿಸಣ್ ಜಾವುನ್, ವಾತ್ ಜಾವುನ್. ಆಜ್ ಕಿತೆಂ ತಿ ಅಶೆತಾ? ಫಕತ್ ಅಪ್ಲ್ಯಾ ಉಸ್ಕ್ಯಾರ್ ಖೆಳೊನ್ ವ್ಹಡ್ ಜಾಲ್ಲ್ಯಾ ಕೊಂಕ್ಣಿ ಸುಪುತ್ರಾಂ ಥಾವುನ್ ನಿಮಾಣೊ ನಿಸಾಚೊ ಥೆಂಬೊ ನ್ಹಯ್, ಉದ್ಕಾಚಾ ಶೆಳಿಚೊ ಏಕ್ ಘೊಟ್ ಮಾತ್ರ್.
ಸರ್ವ್ ಬರೆಂಚ್ ಮಾಗ್ತಾಂ ತುಮ್ಕಾಂ, ಕೊಂಕ್ಣೆಚೆಂ, ಕೊಂಕ್ಣಿ ಭಾಸ್ಯ್ ಉಲಂವ್ಚಾಂಚೆಂ ಸದಾಂಚ್ ಬರೆಂ ಜಾಂವ್, ಕೊಂಕಣಿ ಥಂಯ್ ಸದಾಂಚ್ ಖಾಲ್ತೊ ಸೆವಕ್,
ವಲ್ಲಿ ಕ್ವಾಡ್ರಸ್, ಅಜೆಕಾರ್
ಏಕ್ ಕೊಂಕ್ಣಿ ಸೆವಕ್ - ಕೊಂಕ್ಣಿ ಅಭಿಯಾನ್ ಸಮಿತಿ
[ಹೆಂ ಲೇಖನ್ 2004 ನವೆಂಬರ್ - ತಾರಿಕೆರ್ ಕುವೆಯ್ಟಾಂತ್ ಜಾಲ್ಲ್ಯಾ ದುಸ್ರ್ಯಾ ಕೊಂಕ್ಣಿ ಅಭಿಯಾನ್ ಸಮಿತಿಚಾ ಜಮಾತೆರ್ ವಾಚುನ್ ಸಾಂಗ್ಲಾಂ]
ಕೊಂಕ್ಣಿ ಅಭಿಯಾನ್ ಸಮಿತಿಚಾ ವಾವ್ರಾಕ್ ಲಗ್ತಿ ಜಾಲ್ಲಿಂ ಲೇಖನಾಂ
ಕೊಂಕ್ಣಿ ಅಭಿಯಾನ್ ಸಮಿತಿಕ್ ಆಯಿಲ್ಲೆ ಸಂದೇಶ್-ಅಭಿಪ್ರಾಯ್
ಕೊಂಕ್ಣಿ ಅಭಿಯಾನ್ ಸಮಿತಿ ಮ್ಹಳ್ಯಾರ್ ಕಿತೆಂ? - ಲೇಖನ್
ಕೊಂಕ್ಣಿ ಭಾಸೆಚಿ/ಪತ್ರಾಂಚಿ ಆಯ್ಚಿ ಪರಿಗತ್ - ಲೇಖನ್
ಸ್ಪಿರಿತಾಚೊ ವಾವ್ರ್ ಖಂಡಿತ್ ಫಳ್ ದಿತಾ - ಲೇಖನ್
ಕೊಂಕ್ಣಿ ಅಭಿಯಾನ್ ಸಮಿತಿಚೊ ಎದೊಳ್ಚೊ ವಾವ್ರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications