ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಕಥಾ: ಖುನಿ
ಮೆಲ್ವಿನ್ ಪಿಂಟೊ ನೀರುಡೆ, ಕೊಂಕ್ಣೆಂತ್ ಏಕ್ ಕವಿ ಜಾವ್ನ್, ಕಾಣ್ಯೆಗಾರ್ ಜಾವ್ನ್, ವಿಮರ್ಶಕ್ ಜಾವ್ನ್ ಅಪ್ಲಿ ಪ್ರಭುದ್ದತಾ ಧಾಖಯಿಲ್ಲ್ಯಾ ಹಾಣೆಂ. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004 ಂತ್ ’ತೇಂಪ್ಲ್’ ಕಾಣ್ಯೆಕ್ ದುಸ್ರೆಂ ಇನಾಮ್, ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಂತ್ ’ಜಾಗೊ’ ಕಾಣ್ಯೆಕ್ ವೊರಾಯ್ಣಾರಾಂಚೆ ಶಿಫಾರಸ್ ಜೊಡ್ಲ್ಯಾ, ತಶೆಂಚ್ ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಂತ್ ’ದಿವೊಡ್’ ಕಾಣ್ಯೆಕ್ ದುಸ್ರೆಂ ಇನಾಮ್ ಲಾಭ್ಲಾಂ. ಕೊಂಕ್ಣಿ ಕಾಣ್ಯಾಂಕ್ ನವೆಂಸಾಂವ್ ಹಾಡ್ಚಾ ಮಿಸಾಂವಾಕ್ ಮೆಲ್ವಿನ್ ಪಿಂಟೊ ಥಾವ್ನ್ ಭರ್ಪೂರ್ ದೇಣ್ಗಿ ಆಶೆವ್ಯೆತ್. [ದುಖಾಂ ದಾಯ್ಜಾಚೆರ್ ಆಸ್ಚಿ ಅನ್ಯೇಕ್ ಕಾಣಿ]. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2007 ಂತ್ ’ಖುನಿ’ ಕಾಣ್ಯೆಕ್ ದುಸ್ರೆಂ ಇನಾಮ್ ಲಾಭ್ಲಾಂ.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2007 ಂತ್ 3000 ರುಪ್ಯಾಂಚೆಂ ದುಸ್ರೆಂ ಇನಾಮ್ ಜೊಡ್ಲ್ಲಿ ಕಾಣಿ]
ಮೆಲ್ವಿನ್ ಪಿಂಟೊ
ಏಕ್ ಖುನಿ ಜಾಂವ್ಚ್ಯಾರ್ ಆಸಾ - ಖಂಡಿತ್ ಮುಕ್ಲ್ಯಾ ಏಕ್-ದೋನ್ ದಿಸಾಂನಿ. ಅಶೆಂ ಮ್ಹಣ್ ಸೇಸುನ್ ನಿರ್ದಾರ್ ಕರ್ನ್ ಜಾಲಾ. ತಶೆಂ ಕಾಂಯ್ ಸೇಸು ಖುನಿ ಕರ್ಚ್ಯಾ ಕಾಲೆತಿಚೊ ನ್ಹಂಯ್. ತ್ಯಾ ದಿಶಿಂ ತಾಕಾ ಕಾಂಯ್ ಅನ್ಬೊಗ್ ಆಸಾ? ಕಾಂಯ್ ನಾ. ಪುಣ್ ಖುನಿ ಕರುಂಕ್ ಅನ್ಬೊಗ್ ಕಿತ್ಯಾಕ್? ಸಾತ್ ಇಂಚಾಂಚಿ ಮಾತಿ ಕೆಲ್ಲಿ ಬಡ್ಡ್, ಪುಣ್ ಪಾಜ್ಲ್ಲಿ, ಚುರಿ ಏಕ್ ಪಾವ್ಟಿಂ ಮನ್ಶ್ಯಾಚ್ಯಾ ಪಾಟಿ ಕಣ್ಯಾಂತ್ ರಿಗಯ್ಲ್ಯಾರ್ ಸಯ್! ಭಾಯ್ರ್ ಕಾಡ್ಚಿ ಗರ್ಜ್ಚ್ ನಾ; ಮನಿಸ್ ಖಾಲಿಚ್. ಅಶೆಂ ಮ್ಹಣ್ ಪಾಟ್ಲ್ಯಾ ಥೊಡ್ಯಾ ಘಂಟ್ಯಾಂ ಥಾವ್ನ್ ಚಿಂತುನ್ಂಚ್ ಆಸ್ಚ್ಯಾ ಸೇಸುನ್ ಆಕೇರಿಕ್ ಹಳ್ತಾರ್ ಮತ್ ಘಟ್ ಕರ್ನ್ ಜಾಲ್ಯಾ. ಆನಿ ಫಾಲ್ಯಾಂ ಭಿತರ್ ಗಾಂವಾಂತ್ ಎಕ್ಲ್ಯಾಚೆಂ ಮೊಡೆಂ ಪಡ್ತಾ.
ಸಾಕಾಳಿಂ ಪಟೇಲಾಚ್ಯಾ ಬಾಕಿಮಾರಾಂತ್ ಹರ್ಶೆಂಚಾಬರಿಚ್ ಕಾಲ-ಬೊಲ್ಲಚೆಂ ಜೋತ್ ಬಾಂದುನ್ ನಾಂಗ್ರಾಚೆಂ ಹಿತಾಳೆಂ ಜುಂವಾಕ್ ಶಿರ್ಕಾವ್ನ್ ಪುಡ್ಕಾಯ್ ಹಾತಿಂ ಧರ್ಲ್ಲ್ಯಾ ಸೇಸುಚ್ಯಾ ಜಿವಾಂತ್ ಹುರುಪ್ಯೀ ನಾತ್ಲ್ಲೊ, ವೊರೆಲಾಂ ಘಾಲುಂಕ್ ತಾಳೊಯೀ ನಾತ್ಲ್ಲೊ. ಅಶೆಂ ಕೆದಿಂಚ್ ಜಾಲ್ಲೆಂನಾ. ಪಟೇಲಾಚ್ಯಾ ಶೆತಾಂತ್ ಕಾಮಾಕ್ ಲಾಗೊನ್ ಆತಾಂ ವರ್ಸಾಂ ಬಾರಾ ಉತರ್ತಾತ್. ಆಪ್ಲೆಂಚ್ ಶೆತ್ ಕಶೆಂ ಸುಡ್ಸುಡಾಯೆನ್ ಘೊಳ್ಳಾ ಸೇಸು. ಕಾಲ-ಬೊಲ್ಲ ಆಪ್ಲೆಚ್ ಜೊವ್ಳೆ ಪೂತ್ ಮ್ಹಳ್ಳ್ಯಾಬರಿ ಸಾಂಬಾಳ್ಳ್ಯಾತ್ ತಾಣೆಂ. ಪುಣ್ ಆಜ್ ಮಾತ್ರ್ ತಾಚ್ಯಾ ತಾಳ್ಯಾಂತ್ ವೊರೆಲಾಂ ನಾಂತ್, ಹಾತಾ-ಪಾಂಯಾಂನಿ ಬಳ್ ನಾ. ರೆಡೆಯೀ ಸೇಸುಚಿಂ ಗಾನಾಂ ನಾಸ್ತಾಂ ನಾಂಗೊರ್ ವೊಡುಂಕ್ ಆಯ್ಕಾನಾಂತ್. ದೆಕುನ್ ಕೆದ್ನಾಂಯೀ ಬೊಡಿ ದಾಕಯ್ನಾತ್ಲ್ಲೊ ಸೇಸು ಆಜ್ ರೆಡ್ಯಾಂಚ್ಯಾ ಪಾಟಿರ್ ಬರೆಂಚ್ ವೊಡ್ತಾ. ರೆಡೆ ಬೊಲ್ಚೆತಾತ್ ಭಿರ್ಮತ್. ಕುಶಿಚ್ಯಾ ಗಾದ್ಯಾಂತ್ ನೇಜ್ ಕಾಡುಂಕ್ ದೆವ್ಲ್ಲಿಂ ಕಮಲ, ಎಲ್ಲಮ್ಮ, ಮದಿರೆ ಹೊ ಡ್ರಾಮಾ ಪಳೆವ್ನ್ “ಓ ಸೇಸು, ದಾಯೆಗ್ ಹಾಕುವಾಯಾ ಎರ್ಲೆಗ್!” ಮ್ಹಣ್ ಬೊಬಾಟ್ತಾತ್.
ಸೇಸುಕ್ ಸೊಸಾನಾ. ಕಿತ್ಯಾಕ್ಗೀ ದೊಳ್ಯಾಂ ಖಾಂಚಿಂನಿ ದುಕಾಂ ಫುಟ್ತಾತ್. ತ್ಯಾ ದುಕಾಂ
ಮದೆಂ ತಾಳ್ಯಾಂತ್ ಥಾವ್ನ್ ದುಕಾಳ್ ವೊರೆಲಾಂ ಉಮಾಳೊನ್ ಯೆತಾತ್. ರೆಡೆ
ಸಮಾಧಾನ್ ಜಾತಾತ್. ಪುಣ್ ಸೇಸುಕ್ ಮಾತ್ರ್ ಕಾಳಿಜ್ ಫುಟೊನ್ ಫಾಸಾಳ್ನ್ ಗೆಲ್ಲೊ ಅನ್ಬೊಗ್ ಜಾತಾ.
ಅಶೆಂ ಕಿತ್ಯಾಕ್ ಕೆಲೆಂ ರಾಂಡೆನ್? ಕಿತ್ಲಿಂ ಸ್ವಪ್ಣಾಂ ದವರ್ಲ್ಲಿಂ ಆಪ್ಣೆಂ? ಜೊಗಾಸಾಣೆನ್ ಎಕೆಕ್ ರುವಿ ಎಕ್ಟಾಂವ್ನ್ ಯೆಂವ್ಚ್ಯಾ ಜಾರ್ದೊ
ಮಹಿನ್ಯಾಂತ್ ಫುಲಾಂ ಮಾಳ್ನ್ ಮಾರ್ನೆಮಿಕಟ್ಟೆಚ್ಯಾ ಇಸ್ವಾಚ್ಯಾ
ಪುತಾ ಎಂಕ್ಟಲಾಗಿಂ ಕಾಜಾರ್ ಕರ್ನ್ ದೀಜಯ್ ಮ್ಹಣ್ ಚಿಂತ್ಲ್ಲೆಂ.
ಪುಣ್ ತಿತ್ಲ್ಯಾ ಭಿತರ್ ಹಾಕಾ ಖಂಯ್ಚೊ ಅಂಗಾಲಾಪ್ ಲಾಗ್ಲೊಗೀ?
ಪೋಟ್ ಭರ್ನ್ಯೀ ಜಾಲೆಂ. ಆಜ್ ಸಾಕಾಳಿಂ ಫುಡೆಂ ಕಠೀಣ್
ವೊರೊಡ್ ಕಾಡ್ತಾನಾ ಆಪ್ಣೆಂ ಚಿಂತ್ಲೆಂ ಕಾಂಯ್ ಪೊಟ್ಕಾಣಿ ಆಸ್ತೆಲಿ
ಮ್ಹಣ್. ಪುಣ್ ಉಪ್ರಾಂತ್ ಬಾಯ್ಲೆನ್ ಖಬಾರ್ ದಿತಾನಾ ಅಸ್ಕತ್
ಪಾಕೆಂಚ್ ಆಂಗಾರ್ ಕೊಸಾಳ್ನ್ ಪಡ್ಲ್ಲ್ಯಾಬರಿ ಜಾಲ್ಲೆಂ.
"ಆಯ್ಕಾಲೆಂಯ್ವೇ ತುವೆಂ? ಕೆಲಾಂ ಪಳೆ ದುವೆನ್ ಕರ್ಮ್! ಖಂಯ್ಗೀ ವಚೊನ್ ಚೋರ್ನ್ ಖಾವ್ನ್ ಆಯ್ಲಾಂ. ಕಾಡ್ತಾ ಪಳೆ ವೊರೊಡ್ ಆತಾಂ!"
ಸೇಸು ಪಯ್ಲೆಂ ಪಾತ್ಯೆಲೊನಾ. ಪುಣ್ ಉಪ್ರಾಂತ್ ದುವೆಲಾಗಿಂ ವಿಚಾರ್ ಕಾಡ್ತಾನಾ ತೆಂ ಒಪ್ವಾಲೆಂ. “ಕೋಣ್ಗೋ ತೊ ಹಡ್ಬೊ?” ಮ್ಹಣ್ ವಿಚಾರ್ಲ್ಲ್ಯಾಕ್ ತೆಂ ಸಾಂಗೊಂಕ್ ನಾರ್ಗಾಲೆಂ. ಕೊಸ್ತಾನಾ ರೆಡ್ಯಾಂಕ್ ವಾಪಾರ್ಚ್ಯಾ ತಾಸ್ಲ್ಲ್ಯಾ ಕಾದ್ರ್ಯಾಚ್ಯಾ ಬೊಡಿಯೆನ್ ಸರ್ಸರಿತ್ ಚಾರ್ ಘಾಲ್ತಾನಾ, ಬೊಣ್ಕ್ಯಾನ್ ಆಪ್ಣಾಕ್ ವಾಯ್ಟ್ ಕೆಲೆಂ ಮ್ಹಣಾಲಾಗ್ಲೆಂ.
ಬೊಣ್ಕ್ಯಾನ್ ವಾಯ್ಟ್ ಕೆಲೆಂ?
ಘಡ್ಯೆಕ್ ಅವಾಕ್ಕ್ ಜಾಲ್ಲೊ ಸೇಸು. ತಾಕಾ ಪಾತ್ಯೆಂವ್ಕ್ ಜಾಲೆಂನಾ.
ಬೊಣ್ಕ್ಯಾನ್ ಎಕಾ ಮ್ಹಾರಾಂಚ್ಯಾ ಚೆಡ್ವಾ ಸಂಗಿ ವಾಯ್ಟ್ ಆದಾರ್ಚೆಂ ಧಯ್ರ್ ಘೆತ್ಲೆಂ ತೆಂ ಚಿಂತಾನಾ ತಾಕಾ ದೊಳ್ಯಾಂಕ್ ಕಾಳೊಕ್ ಆಯಿಲ್ಲೊ. ವರ್ಸಾಂ ವರ್ಸಾಂ ಥಾವ್ನ್ ತಾಂಚೆ ಥಾವ್ನ್ ಕೀಳ್ ಮ್ಹಣ್ ಲೆಕಾ ಭಾಯ್ರ್ ಉರ್ಲ್ಲ್ಯಾ ಲೊಕಾ ಮದ್ಲ್ಯಾ ಎಕಾ ಚಲಿಯೆ ಸಂಗಿ ಬೊಣ್ಕ್ಯಾನ್ ಅತ್ಯಾಚಾರ್ ಆದಾರ್ಲೊ ತೆಂ ಒಪುನ್ ಘೆಂವ್ಚೆಂ ತರ್ಯೀ ಕಶೆಂ?
ಚೆಡ್ವಾಕ್ ಮಾರ್ಚೆ ಮಾರ್ ಘಾಲ್ಲೆ ವ್ಹಯ್. ಪುಣ್ ತಶೆಂ ಮ್ಹಣ್ ತಾಕಾ ಲಗಾಡ್ ಕಾಡುಂಕ್ ಜಾತಾ? ಕಿತ್ಲೆಂ ಮ್ಹಳ್ಯಾರ್ಯೀ ತೆಂ ಆಪ್ಣಾಚಿ ದುವ್. ಆಟಿಂತ್ಲ್ಯಾ ಎಕಾ ಆಯ್ತಾರಾ ಭುಂಯ್ ಪಡ್ಲ್ಲ್ಯಾ ತಾಕಾ ಅಯ್ತು ಮ್ಹಣ್ ಮೊಗಾನ್ ನಾಂವ್ ದಿಲ್ಲೆಂ. ಪುಣ್ ಅಶೆಂ ಆಪ್ಣಾಕ್ ಧಗೊ ದೀತ್ ಮ್ಹಣ್ ಚಿಂತುಂಕ್ ನಾತ್ಲ್ಲೆಂ ಸೇಸುನ್. ತಾಚಿ ಮತ್ ಪಿಸಾಂತುರ್ ಜಾಲ್ಲಿ.
ಆಜ್ ಕೊಸ್ಲ್ಲೆಂ ಸಮಾ ಜಾಂವ್ಕ್ ನಾತ್ಲ್ಲೆಂ. ರೆಡ್ಯಾಂಚ್ಯಾ ಆಂಗಾರ್ ಮಾರಾಂಚೊ ಶಿಂವೊರ್ ಪಡೊನ್ ರಗಾತ್ ಕಿಂಡೆಲ್ಲೆಂ. ಪಟೇಲ್ ಕಾಂಯ್ ಪಳೆತ್ ತರ್ ಆಪ್ಣಾಚೆ ಹಾಲ್ ಜಾತಾತ್ ಖಂಡಿತ್. ಸೇಸುನ್ ರೆಡ್ಯಾಂಕ್ ವ್ಹಾಳಾಕ್ ವರ್ನ್ ನಿತಳ್ ಕೆಲೆಂ. ಚರಂವ್ಕ್ ಸೊಡ್ಚ್ಯಾ ಪಯ್ಲೆಂ ರಗತ್ ಕಿಂಡೆಲ್ಲ್ಯಾಕಡೆ ಕಾಯ್ಬೆವಾಚೆಂ ತೇಲ್ ಪುಸ್ಲೆಂ. ಆಂಗಾರ್ ಸಗ್ಳ್ಯಾ ತಿಳೆಲ್ ತೇಲ್ ರಗಡ್ಲೆಂ. ರೆಡ್ಯಾಂಕ್ ಕುಮೆರಿಂತ್ ಸೊಡ್ನ್ ಸೇಸುಯೀ ವ್ಹಾಳಾಂತ್ ನಾಂವ್ಕ್ ದೆಂವ್ಲೊ. ಮತಿಂತ್ ದುವೆಚಿಂಚ್ ಚಿಂತ್ನಾಂ.
ಆತಾಂ ಕಿತೆಂ ಕರ್ಚೆಂ? ಚಿಂತಿಲಾಗ್ಲೊ ಸೇಸು. ಕೀಳ್ ಜಾತಿಂತ್ ಜಲ್ಮಾಲ್ಲೊಂ ತರ್ಯೀ ಮರ್ಯಾದೆನ್ ಜಿಯೆಲಾಂ. ಚವ್ಗಾಂ ಭುರ್ಗ್ಯಾಂಕ್ ಮೊಗಾನ್ ವಾಗಯ್ಲಾಂ. ಶಿತ್ ನಾ ತರ್ ಏಕ್ ಘೊಟ್ ನೀಸ್ ಪುಣ್ಯೀ ದೀವ್ನ್ ಸಾಂಬಾಳ್ಳಾಂ. ತಸಲ್ಯಾ ಆಪ್ಣಾಚ್ಯಾ ಕುಟ್ಮಾಕ್ ಕಶಿ ಭೆಜ್ಲಿಗಾಯ್ ಹಿ ಖ್ಯಾಸ್ತ್? ಬೊಣ್ಕ್ಯಾ ಸಂಗಿ ಮಿರಂವ್ಚ್ಯಾ ತಿತ್ಲಿ ಸಳ್ಗಿ ಕಶಿ ಜಾಲಿ ತಾಕಾ, ಯಾ ಬೊಣ್ಕ್ಯಾನ್ ಬಲತ್ಕಾರ್ ಕೆಲೊ?
ಅದಿಕಾರಾಚ್ಯಾ ಬಳಾರ್ ಕಿತೆಂ ಕರುಂಕ್ಯೀ ತಯಾರ್ ಮನಿಸ್ ಪಯಿಲ್ಲೆ ಪಾವ್ಟಿಂ ಸೇಸುನ್ ಹ್ಯಾ ಪರಿಂ ದೆದೆಸ್ಪೊರ್ ಜಾಂವ್ಚೆಂ. ತಾಕಾ ಮುಕ್ಲಿ ವಾಟ್ ಕಳ್ಳಿನಾ.
ದೊನ್ಪಾರಾಂ ಕೊಡ್ಕ್ಯಾಂತ್ ಪಾಕ್ಯಾಕ್ ಶಿರ್ಕಾಯಿಲ್ಲಿ ಆಪ್ಲಿ ವಾಟ್ಲಿ ಆನಿ ಗೊಬ್ಳೊ ಕಾಡ್ನ್ ಜೆವ್ಣಾಕ್ ಬಸ್ತಾನಾಂಯೀ ಸೇಸುಚೆ ಹಾತ್-ಪಾಂಯ್ ಕಾಂಪ್ತಾಲೆ. ಪಟೇಲಾಚ್ಯಾ ಬಾಯ್ಲೆನ್ ರೇವತಿ ಅಕ್ಕಾನ್ ತಾಕಾ ವಾಡ್ಲೆಂ.
"ಕಿತೆಂರೇ ಸೇಸು, ಹುಶಾರ್ ನಾಂಯ್ವೇರೆ?" ತಿಣೆಂ ವಿಚಾರ್ಲೆಂ.
"ಹಾಂ... ನಾ... ನಾ... ಅಕ್ಕ.."
"ಜೇವ್.. ಜೇವ್, ಕಿತೆಂಗೀ ಜಾಲಾಂ ತುಕಾ ಆಜ್.."
ತೊ ಉಲಯ್ಲೊನಾ. ಕಿತ್ಯಾಕ್ಗೀ ಪಯಿಲ್ಲೆ ಪಾವ್ಟಿಂ ಪಟೇಲಾಗೆಲೆಂ ಶಿತ್ಯೀ ರುಚ್ಲೆಂನಾ ತಾಕಾ. ಕಶ್ಟಾಂನಿ ತಾಣೆಂ ಚಾರ್ ಶಿತಾಂ ತೊಂಡಾಕ್ ವೆಲಿಂ.
ಅರೆ, ಚೆಡ್ವಾಕ್ ಕಿತ್ಯಾಕ್ ಅಸಲಿ ಬೂದ್ ಆಯ್ಲಿ? ಮತ್ ತಾಚಿ ಎಕ್ಚ್ ಸವಾಲ್ ವಿಚಾರ್ತಾಲಿ. ಕಿತೆಂ ಉಣೆಂ ಕೆಲ್ಲೆಂ ಆಪ್ಣೆಂ ತಾಕಾ? ಜಾಂವ್ಕ್ ಶಿಕಾಪ್ ದೀಂವ್ಕ್ ಜಾಲೆಂನಾ ಆಪ್ಣಾ ಥಾವ್ನ್. ಚವ್ತಿ ಭಂಗಾನಿ ಶಿಕ್ಲೆಂ. ಉಪ್ರಾಂತ್ ಘರ್ಚ್ಯಾ ಕಾಮಾಕ್, ಬಾಂವ್ಡಾಂಕ್ ಪಳೆವ್ನ್ ಘೆಂವ್ಚ್ಯಾಕ್ ಮ್ಹಣ್ ಘರಾ ರಾವಯ್ಲೆಂ. ವಾಡೊನ್ ಆಯಿಲ್ಲ್ಯಾಬರಿ ಪಟೇಲಾಚ್ಯಾ ತೊಟಾಂತ್ ಆಪ್ಣೆಂಚ್ ಉಲವ್ನ್ ಕಾಮಾಕ್ ಲಾಯ್ಲೆಂ. ರೇವತಿ ಅಕ್ಕ ತಾಕಾ ಮೊಗಾನ್ ಲೆಕ್ತಾಲಿ, ಆನಿ ಘರ್ ಕಾಮಾಕ್ ಸಯ್ತ್ ಸಾಂಗ್ತಾಲಿ. ತೆದಾಳಾ ತೆದಾಳಾ ವಸ್ತುರಾಂ, ವರ್ವಿ ದಿಲ್ಲಿಯೀ ಆಸಾ. ತಶೆಂ ಚೆಡ್ವಾಕ್ ಕಸಲೆಂಚ್ ಉಣೆಂ ಪಡೊಂಕ್ ನಾತ್ಲ್ಲೆಂ. ಕಾಂಯ್ ಉಣೆಂ ಜಾಲ್ಲೆಂ ತರ್ ಆಪುಣ್ ತಾಕಾ ದಿತೊಂ. ಪುಣ್ ಬೊಣ್ಕ್ಯಾಲಾಗಿಂ ಮಿರಂವ್ಚ್ಯಾ ತಿತ್ಲಿ ಖೊರೊಜ್ ಕಿತ್ಯಾಕ್ ಉಟ್ಲಿ ತಾಕಾ? ಬೊಣ್ಕ್ಯಾ ಸಂಗಿ ಚಂಗಾಯ್ ಕೆದಾಳಾ ಉಬ್ಜಾಲಿ? ಬೊಣ್ಕ್ಯಾಕ್ ಆನಿ ಪಟೇಲಾಕ್ ಮದೆಂ ಉಜೊ ವಚಾನಾ. ದೆಕುನ್ ಕಾಂಯ್ ತಾಣೆಂ ಅಶೆಂ ಆಪ್ಲ್ಯಾ ದುವೆಕ್ ಕಸಾಯ್ಗಾರಾಚಿ ಶೆಳಿ ಕೆಲಿಗಾಯ್? ಆಪುಣ್ ಕೆದ್ನಾಂಚ್ ಬೊಣ್ಕ್ಯಾಚ್ಯಾ ಖಬ್ರೆಕ್ ಗೆಲ್ಲೊಂಚ್ ನಾ. ತರ್ ಹೆಂ ಕಶೆಂ ಬೊಣ್ಕ್ಯಾಕ್ ಮೆಳೊಂಕ್ ಗೆಲೆಂ? ಸರ್ವ್ ತಾಕಾ ಏಕ್ ಮಿಸ್ತೆರ್ಚ್ ಜಾವ್ನ್ ತಕ್ಲಿ ಫಡುಂಕ್ ಸುರು ಜಾಲಿ.
ದನ್ಪಾರಾಂ ಬಾಕಿಮಾರ್ ಗಾದ್ಯಾಕ್ ಮೇರ್ ಘಾಲುಂಕ್ ಗೆಲೊ ಸೇಸು. ಪುಣ್ ಮತಿಂತ್ ತಾಚ್ಯಾ ವಾದಾಳಾಂ ಉಟ್ಲ್ಲಿಂ. ಪಟೇಲಾಲಾಗಿಂ ಹೆಂ ಸಾಂಗುಂಗೀ ಮ್ಹಣ್ ಚಿಂತಿಲಾಗ್ಲೊ ತೊ. ಕಶೆಂ ಸಾಂಗ್ಚೆಂ? ಆಪ್ಲ್ಯಾ ಕುಟ್ಮಾಚಿ ನಾಲಿಸಾಯ್ ತಾಚೆ ಮುಕಾರ್ ಪಾತ್ಳಾಂವ್? ಘರ್ಚೆಂ ದೂದ್ ಮಾಡಾ ಮುಳಾಕ್ ವೊತುಂ? ಕಿತೆಂ ಚಿಂತಲೊ ತೊ? ತುಜ್ಯಾ ದುವೆಕ್ ಸಾಂಬಾಳುಂಕ್ ತಾಂಕಾನಾತ್ಲ್ಲೊ ತುಂ ಕಸಲೊ ಬಾಪಯ್ರೇ ಮ್ಹಣಾತ್ ತರ್?
ಛೆ! ಖಂಡಿತ್ ತಶೆಂ ಮ್ಹಣ್ಸೊನಾ. ತೊ ಆಪ್ಣಾಕ್ ಬಾಪಯ್ಬರಿ. ತಾಚೆವಿಣೆಂ ಖಂಡಿತ್ ನೀಸ್ಯೀ ಗತ್ ನಾ ಆಪ್ಣಾಕ್. ಕೆದಾಳಾಯೀ ಕುಮೊಕ್ ವಿಚಾರ್ನ್ ಗೆಲ್ಲ್ಯಾ ತವಳ್ ತಾಣೆಂ ನಾ ಮ್ಹಳ್ಳೆಂನಾ. ಕಿತ್ಲೆಂ ರೀಣ್ ದಿಲಾಂ ತಾಣೆಂ! ಆಜೂನ್ ಪಾಟಿಂ ಮಾಗೊಂಕ್ ನಾ. ತಸಲ್ಯಾ ಬರ್ಯಾ ವ್ಯಕ್ತಿಲಾಗಿಂ ಆಪ್ಲೆ ಕಶ್ಟ್ ಸಾಂಗೊನ್ ಮುಕ್ಲಿ ವಾಟ್ ಚಿಂತಿಜಯ್.
ಸಾಂಜೆರ್ ರೇವತಿ ಅಕ್ಕಾನ್ ದಿಲ್ಲಿ ಏಕ್ ಗೊಬ್ಳೊ ಚಾ ತಾಳ್ಯಾಂತ್ ಗಳವ್ನ್ ರೆಡ್ಯಾಂಕ್ ಕುಳಿತ್ ವಾಟುನ್ ದಿಲ್ಯಾ ಉಪ್ರಾಂತ್ ತೊ ಚವ್ಕೆಂತ್ ಬಸ್ಲ್ಲ್ಯಾ ಪಟೇಲಾ ಮುಕಾರ್ ಗೆಲೊ.
"ಕಿತೆಂ ಜಾಯ್ರೇ ಸೇಸು? ಪರ್ತುನ್ ಪಯ್ಶ್ಯಾಂಕ್ ಆಯ್ಲಾಯ್ಯೆರೇ?" ಪಟೇಲಾನ್ ವಿಚಾರ್ಲೆಂ ತಾಕಾ.
"ನಾ.. ನಾ.. ಧನ್ಯಾ. ತೆಂ.. ತೆಂ..?" ತೊ ಪಾದ್ದೆಲೊ.
"ಕಸಲೆಂರೇ ತೆಂ ಸೇಸು?"
"ತೆಂ.. ತೆಂ.. ಮ್ಹಜಿ ದುವ್.." ತಾಳೊ ಭರೊನ್ ಯೇವ್ನ್ ತಾಚ್ಯಾ ದೊಳ್ಯಾಂನಿ ದುಕಾಂ ಉದೆಲಿಂ.
"ಅರೆ.. ಕಿತೆಂ ಜಾಲೆಂರೇ ಸೇಸು? ಸೊಡವ್ನ್ ಸಾಂಗ್ರೇ.." ಪಟೇಲಾನ್ ಬಿರ್ಮತ್ ಪಾವೊನ್ ಸಾಂಗ್ಲೆಂ.
ಸೇಸು ಪಾಟಿಂ ಮುಕಾರ್ ಚಿಂತಿಲಾಗ್ಲೊ. ಸಾಂಗೊಂಗೀ ಸರ್ವ್ ಗಜಾಲ್ ಸೊಡವ್ನ್? ನಿರ್ದಾರ್ ಕರ್ಚೆಂ ಕಶ್ಟಾಂಚೆಂ ಜಾಲೆಂ ತಾಕಾ.
"ಕಿತ್ಯಾಕ್ರೇ ಸೇಸು? ಮ್ಹಜೆಲಾಗಿಂ ತುಕಾ ಪಾತ್ಯೆಣಿ ನಾಂಗೀ? ತುಕಾ ಶಿತ್ ಘಾಲ್ಲ್ಯಾ, ತುಕಾ ಪೊಸ್ಚ್ಯಾ ಮನ್ಶಾಲಾಗಿಂ ಕಿತೆಂ ಲಿಪಯ್ತಾಯ್?" ಪಟೇಲಾನ್ ಮಾತ್ಸ್ಯಾ ರಾಗಾನ್ಂಚ್ ಮ್ಹಳೆಂ.
"ನಾ.. ತ-ತಶೆಂ ನ್ಹಂಯ್ ಧನಿಯಾ.." ಸೇಸುನ್ ದುಕಾಂ ಪುಸ್ಲಿಂ.
"ತಶೆಂ ನ್ಹಂಯ್ ತರ್ ಆನಿ ಕಶೆಂ?"
"ತೆಂ.. ತೆಂ.. ಮ್ಹಜ್ಯಾ ದು..ವೆನ್ ಸತ್ತ್ಯಾನಾಸ್ ಕೆಲೆಂ ಧನಿಯಾ.." ತೊ ಪರ್ತುನ್ ಭುರ್ಗ್ಯಾಬರಿ ರಡ್ಲೊ.
"ಅರೆ.. ತುಂ ರಡೊನ್ಂಚ್ ಆಸಾಯ್ಮೂರೇ ಪಾಪಿಯಾ! ಸೊಡವ್ನ್ ಸಾಂಗ್ರೇ ಕಿತೆಂ ಜಾಲೆಂ ಮ್ಹಣ್.."
ಸೇಸುನ್ ಭಾರಿಚ್ ಕಶ್ಟಾಂನಿ ಆನಿ ಉಬ್ದೆಸಾನ್ ಭರೊನ್ ಸಾಕಾಳಿಂ ಆಪ್ಣೆಂ ಆಯ್ಕಾಲ್ಲಿ ಖಬಾರ್ ಪಟೇಲಾಲಾಗಿಂ ಪಾತ್ಳಾಯ್ಲಿ. ಕಾಳಿಜ್ ತಾಚೆಂ ದಡ್ದಡ್ತಾಲೆಂ, ಪಾಂಯ್ ಕಾಂಪ್ತಾಲೆ. ಉಲಯ್ತಾಂ ಉಲಯ್ತಾಂ ಖರಸ್ ಯೆತಾಲಿ. ಪೂರಾ ಸಡವ್ನ್ ಸಾಂಗ್ತಾನಾ ವಿಶೇಸ್ ಸಂಕಟ್ ಭಗ್ಲೆ ಸೇಸುಕ್.
ಪಟೇಲಾಚ್ಯಾ ಮತಿಂ ಎದೊಳ್ಚ್ ಗುಣಾಕಾರ್, ಭಾಗಾಕಾರ್ ಜಾಲ್ಲೆ.
"ಹಾಂವೆಂ ಚಿಂತ್ಲ್ಲ್ಯಾಬರಿಚ್ ಜಾಲೆಂರೇ ಸೇಸು.." ಶಿರ್ ಜೊಕುನ್ ದಾಗ್ ದಿಂವ್ಚ್ಯಾಕ್ಲಾಗ್ಲೊ ಪಟೇಲ್.
"ಧ.. ಧನಿಯಾ.." ಸೇಸು ಹಾಂಕ್ರೆಲೊ.
"ಹಾಂ.. ಹಾಂ.. ತುವೆಂ ಆಂತಶೆಂ ಶೆರ್ಮೆಲ್ಯಾರ್ ಕಾಂಯ್ಚ್ ಫಾಯ್ದೊ ನಾ. ತುಂ ಏಕ್ ಗೊರುಂ. ತ್ಯಾ ಬೊಣ್ಕ್ಯಾಚಿ ಚರಿತ್ರಾ ತುಕಾ ಕಶಿ ಕಳಿತ್? ತಾಣೆಂ ಹ್ಯಾ ಗಾವಾಂತ್ ಪಾಡ್ ಕರಿನಾತ್ಲ್ಲಿಂ ಚೆಡ್ವಾಂ ಆಸ್ಲ್ಯಾರ್ ವಿಚಾರ್. ತುಮ್ಚ್ಯಾಚ್ ಕೇರಿಂತ್ ಕಿತ್ಲ್ಯಾ ಮ್ಹಾರಾಂಚಿಂ ಭುರ್ಗಿಂ ಆಪ್ಲ್ಯಾ ಬಾಪಯ್ಕ್ ಜಾಲ್ಲಿಂ ತುಕಾ ಕಳಿತ್ ಆಸಾ? ತುಕಾ ಕಶೆಂ ಕಳಿತ್ ಸೇಸು? ತ್ಯಾ ಹಡ್ಬ್ಯಾ ಬೊಣ್ಕ್ಯಾಕ್ ಸಂಸ್ರಾಕ್ ಖಬರ್ ನಾತ್ಲ್ಲ್ಯಾಬರಿಚ್ ಹಲ್ಕ್ ಕಾಮಾಂ ಕರ್ಚೆಂ ದೆಣೆಂಚ್ ಮೆಳ್ಳಾಂ. ತಾಚಿ ಖೊರೊಜ್ ಆಸಾ ಪಳೆ, ತಿ ಕಠೀಣ್. ದೆಕುನ್ಂಚ್ ಸೊಸುಂಕ್ ತಾಂಕಾನಾಸ್ತಾಂ ಬಾಯ್ಲೆನ್ ತೆದಾಳಾ ತೆದಾಳಾ ಕುಳಾರಾ ವಚೊನ್ ರಾಂವ್ಚೆಂ. ಅರೆ, ತುಜ್ಯಾ ದುವೆಕ್ ವಾಯ್ಟ್ ಕರುಂಕ್ ತಾಣೆಂ ಮಾಂಡಾವಳ್ ಘಾಲ್ಲಿ ಕಳಿತ್ ಆಸ್ಲ್ಲೆಂ ತರ್ ತುವೆಂ ಆಡವ್ಯೆತ್ ಆಸ್ಲ್ಲೆಂ ಮ್ಹಣ್ ಚಿಂತಾಯ್ವೇ ತುಂ? ತುಕಾ ಹ್ಯಾ ವಿಶಿಂ ಕಾಂಯ್ ಕಳೊನ್ ತುಂ ಆಡ್ಕಳ್ ಜಾಲ್ಲೊಯ್ ತರ್ ತುಕಾ ತಿತೀನ್ ಕುಡ್ಕೆ ಕರುಂಕ್ ಪಾಟಿಂ ಸರ್ತೊನಾ ತೊ. ಕುಂಟಿಮಜಲ್ ಅಂಗಾರ ಕಸೊ ಮೆಲೊ? ಸರ್ವ್ ಚಿಂತಾತ್ ತಾಣೆಂ ವೀಕ್ ಘೆತ್ಲೆಂ ಮ್ಹಣ್. ಪೂರಾ ಫಟ್. ಹ್ಯಾ ಬೊಣ್ಕ್ಯಾಕ್ ತಾಚ್ಯಾ ಬಾಯ್ಲೆಲಾಗಿಂ ಚಂಗಾಯ್ ಆಸ್ಲ್ಲಿ. ಅಂಗಾರಾಕ್ ಹೆಂ ಕಳ್ಳೆಂ. ಘರಾಂತ್ ಬಾಯ್ಲೆಲಾಗಿಂ ಲಡಾಯ್ ಕೆಲಿ ತಾಣೆಂ. ದುಸ್ರ್ಯಾ ದಿಸಾ ಅಂಗಾರಾಚೆಂ ಮೊಡೆಂ ಮಜಾಲಾಚ್ಯಾ ಮೆರೆರ್ ಪಡ್ಲ್ಲೆಂ. ಬೊಣ್ಕ್ಯಾಚ್ಯಾ ಮನ್ಶಾಂನಿ ತಾಕಾ ಟಿಕ್ ಟ್ವೆಂಟಿ ಭರಯಿಲ್ಲೆಂರೇ ಸೇಸು. ಲೋಕ್ ಚಿಂತಾ ಅಂಗಾರಾನ್ ಜಿವ್ಘಾತ್ ಕೆಲೊ ಮ್ಹಣ್. ಪುಣ್ ಖರಿ ಗಜಾಲ್ ವೆಗ್ಳಿಚ್. ತಶೆಂ ಆಸ್ತಾಂ ತುಜ್ಯಾ ದುವೆಕ್ ಅಶೆಂ ಜಾಲಾ ಆನಿ ತುಂ ಆಜೂನ್ ಜೀವಂತ್ ಆಸಾಯ್ ತರ್ ತೆಂ ಏಕ್ ವ್ಹಡ್ ಅಜ್ಯಾಪ್ ಮ್ಹಣ್ ಚೀಂತ್..."
ಸವಯೆಚ್ಯಾ ಬಳಾನ್ ಆಪ್ಲೊ ದಾವೊ ಹಾತ್ ವಯ್ರ್ ಸಕಯ್ಲ್ ಬಿಜಾವ್ನ್ ಪಟೇಲ್ ಸಾಂಗೊನ್ ಗೆಲ್ಲ್ಯಾಬರಿ ಸೇಸು ಪುರ್ತೊ ಘಾಮೆಲ್ಲೊ. ಬೊಣ್ಕೊ ಇತ್ಲೊ ವಾಯ್ಟ್ ಆಸಾ ಮ್ಹಣ್ ತಾಣೆಂ ಚಿಂತುಂಕ್ ನಾತ್ಲ್ಲೆಂ. ಜಾಂವ್ಕ್ ಥೊಡ್ಯಾ ತೆಂಪಾ ಆದಿಂ ಜಾಲ್ಲ್ಯಾ ಇಲೆಕ್ಶನಾಂತ್ ಹಿಕ್ಮತ್ಯೊ ಖೆಳೊನ್ ತೊ ಜಿಕೊನ್ ಆಯ್ಲಾ ಮ್ಹಳ್ಳಿ ಖಬಾರ್ ತಾಣೆಂಯೀ ಆಯ್ಕಾಲ್ಲಿ. ಪುಣ್ ಕಸಲಿ ಹಿಕ್ಮತ್, ಕಿತೆಂ ತೆಂ ತಾಕಾ ಕಳಿತ್ ನಾತ್ಲ್ಲೆಂ. ಪುಣ್ ಬೊಣ್ಕೊ ಹ್ಯಾ ರಿತಿಂ ವಿಕಾಳ್ ಆಸಾ ತಿ ಖಬಾರ್ ತಾಚ್ಯಾ ವಾಂಟ್ಯಾಕ್ ವ್ಹಡಾ ಆಕಾಂತಾಚಿ.
ಸದ್ದ್ಯಾಕ್ ಸೇಸುಚಿ ವಾಚಾಚ್ ಬಂದ್ ಪಡ್ಲಿ. ಕಿತೆಂ ಉಲೊಂವ್ಚೆಂ ತೆಂ ತಾಕಾ ಬಿಲ್ಕುಲ್ ಸುಸ್ತಾಲೆಂನಾ.
"ಇಲೆಕ್ಶಾನಾಂತ್ ಜಿಕ್ಲ್ಯಾ ಉಪ್ರಾಂತ್
ಸಗ್ಳೊ ಗಾಂವ್ಚ್ ಆಪ್ಲ್ಯಾ ಚರೊವಾಕ್ ಆಸಾ ಮ್ಹಣ್ ಚಿಂತ್ಲಾಂ ತ್ಯಾ
ಹರಾಮ್ಯಾನ್," ಪಟೇಲಾನ್ ಮುಕಾರ್ಸಿಲೆಂ. "ಹ್ಯಾ ಗಾವಾಂತ್ ಆನಿ ಖಂಯ್ಚಿಂಯೀ ಚೆಡ್ವಾಂ ಬರ್ಕಾತ್ ಉರ್ಲ್ಯಾರ್
ಸಾಂಗ್ ಮ್ಹಾಕಾ.." ಪಟೇಲ್ ಸಾಂಗೊನ್ ಗೆಲ್ಲ್ಯಾಬರಿ
ಸೇಸುಚ್ಯಾ ಸಗ್ಳ್ಯಾ ಜಿವಾಂತ್ ಸವ್ಕಾಸ್ ಉಜೊ ಪೆಟೊಂಕ್ಲಾಗ್ಲೊ. ಉಸ್ವಾಸಾ
ವೇಗ್ ಚಡ್ಲೊ. ಕಾಳಿಜ್ ಹೆಳ್ಕೆ ಭಾಯ್ರ್ ಬಡಂವ್ಕ್ ಲಾಗ್ಲೆಂ.
"ಧ.. ಧನಿಯಾ.." ತೊ ಮ್ಹಣಾಲೊ. "ಕಿತೆಂ ತರ್ಯೀ ಕರ್ ಧನಿಯಾ.."
"ಕಿತೆಂ ತರ್ಯೀ ಕರ್? ಕಿತೆಂ ನವಾಲಾಂ ಉಲಯ್ತಾಯ್ರೇ ಸೇಸು? ಹಾಂವೆಂ ಆತಾಂ ಕಿತೆಂ ಕರಿಜಯ್? ತುಜ್ಯಾ ದುವೆಕ್ ಹಾಡ್ನ್ ಆಂಮ್ಗೆರ್ ರಾವಯ್ಜಯ್ ಮ್ಹಣ್ತಾಯ್ವೇ ತುಂ?"
"ತಶೆಂ ನ್ಹಂಯ್ ಧನಿಯಾ. ತ್ಯಾ ಬೊಣ್ಕ್ಯಾಕ್ ಕಿತೆಂ ತರ್ಯೀ ಕರ್ ಧನಿಯಾ.."
"ಹಾಂವ್ ಕಿತೆಂ ಕರುಂ? ಅರೆ ತಾಣೆಂ ತುಜ್ಯಾ ದುವೆಕ್ ವಾಯ್ಟ್ ಕೆಲಾಸ್ತಾಂ ತುವೆಂಚ್ ಕಿತೆಂ ತರ್ಯೀ ಕರಿಜಯ್.." ಪಟೇಲಾನ್ ಹಳ್ತಾರ್ ಸಾಂಗ್ಲೆಂ.
"ಪು.. ಪುಣ್ ಹಾಂವೆಂ ದಳ್ದಿರ್ ಮನ್ಶಾನ್ ತ್ಯಾ ಬೊಣ್ಕ್ಯಾಕ್ ಕಿತೆಂ ಕರ್ಯೆತ್ ಧನಿಯಾ?"
"ತುಜೆಂ ಚಿಂತಾಪ್ಚ್ ಹೆಂ. ವರ್ಸಾಂ ವರ್ಸಾಂ ಥಾವ್ನ್ ಆಪುಣ್ ದಳ್ದಿರ್ ಮ್ಹಣ್ ತುಂ ಚಿಂತುನ್ ಆಯ್ಲಾಯ್. ದೆಕುನ್ಂಚ್ ತ್ಯಾ ಬೊಣ್ಕ್ಯಾ ತಸಲ್ಯಾಂಕ್ ತುಮಿ, ತುಮ್ಚಿಂ ಭುರ್ಗಿಂ ಸಲೀಸಾಯೆನ್ ಸಾಂಪಡ್ಚೆ ಉಂದಿರ್. ತುಮಿಂಚ್ ನೀಟ್ ರಾವೊನ್ ಆಪುಣ್ ಉಂದಿರ್ ನ್ಹಂಯ್, ಜಾಯ್ ತರ್ ವಾಗ್ ಜಾಂವ್ಕ್ಯೀ ತಯಾರ್ ತೆಂ ದಾಕವ್ನ್ ದಿಯಾ ತಾಕಾ. ತೆದಾಳಾ ತುಮ್ಚ್ಯಾ ತಂಟ್ಯಾಕ್ ಕೊಣ್ಯೀ ಯೆಂವ್ಚೊನಾ.." ಪಟೇಲ್ ಆಪ್ಲೆಂ ತುರುಪ್ ಖೆಳ್ಳೊ.
"ಹಾ..ಹಾಂವ್ ಕಿತೆಂ ಕರುಂ ಧನಿಯಾ?"
"ತುಕಾ ಖುಶಿ ಆಸ್ಲ್ಲೆಂ ಕರ್. ಪುಣ್ ತೊ ಬೊಣ್ಕೊ ಆಸ್ತಾ ಮ್ಹಣಾಸರ್ ತುಮ್ಚ್ಯಾ ಕೇರಿಚಿಂ ಏಕ್ಯೀ ಚೆಡ್ವಾಂ ಸುರಕ್ಶಿತ್ ನಾಂತ್ ತೆಂ ಉಡಾಸ್ ದವರ್".”
ಸೇಸು ಪುರ್ತೊ ವಿರ್ಯಾರ್ ಜಾಲೊ. ಎಕಾ ವಾಟೆನ್ ಸಗ್ಳೆಂ ಆಂಗ್ ಕ್ರೋದಾಚೆಂ ಆಗ್ಟೆಂ ಜಾವ್ನ್ ಜಳ್ತಾಲೆಂ ತರ್ ದುಸ್ರ್ಯಾ ವಾಟೆನ್ ಕಿತೆಂಚ್ ಕರುಂಕ್ ಆಪುಣ್ ಸಕಾನಾ ಮ್ಹಳ್ಳೆಂ ಅಸಹಾಯಕ್ಪಣ್.
"ಕಿತೆಂ ಕರ್ತಾಯ್ ಪಳೆ ಸೇಸು; ಕಸಲಿಯ್ ಕುಮೊಕ್ ಜಾಯ್ ತರ್ ವಿಚಾರ್," ಸಾಂಗೊನ್ ಪಟೇಲ್ ಆಪ್ಲೆಂ ಪುಡ್ವೆಂ ಎಕಾ ಹಾತಾನ್ ಉಕಲ್ನ್ ಧರ್ನ್ ಶೆತಾ ತೆವ್ಶಿಂ ಚಲ್ತಚ್ ರಾವ್ಲೊ.
ಪಟೇಲಾನ್ ಆಪ್ಲೊ ಖೆಳ್ ಖೆಳ್ನ್ ಜಾಲ್ಲೊ. ಸೇಸು ಕಿತೆಂ ನಿರ್ದಾರ್ ಘೆತಾ ಮ್ಹಳ್ಳ್ಯಾಚೊ ಖರೊ ಅಂದಾಜ್ ಪಟೇಲಾಕ್ ಎದೊಳ್ಚ್ ಜಾಲ್ಲೊ.
ಇತ್ಲ್ಯಾ ವರ್ಸಾಂ ಥಾವ್ನ್ ಹ್ಯಾ ಗಾಂವಾಂತ್ ಆಪ್ಣಾಚೆಂ ಯೆಜ್ಮಾನ್ಪಣ್ ಆಸ್ಲ್ಲೆಂ, ಚಿಂತಿಲಾಗ್ಲೊ ಪಟೇಲ್. ಆಪ್ಣೆಂ ಸಾಂಗ್ಲ್ಲ್ಯಾಬರಿ ಚಲ್ತಾಲೊ ಲೋಕ್. ಕಿತೆಂ ಗವ್ರವ್, ಕಿತೆಂ ಮರ್ಯಾದ್ ದಿತಾಲೊ ಆಪ್ಣಾಕ್! ಹ್ಯಾ ವರ್ಸಾ ಥಾವ್ನ್ ತೆಂ ಸರ್ವ್ ರಾವ್ಲಾಂ. ವಾಟೆರ್ ಚಲೊನ್ ವೆಚೆಂಯೀ ಅಕ್ಮಾನಾಚೆಂ ಜಾಲಾಂ. ಮೂಸ್ಯೀ ಲೆಕಿನಾ ಆಜ್ ಆಪ್ಣಾಕ್. ಹಾಕಾ ಸರ್ವ್ ಕಾರಣ್ ತೊ ಬೊಣ್ಕೊ. ತೊ ಆಸ್ತಾಂ ಮ್ಹಣಾಸರ್ ಆಪ್ಣಾಚೆಂ ಕಿತೆಂಚ್ ಶಿಜಾನಾ ತೆಂ ಖಂಡಿತ್. ದೆಕುನ್ ಆಪ್ಣೆಂ ಖೆಳ್ ಖೆಳ್ಚಿ ಗರ್ಜ್ ಆಸಾ ತೆಂ ಪಟೇಲಾಕ್ ಕೆದಾಳಾಗೀ ಗಮ್ಲಾಂ.
ತಶೆಂ ಪಳೆಂವ್ಕ್ ಗೆಲ್ಯಾರ್ ಗಾವಾಂತ್ ಸಾಂಗ್ಚ್ಯಾ ತಸಲೆ ಕುಳ್ವಾರ್, ಗಿರೇಸ್ತ್ ಮ್ಹಣ್ ಆಸ್ಚೆ ಹೆಚ್ ದೋಗ್ - ಪಟೇಲ್ ಆನಿ ಬೊಣ್ಕೊ. ಪಟೇಲಾಕ್ ಪುರ್ವಜಾಂ ಥಾವ್ನ್ ಆಯಿಲ್ಲಿ ಆಸ್ತ್ ಉಣ್ಯಾರ್ ಉಣೆಂ ಶೆಂಬೊರ್ ಎಕ್ರೆ ಆಸ್ಲ್ಲಿ. ಚಡ್ತಾವ್ ಕೃಶೆಚಿ ಭುಂಯ್. ವರ್ಸಾಕ್ ತೀನ್ ಬೆಳಿಂ ಕಾಡ್ತಾಲೊ ತೊ. ವಯ್ಲ್ಯಾನ್ ತರ್ಕಾರಿ, ಮಾಡ್, ಮಾಡಿ, ಕೆಂಳ್ಬೆ. ಗೊಟೊಭರ್ ಗಾಯ್ರಾಂ, ಮೊಶಿ, ಕಾಂಬ್ಳಾಚೆ ಜಯ್ತ್ ಪುಡ್ಪುಡಿತ್ ರೆಡೆ.
ತರಿಕ್ಯೀ ಪಟೇಲಾಚಿ ಆಶಾ ಥಾಂಬನಾತ್ಲ್ಲಿ. ಪಾಂಚ್ ವರ್ಸಾಂ ಆದಿಂ ಪಯ್ಶ್ಯಾಂಚ್ಯಾ ಬಳಾರ್ ಪಂಚಾಯತ್ ಇಲೆಕ್ಶನಾಕ್ ರಾವ್ಲ್ಲೊ ಪಟೇಲ್, ಸಲೀಸಾಯೆನ್ ಜಿಕ್ಲ್ಲೊ. ಪಂಚಾಯತಾ ಥಾವ್ನ್ ದುಬ್ಳ್ಯಾಂ ಖಾತಿರ್ ಮ್ಹಣ್ ಮೆಳ್ಲ್ಲೆ ಪಯ್ಶೆ, ಹಳ್ಳೆಂತ್ ಅಭಿವೃದ್ದೆ ಕಾಮಾಕ್ ಮ್ಹಣ್ ಮಂಜೂರ್ ಜಾಲ್ಲ್ಯಾ ಪಯ್ಶ್ಯಾಂತ್ ಕಾಲ್ದೊ ವಾಂಟೊಯೀ ಪಾವಾಜೆ ಜಾಲ್ಲ್ಯಾಕಡೆ ಪಾವಾನಾಸ್ತಾಂ ಪಟೇಲಾಚ್ಯಾ ಆಸ್ತಿಕ್ ಪಡ್ಲಾ ಮ್ಹಣ್ ಲೋಕ್ ಉಲಯ್ತಾಲೊ. ಪಂಚಾಯತ್ ಸಾಂದೊ ಜಾವ್ನ್ ಅಧಿಕಾರಾಚ್ಯಾ ರುಬಾವಾರ್ ಗಾವಾಂತ್ ಆಪುಣ್ಂಚ್ ಪಯ್ಲೊ ಮ್ಹಳ್ಳೆಬರಿ ಚಲ್ತಲೊ ಪಟೇಲ್ ಲೊಕಾಕ್ ಖಾಯ್ಸ್ ಜಾಲೊಚ್ ನಾ. ವಯ್ಲ್ಯಾನ್ ತಾಚೆ ವಿಶಿಂ, ತಾಣೆಂ ಆದಾರ್ಚ್ಯಾ ವಾಯ್ಟ್ ಕರ್ತುಬಾಂ ವಿಶಿಂ ಗುಪಿತ್ ಖಬ್ರೊ ಗಾಂವ್ಭರ್ ಪ್ರಸಾರ್ ಜಾವ್ನ್ ಪಟೇಲಾಚ್ಯಾ ಒಟ್ಟಾರೆ ಬಳಾಕ್ ಸಂಕಟ್ ಹಾಡಂವ್ಕ್ ಪಾವ್ಲ್ಯೊ. ಅಶೆಂ ಹ್ಯಾ ವರ್ಸಾಚ್ಯಾ ಎಲಿಸಾವಾಂತ್ ಲಜೆಭರಿತ್ ರಿತಿನ್ ಸಲ್ವಾಲ್ಲೊ ಪಟೇಲ್.
ಗಾವಾಂತ್ ಆತಾಂ ಬೊಣ್ಕ್ಯಾಚೆಂಚ್ ಕಾರ್ಬಾರ್. ಕಿತ್ಯಾಕ್ ನಜೊ, ಮ್ಹಣ್ತಾಲೊ ಲೋಕ್. ಬೊಣ್ಕೊ ಬೋವ್ ಕಶ್ಟ್ ಕಾಡ್ನ್ ವಯ್ರ್ ಆಯ್ಲಾ. ಭುಂಯ್ ಮಾತ್ರ್ ನ್ಹಂಯ್, ಥರಾವಳ್ ರಿತಿಚೆಂ ಬಿಸ್ನೆಸ್ ಕರ್ನ್ ಮಿನತ್ ಕಾಡ್ನ್ ವಯ್ರ್ ಆಯ್ಲಾ. ತಾಕಾಯೀ ಥೊಡ್ಯೊ ವಾಯ್ಟ್ ಸವಯೊ ಆಸಾತ್; ವಯ್ಲ್ಯಾನ್ ಬಿಸ್ನೆಸಾ ಖಾತಿರ್ ಸಬಾರ್ ಅನಯ್ತಿಕ್ ವಾಟೊಯೀ ತೊ ಧರ್ತಾ ಮ್ಹಣ್ ಗಾಂವಾರ್ ಖಬಾರ್. ಪುಣ್ ತ್ಯಾ ವಿಶಿಂ ಲೊಕಾಕ್ ಕಾಂಯ್ ಪಡೊನ್ ವಚೊಂಕ್ ನಾ. ಕಿತ್ಯಾಕ್ ಪಟೇಲಾ ಥಂಯ್ ನಾತ್ಲ್ಲೆಂ ಮನ್ಶಾಪಣ್ ಬೊಣ್ಕ್ಯಾಲಾಗಿಂ ಆಸಾ ಮ್ಹಣ್ ಲೋಕ್ ಚಿಂತ್ತಾ. ಆನಿ ತ್ಯಾಚ್ ಖಾತಿರ್ ಲೊಕಾನ್ ತಾಕಾ ವಿಂಚ್ಲಾ. ಲೊಕಾಚಿ ಪಾತ್ಯೆಣಿ ಬೊಣ್ಕ್ಯಾನ್ ಫಟ್ ಕೆಲಿನಾ. ಜಿಕ್ಲ್ಲ್ಯಾ ಹ್ಯಾ ಸ ಮಹಿನ್ಯಾಂನಿಂಚ್ ಗಾಂವಾಕ್ ನಳಾ ಉದ್ಕಾಚಿ ವ್ಯವಸ್ಥಾ ಕೆಲಿ ತಾಣೆಂ. ಮಾರ್ಗಾಕ್ ಡಾಮಾರ್ ಪಡ್ಲೊ; ಏಕ್ ನವೆಂ ಬಸ್-ಸ್ಟ್ಯಾಂಡ್ ಆನಿ ದುದಾಚ್ಯಾ ಸೊಸಾಯ್ಟಿಕ್ ನವೆಂ ಬಾಂದಪ್ ಮಂಜೂರ್ ಜಾಲೆಂ. ಮಾತ್ರ್ ನ್ಹಂಯ್ ಮಾತಾರ್ಯಾಂಕ್, ಅಂಗ್-ವಿಕಲಾಂಕ್ ಸರ್ಕಾರಾ ಥಾವ್ನ್ ಪಯ್ಶೆ ಹಾಡಂವ್ಚೊ ಭರ್ವೊಸೊ ದಿಲೊ. ಲೊಕಾಕ್ ಆತಾಂ ಬೊಣ್ಕ್ಯಾ ವಿಶಿಂ ಚಡಿತ್ ಅತ್ರೆಗ್ ಆನಿ ಅಭಿಮಾನ್. ಹೆಂಚ್ ಪಟೇಲಾಚ್ಯಾ ಪೊಟಾ ಉಜ್ಯಾಕ್ ಕಾರಣ್ ಜಾಲಾಂ. ಬೊಣ್ಕ್ಯಾನ್ ದಿಸಾನ್-ದೀಸ್ ಪ್ರಬಾವ್ಭರಿತ್ ಜಾಂವ್ಚೆಂ, ಲೊಕಾಮೊಗಾಳ್ ಜಾಂವ್ಚೆಂ ಪಳೆತಾನಾ ತಾಚ್ಯಾ ಪೊಟಾಂತ್ಲೊ ಉಜೊ ಕಠೀಣ್ ರಿತಿಂ ಝಳೊನ್ ಇಂಚಾನ್ ಇಂಚ್ ತಾಕಾ ಭಸ್ಮ್ ಕರ್ನ್ ಆಸಾ. ಆನಿ ಆಪ್ಣೆಂ ಗೊಬೊರ್ ಜಾವ್ನ್ ವಾರ್ಯಾರ್ ಉಬ್ಚ್ಯಾ ಪಯ್ಲೆಂ ಬೊಣ್ಕ್ಯಾಕ್ ಏಕ್ ಗತ್ ದಾಕಯ್ನಾ ತರ್ ಆಪ್ಣೆಂ ಜಿಂಯೆಂವ್ಚೆಂ ವ್ಯರ್ಥ್ ಮ್ಹಣ್ ಚಿಂತ್ಲ್ಲ್ಯಾ ಪಟೇಲಾಕ್ ಏಕ್ ಅಪೂರ್ವ್ ಅವ್ಕಾಸ್ ಆತಾಂ ಉದೆವ್ನ್ ಆಯಿಲ್ಲೊ ಸೇಸು ಆನಿ ತಾಚ್ಯಾ ದುವೆಚ್ಯಾ ರುಪಾರ್. ಬೊಣ್ಕ್ಯಾಚೆಂ ಸತ್ತ್ಯಾನಾಸ್ ಕರ್ನ್ಂಚ್ ಶುದ್ದ್ ಮ್ಹಣ್ ಚೂಪ್ ಮಿಶಿಯಾಂ ವಯ್ರ್ ಬೊಟಾಂ ಚರವ್ನ್ ಮಿಶಿಯಾಂ ಪೊಂತಾರ್ಚ್ ಆಮ್ರುಕೊ ಹಾಸೊ ಹಾಡುನ್ ಜಯ್ತಾಚಿಂ ಮೆಟಾಂ ಕಾಡ್ನ್ ಕಾಳೊಕ್ ಜಾತಾಂ ಬೊಂಗ್ಲ್ಯಾಕ್ ಪಾವ್ಲ್ಲ್ಯಾ ಪಟೇಲಾಕ್ ಎಕ್ಸುರ್ಪಣ್ ದೊಸುಂಕ್ಲಾಗ್ಲೆಂ. ಬಾಯ್ಲ್ ಕುಳಾರಾ ವಚೊನ್ ಯೆತಾಂ ಮ್ಹಣ್ ಭಾಯ್ರ್ ಸರ್ನ್ ಗೆಲ್ಲಿ.
ಹೆಣೆಂ ಸೇಸುಚ್ಯಾ ಮತಿಂತ್ ಭಿರಾಂಕುಳ್ ವಾದಾಳಾಂ ಉಟ್ಲ್ಲಿಂ, ಕಾಳ್ಜಾಂತ್ ಭುಂಯ್ಕಾಂಪ್. ಸಗ್ಳ್ಯಾ ಜಿವಾಂತ್ ರಾಗ್, ಹಗ್ಯಾಚೊ ಉಜೊ ಪೆಟೊನ್ ರಗ್ತಾಂತ್ ಹುಲೊಪ್ ಚರ್ಲ್ಲೊ. ಘರಾ ತೆವ್ಶಿಂ ಪಾಟಿಂ ಪರ್ತಾಲ್ಲ್ಯಾ ಸೇಸುಚ್ಯಾ ಮೆಟಾಂನಿ ಆವೇಶ್ ಆಸ್ಲ್ಲೊ. ದಡಾಮಾಂ ಅಡ್ಚುನ್ ತಕ್ಲಿ ಮಾತ್ಸಿ ಜಡ್ ಜಾವ್ನ್ ಯೆತಾಲಿ.
ಪಾವ್ಲಾಂ ತಾಚಿ ಹೆಳ್ಕೆ ಭಾಯ್ರ್ ಕೂಸಾಚ್ಯಾ ಗಡಂಗಾ ತೆವ್ಶಿಂ ಚಮ್ಕಾಲಿಂ. ಎಕ್ಶೆಂ ಸಾಟ್ ದೋನ್ಂಚ್ ಘೊಟಾಂನಿ ಮ್ಹಳ್ಳೆಬರಿ ತಾಳ್ಯಾಂತ್ ದೆಂವಯ್ಲೊ ತಾಣೆಂ.
"ಕಿತೆಂ ಸೇಸು ಭಾರಿ ಆಮ್ಸೊರ್ತಾಯ್?" ಕೂಸಾನ್ ವಿಚಾರ್ಲೆಂಚ್.
"ವ್ಹಯ್..ವ್ಹಯ್.. ಆಯ್ಚೊ ದೀಸ್ ಭಾರಿಚ್ ಕಶ್ಟಾಂಚೊ ಜಾಲೊ. ತಶೆಂ ಸುಕುರ್ನಳಿ ಸುಕೊನ್ ಚಿಂವೊಳೊನ್ ಗೆಲ್ಯಾ. ಮಾತ್ಸಿ ಹುನ್ ಕರ್ಯಾಂ ಮ್ಹಳ್ಳೊ ಅತ್ರೆಗ್.." ಸೇಸುನ್ ಜಾಪ್ ದಿಲಿ.
"ತಶೆಂ ಎಕ್ಚ್ ಪಾವ್ಟಿಂ ತಾಳ್ಯಾಕ್ ಒತ್ಲ್ಯಾರ್ ಸುಕ್ಲ್ಲಿ ನಳಿ ಭಿಜ್ಚ್ಯಾ ಬದ್ಲಾಕ್ ಕರ್ಪೊನ್ ವಚೊಂಕ್ ಆಸಾರೇ ಸೇಸು, ಹೆ.. ಹೆ.. ಹೆ.." ಆಸ್ಲ್ಲೆ ಚಾರ್ ಕಿಡಿಯಾರೆ ದಾಂತ್ ದಾಕಯ್ಲೆ ಮಾರಾಂಚ್ಯಾ ಇಸ್ವಾನ್.
"ಕರ್ಪಲ್ಯಾರ್ ಕರ್ಪೊಂದಿರೇ ಇಸ್ವಾ; ಪುಣ್ ತಾಚೆ ಪಯ್ಲೆಂ ಅನ್ಯೇಕ್ಲ್ಯಾಚಿ ಸುಕುರ್ನಳಿ ಶಿಂದುಂಕ್ ಆಸಾ ಮ್ಹಾಕಾ. ಯೆತಾಯ್ವೇ ಮ್ಹಜೆ ಸಾಂಗಾತಾ ತುಂ?" ಸವಾಲ್ ಉಡಯ್ಲೆಂ ಸೇಸುನ್ ಇಸ್ವಾಕ್. ಕುಡಿಂತ್ಲೊ ಸ್ಪಿರಿತ್ ಹಳ್ತಾರ್ ಊಬ್ ದಿತಾಲೊ.
"ಅರೆ, ಕಿತೆಂ ವೊಪಾರಿಂನಿ ಉಲಯ್ತಾಯ್ರೇ ಸೇಸು? ತೆಂ ಕಿತೆಂ ಅವ್ಚಿತ್ ಸುಕುರ್ನಳಿ ಶಿಂದ್ಚ್ಯಾಕ್ ಭಾಯ್ರ್ ಸರ್ಲಾಯ್ ತುಂ?" ಇಸ್ವಾನ್ ಸತ್ತ್ಯಾನ್ ವಿಚಾರ್ಲೆಂ.
"ಸವಾಲಾಂ ವಿಚಾರ್ನಾಕಾ ತುಂ; ಯೆತಾಯ್ ಜಾಲ್ಯಾರ್ ಮ್ಹಜೆ ಸಾಂಗಾತಾ ಯೇವ್ನ್ ಮ್ಹಾಕಾ ಕುಮೊಕ್ ಕರ್. ಬಾಕಿಚೆಂ ಹಾಂವ್ ಪಳೆಯ್ತಾಂ."
"ಭಾರಿ ಶಿಕ್ಣಾಂ ಉಲಯ್ತಾಯ್ರೇ ತುಂ ಸೇಸು. ತಸಲೆಂ ಪುರಾ ಉಲೊಂವ್ಚೊ ವೇಳ್ ನ್ಹಂಯ್ ಹೊ. ಫಾಲ್ಯಾಂ ಉಲವ್ಯಾಂ."
"ತುಕಾ ಧಯ್ರ್ ನಾಂರೇ ಹಡ್ಬ್ಯಾ. ದೆಕುನ್ಂಚ್ ಆಮ್ಚಿ ಜಾತ್ ಆಜೂನ್ ಅಶಿಚ್ ಆಸಾ, ತುಜೆ ತಸಲ್ಯಾಂ ಧರ್ಮಾನ್. ಹಾಂವ್ ತುಜೆಬರಿ ಉರೊಂಕ್ ಆಶೆನಾ. ದೆಕುನ್ ಮ್ಹಾರಾಂಕ್ಯೀ ಕಾಂಯ್ ಥೊಡಿ ಮರ್ಯಾದ್, ಕಿಮ್ಮತ್ ಆಸಾ ಮ್ಹಣ್ ದಾಕಂವ್ಕ್ ಆಸಾ. ತುವೆಂ ಯೆಂವ್ಚೆಂ ನಾಕಾ. ಪುಣ್ ತುಕಾ ತುವೆಂ ಜಿಯೆಂವ್ಚ್ಯಾ ಯೆಂಮ್ಕೊಂಡಾ ಥಾವ್ನ್ ಸುಟ್ಕಾ ದೀಜಯ್ ತರ್ ಹಾಂವೆಂಚ್!"
ಸೇಸು ಉಟ್ಲೊ. ಆನ್ಯೇಕ್ ಶೆಂಬೊರ್ ಘೆತ್ಲೊ ತಾಣೆಂ. ಜಿವಾಂತ್ ಆತಾಂ ಎಕಾ ಥರಾಚೊ ಹುರುಪ್ ಭರ್ಲೊ. ಮಾತ್ಸಿ ಲಕ್ಣಿ ಯೆತಾಲಿ ತರ್ಯೀ ಸುದಾರ್ಸುನ್ ಘರಾ ತೆವ್ಶಿಂ ಮೆಟಾಂ ಘಾಲಿಂ ತಾಣೆಂ. ಘರಾ ಪಾಂವ್ಚ್ಯಾ ಭಿತರ್ ತಾಣೆಂ ನಿರ್ದಾರ್ ಕರ್ನ್ ಜಾಲ್ಲೊ.
ವ್ಹಯ್, ಗಾಂವ್ಚ್ಯಾ ಅಮಾಯಕ್ ಲೊಕಾಮಾಯೆಚ್ಯಾ ಚೆಡ್ವಾಂಚೆಂ ಜಿವಿತ್ಚ್ ಚಿಂವ್ಚ್ಯಾ ಸರ್ಪಾಕ್ ಏಕ್ ವಾಟ್ ದಾಕಯ್ಜಯ್. ಎದೊಳ್ ತಾಣೆಂ ಆದಾರ್ಲ್ಲಿಂ ಪಾತ್ಕಾಂ ಪುರೊ. ಗಾವಾಂತ್ ಚೆಡ್ವಾಂಕ್ ಸುಶೆಗ್ ಮೆಳಾಜೆ ತರ್ ಬೊಣ್ಕ್ಯಾನ್ ದುಸ್ರ್ಯಾ ಸಂಸ್ರಾಕ್ ವಚಾಜಯ್. ಆನಿ ತಾಚಿ ವಿಲೆವಾರಿ ಆಪ್ಣೆಂಚ್ ಕರಿಜಯ್. ಆಪುಣ್ ಭಿಂವ್ಕುರೊ ನ್ಹಂಯ್, ತುಜ್ಯಾ ವಾಂಟ್ಯಾಕ್ ಯಮದೂತ್ ಮ್ಹಳ್ಳೆಂ ಜಾಹೀರ್ ಕರಿಜಯ್. ಆಪ್ಣಾಚ್ಯಾ ದುವೆಚೆಂ ಜಿಣೆಂ ಕಶೆಂಯೀ ತೀನ್-ತಿರ್ಕುಟ್ ಜಾಲೆಂ. ಗಾವಾಂತ್ಲ್ಯಾ ಚೆಡ್ವಾಂಕ್ ಕಾಂಯ್ ಥೊಡಿ ಭದ್ರತಿ ಜಾಯ್ ತರ್ ಬೊಣ್ಕ್ಯಾಚ್ಯಾ ಪಾಟಿಕ್ ಆಪ್ಣೆಂ ಚುರಿ ಘಾಲಿಜಯ್ಚ್.
ಸೇಸುನ್ ನಿರ್ದಾರ್ ಕರ್ನ್ ಜಾಲ್ಲೊ.
ಕಶ್ಟಾಂನಿ ಘರಾ ಪಾವ್ಲ್ಲ್ಯಾ ಸೇಸುಕ್ ಆಜ್ ಜೆಂವ್ಚಿ ಆಶಾ ನಾತ್ಲ್ಲಿ. ಭುಕ್ ಮ್ಹಳ್ಳಿ ಆಯ್ಚ್ಯಾ ದಿಸಾ ಮಯ್ಲಾ ಪಯ್ಸ್ ಧಾಂವ್ಲ್ಯಾ ಕಶೆಂ ಭಗ್ತಾಲೆಂ ತಾಕಾ. ರಾಂದ್ಚ್ಯಾ ಕುಡಾಕ್ ಗೆಲ್ಲ್ಯಾ ಸೇಸುನ್ ಆಸ್ಲ್ಲಿ ಏಕ್ಚ್ ಸಾತ್ ಇಂಚಾಂಚಿ ಬಡ್ಡ್ ಚುರಿ ಮಿಂಚ್ಲಿ.
"ಬೊಣ್ಕ್ಯಾಚ್ಯಾ ಜಲ್ಮಾಕ್ ಹಿಚ್ ಚುರಿ ಫಾವೊ.." ಚುರಿ ಘೆವ್ನ್ ಭಾಯ್ರ್ ಆಯಿಲ್ಲೊ ಸೇಸು ಮ್ಹಣಾಲಾಗ್ಲೊ, ಘರ್ಚ್ಯಾಂಕ್ ಆಯ್ಕಾ ಸಾರ್ಕೆಂ.
"ಮ್ಹಜ್ಯಾ ದುವೆಚೆಂ ನಿಸ್ಸಂತಾನ್ ಕೆಲ್ಲೆಂ ಪುರೊ ತ್ಯಾ ಬಾಯ್ಲಾಂಡ್ಯಾನ್. ಗಾಂವ್ಚ್ಯಾ ಚೆಡ್ವಾಂನಿ ಬಚಾವ್ ಜಾಯ್ಜಯ್ ತರ್ ಬೊಣ್ಕ್ಯಾಕ್ ದೇಶಾಂತರ್ ಧಾಡಿಜಯ್ ಜಾಲ್ಲೆಂ ಕರ್ಮ್ ಮ್ಹಜೆಂ.." ಸೇಸುಚ್ಯಾ ಕುಡಿಂತ್ಲೊ ಸ್ಪಿರಿತ್ ಬರೆಂಚ್ ಕಾಮ್ ಕರ್ತಾಲೊ.
ಸೇಸುಚೊ ಅವ್ತಾರ್ ಪಳೆವ್ನ್ ತಾಚಿ ಬಾಯ್ಲ್ ರುಮಿ, ಅಯ್ತು ಆನಿ ಇತರ್ ತೆಗಾಂ ಭುರ್ಗಿಂ ಆಕ್ಲಾಸೊನ್ ಗೆಲಿಂ. ಸೇಸುಕ್ ತಾಣಿಂ ಹ್ಯಾ ಸ್ಥಿತೆರ್ ದೆಕ್ಚೆಂ ಹೆಂಚ್ ಪಯ್ಲೆ ಪಾವ್ಟಿಂ.
"ಕಿತೆಂ ವೇಸ್ ಪಾಂಗುರ್ತಾಯ್ ಹಾಬಾ ತುಂ? ವೆಚೊ ಕಾಲ್ ಆಯ್ಲಾಗೀ ತುಕಾ?" ತಾಚ್ಯಾ ಬಾಯ್ಲೆನ್ ತಾಳೊ ಕಾಡ್ಲೊ.
"ವೆಚೊ ಕಾಲ್ ಮ್ಹಾಕಾ ನ್ಹಂಯ್ಗೋ ಗಾಡ್ವಾ, ಬೊಣ್ಕ್ಯಾಕ್, ಬೊಣ್ಕ್ಯಾಕ್ ಆಯ್ಲಾ. ಫಾಲ್ಯಾಂ ಸಾಕಾಳಿಂ ತಾಚೆಂ ಮೊಡೆಂ ಪಡ್ತೆಲೆಂಚ್.."
"ವ್ಹಯ್, ಮೊಡೆಂ ಪಡ್ತೆಲೆಂ ಆನಿ ತುಕಾ ಫುಲಾಂ-ಝೆಲೆ ಘಾಲ್ತೆಲೆ, ಸನ್ಮಾನ್ ಚಲ್ತೊಲೊ," ನಂಜಿ ಉಲಯ್ಲೆಂ ರುಮಿ.
"ಕೋಣ್ ಜಾಣಾ! ಗಾಂವಾಂತ್ಲ್ಯಾ ಲೊಕಾಮಾಯೆಚ್ಯಾ ಚೆಡ್ವಾಂಕ್ ರಾಕಣ್ ದಿಲ್ಲ್ಯಾ ಖಾತಿರ್ ಸನ್ಮಾನ್ ಮೆಳ್ಳ್ಯಾರ್ಯೀ ಮೆಳ್ಳೊ," ಸೇಸುನ್ ಸೊಡ್ನ್ ದಿಲೆಂನಾ.
ಬಾಪಯ್ ಆನಿ ಆವಯ್ ಭಾಯ್ರ್ ಚವ್ಕೆಂತ್ ಅಶೆಂ ಉಲೊವ್ನ್ ಪಡ್ತಾನಾ ಭಿತರ್ ಅಯ್ತು ಮಾಂದ್ರೆರ್ ಒಮ್ತೆಂಚ್ ಪಡೊನ್ ಕಸ್ಕಸೊನ್ ರಡ್ತಾಲೆಂ. ಕಸಲೆಂ ದುರ್ಬಾಗ್ ಆಪ್ಣಾಚೆಂ? ಚಿಂತಿಲಾಗ್ಲೆಂ ತೆಂ. ಚಲಿ ಜಾವ್ನ್ ಜಲ್ಮಾಲ್ಯಾರ್ ಹಿಚ್ಗಾಯ್ ಜಿಣಿ? ತೆಂಯೀ ಮ್ಹಾರಾಂಚ್ಯಾ ಜಾತಿಂತ್ ಜಲ್ಮಾಲ್ಯಾರ್ ಸ್ವಾತಂತ್ರ್ಯ್ ಮ್ಹಳ್ಳೆಂಚ್ ನಾಂಗಾಯ್?
ಅಕ್ಕ ನಾತ್ಲ್ಲ್ಯಾ ತ್ಯಾ ದಿಸಾ ಘರಾ ಭಿತರ್ ಖಂಡಿತ್ ವಚೊಂಕ್ ನಜೊ ಆಸ್ಲ್ಲೆಂ ಆಪ್ಣೆಂ. ತಿತ್ಲೆಂಯೀ ಅಕ್ಕಲ್ ಕಿತ್ಯಾಕ್ ಚುಕ್ಲೆಂ ಆಪ್ಣಾಕ್? ಜಾಂವ್ಕ್ ಅಕ್ಕಲ್ ನಾತ್ಲ್ಲೆಂ ಚೆಡುಂ ಮ್ಹಣ್ಂಚ್ ಒಲಾಯ್ಲಾಂ ಘರ್ಚ್ಯಾಂನಿ ಆಪ್ಣಾಕ್. ಪುಣ್ ತ್ಯಾ ದೀಸ್ ತರ್ಯೀ ಕಾಂಯ್ ಥೊಡೆಂ ಅಕ್ಕಲ್ ಆಪ್ಣಾಕ್ ಆಯಿಲ್ಲೆಂ ತರ್!
ಘರ್ ನಿತಳ್ ಕರ್ನ್ ಆಸ್ತಾನಾ ಪಾಟ್ಲ್ಯಾನ್ ಥಾವ್ನ್ ಆಂಗಾರ್ ಪಡ್ಲ್ಲೊ ಲಜ್ಮಾಡೊ. ಕಿಂಕ್ರಾಟ್ ಮಾರುಂಕ್ಯೀ ಆವ್ಕಾಸ್ ದಿಲೊನಾ ತಾಣೆಂ. ಉಕಲ್ನ್ ಭಿತರ್ ಕುಡಾಕ್ ವರ್ನ್ ದಾರ್ ಪಿಚಾರ್ ಕರ್ನ್ ವಾಗಾನ್ ಅಸ್ಕತ್ ಗೊರ್ವಾಚೆರ್ ಝೊಂಪಯ್ ಮಾರ್ಲ್ಲ್ಯಾಬರಿ ಆಪ್ಲಿ ಕಠೀಣ್ ಖೊರೊಜ್ ನಿವಾರ್ಲ್ಲಿ ತಾಣೆಂ.
"ಜಾಣಾಂಯ್ ತುಂ ತುಜ್ಯಾ ಬಾಪಯ್ನ್ ಕಿತ್ಲೆಂ ರೀಣ್ ಘೆತ್ಲಾಂ ಮ್ಹಜೆ ಥಾವ್ನ್?" ತಾಣೆಂ ಮ್ಹಳ್ಳೆಂ. "ಜಲ್ಮಾಂತ್ ಫಾರಿಕ್ ಕರುಂಕ್ ಜಾಂವ್ಚೆಂನಾ ತಾಕಾ. ತುಂ ಮ್ಹಾಕಾ ಅಸಲೆಂ ಸುಖ್ ತೆದಾಳಾ ತೆದಾಳಾ ದಿಶಿ ತರ್ ಸರ್ವ್ ರೀಣ್ ಮಾಫಿ ಜಾತೆಲೆಂ. ತುಜೆಂ ಕಾಜಾರ್ಯೀ ಬರ್ಯಾನ್ ಜಾತೆಲೆಂ. ಅಕ್ಕಾಕ್ ಮಾತ್ರ್ ಹಿ ಖಬರ್ ದಿಶಿ ತರ್ ಪರಿಣಾಮ್ ವಾಯ್ಟ್ ಉರ್ತೊಲೊ."
ಆಂಗ್ ಸಗ್ಳೆಂ ದುಕಿನ್ ಏಕ್ ರೂಂವ್ ಕಶೆಂ ಜಾಲ್ಲೆಂ ತರ್ಯೀ ಕಿತ್ಯಾಕ್ ಪಾತ್ಯೆಲಿಂ ತಾಕಾ ಹಾಂವ್? ಆಕೇರಿಕ್ ಖರೆಂಚ್ ಅಕ್ಕಲ್ ನಾತ್ಲ್ಲೆಂ ಚೆಡುಂ ಮ್ಹಣ್ ಆಪ್ಣೆಂಚ್ ಸಾಬಿತ್ ಕೆಲೆಂ ನ್ಹಂಯ್?
ತ್ಯಾ ಉಪ್ರಾಂತ್ ಅಕ್ಕ ಕುಳಾರಾ ಗೆಲ್ಲ್ಯಾ ಹರ್ಎಕಾ ದಿಸಾ, ಆನಿ ಥೊಡೆ ಪಾವ್ಟಿಂ ರಾನಾಂತ್ ಸಯ್ತ್ ಆಪ್ಣಾಕ್ ತಾಣೆಂ ಚಿಂವೊನ್ ಚಿಂವಡ್ ಕರ್ನ್ ಸೊಡ್ಲೆಂ.
ಆನಿ ಪೋರ್ ಆಪುಣ್ ತಾಚ್ಯಾ ಭುರ್ಗ್ಯಾಕ್ ಪೊಟಾಂತ್ ವಾವವ್ನ್ ಆಸಾಂ ತೆಂ ಕಳೊನ್ ತಾಕಾ ಸಾಂಗ್ತಾನಾ, ತಾಣೆಂ ದಿಲ್ಲಿ ತಾಕಿದ್ ಆಯ್ಕೊನ್ ಮೊಳಾಬ್ಚ್ ಮಾತ್ಯಾರ್ ಕೊಸ್ಳೊನ್ ಪಡ್ಲ್ಲೊ ಅನ್ಬೊಗ್ ಜಾಲ್ಲೊ.
"ಭಾರಿ ಖುಶೆಚಿ ಖಬಾರ್ಗೋ ಚೆಡ್ವಾ," ತಾಣೆಂ ಆಪ್ಣಾಕ್ ಮುಡ್ಡುನ್ ಮುಡ್ಡುನ್ ಸಾಂಗ್ಲೆಂ. "ಮ್ಹಾರಾಂಚ್ಯಾ ಜಾತಿಚ್ಯಾ ತುಜ್ಯಾ ಗರ್ಬಾಂತ್ ಉಂಚ್ಲ್ಯಾ ಜಾತಿಚೆಂ ಬಿಂ ಕಿರ್ಲಾಲಾಂ. ಪುಣ್ ಹೆಂ ಬಿಂ ಮ್ಹಾಕಾ ನಾಕಾ. ತುಂಚ್ ದವರ್. ಸಾಂಗಾತಾ ತುಜ್ಯಾ ಬಾಪಯ್ನ್ ಕೆಲ್ಲೆಂ ಸರ್ವ್ ರೀಣ್ ಮಾಫಿ ಜಾಲೆಂ ಮ್ಹಣ್ ಚೀಂತ್. ಪುಣ್ ತುವೆಂ ಕರಿಜಯ್ ಜಾಲ್ಲೆಂ ಭಾರಿಚ್ ಜವಾಬ್ದಾರೆಚೆಂ ಕಾಮ್ ಆನ್ಯೇಕ್ ಆಸಾ. ತುಜ್ಯಾ ಪೊಟಾಂತ್ಲ್ಯಾ ಭುರ್ಗ್ಯಾಚೊ ಬಾಪಯ್ ಬೊಣ್ಕೊ ಮ್ಹಣ್ ಮಾತ್ರ್ ತುವೆಂ ತುಜ್ಯಾ ಬಾಪಯ್ಕ್ ಸಾಂಗಾಜಯ್, ಜರೂರ್ ಸಾಂಗಾಜಯ್. ಹಾಂತುಂ ತುಜ್ಯಾ ಕುಟ್ಮಾಚೆಂ ಬರೆಂಪಣ್ಂಚ್ ಆಸಾ, ಉಡಾಸ್ ದವರ್."
ತಾಚಿ ತಾಕಿದ್ ಆಯ್ಕೊನ್ ಆಪುಣ್ ಖರೆಂಚ್ ಪಾಂಯಾನ್ ಚಿಲ್ಲುಂಚೊ ಕಸ್ರೊ ಕಶೆಂ ಭಗ್ಲ್ಲೆಂ ನ್ಹಂಯ್ ಆಪ್ಣಾಕ್?
ಭಾಯ್ರ್ ಆವಯ್ ಬಾಪಯ್ ಆಜೂನ್ ಉಲೊವ್ನ್ ಪಡ್ತಾಲಿಂ. ಬಾಪಯ್ ವಾನಾಚ್ಯಾ ಫಾತ್ರಾರ್ ಚುರಿ ಪಾಜ್ತಾಲೊ.
ತುಜಿ ಚುರಿ ಪಡಾಜಯ್ ಜಾಲ್ಲಿ ಬೊಣ್ಕ್ಯಾಚ್ಯಾ ಪಾಟಿಕ್ ನ್ಹಂಯ್, ಪಟೇಲಾಚ್ಯಾ ಪಾಟಿಕ್ ಮ್ಹಣ್ ಭಾಯ್ರ್ ವಚೊನ್ ಬಾಪಯ್ಕ್ ಶೀದಾ ಸಾಂಗಾಜಯ್ ಮ್ಹಳ್ಳಿ ಜಬ್ಬೊರ್ ತಾಳ್ಣಿ ಅಯ್ತುಕ್ ಆಯ್ಲಿ ತರ್ಯೀ, ಆಪ್ಲ್ಯಾ ದಳಿದ್ರ್ ಅಸಹಾಯಕ್ ಪರಿಸ್ಥಿತೆಂತ್ ತಶೆಂ ಕರ್ಚೆಂ ಧಯ್ರ್ ಹಾತಾಂ ಪಾಯಾಂಕ್, ಜಿಬೆಕ್ ಆಯ್ಲೆಂಚ್ ನಾ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
