ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಖೊವ್ಳಾಂ
ಕ್ಲೆರೆನ್ಸ್ ಪಿಂಟೊ, ಕೈಕಂಬ: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚಾ ಸಂಸಾರಾಂತ್ ಹೆಂ ನಾಂವ್ ಥಿರ್ ಆನಿ ಅಥ್ವೆಂಚ್. ಅಪುರ್ಭಾಯೆಚಿ ಕಥಾ, ವಿಭಿನ್ನ್ ರಿತಿನ್ ನಿರೂಪಣ್ ಕರ್ಚಾಂತ್ ಮಾತ್ರ್ ನ್ಹಂಯ್, ವಾಚ್ಪ್ಯಾಕ್ ತಿ ಕಾಣಿ ಸಂಪ್ತಾಪರ್ಯಾಂತ್ ಭಾಂದುನ್ ದವರ್ಚಿ ಕಲಾ ಆಸ್ಚಾ ಭೋವ್ ಥೊಡ್ಯಾಂ ಪಯ್ಕಿ ಉಟೊನ್ ದಿಸ್ಚೊ ಕಾಣ್ಯೆಗಾರ್ ಹೊ ಜಾವ್ನಾಸಾ. ಅಪುಟ್ ಕೊಂಕ್ಣಿ ಭಾಸ್ ಆನಿ ವಾಚ್ಪ್ಯಾಕ್ ವೆಗ್ಳ್ಯಾಚ್ ಸಂಸಾರಾಕ್ ವರುನ್ ವೆಚಿ ಹಾಚಾ ಕಾಣ್ಯಾಂಚಿ ವಿಶೇಷತಾ. ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಸುಟ್ಕಾ’ ಪರ್ಗಟ್ ಜಾಲಾ ತರ್ಯ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಹಾಣೆಂ ಎದೊಳ್ಚ್ ಬರಯ್ಲ್ಯಾತ್. ವೆಬ್ಸಾಯ್ಟಾಂಚೆರ್ ಸುರ್ವಾತ್ ಕೆಲ್ಲೆಂ ಪಯ್ಲೆಂ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಕಥಾಮೃತ್’ ಹಾಣೆಂಚ್ ಸುರ್ವಾತ್ ಕೆಲ್ಲೆಂ ಜಾವ್ನಾಸಾ. [’ಸುಟ್ಕಾ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಹಾಚ್ಯೊ ಥೊಡ್ಯೊ ಕಾಣ್ಯೊ: ದೆವಾನ್ ವಿಸರ್ಲೆಲಿಂ ಭುರ್ಗಿಂ, ಧುಳ್ ತಿ ಧುಳ್ಚ್ಚ್, ಯಜ್ನ್, ಏಕ್ ಕುಡ್ಕೊ ಪಿಜ಼್ಜಾ
ಕ್ಲೆರೆನ್ಸ್, ಕೈಕಂಬ
ಹಾಂವ್ ಲಂಡನ್ ಪಾವ್ಲ್ಲ್ಯಾ ದುಸ್ರ್ಯಾ ಮಹಿನ್ಯಾಂತ್ಚ್ಚ್ ಘರಾ ಜಾಯ್ ಜಾಲ್ಲ್ಯೊ ವಸ್ತು ಸೊದ್ಚ್ಯಾರ್ ಆಮಿಂ ಲಾಗ್ಲ್ಲ್ಯಾಂವ್.
ಸೆಕೆಂಡ್ ಹ್ಯಾಂಡ್ (ಎಕ್ ಪಾವ್ಟಿಂ ಉಪ್ಯೊಗ್ ಕರ್ನ್ ವಿಕ್ಚ್ಯೊ - ದುಸ್ರ್ಯಾ ವರ್ಗಾಚ್ಯೊ) ವಸ್ತು ವಿಕ್ಚ್ಯೊ ಹಾಂಗಾಸರ್ ಭಾರಿ ಚಡ್ ಮೆಳ್ತಾತ್ ಆನಿಂ ಬರ್ಯೊ ಮೆಳ್ತಾತ್ ಮ್ಹಣ್ ಆಮ್ಚ್ಯಾ ಮಂಗ್ಳುರಿ ಮಿತ್ರಾನ್ ಕಳಯಿಲ್ಲೆಂ ಅನಿಂ ತಸೆಂ ಆಮಿಂ ತ್ಯಾ ರಿತಿಂಚ್ಯಾ ವಸ್ತುಂಚ್ಯಾ ಸೊದ್ನೆರ್ ಆಸ್ಲ್ಲ್ಯಾಂವ್. ಯೆದೊಳ್ಚ್ ಸುಮಾರ್ ಘರಾಂನಿಂ ಆಮಿಂ ಗೆಲ್ಲ್ಯಾಂವ್ ತರೀ ಪಸಂದ್ ಜಾಲ್ಲ್ಯೊ ವಸ್ತು ಮೆಳೊಂಕ್ ನಾತ್ಲ್ಲ್ಯೊ. ಥೊಡ್ಯಾ ಘರಾಂನಿ ನಾಕಾರಿ ಆನಿಂ ಉಡಂವ್ಕ್ ಸಹಜ್ಲ್ಲ್ಯೊಚ್ಚ್ ವಸ್ತು ವಿಕುಂಕ್ ದವರ್ತಾಲೆ. ತೆಂಯೀ ಚಡಾವತ್ ಜಾವ್ನ್ ಸರ್ಧಾರ್ ಯಾ ಮಲ್ಭಾರಿಂಚ್ಯಾ ಘರಾಂನಿ.
ಲಂಡನಾಂತ್ ಬರ್ಯಾ ಎಕಾ ಕಂಪ್ಣೆಂತ್ ವೊಲ್ಟರಾಕ್ ಕಾಮ್ ಮೆಳ್ಲ್ಲೆಂ. ಮುಂಬಯ್ ಆಸ್ಲ್ಲೆಂ ಬರೆಂ ಕಾಮ್ ಸಾಂಡುನ್ ತೊ ಲಂಡನ್ ಆಯಿಲ್ಲೊ. ಕಂಪ್ಯೂತರ್ ಇಂಜಿನಿಯರ್ ಜಾಲ್ಲ್ಯಾ ವರ್ವಿಂ ಸಾಂಬಾಳ್ ಬರೊ ಆಸ್ಲ್ಲೊ. ಕಾಮಾಕ್ ಲಾಗೊನ್ ಎಕಾ ಮಹಿನ್ಯಾಂನ್ಂಚ್ಚ್ ಮ್ಹಾಕಾಯ್ ತಾಣೆಂ ಆಪವ್ನ್ ವೆಲ್ಲೆಂ. ಹಾಂವ್ಂಯ್ ಮುಂಬಯ್ ಆಸ್ಲ್ಲೆಂ ಕಾಮ್ ಸಾಂಡುನ್ ಹಾಂವ್ ಲಂಡನ್ ಆಯಿಲ್ಲಿಂ.
ಜೋಡ್ ಕಿತ್ಲಿ ಬರಿ ಆಸ್ಲ್ಯಾರೀ ಎಕ್ಲ್ಯಾಚಿಚ್ಚ್ ಜೋಡ್ ಕಿತ್ಲಿ ಮ್ಹಳ್ಯಾರ್ಯೀ ತಿತ್ಲಿಚ್ಚ್. ಎಕಾಚ್ಚ್ ಫರಾ ನವ್ಯೊ ವಸ್ತು ಹಾಡುಂಕ್ ವೊಲ್ಟರಾಕ್ ಪುರೊ ಪಡಾನಾತ್ಲ್ಲಿ ಗಜಾಲ್. ತ್ಯಾ ಖಾತಿರ್ ದುಸ್ರ್ಯಾ ವರ್ಗಾಚ್ಯೊ ವಸ್ತು ಸೊದುಂಕ್ ಆಮಿಂ ಸುರು ಕೆಲ್ಲೆಂ.
ಬುದ್ವಾರಾಚೆಂ ದಿಸಾಳ್ಯಾರ್ ದುಸ್ರ್ಯಾ ವರ್ಗಾಚ್ಯೊ ವಸ್ತು ವಿಕ್ಚ್ಯಾ ವಿಬಾಗಾಂತ್ ದೆಖ್ತಾಂ, ಪಯ್ಲೆಂ ಮ್ಹಾಕಾ ದಿಷ್ಟಿಕ್ ಪಡ್ಲೆಂ ನಾಂವ್ ಆನಿಂ ಜಾಹಿರಾತ್ - ಮಂಗ್ಳುರ್ಚ್ಯಾ ಕ್ರಿಸ್ತಾಂವ್ ಕುಟ್ಮಾಚೆಂ.
ಘರ್ಚೊ ವಸ್ತು - ಬರ್ಯೊಚ್ಚ್ ಆನಿಂ ಸವಾಯೆಕ್. ಸರ್ವ್ ವಸ್ತು ಬರ್ಯಾಚ್ಚ್ ರಿತಿನ್ ಸಾಂಬಾಳ್ಲ್ಲ್ಯೊ ಉಣ್ಯಾ ಮೊಲಾಕ್ ವಿಕ್ಚಿ ಭಾಸಾವ್ಣಿ.
ಜಾಹಿರಾತ್ ದೆಕೊನ್ ಹಾಂವ್ ಖುಶ್ ಜಾಲಿಂ. ಯೆದೊಳ್ ಆಮಿಂ ಚಡಾವತ್ ಸಿಕ್ಕ್, ಗುಜ್ರಾತಿ ವ ಮಲ್ಭಾರ್ಯಾಂಚ್ಯಾ ಘರಾಂನಿ ಗೆಲ್ಲ್ಯಾಂವ್. ತಾಣಿಂ ವಿಕುನ್ ದವರ್ಚ್ಯೊ ಬುರ್ನಾಸ್ ವಸ್ತು ಪಳವ್ನ್ ಎಕಾ ನಮೂನೆಚೊ ರಾಗ್ಯ್ ಆಯಿಲ್ಲೊ. ಆತಾಂ ಮಂಗ್ಳುರ್ಗಾರಾಚೆಂ ಕುಟಾಂಬ್. ವಸ್ತು ಖಂಡಿತ್ ಜಾವ್ನ್ ಬರ್ಯೊ ಆಸ್ತೆಲ್ಯೊ. ಹಾಂವೆ ತಾಂಕಾ ಫೊನ್ ಕೆಲೊಚ್ಚ್.
ವಿಲಿಯಂ ಡಿ’ಸೋಜಾ ತಾಚೆಂ ನಾಂವ್. ಮ್ಹಾತಾರೊ ತಾಳೊ ತಸೆಂ ಭಗ್ಲೆಂ ಮ್ಹಾಕಾ. ಉಲಂವ್ಕ್ ಬೋವ್ ಸುಡಾಳ್ ಆನಿಂ ಸಾರ್ಕೊ ಆಸ್ಲ್ಲೊ. ಥೊಡೆಪಾವ್ಟಿಂ ಚಿಕ್ಕೆಶೆ ಖೊಂಕ್ತಾಲೊ. ಹಾಂವ್ಂಯೀ ಮಂಗ್ಳುರಿ ಮ್ಹಣ್ ತಾಕಾ ಸಂತೊಸ್ ಜಾಲೊ.
ಆಯ್ತಾರಾ ಸಕಾಳಿಂಚ್ಚ್ ಯೇವ್ನ್ ವಸ್ತು ಪಳಯಾ ಮ್ಹಣ್ ತಾಣೆಂ ಮ್ಹಾಕಾ ಸಾಂಗ್ಲೆಂ. ದನ್ಪಾರಾಂ ಉಪ್ರಾಂತ್ ಬಾಯ್ರ್ ವೆತಾಂವ್ ತಸೆಂ ಸಕಾಳಿಂಚ್ಚ್ ಯೆಂವ್ಕ್ ವತ್ತಾಯ್ ಕೆಲ್ಲಿ.
ಸಾಂಜೆರ್ ವೊಲ್ಟರ್ ಆಯಿಲ್ಲೊಚ್ಚ್ ಹಾಂವೆ ಹಿ ಖಬಾರ್ ತಾಕಾ ಕಳಯ್ಲಿ. ತೊಯೀ ಖುಶ್ ಜಾಲೊ.
ಆಮಿಂ ಸ್ಟ್ರಾಪೊರ್ಡ್ ರಾವ್ತೆಲ್ಯಾಂವ್. ತಾಂಚೆ ಘರ್ ಬರ್ಮಿಂಗ್ ಹ್ಯಾಮ್ ಆಸ್ಲ್ಲೆಂ. ಸುಮಾರ್ ಚಾಳಿಸ್ ಕಿಲೊಮೀಟರ್ ಪಯ್ಸ್. ವಿಳಾಸ್ ಸರ್ವ್ ಸಾರ್ಕೊ ಮ್ಹಾಕಾ ದಿಲ್ಲೊ ತ್ಯಾ ವಿಲಿಯಂ ಸೋಜಾನ್.
ಆಯ್ತಾರಾ ಸಕಾಳಿಂ ಹಿಂವ್ ಬರೆಂ ಆಸ್ಲ್ಲೆಂ. ಚಿಕ್ಕೆ ಚಿಕ್ಕೆ ಬರಫ್ ಪಡೊನ್ ಯೆತಾಲೆಂ. ವೊಲ್ಟರ್ ಆಯ್ತಾರಾ ಸಕಾಳಿಂ ತಡವ್ ಕರ್ನ್ ಉಟ್ತಾಲೊ. ಪುಣ್ ಆಜ್ ತಾಕಾ ಫಾಂತ್ಯಾರ್ಚ್ಚ್ ಉಟವ್ನ್, ಹಾಂವ್ಂಯೀ ತಯಾರ್ ಜಾಲಿಂ. ಬರ್ಮಿಂಗ್ ಹ್ಯಾಮ್ ಘರ್ ಸೊಧುನ್ ಕಾಡುಂಕ್ ತ್ರಾಸ್ ಜಾಲೆ ನಾಂತ್.
ಬರ್ಮಿಂಗ್ ಹ್ಯಾಮ್ ಮುಖ್ಲ್ಯಾ ರಸ್ತ್ಯಾರ್ ಥಾವ್ನ್ ಆಡ್ ವಚೊನ್, ಚವ್ತ್ಯಾ ಆಡ್ ರಸ್ತ್ಯಾರ್ ತಾಂಚೆ ಘರ್. ಇಂಗ್ಲೆಂಡಾಂತ್ ಘರಾನಿಂ (ವಿಲ್ಲಾ) ರಾಂವ್ಚೆಂ ಮ್ಹಳ್ಯಾರ್ ಚಿಕ್ಕೆ ಗ್ರೇಸ್ತ್ ಭಾರತೀಯಾಂನಿ ಮಾತ್ರ್ ಮ್ಹಣ್ಯೆತ್ ಆನಿಂ ಆತಾಂ ವೆಚೆಂ ಘರ್ ಲ್ಹಾನ್ಸೊ ಬಂಗ್ಲೊಚ್ಚ್ ಜಾವ್ನಾಸ್ಲ್ಲೊ. ಬಾಯ್ಲ್ಯಾನ್, ಘರಾ ಭಂವಾರಿಂ ಆಸ್ಲ್ಲ್ಯಾ ಲ್ಹಾನ್ ಜಾಗ್ಯಾರ್ ಫುಲಾಂ ತೋಟ್ ಆಸಾ ಕೆಲ್ಲೆಂ. ಆಮಿಂ ಘರಾಚಿ ಬೆಲ್ಲ್ ಮಾರ್ತಾನಾ, ಆಮ್ಚ್ಯಾ ಯೆಣ್ಯಾಕ್ ತಯಾರ್ ಆಸ್ಲ್ಲ್ಯಾಬರಿ ಬಾಗಿಲ್ ಉಗ್ತೆಂ ಕೆಲೆಂ ಮ್ಹಾತಾರ್ಯಾ ಮನ್ಶಾನ್. ತೊ ವಿಲಿಯಂ ಸೋಜ್ ಮ್ಹಣ್ ಚಿಂತುಂಕ್ ಆಮ್ಕಾಂ ತ್ರಾಸ್ ಜಾಲೆ ನಾಂತ್.
ಸಾಧಾರ್ನ್ ಸತ್ತರ್ ವರ್ಸಾಂ ಪ್ರಾಯೆಚೊ ಮ್ಹಾತಾರೊ. ತೊಂಡ್ ಮಿರಿಯಾಂನಿ ಭರೊನ್ ಗೆಲಾಂ ತರೀ ಹಾಸೊ ತರ್ನೊಚ್ಚ್ ಆಸ್ಲ್ಲೊ. ಪಾಟ್ಲ್ಯಾನ್ ಎಕ್ ಗೊರಿ ಸ್ತ್ರಿ ಉಭಿ ಅಸ್ಲ್ಲಿ. ತಾಚಿ ಬಾಯ್ಲ್ ಮ್ಹಣ್ ಹಾಂವೆ ಚಿಂತ್ಲೆಂ.
ಆಮ್ಕಾಂ ಬರೊಚ್ಚ್ ಸ್ವಾಗತ್ ಲಾಭ್ಲೊ.
ವ್ಹಡ್ ವಿಸ್ತಾರ್ ಘರ್. ಲಂಡನಾಂತ್ ಇತ್ಲೆಂ ವ್ಹಡ್ ವಿಸ್ತಾರ್ ಘರ್ ಪಳಂವ್ಚೆಂ ಹಾಂವೆಂ ಪಯ್ಲ್ಯಾ ಪಾವ್ಟಿಂ.
ಆಮ್ಚಿ ವಳೊಕ್ ಆದ್ಲಿ ಬದ್ಲಿ ಜಾಲಿ. ತಿ ಗೊರಿ - ವಿಲಿಯಂ ಸೋಜಾಚಿ ಬಾಯ್ಲ್ ಆನಿಂ ತಿಚೆಂ ನಾಂವ್ ಕ್ಯಾಥರಿನ್ ಮ್ಹಣ್ ಕಳ್ಳೆಂ.
"ಆಮಿಂ ವಸ್ತು ಪಳಂವ್ಕ್ ಆಯಿಲ್ಲ್ಯಾಂವ್.." ವೊಲ್ಟರಾನ್ ಉಲಂವ್ಕ್ ಸುರು ಕೆಲೆಂ.
ಮ್ಹಾತಾರೊ ವಿಲಿಯಂ ಸೋಜ್, ಆಮ್ರುಕೊ ಹಾಸ್ಲೊ. "ಆಯ್ಲ್ಯಾತ್ ಮಾತ್.. ಕಿತೆಂ ಆಮ್ಸೊರ್ ಬಸಾ... ವಸ್ತು ಭಾರಿ ಬರ್ಯೊ ಆಸಾತ್.... ತುಮ್ಕಾಂ ದಾಕಯ್ತಾಂ..."
ಆಮಿಂ ಮುಖ್ಲ್ಯಾ ಸೊಫಾಚೆರ್ ಬಸ್ಲ್ಯಾಂವ್.
ಉಲವ್ಣೆಂ ಮುಕಾರ್ಸುನ್ ಗೆಲೆಂ. ವಿಲಿಯಂ ಸೋಜಾನ್ ಆಮ್ಚ್ಯಾ ಖಾತಿರ್ಚ್ಚ್ ಮ್ಹಣ್ ಪಾನ್ಪಳೆ ಆನಿ ಚೆಟ್ಣಿ ಕೆಲ್ಲಿ. "ಗಾಂವ್ಚೆಂ ಖಾಣ್ ಖಾಂವ್ಕ್ ಗಾಂವ್ಚೊ ಲೋಕ್ ಮೆಳಾಜಯ್.... ತೆದಾಳಾ ಮಾತ್ ಗಾಂವ್ಚ್ಯಾ ಮಾತಿಯೆಚೊ ಪರ್ಮಳ್ ಹಾಂಗಾಸರ್ ಲಂಡನಾಂತ್ಯೀ ಯೆತಾ.... ಕಿತ್ಲೆಶ್ಯಾ ವರ್ಸಾಂ ಉಪ್ರಾಂತ್ ಪಾನ್ಪಳೆ ಹಾಂವೆಂ ಕರ್ಚೆ... ಹಾಂಗಾ ಕೆದಾಳಾ ಪಳಯ್ಲ್ಯಾರಿ ಸ್ಯಾಂಡ್ವಿಚ್, ಬರ್ಗರ್... ಛಿ.. ಮ್ಹಾಕಾ ಕಿತ್ಯಾಕ್ಗಿ ಬರೆಂಚ್ಚ್ ಜಾಯ್ನಾ...."
ನಾಸ್ಟೊ ಜಾಲೊ. ಲಂಡನಾಂತ್ ಆಯಿಲ್ಲ್ಯಾ ಉಪ್ರಾಂತ್ ಪಯ್ಲ್ಯಾ ಪಾವ್ಟಿಂ ಮಮ್ಮಿನ್ ಕರ್ಚ್ಯಾ ಪೊಳಿಯೆಚೊ ಉಡಾಸ್ ಮ್ಹಾಕಾ ಆಯ್ಲೊ.
ವಿಲಿಯಂ ಸೋಜ್ ಬರೊಚ್ಚ್ ಆನಿಂ ಧಾದೊಶಿ ಉಲಯ್ತಾಲೊ. ಕ್ಯಾಥರಿನ್ ಆಮ್ಚ್ಯಾ ಸವೆಂ ಸಾಂಗಾತಾ ಮೆಳೊನ್ ಉಲಂವ್ಕ್ ಲಾಗ್ಲಿ.
ಉಲವ್ಣೆಂ ಮುಖಾರ್ಸುನ್ ವೆತಾನಾ ವಿಲಿಯಂ ಸೋಜಾಚಿ ಆಖ್ಖೀ ಜೀವನ್ ಚರಿತ್ರಾ ಆಮ್ಕಾಂ ಕಳ್ಳಿ.
ತಾಕಾ ಗಾವಾಂತ್ ಇಜಯ್ ನೀವ್ ರೋಡ್. ಧಾ ಜಣಾಂ ಬಾವ್- ಭಯ್ಣ್ಯಾಂ ಪಯ್ಕಿ ತೊ ನಿಮಾಣೊ. ಲ್ಹಾನ್ಪಣಾರ್ ಬೊಂಬಯ್ ಆಯಿಲ್ಲೊ. ಬೊಟ್ಲೆರಾಚೆಂ ಕಾಮ್ ಶಿಕೊನ್ ಬೊಂಬಯ್ ಮಜ್ಗಾಂವ್ ಗೊರ್ಯಾಂಚ್ಯಾ ಘರಾ ಕಾಮ್ ಕರುಂಕ್ ಲಾಗ್ಲೊ. ಗೊರೊ ಭಾರತ್ ಸಾಂಡುನ್ ವೆತಾನಾ, ತಾಚ್ಯಾ ತಾಣೆಂಯ್ ಇಂಗ್ಲೆಂಡಾಚಿ ವಾಟ್ ಧರ್ಲಿ.
ಗೊರ್ಯಾ ಧನಿಯಾಕ್ ಭುರ್ಗಿಂ ನಾತ್ಲ್ಲಿಂ. ಧನಿನ್ ಪಯ್ಲೆಂಚ್ಚ್ ಸರ್ಲ್ಲಿ ಜಾಲ್ಲ್ಯಾನ್ ಗೊರ್ಯಾಕ್ ವಿಲಿಯಂ ಸೋಜ್ಚ್ಚ್ ಆಧಾರಾಚೊ ಖಾಂಬೊ ಜಾಲೊ. ವಿಲಿಯಂ ಸೋಜಾಕ್ ಬರೆಂಚ್ಚ್ ಜಾಲೆಂ. ಆಯಿಲ್ಲ್ಯಾ ತೊಡ್ಯಾಚ್ಚ್ ವರ್ಸಾಂನಿ ತಾಕಾ ಇಂಗ್ಲೆಂಡಾಚೆಂ ನಿವಾಸಿಪಣ್ಯ್ ಲಾಭ್ಲೆಂ. ಗೊರೊ ಸರ್ಚ್ಯಾ ಫುಡೆಂ ತಾಚೆಂ ಘರ್ ಆನಿಂ ಆಸ್ತ್ ಸರ್ವ್ ತಾಕಾ ಲಾಬ್ಲಿ.
ಬೊತ್ಲೆರ್ ಆಸ್ಲ್ಲೊ ವಿಲಿಯಂ ಧನಿ ಜಾಲೊ. ಕ್ಯಾಥರಿನ್ ಮ್ಹಳ್ಳ್ಯಾ ಗೊರ್ಯಾ ಚೆಡ್ವಾಲಾಗಿಂ ಕಾಜಾರ್ ಜಾಲೊ. ದೊಗಾಂ ಭುರ್ಗಿಂ ಜಾಲಿಂ. ಮಾಲ್ಗಡೊ ಚೆರ್ಕೊ ಆನಿಂ ದುಸ್ರೆಂ ಚೆಡುಂ.
ಗ್ರೇಸ್ತ್ಕಾಯ್ ಆಸ್ಲ್ಲಿ ತರೀ ವಿಲಿಯಂ ಘರಾ ಬಸ್ಲೊ ನಾ. ಧನಿ ಸರ್ಲ್ಯಾ ಉಪ್ರಾಂತ್ ತಾಣೆಂ ಎಕಾ ರೆಸ್ಟೊರೆಂಟಾಂತ್ ಕಾಮ್ ಕರುಂಕ್ ಸುರು ಕೆಲೆಂ.
ಭುರ್ಗಿಂ ವ್ಹಡ್ ಜಾಲಿಂ. ಪಾಶ್ಚ್ಯಾತ್ ಶೆಳೆರ್ ತಾಂಚ್ಯಾ ಮತಿಕ್ ಲಾಗ್ಲೊ. ತೆಂಚ್ಚ್ ಶಿಕಾಪ್ ಆನಿಂ ಗೊರ್ಯಾ ಕಾತಿಚಿ ಸಂಸ್ಕ್ರತಿ. ಚೆರ್ಕೊ ಸೊಳಾ ವರ್ಸಾಂಚೊ ಜಾತಾನಾ, ಇಸ್ಕೊಲ್ ಸೊಡ್ನ್ ಎಕಾ ಡಿಪಾರ್ಟ್ಮೆಂಟಲ್ ಸ್ಟೊರಾಂತ್ ಕಾಮ್ ಕರಿಲಾಗ್ಲೊ. ಥಂಯ್ಸರ್ ತಾಕಾ ಎಕಾ ಗೊರ್ಯಾ ಚೆಡ್ವಾಚಿ ವಳೊಕ್ ಜಾಲಿ. ಚೆಡ್ವಾಕ್ ಘೆವ್ನ್ ಘರಾ ರಾಂವ್ಚ್ಯಾಕ್ ಆಯ್ಲೊ. ವಿಲಿಯಂ ಸೋಜಾಕ್ ಹೆಂ ಸೊಸಾನಾ ಜಾಲೆಂ. ತಾಣೆಂ ಆಡಾಯಿಲ್ಲ್ಯಾಕ್ ಚೆಡೊ ಗರ್ಲ್ ಫ್ರೆಂಡಾಸವೆಂ ವಿಂಗಡ್ ರಾಂವ್ಚ್ಯಾಕ್ ಚಲ್ತಚ್ಚ್ ರಾವ್ಲೊ. ತಸೆಂ ಮ್ಹಣೊನ್, ದುಸ್ರ್ಯಾ ಚೆಡ್ವಾಕ್ ಸಾಂಬಾಳ್ಚೆಂ ಪ್ರೇತನ್ ಕೆಲೆಂ ತರ್ ತೆಂಯೀ ಪಂದ್ರಾ ಜಾತಾನಾ ಸಾಂಗಾನಾಸ್ತಾನಾ ಘರಾ ಥಾವ್ನ್ ಧಾಂವ್ಲೆಂ ಆಪ್ಲ್ಯಾ ಬೋಯ್ಫ್ರೆಂಡಾಸಂಗಿಂ ರಾವೊಂಕ್. ಆತಾಂ ಚೆಡೊ ಕಾಜಾರ್ ಜಾಲ್ಲ್ಯಾ ಬಾಯ್ಲೆಕ್ ಸಾಂಡುನ್ ತಿಸ್ರ್ಯಾಚ್ಚ್ ಚಲಿಯೆ ಸಂಗಿಂ ರಾವ್ತಾ ತರ್ ಚೆಡುಂ ಕಾಜಾರಾವಿಣೆಂ ಭುರ್ಗೆಂ ಜಾವ್ನ್, ಆತಾಂ ವಿಂಗಡ್ಚ್ಚ್ ದಾದ್ಲ್ಯಾಸವೆಂ ವಸ್ತಿ ಕರ್ತಾ.
ಆಸ್ಲ್ಲಿಂ ಭುರ್ಗಿಂ ಸಾಂಡುನ್ ಗೆಲ್ಯಾ ಉಪ್ರಾಂತ್ ವಿಲಿಯಂ ಸೋಜ್ ಆನಿಂ ಕ್ಯಾಥರಿನಾಚಿ ಜಿಣಿ ಎಕ್ಸುರಿ ಆನಿಂ ತಸೆಂ ಕೊಡ್ಸಾಣೆಚಿ ಜಾಲ್ಲಿ.
ಧನ್ಪಾರ್ ಜಾವ್ನ್ ಯೆತಾಲೊ. ವಿಲಿಯಂ ಸೋಜಾನ್ ಬಿಯರ್ ಹಾಡ್ಲಿಚ್ಚ್. ವೊಲ್ಟರ್ ನಾಕಾ ಮ್ಹಣ್ಂಚ್ಚ್ ಉಟ್ಲೊ. ಹಾಂವೆಂಯೀ ನಾಕಾ ಮ್ಹಳೆಂ. "ವಸ್ತು ಪಳಂವ್ಕ್ ಆಯಿಲ್ಲಿಂ ಆಮಿಂ - ಬಿಯರ್ ಆನಿಂ... ನಾಕಾ ... ನಾಕಾ... ವಸ್ತು ಪಳವ್ನ್ ಆಮಿಂ ಚಲ್ತಾಂವ್ ...." ಆಮಿಂ ಉಭೆ ರಾವ್ಲ್ಯಾಂವ್.
ವಿಲಿಯಂ ಸೋಜಾನ್ ಆಮ್ಕಾಂ ಬಸಯ್ಲೆಂ. ಬಿಯರ್ ಗ್ಲಾಸಾಂನಿಂ ವೊತ್ಲಿಚ್ಚ್. ಮ್ಹಾಕಾ ಬರೊಚ್ಚ್ ಮೊಲಾಧಿಕ್ ಧವೊ ವಾಯ್ನ್ ದಿಲೊ. "ಗಾಂವ್ಚೆ ಮನಿಸ್ ... ತೆಯೀ ಕೊಡ್ಯಾಳ್ಗಾರ್... ತುಮಿಂ ಆಯಿಲ್ಲ್ಯಾತ್ ಕಿತ್ಯಾಕೀ ಜಾಂವ್ ಪುಣ್ ಹಾಂಗಾ ಆಯ್ಲ್ಯಾ ಉಪ್ರಾಂತ್ ಬಿಯರ್ ಆನಿಂ ಜೆವಾಣ್ ಕೆಲ್ಯಾ ಶಿವಾಯ್ ... ನಾ... ತುಂಮಿಂ ಜೆವ್ನ್ಂಚ್ಚ್ ವಚಾಜಯ್.."
ವಿಲಿಯಂ ಸೋಜಾಚೊ ಸ್ವಭಾವ್ ವಿಚಿತ್ರ್ ದಿಸ್ಲೊ ಮ್ಹಾಕಾ. ವಸ್ತು ಪಳೆಂವ್ಕ್ ಆಯಿಲ್ಲ್ಯಾ ಆಮ್ಕಾಂ ಹಿ ಪುರಾ ಸರ್ಭಾರಾಯ್. ಹಾಂವ್ ಕಾಂಯ್ ಉಲಯ್ಲಿಂ ನಾ. ಬಿಯರ್ ಕೆನಾಂ ಉಪ್ರಾಂತ್ ಕೆನಾಂ ಉಗ್ತಿ ಜಾಲಿ. ವೊಲ್ಟರ್ ಆನಿಂ ವಿಲಿಯಂ - ಲಾಗ್ಸಿಲಿ ವಳೊಕ್ ಆಸ್ಲ್ಲ್ಯಾ ಬರಿಚ್ಚ್ ಉಲಯ್ತಾಲೆ. ಕ್ಯಾಥರಿನ್ ತಾಂಕಾಂ ಸಾಂಗಾತ್ ದಿತಾಲಿ. ತಿಯೀ ಖುಶಲಾಯೆಂತ್ ಹಾಸ್ತಾಲಿ. ಹಾಂವೆಂಯೀ ತಾಂಕಾಂ ಸಾಂಗಾತ್ ದಿಂವ್ಕ್ ಪ್ರೇತನ್ ಕೆಲೆಂ ತರೀ ಮ್ಹಾಕಾ ಸಾಧ್ಯ್ ಜಾಲೆಂ ನಾ.
ಜೆವಾಣ್ ಜಾತಾನಾ ವೊರಾಂ ತೀನ್ ಜಾಲಿಂ. ಗಾಂವ್ಚ್ಯಾ ರಾಂದ್ಪಾಚೊ ಉಡಾಸ್ ದಿಲೊ ವಿಲಿಯಂ ಸೋಜಾನ್. ದುಕ್ರಾಚೆಂ ಸರ್ಪಾತೇಲ್ ಭಾರಿಚ್ಚ್ ಬರೆಂ ಕೆಲ್ಲೆಂ. ತಾಂದ್ಳಾಚೆ ಪೊಳೆ ಆನಿಂ ಕುಂಕ್ದಾಚಿ ಕಡಿ. ಕೊಡ್ಯಾಳ್ ಘರಾಂಚೆಂಚ್ಚ್ ಜೆವಾಣ್.
ಸಾಂಜ್ ಜಾವ್ನ್ ಯೆತಾಲಿ. ಚ್ಹಾಯ್ ಜಾಲಿ.
ಆತಾಂ ಹಾಂವ್ ಉಬಿಂ ಜಾಲಿಂ. "ಸಕಾಳಿಂ ಆಯಿಲ್ಲ್ಯಾಂವ್ ಆತಾಂ ರಾತ್ ಜಾವ್ನ್ ಯೆತಾ..." ಹಾಂವೆ ಮ್ಹಳೆಂ ವಿಲಿಯಂ ಸೋಜಾಲಾಗಿಂ. "ಆನಿಂ ಪುಣಿ ವಸ್ತು ದಾಕಯ್ಶಿಗೀ?"
ವಿಲಿಯಂ ಸೋಜ್ ಕಾಲುಬುಲೊ ಜಾಲೊ. ಕ್ಯಾಥರಿನಾಕ್ ಪಳಯ್ಲಾಗ್ಲೊ. "ವಸ್ತು ಆಸ್ಲ್ಲ್ಯೊ ಪುಣ್... ಸಾರ್ಕ್ಯೊ ಮಾಂಡುನ್ ದವರುಂಕ್ ..."
"ತರ್ ಆಮ್ಕಾಂ ಕಿತ್ಯಾಕ್ ಆಪಯಿಲ್ಲೆಂಯ್....." ಹಾಂವ್ ಉಸ್ಮಡ್ಲಿಂ. ಮ್ಹಜ್ಯಾ ತಾಳ್ಯಾಂತ್ ರಾಗ್ ಆಸ್ಲ್ಲೊ ತೊ ವಿಲಿಯಂ ಸೋಜಾಕ್ ಸಾರ್ಕೊ ಆರ್ಥ್ ಜಾಲೊ ತೆಂ ಖಂಡಿತ್.
ಕ್ಯಾಥರಿನ್ ಮಧೆಂ ಆಯ್ಲಿ. "ಆಮ್ಕಾಂ ಮಾಫ್ ಕರಾ....." ತಿಚ್ಯಾ ಉತ್ರಾಂನಿ ದೀನತಾ ಭ್ಹರೊನ್ ಗೆಲ್ಲಿ. "ಆಮಿಂ ತುಮ್ಕಾಂ ಆಸೆಂ ಕರುಂಕ್ ನ್ಹಜೊ ಆಸ್ಲ್ಲೆಂ ಪುಣ್..." ತಿಚ್ಯಾ ದೊಳ್ಯಾಂನಿ ದುಃಖಾಂ ಭರ್ಲಿಂ.
ಹಾಂವ್ ಆನಿಂ ವೊಲ್ಟರ್ ಉಲಂವ್ಕ್ ಸಕ್ಲ್ಯಾಂನಾಂವ್.
ಥೊಡೊ ವೇಳ್ ಮೌನ್ಪಣ್ ಆಮ್ಚ್ಯಾ ಮಧೆಂ ಭರೊನ್ ರಾವ್ಲೆಂ.
"ಹಾಂವ್ ತುಮ್ಕಾಂ ಸತ್ ಆನಿಂ ಸುಡಾಳ್ ಸಾಂಗ್ತಾಂ .... ಆಮಿಂ ಮನ್ಶಾಂಲಾಗಿಂ ಉಲಂವ್ಕ್ ಆಶೆಲ್ಲ್ಯಾಂವ್.... " ವಿಲಿಯಂ ಸೋಜ್ ಹಾಳ್ವಾಯೆನ್ ಉಲಯ್ಲೊ. "ಹ್ಯಾ ಸುಕಾಳ್ ದೇಶಾಂತ್ ಆಮ್ಚ್ಯಾ ತಸಲ್ಯಾ ಮ್ಹಾತಾರ್ಯಾಂ ಲಾಗಿಂ ಕೋಣ್ ಉಲಂವ್ಕ್ ಯೆತಾ? ಆಮ್ಚಿಂ ಭುರ್ಗಿಂ ಉಡಾಸ್ ಜಾಲ್ಯಾರ್ ಕ್ರಿಸ್ಮಸಾಕ್ ಯೆತಾತ್... ಆರ್ಧ್ಯಾ - ಎಕಾ ವೊರಾಕ್..... ಆದ್ಲ್ಯಾ ವರ್ಸಾ ದೊಗಾಂಯ್ ಯೆಂವ್ಕ್ನಾಂತ್... ಆಮಿಂ ಕೊಣಾ ಕಡೆ ಪುಣಿ ಉಲಂವ್ಕ್ ಆಶೆಲ್ಯಾಂವ್.. ಹ್ಯಾ ಹಿಂವಾಂತ್ ಬಾಯ್ರ್ ಖಂಯ್ಚರ್ಯ್ ವಚೊಂಕ್ಯ್ ಜಾಯ್ನಾ.... ಜೆವಾಣ್ ಖಾಣ್ ಪುರಾ ಆಸಾ.... ಘರಾಂತ್ ಬಸೊನ್... ಆಮ್ಚಿಂಚ್ಚ್ ಮನ್ಶಾಂ ನಾಂತ್..... ತ್ಯಾ ದೆಕುನ್ ಹೊ ನಾಟಕ್ ಖೆಳ್ಳ್ಯಾಂವ್.. ದಯಕರ್ನ್ ಆಮ್ಕಾಂ ಮಾಫ್ ಕರಾ.... ಪುಣ್ ತುಮಿ ಆಯಿಲ್ಲ್ಯಾನ್ ಆಮ್ಚೆಂ ಮನ್ ಧಾದೊಶಿ ಜಾಲೆಂ ಆನಿಂ ಕಾಳಿಜ್ ಭರ್ಲೆಂ..." ವಿಲಿಯಂ ಸೋಜ್ ರಡ್ತಾಲೊ.
ಮ್ಹಾಕಾ ಸರ್ವ್ ಸಮ್ಜಾಲ್ಲೆಂ. ವಿಲಿಯಂ ಸೋಜಾನ್ ಆಪ್ಲ್ಯಾ ಘಾಯಾಂ ವಯ್ಲಿಂ ಖೊವ್ಳಾಂ ಕಾಡುನ್ ತಾಚ್ಯಾ ಮನಾಂತ್ಲಿ ದೂಕ್ ಆಮ್ಕಾಂ ಉಗ್ತಿ ದಾಕಯಿಲ್ಲಿ. ವಿಲಿಯಂ ಸೋಜ್ಚ್ಚ್ ಕಿತ್ಯಾಕ್ ತಾಚ್ಯಾ ತಸಲೆ ಹಜಾರ್ ಮ್ಹಾತಾರೆ ಹ್ಯಾ ದೇಶಾಂತ್ ಆಸಾತ್ ತೆಂ ಖಂಡಿತ್ ತೆಂ ಆಮಿಂ ಜಾಣಾಸ್ಲ್ಲ್ಯಾಂವ್....
ತಾಂಚಿ ಭಿರ್ಮತ್ ದಿಸ್ಲಿ.
ವೊಲ್ಟರ್, ವಿಲಿಯಂ ಸೋಜಾಕ್ ಲಾಗಿಂ ಗೆಲೊ.
"ಕಾಂಯ್ ವ್ಹಡ್ ನ್ಹಂಯ್.. ಆಮ್ಕಾಂ ಸರ್ವ್ ಸಮ್ಜಾತಾ... ಯೆಂವ್ಚ್ಯಾ ಆಯ್ತಾರಾ ತುಮಿಂ ವಸ್ತು ಪಳಂವ್ಕ್ ಆಮ್ಗೆರ್ ಯೆಯಾ... ಆಮ್ಗೆರ್ ಸೆಕೆಂಡ್ ಹ್ಯಾಂಡ್ ವಸ್ತು ಆಮಿಂ ವಿಕ್ತೆಲ್ಯಾಂವ್....."
ವಿಲಿಯಂ ಸೋಜ್ ಕ್ಯಾಥರಿನಾಕ್ ಪಳವ್ನ್ ಹಾಸ್ಲೊ. ತಾಚ್ಯಾ ದೊಳ್ಯಾಂತ್ಲಿ ದುಃಖಾಂ ಸುಕ್ಲ್ಲಿಂ.
ಕ್ಯಾಥರಿನ್ ಆಮ್ರುಕೊ ಹಾಸೊ ಹಾಸಾಲಾಗ್ಲಿ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
