ಕವಿತಾकविताPoem
ಖೊಡ್,
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಖೊಡ್, ವಾಡಾವಳ್ ಆನಿಂ ಎಕಾ ಬರವ್ಪ್ಯಾಚಿ ನೈತಿಕ್ ಜವಾಬ್ಧಾರಿ
[ಹೆಂ ಕವಿತಾಪಾಠ್ ಹಾಚಾ ಪಯ್ಲ್ಯಾ ಬುಕಾಚೆಂ ಸಂಪಾದಕೀಯ್]
ವಲ್ಲಿ ಕ್ವಾಡ್ರಸ್
ಖೊಡ್:
ಅಜಿಕ್ ಚಡುಣೆಂ ಪಂದ್ರಾ ವಸ್ರಾಧಿಂ ಹಾವೆಂಚ್ ವಾಚ್ಲ್ಲಿ ಏಕ್ ಮಟ್ವಿ ಕಾಣಿ ಆಯ್ಲೆವಾರ್ ಹಾವೆಂಚ್ ವಾಚ್ಲಿ. ಪಂದ್ರಾ ವರ್ಸಾಧಿಂ ತ್ಯಾ ಕಾಣ್ಯೆಕ್ ಪರ್ಗಟ್ಲೆಲ್ಯಾ ಪತ್ರಾಚೆರ್ ಹಾವೆಂಯ್ ಭಾರಿಚ್ ಹೊಗ್ಳಿಕಾಯ್ ಉಚಾರ್ನ್ ಸಂಪಾದಕಾಕ್ ಪತ್ರಾಂ ಘಾಲ್ಲಿಂ ಆನಿಂ ಹಾವೆಂಯ್ ವಾಚ್ಲ್ಲ್ಯಾ ಬರ್ಯಾಂತ್ಲಿ ಏಕ್ ಬರಿ ಕಾಣಿ ಮ್ಹಣ್ ಮ್ಹಜಾ ಮತಿಂತ್ ವೊಪುನ್ ಘೆತ್ಲ್ಲೆಂ. ಪುಣ್ ಆಯ್ಲೆವಾರ್ ತಿಚ್ಚ್ ಕಾಣಿ ಪರತ್ ವಾಚ್ತಾನಾ ತ್ಯಾ ಕಾಣ್ಯೆಚಾ ಮಾಂಡಾವಳೆಂತ್ ಆಸ್ಲ್ಲೆ ಅಸ್ಕತ್ ಕೊನ್ಶೆ ಮ್ಹಾಕಾ ದಿಸ್ಲೆ ಆನಿಂ ತ್ಯಾ ಕಾಣ್ಯೆಂತ್ ಆಸ್ಲ್ಲ್ಯೊ ಸಭಾರ್ ಚುಕಿಯ್ ಮ್ಹಾಕಾ ಗೊಮ್ಲ್ಯೊ.
ಅಶೆಂ ಕಿತ್ಯಾಕ್?
ಭೋವ್ಶಾ ಚಿಂತ್ನಾಂನಿ ಜಾಲ್ಲಿ ಬದ್ಲಾವಣ್, ಖಿಣಾ ಖಿಣಾಂನಿ ಹೊ ಸಂಸಾರ್ಚ್ ಬದ್ಲೊನ್ ಯೆತಾಸ್ತಾಂ ಮನ್ಶಾನ್ ಬದಲ್ಚೆಂ ಸ್ವಾಭಾವಿಕ್ ನ್ಹಯ್ಗಿ? ತರ್ ಹ್ಯಾ ಕಾಣ್ಯೆಚಾ ಅಸ್ಕತ್ಕಾಯೆಚೆರ್ ಮ್ಹಜೆಂ ಉಣೆಂ ಚಿಂತಾಪ್ ಕಾಂಯ್ ಖೊಡ್ ನ್ಹಯ್ಮೂ? ಆಸೊಂ! ಮನಿಸ್ ಖೊಡಿ ಕಿತ್ಯಾಕ್ ಕಾಡ್ತಾ? ಖೊಡ್ ಆನಿ ಮೊಸೊರ್ ದೊನ್ಯ್ ಏಕ್ ನ್ಹಯ್ - ವೆವೆಗ್ಳೆಂ.
ತರ್ ದೆವಾನ್ ರಚ್ಲ್ಲ್ಯಾ ಸಂಸಾರಾಂತ್ ಪಯ್ಲಿ ಖೊಡ್ ಕಶಿ ಉಭ್ಜಾಲಿ?
ಮ್ಹಜಾ ಮತಿನ್ ವೊಪುನ್ ಘೆತ್ಲ್ಲೆಪ್ರಕಾರ್ ಸಂಸಾರಾಂತ್ ಪಯ್ಲಿ ಖೊಡ್ ಉದೆಲ್ಲಿ ಭುಮಿವೈಕುಂಟಾಂತ್ - ಯೆವೆ ಥಾವ್ನ್. ತಿಕಾ ತ್ಯಾ ಸೊರೊಪಾನ್ ನಾಡ್ಲೆಂ ಜಾವ್ಯೆತಾ, ಪುಣ್ ಯೆವೆನ್ ಜೆದ್ನಾಂ ಆದಾಂವ್ ಬಾಪಾಲಾಗಿಂ ದೆವಾಚಾ ಉತ್ರಾಚೆರ್ ಖೊಡ್ ಉಚಾರ್ನ್ ಆದಾಂವ್ಕ್ ತೆಂ ಆಡ್ವಾರ್ಲೆಲೆಂ ಫಳ್ ಖಾಂವ್ಕ್ ಮಜ್ಬೂರ್ ಕೆಲೆಂ ಆನಿಂ ಸುರ್ವಾತ್ ಜಾಲಿ ಮನ್ಶಾಚಿ ಧಾಂವ್ಣಿಂ - ಜೊ ಅಜೂನ್ ಧಾಂವೊನ್ಂಚ್ ಆಸಾ..
ಹಿ ಖೊಡ್ ಕಸಲಿ?
ಆಪ್ಲ್ಯಾ ಸ್ವಾರ್ಥಾಚಿ ಖೊಡ್, ಆಪ್ಲ್ಯಾ ಫಾಯ್ದ್ಯಾಚಿ ಖೊಡ್, ಅಪ್ಣಾಕ್ ರಚ್ಲ್ಲ್ಯಾ ದೆವಾಚೆರ್ಚ್ ಬೆಮಾಣ್ ಜಾಂವ್ನ್ ಅಪ್ಲೊ ಸ್ವಾರ್ಥಿ ಇರಾದೆ ಜ್ಯಾರಿ ಕರ್ಚಾ ಅಬ್ಲೇಸ್ಪಣಾಚಿ ಖೊಡ್.
ಪುಣ್ ಆಮಿಂ ಹ್ಯಾ ಬುಕಾಂತ್ ಎಕ್ಟಾಂಯ್ ಕೆಲ್ಲಿ ಖೊಡ್ ತಸಲಿ ಜಾಂವ್, ತಸಲ್ಯಾ ಇರಾದ್ಯಾನ್ ಜಾಂವ್ ಆಸಾ ಕೆಲ್ಲಿ ಬಿಲ್ಕುಲ್ ನ್ಹಯ್. ಆಮ್ಚೊ ಇರಾದೊ ಅಧ್ಯಯನಾಚೊ, ಸಾಮೂಹಿಕ್ ಅಧ್ಯಯನಾಚೊ ಮ್ಹಣ್ತಾನಾ ಹಿಂ ಅಧ್ಯಯನಾಂ ಎಕೆಕ್ಲ್ಯಾಂಚೆ ವಿಚಾರ್ ಮಾತ್ರ್ ವೆಕ್ತ್ ಕರ್ತಾ ಶಿವಾಯ್ ವಿಮರ್ಸೊ ನ್ಹಯ್. ಹಿಂ ವಿಮರ್ಶ್ಯಾಚಿಂ ಲೇಖನಾಂ ಬಿಲ್ಕುಲ್ ನ್ಹಯ್.
ವಾಡಾವಳ್:
ಸಂಸಾರಾಂತ್ ಖಂಚಾಯ್ ಭಾಸೆಂತ್ ಸಾಹಿತ್ಯ್ ವಾಡಾಜಯ್ ಯಾ ವಾಡ್ಲಾಂ ತರ್ ತಾಕಾ ಅಸಲ್ಯೊಚ್ ಖೊಡಿ ಕಾರಾಣ್ ಜಾವ್ನಾಸಾತ್. ಏಕ್ ಖೊಡ್ ಎಕಾ ಬರವ್ಪ್ಯಾಕ್ ಆಪ್ಲ್ಯಾ ಲಿಖ್ಣೆಧ್ವಾರಿಂ ಆಸ್ಚಿ ಜವಾಬ್ಧಾರಿ ಧಾಖವ್ನ್ ದಿತಾ. ಖೊಡ್ ಕೆದ್ನಾಂಯ್ ಕೊಡುಚ್ ಆಸ್ತಾ ದೆಕುನ್ ಖೊಡ್ಯಾರ್ಯಾಂಕ್ ಸಮಾಜ್ ಪಯ್ಸ್ಚ್ ದವರ್ತಾ - ಹೆಂ ಸಹಜ್. ಪುಣ್ ಖೊಡಿಂಕ್ಯ್ ತಾಚೆಂಚ್ ಮ್ಹಳ್ಳೆಂ ಸ್ಥಾನ್ ಆಸಾ ಆನಿಂ ಆಸಾಜಯ್ಚ್. ಜಶೆಂ ಭುರ್ಗ್ಯಾಂಕ್ ವಾಯ್ಟ್ ಪಿಡೆಚಾ ವೆಳಾರ್ ತಸಲೆಂಚ್ ಕೊಡು ವಕಾತ್ ದಿತಾತ್ ತಶೆಂ ಸಾಹಿತ್ಯಾಕ್ಯ್ ವಾಯ್ಟ್ ಪಿಡಾ ಯೆತಾನಾ ಅಸಲಿಚ್ ಖೊಡ್ ಉಪ್ಕಾರಾಕ್ ಪಡ್ತೆಲಿ - ಜರ್ತರ್ ಹೆಂ ಕೊಡು ಲೆಕಾಚೆಂ ಘೆತ್ಲೆಂ ತರ್.
ಸಾಹಿತ್ ಏಕ್ ಅಭಿವ್ಯಕ್ತಿ, ಸಾಹಿತ್ಯ್ ಏಕ್ ಲಿಸಾಂವ್, ಸಾಹಿತ್ಯ್ ಏಕ್ ವಾಟ್ ಜಿ ಮನ್ಶಾಚಾ ಮತಿಂತ್ ವಿಚಾರ್ ಉಭ್ಜಾಯ್ತಾ, ಬರೆಂ-ವಾಯ್ಟ್ ಉಭ್ಜಾಯ್ತಾ ತಶೆಂಚ್ ಸಮಾಜೆಚಾ ವಾಡಾವಳೆಕ್ ಸಹಕಾರ್ ದಿತಾ. ಹ್ಯಾ ಮಧೆಂ ಹಾತಿಂ ಲಿಖ್ಣಿಂ ಧರ್ಲ್ಲೆ ಸಗ್ಳೆ ಸಾಹಿತಿ ಜಾಯ್ನಾಂತ್, ವಾಚ್ಪಿ ಸಗ್ಳೆ ವಿಧ್ವಾನ್ ಜಾಯ್ನಾಂತ್.
ಎಕಾ ಬರ್ಯಾ ಸಮಾಜೆಕ್ ಭಾಂದುನ್ ಹಾಡ್ಚಾಂತ್ ಸಾಹಿತ್ಯ್ ಭೋವ್ ವಡ್ಲೊ ಪಾತ್ರ್ ಖೆಳ್ತಾ ಮ್ಹಣ್ ಹಾಂವ್ ತರ್ಯೀ ಪಾತ್ಯೆತಾಂ. ಆನಿಂ ಜರೀ ತರೀ ಆಮ್ಚಾ ಸಾಹಿತಿಕ್ ವಾಡಾವಳೆಕ್ ಉಪ್ಕಾರಾಕ್ ಪಡ್ಚಿಂ ಬರ್ಪಾಂಚೆರ್ ಜೊಕ್ತ್ಯಾ ಮಾಪಾನ್ ಖೊಡ್ ಉಚಾರ್ಲಿ ತರ್ ಥಂಯ್ಚೆಂ ಸಾಹಿತ್ಯ್ ವ್ಹಾಡ್ತಾ ಮಾತ್ರ್ ನ್ಹಯ್ ಸಮಾಜೆಕ್ ಬರೆಂ ಕರ್ಚಾಕ್ ಹ್ಯೊ ಖೊಡಿ ಉಪ್ಕಾರಾಕ್ಯ್ ಪಡ್ತಾತ್.
ನೈತಿಕ್ ಜವಾಬ್ಧಾರಿ ಕೊಂಕ್ಣೆಂತ್ ಖೊಡಿ ಕಿತ್ಯಾಕ್ ನಾಂತ್?
ಕೊಂಕ್ಣೆಂತ್ ಕಸಲೆ ಬೂಕ್ ಪರ್ಗಟ್ಲ್ಯಾತ್ ಯಾ ಪರ್ಗಟೊನ್ ಆಸಾತ್?
ಮ್ಹಳ್ಳಿಂ ಸವಾಲಾಂ ವಿಚಾರ್ಲಿಂ ತರ್ ತಾಂತುಂ ಫಕತ್ತ್ ಸವಾಲಾಂಚ್ ಉರ್ತೆಲಿಂ;
ಕಿತ್ಯಾಕ್ ನಾಂತ್?
ಕಶೆಂ ಆಸಾಜಯ್ ಆಸ್ಲ್ಲೆಂ?
ಕಿತ್ಯಾಕ್ ನಾಂತ್?
ಕೊಣೆಂ ಕರಿಜಾಯ್ ಆಸ್ಲ್ಲೆಂ?
ಕಿತೆಂ ಫಾಯ್ದೊ?
ಅಖೇರಿಕ್ ಸಂಪ್ತಾ ಹೆಚ್ ದೈವಿಕ್ ಸವಾಲಾಂತ್ - ಕಿತೆಂ ಫಾಯ್ದೊ?
ಆಮ್ಚಿ ಚಿಂತ್ನಾಂಚಿ ಗಾಡಿ ಹಾಚಾಕೀ ಮುಖಾರ್ ವಚಾನಾ. ಏಕ್ ಘಡಿ ತಿ ಆಮಿಂ ಸರ್ವಾಂ ಮೆಳೊನ್ ಇಲ್ಲೆ ಜೊರಾನ್ ಪಾಟ್ಲ್ಯಾನ್ ಲೊಟುನ್ ತಿಂ ಚಿಂತ್ನಾಂಚಿ ಗಾಡಿ ಮುಖಾರ್ ಲೊಟ್ಯಾಂ;
ಕಿತ್ಯಾಕ್ ನಾಂತ್ ಮ್ಹಳ್ಯಾರ್ ಹೆಂ ಕರುಂಕ್ ಕೊಣಾಯ್ಕ್ಯ್ ನಾಕಾ.
ಕಿತ್ಯಾಕ್ ನಾಕಾ?
ಕರ್ತೆಲೆ ಕೊಣ್ಂಚ್ ನಾಂತ್.
ಬರೆಂ ತರ್ ಆತಾಂ ಕಿತೆಂ ಕರ್ಯೆತಾ?
ಕಿತೆಂ ಕರ್ಚೆಂ?
ಆಮಿಂಚ್ ತೆಂ ಸುರು ಕರುಂಕ್ ಮುಖಾರ್ ಯಾ..
ಆಮಿಂ ಮ್ಹಳ್ಯಾರ್?
’........’
ಆಮಿಂ ಕಾಂಯ್ ಖಂಚೋಯ್ ಸಂಸ್ಥೊ ನ್ಹಯ್, ಸಂಚಾಲನ್ ನ್ಹಯ್, ಪರಿಶದ್ ನ್ಹಯ್, ಸಂಘಟನ್ ನ್ಹಯ್.. ಬಗಾರ್ ಆಮಿಂ ಚಾರ್ ಗಾಂವ್ಚಿಂ, ಚಾರ್ ವಿಚಾರಾಂಚಿಂ, ಚಾರ್ ಬೊಡಾಂ. ಆಮಿಂ ಹಿ ಸುರ್ವಾತ್ ಕರ್ಯಾಂ.
ಆಮ್ಚಾ ವಾಡಾವಳೆಚಾ ಇರಾದ್ಯಾನ್ ಶಿವಾಯ್ ಕಸಲ್ಯಾಚ್ ಮುನಾಫ್ಯಾಚಾ ಇರಾದ್ಯಾನ್ ಭಿಲ್ಕುಲ್ ನ್ಹಯ್.
ಆನಿಂ ಜರ್ತರ್ ಅಶೆಂ ಜಾಲೆಂ ತರ್ ಮಾತ್ರ್ ಎಕ್ಲ್ಯಾ ಥಾವ್ನ್ ದುಸ್ರೊ ಆನಿಂ ದುಸ್ರ್ಯಾ ಥಾವ್ನ್ ತಿಸ್ರೊ ಅಸಲಿಂ ಎದೊಳ್ ಜಾಯ್ಜಾಯ್ ಆಸ್ಲ್ಲಿಂ ಪುಣ್ ಜಾಂವ್ಕ್ ನಾತ್ಲ್ಲಿಂ ಕಾಮಾಂ ಕರುಂಕ್ ಫುಡೆಂ ಯೆತೆಲಿಂ.
ಆನಿಂ ಅಶೆಂ ಜಾಲೆಂ ತರ್ ಮಾತ್ರ್ ಫಾಲ್ಯಾಂ ಪೊರ್ವಾಂ ಕೊಣ್ಯೀ ಹಿಂ ವಯ್ರ್ ಆಮಿಂ ವಿಚಾರ್ಲ್ಲಿಂ ಸವಾಲಾಂ ವಿಚಾರ್ಚಿಂನಾಂತ್..
ಹಿಚ್ಚ್ ಆಮ್ಚಿ (ಮ್ಹಜಿ - ತುಜಿ) ನೈತಿಕ್ ಜವಾಬ್ಧಾರಿ.
- ವಲ್ಲಿ ಕ್ವಾಡ್ರಸ್
10 ಜುಲಾಯ್ 2005
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.