ಖೆಳ್!?

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಸಾಂಕಳ್ ಕಾಣಿ

ಗಿಬ್ಬಾ ಕುಲ್ಶೇಕರ್

ರಗ್ತಾಳೊ ಖೆಳ್!?

     ನಾಂವ್ : ಗಿಲ್ಬರ್ಟ್ ಸಲ್ಡಾನ್ಹಾ

     ಲಿಖ್ಣೆ ನಾಂವಾಂ : ಗಿಬ್ಬಾ ಕುಲ್ಶೇಕರ್

     ಜನನ್ : 08 ಫೆಬ್ರೆರ್ 1953.

     ಜಲ್ಮಾಲ್ಲೊ ಗಾಂವ್ : ಕುಲ್ಶೇಕರ್

ವಳೊಕ್: ಗಿಬ್ಬಾ ಕುಲ್ಶೇಕರ್ ಪಾಟ್ಲ್ಯಾ ಪಾಂತೀಸ್-ಚಾಳಿಸ್ ವರ್ಸಾಂ ಥಾವ್ನ್ ಅಪ್ರೂಪ್ ತರ್‌ಯೀ ಬರವ್ನ್ ಆಯ್ಲಾ. ಹಾಚ್ಯೊ ಕಾಣ್ಯೊ ಮನರಂಜನಾಚ್ಯೊ ತಶೆಂಚ್ ಸಸ್ಪೆನ್ಸ್/ಥ್ರಿಲ್ಲರ್. ಹಿಂದಿ ಕಾದಂಬರಿಂಕ್ ಚಡ್ ಖಾಯ್ಸ್ ಕರ್ಚಾ ಹಾಣೆಂ ಎದೊಳ್ ಕೊಂಕ್ಣೆಂತ್ ಬರಯಿಲ್ಲ್ಯೊ ಮಟ್ವ್ಯೊ ಕಾಣ್ಯೊ ಥೊಡ್ಯೊಚ್ ತರ್‌ಯೀ, ವಾಚ್ಪ್ಯಾಂಕ್ ಅಪ್ಲೆಚ್ಚ್ ಶೈಲೆರ್ ತಾಣೆಂ ಭರ್ಪೂರ್ ಮನರಂಜನ್ ದಿಲಾಂ ತೆಂ ಖಂಡಿತ್. ಕೊಂಕ್ಣಿ ಸಾಹಿತ್ಯಾಚೊ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚೊ ಆದರ್ಶ್ ಆನಿ ಪ್ರೇರಣ್ ಮ್ಹಣ್ಚಾ ಹಾಣೆಂ ಕಾಣ್ಯಾಂ ಶಿವಾಯ್ ಸಭಾರ್ ನೀಳ್‌ಗಥಾ/ಸಾಂಕಳ್ ಕಥಾ ಹಾಣೆಂ ಬರಯ್ಲ್ಯಾತ್. ತಾಂತ್ಲಿ ಏಕ್ ಜಾವ್ನಾಸಾ ರಗ್ತಾಳೊ ಖೆಳ್.

ರಗ್ತಾಳೊ ಖೆಳ್!?

ರಾತಿಚ್ಯಾ ಜೆವ್ಣಾ ಉಪ್ರಾಂತ್ ರಾಜ್ ಸುರೆಂದರ್ ಕುಲಕರ್ಣಿ ಹೊಲಾಂತ್ಲ್ಯಾ ಸೋಫಾರ್ ವಚೊನ್ ಬಸ್ಲೊ. ವ್ಹಡ್ಲೊ ಪೂತ್ ಆಪ್ಲ್ಯಾ ಬಾಯ್ಲೆ ಸವೆಂ ಬೆಡ್ ರೂಮಾಂತ್ ಪಾವ್‌ಲ್ಲೊ. ಕೊಲೆಜಿಕ್ ವೆಚೊ ಮಧ್ಲೊ ಪೂತ್ ಸ್ಟಡಿ ರೂಮಾಂತ್ ಕಂಪ್ಯೂಟರಾರ್ ಮಗ್ನ್ ಜಾಲ್ಲೊ. ನಿಮಾಣೆಂ ಧುವ್ ಉಡ್ಕಾಣಾ ಘಾಲಿತ್ತ್ ಶಿಡಿಯೆಚಿಂ ಮೆಟಾಂ ದೆಂವೊನ್ ಆಸ್‌ಲ್ಲೆಂ.

"ಭಾವನಾ" ಘರ್ಚ್ಯಾ ವ್ಹಡಿಲಾನ್ ಉಲೊ ಮಾರ್ಲೊ.

"ಎಸ್ ಡೆಡ್"

"ತುಜಿ ಮನವಿ ತುಜ್ಯಾ ವ್ಹೊನಿಯೆನ್ ಮ್ಹಾಕಾ ಪಾವಿತ್ ಕೆಲ್ಯಾ"

"ಮ್ಹಾಕಾ ತುಜಿ ಜಾಪ್ ಮೆಳಾತ್ ಡೆಡ್?" ಲಾಗಿಂ ಯೇವ್ನ್ ಬಸ್ಲೆಂ ಭಾವನಾ.

"ತುವೆಂ ವಿಂಚ್‌ಲ್ಲೊ ಚಲೊ ಏಕ್ ಬೊಕ್ಸರ್ ಜಾವ್ನಾಸಾ". ರಾಜ್ ಕುಲಕರ್ಣಿನ್ ಕಂರ್ಡ್ಯಾಂತ್ಲಿ ಸಿಗಾರ್ ವಿಂಚ್ಲಿ. ’ಚಾಲಿಂತ್ ರಾವ್ತಾ. ಬೆಂಕಾಂತ್ ಕ್ಲಾರ್ಕಾಚೆಂ ಕಾಮ್ ಕರ್ತಾ. ಸಾಯ್ಕಲಾರ್ ಕಾಮಾಕ್ ವೆತಾ. ರೈಟ್?" ಸಿಗಾರಾಚ್ಯಾ ತುದಿಯೆಕ್ ಉಜೊ ದಿಲೊ. ತುಜ್ಯಾ ವಿಂಚವ್ಣೆಂತ್ ತುಂ ಚುಕೊನ್ ಪಡೋಂಕ್ ನಾಂಯ್ ಮ್ಹಜ್ಯಾ ಧುವೆ?"

"ಅಜಯಾಚೊ ಹಾಂವ್ ಕಾಳ್ಜಾಚ್ಯಾ ಗೂಂಡಾಯೆ ಥಾವ್ನ್ ಮೋಗ್ ಕರ್ತಾಂ ಡೆಡ್".

"ತುಕಾ ಹಾಂವೆಂ ಫುಲಾಬರಿ ವಾಗಯ್ಲಾಂ ಭಾವನಾ".

"ಮೊಗಾ ಪಾಸ್ವತ್ ಕಾಂಟ್ಯಾಂಚೆಂ ಜಿವಿತ್ ಆಪ್ಣಾಂವ್ಕ್ ಹಾಂವ್ ತಯಾರ್ ಆಸಾ ಡೆಡ್".

"ಕಾಂಟ್ಯಾಂಚೆಂ ಜಿವಿತ್ ಪಿಂದ್ಕಾರ್ ಜಾಂವ್ಕ್ ಥೊಡೆಚ್ ದೀಸ್ ಲಾಗ್ತಾತ್ ಚೆಡ್ವಾ"

"ಮೆಳಾನಾತ್ಲ್ಯಾರ್ ಘರ್ ಸೊಡ್ನ್ ಧಾಂವ್ತೆಲೆಂಯ್?"

"ನಾ"

"ಆತ್ಮಹತ್ತ್ಯಾ ಕರ್ತೆಲೆಂಯ್?"

"ನಾ"

"ಕೋರ್ಟ್ ಮೆರೆಜ್ ಕರುನ್ ಮ್ಹಜ್ಯಾ ಮುಸ್ಕಾರಾರ್ ಥುಕ್ತೆಲೆಂಯ್?"

"ನಾ"

"ತರ್.....ಕಿತೆಂ ಕರುಂಕ್ ಚಿಂತ್ಲಾಂಯ್ ಮ್ಹಜ್ಯಾ ಧುವೆ?"

"ಮ್ಹಜ್ಯಾ ಡೆಡಿನ್ ಪಸಂದ್ ಕೆಲ್ಲ್ಯಾ ಚಲ್ಯಾಲಾಗಿಂ ಲಗ್ನ್ ಹಾಂವ್ ಜಾತೆಲಿಂ". ತಾಚೊ ಗಳೊ ಭರೊನ್ ಆಯ್ಲೊ. "ಪುಣ್ ಮ್ಹಜ್ಯಾ ಪಯ್ಲ್ಯಾ ಮೊಗಾಕ್ ವಿಸ್ರೊಂಕ್ ಸಕ್ಚಿಂನಾ. ತಾಚ್ಯಾ ಉಗ್ಡಾಸಾನ್ ದೀಸ್ ರಾತ್ ಪಾಶಾರ್ ಕರ್ತೆಲಿಂ. ಹಾತ್ ಧರ್‌ಲ್ಲ್ಯಾ ಘೊವಾಕ್ ವಿಶ್ವಾಸ್ ಘಾತ್ ಹಾಂವ್ ಕರುಂಕ್ ಪಾವ್ತೆಲಿಂ. ರಚ್‌ಲ್ಲ್ಯಾ ಪ್ರಭ್ಹು ಮುಖಾರ್ ಗುನ್ಯಾಂವ್ಕಾರ್ ಜಾಂವ್ಕ್ ಹಾಂವ್ ಪಾವ್ತೆಲಿಂ. ಆಸೆಂ ಜಾಂವ್ಕ್ ತುಂ ಖುಶಿ ವ್ಹರ್ತಾಯ್ ತರ್....... ವೇಳ್ ವಿಬಾಡಿನಾಕಾ ಡೆಡ್. ಮಿಸ್ ಭಾವನಾ ಕುಲಕರ್ಣಿ ತುಕಾ ನಿರಾಶಿ ಕರ್ಚೆಂ ನಾ" ತೆಂ ರಡ್ಲೆಂಚ್.

"ಭಾವನಾ, ಮೈ ಹನಿ ಡೋಲ್" ಉಟೊನ್ ಉಭೊ ಜಾಲ್ಲ್ಯಾ ವ್ಹಡಿಲಾನ್ ಹಾತ್ ವಿಸ್ತಾರಾಯ್ಲೆ. "ಐ ಎಮ್ ಜೊಕಿಂಗ್ ವಿದ್ ಯು. ಮಿಸ್ಟರ್ ಬೊಕ್ಸರಾಕ್ ಹಾವೆಂ ಪಸಂದ್ ಕೆಲಾ."

"ಓಹ್ ಮೈ ಸ್ವೀಟ್ ಡೆಡ್" ಝಗ್ಲಣ್ಯಾಚ್ಯಾ ವೇಗಾನ್ ಉಟೊನ್ ಉಭೆಂ ಜಾಲ್ಲ್ಯಾ ಭಾವನಾನ್ ವ್ಹಡೀಲಾಕ್ ವೇಂ ಮಾರ್ಲಿ. "ಫುಡ್ಲ್ಯಾ ಜನ್ಮಾಂತ್‌ಯಿ ತುಂಚ್ ಮ್ಹಜೊ ಡೆಡ್ ಜಾವ್ನ್ ಯೆ"

ರಾಜ್ ಕುಲಕರ್ಣಿನ್ ಧುವೆಚೆಂ ಮಾತೆಂ ಪೊಶೆಲೆಂ

****

ಎಕಾ ಮಹಿನ್ಯಾ ಉಪ್ರಾಂತ್ ಅಜಯ್ ಭಾರ್ಗವಾ ಸವೆಂ ವ್ಹಡಾ ಗದ್ದಾಳಾಯೆನ್ ಭಾವನಾಚೆಂ ಲಗ್ನ್ ಜಾಲೆಂ. ಸಲಾಖಾಂಚೆಂ ಫ್ಲೇಟ್, ಮಾರುತಿ ಕಾರ್, ಭಾಂಗಾರಾಚೆ ನಗ್ ಆಣಿಂ ನಗ್ದೆನ್ ಏಕ್ ಲಾಖ್ ರುಪಯ್ ರಾಜ್ ಕುಲಕರ್ಣಿನ್ ಆಪ್ಲ್ಯಾ ಧುವೆಕ್ ಆನಿಂ ಜಾಂವ್ಯಾಕ್ ದಿಲೆ.

ತಾಂಚೆಂ ಲಗ್ನ್ ಜಿವಿತ್ ದೂಧಾ - ಮ್ಹೊಂವಾಚೆಂ ಜಾಲೆಂ. ಚಾಂದ್ನ್ಯಾಚೊ ಉಜ್ವಾಡ್, ನೆಕೆತ್ರಾಂಚೊ ಪ್ರಕಾಸ್, ಫುಲಾಂಚೊ ಸುವಾದ್ ತಾಂಚ್ಯಾ ಜಿವಿತಾಂತ್ ವ್ಹಾಳೊಂಕ್ ಲಾಗ್ಲೊ.

ದೀಸ್ ಧಾಂವ್ಲೆಂ, ಮಹಿನೆ ಉಭ್ಲೆಂ. ವರ್ಸಾಂ ತೀನ್ ಪಾಶಾರ್ ಜಾಲಿಂ ತರಿ, ತಾಂಚ್ಯಾ ಆಂಗ್ಣಾಂತ್ ಫುಲ್ ಫುಲ್ಲೆಂನಾ. ಆಂಗವ್ಣ್ಯೊ ಆನಿಂ ಉಪಾಸ್ ಕೆಲೆ ದೊಗಾಂಯ್ನಿ. ಪುಣ್ ತಾಂಚೆಂ ಸ್ವಪಾಣ್ ಜ್ಯಾರಿ ಜಾಲೆಂನಾ.

ಚವ್ತ್ಯಾ ವರ್ಸಾಚೊ ಪಯ್ಲೊ ಮಹಿನೊ ತೊ. ಲಗ್ನಾ ಉಪ್ರಾಂತ್ ಪಯ್ಲೆ ಪಾವ್ಟಿ ಎಕಾ ಸಾಂಜೆರ್ ವೆಳಾರ್ ಘರಾ ಪಾವ್ಲೊ ನಾ ಆಜಯ್. ಘೊವಾಚೆರ್ ರಾಗಾರ್ ಜಾಲೆಂ ಭಾವನಾ. ರಾತಿಚ್ಯಾ ಧಾ ವರಾರ್ ಘರಾ ಪಾವ್‌ಲ್ಲ್ಯಾ ಅಜಯಾಕ್ ಸದಾಂಚೊ ಸ್ವಾಗತ್ ಮೆಳ್ಳೊನಾ.

"ರಾಗಾರ್ ಆಸಾಯ್?" ಬಾಯ್ಲೆಕ್ ಆರಾಂವ್ಕ್ ಗೆಲೊ ಆಜಯ್.

"ಆಪಡ್ನಾಕಾ ಮ್ಹಾಕಾ" ಪಾಟಿಂ ಸರ್ಲೆಂ ಭಾವನಾ. ವೇಳ್ ಕಿತ್ಯಾಕ್ ಜಾಲೊ? ಫೋನ್ ಕಿತ್ಯಾಕ್ ಕರುಂಕ್ ನಾಂಯ್?" ಉಸ್ಮಡ್ಲೆಂ ತೆಂ. "ಕೊಣ್ ತರಿ ಭೆಟ್ಲಾಂ?"

"ವ್ಯಾಯಾಮ್ ಶಾಳಾಕ್ ಗೆಲ್ಲೊಂ" ಸತ್ ಉಚಾರ್ಲೆಂ ಅಜಯಾನ್.

"ಕಿತ್ಯಾಕ್?"

"ಬೊಕ್ಸಿಂಗ್ ಪ್ರೆಕ್ಟಿಸಾ ಖಾತಿರ್ ಆನಿಂ ಕಿತ್ಯಾಕ್?" ತೊ ಹಾಸ್ಲೊ.

"ಲಗ್ನಾ ಉಪ್ರಾಂತ್ ಬೊಕ್ಸಿಂಗ್ ತುವೆಂ ಸೊಡ್‌ಲ್ಲೆಂಯ್ ನಹಿಂ?"

"ಮ್ಹಜಿ ವಿಂಚವ್ಣ್ ಜಾಲ್ಯಾ" ಸೋಫಾರ್ ತೊ ಗಳ್ಳೊ. ಮೇಯ್ಯಾರಾನ್ ಮ್ಹಜಿ ವಿಂಚವ್ಣ್ ಕೆಲ್ಯಾ" ತಾಚ್ಯಾ ತಾಳ್ಯಾಂತ್ ಗರ್ವ್ ಆಸ್‌ಲ್ಲೊ. "ದೊಲಕ್‌ಪುರ್ ಶಹರಾಚ್ಯಾ ಅರ್ಜುನ್ ಪಂಡಿತಾಕ್ ಹಾಂವೆಂ ಸಲ್ವುಂಕ್ ಆಸಾ"

"ಕಿತ್ಲೆ ದೀಸ್ ಪ್ರೆಕ್ಟಿಸ್ ಚಲ್ತೆಲೆಂ?" ಮೋವ್ ಪಡ್ಲೆಂ ಭಾವನಾ.

"ಲಾಗಿ - ಲಾಗಿಂ ತೀನ್ ಮಹಿನೆ"

"ತೀನ್ ಮಹಿನೆ ಪರ್ಯಾಂತ್ ತಡವ್ ಕರುನ್ ಯೆತೊಲೊಯ್?" ತಾಚ್ಯಾ ತಾಳ್ಯಾಂತ್ ಆಕಾಂತ್ ಆಸ್‌ಲ್ಲೊ. ವೇಳ್ ಕಸೊ ಪಾಶಾರ್ ಜಾತೊಲೊ ಮ್ಹಜೊ?"

"ವೆರಿ ಸಿಂಪಲ್" ಹಾಸ್ಲೊ ಆಜಯ್.

"ಲೇಡಿಸ್ ಕ್ಲಬ್ಬಾಕ್ ಸೆರ್ವಾಲ್ಯಾರ್ ಜಾಲೆಂ"

"ಕಾಮ್ ನಾತ್‌ಲ್ಲ್ಯಾಂಚೊ, ಫಾಲ್ಯಾಂ ಮರ್ತೆಲ್ಯಾಂಚೊ ಜಾಗೊ ತೊ" ನಾಕ್ ಮೊಡ್ಲೆ ಭಾವನಾನ್. "ತೀನ್ ಮಹಿನೆ ಯುಗಾಂ ಬಾಂದ್ಚಿಂನಾಂತ್?" ಘೊವಾಕ್ ತೆಂಕುನ್ ತೆಂ ಬಸ್ಲೆಂ.

"ಮ್ಹಜೆ ಖಾತಿರ್ ಏಕ್ ಲ್ಹಾನ್ ಸಾಕ್ರಿಫಿಸ್ ತುಂ ಕರ್ಚೆನಾಂಯ್?" ಭಾವನಾಚ್ಯಾ ಪೆಂಕ್ಟಾ ಭಂವಾರಿಂ ಹಾತ್ ರೆವ್ಡಾಯ್ಲೊ. "ಹ್ಯಾ ಶಹರಾಚೆಂ ನಾಂವ್ ಸಗ್ಳ್ಯಾ ದೇಶಾಂತ್ ಗಾಜ್ತೆಲೆಂ. ತುಜೊ ಘೊವ್ ಚರಿತ್ರಾ ರಚ್ತೊಲೊ".

"ಮಿಸ್ಟರ್ ಬೊಕ್ಸರ್" ಅಜಯಾಚ್ಯಾ ಖಾಂದ್ಯಾರ್ ಮಾತೆಂ ತೆಂಕ್ಲೆಂ ಭಾವನಾನ್. "ತುಜ್ಯಾ ಮೊಗಾಚ್ಯಾ ಆಗೊಶಾಂತ್ ಮ್ಹಾಕಾ ಸದಾಂಚ್ ದವರ್. ದರ್ಯೊ ಸುಕೊಂದಿ, ಪರ್ವತ್ ಉಬೊಂದಿತ್, ಪುಣ್.... ತುಜೊ ಮೋಗ್ ಮ್ಹಾಕಾ ಸದಾಂಚ್ ಜಾಯ್. ಹ್ಯಾ ಜನ್ಮಾಂತ್ ತುಜಿ ಪತಿಣ್ ಹಾಂವ್ ಜಾಲ್ಯಾಂ. ಪುಡ್ಲ್ಯಾ ಸಾತ್ ಜನ್ಮಾಂ ಪರ್ಯಾಂತ್ ಹಾಂವ್ ತುಜಿಚ್ ಪತಿಣ್ ಜಾಂವ್ಕ್ ಹಾಂವ್ ಅತ್ರೆಗ್ತಾಂ. ತುಜ್ಯಾ ವೆಂಗೆಂತ್ ಮರೊಂಕ್ ಆಶೆತಾಂ" ಭಾವುಕ್ ತೆಂ ಜಾಲೆಂ. ಕನಕ್‌ಪುರಿ ಶಹರಾಚ್ಯಾ ಚೆಡ್ವಾಂಚಿ ನದರ್ ಮ್ಹಜ್ಯಾ ಮೊಗಾ ವಯ್ರ್ ಪಡಾನಾ ಜಾಂವ್ದಿ"

"ಮರಾ ಪರ್ಯಾಂತ್ ತುಜಾ ಹಾಂವ್ ವಿಶ್ವಾಸಿ ರಾವ್ತೊಲೊಂ" ಉಮ್ಯಾಂಚೊ ಶಿಂವರ್ ವೊತ್ಲೊ ಬಾಯ್ಲೆಚ್ಯಾ ಗಾಲಾಂ ವಯ್ರ್.

"ಜ್ಯಾ ದಿಸಾ ತುಕಾ ಹಾಂವ್ ಘಾತ್ ಕರಿನ್, ತ್ಯಾ ದಿಸಾ ಮೊಳಾಬ್ ಕೊಸಾಳ್ತೆಲೆಂ"

"ಪೊಕ್ರಿ ಚೆಡ್ಯಾ.." ಅಜಯಾಚ್ಯಾ ಕಾನಾಂತ್ ಪುಸ್ಪುಸ್ಲೆಂ ಭಾವನಾ. "ಪಾಂಚ್ ದಿಸಾಂ ಉಪ್ರಾಂತ್ ಆಜ್ ಹಾಂವ್ ನಿತಳ್ ಜಾಲ್ಲಿಂ ಆಸಾಂ. ತೆಂ ಲಜೆಲೆಂ. ವೇಳ್ ವಿಭಾಡ್ಚೊ ನಹಿಂ ಬೆಡ್ ರೂಮಾಕ್ ರಾಕಂವ್ಚೆಂ ನ್ಹಂಯ್".

"ಲಿಟಲ್ ಬೊಕ್ಸರ್ ಮೆಳ್ಳ್ಯಾರ್‌ಯಿ ಮೆಳ್ಳೊ ನಹಿಂ?" ತುಕ್ಲಾಯ್ಲೆಂ ಆಜಯಾನ್. "ಪ್ರಯತ್ನ್ ಆಮಿಂ ಕರ್ಯಾಂ. ಉಪ್ರಾಂತ್ಲೆಂ ಪ್ರಭುಚ್ಯಾ ತಾಬೆಂತ್ ಸೊಡ್ಯಾಂ. ರೈಟ್?"

"ಎಸ್ ಮೈ ಲವ್"

**********

ದೊಲಕ್‌ಪುರ್ ಶಹರಾಂತ್ ಅಜಯ್ ಭಾರ್ಗವಾನ್ ಚರಿತ್ರಾ ರಚ್ಲಿ. ಸಾತ್ವ್ಯಾ ರೌಂಡಾಂತ್ ಮುಖ್ಲೊ ಪ್ರತಿಸ್ಪರ್ಧಿ ಅರ್ಜುನ್ ಪಂಡಿತ್ ರಿಂಗಾ ಬಿತರ್ ಕೊಸಾಳ್ಳೋ. ನಾಕ್ ತಾಚೆಂ ಪುಟ್‌ಲ್ಲೆಂ. ದಾವೊ ದೊಳೊ ಸುಜ್‌ಲ್ಲೊ. ರೆಫ್ರಿನ್ ಧಾ ಪಾವ್ಟಿಂ ಕೌಂಟ್ ಡೌನ್ ಕೆಲ್ಯಾರ್‌ಯಿ ದೊಲಕ್‌ಪುರ್‌ಚ್ಪ್ ಬೊಕ್ಸರ್ ಉಟೊಂಕ್ ಸಕ್ಲೊನಾ.

ಪ್ರೇಕ್ಶಕಾಂಚ್ಯಾ ಪ್ರಚಂಡ್ ತಾಳಿಯಾಂ ಮಧೆಂ ದಕ್ಶಿಣ್ ರಾಜ್ಯಾಂಚೊ ಛಾಂಪಿಯನ್ ಜಾವ್ನ್ ಅಜಯ್ ಬಾರ್ಗವಾಕ್ ಕುರ್ವಾರ್ ಕೆಲೊ. ಫುಲಾಂಚೆ ಝೆಲೆ ಗಳ್ಯಾಕ್ ಪಡ್ಲೆ. ಶೀಲ್ಡ್ ಆನಿಂ ಏಕ್ ಲಾಖ್ ರುಪಿಯಾಂಚಿ ಚೆಕ್ ಆಪ್ಣಾಂವ್ಕ್ ಸಕ್ಲೊ ನವೊ ಛಾಂಪಿಯನ್.

ಕನಕ್‌ಪುರಿ ಶಹರಾಚ್ಯಾ ಮೇಯರಾನ್, ಮಾನೆಸ್ತ್ ಆಲೋಕ್ ಗುಪ್ತಾನ್ ಅಜಯಾಕ್ ವೆಂಗೆಂತ್ ಘೆತ್ಲೊ. "ತುಂ ವಜ್ರ್ ಜಾವ್ನಾಸಾಯ್ ಮ್ಹಜ್ಯಾ ಶಹರಾಚೆಂ" ತಾಚಿ ನದರ್ ವಿ.ಐ.ಪಿ. ಫಂಗ್ತೆರ್ ಗೆಲಿ. ತಾಚಿ ತರ್ನಾಟಿ ಬಾಯ್ಲ್ ತ್ಯಾ ಸುವಾತೆರ್ ನಾತ್‌ಲ್ಲಿ. "ವೆಳಾಚೊ ಅಭಾವ್ ಆಸಾ ಮ್ಹಜೆಲಾಗಿಂ" ಮೇಯಾರಾನ್ ಹಾತ್ ಮೆಳಯ್ಲೊ.

"ಥೆಂಕ್ ಯೂ ಸರ್" ಪರತ್ ಹಾತಾಂಕ್ ಹಾತ್ ಮೆಳ್ಳೆ.

ಮೀಡಿಯಾಚೆ ಕೆಮರಾ ನಿರಂತರ್ ಕ್ಲಿಕ್ ಜಾವ್ನ್ ಆಸ್‌ಲ್ಲೆ.

ರಿಪೊರ್ಟರಾಂಚ್ಯಾ ಸವಾಲಾಂಕ್ ಮಟ್ವ್ಯಾನ್ ಜಾಪ್ ದೀವ್ನ್, ಅಭಿಮಾನಿಂಚೆ ಹಾತ್ ಮೆಳವ್ನ್ ಬೋವ್ ಕಷ್ಟಾಂನಿ ಡ್ರೆಸ್ಸಿಂಗ್ ರೂಮಾಕ್ ಪಾವ್ಲೊ. ತಾಚೆಂ ಶರೀರ್ ಥಕ್‌ಲ್ಲೆಂ. ಥಂಡ್ ಉದ್ಕಾಚೆಂ ಸ್ನಾನ್ ಕರ್ಚೆ ಖಾತಿರ್ ಬಾತ್‌ರೂಮಾಕ್ ರಿಗ್ಲೊ. ಶವರಾಚ್ಯಾ ಥಂಡ್ ಉದ್ಕಾ ಪಂದಾ ಉಭೊ ಜಾಲ್ಲ್ಯಾ ವೆಳಾರ್ ಆಪ್ಲ್ಯಾ ಬಾಯ್ಲೆಚೊ ಉಗ್ಡಾಸ್ ತಾಕಾ ಆಯ್ಲೊ. ಘೊವಾಚ್ಯಾ ಜಯ್ತಾಂತ್ ಭರ್‍ಸೊಂಕ್ ಭಾವನಾ ಯೇಂವ್ಕ್ ಸಕ್ಲೆಂನಾ. ತೆಂ ಗುರ್ವಾರ್ ಆಸ್‌ಲ್ಲೆಂ. ಜಾಯ್ತ್ಯಾ ವರ್ಸಾಂ ಉಪ್ರಾಂತ್ ಪಯ್ಲೆ ಪಾವ್ಟಿಂ ಗುರ್ವಾದಾರ್ ರಾವ್‌ಲ್ಲ್ಯಾನ್, ದಾಕ್ತೆರ್ನಿನ್ ತಾಕಾ ವಿಶ್ರಾಂತಿ ಘೆಂವ್ಕ್ ಸಲಹಾ ದಿಲ್ಲಿ.

ಲಿಟಲ್ ಬೊಕ್ಸರ್ ಸಾತ್ ಮಹಿನ್ಯಾಂನಿ ಹ್ಯಾ ಸಂಸಾರಾಕ್ ಯೆಂವ್ಚ್ಯಾರ್ ಆಸ್‌ಲ್ಲೊ. ನ್ಹಾಣ್ ತಿರ್‍ಸುನ್ ಬಾತ್‌ರೂಮಾ ಥಾವ್ನ್ ಭಾಯ್ರ್ ಆಯ್ಲೊ. ಕಿಟ್ ಬೆಗ್ ಉಗ್ತೆಂ ಕರುನ್ ಮುಸ್ತಾಯ್ಕಿ ನ್ಹೆಸ್ಚ್ಯಾ ವೆಳಾರ್, ದಾರಾರ್ ಠೊಕೆ ಪಡ್ಲೆ. ತಾಣೆಂ ಬಾಗಿಲ್ ಉಗ್ತೆಂ ಕೆಲೆಂ. ತೊ ತಾಚ್ಯಾ ದೊಳ್ಯಾಂಕ್ ಪಾತ್ಯೆನಾ ಜಾಲೊ. ಮಾದಕ್ ಶರೀರಾಚಿ ಅತಿ ಸುಂದರ್ ತರ್ನಾಟಿ ಸ್ತ್ರೀ ದಾರ್ವಾಟ್ಯಾ ಭಾಯ್ರ್ ಉಭಿ ಆಸ್‌ಲ್ಲಿ.

"ಹಾಂವ್ ಜೋತ್ಸನಾ ಗುಪ್ತಾ...." ಕೊಗುಳ್ ಲಿಪ್‌ಲ್ಲಿ ತಿಚ್ಯಾ ತಾಳ್ಯಾಂತ್. ದೊಳ್ಯಾಂನಿ ಚಂಚಲತಾ ಆಸ್‌ಲ್ಲಿ. ನಿಳ್ಶೆಂ ಜೀನ್ಸ್ ಪೆಂಟ್ ಆನಿಂ ಉಗ್ತ್ಯಾ ಗಳ್ಯಾಚಿ ಹಳ್ದುವಿ ಸ್ಕಿವಿ ತಿ ನ್ಹೆಸ್‌ಲ್ಲಿ. ಸ್ಥನಾಂ ಮೊಟಿಂ ತಶೆಂ ಪುಡ್ಪುಡಿತ್ ಆಸ್‌ಲ್ಲಿಂ. ಪೆಂಕಾಟ್ ಬಾರಿಕ್ ಆಶೊನ್ ನಿತಾಂಬ್ ಮೆಟೆಂ ಆಸ್‌ಲ್ಲೆಂ.

ಅಜಯ್ ಮೀಟಾ ಖಾಂಬೊ ಜಾಲ್ಲೊ. ಅಸಲಿ ಅಪೂರ್ವ್ ಸೊಭಾಯ್ ಹಾಚ್ಯಾ ಪಯ್ಲೆಂ ತಾಣೆಂ ದೆಖೊಂಕ್ ಆಯಿಲ್ಲೆಂ. ತೊಂಡ್ ಬಿಳಾ ಬಾಶೆನ್ ಉಗ್ತೆಂಚ್ ಉರ್ಲೆಂ. ದೊಳ್ಯಾಂಚ್ಯೊ ಆಸ್ಡ್ಯೊ ಪರ್ಯಾಂತ್ ಧಾಂಪುಂಕ್ ವಿಸ್ರಾಲೊ.

"ಬಿತರ್ ಹಾಂವೆಂ ಯೆವ್ಯೆತ್ ಮಿಸ್ಟರ್ ಛಾಂಪಿಯನ್?"

"ಶುವರ್ ವೈ ನೊಟ್?" ತೊ ಗಾಗೆಲೊ.

"ಕನಕ್‌ಪುರಿ ಶಹರಾಚಿ ಮರ್‍ಯಾದ್ ತುವೆಂ ರಾಕ್ಲಿಯ್" ದುಸ್ರ್ಯಾಕ್ ಘಸ್ಟೊನ್‌ಚ್ ಬಿತರ್ ತೆಂ ರಿಗ್ಲೆಂ. "ಮೇಯರಾಕ್ ಆನಿಂ ಶಹರಾಚ್ಯಾ ನಾಗರಿಕಾಂಕ್ ನಿರಾಶಿ ತುವೆಂ ಕರುಂಕ್ ನಾಂಯ್" ಫುಲಾಂಚೊ ಬುಕ್ಕೊ ಅಜಯಾಕ್ ದಿಲೊ. "ವೀರ್ ಶಹರಾಂತ್ಲೊ ವೀರ್ ತುಂ".

"ಥೆಂಕ್‌ಯೂ"

"ಪಾಟಿಂ ವೆಚಿ ತಯಾರಿ?"

"ವ್ಹಯ್"

"ಟೆಕ್ಸೆರ್?"

"ನಾ. ಮ್ಹಜೆಂ ಮಾರುತಿ ಎಸ್ಟೀಮ್ ಪಾರ್ಕಿಂಗಾಂತ್ ಆಸಾ."

"ಲಿಫ್ಟ್ ಮೆಳಾತ್?"

"ಕಿತ್ಯಾಕ್ ನಜೊ?" ಭುಜಾಂ ಉಡಯ್ಲಿಂ ಅಜಯಾನ್. "ಕನಕ್‌ಪುರಿಕ್?"

"ತುಜ್ಯಾಚ್ ಶಹರಾಂತ್ ಹಾಂವ್ ರಾವ್ತಾಂ ತರಿ ಹಾಚ್ಯಾ ಪಯ್ಲೆಂ ಆಮಿಂ ಭೆಟೊಂಕ್ ನಾಂವ್." ವ್ಯಾನಿಟಿ ಬೆಗ್ ಉಗ್ತೆಂ ಕರುನ್ ಸಿಗ್ರೆಟ್ ಪೆಕೆಟ್ ಭಾಯ್ರ್ ಕಾಡ್ಲಿ. "ವರಾಂ ಪಾವ್ಣೆಂ - ಆಟ್ ಜಾಂವ್ಚ್ಯಾರ್ ಆಸಾತ್. ಲಾಗಿಂ-ಲಾಗಿಂ ಎಕಾ ವರಾಚೆಂ ಲಾಂಭಾಯೆಚೆಂ ಪಯ್ಣ್ ಆಮ್ಕಾಂ ಕಾತ್ರುಂಕ್ ಆಸಾ" ಸಿಗ್ರೆಟ್ ತಾಣೆಂ ಜಳಯ್ಲಿ. "ಪಾರ್ಕಿಗಾಂತ್ ಹಾಂವ್ ತುಕಾ ಮೆಳ್ತಾ" ದುಸ್ರ್ಯಾಚ್ಯಾ ಜಾಪಿಕ್ ರಾಕನಾಸ್ತಾಂ ನಿತಾಂಬ್ ಹಾಲಯಿತ್ತ್ ತೊ ಜಾಗೊ ಖಾಲಿ ಕೆಲೊ ಜ್ಯೋತ್ಸನಾನ್.

ಅಜಯ್ ಭಾರ್ಗವಾಚ್ಯಾ ಶರೀರಾ ಭಿತರ್ ಉಜ್ಯಾಚೆಂ ಆಗ್ಟೆಂ ಜಳೊಂಕ್ ಲಾಗ್ಲೆಂ. ಶಿರಾಂನಿ ರಗಾತ್ ರಭಸಾನ್ ವ್ಹಾಳೊಂಕ್ ಲಾಗ್ಲೆಂ. ಲಿಪ್‌ಲ್ಲಿ ಗುಪ್ತ್ ಆಶಾ ಜಾಗ್ರತ್ ಜಾಲ್ಲಿ. ಭಾವನಾಕ್ ಖುರ್ಸಾರ್ ಮಾರುಂಕ್ ತಾಚೆ ವರ್ವಿಂ ಸಾಧ್ಯ್ ಜಾಯ್ತ್? ವೆಳಾಲಾಗಿಂ ಜವಾಬ್ ಆಸ್‌ಲ್ಲಿ.

ಅನಿರೀಕ್ಶಿತ್ ಗುಂವ್ಡಿ ತಾಚ್ಯಾ ಜಿವಿತಾಂತ್ ಯೆಂವ್ಚ್ಯಾರ್ ಆಸ್‌ಲ್ಲಿ.

ಕಿಟ್ ಬೆಗ್ ತಾಣೆಂ ಸಾಂಭಾಳ್ಳೆಂ. ಲಾಂಭಾಯೆಚೊ ಕೊರಿಡಾರ್ ಉತ್ರೊನ್ ಬಿಲ್ಡಿಂಗಾ ಭಾಯ್ರ್ ತೊ ಆಯ್ಲೊ. ವಿಶಾಲ್ ಪಾರ್ಕಿಗಾಂತ್ ತಾಚೆಂ ಮಾರುತಿ ಎಸ್ಟೀಮ್ ಎಕ್ಸುರೆಂಚ್ ಉಭೆಂ ಆಸ್‌ಲ್ಲೆಂ.

ಅಜಯಾನ್ ಡ್ರಾಯ್ವಿಂಗ್ ಸೀಟ್ ಸಾಂಬಾಳ್ಳಿ. ದುಸ್ರ್ಯಾ ಕುಶಿಚೆಂ ಬಾಗಿಲ್ ಉಗ್ತೆಂ ಕರುನ್ ಪೆಸೆಂಜರ್ ಬಸ್ಕೆರ್ ಗಳ್ಳೆಂ ಜೋತ್ಸನಾ. "ಸಿಗ್ರೆಟ್, ಸೊರೊ ಆನಿಂ ದಾದ್ಲೊ ನಾತ್‌ಲ್ಲೆಂ ಜಿವಿತ್ ಅಧುರೆಂ ಜಾವ್ನಾಸಾ ಮ್ಹಜ್ಯಾ ವಾಂಟ್ಯಾಕ್" ಸಿಗ್ರೆಟ್ ಪೆಕೆಟ್ ಉಗ್ತಿ ಕೆಲಿ. "ಆಧುನಿಕ್ ಸ್ತ್ರೀ ಹಾಂವ್ ವ್ಹಯ್ ತರೀ, ಎದೊಳ್ ಪರ್ಯಾಂತ್ ಸಿಗ್ರೆಟ್ ಆನಿಂ ಸೊರ್‍ಯಾಕ್ ಮಾತ್ರ್ ಸಾಂಗಾಂತ್ ದಿಲಾ. ಘೊವಾಕ್ ಘಾತ್ ಕರುಂಕ್ ನಾ. ಪುಣ್ ಕೆದೊಳ್ ಪರ್ಯಾಂತ್?" ಸಿಗ್ರೆಟಿಚ್ಯಾ ತುದಿಯೆಕ್ ಉಜೊ ದಿಲೊ. "ಏಖ್ ಬಂಧಡ್, ಏಕ್ ವರ್ತುಲ್ ಹ್ಯಾ ಸಮಾಜೆನ್ ಫಕತ್ತ್ ಸ್ತ್ರೀಯೆಕ್ ಕಿತ್ಯಾಕ್ ಲಾಗು ಕೆಲ್ಯಾ?" ಸಿಗ್ರೆಟಿಚೊ ಧುಂವರ್ ನಾಕಾ ತೊಂಡಾಂತ್ಲ್ಯಾನ್ ಸೊಡ್ಲೊ. "ಸರ್ವ್ ಬಂಧಡ್ಯೊ, ಸರ್ವ್ ವರ್ತುಲಾಂ ಹ್ಯಾ ಫುಡೆಂ ಕೊಸ್ಳೊನ್ ಪಡ್ತೆಲಿಂ."

ಅಜಯಾನ್ ಮೌನ್ ಸಾಂಬಾಳ್ಳೆಂ.

ಕಾರ್ ಡ್ರಾಯ್ವ್‌ವೇ ವಯ್ಲ್ಯಾನ್ ನಿಸ್ರೊಂಕ್ ಲಾಗ್ಲೆಂ.

"ಮೇಯರ್ ಅಶೋಕ್ ಗುಪ್ತಾನ್ ತುಇಜಿ ವಿಂಚವ್ಣ್ ಕೆಲ್ಲಿ" ವಾರ್‍ಯಾರ್ ಧಲ್ಚೆ ಕೆಸ್ ಪಾಟಿಂ ಪುಸ್ಲೆ ಜ್ಯೋತ್ಸನಾನ್. "ಶಿರ್ಪುಟ್ ದಾದ್ಲೊ. ಪೆಂಕ್ಟಾಂತ್ ಬಳ್ ನಾ ತರಿ ಅಗರ್ಭ್ ಶ್ರೀಮಂತ್ ಜಾವ್ನಾಸಾ." ನಾಕ್ ತಾಣೆಂ ಮೊಡ್ಲೆಂ. ಆಲಂಕಾರಾ ಖಾತಿರ್ ಮ್ಹಾತರ್‍ಯಾಕ್ ಜಾಯ್ ಫಕತ್ತ್ ತರ್ನಾಟಿ ಬಾಯ್ಲ್"

ಉಡೊನ್ ಪಡ್ಲೊ ಅಜಯ್.

"ಜ್ಯೋತ್ಸನಾ ಗುಪ್ತಾ ಮಾನೆಸ್ತ್ ಆಲೋಕ್ ಗುಪ್ತಾಚಿ ತರ್ನಾಟಿ ಪತಿಣ್?" ತೊ ಚಿಂತುಂಕ್ ಪಡ್ಲೊ. ’ಮಾಂಕ್ಡಾಚ್ಯಾ ಪಾಸ್ಳೆಂತ್ ಮಾಣಿಕ್?’

"ತುಜೆಂ ಚಿಂತಾಪ್ ಸಾರ್ಕೆಂ ಜಾವ್ನಾಸಾ ಬೊಕ್ಸರ್" ದುಸ್ರ್ಯಾಚಿಂ ಚಿಂತ್ನಾಂ ವಾಚ್ಲಿಂ ಜ್ಯೋತ್ಸನಾನ್. ತಾನೆಲ್ಲ್ಯಾ ವಾಲಿಕ್ ಉದಾಕ್ ಶಿಂಪ್ಡಾಯ್ನಾತ್‌ಲ್ಲೊ ಮ್ಹಾಲಿ ಜಾವ್ನಾಸಾ ಮ್ಹಜೊ ಶಿರ್ಪುಟೊ, ಲಾಚಾರ್, ಅಸ್ಕತ್ ಮ್ಹಾತಾರೊ ಮೇಯರ್" ತಾಚ್ಯಾ ಉತ್ರಾಂನಿ ಕೊಡ್ಸಾಣ್ ಆಸ್‌ಲ್ಲಿ. "ಕೆದೊಳ್ ಪರ್‍ಯಾಂತ್ ಏಕ್ ತರ್ನಾಟಿ ಸ್ತ್ರೀ ಪತಿವ್ರತಾ ಜಾವ್ನ್ ಜಿಯೆತಾಲಿ? ಲಕ್ಷ್ಮಣ್ ರೇಖಾಚೊ ಮಾನ್ ಕೆದೊಳ್ ಪರ್ಯಾಂತ್ ಸಾಂಬಾಳುಂಕ್ ಸಕ್ತೆಲಿ?"

ಡ್ರಾಯ್ವ್ ವೇ ವಯ್ಲ್ಯಾನ್ ನಿಸ್ರೊನ್ ಆಸ್‌ಲ್ಲೆಂ ಮಾರುತಿ ಎಸ್ಟೀಮ್, ಸ್ಪೋರ್ಟ್ಸ್ ಕ್ಲಬ್ಬಾಚ್ಯಾ ಪರಿಸರಾ ಥಾವ್ನ್ ಭಾಯ್ರ್ ಯೇವ್ನ್ ರಾಜ್ ರಸ್ತ್ಯಾಕ್ ಕಾತ್ರುಂಕ್ ಲಾಗ್ಲೆಂ.

"ಉಜ್ಯಾಂತ್ ಜಳ್ಚೆಂ ಫುಲ್ ಹಾಂವ್ ಜಾವ್ನಾಸಾಂ" ತಾಚೆ ತಾಂಬ್ಡೆ ರೊಸಾಳ್ ವೋಂಠ್ ಕಾಂಪೊಂಕ್ ಲಾಗ್ಲೆ. "ಏಕ್ ಮಾದಕ್ ಫುಲ್ ಭ್ರಮರಾಚ್ಯಾ ಆಕ್ರಮಣಾಕ್ ರಾಕ್ತಾ"

ಜ್ಯೋತ್ಸನಾಚ್ಯಾ ಉತ್ರಾಂನಿ ಸಂಕೋಚ್ ನಾತ್‌ಲ್ಲೊ. ಲಜ್ ನಾತ್‌ಲ್ಲಿ. ಬಿತರ್ಲೊ ಪಾಶಾಂವ್ ಎಕಾ ದಾದ್ಲ್ಯಾ ಸಾಮ್ಕಾರ್ ವೊಂಕೊನ್ ಆಸ್‌ಲ್ಲೆಂ. ತಾಚ್ಯಾ ಉತ್ರಾಂನಿ ಸಜ್ಞಾ ಆಸ್‌ಲ್ಲಿ. ತಾಚ್ಯಾ ಉತ್ರಾಂನಿ ಆಹ್ವಾನ್ ಆಸ್‌ಲ್ಲೆಂ.

"ಹಾಂವ್ ಏಕ್ ಕಾಜಾರಿ ದಾದ್ಲೊ ಜಾವ್ನಾಸಾಂ" ಅಜಯಾಚೊ ತಾಳೊ ಪಾತಾಳಾಕ್ ದೆಂವ್‌ಲ್ಲೊ. "ಪಯ್ಲ್ಯಾ ಭೆಟೆಂತ್‌ಚ್ ತುವೆಂ ಮ್ಹಜಿ ವಿಂಚವ್ಣ್ ಕೆಲ್ಯಾಯ್ ಮಿಸೆಸ್ ಗುಪ್ತಾ?"

"ಉಜ್ಯಾಂತ್ ಜಳ್ಚ್ಯಾ ಫುಲಾಕ್ ಆಪ್ಣಾಂವ್ಕ್ ಜಾಯ್ತ್ಯಾಂಕ್ ಹಾಂವೆ ಆಪವ್ಣೆಂ ದಿವ್ಯೆತ್ ಆಸ್‌ಲ್ಲೆಂ. ಪುಣ್ ಹಾಂವ್ ವೇಶ್ಯಾ ನಹಿಂ. ಮ್ಹಜೆಂ ಶರೀರ್ ನಿತಳ್ ಆಸಾ. ಕಸಲಿಚ್ ಮಾರೆಕಾರ್ ಪಿಡಾ ಮ್ಹಾಕಾ ನಾ. ಪುಂಕ್ಯಾಚಿ ಸೇವಾ ತುಜೆ ಥಾವ್ನ್ ಆಪೇಕ್ಶಿನಾ. ದುಡ್ವಾಚ್ಯಾ ರಾಶಿರ್ ತುಂ ಖೆಳ್ತೊಲೊಯ್"

"ಮ್ಹಜ್ಯಾ ಬಾಯ್ಲೆಕ್ ಹಾವೆಂ ದ್ರೋಹ್ ಕರುಂಕ್ ಜಾಯ್?"

"ಲಕ್ಶ್ಮಣ್ ರೇಖಾ ದಾದ್ಲ್ಯಾಂಕ್ ಲಾಗು ಜಾಯ್ನಾ ಅಜಯ್"

"ಮೇಯರಾಚ್ಯಾ ಕ್ರೋಧಾಕ್ ಆಮಿಂ ಬಲಿ ಜಾತೆಲ್ಯಾಂವ್. ಆಮ್ಚೆಂ ಜಿವಿತ್ ತೀನ್ ತಿರ್ಕುಟ್ ತೊ ಕರ್ತೊಲೊ" ಕಾಂಪ್ಲೊ ಅಜಯ್. "ಪಯ್ಸಾ- ಪಯ್ಸ್ ಆಸ್‌ಲ್ಲಿಂ ಧ್ರುವಾಂ ಲಾಗಿಂ ಯೇವ್ನ್ ಆಪ್ಟಾಲ್ಯಾರ್ ಭುಂಯ್ಕಾಂಪ್ ಜಾತೆಲಿ"

"ತಾಚ್ಯಾ ಕಾನಾಕ್ ಮೂಯ್ ಸಯ್ತ್ ಚಾಬ್ಚಿನಾ" ಹಾಸ್ಲೆಂ ತೆಂ. "ಅನ್ವರ್ ಲಂಗ್ಡ್ಯಾಚ್ಯಾ ಗೆರೆಜಿ ಪಾಟ್ಲ್ಯಾ ರೂಪ್‌ತಾರಾ ಕೊಲೊನಿಂತ್ ಮ್ಹಜೆಂ ಪರ್ಸನಲ್ ಫ್ಲ್ಯಾಟ್ ಆಸಾ" ಅಜಯ್ ಭಾರ್ಗವಾಚ್ಯಾ ಜಾಂಗ್ಳಾ ವಯ್ರ್ ಹಾತ್ ಚರಯ್ಲೊ ಜ್ಯೋತ್ಸನಾನ್. "ಸರ್ವ್ ಸುವಿಧಾ ಆಸಾ ತ್ಯಾ ಫ್ಲ್ಯಾಟಾಂತ್"

"ಏಕ್ ದೀಸ್ ಮೇಯರ್ ಆಮ್ಚ್ಯಾ ತಕ್ಲೆರ್ ಪಾವ್ತೊಲೊ" ಸ್ಟೇರಿಂಗ್ ಧರ್‌ಲ್ಲೆ ಹಾತ್ ಕಾಂಪ್ಲೆ. "ದೋನ್ ಹುನೊನಿ ಗುಳೆ ಆಮ್ಚ್ಯಾ ಮೆಂದ್ವಾಂತ್ ರಿಗ್ತೆಲೆ"

"ಪಯ್ಲ್ಯಾ ಸುವಾತೆರ್ ತಶೆಂ ಕಾಂಯ್ ಜಾಂವ್ಚೆಂನಾ. ಕಿತ್ಯಾಕ್ ತೆಂ ಫ್ಲ್ಯಾಟ್ ನರ್ಗೀಸ್ ಫಿರೋಜಾ ಖಾನ್ ಮ್ಹಳ್ಳ್ಯಾ ನಾಂವಾರ್ ಹಾವೆಂ ಭಾಡ್ಯಾಕ್ ಘೆತ್ಲಾಂ. ಬುರ್ಖಾ ನ್ಹೆಸೊಣ್ ಯೆಂವ್ಚ್ಯಾ - ವೆಚ್ಯಾ ಸ್ತ್ರೀಯೆಕ್ ಕೋಣ್ ಪಾರ್ಕಿತ್?"

"ತರಿಪುಣ್..." ನರ್ಗಾಲೊ ಅಜಯ್. "ಭಾವನಾ ಸವೆಂ ವಿಶ್ವಾಸ್ ಘಾತ್ ಹಾವೆಂ ಕರುಂಕ್ ಪಡ್ತೊಲೊ"

"ಕಿತೆಂ ಆಸಾ ತುಜೆಲಾಗಿಂ? ಏಕ್ ಮಾಮೂಲಿ ನೌಕರಿ ಕರ್ಚ್ಯಾ ತುವೆಂ ಕರೊಡಾಂಚಿ ಸ್ವಪ್ಣಾಂ ಚಿಂತುಂಕ್ ಸಾಧ್ಯ್ ಆಸಾ? ಭರ್ಪೂರ್ ದುಡು ಫಕತ್ ಹಾಂವ್ ತುಕಾ ದೀಂವ್ಕ್ ಸಕ್ತಾಂ ಅಜಯ್. ದುಡ್ವಾಚ್ಯಾ ರಾಶಿರ್ ಖೆಳ್ಚೆಂ ನಶಿಬ್ ಸರ್ವಾಂಚ್ಯಾ ನಶಿಬಾಂತ್ ನಾಂ" ತೆಂ ಖರ್ಶೆಂವ್ಕ್ ಲಾಗ್ಲೆಂ. ತಾಚೆ ಫುಡ್ಪುಡಿತ್ ಮೊಟಿಂ ಸ್ಥನಾಂ ಉಡೊನ್ ಪಡೊಂಕ್ ಲಾಗ್ಲಿಂ. ಹುನೊನಿ ಶ್ವಾಸ್ ದುಸ್ರ್ಯಾಚ್ಯಾ ಗಾಲಾಕ್ ಆಪ್ಟೊಂಕ್ ಲಾಗ್ಲೊ. "ಹಾಂವ್ ಭುಕೆಲ್ಯಾಂ ಅಜಯ್. ಆಯ್ಚಿ ರಾತ್ ತುಜೆ ಸವೆಂ ಖರ್ಚಿತೆಲಿಂ"

ತಾಂಚೆಂ ಕಾರ್ ಶಹರಾ ಬಿತರ್ ಪಾವ್‌ಲ್ಲೆಂ. ಎಕಾ ಮಯ್ಲಾ ಫಾತ್ರಾಲಾಗಿಂ ಮಾರುತಿಕ್ ಉಭೆಂ ಕೆಲೆಂ ಅಜಯಾನ್. ವಿಂಚವ್ಣ್ ಕರ್ಚೊ ವೇಳ್ ಲಾಗಿಂ ಪಾವ್‌ಲ್ಲೊ.

ಉಜ್ವ್ಯಾ ಕುಶಿಚೊ ರಸ್ತೊ ಆಪ್ಲ್ಯಾ ಘರಾ ಕುಶಿನ್ ವೆತಾ ತರ್, ದಾವ್ಯಾ ಕುಶಿಚೊ ರಸ್ತೊ ರೂಪ್‌ತಾರಾ ಕೊಲೊನಿ ಫಕತ್ ತೀನ್ ಕಿಲೋಮೀಟರಾಂಚ್ಯಾ ಅಂತರಾರ್ ಆಸಾ ಆದ್ರಶ್ಯ್ ತಾಳೊ ಜಾಗಂವ್ಕ್ ಲಾಗ್ಲೊ. ’ಭಾವನಾಚಿ ರೂಚ್ ತುವೆಂ ಚಾಕ್ಲ್ಯಾಯ್. ಆತಾಂ ಜ್ಯೋತ್ಸನಾ ಕಿತ್ಯಾಕ್ ನಜೊ?"

’ಬೆಂಕಾಂತ್ಲಿ ಏಕ್ ಮಾಮೂಲಿ ನವ್ಕರಿ. ಮಾಂವಾನ್ ದಿಲ್ಲೆಂ ಪ್ಲ್ಯಾಟ್ ಆನಿಂ ಕಾರ್. ಹಂಗಾಂತ್ ಹಾಂವೆಂ ಜಿಯೆಂವ್ಕ್ ಜಾಯ್? ಏಕ್ ಅತ್ರಪ್ತ್ ಸ್ತ್ರೀ ದುಡ್ವಾ ಸವೆಂ ಆಪ್ಲೆಂ ಶರೀರ್ ಒಪ್ಸುಂಕ್ ತಯಾರ್ ಆಸ್ತಾನಾ ದ್ರೋಹ್ ಕೆಲ್ಲ್ಯಾಂತ್ ಚೂಕ್ ಕಸಲಿ?’ ಥಾಂಬಲ್ಲ್ಯಾ ಕಾರಾಕ್ ಜೀವ್ ದಿಲೊ ಅಜಯಾನ್. "ಲಕ್ಶ್ಮಣ್ ರೇಖಾ ದಾದ್ಲ್ಯಾಂಕ್ ಲಾಗು ಜಾಯ್ನಾ ಮ್ಹಳ್ಳಿಂ ತುಜಿ ಚಾರಿತ್ರಿಕ್ ಉತ್ರಾಂ ನೀಜ್ ಜಾತೆಲಿಂ" ತಾಚ್ಯಾ ತಾಳ್ಯಾಂತ್ ಧ್ರಡತಾ ಉದೆಲ್ಲಿ.

"ರೀಯಲಿ?"

"ತಾನೆಲ್ಲ್ಯಾ ವಾಲಿಕ್ ನಿರಾಶಾ ಕರ್ಚೊನಾ ಅಜಯ್ ಭಾರ್ಗವ್" ಎಕ್ಸಿಲೇಟರಾ ವಯ್ರ್ ಪಾಂಯ್ ಧಾಂಬ್ಲೊ. "ಬುರ್ಖಾ ಆಮಿಂ ಮೊಲಾಕ್ ಘೆವ್ಯಾಂ"

"ಥೆಂಕ್‌ಯೂ ಅಜಯ್"

"ಎಕಾ ಹಾತಾನ್ ಸ್ಟೇರಿಂಗ್ ಸಾಂಬಾಳುನ್ ದುಸ್ರ್ಯಾ ಹಾತಾನ್ ಜ್ಯೊತ್ಸನಾಕ್ ಆರಾಯ್ಲೆಂ. ದುಸ್ರ್ಯಾ ಕ್ಷಣಾ ಮಾರುತಿ ವಾರ್‍ಯಾಂ ಸವೆಂ ಉಲವ್ನ್ ಆಸ್‌ಲ್ಲೆಂ.

********

"ಭಾವನಾ" ಉಲೊ ಮಾರಿತ್ತ್ ಬಿತರ್ ಸರ್ಲೊ ಅಜಯ್.

ಕಿಚನಾ ಥಾವ್ನ್ ಭಾಯ್ರ್ ಆಯ್ಲೆಂ ಭಾವನಾ. "ಹ್ಯಾ ದಿಸಾಂನಿ ಥಕ್‌ಲ್ಲ್ಯಾ ಭಾಶೆನ್ ದಿಸ್ತಾಯ್. ಭಲಾಯ್ಕಿ ಬರಿ ನಾ ವ ಬೆಂಕಾಂತ್ ಕಾಮ್ ವಾಡ್ಲಾಂ?" ಟಾಯೆಚಿ ಗಾಂಟ್ ಸೊಡಯ್ಲಿ. "ಛಾಂಪಿಯನ್ ಜಾಂವ್ಚ್ಯಾ ಪಯ್ಲೆಂ ಸುಡ್ಸುಡಿತ್ ತುಂ ಆಸ್‌ಲ್ಲೊಯ್"

"ಹ್ಯಾ ಬೆಂಕಾಚ್ಯಾ ಕಾಮಾನ್ ನಿಜಾಯ್ಕಿ ಹಾಂವ್ ಥಕ್ಲಾಂ" ಸೋಫಾರ್ ಗಳ್ಳೊ ಆಜಯ್. "ನವ್ಕರೆಕ್ ಹಾಂವೆಂ ರಾಜಿನಾಮ್ ದಿಲಾಂ"

"ಕಿತೆಂ?" ಉಡೊನ್ ಪಡ್ಲೆಂ ಭಾವನಾ. "ತಕ್ಲಿ ಕುಂಬು ಜಾಲ್ಯಾ?"

"ತುಜ್ಯಾ ಡೆಡಿಚ್ಯಾ ಹಂಗಾಂತ್ ಹಾಂವ್ ಜಿಯೆವ್ನ್ ಆಸಾಂ" ಭಾವನಾಕ್ ತಾಣೆಂ ಲಾಗಿಂ ವೊಡ್ಲೆಂ. "ಶಿಮೊಲಿಂತ್ ಹಾಂವೆಂ ದಫ್ತರ್ ಘೆಂವ್ಕ್ ಚಿಂತ್ಲಾಂ. ಲಿಟಲ್ ಬೊಕ್ಸರಾ ಖಾತಿರ್ ದುಡು ಆಮಿಂ ಪುಂಜಾಂವ್ಕ್ ಜಾಯ್ ನಹಿಂ?"

"ಬಿಜ್ನೆಸಾಕ್ ದೆಂವೊಂಕ್ ಚಿಂತ್ಲಾಯ್?"

"ಹುಂ"

"ಬಿಜ್ನೆಸ್ ಸುರು ಕರುಂಕ್ ದುಡು ಆಸಾ ತುಜೆಲಾಗಿ?"

"ಮ್ಹಜೊ ಫ್ರೆಂಡ್ ಇನ್‌ವೆಸ್ಟ್ ಕರ್ಚ್ಯಾರ್ ಆಸಾ"

"ಕೊಣ್ ತೊ ಪುನೆಗೆಲ್ಲೊ?"

"ರಹಸ್ಯ್ ಡಾರ್ಲಿಂಗ್, ರಹಸ್ಯ್" ಭಾವನಾಚ್ಯಾ ಪೊಟಾ ವಯ್ರ್ ಹಾತ್ ಚರಯ್ಲೊ. ಭಾವನಾಚೆಂ ಧ್ಯಾನ್ ದುಸ್ರ್ಯಾ ಕುಶಿನ್ ಗುಂವ್ಡಾಂವ್ಚಿ ಗರ್ಜ್ ಆಸ್‌ಲ್ಲಿ. ಸವಾಲಾಂಚ್ಯಾ ಜಾಳಾ ಬಿತರ್ ಶಿರ್ಕೊಂಕ್ ತಾಕಾ ನಾಕಾ ಆಸ್‌ಲ್ಲೆಂ. "ಲಿಟಲ್ ಬೊಕ್ಸರ್ ಯೆತಾ ಪರ್ಯಾಂತ್ ತುಜ್ಯಾ ಶರೀರಾಚೊ ಭೋಗ್ ಹಾಂವ್ ಕರ್ಚೊ ನಾ."

"ಕಿತ್ಯಾಕ್ ಹಿ ಧಂಡವ್ಣಿ ಅಜಯ್?" ಭಾವನಾಚೆಂ ಮುಸ್ಕಾರ್ ಬಾವ್ಲೆಂ.

"ಆಮ್ಚ್ಯಾ ಬಾಳಾ ಖಾತಿರ್ ಸುಖಾ ಥಾವ್ನ್ ವಂಚಿತ್ ಜಾಂವ್ಕ್ ಹಾಂವ್ ತಯಾರ್ ಆಸಾಂ. ತಾಚ್ಯಾ ಉತ್ರಾಂನಿ ಚುರ್ಚುರೆ ಆಸ್‌ಲ್ಲೆಂ. ನಟನಾಂತ್ ತೊ ಅಪ್ರತಿಮ್ ಜಾವ್ನಾಸ್‌ಲ್ಲೊ. ದುಸ್ರ್ಯಾ ಬಾಂಯ್ಚಿ ಗೂಂಡಾಯ್ ಮೆಜುನ್ ಆಸ್‌ಲ್ಲ್ಯಾಕ್ ಆಪ್ಲ್ಯಾ ಬಾಯ್ಲೆಚಿ ಪರ್ವಾ ನಾತ್‌ಲ್ಲಿ. ಸ್ವಾರ್ಥಾನ್ ತಾಕಾ ಆಂದ್ಳೊ ಕೆಲ್ಲೊ. ಚೊರಿಯಾಂ ಪಕ್ವಾನ್ ಸದಾಂಚ್ ಹರ್ವಾಣಾಂತ್ ಮೆಳ್ತಾನಾ, ಘರ್ಚ್ಯಾ ದಾಳಿಚೊ ಮಹತ್ವ್ ಕಸಲೊ? ’ವ್ಹಾ ಅಜಯ್ ವ್ಹಾ’ ತೊ ಆಪ್ಲ್ಯಾ ಮತಿ ಬಿತರ್ ಆಪ್ಲಿಚ್ ಪಾಟ್ ಥಾಪುಡುಂಕ್ ಲಾಗ್ಲೊ. ’ಯು ಆಸ್ ಎ ಲಕ್ಕಿ ಬಾಸ್ಟಾರ್ಡ್’ ಭಾವನಾಚೆ ವೋಂಟ್ ತಾಣೆಂ ಚಿಂವ್ಲೆಂ. "ಶರೀರಾ ಆಮ್ಚಿಂ ಏಕ್ ಜಾಂವ್ಚಿನಾಂತ್ ತರಿ ಕಾಳ್ಜಾಂ ಘಡ್ಸೊನ್‌ಚ್ ಉರ್ತೆಲಿಂ".

ಭಾವನಾಚೆ ದೊಳೆ ತೇವಾಭರಿತ್ ಜಾಲೆ. "ತುಕಾ ಆಪ್ಣಾಯಿಲ್ಲಿಂ ಹಾಂವ್ ನಿಜಾಯ್ಕಿ ಭಾಗಿ ಜಾವ್ನಾಸಾ" ಘೊವಾಚ್ಯಾ ಖಾಂದ್ಯಾರ್ ಮಾತೆಂ ತೆಂಕ್ಲೆಂ. "ಐ ಲವ್ ಯೂ ಹನಿ ಬೊಯ್."

"ಸುರ್ಯಾಚಿ ದಾವ್, ಚಂದ್ರಾಚೊ ಪ್ರಕಾಸ್, ನೆಕೆತ್ರಾಂಚೊ ಉಜ್ವಾಡ್ ಎಕಾ ದಿಸಾ ಮಾಜ್ವಾತಾಲೊ. ಪುಣ್ ತುಜ್ಯಾ ಪತಿಚೊ ಮೋಗ್ ಕೆದ್ನಾಂಚ್ ಉಣೊ ಜಾಂವ್ಚೊ ನಾ. ಮ್ಹಜೆಂ ಶರೀರ್, ಮ್ಹಜೆಂ ಕಾಳಿಜ್ ಆನಿಂ ಮ್ಹಜೊ ನಿಮಾಣೊ ಉಸ್ವಾಸ್ ಪರ್ಯಾಂತ್ ತುಜೊ ಜಾವ್ನಾಸಾ ಭಾವನಾ".

"ಅಜಯ್ ಮ್ಹಜ್ಯಾ ಮೊಗಾ" ಉಮ್ಯಾಂಚಿ ಶಿಂವರ್ ವೊತ್ಲೊ ಭಾವನಾನ್. "ತುಜ್ಯಾ ವೆಂಗೆಂತ್ ಹಾಂವ್ ಮರೊಂಕ್ ಆಶೆತಾಂ"

"ಹನಿ ಗರ್ಲ್.." ಉತ್ರಾಂನಿ ಮ್ಹೊಂವ್ ಗಳಯ್ಲೆಂ ಅಜಯಾನ್. "ತುಕಾ ಹಾಂವ್ ಘಾತ್ ಕರ್ಚೊಂನಾ"

"ಮ್ಹಾಕಾ ಮ್ಹಜ್ಯಾ ಮೊಗಾ ವಯ್ರ್ ವಿಶ್ವಾಸ್ ಆಸಾ" ಹಾಸೊನ್‌ಚ್ ಉಟೊನ್ ಉಭೆಂ ಜಾಲೆಂ ಭಾವನಾ. ವಚ್, ಸ್ನಾನ್ ಕರುನ್ ಯೆ. ಜೆವ್ಣಾಚೊ ವೇಳ್ ಜಾಲೊ ನಹಿಂ?"

"ನಿಜಾಯ್ಕಿ ಮ್ಹಾಕಾ ಭುಕ್ ಲಾಗ್ಲ್ಯಾ" ತೊಯಿ ಉಟೊನ್ ಉಭೊ ಜಾಲೊ.

ಜೆವ್ಣಾ ಉಪ್ರಾಂತ್ ಪರತ್ ಹೊಲಾಂತ್ ಯೇವ್ನ್ ತಿಂ ಬಸ್ಲಿಂ.

"ಹ್ಯಾ ಫುಡೆಂ..." ಫಳಾಂಚಿ ದಾಲಿ ಲಾಗಿಂ ವೊಡ್ಲಿ ಅಜಯಾನ್. "ಜಾಂವ್ಕ್ ಪುರೊ ಹಾಂವ್ ತಡವ್ ಕರುನ್ ಘರಾ ಯೆತಾಲೊಂ"

"ಕಿತ್ಯಾಕ್?"

"ಬಿಜ್ನೆಸಾಂತ್ ವೆಳಾಚೊ ಅಭಾವ್ ಆಸ್ತಾ. ವೆಳಾಕ್ ಮಹತ್ವ್ ದಿಲ್ಯಾರ್ ದುಡು ಕಸೊ ಜಮೊ ಜಾತಾಲೊ" ಎಪ್ಪಲಾಕ್ ಘಾಸ್ ಮಾರ್ಲೊ ಅಜಯಾನ್. "ವೆಳಾಚ್ಯಾ ಪರಿಧಿ ಬಿತರ್ ಮ್ಹಾಕಾ ಕೈದ್ ಕರಿನಾಕಾ"

"ತುಜ್ಯಾ ಉನ್ನತೆಂತ್ ಮ್ಹಜ್ಯಾ ಬಾಳಾಚೆಂ ಭವಿಷ್ಯ್ ಹೊಂದ್ವೊನ್ ಆಸಾ ತರ್..... ತುಂ ಕೈದ್ ನಹಿಂ. ಹಾಂವ್ ಜಯ್ಲರ್ ನಹಿಂ ಖುಶ್?"

"ಬೊಕುಲ್ ಆಜ್ ಸ್ವತಂತ್ರ್ ಜಾಲೊ. ಪ್ರಭುಕ್ ಅರ್ಗಾಂ" ಹಾತ್ ಜೊಡ್ಲೆ ಅಜಯಾನ್.

ಭಾವನಾಚ್ಯೊ ಹಾಸೊ ಸುಟ್ಲ್ಯೊ.

"ವೆಗಿಂಚ್..." ಎಪ್ಪಲಾಚೊ ಕುಡ್ಕೊ ಚಾಬ್ಲೊ ಅಜಯಾನ್. "ಫ್ಲೇಟಾ ಬದ್ಲಾಕ್ ಬಂಗ್ಲ್ಯಾಂತ್ ಆಮಿಂ ಜಿಯೆತೆಲ್ಯಾಂವ್. ಲಕ್ಷ್ಮಿಚಿ ಕ್ರಪಾ ಮ್ಹಜೆರ್ ಪಡ್ಲ್ಯಾ."

"ತುಜಿಂ ಸ್ವಪ್ಣಾಂ ನೀಜ್ ಜಾಂವ್ದಿತ್. ದುರ್ಗಾ ಪರಮೇಶ್ವರಿ ಮಾತಾಚೆಂ ಆಶೀರ್ವಾದ್ ಸದಾಂಚ್ ತುಜೆರ್ ಆನಿಂ ತುಜ್ಯಾ ವ್ಯವಹಾರಾಚೆರ್ ಆಸ್ತೆಲೆಂ" ದಾಲಿಯಾಂತ್ಲೊ ಚಿಕ್ಕು ವಿಂಚ್ಲೊ ಭಾವನಾನ್. "ತುಜ್ಯಾ ಇಷ್ಟಾಕ್ ಬಿಜ್ನೆಸ್ ಪಾಟ್ನರಾಕ್ ವೆಗಿಂಚ್ ಹಾಂವ್ ಮೆಳ್ತೆಲಿಂ".

"ಕಿತ್ಯಾಕ್ ನಜೊ?" ಬಿತರ್ಲ್ಯಾ - ಬಿತರ್ ಕಾಂಪ್ಲೊ ಅಜಯ್. "ಮ್ಹಾಕಾ ನೀದ್ ಯೆತಾ. ಫಾಲ್ಯಾಂ ಸಕಾಳಿಂ ಆಟ್ ವರಾರ್ ಪಾಟ್ನರಾಂ ಸವೆಂ ಮೀಟಿಂಗ್ ಹಾಂವೆಂ ಫಿಕ್ಸ್ ಕೆಲ್ಲೆಂ ಆಸಾ"

"ತುಂ ವಚೊನ್ ನಿದೆ ಅಜಯ್. ನವ್ಯಾ ಸೀರಿಯಲಾಚೊ ದುಸ್ರೊ ಎಪಿಸೊಡ್ (ಭಾಗ್) ಮ್ಹಾಕಾ ಪಳೆಂವ್ಕ್ ಆಸಾ. ಸೀರಯಲಾಚೆಂ ನಾಂವ್ ಆಯ್ಕಾಶಿ ತರ್ ಶಿರಿಂ ಚುಕೊಂಕ್ ಆಸಾಯ್" ತೆಂ ಹಾಸ್ಲೆಂ ’ಪತಿ, ಪತ್ನೀ ಔರ್ ವ್ಹೊಹ್’ ಸೀರಿಯಲಾಚೆಂ ನಾಂವ್ ಜಾವ್ನಾಸಾ. ಪ್ರಭ್ಹುಕ್ ಅರ್ಗಾಂ. ಆಮ್ಚ್ಯಾ ಜಿವಿತಾಂತ್ ವ್ಹೊ (ತೆಂ) ನಾತ್‌ಲ್ಲ್ಯಾ ಖಾತಿರ್".

ಭಾವನಾಚಿಂ ಉತ್ರಾಂ ಕಾಬಾರ್ ಜಾಂವ್ಚ್ಯಾ ಫುಡೆಂಚ್ ಅಜಯ್ ಬೆಡ್‌ರೂಮಾಕ್ ಪಾವ್‌ಲ್ಲೊ.

"ಪ್ರಭು.." ಉದ್ಗಾರ್ಲೊ ಅಜಯ್. "ಚುಕೊನ್ ಹಾಂವ್ ಪಡ್ಲಾಂ. ಪಾತ್ಕಾಚ್ಯಾ ಕೊಂಡಾಂತ್ ದೆಂವ್‌ಲ್ಲ್ಯಾ ಮ್ಹಾಕಾ ಬಚಾವ್ ಕರ್" ಖಾಟಿಯೆರ್ ತೊ ಆಡ್ ಪಡ್ಲೊ ತರಿ ನೀದ್ ಮಯ್ಲಾ ಪಯ್ಸ್ ಆಸ್‌ಲ್ಲಿ.

ನಾಂವಾ ಖಾತಿರ್ ಶಿಮೊಲಿಂತ್ ದಫ್ತರ್ ಉಘಡ್ಲೆಂ ಭಾರ್ಗವಾನ್. ದಿಸಾಚೆಂ ಚಡಾವತ್ ವೇಳ್ ಜ್ಯೋತ್ಸನಾ ಗುಪ್ತಾಚ್ಯಾ ವೆಂಗೆಂತ್ ತೊ ಖರ್ಚುಂಕ್ ಲಾಗ್ಲೊ. ಜ್ಯೋತ್ಸನಾನ್ ಆಫ್ಲಿಂ ಉಪ್ತ್ರಾಂ ಪಾಳ್ಳಿಂ ಮಹಿನ್ಯಾ ಬಿತರ್ ಅಜಯಾಚ್ಯಾ ಬೆಂಕ್ ಖಾತ್ಯಾಂತ್ ಬಾವೀಸ್ ಲಾಖ್ ಜಮೊ ಜಾಲೆ. ಸವೆಂಚ್ ಶೋ ರೂಮಾಂತ್ಲೆಂ ನವೆಂಚ್ ಟಾಟಾ ಸುಮೊ ಘೆವ್ನ್ ದಿಲೆಂ.

"ತುವೆಂ ಮ್ಹಜ್ಯಾ ಅತ್ರಪ್ತ್ ಶರೀರಾಚಿ ತಾನ್ ಭಾಗಯ್ಲ್ಯಾಯ್" ಅಜಯಾಚ್ಯ ಲೊಂವೆನ್ ಭರ್‌ಲ್ಲ್ಯಾ ಹರ್ದ್ಯಾ ವಯ್ರ್ ಬೊಟಾಂ ಚರಯ್ಲಿಂ ಜ್ಯೋತ್ಸನಾನ್. "ಘೊವಾಕ್ ಬಿಯೆವ್ನ್, ಸಮಾಜೆಕ್ ಬಿಯೆವ್ನ್ ಕೆದೊಳ್ ಪರ್ಯಾಂತ್ ಹಾಂವ್ ಜಿಯೆಂವ್?"

"ಹೆಂ ತುವೆಂ ಪಯ್ಲೆಂ ಚಿಂತುಂಕ್ ನಾಂಯ್?"

"ಮ್ಹಜೊ ಪತಿ ಅಗರ್ಭ್ ಶ್ರೀಮಂತ್ ಜಾವ್ನಾಸಾ" ದುಸ್ರ್ಯಾಂಚಿ ಉತ್ರಾಂ ಕಾತರ್ಲಿಂ. ಆಣಿಂ ಥೊಡ್ಯಾಚ್ ಮಹಿನ್ಯಾಂನಿ ಮೇಯರ್ ಸ್ಥಾನಾ ಥಾವ್ನ್ ತೊ ದೆಂವ್ತೊಲೊ. ದೋನ್ ಕರೊಡ್ ತರೀ ಕಮಾಯ್ಲ್ಯಾತ್ ಮ್ಹಾತಾರ್‍ಯಾನ್"

"ಫಕತ್ತ್ ದೋನ್ ಕರೊಡಾಂಚೊ ಧನಿ ಜಾವ್ನಾಸಾ ತುಜೊ ಪತಿ?"

"ತುಂ ಚೂಕ್ ಸಮ್ಜಾಲಾಯ್. ತೊ ಏಕ್ ಅಗರ್ಭ್ ಶ್ರೀಮಂತ್ ಜಾವ್ನಾಸಾ ಮ್ಹಣ್ ಹಾಂವೆಂ ಸಾಂಗ್ಲಾಂ. ದೋನ್ ಕರೊಡ್ ಫಕತ್ ಎಕ್ ವರ್ಸಾನ್ ತಾಣೆಂ ಕಮಾಯ್ಲ್ಯಾತ್."

"ಏಹ್!" ಉದ್ಗಾರ್ಲೊ ಅಜಯ್. "ಸರ್ಕಾರಿ ದುಡ್ವಾಕ್ ಕುದೊಳ್ ಮಾರ್ಲ್ಯಾ?"

"ವೆಳಾಚೊ ಫಾಯ್ದೊ ಉಟಯ್ತಾತ್ ಶಾಣೆ ಮನಿಸ್. ಕೊಣಾ ಖಾತಿರ್ ತೊ ಪುಂಜಾಯ್ತಾ? ಪಯ್ಲಿ ಬಾಯ್ಲ್ ಕೆನ್ಸರ್ ಪಿಡೆಂತ್ ಮೆಲಿ. ಭುರ್ಗಿಂ ತಾಂಕಾಂ ಜಾಂವ್ಕ್ ನಾತ್‌ಲ್ಲಿಂ. ತೊ ಜೀವಂತ್ ಆಸ್ತಾ ಪರ್ಯಾಂತ್ ದುಡು ತಾಚೊ. ಉಪ್ರಾಂತ್?" ತಾಚ್ಯಾ ದೊಳ್ಯಾಂನಿ ನೆಕೆತ್ರಾಂ ಉದೆಲ್ಲಿಂ.

"ಮ್ಹಾತಾರ್‍ಯಾಕ್ ಜಿಯೆಂವ್ಕ್ ಸೊಡ್ ಜ್ಯೋತ್ಸನಾ. ಕಿತ್ಲಿ ವರ್ಸಾಂ ತೊ ಜಿಯೆತಾಲೊ? ಎಕಾ ನಹಿಂ ತರ್ ಎಕಾ ದಿಸಾ ತಾಣೆಂ ಮರೊಂಕ್ ಆಸಾ"

"ತೆದೊಳ್ ಪರ್ಯಾಂತ್ ರಾಕೊಂಕ್ ಹಾಂವ್ ತಯಾನ್ ನಾ" ತೆಂ ಉಟೊನ್ ಬಸ್ಲೆಂ. "ಕಾಂಯ್ ತರಿ ರಸ್ತೊ ಸೊಧುನ್ ಕಾಡ್ ಅಜಯ್"

"ಖುನ್?" ಕುಡಿ ಆತ್ಮ್ಯಾ ಸವೆಂ ಕಾಂಪ್ಲೊಂ ಅಜಯ್.

"ಕಿತ್ಯಾಕ್ ನಜೊ?"

"ನಾಕಾ....ನಾಕಾ......." ಉಟೊನ್ ತೊ ಬಸ್ಲೊ. ತಾಚ್ಯಾ ದೊಳ್ಯಾಂನಿ ಬಿರಾಂತ್ ಆಸ್‌ಲ್ಲಿ.

"ಲಾಗಿಂ - ಲಾಗಿಂ ಪನ್ನಾಸ್ ಕರೊಡಾಂಚಿ ಸಂಪತಿ ಆಮ್ಚಿ ಜಾತೆಲಿ"

"ಭಾವನಾಕ್ ದ್ರೋಹ್ ಕರುನ್ ಆಕ್ ಪಾಪ್ ಹಾಂವೆಂ ಎದೊಳ್‌ಚ್ ಆಧಾರ್ಲಾಂ. ದುಸ್ರೆಂ ಮಹಾ ಪಾಪ್ ಆಧಾರುಂಕ್ ಹಾಂವ್ ಸಕ್ಚೊಂನಾ"

"ಪನ್ನಾಸ್ ಕರೊಡ್ ರುಪಯ್ ಅಜಯ್, ಪನ್ನಾಸ್ ಕರೊಡ್. ಜಾತಾ ತಿತ್ಲ್ಯಾ ವೆಗಿಂ ಮ್ಹಾತಾರ್‍ಯಾಕ್ ಪೆಲ್ಯಾ ಸಂಸಾರಾಕ್ ಧಾಡೂಂಕ್ ಜಾಯ್."

ಅಜಯಾಚೆಂ ಶರೀರ್ ಕಾಂಪ್ಲೆಂ.

ಜ್ಯೋತ್ಸನಾ ಗುಪ್ತಾಚೆಂ ಬಿತರ್ಲೆಂ ರೂಪ್ ಉಗ್ತೆಂ ಜಾಲ್ಲೆಂ.

ಏಕ್ ಮಾರೆಕಾರ್ ಜಾಳ್ ವೊಳ್‌ಲ್ಲೆಂ ವಿಲಾಸಿ ಸ್ತ್ರೀಯೆನ್. ತ್ಯಾ ಜಾಳಾ ಬಿತರ್ ಅಜಯ್ ಸಾಂಪ್ಡಾತ್ ತರ್ ಕೊಣಾಕ್ ಫಾಯ್ದೊ, ಕೊಣಾಕ್ ಲುಕ್ಸಾಣ್>

"ಕಿತೆಂ ಮ್ಹಣ್ತಾಯ್?"

ತೊ ಚಿಂತುಂಕ್ ಪಡ್ಲೊ.

"ಪ್ಲೆನಿಂಗ್ ಮ್ಹಜೆಂ. ಪುಣ್ ಕಾರ್ಯಗತ್ ತುಂ ಕರ್ತೊಲೊಯ್" ತೆಂ ವಿವರುಂಕ್ ಲಾಗ್ಲೆಂ. "ಮ್ಹಾತಾರ್‍ಯಾಚ್ಯಾ ಕಾರಾಕ್ ಏಕ್ ಟ್ರಕ್ಕ್ ಯೇವ್ನ್ ಹಾಂಡ್ತೆಲೆಂ. ಎಕ್ಸಿಡೆಂಟಾಕ್ ಖುನಿಯೆಚೆಂ ರೂಪ್ ದೀಂವ್ಕ್ ಪೊಲಿಸ್ ಸಕ್ಚೆನಾಂತ್"

"ತುಕಾ ಹೊಗ್ಡಾಂವ್ಕ್ ಹಾಂವ್ ತಯಾರ್ ನಾ." ಜ್ಯೋತ್ಸನಾಕ್ ತಾಣೆಂ ಖಾಟಿಯೆರ್ ನಿದಾಯ್ಲೆಂ. "ಮ್ಹಾಕಾ ಚಿಂತುಂಕ್ ಆವ್ಕಾಸ್ ದೀ"

"ಅಮ್ಸರ್ ನಾ" ತೆಂ ಫುಡ್ಲ್ಯಾ ಖೆಳಾಕ್ ತಯಾರ್ ಜಾಲೆಂ. "ಪನಾಸ್ ಕರೊಡ್ ರುಪಿಯಾಂ ಖಾತಿರ್ ವಿಧವ್ ಜಾಂವ್ಕ್ ಹಾಂವ್ ತಯಾರ್ ಆಸಾಂ". ಅಜಯಾಕ್ ಆಫ್ಲ್ಯಾ ಕುಡಿ ವಯ್ರ್ ವೊಡ್ಲೊ.

ಅಜಯ್ ಆಫ್ಲ್ಯಾ ಕಾಮಾಂತ್ ಮಗ್ನ್ ಜಾಲೊ.

’ಪನ್ನಾಸ್ ಕರೊಡಾಂ ಖಾತಿರ್ ದೊಡಿ ಜೂಗಾರ್ ಹಾಂವ್ ಖೆಳ್ತೆಲಿಂ’ ಗೊಡ್ಶ್ಯಾ ಪಿಂರ್ಗವ್ಣ್ಯಾ ಮಧೆಂ ಜ್ಯೋತ್ಸನಾಚಿಂ ಚಿಂತ್ನಾಂ ವ್ಹಾಳ್ಳಿಂ. ’ದೂಧಾಂತ್ಲ್ಯಾ ಮೂಸಾಕ್ ಕಾಡ್ನ್ ಉಡಯಿಲ್ಲ್ಯಾಬರಿ ತುಕಾ ಹಾಂವ್ ಮ್ಹಜ್ಯಾ ಜಿವಿತಾ ಥಾವ್ನ್ ಕಾಡ್ನ್ ಉಡಯ್ತೆಲಿಂ’ ದುಸ್ರ್ಯಾಕ್ ಆಪ್ಲ್ಯಾ ಕಾಮಾಂತ್ ಸಹಕಾರ್ ದಿಲೊ ಜ್ಯೋತ್ಸನಾನ್.

ವರಾಂ ರಾತಿಚಿಂ ಪಾವ್ಣೆಂ ಬಾರಾ ಉತ್ರಾಲ್ಯಾರ್‌ಯಿ ಭಾವನಾ ನಿದೊಂಕ್ ನಾತ್‌ಲ್ಲೆಂ. ಟೇಬಲ್ ಲೇಂಪಾಚ್ಯಾ ಉಜ್ವಾಡಾಂತ್ ಹಿಂದಿ ಸಾಹಿತ್ಯಾಚೊ ಖ್ಯಾತ್ ಲೇಖಕ್ ಮಾನೆಸ್ತ್ ಸುರೆಂದರ್ ಮೋಹನ್ ಪಾಠಕಾಚಿ ಥ್ರಿಲ್ಲರ್ ಕಾದಂಬರಿ ತೆಂ ವಾಚುನ್ ಆಸ್‌ಲ್ಲೆಂ.

ಅಜಯ್ ಗೊಡ್ಶ್ಯಾ ನಿದೆಂತ್ ವಿಲೀನ್ ಜಾಲ್ಲೊ. ಕಾದಂಬರಿ ಬಂಧ್ ಕರುನ್, ಖಾಟಿಯೆರ್ ಯೇವ್ನ್ ತೆಂ ಬಸ್ಲೆಂ. ನಿದೆಂತ್ ಆಸ್‌ಲ್ಲ್ಯಾ ಘೊವಾಚ್ಯಾ ವೊಂಠಾಂ ವಯ್ರ್ ತಾಚಿ ನದರ್ ಗೆಲಿ. ಸಕಯ್ಲೊ ವೋಂಠ್ ಸುಜ್‌ಲ್ಲೊ. ಕಾನಾಚ್ಯಾ ಪಾಕ್ಲ್ಯಾರ್ ದಾಂತಾಂಚಿ ನಿಶಾನಿ ಆಸ್‌ಲ್ಲಿ. ತಾಚ್ಯಾ ಕುಡಿ ಥಾವ್ನ್ ಸೆಂಟಾಚೊ ವೆಗ್ಳೊಚ್ ಪರ್ಮಳ್ ಯೆತಾಲೊ.

ಭಾವನಾಚೆ ದೊಳೆ ದುಬಾವಾನ್ ಸಂಕುಚಿತ್ ಜಾಲೆ.

’ಮೊಳಾಬ್ ಕೊಸ್ಳೊಂಚ್ಯಾರ್ ಆಸಾ?’ ತಾಚ್ಯಾ ಕುಡಿಂತ್ ತಾಡ್ ವೋಡ್ ಜಾಲಿ. ’ಮ್ಹಾಕಾ ತುವೆಂ ಗಾತ್ ಕೆಲಾಯ್ ಅಜಯ್?"

ಘಡ್ಘಡ್ಯಾ ಝಗ್ಲಾಣ್ಯಾಚೊ ಆವಾಜ್ ಜಾಲೊ. ಎದೊಳ್ ಪರ್ಯಾಂತ್ ಶಾಂತ್ ಆಸ್‌ಲ್ಲೆಂ ಭಾಯ್ಲೆಂ ವಾತಾವರಣ್ ಬಿಗ್ಡೊನ್ ಆಯಿಲ್ಲೆಂ. ಪಾವ್ಸಾಚೆಂ ಯೆಣೆಂ ಜಾಲ್ಲೆಂ. ದೆಖ್ತಾಂ....ದೆಖ್ತಾಂ..... ಶಿರಾಂಧಾರಿಂಚೊ ಪಾವ್ಸ್ ವೊತೊಂಕ್ ಲಾಗ್ಲೊ.

’ತುಫಾನ್ ಯೆಂವ್ಚ್ಯಾರ್ ಆಸಾ?’ ತಾಚೆ ಶರೀರ್ ಕಾಂಪ್ಲೆಂ. ’ಮ್ಹಜ್ಯಾ ಜಿವಿತಾಂತ್‌ಯಿ ತುಫಾನ್ ಯೆಂವ್ಚ್ಯಾರ್ ಆಸಾ?’ ತಾಚೆ ದೊಳೆ ಬಿಜೊನ್ ಆಯ್ಲೆ.

ಅಜಯಾನ್ ನಿದೆಂತ್ ಕೂಸ್ ಪರ್ತಿಲಿ.

’ತುವೆಂ ಮ್ಹಜ್ಯಾ ವಿಶ್ವಾಸಾಚಿ ಹತ್ತ್ಯಾ ಕೆಲ್ಯಾಯ್ ಅಜಯ್?’ ತೆಂ ಪಿಂರ್ಗಾಲೆಂ. ’ಸತಾ ವಯ್ಲೆ ಪಡ್ದೆ ನಿಸ್ರೊಂಚೆನಾಂತ್?’

"ಜ್ಯೋತ್ಸನಾ.." ನಿದೆಂತ್ ಉಲಯ್ಲೊ ಅಜಯ್. "ತುಕಾ ಹಾಂವ್ ವಿಸ್ರೊಂಕ್ ಸಕ್ಚೊಂನಾ. ಐ ಲವ್ ಯೂ ಹನಿ ಬರ್ಡ್" ನಿದೆಂತ್ ಸತ್ ಉಗ್ಡಾಪೆ ಜಾಲ್ಲೆಂ.

’ಸತ್ತ್ಯಾನಾಸ್’ ಭಾವನಾಚ್ಯಾ ಕಾಳ್ಜಾಕ್ ಭಾಲಿ ತೊಪ್ಲಿ.

ಮೊಳಾಬ್ ಕೊಸ್ಳೊನ್ ಪಡ್‌ಲ್ಲೆಂ.

ಭಾವನಾಚ್ಯಾ ಕಾಳ್ಜಾಚೆ ಹಜಾರ್ ಕುಡ್ಕೆ ಜಾಲೆ. ತಾಚೆಂ ಮೊಗಾ ರಾವ್ಳೆರ್ ಕೊಸ್ಳೊನ್ ಪಡ್ಲೆಂ. ತಾಚೊ ರಾಮ್, ರಾವಣ್ ಜಾಲ್ಲೊ. ತಾಚೆಂ ಶರೀರ್ ಆವೇಶಾನ್ ಕಾಂಪ್ಲೆಂ. ಹಾತಾಚ್ಯೊ ಮುಟಿ ಅಂರ್ದಾಲ್ಯೊ. ದಾಂತ್ ಕಡ್ಕಡ್ಲೆ. ದೊಳ್ಯಾಂನಿ ಉಜೊ ದೆಂವ್ಲೊ. ಶಾಂತ್ ಸ್ವಭಾವಾಚ್ಯಾ ಭಾವನಾನ್ ಉಗ್ರ್ ರೂಪ್ ಆಪ್ಣಾಯ್ಲೆಂ. ಭೋವ್ ಕಷ್ಟಾಂನಿ ತೆಂ ಉಟ್ಲೆಂ. ತಕ್ಲೆಕ್ ಗುಂವೊಳ್ ಆಯ್ಲಿ. ಆಧಾರ್ ಚುಕ್‌ಲ್ಲಿ ವಾಲ್ ವ್ಹಡಾ ಕಿಂಕ್ರಾಟೆ ಸವೆಂ ಧರ್ಣಿಕ್ ಶೆವ್ಟಾಲಿ.

ನಿದೆಂತ್ ಆಸ್‌ಲ್ಲೊ ಅಜಯ್ ಝಗ್ಲಣ್ಯಾಚ್ಯಾ ವೇಗಾನ್ ಉಟೊನ್ ಬಸ್ಲೊ. ತಾಚಿ ನದರ್ ಧರ್ಣಿರ್ ಗೆಲಿ. ಭಾವನಾ ಮತಿಹೀನ್ ಜಾವ್ನ್ ಸಕ್ಲಾ ಪಡ್‌ಲ್ಲೆಂ. ನ್ಹೆಸ್‌ಲ್ಲಿ ನಾಯ್ಟಿ ರಗ್ತಾಂತ್ ಬುಡ್‌ಲ್ಲಿ. ತಾಕಾ ಗರ್ಭಸ್ರಾವ್ ಜಾಲ್ಲೊ.

ಲಿಟಲ್ ಬೊಕ್ಸರಾಚೊ ಭ್ರೂಣ್ ಧ್ವಂಸ್ ಜಾಲ್ಲೊ.

ಅಜಯಾಚ್ಯಾ ಕಾಳ್ಜಾಕ್ ಅಘಾತ್ ಜಾಲ್ಲೊ. ವೆಳಾಚೊ ವಿಭಾಡ್ ಕರ್ಚ್ಯಾ ಬದ್ಲಾಕ್ ಲಾಗ್ಶಿಲ್ಯಾ ನರ್ಸಿಂಗ್ ಹೋಮಾಕ್ ತಾಣೆಂ ಟೆಲಿಫೋನ್ ಕೆಲೆಂ.

ದೋನ್ ದಿಸಾಂ ಉಪ್ರಾಂತ್ ನರ್ಸಿಂಗ್ ಹೋಮಾ ಥಾವ್ನ್ ಪಾಟಿ ಆಯಿಲ್ಲ್ಯಾ ಭಾವನಾನ್ ಮೌನ್ ವ್ರತಾ ಆಪ್ಣಾಯಿಲ್ಲಿ. ದೊಡ್ತೊ ಅಘಾತ್ ತಾಚ್ಯಾ ಮತಿಕ್ ಜಾಲ್ಲೊ. ಅಜಯ್ ತಾಕಾ ಸಮ್ಜಯ್ತಾಲೊ, ಬೊಳಾಯ್ತಾಲೊ, ಆರಾಯ್ತಾಲೊ. ಪುಣ್ ಕಸಲಿಚ್ ಪ್ರತಿಕ್ರಿಯಾ ದಿಲಿನಾ ಭಾವನಾನ್.

ತಿಸ್ರೆ ದಿಸಾ ರೂಪ್‌ತಾರಾ ಕೊಲೊನಿಚಿ ವಾಟ್ ಆಪ್ಣಾಯ್ಲಿ ಅಜಯಾನ್.

’ಹಕೀಗತ್ ಹಾಂವ್ ಜಾಣಾ ಜಾತೆಲಿಂ ಅಜಯ್. ತುಂ ಚುಕೊನ್ ಪಡ್ಲಾಯ್ ಜಾಲ್ಯಾರ್ ಭಗ್ಸಾಣೆ ತುಕಾ ಮೆಳ್ಚೆಂನಾ. ತುಜ್ಯಾ ಚುಕಿಕ್ ಶಿಕ್ಶಾ ಜರೂರ್ ಹಾಂವ್ ದಿತೆಲಿಂ.’

ತಾಚೆಂ ಶರೀರ್ ಅಸ್ಕತ್ ಜಾಲ್ಲೆಂ. ಮತಿಕ್ ಆನಿಂ ಕಾಳ್ಜಾಕ್ ಆಘಾತ್ ಜಾಲ್ಲೊ ತರಿ ವಿವೇಕ್ ತಾಣೆಂ ಹೊಗ್ಡಾಯ್ಲೊನಾ. ಘೊವಾಕ್ ತಾಣೆಂ ಸವಲಾಂ ಕೆಲಿಂನಾಂತ್. ಕಾಂಟ್ಯಾನ್ ಕಾಂಟೊ ಕಾಡುಂಕ್ ಫಕತ್ತ್ ವೆಳಾಚೊ ಇಂತ್‌ಜಾರ್ ಆಸ್‌ಲ್ಲೊ.

ಹಫ್ತ್ಯಾ ಉಪ್ರಾಂತ್ ನ್ಹೆಸೊನ್ ತೆಂ ತಯಾರ್ ಜಾಲೆಂ. ಅಜಯ್ ಘರಾ ನಾತ್‌ಲ್ಲೊ. ಪರಿಹಾರಾಚಿ ಖಿಳ್ ಮಾನೆಸ್ತ್ ಹರಿ ಪ್ರಸಾದಾಲಾಗಿಂ ಆಶ್‌ಲ್ಲಿ.

ಹರಿಪ್ರಸಾದ್ ಕನಕ್‌ಪುರಿ ಶಹರಾಚೊ ನಾಂವಾಡ್ದಿಕ್ ಪಿ.ಡಿ. ಜಾವ್ನಾಸ್‌ಲ್ಲೊ.

ಟೆಕ್ಶಿ ಕರುನ್ ತೆಂ ಗಾಂಧಿ ನಗರಾಕ್ ಪಾವ್ಲೆಂ. ದೀಪ್ ಕುಂಚ್ ಪ್ರಸಾದಾಚೆಂ ದಫ್ತರ್ ಆಸ್‌ಲ್ಲೆಂ. ಟೆಕ್ಶಿ ದೀಪ್ ಕುಂಚ್ ಬಿಲ್ಡಿಂಗಾ ಮುಳಾಂತ್ ಯೇವ್ನ್ ಥಾಂಬ್ಲಿ. ಬಾಡೆಂ ಫಾರಿಕ್ ಕರುನ್ ಲಿಫ್ಟಾ ತೆವ್ಶಿನ್ ಚಮ್ಕಾಲೆಂ ಭಾವನಾ.

ಲಿಫ್ಟ್ ಸಾತ್ವ್ಯಾ ಮಾಳಿಯೆರ್ ಪಾವ್ಲಿ. ಕೊರಿಡಾರಾಚ್ಯಾ ಪೊಂತಾರ್ ಆಸ್‌ಲ್ಲೆಂ ಹರಿ ಪ್ರಸಾದಾಚೆಂ ದಫ್ತರ್. ರಿಶೆಪ್ಶನ್ ಚಲಿಯೆನ್ ವ್ಯವಹಾರಿಕ್ ಹಾಸ್ಯಾಂ ಸವೆಂ ಸ್ವಾಗತ್ ಮಾಗ್ಲೊ.

"ಮಿಸ್ಟರ್ ಹರಿ ಪ್ರಸಾದಾ ಸವೆಂ ಎಪೊಂಯ್ಟ್‌ಮೆಂಟ್ ಫಿಕ್ಸ್ ಜಾಲಾಂ". ಸೋಫಾಚೆರ್ ಬಸ್ಕಾ ಆಪ್ಣಾಯ್ಲಿ ಭಾವನಾನ್. "ಏಕ್ ಗ್ಲಾಸ್ ಥಂಡ್ ಉದಾಕ್ ಮೆಳಾತ್?"

"ಶುವರ್" ಕೌಂಟರಾ ಪಾಟ್ಲೆಂ ಬಾಗಿಲ್ ಲೊಟುನ್ ಚಿತ್ಳಾ ವೆಗಾನ್ ಧಾಂವ್ಲಿ ಚಲಿ.

ಭಾವನಾನ್ ಮ್ಯಾಗಝಿನಾಚಿಂ ಪಾನಾಂ ಪರ್ತಿಲಿಂ.

"ಮೇಡಮ್" ಚಲಿ ಹಾಜರ್ ಜಾಲಿ.

"ಥೆಂಕ್ ಯೂ" ಉದ್ಕಾಚೊ ಗ್ಲಾಸ್ ಘೆತ್ಲೊ ಭಾವನಾನ್.

ಚಲಿ ಫಕತ್ತ್ ಹಾಸ್ಲಿ.

ಭೋವ್ ಸವ್ಕಾಸಾಯೆನ್ ಉದಾಕ್ ಪಿಯೆಂವ್ಕ್ ಲಾಗ್ಲೆಂ ಭಾವನಾ. ಚಲಿ ಇಂಟರ್‌ಕೊಮಾರ್ ಮಗ್ನ್ ಜಾಲ್ಲಿ.

"ಫಕತ್ತ್ ಪಾಂಚ್ ಮಿನುಟಾಂ" ಚಲಿಯೆನ್ ಇಂಟರ್‌ಕೊಮ್ ಬಂಧ್ ಕೆಲೆಂ. "ಎಕ್ಲೊ ಮಾನೆಸ್ತ್ ಬಿತರ್ ಆಶಾ".

"ಪರ್ವಾ ನಾ" ಭುಜಾಂ ಉಡಯ್ಲಿಂ ಭಾವನಾನ್. "ಮಾಕಾ ದರ್ವಡ್ ನಾ"

ಚಲಿ ಪರತ್ ಹಾಸ್ಲಿ.

"ಸೊಭಾಯೆ ಸವೆಂ ಸೊಭಿತ್ ಹಾಸೊ ಆಸಾತ್ ತುಜ್ಯೆಲಾಗಿಂ" ಭಾವನಾಚ್ಯಾ ಮುಖಮಳಾರ್ ಜಾಯ್ತ್ಯಾ ದಿಸಾಂ ಉಪ್ರಾಂತ್ ಹಾಸೊ ಉದೆಲ್ಯೊ. "ಕೊಣ್ ತರಿ ಆಸಾ ತುಜ್ಯಾ ಜಿವಿತಾಂತ್?"

"ಎದೊಳ್ ಪರ್ಯಾಂತ್ ನಾ" ಚೆಡುಂ ಲಜೆಲೆಂ

"ಕಿತೆಂ ನಾಂವ್ ತುಜೆಂ?"

"ನಿಮಿತಾ"

"ಮೊಗಾರ್ ಪಡೊನ್ ಕಾಜಾರ್ ಜಾಯ್ನಾಕಾ ನಿಮಿತಾ. ಕಿತ್ಯಾಕ್ ಮೊಗಾಂತ್ ಫುಲಾಸವೆಂ ಕಾಂಟೆ ಆಶಾತ್. ಕಾಂಟೆ ತೊಪ್ತಾನಾ ಜಾಂವ್ಚಿ ದೂಕ್ ಅತೀ ಮಾರೆಕಾರ್ ಜಾವ್ನಾಸಾ"

"ಮೊಗಾಚೆಂ ದುಸ್ರೆಂ ರೂಪ್ ತ್ಯಾಗ್ ಜಾವ್ನಾಸಾ" ಚಲಿಯೆಚಿಂ ಬೊಟಾಂ ಕೀ ಬೋರ್ಡಾ ವಯ್ರ್ ಚರೊಂಕ್ ಲಾಗ್ಲಿಂ. "ಕಾಂಟ್ಯಾಚೊ ದ್ವೇಷ್ ಕೆಲ್ಯಾರ್ ಫುಲಾಕ್ ಲುಕ್ಸಾಣ್ ಜಾತೆಲೆಂ ಶಿವಾಯ್ ಕಾಂಟ್ಯಾಕ್ ನಹಿಂ"

ಚಲಿಯೆಚ್ಯಾ ಉತ್ರಾಂನಿ ವಜನ್ ಆಸ್‌ಲ್ಲೆಂ.

ಭಾವನಾನ್ ಉತ್ರಾಂ ವಿಂಚ್ಚ್ಯಾ ಪಯ್ಲೆಂಚ್ ಉಜ್ವ್ಯಾ ಕುಶಿಚೆಂ ದಾರ್ ಉಗ್ತೆಂ ಜಾಲೆಂ. ಸೂಟ್ ನ್ಹೆಸ್‌ಲ್ಲೊ ಎಕ್ಲೊ ಮಾನಾಯ್ ಭಾಯ್ರ್ ಆಯ್ಲೊ. ಏಕ್ ಉಡ್ತಿ ನದರ್ ಭಾವನಾ ವಯ್ರ್ ಗೆಲಿ ತ್ಯಾ ಮಾನಾಯಾಚಿ. ತ್ಯಾ ನದ್ರೆಂತ್ ತಿರಸ್ಕಾರ್ ಆಸ್‌ಲ್ಲೊ. ನಿಮಿತಾಚೆಂ ಮುಸ್ಕಾರ್ ಸಯ್ತ್ ಪಳೆನಾಸ್ತಾಂ ದಫ್ತರಾ ಥಾವ್ನ್ ಭಾಯ್ರ್ ಗೆಲೊ.

"ವಿಚಿತ್ರ್ ಮನಿಸ್" ನಿಮಿತಾನ್ ನಾಕ್ ಮೊಡ್ಲೆಂ. "ಬಾಯ್ಲೆಚಿ ಚರಿತ್ರಾ ಜಾಣಾ ಜಾಲ್ಯಾ ಉಪ್ರಾಂತ್ ಸ್ತ್ರೀ ಸಂತತಿಕ್ ಕಾಂಠಾಳೊಂಕ್ ಲಾಗ್ಲಾ."

"ಕಾಂಟೆ ತೊಪ್ತಾನಾ ಜಾಂವ್ಚಿ ದೂಕ್ ಅತೀ ಮಾರೆಖಾರ್ ಜಾವ್ನಾಸಾ" ಭಾವನಾ ಉಟೊನ್ ಉಭೆಂ ಜಾಲೆಂ. "ಮಾನೆಸ್ತ್ ಹರಿ ಪ್ರಸಾದಾಕ್ ಹಾಂವೆಂ ಮೆಳ್ಯೆತ್?"

"ಎಸ್ ಶುವರ್"

"ಬಾಗಿಲ್ ಲೊಟುನ್ ಬಿತರ್ ಪ್ರವೇಶ್ ಜಾಲೆಂ ಭಾವನಾ"

"ಬಸ್ಕಾ ಸ್ವೀಕಾರ್ ಕರ್ ಮಿಸೆಸ್ ಭಾವನಾ" ಹಿಶಾರೊ ಕೆಲೊ ಮಾನಾಯಾನ್. "ಕನಕ್‌ಪುರಿ ಶಹರಾಚೊ ಪ್ರಾಯ್ವೆಟ್ ಡಿಟೆಕ್ಟಿವ್ ತುಮ್ಚ್ಯಾ ಸೆವೆಕ್ ಆಯ್ತೊ ಆಸಾ"

ಭಾವನಾನ್ ಬಸ್ಕಾ ಆಪ್ಣಾಯ್ಲಿ.

"ಪಯ್ಲ್ಯಾ ಸುವಾತೆರ್..." ವ್ಯಾನಿಟಿ ಬೆಗ್ ಉಗ್ತೆಂ ಕೆಲೆಂ ಭಾವನಾನ್. "ಘುಟ್ ಸಾಂಬಾಳ್ತೊಲೊಯ್ ಮ್ಹಳ್ಳೆಂ ವಚನ್ ತುವೆಂ ದೀಂವ್ಕ್ ಆಸಾ"

"ಹ್ಯಾ ದಫ್ತರಾ ಥಾವ್ನ್ ಕಸಲೆಚ್ ಘುಟ್ ಎದೊಳ್ ಪರ್ಯಾಂತ್ ಲೀಕ್ ಜಾಂವ್ಕ್ ನಾಂತ್" ನಾಕಾ ಪರ್ಯಾಂತ್ ದೆಂವ್‌ಲ್ಲೆಂ ವೊಕ್ಲ್ ಸಾರ್ಕೆಂ ಕೆಲೆಂ ಪಿ.ಡಿ.ನ್. "ತುವೆಂ ಸುಢಾಳ್ ಉಲವ್ಯೆತ್"

"ಮ್ಹಾಕಾ ತುಜ್ಯಾ ಉತ್ರಾಂ ವಯ್ರ್ ಪಾತ್ಯೆಣಿ ಆಸಾ" ಬೆಗ್ ಉಗ್ತೆಂ ಕರುನ್ ಅಜಯಾಚಿ ತಸ್ವೀರ್ ಭಾಯ್ರ್ ಕಾಡ್ಲಿ. "ದೊಲಕ್‌ಪುರ್ ಪಾವ್ಲ್ಯಾ ಉಪ್ರಾಂತ್ಲಿ ಚರಿತ್ರಾ ಜಾಯ್ ಮ್ಹಾಕಾ ಹ್ಯಾ ಮನ್ಶ್ಯಾಚಿ."

"ಮಿಸ್ಟರ್ ಛಾಂಪಿಯನ್?" ಉದ್ಗಾರ್ಲೊ ಹರಿಪ್ರಸಾದ್.

ಭಾವನಾನ್ ಮೌನ್ ಸಾಂಬಾಳ್ಳೆಂ.

"ಕಿತೆಂ ವಾಯ್ಟ್ ಕೆಲಾಂ ಹ್ಯಾ ಬೊಕ್ಸರಾನ್?"

"ತೆಂ ಸೊಧುನ್ ಕಾಡ್ಚೆಂ ಕಾಮ್ ತುಜೆಂ ಜಾವ್ನಾಸಾ"

"ಖತಾಂ ಆಸಾತ್ ಹ್ಯಾ ಬೊಕ್ಸರಾಚ್ಯಾ ಜಿವಿತಾಂತ್?"

"ಹಾಂವ್ ಜಾಣಾಂ ಆಸ್‌ಲ್ಲಿ ತರ್.... ತುಜಿ ಮ್ಹಾಕಾ ಗರ್ಜ್ ಆಸ್‌ಲ್ಲಿ ಮಿ! ಡಿಟೆಕ್ಟಿವ್?"

"ತೊ ತುಜೊ ಪತಿ ಜಾವ್ನಾಸಾ. ರಾಯ್ಟ್?"

"ತುವೆಂ ಸತ್ ಉಚಾರ್ಲೆಂಯ್"

"ನಿತಳ್ ಪಡ್ದ್ಯಾ ವಯ್ರ್ ಖತಾಂ ಆಸ್ಲ್ಯಾರ್.....ತುಂ ದುಃಖೆಸ್ತ್ ಜಾತೆಲಿಯ್ ಮಿಸೆಸ್ ಬಾರ್ಗವ್"

"ಮ್ಹಾಕಾ ಅಜಯ್ ಭಾರ್ಗವಾಚಿ ಚರಿತ್ರಾ ಜಾಯ್ ದುಡ್ವಾಚಿ ಮೊಟಿ ಆಟ್ಟಿ ದುಸ್ರ್ಯಾ ಫುಡೆಂ ಗಳಯ್ಲಿ. ಕಿತ್ಲೆಂ ದೀಸ್ ಲಾಗ್ತೆಲೆ?"

"ಜಾಂವ್ಕ್ ಪುರೊ ಎಕಾ ದಿಸಾನ್. ಜಾಂವ್ಕ್ ಪುರೊ ಎಕಾ ದಿಸಾನ್. ಜಾಂವ್ಕ್ ಪುರೊ ಎಕಾ ಹಪ್ತ್ಯಾನ್......ಪಿ.ಡಿ.ಚೆ ದೊಳೆ ಫಳ್ಫಳ್ಳೆ. ಕಿತ್ಲೆ ಆಸಾತ್?"

"ಪಾಂಚ್ ಹಜಾರ್. ಉರ್‌ಲ್ಲೊ ಐವಜ್ ಕಾಮ್ ಸಂಪ್ಲ್ಯಾ ಉಪ್ರಾಂತ್."

"ನೊ ಪ್ರೊಬ್ಲೆಮ್"

ಭಾವನಾ ಉಟೊನ್ ಉಭೆಂ ಜಾಲೆಂ.

***********

ತಿಸ್ರ್ಯಾ ದಿಸಾ ಪಿ.ಡಿ.ಚೆಂ ಆಪವ್ಣೆಂ ಆಯ್ಲೆಂ.

ಅರ್ಧ್ಯಾ ವರಾ ಬಿತರ್ ಭಾವನಾ ದಫ್ತರಾಕ್ ಪಾವ್‌ಲ್ಲೆಂ. ತಾಚೆಂ ಕಾಳಿಜ್ ಬೊರಿಯಾಂಕ್ ಖೊಟಾಯ್ತಾಲೆಂ. ’ಲಗ್ನಾ ಬಾಂಧ್ ಸುತಾಚೆರ್ ಉಮ್ಕಾಳೋಂಕ್ ಸೊಡಿನಾಕಾ ಪ್ರಭು’ ಅಪಧಯ್ರಾನ್ ದುಸ್ರ್ಯಾ ಫುಡೆಂ ಬಸ್ಕಾ ಆಪ್ಣಾಯ್ಲಿ.

ಹರಿ ಪ್ರಸಾದಾನ್ ಟಾಯ್ಪ್ ಕೆಲ್ಲೆಂ ಕಾಗಾದ್ ಭಾವನಾಕ್ ದಿಲೆಂ. ಚರಿತ್ರಾ ಹ್ಯಾ ಕಾಗ್ದಾರ್ ಆಸಾ.

ಕಾಗದ್ ಧರ್‌ಲ್ಲೊ ಹಾತ್ ಕಾಂಪ್ಲೊ. ವಿವರ್ ವಾಚ್ಲೊ ಭಾವನಾನ್. ತಾಚ್ಯಾ ಮಾತ್ಯಾಕ್ ಘಡ್ಘಡೆ ಮಾರ್ಲೆ. ಸಂಸಾರ್ ರಭಸಾನ್ ಗುಂವೊಂಕ್ ಲಾಗ್ಲೊ. ತಾಚ್ಯಾ ದೊಳ್ಯಾಂನಿ ದುಃಖಾಂ ಉದೆಲಿಂ. ನಿತಳ್ ಪಡ್ದೊ ಮೆಳ್ಕುಟೊ ಜಾಲ್ಲೊ.

ಅಜಯ್ ಭಾರ್ಗವ್ ನಾಗ್ಡೊ ಜಾಲ್ಲೊ.

"ಸುಣ್ಯಾಚೊ ಮೋಗ್ ಕರುನ್ ಕಾಜಾರ್ ಹಾಂವ್ ಜಾಲ್ಲಿಂ. ರಾಂಡೆಚ್ಯಾ ಪುತಾನ್ ಮ್ಹಾಕಾ ಘಾತ್ ಕೆಲೊ" ಮೆಜಾಕ್ ಮೂಟ್ ಮಾರ್ಲಿ ಭಾವನಾನ್. "ತಾಚೆಂ ಜಿವಿತ್ ಹಾಂವ್ ತೀನ್ ತಿರ್ಕುಟ್ ಕರ್ತೆಲಿಂ" ದುಃಖಾಂ ಪುಸ್ಲಿಂ ಭಾವನಾನ್.

ಹರಿಪ್ರಸಾದ್ ಮೌನ್ ಜಾಲ್ಲೊ.

"ಬಾಕಿಚೊ ಐವಜ್ ತುವೆಂ ವಿಚಾರ್‍ಯೆತ್ ಮಾನೆಸ್ತಾ"

"ತುಜೊ ಲಗ್ನಾ ಬಾಂದ್ ಶಾಬಿತ್ ಉರೊಂದಿ" ಚುರ್ಚುರೆ ಉಚಾರ್ಲೆ ಪಿ.ಡಿ.ನ್. "ವಾಟ್ ತೊ ಚುಕ್ಲಾ ವ್ಹಯ್. ತಾಕಾ ಭಗ್ಶಿ. ತಾಕಾ ಸಮ್ಜಾಯ್. ತಾಕಾ ಆಪ್ಣಾಯ್"

"ಬಾಕಿಚೊ ಐವಜ್ ತುವೆಂ ವಿಚಾರ್‍ಯೆತ್"

"ಫಕತ್ತ್ ಪಾಂಚ್ ಹಜಾರ್"

ಭಾವನಾನ್ ದುಡು ದುಸ್ರ್ಯಾಕ್ ದಿಲೊ.

ತೆಂ ಉಟೊನ್ ಹಾಂವ್ ದೇವಿ ನಹಿಂ ತಾಕಾ ಭಗ್ಸುಂಕ್" ತೆಂ ವಚೊಂಕ್ ಘುಂವ್ಲೆಂ. "ತುಜ್ಯಾ ವಚನಾಂತ್ ತುವೆಂ ಥಿರ್ ರಾವೊಂಕ್ ಆಸಾ"

"ಘುಟ್ ಹ್ಯಾ ದಫ್ತರಾಂತ್ ದಫನ್ ಜಾಲ್ಯಾತ್ ಮಿಸೆಸ್ ಭಾರ್ಗವ್"

"ಆಯ್ಕೊನ್ ಖುಶಿ ಜಾಲಿ" ಉತ್ರಾಂ ಸವೆಂ ದಫ್ತರಾ ಥಾವ್ನ್ ಭಾಯ್ರ್ ಚಮ್ಕಾಲೆಂ ಭಾವನಾ.

*****

"ತುಕಾ ಹಾಂವ್ ಭಗ್ಸುಂಚಿ ನಾ" ಕಾಗದ್ ಚೂರಾನ್ ಚೂರ್ ಕೆಲೆಂ ಭಾವನಾನ್. "ಕಾನೂನಾಚ್ಯಾ ನಾಕಾ ಪಂದಾ ಏಕ್ ಬಿರಾಂಕುಳ್ ರಗ್ತಾಳೊ ಖೆಳ್ ಹಾಂವ್ ಖೆಳ್ತೆಲಿಂ" ಕಾಗ್ದಾಚೆ ಕುಡ್ಕೆ ಉಜ್ಯಾ ವಯ್ರ್ ಉಡಯ್ಲೆ. "ಜ್ಯೋತ್ಸನಾ ಗುಪ್ತಾಚಿ ಗೊಮ್ಟಿ ಹಾಂವ್ ಲುಂವ್ತೆಲಿಂ. ಖುನ್ ಹಾಂವ್ ಕರ್ತೆಲಿಂ. ಪುಣ್ ಜಯ್ಲಾಕ್ ತುಂ ವೆತೊಲೊಯ್ ಅಜಯ್"

ತೆಂ ಖೆಳಾಕ್ ಆಯ್ತೆಂ ಜಾಲೆಂ.

ಲುವಾಂ,. ನಿದೆಚ್ಯೊ ಗುಳಿಯೊ ಆನಿಂ ತೇಜ್ ಧಾರೆಚಿ ಚುರಿ ತಾಕಾ ಜಾಯ್ ಆಸ್‌ಲ್ಲಿ. ತೀನ್‌ಯಿ ವಸ್ತು ಆರಾಮಾಯೆನ್ ತಾಣೆಂ ಆಪ್ಣಾಯ್ಲ್ಯೊ.

ಜೆವ್ಣಾ ಉಪ್ರಾಂತ್ ದೂಧ್ ಪಿಯೆಂವ್ಚಿ ಸವಯ್ ಆಸ್‌ಲ್ಲಿ ಅಜಯಾಕ್. ದುಬಾವಾಕ್ ಇಡೆಂ ದಿಲೆಂನಾ ಭಾವನಾನ್. ಸದಾಂಚೊ ಮ್ರಧು ಸ್ವಭಾವ್ ತಾಣೆಂ ಆಪ್ಣಾಯಿಲ್ಲೊ.

ನಿದೆಚ್ಯಾ ಗುಳಿಯಾಂಚೊ ಪಿಟೊ ದೂಧಾಂತ್ ಭರ್ಸುನ್, ಗ್ಲಾಸ್ ಅಜಯಾಕ್ ದಿಲೊ. "ಮೊರಾ ಪರ್ಯಾಂತ್ ಆಮ್ಚೆಂ ಜಿವಿತ್ ದೂಧಾ ಭಾಶೆನ್ ನಿತಳ್ ಉರೊಂದಿ ಆಂಗಾಚಿ ವೋಳ್ ಕಾಡ್ಲಿ ಭಾವಾನಾನ್. "ತುಂ ಮ್ಹಜೊ ದೇವ್ ಜಾವ್ನಾಸಾಯ್" ತಾಚ್ಯಾ ಉತ್ರಾಂನಿ ಮ್ಹೊಂವ್ ಆಸ್‌ಲ್ಲೆಂ. "ಮ್ಹಜೊ ಪತಿ ಸದಾಂಚ್ ರಾಮ್ ಜಾವ್ನ್ ಉರೊಂದಿ"

"ರಾಮ್ ಆಣಿಂ ಸೀತಾಚ್ಯಾ ಜಿವ್ತಾಂತ್ ತಿಸ್ರೊ ಎಕ್ಲೊ ಆಸ್‌ಲ್ಲೊ" ಗ್ಲಾಸ್ ಖಾಲಿ ಕೆಲೊ ಅಜಯಾನ್.

"ತೊ ಲಕ್ಶ್ಮಣ್ ಜಾವ್ನಾಸ್‌ಲ್ಲೊ" ನಾಯ್ಟಿಚೆ ಭುತಾಂವ್ ಮೆಕ್ಳೆ ಕೆಲೆ ಭಾವನಾನ್. "ತಾಣೆಂ ಏಕ್ ರೇಖಾ ಘಾಲ್ಲಿ ಸೀತಾಕ್.

"ರಾವಣಾ ಥಾವ್ನ್ ಬಚಾವ್ ಜಾಂವ್ಚ್ಯಾ ಖಾತಿರ್" ದೊಳ್ಯಾಂ ಮುಖಾರ್ ಹಾತ್ ಭಂವ್ಡಾಯ್ಲೊ ಆಜಯಾನ್. "ಲಕ್ಷ್ಮಣ್ ರೇಖಾ ಫಕತ್ತ್ ಸ್ತ್ರೀಯಾಂಕ್ ಲಾಗು ಜಾತಾ ನಹಿಂ? ತೊ ಕುರ್ವೊಂಕ್ ಲಾಗ್ಲೊ.

"ದಾದ್ಲ್ಯಾಂಚ್ಯಾ ಸಮಾಜೆಂತ್ ದಾದ್ಲ್ಯಾಕ್ ವಿಚಾರ್ತಾಲೊ ಕೊಣ್ ಆಸಾ?" ನಾಯ್ಟಿ ಮೆಕ್ಳಿ ಕೆಲಿ ಭಾವನಾನ್. "ಮ್ಹಜ್ಯಾ ಶರೀರಾಕ್ ಉಜೊ ಲಾಗ್ಲಾ ಅಜಯ್. ಆಯ್ಚ್ಯಾ ರಾತಿಂ ತುಂ ಮ್ಹಾಕಾ ನಿರಾಶಿ ಕರಿನಾಕಾ"

"ಮ್ಹಾಕಾ ನೀದ್ ಯೆತಾ ಡಾರ್ಲಿಂಗ್" ತೊ ಖಾಟಿಯೆರ್ ಗಳ್ಳೊ. "ಸೊರ್ರಿ ಸ್ವೀಟ್ ಹಾರ್ಟ್" ತಾಚೆ ದೊಳೆ ಬಂಧ್ ಜಾವ್ನ್ ಆಯ್ಲೆ. ನಿದೆನ್ ತಾಕಾ ಆಪ್ಲ್ಯಾ ವೆಂಗೆಂತ್ ಘೆತ್ಲೊ.

ಭಾವನಾಚ್ಯಾ ಮುಸ್ಕಾರಾರ್ ಕ್ರೂರ್ ಹಾಸೊ ಉದೆಲ್ಯೊ. ಲಿಪಯಿಲ್ಲಿಂ ಲುಂವಾಂ ಹಾತಾಕ್ ಶಿರ್ಕಾಯ್ಲಿ.

ದೋನ್‌ಯಿ ಹಾತಾಕ್ ಲುವಾಂ ಶಿರ್ಕಾಯ್ಲ್ಯಾ ಉಪ್ರಾಂತ್ ನಾಯ್ಟಿ ತೆಂ ಪರತ್ ನ್ಹೆಸ್ಲೆಂ. ಕಬಾಟಾ ಪಾಟ್ಲ್ಯಾನ್ ಲಿಪಯಿಲ್ಲಿ ತೇಜ್ ಚುರಿ ಭಾಯ್ರ್ ಕಾಡುನ್, ಚುರಿಯೆಚೊ ಹಾತಾಳೊ ಲುಗ್ಟಾನ್ ಪುಸುನ್, ಚುರಿಯೆಚೊ ಹಾತಾಳೊ ಲುಗ್ಟಾನ್ ಪುಸುನ್, ಚುರಿಯೆಚೊ ಹಾತಾಳೊ ಅಜಯಾಚ್ಯಾ ಉಜ್ವ್ಯಾ ಹಾತಾಕ್ ದಿಲೊ. ಹಾತಾಳ್ಯಾ ವಯ್ರ್ ಬೊಟಾಂ ಅಂರ್ಧಿಲಿಂ.

"ಮೇಯರಾಚ್ಯಾ ಬಾಯ್ಲೆಚಿ ಖುನ್ ಹ್ಯಾ ಹಾತೆರಾನ್ ಜಾತೆಲಿ" ಚುರಿ ಕಾಗ್ದಾಂತ್ ಗುಟ್ಲಾವ್ನ್ ಪಯ್ಲೆಂಚ್ಯಾ ಜಾಗ್ಯಾರ್ ಲಿಪಯ್ಲಿ. "ಎಕಾ ವಿ.ಐ.ಪಿ. ಮನ್ಶ್ಯಾಚ್ಯಾ ಬಾಯ್ಲೆಚ್ಯಾ ಖುನಿಗಾರಾಕ್ ಕಾನೂನ್ ಸಾತ್ ವರ್ಸಾಂಚಿ ಶಿಕ್ಷಾ ದಿಂವ್ಚಿನಾ. ಫಾಶಿಯೆಚಿ ಶಿಕ್ಷಾ ಜರೂರ್ ತುಕಾ ಜಾತೆಲಿ"

ರಗ್ತಾಳ್ಯಾ ಖೆಳಾಚೊ ಪಯ್ಲೊ ಹಂತ್ ಸಂಪ್‌ಲ್ಲೊ.

***********

ರೂಪ್‌ತಾರಾ ಕೊಲೊನಿಚ್ಯಾ ಪಾರ್ಕಿಂಗಾಂತ್ ಟಾಟಾ ಸುಮೊ ಉಭೆಂ ಕೆಲೆಂ ಅಜಯಾನ್.

ಪಾಟ್ಲ್ಯಾನ್ ಕರುನ್ ಆಯಿಲ್ಲ್ಯಾ ಭಾವನಾನ್ ಮಾರುತಿಕ್ ರೂಕಾ ಮುಳಾಂತ್ ಉಭೆಂ ಕೆಲೆಂ. ಡ್ರಾಯ್ವಿಂಗ್ ಸಿಟಿರ್ ಬಸ್‌ಲ್ಲ್ಯಾ ತಾಚಿ ನದರ್ ರೂಪ್‌ತಾರಾ ಕೊಲೊನಿಚ್ಯಾ ಜಯ್ತ್ ಗೇಟಿ ವಯ್ರ್ ಖಂಚೊನ್ ರಾವ್ಲಿ. ಪಾಂಚ್ ಮಾಳಿಯಾಂಚಿಂ ಇಕ್ರಾ ಬಾಂದ್ಪಾಂ ತ್ಯಾ ಕೊಲೊನಿಂತ್ ಆಸ್‌ಲ್ಲಿ. ತಾಚಿ ಶಿಕಾರಿ ದುಸ್ರ್ಯಾ ಬಾಂಧ್ಪಾಚ್ಯಾ ಪಯ್ಲ್ಯಾ ಮಾಳಿಯೆರ್ ಫ್ಲೆಟ್ ನಂಬರ್ ೧೩-ತ್ ಆಸ್‌ಲ್ಲಿ.

ಭಾಯ್ರ್ ವೆಚ್ಯಾ ವೆಳಾರ್ ಸದಾಂಚ್ ಸಾಡಿ ನ್ಹೆಸ್ಚೆಂ ಭಾವನಾ ಹ್ಯಾ ವೆಳಾರ್ ಸಲ್ವಾರ್ ಖಮೀಜಾರ್ ಆಸ್‌ಲ್ಲೆಂ. ಶೆಂಡ್ಯಾ ಬದ್ಲಾಕ್ ಲಾಂಭ್ ಕೇಸ್ ಉಗ್ತೆಚ್ ಪಾಟಿರ್ ಸೊಡ್‌ಲ್ಲೆ. ನಾಕಾಕ್ ನೊತಿಂ ಆನಿಂ ಖಾಡ್ಕೆಚ್ಯಾ ಪೊಂತಾರ್ ಕಾಳೊ ತಿಳೊ ಲಾಯಿಲ್ಲೊ.

’ತುವೆಂ ಮ್ಹಾಕಾ ಘಾತ್ ಕರುಂಕ್ ನಾತ್‌ಲ್ಲೊಯ್ ತರ್, ಹ್ಯಾ ರಗ್ತಾಳ್ಯಾ ಖೆಳಾಚಿ ಗರ್ಜ್ ಆಸ್‌ಲ್ಲಿ?’ ತಾಚೊ ಹಾತ್ ಬೆಗ್ ಪೊಶೆಂವ್ಕ್ ಲಾಗ್ಲೊ. "ಏಕ್ ಹತ್ತ್ಯಾ ಏಕ್ ಫಾಶಿ ಕಾನೂನಾಚ್ಯಾ ನಾಕಾ ಪಂದಾ ಜಾತೆಲಿ’.

ಪಾಂಚ್ ಮಿನುಟಾಂ ಉಪ್ರಾಂತ್ ಮೊಬಾಯ್ಲಾ ವಯ್ಲಿಂ ನಂಬ್ರಾಂ ಧಾಂಬ್ಲಿಂ ಭಾವನಾನ್. ಲಾಯ್ನಿರ್ ಅಜಯ್ ಆಸ್‌ಲ್ಲೊ. "ಅಜಯ್......ಅಜಯ್" ತಾಚ್ಯಾ ತಾಳ್ಯಾಂತ್ ಭಿರಾಂತ್ ಆಸ್‌ಲ್ಲಿ. "ಖಂಯ್ ಆಸಾಯ್ ತುಂ?"

"ದಫ್ತರಾಂತ್ ಆಸಾಂ" ಫಟ್ ಮಾರ್ಲಿ ಅಜಯಾನ್. "ಪಾಟ್ನರಾ ಸವೆಂ ಮೀಟಿಂಗಾರ್ ಆಸಾಂ. ಕಿತೆಂ ಜಾಲಾಂ ತುಕಾ? ಕಿತ್ಯಾಕ್ ಬಿಯೆಲಾಂಯ್?" ತಾಚ್ಯಾ ತಾಳ್ಯಾಂತ್ ಕರ್ಕರೆ ಆಸ್‌ಲ್ಲೆ.

"ಗುಂಡಾಚ್ಯಾ ಆಕ್ರಮಣಾಕ್ ಹಾಂವ್ ಸಾಂಪಡ್ಲ್ಯಾಂ" ಭಾವನಾ ರಡೊಂಕ್ ಲಾಗ್ಲೆಂ. "ಮ್ಹಜೊ ಜೀವ್ ಆನಿಂ ಮರ್‍ಯಾದ್ ರಿಸ್ಕೆರ್ ಆಶಾ"

"ಫ್ಲೆಟಾ ಬಿತರ್ ತೆ ಕಶೆ ರಿಗ್ಲೆ? ಬಾಗಿಲ್ ಕಿತ್ಯಾಕ್ ಉಗ್ತೆಂ ಕೆಲೆಂಯ್?" ಅಜಯಾಚ್ಯಾ ತಾಳ್ಯಾಂತ್ ಆಕಾಂತ್ ಆಸ್‌ಲ್ಲೊ. "ಫ್ಲೆಟಾ ಥಾವ್ನ್ ಭಾಯ್ರ್ ಧಾಂವ್ಚೆಂ ಪ್ರಯತ್ನ್ ಕರ್. ಕಿಂಕ್ರಾಟ್ಯೊ ಮಾರ್. ಸೆಜಾರಿ ತುಜ್ಯಾ ಕುಮ್ಕೆಕ್ ಯೆತೆಲೆ."

"ಫ್ಲೆಟಾ ಬಿತರ್ ತೆ ರಿಗೊಂಕ್ ನಾಂತ್ ಅಜಯ್" ಖಿಳಂಚ್ಲೆಂ ಭಾವನಾ. "ತುಂ ಗೆಲ್ಯಾ ಉಪ್ರಾಂತ್ ಶೊಪಿಂಗಾಕ್ ಹಾಂವ್ ಭಾಯ್ರ್ ಸರ್‌ಲ್ಲಿಂ. ಮೌಂಟ್ ಪ್ಲಾಜಾಚ್ಯಾ ಅಂಡರ್ ಗ್ರಾಂವ್ಡ್ ಪಾರ್ಕಿಗಾಂತ್......ಓಹ್ ಅಜಯ್ ತೆ ಲಾಗಿಂ ಸರೊನ್ ಆಸಾತ್. ತಾಂಚೊ ಇರಾದೊ ಸಾರ್ಕೊ ನಾ. ಪ್ಲೀಜ್ ಹೆಲ್ಪ್ ಮಿ ಅಜಯ. "ಪ್ಲೀಜ್....ಪ್ಲೀಜ್" ಏಕ್ ನಿಮಾಣಿ ಕಿಂಕ್ರಾಟ್ ಮಾರುನ್ ಮೊಬಾಯ್ಲಾಚಿ ಲಾಯ್ನ್ ಕಾತರ್ಲಿ ಭಾವನಾನ್. ತೆಂ ತಾಚ್ಯಾ ನಟನಾಂತ್ ಜಿಕ್‌ಲ್ಲೆಂ.

ದೋನ್‌ಚ್ ಮಿನುಟಾಂನಿ ಪರಿಣಾಮ್ ಫುಡೆಂ ಆಯ್ಲೊ.

ರೂಪ್‌ತಾರಾ ಕೊಲೊನಿಚ್ಯಾ ಜಯ್ತ್ ಗೇಟಿಂತ್ಲ್ಯಾನ್ ಟಾಟಾ ಸುಮೊ ಭಾಯ್ರ್ ಆಯ್ಲೆಂ ಆನಿಂ ವಾರ್‍ಯಾ ವೇಗಾನ್ ಕಾತ್ರುನ್ ಪಾಶಾರ್ ಜಾವ್ನ್ ಗೆಲೆಂ.

ಮಾರುತಿ ಥಾವ್ನ್ ಭಾಯ್ರ್ ಆಯ್ಲೆಂ ಭಾವನಾ. ತಾಚಿ ಮ್ರತ್ಯು ಶಿಕಾರಿ ಫಕತ್ತ್ ಥೊಡ್ಯಾ ಮಿನುಟಾಂಚ್ಯಾ ಅಂತರಾರ್ ಆಸ್‌ಲ್ಲಿ. ವೆಳಾಚೊ ಅಭಾವ್ ಆಸ್‌ಲ್ಲೊ ತಾಚೆಲಾಗಿಂ. ಅಮ್ಸರಿ ಮೆಟಾಂ ಕಾಡುನ್ ಕೊಲೊನಿಕ್ ತೆಂ ಪಾವ್ಲೆಂ. ಗೇಟಿರ್ ವೊಚ್‌ಮೆನ್ ನಾತ್‌ಲ್ಲೊ. ದುಸ್ರ್ಯಾ ಬಾಂದ್ಪಾಲಾಗಿಂ ಪಾವ್ಲ್ಯಾ ಉಪ್ರಾಂತ್ ಶಿಡಿಯೆಚಿಂ ಮೆಟಾಂ ಚಡೊಂಕ್ ಲಾಗ್ಲೆಂ. ಎಕ್ಲೊ ಲ್ಹಾನ್ ಭುರ್ಗೊ ಉಡ್ಕಾಣಾಂ ಘಾಲಿತ್ ಶಿಡಿಯೆಚಿಂ ಮೆಟಾಂ ದೆಂವೊನ್ ಗೆಲೊ. ತೆಂ ಪಯ್ಲ್ಯಾ ಮಾಳಿಯೆಕ್ ಪಾವ್ಲೆಂ. ಪಯ್ಲ್ಯಾ ಮಾಳಿಯೆ ವಯ್ಲಿಂ ಫ್ಲೇಟಾಚಿಂ ಸರ್ವ್ ಬಾಗ್ಲಾಂ ಬಂಧ್ ಆಸ್‌ಲ್ಲಿಂ.

"ಫ್ಲೆಟ್ ನಂಬರ್ ೧೩ ಚ್ಯಾ ದಾರ್ವಾಟ್ಯಾ ಫುಡೆಂ ಉಭೆಂ ಜಾಲೆಂ ಭಾವನಾ.

ಮುಖ್ಲ್ಯಾ ಫ್ಲೆಟಾಂತ್ ಮ್ಯೂಜಿಕ್ ಸಿಸ್ಟಮಾರ್ ಪಾಕಿಸ್ತಾನಿ ಗಾವ್ಪಿಣ್ ನಜ್ಮಾ ಕುರೇಶಿ ಗಝಲ್ ಗಾವ್ನ್ ಆಸ್‌ಲ್ಲೆಂ "ಆಜ್ ತೊ ಆನೆವಾಲಾ ಹೈ ಕೊಯಿ, ಆಜ್ ತೊ ರಂಗ್ ದಿಕಾಯೆಗಾ ಅಜನಬಿ’

ಉಜ್ವ್ಯಾ ಹಾತಾಚೆಂ ಬೊಟ್ ದೊಡುನ್ ದಾರಾಚೆರ್ ’ನೊಕ್’ ಕೆಲೆಂ ಭಾವನಾನ್.

"ಕೊಣ್" ಬಿತರ್ ಥಾವ್ನ್ ಕೊಗುಳೆ ನಾದ್ ಆಯ್ಲೊ.

"ದಯಾ ಕರುನ್ ಮ್ಹಾಕಾ ಬಚಾವ್ ಕರ್ ಭಯ್ಣಿ" ಭಾವನಾಚ್ಯಾ ತಾಳ್ಯಾಂತ್ ಬಿರಾಂತೆ ಸವೆಂ ವಿನಂತಿ ಆಸ್‌ಲ್ಲಿ. "ಎಕ್ಲೊ ಮೊವಾಲಿ ಮ್ಹಜ್ಯಾ ಪಾಟ್ಲ್ಯಾನ್ ಪಡ್ಳಾ"

ಕ್ಷಣಾ ಬಿತರ್ ಬಾಗಿಲ್ ಉಗ್ತೆಂ ಜಾಲೆಂ.

ವಾರ್‍ಯಾ ವೇಗಾನ್ ಬಿತರ್ ರಿಗ್ಲೆಂ ಭಾವನಾ.

"ಜಾತಾ ತಿತ್ಲ್ಯಾ ವೆಗಿಂ ಬಾಗಿಲ್ ಬಂಧ್ ಕರುನ್ ಬಿತರ್ಲ್ಯಾನ್ ಖಿಳ್ ಘಾಲ್ ಮ್ಹಜ್ಯಾ ಭಯ್ಣಿ" ಖರ್ಶೆಂವ್ಕ್ ಲಾಗ್ಲೆಂ ಭಾವನಾ. "ಮೊವಾಲಿ ಬಿತರ್ ರಿಗೊನ್ ಆಮ್ಚೆಂ ಸವೆಂ ರೇಪ್ ಕರುಂಕ್ ಆಸಾ" ತಾಚೆಂ ಶರೀರ್ ಕಾಂಪೊಂಕ್ ಲಾಗ್ಲೆಂ.

ಜ್ಯೋತ್ಸನಾನ್ ಬಾಗಿಲ್ ಬಂದ್ ಕರುನ್ ಬಿತರ್ಲ್ಯಾನ್ ಖಿಳ್ ಶಿರ್ಕಾಯ್ಲಿ.

"ಪ್ರಭುಕ್ ಅರ್ಗಾಂ ಆನಿಂ ಬಿರಾಂತ್ ನಾ. ಸುರಕ್ಶಿತ್ ಜಾಗ್ಯಾರ್ ಹಾಂವ್ ಆಸಾಂ" ಸೋಫಾಚೆರ್ ಗಳ್ಳೆಂ ಭಾವನಾ. "ದಯಾ ಕರುನ್ ಉದಾಕ್ ಮೆಳಾತ್?"

"ಬಿಯೆನಾಕ್" ದುಸ್ರ್ಯಾಚೆಂ ಮಾತೆಂ ಪೊಶೆಲೆಂ ಜ್ಯೋತ್ಸನಾನ್. "ಹ್ಯಾ ಶಹರಾಂತ್ ಗುಂಡಾಂಚೆಂ ಭಿರೆಂ ವಾಡ್ಲಾಂ. ಥೊಡ್ಯಾಚ್ ವೆಳಾ ಪಯ್ಲೆಂ ಮ್ಹಜ್ಯಾ ಘೊವಾಕ್ ತಾಚ್ಯಾ ಇಷ್ಟಾಚ್ಯಾ ಬಾಯ್ಲೆಚೆಂ ಫೋನಾಯಿಲ್ಲೆಂ. ತೊ ತಿಕಾ ಬಚಾವ್ ಕರುಂಕ್ ಧಾಂವ್ಲಾ. ಸ್ತ್ರೀ - ಚಲಿಯಾಂಚೊ ಮಾನ್ ತೀನ್ ಕಾಸಾಂಚೊ ಜಾಲಾ ಮ್ಹಣ್ ಚಿಂತ್ತಾತ್ ಹರಾಮಿ ಗುಂಡಾ-ಮೊವಾಲ್ಯಾಂಚಿ ಜಾತ್"

"ಉದಾಕ್ ಮೆಳಾತ್?"

"ಓಹ್ ಸೊರ್ರಿ" ಜೀಬ್ ಚಾಬ್ಲಿ ಜ್ಯೋತ್ಸನಾನ್. "ಆತ್ತಾಂ ಅಯ್ಲಿಂ"

’ಸೊಭಾಯೆನ್ ಪಿಕ್ಲಾಯ್. ಸವೆಂಚ್ ಫಟಿ ಮಾರ್ಚ್ಯಾಂತ್ ನಿಪುಣ್ ಜಾವ್ನಾಸಾಯ್’ ದಾಂತ್ ಚಾಬ್ಲೆ ಭಾವನಾನ್. ’ಪಯ್ಲೆಂ ತುಜ್ಯಾ ಹಾತಾಚೆಂ ಉದಾಕ್ ಪಿಯೆತೆಲಿಂ. ಉಪ್ರಾಂತ್ ತುಜೆಂ ರಗಾತ್ ಪಿಯೆಂವ್ಕ್ ಆಸಾ ಮ್ಹಾಕಾ. ಮ್ಹಜ್ಯಾ ಮೊಗಾ ವಯ್ರ್ ದಾವ್ಲಿ ಮಾರ್‌ಲ್ಲ್ಯಾ ತುಕಾ ಜಿಯೆಂವ್ಚೆಂ ಹಕ್ಕ್ ನಾ’.

"ಉದಾಕ್ ಹಾಜರ್ ಆಸಾ" ಜ್ಯೋತ್ಸನಾ ಲಾಗಿಂ ಪಾವ್‌ಲ್ಲೆಂ.

"ಥೆಂಕ್‌ಯೂ" ಗ್ಲಾಸ್ ಆಪ್ಣಾಯ್ಲೊ ಭಾವನಾನ್.

"ಖಂಯ್ ತರಿ ತುಕಾ ಹ್ ಆಂವೆಂ ಪಳೆಲಾಂ. ದುಸ್ರ್ಯಾ ಸೋಫಾಚೆರ್ ಗಳ್ಳೆಂ ಜ್ಯೋತ್ಸನಾ.

"ಹಾಂವ್ ಹ್ಯಾ ಶಹರಾಚಿಂ ನಹಿಂ" ಗ್ಲಾಸ್ ಖಾಲಿ ಕರುನ್ ವೋಂಠ್ ಪುಸ್ಲೆ ಭಾವನಾನ್. "ದೊಲಕ್‌ಪುರ್ ಶಹರಾಂತ್ ಸರ್ಕಾರಿವಿಝ್ ಖಾತ್ಯಾಂತ್ ನೌಕರಿ ಕರ್ತಾಂ. ಥೊಡ್ಯಾ ಸರ್ಕಾರಿ ಕಾಮಾನ್ ಹ್ಯಾ ಶಹರಾಕ್ ಹಾಂವ್ ಪಾವ್‌ಲ್ಲಿಂ. ನಶಿಬ್ ಖೊಟೆಂ. ಕಾರ್ ಪಾಡ್ ಜಾಲೆಂ. ಅನ್ವರ್ ಲಂಗ್ಡ್ಯಾಚ್ಯಾ ಗೆರೆಜಿಂತ್ ಕಾರ್ ರಿಪೇರಿಂಗಾಕ್ ದೀವ್ನ್ ಹ್ಯಾ ಕೊಲೊನಿಚ್ಯಾ ರಾಜ್ ರಸ್ತ್ಯಾ ವಯ್ಲ್ಯಾನ್ ಚಲೊನ್ ಆಸ್‌ಲ್ಲ್ಯಾ ವೆಳಾರ್, ಮೊವಾಲಿ ಎಕ್ಲೊ ಪಾಟ್ಲಾವ್ ಕರುಂಕ್ ಲಾಗ್ಲೊ. ತಾಚ್ಯಾ ದಾವ್ಲೆ ಥಾವ್ನ್ ಕಶೆಂಯ್ ಬಚಾವ್ ಜಾಲಿಂ" ಸೊಬಿತ್ ಫಟಿ ಮಾರ್ಲ್ಯೊ ಭಾವನಾನ್.

"ಜಾಂವ್ಕ್ ಪುರೊ" ಜ್ಯೋತ್ಸನಾನ್ ಸಿಗ್ರೆಟ್ ಜಳಯ್ಲಿ. "ಮಿಸೆಸ್ ಭಾವನಾ ಭಾರ್ಗವ್ ಆನಿಂ ತುಜ್ಯಾ ವ್ಯಕ್ತಿತ್ವಾಂತ್ ಸುತಾಚೊ ಅಂತರ್ ಆಸಾ"

"ಕೊಣ್ ತೆಂ ಭಾವನಾ ಭಾರ್ಗವ್?" ಆತುರಾಯ್ ದಾಕಯ್ಲಿ ಭಾವನಾನ್.

"ಸೊಡ್ ತಿ ಗಜಾಲ್" ಉಟೊನ್ ಉಭೆಂ ಜಾಲೆಂ ಜ್ಯೋತ್ಸನಾ. "ಮ್ಹಜ್ಯಾ ಹಾತಾಚಿ ಟೀ ಮ್ಹಜೊ ಪತಿ ಮಿಠಿಯೊ ಮಾರುನ್ ಪಿಯೆತಾ. ಟೀ ಚಲಾತ್?"

"ತುಕಾ ಹಾಂವ್ ತ್ರಾಸ್ ದೀವ್ನ್ ಆಸಾ ಮಿಸೆಸ್.....ಕಿತೆಂ ನಾಂವ್ ಸಾಂಗ್ಲೆಂಯ್ ತುವೆಂಂ?"

"ನರ್ಗಿಸ್ ಫಿರೊಜಾ ಖಾನ್"

"ಸೊಭಾಯೆ ಸವೆಂ ಸೊಬಿತ್ ನಾಂವ್. ಸುಂದರ್ ಶರೀರ್ ಆಸಾ ತುಜ್ಯೆಲಾಗಿಂ ಮಿಸೆಸ್ ಖಾನ್. ದಾದ್ಲ್ಯಾಕ್ ಜಾಯ್ ಆಸ್‌ಲ್ಲೆಂ ಸರ್ವ್ ಆಸಾ ತುಜೆಂಲಾಗಿಂ. ಪೂನ್ ಕೆಲಾಂ ತುಜ್ಯಾ ಪತಿನ್ ನಹಿಂ?"

"ತಾಕಾ ಏಕ್ ಫೋನ್ ಯೇಂವ್ಕ್ ನಾತ್‌ಲ್ಲೆಂ ತರ್......ಮಹ್ಜ್ಯಾ ಶರೀರಾಚೆ ಬಾರಾ ಬ್ರೇಸ್ತಾರ್ ಕರ್ತೊ ಆಸ್‌ಲ್ಲೊ" ಲಜೆಲೆಂ ಜ್ಯೋತ್ಸನಾ.

"ಟೀ ತುಂ ಕರ್ಚ್ಯಾರ್ ಆಸ್‌ಲ್ಲಿಯ್?"

"ಓಹ್ ಸೊರ್ರಿ" ಪರತ್ ಜೀಬ್ ಚಾಬ್ಲಿ ಜ್ಯೋತ್ಸನಾನ್. "ಫಕತ್ತ್ ಪಾಂಚ್ ಮಿನುಟಾಂ"

"ಪರ್ವಾ ನಾ"

ಜ್ಯೋತ್ಸನಾ ಗೆಲ್ಯಾ ಉಪ್ರಾಂತ್ ವೆನಿಟಿ ಬೆಗ್ ಉಗ್ತೆಂ ಕರುನ್, ಆಮ್ಸರಾನ್ ಲುವಾಂ ಹಾತಾಕ್ ಶಿರ್ಕಾಯ್ಲಿಂ. ಕಾಗ್ದಾಂತ್ ಗುಟ್ಲಾಯಿಲ್ಲಿ ಚುರಿ ಉಜ್ವ್ಯಾ ಹಾತಾಂತ್ ಸಾಂಬಾಳುನ್ ಮಾಜ್ರಾ ಪಾವ್ಲಾಂ ಕಾಡ್ಲಿಂ.

ಆಯ್ದಾನಾಂತ್ ಫಿಲ್ಟರಾಚೆಂ ಉದಾಕ್ ವೊತುನ್, ಜಳ್ಚ್ಯಾ ಗೆಸಾ ವಯ್ರ್ ಆಯ್ದಾನ್ ದವರ್ಲೆಂ ಜ್ಯೋತ್ಸನಾನ್. ಮುಖ್ಲ್ಯಾ ಫ್ಲೇಟಾಂತ್ ಮ್ಯೂಜಿಕ್ ಸಿಸ್ಟಮಾರ್ ನಜ್ಮಾ ಕುರೇಶಿ ನವಿ ಗಝಲ್ ಗಾವ್ನ್ ಆಸ್‌ಲ್ಲೆಂ. ತ್ಯಾ ಮಧುರ್ ತಾಳ್ಯಾಕ್ ಆನಿಂ ಉತ್ರಾಂಕ್ ಪಿಸ್ವಾನಾತ್‌ಲ್ಲೊ ಕೊಣ್ ಆಸಾ?

"ಜಿನೆಕಿ ಆರ್‌ಜೂ ಸೇ ಜಗಯಾ ತೂನೆ, ಮೌತ್‌ಕಾ ಇಂತ್‌ಜಾರ್ ಕ್ಯೂಂ ಕರುಂ?"

ಖತ್ಕತ್ಚ್ಯಾ ಉದ್ಕಾ ವಯ್ರ್ ನದರ್ ಆಸ್‌ಲ್ಲಿ ಜ್ಯೋತ್ಸನಾಚಿ.

ಮ್ರತ್ಯು ತಾಚ್ಯಾ ಪಾಟ್ಲ್ಯಾನ್ ಉಭಿ ಜಾಲ್ಲಿ.

ದಾವ್ಯಾ ಹಾತಾನ್ ಜ್ಯೋತ್ಸನಾಚೆ ಕೆಸ್ ಆರಾಯ್ಲೆ ಭಾವನಾನ್. ದುಸ್ರೆ ಕ್ಷಣಾ ಉಜ್ವ್ಯಾ ಹಾತಾಂತ್ಲಿ ತೇಜ್ ಧಾರಿಚಿ ಚುರಿ ಸುಕುರ್ ನಳಿಯೆ ವಯ್ರ್ ಲಾಂಬಾಯೆನ್ ವೊಡ್ಳಿ. ರಗ್ತಾಚಿ ಕಾರಂಜಿ ಮುಖ್ಲ್ಯಾ ವೊಣದಿ ವಯ್ರ್ ಉಸಾಳ್ಳಿ. ಖಿಳಂಚ್ ಸಯ್ತ್ ಮಾರುಂಕ್ ಸಕ್ಲೆಂನಾ ಜ್ಯೋತ್ಸನಾ. ಫಕತ್ತ್ ಥೊಡ್ಯಾ ಕ್ಶಣಾಂಕ್ ತೆಂ ಹುಳ್ವುಳ್ಳೆಂ ಆನಿಂ ನಿಸ್ತೇಜ್ ಜಾಲೆಂ.

ಫಾರಿಕ್ಪಣಾಚ್ಯಾ ರಗ್ತಾಳ್ಯಾ ಖೆಳಾಂತ್ ಭಾವನಾ ಜಿಕ್‌ಲ್ಲೆಂ.

ನಜ್ಮಾ ಕುರೇಶಿಚೊ ಮಧುರ್ ತಾಳೊ ಭಾವನಾಚ್ಯಾ ಕಾನಾರ್ ಪಡ್ಲೊ.

"ಮೌತ್ ಕಾ ಜಾಮ್ಕಾ ಸಬ್ ನೆ ಚಕ್ನಾ ಹೈ, ಜೊ ಏಕ್ ಬಾರ್ ಆಯಾ ಹೈ, ಉಸ್ಕೊ ತೊ ಜಾನಾ ಹೈ".

ರಗ್ತಾಳಿ ಚುರಿ ಮೊಡ್ಯಾಲಾಗಿಂ ಗಳವ್ನ್, ಲುವಾಂ ಆನಿಂ ಟಿಪೊಯೆ ವಯ್ಲೊ ಖಾಲಿ ಗ್ಲಾಸ್ ಕಾಗ್ದಾಂತ್ ಗುಟ್ಲಾವ್ನ್, ಪೊಟ್ಲಿ ಬೆಗಾಂತ್ ಲಿಪಯ್ಲಿ ಭಾವನಾನ್. ಜಾತಾ ತಿತ್ಲ್ಯಾ ವೆಗಿಂ ತ್ಯಾ ಪರಿಸರಾ ಥಾವ್ನ್ ತಾಣೆಂ ಚುಕಾರಿ ಮಾರುಂಕ್ ಆಸ್‌ಲ್ಲಿ.

ಮಾರುತಿ ಧಾಂವೊನ್ ಆಸ್‌ಲ್ಲೆಂ.

ಮೊಬಾಯ್ಲ್ ಜಾಗೆಂ ಜಾಲೆಂ.

"ಭಾವನಾ......."ಆಕಾಂತ್ ಆಶ್‌ಲ್ಲೊ ಅಜಯಾಚ್ಯಾ ತಾಳ್ಯಾಂತ್. "ಮೌಂಟ್ ಪ್ಲಾಜಾಚ್ಯಾ ಪಾರ್ಕಿಗಾಂತ್ ತುಕಾ ಹಾಂವ್ ಸೊದುನ್ ಆಸಾಂ. ಖಂಯ್ ಆಸಾಯ್ ತುಂ?"

"ತಾಂಚ್ಯಾ ದಾವ್ಲೆ ಥಾವ್ನ್ ಹಾಂವ್ ಬಚಾವ್ ಜಾಲ್ಯಾಂ" ನಿಧಾನ್ ತಾಳ್ಯಾನ್ ತೆಂ ಉಲಯ್ಲೆಂ. "ಧಾ ಹಜಾರ್ ತಾಣಿ ಲುಟ್ಲ್ಯಾತ್. ಉದ್ಡು ನಾತ್‌ಲ್ಲೊ ತರ್ ತೆ ಮ್ಹಜೆ ಸವೆಂ ಬಲತ್ಕಾರ್ ಕರ್ತೆ ಆಶ್‌ಲ್ಲೆ"

"ಘರಾ ವಚೊನ್ ಆಸಾಯ್?"

"ವ್ಹಯ್ ಡಾರ್ಲಿಂಗ್"

"ಘರಾ ಯೆಂವ್ಚಿ ಗರ್ಜ್ ಆಸಾ?"

"ನಾಕಾ ಡಾರ್ಲಿಂಗ್" ಮ್ಹೊಂವ್ ಗಳಯ್ಲೆಂ ಭಾವನಾನ್. "ಬಿಜ್ನೆಸಾ ತೆವ್ಶಿನ್ ಧ್ಯಾನ್ ದೀ"

"ಪಾರ್ಟ್ನರಾ ಸವೆಂ ಮೀಟಿಂಗಾರ್ ಆಸ್‌ಲ್ಲೊಂ. ತುಕಾ ಅನ್ವಾರಾಂತ್ಲೆಂ ರಾಕ್ಚ್ಯಾ ಖಾತಿರ್ ಭಾವ್ಡ್ಯಾ ಸವೆಂ ಮೀಟಿಂಗ್ ಆಧುರೆಂಚ್ ಉರ್ಲಾಂ"

"ಭಾವ್ಡ್ಯಾಕ್ ರಾಕೊಂಕ್ ಕರಿನಾಕಾ ಅಜಯ್" ಮಾರುತಿನ್ ಗುಂವ್ಡೀ ಕಾತರ್ಲಿ. "ದುಡೂ ಕಮಾಂವ್ಚೊ ರಸ್ತೊ ಬಂಧ್ ಜಾಯ್ತ್"

"ಎನೀ ವೆ. ಯೂ ಮಸ್ಟ್ ಟೇಕ್ ಕ್ಯಾರ್ ಸ್ವೀಟ್ ಹಾರ್ಟ್"

"ಎಸ್ ಮೈ ಲವ್" ಲಾಯ್ನ್ ಕಾತರ್ಲಿ ಭಾವನಾನ್.

"ಹರಾಮ್ಯಾ" ದಾಂತ್ ಚಾಬ್ಲೆ ಭಾವನಾನ್. "ತುಜೊ ವೇಳ್ ಲಾಗಿಂ ಪಾವ್ಲಾ" ಕಾರಾಚೊ ವೇಗ್ ತಾಣೆಂ ವಾಡಯ್ಲೊ. "ಜಾತಾ ತಿತ್ಲ್ಯಾ ವೆಗಿಂ ಫ್ಲೆಟಾಕ್ ತಾಣೆಂ ಪಾವೊಂಕ್ ಜಾಯ್ ಆಸ್‌ಲ್ಲೆಂ".

ತೆಂ ಫ್ಲೆಟಾಕ್ ಪಾವ್ಲೆಂ.

ವೆನಿಟಿ ಬೆಗಾಂತ್ಲೊ ಗ್ಲಾಸ್ ಫುಟವ್ನ್ ಡಸ್ಟ್‌ಬಿನಾಂತ್ ಉಡಯ್ಲೊ. ಶರೀರಾ ವಯ್ಲಿ ಮುಸ್ತಾಯ್ಕಿ ನಿಕ್ಳಾವ್ನ್ ಟೊಯ್ಲೆಟಾಚ್ಯಾ ಧರ್ಣಿರ್ ಗಳಯ್ಲಿ. ಖಾಡ್ಕೆ ವಯ್ಲೊ ತಿಳೊ ಮಾಜ್ವಾಯ್ಲೊ. ಉಗ್ತೆ ಸೊಡ್‌ಲ್ಲೆ ಕೇಸ್ ಶೆಂಡ್ಯಾ ರೂಪಾರ್ ಬಾಂದ್ಲೆಂ. ಮುಸ್ತಾಯ್ಕಿ ಆನಿಂ ಬೆಗಾಚೆರ್ ಚಿಮ್ಣೆ ತೆಲ್ ವೊತುನ್ ಉಜೊ ದಿಲೊ.

ಉಜೊ ಧಗ ಧಗ ಕರುನ್ ಜಳೊಂಕ್ ಲಾಗ್ಲೊ.

ಫಕತ್ ಪಾಂಚ್ ಮಿನುಟಾಂ.

ಮುಸ್ತಾಯ್ಕಿ ಆನಿಂ ಬೆಗ್ ಗೊಬ್ರಾ ರೂಪಾರ್ ಬದ್ಲಿ ಜಾಲೆಂ. ಧರ್ಣ್ ತಾಣೆಂ ನಿತಳ್ ಕೆಲಿ. ಚಿಮ್ಣೆ ತೆಲಾಚೊ ಪರ್ಮಳ್ ವೆಚ್ಯಾ ಖಾತಿರ್ ಟೊಯ್ಲೆಟ್ ಲಿಕ್ವಿಡಾನ್ ಪರತ್ ಏಖ್ ಪಾವ್ಟಿ ಬಾತ್‌ರೂಮ್ ಧುವ್ನ್ ಕಾಡ್ಲೆಂ. ಏಖ್ ಖುನ್ ಕರುನ್‌ಯಿ ತೆಂ ಸುರಕ್ಶಿತ್ ಆಸ್‌ಲ್ಲೆಂ. ಬಚಾವೆಚೆ ಸರ್ವ್ ಖೊಲೆ ತಾಚ್ಯಾ ತಾಬೆಂತ್ ಆಸ್‌ಲ್ಲೆಂ.

***********

ಅಜಯ್ ಭಾರ್ಗವ್ ರೂಪ್‌ತಾರಾ ಕೊಲೊನಿಕ್ ಪಾವ್ಲೊ.

ಫ್ಲೆಟ್ ನಂಬರ್ ೧೩ ಚೆಂ ದಾರ್ ಅರ್ಧೆಂ ಕುರೆಂ ಉಗ್ತೆಂಚ್ ಆಸ್‌ಲ್ಲೆಂ.

"ಜ್ಯೋತ್ಸನಾ...." ಬಾಗಿಲ್ ಬಂಧ್ ಕರುನ್ ಆವಾಜ್ ದಿಲೊ ಅಜಯಾನ್. "ಬಾಗಿಲ್ ಬಂಧ್ ಕರುಂಕ್ ವಿಸ್ರಾಲೆಂಯ್?"

"ಮೊಡೆಂ ಉಲಂವ್ಕ್ ಸಕ್ತಾ?"

ಬೆಡ್‌ರೂಮಾಂತ್ ವ ಟೊಯ್ಲೆಟಾಂತ್ ಜ್ಯೋತ್ಸನಾಚಿ ಝಳಕ್ ನಾತ್‌ಲ್ಲಿ. ಕಿಚನಾಂತ್ ತಾಣೆಂ ಪಾಂಯ್ ದವರ್ಲೊ. ತೆಂ ಬಿರಾಂಕುಳ್ ದ್ರಶ್ಯ್ ಪಳೆವ್ನ್, ಕಿಂಕ್ರಾಟ್ ಮಾರುಂಕ್ ತೊಂಡ್ ಉಘಡ್ಲೆಂ ತರಿ ಕಿಂಕ್ರಾಟ್ ಮಾರುಂಕ್ ತೊಂಡ್ ಉಘಡ್ಲೆಂ ತರಿ ಕಿಂಕ್ರಾಟ್ ಮಾರುಂಕ್ ಸಕ್ಲೊನಾ. ತಾಚೆ ಪಾಂಯ್ ಕಾಂಪ್ಲೆಂ. ಶರೀರ್ ಘಾಮೆಂವ್ಕ್ ಲಾಗ್ಲೆಂ.

ಪನ್ನಾಸ್ ಕರೊಡ್ ರುಪಿಯಾಂಚೆಂ ಸ್ವಪಾಣ್ ನಿರ್ಫಳ್ ಜಾಲ್ಲೆಂ.

’ಮೇಯರಾಚ್ಯಾ ಘಾಸಾಕ್ ತುಂ ಸಾಂಪಾಡ್ಲೆಂಯ್? ತಾಣೆಂ ವ ತಾಚ್ಯಾ ಮನ್ಶ್ಯಾಂನಿ ತುಜಿ ಗೊಮ್ಟಿ ಲುಂವ್ಲ್ಯಾ. ತೆ ಮ್ಹಾಕಾ ಜೀವಂತ್ ಸೊಡ್ಚೆನಾಂತ್. ತ್ಯಾ ಫುಡೆಂ......" ತಾಚಿ ತಕ್ಲಿ ಕಾಮ್ ಕರುಂಕ್ ಲಾಗ್ಲಿ. ’ಹ್ಯಾ ಪರಿಸರಾ ಥಾವ್ನ್ ಫೊಳಾಫಳ್ ಹಾವೆಂ ಘೆಂವ್ಕ್ ಆಸಾ’.

ಘಾಮೆಲ್ಲೆಂ ಶರೀರ್ ಘೆವ್ನ್ ಅಜಯ್ ಪಾಟಿಂ ಆಯಿಲ್ಲೊ.

"ಕಿತ್ಯಾಕ್ ಘಾಮೆಲಾಯ್ ಅಜಯ್?" ದಿಸಾ ಉಜ್ವಾಡಾಕ್ ನಾಡ್ ಪಳೆಲಿಯ್ ವ ಭಲಾಯ್ಕಿ ಬರಿ ನಾ?" ಅಜಯಾಚಿ ಅವಸ್ಥಾ ಪಳೆವ್ನ್ ಬಿತರ್ಲ್ಯಾ ಬಿತರ್ ಖುಶ್ ಆಶ್‌ಲ್ಲೆಂ ಭಾವನಾ. ಪುಣ್ ಮುಸ್ಕಾರಾರ್ ಕಸಲಿಂಚ್ ಭಾವನಾಂ ವ್ಯಕ್ತ್ ಕೆಲಿಂನಾಂತ್.

"ಮ್ಹಜ್ಯಾ ಕುಡಿಂತ್ ಅಸ್ಕತ್ಕಾಯ್ ಉದೆಲ್ಯಾ" ಖಾಟಿಯೆರ್ ಗಳ್ಳೊ ಅಜಯ್. "ಮ್ಹಾಕಾ ವಿಶ್ರಾಂತಿ ಜಾಉ" ತಾಚೊ ತಾಳೊ ಮರೊಂಕ್ ಜಾಲ್ಲೊ.

"ಸಕಾಳಿಂ ತುಂ ಸುಡ್ಸುಡಿತ್ ಆಸ್‌ಲ್ಲೊಯ್. ಅಛಾನಕ್ ತುಕಾ ಕಿತೆಂ ಜಾಲೆಂ?" ಘೊವಾಚೆಂ ಮಾತೆಂ ಪೊಶೆಲೆಂ ಭಾವನಾನ್. "ಕಾಂಯ್ ತರಿ ಪಿಯೆಂವ್ಕ್ ಹಾಡುಂ?"

"ನಾಕಾ" ತೊ ಪಿಂರ್ಗಾಲೊ.

"ತುಂ ಬಿಂಯೆಲಾಯ್. ತುಂ ಬೆಜಾರಾಯೆರ್ ಆಸಾಯ್. ತುಜ್ಯಾ ಜಿವಿತಾಂತ್ಲೆಂ ಆಮೊಲಿಕ್ ದಿರ್ವೆಂ ಹೊಗ್ಡಾಯ್ಲಾಂಯ್? ಸತ್ ಉಲಯ್ ಅಜಯ್. ಕಾಂಯ್ ತರಿ ಸಾಂತ್ವಾನ್ ಹಾಂವ್ ದೀಂವ್ಕ್ ಸಕ್ತೆಲಿಂ"

"ಎಕಾ ವಜ್ರಾಕ್ ಹಾಂವೆಂ ಹೊಗ್ಡಾಯ್ಲಾಂ"

"ವಜ್ರ್?"

"ಧೊಲಕ್‌ಪುರ್ ಶಹರಾಂತ್ ಆಮಿಂ ಭೆಟ್‌ಲ್ಲ್ಯಾಂವ್" ಜ್ಯೋತ್ಸನಾಚೆಂ ರುಪ್ಣೆಂ ದೊಳ್ಯಾಂ ಮುಖಾರ್ ಆಯ್ಲೆಂ. "ಬಿಜ್ನೆಸಾ ಖಾತಿರ್ ಲಾಖಾಂನಿ ದುಡು ತಾಣೆಂ ಮ್ಹಾಕಾ ದಿಲ್ಲೊ. ಟಾಟಾ ಸುಮೊ ಸಯ್ತ್ ಮೊಲಾಕ್ ಘೆವ್ನ್ ದಿಲೆಂ ಆನಿಂ ಆಜ್......ಥೊಡ್ಯಾಚ್ ವೆಳಾ ಪಯ್ಲೆಂ ತಾಚಿ ಹತ್ತ್ಯಾ ಜಾಲ್ಯಾ"

"ತುಜ್ಯಾ ಪಾರ್ಟ್ನರಾಚಿ ಹತ್ತ್ಯಾ ಜಾಲ್ಯಾ?"

"ವ್ಹಯ್".

"ಮ್ಹಜೆಂ ಫೋನ್ ಯೆಂವ್ಚ್ಯಾ ವೆಳಾರ್ ತೊ ದಫ್ತರಾಂತ್ ಆಸ್‌ಲ್ಲೊ ನಹಿಂ? ದಫ್ತರಾಂತ್ ಆಸ್‌ಲ್ಲೊ ನಹಿಂ? ದಫ್ತರಾಂತ್ ಖುನ್ ಜಾಲ್ಯಾ? ಪೊಲಿಸಾಂಚ್ಯಾ ಲಫ್ಡ್ಯಾಂತ್ ತುಂ ಸಾಂಪಾಡ್ಲೊಯ್?"

"ತಾಚಿ ಖುನ್ ದಫ್ತರಾಂತ್ ಜಾಂವ್ಕ್ ನಾ. ತುಕಾ ಬಚಾವ್ ಕರುಂಕ್ ಮೌಂಟ್ ಫ್ಲಾಜಾಕ್ ಗೆಲ್ಲ್ಯಾ ವೆಳಾರ್ ತೊ ಆಫ್ಲ್ಯಾ ಫ್ಲೆಟಾಕ್ ಪಾಟಿಂ ಪಾವ್‌ಲ್ಲೊ. ತಾಚ್ಯಾಚ್ ಫ್ಲೆಟಾಂತ್ ಗೊಮ್ಟಿ ಲುಂವೊನ್ ಹತ್ತ್ಯಾ ಕೆಲ್ಯಾ ಖುನಿಗಾರಾನ್" ತಾಚೊ ತಾಳೊ ಭರೊನ್ ಆಯ್ಲೊ.

"ಪೊಲಿಸಾಂಚ್ಯಾ ಲಫ್ಡ್ಯಾಂಕ್ ತುಂ ಸಾಂಪಡ್ಶಿ ಜಾಲ್ಯಾರ್.....ಮ್ಹಜೆಂ ಕಿತೆಂ ಜಾತೆಲೆಂ?" ಭಾವಾನಚ್ಯಾ ದೊಳ್ಯಾಂನಿ ದುಃಖಾಂ ಉದೆಲಿಂ. "ತುಫಾನ್ ಯೆಂವ್ಚ್ಯಾರ್ ಆಸಾ ಆಮ್ಚ್ಯಾ ಜಿವಿತಾಂತ್?"

"ಖುನಿಗಾರ್ ಸಾಂಪಡ್ತೊಲೊ ಭಾವನಾ. ತುಜ್ಯಾ ಘೊವಾಚಿ ಲೋಂವ್ ಪರ್ಯಾಂತ್ ವಯ್ಲೊ ರಚ್ನಾರ್ ಸಾಂಬಾಳ್ತಾಲೊ. ಏಕ್ ನವೆಂ ಜಿವಿತ್ ಮ್ಹಾಕಾ ಜಿಯೆಂವ್ಕ್ ಆಸಾ"

"ಎದೊಳ್ಚ್ಯಾ ತುಜ್ಯಾ ಜಿವಿತಾಂತ್ ಖತಾಂ ಆಸ್‌ಲ್ಲಿಂ ಅಜಯ್?"

"ಮ್ಹಾಕಾ ವಿಶ್ರಾಂತಿ ಜಾಯ್" ಕೂಸ್ ಬದ್ಲಿಲಿ ಅಜಯಾನ್. "ಮ್ಹಜಿ ಮಾನಸಿಕ್ ಸ್ಥಿತಿ ಥಾರ್‍ಯಾರ್ ನಾಂ"

"ಪ್ರಭು, ತುಜ್ಯಾ ಇಷ್ಟಾಚ್ಯಾ ಅತ್ಮ್ಯಾಕ್ ಶಾಂತಿ ದೀಂವ್ದಿ. ತುಜೊ ಈಷ್ಟ್ ಜರ್ ಪಾತ್ಕಿ ಜೀಣ್ ಜಿಯೆಂವ್ಕ್ ನಾಂ ತರ್ ಸರ್ಗ್ ಫಾವೊ ಜಾಂವ್ದಿ. ತಾಚೊ ಖುನಿಗಾರ್ ಸರಳಾಂ ಪಾಟ್ಲ್ಯಾನ್ ಪಾವೊಂದಿ ಆನಿಂ ಫಾಶಿಯೆಚ್ಯಾ ಖಾಂಬ್ಯಾರ್ ಉಮ್ಕಾಳೊಂದಿ. ತುಂ ಆರಾಮ್ ಕರ್ ಮ್ಹಜ್ಯಾ ಮೊಗಾ. ತುಜ್ಯಾ ದುಃಖಾಂತ್ ಹಾಂವ್ ಶಾಮಿಲ್ ಜಾಲ್ಯಾಂ ಮ್ಹಣ್ ಚೀಂತ್"

"ಥೆಂಕ್ ಯೂ ಭಾವನಾ" ಅಜಯಾನ್ ದೊಳೆ ಧಾಂಪ್ಲೆ.

ಭಾವನಾಚ್ಯಾ ಕಾಳ್ಜಾಂತ್ ನೆಕೆತ್ರಾಂ ಫುಟ್‌ಲ್ಲಿಂ.

"ಕಿತೆಂ ಜಾತೆಲೆಂ ಮ್ಹಜೆಂ?" ನಿದ್‌ಲ್ಲ್ಯಾ ಜಾಗ್ಯಾರ್ ಕಾಂಪ್ಲ್ ಅಜಯ್. ’ಖುನಿಗಾರ್ ಖುನಿ ಕರುನ್ ಚುರಿ ಮೊಡ್ಯಾಲಾಗಿಂ ಸೊಡ್ಲ್ಯಾ. ಚುರಿಯೆಚ್ಯಾ ಹಾತಾಳ್ಯಾರ್ ಖುನಿಗಾರಾಚಿಂ ಬೊಟಾಂ ಗುರ್ತ್ ಪೊಲಿಸಾಂಕ್ ಮೆಳ್ತೆಲೆ. ಖುನಿಗಾರ್ ಸಾಂಪಾಡ್ತೊಲೊ. ಮೇಯರಾನ್ ವ ತಾಚ್ಯಾ ಮನ್ಶ್ಯಾನ್ ಖುನಿ ಕೆಲ್ಯಾ ತರ್ ಕಾನೂನಾಚ್ಯಾ ದಾವ್ಲೆಕ್ ಸಾಂಪಡ್ತೆಲೆ. ಹಾತಾಕ್ ಲುಂವಾಂ ನ್ಹೆಸೊನ್ ಖುನಿ ಕೆಲ್ಯಾ ತರ್...’ ತಾಚೆಂ ಕಾಳಿಜ್ ಬೊರಿಯಾಂಕ್ ಆಪ್ಟೊಂಕ್ ಲಾಗ್ಲೆಂ. ’ಸಗ್ಳ್ಯಾ ಫ್ಲೆಟಾಂತ್ ಮ್ಹಜೆಂ ಫಿಂಗರ್ ಪ್ರಿಂಟ್ಸ್ ಆಸಾತ್. ಪರಿಸರಾಚ್ಯಾ ಜಾಯ್ತ್ಯಾ ಲೊಕಾನ್ ಮ್ಹಾಕಾ ಪಳೆಲಾಂ. ಫ್ಲೆಟ್ ನಂಬರ್ ೧೩ ಕ್ ಆನಿಂ ಮ್ಹಾಕಾ ಸಂಬಂಧ್ ಆಸಾ ಮ್ಹಣ್ ಮುಖ್ಲ್ಯಾ ಫ್ಲೆಟಾಚಿ ಮಿಸೆಸ್ ವಂದನಾ ರಾವ್ ಸಯ್ರ್ ಜಾಣಾಂ. ಉಡ್ಕಾಣಾಂ ಘಾಲ್ಚೊ ತಿಚೊ ಭುರ್ಗೊ ಬಬ್ಲು, ಅಂಕಲ್ ಬೊಕ್ಸರ್ ಮ್ಹಣ್ ಮ್ಹಾಕಾ ವಳ್ಕಾತಾ’ ಸಂಪೂರ್ಣ್ ಘಾಮೆಲ್ಲೊ ತೊ ಉಟೊನ್ ಬಸ್ಲೊ. ’ಬ್ರಹ್ಮ, ವಿಷ್ಣು, ಮಹೇಶ್ವರಾ, ಮ್ಹಜ್ಯಾ ಕುಮ್ಕೆಕ್ ಯೆಯಾತ್’.

****************

ಫ್ಲೆಟ್ ನಂಬರ್ ೧೩ ಚೆಂ ಬಾಗಿಲ್ ಉಗ್ತೆಂಚ್ ಆಸ್‌ಲ್ಲೆಂ. ಧಾಂವ್ ಮಾರ್ಚ್ಯಾ ವೆಳಾರ್ ಬಾಗಿಲ್ ಬಂಧ್ ಕರುಂಕ್ ವಿಸ್ರಾಲ್ಲೊ ಅಜಯ್.

ಸಕಯ್ಲ್ ಖೆಳೊಂಕ್ ಗೆಲ್ಲೊ ಬಬ್ಲು ಉಡ್ಕಾಣಾಂ ಘಾಲಿತ್ತ್ ಪಯ್ಲ್ಯಾ ಮಾಳಿಯೆರ್ ಪಾವ್ಲೊ. ತಾಚಿ ನದರ್ ಉಗ್ತ್ಯಾ ದಾರ್ವಾಟ್ಯಾ ವಯ್ರ್ ಗೆಲಿ.

"ಬೊಕ್ಸರ್ ಅಂಕಲ್" ಉಲೊ ಮಾರಿತ್ತ್ ಬಿತರ್ ರಿಗ್ಲೊ ಬಬ್ಲೂ. "ಖಂಯ್ ಆಸಾಯ್ ತುಂ ಫಿರೋಜಾ ಆಂಟಿ? ಬಾಗಿಲ್ ಕಿತ್ಯಾಕ್ ಬಂದ್ ಕರುಂಕ್ ನಾಂಯ್?" ಬೆಡ್ ರೂಮಾಕ್ ತೊ ಧಾಂವ್ಲೊ.

ಬೆಡ್‌ರೂಮಾಂತ್ ತಾಚೊ ಬೊಕ್ಸರ್ ಅಂಕಲ್ ನಾತ್‌ಲ್ಲೊ.

"ಫಿರೋಜಾ ಆಂಟಿ" ಕಿಚನಾಕ್ ತಾಣೆಂ ಧಾಂವ್ ಮಾರ್ಲಿ.

ಕಿಚನಾಂತ್ ತಾಚಿ ಫಿರೋಜಾ ಆಂಟಿ ರಗ್ತಾಚ್ಯಾ ಕೊಂಡಾಂತ್ ಮೊರೊನ್ ಪಡ್‌ಲ್ಲಿ.

ಏಕ್ ಬಿರಾಂಕುಳ್ ಖಿಳಂಚ್ ಮಾರುನ್ ಭಾಯ್ರ್ ಧಾಂವ್ ಮಾರ್ಲಿ ಬಬ್ಲೂನ್.

ಉಪ್ರಾಂತ್....?

ಪೊಲಿಸ್ ಯೇವ್ನ್ ಪಾವ್ಲೆ. ಸೆಜಾರ್‍ಯಾಂಚೆಂ ವಾಕ್ಮೂಲ್ ಘೆತ್ಲೆಂ. ಅಜಯ್ ಭಾರ್ಗವಾಚೆಂ ವ್ಯಕ್ತಿತ್ವ್ ಫುಡೆಂ ಆಯ್ಲೆಂ. ಫಿಂಗರ್ ಎಕ್ಸ್‌ಫರ್ಟಾನ್ ಸಗ್ಳ್ಯಾ ಫ್ಲೆಟಾ ಬಿತರ್ ಬೊಟಾಚೆಂ ಘುರ್ತ್ ಘೆತ್ಲೆ. ಮರ್ಡರ್ ವೆಪನ್ ಪೊರೆನ್ಸಿಕ್ ಲೆಬೊಟ್ರಿಕ್ ದಾಡುನ್ ದಿಲೆಂ.

ಪೊಲಿಸಾಂಕ್ ರುಜ್ವಾತ್ ಮೆಳ್ಳಿ. ರಾತಿಚ್ಯಾ ಎಕಾ ವರಾರ್ ಅಜಯಾಕ್ ಕೈದ್ ಕೆಲೊ. ನರ್ಗಿಸ್ ಫಿರೋಜಾಚೆಂ ನೀಜ್ ನಾಂವ್ ಆನಿಂ ವ್ಯಕ್ತಿತ್ವ್ ಉಜ್ವಾಡಾಕ್ ಹಾಡ್ಲೆಂ ಅಜಯಾನ್.

ಮೇಯರಾಕ್ ವಿಶ್ವಾಸ್ ಘಾತ್ ಕೆಲ್ಲೊ ಬಾಯ್ಲೆನ್.

ಲಕ್ಷ್ಮಣ್ ರೇಖಾಚಿ ಮರ್‍ಯಾದ್ ರಾಕೊಂಕ್ ಸಕ್ಲಿನಾ ಕಾಜಾರಿ ಬಾಯ್ಲ್.

ಕನಕ್‌ಪುರಿ ಶಹರಾಚ್ಯಾ ಪಯ್ಲ್ಯಾ ನಾಗರಿಕಾಚ್ಯಾ ಕ್ರೋಧಾಕ್ ಬಲಿ ಜಾಲ್ಲೊ ಬೊಕ್ಸರ್.

"ಜ್ಯೋತ್ಸನಾ ಗುಪ್ತಾಚಿ ಖುನ್ ಹಾವೆಂ ಕರುಂಕ್ ನಾ. ಹಾಂವೆಂ ಪಾಪ್ ಆಧಾರ್ಲಾಂ ವ್ಹಯ್. ಪುಣ್ ಹಾಂವ್ ಖುನಿಗಾರ್ ನಹಿಂ"

"ಮೇಯರಾಚ್ಯಾ ಬಾಯ್ಲೆ ಸವೆಂ ಅನೈತಿಕ್ ಸಂಬಂಧ್ ತುಕಾ ಆಸ್‌ಲ್ಲೊ ಅಜಯ್?" ಭಾವನಾನ್ ದುಃಖಾ ಗಳಯ್ಲಿಂ "ಕಿತ್ಯಾಕ್ ತುವೆಂ ಮ್ಹಾಕಾ ಘಾತ್ ಕೆಲೊಯ್?"

ಅಜಯಾನ್ ಮಾನ್ ಬಾಗಾಯ್ಲಿ.

"ತುಂ ಮ್ಹಜೊ ಪತಿ ಜಾವ್ನಾಸಾಯ್" ದುಃಖಾಂ ಪುಸ್ಲಿಂ ಭಾವನಾನ್. "ತುಕಾ ಹಾಂವ್ ವಾಂಚಯ್ತೆಲಿಂ. ಫಾಶಿಯೆಚ್ಯಾ ಖಾಂಬ್ಯಾ ಥಾವ್ನ್ ತುಕಾ ಹಾಂವ್ ಬಚಾವ್ ಕರ್ತೆಲಿಂ. ಜ್ಯೋತ್ಸನಾ ಗುಪ್ತಾನ್ ದಿಲ್ಲೊ ದುಡು ಉದ್ಕಾಪರಿಂ ಕಾನೂನಾ ಪಾಟ್ಲ್ಯಾನ್ ಹಾಂವ್ ವ್ಹಾಳಾಯ್ತೆಲಿಂ"

"ಹಾಂವ್ ಚುಕೊನ್ ಪಡ್ಲೊಂ. ದುಡ್ವಾಕ್ ಆನಿಂ ಪೆಲ್ಯಾ ಸ್ತ್ರೀಯೆಕ್ ಹಾಂವ್ ಲಬ್ದೊಂಕ್ ನಾತ್‌ಲ್ಲೊಂ ತರ್....ಆಜ್ ತುಜ್ಯಾ ನದ್ರೆ ಥಾವ್ನ್ ಪಡ್ತೊಂನಾ ಆಸ್‌ಲ್ಲೊ"

ಪೊಲಿಸ್ ಅಧಿಕಾರಿನ್ ಅಜಯಾಕ್ ಜೀಪಾರ್ ಬಸಯ್ಲೆಂ.

ಜೀಪ್ ಠಾಣ್ಯಾ ತೆವ್ಶಿನ್ ಧಾಂವೊಂಕ್ ಲಾಗ್ಲೆಂ.

ಭಾವನಾಚ್ಯಾ ಮುಸ್ಕರಾರ್ ಫುಲಾಂ ಫುಲೊನ್ ಆಯಿಲ್ಲಿ.

"ತುಕಾ ಫಾಶಿ ಜಾಂವ್ಕ್ ಜಾಯ್ ಹರಾಮ್ಯಾ. ತುಜಿ ಅವನತಿ ಹಾಂವ್ ಆಶೆತಾಂ" ಕಪಲಾಚೊ ಸಿಂಧೂರ್ ಮಾಜ್ವಾಯ್ಲೊ. ರಾತಿಚೊ ವೇಳ್ ತರಿ ಧವೆಂ ವಸ್ತುರ್ ನ್ಹೆಸ್ಲೆಂ. ತುಂ ಜೀವಂತ್ ಆಸಾಯ್ ತರಿ ಹ್ಯಾ ವೆಳಾ ಥಾವ್ನ್ ಹಾಂವ್ ವಿಧವ್ ಜಾಲ್ಯಾಂ" ತಾಣೆಂ ಮ್ಯೂಝಿಕ್ ಸಿಸ್ಟಮ್ ಚಾಲು ಕೆಲೊ.

"ಆಜ್ ಮೈನೆ ಸಬ್‌ಕುಚ್ ಪಾಲಿಯಾ. ಮೆರೆ ರಾಮ್‌ನೆ ಮೆರಾ ಸಾಥ್ ದಿಯಾ. ನಾ ಗಮ್ ಹೈ, ನಾ ಶಿಕ್ವಾ ಹೈ. ಮುಜೆ ಬಸ್, ತೆರಾ ಮೌತ್‌ಕಾ ಇಂತ್‌ಜಾರ್ ಹೈ"

ಭಾವನಾನ್ ಪಾಕ್ಯಾಕ್ ಪುರಾಕ್ ಪಡ್ತಾ ಪರ್ಯಾಂತ್ ಕುಕಾರ್‍ಯೊ ಮಾರ್ಲ್ಯೊ.

ಫಾರಿಕ್ಪಣಾಚೊ ದುಸ್ರೊ ಹಂತ್ ಸಂಪ್‌ಲ್ಲೊ.

*****

ಎಕಾ ವರ್ಸಾ ಉಪ್ರಾಂತ್..

ಧವಿ ಸಾಡಿ ನ್ಹೆಸ್‌ಲ್ಲೆಂ ಭಾವನಾ ಅಜಯಾಕ್ ಮೆಳೊಂಕ್ ದೆಜೊಪಾಡಾಚ್ಯಾ ಸೆಂಟ್ರಲ್ ಜಯ್ಲಾಕ್ ಪಾವ್ಲೆಂ.

ನಿಮಾಣಿ ಬೆಟ್!

ವಿಝಿಟಿಂಗ್ ಹೊಲಾಚ್ಯಾ ಜಾಳಿ ಪಾಟ್ಲ್ಯಾನ್ ಅಜಯ್ ಉಭೊ ಆಸ್‌ಲ್ಲೊ. ದೊಳೆ ಫೊಂಡಾರ್ ದೆಂವ್‌ಲ್ಲೆ. ಖಾಡ್ ವಾಡ್‌ಲ್ಲೆಂ. ಭಿಕಾರ್‍ಯಾ ಪರಿಂ ತೊ ದಿಸ್ತಾಲೊ.

"ಫಾಲ್ಯಾಂ ಫಾಂತ್ಯಾರ್..." ಲಾಗಿಂ ಪಾವ್‌ಲ್ಲ್ಯಾ ಭಾವನಾನ್ ಉತ್ರಾಂ ವಿಂಚ್ಲಿಂ. ಹ್ಯಾ ಸಂಸಾರಾಕ್ ತುಂ ಆದೇವ್ಸ್ ಮಾಗ್ತೊಲೊಯ್" ಕಸಲಿಂಚ್ ಭಾವನಾಂ ತಾಚ್ಯಾ ಮುಸ್ಕರಾರ್ ನಾತ್‌ಲ್ಲಿಂ. ತುಕಾ ವಾಂಚವ್ಚ್ಯಾ ಪಾಸ್ವತ್ ಜಾಯ್ತಿಂ ಪ್ರಯತ್ನಾಂ ಹಾಂವೆಂ ಕೆಲಿಂ. ಸೆಶನ್ ಕೊರ್ಟಾ ಥಾವ್ನ್ ಹಾಯ್ ಕೊಡ್ತಿಕ್, ಹಾಯ್ ಕೊಡ್ತಿ ಥಾವ್ನ್ ಸುಪ್ರಿನ್ ಕೊಡ್ತಿ ಪರ್ಯಾಂತ್ ಹಾಂವ್ ಝುಜ್ಲಿಂ ಆನಿಂ ಸಲ್ವಾಲಿಂ ಆನಿಂ ನಿಮಾಣೆಂ ರಾಷ್ಟ್ರಪತಿಕ್ ಸಯ್ತ್ ದಯಾ ಭಿಕೆಚಿ ವಿನಂತಿ ಕೆಲಿ. ಕೊಣ್‌ಚ್ ತುಕಾ ಭಗ್ಸುಂಕ್ ತಯಾರ್ ನಾ ಜಾಲೊ."

"ಹಾಂವ್ ನಿರಾಪ್ರಾಧಿ ಜಾವ್ನಾಸಾಂ" ತೊ ರಡ್ಲೊ. "ಹ್ಯಾ ದೇಶಾಚೆಂ ಕಾನೂನ್ ಆಂದ್ಳೆ ಜಾಲಾಂ".

"ತುಂ ಖುನಿಗಾರ್ ನಹಿಂ ಮ್ಹಣ್ ಫಕತ್ ಹಾಂವ್ ಜಾಣಾಂ. ಕಿತ್ಯಾಕ್ ಜ್ಯೋತ್ಸನಾ ಗುಪ್ತಾಚಿ ಖುನ್ ಹಾಂವೆಂ ಕೆಲ್ಲಿ" ಭಾವನಾ ಹಾಸ್ಲೆಂ.

"ವೊಟ್?" ಉಡೊನ್ ಪಡ್ಲೊ ಅಜಯ್.

"ತುವೆಂ ಮ್ಹಜ್ಯಾ ಮೊಗಾಚೊ ಘಾತ್ ಕೆಲೊಯ್ ಆನಿಂ ಹಾಂವೆಂ ಪ್ರತಿಕಾರ್ ಘೆತ್ಲೊ. ತುಜೊ ಹಾವೆಂ ಕಾಳ್ಜಾಚ್ಯಾ ಗೂಂಡಾಯೆ ಥಾವ್ನ್ ಮೋಗ್ ಕೆಲ್ಲೊ. ಏಕ್ ಮಾಮೂಲಿ ಬೆಂಕ್ ಕ್ಲಾರ್ಕ್ ಜಾವ್ನಾಸ್‌ಲ್ಲ್ಯಾ ತುಜೆಂ ಸವೆಂ ಲಗ್ನ್ ಹಾಂವ್ ಜಾಲಿಂ. ಲಾಂಭಾಯೆಚಿಂ ಪಾಂಚ್ ವರ್ಸಾಂ ತುಜೆಂ ಸವೆಂ ಪಾಶಾರ್ ಕೆಲಿಂ. ತುವೆಂ ಮ್ಹಾಕಾ ಕಿತೆಂ ದಿಲೆಂಯ್? ವಿಶ್ವಾಸ್ ಘಾತ್ ಕೆಲೊಯ್ ಮ್ಹಜ್ಯಾ ಮೊಗಾಚೊ. ಕಾಳ್ಜಾಚೆ ಹಜಾರ್ ಕುಡ್ಕೆ ಕೆಲೆಯ್. ಜ್ಯೋತ್ಸನಾ ಗುಪ್ತಾ ಸವೆಂ ಶರೀರಿಕ್ ಸಂಬಂಧ್ ದವರ್ನ್ ಘೆತ್ಲೊಯ್. ತುಜೆಂ ಶರೀರ್ ತುವೆಂ ಅಪವಿತ್ರ್ ಕರುನ್ ಘೆತ್ಲೆಂಯ್. ತುಕಾ ಹಾಂವ್ ಕಶೆಂ ಭಗ್ಶಿತೆಲಿಂ? ತುಜೊ ಹಾಂವ್ ಕಾಳ್ಜಾಚ್ಯಾ ಗುಂಡಾಯೆ ಥಾವ್ನ್ ದ್ವೇಷ್ ಕರ್ತಾಂ" ತೆಂ ಖರ್ಶೆಂವ್ಕ್ ಲಾಗ್ಲೆಂ. "ಕಸಲೊಚ್ ಪಶ್ಚಾತ್ತಾಪ್ ನಾ ಮ್ಹಜೆಂ ಥಂಯ್."

"ತುಜೆ ಹಾತ್ ರಗ್ತಾಂತ್ ಬುಡ್ಲ್ಯಾತ್. ಜ್ಯೋತ್ಸನಾಚಿ ಗೊಮ್ಟಿ ತುವೆಂ ಲುಂವೊಂಕ್ ನಜೊ ಆಸ್‌ಲ್ಲಿ."

"ತುಜಿಯಿ ಗೊಮ್ಟಿ ಹಾಂವ್ ಲುಂವ್ತಿಂ ಆಸ್‌ಲ್ಲಿಂ. ಪುಣ್....... ಫಾಶಿಯೆಕ್ ಉಮ್ಕಾಳೊಂಕ್ ಮ್ಹಾಕಾ ನಾಕಾ ಆಸ್‌ಲ್ಲೆಂ. ಎಕಾ ಫಾತ್ರಾನ್ ದೋನ್ ಶಿಕಾರಿ ಹಾಂವೆಂ ಕೆಲ್ಯಾತ್. ಭಾವನಾ ಮೋಗ್ ಕರುಂಕ್‌ಯಿ ಜಾಣಾ, ಭಾವನಾ ದ್ವೇಷ್ ಕರುಂಕ್‌ಯಿ ಜಾಣಾಂ"

"ಮ್ಹಾಕಾ ವಾಂಚವ್ಚೆಂ ಪ್ರಯತ್ನ್ ಕಿತ್ಯಾಕ್ ಕೆಲೆಂಯ್?"

"ನಾಟಕ್, ಫಕತ್ ನಾಟಕ್! ಸಂಸಾರಾಕ್ ಕಾನೂನಾಕ್ ಮಾಂಕೊಡ್ ಕರುಂಕ್ ಆಸ್‌ಲ್ಲೆಂ ಹಾಂವೆಂ. ಎಕಾ ವಿ. ಐ. ಪಿ. ಮನ್ಶ್ಯಾಚ್ಯಾ ಬಾಯ್ಲೆಚ್ಯಾ ಖುನಿಯೆಂತ್ ಸಾಂಪ್ಡಾಲ್ಲ್ಯಾಕ್ ಕಸಲಿ ಶಿಕ್ಷಾ ಮೆಳ್ತೆಲಿ ಮ್ಹಣ್ ಪಯ್ಲೆಂಚ್ ಹಾಂವ್ ಜಾಣಾಂ ಆಸ್‌ಲ್ಲಿಂ"

"ಚುರಿಯೆಚ್ಯಾ ಹಾತಾಳ್ಯಾರ್ ಮ್ಹಜೆಂ ಫಿಂಗರ್ ಪ್ರಿಂಟ್ಸ್ ಕಶೆಂ ಉದೆಲೆ?"

"ಹ್ಯಾ ಸವಾಲಾಚಿ ಜಾಪ್ ಪೆಲ್ಯಾ ಸಂಸರಾಂತ್ ತುಕಾ ಮೆಳ್ತೆಲಿ" ಭಾವನಾಚ್ಯಾ ಮುಸ್ಕರಾರ್ ಕ್ರೂರ್ ಹಾಸೊ ಉದೆಲ್ಯೊ.

"ಫಕತ್ತ್ ಥೊಡಿಂ ವೊರಾಂ ಉರ್ಲ್ಯಾಂತ್ ತುಜ್ಯಾ ಜಿವಿತಾಂತ್ಲಿಂ. ಅಧಿಕಾರಿಂಚೆ ಕಾನ್ ತುಂವೆಂ ಫುಂಕ್ಯೆತ್. ಪುಣ್............ಕಾನೂನ್ ತುಕಾ ಪಾತ್ಯೆಂವ್ಚೆಂ ನಾ. ಕಸಲಿಚ್ ರುಜ್ವಾತ್ ನಾ ಕಾನೂನಾಲಾಗಿಂ, ಜ್ಯೋತ್ಸನಾ ಗುಪ್ತಾಚಿ ಖುನ್ ಹಾಂವೆಂ ಕೆಲ್ಲಿ ಮ್ಹಣ್. ಸರ್ವ್ ಖೊಲೆ ಹಾಂವೆಂ ಶಾಬಿತಾಯೆನ್ ಸಾಂಬಾಳ್ಳ್ಯಾತ್ ಬೇಕುಫ್ ಮನ್ಶ್ಯಾ"

ಅಜಯ್ ರಡೊಂಕ್ ಲಾಗ್ಲೊ.

"ಭಾವನಾಚೆಂ ಧಾರುಣ್ ಜಾಲ್ಲೆಂ ಕಾಳಿಜ್ ಪಿಗಳ್ಳೆಂ ನಾ.

"ಮ್ಹಾಕಾ ಭಗ್ಸಿ ಭಾವನಾ. ಹ್ಯಾ ಜನ್ಮಾಂತ್ ತುಕಾ ಹಾಂವೆಂ ಘಾತ್ ಕೆಲೊ. ಫುಡ್ಲ್ಯಾ ಜನ್ಮಾಂತ್...."

"ಆಪ್ಲೆಂ ಭುರ್ಶೆಂ ತೊಂಡ್ ಧಾಂಪ್ ಸುಣ್ಯಾ" ಭಾವನಾಚ್ಯಾ ದೊಳ್ಯಾಂನಿ ಉಜೊ ದೆಂವ್ಲೊ. "ಫುಡ್ಲ್ಯಾ ಜನ್ಮಾಂತ್ ಪತಿ ಜಾವ್ನ್ ಯೆಂವ್ಚೆಂ ಭಾಗ್ ತುವೆಂ ಹೊಗ್ಡಾಯ್ಲಾಂಯ್".

"ಭಾವನಾ.....ಭಾವನಾ..." ಹುಸ್ಕಾರ್ಲೊ ಅಜಯ್. "ಹಾಂವ್ ಮೊರೊಂಕ್ ತಯಾರ್ ಆಸಾಂ. ಮ್ಹಜ್ಯಾ ಅತ್ಮ್ಯಾಕ್ ಶಾಂತಿ ಮೆಳ್ಚ್ಯಾ ಖಾತಿರ್ ತರಿ ಮ್ಹಾಕಾ ಭೊಗ್ಶಿ."

"ಗುಡ್ ಬಾಯ್ ಮಿಸ್ಟರ್ ಚಾಂಪಿಯನ್" ಭಾವನಾಚಿ ಪಾವ್ಲಾಂ ಹೊಲಾ ಥಾವ್ನ್ ಭಾಯ್ರ್ ವಚೊಂಕ್ ಲಾಗ್ಲಿಂ.

ಅಜಯ್ ಕಸ್ಕಸೊನ್ ರಡೊಂಕ್ ಲಾಗ್ಲೊ.

******

ದುಸ್ರ್ಯಾ ಫಾಂತ್ಯಾರ್ ...

ಅಜಯ್ ಭಾರ್ಗವಾಚಿ ಫಾಶಿ ಜಾಲಿ.

ಭಾವನಾ ಫಾರಿಕ್ಪಣಾಚ್ಯಾ ರಗ್ತಾಳ್ಯಾ ಖೆಳಾಂತ್ ಜಿಕ್‌ಲ್ಲೆಂ.

[ಸಮಾಪ್ತ್]

ಕಥಾದಾಯ್ಜ್ ಪಾನಾಕ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications