ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 69. ಕೊಂಕ್ಣೆ ಖಾತಿರ್!?
ನವೀನ್ ಕುಲ್ಶೇಕರ್: ಮುಂಬಯಾಂತ್ ವಸ್ತಿ ಕರುನ್ ಆಸ್ಚೊ ಕುಲ್ಶೇಕರ್ಚೊ ನವೀನ್, ಕೊಂಕ್ಣೆಂತ್ಲ್ಯಾ ಮಾಲ್ಘಡ್ಯಾ ಲೇಖಕಾಂ ಮಧ್ಲೊ ಎಕ್ಲೊ. ಕಾಣ್ಯೊ, ಕವಿತಾ, ಲೇಖನಾಂ, ವಿಡಂಬನಾಂ, ಹಾಸೊ, ಅನುವಾದಾಂ ತೊ ಬರಯ್ತಾ. ಕೊಂಕ್ಣೆಶಿವಾಯ್ ಕಾನಡಿ, ಹಿಂದಿ ಭಾಸಾಂನಿ ಸಯ್ತ್ ಬರಯ್ತಾ. ಚಡ್ತಾವ್ ಜಾವ್ನ್ ಸಾಮಾಜಿಕ್ ಕಾಣ್ಯೊ ಬರಂವ್ಚ್ಯಾ ಹಾಣೆಂ ವಿಂಸ್ಚೊ ವಿಶಯ್ ಸಾಮಾಜಿಕ್ ದೆಕುನ್ ಚಡ್ತಾವ್ ಲೋಕ್ ಹಾಚಿಂ ಬರ್ಪಾಂ ಖಾಯ್ಸ್ ಕರ್ತಾ.
ನವೀನ್ ಕುಲ್ಶೇಕರ್
ಸಬಾರ್ ವರ್ಸಾಂ ಉಪ್ರಾಂತ್ ಗಾಂವಾಕ್ ಪಾವ್ಲ್ಲ್ಯಾ ಮ್ಹಕಾ ಸುದ್ರಾಲ್ಲೊ ಮ್ಹಜೆ ಗಾಂವ್ ಪಳವ್ನ್ ವರ್ತೊ ಸಂತೊಸ್ ಭಗ್ಲೊ.
ಉರ್ವಾ ಥಾವ್ನ್ ಭಿಸ್ಪಾಚ್ಯಾ ಘರಾ ಕೊಡಿಯಾಲ್ಬೈಲ್ ಪರ್ಯಾಂತ್ ಪಾವ್ತಾಂ ಪಾವ್ತಾಂ ಭಂವ್ತಣಿಂ ಜಾಲ್ಲೆಂ ಸುದ್ರಾಪ್ ಪಳವ್ನ್ ನಿಜಾಯ್ಕ್ಯ್ ಮ್ಹಜ್ಯಾ ಮಂಗ್ಳುರಾ ವಯ್ರ್ ವರ್ತೊ ಅಭಿಮಾನ್ ಭರ್ಲೊ.
ರೂಂದ್ ರಸ್ತೆ, ಊಂಚ್ ಬಿಲ್ಡಿಂಗಾಂ ಥಾಂವ್ಚ್ಯಾ ವಾಹನಾಂಚಿ ಖಾತಡ್, ರಂಗೀನ್ ವಸ್ತ್ರಾಂನಿ ರೆವ್ಡಾಲ್ಲಿಂ ಕಾಲೇಜಿಚೆಂ ಭುರ್ಗಿಂ, ಬಾಯ್ಕಾಂನಿ ವೆಗಾನ್ ಧಾಂವ್ಚೆ ತರ್ನಾಟೆ, ಹಾಂಕಾಂ ಪಳವ್ನ್ ಹಾಮ್ವ್ ಎಕಾ ಮಹಾನಗರಾಂತ್ ಆಸಾಂ ತಶೆಂ ಭಗ್ಲೆಂ.
ಮ್ಹಜೆಂ ಘರ್ ಮ್ಹಳ್ಯಾರ್ ಮ್ಹಜ್ಯಾ ಆವಯ್ ಬಾಪಾಯ್ಚೆಂ ಘರ್ ಕಂಕ್ನಾಡಿ ಮಾರ್ಕೆಟಿ ಲಾಗ್ಸಾರ್ ಆಸ್ಲ್ಲ್ಯಾನ್ ಹಂಪನ್ಕಟ್ಟಾ ಥಾವ್ನ್ ಫಳ್ನೀರ್ಚಾ ರಸ್ತ್ಯಾನ್ ಆಯ್ಲ್ಯಾರ್ ವಾಟ್ ಲಾಗಿಂ ಜಾತಾಲಿ.
ಘರಾ ಮ್ಹಜೊ ಆನ್ ಆನಿ ಮಾಂಯ್ ದೊಗಾಂಚ್ ಆಸ್ಲ್ಲಿಂ ಆನ್ ಮ್ಹಜೊ ಆತಾಂಯ್ ಕಾಮ್ ಕರ್ತಾಲೊ. ಕಂಕ್ನಾಡಿ ಆಸ್ಚತ್ರೆಚೊ ಗೇಟ್ಕೀಪರ್ ಜಾವ್ನ್.
ತಾಂಚೊ ಹಾಂವ್ ಎಕ್ಲೊಂಚ್ ಪೂತ್. ಬಿ.ಎ. ಶಿಕ್ಶಣ್ ಜಾತಚ್ ಹಾವೆಂ ಮುಂಬಯಿಚಿ ವಾಟ್ ದರ್ಲ್ಲಿ. ಮುಂಬಯಿ ಶ್ಹೆರಾನ್ ಮ್ಹಾಕಾ ಸಗ್ಳೊಚ್ ಬದ್ಲಿಲ್ಲೊ. ಗಾಂವ್ಚೊ ಉಡಾಸ್ ಹಾಂವ್ ಸಗ್ಳೊಚ್ ವಿಸ್ರಾಲ್ಲೊಂ. ತಶೆಂ ಮ್ಹಣ್ ಆವಯ್ ಬಾಪಾಯ್ಕ್ ವಿಸ್ರೊಂಕ್ ನಾ. ಹರ್ಯೆಕಾ ಮಹಿನ್ಯಾಕ್ ಪಯ್ಶೆ ಆನಿ ಏಕ್ ಚೀಟ್ ಸರಾಗ್ ವೆತಾಲೆಂ.
ಲಗ್ಬಗ್ ಪಾಂಚ್ ವರ್ಸಾಂ ಉಪ್ರಾಂತ್ ಹಾಂವ್ ಪಯ್ಲೆ ಪಾವ್ಟಿಂ ಹಾಂವ್ ಗಾಂವಾಕ್ ಪಾವ್ಲ್ಲೊಂ. ಮಾಂಯ್ನ್ ರಡೊನ್ ಮ್ಹಳ್ಳೆಪರಿಂ ಆಪಯಿಲ್ಲ್ಯಾನ್ ಹಾಂವ್ ಗಾಂವಾಕ್ ಪಾವ್ಲೊ ಭರ್ತಿ ಎಕಾ ಮಹಿನ್ಯಾಚ್ಯಾ ರಜೆರ್.
ಗಾವಾಂಕ್ ಪಾವ್ಲ್ಲೊ ತಿಸ್ರೊ ದೀಸ್ ಆಯ್ತಾರ್. ಸಾಕಾಳಿಂ ಆನಾ ಮಾಂಯ್ ಸಾಂಗಾತಾ ಮಿಲಾರ್ ಇಗರ್ಜೆಂತ್ ಆಟ್ ವೊರಾಂಚಾ ಮಿಸಾಕ್ ಗೆಲೊಂ. ಇಗರ್ಜ್ ಭರುನ್ ಲೋಕ್ ಜಶೆಂ ಬೆಂಡ್ರಾ ಮೌಂಟ್ ಮೇರಿಚ್ಯಾ ಇಗರ್ಜೆಂತ್ ಭರ್ತಾಲೊ. ಮ್ಹಾಕಾ ಪಳವ್ನ್ ಸಭಾರಾಂಚ್ಯೊ ಆಸ್ಡ್ಯೊ ವಯ್ರ್ ಗೆಲ್ಲ್ಯಾಂತ್ ನವಾಲ್ ನಾ! ಪಾಂಚ್ ವರ್ಸಾಂ ಉಪ್ರಾಂತ್ ತರ್ ಹಾಂವ್ ಆಯ್ಲಾಂ!
ಥೊಡ್ಯೊ ತರ್ನ್ಯೊ ಚಲಿಯೊಯ್ ಮ್ಹಾಕಾ ವಾಂಕ್ಡ್ಯಾ ನದ್ರೆನ್ ಮ್ಹಾಕಾ ಪಳೆತಾಲ್ಯೊ. ಆನಿ ಹಾಂವ್ ಭರ್ಮಾನ್ ಮ್ಹಜೆಸ್ಥಕಿಂ ಹಾಸ್ತಾಲೊಂ.
"ಪೂತ್ ಆಯ್ಲಾ ದುಲ್ಸಿನಾ....?" ಮಾಂಯ್ಚಾ ವಳ್ಕಿಚ್ಯಾ ಎಕಾ ಸ್ತ್ರೀಯೆನ್ ವಿಚಾರ್ಲೆಂ. "ಕಾಜಾರ್ ಪುಣಿ ಆಸಾ.....?" ಪರತ್ ತಿಚೆಂಚ್ ಸವಾಲ್.
ಮಾಂಯ್ ಹಾಸ್ಲಿ ಮಾತ್ರ್. ತಿ ಕಾಂಯ್ ಉಲಯ್ಲಿ ನಾ.
ಮೀಸ್ ಜಾಲೆಂ ಸವಾ ನೊವಾಂಕ್.
"ತಾಜ್ ಮಹಲಾಕ್ ವಚೊನ್ ನಾಸ್ಟೊ ಕರಿಯಾಂ!" ಹಾಂವೆಂ ಮ್ಹಳೆಂ
"ಘರಾ ಪೊಳೆ ಕರುನ್ ದವರ್ಲ್ಯಾತ್ ಪುತಾ.....!" ಮಾಂಯ್ ಪಿಂರ್ಗಾಲಿ.
"ತೆ ದನ್ಪಾರಾಂ ಮಾಸಾ ಸಂಗಿಂ ಖಾವ್ಯೆತ್ ಮಾಂಯ್!" ಹಾವೆಂ ಮ್ಹಳೆಂ. ಆನ್ ಚಡ್ ಉಲಯ್ನಾತ್ಲ್ಲೊ. ಆಮಿ ತೆಗಾಂಯ್ನ್ಯ್ ತಾಜ್ಮಹಲಾ ಕುಶಿಕ್ ಮೆಟಾಂ ಕಾಡ್ಲಿಂ.
"ಶ್ಯೂ..... ಶ್ಯೂ...."
ಮ್ಹಜ್ಯಾ ಪಾಟ್ಲ್ಯಾನ್ ಏಕ್ ಆವಾಜ್ ಅಯ್ಕಾಲೊ. ಮಾಂಯ್ನ್ ಪಾಟಿಂ ಪಳೆಲೆಂ.
"ಆಳೆ ಪುತಾ, ಕೋಣ್ ತುಕಾ ಆಪಯ್ತಾ....!" ಮ್ಹಣಾಲಿ ತಿ.
"ಕೋಣ್ ಮಾಂಯ್?" ಹಾಂವ್ ಪಾಟಿಂ ಘುಂವ್ಲೊಂ. ಪಾಟ್ಲ್ಯಾನ್ ಏಕ್ ಹಾಡ್ಕುಟ್ಯಾ ಜಿವಾಚೊ ಮಾತಾರೊಸೊ ವ್ಯಕ್ತಿ ಉಭೊ ಆಸ್ಲ್ಲೊ. ತಾಚ್ಯ್ ತೊಂಡಾರ್ ಅರ್ಧೆಂ ಕುರೆಂ ಪಿಕೆಂ ಕಾಡ್ ಆಸ್ಲ್ಲೆಂ.
"ತುಂ ಲೊರಿ ನ್ಹಯ್ವೇ......? ಹಾಂವ್ ಜಾಕಿ! ಪಂಪ್ವೆಲ್ಚೊ....!" ತೊ ಮ್ಹಣಾಲೊ.
"ಜಾಕಿ.....!?" ಹಾಂವ್ ಚಿಂತುಂಕ್ ಪಡ್ಲೊಂ. ಮಾಂಯ್ ಆನಿ ಆನ್ ಮ್ಹಜೆ ಸರ್ಶಿನ್ ಉಭಿಂ ಜಲಿಂ.
"ಕೊಂಕಣ್ ಗಾಂವ್ ಪತ್ರ್ ವಾಚ್ಲಾಂಯ್ ತುವೆಂ....?" ತೊ ವಿಚಾರಿ
"ವ್ಹಯ್ ಬಂದ್ ಜಾಲಾಂ ನ್ಹಯ್ವೇ.....?"
"ವ್ಹಯ್ ಬಂದ್ ಜಾಲಾಂ. ತ್ಯಾಚ್ ಪತ್ರಾಚೊ ಸ್ಥಾಪಕ್, ಸಂಪಾದಕ್ ಆನಿ ಪ್ರಕಾಶಕ್ ಹಾಂವ್ ಜಾಕಿ ಸೊಜ್!" ತೊ ಬಾವ್ಡೊ ಜಾಲೊ.
"ಅರೇ....., ತುಂ ಜಾಕಿಯಾಮ್......? ತುಜಿ ವಳಕ್ಚ್ ಮೆಳ್ಳಿನಾ. ಚಲ್ ಚಲ್.... ಆಮ್ಚೆ ಸಂಗಿಂ ನಾಸ್ಟೊ ಕರಿಯಾಂ....!"
ಹಾವೆಂ ತಾಚೊ ಹಾತ್ ಧರ್ಲೊ.
ತೊ ಹಾತ್ ಇತ್ಲೊ ಥಂಡ್ ಆಸ್ಲ್ಲೊಕೀ ಕಾಂಯ್ಚ್ ರಗಾತ್ ವ್ಹಾಳಾನಾ ತಶೆಂ ಭಗ್ಲೆಂ ಮ್ಹಾಕಾ.
ಆನ್ ಆನಿ ಮಾಂಯ್ ಮ್ಹಾಕಾ ಏಕ್ ಪಾವ್ಟಿಂ ಆನಿ ತಾಕಾ ಏಕ್ ಪಾವ್ಟಿಂ ಪಳೆಲಾಗ್ಲಿಂ. ಮಾಗಿರ್ ಆಮಿ ಚವ್ಗಾಂಯ್ ತಾಜ್ ಮಹಲಾಕ್ ಗೆಲ್ಯಾಂವ್. ಎಕಾ ಪೊಂತಾರ್ ಏಕ್ ಮೇಜ್ ಖಾಲಿ ಆಸ್ಲ್ಲೆಂ ಥಂಯ್ಚರ್ ಆಮಿಂ ಬಸ್ಲ್ಯಾಂವ್.
ಹಾವೆಂ ನಾಸ್ಟೊ ಆರ್ಡಾರ್ ಕೆಲೊ.
"ಆನಾ...., ಮಾಂಯ್...., ಹೊ ಜಾಕಿಯಾಬ್ ಬರೊ ಬರಯ್ಣಾರ್ ಕೊಂಕ್ಣಿ ಬರಯ್ಣಾರ್ ಜಾವ್ನ್ ಆಸ್ಲ್ಲೊ. ತಾಚೆಂ ಕೊಂಕ್ಣಿ ಹಪ್ತಾಳೆಂ ಆಸ್ಲ್ಲೆಂ. ಕೊಂಕಣ್ ಗಾಂವ್!....." ಹಾವೆಂ ಸಾಂಗ್ತಾನಾ ಆನಾಚೆ ದೊಳೆ ರುಂದಾಲೆ.
"ತಾಂತುಂ ತುಜಿ ಏಕ್ ಕಾಣಿ ಆಯಿಲ್ಲಿ!" ಆನ್ ಮ್ಹಣಾಲೊ.
"ವ್ಹಯ್ ಆನಾ! ತಿಚ್ ಪಯ್ಲಿ ಆನ್ ಅಖ್ರೇಚಿ......!" ಹಾವೆಂ ಮ್ಹಳೆಂ
"ತುವೆಂ ಆನಿಕ್ಯೀ ಬರಂವ್ಕ್ ಜಾಯ್ ಲೊರಿ!" ಜಾಕಿ ಮ್ಹಣಾಲೊ.
"ಕಿತ್ಯಾಕ್ ಜಾಕಿಯಾಬ್? ಕಿತೆಂ ಮೆಳ್ತಾ ಮ್ಹಣೊನ್......? ತೆಂ ಸೊಡ್ಯಾಂ. ಪತ್ರ್ ಕಿತ್ಯಾಕ್ ಬಂಧ್ ಕೆಲೆಂಯ್?"
"ಕಿತೆಂ ಕರ್ಚೆಂ ಲೊರಿ.....? ಆಮ್ಚ್ಯಾ ಕೊಂಕ್ಣಿ ಮನ್ಶ್ಯಾಂನಿ ಸಹಕಾರ್ ದಿಲೊ ನಾ. ಹಪ್ತ್ಯಾಕ್ ಪಾಂಚ್ ಹಜಾರ್ ಛಾಪ್ಲೆಲ್ಯೊ ಪ್ರತಿಯೊ ಸುರ್ವೆ ಸುರ್ವೆಕ್ ಉಪ್ರಾಂತ್ ಉಣ್ಯೊ ಜಾಲ್ಯೊ ಶಿವಾಯ್ ಚಡ್ಲ್ಯೊ ನಾಂತ್....!"
"ಓಹ್! ಖಂಡಿತ್ ಬೆಜಾರಾಯೆಚಿ ಗಜಾಲ್! ಇತ್ಲೊ ಕೊಂಕ್ಣಿ ಲೋಕ್ ಆಸಾ ಗಾವಾಂತ್.....!"
"ಆಸಾ ಆಸಾ...... ಆಸ್ಲ್ಲ್ಯಾ ಲೊಕಾ ಸಂಖ್ಯಾಂತ್ ಧಾ ಪರ್ಸೆಂಟ್ ಲೊಕಾಂನಿ ಪತ್ರ್ ಘೆತ್ಲೆಲೆಂ ಜಾಲ್ಯಾರ್ ’ಕೊಂಕಣ್ ಗಾಂವ್’ ಪತ್ರಾಚ್ಯೊ ಪನ್ನಾಸ್ ಹಜಾರ್ ಪ್ರತಿಯೊ ಜಾತ್ಯೊ ಲೊರಿ. ದಾರಾಳ್ ಜಾಹಿರಾತಾಂ ಮೆಳ್ತಿಂ. ಲೇಖಕಾಂಕ್ ಸಂಭಾವನ್ ದಿವ್ಯೆತೆಂ. ಪುಣ್ ಧಾ ಪರ್ಸಂತ್ ಸೊಡ್ ಏಕ್ ಪರ್ಸಂಟ್ ಲೋಕ್ಯ್ ಘೆನಾಂತ್ ನ್ಹಯ್ವೇ....." ಜಾಕಿಯಾಬ್ ಸುಸ್ಕಾರ್ಲೊ.
"ಖಂಡಿತ್ ಪಾಡ್....!" ಹಾವೆಂ ಮ್ಹಳೆಂ.
"ನಿಜಾಯ್ಕ್ಯೀ ಲೊರಿ, ಆಮ್ಚೊ ಲೋಕ್ ಆಮ್ಚಾ ಭಾಶೆ ಥಂಯ್ ಉದಾಸಿ ಆನಿ ಅನುಪ್ಕಾರಿ! ಆವಯ್ಚಾ ಉಸ್ಕ್ಯಾರ್ ಶಿಕ್ಲೆಲಿ ಭಾಸ್ ಚ್ಯಾರ್ ಕ್ಲಾಸಿ ಶಿಕ್ಲೆ ಮ್ಹಣ್ತಚ್ ವಿಸರ್ತಾತ್ ಆನಿ ಪಾಶ್ಚಾತ್ಯ್ ಭಾಶೆಕ್ ವೆಂಗ್ತಾತ್. ಆಶೆಂ ಜಾಲ್ಯಾರ್ ಪತ್ರ್ ಕಶೆಂ ಚಲಂವ್ಚೆಂ? ಕೊಣಾ ಖಾತಿರ್ ಚಲಂವ್ಚೆಂ? ಹಪ್ತ್ಯಾನ್ ಹಾಫ್ತೊ ಭಾಯ್ರ್ ಕಾಡಿಜಾಯ್ ಜಾಲ್ಯಾರ್ ಜಿವಾರ್ ಯೆತಾಲೆಂ. ಕಾಗ್ದಾಕ್ ಪಯ್ಶೆ, ಕಾಮ್ಗಾರಾಂಕ್ ಪಯ್ಶೆ, ಪ್ರಿಂಟಿಂಗಾಕ್ ಪಯ್ಶೆ ಮ್ಹಣ್ತಾನಾ ಘರಾಂತ್ಲೆಂ ಆಸ್ಲ್ಲೆ ಪಯ್ಶೆ ಕಾಬಾರ್ ಜಾವ್ನ್ ರೀಣ್ ಘೆತ್ಲೆಂ. ಪುಣ್ ಕಾಣ್ಗೆಲ್ಲೆಂ ರೀಣ್ ಪಾಟಿಂ ದೀಜೆ ನ್ಹಯ್ವೇ? ಬರೆಂ ಜಾಲೆಂ ಹಾವೆಂ ಕಾಜಾರ್ ಜಾಯ್ನಾತ್ಲ್ಲೆಂ..... ನಾ ತರ್ ಬಾಯ್ಲೆ ಭುರ್ಗ್ಯಾಮ್ಚಿ ಗತ್ ಜಾತಿ" ಜಾಕಿಯಾಬ್ ಆಪ್ಲ್ಯಾ ಪೊಟಾಚೆ ಜಾಳ್ ಸಾಂಗಾಲಾಗ್ಲೊ.
ತಿತ್ಲ್ಯಾರ್ ಆರ್ಡರ್ ಕೆಲ್ಲೊ ನಾಸ್ಟೊ ಆಯ್ಲೊ. ಜಾಕಿಯಾಬ್ ಬೋವ್ಶಾ ಭುಕೆಲ್ಲೊ ಆಸ್ತಲೊ. ಖಾ.. ಘೆ.. ಮ್ಹಣ್ ಸಾಂಗ್ಚಾ ಪಯ್ಲೆಂಚ್ ಆಪ್ಲಿ ಪ್ಲೇಟ್ ಘೆವ್ನ್ ಖಾಂವ್ಕ್ ಲಾಗ್ಲೊ.
ಎಕಾ ಕೊಂಕ್ಣಿ ಬರಯ್ಣಾರ್, ಪ್ರಕಾಶಕ್, ಸಂಪಾದಕಾಚಿ ಹಿ ಗತ್ ಪಳವ್ನ್ ಮ್ಹಾಕಾ ದೂಖ್ ಆಯ್ಲೆಂ.
"ಆತಾಂ ಕಿತೆಂ ಕರ್ತಾಯ್ ಜಾಕಿಯಾಬಾ.....?" ಹಾವೆಂ ವಿಚಾರ್ಲೆಂ.
"ಕರ್ಚೆಂ ಕಿತೆಂ? ಮ್ಹಜೊ ಹೊ ಜೀವ್ ಪಲವ್ನ್ ಕೊಣ್ಯ್ ಕಾಮ್ ದೀನಾ, ಮ್ಹಾಕಾ ವಳ್ಕೊಂಚೆ ಥೊಡೆ ದುಡ್ವಾವಾಲೆ ಮ್ಹಜೆಲಾಗಿಂ ಯೇನಾಂತ್! ಮಾರ್ಕೆಟಿಂತ್ ಭಂವ್ತಾಂ! ಕೊಣಾಚಿಂ ವೊಜಿಂ ವರ್ಚಿಂ ಕಾಮಾಂ ಕರ್ತಾಂ ಆನಿ ಪೋಟ್ ಭರ್ತಾಂ.!"
"ಆನಿ ಘರಾ....?"
"ಘರ್ ಖಂಯ್ ಆಸಾ? ಆಸ್ಲ್ಲೆಂ ಬಾಡ್ಯಾಚೆಂ ಬಾಡೆಂ ಭರಿನಾತ್ಲ್ಯಾಕ್ ಧನಿಯಾನ್ ಭಾಯ್ರ್ ಘಾಲಾ!"
ಜಾಕಿಯಾಬ್ ರಡ್ಲೊ.
"ರಡಾನಾ ಜಾಕಿಯಾಬಾ..... ಮ್ಹಾಕಾ ದೂಖ್ ಪಳಂವ್ಕ್ ಜಾಯ್ನಾ. ತುಕಾ ರಾವೊಂಕ್ ಘರ್ ನಾ ಮ್ಹಣ್ತಾಯ್ ತರ್ ಆಮ್ಗೆರ್ ಯೆ. ಆಮ್ಚಾ ಘರಾ ಆಮಿ ದೊಗಾಂಚ್ ಆಸಾಂವ್. ತುಂ ಯೇವ್ನ್ ರಾವ್. ಪುಣ್ ದಿಸಾಕ್ ಕಸಲೆಂ ತರ್ಯ್ ಕಾಮ್ ಕರುನ್ ಪೊಟಾಚೊ ಗ್ರಾಸ್ ಜೋಡ್....!" ಮ್ಹಜೊ ಆನ್ ಮ್ಹಣಾಲೊ.
ಹಾವೆಂ ಆನಾಕ್ ಪಳೆಲೆಂ ತಾಚೆರ್ ಮ್ಹಾಕಾ ವ್ಹರ್ತೊ ಅಭಿಮಾನ್ ಭಗ್ಲೊ. ಮಾಂಯ್ ಆಮೃಕಿ ಹಾಸ್ತಾಲಿ.
ತಿತ್ಲ್ಯಾರ್ ಏಕ್ ಅನಿರೀಕ್ಶಿತ್ ಘಡಿತ್ ಘಡ್ಲೆಂ.
ದೋಗ್ ದಡಂಗ್ ಜಿವಾಚೆ ತರ್ನಾಟೆ ಆಮಿ ಬಸ್ಲೆಲ್ಯಾ ಕಡೆ ವೆಗಾನ್ ಆಯ್ಲೆ. ಆನಿ ಜಾಕಿಯಾಬಾಚ್ಯಾ ದೊನ್ಯ್ ಹಾತಾಂತ್ ದರುನ್ ವೊಡಿಲಾಗ್ಲೆ.
"ಅರೆ...ಅರೆ... ಹೆಂ ಕಿತೆಂ? ಕೋಣ್ ತುಮಿಂ?" ಹಾಂವ್ ರಾಗಾನ್ ಉಭೊ ರಾವ್ಲೊಂ.
"ತುಂ ಗಪ್ ಚುಪ್ ಬಸ್ ಮಿಸ್ಟರ್....! ಹ್ಯಾ ಮನ್ಶಾನ್ ಆಮ್ಚಾ ಧನಿಯಾಚೆ ಧಾ ಹಜಾರ್ ಘೆವ್ನ್ ವರ್ಸಾಂ ದೋನ್ ಜಾಲಿಂ ಆನಿಕ್ಯ್ ಫಾರಿಕ್ ಕರುಂಕ್ ನಾಂತ್. ದೆಕುನ್ ತಾಕಾ ಧರ್ನ್ ಹಾಡುಂಕ್ ಸಾಂಗ್ಲಾಂ!"
ಎಕ್ಲೊ ವ್ಹಡ್ಲ್ಯಾನ್ ಮ್ಹಣಾಲೊ. ಹೊಟೆಲಾಂತ್ಲೊ ಲೋಕ್ ಸಗ್ಳೊ ಆಮ್ಚೆಶಿಂ ಪಳೆಲಾಗ್ಲೊ.
"ತುಮ್ಚೊ ಧನಿ ಕೋಣ್....?" ಮ್ಹಜೊಯ್ ತಾಳೊ ಸಾದ್ಲೊ.
"ಘಾಟಾಗಾರ್ ಸಾಲು ಶೇಟ್!"
"ತುಮಿ ಹಾಕಾ ಸೊಡಾ ಆನಿ ಪಾಟಿಂ ವಚಾ. ಸಾಲು ಶೆಟಿಕ್ ಸಾಂಗಾಕೀ ತಾಚೆ ಪಯ್ಶೆ ತೊ ಘೆವ್ನ್ ಯೆತಲೊ ಮ್ಹಣ್.... ಚತ್ರಾಯ್ ಹ್ಯಾ ಫುಡೆಂ ತುಮಿ ಹಾಕಾ ದೊಶಿ ದಿಲ್ಯಾರ್.....!"
ಮ್ಹಜ್ಯಾ ಖಡಕ್ ತಾಳ್ಯಾಕ್ ತೆ ಮಾತ್ಶೆ ಘಾಬರ್ಲೆ. ಜಾಕಿಯಾಬಾಕ್ ತಾಣಿ ಸೊಡ್ಲೊ.
"ಕಸಲಿ ನಾಲಿಸಾಯ್? ಹಿ? ರೀಣ್ ಕಾಣ್ಗೆವ್ನ್ ಕಿತ್ಯಾಕ್ ತುವೆಂ ಪತ್ರ್ ಚಲಯ್ಲೆಂಯ್?" ಮ್ಹಜ್ಯಾ ಮಾಯ್ನ್ ವಿಚಾರ್ಲೆಂ.
"ಕಿತೆಂ ಕರುಂ ಬಾಯೆ, ಕೊಂಕ್ಣಿಚೊ ಮೋಗ್, ಕೊಂಕ್ಣಿ ಸಾಹಿತ್ಯಾಚೊ ಮೋಗ್.... ಹ್ಯಾ ಖಾತಿರ್ ಹಾವೆಂ ಸಗ್ಳೆಂ ಮ್ಹಜೆಂ ಜೀವನ್ ವಿಭಾಡ್ಲೆಂ.
ಆಮಿ ಚುಪ್ ಜಾಲ್ಯಾಂವ್.
ಆಪ್ಲ್ಯಾ ಮಾಂಯ್ಭಾಶೆಖಾತಿರ್ ಆಪ್ಲೆಂ ಸರ್ವಸ್ವ್ಚ್ ತ್ಯಾಗ್ ಕೆಲ್ಲ್ಯಾ ಎಕಾ ಕೊಂಕ್ಣಿ ಲೇಖಕ್, ಪ್ರಕಾಶಕ್ ಆನಿ ಬರಯ್ಣಾರಾಚಿ ಹಿ ಆವಸ್ಥಾ ಜಾಂವ್ಕ್ ಕಾರಾಣ್ ಕೋಣ್? ಹಾಂವ್ ಚಿಂತುಂಕ್ ಪಡ್ಲೊಂ. ಮಂಗ್ಳುರಾಂತ್ ಪಾಂಚ್ ಲಾಖ್ ಕೊಂಕ್ಣಿ ಕ್ರಿಸ್ತಾಂವ್ ಲೋಕ್ ಆಸೊನ್ ಫಾಯ್ದೊ ಕಿತೆಂ? ಹಾಂ ತ್ಯಾ ಪಾಂಚ್ ಪರ್ಸಂಟ್ ಲೊಕಾಂನಿ ಜರ್ತರ್ ’ಕೊಂಕಣ್ ಜಾಂವ್’ ಘೆತ್ಲೆಲೆಂ ಜಾಲ್ಯಾರ್, ಜಾಕಿಯಾಬಾಚಿ ಗತ್ ಆಶಿ ಜಾತಿ ನಾ.
"ಪುಣ್ ತುವೆಂ ಕಿತೆಂ ಕೆಲಾಂಯ್? ಬೊಂಬಯ್ ಪಾವ್ಲ್ಯಾ ಉಪ್ರಾಂತ್ ಕೊಂಕ್ಣಿ ಪತ್ರಾಂ ಥಂಯ್ ಘುಂವೊನ್ ತರೀ ಪಳೆಲಾಂಯ್? ಕೆದ್ನಾ ತರ್ಯ್ ಏಕ್ ಪ್ರತಿ ಘೆತ್ಲ್ಯಾಯ್? ಹೆರ್ ಪತ್ರಾಂಚ್ಯಾಕ್ಯೀ ಉಣ್ಯಾ ಮೊಲಾಕ್ ಮೆಳ್ಚ್ಯಾ ಆಮ್ಚಾ ಪತ್ರಾಂಕ್ ವಿಕ್ತಿಂ ಘೆಂವ್ಕ್ ತುಕಾ ಸುರಾತ್ ದಿಸಾನಾ?"
ಜಾಕಿಯಾಬಾ, ಆತಾಂ ಆಮಿ ಘರಾ ಯಾ. ಥಂಯ್ ಥಾವ್ನ್ ಹಾಂವ್ ಆನಿ ತುಂ ಸಾಲು ಶೆಟಿಕ್ ಮೆಳೊಂಕ್ ಯಾ.... ತುವೆಂ ಬಾಕಿ ಆಸ್ಚೆ ತೆ ಧಾ ಹಜಾರ್ ರುಪಯ್ ಹಾಂವ್ ದಿತಾಂ.
"ನಾಕಾ ಲೊರಿ! ಮ್ಹಜೆಂ ರೀಣ್ ಹಾಂವ್ಚ್ ಫಾರಿಕ್ ಕರ್ತಾಂ. ತುಜ್ಯಾ ಬರ್ಯಾ ಮನಾಕ್ ದೇವ್ ಬರೆಂ ಕರುಂ" ತೊ ವಚೊಂಕ್ ಘುಂವ್ಲೊ.
"ಆತಾಂ ಕಂಯ್....?"
ಮಾಂಯ್ ವಿಚಾರಿ.
"ಹಾಂವ್ ಕೊಣಾಕ್ಯ್ ಕಶ್ಟಾಂತ್ ಘಾಲುಂಕ್ ಆಶೆನಾ ಬಾಯೆ!" ತೊ ಮ್ಹಣಾಲೊ.
"ಕಶ್ಟಾಂತ್ ಕಾಂಯ್ ನಾ ಜಾಕಿಯಾಬಾ.....! ಆಮಿ ಮನ್ಶ್ಯಾ ಪಣಾಚಿಂ ಮನ್ಶ್ಯಾಂ.... ವ್ಹಡ್ಲೆಂ ಕಾಂಯ್ ನ್ಹಯ್ ತರ್ಯೀ ಹಳ್ತಾಚೆಂ ಘರ್ ಆಸಾ. ತುಂ ಆಮ್ಚೆ ಸಂಗಿಂಚ್ ರಾವ್." ಮಾಂಯ್ಚಾ ಉತ್ರಾಂಕ್ ಜಾಕಿಯಾಬಾಕ್ ಸೈ ಘಾಲುಂಕ್ ಪಡ್ಲೆಂ.
ಆಮಿಂ ಚವ್ಗಾಂಯೀ ಘರ್ಚ್ಯಾ ವಾಟೆಕ್ ಲಾಗ್ಲ್ಯಾಂವ್.
ಮಾಂಯ್ಚಾ ವದನಾರ್ ಸಂತೊಸ್ ದಿಸ್ತಾಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
