ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣೆಂತ್ಲಿಂ ಕವಯತ್ರಿಯಾಂ ಆನಿ ಸ್ತ್ರೀ ಸಂವೇದನಾಂ - ಏಕ್ ನದರ್
ಹೆರ್ ಪ್ರಾಂತೀಯ್ ಭಾಸಾಂಸವೆಂ ಕೊಂಕ್ಣೆಚೆಂ ತಲನಾತ್ಮಕ್ ಅಧ್ಯಯನ್ ಕರ್ಚ್ಯಾ ವೆಳಾರ್ ಮ್ಹಜ್ಯಾ ಗಮನಾಕ್ ಆಯಿಲ್ಲೆಂ ಏಕ್ ಸತ್ ಜಾವ್ನಾಸಾ; ಕೊಂಕ್ಣೆಂತ್ ಆಸ್ಚಾ ಕವಯತ್ರಿಂಚೊ ಸಂಖೊ ಹೆರ್ ಭಾಸಾಂಚಾ ಕವಯತ್ರಿಂಚಾ ಸಂಖ್ಯಾಚ್ಯಾಕೀ ಮೊಸ್ತ್ ಉಣೊ. ತಶೆಂ ಲೇಖ್ ಧರುಂಕ್ ಗೆಲ್ಯಾಂವ್ ತರ್ಯೀ ಕಾಂಯ್ ಏಕ್-ದೋನ್ ಕವಿತಾ/ಚುಟುಕಾಂ ಬರಯಿಲ್ಲಿಂ ಥೊಡಿಂ ದಿಸ್ತಿತ್ ತರ್ಯೀ ಕವಿತಾಶೆತಾಂತ್, ಫಕತ್ತ್ ಅಪ್ಲ್ಯಾ ಕವಿತಾ ಪ್ರತಿಭೆಧ್ವಾರಿಂ ಅಪ್ಲಿ ಅಸ್ಮಿತಾಯ್ ರುತಾಂ ಕರುಂಕ್ ಸಕ್ಚಿಂ ಖರಿಂ ಲಕ್ಶಣಾಂ ಆಸ್ಚಿಂ ಭೊವ್ ಉಣಿಂ. ಕೊಂಕ್ಣಿ ಸಾಹಿತ್ಯಾಂತ್, ಜಶೆಂ ಹೆರ್ ಪ್ರಾಂತೀಯ್ ಭಾಸಾಂಚಾ ವಾಚ್ಪ್ಯಾಂ ಪ್ರಕಾರ್ ಸ್ತ್ರೀ ವಾಚ್ಪಿಂ ಖಂಡಿತ್ ಜಾವ್ನ್ ದಾದ್ಲ್ಯಾಂಚಾಕ್ಯೀ ಚಡ್. ಪುಣ್ ಸಾಹಿತ್ಯಾಂತ್, ತೆಂಯೀ ಕವಿತಾಂತ್ ಕಿತ್ಯಾಕ್ ಉಣಿಂ? ಆನಿ ಆಸ್ಚಾ ಥೊಡ್ಯಾಂತ್ಲಿಂ ಕಿತ್ಲಿಂ ಮುಖಾರ್ ಪಾವ್ಲ್ಯಾಂತ್? ಹ್ಯಾಚ್ ಸವಾಂಲಾಂ ಭಂವಾರಿಂ ಹೆಂ ಲೇಖನ್ ಲಿಖ್ಲಾಂ;
ಅಶೆಂ ಕಾಂಯ್ ಸಾಹಿತ್ಯಾಕ್ ಪ್ರಾಯ್ ಮ್ಹಣ್ ನಾ, ರೂಪ್ ಮ್ಹಣ್ ನಾ, ಮಾಪ್ ಮ್ಹಣ್ ನಾ - ಕಿತೆಂಯೀ ಆಸಾ ತರ್ ವಾಚ್ಪ್ಯಾಚಾ ಕಾಳ್ಜಾಚಿ ಉಡಿ ಮೆಜುಂಕ್ ಸಕ್ಚಿ ಸಕತ್, ವಾಚ್ಪ್ಯಾಚಾ ದಾಡ್ಡ್ ಮತಿಕ್ ಪಾಜುಂಕ್ ಸಕ್ಚೆಂ ತ್ರಾಣ್ ಸಾಹಿತ್ಯಾಕ್ ಜರೂರ್ ಆಸಾ ಮ್ಹಣ್ ಮಾಂಧ್ಚಾಂತ್ ಹಾಂವ್ಯೀ ಎಕ್ಲೊಂ. ತಶೆಂ ಆಸ್ತಾನಾ ಕವಿ ಜಾಂವ್ ಕವಯತ್ರಿ ಜಾಂವ್ ಹಾಂತುಂ ಕಿತೆಂ? ಮ್ಹಳ್ಳೆಂ ಸವಾಲ್ ತುಮ್ಕಾಂ ಧೊಸ್ತಾ ತರ್ ಸದ್ದ್ಯಾಕ್ ಮಾಫ್ ಕರಾ.
ಜೆದ್ನಾಂ ಮನಿಸ್ ಏಕ್ ’ಕಾಣಿ’ ಕವಿತೆಕ್ ವಿಂಚ್ತಾ ವಾ ’ಜಿಣಿ’ ಕವಿತೆಕ್ ವಿಂಚ್ತಾ - ಹ್ಯಾ ದೊನ್ಯೀ ಸಂದರ್ಭಾಂನಿ ದೋನ್ ವೆವೆಗ್ಳ್ಯಾ ರಿತಿಚ್ಯೊ ಕವಿತಾ ಉದೆತಾತ್. ಕಾಣಿ ಆಸ್ಚಿ ಕವಿತಾ ಫಕತ್ತ್ ’ಕೂಡ್’ ತರ್ ಜಿಣಿ ಆಸ್ಚೆಂ ಕವಿತಾ ’ಜೀವ್’. ಧಾಖ್ಲೊ - ಹಾಂವ್ ಎಕಾ ಬಾಯ್ಲೆಚ್ಯಾ ಪ್ರಸೂತ್ಪಣಾವಿಶಿಂ ಜಾಯ್ತೆಂ ಬರಂವ್ಕ್ ಸಕಾನ್. ಪುಣ್ ಹಾಂವ್ ಖುದ್ದ್ ಏಕ್ ಬಾಯ್ಲ್ ಜಾವ್ನ್ ಜಿಯೆವ್ನ್, ಪ್ರಸೂತ್ಪಣಾಚಿ ದೂಖ್ ಭೊಗುನ್ ಜರ್ ಬರಯಿಲ್ಲೆಂ ತರ್ ಥಂಯ್ ಕಾಣಿ ನ್ಹಂಯ್ ಬಗಾರ್ ಜಿಣಿ ಆಸ್ತಿ, ಕೂಡ್ ನ್ಹಂಯ್ ಬಗಾರ್ ಜೀವ್ ಆಸ್ತೊ.
ಕೊಂಕ್ಣಿ ಕಾವ್ಯಾಂತ್ ಅಜೂನ್ ಜಾಯ್ತೊ ವಾವ್ರ್ ಬಾಕಿ ಆಸಾ. ಹ್ಯಾ ಬಾಕಿ ಉರ್ಲೆಲ್ಯಾ ವಾವ್ರಾಕ್ ಲಾಗೊನ್ ಹೆರ್ ಪ್ರಾಂತೀಯ್ ಭಾಸಾಂಕ್ ಸರಿ ಜಾಂವ್ಕ್ ಆಮ್ಚೆಂ ಕೊಂಕ್ಣಿ ಸಾಹಿತ್ಯ್, ಪ್ರತ್ಯೇಕ್ ಜಾವ್ನ್ ಕವಿತಾಂ ಸಕೊಂಕ್ ನಾಂತ್ ಮ್ಹಳ್ಯಾರ್ ಗುನ್ಯಾಂವ್ ಜಾಂವ್ಚೊನಾ ಮ್ಹಣ್ ಪಾತ್ಯೆತಾಂ. ಆನಿ ಕವಯತ್ರಿ ಕಿತ್ಯಾಕ್ ಉದೆನಾಂತ್? ಕಶೆಂ ಉದೆವ್ಯೆತಾ?
ಕವಿನ್ ಮನ್ಶ್ಯಾಂಕ್ ಚತ್ರಾಯ್ ದಿವ್ಯೆತಾ ಮಾತ್ರ್ ಶಿವಾಯ್ ಜಿಣಿ ಕಶಿ ಜಿಯೆಂವ್ಚಿ ಮ್ಹಳ್ಳೆಂ ಫಯ್ಸಲ್ ಕರ್ಚೊ ಮನ್ಶ್ಯಾನ್ಂಚ್. ಸಾಹಿತ್ಯ್ ಪ್ರತ್ಯೇಕ್ ಜಾವ್ನ್ ಕವಿತಾ ಏಕ್ ಬಳ್ವಂತ್ ಮಾಧ್ಯಮ್ ಅಸಲ್ಯಾ ಸಂಘರ್ಷಾಂಕ್, ಮಿಸ್ತೆರಾಂಕ್ ಸುಟಂವ್ಕ್ ಪ್ರೇತನ್ ಕರುಂಕ್ ಸಕ್ಚೆಂ. ದೆಖುನ್ ಏಕ್ ಅಡ್ಹೂಕ್ ಸತ್ ಹೆಂಯೀ ಜಾವ್ನಾಸಾ - ’ಹರ್ಯೆಕಾ ಭಾಸೆಂತ್ ಚಡಾವತ್ ಜಾವ್ನ್ ’ಸತ್’ ಉಲಂವ್ಚಾ ಕವಿಂಕ್ ಭಹಿಷ್ಕಾರ್ ಘಾಲ್ತಾತ್ ಆನಿ ’ಧುಂಪಯ್ತೆಲ್ಯಾಂಕ್’ ಪುರಸ್ಕಾರ್ ದಿತಾತ್. ಖಂಡಿತ್ ಜಾವ್ನ್ ಹೆಂ ಏಕ್ ಅಡ್ಹೂಕ್ ಸತ್. ಫಾಮಾದ್ ಉರ್ದು ಕವಿ ಸಾಹಿರ್ ಲುಧ್ಯಾನ್ವಿ ಜೆನ್ನಾ ಪಾಕಿಸ್ತಾನಾಂತ್ ಆಸ್ಲ್ಲೊ, ತವಳ್ಚಾ ಸರ್ಕಾರಿ ಧೋರಣಾಂಕ್ ವಿರೋದ್ ತಾಣೆಂ ಕವಿತಾ ಘಡ್ಲಿಂ ಆನಿ ತಾಕಾ ಗಾಂವ್ ಸೊಡ್ನ್ ಪೊಳೊಂಕ್ ಪಡ್ಲೆಂ. ಟರ್ಕಿಶ್ ಕವಿ ನಜೀಮ್ ಹಿಕ್ಮತಾನ್ ಜೆದ್ನಾಂ ಟರ್ಕಿಂತ್ ಅಪ್ಲಿ ಕವಿತಾಪ್ರತಿಭಾ ಧಾಖಯ್ಲಿ, ತೆದ್ನಾಂ ತಾಕಾ ಟರ್ಕಿ ಸೊಡ್ನ್ ರಶ್ಯಾ ಪೊಳೊಂಕ್ ಪಡ್ಲೆಂ. ಪುಣ್ ವಿಪರ್ಯಾಸ್ ಮ್ಹಳ್ಯಾರ್ ತಾಕಾಚ್ ಉಪ್ರಾಂತ್ ವಿಶ್ವ್ ಶಾಂತಿ ಪುರಸ್ಕಾರ್ ಮೆಳ್ಳೊ (ಅನ್ಯೇಕ್ಲೊ ಕವಿ ಪ್ಯಾಬ್ಲೊ ನೆರೊದಾಸವೆಂ).
ಕವಿತಾ ಬರಯ್ತಾನಾ ಸಯ್ತ್ ಅಸಲಿಂ ಸಭಾರ್ ಮೆಟಾಂ (Stages) ಉತ್ರೊಂಕ್ ಪಡ್ತಾತ್. ಆನಿ ಜೊ ಕವಿ/ಕವಯತ್ರಿ ಅಪ್ಲಿಂ ಪಾವ್ಲಾಂ ಮುಖಾರ್ ಕಾಡುಂಕ್ ಸಕ್ತಾ, ತಿಂ ಮಾತ್ರ್ ಮೆಟಾಂ ಚಡೊಂಕ್ ಸಕ್ತಾತ್.
ಖಂಚೊಯ್ ಕವಿ ಪಯ್ಲ್ಯಾ ಕವಿತೆಂತ್ ಮಹಾನ್ ಕವಿ ಜಾವ್ನ್ ಉದೆನಾ. ಕವಿತಾ ಏಕ್ ನಿರಂತರ್ ಶಿಕ್ಚಿ ಪ್ರಕ್ರಿಯಾ. ಹಾಂಗಾ ಶಿಕೊಂಕ್, ಶಿಕೊಂಕ್ ಆನಿ ಶಿಕೊಂಕ್ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ ನಾ. ಕವಿತಾ ಜಿಣ್ಯೆಮಿಸ್ತೆರಾಕ್ ಕಾಂಯ್ ಸೊಡ್ನ್ ದೀನಾ ಪಳೆ. ಖ್ಯಾತ್ ಪಂಜಾಬಿ ಕವಯತ್ರಿ ಅಮೃತಾ ಪ್ರೀತಮ್ ಹಿಣೆಂ ಸಾಂಗ್ಚೆಪರಿಂ; ’ಜೆದ್ನಾಂ ಜಿಯೆವ್ನ್ ಆಸ್ತಾನಾ ಜಿಣಿ ಕಿತೆಂ ಮ್ಹಳ್ಳೆಂ ಸಮ್ಜಾನಾ ತರ್ ಮೊರ್ತಚ್ ಮರಣ್ ಕಶೆಂ ಸಮ್ಜೊಂಚೆಂ?’ - ಮ್ಹಳ್ಯಾರ್ ಜಿಣಿ ಜಿಯೆವ್ನ್ ಆಸ್ತಾಸರ್ ಮಿಸ್ತೆರ್ಚ್ ಆನಿ ಶಿಕೊಂಕ್ಚ್ ಆಸಾ.
ತಶೆಂ ಆಸ್ತಾನಾ ಚಡಾವತ್ ಕವಿಂನಿ, ತೆಂಯೀ ಕೊಂಕ್ಣಿ ಕವಿಂನಿ ಕವಿತಾಚಿ ಸುರ್ವಾತ್ ಕರ್ತಾನಾ ವಿಂಸ್ಚೊ ವಿಶಯ್ ಭೋವ್ ಸಾದೊ - ಮೋಗ್, ಚೆಡೊ, ವಾ ಚೆಡುಂ, ಫುಲ್, ಸೊಭಾಯ್, ಪಿಸೊಳೆಂ, ಘಾತ್, ಇಶ್ಟಾಗಾತ್.... ಹೆಂ ಪಯ್ಲೆಂ ಮೇಟ್. ಆಮ್ಚಾ ಕೊಂಕ್ಣೆಂತ್ಯೀ ಹ್ಯಾ ಹಂತಾರ್ ಆಸ್ಚಿಂ ಜಾಯ್ತಿಂ ಕವಯತ್ರಿಂ ದಿಸ್ತಾತ್. ಹೆಂ ವಾಯ್ಟ್ ಮ್ಹಣ್ ಸಾಂಗ್ಚೊ
ಮ್ಹಜೊ ಇರಾದೊ ನ್ಹಂಯ್.
ಪುಣ್ ತೊ ಮೋಗ್, ರಾಗ್, ಜೆದ್ನಾಂ ಭಾಂದ್ ಜಾವ್ನ್ ಫುಲ್ತಾ - ಸಂಬಂಧ್, ಕುಟಾಮ್, ಸುಖ್ ದುಃಖ್ ಜಾವ್ನ್ ಬದಲ್ತಾ ತರ್ ತೆಂ ದುಸ್ರೆಂ ವಾ ಫುಡ್ಲೆಂ ಹಂತ್. ಹಾಂಗಾಸರ್ ಮಾತ್ಸಿ ಪ್ರತಿಭಾ ಗರ್ಜೆಚಿ. ಮಾತ್ಸಿ ಚಿಂತ್ಪಾಚಿ ಗುಂಡಾಯ್ ಅನಿವಾರ್ಯ್. ಕೊಂಕ್ಣೆಚಾ ಮಟ್ಟಾಕ್ ಸಾಂಗ್ಚೆಂ ತರ್ - ಮ್ಹಜ್ಯಾ ನದ್ರೆಕ್ ಪಯ್ಲೆಂ ದಿಶ್ಟಿಕ್ ಪಡ್ತಾ ಬಾಯ್ ನಿರ್ಮಲಾ ಗೋವಿಯಸ್, ಬಾಯ್ ವಾಯ್ಲೆಟ್ ಪಿರೇರಾ, ಬಾಯ್ ಅಸುಂತಾ ಪಿರೇರಾ ತಸಲಿಂ ಥೊಡಿಂ ಕವಯತ್ರಿಯಾಂ ಮ್ಹಜ್ಯಾ ನದ್ರೆಕ್ ಪಡ್ತಾತ್.
ಪುಣ್ ಕವಿತಾ ಹಂತಾನ್ ಹಂತ್ ಚಡೊಂಕ್ ಆಸ್ತಾ ಆನಿ ಜೆದ್ನಾಂ ಹೆಂ ಭಾಂಧ್ ಅಪ್ಲಿ ಗಡ್ ಉತ್ರೊನ್ ಜಿಣ್ಯೆಕ್ ಪಳೆಂವ್ಕ್ ಸಕ್ತಾ, ತೆದ್ನಾಂ ಕವಿ ಆಪ್ಲ್ಯಾ ಭಂವ್ತೊಣಿಂ ನದರ್ ಘುಂವ್ಡಾಂವ್ಕ್ ಸಕ್ತಾ, ಆಪ್ಲ್ಯಾ ಸಮಾಜೆಚೆರ್, ಆಪ್ಲ್ಯಾ ಸಮಾಜೆಂತ್ ಅಜೂನ್ ಕಸ್ಟೊಂವ್ಚಾಂಚೆರ್, ನಿರ್ಗತಿಂಕಾಂಚೆರ್, ಅಸ್ಕತಾಂಚೆರ್, ಶೋಶಿತಾಂಚೆರ್ ಅಪ್ಲಿ ನದರ್ ಚರಂವ್ಕ್ ಸಕ್ತಾ. ಮ್ಹಜ್ಯಾ ನದ್ರೆಂತ್ ಬಾಯ್ ಪ್ರಿಯಾ ಸಿಕ್ವೇರಾ, ಬಾಯ್ ವಿಲ್ಮಾ ರೇಗೊ ಹ್ಯಾ ಹಂತಾಕ್ ಪಾವೊಂಕ್ ಸಕ್ಲ್ಯಾಂತ್. ಬಾಯ್ ಪ್ರಿಯಾ ಸಿಕ್ವೇರಾನ್ ಕವಿತಾಂತ್ ಪಾವ್ಲಾಂ ಕಾಡುಂಕ್ ಧರ್ಲ್ಲಿಂ ಆಯ್ಲೆವಾರ್ಚ್ ತರ್ಯೀ ಅಶಿಚ್ ಅಪ್ಲಿ ಮಿನತ್ ಮುಖಾರುನ್ ವ್ಹರಿತ್ ತರ್ ಖಂಡಿತ್ ಜಾವ್ನ್ ಥೊಡಿಂ ತರ್ಯೀ ನವಾಲಾಂ ಕರುಂಕ್ ಪಾವ್ತೆಲಿ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ದಾಖ್ಲ್ಯಾಕ್ ತಿಚಾ ಆಯ್ಲೆವಾರ್ಚಾ ಎಕಾ ಕವಿತೆಚಿಂ ಥೊಡಿಂ ಉತ್ರಾಂ ಘೆತಾಂ;
’ತುಮಿಂ ಸೊಭಾಯ್ ಚಾಕ್ತೆಲ್ಯಾಂನೊ
ಗುಡ್ಡಾವ್ನ್ ಮಸ್ತಿತೆಲ್ಯಾಂನೊ
ದರ್ಯಾಕ್ ವರುನ್ ಘಾಲಾ
ಆಶೆಂ ಪರಾತ್ತಿನಾಂವ್ ಆಮಿಂ
ಸಾದ್ಯ್ ಜಾಲ್ಯಾರ್ ಮಸ್ತುಂಚೆಂ ಸೊಡಾ
ಖೆಳ್ಕುಳಾಂ ಕರ್ಚಿಂ ರಾವಯಾ
ಆಮ್ಕಾಂ ರೆಂವೆರ್ಚ್ ಜಿಯೆಂವ್ಕ್ ಸೊಡಾ!!!’
ಹಿ ಬೋಬ್ ರೆಂವೆಚಿ. ತ್ಯಾ ದರ್ಯಾಚಾ ಭಂವ್ತೊಣಿ ವೇಂಗ್ ಮಾರ್ನ್ ರಾವ್ಲ್ಯಾ ತಿ ರೇಂವ್, ಪುಣ್ ಲೋಕ್ ಯೆತಾ ದರ್ಯಾಚಿ ಸೊಭಾಯ್ ಪಳೆಂವ್ಕ್, ಪುಣ್ ತಿ ಸೊಭಾಯ್ ಪಳೆತಾಂ ಪಳೆತಾಂ ತಾಣಿಂ ಮಸ್ತುಂಚೆಂ, ಗುಡ್ಡಾಂವ್ಚೆಂ ತರ್ಯೀ ಕೊಣಾಕ್? ಹ್ಯಾ ರೆಂವೆಕ್. ಆನಿ ಹಿ ರೆಂವ್ ತ್ಯಾ ವೊತಾಂತ್ ತಾಪೊನ್ ತರ್ಯೀ ಪರತ್ ಪರತ್ ತ್ಯಾ ದರ್ಯಾಕ್ ಸಾಂಗಾತ್ ದಿತಾ.
ಕವಿತಾ ಆಸ್ಚಾ ರಿತಿನ್ ಘೆತ್ಲ್ಯಾರ್ಯೀ ವೆಗ್ಳೆಂಚ್ ಚಿಂತಾಪ್ - ಪುಣ್ ವಿಶಾಲ್ ನದರ್ ನಾಸ್ಚಾಂಕ್ ಹೆಂ ಚಿಂತುಂಕ್ ಸಾಧ್ಯ್ ನಾ. ಹೆಂಚ್ ಕವಿತಾ ಸಾಂಕೇತಿಕ್ ರಿತಿನ್ ಘೆತ್ಲೆಂ ತರ್ ಆಮ್ಚಾ ಘರಾಂತ್ಲ್ಯಾ ಬಾಯ್ಲಾಂಚೆಂ ರುದಾನ್ ಆಯ್ಕಾನಾ? ತಿಂ ಬಾಯ್ಲಾಂ ಘರ್ಚಿ ರೇಂವ್ - ಘರಾಣೆಂ ಭಾಂಧುಂಕ್ ಉಪ್ಕಾರಾಕ್ ಪಡ್ಚಿಂ. ತರ್ಯೀ ಘರ್ಚೆಂ ಘುರ್ಕಾರ್ಪಣ್ ದಾದ್ಲ್ಯಾಂಚೆಂಚ್. ಕಿತ್ಯಾಕ್ ದಾದ್ಲೊ ದರ್ಯೊ ಆನಿ ಬಾಯ್ಲಾಂ ರೇಂವ್.
ಕೊಣ್ ಮ್ಹಣ್ತಾ ’ನಿರ್ಗತಿಕ್’ ಮ್ಹಳ್ಯಾರ್ ಫಕತ್ತ್ ಮ್ಹಾರಾಂಚೆ ಮ್ಹಣ್? ಕೊಣ್ ಮ್ಹಣ್ತಾ ’ಶೋಶಿತ್’ ಮ್ಹಳ್ಯಾರ್ ಪಟೆಲಾಂಗೆರ್ ಕಾಮ್ ಕರ್ಚಿಂ ಮಾತ್ರ್ ಮ್ಹಣ್? ಪಯ್ಲ್ಯಾನ್ ಪಯ್ಲೆಂ ಆಮ್ಚ್ಯಾಚ್ ಘರಾಂನಿ ಆಮ್ಚಿ ಆವಯ್, ಆಮ್ಚಿ ಭಯ್ಣ್, ಆಮ್ಚಿ ಬಾಯ್ಲ್ ಕಿತ್ಲಿ ಶೋಶಿತ್ ಮ್ಹಳ್ಳೆಂ ಆಮಿಂ ಚಿಂತುಂಕ್ಚ್ ವಚಾನಾಂವ್. ಕಿತ್ಯಾಕ್ - ಮನಿಸ್ ಹರ್ಯೆಕ್ಲೊ ಸ್ವಾರ್ಥಿ ರಚನ್. ಫಕತ್ತ್ ಆಪ್ಲೆಂ ಮಾತ್ರ್ ಚಿಂತಾ ಶಿವಾಯ್ ಹೆರಾಂಚಾ ಸಂತೊಸಾಖಾತಿರ್ ಅಪ್ಲೆಂ ಸುಖ್ ಸಾಕ್ರಿಫಿಸ್ ಕರುಂಕ್ ತೊ ತಯಾರ್ ನಾ. ದೆಖುನ್ ಅಸಲೆ ಅಸ್ಕತ್ ತಾಳೆ ಆವಾಜ್ ನಾಸ್ತಾಂ ಗಳ್ಯಾಭಿತರ್ ಅಡ್ಚತಾತ್. ಹ್ಯಾ ಅಸ್ಕತ್ಯಾಂಕ್ ತಾಳೊ ಜಾಂವ್ಚೆ ತಸಲೆಂ ಸ್ತ್ರೀ ಸಂವೇದನ್ ಆಮ್ಚಾ ಕೊಂಕ್ಣೆಂತ್ ಉದೆಲ್ಲೆಂ ಭೋವ್ ಉಣೆಂ. ದೆಖುನ್ ಸೊಸುನ್ ಜಿಯೆಜಾಯ್ ಶಿವಾಯ್ ಹೆರ್ ವಾಟೊ ನಾಂತ್ ಮ್ಹಳ್ಳೆಂ ಪಾರಂಪರಿಕ್ ಚಿಂತಾಪ್. ಮಾಲ್ಘಡಿ ಕವಯತ್ರಿ ಗ್ಲ್ಯಾಡಿಸ್ ರೇಗೊ ಮ್ಹಾಕಾ ಹ್ಯಾ ಹಂತಾಕ್ ಪಾವ್ಲ್ಲಿ ದಿಸೊನ್ ಯೆತಾ. ಹಿಚೆಂ ಆಯ್ಲೆವಾರ್ಚೆಂ ’ಸ್ವಾರ್ಥ್ ರುದಾನ್’ ಕವಿತಾ ಧಾಖ್ಲ್ಯಾಕ್ ಘೆತಾಂ.
’ಘರಾಂತ್ ಆಜ್ ನವೊ ಸುರ್ಯೊ ಉದೆಲಾ
ಸಂತೊಸಾಚಿಂ ಕಿರ್ಣಾಂ ಫಾಂಕವ್ನ್ ಆಯ್ಲಾ
ಚೆರ್ಕೊ ಜಾಲಾ ಘರಾಂತ್
ಪಾಡ್ಕೊ ಜಾಲಾ ಗೊಟ್ಯಾಂತ್
ಘೊಟ್ಯಾಂತ್ಲಿ ಮೂಖ್ ಗಾಯ್
ಘರಾಂತ್ಲಿ ಗಂಭೀರ್ ಮಾಯ್
ದೋನ್ ಜಿವಾಂತ್ಲೆ ಬಾಳ್ ಕಿಸ್ಪೊನ್
ವ್ಹಾಳ್ಳ್ಯಾತ್ ಭುಮಿ ಸಮೊರ್
ಉದಾರ್ ಆಪ್ಲೆಂ ಖಾಲಿ ಕರುನ್
ಸಂತೊಸ್ ತೃಪ್ತೆ ಸುಸ್ಕಾರ್ ಸೊಡುನ್
ಫುಡಾರಾಚಿಂ ಸ್ಬಪ್ಣಾಂ ದೆಖ್ತಾತ್
ಬಾಳಾಂ ಸ್ಪರ್ಶ್ಯಾಕ್ ಫುಲೊನ್,
ಘರಾಂತ್ ಚಲ್ತಾ ಸರ್ಬಾರಾಯ್
ಚೆರ್ಕೊ ಜಾಲಾ ಕುಟ್ಮಾಂತ್
ದಿವೊ ಕಾಳ್ಜಾಂಚೊ, ಆಧಾರ್ ಫುಡಾರಾಚೊ
ನಶಿಬ್ ಘೆವುನ್ ಆಯ್ಲಾ
ರಾಯ್ ಕುಂವಾರ್ ಕುಟ್ಮಾಂತ್ಲೊ
ಗೊಟ್ಯಾಂತ್ ಗಾಯ್ನ್ ವಾಸ್ರುಂ ಘಾಲಾಂ
ನಶೀಬಾನ್ ತಾಕಾ ಪಾಡ್ಕೊ ಕೆಲಾಂ
ಗೊಟ್ಯಾಂತ್ ಪಾಡ್ಕ್ಯಾಚಿ ಗರಜ್ ನಾ
ತೊ ಮೆಲ್ಯಾರ್ ಲುಗ್ಸಾಣ್ ನಾ
ಚೆರ್ಕ್ಯಾ ಬಾಳಾ ಭಾಗ್ ಕಸ್ಲೆಂ ಘೆವ್ನ್ ಆಯ್ಲಾಯ್!
ಗೊಟ್ಯಾಂತ್ಲ್ಯಾ ಗಾಯ್ಚೆಂ ಕುತಿಯಾಂನಿ ದೂದ್
ಚಿಂವೆಂತ್ಲೆಂಯ್ ಪುತಾ ತುಕಾಚ್ಚ್
ದೂದ್ ಗಾಯೆಚೆಂ ಆನಿ ಮಾಯೆಚೆಂ
ತುಕಾಚ್ಚ್ ಪುತಾ ಭರಯ್ತೆಲಿಂ
ಆಮ್ಚ್ಯಾ ದೊಗಾಂಯ್ಚ್ಯಾ ದುದಾನ್
ಪುಡ್ಪುಡಿತ್ ತುಕಾ ಕರ್ತೆಲಿಂ
ಗೊಟ್ಯಾಂತ್ ಪಾಡ್ಕ್ಯಾ ಗರಜ್ ನಾ
ತೊ ಮೆಲ್ಯಾರ್ ಲುಕ್ಸಾಣ್ ನಾ’ [ಕಾಳ್ಜಾಂತ್ಲೆ ಯಾದ್]
ಹ್ಯಾ ಕವಿತೆಂತ್ ದೋನ್ ’ಜಲ್ಮ್’ ಜಾಲ್ಯಾತ್ - ಏಕ್ ಮಾಯೆಕ್ ಆನ್ಯೇಕ್ ಗಾಯೆಕ್ - ದೊಗ್ಯೀ ಚೆರ್ಕೆ (ಸಮಾಜೆಂತ್ಲೊ ’ಉಂಚ್ಲೊ’ ವರ್ಗ್ ಮ್ಹಳ್ಳೊ ಸಾಂಕೇತ್). ಪುಣ್ ಗಾಯೆಚಾ ಚೆರ್ಕ್ಯಾಕ್ (ಪಾಡ್ಕ್ಯಾಕ್) ಮೋಲ್ ನಾ, ತಾಣೆಂ ಮೆಲ್ಯಾರ್ಯೀ ಲುಕ್ಸಾಣ್ ನಾ. ಗೊಟ್ಯಾಂತ್ ಕಾಂಯ್ ಥೊಡೆ ಥಾಪೆ ಶೆಣ್ ಉಣೆಂ ಜಾತೆಲೆಂ. ಪುಣ್ ಮಾಯೆಚೊ ಚೆರ್ಕೊ ಮೊಲಾಧಿಕ್ ದೆಖುನ್ ತಾಕಾ ಗಾಯೆಚೆಂ ದೂದ್ ಆವಯ್ಚಾ ದುದಾಸವೆಂ. ಪುಣ್ ಕವಿತಾ ಇತ್ಲೆಂಚ್ ಆಟಾಪಿನಾ - ಜಾಯ್ತೆಂ ಆಟಾಪ್ತಾ.
ಚೆರ್ಕೊ ಸಮಾಜೆಂತ್ ಉಂಚ್ಲ್ಯಾ ವರ್ಗಾಚೊ ಜೀವ್ ತರ್ ಗಾಯೆಚೊ ಚೆರ್ಕೊ ಕಿತ್ಯಾಕ್ ಮೋಲ್ ನಾತ್ಲ್ಲೊ? ಗಾಯೆಚೊ ಚೆರ್ಕೊ ಪಾಡಾರಿ ಜಾಂವ್ಚೊ, ಕಾಸಾಕ್ ಮೋಲ್ ಮೆಳಾನಾತ್ಲ್ಲೊ. ಗಾದ್ಯಾಂನಿ ಕೊಸುಂತ್ ವಾಪಾರ್ಯೆತ್ ತರ್ಯೀ ತಾಚ್ಯಾಕೀ ಚಡಿತ್ ತಾಚ್ಯಾನ್ ಕಿತೆಂಯ್ ಸಾಧ್ಯ್ ನಾ. ಪುಣ್ ತೊಚ್ ಚೆರ್ಕೊ (ಪಾಡ್ಕೊ) ಜಾಂವ್ಚ್ಯಾಕೀ ಚೆಡುಂ (ಪಾಡಿ) ಜಾಲ್ಲಿ ತರ್ ಕಾಂಯ್ ಫುಡೆಂ ವ್ಹಡ್ ಜಾಯ್ತ್, ಗಾಬ್ ಜಾಯ್ತ್ ಆನಿ ಕಾಂಯ್ ಕಾಸಾಕ್ ಉಪ್ಕಾರಾಕ್ ಪಡಾತ್.
ಕವಯತ್ರಿನ್ ಹಾಂಗಾಸರ್ ಭೋವ್ ಸೊಭಿತ್ ರಿತಿನ್ ದಾದ್ಲೆ ಜರ್ ಪೆಂಕಾಡ್ ಬಾಗವ್ನ್ ಘಾಮ್ ಕಾಡ್ನ್ ಘೊಳುಂಕ್ ಸಕ್ತಿತ್, ತೆದ್ನಾಂ ತಾಂಕಾಂ ಮೋಲ್ ಫಾವೊ ಶಿವಾಯ್, ಬಾಯ್ಲಾಂಚಾ ಗುಸ್ತ್ಯಾರ್ ಜಿಯೆಂವ್ಚೆ ದಾದ್ಲೆ ಮೆಲ್ಯಾರ್ಚ್ ಬರೆಂ ಮ್ಹಳ್ಳೊ ಸಂದೇಶ್ ದಿತಾ. ಹೆಂ ಕವಿತಾ ಸ್ತ್ರೀ ಸಂವೇದನಾಕ್ ಅಪುರ್ಭಾಯೆನ್ ಮೆಳ್ತಾ. ಕೊಂಕ್ಣೆಂತ್ ವಾಚುಂಕ್ ಮೆಳ್ಚಾ ಭೋವ್ ಥೊಡ್ಯಾ ಸ್ತ್ರೀ ಸಂವೇದನಾಚಾ ಕವಯತ್ರಿಂ ಪಯ್ಕಿ ಹಿಯೀ ಎಕ್ಲಿ. ಹಿಚ್ಯಾ ಧುವೆನ್ ವಿಲ್ಮಾ ರೇಗೊನ್ ಪ್ರಯತ್ನ್ ಜರೂರ್
ಕೆಲಾಂ ತರ್ಯೀ ಹಿಚೆತಿತ್ಲಿ ಮುಖಾರ್ ಎದೊಳ್ ಪಾವೊಂಕ್ ಸಕೊಂಕ್ ನಾ.
ಪುಣ್ ಪ್ರಾಯೆನ್ ಹೆರಾಂಚ್ಯಾಕೀ ಭೋವ್ ಲ್ಹಾನ್ ತರ್ಯೀ ವಿಚಾರಾಂನಿ ಪ್ರಭುದ್ದ್ ಜಾವ್ನ್ ಎದೊಳ್ಚ್ ಫಾಮಾದ್ ಜಾಲ್ಲಿ ಕವಯತ್ರಿ ಮ್ಹಜ್ಯಾ ನದ್ರೆಕ್ ದಿಸ್ಚಿ ಮ್ಹಳ್ಯಾರ್ ಅವಿನಾ ಮಿಯಾರ್. ತಿಚೆಂ ’ಸವಾಲ್’ ಕವಿತಾ ಇಲ್ಲೆಂ ಗುಂಡಾಯೆನ್ ಪಳೆವ್ಯಾಂ;
’ದೆವಾ,
ತುಂ ಆಸಾಯ್ ಜಾಲ್ಯಾರ್
ಏಕ್ ಸವಾಲ್
ಮನ್ಶ್ಯಾಂಕ್ ರಚುಂಕ್ ಮಾತಿ ಮೊಳ್ತಾನಾ
ವಾಪಾರ್ಲೆಂಯ್ ಕಿತೆಂ?
ರಗಾತ್ ಯಾ ಉದಾಕ್?’
ರಚ್ಲ್ಲ್ಯಾ ದೆವಾಕ್ ಸವಾಲ್ ಕರ್ಚಿ ತಾಂಕ್ ಕವಯತ್ರಿಚಿ. ಪುಣ್ ಕಿತ್ಯಾಕ್? ಹ್ಯಾ ಥೊಡ್ಯಾಚ್ ಉತ್ರಾಂನಿ ಕವಯತ್ರಿಚಾ ತಾಳ್ಯಾಚಿ ಸಕತ್ ಉಟೊನ್ ದಿಸ್ತಾ. ಎಕಾ ರಿತಿಚೊ ತಾತ್ಸಾರ್ ಆನಿ ಕ್ರೋಧ್. ಕೊಣ್ ಸಾಂಗ್ತಾ ಬಂಡಾಯ್ ಮ್ಹಳ್ಯಾರ್ ಕ್ರೋಧ್ ಮ್ಹಣ್? ತೆ ಪಿಶೆ. ಬಂಡಾಯ್ ಉದೆಂವ್ಕ್ ಮೂಳ್ ಕಾರಾಣ್ ಹುಸ್ಕೊ, ಮೋಗ್ ಆನಿ ನಿರಾಶಾ. ಹೆ ಸರ್ವ್ ಅಂಶ್ ಎಕಾಮೆಕಾ ಮೆಳೊನ್ ಕವಿಕ್ ಉದ್ವೇಗ್ ಹಾಡಂವ್ಕ್ ಲಾಗ್ತಾನಾ ತಾಚಿಂ ಭಗ್ಣಾಂ ಶಿಜೊಂಕ್ ಲಾಗ್ತಾತ್ ಆನಿ ತವಳ್ ಅಭಿವ್ಯಕ್ತ್ ಜಾಂವ್ಚಿ ಅಭಿವ್ಯಕ್ತಿ ಖರಿಚ್ ಜಾವ್ನ್ ಕ್ರೋಧಿತ್ ಜಾವ್ನ್ ಆಸ್ತಾ.
’ಬರೆಂ ಜಾಲೆಂ ರಗ್ತಾಂತ್ ಮೊಳ್ಳೆಂಯ್
ಚಿಂತಾಂ ಜರ್ ಮನ್ಶಾ ಕುಡಿಂತ್ ಉದಾಕ್ ವ್ಹಾಳ್ಳೆಂ
ಖುನಿ ಜಾತ್ಯೊ ಉದ್ಕಾ ಖಾತಿರ್
ರಗ್ತಾಚಿ ತಾನ್ ಇತ್ಲಿ ಆಸ್ತಾನಾ
ರಗ್ತಾಚಿ ತಾನ್ ಸಾಂಗ್ಚಿ ಕಿತ್ಲಿ?’
ಪಳೆಯಾ ಉತ್ರಾಂ ಉತ್ರಾಂಚಿ ಸಾಂಕಳ್ ಆನಿ ಘಡಾವಳ್ - ಹ್ಯಾ ಉತ್ರಾಂಕ್ ಎಕಾಮೆಕಾ ಘಡ್ಸುಂಕ್
ವಿಣ್ಲೆಲ್ಯಾ ಶಿರಾಂಚೆಂ ತ್ರಾಣ್ ಪಳೆಯಾ.
’ಅನಿಕೀ ಮೊಳಿತ್ ಆಸಾಯ್ ತರ್
ದಯಾ ಕರ್ನ್ ಧರ್ತೆಕ್ ಯೇ ದೆವಾ
ಹಾಂಗಾ ನಂಯ್ ಸುಕೊನ್ ರಗತ್ ವ್ಹಾಳ್ತಾ
ರಗತ್ ಆಟವ್ನ್ ಮನಿಸ್ ಪಿಟೊ ಜಾತಾ
ಪಿಟೊ ಖಿರವ್ನ್ ರಗತ್ ಪಿಯೆವ್ನ್
ಧೆಂಖ್ ಕಾಡ್ಚಿಂ ತೊಂಡಾಂ ಘಾಣ್ತಾತ್.’
ಹಾಂಗಾಸರ್ ಅನ್ಯೇಕ್ ಸಂಗತ್ ಭೊವ್ ಗರ್ಜೆಚಿ - ಕವಿತಾ ಮ್ಹಳ್ಯಾರ್ ಆಪ್ಲ್ಯಾ ಮತಿಂತ್ ಆಸ್ಚಿ ಕುಸಾಡಾಯ್ ವಾಚ್ಪ್ಯಾಚ್ಯಾ ಮಾತ್ಯಾರ್ ಥಾಪ್ಚೆಂ ಮಾಪ್ ಭಿಲ್ಕುಲ್ ನ್ಹಂಯ್. ಕಿತ್ಯಾಕ್ ಅಶೆಂ ಕರ್ಚೆಯ್ ಧಾರಾಳ್ ಮಾಪಾನ್ ಆಸಾತ್. ಪುಣ್ ಖರಿ ಜವಾಬ್ಧಾರಿ ಆಸ್ಚೆ ಕವಿ ಕಿತ್ಲ್ಯಾ ನಾಜೂಕ್ ರಿತಿನ್ ಹೆ ಅಕ್ಲಾಸ್ ಪಿಂತ್ರಾಯ್ತಾತ್? ಹಾಂಗಾಸರ್ ಕವಯತ್ರಿನ್ ದೆವಾಕ್ ಧರ್ತೆಕ್ ಆಪಯ್ಲಾಂ ತರ್ಯೀ ಕಿತ್ಯಾಕ್? ದೇವ್ ಸರ್ವ್ ದೆಖೊಂಕ್ ಸಕ್ತಾ. ತಾಕಾ ತರ್ ವೊತ್ತಾಯೆನ್ ಧರ್ತೆಕ್ ಆಪವ್ನ್ ರತಾಂ ವ್ಹಾಳ್ಚ್ಯೊ ನಂಯೊ ಧಾಖಂವ್ಚೊ ಮತ್ಲಬ್ ತರ್ಯೀ ಕಸಲೊ? ಹಾಂಗಾಸರ್ ಕವಯತ್ರಿ ದೆವಾಲಾಗಿಂ ಸಂವಾದ್ ಕರ್ತಾ ತರ್ಯ್ ಸಮಾಜೆಕ್ ಬೋಟ್ ದೀವ್ನ್, ಖೊಂಖುನ್.. ಆನಿ ಎಕಾ ಕವಿಚಿ ಮೂಳ್ ಜವಾಬ್ಧಾರಿಯೀ ತಿಚ್ಚ್.
’ಅರೆ! ಬೆಜಾರ್ ಕರ್ನಾಕಾ, ರಾಗಾರ್ ಜಾಯ್ನಾಕಾ
ಕಿತ್ಯಾಕ್ ತಾಕಾ ಅರ್ಥ್ ನಾ
ತ್ಯೊ ದೋನ್ ಮನ್ಶ್ಯಾ ಶಿರೊ
ಆಜ್ ಸುಕೊನ್ ಗೆಲ್ಯಾ.
ದೆಕುನ್ ಆನಿ ಮೊಳ್ತಾಯ್ ತರ್..
ರಿಸರ್ಚ್ ಕರ್, ಥಿಸೀಸ್ ಬರಯ್
ಪುಣ್ ಜಾತಾ ತಿತ್ಲ್ಯಾ ವೆಗ್ಗಿಂ
ಕಿತ್ಯಾಕ್
ಮನಿಸ್ ಲಂಕಡ್ ಮೊಡಿತ್ ಆಸಾ
ಆಪ್ಲ್ಯಾಚ್ ಪ್ರತಿರುಪಾಕ್ ರಚುನ್ ಆಸಾ
ತುಜ್ಯೆಪರಿಂ..’
ಆಯ್ಚೊ ಮನಿಸ್ ಕಿತ್ಲೊ ಕೃತಕ್ ಜಾಲಾ ಪಳೆಯಾ - ಹರ್ಯೆಕಾ ಸಧಾಂನಿ ಎಕೇಕ್ ಪ್ರತಿಮಾ, ಆನಿ ಎಕೆಕಾ ಪ್ರತಿಮಾಂತ್ ಎಕೇಕ್ ಕಾಣಿ..
’ಹೊ ನವೊ ಮನಿಸ್ ಪಿಟೊ ಜಾಯ್ನಾ
ತಾಕಾ ಮಾರ್ಲ್ಯಾರ್ ರಗತ್ ವ್ಹಾಳಾನಾ
ಥಂಯ್ ಕಾಳಿಜ್ಚ್ ನಾ
ಎದ್ಕುನ್ ರಾಕೊನ್ ಆಸಾ ತುಜ್ಯಾ ಜಾಪಿಕ್
ಕಶೆಂ ಮೊಳ್ತಾಯ್ ದೆವಾ?
ತುಂ ಆಸಾಯ್ ತರ್,
ಸಂಸಾರಾಚ್ಯಾ ಮುಖ್ಲ್ಯಾ ಮನ್ಶ್ಯಾಕ್?’
ಅಸಲಿಂಚ್ ಕವಿತಾ ಪುಣ್ ಚಡ್ತಾವ್ ಸಾಮಾಜಿಕ್, ಶೋಶಿತ್ ವರ್ಗಾಚೆರ್ ಬರಯಿಲ್ಲಿಂ ವಾಚುಂಕ್ ಮೆಳ್ತಾತ್ ಬಾಯ್ ಕ್ಯಾಥರಿನ್ ರೊಡ್ರಿಗಸ್ ಕಟ್ಪಾಡಿ ಥಾವ್ನ್. ಹಿಣೆಂ ನಾಟಕ್ ಶೆತಾಂತ್, ನ್ಹಂಯ್ ಫಕತ್ತ್ ಕೊಂಕ್ಣೆಂತ್ ಬಗಾರ್ ತುಳು ಭಾಸೆಂತ್ಯೀ ಬರೆಂ ಸಾಹಿತ್ಯ್ ರಚ್ಲಾಂ. ಏಕ್ ಬರಿ ಕಾಣ್ಯೆಗಾರ್ನ್ ತಶೆಂಚ್ ಪ್ರಭುದ್ದ್ ಕವಯತ್ರಿಂಚಾ ಪಂಗ್ತೆರ್ ಹಿಕಾಯ್ ಮಾನಾಚೊ ಜಾಗೊ ಫಾವೊ.
ಪುಣ್ ಮ್ಹಜ್ಯಾ ನದ್ರೆಂತ್ ಕೊಂಕ್ಣೀ ಕವಯತ್ರಿಂ ಮಧೆಂ ಸರ್ವಾಂಕ್ ಮಿಕ್ವೊನ್ ಗೆಲ್ಲಿ ಕವಯತ್ರಿ ನಂದಿನಿ. ಹೆಂ ಕಾಂಯ್ ಅತಿಶಯೋಕ್ತಿ ಮ್ಹಣ್ ಹಾಂವ್ ಚಿಂತಿನಾ. ಚಿಂತ್ಪಾಚಿ ಪ್ರಭುದ್ದತಾ, ಸಮ್ಜಣೆಚಿ ವಿಸ್ತಾರಾಯ್, ಕವಿತಾಚಿ ಗುಂಡಾಯ್ ಭರ್ಪೂರ್ ಮಾಪಾನ್ ತಿಚ್ಯಾ ಕವಿತೆಂನಿ ಉಟೊನ್ ದಿಸ್ತಾ. ಅಸಲಿಂಚ್ ಲಕ್ಶಣಾಂ ದಿಸೊನ್ ಯೆಂವ್ಚಿ ಅನ್ಯೇಕ್ ಕವಯತ್ರಿ ಬಾಯ್ ಸೋನಿಯಾ ದೆ’ಕೋಸ್ತಾ ಆಜ್ಕಾಲ್ ಕೊಂಕ್ಣೆಂತ್ ಬರಂವ್ಚ್ಯಾಕೀ ಇಂಗ್ಲಿಶ್ ಭಾಸೆಂತ್ ಬರಯ್ತಾ. ಸಾಂ|ಲುವಿಸ್ ಕೊಲೆಜಿಂತ್ ಇಂಗ್ಲಿಶ್ ಭಾಸೆಚಿ ಪ್ರಾಧ್ಯಾಪಕಿ ಜಾವ್ನ್ ವಾವ್ರ್ ಕರ್ನ್ ಆಸ್ಚಾ ತಿಕಾ ತಿಚಿ ಕವಿತಾ ಪ್ರತಿಭಾ ಖಂಡಿತ್ ಜಾವ್ನ್ ಉಂಚಾಯೆಕ್ ಪಾವಂವ್ಕ್ ಸಕ್ಚಾಂತ್ ದುಭಾವ್ ನಾ.
’ರೈತಾಕ್ ಮ್ಹಣಾಲೊ ಅರ್ಗಾಂ ದೀ ದೆವಾಕ್
ಸರ್ಗ್ ದೆಂವ್ಲಾಂ ತುಜ್ಯಾ ಆಂಗ್ಣಾಂತ್
ಆಂಜಾಂಚೊ ನಾಚ್ ಮಾತಿಯೆಚಾ ಕಣಾ ಕಣಾಂತ್
ಭಾಂಗಾರ್ ಶಿಂಪ್ಲಾಂ, ಮೊತಿಯಾಂ ಪಿಕ್ಲ್ಯಾಂತ್
ನಶೀಬ್ ತುಜೆಂ, ನಶೀಬ್ ತುಜೆಂ
ಅರ್ಗಾಂ ದೀ ದೆವಾಬಾಪಾಕ್
ಶ್ಹೆರಾಂತ್ಲೊ ಪಿಲೊ ಗೊಡಾ ಪೆಳೊ, ಮಾರುನ್ ಆಸ್ಲ್ಲೊ ಗೋಡ್ ಗೋಡ್ ಮಿಟಿಯೊ’
’ಕವಿತಾ ಜೆದ್ನಾಂ ಸಮಾಜೆಂತ್ಲ್ಯಾ ಹರ್ಯೆಕಾ ವರ್ಗಾಂತ್ಲ್ಯಾ ಮನ್ಶಾಂಚೆಂ ಜಿವಿತ್ ಪ್ರತಿಫಲಿತ್ ಜಾತಾ ತೆದ್ನಾಂ ತೆಂ ಖರೆಂ ಕವಿತಾ ಜಾಂವ್ಕ್ ಪಾವ್ತಾ’ - ಹೆಂ ಮ್ಹಜೆಂ ಖಾಸ್ಗಿ ಚಿಂತಾಪ್.
ಪುಣ್ ಇತ್ಲೆಂ ಸಾಂಗ್ತಾನಾ ಅನ್ಯೇಕ್ ಸಂಗತ್ ಭೋವ್ ಗರ್ಜೆಚಿ - ಕೊಂಕ್ಣೆಂತ್ ಅಪ್ಶೆಂಚ್ ಕವಯತ್ರಿಂಕ್ ರಚುಂಕ್ ಜಾಯ್ನಾ - ಕವಯತ್ರಿಂ ಕಿತ್ಯಾಕ್? ಕವಿಂಕ್ಯೀ ಕೊಣೆಂಯೀ ರಚ್ಲ್ಲೆಪರಿಂ ನಾ. ಕವಿ ಖುದ್ದ್ ಜಲ್ಮಾತಾತ್. ಫಾಮಾದ್ ಪಂಜಾಬಿ ಕವಿ ಜಸ್ಭೀರ್ ಸಿಂಘ್ ಧಿಮಾನ್ ಸಾಂಗ್ಚೆಪರಿಂ ’ಹರ್ಯೆಕ್ಲೊ ಮನಿಸ್ ಜಲ್ಮಾನ್ ಕವಿ ತರ್ಯೀ ಸಭಾರಾಂಕ್ ತಿ ಅಭಿವ್ಯಕ್ತಿ ಕರುಂಕ್ ಜೊಕ್ತಿಂ ಮಾಧ್ಯಮಾಂ ಮೆಳಾನಾಂತ್’. ಕೊಂಕ್ಣೆಂತ್ ತರ್ಯೀ ಪ್ರತಿಭಾವಂತ್ ಕವಯತ್ರಿಂಕ್ ವಳ್ಕೊಂಕ್ ಆಮಿ ಸಕ್ಲ್ಯಾಂವ್ ತರ್ ಖಂಡಿತ್ ಜಾವ್ನ್ ಫುಡ್ಲ್ಯಾ ದಿಸಾಂನಿ ತರ್ಯೀ ಭೊವ್ ಉಂಚ್ಲಿಂ ಕವಯತ್ರಿಂಯಾಂ ಆಮ್ಚಾ ಕೊಂಕ್ಣೆಂತ್ ಉದೆವ್ನ್ ಯೆಂವ್ಚಾಂತ್ ಕಾಂಯ್ ನವಾಲ್ ನಾ.
ಇತ್ಲೆಂ ಸರ್ವ್ ಸಾಂಗ್ತಾನಾ ಅನ್ಯೇಕ್ ಸಂಗತ್ ಭೋವ್ ಗರ್ಜೆಚಿ ಮ್ಹಣ್ ಮ್ಹಾಕಾ ಭೊಗ್ತಾ;
ಆಮ್ಚಿಂ ಚಡಾವತ್ ಕವಿ/ಕವತ್ರಿಯಾಂ - ಸಿಂತಿಮೆಂತಾಳ್ - ತಾಂಚಾ ಕವಿತಾಕ್ ಹೆರಾಂನಿ ಫಕತ್ತ್ ಬರೆಂ ಮ್ಹಣಾಜಯ್ ಮ್ಹಳ್ಳೆಂ ಚಿಂತಾಪ್ ಚಡ್ತಾವಾಂಕ್ ಆಸ್ತಾ. ಹಾಂಗಾಸರ್ ಹರ್ಯೆಕಾ ಕವಿನ್ ಪಾತ್ಯೆಜಾಯ್ ಜಾಲ್ಲಿ ಸಂಗತ್ - ಏಕ್-ದೋನ್ ಕವಿತಾ ಬರೆಂ ಆಸಾ ಮ್ಹಣ್ತಾಚ್ ತೊ/ತಿ ಮಹಾನ್ ಕವಿ/ಕವಯತ್ರಿ ಜಾಯ್ನಾ ವಾ ಏಕ್-ದೋನ್ ಕವಿತಾ ಬರಿಂ ನಾಂತ್ ದೆಖುನ್ ತೊ/ತಿ ಬೇಕಾರ್ ಕವಿ/ಕವಯತ್ರಿ ಜಾಂವ್ಕ್ ಸಕಾನಾಂತ್. ದೆಖುನ್ ಪಯ್ಲೆಂ ಅಸಲ್ಯಾ ಸಿಂತಿಮೆಂತಾಂ ಥಾವ್ನ್ ಪಯ್ಸ್ ರಾಂವ್ಚೆಂ ಭೊವ್ ಗರ್ಜೆಚೆಂ.
ದುಸ್ರೆಂ - ಕೊಂಕ್ಣೆಚಾ ಮಟ್ಟಾರ್ ಸಾಂಗ್ಚೆಂ ತರ್ - ಬರೆಂ ಕವಿತಾ ಬರಯಿಲ್ಲೆಂ ಬರೆಂ ಕವಿತಾ ಮ್ಹಣ್ ವೊಪುನ್ ಘೆಂವ್ಚಿಂ ಭೊವ್ ಉಣಿಂ ವಾ ನಾಂಚ್. ದೆಖುನ್ ಕೊಂಕ್ಣೆಂತ್ ಉತ್ತೇಜನ್ ಮೆಳಾನಾ ಮ್ಹಳ್ಳೆಂ ಚಿಂತಾಪ್ ಮತಿಂತ್ಲೆಂ ಕಾಡಿಜಾಯ್. ಆಪ್ಣಾಚೆಂ ಕವಿತಾ ಹೆರಾಂನಿ ವಾಚುಂಕ್ ನಾ ಮ್ಹಳ್ಳೆಂ ಸವಾಲ್ ವಿಚಾರ್ಚ್ಯಾಧಿಂ ’ಆಪ್ಣಾನ್ ಕಿತ್ಲೆಶ್ಯಾ ಹೆರಾಂಚಿಂ ಕವಿತಾ ವಾಚ್ಲ್ಯಾಂತ್?’ ಮ್ಹಳ್ಳೆಂ ಸವಾಲ್ ಆಪ್ಣಾಕ್ಚ್ ಕರ್ಚಿ ಗರ್ಜ್ ಆಸಾ.
ತಿಸ್ರೆಂ - ಕವಿತಾ ಮ್ಹಳ್ಯಾರ್ ಫಕತ್ತ್ ಸಬ್ಧಾಂಚಿ ರಾಸ್ ನ್ಹಂಯ್, ತಾಂತುಂ ಕಾಂಯ್ ಇಲ್ಲೆಂ ಮಾಸ್, ಕಾಂಯ್ ಇಲ್ಲೆಂ ರಗಾತ್, ಕಾಂಯ್ ಇಲ್ಲೊ ಜೀವ್ ಆಸ್ಚೊ ಭೋವ್ ಗರ್ಜೆಚೊ. ಕೊಂಕ್ಣೆಂತ್ ಆತಾಂ ತರ್ಯೀ ಜಾಯ್ತೆ ಕವಿತಾಬೂಕ್ ಆಸಾತ್, ಸಾಯ್ಟಾಂ-ಮಾಧ್ಯಮಾಂ ಆಸಾತ್, ತ್ಯಾ ಶಿವಾಯ್ ಚಡಿತ್ ಹ್ಯಾವಿಶಿಂ ಶಿಕ್ಚಿ ಉರ್ಭಾ ಆಸ್ಚಾಂನಿ ಜೊಕ್ತ್ಯಾಂಕ್ ಸಂಪರ್ಕ್ ಕೆಲ್ಯಾರ್ ಖಂಡಿತ್ ಶಿಕೊಂಕ್ ಸಾಧ್ಯ್ ಆಸಾ.
ಚೊವ್ತೆಂ - ಭೋವ್ ಗರ್ಜೆಚೆಂ - ನಿರಂತರ್ ಪ್ರಯತ್ನ್.. ಕವಿತಾ ಬರಂವ್ಚೆಂ ಏಕ್ ನಿರಂತರ್ ಶಿಕ್ಚಿ ಪ್ರಕ್ರಿಯಾ. ಏಕ್ ದಿಸಾಚಾ ಚೊವೀಸ್ ವೊರಾಂ ನ್ಹಂಯ್ ತರ್ಯೀ ಚೊವೀಸ್ ವೊರಾಂಚಾ ಎಕಾ ವೊರಾಂತ್ ತರ್ಯ್ ಕವಿತಾವಿಶಿಂ ಇಲ್ಲೆಂ ವಾಚುಂಕ್ ಧರ್ಲೆಂ ತರ್ ಜರೂರ್ ಉಪ್ಕಾರಾಕ್ ಪಡ್ತಾ.
ಪಾಂಚ್ವೆಂ - ಬರಯಿಲ್ಲೆಂ ಸರ್ವ್ ಪರ್ಗಟ್ ಜಾಯ್ಜಯ್ ಮ್ಹಳ್ಳೆಂ ಚಿಂತಾಪ್ ಸೊಡಿಜಾಯ್.
ಸ್ತ್ರೀ ಸಂವೇದನಾಚಿಂ ಕವಿತಾ ಕೊಂಕ್ಣೆಂತ್ ಫುಲೊನ್ ಯೇಂವ್ಕ್ ಆನಿ ಕೊಂಕ್ಣಿ ಕಾವ್ಯಾಂತ್ ಜಶೆಂ ನವ್ಯ, ನವ್ಯೋತ್ತರ್ ಕಾವ್ಯಾಚಿ ಸುರ್ವಾತ್ ಜಾಲ್ಯಾ ತೆಚ್ಚ್ಪರಿಂ ಸ್ತ್ರೀ ಸಂವೇದನ್ ಸಾಹಿತ್ಯ್ ಅಸ್ಕತ್ ಸ್ತ್ರೀಯಾಂಚೊ ತಾಳೊ ಜಾಂವ್ಕ್ ಪಾವೊಂದಿ ಮ್ಹಳ್ಳೆಂ ಮ್ಹಜೆಂ ಆಶಾವಾದ್.
- ವಲ್ಲಿ ಕ್ವಾಡ್ರಸ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications