ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾ: ಕಸ್ತಳ್ ಉಸ್ತಿತಾನಾ
ಸಿರಿವಂತ್: ಕೊಂಕ್ಣಿ ಸಾಹಿತ್ಯಾಂತ್ ಎದೊಳ್ ಆಯಿಲ್ಲ್ಯಾ ಉಂಚ್ಲ್ಯಾ ಮಟ್ಟಾಚಾ ಕಾಣ್ಯೆಗಾರಾಂ ಪಯ್ಕಿಂತ್ ಉಟೊನ್ ದಿಸ್ಚೊ ಸಿರಿವಂತ್. ಆಜ್ ತೊ ಆಮ್ಚೆ ಮಧೆಂ ನಾ ತರ್ಯ್ ಅಜೀಕ್ ತೀಸ್ ವರ್ಸಾಧಿಂ ಅಪ್ಲ್ಯಾ ವಿಭಿನ್ನ್ ಪ್ರಕಾರಾಂಚಾ ಮಟ್ವ್ಯಾ ಕಾಣ್ಯಾಂಕ್ ತೊ ಭೋವ್ ಫಾಮಾದ್. ತಾಕಾ ಮೆಳ್ಚೆಂ ಭಾಗ್ ಮ್ಹಾಕಾ ಅಖ್ರೇಕ್ ತರ್ಯೀ ಲಾಭ್ಲ್ಲೆಂ, ಆನಿ ತ್ಯಾ ವೆಳಾರ್ ತಾಣೆಂ ಮ್ಹಾಕಾ ದಿಲ್ಲಿ ತಾಚಿಚ್ಚ್ ಏಕ್ ಪರ್ನಿ ಕಾಣಿ. ತಾಚಾ ಉಡಾಸಾನ್ ತಿ ಕಾಣಿ ದಾಯ್ಜ್ ಮಟ್ವ್ಯಾ ಕಾಣ್ಯಾಂಚಾ ಫೆಸ್ತಾವೆಳಾರ್ ವಾಚ್ಪ್ಯಾಂಕ್ ದಿಂವ್ಚಿ ಏಕ್ ಮೊಗಾಚಿ ಕಾಣಿಕ್.
[ದಾಯ್ಜ್ ಮಟ್ವ್ಯಾ ಕಾಣ್ಯಾಂಚೆಂ ಫೆಸ್ತ್ 2006 - ಕಾಣಿ: 2]
ಸಿರಿವಂತ್
"ಗುಡ್ ಈವ್ನಿಂಗ್."
"ಗುಡ್ ಈವ್ನಿಂಗ್."
"ಸಿರಿವಂತ್ ಮ್ಹಳ್ಯಾರ್ ತುಂಚ್ಗಿ?"
"ವ್ಹಯ್.. ಯೆ. ಬಸ್."
"ತುಕಾ ಪಳೆಂವ್ಕ್ ಮ್ಹಾಕಾ ವರ್ತೊ ಸಂತೊಸ್ ಭಗ್ತಾ.. ತುಜಿಂ
ಬರ್ಪಾಂ ನಿಜಾಯ್ಕೀ ಹೊಗ್ಳಿಕೆಕ್ ಫಾವೊ ಜಾಲ್ಲಿಂ ಮಾತ್ರ್
ನ್ಹಂಯ್, ತಾಂತುಂ ಆತ್ಮೀಯತಾ, ಸಹಾನುಭೂತಿ, ದಯಾ,
ಹೆರಾಂಚಾ ಕಷ್ಟಾಂಚೊ ಹುಸ್ಕೊ ಝಳ್ಕಾತಾ..."
ತಾಚಿ ಹೊಗ್ಳಿಕ್ ಆಯ್ಕೊನ್ ಹಾಂವ್ ಸಗ್ಳೊಚ್ ಫುಲ್ಲೊಂ.
ಮ್ಹಜಾ ತೊಂಡಾರ್ ರೂಂದ್ ಹಾಸೊ ಆಯ್ಲೊ. "ಮಸ್ತ್ ಥೆಂಕ್ಸ್ ತುಕಾ."
ಹಾವೆಂ ಮ್ಹಳೆಂ ಆಭಾರಿ ಮನಾನ್.
"ತುಕಾ ಮ್ಹಜೆಂ ಘರ್ ಕಶೆಂ ಮೆಳ್ಳೆಂ?" ವಿಚಾರ್ಲೆಂ
ಹಾಂವೆಂ. ತಾಚೆಲಾಗಿಂ ಲಾಂಬ್ ಸಂಭಾಷಣ್ ಕರ್ಚ್ಯೆ ಆತುರಾಯೆನ್.
"ಕಷ್ಟಾಂನಿ ಸೊಧುನ್ ಕಾಡ್ಲೆಂ.. ತೆಂ ಮೊರೊಂ: ತುಂ ಎಕ್ಲೊಚ್ ರಾವ್ಯಾತ್ಗಿ?"
"ವ್ಹಯ್."
"ಕಿತೆಂ, ತುಜಿಂ ಆವಯ್-ಬಾಪುಯ್.."
"ಆಸಾತ್.. ಆಸಾತ್.. ಹಾಂವೆಂ ಮಾತ್ರ್ ವಿಂಗಡ್ ಘರ್ ಕೆಲಾಂ.
ಮ್ಹಜಾ ವಾಚ್ಪ್ಯಾಕ್ ಆನಿ ಬರ್ಪಾಂಕ್ ಆಂಗೆರ್ ರಾವ್ಲ್ಯಾರ್ ಇಲ್ಲೆ ಉಪದ್ರ್ಚ್ ಜಾತಾತ್, ಶಿವಾಯ್ ,
ಹಾಂವ್ ಆತಾಂ ಪರ್ತ್ಯಾನ್ ಶಿಖ್ತಾಂ."
"ಕಸಲೆಂ ಶಿಕ್ತಾಯ್?"
"ಲ್ಹಾನ್ ಕಾಣ್ಯೊ ಬರಂವ್ಚಿ ವಿದ್ಯಾ."
"ಹೋ! ತರ್ ಆಮ್ಕಾಂ ಅನಿಕಿ ಬರ್ಯೊ ಕಾಣ್ಯೊ ವಾಚುಂಕ್ ಮೆಳ್ಚೊ ಭರ್ವಸೊ ಮೆಳ್ಲ್ಲೆಬರಿ ಜಾಲೆಂ. ತುಜೆಂ ಭವಿಷ್ಯ್ ಉಜ್ವಲ್ ಜಾಂವ್ದಿ." ತಾಣೆ
ಮ್ಹಾಕಾ ಆಶಿರ್ವಾದ್ ದಿಲೊ. ಉಪ್ರಾಂತ್ ಎಕಾಚ್ಛಾಣೆ -
"ತರ್ ತುಕಾ ರಾಂದುನ್ ವಾಡ್ತಾ ಕೊಣ್?" - ಸವಾಲ್ ಉಠಯ್ಲೆಂ ತಾಣೆ.
"ಎಕ್ಲಿ ಪ್ರಾಯ್ವಂತ್ ವಿಧೊವ್ ಸ್ತ್ರೀ ಆಸಾ."
"ಹೋ! ತಶೆಂ ಜಾಲ್ಯಾರ್ ಹಾಂವ್ ಆಯಿಲ್ಲೆಂ ಕಾಮ್ ಸುಫಳ್ ಜಾಂವ್ಚ್ಯೆ
ವಾಟೆರ್ಚ್ ಆಸಾ ಮ್ಹಣ್ಯೆತ್."
"ಕಿತೆಂ ತೆಂ?"
ಮ್ಹಜಾ ಸವಾಲಾಕ್ ಜವಾಬ್ ದಿಂವ್ಚಾ ಖಾತಿರ್ ತಾಣೆ ದೋನ್
ಪಾವ್ಟಿಂ ಖೊಂಕ್ಲಿ ಕಾಡ್ಲಿ. ತಾಳೊ ನಿತಳ್ ಕರುನ್ ಥಿಂಪಿ ಗಿಳ್ಳೀ!
ಹಾಂವ್ ಆತುರಾಯೆನ್ ತಾಕಾಚ್ ಪಳೆಂವ್ಕ್ ಪಡ್ಲೊಂ!
"ಆಮ್ಚೆಲಾಗಿಂ ಎಕ್ಲಿ ಚಲಿ ಆಸಾ. ತುಂವೆಂ ಪೊರ್ಚಾ ಕಾಣ್ಯೆಂತ್
ವರ್ಣನ್ ಕೆಲ್ಲಿ ’ಕಥಾ ನಾಯಕಿ’ ತುಜಾ ಉಗ್ಡಾಸಾಂತ್ ಆಸಾ ಜಾಲ್ಯಾರ್ ತಿಕಾ
ವಿವರಿಜಾಯ್ ಮ್ಹಣ್ ನಾ. ತುಜೆಂ ಉದಾರ್ ಮನ್ ವ್ಹಯ್ ಜಾಲ್ಯಾರ್.."
ತಾಚೊ ಮತ್ಲಬ್ ಘಡ್ಯೆನ್ ಸಮ್ಜಾಲೊ ಮ್ಹಾಕಾ. ಹಾತಾಂತ್ಲಿ ಲಿಖ್ಣಿ ಆಪ್ಶೆಂಚ್
ಸಕಯ್ಲ್ ಗಳಿ. ಕಪಲಾರ್ ಘಾಮಾಚೆ ಥೆಂಬೆ ಉದೆಲೆ. ತಾಳೊ
ಸುಕೊನ್ ಆಯ್ಲೊ. ಕಾಳಿಜ್ ಧಡ್ದಡೊಂಕ್ ಲಾಗ್ಲೆಂ. ’ಸಾಯ್ಭಾ!’
ಹಾಂವೆಂ ಕಿತ್ಯಾಕ್ ತಿ ಕಾಣಿ ಬರಯ್ಲಿ..! ಮನಾಂತ್ಚ್ ಸೊವ್ಲೆಂ
ಹಾಂವೆಂ ಮ್ಹಾಕಾಚ್!.
ಕಾಣ್ಯೆಂತ್ ಹಾಂವ್ ಮೊಠೊ ಆಣಿ ಕುರೂಪಿ ಜಾವ್ನಾಸ್ಚ್ಯೆ ಎಕ್ಯೆ ಚಲಿಯೆಲಾಗಿಂ ಕಾಜಾರ್ ಜಾಲ್ಲೊಂ.
ಸಮಾಜಿಂತ್ಲ್ಯಾಂಕ್ ಏಕ್ ಲಿಸಾಂವ್ ಶಿಕಂವ್ಕ್! ಪುಣ್ ತೆಂ ಕಾಲ್ಪನಿಕ್ ಘಡಿತ್ ಆತಾಂ
ನೀಜ್ ಸ್ವರೂಪ್ ಘೆಂವ್ಕ್ ತಯಾರ್ ಜಾಲಾಂ ಮ್ಹಣ್ತಾನಾ.. ’ಸಾಯ್ಭಾ ಸಿಲ್ವೆಸ್ತರಾ.
ಮ್ಹಾಕಾ ತುಂಚ್ ಪಾವ್! - ಇದ್ಗಾರ್ ಸೊಡ್ಲೊ ಹಾಂವೆಂ.
"ಹೆಂ... ಹೆಂ... ಹಾಂ.. ವ್ ಕಾ.. ಕ್ಕಾಜರ್.. ಇ..ಇ...ತ್ಲೆ ವೆ... ವೆಗಿಂ ಜಾಯ್ನಾಂ. ಇಷ್ಟಾ;
ಮ...ಮ... ಮ್ಹಾ... ಕಾ ಸಮಾಜೆಚಿ ಸೆವಾ.. ಕರುಂಕ್ ಆಸಾ.
ಮಸ್ತ್ ಶಿಕೊಂಕ್ ಆಸಾ.. ಬ... ಬರಂವ್ಕ್ ಆಸಾ. ತ್ಯಾ ಖಾತಿರ್ಚ್
ಹಾಂವೆಂ ವಿಂಗಡ್ ಬಿ.. ವಿಡಾರ್ ಕೆಲ್ಲೆಂ." ಹಾಂವ್ ಗಾಗೆಲೊಂ.
"ಪುರೊ.. ಪುರೊ" ಏಕ್ದಮ್ ಗರಮ್ ಜಾಲೊ ತೊ.
"ತುಮ್ಕಾಂ ಲೇಖಕಾಂಕ್ ಕಸ್ತಳ್ ಉಸ್ತುಂಚೆಂ ಮಾತ್ರ್ ಏಕ್ ಕಾಮ್.
ಸಂಪೂರ್ಣ್ ಕಾಲ್ಪನಿಕ್, ಸ್ವಂತ್, ನಾಂವಾಂ ಕಾಲ್ಪಣ್ಯಾಂತ್ಲಿಂ ಆನಿ ಕಿತೆಂ ಆನಿ ಕಿತೆಂ...
ಮಾರ್ ದಿಂವ್ಚೆಂ ಮಾತ್ರ್ ನ್ಹಂಯ್. ಖಾಂವ್ಕ್ಯೀ ತಯಾರ್ ಆಸಾಜಯ್. ಕಳ್ಳೆಂಮೂ? ಫಾಲ್ಯಾಂ ಆಮಿ
ಸಯ್ರಿಕ್ ನಿಘಂಟ್ ಕರುಂಕ್ ಯೆತಾಂವ್!"
ತೊ ಚಲ್ತಚ್ ರಾವ್ಲೊ!
ಹಾಂ! ಸಯ್ರಿಕ್ ನಿಘಂಟ್ ಕರುಂಕ್!
ನೀಳ್ ಶ್ವಾಸ್ ಸೊಡುನ್ ಹಾಂವ್ ಉಠ್ಲೊಂ. ಮ್ಹಜಿ ಘರ್ -
ಸೆವಕಿ ಮ್ಹಾಕಾ ಜೆವ್ಣಾಕ್ ಆಪಯ್ತಾಲಿ ಜಾಲ್ಯಾರಿ, ಮ್ಹಾಕಾ ಭುಕ್ಚ್
ಲಾಗಾನಾತ್ಲ್ಲಿ!
ತಿ ರಾತ್ ಕಷ್ಟಾಂನಿ ಪಾಶಾರ್ ಕೆಲಿ ಹಾಂವೆಂ. ದುಸ್ರ್ಯಾ ದಿಸಾ ಸಕಾಳಿಂ ಉಠ್ತಾನಾಂಚ್
ಹರ್ಧ್ಯಾಂತ್ ಡಬ್ ಡಬ್ ಆಯ್ಕೊಂಕ್ ಸುರು ಜಾಲೆಂ.. ವ್ಹಯ್.
ಮ್ಹಜ್ಯಾ ಕಾಳ್ಜಾಂತ್ ಧಡ್ದಡೆ ಉಠ್ಲ್ಲೆ. ’ತೆ’ ಯೆತಾತ್ ಮ್ಹಳ್ಳ್ಯಾ ಖಾತಿರ್! ರೂಚ್
ನಾತ್ಲ್ಲ್ಯಾ ತೊಂಡಾಂತ್ ಪೇಜ್ ಚೆಪ್ಲಿ ಹಾಂವೆಂ. ಉಪ್ರಾಂತ್
’ತಾಂಕಾಂ’ ರಾಕೊನ್ ರಾವ್ಲೊಂ. ’ತೆ ಯೇನಾಸ್ತಾನಾಂಚ್ ರಾವ್ಲ್ಲೆ ಜಾಲ್ಯಾರ್!’ ಕಾಲ್ಚೆಂ ಘಡಿತ್ ಉಗ್ಡಾಸಾಕ್ ಯೆತಾನಾ
ಮನಾಂತ್ಚ್ ಮಾಗೊನ್ ಜನೆಲಾಚಾ ಇಡ್ಯಾಂತ್ಲ್ಯಾನ್ ತಿಳ್ಳೆಂ
ಹಾಂವೆಂ.
ಪುಣ್ ತೆ ಆಯ್ಲೆಚ್! ತೊಚ್ ತೊ ಆನಿ ತಾಚೆ ಸಾಂಗಾತಿ ಹೆರ್ ದೊಗ್ ದಡಂಗ್
ಮನಿಸ್ ಆನಿ ತಾಂಚಾ ಪಾಟ್ಲ್ಯಾನ್ ತಿ ಚಲಿ. ತಿಚೊ ವ್ಹಡ್ಲೊ
ಮೊಠೊ ಪಾತ್ ವೊಡುನ್ ಯೆತಾಲಿ!
"ಬ.. ಬಸಾ." ಭಿಯಾನ್ ಆನಿ ಕಾಂಪ್ಚಾ ತಾಳ್ಯಾನ್ ಮ್ಹಳೆಂ
ಹಾಂವೆಂ.
ತೆಂ ತಾಂಕಾಂ ಖಂಡಿತ್ ಆಯ್ಕೊಂಕ್ ನಾ! ಪುಣ್ ತೆಚ್. ಹೆಣೆ-ತೆಣೆ ಆಸ್ಲ್ಲ್ಯಾ ಕದೆಲಾಂಚೆರ್
ಬಸ್ಲೆ ಆನಿ ’ತೆಂ’ ಎಕ್ಯೆ ದೆಗೆರ್ ಲಜಿಷ್ಟ್ ಮುಖಾನ್ ಉಬೆಂ ರಾವ್ಲೆಂ.
ಹಾಂವೆಂ ’ತಾಕಾ’ ಪಳೆಲೆಂ. ಮ್ಹಜ್ಯೆ ಕಾಣ್ಯೆಂತ್ಲ್ಯೆ ’ಹಿರೊಯಿನಿ’ ಬರಿಚ್
ದಿಸ್ಲೆಂ ತೆಂ ಮ್ಹಾಕಾ.
"ಹಿಚ್ ಆಮ್ಚಿ ಚಲಿ.. ತುಕಾ ಪಸಂದ್ಗೀ?"
"ಪ.. ಪಸಂದ್ ಮ್ಹ...ಮ್ಹಳ್ಯಾರ್?" - ಮ್ಹಜೆ ವೋಂಠ್ ಕಾಂಪ್ಲೆ.
"ತುಕಾ ಜಾಯ್ತ್ಗಿ ಮ್ಹಣ್?!"
"ಜಾಯ್ನಾ ಜಾಲ್ಯಾರ್ ತುಮಿ ಪಾಟಿಂ ಆಪವ್ನ್ ವ್ಹರ್ತಾತ್ಗಿ?" - ಆಶೆನ್ ವಿಚಾರ್ಲೆಂ
ಹಾಂವೆಂ.
"ವ್ಹಯ್."
"ತುಮ್ಕಾಂ ಮಸ್ತ್ ಥ್ಯಾಂಕ್ಸ್."
"ಪುಣ್ ಆಮ್ಚೆಲಾಗಿಂ ಹೆರ್ ಚಲಿಯೊ ಆಸಾತ್."
"ಹಾಂ! ಹೆರ್ ಚಲಿಯೊ? ಹಿಚೆಬರಿಚ್!?"
"ವ್ಹಯ್. ಹಿಚೆಬರಿಚ್."
’ಅಯ್ಯೋ! ಥಂಯ್ಚ್ ಮುಖಾರ್ ಆಸ್ಲ್ಲ್ಯಾ ಆರ್ಶ್ಯಾಂತ್
ಮ್ಹಜೆಂ ಮುಸ್ಕರ್ ದಿಸ್ಲೆಂ ಮ್ಹಾಕಾ. ತಶೆಂಚ್ ಪಾಟ್ಲ್ಯಾನ್ ಕೊನ್ಶ್ಯಾಕ್ ಉಭಿ ಆಸ್ಲ್ಲ್ಯೆ ತ್ಯೆ ಚಲಿಯೆಚೆಂಯಿ ಮುಖಮಳ್
ದಿಸ್ತಾಲೆಂ. ’ಹಾಂವೆಂ ಇತ್ಲ್ಯಾ ಸುರುಪಿ ಚಲ್ಯಾನ್... ತಾಚೆಲಾಗಿಂ ಕಾಜಾರ್ ಜಾಂವ್ಚೆಂ ಮ್ಹಳ್ಯಾರ್...!?’ - ಚಿಂತ್ನಾಂ ಭರ್ಲಿಂ
ಮ್ಹಜೆ ಮತಿಂತ್.
"ಮಾಗಿರ್ ಖಂಚಾ ಕರ್ಮಾಕ್ ತುವೆಂ ತಿ ಕಾಣಿ ಬರಯಿಲ್ಲಿ?"
ತಾಂಚೆ ಪಯ್ಕಿ ಎಕ್ಲ್ಯಾನ್ ತಾಪೊನ್ ಧೆಂಕ್ಣೊ ಘಾಲ್ತಾನಾ,
ಹಾಂವ್ ಏಕ್ ಪಾವ್ಟಿಂ ಉಡೊನ್ ಪಡ್ಲೊಂ. ಚಿಂತ್ನಾಂತ್ಲೊ ಜಾಗೊ ಜಾಲ್ಲೊಂ ಆನಿ
ಮ್ಹಜಿ ಕೂಡ್ ಕಾಂಪ್ತಾಲಿ.
"ದು.. ದುಸ್ರ್ಯಾಕ್ ಆ.. ಆಪವ್ನ್ ಹಾಡಾ, ಹೆಂ ಮ್ಹಾಕಾ
ಪ.. ಪಸಂದ್ ನಾ." ಕಷ್ಟಾಂನಿ ಜೀಬ್ ಘಳಯ್ಲಿ ಹಾಂವೆಂ. ಕಸೊ
ಪುಣಿ ಆಯ್ಚೊ ದೀಸ್ ಪಾಶಾರ್ ಜಾಂವ್ದಿ ಮ್ಹಣ್ ಚಿಂತುನ್.
"ಜಾಯ್ತ್ ತರ್." ತೆ ವಚೊಂಕ್ ಉಠ್ಲೆ.
’ಅಬ್ಬಾ!’ ತ್ ಉದ್ಗಾರ್ಲೊಂ ಹಾಂವ್ ಇಲ್ಲೆಂ ಸಮಧಾನ್ ಪಾವೊನ್.
"ಫಾಲ್ಯಾಂ ಯೆತಾಂವ್."
’ಹಾಂ! ಫಾಲ್ಯಾಂಚ್!’
"ಹೆಂ... ಹಾಂವ್ ಏಖ್ ಹಫ್ತೊ ನಾ; ಉಪ್ರಾಂತ್ಲ್ಯಾ ಹಫ್ತ್ಯಾಂತ್ ಯೆಯಾ.." ತಾಚಾ
ಭಿತರ್ ಖಂಯ್ ಪುಣಿ ಧಾಂವೊಂಕ್ ವೇಳ್ ಮೆಳಾಜಯ್ ಮ್ಹಳ್ಳ್ಯೆ ಆಶೆನ್
ಹಾಂವ್ ಘಡ್ಪಾಂ ಉಲಯ್ಲೊ.
"ಖಂಯ್ ವಚೊಂಕ್ ಆಸಾ?"
"ಮೆಡ್ರಸಾಕ್."
"ಜಪಾನಾಕ್ ವಚಾನಾಂಯ್ಮೂ?"
"....."
"ಫಾಲ್ಯಾಂಚ್ ಯೆತಾಂವ್!" - ತೆ ಗೆಲೆ.
ಉಸ್ವಾಸ್ ಘೆಂವ್ಕ್ ವಿಶೇಸ್ ಭಾಂದ್ಪಾಸ್ ಜಾಲೆ ಮ್ಹಾಕಾ ಆತಾಂ, ಆನಿ
ಹಾಂವ್ ಆರಾಮ್ ಕದೆಲಾರ್ ಗಳ್ಳೊಂ. ಮ್ಹಜಿ ನಾಡ್ ರಭಸಾನ್ ಉಡ್ತಾಲಿ. ಕಾಲ್ಜಾಚಿ ಉಡಿ
ಮ್ಹಜಾ ಕಾನಾಂಕ್ ಆಯ್ಕೊಂಚೆ ತಿತ್ಲೆ ವ್ಹಡ್ ಜಾಲ್ಲಿ.
"ಮಾಗಿರ್ ಖಂಚಾ ಕರ್ಮಾಕ್ ತುಂವೆಂ ತಿ ಕಾಣಿ ಬರಯಿಲ್ಲಿ?’ - ತಾಚೊ ಧೆಂಕ್ಣೊ
ಪರ್ತುನ್ ಮ್ಹಜಾ ಕಾನಾಂತ್ ಗರ್ಜಾಲೊ. ತಿತ್ಲ್ಯಾರ್ ಲೇಖಕಾಚಾ ದಂದ್ಯಾಕ್ಚ್ ಅದೇವ್ಸ್
ಮಾಗ್ಚೊ ನಿರ್ಧಾರ್ ಥಂಯ್ಚ್ ಕೆಲೊ ಹಾಂವೆಂ.
ಪುಣ್ ಫಾಲ್ಯಾಂ ತೆ ಪರ್ತುನ್ ಯೆತಾನಾ ಹಾಂವ್ ಕಿತೆಂ ಕರುಂ?
ಲೇಖಕ್ ಜಾವ್ನ್ ಸಮಾಜಿಂತ್ಲೆಂ ಕಸ್ತಳ್ ಉಸ್ತುಂಕ್ ವಚೊನ್ ಆಪಾಯ್
ಮ್ಹಜಾ ಘರಾಚಾ ಖಳಾರ್ ಯೇವ್ನ್ ರಾವ್ಲ್ಲೊ, ಆನಿ ಎಕ್ಯೆ ಕುರುಪಿ ಚಲ್ಯೆಕ್
ಮ್ಹಜಾ ಗಳ್ಯಾಕ್ ಬಾಂಧುಂಕ್ ತೆ ತಯಾರ್ ಜಾಲ್ಲೆ!
’ಅಯ್ಯೋ’ ಕಾಳ್ಜಾಚೆ ಕಳ್ವಳೆ ತಡ್ವುಂಕ್ ತಾಂಕಾನಾಸ್ತಾಂ ವ್ಹಳ್ವಳ್ಳೊಂ
ಹಾಂವ್.
"ಹೇಯ್. ಅನಿಕಿ ಉಠಾನಾಂಯ್ಗಿ ಕಿತೆಂ? ಕೊಣ್ಗಿ ಮ್ಹಾಕಾ ಜಾಗಂವ್ಕ್
ಲಾಗ್ಲೆ. ದೊಳೆ ಘಸ್ಟುನ್ಪಳೆತಾನಾ ಎಕ್ಯೆ ಚಲಿಯೆಚೆಂ
ಮಸ್ಕ್ ರೂಪ್ ಮ್ಹಾಕಾ ದಿಸ್ಲೆಂ. ಹಾಂವ್ ತಿಚಾ ಪಾಂಯಾಂಕ್ಚ್ ಪಳೆಂವ್ಕ್
ಪಡ್ಲೊಂ.
"ಮ್ಹಜಾ ಪಾಂಯಾಂಕ್ ಕಸಲೆಂ ಪಳೆತಾಯ್. ಧಾಕ್ಟ್ಯಾಬಾ?"
ಮ್ಹಜೆ ಭಯ್ಣಿಚೊ ತಾಳೊ ಆಯ್ಕಾಲೊ ಮ್ಹಾಕಾ.
"ಆಫಿಸಾಕ್ ವಚಾನಾಂಯ್ವೆ?"
’ಹಾಂ! ತೆಂ ಏಕ್ ಸ್ವಪಾಣ್ ಮಾತ್ರ್ಗಿ? ದೆವಾಕ್ ಅರ್ಗಾಂ!’ ಸಂತೊಸ್
ಪಾವ್ಲ್ಲೊಂ ಹಾಂವ್. ಆಂಬುರ್ಕೊ ಹಾಸೊನ್ ವೆಗಿಂ ವೆಗಿಂ ಅಠ್ಲೊಂ.
ವ್ಹಯ್ ತೆಂ ಏಕ್ ಸ್ವಪಾಣ್ ಮಾತ್ರ್!
ಪುಣ್...
ತೊಂಡ್ ಧುಂವ್ಕ್ ವೆಚಾ ಆದಿಂ ಹಾಂವ್ ಶೀದಾ ಮ್ಹಜಾ ಬರಂವ್ಚಾ
ಮೆಜಾ ಸರ್ಶಿಂ ಗೆಲೊಂ ಆಣಿ ಆದ್ಲ್ಯಾ ದಿಸಾ ರಾತಿಂ ನಿದ್ಚೆ ಆದಿಂ ಬರವ್ನ್ ದವರ್ಲ್ಲಿ ತಿ ಕಾಣಿ
ಹಾಂವೆಂ ಪಿಂಜುನ್ ಘಾಲಿ.
"ಬರಯಿಲ್ಲೆಬರಿ ಕರುಂಕ್ ತಾಂಕಾಜಯ್. ನಾತ್ಲ್ಯಾರ್ ಬರಂವ್ಕ್ಚ್
ನ್ಹಜೊ." ತಾಚೆ ಚೂರ್ ಕರ್ತಾನಾ ಅಪ್ಶಿಂಚ್ ಉತ್ರಾಂ ಭಾಯ್ರ್
ಪಡ್ಲಿಂ ಮ್ಹಜಾ ತೊಂಡಾಂತ್ಲ್ಯಾನ್.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
