ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾದಾಯ್ಜ್ - 3
ಜೆರಿ ಕುಲ್ಶೇಕರ್
ಕಾಳ್ಜಾಂತ್ಲೊ ಮೋಗ್
ನಾಂವ್ : ಜೋನ್ ಸಾಲ್ವಾದೊರ್ ಡಿ’ಸಿಲ್ವಾ.
ಲಿಖ್ಣೆ ನಾಂವಾಂ : ಜೆರಿ, ಕುಲ್ಶೇಕರ್.
ಆವಯ್-ಬಾಪಾಯ್ಚೆಂ ನಾಂವ್ : ದೆ|ಆಂಜೆಲಿನ್ ಡಿ’ಸಿಲ್ವಾ ಆನಿಂ ದೆ|ಆಂತೊನಿ ಡಿ’ಸಿಲ್ವಾ.
ಜನನ್ : 16 ಮಾಯ್ 1939.
ಜಲ್ಮಾಲ್ಲೊ ಗಾಂವ್ : ಕೊರ್ಡೆಲ್ (ಕುಲ್ಶೇಕರ್)
ಜೆರಿ ಕುಲ್ಶೇಕರ್
ವಳೊಕ್:
ಪತಿಣೆಚೆಂ ನಾಂವ್ : ಬೆನಿಲ್ಡಾ ಡಿ’ಸಿಲ್ವಾ [’ಯೇ ಯೇ ಕಾತ್ರಿನಾ’ ಖ್ಯಾತಿ ಕೊಂಕ್ಣಿ ಗಾವ್ಪಿ ಹೆನ್ರಿ ಡಿ’ಸೊಜಾಚಿ ಭಯ್ಣ್]
ಆಪ್ಣಾಯಿಲ್ಲಿಂ ಇನಾಮಾಂ/ಪ್ರಶಸ್ತ್ಯೊ ;
ಕೊಂಕಣ್ ಭಾಶಾ ಮಂಡಳ್ - ಗೊಂಯಾ ಥಾವ್ನ್ ಪ್ರಶಸ್ತಿ [’ಜನ್ಮಾ-ಸಂದೇಶ್’ ಕಾದಂಬರೆಕ್ 1985 ಇಸ್ವೆಂತ್]
’ಕಾದಂಬರಿಯಾಂಚೊ ರಾಯ್ ’ ಪ್ರಶಸ್ತಿ. [1997 ಇಸ್ವೆಂತ್]
ಡಾ|ಟಿ.ಎಮ್.ಎ.ಪೈ. ಸಂಸ್ಥ್ಯಾ ಥಾವ್ನ್ ಪ್ರಶಸ್ತಿ [’ಘರಾಚೊ ದಿವೊ’ ಕಾದಂಬರೆಕ್ 1992 ಇಸ್ವಿ]
ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ [1999 ಇಸ್ವೆಂತ್]
’ದಾಯ್ಜಿ ಪುರಸ್ಕಾರ್ ’ [2004 ಇಸ್ವೆಂತ್]
ಕಾದಂಬರ್ಯೊ : 52
ಮಟ್ವ್ಯೊ ಕಾಣ್ಯೊ : 800
ಕವಿತಾ/ಚುಟುಕಾಂ : 100
ಅಣ್ಕಾರಿತ್ : 4 ಕಾದಂಬರಿಯೊ ಮಲಯಾಳಂ ಭಾಸೆಕ್ ತರ್ಜಣ್ ಜಾಲ್ಯಾತ್.
ಪಯ್ಲಿ ಕಾದಂಬರಿ : 1955 ಇಸ್ವೆಂತ್ ’ಪಯ್ಣಾರಿ’ ಹಾಪ್ತ್ಯಾಳ್ಯಾರ್ ಫ಼ಾಯ್ಸ್ ಜಾಲ್ಲಿ ’ಜೆಮಿ-ಜೆನಿತ್’
ಶ್ರೇಷ್ಟ್ ಕಾದಂಬರಿ: ಎಕಾ ಆವಯ್ಕ್ ಆಪ್ಲ್ಯಾ ಬುರ್ಗ್ಯಾಂ ಪಯ್ಕಿ ಕಶಿಂ ಸಗ್ಳಿಂ ಮೊಗಾಚಿಂಗೀ ತಶೆಂಚ್ ಎಕಾ ಬರವ್ಪ್ಯಾಕ್ ಆಪ್ಲ್ಯಾ ಕೃತಿಯಾಂ ಪಯ್ಕಿಂತ್ಲಿ ಶ್ರೇಷ್ಟ್ ಖಂಚಿ ಮ್ಹಣ್ಚೆಂ ಕಷ್ಟಾಂಚೆಂ ತರ್ಯ್ ತಾಚಿ ’ಘರಾಚೊ ದಿವೊ’ ಕಾದಂಬರಿ ತಾಕಾ ಭೋವ್ ಧಾದೊಸ್ಕಾಯ್ ದೀಂವ್ಕ್ ಸಕ್ಲ್ಲಿ ಕಾದಂಬರಿ ಜಾವ್ನಾಸಾ.
ಸಾಹಿತಿಕ್ ವಾವ್ರ್ :
ಕೊಂಕ್ಣಿ ಪತ್ರಾಂಕ್ ತಾಣೆಂ ಜಾಯ್ತಿ ಕುಮೊಕ್ ಕೆಲ್ಯಾ. ಆಜ್ ತೆಂ ಕೊಣಾಯ್ಚಾಯ್ ಗುಮಾನಾಂತ್ ಆಸ್ಚೆಂನಾ ತರ್ಯ್ ತಾಣೆಂ ಕೊಂಕ್ಣಿ ಪತ್ರಾಂ ಖಾತಿರ್ ಫ಼ಕತ್ ಅಪ್ಲಿಂ ಬರ್ಪಾಂ ದಿಲ್ಲಿಂ ಮಾತ್ರ್ ನ್ಹಯ್, ಕೊಂಕ್ಣಿ ಪತ್ರಾಂಕ್ ಜಾತಾ ತಿತ್ಲ್ಯಾ ಲೊಕಾಂನಿ ವಾಚಿಚೆಂ ಕರುಂಕ್ ತವಳ್ ತವಳ್ ಪತ್ರಾಚೊ ವರ್ಗಣ್ಯೊ ಜಮೊ ಕರುನ್ ದಿತಾಲೊ. [ಮಾಫ಼್ ಕರಾ - ಕಮಿಶನ್ ಘೆವ್ನ್ ಬಿಲ್ಕುಲ್ ನ್ಹಯ್ - ತಸಲೆಂ ವೆವಹಾರಿಕ್ ಗಿನ್ಯಾನಾಚೊ [Business Minded ಮನಿಸ್ ತೊ ಬಿಲ್ಕುಲ್ ನ್ಹಂಯ್].
ವೆಕ್ತಿತ್ವ್ :
ಜೆರಿ ಕುಲ್ಶೇಕರಾಚಿ ವಳೊಕ್ ಕರ್ಚಿ ಮ್ಹಳ್ಯಾರ್ ಹಸ್ತಿಕ್ ವರ್ಣುಂವ್ಚೆಂ ಮ್ಹಣ್ಯೆತ್. ’ಹಸ್ತ್’ ಮ್ಹಳ್ಯಾರ್ ಪುರೊ. ಅಪ್ಲೆಂಚ್ ಸಮ್ಜತಾ ವಡ್ಲಿ ಜಿವಿ ಮ್ಹಣ್. ತಶೆಂಚ್ ’ಜೆರಿ ಕುಲ್ಶೇಕರ್’ ಮ್ಹಳ್ಳೆಂ ನಾಂವ್ಚ್ ಏಕ್ ವಳೊಕ್.
ಹಾಂವ್ ಬುರ್ಗೊಂ ಆಸ್ತಾನಾ ತಾಚೊ ಮಟ್ವ್ಯೊ ಕಾಣ್ಯೊ ವಾಚ್ತಾಲೊಂ. ತೊ ಕೊಂಕ್ಣೆಂತ್ಲ್ಯಾ ಚಡ್ತಾವ್ ಜಾವ್ನ್ ಹರ್ಯೆಕಾ ಪತ್ರಾಂನಿ ಕಾಣ್ಯೊ ಬರಯ್ತಾಲೊ. ಕಾಣ್ಯೊ ಮಾತ್ರ್ ನ್ಹಯ್, ಕವಿತಾ, ಚುಟುಕಾಂ, ನೀಳ್ಗತಾ, ಕಾದಂಬರಿಯೊ, ಲೇಕನಾಂ ತಾಣೆಂ ಸರಾಗ್ ಬರಯ್ಲ್ಯಾಂತ್.
ಚಿಂತಾಪ್:
ಜೆರಿ ಕುಲ್ಶೇಕರ್ ಏಕ್ ತಾಲೆಂತ್ವಂತ್ ಸಾಹಿತಿ. ಸಂಸಾರಿಂ ಸಂಗ್ತ್ಯಾಂನಿ ತಾಣೆ ಜಾಯ್ತೊ ಅನ್ಭೋಗ್ ಜೊಡ್ಲಾ. ಸಾದ್ಯಾ ಮನ್ಶಾಂಚಾ ಕಾಳ್ಜಾಚಿಂ ಉಡ್ಕಾಣಾಂ ತೊ ಸಾರ್ಕೆ ರಿತಿನ್ ಸಮ್ಜತಾ. ಅಶೆಂಚ್ ಅಪ್ಲ್ಯಾ ಕಾಣ್ಯಾಂನಿ ತೊ ಲಿಸಾಂವಾಂ ಶಿಕಯ್ತಾ, ಪರಿಹಾರ್ ದಿತಾ. ತಾಚೆಂ ಚಿಂತಾಪ್ ಸಾಮಾಜಿಕ್, ಕುಟುಂಬಿಕ್ ಚಿಂತ್ಪಾಚೆಂ. ಎಕಾ ಸಮಾಜೆಂತ್ ಜಿಯೆಂವ್ಚಾ ಕುಟ್ಮಾಕ್ ಕಸಲಿಂ ಆದರ್ಶಾಂ ಆಸಾಜಯ್. ಕಸಲಿಂ ಮೌಲ್ಯಾಂ ಆಸಾಜಯ್? ಹೆಂ ಸರ್ವ್ ತಾಚಾ ಬರ್ಪಾಂನಿ ವಾಚುಂಕ್ ಮೆಳ್ತಾ.
ಮಟ್ವ್ಯೊ ಕಾಣ್ಯೊ :
ಜೆರಿ ಕುಲ್ಶೇಕರಾಚೊ ಚಡ್ತಾವ್ ಮಟ್ವ್ಯೊ ಕಾಣ್ಯೊ ಪಾರಂಪರಿಕ್ ಚಿಂತ್ಪಾಚೊ. ಮ್ಹಣ್ಜೆ ಎಕಾ ತೆಂಪಾರ್ ಥಾವ್ನ್ ಸುರು ಜಾವ್ನ್ ಅಖೇರಿಕ್ ಸುಕಾ-ಸಂತೊಸಾನ್ ಜಿಯೆಲಿಂ ಮ್ಹಣೊನ್ ಅಖೇರ್ ಜಾಂವ್ಚೆ ತಸಲ್ಯೊ. ದೆಕುನ್ ತಾಚೊ ಮಟ್ವ್ಯೊ ಕಾಣೊ ಖಾಯ್ಸ್ ಕರ್ಚೊ ಸಾದೊ ಲೋಕ್ ಜಾಯ್ತೊ ಆಸ್ಲ್ಲೊ ಆನಿ ಆಸಾ ಸಯ್ತ್. ಮಟ್ವ್ಯಾ ಕಾಣ್ಯಾಂತ್ ಹೊಯ್ ಏಕ್ ಪ್ರಕಾರ್ ದೆಕುನ್ ಸಾದ್ಯಾ ವಾಚ್ಪ್ಯಾಂಚಾ ನದ್ರೆಂತ್ ಜೆರಿ ಕುಲ್ಶೇಕರ್ ಸದಾಂಚ್ ಮೊಗಾಚೊ. ತಾಚಿ ಭಾಸ್ ಸಾದಿ, ತಾಚೆಂ ಚಿಂತಾಪ್ ಸಾದೆಂ. ತಾಚೊ ಮಟ್ವ್ಯೊ ಕಾಣ್ಯೊ ವಾಚ್ತಾನಾ ಅಶೆಂ ಭೊಗ್ತಾಕೀ ಹಿ ಏಕ್ ಕಾಣಿ ನ್ಹಯ್, ಬಗಾರ್ ಕೊಣಾಚಿಗೀ ಜಿಣಿ ಮ್ಹಳ್ಳೆಪರಿಂ.
’ಕಾಳ್ಜಾಂತ್ಲೊ ಮೋಗ್’ ಕಾಣಿ ಅಸಲ್ಯಾಚ್ ಸಾದ್ಯಾ ಚಿಂತ್ಪಾಚಿ ಉಂಚ್ಲಿ ಕಾಣಿ. ಹಾಂತುಂ ದಿಸೊನ್ ಯೆಂವ್ಚಿಂ ಕುಟ್ಮಾಚಿಂ ಮೊಲಾಂ ಪಳೆಯಾ. ಖರೆಂ ಕ್ರಿಸ್ತಿ ಕುಟಾಮ್ ಮ್ಹಳ್ಯಾರ್ ಕಶೆಂ ಆಸ್ಲ್ಲೆಂ ಮ್ಹಳ್ಳ್ಯಾಕ್ ಹಿ ಕಾಣಿ ಆರ್ಸೊ ಧರ್ತಾ.
ಕಥಾದಾಯ್ಜ್ - 3 . ಕಾಳ್ಜಾಂತ್ಲೊ ಮೋಗ್
ಬೊಂದೆಲಾಂತ್ ಜಿಯೆತಾಲೆಂ ಏಕ್ ಮಧ್ಯಮ್ ವರ್ಗಾಚೆಂ ಕುಟಾಮ್, ಪಾಂಚ್ ಜಣಾಂ ಬುರ್ಗಿಂ ತಾಂಕಾಂ ಆಸ್ಲ್ಲಿಂ, ಮಾಲ್ಘಡೆಂ ಗ್ರೆಟ್ಟಾ, ತಾಚೆ ಪಾಟ್ಲ್ಯಾನ್ ಪಾಟಿಂ ಫ಼ುಡೆಂ ದೊಗಿ ಭಯ್ಣಿ ಆನಿ ದೋಗ್ ಭಾವ್, ಲ್ಹಾನ್ಶಾ ಮಾಡಿಯಾಂ ತೊಟಾ ಸಾಂಗಾತಾ ಥೊಡೆ ಮಾಡ್ಯ್ ಲಾಯಿಲ್ಲ್ಯಾನ್ ತಾಂಚಾ ಕುಟ್ಮಾಚಾ ಖರ್ಚಾಕ್ ಹಾಂತ್ಲಿ ಹುಟ್ವೊಳ್ ಪಾವ್ತಾಲಿ.
ದೆವಾಸ್ಪಣಿಂ ಮರ್ಯಾದಿಚೆಂ ಕುಟಾಮ್ ಹೆಂ.. ಮಾಲ್ಘಡೆಂ ಗ್ರೆಟ್ಟಾ ಟೀಚರ್ ಟ್ರೇನಿಂಗ್ ಶಿಕ್ತಾಲೆಂ ತಾಚಿ ಸೊಭಾಯ್ ಪಳೆತೆಲ್ಯಾಂಚಾ ದೊಳ್ಯಾಂಕ್ ಸೊಭ್ತಾಲಿ. ಆಕರ್ಷಿತಾಲಿ. ಪುಣ್ ಗ್ರೆಟ್ಟಾ ಮಾನ್ ಮಾನ್ಸುಗೆಚ್ಯಾ ನ್ಹೆಸ್ಣಾನ್ ಸಾದ್ಯಾಪಣಾನ್ ನಿತಳ್ ಗುಣಾಂಕ್ ಫ಼ಿರ್ಗಜೆಂತ್ ವಳ್ಕಾತಾಲೆ. ತೆಂ ಸಕಾಳಿಂ ಕ್ಲಾಸಿಕ್ ಭಾಯ್ರ್ ಸರ್ತಾನಾ ಅಪ್ಲ್ಯಾ ಭಾಂವ್ಡಾಂಕ್ ಇಸ್ಕೊಲಾಕ್ ತಯಾರ್ ಕರ್ನ್ ದೀವ್ನ್ ಆಪ್ಣಾ ಸಾಂಗಾತಾ ಆಪವ್ನ್ ವರ್ನ್ ಗೆಟಿ ಭಿತರ್ ಸೊಡುನ್ ಉಪ್ರಾಂತ್ ಬಸ್ಸ್ ಧರ್ತಾಲೆಂ. ಜಾಂವ್ ತೆಂ ವಾಟೆನ್ ಚಲ್ತಾನಾ ಜಾಂವ್ ಬಸ್ಸಾರ್ ಬಿಲ್ಕುಲ್ ತರ್ನಾಟ್ಯಾಂಚಾ ತೊಂಡಾರ್ ದೀಷ್ಟ್ ಘಾಲಿನಾತ್ಲ್ಲೆಂ. ಕೋಣ್ಯ್ ತಾಚೆರ್ ಆಬ್ಳಾಯೆಚಿ ದೀಷ್ಟ್ ಲಾಯಿಲ್ಲೆಂ ಪಳೆತ್ ಜಾಲ್ಯಾರ್ ತೆಂ ಸಕ್ಲಾ ಘಾಲುನ್ ಆಪ್ಲೆ ಬೂಕ್ ಹರ್ಧ್ಯಾರ್ ಆಡ್ ಧರುನ್ ಬಸ್ತಾಲೆಂ.
ಶಿಕ್ಪಾಂತ್ ತೆಂ ಹುಶಾರ್ ಆಸ್ಲ್ಲ್ಯಾನ್ ಟ್ರೇನಿಂಗ್ ಪರಿಕ್ಶೆಂತ್ ಪಾಸ್ ಜಾಂವ್ಕ್ ತಾಕಾ ಕಶ್ಟ್ ಜಾಂವ್ಕ್ನಾಂತ್. ಶಿಕ್ತಾನಾ ಜಾಲ್ಯಾರ್ಯ್ ಘರ್ಚೆಂ ಸರ್ವ್ ಕಾಮ್ ತೆಂ ಕರ್ತಾಲೆಂ, ಭಾಂವ್ಡಾಂಚಿ ಚಾಕ್ರಿ ಕರ್ತಾಲೆಂ. ಪುಡ್ಪುಡಿತ್ ತಾಚಿ ಕೂಡ್ ಜಾಲ್ಲ್ಯಾನ್ ಸುಡ್ಸುಡಾಯೆಂತ್ ಉಣೆಂ ನಾತ್ಲ್ಲೆಂ. ಸೆಜಾರ್ಯಾಂ ಲಾಗಿಂ ಮಾತ್ರ್ ನ್ಹಯ್, ಸಗ್ಳ್ಯಾ ಫ಼ಿರ್ಗಜ್ಗಾರಾಂಲಾಗಿಂ ತೆಂ ಮಾಯಾಮೊಗಾನ್ ಆನಿ ಮಾಯ್ಪಾಸಾನ್ ಉಲಯ್ತಾಲೆಂ. ಕೆದ್ನಾಂಯೀ ತೊಂಡಾರ್ ಹಾಸೊ ಪಳೆಲ್ಲಿಂ ತಾಚಾ ಮಾಯ್ಪಾಸ್ಪೊಣಾಕ್ ಮೆಚ್ವತಾಲಿಂ. ಆಯ್ತಾರಾ ಮಿಸಾವೆಳಾರ್ ಕೊಯರಾಂತ್ ಗ್ರೆಟ್ಟಾಚೊ ತಾಳೊ ಆಯ್ಕನಾತ್ಲ್ಯಾರ್, ತ್ಯಾ ದಿಸಾಚಿಂ ಕಂತಾರಾಂ ಕಾನಾಂಕ್ ಆಕರ್ಶಿತ್ ಕರಿನಾತ್ಲ್ಲಿಂ, ಗಿತಾಂ ಆಯ್ಕಾಲ್ಲೆ/ಲ್ಲಿಂ ಮ್ಹಣ್ತಾಲೆ/ಲಿಂ
"ಆಜ್ ಗ್ರೆಟ್ಟಾ ಮಿಸಾಕ್ ಯೇವ್ನಾ?" ತಿತ್ಲೊಯಿ ಮಧುರ್ ತಾಚೊ ತಾಳೊ ಆಯ್ತಾರಾಚಾ ಮಿಸಾ ಉಪ್ರಾಂತ್ ತೆಂ ಬುರ್ಗ್ಯಾಂಕ್ ದೊತೊರ್ನ್ ಶಿಕಯ್ತಾಲೆಂ.
ತಾಚಿ ಮಾನ್ಸುಗೆಚಿ ಚಾಲ್-ಚಮ್ಕಾಣ್, ದೊತೊರ್ನ್ ಶಿಕಂವ್ಚಿ ಹುಶಾರಾಯ್, ಫ಼ಿರ್ಗಜೆಂತ್ಲ್ಯಾ ಕಾರ್ಯಾಂ-ಫ಼ೆಸ್ತಾಂ ವೆಳಾರ್ ತಾಣೆಂ ವಾವುರ್ಚಿ ರೀತ್, ಲ್ಹಾನ್-ವ್ಹಡಾಂ ಲಾಗಿಂ ಉಲಂವ್ಚೆಂ ಸುಡಾಳ್ ನಿತಳ್ ಉಲವ್ಣೆಂ ಪಾರ್ಕಿಲ್ಲ್ಯಾ ವಿಗಾರಾಕ್ ಗ್ರೆಟ್ಟಾ ಮ್ಹಳ್ಯಾರ್ ವರ್ತೊ ಮಯ್ಪಾಸ್. ತ್ಯಾ ವರ್ವಿಂ ತಾಕಾ ತಾಣೆ ಫ಼ಿರ್ಗಜೆಂತ್ಲ್ಯಾ ಇಸ್ಕೊಲಾಂತ್ ಕಾಮ್ ದಿಲ್ಲೆಂ. ದೋನ್ ವರ್ಸಾಂ ಪಾಶಾರ್ ಜಾತಾನಾ ಬಾಪುಯ್ ಪಿಡೆಂತ್ ಪಡ್ಲೊ. ತಾಚಾ ವಕ್ತಾಕ್ ಮ್ಹಣ್ ಥೋಡೆಂ ರೀಣ್ ಕಾಡಿಜಾಯ್ ಪಡ್ಲೆಂ.
ಪುಣ್ ಕೊಣೀಂ ಕೆದ್ನಾಂಯ್ ಕಿತೆಂ ರೀಣ್ ದಿತಿತ್? ನಿಮಾಣೆಂ ತಾಣೆಂ ಆಪ್ಲ್ಯಾ ಆವಯ್ಚಾ ಕಬ್ಲಾತೆನ್ ತಿಚೆಂ ಥೋಡೆಂ ಭಾಂಗಾರ್ ಬೆಂಕಾಂತ್ ಆಪ್ಲ್ಯಾ ನಾಂವಾರ್ ಆಡವ್ ದವರ್ಲೆಂ. ಭಾಂಗಾರ್ ಆಡವ್ ದವರ್ತಾನಾ ಕಾಳಿಜ್ ಖಡ್ಸರ್ತಾಲೆಂ ತರೀ ಬಾಪಾಯ್ಚಿ ಪಿಡಾ ಗೂಣ್ ಕರ್ಚೆ ಖಾತಿರ್ ದುಸ್ರಿ ವಾಟ್ ನಾತ್ಲ್ಲಿ.
ಬಾಪಯ್ ಭಲಾಯ್ಕೆಂತ್ ಪಾಟಿಂ ಆಯ್ಲೊ ಜಾಲ್ಯಾರ್ ಉಪ್ರಾಂತ್ ಆಪ್ಲ್ಯಾ ಸಾಂಬಾಳಾನ್ ತೆಂ ಭಾಂಗಾರ್ ಸೊಡಂವ್ಚೆಂ ಧಯ್ರ್ ತಾಕಾ ಆಸ್ಲ್ಲೆಂ. ಪುಣ್ ಬಾಪಾಯ್ಚಿ ಪಿಡಾ ದಿಸಾನ್ದೀಸ್ ಚಡೊನ್ ಆಯ್ಲಿ. ಎಕಾ ವರ್ಸಾಚಾ ವಳ್ವೊಳ್ಯಾಂನಿ ತಾಣೆಂ ಪ್ರಾಣ್ ಸೊಡ್ಲೊ. ಆತಾಂ ಮಾಲ್ಘಡ್ಯಾ ಗ್ರೆಟ್ಟಾವಯ್ರ್ ಘರ್ಚೊ ಭೊರ್ ಪಡ್ಲೊ. ಕಿತ್ಯಾಕ್ ಅಶಿಕ್ಪಿ ಆವಯ್ ಸುಡ್ಸುಡಾಯೆಂತೀ ಉಣಿಂ ಆಸ್ಲಿ. ತ್ಯಾ ಶಿವಾಯ್ ತವಳ್-ತವಳ್ ಪಿಡೆಂತ್ ಪಡೊನ್ ಜಿವಾಂತ್ ತಿ ಅಸ್ಕತ್ ಆಸ್ಲ್ಲಿ.
ತ್ಯಾ ವರ್ವಿಂ ಕಷ್ಟ್ ಜಾಲ್ಯಾರೀ ತೆಂ ಆವಯ್ಕ್ ಘರ್ಚೆಂ ಕಾಮ್ ಕರುಂಕ್ ದೀನಾಶೆಂ ಆಪ್ಲ್ಯಾ ಭಾಂವ್ಡಾಂಕ್ ಕಾಣ್ಘೆವ್ನ್ ಇಸ್ಕೊಲಾ ಥಾವ್ನ್ ಯೆತೆಚ್ ಘರ್ಚೆಂ ಸರ್ವ್ ಕಾಮ್ ಕರ್ತಾಲೆಂ, ಘರ್ದಾರ್ ಸಾಂಬಾಳ್ತಾನಾ ಭಾಂವ್ಡಾಂಚಾ ಫ಼ುಡಾರಾಚೊ ಹಾರ್ಭಾರ್ಯೀ ತಾಣೆಂ ಸಾಂಬಾಳುಂಕ್ ಆಸ್ಲ್ಲೊ. ಬಾಪಾಯ್ನ್ ಮಾಡಿಯಾಂ ತೊಟಾಕ್ ಉದಾಕ್ ಘಾಲ್ಚಾಕ್ ಪಂಪ್ಸೆಟ್ ಘೆತ್ಲ್ಲೆಂ ಆಸ್ತಾನಾ ಉದ್ಕಾಚಾ ಪೊಯ್ರ್ಯಾ ದೀಸ್ ತೆಂ ಭಾವಾ ಕರ್ನಾ ಪಂಪ್ ಚಾಲು ಕರವ್ನ್ ಭಾಂವ್ಡಾಂಲಾಗಿಂ ಕರ್ಲಿಂ ದೀವ್ನ್ ತೆಂಯೀ ಆಪ್ಣಾಲಾಗಿಂ ಏಕ್ ಧರುನ್ ಉದಾಕ್ ಶಿಂಪ್ತಾಲೆಂ.
ಅಪುಣ್ ಏಕ್ ಟೀಚರ್ ಆಸ್ಲ್ಲೆಂ ಕಾಮ್ ಕರ್ಚೆಂ ಅಪ್ಣಾಕ್ ಹಲ್ಕ್ಪಣ್ ಮ್ಹಣ್ ತೆಂ ಬಿಲ್ಕುಲ್ ಲಿಕಿನಾತ್ಲೆಂ. ಎಕಾ ದಾದ್ಲ್ಯಾಪರಿಂ ತೆಂ ಕಾಮ್ ಕರ್ತಾಲೆಂ. ಹೆಂ ಪಳೆಲ್ಲೊ ಸೆಜಾರಿ ಲೋಕ್ ಮ್ಹಣ್ತಾಲೊ
"ಗ್ರೆಟ್ಟಾ ಚೆಡುಂ ನ್ಹಯ್, ಚೆಡೊ, ಮ್ಹಾಲ್ಘಡೆಂ ಚೆಡುಂ ಜಾವ್ನ್ ಘರ್ಚೊ ವ್ಹಡ್ಲೊ ಹಾರ್ಭಾರ್ ತಾಣೆಂ ಖಾಂದ್ಯಾರ್ ಘೆತ್ಲಾ..? ಭಾಂವ್ಡಾಂ ಖಾತಿರ್ ಕಿತ್ಲೆಂ ತೆಂ ವಾವುರ್ತಾ? ಕಿತ್ಲ್ಯಾ ಶಿಸ್ತೆನ್ ಆನಿ ಮಾಯಾಮೊಗಾನ್ ತಾಂಕಾಂ ವಾಗಯ್ತಾ? ತೆಂ ಕಾಜಾರ್ ಜಾವ್ನ್ ಭಾಯ್ರ್ ಗೆಲೆಂ ತರ್ ತ್ಯಾ ಘರ್ಚೊ ಖಾಂಬೊ ನಿಕ್ಳಾಲ್ಲೆಪರಿಂ, ಘರ್ಚೊ ದಿವೊ ಪಾಲ್ವಾಲ್ಲೆಪರಿಂ. ’ಚೆಡ್ವಾಕ್ ಕಾಜಾರಾಚಿ ಪ್ರಾಯ್ ಜಾಲ್ಯಾ. ಆನಿ ಕಿತ್ಲಿಂ ವರ್ಸಾಂ ತೆಂ ಘರಾಂತ್ ಆಸತ್? ತೆಂ ಭಾಯ್ರ್ ಗೆಲೆಂ ತರ್ ತ್ಯಾ ಘರಾಚಿ ಆವಸ್ಥಾ ಕಿತೆಂ ಜಾಂವ್ಕ್ ಆಸಾ ಕೊಣ್ಣಾ..
ತಾಚೆಲಾಗ್ಗಿಂ ಕಾಜಾರ್ ಜಾಂವ್ಚ್ಯಾ ನೊವ್ರ್ಯಾನ್ ತಾಚೆ ಪಾಂಯ್ ಧುವ್ನ್ ಉದಾಕ್ ಪಿಯೆಜಾಯ್." ಪುಣ್ ಗ್ರೆಟ್ಟಾಕ್ ಆಪ್ಲ್ಯಾ ಕಾಜಾರಾಚಿ ಆತುರಾಯ್ ನಾ. ತ್ಯಾ ವಿಶ್ಯಾಂತ್ ತಾಣೆಂ ಚಿಂತ್ಲ್ಲೆಂಚ್ ನಾ. ತೆಂ ಫ಼ಕತ್ತ್ ಭಾಂವ್ಡಾಂಚಾ ಶಿಕ್ಪಾ ಥಂಯ್ ತಾಂಚಾ ಬರ್ಯಾ ಫ಼ುಡಾರಾ ಥಂಯ್ ಘರ್ ಉದ್ದಾರ್ ಕರ್ಚೆ ಥಂಯ್ ವಾವುರ್ತಾಲೆಂ. ತಾಚಾ ಸಾಂಗಾತಾಂಕ್ ಥೊಡ್ಯಾಂಕ್ ಕಾಜಾರ್ ಜಾವ್ನ್ ಭುರ್ಗಿಂ ಜಾಲ್ಯಾಂತ್ ತರೀ ತಾಕಾ ಹ್ಯಾ ವಿಷ್ಯಾಂತ್ ಖಬಾರ್ ನಾ ಮ್ಹಳ್ಳೆಪರಿಂ ತೆಂ ಘರ್ಚ್ಯಾ ಹಾರ್ಭಾರಾಕ್ ಖಾಂದ್ ಮಾರ್ತಾಲೆಂ.
ಆಂವ್ದುಂ ಪಡ್ಲ್ಲೆ ಪೂರಾಯ್ ನಾರ್ಲ್ ತಾಣೆ ದಾಸ್ತಾನ್ ಕರ್ನ್ ದವರ್ಲ್ಲೆ, ಕಿತ್ಯಾಕ್ ಪೊಪಾಳ್ ಯೆತೆಚ್ ಪೊಪ್ಳಾಂ ಸಾಂಗಾತಾ ನಾರ್ಲ್ಯಿ ಎಕ್ಚ್ ಪಾವ್ಟಿಂ ವಿಕುನ್ ಆವಯ್ಚೆಂ ಭಾಂಗಾರ್ ಸೊಡಂವ್ಚಿ ತಾಚಿ ಆಲೋಚನ್, ಆನಿ ತೆಂ ತಶೆಂಚ್ ಕರ್ತಾ. ಪದ್ವಾ ವಯ್ಲ್ಯಾ ಕೊಂಕ್ಣ್ಯಾಂಕ್ ಆಪಂವ್ಕ್ ಧಾಡ್ನ್ ಪೊಪ್ಳಾಂ ಸಾಂಗಾತಾ ನಾರ್ಲ್ಯೀ ವಿಕುನ್ ಎಕಾ ಗಾಂಟಿನ್ ದುಡು ಘೆವ್ನ್ ಆವಯ್ಚೆಂ ಭಾಂಗಾರ್ ತೆಂ ಸೊಡಯ್ತಾ ಆನಿ ಘರ್ಚ್ಯಾ ಖರ್ಚಾಕ್ ಆಪ್ಲ್ಯಾ ಸಾಂಬಾಳಾನ್ಂಚ್ ಸುಧಾರ್ಸುನ್ ವರ್ತಾ. ಹೆಂ ಪಳೆಲ್ಲ್ಯಾ ಆವಯ್ಚೆ ದೊಳೆ ಭಿಜ್ತಾತ್. ’ಗ್ರೆಟ್ಟಾ ಮ್ಹಜಿ ಮ್ಹಾಲ್ಘಡಿ ಧುವ್ ನ್ಹಯ್, ಬಗಾರ್ ಮಾಲ್ಘಡೊ ಪೂತ್..’ ತಿ ಸಮ್ತೊಸ್ ಪಾವ್ತಾನಾ ತ್ಕಾ ಕಾಜಾರ್ ಕರುಂಕ್ ಅಸಹಾಯಕ್ ಜಾಲ್ಲ್ಯಾ ಆಪ್ಲ್ಯಾ ಸ್ತಿತಿಕ್ ದೊಳೆ ಭಿಜಯ್ತಾ.
ಘರಾ ಖಾತಿರ್, ಆಪ್ಲ್ಯಾ ಭಾಂವ್ಡಾಂ ಖಾತಿರ್ ತಾಣೆ ಕಾಡ್ಚೆ ಕಷ್ಟ್ ಚಿಂತಾನಾ ತಿಚೆಂ ಕಾಳಿಜ್ ಖಡ್ಸರ್ತಾ, ಎಕೇಕ್ ಪಾವ್ಟಿಂ ತಿ ಅಶೆಂ ಚಿಂತುನ್ ಅಕಸ್ಮತ್ ದೊಳ್ಯಾಂನಿ ದೆಂವ್ಚಿಂ ದುಃಖಾಂ ಪಾಲ್ವಾಪೊಂತಾನ್ ಪುಸ್ತಾನಾ ಪಳೆಲ್ಲೆಂ ಗ್ರೆಟ್ಟಾ ತಿಕಾ ಸಮಧಾನ್ ಕರುನ್ ಭುಜಯ್ತಾ.
"ಮಾಂಯ್, ಬಾಬಾಚಾ ಅತ್ಮ್ಯಾಖಾತಿರ್ ಮಾಗ್. ತಾಚೊ ಉಗ್ಡಾಸ್ ಕಾಡುನ್ ಖಂತ್ ಕಾಣ್ಘೆವ್ನ್ ಕರ್ಗಾಲ್ಯಾರ್ ತೊ ಕಾಂಯ್ ಜಿವಂತ್ ಜಾಂವ್ಚೊನಾ.."
"ಹಾಂವ್ ತ್ಯಾ ಖಾತಿರ್ ರಡಾನಾ ಪುತಾ... ತುವೆಂ ಕಾಡ್ಚೆ ಕಷ್ಟ್ ಪಳೆತಾನಾ ಮ್ಹಜೆಂ ಕಾಳಿಜ್ ಪಾಪ್ಸಾತಾ... ತುಜಾ ಪ್ರಾಯೆಚಿಂ ಕಾಜಾರ್ ಜಾವ್ನ್ ತಾಂಚೊ ಫ಼ುಡಾರ್ ಭಾಂದುಂಕ್ ಪಾವ್ಲಿಂ. ಆನಿ ತುಂ ಮ್ಹಾಲ್ಘಡೆಂ ಧುವ್ ಜಾವ್ನ್ ಭಾಂವ್ಡಾಂಚಾ ಫ಼ುಡಾರಾ ಖಾತಿರ್ ಒದ್ದಾಡ್ತಾಯ್.."
"ಅಳೆ ಮಾಂಯ್, ತುಂ ಮ್ಹಜಾ ಫ಼ುಡಾರಾಖಾತಿರ್ ಕಿತೇಂಯೀ ಚಿಂತುಂಕ್ ವಚಾನಾಕಾ. ವೇಳ್ ಘಡಿ ಯೆತಾನಾ ಸರ್ವ್ ಸಾರ್ಕೆಂ ಜಾತೆಲೆಂ. ಮ್ಹಜೆ ಥಂಯ್ ಕಾಜಾರಾಚಿ ವೊಡ್ಣಿ ನಾ. ಮ್ಹಜ್ಯಾ ಭಾವಾಂಚೆಂ-ಭಯ್ಣ್ಯಾಂಚೆಂ ಶಿಕಾಪ್, ತಾಂಚೊ ಫ಼ುಡಾರ್ಚ್ ಮ್ಹಜೊ ಫ಼ುಡಾರ್. ತ್ಯಾ ಖಾತಿರ್ ತುಂ ಕಾಂಯ್ ಫ಼ಿಕಿರ್ ಕರಿನಾಕಾ. ದೆವಾಲಾಗಿಂ ಮಾಗ್. ಸರ್ವ್ ಬರೆಂ ಜಾತೆಲೆಂ. ತುಂ ಅಶೆಂ ರಡೊನ್ ಕರ್ಗೊನ್ ಬಾಬಾಚಿ ವಾಟ್ ಧರ್ನ್ ವೆಶಿ ತರ್ ಆಮಿ ಕೊಣಾಚೊ ಆಧಾರ್ ಮಾಗ್ಚೊ..?" ತೆಂ ಸಮ್ಜಾಯ್ತಾಲೆಂ.
ಮ್ಹಾಲ್ಘಡ್ಯಾ ಧುವೆಚೆ ಜಾಣ್ವಾಯ್ ಅಪ್ಣಾಕ್ ನಾತ್ಲ್ಲ್ಯಾಕ್ ತಿ ತಿಕಾಚ್ ದುರ್ಸತಾಲಿ. ಭಾಂವ್ಡಾಂ ವಾಡೊನ್ ಆಯಿಲ್ಲೆಪರಿಂಚ್ ದೊಗಾಂ ಕೊಲೆಜಿಕ್ ಆನಿ ದೊಗಾಂ ಹಾಯ್ಸ್ಕೂಲಾಂತ್ ಶಿಕ್ತಾಲಿಂ. ಹಾಂಚಾ ಶಿಕ್ಪಾ ಖಾತಿರ್ ತೊಟಾಂತ್ ಜಾಲ್ಲ್ಯಾ ಹುಟ್ವೊಳೆಚೊ ದುಡು ತೆಂ ಜೊಗಾಸಣೆನ್ ದವರ್ತಾಲೆಂ. ಆನಿಂ ಆಪ್ಲ್ಯಾ ಸಾಂಬಾಳಾನ್ ಕಶಿಶೆನ್ ಘರ್ಚೊ ಖರ್ಚ್ ಚಲಯ್ತಾಲೆಂ. ಹ್ಯಾ ಮಧೆಂ ತಾಚಾ ಗುಣಾಂಕ್ ಹುಶಾರ್ಗಾಯೆಕ್ ಮೆಚ್ವಾಲ್ಲೆ ಸಬಾರ್ ತರ್ನಾಟೆ ತಾಚೆಲಾಗಿಂ ಕಾಜಾರ್ ಜಾಂವ್ಚೆ ಅಪೇಕ್ಶೆನ್ ತಾಂಚಾ ವ್ಹಡಿಲಾಂ ಮುಖಾಂತ್ರ್ ಮುಕಾರ್ ಆಯ್ಲೆ ತರೀ ಗ್ರೆಟ್ಟಾನ್ ನೆಗಾರ್ ಕೆಲೆಂ, ಹ್ಯಾ ಖಾತಿರ್ ವಿಗಾರಾನ್ ಪರ್ಯಾಂತ್ ತಾಕಾ ಸಮ್ಜಯ್ಲೆಂ.
"ಹ್ಯಾ ಪ್ರಾಯೆರ್ ಕಾಜಾರ್ ಬರೆಂ ಗ್ರೆಟ್ಟಾ, ಪ್ರಾಯ್ ಉತರ್ಲ್ಯಾ ಚೆಡ್ವಾಂಕ್ ಕೊಣೀಂ ಖಾಯ್ಸ್ ಕರಿನಾಂತ್.." ಪುಣ್ ತಾಚಿ ಎಕ್ಚ್ ಜಾಪ್
"ಆಪ್ಲ್ಯಾ ಭಾಂವ್ಡಾಂಚೊ ಫ಼ುಡಾರ್ ಮಾಂಡುನ್ ದಿತಾಂ ಪರ್ಯಾಂತ್ ಅಪುಣ್ ಕಾಜಾರ್ ಜಾಯ್ನಾ ಉಪ್ರಾಂತ್ ಮ್ಹಜೊ ಫ಼ುಡಾರ್.." ತಾಚಾ ಪಾಟ್ಲ್ಯಾ ಭಯ್ಣಿಚೆಂ ಪಿ.ಯು.ಸಿ ಜಾಲ್ಲ್ಯಾನ್ ಸೆಕ್ರೆಟರಿ ಕೊರ್ಸಾಕ್ ತಾಕಾ ದಾಖಲ್ ಕೆಲ್ಲೆಂ.
ಏಕ್ ವರ್ಸ್ ಸಂಪೊನ್ ಯೆತಾನಾ ಒತ್ತಾಯೆಕ್ ತವಳ್-ತವಳ್ ತಾಂಗೆರ್ ವೆತಾನಾ ತಾಚಾ ಭಾವಾಚಿ ತಾಕಾ ವಳಕ್ ಜಾವ್ನ್ ಮೊಗಾಚಾ ರೊಗಾಂತ್ ಭರ್ಸತಾನಾ ಆನಿ ಹಿ ಖಬಾರ್ ಗ್ರೆಟ್ಟಾಚಾ ಕಾನಾಂಕ್ ಪಡ್ತಾನಾ ಚಡ್ ಕಾಳ್ ಕಾಡ್ಚೊ ಬರೊ ನ್ಹಯ್ ಮ್ಹಣ್ ಭಗ್ಲ್ಲ್ಯಾ ತಾಣೆಂ ಆವಯ್ಚಿ ಒಪ್ಪಿಗೆ ಘೆವ್ನ್ ನವ್ರ್ಯಾಗೆಲ್ಯಾಂಕ್ ಖಬಾರ್ ದೀವ್ನ್ ಕಾಜಾರ್ ಕೆಲೆಂ. ಹಾತಾಂತ್ ತಾಚಾ ದುಡು ನಾತ್ಲ್ಲ್ಯಾನ್ ತೋಟ್ ಪದ್ವಾ ವಯ್ಲ್ಯಾ ಕೊಂಕ್ಣ್ಯಾಕ್ ಆಡವ್ ಘಾಲ್ಚೆಂ ಪಡ್ಲೆಂ. ದೀಸ್ ಉದ್ಕಾಚಾ ಲೊಟಾಪರಿಂ ಧಾಂವ್ತಾಲೆ. ಆಮಾಸ್ ಪುನೊವ್ ಉದೆವ್ನ್ ಮಹಿನೆ ಪರ್ತಿತಾಲೆ.
ಬರ್ಯಾ ವಾಯ್ಟಾಚಿ ಖಬಾರ್ ನಾಸ್ತಾನಾ ವರ್ಸಾಂಚೆ ಸಂಖೆ ಚಡ್ತಾಲೆ. ಗ್ರೆಟ್ಟಾಗೆಲ್ಯಾ ಘರ್ಚೆಂ ರೋದ್ ಸದಾಂಚೆಪರಿಂ ಘುಂವ್ತಾಲೆಂ. ಪಾಟ್ಲಿಂ ತೆಗಾಂಯ್ ಕೊಲೆಜಿಕ್ ವೆತಾಲಿಂ ಜಾಲ್ಯಾರ್ ಗ್ರೆಟ್ಟಾಕ್ ಆತಾಂ ದೋನ್ ಖಂತಿ ದೊಳ್ಯಾಂ ಮುಕಾರ್ ಉಭ್ಯೊ ಜಾಲ್ಲ್ಯೊ. ಪಯ್ಲೆಂ ತೋಟ್ ಆಡವ್ ಘಾಲ್ಲೆಂ ರೀಣ್ ದುಸ್ರೆಂ ಆಜ್ ಫ಼ಾಲ್ಯಾಂ ಮ್ಹಣ್ತಾನಾ ನಿಮಾಣ್ಯಾ ಭಯ್ಣಿಚೆಂ ಕಾಜಾರ್. ಭಾಂವಾಂಚಿ ತಾಕಾ ಖಂತ್ ನಾತ್ಲ್ಲಿ. ತಾಂಚೆಂ ಕೊಲೆಜಿಚೆಂ ಶಿಕಾಪ್ ಜಾವ್ನ್ ಯೆತಾಲೆಂ. ತೆ ಚೆಡೆ ಜಾಲ್ಲ್ಯಾನ್ ಖಂಯ್ಸರ್ ಪುಣಿ ಕಾಮ್ ಕರುನ್ ತಾಂಚೊ ಫ಼ುಡಾರ್ ತೆ ಪಳೆತೆಲೆ ಆನಿ ಆಪ್ಲ್ಯಾ ಪಾಂಯಾಂನಿ ರಾವ್ತೆಲೆ.
ಫ಼ಿರ್ಗಜೆಚಾ ಇಸ್ಕೊಲಾಚೆಂ ಭಾಂದಾಪ್ ಪರ್ನೆಂ ಜಾವ್ನ್ ಯೇವ್ನ್ ಪಕ್ಕಾಸ್ ಕುಂಬು ಜಾಲ್ಲೆ. ವಣದಿ ಥಂಯ್ - ಹಾಂಗಾ ಯೆರೆವ್ನ್ ಆಯಿಲ್ಲ್ಯೊ. ತ್ಯಾ ವರ್ವಿಂ ವಿಗಾರಾನ್ ಹೊ ವಿಷಯ್ ಸಲ್ಹಾ ಸಮಿತಿಚಾ ಮುಕಾರ್ ದವರ್ನ್ ತಾಂಚಾ ಒಪ್ಪಿಗೆನ್ ಪರ್ನೆಂ ಭಾಂದಾಪ್ ಕೊಸ್ಳೊವ್ನ್ ನವೆಂ ಭಾಂದಾಪ್ ಭಾಂದ್ಚೆಂ ಯೋಜನ್ ಘಾಲೆಂ. ಹ್ಯಾ ಭಾಂದ್ಪಾಚೆಂ ಕಾಮ್ ತರ್ನಾಟೊ ಯೋಗ್ಯ್ ತಶೆಂ ಪಾತಿಯೆಣೆಚೊ ಜಾಲ್ಲ್ಯಾ ಉರ್ವಾಚಾ ನವಿನ್ ಅಂಚನಾಕ್ ಕೊಂಟ್ರಾಕ್ಟ್ ದಿಲೆಂ. ತಾಣೆಂ ಹ್ಯಾ ಆಧಿಂಯ್ ಸಭಾರ್ ಇಸ್ಕೊಲಾಂಚಿಂ, ಇಗರ್ಜ್ಯಾಂಚಿಂ, ಕೊವೆಂತಾಂಚಿಂ ಕಾಮಾ ಎಕೀನ್ಪಣಾನ್ ವೆಳಾರ್ ಸಂಪಯ್ಲ್ಯಾಂತ್. ತೊ ದುಡ್ವಾಖಾತಿರ್ ತೋಂಡ್ ಸೊಡ್ಚೊ ಮನಿಸ್ ನ್ಹಯ್. ಫ಼ಕತ್ ಆಪ್ಲೆಂ ಕಾಮ್ ಖಾತ್ರಿ ಮ್ಹಣ್ ಹೆರಾಂನಿ ಮೆಚ್ವೊನ್ ಶಿಫ಼ಾರಾಸ್ ಕರುನ್ ವಿಶ್ವಾಸಾನ್ ದುಸ್ರಿಂಯೀ ಕಾಮಾಂ ಮೆಳಾಜಯ್ ಮ್ಹಣ್ಚೆಂ ತಾಣೆಂ. ತಾಣೆಂ ಸಾಂಬಾಳ್ನ್ ಹಾಡ್ಲ್ಲ್ಯಾ ವಿಶ್ವಾಸಾನ್ ತಾಕಾ ಪಾದ್ರಿ-ಮಾದ್ರಿ ಕೊಡಿಯಾಳಾಂತ್ ಮಾತ್ರ್ ನ್ಹಯ್, ಶಹರಾ ಭಾಯ್ಲ್ಯಾ ಫ಼ಿರ್ಗಜಾಂನಿಂಯೀ ಕೊಂಟ್ರೆಕ್ಟ್ ದಿತಾಲೆ.
ತ್ಯಾ ವರ್ವಿಂ ತೊ ಏಕ್ ವಿಶ್ವಾಸಿ , ನಿತಿಚೊ, ಬರ್ಯಾ ಮನಾಚೊ, ಗುಣಾಂಚೊ ಮ್ಹಣ್ ಚಾರ್ ಭಂವ್ತೊಣಿಂಚಾಂಕ್ ವಳ್ಕಿಚೊ ಜಾಲ್ಲೊ. ಇಸ್ಕೊಲಾಚಾ ಭಾಂದ್ಪಾಚೆಂ ಕಾಮ್ ತುರ್ತಾನ್ ಚಲ್ತಾಲೆಂ. ನವಿನ್ ಖುದ್ ರಾವೊನ್ ಕಾಮ್ ಪಳೆತಾಲೊ. ಸದಾಂಯ್ ಮೆಳ್ಚಾ ಮೆಸ್ತಿರ್ನ್ಯಾಂಕ್ ಹಾಸ್ಕುರ್ಯಾ ವದನಾರ್ ವಂದನ್ ಕರ್ತಾಲೊ. ಕ್ಲಾಸಿಕ್ ಸುಟಿ ಆಸ್ತಾನಾ ತಾಂಚೆಲಾಗಿಂ ಮಾಯಾಮೊಗಾನ್ ಮಯ್ಪಾಸಾನ್ ಉಲವ್ನ್ ತಾಂಚಿ ವಳಕ್ ಕರ್ತಾಲೊ.
ತಶೆಂ ಗ್ರೆಟ್ಟಾಲಾಗ್ಗಿಂಯ್ ಸಭಾರ್ ಪಾವ್ಟಿಂ ತೊ ಉಲಯ್ಲಾ. ಖುಶಾಲಾಯೆನ್ ಹಾಸ್ಲಾ. ಕಿತ್ಯಾಕ್ಗೀ ಸರ್ವ್ ಟೀಚರಾಂ ಪಯ್ಕಿ ಗ್ರೆಟ್ಟಾಚೆ ಗೂಣ್ ತಾಕಾ ಮೆಚ್ವಲ್ಯಾತ್. ತಾಚಿ ಚಾಲ್ ಚಮ್ಖೋಣ್ ತಾಕಾ ಆಕರ್ಶಿತ್ ಜಾಲ್ಯಾ... ತ್ಯಾ ವರ್ವಿಂ ಹ್ಯಾ ದಿಸಾಂನಿ ತೊ ಗ್ರೆಟ್ಟಾ ಇಸ್ಕೊಲಾಚಾ ಗೆಟಿಭಿತರ್ ರಿಗ್ತಾನಾ ಕಸಲೆಂ ಕಾಮ್ ಪಳೆವ್ನ್ ಆಸ್ಲ್ಯಾರ್ಯಿ ತೆಂ ಸೊಡ್ನ್ ತುರ್ತಾನ್ ಮುಕಾರ್ ಯೇವ್ನ್ ವಂದನ್ ಕರ್ತಾ. ಗ್ರೆಟ್ಟಾಯೀ ಸದಾಂಚಾ ಹಾಸ್ಯಾನ್ ಪಾಟಿಂ ವಂದನ್ ಕರ್ತಾ.
ಥೊಡಿಂ ಮೆಟಾಂ ಫ಼ುಡೆಂ ದವರ್ನ್ ಹಳ್ತಾರ್ ಪಾಟಿಂ ಘುಂವೊನ್ ಪಳೆತಾ ಆನಿ ತೆದ್ನಾಂ ಆತುರಾಯೆನ್ ಅಪ್ಣಾಕ್ಚ್ ಪಳೆಂವ್ಚ್ಯಾ ನವಿನಾಕ್ ಪಳೆವ್ನ್ ತೆಂ ಲಜೆನ್ ತಕ್ಲಿ ಪಂದಾಕ್ ಘಾಲುನ್ ತುರ್ತಾನ್ ಚಲ್ತಾ. ನವಿನಾಕ್ ಹಾಚಾ ಹ್ಯಾ ಮಯ್ಪಾಸಿ ಹಾಸ್ಯಾನ್ ಕಾಳ್ಜಾ ಭಿತರ್ ಕಸಲಿಗಿ ಮೋವ್ ವಸ್ತ್ ರಿಗ್ಲ್ಲೆಪರಿಂ ಭೊಗ್ತಾ. ದೀಸ್ ಕಸಲ್ಯಾಚಿಯೀ ಪರ್ವಾ ನಾಸ್ತಾನಾ ಧಾಂವ್ತಾತ್. ಮಹಿನೆ ಬದ್ಲತಾತ್ ಆನಿ ಗ್ರೆಟ್ಟಾ - ನವಿನಾ ಮಧೆಂ ಅವ್ಯಕ್ತ್ ಸಕ್ತೆನ್ ಬದ್ಲಾವಣ್ ಜಾತಾ.
ಸದಾಂಯೀ ಎಕಾಮೆಕಾಚಿಂ ತೊಂಡಾಂ ಪಳೆನಾ ಜಾಲ್ಯಾರ್ ತಾಂಚೆ ಧಂಯ್ ಕಿತೆಂಗೀ ಚುಕ್ಲ್ಲೆ ಚುಕ್ಲ್ಲೆಪರಿಂ ಭಗ್ತಾ. ಗ್ರೆಟ್ಟಾನ್ ನವಿನಾಕ್ ಆಪ್ಲ್ಯಾ ಘರಾ ಆಪವ್ನ್ ವರ್ನ್ ಆವಯ್ಕ್ ವಳೊಕ್ ಕರ್ನ್ ದಿಲ್ಯಾ. ಆಶೆಂ ಆಯ್ತಾರಾಚೆಂ ತಶೆಂ ಇಸ್ಕೊಲಾಕ್ ರಜಾ ಆಸ್ಲ್ಲ್ಯಾ ದಿಸಾಂನಿ ನವಿನಾಚೆಂ ಸ್ಕೂಟರ್ ಗ್ರೆಟ್ಟಾಗೆರ್ ಉಭೆಂ ಜಾತಾನಾ ಸೆಜಾರ್ಯಾಂನಿಂಯೀ ಪಳೆಲಾಂ ಆನಿಮ್ ಎಕಾಮೆಕಾ ಗುಸುಗುಸು ಖಬಾರ್ ಕೆಲ್ಯಾ. ದೊಗಾಂ ಮಧೆಂ ಕಾಜಾರಾಚೆಂ ಉತಾರ್ ಜಾಲಾಂ ಆನಿ ನವಿನಾನ್ ಗ್ರೆಟ್ಟಾಚೊ ಧರ್ಮ್ ಸ್ವೀಕಾರ್ ಕರ್ಚಿ ಖಾತ್ರಿಯೀ ದಿಲ್ಯಾ, "ತುಜೆ ಶಿವಾಯ್ ಹಾಂವ್ ಜಿಯೆಂವ್ಕ್ ಸಕಾನಾ.." ಮ್ಹಣ್ ಆಪ್ಲ್ಯಾ ಕಾಳ್ಜಾಂತ್ಲೆ ಉಮಾಳೆ ತಾಣೆ ಸಾಂಗ್ಲ್ಯಾತ್, ತಶೆಂ ಗ್ರೆಟ್ಟಾನ್ಂಯೀ ಖಂಡಿತ್ ಭಾಸಾವ್ಣೆಂ ದಿಲಾಂ.
ನವಿನಾಚೊ ಬಾಪುಯ್ ಕಾರ್ಭಾರಿ ಮನಿಸ್, ತಶೆಂ ಉರ್ವಾಂತ್ ಭರ್ಮಾಧಿಕ್, ತ್ಯಾ ವರ್ವಿಂ ಚಾರ್ ಭಂವ್ತೊಣೆಚೊ ಲೋಕ್ ತ್ಕಾ - ತಾಚಾ ಘರಾಣ್ಯಾಕ್ ಮಾಂದ್ತಾ. ನವಿನ್ ಮ್ಹಾಲ್ಘಡೊ. ಸಿವಿಲ್ ಇಂಜಿನಿಯರಿಂಗ್ ಕೋರ್ಸ್ ಸಂಪ್ತಚ್ ತಾಣೆ ಲ್ಹಾಣ್-ಲ್ಹಾನ್ ಕೊಂಟ್ರೆಕ್ಟಾಚಿಂ ಕಾಮಾಂ ಕರಂವ್ಕ್ ಸುರು ಕರುನ್, ತಾಣೆಂ ಬಾಂದ್ಚಿಂ ಬಾಂದ್ಪಾಂ ಖಾತ್ರೆಚಿಂ ಮ್ಹಣೊನ್ ಅಸ್ಪಾಸಾಂತ್ಲ್ಯಾಂಕ್ ಖಬಾರ್ ಮೆಳ್ಲ್ಲ್ಯಾನ್ ಕೊಂಟ್ರೆಕ್ಟಾಂ ತಾಕಾ ಜಾಯ್ತಿಂ ಮೆಳ್ತಾತ್.
ತೊ ಅಬ್ಲೇಶಿ ದುಡ್ವಾಖಾತಿರ್ ಮೋಸ್ ಕರುನ್ ಹೆರಾಂ ಕೊಂಟ್ರೆಕ್ಟಾರಾಂಪರಿಂ ದುಡು ಕಮಯ್ನಾ, ಪುಣ್ ಚಾರಾಂಯೀ ಕುಸಿಂಚಾಂಕ್ ಖಾತ್ರ್ ಕೊಂಟ್ರೆಕ್ಟರ್, ಬರ್ಯಾ ಗುಣಾಂಚೊ ಮ್ಹಣ್ ಲೋಕ್ ತಾಕಾ ವಳ್ಕತಾ. ಪ್ರಾಯ್ ತಾಚಿ ತಿಸಾಂಚಿ ಗಡ್ ಉತರ್ಲ್ಯಾ ತರೀ ತಾಚೆಂ ಕಾಜಾರ್ ಅಜೂನ್ ಜಾಂವ್ಕ್ ನಾ. ತ್ಯಾ ಎಕಾ ತಾಚೊ ಬಾಪಯ್ ತಾಚಾ ಕಾಜಾರಾಚೊ ಪ್ರಸ್ತಾಪ್ ಕಾಡ್ತಾನಾ, ತೊ ಅಪ್ಣೆಂ ಕಾಜಾರ್ ಜಾಂವ್ಕ್ ವಿಂಚುನ್ ಕಾಡ್ಲ್ಲ್ಯಾ ಚಲಿಯೆಚಿ ವಳಕ್ ಸಾಂಗ್ತಾನಾ ಬಾಪಯ್ ರಾಗಾನ್ ಮೆಜಾಕ್ ಮಾರ್ನ್
"ಕಿತೆಂ? ತುಂ ಕ್ರಿಸ್ತಾಂವ್ ಚೆಡ್ವಾಲಾಗಿಂ ಕಾಜಾರ್ ಜಾಂವ್ಕ್ ಭಾಯ್ರ್ ಸರ್ಲಾಯ್? ಆಮ್ಚಾ ಜಾತಿಂತ್ ತುಕಾ ಕೊಣೀಂ ಮೆಳಾನಾಂತ್...?" ಮ್ಹಣ್ ಬೊಬಾಟ್ತಾ.
"ಮೆಳ್ತಿತ್, ಸಭಾರಾಂ ಮೆಳ್ತಿತ್. ಪುಣ್ ಹಾವೆಂ ಮೋಗ್ ಕೆಲ್ಲ್ಯಾ ಗ್ರೆಟ್ಟಾ ತಸಲಿಂ ಮೆಳ್ಚಿಂನಾಂತ್..." ತೊ ಬಾಪಾಯ್ಕ್ ಖಡಾಕಡ್ ಸಾಂಗ್ತಾ.
"ತುವೆಂ ಜರ್ ಕ್ರಿಸ್ತಾಂವ್ ಚಲಿಯೆಲಾಗಿಂ ಕಾಜಾರ್ ಜಾಂವ್ಚೆಂ ಮ್ಹಣ್ ಠರಾಯ್ಲಾಂಯ್, ಹ್ಯಾ ಘಡಿಯೆ ಥಾವ್ನ್ ಹ್ಯಾ ಘರಾ ಥಾವ್ನ್ ಪಯ್ಸ್ ರಾವಾಜಯ್ ಪಡ್ತೆಲೆಂ.." ಬಾಪಾಯ್ನ್ ಪಾಟಿಂ - ಫ಼ುಡೆಂ ಪಳೆನಾಸ್ತಾನಾ ನಿಷ್ಠುರಾಯೆನ್ ಸಾಂಗ್ಲೆಂ.
ನವಿನಾನ್ ಗ್ರೆಟ್ಟಾ ಖಾತಿರ್ ಬಾಪಾಯ್ಚೆಂ ಸವಾಲ್ ಸ್ವೀಕಾರ್ ಕೆಲೆಂ. ಆಪ್ಲಿ ಸೂಟ್ಕೇಸ್ ಭಾಯ್ರ್ ಕಾಡ್ಲಿ ಆನಿ ತಾತ್ಕಾಲಿಕ್ ಆಪ್ಲ್ಯಾ ಕ್ಲಾಸ್ಮೇಟ್ ಮಿತ್ರಾಗೆರ್ ರಾವೊನ್ ಆಪ್ಲೆಂಚ್ ಮ್ಹಳ್ಳೆಂ ಘರ್ ಕರ್ಚೆಂ ಸಾಧನ್ ಕೆಲೆಂ. ಥೊಡ್ಯಾಚ್ ಮಯ್ನ್ಯಾಂನಿ ಒಮ್ಜೂರಾಂತ್ ಲ್ಹಾನ್ಸೊ ಘರ್ಜಾಗೊ ಘೆವ್ನ್ ಥಂಯ್ಸರ್ ತೊ ರಾವೊಂಕ್ ಗೆಲೊ. ಅಪ್ಣಾಚೊ ಮೋಗ್ ಕೆಲ್ಲ್ಯಾನ್ ಆಪ್ಲೆಂ ಕುಟಾಮ್ ಸಾಂಡಿಜಾಯ್ ಪಡ್ಲ್ಲ್ಯಾನ್ ಗ್ರೆಟ್ಟಾ ಖೂಬ್ ಕಳ್ವಳ್ಳೆಂ. ತರಿಪುಣ್ ನವಿನಾನ್ ಅಪ್ಣಾಚಾ ಮೊಗಾಕ್ ಲಾಗೊನ್ ಅಸಲೆಂ ಮೇಟ್ ಕಾಡ್ಲಾಂ ಜಾಲ್ಲ್ಯಾನ್ ಅಪ್ಣಾಚೊ ತೊ ಕಿತ್ಲೊ ಮೋಗ್ ಕರ್ತಾ ಮ್ಹಣ್ ಸಂತೊಸ್ ಪಾವ್ಲೆಂ.
ತ್ಯಾ ಎಕಾ ದಿಸಾ ತಪ್ಪಾಲ್ ಪೆದ್ಯಾನ್ ಗ್ರೆಟ್ಟಾಚಾ ನಾಂವಾರ್ ರಿಜಿಸ್ಟರ್ಡ್ ಕವರ್ ಹಾಡ್ನ್ ದಿತಾನಾ ತೆಂ ಸಗ್ಳೆಂಚ್ ಕಾಲುಬುಲೆಂ ಜಾಲೆಂ. ’ಅಪ್ಣಾಕ್ ಕೊಣಾಚೆಂ, ಕಿತ್ಯಾ ಖಾತಿರ್ ರಿಜಿಸ್ತ್ರಿ ಪತ್ರ್?’ ತೆಂ ಕವರ್ ಒಡ್ಡಾಂವ್ಚಾ ಪೆದ್ಯಾಕ್ಚ್ ಪಳೆವ್ನ್ ರಾವ್ಲೆಂ.
"ಹಾಂಗಾಸರ್ ದಸ್ಕತ್ ಕರ್..." ಪೆದ್ಯಾನ್ ತಾಚಾ ಚಿಂತ್ನಾಂಕ್ ಕುಟ್ಟಿತಾನಾ ಕಾಂಪೆರ್ಯಾ ಬೊಟಾಂನಿ ಪೆನ್ನ್ ಧರುನ್ ದಸ್ಕತ್ ಘಾಲುನ್ ಕವರ್ ತಾಣೆಂ ಘೆತ್ಲೆಂ. ಕ್ಲಾಸಿಚೊ ವೇಳ್ ಜಾಲ್ಲ್ಯಾನ್ ತಾಣೆ ತೆಂ ಘರಾ ವಚೊನ್ ವಾಸ್ಚೆಖಾತಿರ್ ಆಪ್ಲ್ಯಾ ಬೆಗಾಂತ್ ಗಳಯ್ಲೆಂ. ತೆಂ ಭುರ್ಗ್ಯಾಂಕ್ ಶಿಕಯ್ತಾಲೆಂ ತರೀ ತಾಚಿಂ ಚಿಂತ್ನಾಂ ಮಾತ್ರ್ ತ್ಯಾ ರಿಜಿಸ್ತ್ರಿ ಕವರಾ ವಯ್ರ್ ಚಂಚಲ್ ಜಾಲ್ಲಿಂ. ಘರಾ ವಚೊನ್ ಕವರ್ ಫ಼ೊಡ್ನ್ ವಾಚ್ತಾನಾ ಪದ್ವಾ ವಯ್ಲ್ಯಾ ದುಕಾನ್ದಾರ್ ಕೊಂಗ್ಣ್ಯಾಚೆಂ ಜಾವ್ನಾಸ್ಲ್ಲೆಂ.
ಅಪ್ಲ್ಯಾ ಭಯ್ಣಿಚ್ಯಾ ಕಾಜಾರಾ ಖಾತಿರ್ ಮಾಡಿಯಾಂ ತೊಟಾವಯ್ರ್ ಕಾಡ್ಲ್ಲ್ಯಾ ರಿಣಾಚಿ ಆವ್ದಿ ಸಂಪ್ಲ್ಲ್ಯಾನ್ ಫ಼ಕತ್ ಮಹಿನ್ಯಾಚಿ ಆವ್ದಿ ದೀವ್ನ್ ಕೊಂಗ್ಣ್ಯಾನ್ ನೊಟಿಸ್ ಧಾಡ್ಲ್ಲೆಂ. ಮಾತ್ರ್ ನ್ಹಯ್ ಹೊ ದುಡು ಫ಼ಾರಿಕ್ ಕರುಂಕ್ ವಾಯ್ದ್ಯಾಕ್ ಚುಕ್ಲ್ಯಾರ್ ಕೇಜ್ ಕೊರ್ಟಾಕ್ ಘಾಲ್ಚೊ ಹಿಶಾರೊಯ್ ದಿಲ್ಲೊ. ಹ್ಯಾ ವರ್ವಿಂ ಗ್ರೆಟ್ಟಾ ಸಗ್ಳೆಂಚ್ ಭಿಂಯೆಲೆಂ. ಇತ್ಲೊ ದುಡು ಎಕಾ ಮಹಿನ್ಯಾಂನ್ ಅಪೂನ್ ಖಂಚೊ ಕರುಂ? ಕೋಣ್ ಅಪ್ಣಾಕ್ ಕುಮೊಕ್ ಕರಿತ್? ಜರ್ತರ್ ವಾಯ್ದ್ಯಾಕ್ ಫ಼ಾರಿಕ್ ಕೆಲೆಂನಾ ಜಾಲ್ಯಾರ್ ಕೊಂಗ್ಣೊ ಕೊರ್ಟಾಕ್ ವೊಡ್ತಲೊ. ಆನಿ ಹಾವೆಂ ಕೊರ್ಟಾಚಿಂ ಮೆಟಾಂ ಚಡ್ಚಿಂ ಪಡ್ತೆಲೆಂ. ತೋಟ್ ಕೊಂಗ್ಣ್ಯಾಚೆಂ ಜಾತೆಲೆಂ.. ತರ್ ಹಾಂವ್ ಕಿತೆಂ ಕರುಂ..
ತೆಂ ದೆದೆಸ್ಪ್ರಾರ್ ಜಾಲ್ಲೆಂ. ಅಪ್ಲ್ಯಾ ಧುವೆಚಿ ಪರಿಗತ್ ಪಳೆಲ್ಲ್ಯಾ ಆವಯ್ಚೆಂ ಕಾಳಿಜ್ ರಡ್ತಾಲೆಂ ತರೀ ತಿ ಕಿತೆಂ ಕರ್ತೆಲಿ? ಇತ್ಲೊ ಹಜಾರ್ ರುಪಯ್ ರೀಣ್ ಫ಼ಾರಿಕ್ ಕರುಂಕ್ ಕೋಣ್ ಆಮ್ಕಾಂ ಆಧಾರ್ಸಿತ್? ಚೆರ್ಕ್ಯಾ ಭುರ್ಗ್ಯಾಂನಿ ಸದ್ದ್ಯಾಕ್ ಕಾಂಯ್ ವಾಟ್ ಕರ್ಚೆಪರಿಂ ನಾ. ಕಿತ್ಯಾಕ್ ತೆ ಅನಿಕೀ ಶಿಕ್ಪಾರ್ ಆಸಾತ್ ಘರಾಚೆಂ ಸಗ್ಳೆಂ ವೊಜೆಂ ಹ್ಯಾ ಮಾಲ್ಘಡ್ಯಾ ಧುವೆನ್ ವಾವಾವ್ನ್ ಭಾಂವ್ಡಾಂಕ್ ಬರ್ಯಾ ವಾಟೆಕ್ ಧಾಡ್ಚೆಂ ಸಾಧನ್ ಕರ್ತಾನಾ ಕಸಲೆ ಕಷ್ಟ್ ತಾಚೆರ್ ಆಯ್ಲೆ..? ತಿ ಕಳ್ವಳ್ತಾಲಿ.
ಆಜ್ ಗ್ರೆಟ್ಟಾಚಾನ್ ಕಿತೆಂಚ್ ಕಾಮ್ ಕರುಂಕ್ ಜಾಲೆಂನಾ. ತೆಂ ಆಪ್ಲ್ಯಾ ಕುಡಾಂತ್ ವಚೊನ್ ನಿದೊನ್ ರಡ್ತಾಲೆಂ. ರಡೊನ್ ರಡೊನ್ ತಾಚೆ ದೊಳೆ ತಾಂಬ್ಡೆ ಜಾವ್ನ್ ಯೆತಾಲೆ. ಇತ್ಲ್ಯಾರ್ ಭಾಯ್ಲ್ಯಾನ್ ಸ್ಕೂಟರಾಚೊ ಆವಾಜ್ ಜಾಲೊ. ನವಿನ್ ಸದಾಂಚೆಪರಿಂ ಸೊಪ್ಯಾಚೆಂ ಮೆಟಾಂ ಚಡ್ಲೊ. ಗ್ರೆಟ್ಟಾಚಾ ಆವಯ್ಕ್ ತಾಣೆ ವಂದನ್ ಕೆಲೆಂ. ಪುಣ್ ತಿ ಆಜ್ ಕಿತ್ಯಾಕ್ಗೀ ಸಾರ್ಕೆಂ ಪಾಟಿಂ ವಂದನ್ ಕರುಂಕ್ ವಿಸ್ರಾಲ್ಲಿ. ಭಾವ್ ಆಪಾಪ್ಲ್ಯಾ ಶಿಕ್ಪಾಂತ್ ಮಗ್ನ್ ಜಾಲ್ಲೆ. ತೊ ಚಂಚಲ್ ಚಿಂತ್ನಾಂನಿ ರೆವೊಡ್ನ್ ತ್ಯಾ ಹ್ಯಾ ಕುಶಿನ್ ತಿಳುನ್ ಗ್ರೆಟ್ಟಾ ದಿಸ್ತಾಗೀ ಮ್ಹಣ್ ಪಳೆಲಾಗ್ಲೊ.
ಪುಣ್ ತಾಚಿ ಝಳಕ್ ನಾಂ ತರ್ ಕಿತೆಂ ಗಜಾಲ್ಗಾಯ್...? ಚಿಂತ್ನಾಂನಿ ತೊರೆವೊಡ್ಲೊ. ಥೊಡ್ಯಾ ವೆಳಾನ್ ಗ್ರೆಟ್ಟಾಚಾ ಭಯ್ಣಿನ್ ಚಾ ಹಾಡ್ನ್ ದಿಲಿ. ಗ್ರೆಟ್ಟಾ ಘರಾಂತ್ ನಾ? ವ ಹಾಂಚೆ ಭಿತರ್ ಕಿತೆಂಯೀ ಗಡ್ಬಡ್ ಜಾಲ್ಯಾ? ಬಸ್ಲ್ಲೆಂ ಕದೆಲ್ ತಾಕಾ ತೊಪ್ತಾಶೆಂ ಭಗ್ತಾಲೆಂ. ತಾಕಾ ಬಸೊಂಕ್ಯೀ ನ್ಹಯ್ ಉಟೊನ್ ವಚೊಂಕ್ಯಿ ನ್ಹಯ್ ತಶೆಂ ಭೊಗ್ಲೆಂ. ಇತ್ಲ್ಯಾರ್ ಚಾಯೆಚೊ ಗ್ಲಾಸ್ ವ್ಹರುಂಕ್ ಭಾಯ್ರ್ ಆಯಿಲ್ಲ್ಯಾ ಭಯ್ಣಿಲಾಗಿಂ ತಾಣೆಂ ವಿಚಾರ್ಲೆಂ "ಗ್ರೆಟ್ಟಾ ನಾ?" ತಾಣೆ ಕ್ಷೀಣ್ ತಾಳ್ಯಾನ್ "ಭಿತರ್ ಆಸಾ" ಮ್ಹಣ್ತಾನಾ ತೊ ಹಳೂ ಉಟೊನ್ ಗ್ರೆಟ್ಟಾ ನಿದ್ಲ್ಲ್ಯಾ ಕುಡಾಂತ್ ತಿಳಿಲಾಗ್ಲೊ.
ತೆಂ ಉಶ್ಯಾರ್ ತಕ್ಲಿ ದವರ್ನ್ ಹುಸ್ಕಾರ್ನ್ ಹುಸ್ಕಾರ್ನ್ ರಡ್ತಾಲೆಂ. ಹೆವ್ಶಿಲಿ ಪರ್ವಾ ತಾಕಾ ನಾತ್ಲ್ಲಿ. ಆಪ್ಲ್ಯಾ ಭುಜಾಚೆರ್ ಜಡಾಯ್ ಪಡ್ಲ್ಲೊ ಅನ್ಭೋಗ್ ಜಾವ್ನ್ ಹೆವ್ಶಿನ್ ತಾಣೆಂ ಪಳೆತಾನಾ ನವಿನ್ ಮುಕಾರ್ ಉಭೊ ಆಸ್ಲ್ಲೊ. ತೆಂ ಸಟ್ಟ್ ಕರ್ನ್ ಉಟೊನ್ ವೆ-ವೆಗ್ಗಿಂ ದುಃಖಾಂ ಪುಸುನ್ ಹಾಸೊ ದೀಂವ್ಕ್ ಪ್ರೇತನ್ ಕರಿಲಾಗ್ಲೆಂ. ಪುಣ್ ತ್ಯಾ ಹಾಸ್ಯಾಂನಿ ಸದಾಂಚೆಂ ಆಕರ್ಶಣ್ ನವಿನಾಕ್ ದಿಸ್ಲೆಂನಾ. ತೊ ಖಾಟಿಯೆಚಾ ಕುಶಿನ್ ಬಸ್ಲೊ ಆನಿ ಹಕೀಗತ್ ಸಮ್ಜೊನ್ ಸಾಂಗ್ಲೆಂ ನಾ ತರೀ ಬಸೊನ್ ನಿರ್ವೋಗ್ ನಾಸ್ತಾನಾ ಸಾಂಗ್ಚೆಂಚ್ ಪಡ್ಲೆಂ.
"ಓಹ್! ತುಂ ಯೆದೆಶ್ಯಾ ಸಂಗ್ತಿಕ್ ಇತ್ಲೊ ಪಾವ್ನ್ ವೊತ್ತಾಯ್?" ತಾಣೆಂ ಹಾಸಂವ್ಚೆಂ ಪ್ರೇತನ್ ಕರುನ್ ತಾಚೆ ಹಾತ್ ಅಪ್ಲ್ಯಾಂತ್ ಘೆತ್ಲೆ. ಪುಣ್ ಗ್ರೆಟ್ಟಾ ಥಂಯ್ ಬದ್ಲಾವಣ್ ಜಾಲಿನಾ.
"ಗ್ರೆಟ್ಟಾ ತುಜೊ ನಿವಿನ್ ಆಸ್ತಾ ಪರ್ಯಾಂತ್ ತುಂ ಖಂಚಾಕ್ಚ್ ಭಿಯೆನಾಕಾ. ಕಿತ್ಲೆ ಹಜಾರ್ ಕೊಂಕ್ಣ್ಯಾಕ್ ಫ಼ಾರಿಕ್ ಕರ್ತೊಲೊ" ತಾಣೆಂ ಭರ್ವಸೊ ದಿತಾನಾ ತೆಂ ಸಟ್ಟ್ ಕರ್ನ್ ತಾಚಾ ದೊಳ್ಯಾಂಕ್ ಪಳೆಲಾಗ್ಲೊ.
"ದುಭಾವ್ನಾಕಾ ಗ್ರೆಟ್ಟಾ ಊಟ್ ಭಾಯ್ರ್ ಸರ್. ಕೊಂಗ್ಣ್ಯಾಚೆಂ ದುಕಾನ್ ಕಾಂಯ್ ಪಯ್ಸ್ ನಾ. ಯೇ ಮ್ಹಜೆಂ ಸ್ಕೂಟರ್ ಆಸಾ... ತಾಚೆಂ ರೀಣ್ ಫ಼ಾರಿಕ್ ಕರುನ್ ಯೆವ್ಯಾಂ.."
"ತುಂ ಮ್ಹಜೆಂ ರೀಣ್ ಫ಼ಾರಿಕ್ ಕರ್ತಲೊಯ್? ಪುಣ್.." ತಾಚೆಂ ಉತ್ರಾಂ ಕಾತರ್ಲಿಂ.
"ಪುಣ್ ಗೀಣ್ ಕಾಂಯ್ ನಾ, ತುಂ ವೆಗ್ಗಿಂ ಭಾಯ್ರ್ ಸರ್.." ತಾಣೆಂ ತಾಚಾ ಬಾವ್ಳ್ಯಾಂಕ್ ಧರುನ್ ಉಟಂವ್ಚೆಂ ಪ್ರಯತ್ನ್ ಕರ್ತಾನಾ ತೆಂ ಪಾಂಯ್ ಧರ್ಣಿಕ್ ಘಟ್ ಕರುನ್ ಬಸೊನ್ ಮ್ಹಣಾಲೆಂ.
"ತುಜೆಂ ರೀಣ್ ಹಾವೆಂ ಕೆದಾಳಾ ಫ಼ಾರಿಕ್ ಕರ್ಚೆಂ?" ತೆಂ ದುಬಾವಾಚೆಂ ಸವಾಲ್ ಘಾಲಿಲಾಗ್ಲೆಂ. "ಮ್ಹಜೆಲಾಗಿಂ ಕಾಜಾರ್ ಜಾಲ್ಯಾ ಉಪ್ರಾಂತ್ ತೆಂ ಫ಼ಾರಿಕ್ ಜಾಲೆಂ ಮ್ಹಣ್ ಚೀಂತ್.."
ತಾಣೆಂ ಹಾಸೊನ್ ತಾಚಾ ದೊನೀ ಬಾವ್ಳ್ಯಾಂಕ್ ಧರುನ್ ಹಾಲಯ್ಲೆಂ. ಗ್ರೆಟ್ಟಾಕ್ ಜಾಲ್ಲೊ ಸಂತೊಸ್ ಇತ್ಲೊ ಕಿತ್ಲೊ ನ್ಹಯ್. ’ಅಪ್ಣಾಕ್ ತೊ ಕಿತ್ಲೊ ಅಪೇಕ್ಶಿತಾ - ಕಿತ್ಲೊ ಮೋಗ್ ತಾಕಾ ಮ್ಹಜೆರ್ ಆಸಾ? ಮ್ಹಜೆ ಖಾತಿರ್ ಕಿತ್ಲೊ ತ್ಯಾಗ್ ಕರುಂಕ್ ತೊ ತಯಾರ್ ಆಸಾ? ಮ್ಹಜೆ ಖಾತಿರ್ ತಾಚಾ ಕುಟ್ಮಾಕ್ ಸಾಂಡುನ್ ವೆಗ್ಳೊ ತೊ ಗೆಲಾ. ಆನಿ ಆತಾಂ ಮ್ಹಜೆಂ ರೀಣ್ ಫ಼ಾರಿಕ್ ಕರುಂಕ್ ತಯಾರ್ ಜಾಲಾ..’ ತೆಂ ಸಟ್ಟ್ ಕರ್ನ್ ಉಟ್ಲೆಂ.
ಹಾತ್-ಪಾಂಯ್ ತೋಂಡ್ ಧುವ್ನ್ ತೆಂ ನ್ಹೆಸ್ಲೆಂ. ಆವಯ್ಲಾಗಿಂ ಅಪುಣ್ ಪದ್ವಾ ವಯ್ಲ್ಯಾ ಕೊಂಗ್ಣ್ಯಾಚಾ ದುಕಾನಾಕ್ ವಚೊನ್ ಯೆತಾಂ ಮ್ಹಣ್ ಸಾಮ್ಗೊನ್ ಮೆಟಾಂ ದೆಂವ್ಲೆಂ. ನವಿನಾನ್ ಸ್ಕೂಟರ್ ಚಾಲು ಕರ್ತಾನಾ ತೆಂ ಆಡಾಯ್ಲಾಗ್ಲೆಂ. ಅಪ್ಣಾಕ್ ಸ್ಕೂಟರಾರ್ ಬಸೊನ್ ಸವಯ್ ನಾ, ಭಿರಾಂತ್ಯೀ ದಿಸ್ತಾ. ತ್ಯಾ ಶಿವಾಯ್ ತುಜಾ ಸ್ಕೂಟರಾರ್ ಗಾಂವ್ಚೊ ಲೋಕ್ ಮ್ಹಾಕಾ ಪಳೆತ್ ಜಾಲ್ಯಾರ್ ಕಿತೆಂ - ಕಿತೆಂ ಖಬ್ರೊ ಜಾಂವ್ಕ್ ಆಸಾತ್. ಆಮಿ ಚಲೊನ್ ಯಾ. ಗ್ರೆಟ್ಟಾಚೆಂ ಮನ್ ದುಖಂವ್ಕ್ ನವಿನಾಕ್ ನಾಕಾ ದಿಸ್ಲೆಂ.
ತಿಂ ದೊಗಾಂಯೀ ಪಾಂಯ್ ವಾಟೆನ್ ಚಾರ್ ಫ಼ರ್ಲಾಂಗಾಂಬರ್ ಪಯ್ಸ್ ಆಸ್ಚ್ಯಾ ಕೊಂಗ್ಣ್ಯಾಂಚಾ ದುಕಾನಾಕ್ ಮೆಟಾಂ ಕಾಡಿಲಾಗ್ಲಿಂ. ಗ್ರೆಟ್ಟಾ ಸಾಂಗಾತಾ ಕೊಂಟ್ರ್ಯಾಕ್ಟರ್ ನವಿನಾಕ್ ಪಳೆವ್ನ್ ಕೊಂಗ್ಣ್ಯಾಚೆ ದೊಳೆ ರುಂದಾಲೆ. ಹಾಂಚೆ ವಿಷ್ಯಾಂತ್ ತಾಚಾ ದುಖಾನಾಂತ್ ಥೊಡ್ಯಾಂನಿ ಉಲಯಿಲ್ಲೆಂ ಕೊಂಗ್ಣ್ಯಾನ್ ಆಯ್ಕಾಲೆಂ ತರೀ ದೊಳ್ಯಾಂನಿ ಸಾಂಗಾತಾ ಹಾಂಕಾಂ ತಾಣೆಂ ಅಜಾಪ್ ಪಳೆಂವ್ಚೆಂ. ತಾಕಾ ಭಿತರ್ಲೆ ಭಿತರ್ ಮೊಸೊರ್ಯೀ ಜಾಲೊ.
ಕಿತ್ಯಾಕ್ ಮಾಡಿಯಾಂ ತೊಟಾ ವಯ್ರ್ ಫ಼ಕತ್ ಪಂದ್ರಾ ಹಜಾರ್ ರೀಣ್ ದೀವ್ನ್ ಎಕಾ ವರ್ಸಾಕ್ ಪಾಂಚ್ ಹಜಾರಾಂಚಿ ವಾಡ್ ಚಡವ್ನ್ ಹೊ ದುಡು ಫ಼ಾರಿಕ್ ಕರುಂಕ್ ಹಾಚಾನ್ ಸಾಧ್ಯ್ ನಾ ತೆಂ ಜಾಣಾಂ ಆಸೊನ್ ಭಾಂಗಾರಾ ಸಾರ್ಕೆಂ ತೋಟ್ ಭಿತರ್ ಘಾಲ್ಚಿ ಮಾಂಡ್ಣಿಂ ತಾಣೆಂ ಕೆಲ್ಲಿ. ಆನಿ ನೊಟಿಸ್ ಜ್ಯಾರಿಯೀ ಕೆಲ್ಲೆಂ. ಆತಾಂ ನವಿನ್ ಸಾಮ್ಗಾತಾ ಆಯ್ಲಾ ಮ್ಹಣ್ತಾನಾ ಹೆಂ ರೀಣ್ ಫ಼ಾರಿಕ್ ಕರುಂಕ್ಚ್ ಆಯ್ಲಾ ಮ್ಹಣ್ ತಾಕಾ ಸ್ವಷ್ಟ್ ಜಾಲ್ಲೆಂ. ಅಪ್ಣಾಕ್ ಹೆಂ ತೋಟ್ ಮೆಳಾನಾ ಮ್ಹಣ್ ದೊಗಾಂಯ್ಕಿ ಬಸೊಂಕ್ ಬಸ್ಕಾ ದಾಕಯ್ಲಿ. ನವಿನಾನ್ ವೀಸ್ ಹಜಾರಾಂಚಿ ಚೆಕ್ಕ್ ಬರವ್ನ್ ತಿ ಗ್ರೆಟ್ಟಾಚಾ ಹಾತಾಕ್ ದೀವ್ನ್ ತಾಣೆಂ ಕೊಂಗ್ಣ್ಯಾಕ್ ಒಪ್ಸುನ್ ರಿಕಾರ್ಡ್ ಸ್ವಾಧೀನ್ ಕರುನ್ ಪಾಟಿಂ ಯೆತಾನಾ
"ಟಿಚೆರಿನ್ ಫ಼ೆರ್ಗೊ ಮಾರ್ಲೊಗಾ ಕೊಂಟ್ರೆಕ್ಟರಾನ್ ತಿಕಾ ದಿಗೊ ದಿಲಾ.." ಮ್ಹಣ್ ಕೊಂಗ್ಣೆ ತಮಾಶೆ ಕರುನ್ ಹಾಸಾಲಾಗ್ಲೆ. ಗ್ರೆಟ್ಟಾನ್ ನವಿನಾಚೊ ಮೋಗ್ ಕೆಲಾ ಆನಿ ತಿಂ ಆತಾಂ ಫ಼ಿಕಿರ್ ನಾಸ್ತಾನಾ ಸಾಂಗಾತಾ ಭಂವ್ತಾತ್. ನವಿನ್ ಗ್ರೆಟ್ಟಾಚಾ ಘರಾಯೀ ಯೆತಾ ಮ್ಹಣ್ ಗಾಂವಾರ್ ಖಬಾರ್ ಜಾಲ್ಲಿ. ಗ್ರೆಟ್ಟಾಚಾ ಬರ್ಯಾ ನಡ್ತ್ಯಾಂಕ್ ಮೆಚ್ವಾಲ್ಲಿಂ ಆತಾಂ ತಾಚಾ ಗುಣಾಂಚೆರ್ ಕಳಂಕ್ ಹಾಡ್ಚ್ಯಾ ರಿತಿನ್ ತಾಚಿಂ ಖೆಳ್ಖುಳಾಂ ಕರುನ್ ಉಲಯ್ತಾಲಿಂ. ಚಾರ್ ಭಂವ್ತಣಿಂ ಆತಾಂ ಹಿಚ್ ಖಬಾರ್. ಹಿ ಖಬಾರ್ ವಿಗಾರಾಚಾ ತಶೆಂ ಆವಯ್ಚಾ ಕಾನಾಂಕ್ ಪಡೊಂಕ್ ದೀಸ್ ಗೆಲೆನಾಂತ್. ವಿಗಾರಾನ್ ಎಕಾ ಸಾಂಜೆರ್ ಕ್ಲಾಸ್ ಸುಟ್ತಚ್ ತಾಕಾ ಮೆಳೊಂಕ್ ಸಾಂಗೊನ್ ಧಾಡ್ಲೆಂ. ತೆಂ ವಿಗಾರಾಚಾ ಕುಡಾಕ್ ವೆತಾನಾ ಹರ್ಶೆಂ ಸಂತೊಸಾನ್ ಸ್ವಾಗತ್ ದಿಂವ್ಚ್ಯಾ ವೆಗಾರಾಚಾ ಕಪಲಾರ್ ಮಿರಿಯೊ ಪಡ್ಲ್ಲ್ಯೊ. ತೊಂಡಾರ್ ಗಂಭೀರಾಯ್ ದಿಸ್ತಾಲಿ.
ಹರ್ಶೆಂ ಸ್ವಾದಿಕ್ ಹಾಸೊ ದೀವ್ನ್ ಬಸೊಂಕ್ ಸಾಂಗ್ತಾಲೊ ಜಾಲ್ಯಾರ್ ಆಜ್ ತಿ ಖಬಾರ್ ನಾ.. ಗ್ರೆಟ್ಟಾಕ್ ಕಿತ್ಯಾ ಖಾತಿರ್ ಆಜ್ ಅಸೊ ಮ್ಹಣ್ ಕಳಾನಾಸ್ತಾನಾ ಗೆಲೆಂನಾ. ಪುಣ್ ತಾಣೆಂ ತಾಚಾ ಅಂತಸ್ಕರ್ನಾಂತ್ ನವಿನಾಕ್ ಜಾಗೊ ಅಮಾನತ್ ಕರ್ನ್ ಜಾಲಾ ಜಾಲ್ಲ್ಯಾನ್ ತೆಂ ವಿಗಾರಾಚಾ ಸವಾಲಾಂಕ್ ಜಾಪ್ ದೀಂವ್ಕ್ ಆಯ್ತೆಂ ಜಾಲ್ಲೆಂ. ವಿಗಾರ್ ಮೆಜಾಫ಼ುಡೆಂ ಆಸ್ಚಾ ಕದೆಲಾರ್ ಗಳ್ಳೊ. ಆನಿ ಉಭೆಂ ರಾವ್ಲ್ಲ್ಯಾ ಗ್ರೆಟ್ಟಾಚೆರ್ ರಾಗೀಷ್ಟ್ ದೀಷ್ಟ್ ಲಾವ್ನ್ ವಯ್ರ್ ಥಾವ್ನ್ ಸಕಯ್ಲ್ ಪರ್ಯಾಂತ್ ಎಕೊಡಿ ದೀಷ್ಟ್ ಚರವ್ನ್ ಖಾಡಾರ್ ಹಾತ್ ವೊಡುನ್ ತಾಳೊ ತಾಣೆಂ ಸಡಿಲ್ ಕೆಲೊ!.
"ಗ್ರೆಟ್ಟಾ.. ತುಜೆ ವಿಷ್ಯಾಂತ್ ಫ಼ಿರ್ಗಜೆಂತ್ ನಾಕಾರಿ ಖಬರ್ ಪ್ರಸಾರ್ ಜಾಲ್ಯಾ.. ತ್ಯಾ ಖಬ್ರೆಕ್ ಹಾಂವ್ ಪಾತಿಯೆಂವ್?" ಶೀದಾ ಉಲಂವ್ಚ್ಯಾಕೀ ತಾಣೆಂ ಬೊಲ್ಯಾ ಭಂವ್ತಣಿಂ ಫ಼ಾತೊರ್ ಉಡವ್ನ್ ಪ್ರಸ್ತಾಪ್ ಕೆಲೊ. ವಿಗಾರಾಚಿ ದೀಷ್ಟ್ ಗ್ರೆಟ್ಟಾಚಾ ಕಾಳ್ಜಾಕ್ ತೊಪ್ಲ್ಲೊ ಅನ್ಭೋಗ್ ಜಾವ್ನ್ ತೇಂಯೀ ಗಂಭೀರಾಯೆನ್ ಪಳೆಲಾಗ್ಲೆಂ.
"ಕಸಲಿ ಖಬಾರ್ ಫ಼ಾದರ್? ತಿ ಸುಡಾಳ್ ವಿಚಾರ್ಲ್ಯಾರ್ ವ್ಹಯ್ ಆಸ್ಲ್ಲೆಂ ವ್ಹಯ್ ಮ್ಹಣ್ತಾಂ.."
"ತೊ... ಕೊಂಟ್ರೇಕ್ಟರ್ ನವಿನ್ ಅಂಚನ್ ತುಮ್ಗೆರ್ ಯೆತಾ ಮ್ಹಣ್ ಲೋಕ್ ಯ್ಲಯ್ತಾ.. ಆನಿ ತೂಂಯೀ ತಾಚೆ ಸಾಂಗಾತಾ ಭೊಂವ್ತಾಯ್ ಮ್ಹಣ್ ಪಳೆಲ್ಲ್ಯಾಂನಿ ಸಾಂಗ್ಲಾಂ ಮ್ಹಾಕಾ.."
"ವ್ಹಯ್ ಫ಼ಾದರ್. ತೊ ಆಮ್ಗೆರ್ ಯೆತಾ ತೆಂ ಖರೆಂ. ಪುಣ್ ಹಾಂವ್ ತಾಚೆ ಸಾಂಗಾತಾ ಭಂವ್ತಾಂ ತಿ ಗಜಾಲ್ ಮಾತ್ರ್ ಫ಼ಟ್" ತಾಣೆಂ ಸುಡಾಳ್ ಜಾಪ್ ದಿಲಿ. "ತುಮ್ಗೆರ್ ತೊ ಯೆತಾ ಮ್ಹಣ್ ತುಂ ಒಪ್ತಾಯ್ ತರ್ ಭಂವ್ಲ್ಲೆಂ ಖರೆಂ ಕಿತ್ಯಾಕ್ ನಜೊ?"
"ಫ಼ಾದರ್ ಹಾಂವ್ ತಾಚೆಸಾಂಗಾತಾ ಭಂವೊಂಕ್ ವಚೊಂಕ್ನಾ ಮ್ಹಳ್ಳೆಂ ಖಂಡಿತ್ ಗೆಲ್ಯಾಂ ಜಾಲ್ಯಾರ್ ಭಂವ್ಡೆಕ್ ನ್ಹಯ್, ಪೊರ್ಚೆದಿಸಾ ರೀಣ್ ಫ಼ಾರಿಕ್ ಕರ್ಚೆ ಖಾತಿರ್ ಪದ್ವಾಚಾ ಕೊಂಗ್ಣ್ಯಾಚಾ ದುಕಾನಾಕ್ ಗೆಲ್ಲ್ಯಾಂವ್ ತೆಂ ಖರೆಂ..." ತೆಂ ಸತ್ ಉಚಾರ್ತಾಲೆಂ.
"ರೀಣ್ ಫ಼ಾರಿಕ್ ಕರ್ಚಾಕ್ ನವಿನಾನ್ ಕಿತ್ಯಾಕ್ ಸಾಂಗಾತ್ ದಿಂವ್ಚಿ ಗರ್ಜ್ ಆಸ್ಲ್ಲಿ? ತಶೆಂ ವೆಚೆಂ ಜಾಲ್ಯಾರ್ ತುಜೆ ಭಾವ್ ಕೊಣೀ ನಾತ್ಲ್ಲೆ..?"
ವಿಗಾರಾನ್ ರಾಗ್ ಮಿಶ್ರಿತ್ ಸವಾಲ್ ಕೆಲೆಂ.. "ಭಾವ್ ಆಸ್ಲ್ಲೆ ಫ಼ಾದರ್, ಪುಣ್ ಕೊಂಗ್ಣ್ಯಾಚೆಂ ರೀಣ್ ಫ಼ಾರಿಕ್ ಕರುಂಕ್ ಭಾವಾಲಾಗಿಂ ದುಡು ನಾತ್ಲ್ಲೊ.."
ವಿಗಾರಾಚಾ ಸವಾಲಾಕ್ ಸಾರ್ಕಿ ಜಾಪ್ ತಾಣೆಂ ದಿಲಿ.
"ತರ್ ನವಿನಾನ್ ತುಕಾ ರೀಣ್ ದಿಲೆ? ದುಸ್ರೆ ಕೊಣೀಂ ರೀಣ್ ದಿತೆಲೆ ನಾತ್ಲ್ಲೆ? ತಿತ್ಲೊ ದುಡು ದಿಂವ್ಚೊ ತಾಚೊ ಇರಾದೊ ಕಸಲೊ ಆಸ್ಯೆತ್ ತೆಂ ತುವೆಂ ಸಮ್ಜೊನ್ ಘೆತ್ಲಾಂಯ್?" ತಾಣೆಂ ಕದೆಲಾ ವಯ್ಲಿ ಅಪ್ಲಿ ಕೂಸ್ ಬದ್ಲುನ್ ಘಣ್ಘಣಿತ್ ಸವಾಲ್ ಕೆಲೆಂ.
"ತಾಚೊ ಉದ್ದೇಶ್ ಹಾವೆಂ ಕೊಂಗ್ಣ್ಯಾಚಾ ರಿಣಾಥಾವ್ನ್ ಸುಟಂವ್ಕ್ ಆನಿ ಆಮ್ಚಿ ಮ್ಹಾಲ್ಘಡ್ಯಾಂಚಿ ಆಸ್ತ್ ಉರಂವ್ನ್ ದಿಂವ್ಚೊ.. ಆನಿ ಕೊಣಾಲಾಗಿಂಯೀ ದುಡು ಮೆಳ್ಚೊ ಭರ್ವಸೊ ಮ್ಹಾಕಾ ನಾತ್ಲ್ಲೊ. ಕಿತ್ಯಾಕ್ ಮ್ಹಜಾ ಭಯ್ಣಿಚಾ ಕಾಜಾರಾಕ್ ಹಾವೆಂ ಸಭಾರಾಲಾಗಿಂ ರೀಣ್ ವಿಚಾರ್ನ್ ಜೀಬ್ ಹುಲ್ಪಾವ್ನ್ ಘೆತ್ಲ್ಯಾ.. ತಶೆಂ ತುಮ್ಚೆಲಾಗಿಂಯಿ..." ತೆಂ ಖಡಾಖಡ್ ಉಲಯ್ಲೆಂ. "ತರ್ ತ್ಯಾ ಹಿಂದ್ವಾಂಚಾಕ್ ತುಜೆ ತಸಲ್ಯಾ ಅಂಕ್ವಾರ್ ಚಲಿಯೆಕ್ ರೀಣ್ ದಿಂವ್ಚೊ ಖೊಟೊ ಉದ್ದೇಶ್ ಆಸಾ ಮ್ಹಣ್ ತುಕಾ ಕಳಾನಾ...?"
"ನಾ ಫ಼ಾದರ್. ನವಿನ್ ತಸಲೊ ನ್ಹಯ್. ಹಾವೆಂ ತಾಕಾ ಪರ್ಕಿಲಾಂ. ಹಾಂವ್ ತಾಚೆಂ ಅಂತಸ್ಕರ್ನ್ ಸಮ್ಜೊನ್ ಜಾಣಾಂ.. ತೊ ಘಾತ್ಕಿ ಬಿಲ್ಕುಲ್ ನ್ಹಯ್."
"ತರ್ ತುಂ ತಾಕಾ ಅಪೇಕ್ಶಿತಾಯ್?" ಗ್ರೆಟ್ಟಾಚಿ ಜಾಪಿನ್ ಹಕೀಗತ್ ಪಾರ್ಕಿಲ್ಲ್ಯಾ ವಿಗಾರಾನ್ ಮೆಜಾರ್ ಆಪ್ಲೆ ಹಾತ್ ನಿಟಾವ್ನ್ ದೊಳೆ ರುಂದಾಯ್ಲೆ.
"ವ್ಹಯ್ ಫ಼ಾದರ್ ಹಾಂವ್ ತಾಚೊ ಮೋಗ್ ಕರ್ತಾಂ, ತಶೆಂ ನವಿನ್ಯಿ ಮ್ಹಜೊ ಮೋಗ್ ಕರ್ತಾ. ತೊ ಆಮ್ಚಾ ಸಮೊಡ್ತಿಕ್ ಯೇವ್ನ್ ಮ್ಹಜೆಲಾಗಿಂ ಕಾಜಾರ್ ಜಾತಲೊ..."
"ವ್ಹಯ್ ವ್ಹಯ್, ತೊ ಹಿಂದ್ವಾಂಚೊ ತುಜಾ ಕುಡಿಕ್ ಪಳೆವ್ನ್ ಭುಲ್ಲಾ.. ಆನಿ ತುಜಾ ನಿಸ್ಕಳ್ಪಣಾಚೆರ್ ಖೆಳೊನ್ ಮಾಗಿರ್...’"
"ಫ಼ಾದರ್! ಹೆಂ ಕಿತೆಂ ತುಮಿಂ ಉಲಯ್ತಾತ್? ಏಕ್ ಯಾಜಕ್ ಜಾವ್ನ್ ಕಸಲಿಂ ಉತ್ರಾಂ ತುಮಿ ಸಾಂಗ್ತಾತ್? ಮ್ಹಜಾ ನಿಸ್ಕಳ್ಪಣಾಚೆರ್ ಹಾತ್ ಘಾಲ್ಚೊ, ಮ್ಹಜಾ ಕುಡಿರ್ ಆಕ್ರಮಣ್ ಕರ್ಚೊ, ಮ್ಹಜಾ ಜಿವಿತಾಚೆರ್ ಘಾತ್ ಕರ್ಚೊ ಚಲೊ ಯೆದೊಳ್ ಜಲ್ಮೊಂಕ್ನಾ ಮ್ಹಣ್ ಚಿಂತಾಂ. ಆನಿ ನವಿನ್ ತಸಲೊ ಘಾತ್ಕಿ-ಪಾತ್ಕಿ ನ್ಹಯ್ ಮ್ಹಣ್ ಹಾಂವ್ ಖಂಡಿತ್ ಜಾಣಾಂ." ಗ್ರೆಟ್ಟಾಚೆ ದೊಳೆ ವಯ್ರ್ ಸಕಯ್ಲ್ ಜಾತಾಲೆ. ರಾಗಾನ್ ತೆಂ ತಾಂಬ್ಡೆಂ ಜಾಲ್ಲೆಂ.
"ಜರ್ತರ್ ತುಂ ತಾಚೆರ್ ಖಂಡಿತ್ ಭರ್ವಸ್ಲಾಂಯ್ ಆನಿ ತೊಚ್ ತುಜೊ ಜಿಣಿಯೆಸಾಂಗಾತಿ ಜಾವ್ನ್ ವಿಂಚ್ಲಾಂಯ್ ತರ್, ಗಳಾಯ್ ಕರಿನಾಶೆಂ ತುವೆಂ ತಾಕಾ ಕ್ರಿಸ್ತಾಚಾ ಸಾವ್ಳೆಕ್ ಹಾಡುನ್ ತಾಚೆಲಾಗಿಂ ಸಾಕ್ರಾಮೆಂತಾಂತ್ ಎಕ್ವೊಟೊಂಕ್ ಜಾಯ್. ಆನಿ ಗಾಂವಾರ್ ತುಮ್ಚೆ ವಿಶ್ಯಾಂತ್ ನಾಕಾರಿ ಖಬ್ರಾಂಕ್ ವಿರಾಮ್ ಘಾಲಯ್ಜಾಯ್..." ಗ್ರೆಟ್ಟಾಚೆಂ ತೀರ್ಮಾನ್ ಆನಿ ಉದೆಲ್ಲೊ ರಾಗ್ ಪಾರ್ಕುನ್ ವಿಗಾರಾನ್ ಮ್ಹಳೆಂ.
"ಮ್ಹಜೊ ನವಿನ್ ಆಜ್ಚ್ ಜಾಲ್ಯಾರ್ಯಿ ಕ್ರಿಸ್ತಾಚಾ ಸಾವ್ಳೆಕ್ ಯೇವ್ನ್ ಮ್ಹಜೆಲಾಗಿಂ ಕಾಜಾರ್ ಜಾಂವ್ಕ್ ತಯಾರ್ ಆಸಾ ಫ಼ಾದರ್. ಪುಣ್ ಹಾವೆಂಚ್ ತೆಂ ಪಾಟಿಂ ಘಾಲಯ್ಲಾಂ. ಕಿತ್ಯಾಕ್ ಮ್ಹಜಾ ಭಯ್ಣಿಚೆಂ ಕಾಜಾರ್ ಕರುಂಕ್ ಆಸಾ... ಭಾವಾಂಚೆಂ ಶಿಕಾಪ್ ಅಖೇರ್ ಕರುಂಕ್ ಆಸಾ. ತಾಂಚೊ ಫ಼ುಡಾರ್ ಮಾಂಡುನ್ ಮ್ಹಜಿಂ ಭಾವ್-ಭಯ್ಣ್ ತಾಂಚಾ ಪಾಂಯಾಂಚೆರ್ ರಾವ್ಲ್ಯಾ ಉಪ್ರಾಂತ್ ಮ್ಹಜೊ ಫ಼ುಡಾರ್ ಆನಿ ಉಪ್ರಾಂತ್ ಮ್ಹಜೊ ಫ಼ುಡಾರ್ ಆನಿ ಉಪ್ರಾಂತ್ ಮ್ಹಜೆಂ - ನವಿನಾಚೆಂ ಕಾಜಾರ್ ಜಾತೆಲೆಂ..." ತಾಣೆಂ ಕಿತೆಂಚ್ ಲಿಪಯ್ಲೆಂ ನಾ.
"ಪುಣ್ ಗ್ರೆಟ್ಟಾ ಉಗ್ಡಾಸ್ ದವರ್. ತುಮಿ ಎಕಾಮೆಕಾ ಸಾಂಗಾತಾ ಮೆಳ್ತಾನಾ ನಿಸ್ಕಳ್ಪಣಾಚೆರ್ ಖತ್ ಜಾತೆಲೆಂ.. ಕಿತ್ಯಾಕ್ ತರ್ನಾಟ್ಪಣಾಚಾ ಪ್ರಾಯೆರ್ ಶಿರಾಂನಿ ವಾಳ್ಚಾ ಸಳ್ಸಳ್ಯಾ ರಗ್ತಾನ್ ಕುಡಿ ಭಿತರ್ ಆವೇಶ್ ಭರ್ತಾನಾ ಸಂಸಾರಾ ಭಂವ್ತೊಣಿಂ ಕಿತೆಂ ಘಡ್ತಾ ತೆಂ ಚಿಂತುನ್ ಪಳೆಂವ್ಚಿ ಸಕತ್ ತ್ಯಾ ವೆಳಾರ್ ಆಸ್ಚಿನಾ.. ತ್ಯಾ ದೆಕುನ್ ತುಕಾ ಹಾಂವ್ ಚತ್ರಾಯ್ ದಿತಾಂ. ತುಂ ಏಕ್ ಬುಧ್ವಂತ್ ಹುಶಾರ್ ಟೀಚೆರ್ ಮ್ಹಣ್ ಆಮ್ಚ್ಯಾ ಫ಼ಿರ್ಗಜೆಂತ್ ನಾಂವಾಡ್ಲಾಂಯ್. ತುಜಾ ಬರ್ಯಾ ನಡ್ತಾಚೆರ್ ಫ಼ಿರ್ಗಜ್ಗಾರಾಂನಿ ಭರ್ವಸೊ ದವರ್ಲಾ. ಆನಿ ಆಜ್ ತುಜಾ ಹ್ಯಾ ನಡ್ತ್ಯಾನ್ ಸರ್ವ್ ಉಲ್ಟ್ಯಾ ಉಲವ್ಣ್ಯಾಕ್ ಆವ್ಕಾಸ್ ದಿಲಾಯ್. ಹೆಂ ಮ್ಹಾಕಾ ಬರೆಂ ಲಾಗಾನಾ..." ವಿಗಾರಾನ್ ಥೊಡಿ ಸಮ್ಜೊಣಿ ದಿಲಿ.
"ಫ಼ಾದರ್ ಮರ್ತಾನಾ ಹಾತ್ ಧರ್ಯೆತ್. ಪುಣ್ ಉಲಯ್ತಾನಾ ಧರುಂಕ್ ಅಸಾಧ್ಯ್. ತಶೆಂ ಕೊಣೀ ಕೊಣಾಚೆರ್ ಉಲಯ್ತಾತ್ ಮ್ಹಣ್ ಎಕಾ ದಿಸಾನ್ ಏಕ್ ಘರ್ ಭಾಂದುಂಕ್ಯಿ ಜಾಯ್ನಾ ಮೊಡುಂಕೀ ಜಾಯ್ನಾ. ಪುಣ್ ಇತ್ಲೊ ಮಾತ್ರ್ ಉಗ್ಡಾಸ್ ದವರಾ ಫ಼ಾದರ್. ಹಾಂವ್ ನವಿನಾಚೊ ಕಾಳ್ಜಾ ಥಾವ್ನ್ ಮೋಗ್ ಕರ್ತಾಂ ಶಿವಾಯ್ ತಾಚಾ ಕುಡಿಚೊ ನ್ಹಯ್. ತಶೆಂ ತೊಯೀ.. ಕೆದ್ನಾಂಚ್ ತೊ ಮ್ಹಜಾ ಕುಡಿಚೆರ್ ಆಕ್ರಮಣ್ ಕರಿಚೊನಾ ಮ್ಹಣ್ ಮ್ಹಾಕಾ ಖಂಡಿತ್ ಧಯ್ರ್ ಆಸಾ. ಆನಿ ತಶೆಂ, ತಸಲ್ಯಾ ಪ್ರಯತ್ನಾಚೆಂ ಮೇಟ್ ತಾಣೆಂ ಕಾಡ್ಲೆಂ ಜಾಲ್ಯಾರ್ ತಾಕಾ ಹಾಂವ್ ಭೊಗ್ಸುಂಚಿಂನಾ!"
"ತುಂ ತಸಲ್ಯಾ ವಾಂಕ್ಡೆ ವಾಟೆನ್ ಚಲ್ಚೆಂನಾಂಯ್ ಮ್ಹಳ್ಳಿ ಖಾತ್ರಿ ಮ್ಹಾಕಾ ಆಸಾ. ತರಿಪುಣ್ ಏಖ್ ಮಣಿಯಾರಿ ಜಾವ್ನ್ ಮ್ಹಜಾ ಗಮನಾಕ್ ಆಯಿಲ್ಲ್ಯಾ ಸಂಗ್ತ್ಯಾಂಚೆರ್ ಹಾವೆಂ ಸಮ್ಜೊಣಿಂ ದೀಂವ್ಕ್ ಆಸಾ. ತೆಂ ಮ್ಹಜೆಂ ಕ್ರಿಸ್ತಾ ಸಾಕ್ಶೆಖಾಲ್ ಕರ್ತವ್ಯ್ ಜಾವ್ನಾಸಾ..."
ಗ್ರೆಟ್ಟಾಚೊ ರಾಗ್ ಆನಿ ಅಚಲ್ ನಿರ್ಧಾರ್ ಸಮ್ಜೊನ್ ಘೆತ್ಲ್ಲ್ಯಾ ವಿಗಾರಾನ್ ತಾಕಾ ಆಮ್ಸೊರಾನ್ ಭುಜಾವಣ್ ದಿಲಿ. ಆಜ್ ಘರ್ಚಿಂ ಮೆಟಾಂ ಚಡ್ತಾನಾ ಕಿತ್ಯಾಕ್ಗೀ ಘರಾಂತ್ ಕಾಳೊಕ್ ಪಡ್ಲ್ಲೊ ಅನ್ಭೋಗ್ ತಾಕಾ ಜಾತಾ. ಹರ್ಶೆಂ ಇಸ್ಕೊಲ್ ಜಾವ್ನ್ ಘರಾ ಭಿತರ್ ರಿಗ್ತಾನಾ ರಾಕೊನ್ ರಾಂವ್ಚಿ ಆವಯ್ ದಿಸಾನಾ. ಭಾವ್-ಭಯ್ಣಿಚೊ ತಾಳೊ ಆಯ್ಕಾನಾ. ತಾಕಾ ಸಮ್ಜಾತಾ. ಆಜ್ ತಾಂಚಾ ಗರಾ ಸಗ್ಳೆಂ ಮೌನ್ಪಣಾನ್ ತಿರ್ಸಾತಾ. ಆಮೊರಿ, ತೇರ್ಸ್, ಜೆವಾಣ್, ಸದಾಂಚೆಪರಿಂ ಚಲೊನ್ ವೆತಾ ತರೀ ಎಕಾಮೆಕಾ ಕೊಣೀಂ ಉಲಯ್ನಾಂತ್. ಚಡ್ ಜಾವ್ನ್ ತಾಚಿ ಆವಯ್.
ಹರ್ಶೆಂ ’ಪುತಾ, ಪುತಾ’ ಮ್ಹಣ್ ಘಡಿಯೆ ಘಡಿಯೆ ಕಿತೆಂ ನ್ಹಯ್ ಕಿತೆಂ ಉಲಯ್ತಾಲಿ ಜಾಲ್ಯಾರ್ ಆಜ್ ತಿಚಾ ತೊಂಡಾರ್ ಕಾಲ್ಭಾಣ್ ಪಡ್ಲ್ಯಾ. ಗ್ರೆಟ್ಟಾಕ್ ಪಳೆತಾನಾ ತಿ ರಾಗಾನ್ ಪಳೆವ್ನ್ ದೀಷ್ಟ್ ತೆವ್ಶಿನ್ ಘಾಲ್ತಾ. ಹೆಂ ಪಾರ್ಕಿಲ್ಲ್ಯಾ. ಗ್ರೆಟ್ಟಾ ಥಂಯ್ ಕಠೀಣ್ ಬೆಜಾರಾಯ್ ಉಭ್ಜೊನ್ ಕಾಳಿಜ್ ಖಡ್ಸಾರ್ತಾ.
ನಿದೊಂಕ್ ಗೆಲ್ಲ್ಯಾ ತಾಕಾ ನೀದ್ಯೀ ಲಾಗಿಂ ಯೇನಾ. ತೆಂ ಖಾಟಿಯೆರ್ ತೆವ್ಶಿನ್ - ಹೆವ್ಶಿನ್ ಪರ್ತಾನಾ ಚಿಂತ್ನಾಂನಿ ತೆಂ ವಿರಾರ್ ಜಾತಾ. ಆಪ್ಲಿ ಆವಯ್ ಆಜ್ ಏಕ್ ಸಬ್ಧ್ಯಿ ಉಲಂವ್ಕ್ ನಾ ಜಾಲ್ಲ್ಯಾನ್ ಕಾಳಿಜ್ ತಾಚೆಂ ಭರೊನ್ ಯೆತಾ. ತೆಂ ಖಾಟಿಯೆರ್ ಥಾವ್ನ್ ಉಟ್ತಾ, ಆನಿ ಆವಯ್ ನಿದ್ಲ್ಲ್ಯಾ ಕುಡಾಕ್ ವಚೊನ್ ತಿಚಾ ಪಾಂಯಾಂ ಮುಳಾಂತ್ ಉಭೆಂ ಜಾತಾ. ಹಾಕಾ ಪಳೆವ್ನ್ ಆವಯ್ ಕೂಸ್ ಬದ್ಲುನ್ ತೆವ್ಶಿನ್ ತಕ್ಲಿ ಘಾಲ್ತಾನಾ ದುಖ್ ತಾಚ್ಯಾ ತಡ್ವುಂಕ್ ಜಾಯ್ನಾಶೆಂ ಕಸ್ಕಸೊನ್ ರಡ್ತಾನಾ ಆವಯ್ ತಾಚಾ ಕುಶಿನ್ ತಕ್ಲಿ ಘುಂವ್ಡಾವ್ನ್ ಮ್ಹಣ್ತಾ.
"ಕೋಣ್ ಮೆಲಾಂ ಮ್ಹಣ್ ರಡ್ತಾಯ್ಗೋ.. ಬಾಪುಯ್ ಮೊರೊನ್ ತ್ಯಾ ಸಂಸಾರಾಂತ್ ಆಸಾ.. ಆನಿ ಹಾಂವ್ ಎಕ್ಲಿಂ ಆಸಾಂ.." ತೆಂ ಸಟ್ಟ್ ಕರ್ನ್ ಉಲಂವ್ಚಾ ಆವಯ್ಚ್ಯಾ ಒಂಠಾಂಚೆರ್ ಹಾತ್ ಧಾಂಬುನ್ ತಿಚಿಂ ಉತ್ರಾಂ ಕಾತ್ರುನ್ ರಡ್ತಾ ಆನಿ ಮ್ಹಣ್ತಾ;
"ಮಾಂಯ್, ತುವೆಂ ಮೊರೊನ್ ಆಮಿ ವಾಟೆರ್ ಪಡ್ಚೆಂ ನಾಕಾ ಮಾಂಯ್, ಹಾಂವ್ ಜಾಣಾಂ ತುಂ ಕಿತ್ಯಾ ಖಾತಿರ್ ಅಶೆಮ್ ಉಲಯ್ತಾಯ್ ಮ್ಹಣ್. ಹಾಂವ್ ನವಿನಾಚೊ ಮೋಗ್ ಕರ್ತಾಂ ಮಾಂಯ್. ನಿತಳ್ ನಿಸ್ಕಳ್ ಮೋಗ್. ತೊ ಮ್ಹಜಾ ಕಾಳ್ಜಾಂತ್ ರೊಂಬ್ಲಾ... ಹಾಂವ್ ತಾಚೆರ್ ಪಾತಿಯೆಲ್ಯಾಂ..."
"ಕಿತೆಂ ಉಲಯ್ತಾಯ್ಗೋ ತುಂ ಬಾಸ್ಕಳ್ ಉಲವ್ಣೆಂ?.. ತ್ಯಾ ಹಿಂದ್ವಾಂಚಾಚೊ ತುಂ ಮೋಗ್ ಕರ್ತಾಯ್? ತಾಚೆಲಾಗಿಂ ಕಾಜಾರ್ ಜಾತಯ್? ತುವೆಂ ಇಲ್ಲೆಂ ಪುಣೀಂ ಸಮ್ಜೊನ್ ಘೆತ್ಲಾಂಯ್ಗೀ ಆಮಿ ಕ್ರಿಸ್ತಾಂವ್ ಆನಿ ತೊ ಹಿಂದ್ವಾಂಚೊ ಮ್ಹಣ್? ಜರ್ತರ್ ತುಂ ತಾಚೆಲಾಗಿಂ ಕಾಜಾರ್ ಜಾಶಿ ಚಿಂತ್ಲಾಂಯ್ಗೀ ತುವೆಂ ತುಜಾ ಭಯ್ಣಿಂ ವಿಷ್ಯಾಂತ್? ಚಿಂತ್ಲಾಂಯ್ಗೀ ತುವೆಂ ತುಜಾ ಭಾಂವಾಂಚಾ ಫ಼ುಡಾರಾ ವಿಶ್ಯಾಂತ್? ತುಂ ಜರ್ತರ್ ತಾಚೆಲಾಗಿಂ ಕಾಜಾರ್ ಜಾಶಿ ತುಜಾ ಭಯ್ಣಿಕ್ ಸಯ್ರಿಕ್ ಲಾಗತ್? ತಿ ಉಟೊನ್ ಬಸೊನ್ ವಣದಿಕ್ ವೊಣ್ಕೊನ್ ರಾಗಾರ್ ಸಣ್ಸಣ್ತಾ.
"ಮಾಂಯ್ ಹಾಂವ್ ಸರ್ವ್ ಜಾಣಾಂ ಮಾಂಯ್...ಮ್ಹಜಾ ಭಯ್ಣಿಕ್ ಸೈರಿಕ್ ಪಳೆವ್ನ್ ತಾಚೆಂ ಕಾಜಾರ್ ಜಾಲ್ಯಾ ಉಪ್ರಾಂತ್ ಹಾಂವ್ ನವಿನಾಲಾಗಿಂ ಕಾಜಾರ್ ಜಾತೆಲಿಂ.. ಭಾವಾಂಚೊ ಫ಼ುಡಾರ್ ಖಂಡಿತ್ ನಂದನ್ ಜಾತಲೊ. ತಾಂಕಾಂ ಶಿಕಾಪ್ ದಿಲಾಂ. ತೆ ನೀಟ್ ವಾಟೆನ್ ಚಲ್ತೆಲೆ. ತಶೆಂ ನವಿನ್ ಆಮ್ಚ್ಯಾ ಸಮೊಡ್ತೆಕ್ ಯೇಂವ್ಂಚ್ ಮ್ಹಜೆಲಾಗಿಂ ದುಃಖಾಂ ಗಳವ್ನ್ ಆವಯ್ಕ್ ಸಮ್ಜೊಂವ್ಚೆಂ ಪ್ರೇತನ್ ಕರ್ತಾ.
"ತೊ ಕ್ರಿಸ್ತಾಂವ್ ಜಾತಾ ಆನಿ ತುಂ ಉಪ್ರಾಂತ್ ಕಾಜಾರ್ ಜಾತಾಂ ಮ್ಹಣ್ತಾಯ್, ತುಕಾ ಆಮ್ಚಾ ಜಾತಿಂತ್ ಕೊಣೀ ನವ್ರೆ ಮೆಳಾನಾಂತ್ ಮ್ಹಣ್ ಚಿಂತಾಯ್..?"
"ಮೆಳ್ತಾತ್ ಮಾಂ. ಮೆಳ್ತೆಲೆ ಪುಣ್ ಹಾವೆಂ ಮೋಗ್ ಕೆಲ್ಲ್ಯಾ ತಸಲೊ, ಮ್ಹಜಾ ಜಿಣಿಯೆಚೊ ಸಾಂಗಾತ್ ದಿಂವ್ಚೆ ತಸಲೊ ಮೊಗಾಳ್ ಮಯ್ಪಾಸಿ ನವಿನಾ ತಸಲೊ ಮೆಳಾತ್ ಮ್ಹಣ್ ಮ್ಹಾಕಾ ಭೊಗಾನಾಮೂ?.. ಮ್ಹಾಕಾ ತುಂ ಮಾಫ಼್ ಕರ್ ಮಾ.. ಹಾವೆಂ ವಿಂಚ್ಲ್ಲ್ಯಾ, ಮ್ಹಜಾ ಕಾಲ್ಜಾಂತ್ ರೊಂಬ್ಲ್ಲ್ಯಾ ನವಿನಾ ಥಾವ್ನ್ ಮ್ಹಾಕಾ ಮೆಕ್ಳೆಂ ಕರುಂಕ್ ಮ್ಹಾಕಾ ಆಡಾಯ್ನಾಕಾ ಮಾಂ.." ತೆಂ ಆವಯ್ಚೆ ದೊಣೀಂ ಹಾತ್ ಧರುನ್ ರಡೊನ್ ಪರತ್ತಾ..
"ತುಂ ಅಶೆಂ ಮ್ಹಣ್ತಾಯ್ ವ್ಹಯ್ ಪುತಾ.. ಪುಣ್ ಗಾಂವಾರ್ ಲೋಕ್ ಆಮ್ಚ್ಯಾ ಕುಟ್ಮಾಚಾ ಮರ್ಯಾದೆಚೆ ವಾಂಟೆ ಘಾಲುನ್ ಆಸಾ ತೆಂ ತುಂ ನೆಣಾಂಯ್?.."
"ಹಾಂವ್ ಸರ್ವ್ ಜಾಣಾಂ ಮಾಂ.. ತಿತ್ಲಿಂ ಹಾಂವ್ ಬುದ್ದು ನ್ಹಯ್.." "ತುಂ ಕಿತೇಂಯ್ ಸಾಂಗ್ ಪುತಾ, ಮ್ಹಜೊ ಜೀವ್ ಆಸ್ತಾ ಪರ್ಯಾಂತ್ ತುವೆಂ ತ್ಯಾ ಹಿಂದ್ವಾಲಾಗಿಂ ಕಾಜಾರ್ ಜಾಂವ್ಚೆಂ ಹಾಂವ್ ಪಳೆಂವ್ಕ್ ಸಕ್ಚಿಂನಾ. ಹಾವೆಂ ದೊಳೆ ಧಾಂಪ್ಲ್ಯಾ ಉಪ್ರಾಂತ್ ಜಾಲ್ಯಾರ್ ತುಂ ತಾಚೆಲಾಗಿಂ ಕಾಜಾರ್ ಜಾ... ತೆದ್ನಾಂ ಹಾಂವ್ ಆಡಾಂವ್ಕ್ ಯೆಂವ್ಚಿಂ ನಾ..."
ಖಂಚಾಚ್ ಥರಾನ್ ಆಪ್ಲ್ಯಾ ಆವಯ್ಕ್ ಸಮ್ಜಾಯ್ಲ್ಯಾರೀ ತಿ ಒಪ್ವೊಂಚೆಪರಿಂ ನಾತ್ಲ್ಲಿ ಪಳೆವ್ನ್ ನಿದೆನ್ ಜೆಮೆಂವ್ಚಾ ತಿಕಾ ನಿದಾವ್ನ್ ತೆ ಖಾಟಿಯೆರ್ ಯೇವ್ನ್ ಪಡ್ತಾ. ದುಸ್ರ್ಯಾ ದಿಸಾ ನವಿನಾಕ್ ತೆಂ ಏಕ್ ಲಾಂಬಾಯೆಚೆಂ ಪತ್ರ್ ಬರಯ್ತಾ.
"ಫ಼ುಡೆಂ ಆಮ್ಚಾ ಘರಾ ಯೇನಾಕಾ.." ಮ್ಹಣ್ ಬರವ್ನ್ ಆಪ್ಲ್ಯಾ ಆನಿ ತಾಚೆ ವಿಷ್ಯಾಂತ್ ಗಾಂವಾರ್ ಪಡ್ಲ್ಲ್ಯಾ ಖಬ್ರೆನ್ ವಿಗಾರಾ ಥಾವ್ನ್ ಆವಯ್ ಪರ್ಯಾಂತ್ ಜಾಲ್ಲೆಂ ಉಲವ್ಣೆಂ ವಿವರ್ಸುನ್ ಬರ್ಯಾ ಗುಣಾಂಚಾ ಚಲಿಯೆಲಾಗಿಂ ಕಾಜಾರ್ ಜಾಂವ್ಕ್ ಬರಯ್ತಾ. ಪುಣ್ ಇಸ್ಕೊಲಾಚಾ ಬಾಂದ್ಪಾಚೆಂ ಕಾಮ್ ಪುರ್ತೆಂ ಜಾವ್ನ್ ಯೆದೊಳ್ ಸೊಡ್ನ್ ದಿಲ್ಲ್ಯಾನ್ ನವಿನಾಕ್ ಹೆಂ ಕಾಗಾದ್ ಕಶೆಂ ಪಾವಿತ್ ಕರ್ಚೆಂ ಮ್ಹಳ್ಳೆಂ ತಾಕಾ ಸಮ್ಜಾಲೆಂನಾ.
ಸಾಂಜೆಭಿತರ್ ತಾಕಾ ಪಾವಿತ್ ಕರಿನಾತ್ಲ್ಯಾರ್ ತೊ ಸಾಂಜೆರ್ ಘರಾ ಯೆತಲೊ. ಆನಿ ತೆದ್ನಾಂ ಆಪ್ಲಿ ಆವಯ್ ತಾಚೆರ್ ಭಿಗ್ಡೊನ್ ತಾಕಾ ನಾಕಾ ಜಾಲ್ಲೆಂ ಉಲಯ್ತ್ ಜಾಲ್ಯಾರ್ ಆಪ್ಣಾಕ್ ಸೊಸುಂಕ್ ಜಾಂವ್ಚೆಂನಾ ಮ್ಹಣ್ ತೆಂ ಕಳ್ವಳ್ಳ್ತಾ.
ಇತ್ಲ್ಯಾರ್ ಇಗರ್ಜೆಚಾ ಗೆಟಿ ಮುಕ್ಲ್ಯಾನ್ ರಸ್ತ್ಯಾರ್ ವೆಚೊ ನವಿನಾಚೊ ಕಾಮಾಗಾರ್ ತಾಕಾ ದಿಷ್ಟಿಕ್ ಪಡೊನ್ ತಾಚೆಲಾಗಿಂ ತಾಣೆಂ ಬರವ್ನ್ ಕವರಾಂತ್ ಫ಼ಿಛಾರ್ ಕೆಲ್ಲೆಂ ಕಾಗಾದ್ ದೀವ್ನ್ ನವಿನಾಕ್ ಪಾವಂವ್ಕ್ ತೆಂ ಉಪ್ಕಾರ್ ಮಾಗ್ತಾನಾ ತೊ ಹಾಸೊನ್ಂಚ್ ಘೆವ್ನ್ ವೆತಾ. ಕಾಗಾದ್ ವಾಚ್ಲ್ಲೊ ನವಿನ್ ಸಗ್ಳೊಚ್ ವಿರ್ಯಾರ್ ಜಾತಾ. ಚಂಚಲ್ ಚಿಂತ್ನಾಂನಿ ಬುಡ್ತಾ. ತಾಕಾ ಆತಾಂಚ್ ವಚೊನ್ ಗ್ರೆಟ್ಟಾಕ್ ತಶೆಂ ತಾಚಾ ಆವಯ್ಕ್ ಮೆಳೊನ್ ಆಪ್ಣಾನ್ ಕ್ರಿಸ್ತಾಂವ್ ಜಾಂವ್ಚೊ ತಶೆಂ ಗ್ರೆಟ್ಟಾಲಾಗಿಂ ಕಾಜಾರ್ ಜಾಂವ್ಚೊ ಘಟ್ ನಿರ್ಧಾರ್ ಸಾಂಗೊಂಕ್ ಆತುರಾಯ್ ಭಗ್ತಾ.
ಪುಣ್ ಗ್ರೆಟ್ಟಾನ್ ಘರಾ ಯೇನಾಕಾ ಮ್ಹಣ್ ಬರಯಿಲ್ಲ್ಯಾನ್ ಅಪುಣ್ ತಾಚೆಂ ಉತಾರ್ ಮಿರ್ವೊನ್ ಗೆಲೊಂ ತರ್ ಬಾಧಕ್ ಜಾತಾ ಮ್ಹಣ್ ತೊ ಸಮಧಾನ್ ಘೆತಾ.
ಥೊಡೆ ದೀಸ್ ಪಾಶಾರ್ ಜಾತಾನಾ ಎಕಾ ಸಾಂಜೆರ್ ಇಸ್ಕೊಲ್ ಜಾವ್ನ್ ಗೆಟಿ ಭಾಯ್ರ್ ಯೆಂವ್ಚಾ ಗ್ರೆಟ್ಟಾಕ್ ರಾಕೊನ್ ರಾವ್ಲ್ಲೆಪರಿಂ ರಾವ್ಲ್ಲೊ ಗ್ರೆಟ್ಟಾನ್ ನವಿನಾಕ್ ಕಾಗಾದ್ ದೀವ್ನ್ ಧಾಡ್ಲ್ಲೊ ನವಿನಾಚೊ ಕಾಮಾಗಾರ್ ಮುಕಾರ್ ಯೆತಾ ಆನಿಂ ದರ್ವಡ್ಯಾನ್ ಸಾಂಗ್ತಾ -
"ಟೀಚರ್, ಆಮ್ಚೊ ಧನಿ ತೀನ್ ದಿಸ್ ಥಾವ್ನ್ ತಾಪಾನ್ ಕಡ್ಕಡ್ತಾ. ತೊ ತಾಚಾ ಘರಾಂತ್ ಎಕ್ಸುರ್ಯಾ ಕುಡಾಂತ್ ಎಕ್ಲೊಚ್ ನಿದೊನ್ ಆಸಾ.. ತೊ ಪೊಟಾಕ್ ಕಿತೆಂಚ್ ಖಾಯ್ನಾ, ವಕತ್ ಘೆನಾ.. ಫ಼ಕತ್ ’ಗ್ರೆಟ್ಟಾ ಗ್ರೆಟ್ಟಾ’ ಮ್ಹಣ್ ಫ಼ಿಂರ್ಗತಾ.."
ತೊ ಉಸ್ವಾಸ್ ಬಾಂಧುನ್ ಸಾಂಗ್ತಾ. ಹೆಂ ಆಯ್ಕಾಲ್ಲೆಂ ಗ್ರೆಟ್ಟಾ ಸಗ್ಳೆಂಚ್ ದೆದೆಸ್ಪ್ರಾರ್ ಜಾತಾ. ಏಕ್ ಘಡಿ ತಾಚಾ ಮತಿಂತ್ ಕಸಲಿಂಚ್ ಚಿಂತ್ನಾಂ ಉದೆನಾಂತ್. ತೆಂ ನವಿನಾಚಾ ಭಿರ್ಮತೆನ್ ಕಡ್ತಾ. ಆತಾಂ ವೊರಾಂ ಸಾಡೆ ಚಾರ್ ಜಾಲಿಂ. ಆನಿ ಹಾವೆಂ ಒಮ್ಜೂರ್ ವಚೊನ್ ಯೆಂವ್ಚೆಂ ಕೆದಾಳಾ? ತಿತ್ಲಿ ವಾಳ್ ಚಲೊನ್ ವೆತಾನಾ ಕಾಳೊಕ್ ಪಡ್ತಲೊ. ಪುಣ್ ಮ್ಹಜಾ ನವಿನಾಕ್ ಅಸಲ್ಯಾ ವೆಳಾರ್ ಸಾಂಡುನ್ ಘಾಲ್ಯಾರ್ ದೇವ್ ಮ್ಹಾಕಾ ಮೆಚ್ವಾತ್? ಮ್ಹಜೊ ಮೋಗ್ ಕೆಲ್ಲ್ಯಾ ಮ್ಹಾಕಾ ಪಾತ್ಯೆಲ್ಲ್ಯಾ ನವಿನಾಕ್ ಹಾವೆಂ ಬಚಾವ್ ಕರಿಜಾಯ್.
ಎಕಾ ದಿಸಾ ಕೊಂಗ್ಣ್ಯಾಚಾ ರಿಣಾಕ್ ಲಾಗೊನ್ ಹಾವೆಂ ದೆದೆಸ್ಪ್ರಾರ್ ಜಾವ್ನ್ ರಡ್ತಾನಾ, ಮ್ಹಾಕಾ ಭುಜವ್ನ್ ಮ್ಹಜಿಮರ್ಯಾದ್ ತಾಣೆ ರಾಕ್ಲ್ಯಾ. ಹಾಂವ್ ತಾಚಿಂ ರಿಣ್ಕಾರ್ನ್. ಆನಿ ಅಸಲ್ಯಾ ನವಿನಾಕ್ ಹ್ಯಾ ತಾಚಾ ಪಿಡೆವೆಳಾರ್ ಸಾಂಡುನ್ ಘಾಲ್ಯಾರ್...? ತೆಂ ನ್ಹಯ್ ಆಸ್ತಾನಾ ಮ್ಹಜಾ ನವಿನಾನ್ ಮ್ಹಜೆಖಾತಿರ್ ಆಪ್ಲ್ಯಾ ಕುಟ್ಮಾಕ್ ಸಾಂಡುನ್ ಮ್ಹಜಾ ವಯ್ಲ್ಯಾ ಖರ್ಯಾ ಮೊಗಾನ್ ವೆಗ್ಳೆಂ ಘರ್ ಕರುನ್ ತೊ ಎಕ್ಸುರೊ ಜಿಯೆತಾ.. ತರ್ ಹಾವೆಂ ತಾಚಿ ಚಾಕ್ರಿ ಕರುಂಕ್ಚ್ ಜಾಯ್.
ಲೋಕ್ ಕಿತೇಂಯ್ ಉಲಂವ್ದಿ, ತಾಕಾ ಃಆಂವ್ ತೋಂಡ್ ದಿತೆಲಿಂ. ತೆಂ ಅಪ್ಲ್ಯಾ ಘರಾ ಲಾಗ್ಶಿಲ್ಯಾ ಇಸ್ಕೊಲಾಕ್ ಯೆಂವ್ಚಾ ಎಕಾ ಭುರ್ಗ್ಯಾಲಾಗಿಂ ಅಪುಣ್ ಘರಾ ಯೆತಾನಾ ವೇಳ್ ಜಾತಲೊ ಮ್ಹಣ್ ಸಾಂಗೊನ್ ಧಾಡುನ್ ರಿಕ್ಶಾ ಕರುನ್ ಒಮ್ಜೂರಾಕ್ ವೆತಾ. ಆನಿ ನವಿನಾಚಾ ಕುಡಾಭಿತರ್ ರಿಗ್ತಾನಾ ತಾಚಿಂ ಅಂತರ್ಮಳಾಂ ಉಡ್ತಾತ್. ನವಿನ್ ಖಾಟಿಯೆರ್ ಎಕ್ಸುರೊ ನಿದೊನ್ ಫ಼ಿಂರ್ಗತಾ. ತೀನ್ಂಚ್ ದಿಸಾಂನಿ ತಾಚಿ ಕೂಡ್ ನಿತ್ರಾಣ್ ಜಾಲ್ಯಾ. ತೆಂ ತಾಚಾ ಲಾಗ್ಸಾರ್ ವೆತಾ, ಆಪ್ಲೆ ದೊನೀಂ ಹಾತ್ ತಾಚಾ ಕಪಲಾರ್ ದವರುನ್ ’ನವಿನ್’ ಮ್ಹಣ್ತಾನಾ ತೊ ಹಳ್ತಾರ್ ದೊಳೆ ಸೊಡ್ತಾ.
"ನವಿನ್.. ನವಿನ್ ಕಿತೆಂ ಜಾತಾ ತುಕಾ... ಅಳೆ, ತುಜೆಂ ಗ್ರೆಟ್ಟಾ ಆಯ್ಲಾಂ.." ತೆಂ ತಾಚೆ ಹಾತ್ ಅಪ್ಲ್ಯಾಂತ್ ಧರುನ್ ಹಳ್ತಾರ್ ಹಾಲವ್ನ್ ಭಿರ್ಮತೆಚಿ ದೀಷ್ಟ್ ಲಾಯ್ತಾ.
"ಗ್ರೆಟ್ಟಾ.." ನವಿನ್ ಕುಡ್ಕ್ಯಾ ಉತ್ರಾಂನಿ ಜೀಬ್ ಗಳವ್ನ್ ಪುರ್ತೆ ದೊಳೆ ಸೊಡ್ಚೆಂ ಪ್ರೇತನ್ ಕರ್ತಾ. "ವ್ಹಯ್ಬಾ ನವಿನ್, ತುಜೆಂ ಗ್ರೆಟ್ಟಾ..." ತೆಂ ತಾಚೆ ಹಾತ್ ದೊನೀ ಗಾಲಾಂಚೆರ್ ಚರಯ್ತಾ.
"ಗ್ರೆ..ಟ್ಟಾ.. ತುಂ ...ತುಂ .. ಮ್ಹಾಕಾ.. ಸಾಂಡ್ತಾಯ್.?" ನವಿನ್ ಕಷ್ಟಾಂನಿ ಉಜ್ವೊ ಹಾತ್ ಉಕ್ಲುನ್ ತಾಚೊ ಹಾತ್ ಧರ್ಚೆಂ ಪ್ರೇತನ್ ಕರ್ತಾ. "ನಾ-ಬಾ ನವಿನ್, ತುಕಾ ಹಾಂವ್ ಸಾಂಡಿನಾ. ಅಳೆ, ತುಜಿ ಚಾಕ್ರಿ ಕರ್ಚೆ ಖಾತಿರ್ ಹಾಂಗಾಸರ್ ಆಯ್ಲ್ಯಾಂ.."
ಅಶೆಂ ಉಲಯ್ತಾನಾ ತಾಚಾ ದೊಳ್ಯಾಂ ಥಾವ್ನ್ ದೋನ್ ದುಃಖಾಂ ತಾಚಾ ಖಬ್ರೆಭಾಯ್ರ್ ನವಿನಾಚಾ ಹರ್ಧ್ಯಾರ್ ಪಡ್ತಾನಾ ನವಿನಾಕ್ ಹುನ್ ಲಾಗ್ತಾ.
"ಗ್ರೆಟ್ಟಾ ತುಂ ರಡ್ತಾಯ್? ರಡಾನಾಕಾ ಮ್ಹಜಾ ಮೊಗಾ... ಹಾಂವ್ ಬರೊಂ ಜಾತಲೊಂ... ಪುಣ್ ತುಂ ಮ್ಹಾಕಾ ಭಾಸ್ ದೀಬಾ ಗ್ರೆಟ್ಟಾ... ಮ್ಹಜೊ ಮೋಗ್ ಸಾಂಡಿನಾ ಮ್ಹಣ್.."
"ನಾ ನವಿನ್, ಹಾಂವ್ ತುಜಾ ಮೊಗಾಕ್ ಸಾಂಡ್ಚಿಂನಾ, ತುಜೆ ಶಿವಾಯ್ ಜಿಯೆಂವ್ಕ್ ಸಕ್ಚಿಂ ನಾ. ತುಂಚ್ ಮಾಕಾ ಜಾಯ್..." ಆತಾಂ ನವಿನಾಚಾ ಕುಡಿಂತ್ ಹಳ್ತಾಚೊ ಉಲ್ಲಾಸ್ ಭರೊನ್ ತೊ ಗ್ರೆಟ್ಟಾಚಾ ಹಾತಾಂತ್ ಉಮೊ ಘೆತಾ.
"ತುವೆಂ ವಕಾತ್ ಹಾಡುಂಕ್ನಾಂಯ್?" ತೆಂ ಮೆಜಾ ವಯ್ರ್ ತೆಣೆ-ಹೆಣೆ ದುಬಾವಾನ್ ಪಳೆತಾ.
"ವಕಾತ್ ಹುಂ. ತುಜೆಶಿವಾಯ್ ದುಸ್ರೆಂ ವಕಾತ್ ಮ್ಹಾಕಾ ನಾಟ್ವೊಂಚೆಂನಾ. ತುಂಚ್ ಮ್ಹಜೆಂ ಟೊನಿಕ್, ತುಂಚ್ ಮ್ಹಜಿ ಘಟಾಯ್. ತುಂ ಆಸ್ಲ್ಯಾರ್ ಓಂಠ್ ರುಂದಾವ್ನ್ ಅಮೃಕೊ ಹಾಸೊನ್ ತಾಚಾ ಭುಜಾಂಚೆರ್ ಹಾತ್ ದವರ್ತಾ.
"ಹಾಂವ್ ಆಸ್ತೆಲಿಂ ಮೊಗಾ, ತುಜೆ ಸಾಂಗಾತಾ ಆಸ್ತೆಲಿಂ. ತುಜಾ ಕಾಳ್ಜಾಂತ್ ಆಸ್ತೆಲಿಂ. ಸದಾಂಚ್ ಆಸ್ತೆಲಿಂ." ತೆಂ ತಾಚಾ ಕೆಸಾಂ ಭಿತರ್ ಆಪ್ಲಿಂ ಮೋವ್ ಬೊಟಾಂ ರಿಗಯ್ತಾ. ಆನಿ "ಆತ್ತಾಂ ಯೆತಾಂ" ಮ್ಹಣ್ ಸಾಂಗೊನ್ ಭಾಯ್ರ್ ವೆತಾ.
ಲಾಗ್ಸಾರ್ ಆಸ್ಲ್ಲ್ಯಾ ದಾಕ್ತೆರಾಕ್ ಮೆಳೊನ್ ತಾಚೆಲಾಗಿಂ ನವಿನಾಚಾ ಪಿಡೆವಿಶ್ಯಾಂತ್ ವಿವರ್ಸುನ್ ತಾಕಾ ತಪಾಸುನ್ ವಕಾತ್ ದೀವ್ನ್ "ದೋನ್ ದಿಸಾಂನಿ ತಾಪ್ ಸುಟ್ತಲೊ" ಮ್ಹಳ್ಳಿ ಭಾಸಾವ್ಣಿಂ ದಿತಾ.
ಗ್ರೆಟ್ಟಾಕ್ ದಾಕ್ತೆರಾಚಾ ಉತ್ರಾಂನಿ ಭರ್ವಸೊ ಉದೆತಾ. ಕಾಳೊಕ್ ಪಡೊನ್ ಯೆಂವ್ಚೊ ಪಳೆಲ್ಲ್ಯಾ ಗ್ರೆಟ್ಟಾಕೀ ಆತಾಂ ಘರಾ ವೆಚೊ ಉಗ್ಡಾಸ್ ಜಾತಾ.
ತೆಂ ನವಿನಾಕ್ ಭುಜವ್ನ್ ಪಾಟಿಂ ಘರಾ ಪರ್ತೊಂಕ್ ಚಿಂತಾನಾ, ತಾಚೆ ಲಾಗ್ಸಾರ್ ಕೊಣೀಂ ನಾತ್ಲ್ಲೆಂ ಪಳೆವ್ನ್ ಭಿರ್ಮತ್ ದಿಸ್ತಾ. ಆಪ್ಣಾವರ್ವಿಂ ಆಜ್ ತಾಣೆಂ ಆಪ್ಲ್ಯಾ ಕುಟ್ಮಾಕ್ ಸಾಂಡುನ್ ಎಕ್ಸುರ್ಯಾ ಹ್ಯಾ ಘರಾಂತ್ ಅಸಲ್ಯಾ ಪರಿಸ್ಥಿತೆಂತ್ ಕಷ್ಟಾಜಾಯ್ ಪಡ್ಲೆಂ ನ್ಹಯ್ಗೀ ಮ್ಹಣ್ ತೆಂ ಕಳ್ವಳ್ತಾ. ಜರ್ತರ್ ಅಪ್ಣಾಚೊ ಮೋಗ್ ತಾಣೆ ಕೆಲ್ಲೊ ನ್ಹಯ್ ತರ್, ಆಜ್ ತೊ ಪಿಡೆಂತ್ ಪಡ್ತಾನಾ ತಾಚಾ ಕುಟ್ಮಾಚಿಂ ತಾಚಿ ಚಾಕ್ರಿ ಕರ್ತಿಂ ಆಸ್ಲ್ಲಿಂ... ಆನಿ ಆತಾಂ ಆಪ್ಣಾವರ್ವಿಂ ತೊ ಪಿಡೆಂತ್ ಆಸ್ತಾನಾ ಎಕ್ಸುರ್ಯಾಕ್ ಸೊಡ್ನ್ ವೆಚೆಂ ಕಶೆಂ ಮ್ಹಣ್ ತೆಂ ಚಿಂತುನ್ ಆಸ್ತಾನಾ, ನವಿನಾಕ್ ತಾಚೆ ವಳ್ವಳೆ ಕಳ್ತಾತ್ ಜಾಲ್ಲ್ಯಾನ್ ತೊ ತಾಕಾ ಭುಜಾವಣ್ ಸಾಂಗೊನ್ ಘರಾ ವಚೊಂಕ್ ಪರ್ನಣ್ಗಿ ದಿತಾ.
ಗ್ರೆಟ್ಟಾ ಘರಾ ಪಾವ್ತಾನಾ ಧರ್ತೆಚೆರ್ ಕಾಳೊಕ್ ದಾಟೊನ್ ಆಯಿಲ್ಲ್ಯಾನ್ ತಾಚಾ ಆವಯ್ಕ್ ದುಭಾವ್ ಜಾತಾ. ಕಿತ್ಯಾಕ್ ಕೆದ್ನಾಂಯೀ ಇಸ್ಕೊಲ್ ಜಾತೆಚ್ ಯೆತಾಲೆಂ. ಖಂಯ್ಸರೀ ವೆಚೆಂ ಜಾಲ್ಯಾರ್ ಸಾಂಗೊನ್ ವೆತಾಲೆಂ. ಆನಿಂ ಸಾಂಗಾತಾ ಭಾವಾಕ್ ಆಪವ್ನ್ ವರ್ತಾಲೆಂ. ಆನಿ ಏಕ್ ಎಕಾ ಭುರ್ಗ್ಯಾಲಾಗಿಂ ತಾಣೆಮ್ ಸಾಂಗೊನ್ ಧಾಡ್ಲಾಂ. ತೆಂಯೀ ಖಂಯ್ಸರ್ ವೆತಾಂ ಮ್ಹಳ್ಳೆಂ ಸಾಂಗೊಂಕಾಂ. ತ್ಯಾ ಶಿವಾಯ್ ಥೊಡೆ ದೀಸ್ ಥಾವ್ನ್ ನವಿನಾಚೆಂ ಸ್ಕೂಟರ್ ಹಾಂಗಾಸರ್ ಯೇಂವ್ಕ್ ನಾ ಮ್ಹಣ್ತಾನಾ ಖರೊಚ್ ತಿಚೊ ದುಭಾವ್ ದೊಡ್ತೊ ಜಾಲ್ಲೊ. ಕಾಂಯ್ ತಾಕಾ ಭೆಟ್ಚಾಕ್ ಹೆಂ ಗೆಲಾಂ..? ಗೆಲಾಂ ತರ್ ಪಳೆಲ್ಲೊ ಲೋಕ್ ಹಾಚೆವಿಶ್ಯಾಂತ್ ಅನಿಕೀ ಉಲಯ್ತಲೊ.
ತೆಂ ಘರಾ ಭಿತರ್ ರಿಗೊನ್ ಪಾರ್ಕೆಂ - ಪಾರ್ಕೆಂ ಜಾವ್ನ್ ಅಪ್ಲ್ಯಾ ಕುಡಾಕ್ ವಚೊನ್ ಮುಸ್ತಾಯ್ಕಿ ಬದ್ಲುನ್ ಭಾಯ್ರ್ ಯೆತಾನಾ ಆವಯ್ಚೆಂ ತೋಂಡ್ ಕಾಳೆಂ ಜಾವ್ನ್ ತಿರ್ಸ್ಯಾ ದಿಶ್ಟಿನ್ ಪಳೆಂವ್ಚೆಂ ತಾಕಾ ಕಳ್ತಾ. ತೆಂ ರಾಂದ್ಪಾ ಕುಡಾಕ್ ವೆತಾನಾ ರಾಂದ್ಣಿರ್ ಶಿತ್ ಶಿಜ್ತಾಲೆಂ. ಆನಿ ಭಯ್ಣ್ ಆಳೆನ್ ವಾಟುನ್ ಆಸ್ತಾಂ, ವ್ಹಡ್ ಭಯ್ಣಿಚೆರ್ ದುಭಾವಾಚಾ ದಿಶ್ಟಿನ್ ಪಳೆತಾಲೆಂ. ಹಾಕಾ ಮತ್ಲಬ್ ಸಮ್ಜತಾ, ತೆಂ ಭಿತರ್ಲ್ಯಾ ಕಾಮಾಂತ್ ಮಗ್ನ್ ಜಾತಾ. ಆಳೆನ್ ವಾಟುನ್ ಜಾತಚ್ ಭಯ್ಣ್ ನ್ಹಾಂವ್ಕ್ ವೆತಾ, ಭಾವ್ ತೆವ್ಶಿಲ್ಯಾ ಕುಡಾಂತ್ ಶಿಕ್ಪಾರ್ ಆಸಾತ್. ಆವಯ್ ರಾಂದ್ಪಾ ಕುಡಾಕ್ ಯೇವ್ನ್ ಹಾಚೊ ವಿಚಾರ್ ಕರ್ತಾ: "ಇತ್ಲಿ ರಾತ್ ಖಂಯ್ಸರ್ ಗೆಲ್ಲೆಂಯ್ಗೋ?"
"ನವಿನ್ ಹುಷಾರ್ ನಾ ಮ್ಹಳ್ಳಿ ಖಬಾರ್ ಮೆಳ್ಳಿ ಮಾಂಯ್. ತೊ ಕಠೀಣ್ ತಾಪಾನ್ ಕಡ್ಕಡ್ತಾ.." ತೆಂ ಶಿತ್ ವಾಳುನ್ ಹುನ್ ನಿಸಾ ಥಾವ್ನ್ ಉಭ್ಚಾ ಧುವ್ರಾಕ್ ಪಳೆತಾ.
"ತಾಕಾ ಹುಷಾರ್ ನಾ ಜಾಲ್ಯಾರ್ ತಾಚಿಂ ಕೊಣೀಂ ನಾಂತ್ವೆಗೊ ಚಾಕ್ರಿ ಕರ್ತೆಲಿಂ - ಖಬಾರ್ ಕಾಡ್ತೆಲಿಂ? ತುವೆಂ ವಾಡ್ಲ್ಲ್ಯಾ ಚೆಡ್ವಾನ್ ಹ್ಯಾ ರಾತಿಂ ತಾಚಾ ಘರಾ ವಚಾಜಯ್ವೆ?"
"ತಾಚಿಂ ಮ್ಹಳ್ಳಿಂ ಕೊಣೀಂ ನಾತ್ಲ್ಲ್ಯಾನ್ ಹಾಂವ್ ಪಳೆಂವ್ಕ್ ಗೆಲ್ಲಿಂ ಮಾಂಯ್. ಭಿರ್ಮತ್ ಸಗ್ಳ್ಯಾ ಘರಾಂತ್ ಎಕ್ಸುರ್ಯಾ ಕುಡಾಂತ್ ತಾಪಾನ್ ಖಡ್ಕಡೊನ್ ವಳ್ವಳ್ತಾಲೊ.. ಹಾವೆಂ ದಾಕ್ತೆರಾಕ್ ಆಪವ್ನ್ ವ್ಹರ್ನ್ ವಕಾತ್ ಹಾಡುನ್ ದಿಲೆಂ..."
"ತೊ ತಿತ್ಲೊ ಬರೊ ಜಾಲ್ಲೊ ಜಾಲ್ಯಾರ್ ತಾಚಿಂ ಕೊಣೀ ಸೊಡ್ನ್ ಘಾಲ್ತಿಂವೇ...?"
"ಮಾಂಯ್ ನವಿನ್ ತುವೆಂ ಚಿಂತ್ಚೆ ತಿತ್ಲೊ ಅಣ್ವೊ ನ್ಹಯ್. ದಯಕರ್ನ್ ತಾಚೆವಿಶ್ಯಾಂತ್ ಚೂಕ್ ಉಲಯ್ನಾಕಾ, ತಾಣೆಂ ಮ್ಹಜೆ ಖಾತಿರ್ ಕುಟಾಮ್ ಸಾಂಡ್ಲಾಂ. ಆನಿ ಮ್ಹಜೆ ಖಾತಿರ್ ಘರ್ ಘೆತ್ಲಾಂ. ಆಮ್ಚ್ಯಾ ಕಾಜಾರಾ ಉಪ್ರಾಂತ್ ತ್ಯಾ ಘರಾಂತ್ ರಾಂವ್ಚ್ಯಾಕ್..." ತೆಂ ಆವಯ್ಕ್ ನೀಜ್ ಹಕಿಗತ್ ಸಾಂಗ್ತಾ.
"ಮ್ಹಾಕಾ ಕಾಂಯ್ ಸಮ್ಜಾನಾ ಪುತಾ ಗ್ರೆಟ್ಟಾ.. ಹೊ ಕಸಲೊ ಮೋಗ್..." ಇತ್ಲೆಂ ತಿ ಉಲಯ್ತಾನಾ ನ್ಹಾಂವ್ಕ್ ಗೆಲ್ಲೆಂ ಭಯ್ಣ್ ಭಿತರ್ ಆಯಿಲ್ಲೆಂ ಪಳೆವ್ನ್ ತಾಚೆ ಮುಕಾರ್ ಹ್ಯಾ ವಿಷ್ಯಾಂತ್ ಉಲಂವ್ಚೆಂ ನ್ಹಯ್ ಮ್ಹಣ್ ತಿ ವೆ-ವೆಗಿಂ ಉಲವ್ಣೆಂ ರಾವಯ್ತಾ. ಗ್ರೆಟ್ಟಾ ದುಸ್ರ್ಯಾ ಸಾಂಜೆರ್ಯಿ ರಿಕಾರ್ ಬಸೊನ್ ನವಿನಾಕ್ ಪಳೆಂವ್ಕ್ ವೆತಾ. ಪುಣ್ ಆಜ್ ತೊ ಉಟೊನ್ ಬಸ್ಲಾ. ತಾಕಾ ಪಳೇತೆಚ್ ತೊ ಅಮೃಕೊ ಹಾಸ್ತಾನಾ ಗ್ರೆಟ್ಟಾಕ್ ಸಂತೊಸ್ ಜಾತಾ.
"ತಾಪ್ ನಿಂವ್ಲೊ?" ತೆಂ ತಾಚಾ ಕಪಲಾಚೆರ್ ಹಾತ್ ದವರುನ್ ಪಳೆತಾ.
"ತೊ ಕಾಲ್ಚ್ ತುಜಾ ಪಾಟ್ಲ್ಯಾನ್ ಧಾಂವ್ಲಾ.." ತೊ ತಾಚೆ ಹಾತ್ ಆಪ್ಲ್ಯಾಂತ್ ಧರುನ್ ತಾರಿಫ಼ೊ ಕರ್ತಾ.
"ಒಹೋ ತಾಪಾಕ್ ಧಾಂವ್ಡಾಂವ್ಕ್ ಹಾವೆಂ ಯೇಜಯ್ ಆಸ್ಲ್ಲೆಂ ದಿಸ್ತಾ..." ತೆಂಯಿ ತಾಚಾ ಗಾಲಾಚೆರ್ ಚಿರ್ಪುಟ್ ಮಾರುನ್ ಪಾಟಿಂ ಹಾಸೊ ದಿತಾ.
ಥೊಡೊ ವೇಳ್ ತಿಂ ಉಲವ್ನ್ ಬಸ್ತಾತ್. ಆಜ್ ವೆಗ್ಗಿಂ ಪಾಟಿಂ ವಚಾಜಯ್ ಮ್ಹಳ್ಳ್ಯಾರ್ ಇರಾದ್ಯಾನ್ ಗ್ರೆಟ್ಟಾ ನವಿನಾಕ್ ಸಮ್ಜೊವ್ನ್ ಮೆಟಾಂ ದೆಂವ್ತಾ. ಭಯ್ಣಿಚೆಂ ಸೆಕ್ರೆಟರಿ ಕೋರ್ನ್ ಶಿಕೊನ್ ಜಾತಾ ಆನಿ ತೆಂ ಕಾವೂರಾಂತ್ಲ್ಯಾ ಲ್ಹಾನ್ಶಾ ಸಂಸ್ಥ್ಯಾಂತ್ ಕಾಮಾಕ್ ಲಾಗ್ತಾನಾ ಹೆಣೆ ಭಾಂವಾಂಚೆಂಯೀ ಶಿಕಾಪ್ ಜಾತಾ. ಭಾಂವಾಂ ಪಯ್ಕಿ ವ್ಹಡ್ಲೊ ಬೆಂಗ್ಳುರ್ ಕಾಮಾಕ್ ಸೆರ್ವತಾನಾ ಧಾಕ್ಟ್ಯಾಕ್ ಪಣ್ಬೂರಾಂತ್ಲ್ಯಾ ಎಕಾ ಕೊಂಟ್ರ್ಯಾಕ್ಟ್ ಕಂಪೆನಿಂತ್ ಕ್ಲಾರ್ಕಾಚೆಂ ಕಾಮ್ ಮೆಳ್ತಾ ಜಾಲ್ಲ್ಯಾನ್ ಸದಾಂಯೀ ಸಕಾಳಿಂಚೆಂ ಕಾಮಾಕ್ ವಚೊನ್ ಸಾಂಜೆರ್ ಪಾಟಿಂ ಘರಾ ಯೆತಾ.
ಗ್ರೆಟ್ಟಾ ವಿಶ್ಯಾಂತ್ ಗಾಂವಾರ್ ಖಬಾರ್ ಜಾಲ್ಯಾ ತಿ ಭಾವ್-ಭಯ್ಣಿಂಚಾ ಕಾನಾಂತ್ ಪಡ್ಲ್ಯಾ ತರೀ ಮ್ಹಾಲ್ಘಡೆಂ ಭಯ್ಣ್ ಆವಯ್ ಸಾರ್ಕೆಂ ಮ್ಹಳ್ಳ್ಯಾ ಮರ್ಯಾದೆನ್ ತಶೆಂ ತೆಂ ಕಾಂಯ್ ನಾ ಸಮ್ಜೊಣೆಚೆಂ ನ್ಹಯ್ ಮ್ಹಣ್ ಸಮ್ಜಾಲ್ಲೊ ಭಾವ್ ತಾಚೆಲಾಗಿಂ ಹ್ಯಾ ವಿಶ್ಯಾಂತ್ ಕಿತೆಂಚ್ ಪ್ರಸ್ತಾಪ್ ಕರಿನಾ. ತೆಂ ನ್ಹಯ್ ಆಸ್ತಾನಾ ಗ್ರೆಟ್ಟಾ ಆತಾಂ ಹಾಪ್ತ್ಯಾಂತ್ ದೋನ್ -ತೀನ್ ಪಾವ್ಟಿಂ ನವಿನಾಚಾ ಘರಾ ಭೆಟ್ ದಿತಾ ತರೀ ಆವಯ್ ಕಾಂಯ್ಚ್ ಉಲಯ್ನಾ. ಕಿತ್ಯಾಕ್ ತಾಕಾ ಸಮ್ಜಾವ್ನ್ ಸಮ್ಜಾವ್ನ್ ತಿ ಥಕ್ಲ್ಯಾ. ತ್ಯಾ ಶಿವಾಯ್ ತಿಚಿ ಆತಾಂ ಭಲಾಯ್ಕಿ ಬರಿ ನಾ. ಕುಡಿಂತ್ ಅಸ್ಕತ್ ಜಾಲ್ಯ. ಗ್ರೆಟ್ಟಾಕ್ ಸಮ್ಜಾಯ್ಲ್ಯಾರೀ ತೆಂ ಮ್ಹಣ್ತಾ ’ಅಪ್ಣೆಂ ನವಿನಾಚೊ ಕಾಳ್ಜಾಥಾವ್ನ್ ಮೋಗ್ ಕೆಲಾ’ ಮ್ಹಣ್. ಹೊ ಕಸಲೊ ಕಾಳ್ಜಾಂತ್ಲೊ ಮೋಗ್ ಮ್ಹಳ್ಳೆಂ ತಿಕಾ ಕಳಾನಾ. ಆನಿ ಸಾಂಗೊನ್ ಸಮ್ಜಾವ್ನ್ ಉಪ್ಕಾರಾನಾ ಮ್ಹಣ್ ತಿ ಗಪ್ಚುಪ್ ರಾವ್ತಾ.
ಹ್ಯಾ ವರ್ಸಾಚೆಂ ಪೊಪಾಳ್ ವಿಕುನ್ ಆನಿ ಭಾವಾನ್ ಭಯ್ಣಿನ್ ಸಾಂಬಾಳ್ಲ್ಲೊ ಐವಜ್ ಹಾಡ್ನ್ ಜೊಗಾಸಣೆಂತ್ ದವರ್ಲ್ಲೆ ಧಾ ಹಜಾರ್ ರುಪಯ್ ಎಕ್ಟಾಂಯ್ ಕರುನ್ ತ್ಯಾ ಎಕಾ ಸಾಂಜೆರ್ ಗ್ರೆಟ್ಟಾ ನವಿನಾಕ್ ದೀಂವ್ಕ್ ವೆತಾ. ನವಿನ್ ಆಜ್ ಭಾರಿಚ್ ಖುಶಾಲ್ಭರಿತ್ ದಿಸ್ತಾ ತಾಕಾ. ತೆಂ ಮೆಟಾಂ ಚಡ್ತಾಣಾ ತೊ ಮುಕಾರ್ ಯೇವ್ನ್ ತಾಚಾ ಹಾತಾಂಕ್ ಹಾತ್ ಮೆಳವ್ನ್ ಬಸ್ಕಾ ದಾಕಯ್ತಾ. ಗ್ರೆಟ್ಟಾಕ್ ಮತ್ಲಬ್ ಸಮ್ಜಾನಾ ತರೀ ಆಜ್ ನವಿನಾನ್ ದಿಲ್ಲ್ಯಾ ವೀಸ್ ಹಜಾರಾಂತ್ ಧಾ ಹಜಾರ್ ರುಪಯ್ ಹಾಡ್ನ್ ಆಯ್ಲಾಂ ಜಾಲ್ಲ್ಯಾನ್ ಬಸ್ಲ್ಲೆಂಚ್ ಆಪ್ಲೆಂ ಹ್ಯಾಂಡ್ಬೇಗ್ ಉಗ್ತಾವ್ನ್ ನೊಟಾಂಚ್ಯೊ ಅಟ್ಟ್ಯೊ ಭಾಯ್ರ್ ಕಾಡ್ತಾನಾ ನವೀನ್ ವಿಜ್ಮಿತ್ಕಾಯೆನ್ ದೊಳೆ ಸೊಡ್ನ್ ತಾಕಾಚ್ ಪಳೆತಾ.
"ನವೀನ್ ಘೆ. ತುವೆಂ ಮ್ಹಾಕಾ ದಿಲ್ಲ್ಯಾ ವೀಸ್ ಹಜಾರ್ ರಿಣಾಂತ್ ಧಾ ಹಜಾರ್ ಹಾವೆಂ ಹಾಡ್ಲ್ಯಾತ್. ಉರ್ಲ್ಲೆ ಪಾಟ್ಲ್ಯಾನ್ ದಿತಾಂ..." ಗ್ರೆಟ್ಟಾ ಸಾಂಗಾಲಾಗ್ಲೆಂ.
ಪುಣ್ ನವಿನ್ ತೊ ದುಡು ಘೆನಾಸ್ತಾನಾ ಉಟೊನ್ ತಾಚಾ ಲಾಗ್ಸಾರ್ ಯೇವ್ನ್ ಗ್ರೆಟ್ಟಾನ್ ಭಾಯ್ರ್ ಕಾಡ್ಲ್ಲ್ಯೊ ನೊಟಾಂಚ್ಯೊ ಅಟ್ಟ್ಯೊ ಆಸಾ ತಶ್ಯೊಚ್ ತಾಚಾ ಬೆಗಾಂತ್ ಪಾಟಿಂ ಘಾಲ್ತಾ.
"ಗ್ರೆಟ್ಟಾ ಹಾವೆಂ ತುಕಾ ತೊ ದುಡು ರೀಣ್ ಮ್ಹಣ್ ದಿಲ್ಲೊ ನ್ಹಯ್. ತುಜಿ ಮರ್ಯಾದ್ ರಾಕೊಂಕ್ ತಶೆಂ ತುಜಾ ಮ್ಹಾಲ್ಘಡ್ಯಾಂಚಿ ಆಸ್ತ್ ಉರಂವ್ಚಾಖಾತಿರ್ ಆನಿ ತುಜೆರ್ ಆಸ್ಚಾ ಕಾಳ್ಜಾಂತ್ಲ್ಯಾ ಮೊಗಾನ್. ತುಜೆಲಾಗಿಂ ಹಾವೆಂ ತೊ ದುಡು ಪಾಟಿಂ ವಿಚಾರ್ಲಾಗೀ?"
"ಪುಣ್ ಇತ್ಲೊ ದುಡು ತುವೆ.." ತೆಂ ದೊಳೆ ರುಂದಾವ್ನ್ ಕಪಲಾಚೆರ್ ಮಿರಿಯೊ ಘಾಲ್ತಾ.
"ಇತ್ಲೊ ಆನಿ ತಿತ್ಲೊ. ಮ್ಹಜೆಲಾಗಿಂ ಆಸ್ಲ್ಲೊ ಹಾವೆಂ ದಿಲಾ. ತೊ ರಿಣಾ ರುಪಾರ್ ನ್ಹಯ್. ರೀಣ್ ದಿಂವ್ಚೆಂ ಜಾಲ್ಯಾರ್ ಹೆರಾಂಕ್ಯಿ ದಿವ್ಯೆತಾ, ಪುಣ್ ತುಕಾ ನ್ಹಯ್.." ತೊ ತಾಚಾ ಬಗ್ಲೆನ್ ಬಸೊನ್ ವಿವರ್ಸಿತಾ.
"ಪುಣ್ ನವಿನ್ ಹಾಂವ್ ತುಜಿಂ ರಿಣ್ಕಾರಿಂ ಜಾತೆಲಿಂ.." ತೆಂ ಗಾಗೆತಾ.
"ಗ್ರೆಟ್ಟಾ ಅನ್ಯೇಕ್ ಪಾವ್ಟಿಂ ತಶೆಂ ಮ್ಹಣಾನಾಕಾ... ತುಕಾ ಮ್ಹಜೆರ್ ಮೋಗ್ ಆಸಾ ವ ನಾ?" ತೊ ತಾಚಾ ಒಂಠಾಂಚೆರ್ ಹಾತ್ ಆಡ್ ಧರುನ್ ಉಮಾಳ್ಯಾಂನಿ ಉಲಯ್ತಾ.
"ಮೊಗಾ ನವಿನ್, ತುಜೊ ಮ್ಹಾಕಾ ಖರೊಚ್ ಮೋಗ್ ಆಸಾಬಾ. ಮ್ಹಜಾ ಕಾಳ್ಜಾಂತ್ಲೊ ಮೋಗ್ ತುಜೆ ಶಿವಾಯ್ ಹೆರಾಂಕ್ ವಾಂಟುನ್ ವಚಾಚೊನಾ. ಪಾತಿಯೆ ಮೊಗಾ ಪತಿಯೆ.."
ತೆಂ ಒಂಠಾ ವಯ್ಲೊ ನವಿನಾಚೊ ಹಾತ್ ಉಜ್ವ್ಯಾ ಹಾತಾನ್ ಹೆವ್ಶಿನ್ ವೊಡುನ್ ಸಾಂಗ್ತಾ.
"ತರ್ ಮ್ಹಜಾ ಕಾಳ್ಜಾಂತ್ಲೊ ಮೋಗ್ ತುಜೆ ಶಿವಾಯ್ ಹೆರಾಂಕ್ ತೊ ತಾಂಡುನ್ ಕಾಡೂಂಕ್ ಜಾಂವ್ಚೊ ನಾ. ಫ಼ಾಲ್ಯಾಂ ನ್ಹಯ್ ಪೊರ್ವಾಂ ವ ಕಿತ್ಲ್ಯಾಯ್ ವರ್ಸಾಂ ಪರ್ಯಾಂತೀ ಕಾಳ್ಜಾಂತ್ಲೊ ಮೋಗ್ ಮ್ಹಜೊ ಪಾಲ್ವಂವ್ಚೊ ನಾ."
"ತರ್ ಹೊ ದುಡು ಹಾಂವ್ ಕಿತೆಂ ಕರು.." ತೆಂ ಚಂಚಲ್ ಜಾವ್ನ್ ಸವಾಲ್ ಕರ್ತಾ.
"ತುಜಾ ನಾಂವಾರ್ ಬೆಂಕಾಂತ್ ದವರ್. ಆನಿ ತುಜಾ ಘರ್ಚಾಂಚಾ ಗರ್ಜೆಕ್ ವಾಪಾರ್.."
ತಿಂ ಆತಾಂ ತೊ ಪ್ರಸ್ತಾಪ್ ಅಖೇರ್ ಕರುನ್ ದುಸ್ರ್ಯಾಚ್ ಸಂಗ್ತಿಚೆರ್ ಉಲವ್ನ್ ಬಸ್ತಾತ್. ಎಕಾಮೆಕಾ ಉಲವ್ಣ್ಯಾಂ ಮಧೆಂ ಹಾಸೊನ್ ಹಾಸೊನ್ ಪಾವ್ತಾತ್.
"ಗ್ರೆಟ್ಟಾ ಆಮಿಂ ಚಾರ್ ವರ್ಸಾಂ ಥಾವ್ನ್ ಮೋಗ್ ಕರ್ತಾಂವ್, ಹ್ಯಾ ಕಾಳ್ಜಾಂತ್ಲ್ಯಾ ಮೊಗಾಕ್ ಕೆದ್ನಾಂ ಘಡ್ಸೊಂವ್ಚೆಂ?"
ತೊ ಅಚಾನಕ್ ಸವಾಲ್ ಕರ್ತಾನಾ ಗ್ರೆಟ್ಟಾ ಜಾಪಿಖಾತಿರ್ ಗುಸ್ಪೊಡ್ತಾ.
"ಕಿತ್ಯಾಕ್ ಗ್ರೆಟ್ಟಾ ತುಜಾ ತೊಂಡಾರ್ ಬದ್ಲಾವಣ್ ಜಾಲಿ? ತುಂ ಮ್ಹಜೊ ಮೋಗ್ ಕರಿನಾಂಯ್? ಕಾಳ್ಜಾಂತ್ ಮೋಗ್ ಆಸಾ ಮ್ಹಣ್ ಮ್ಹಾಕಾ ಫ಼ಸಯ್ನಾಂಯ್ಮೂ?"
ಗ್ರೆಟ್ಟಾಚಾ ತೊಂಡಾಚೊ ಛಾರೊ ಪಾರ್ಕಿಲ್ಲೊ ನವಿನ್ ತಾಚೆ ಹಾತ್ ಆಪ್ಲ್ಯಾಂತ್ ಧರುನ್ ದುಬಾವಾಚೆಂ ಸವಾಲ್ ಘಾಲ್ತಾ.
"ತುಂ ಮ್ಹಾಕ್ ಪಾತ್ಯೆನಾಂಯ್ಗೀ ನವಿನ್?, ಮ್ಹಜೆಂ ಕಾಳಿಜ್ ಉಗ್ತಾವ್ನ್ ದಾಖಂವ್ಕ್ ಸಾಧ್ಯ್ ಜಾಲ್ಲೆಂ ಜಾಲ್ಯಾರ್...? ನವಿನ್ ಹಾಂವ್ ತುಜೊ ಮೋಗ್ ಕರ್ತಾಂ. ಹೊ ಮ್ಹಜಾ ಕಾಳ್ಜಾಂತ್ಲೊ ಮೋಗ್ ತುಜೆಖಾತಿರ್ ಫ಼ುಮಾರ್ ಜಾವ್ನ್ ಉರ್ಲಾ ತೊ ಮರ್ತಾ ಪರ್ಯಾಂತ್ ಉರ್ತಲೊ..? ತೆಂ ತಾಚಾ ವಿಶಾಲ್ ಹರ್ಧ್ಯಾರ್ ತಕ್ಲಿ ದವರ್ನ್ ಭಾಸ್ ದಿತಾ.
"ತರ್ ಆಮಿ ವೆಗಿಂ ಕಾಜಾರ್ ಜಾವ್ಯಾಂ ಮೊಗಾ... ಆನಿಕೀ ಕಿತ್ಲೊ ತೇಂಪ್ ಆಮಿ ರಾಕೊನ್ ರಾಂವ್ಚೆಂ..?" ಹರ್ಧ್ಯಾ ವಯ್ಲಿ ತಕ್ಲಿ ದೊನೀ ಹಾತಾಂನಿ ಧರುನ್ ತಾಚಾ ದೊಳ್ಯಾಂಕ್ ದೊಳೆ ಮೆಳಯ್ತಾ. ಆನಿ ಆತುರಿತ್ ಅಮೃಕೊ ಹಾಸೊ ಹಾಸ್ತಾ.
"ನವಿನ್ ತುಜೆಲಾಗಿಂ ಲಗ್ನಾಭೆಸಾಂತ್ ಎಕ್ವಟೊಂಕ್ ಮ್ಹಾಕಾಯ್ ಆಶಾ ಆಸಾ. ಆನಿ ತೆಂ ಫ಼ಾಲ್ಯಾಂಚ್ ಜಾಂವ್ ಮ್ಹಣ್ಚಿ ಆತುರಾಯ್ ಮ್ಹಜಾ ಕಾಳ್ಜಾಂತ್ ಉಬೆತಾ. ಪುಣ್...!"
"ಪುಣ್...? ಪುಣ್ ಮ್ಹಣ್ ಕಿತ್ಯಾಕ್ ಅರ್ಧ್ಯಾರ್ ತುಜೆಂ ಉಲವ್ಣೆಂ ಕಾತರ್ಲೆಂಯ್? ಅನಿಕೀ ಕಾಂಯ್ ಹರ್ಕತ್ ಆಸಾ? ಕೊಣಾಯ್ಚೆಂಯ್ ಭ್ಯೆಂ ಆಸಾ? ಹಾಂವ್ ಕ್ರಿಸ್ತಾಂವ್ ಜಾಯ್ನಾಂ ಮ್ಹಣ್ ದುಭಾವ್ಯಾತ್? ವ ತುಜೆಲಾಗಿಂ ಕಾಜಾರ್ ಜಾಂವ್ನ್ ತುಕಾ ವಾಟೆರ್ ಘಾಲಿನ್ ಮ್ಹಣ್ ಭಿರಾಂತ್ ತುಕಾ ದಿಸ್ತಾ ..? ಸಾಂಗ್ ಗ್ರೆಟ್ಟಾ ಸಾಂಗ್.."
"ನಾ ನವಿನ್, ತುಂ ಘಾತ್ ಕರ್ಶಿ ಆನಿ ಮ್ಹಾಕಾ ಸಾಂಡ್ಶಿ ಮ್ಹಳ್ಳೊ ಕುಸ್ಕುಟ್ ದುಬಾವ್ ಮ್ಹಾಕಾ ನಾ. ತುಜೆರ್ ಹಾಂವ್ ಪಾತ್ಯೆಲಾಂ ನವಿನ್ ಖಂಡಿತ್ ಪಾತ್ಯೆಲ್ಯಾಂ... ತುಂಯೀಂ ಮ್ಹಜೆರ್ ಕುಸ್ಕುಟ್ ದುಭಾವ್ ಕರಿನಾಕಾ. ತುಜೆಲಾಗಿಂ ಕಾಜಾರ್ ಜಾವ್ನ್ ಕಷ್ಟಾಂತ್ ವ ಸುಖಾಂತ್ ತುಜೆ ಸಮೊಡ್ತಿಕ್ ಸೆರ್ವಾತೊಲೊಯ್ ಆನಿ ಆಮ್ಚ್ಯಾ ಸಮೊಡ್ತೆ ಪ್ರಕಾರ್ ಮ್ಹಾಕಾ ಸ್ವೀಕಾರ್ ಕರುನ್ ತುಜಿ ಜಿಣೀಯೆ ಸಾಂಗಾತಿಣ್ ಕರ್ತಲೊಯ್ ಮ್ಹಳ್ಳೊ ಖಂಡಿತ್ ಭರ್ವಸೊ ಮ್ಹಾಕಾ ಆಸಾ..."
"ತರ್ ತುಂ ಅನಿಕೀ ಪಾಟಿಂ ಮುಕಾರ್ ಕಿತ್ಯಾಕ್ ಕರ್ತಾಯ್?" ನವಿನ್ ಸಟ್ಟ್ ಕರ್ನ್ ಸವಾಲ್ ಘಾಲ್ತಾ. "ಪಳೆ ನವಿನ್ ಏಕ್ ಸಮಾಜ್ ಅನ್ಯೇಕಾ ಸಮಾಜೆಕ್ ಪಾತ್ಯೆನಾ. ಸ್ವೀಕಾರ್ ಕರಿನಾ. ಜಶೆಂ ತುಜಾ ಕುಟ್ಮಾನ್ ಮ್ಹಾಕಾ ನೆಗಾರ್ ಕೆಲಾಂ ತಶೆಂ ಮ್ಹಜೆಂ ಕುಟಾಮ್, ಮ್ಹಜಿ ಸಮಾಜ್ ತುಕಾ ದುಬಾವಾನ್ ಪಳೆತಾ. ಆನಿ ಕ್ರಿಸ್ತಾಂವ್ ಸಮೊಡ್ತಿ ವಿಷ್ಯಾಂತ್ ಚಡ್ತೀಕ್ ಬಂಧಡ್ ಆಸಾ. ಮ್ಹಜೆ ತಸಲ್ಯಾನ್ ದುಸ್ರ್ಯಾ ಸಮೊಡ್ತೆಚಾಕ್ ವಿಂಚ್ಲ್ಯಾರ್ ಮ್ಹಾಜಾ ಭಾಂವ್ಡಾಂಚೆರ್ ತಾಚೊ ಪರಿಣಾಮ್ ಜಾತಾ. ಮ್ಹಜಾ ಪಾಟ್ಲ್ಯಾ ಭಯ್ಣಿಕ್ ಸಯ್ರಿಕ್ ಯೇಂವ್ಕ್ ಕಷ್ಟ್ ಆಸಾತ್. ಕಿತ್ಯಾಕ್ ಖಬಾರ್ ಮೆಳ್ಲ್ಲೆ ’ತಾಚೆಂ ವ್ಹಡ್ ಭಯ್ಣ್ ಹಿಂದ್ವಾಂ ಪಾಟ್ಲ್ಯಾನ್ ಗೆಲಾಂ’ ಮ್ಹಣ್ತಾತ್. ಪುಣ್ ಕೊಣೀ ಸಮ್ಜೊನ್ ಘೆನಾಂತ್ಕೀ ಎಕಾಮೆಕಾ ಕಾಳ್ಜಾ ಥಾವ್ನ್ ಮೋಗ್ ಕರ್ತಾಲಿಂ. ಹ್ಯಾ ಕಾಳ್ಜಾಂತ್ಲ್ಯಾ ಮೊಗಾನ್ ತೊ ಕ್ರಿಸ್ತಾಂವ್ ಸಮೊಡ್ತ್ ಸ್ವೀಕಾರ್ ಕರುನ್ ಸಮೊಡ್ತಿಚಾ ಕಾಯ್ದ್ಯಾಂ ಪ್ರಕಾರ್ ರೆಸ್ಪೆರ್ ಜಾಲಾ.. ಹೆಂ ಕೊಣೀ ಮಾಂದುನ್ ಘೆನಾಂತ್. ಫ಼ಕತ್ ಜೀಬ್ ಆಸಾ ಮ್ಹಣ್ ಖೊಡಿ ಕುಲ್ಪಾಂ ಕಾಡ್ತಾತ್. ಪಾಟ್ಲೆಂ - ಫ಼ುಡ್ಲೆಂ ಕಿತೆಂಚ್ ಚಿಂತುನ್ ಘೆನಾಂತ್. ತೆಂ ಆಪ್ಲ್ಯಾ ಸಮೊಡ್ತೆಚಾ ಸಮಾಜೆಚಾ ಸಂಸ್ಕಾರಾವಿಶ್ಯಾಂತ್ ವಿವರ್ಸಿತಾ.
"ತರ್ ತುಜಾ ಭಯ್ಣಿಚೆಂ ಕಾಜಾರ್ ಜ್ತಾ ಪರ್ಯಾಂತ್ ಆಮಿ ರಾಕಾಜಯ್ ಮ್ಹಣ್ಚೆಂಗೀ ತುವೆಂ?"
"ವ್ಹಯ್ ನವಿನ್, ಖಂಡಿತ್ ಮ್ಹಜಾ ಭಯ್ಣಿಚೆಂ ಬರೆಂ ವಾಯ್ಟ್ ಜಾಲ್ಲ್ಯಾ ಶಿವಾಯ್ ಆಮಿ ಆಮ್ಸೊರ್ಚೆಂ ನಾಕಾ. ತೆದೊಳ್ ಪರ್ಯಾಂತ್ ಮ್ಹಜೆರ್ ಆಸ್ಚೊ ತುಜಾ ಕಾಳ್ಜಾಂತ್ಲೊ ಮೋಗ್ ತುಂ ಸಾಂಬಾಳ್ನ್ ದವರ್. ಎಕಾ ನ್ಹಯ್ ಎಕಾ ದಿಸಾ ಆಮಿ ಹ್ಯಾ ಕಾಳ್ಜಾಂತ್ಲ್ಯಾ ಮೊಗಾಕ್ ಎಕ್ವಟೊಯಾಂ. ಜಿಣಿಯೆ ಸಾಂಗಾತಿ ಜಾವ್ಯಾಂ.."
"ತರ್ ತೂಂಯಿ ಮ್ಹಜೆ ಖಾತಿರ್ ತೊ ಕಾಳ್ಜಾಂತ್ಲೊ ಮೋಗ್ ಸಾಂಬಾಳ್ನ್ ದವರ್ತೆಲೆಂಯ್ಮೂ?" ತೊ ತಾಚೆ ಹಾತ್ ಅಪ್ಲ್ಯಾಂತ್ ಧರುನ್ ಪರಾತ್ತುನ್ ಮ್ಹಳ್ಳೆಪರಿಂ ತಕ್ಲಿ ಆಡ್ ಘಾಲುನ್ ವಿಚಾರ್ತಾ.
"ಖಂಡಿತ್ ನವಿನ್. ತಾಂಟುಂ ಕುಸ್ಕುಟ್ ತುಂ ದುಬಾವ್ನಾಕಾ, ಹೆಂ ಗ್ರೆಟ್ಟಾ ತುಕಾ ವಿಸ್ರೊಂವ್ಚೆಂ ನಾ. ತುಜಾ ಮೊಗಾಕ್ ದುಸ್ರ್ಯಾನ್ ಹಾತ್ ಲಾಂವ್ಕ್ ಸೊಡ್ಚೆಂ ನಾ.."
ಅಶೆಂ ತಿಂ ದೊಗಾಂಯೀ ಎಕಾ ನಿರ್ಧಾರಾಕ್ ಯೆತಾತ್. ವರ್ಸಾಂ ಪಾಶಾರ್ ಜಾಲ್ಯಾರೀ ಭಯ್ಣಿಕ್ ಬಾವಿಸ್ ವರ್ಸಾಂ ಉತ್ರೊನ್ ಯೆತಾತ್ ತರೀ ಸೈರಿಕ್ ಲಾಗಾನಾ. ಕಾರಾಣ್ ವ್ಹಡ್ ಭಯ್ಣ್ ಹಿಂದ್ವಾ ಸಾಂಗಾತಾ ಮಿರಯ್ತಾ ಮ್ಹಳ್ಳಿ ಖಬಾರ್ ಮೆಳ್ತಾನಾ ಆಯಿಲ್ಲಿ ಸೈರಿಕ್ ಚುಕ್ತಾ. ಹ್ಯಾ ವರ್ವಿಂ ಆತಾತಾಂ ಆವಯ್ ಖಂತಿನ್ ಕರ್ಗಾತಾ. ಪುಣ್ ಗ್ರೆಟ್ಟಾಕ್ ನವಿನಾಚೊ ಮೋಗ್ ಸಾಂಡುಂಕ್ ತಾಚಾನ್ ಜಾಯ್ನಾ. ನವಿನಾ ಖಾತಿರ್ ತಾಚಾ ಕಾಳ್ಜಾಂತ್ಲೊ ಮೋಗ್ ಉಣೊ ಜಾಯ್ನಾ. ತೆಣೆಂ ಬೆಂಗ್ಳುರ್ಚೊ ಭಾವ್ ಥಂಯ್ಸರ್ ಎಕಾ ಚಲಿಯೆಚೊ ಮೋಗ್ ಕರುನ್ ತಾಚೆ ಇತ್ಲ್ಯಾಕ್ ಕಾಜಾರ್ ಜಾವ್ನ್ ಥಂಯ್ಚ್ ವಸ್ತಿ ಕರ್ತಾ.
ಆತಾಂ ಘರಾಂತ್ ಮ್ಹಣ್ ಮರ್ಯಾದ್ ದಿಂವ್ಚೊ ಭಾವ್, ವಡ್ ಭಯ್ಣಿಚಾ ನಡ್ತ್ಯಾನ್ ಆಪ್ಣಾಕ್ ಸೈರಿಕ್ ಯೇನಾ ಮ್ಹಣ್ ಭಯ್ಣ್; ಗ್ರೆಟ್ಟಾಚೆರ್ ಉಪ್ರಾಟ್ತಾತ್, ಆವಯ್ ಹ್ಯಾ ಖಂತಿರ್ ಮಾಂದ್ರಿ ಧರ್ತಾ. ಪುಣ್ ಗ್ರೆಟ್ಟಾ ಕರ್ತೆಲೆಂ ಕಿತೆಂ? ತಾಣೆಂ ನವಿನಾಚೊ ಕಾಳ್ಜಾ ಥಾವ್ನ್ ಮೋಗ್ ಕೆಲಾ. ’ನವಿನಾನ್ ಕ್ರಿಸ್ತಾಂವ್ ಸಮೊಡ್ತ್ ಸ್ವಿಕಾರ್ ಕರುನ್ ಅಪ್ಣಾಲಾಗಿಂ ಕಾಜಾರ್ ಜಾತಾಂ ಮ್ಹಣ್ ಭರ್ವಸೊ ದಿಲಾ. ತೊ ಮ್ಹಾಕಾ ಪಾತಿಯೆಲಾ. ಮ್ಹಜಾ ಕಾಳ್ಜಾಕ್ ತಾಚಾ ಕಾಳ್ಜಾಂತ್ ಜಾಗೊ ಆಮಾನತ್ ಕರುನ್ ತಾಚಾ ವ್ಹಡಿಲಾಂಕ್ ಸಾಂಡುನ್ ಮ್ಹಜೆ ಖಾತಿರ್ ಘರ್ದಾರ್ ಕರುನ್ ತೊ ಮ್ಹಾಕಾಚ್ ರಾಕೊನ್ ರಾವ್ಲಾ. ತರ್ ಮ್ಹಜಾ ಕುಟ್ಮಾ ಖಾತಿರ್ ಮ್ಹಜಾ ಸಮಾಜೆಖಾತಿರ್ ಮ್ಹಜೆರ್ ಪಾತ್ಯೆಲ್ಲ್ಯಾ ನವಿನಾಕ್ ಹಾಂವ್ ಸಾಂಡುಂ? ತಾಕಾ ನೆಗಾರ್ ಕರುಂ? ತಾಕಾ ಘಾತ್ ಕರುಂ? ನಾ, ನಾ, ಹೆಂ ಬಿಲ್ಕುಲ್ ಸಾಧ್ಯ್ ನಾ, ಮ್ಹಜಾ ನವಿನಾಕ್ ಹಾಂವ್ ಸಾಂಡ್ಚಿಂ ನಾ, ತಾಚಾ ಮೊಗಾಕ್ ನೆಗಾರ್ ಕರ್ಚಿಂ ನಾ, ತಾಕಾ ಹಾಂವ್ ಕರ್ಚಿಂ ನಾ.. ಮ್ಹಜಾ ಕಾಳ್ಜಾಂತ್ಲ್ಯಾ ಮೊಗಾಕ್ ಕುಸವ್ನ್ ಘಾಣೆಂವ್ಚಿಂನಾ..’ ತೆಂ ದೆವಾಲಾಗಿಂ ಹಾಖ್ ಬೋಬ್ ಮಾರುನ್ ಮಾಗ್ತಾ.
’ಮ್ಹಜಾ ಭಯ್ಣಿಕ್ ಏಕ್ ಬರಿ ಸೈರಿಕ್ ಮೆಳಾಶಿ ಕರ್ ದೆವಾ.. ತಾಚೊ ಫ಼ುಡಾರ್ ನಂದನ್ ಕರ್.. ಮ್ಹಜಾ ಸಮೊಡ್ತೆಕ್ ಏಕ್ ಅತ್ಮೊ ಚಡ್ತಿಕ್ ಹಾಂವ್ ಹಾಡ್ತಾಂ. ಮ್ಹಜಾ ನವಿನಾನ್ ಕ್ರಿಸ್ತಾಂವ್ ಧರ್ಮ್ ಸ್ವೀಕಾರ್ ಕರುನ್ ತಾಚಿ ಪತಿಣ್ ಹಾಂವ್ ಜಾತಾಂ..’ ತೆಂ ಆಪ್ಲ್ಯಾ ಕುಡಾಂತ್ ಕೊಣೆಂಯ್ ಪಳೆನಾಶೆಂ ಸರ್ಪೊಡೊನ್ ಮಾಗ್ತಾ. ತ್ಯಾ ಎಕಾ ರಾತಿಂ ಆವಯ್ಚಿ ಪಿಡಾ ವಿಷಮ್ ಸ್ಥಿತೆಕ್ ಪಾವ್ತಾ. ತಿ ಭುರ್ಗ್ಯಾಂಕ್ ಲಾಗಿಂ ಅಪಯ್ತಾ. ಚಡ್ ಜಾವ್ನ್ ಗ್ರೆಟ್ಟಾಕ್ ತಿಚಾ ಲಾಗ್ಸಾರ್ ಬಸವ್ನ್ ತಿ ಕುಡ್ಕ್ಯಾ ಕುಡ್ಕ್ಯಾ ಉತ್ರಾಂನಿ ಉಲಯ್ತಾ. "ಪುತಾ ಗ್ರೆಟ್ಟಾ, ತುವೆಂ ಎದೊಳ್ಚ್ ತುಜಾ ಭಾಂವ್ಡಾಂ ಖಾತಿರ್ ಮ್ಹಜೆಂ ಸ್ಥಾನ್ ಘೆತ್ಲಾಂಯ್. ಹ್ಯಾ ಫ಼ುಡೆಂಯೀ ತೆಂ ಸ್ಥಾನ್ ಘಟ್ ಕರ್. ತುಜಾ ಭಯ್ಣಿಚೊ ಫ಼ುಡಾರ್ ತುಜಾ ಹಾತಾಂತ್ ಆಸಾ.." ತಿ ತಕ್ಲಿ ಆಡ್ ಘಾಲ್ತಾ. ಆವಯ್ಚಾ ಮರ್ಣಾ ಉಪ್ರಾಂತ್ ಗ್ರೆಟ್ಟಾಕ್ ಆಪ್ಲ್ಯಾ ಕಾನಾಂಕ್ ಸಿಶೆಂ ಚೆಪಿಯಾಂಶೆ ಭಗ್ತಾ. ಕಿತ್ಯಾಕ್ ಹಾಡ್ ನಾತ್ಲ್ಲ್ಯಾ ಜಿಬಾಂನಿ ನಾನಾಂತ್ಯೊ ಖಬ್ರೊ ಉಲಂವ್ಚೆಂ ತಾಕಾ ಆಯ್ಕತಾ.
"ತ್ಯಾ ಹಿಂದ್ವಾಂಚಾ ಸಾಂಗಾತಾ ಮಿರವ್ನ್ ಭಯ್ಣಿಕ್ ಸೈರಿಕ್ ಯೇನಾಸ್ತಾಂ ಆವಯ್ನ್ ಖಂತಿನ್ ಕರ್ಗೊನ್ ಪ್ರಾಣ್ ಸೊಡ್ಲೊ..."
ಪುಣ್ ಕೊಣೀಂ ಸಾಂಗಾನಾಂತ್ಕೀ ಬಾಪಾಯ್ಚಾ ಮರ್ಣಾ ಉಪ್ರಾಂತ್ ಎಕಾ ಚೆಡ್ಯಾ ಪುತಾಪರಿಂ ಘರ್ ಸಾಂಬಾಳ್ನ್ ಭಾಂವ್ಡಾಂಚಾ ಫ಼ುಡಾರಾ ಖಾತಿರ್ ಒದ್ದಾಡುನ್ ತಾಂಚೆ ಖಾತಿರ್ಚ್ ಆಪ್ಲಿ ಜಿಣಿ ಝರವ್ನ್ ಫ಼ುಡಾರಾಕ್ ಕುರಾಡ್ ಮಾರುನ್ ಮಾರುನ್ ಕಾಳ್ಜಾಂತ್ಲ್ಯಾ ಮೊಗಾಕ್ ಯೆದೊಳ್ ಫ಼ುಮಾರ್ ಕರುಂಕ್ ಅತ್ರೆಗ್ತಾ ಮ್ಹಣ್, ತರೀ ತೆಂ ಹೆಂ ಸರ್ವ್ ಉಲವ್ಣೆಂ ನವಿನಾ ಖಾತಿರ್ ಸೊಸ್ತಾ.
ಅಚಾನಕ್ ಭಯ್ಣಿಕ್ ಚಿಕ್ಮಗ್ಳುರ್ಚಿ ಬರಿ ಸೈರಿಕ್ ಯೆತಾ. ದೋತ್ ಚಡ್ ಮಾಗ್ತಾತ್ ತರೀ ಗ್ರೆಟ್ಟಾನ್ ಕಾಜಾರ್ ಘಳಾಯೆವಿಣೆ ಕೆಲೆಂ. ಆತಾಂ ತಾಚಾ ಮಾತ್ಯಾ ವಯ್ಲೊ ಭರ್ ದೆಂವ್ಲ್ಲೊ. ಆನಿ ಆಸ್ಚೊ ಏಕ್ ಭಾವ್, ತಾಕಾ ಹಳ್ತಾಚಾ ಸಾಂಬಾಳಾಚೆಂ ಕಾಮ್ ಆಸಾ. ಘರ್ದಾರ್ ಆನಿಂ ಹಳ್ತಾಚೆಂ ಹಳ್ತಾಚೆಂ ಮಾಡಿಯೆಚೆಂ ತೋಟ್ ಆಸಾ. ಜೀವನಾಕ್ ಕಾಂಯ್ ಕಷ್ಟ್ ಜಾಂವ್ಚೆನಾಂತ್ ಮ್ಹಣ್ ಲೆಕ್ಲ್ಲ್ಯಾ ಗ್ರೆಟ್ಟಾನ್ ಆತಾಂ ಕಾಜಾರ್ ಜಾಂವ್ಕ್ ಚಿಂತ್ಲೆಂ, ವ್ಹಡ್ ಭಯ್ಣ್ ಜಾವ್ನ್ ಘರ್ಚೊ ಹಾರ್ಭಾರ್ ಖಾಂದ್ಯಾರ್ ವಾವವ್ನ್ ಭಾಂವ್ಡಾಂಚೊ ಫ಼ುಡಾರ್ ನಂದನ್ ಕರುನ್ ಸಂತೊಸಾಚೊ ಸ್ವಾಸ್ ಸೊಡ್ತಾನಾ ತಾಚಿ ಪ್ರಾಯ್ ಪಾಂತೀಸಾಂಕ್ ಪಾವ್ಲ್ಲಿ. ತರಿಪಿಣ್ ನವಿನಾಚೆರ್ ಆಸ್ಲ್ಲೊ ಕಾಳ್ಜಾಂತ್ಲೊ ಮೋಗ್ ನಿವೊಂಕ್ ನಾತ್ಲ್ಲೊ. ತಶೆಂಚ್ ನವಿನಾನ್ಯೀ ಗ್ರೆಟ್ಟಾ ಖಾತಿರ್ ಕಾಳ್ಜಾಂತ್ಲೊ ಮೋಗ್ ಸಾಂಬಾಳ್ನ್ ದವರ್ಲ್ಲೊ. ತೆಂ ನವಿನಾಕ್ ಮೆಳೊನ್ ಆಪ್ಲಿ ಜವಾಬ್ದಾರಿ ಸಂಪ್ಲಿ ಮ್ಹಾಲ್ಘಡೆಂ ಜಾವ್ನ್ ಮ್ಹಜೆಂ ಕರ್ತವ್ಯ್ ತಿರ್ಸಾಲೆಂ, ಫ಼ುಡೆಂ ಅಪ್ಲ್ಯಾ ಕಾಜಾರಾ ವಿಶ್ಯಾಂತ್ ಸಮೊಡ್ತೆಕ್ ಸೆರ್ವೊಂಕ್ ಸಲ್ಹಾ ದಿತಾನಾ ತೊ ಖುಶೇನ್ ಒಪ್ಲೊ.
ನವಿನಾಕ್ ಜಾಲ್ಲೊ ಸಂತೊಸ್ ವರ್ಣುಂಕ್ ಅಸಾಧ್ಯ್. ನಿಮಾಣೊ ತರೀ ಆಮ್ಚಾ ಕಾಳ್ಜಾಂತ್ಲೊ ಮೋಗ್ ಎಕಾಮೆಕಾ ಘಡ್ಸೊಂಚಿ ಘಡಿ ಲಾಗಿಂ ಆಯ್ಲಿ ನ್ಹಯ್ಗೀ ಮ್ಹಣ್ ತೊ ಆತುರ್ಲೊ. ಹ್ಯಾ ಖಾತಿರ್ ವಿಗಾರಾ ಮುಖಾರ್ ತಾಕಾ ಹಾಡ್ಲೊ. ವಿಗಾರಾನ್ ತಾಚಿ ಪರಿಕ್ಶಾ ಕೆಲಿ. ಪುಣ್ ಸಮೊಡ್ತಿಚಿ ದೊತೊರ್ನ್ ಗ್ರೆಟ್ಟಾನ್ ತಾಕಾ ಎದೊಳ್ಚ್ ಶಿಕಯಿಲ್ಲ್ಯಾನ್ ಕ್ರಿಸ್ತಾಂವ್ ಸಮೊಡ್ತಿಚೆ ಕಾಯ್ದೆ ರೀತ್ ತೊ ಸರ್ವ್ ಜಾಣಾಂ ಜಾಲ್ಲ್ಯಾನ್ ಎಕಾ ಸಕಾಳಿಂಚಾ ಅದೇಸಾರ್ ವಾಡ್ಯಾಚಾ ಗುರ್ಕಾರಾ ಸಮೊರ್ ನವಿನಾನ್ ಕ್ರಿಸ್ತಾಂವ್ ಧರ್ಮ್ ಸ್ವೀಕಾರ್ ಕೆಲೊ. ನಾಂವ್ ತಾಚೆಂ ನವಿನ್ ಮ್ಹಣ್ ಉರಯ್ಲೆಂ ತರ್ಯೀ ಆಲ್ಕುಂಜ್ ಮಾತ್ಯಾರ್ ವಾತ್ ಧರ್ಲ್ಲ್ಯಾ ಪೊದೊರ್ನಿಚೆ, ಮ್ಹಣ್ಜೆ ಘುರ್ಕಾರಾಚೆಂ ’ಕೊನ್ಸೆಸೊ’ ಮ್ಹಣ್ ದವರ್ಲೆಂ.
ಆತಾಂ ಗ್ರೆಟ್ಟಾ-ನವಿನಾಚಿ ವಾಟ್ ನಿತಳ್ ಜಾಲ್ಲಿ. ತಾಂಚಾ ಕಾಳ್ಜಾಂತ್ಲ್ಯಾ ಮೊಗಾಕ್ ಘಡ್ಸೊಂಕ್ ಹರ್ಕತ್ ನಾತ್ಲ್ಲಿ. ತಿಂ ಸಂತೊಸಾನ್ ಫ಼ುಮಾರ್ ಜಾಲಿಂ. ಆನಿಂ ವೆಗಿಂಚ್ ಕಾಜಾರಾಚಾ ತಯಾರಾಯೆರ್ ಉಲವ್ಣೆಂ ಕರಿಲಾಗ್ಲಿಂ. ತ್ಯಾ ಹಾಪ್ತ್ಯಾಂತ್ಲ್ಯಾ ಎಕಾ ರಾತಿಂ ಭಾವ್ ವ್ಹಡ್ ಭಯ್ಣಿಲಾಗಿಂ ಮಂತ್ರಾಂ ಘಾಲಿಲಾಗ್ಲೊ.
"ಬಾಯೆ ಹಾವೆಂ ಅಫ಼ಿಸಾಂತ್ಲ್ಯಾ ಎಕಾ ಟೈಪಿಸ್ಟ್ ಚಲಿಯೆಚೊ ಮೋಗ್ ಕೆಲಾ, ಆನಿ ತೆಂಯ್ ಮ್ಹಜೆ ಶಿವಾಯ್ ಕಾಜಾರ್ ಜಾಯ್ನಾಂ ಮ್ಹಣ್ತಾ. ಮ್ಹಾಕಾ ತಾಚೆಲಾಗಿಂ ಕಾಜಾರ್ ಜಾಂವ್ಕ್ಜಾಯ್" ’ಹೆಂಯೀ ಬರ್ಯಾಕ್ಚ್ ದೆವಾನ್ ಕರ್ಚೆಂ..’ ಗ್ರೆಟ್ಟಾನ್ ಚಿಂತ್ಪ್ಲೆಂ. ತಾಣೆಂ ತಾಚಾ ಕಾಜಾರಾಚಿ ಮಾಂಡಾವಳ್ ನವಿನಾಕ್ ಒಪ್ವಾವ್ನ್ ಸದ್ದ್ಯಾಕ್ ಪಾಟಿಂ ಘಾಲಿ. ಆನಿ ಭಾವಾಚೆಂ ಕಾಜಾರ್ ಕೆಲೆಂ. ಆನಿ ಕಸಲಿಚ್ ಅಡ್ಕಳ್ ಗ್ರೆಟ್ಟಾಕ್ ಉರೊಂಕ್ ನಾತ್ಲ್ಲಿ.
ತ್ಯಾ ಎಕಾ ಭಾಗಿ ದಿಸಾ ’ಗ್ರೆಟ್ಟಾ-ನವಿನ್ ಕೊನ್ಸೆಸೊ’ ಬೊಂದೆಲ್ಚಾ ಸಾಂ.ಲೊರೆಸಾಚಾ ಆಲ್ತಾರಿ ಹುಜ್ರಿಂ ಸಮೊಡ್ತೆಚಾ ಕಾಯ್ದ್ಯಾ-ಕಾನುನಾಂಕ್ ಅನುಸಾರ್ ಜಾವ್ನ್ ಸಾದ್ಯಾ ರಿತಿರ್ ಸಾತ್ವ್ಯಾ ಸಾಕ್ರಾಮೆಂತಾಂತ್ ಎಕ್ವಟೊನ್ ಸಮಾಜೆಚಾ ನಂಜೆಕ್, ಅಡೂಕ್ ಸತಾಕ್ ನಿತಿಚಿ ವಾತ್ ಪೆಟಯ್ಲಾಗ್ಲಿಂ.
ಕಾಳ್ಜಾಂತ್ಲೊ ಮೋಗ್ ಜಯ್ತೆವಂತ್ ಜಾಲ್ಲೊ!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
