ಕೈಕಂಬ!

ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"

Placeholder: the original page gave this picture no description, and none has been written yet. It came from daaiz\daaiz\articles\gd2.asp.

ಮ್ಹಜೊ ಸಾಹಿತಿಕ್ ಗುರು.... ಮಾನೆಸ್ತ್ ಕ್ಲೆರೆನ್ಸ್ ಕೈಕಂಬ!

- ಜೆರಿ ಡಿ’ಮೆಲ್ಲೊ, ಬೆಂದುರ್[ಮಸ್ಕತಾಂತ್ಲ್ಯಾ

ಹರ್ಯೆಕಾ ಕೊಂಕ್ಣಿ ಲೊಕಾಂಕ್ ಜೆರಿ ಡಿ’ಮೆಲ್ಲೊ ವಳ್ಕೆಚೊ, ಆಜ್‌ಕಾಲ್ ತೊ ಪಯ್ಸಿಲ್ಯಾ ಕೆನಡಾಂತ್ ವಸ್ತಿ ಕರುನ್ ಆಸಾ ತರ್‌ಯೀ, ತಾಚ್ಯಾ ಕಾಳ್ಜಾಂತ್ ಕೊಂಕ್ಣಿ ತಶೆಂಚ್ ಕೊಂಕ್ಣಿ ಲೊಕಾಂಚೊ ಮೋಗ್ ಅಜೂನ್ ತೊಚ್ಚ್ ಮ್ಹಣ್ಚ್ಯಾಕ್ ಹಿಂ ತಾಚಿಂ ಉತ್ರಾಂ ಗೊವಾಯ್ ದಿತಾತ್. ಕೊಂಕ್ಣಿ ಸಂಗೀತ್ ಶೆತಾಕ್ ಹಾಚಿ ದೇಣ್ಗಿ ವರ್ತಿ, ಪುಣ್ ಪರ್ದ್ಯಾ ಪಾಟ್ಲ್ಯಾನ್. ತೆಚ್ಚ್‌ಪರಿಂ ಕೊಂಕ್ಣಿ ವಾವ್ರಾಕ್, ಕೊಂಕ್ಣಿ ಸಾಹಿತ್ಯಾಕ್ ಸಯ್ತ್ ಹಾಣೆಂ ದೇಣ್ಗಿ ದಿಲ್ಯಾ ]

ಮ್ಹಜ್ಯಾ ಕಾಳ್ಜಾ ಆಲ್ತಾರಿರ್ ಹಾಂವೆಂ ಧುಂಪವ್ನ್ ಪುಜಾ ಕರ್ಚೊ... ಮ್ಹಜೊ ಸಾಹಿತಿಕ್ ಗುರು.... ಮಾನೆಸ್ತ್ ಕ್ಲೆರೆನ್ಸ್ ಕೈಕಂಬ!

ಕೊಂಕ್ಣಿ ಸಾಹಿತಿಕ್ ಶೆತಾಂತ್ ಭಾಂಗ್ರಾಳಿ ಪೀಕ್ ಲುಂವ್ಚ್ಯಾ ದಿಶೆನ್ ಭರ್ಮಾಚಿಂ ಮೆಟಾಂ ಕಾಡುನ್ ಆಸ್ಚ್ಯಾ ’ದಾಯ್ಜ್’ ಜಾಳಿಜಾಗ್ಯಾರ್ ’2007 ವರ್‍ಸಾಚೊ ಕಾಣ್ಯೆಗಾರ್’ ಜಾವ್ನ್ ಮಾನೇಸ್ತ್ ಕ್ಲೆರೆನ್ಸ್ ಪಿಂಟೊ ಕೈಕಂಬ ವಿಂಚೊನ್ ಆಯಿಲ್ಲಿ ಖಭಾರ್ ಆಮ್ಕಾಂ, ತಾಚ್ಯಾ ಸಾಹಿತಿಕ್ ಅಭಿಮಾನಿಂಕ್ ಸಂತೊಸಾಚಿ ಖಿರ್ ಖಾವಯ್ತಾ ಆನಿ ಆಮ್ಚ್ಯಾ ಕಾಳ್ಜಾಂನಿ ಉಲ್ಲಾಸಾಚೆ ಖಜ್ನೆ ಫುಟ್ತಾತ್. ಅಸಲೊ ವ್ಹರ್‍ತೊ ಗೌರವ್ ಫಾವೊ ಜಾಲ್ಲ್ಯಾ ಆಮ್ಚ್ಯಾ ಮೊಗಾಳ್ ಕ್ಲೇರಿಕ್ ಕಾಳ್ಜಾ ಗುಂಡಾಯೆ ಥಾವ್ನ್ ರಾಸ್ ರಾಸ್ ಪರ್‍ಬಿಂ.

ಸಭಾರ್ ವಿಂಚ್ಣಾರ್ ತಾಲೆಂತಾಂಚೊ ಪುಂಜೊ ಜಾವ್ನ್ ಆಸ್ಚ್ಯಾ ಕ್ಲೆರೆನ್ಸ್ ಕೈಕಂಬ ಹಾಣೆಂ ಕೊಂಕ್ಣಿ ಭಾಸ್, ಕಲಾ ಆನಿಂ ಸಂಸ್ಕ್ರತೆಚ್ಯಾ ಹರ್ ಪ್ರಕಾರಾಂನಿ ವಾಟಾರ್‌ಲ್ಲಿ ಮತ್ ಆನಿ ಜಿರಯಿಲ್ಲಿ ಸಕತ್ ಖಂಡಿತ್ ಜಾವ್ನ್ ಅಪರಿಮಿತ್. ನವೊಚ್ ಕಾಜಾರಿ ಆಪ್ಲ್ಯಾ ಸುಹಾಗ್ ರಾತಿಂ ವ್ಹೊಕ್ಲೆಕ್ ಖಾಟಿಯೆರ್ ಸೊಡ್ನ್ ಕೊಂಕ್ಣಿಚ್ಯಾ ಮೊಗಾನ್ ಆನಿ ಅಭಿಮಾನಾನ್ ತಿಚ್ಯಾ ಪಾಟ್ಲ್ಯಾನ್ ಧಾಂವ್ಚ್ಯಾ ಕಾಲೆತಿಚೊ... ಬಾಬ್ ಕ್ಲೆರೆನ್ಸ್. ಕೊಂಕ್ಣಿ ಭಾಸೆಚೊ ಮೋಗ್ ತಾಚ್ಯಾ ಕುಡಿಚ್ಯಾ ಶಿರಾಂ-ಶಿರಾಂನಿ ವ್ಹಾಳ್ತಾ. ಉಂಚ್ಲ್ಯಾ ತಾಲೆಂತಾಂಚೊ ವ್ಹಡ್ ಹಾಂಡೊ ತೊ ತರೀ ತಾಚೆಂ ಸಾದೆಂಪಣ್ ಆನಿಂ ಖಾಲ್ತೆಂಪಣ್ ಭೋವ್ ಉಂಚಾಯೆಚೆಂ. ಅಸಲೊ ಮಹಾನ್ ವೆಕ್ತಿ ಮ್ಹಜೊ ಆಪ್ತ್ ಮಿತ್ರ್ ಜಾವ್ನ್ ದೆವಾನ್ ಮ್ಹಾಕಾ ಮ್ಹಜ್ಯಾ ಜಿಣಿಯೆಂತ್ ಫಾವೊ ಕೆಲ್ಲೆಂ ಏಕ್ ವ್ಹರ್‍ತೆಂ ದೆಣೆಂ. ಕ್ಲೆರೆನ್ಸಾವಿಶಿಂ ಸವಿಸ್ತಾರ್ ವಳೊಕ್ ದಿಂವ್ಚಿ ಸಕತ್ ಮ್ಹಜ್ಯಾ ತಿಂತೆರಾಂತ್ ನಾಂ ಮ್ಹಳ್ಳೆಂ ಸತ್ ಹಾಂವ್ ಉಚಾರುನ್ ಸಾಂಗ್ತಾಂ. ತರೀ ದಾಯ್ಜ್ ಜಾಳಿಜಾಗ್ಯಾರ್ ವರ್‍ಸಾಚೊ ಶ್ರೇಷ್ಟ್ ಕಾಣ್ಯೆಗಾರ್ ಜಾವ್ನ್ ವಿಂಚುನ್ ಆಯಿಲ್ಲ್ಯಾ ಭಾಗಿ ಸಂದರ್ಬಾರ್ ಹ್ಯಾ ಮಾನೆಸ್ತಾಚಿ ವಳ್ಕೆ-ಝಳಕ್ ದಿಂವ್ಚೆಂ ಮ್ಹಜೆಂ ಹೆಂ ಖಾಲ್ತೆಂ ಚಾನಿಯೆ ಪ್ರೇತನ್.

ಸುರ್‍ವಿಲಿಂ ಮೆಟಾಂ... ಪ್ರಗತೆಚ್ಯಾ ವಾಟೆರ್...

ಸರ್‍ವೆಸ್ಪರಾ ದೆವಾನ್ ಫಾವೊ ಕೆಲ್ಲಿಂ ಧಾ ತಾಲೆಂತಾಂ ವಾಟಾರ್‍ನ್ ಚಡಿತ್ ಧಾ ತಾಲೆಂತಾಂ ಆಪ್ಣಾಯಿಲ್ಲೊ, ಕೊಂಕ್ಣಿ ಸಾಹಿತ್ಯಾಂತ್ ಮಟ್ವ್ಯಾ ಕಾಣಿಯಾಂಚೊ ರಾಯ್ ಮ್ಹಣ್ ನಾಂವಾಡ್ಲಲೊ ಕೊಂಕ್ಣಿ ಮಾಯೆಚೊ ಸುಪುತ್ರ್ ಜಾವ್ನಾಸಾ ಗುರ್‍ಪುರ್ ಕೈಕಂಬಾಚೊ... ಮಾನೆಸ್ತ್ ಕ್ಲೆರೆನ್ಸ್ ಡೊನಾಲ್ದ್ ಪೀಂತ್! "ಕ್ಲೆರೆನ್ಸ್ ಕೈಕಂಬ" ಲಿಖ್ಣೆಂ ನಾಂವಾಖಾಲ್ ಪಾಟ್ಲ್ಯಾ ತೀಸ್ ವರ್‍ಸಾಂ ಥಾವ್ನ್ ಕೊಂಕ್ಣಿ ಸಾಹಿತ್ಯಾಚ್ಯಾ ಹರ್ ಪ್ರಕಾರಾನಿಂ ಆಪ್ಲಿ ಲಿಖ್ಣಿ ಝರವ್ನ್ ಕೊಂಕ್ಣಿ ಸಾಹಿತ್ಯ್ ಪ್ರೇಮಿಂಚಾ ಕಾಳ್ಜಾ-ಮನಾಂನಿ ಆಪ್ಲ್ಯಾ ವಳ್ಕೆಚಿ ಮ್ಹೊರ್ ಛಾಪ್‌ಲ್ಲೊ ಹೊ ಮಾನೇಸ್ತ್ ದೆ| ದೆನಿಸ್ ಫ್ರಾನ್ಸಿಸ್ ತಶೆಂ ಆಲಿಸ್ ಪೀಂತ್ ಹಾಂಚ್ಯಾ ಪಾಂಚ್ ಜಣಾಂ ಭುರ್‍ಗ್ಯಾಂ ಪಯ್ಕಿ ನಿಮಾಣೊ.

$Placeholder: the original page gave this picture no description, and none has been written yet. It came from daaiz\daaiz\articles\gd2.asp.$ $Placeholder: the original page gave this picture no description, and none has been written yet. It came from daaiz\daaiz\articles\gd2.asp.$

[ಪ್ರಕಾಶಕಿ ಬಾಯ್ ಜೇನ್ ಐಡಾ ಪಿಂಟೊ ಆನಿ ಸಾಹಿತಿ ಬಾಬ್ ಕ್ಲೆರೆನ್ಸ್ ಪಿಂಟೊ]

ಆಪುಣ್ ಪಾಂಚ್ವೆಂತ್ ಶಿಕೊನ್ ಆಸ್ತಾನಾ ’ರಾಕ್ಣೊ’ ನಾಟಕ್ ಸ್ಪರ್ದ್ಯಾಕ್ ನಾಟಕ್ ಬರವ್ನ್ ಧಾಡುನ್ ಕೊಂಕ್ಣಿ ಸಾಹಿತ್ಯಾಚ್ಯಾ ಹುಂಬ್ರಾರ್ ಪಾಯ್ ದವರ್‌ಲ್ಲಿ ರೀತ್ ತಾಚಾ ಹುಮೆದಿಚೆಂ ಆನಿಂ ತಾಲೆಂತಾಂಚೆಂ ಮುಃಖ್ ಆಮ್ಕಾಂ ದಾಕಯ್ತಾ. ಕೊಂಕ್ಣಿ ಬರ್‍ಪಾಂತ್ ಅಪೂರ್ವ್ ಶೈಲಿ ಆಪ್ಣಾವ್ನ್ ತವಳ್ ಥಾವ್ನ್ ಆಜ್ ಪರ್‍ಯಾಂತ್ ಕೊಂಕ್ಣಿಂತ್ಲ್ಯಾ ಚಡಾವತ್ ಸರ್‍ವ್ ಹಾಪ್ತ್ಯಾಳ್ಯಾನಿಂ, ಮಹಿನ್ಯಾಳ್ಯಾನಿಂ, ಜಾಳಿ-ಜಾಗ್ಯಾಂನಿ ಆಪ್ಲಿಂ ಕುರ್ಕುರಿತ್ ಬರ್‍ಪಾಂ ವ್ಹಾಳಯಿಲ್ಲ್ಯಾ ಕ್ಲೆರೆನ್ಸಾನ್ ತಿನ್ಶ್ಯಾಂ ವಯ್ರ್ ಮಟ್ವ್ಯೊ ಕಾಣಿಯೊ, ಪಾಂಚ್ ಕಾದಂಬರಿಯೊ, ಪನ್ನಾಸಾಂ ವಯ್ರ್ ಕವಿತಾ ಕೊಂಕ್ಣಿ ಮಾತೆಚ್ಯಾ ಸಾದ್ಯಾರ್ ಸೊಭಯ್ಲ್ಯಾತ್. ತಾಚ್ಯಾ ’ಯೆಮ್ಕೊಂಡಾಚಿಂ ಮೆಟಾಂ’ ಕಾದಂಬರಿಕ್ 1980 ಇಸ್ವೆಂತ್ ಲಾಭ್‌ಲ್ಲಿ ಗೊಂಯ್ ಸಾಹಿತ್ಯ್ ಅಕಾದೆಮಿಚಿ ಪ್ರಶಸ್ತಿ ಕ್ಲೆರೆನ್ಸಾಚಾ ಲಿಖ್ಣೆಚ್ಯಾ ಧಾರಿಕ್ ಆನಿಂ ಉಂಚ್ಲ್ಯಾ ಸಾಹಿತ್ಯ್ ಮಟ್ಟಾಕ್ ಏಕ್ ಜಿವಿ ಸಾಕ್ಸ್ ಜಾವ್ನಾಸಾ. 2006 ವರ್‍ಸಾಂತ್ ಜೇನ್ ಪ್ರಕಾಶನಾದ್ವಾರಿಂ ಪ್ರಕಟ್ ಜಾಲ್ಲೊ ತಾಚೊ ಪಯ್ಲೊ ಕಾಣಿಯಾಂ ಪೆಳೊ ಖಂಡಿತ್ ಜಾವ್ನ್ ಕೊಂಕ್ಣಿ ಸಾಹಿತ್ಯ್ ಭಂಡಾರಾಂತ್ ಪರ್ಜಳ್ಚೆಂ ಅಪೂರ್ವ್ ಮೊತಿಂ. (ಕ್ಲೆರೆನ್ಸ್ ಕೈಕಂಬಾಚಿ ಸಂಪೂರ್ಣ್ ಸಾಹಿತಿಕ್ ವಳೊಕ್ ವಾಚಾ.)

ಗಲ್ಫಾಂತ್ಲ್ಯಾ ರೆಂವೆರ್... ಕೊಂಕ್ಣಿಂ ಬೆಳೆಂ... :-

ಮಸ್ಕತ್ ತಸಲ್ಯಾ ಖಾಡಿ ಗಾಂವಾಂತ್ ಕೊಂಕ್ಣಿ ಭಿಂ ವೊಂಪುನ್ ಭಾಂಗ್ರಾಳೆಂ ಪೀಕ್ ಲುಂವ್‌ಲ್ಲಿ ಕೀರ್‍ತ್ ಮಾನೇಸ್ತ್ ಕ್ಲೆರೆನ್ಸಾಚಿ. ಕೊಂಕ್ಣಿ ಥಂಯ್ ನಿರಂತರಿ ವ್ಹಾಳ್ಚ್ಯಾ ತಾಚಾ ಹುಮೆದಿಚ್ಯಾ ಝರಿಂತ್ ಖಿರ್ಲಾಲ್ಲೆಂ ಮಸ್ಕತಾಂತ್ಲೆಂ ಕೊಂಕ್ಣಿ ಲೇಖಕಾಂಚೆಂ ಸಂಘಟನ್ - "ಬರ್‍ಪಿ ಮಿತ್ರ್ ಮಸ್ಕತ್" ಹಾಚೊ ತೊ ಸ್ಠಾಪಕ್ ತಶೆಂ ಪ್ರಸ್ತುತ್ ಸಂಚಾಲಕ್. ಕ್ಲೆರೆನ್ಸ್ ಫಕತ್ತ್ ಏಕ್ ಕೊಂಕ್ಣಿ ಲಿಕ್ಪಿ ಮಾತ್ರ್ ನ್ಹಯ್ ಬಗಾರ್ ತೊ ಏಕ್ ಕೊಂಕ್ಣಿ ಲೇಖಕಾಂಕ್ ರಚ್ಚೊ ಲೇಖಕ್ ಮ್ಹಣೊನ್ ಖಾಲ್ತ್ಯಾಪಣಾನ್ ಮಾಂದ್ತಾತ್ ’ಬರ್‍ಪಿಮಿತ್ರ್’ ಸಾಂದೆ. ಮ್ಹಜ್ಯಾ ಕಾಳ್ಜಾ ಆಲ್ತಾರಿರ್ ಹಾಂವೆಂ ಧುಂಪವ್ನ್ ಪುಜಾ ಕರ್‍ಚೊ ಮ್ಹಜೊ ಸಾಹಿತಿಕ್ ಗುರು ’ಕ್ಲೆರೆನ್ಸ್ ಕೈಕಂಬ’ ತಸಲ್ಯಾ ಮಹಾನ್ ಕೊಂಕ್ಣಿ ವೊಡಾ ರುಕಾಚಿ ಸಾವ್ಳಿ ಥೊಡ್ಯಾಚ್ ಕಾಳಾಕ್ ಆರಾವ್ನ್ ಹಾಂವೆಂ ಸಾಹಿತಿಕ್ ಗಿರೆಸ್ತ್‌ಕಾಯ್ ಆಪ್ಣಾಯ್ಲ್ಯಾ ತರ್... ತಾಚ್ಯಾ ಸಾವೊಟಾಂತ್ ಚಡ್ ಕಾಳ್ ಜಿಯೆಂವ್ಚೆಂ ಭಾಗ್ ಮ್ಹಾಕಾ ಲಾಭ್‌ಲ್ಲೆಂ ತರ್..!!!

[ಮಸ್ಕತಾಂತ್ಲೆಂ ಬರ್ಪಿ ಮಿತ್ರ್ - ಸಂಖ್ಯಾನ್ ಥೊಡಿಂಚ್ ತರ್‌ಯೀ ಕೊಂಕ್ಣಿ ಸ್ಪಿರಿತಾಂತ್ ಭೋವ್ ಮುಖಾರ್]

ತೊ ಏಕ್ ಬುಧ್ವಂತ್ ಆನಿಂ ನವೆಸಾಂವ್ ಹಾಡ್ಚೊ ಮಾನಾಯ್. ಅಪುಟ್ ಕೊಂಕ್ಣಿಂತ್ ಪ್ರಸಾರ್ ಜಾಂವ್ಚೊ ಪಯ್ಲೊ ಜಾಳಿಜಾಗೊ ’ಮಾಯ್‌ಬಾಸ್.ಕೊಮ್’ ಹಾಚೆರ್ ವ್ಹಾಳ್ಚೆಂ ತಶೆಂಚ್ ಕೊಂಕ್ಣಿ ಚರಿತ್ರೆಂತ್ ನವೆಂಸಾಂವ್ ಹಾಡುಂಕ್ ಸಕ್‌ಲ್ಲೆಂ ಬರ್‍ಪಿಮಿತ್ರಾನಿಂ ಸಾದರ್ ಕರ್‍ಚೆಂ ಲೊಕಾಮೊಗಾಳ್ ಅಂಕಣ್ ’ತಿಂತೆರ್’ ಹಾಚೊ ಪಾಟಿಚೊ ಕಣೊ ಜಾವ್ನಾಸಾ ಮಾನೆಸ್ತ್ ಕ್ಲೆರೆನ್ಸ್. ಅಖ್ಖ್ಯಾ ಕೊಂಕ್ಣಿ ಸಂಸಾರಾಂತ್ ನಾಂವ್ ವೆಲ್ಲೊ 2001 ಇಸ್ವೆಂತ್ ಮಸ್ಕತಾಂತ್ ’ಎಂ.ಸಿ.ಸಿ.ಪಿ.’ಚ್ಯಾ ಬೊಂದೆರಾಖಾಲ್ ಪನ್ನಾಸಾಂ ವಯ್ರ್ ಪ್ರಾಂತೀಯ್ ಕಲಾಕಾರಾಂ ಥಾವ್ನ್ ಸಾದರ್ ಜಾಲ್ಲೊ ’ಕೊಂಕ್ಣಿ ಉತ್ಸವ್’ ಆಸಾ ಕರುಂಕ್ ಸುಚಾವ್ ದಿಲ್ಲಿ ಕ್ರಿಯಾತ್ಮಕ್ ತಕ್ಲಿ ಜಾವ್ನಾಸಾ ಕ್ಲೆರೆನ್ಸ್ ಕೈಕಂಬಾಚಿ! ಮಸ್ಕತಾಂತ್ ಕೊಂಕ್ಣಿಚೆಂ ಭಿಂ ರೊಂವ್ಚ್ಯಾಕ್ ಆನಿಂ ತಾಚೊ ಪೋಸ್ ಕರ್ಚ್ಯಾಕ್ ಕ್ಲೇರಿಚೊ ಪಾತ್ರ್ ವಿಶೇಷ್ ಜಾವ್ನಾಸಾ.

[(ದಾವ್ಯಾಕ್:) ಫುಡ್ಲದ್ ಮಟ್ವ್ಯಾ ಕಾಣ್ಯಾಂಚೊ ಜಮೊ ’ಸುಟ್ಕಾ’ ಮೊಕ್ಳೀಕ್ ಜಾತಾನಾ, (ಉಜ್ವ್ಯಾಕ್:) ಮಾನೆಸ್ತ್ ಹೆನ್ರಿ ಡಿ’ಪಾವ್ಲಾಸವೆಂ]

ತೀನ್ "ಝೆಲೊ" ಗಲ್ಫ್ ವಿಶೇಷ್ ಅಂಖೆ ಆನಿಂ ಏಕ್ ’ಕಾಣಿಕ್’ ವಿಶೇಷ್ ಅಂಕ್ಯಾಚೊ ಗೌರವ್ ಸಂಪಾದಕ್ ಜಾವುನ್ ಕ್ಲೆರೆನ್ಸಾನ್ ದಿಲ್ಲೊ ವಾವ್ರ್ ಕೊಂಕ್ಣಿ ಸಮಾಜ್ ಕೆದಿಂಚ್ ವಿಸ್ರೊಂಚಿನಾಂ.

ವಿಂಚ್ಣಾರ್ ತಾಲೆಂತಾಂಚೊ... ಅಮೊಲಿಕ್ ಪುಂಜೊ... :-

ಕ್ಲೆರೆನ್ಸ್ ಫಕತ್ತ್ ಲಿಕ್ಪಿ ಆನಿಂ ಕವಿ ನ್ಹಯ್ ಆಸ್ತಾಂ ಏಕ್ ಬರೊ ಸಂಘಟಕ್ ತಶೆಂ ಉತ್ತೀಮ್ ವಾಗ್ಮಿ ಜಾವ್ನಾಸಾ ಆನಿಂ ಹ್ಯಾ ತಾಚ್ಯಾ ತಾಲೆಂತಾ ವರ್ವಿಂಚ್ ತಾಣೆಂ ಅಂತರಾಷ್ತ್ರೀಯ್ ಖ್ಯಾತೆಚ್ಯಾ "ಟೋಸ್ಟ್ ಮಾಸ್ಟರ್‍ಸ್ ಇಂಟರ್‌ನ್ಯಾಶನಲ್" ಹಾಚೊ ಉಪಾಧ್ಯಕ್ಶ್ ಆನಿಂ ಲೆಫ್ಟಿನೆಂತ್ಟ್ ಗವರ್‍ನರ್ ಜಾವುನ್ ಸೆವಾ ದಿಲ್ಯಾ. ಕ್ಲೆರೆನ್ಸಾನ್ ಟೋಸ್ಟ್ ಮಾಸ್ಟರ್‍ಸ್ ಇಂಟರ್‌ನ್ಯಾಶನಲ್ ಹಾಚೆಂ ಮಹಿನ್ಯಾಚೆಂ ಪತ್ರ್ ’ಎಕ್ಸ್‌ಪ್ರೆಶನ್ಸ್’ ಹಾಚೊ ಸಂಪಾದಕ್ ಜಾವುನ್ ಇಂಗ್ಲಿಶ್ ಭಾಶೆಂತ್‌ಯೀ ಆಪ್ಲೆಂ ಪ್ರಭುತ್ವ್ ದಾಕವ್ನ್ ದಿಲಾಂ.

[ಸುಖಾಂತ್ ತಶೆಂ ದುಃಖಾಂತ್ ಸಾಂಗಾತ್ ದಿಂವ್ಚಿ ತಾಚಿ ಮೊಗಾಳ್ ಪತಿಣೆಸವೆಂ ಮೊಗಾಳ್ ದೋನ್ ಘಡಿಯೊ]

ಮಸ್ಕತಾಂತ್ ಆಸ್ಚೊ ಏಕ್‌ಚ್ ಏಕ್ ಕೊಂಕ್ಣಿ ಸಂಸ್ಠೊ ’ಮಂಗ್ಳುರ್ ಕಥೊಲಿಕ್ ಕೇಂದ್ರ್’ (ಎಂ.ಸಿ.ಸಿ.ಪಿ) ಹಾಚೊ ಉಪಾದ್ಯಕ್ಷ್, 2006-2007 ವರ್ಸಾಂತ್ ಪ್ರಮುಖ್ ಸಂಘಟಕ್ ಆನಿಂ ಸಾರ್ವಜನಿಕ್ ಕಾರ್‍ಯದರ್‍ಶಿ ಜಾವುನ್‌ಯಿ ತಾಣೆಂ ಸೆವಾ ದಿಲ್ಯಾ. ಮಸ್ಕತಾಂತ್ಲ್ಯಾ ರುವಿ ಫಿರ್‍ಗಜೆಂತ್ ಕ್ರಿಯಾತ್ಮಕ್ ರಿತಿನ್ ಅಪ್ಲಿ ಸೆವಾ ದಿಂವ್ಚೊ ಕ್ಲೆರೆನ್ಸ್ ಪ್ರಸ್ತುತ್ ಹರ್‌ವರ್ಸಾ ದರ್ಭಾರಾನ್ ಚಲ್ಚ್ಯಾ ಮೊಂತಿ ಫೆಸ್ತ್ ಆಚರಣ್ ಸಮಿತಿಚೊ ಮುಖೇಸ್ತ್ ಜಾವ್ನ್ ಆಪ್ಲಿ ಸೆವಾ ಅರ್‍ಪುನ್ ಅಸಾ. ಅಖ್ಖ್ಯಾ ಸಂಸಾರಾಂತ್ ನವಲಾಂ ಉಟಯ್ಲಲೊ ಫಾಮಾದ್ ಜಾಳಿಜಾಗೊ ’ದಾಯ್ಜಿವರ್ಲ್ಡ್ ದೊಟ್ ಕೊಮ್’ ಹಾಚೊ ಪ್ರಸ್ತುತ್ ಮಸ್ಕತಾಂತ್ಲೊ ಭಾತ್ಮಿದಾರ್ ಜಾವ್ನ್ ಸೆವಾ ದಿಂವ್ಚಿ ಕೀರ್ತ್ ಕ್ಲೆರೆನ್ಸ್ ಕೈಕಂಬಾಚಿ. ಮಸ್ಕತಾಂತ್ ಸಾದರ್ ಜಾಂವ್ಚ್ಯಾ ಸಭಾರ್ ಕಾರ್‍ಯಾನಿಂ ಕಾರ್‍ಯಸುತಾರಿ ಜಾವ್ನ್ ತಶೆಂಚ್ ಭಲಾಯ್ಕಿ ಮಾಗ್ಚೆಂ ಕಾರ್‍ಯೆಂ ಚಲವ್ನ್ ತಾಣೆಂ ದಿಂವ್ಚಿ ಸೆವಾ ನಿಜಾಯ್ಕಿ ವ್ಹರ್‍ತಿ!

ಕುಟ್ಮಾ ಘೊಂಟೆರ್... ಮೊಗಾಸಾಗೊರ್... :-

[ಮಾಯಾಮೊಗಾಳ್ ತಶೆಂಚ್ ಏಕ್ ಆದರ್ಶ್ ಕೊಂಕ್ಣಿ ಕುಟಾಮ್]

ಮೊಗಾಸಾಗೊರಾಚೊ ಕುಟ್ಮಾ ಘೊಂಟೆರ್ ಕ್ಲೆರೆನ್ಸ್ ಕೈಕಂಬಾಚೊ. ಹೆಂ ಕುಟಾಮ್ ಮ್ಹಜ್ಯಾ ಕಾಳ್ಜಾಕ್ ಲಾಗ್ಸಿಲೆಂ. ಮಸ್ಕತಾಂತ್ ’ಸ್ಟಾರ್‌ವೆಂಚರ್‍ಸ್’ ನಾಂವಾಖಾಲ್ ಸ್ವ-ಉದ್ಯಮ್ ಚಲವ್ನ್ ಆಸ್ಚ್ಯಾ ಕ್ಲೆರೆನ್ಸಾಚಿ ಉತ್ತೀಮ್ ತಾಲೆಂತಾಂನಿ ಪರ್ಜಳ್ಚಿ ಪತಿಣ್ ಜೇನ್ ಐಡಾ ಆನಿಂ ತಾಲೆಂತ್ವಂತ್ ಭುರ್‍ಗಿಂ ಆಲಿಸ್ತರ್ ಆನಿಂ ಅಮಾಂದಾ ಪ್ರಸ್ತುತ್ ಬೆಂಗ್ಳುರಾಂತ್ ವಸ್ತಿ ಕರುನ್ ಆಸಾತ್. ಗರ್‍ಜೆವಂತಾಂಕ್ ಪಾಟಿಂ ಫುಡೆಂ ಪಳೆನಾಸ್ತಾಂ ಕುಮ್ಕೆ ಹಾತ್ ದಿಂವ್ಚೊ ವಿಶೇಷ್ ಗೂಣ್ ಜೇನ್ ಐಡಾಚೊ. ಅಪ್ರೂಪ್ ಕವಯತ್ರಿ (ದಾಯ್ಜ್.ಕೊಮ್‌ಚೆರ್ ಪರ್ಗಟ್‌ಲ್ಲೆಂ ’ತುಜೆವೀಣ್’ ಕವಿತಾ ವಾಚಾ) ಜಾವ್ನ್ ಆಸ್ಚಾ ಹಿಕಾ ಸಂಗೀತಾಚೆಂ ವಿಶೇಷ್ ದೆಣೆಂಯ್ ಆಸಾ. ತಿಕಾ ಮಸ್ಕತಾಂತ್ಲಿ ’ಲತಾ ಮಂಗೇಶ್ಕರ್’ ಮ್ಹಣೊನ್ ವೊಲಾಂವ್ಕ್ ಮ್ಹಜೆಂ ಮನ್ ಲಾಲೆತಾ. ಕೊಂಕ್ಣಿಂತ್ ಮ್ಹಜೆ ತಸಲ್ಯಾ ಸಾದ್ಯಾ ಪದಾಂ ಘಡ್ಪ್ಯಾಚಿಂ ಕೊಂಕ್ಣಿ ಪದಾಂ ಆಪ್ಲ್ಯಾ ಕೊಗ್ಳೆತಾಳ್ಯಾನ್ ಗಾವ್ನ್ ತ್ಯಾ ಪದಾಂಕ್ ಅಕಾಸಾರ್ ಚಡಯಿಲ್ಲಿ ಕೀರ್ತ್ ಜಾವ್ನಾಸಾ ’ಜೇನ್ ಐಡಾ ಪಿಂಟೊ’ ಹಿಚಿ. ತಿಚೆಂ ಥೈಂ ಲಿಕ್ಣೆಚೆಂ ತಸೆಂಚ್ ಕವಿತೆಚೆಂ ದೆಣೆಂಯೀ ಬರ್‍ಪೂರ್ ರಿತಿನ್ ವ್ಹಾಳ್ತಾ. ಬಾಯ್ ಜೇನ್ ಐಡಾ ಭಾರಿಚ್ ಖುಶಾಲಿ ಸ್ವಭಾವಾಚಿ ಮಾನೇಸ್ತಿಣ್. ತಿಚೊ ಪೋಟ್-ಭರ್ ಹಾಸೊ ಆಮ್ಕಾಂ ಸರ್‍ವಾಂಕ್ ಭಾರಿಚ್ ಮೊಗಾಚ್ಯೊ.

[ಧುವ್ ಅಮಂದಾ ಆಪ್ಲ್ಯಾ ಪಯ್ಲ್ಯಾ ಕುಮ್ಗಾರಾಚ್ಯಾ ಆಚರಣಾವೆಳಾರ್ ಸಯ್ರ್ಯಾಂಸವೆಂ ತಶೆಂಚ್ ಆಪ್ಲ್ಯಾ ಮೊಗಾಳ್ ಆವಯ್ ಬಾಪಯ್‌ಸವೆಂ]

ತಿಣೆಂ ಹಾಸೊಂಕ್ ಸುರ್‍ವಾತ್ ಕೆಲಿ ತರ್ ತಿಚೆ ಸಂಗಿಂ ಆಸ್ಚೆ ಮಾತ್ರ್ ನ್ಹಯ್ ಭವ್ತಣಿಂಚ್ಯೊ ವೊಣದಿ ಆನಿ ರೂಕ್-ಝಡಾಂಯಿ ಹಾಸೊನ್ ನಾಚೊಂಕ್ ಲಾಗ್ತಾತ್. ಹ್ಯಾ ಭಾಗಿ ಜೊಡ್ಯಾಕ್ ಕಾಜಾರಿ ಜಿವಿತಾಂತ್ ದೆವಾನ್ ಫಾವೊ ಕೆಲ್ಲಿಂ ದೋನ್ ಫಳಾಂ.. ಆಲಿಸ್ಟರ್ ಆನಿ ಆಮಾಂದಾ. ಗಲ್ಫಾಂತ್ ಜಲ್ಮೊನ್ ವಾಡ್‌ಲ್ಲ್ಯಾ ಹ್ಯಾ ಬಾಳಾಂಕ್ ಕೊಂಕ್ಣಿ ಭುರ್‍ಗಿಂ ಜಾವ್ನ್ ವಾಗಯಿಲ್ಲಿ ಕೀರ್‍ತ್ ಕ್ಲೇರೆನ್ಸ್ ಆನಿ ಐಡಾಚಿ. ತಾಂಚ್ಯಾ ಭುರ್‍ಗ್ಯಾನಿಂ ಅಪುಟ್ ಕೊಂಕ್ಣಿ ಭಾಸೆಂತ್ ಉಲಯ್ತಾನಾಂ ತಾನ್-ಭುಕ್ ನಿವ್ತಾ. ಆಲಿಸ್ಟರ್ ಶಿಕ್ಪಾಂತ್ ತಸೆಂಚ್ ಖೆಳಾ-ಪಂದ್ಯಾಟಾಂತ್ ಪ್ರವೀಣ್. ಕ್ರಿಕೆಟ್ ಆನಿಂ ಟೇಬಲ್ ಟೆನ್ನಿಸ್ ಖೆಳಾಂನಿಂ ಸಭಾರ್ ಪದಕಾಂ ತಾಣೆಂ ಆಪ್ಣಾಯ್ಲ್ಯಾಂತ್. ಅಮಂದಾ ಆಪ್ಲ್ಯಾ ಆವಯ್‌ಪರಿಂಚ್ ಉತ್ತೀಮ್ ಗಾವ್ಪಿಣ್ ಮಾತ್ರ್ ನ್ಹಯ್, ಏಕ್ ತಾಲೆಂತ್‌ವಂತ್ ನಾಚ್ಪಿಣ್ ಜಾವ್ನ್ ಪರ್‍ಜಳೊಂಕ್ ಲಾಗ್ಲಾಂ. ಸಂಗೀತಾಂತ್ ತಸೆಂಚ್ ನಾಚ್ಪಾಂತ್ ಸಭಾರ್ ಪದಕಾಂ ತಾಣೆಂ ಆಪ್ಣಾವ್ನ್ ಅಖ್ಖ್ಯಾ ಕೊಂಕ್ಣಿ ಸಮಾಜೆಕ್ ವ್ಹರ್‍ತಿ ಕೀರ್‍ತ್ ತಾಣೆಂ ಹಾಡ್ಲ್ಯಾ. ಪ್ರಸ್ತುತ್ ಆಲಿಸ್ಟರ್ ಆನಿ ಆಮಾಂದಾ ಬೆಂಗ್ಳುರಾಂತ್ ವಿಶ್ವವಿಖ್ಯಾತ್ ವಿದ್ಯಾಶಾಳಾನಿಂ ಶಿಕಾಪ್ ಜೊಡುನ್ ಆಸಾತ್.

ಅಖೇರ್ ಕರ್‍ಚ್ಯಾ ಫುಡೆಂ... :-

ಕ್ಲೆರೆನ್ಸ್ ಕೈಕಂಬ ಹಾಣೆಂ ಕೊಂಕ್ಣಿ ಭಾಸ್, ಕಲಾ ಆನಿ ಸಂಸ್ಕೃತೆಖಾತಿರ್ ಕರ್‍ಚ್ಯಾ ಸರ್‍ವ್ ನಿಸ್ವಾರ್ತಿ ವಾವ್ರಾಕ್ ರಚ್ನಾರ್ ತಾಚೆರ್ ಆನಿ ತಾಚ್ಯಾ ಕುಟ್ಮಾಚೆರ್ ಧಾರಾಳ್ ಆಶೀರ್ವಾದಾಂಚೊ ಶಿಂವೊರ್ ವೊತುಂ ಮ್ಹಳ್ಳೆಂ ಮ್ಹಜೆಂ ಪ್ರಾರ್ಥನ್. ಕೊಂಕ್ಣಿ ಭಾಸೆಚಿ ಸೆವಾ ಮುಕಾರುನ್ ವ್ಹರ್ಚ್ಯಾಕ್ ದೇವ್ ತಾಕಾ ಸದಾಂಚ್ ಬರಿ ಭಲಾಯ್ಕಿ ದೀಂವ್. ತುಮ್ಚ್ಯಾ ಸರ್‍ವಾಂಚಾ ನಾಂವಿಂ ಪರ್ತ್ಯಾನ್ ಹಾಂವ್ ಕ್ಲೆರೆನ್ಸ್ ಕೈಕಂಬಾಕ್ ಉಲ್ಲಾಸಿತಾಂ ಆನಿ ತಾಚ್ಯಾ ಸರ್‍ವ್ ಮುಕ್ಲ್ಯಾ ಯೋಜನಾಂಕ್ ಯಶ್ ಆಶೆತಾಂ. ತಾಚ್ಯಾ ತಿಂತೆರಾ ಥಾವ್ನ್ ವ್ಹಾಳ್ಚಿ ಸುವಾಧಿಕ್ ಕೊಂಕ್ಣಿ ಝರ್ ಕೆದಿಂಚ್ ಸುಕಾನಾಂ ಜಾಂವ್.... ಹೆಂಚ್ ಮ್ಹಜೆಂ ಖಾಲ್ತೆಂ ಪ್ರಾರ್ಥನ್.... ತಥಾಸ್ತು!!!

ದಾಯ್ಜ್ ವರ್ಸಾಚೊ ಕಾಣ್ಯೆಗಾರ್ 2007

ದಾಯ್ಜ್ ಲೇಖನಾಂ

ವಿಮರ್ಶೆ

ದಾಯ್ಜ್ ಪಾನಾಕ್

ಸಜ್ಜಿಗೆ

ವಿಚಾರ್-ಉಚಾರ್

ಫ್ಲಾಯ್ಟ್!?