ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾದಾಯ್ಜ್ - 13
ಜೆಮ್ಮಾ ಪಡೀಲ್
ಪರ್ನೆಂ ಕದೆಲ್
ನಾಂವ್: ಜೆರೋಮ್ ಪಿರೇರಾ
ಲಿಖ್ಣೆ ನಾಂವಾಂ: ಜೆಮ್ಮಾ ಪಡೀಲ್.
ಜನನ್: 15 ಜುಲಾಯ್ 1949.
ಜಲ್ಮಾಲ್ಲೊ ಗಾಂವ್: ಪಡೀಲ್.
ಶಿಕಾಪ್: ಬಿ.ಕೊಮ್.
ಆವಯ್-ಬಾಪಾಯ್ಚೆಂ ನಾಂವ್: ದೆ|ಕ್ರಿಸ್ತಿನ್ ಆನಿ ದೆ|ಗಾಬ್ರಿಯೆಲ್ ಪಿರೇರ್.
ಪತಿಣ್: ಜಾನೆಟ್ ಗ್ರೆಟ್ಟಾ ಪಿರೇರ್.
ಇಮೇಯ್ಲ್: jpereira@adco.ae
ವಳೊಕ್:
ಕಾದಂಬರಿ/ ಲಾಂಬ್
ಮಟ್ವ್ಯೊ
ಕಥಾ:
ಸಲ್ವಣೆಂತ್ಲಿ ಜೀಕ್
ಲೇಖನಾಂ: ಲಗ್ಬಗ್ 175
ಅಂಕಣಾಂ:
ಉಡಾಸಾಂತ್ಲೆ ಫಾತೊರ್ [ಉಮಾಳೊ]
ಭಗ್ಣಾಂ [ದಿವೊ]
ಚಿಂತಾಪ್ [ರಾಕ್ಣೊ]
ಆಮ್ಚಿಂ ಸಂಸ್ಕೃತಿ [ದಿವೊ]
ಸತಾಂತ್ಲಿಂ ವಿಚಿತ್ರಾಂ [ದಾಯ್ಜ್]
ಪರ್ಗಟ್ ಜಾಲ್ಲೆ ಬೂಕ್:
ಆಶಾ ಭಾಗಯ್ಲಿ (1967,
ಸಾಳಕ್ ಪ್ರಕಾಶನ್)
ಸಿಂತಿಮೆಂತಾಂ (1991, ವೀಣಾ
ಪ್ರಕಾಶನ್)
ದುಖಾಂ (2001, ವೀಣಾ
ಪ್ರಕಾಶನ್)
ವಿಂಚ್ಣಾರ್ ಚಿಂತಾಪ್ ಆನಿ ಭಗ್ಣಾಂ (2005,
ಆಶಾವಾದಿ
ಪ್ರಕಾಶನ್)
ಆಪ್ಣಾಯಿಲ್ಲ್ಯೊ
ಪ್ರಶಸ್ತ್ಯೊ:
’ಗೊಂಯ್ಚಿ ಭಾಶಾ ಮಂಡಳ್ ಪ್ರಶಸ್ಥಿ’.
’ಕರ್ನಾಟಕ್
ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ಪ್ರಶಸ್ಥಿ’.
ಚಿಂತಾಪ್ :
ಜಶೆಂ ಹೆರ್ ಭಾಸಾಂಚಾ ಸಾಹಿತ್ಯಾಂತ್ ಆಸ್ಚೆತಿತ್ಲೆ ಪ್ರಕಾರ್ ಕೊಂಕ್ಣೆಂತ್ ನಾಂತ್ ತರ್ಯೀ, ಕೊಂಕ್ಣಿ ಸಾಹಿತ್ಯಾಂತ್ ಸಿಂತಿಮೆಂತಾಳ್ ಸಾಹಿತ್ಯ್ ಚಡ್ ಜಾವ್ನ್ ಲೊಕಾಮೊಗಾಳ್ ಜಾತಾ, ಕಿತ್ಯಾಕ್ ಮ್ಹಳ್ಯಾರ್ ಚಡ್ತಾವ್ ಕೊಂಕ್ಣಿ ವಾಚ್ಪಿ ಹಳ್ಳೆಚೊ ಆನಿ ಸಾದೊ. ತಾಂಕಾಂ ಸಮ್ಜೊಂಚಿ ಏಕ್ ಭಾಸ್ - ಮೊಗಾಚಿ. ತಾಂಕಾಂ ಸಮ್ಜೊಂಚೆಂ ಏಕ್ ಧರ್ಮ್ - ಮಾಯಾಮೋಗ್. ಹ್ಯಾ ಲೊಕಾಂಲಾಗಿಂ ದುಬ್ಳಿಕಾಯ್ ಆಸತ್ ತರ್ಯೀ ಭರ್ಪೂರ್ ಮನ್ಶ್ಯಾಪಣಾಚಿಂ ಮೌಲ್ಯಾಂ, ಮನ್ಶ್ಯಾಮೋಗ್, ಎಕಾಮೆಕಾಚೊ ಹುಸ್ಕೊ, ಭಿರ್ಮತ್ ಆನಿ ಹೆರಾಂಚೆ ಕಸ್ಟ್ ಅಪ್ಲೆ ಕರ್ನ್ ಘೆಂವ್ಚಿ ಶ್ಯಾಥಿ ಸಯ್ತ್. ಅಸಲ್ಯಾ ಲೊಕಾಂಕ್ ಜೆಮ್ಮಾ ಪಡೀಲಾಚ್ಯೊ ಕಾಣ್ಯೊ ಖರೆಂಚ್ ಜಾವ್ನ್ ಜಿಣ್ಯೆ ಲಿಸಾಂವ್ ದಿತಾತ್ ಮಾತ್ರ್ ನ್ಹಂಯ್, ನೈತಿಕ್ ಮೊಲಾಂಚೊ ಆರ್ಸೊ ಧರ್ತಾತ್.
ಜೆಮ್ಮಾ ಪಡೀಲ್ ಜಿಣ್ಯೆಂತ್ ಜಶೆಂ ವೆಕ್ತಿಗತ್ ಜಾವ್ನ್ ವಿಶಿಷ್ಟ್!. ಕೊಣಾಕ್ ಹೊ ಏಕ್ ಮಿಸ್ತೆರಾಭರಿತ್ ದಿಸೊಂಕ್ ಪುರೊ. ಪುಣ್ ಅಪ್ಣಾಕ್ ಫಟವ್ನ್ ಹೆರಾಂಕ್ ಸಂತೊಸ್ ಕರ್ಚ್ಯಾಂತ್ಲೊ ಹೊ ಭಿಲ್ಕುಲ್ ನ್ಹಂಯ್! ಹೆಂ ಮ್ಹಜೆಂ ಖಾಸ್ಗಿ ಚಿಂತಾಪ್. ಹಾಚೆಲಾಗಿಂ ಆಸ್ಚಿ ಅನ್ಯೇಕ್ ಸೊಭಿತ್ ಶ್ಯಾಥಿ ಮ್ಹಳ್ಯಾರ್, ಹೆರಾಂಚ್ಯಾ ಕಾಳ್ಜಾಚಿಂ ಭಗ್ಣಾಂ ವೆಗಿಂಚ್ ಪಾರ್ಕುಂಚಿ. ಜಶೆಂ ಹಾಚ್ಯಾ ಕಾಣ್ಯಾಂನಿ ಮನ್ಶ್ಯಾಪಣಾಚಿಂ ಮೌಲ್ಯಾಂ ಉಟೊನ್ ಧರ್ತಾಗೀ ತಶೆಂಚ್ ಅಪ್ಲ್ಯಾ ಜಿಣ್ಯೆಂತ್ ಸಯ್ತ್! ದೆಖುನ್ ಹಾಚೆರ್ ಮ್ಹಾಕಾ ಭರ್ಪೂರ್ ಮೋಗ್ ಮಾತ್ರ್ ನ್ಹಂಯ್, ಗೌರವ್ ಸಯ್ತ್ ಆಸಾ. ’ಬರಂವ್ಚೆಂ ಏಕ್ ಆನಿ ಕರ್ಚೆಂ ದುಸ್ರೆಂಚ್’ - ಹ್ಯಾ ಕಾಲೆತಿಂತ್ ಜೆಮ್ಮಾ ಪಡೀಲ್ ಖಂಡಿತ್ ನಾ - ಇತ್ಲೆಂ ಹಾಂವ್ ನಖ್ಖೆಂ ಸಮ್ಜಲಾಂ.
ಜೆಮ್ಮಾ ಪಡಿಲಾಕ್ ಹಾಂವ್ ಮುಖಾಮುಖಿಂ ಜಾಲ್ಲೊಂ ಅಜೀಕ್ ಚ್ಯಾರ್ ಪಾಂಚ್ ವರ್ಸಾಂ ಥಾವ್ನ್, ತರ್ಯೀ ಹ್ಯಾ ಆವ್ದೆಂತ್ ತಾಚೆಂ ವೆಕ್ತಿತ್ವ್, ತಾಚೆಂ ಚಿಂತಾಪ್, ತಾಚೊ ರಾಗ್, ತಾಚೊ ಮೋಗ್, ತಾಚೊ ಹುಸ್ಕೊ, ತಾಚೊ ಮಯ್ಪಾಸ್ ಹಾವೆಂ ಪಳೆಲಾ, ಭಗ್ಲಾ. ಹ್ಯಾ ಹರ್ಯೆಕಾಕ್ ಹಾವೆಂ ಗೌರವಾನ್ ಸ್ವೀಕಾರ್ ಕೆಲಾಂ ತಶೆಂಚ್ ಮೋಗ್ ಕೆಲಾ. ತೊಂಡಾ ಪುರ್ತ್ಯೊ ಸುಕ್ಯೊ ತಾರಿಫೊ ಆಯ್ಕೊನ್ ಆಯ್ಕೊನ್ ಮ್ಹಜೆ ಕಾನ್ ವ್ಹೊಳ್ಲ್ಲ್ಯಾ ದಿಸಾಂನಿ ಜರ್ ಹಾಂವ್ ಸಾರ್ಕೆಂ ಜೆವ್ತಾಂಗೀ, ಹಾಂವ್ ಸಾರ್ಕೆಂ ನಿದ್ತಾಂಗೀ, ಹಾಂವ್ ಹಾಸ್ತಾಂಗೀ, ಹಾಂವ್ ರಡ್ತಾಂಗೀ ಮ್ಹಳ್ಳೆಂ ಚಿಂತಾಪ್ ಚಿಂತ್ಲ್ಲ್ಯಾ ಮ್ಹಜ್ಯಾ ಲಾಗ್ಸಿಲ್ಯಾ ಮಿತ್ರಾಂ ಪಯ್ಕಿಂತ್ಲೊ ಹೊಯೀ ಎಕ್ಲೊ.
ಜೆಮ್ಮಾ ಪಡೀಲಾಚೆಂ ಸಾಹಿತ್ಯ್:
ಜೆಮ್ಮಾ ಪಡಿಲಾಚ್ಯಾ ಸಾಹಿತ್ಯಾಕ್, ಪ್ರತ್ಯೇಕ್ ಜಾವ್ನ್ ಕಾಣ್ಯಾಂಕ್ ಕೊಂಕ್ಣೆಂತ್ ’ಜೊಕ್ತೆಂ’ ಸ್ಥಾನ್-ಮಾನ್ ಲಾಭೊಂಕ್ ನಾ. ಕೊಣೆಂಯ್ ಮನ್ ಕೆಲ್ಯಾರ್ ಹಾಚ್ಯೊ ಖಂಚ್ಯೋಯ್ ಕಾಣ್ಯೊ ಸಂಸಾರಾಚ್ಯಾ ಖಂಚ್ಯಾಯ್ ಭಾಸಾಂಕ್ ಅನುವಾದಿತ್ ಜಾಂವ್ಚ್ಯೆತಸಲ್ಯೊ. ಭಾಸ್ ಏಕ್ ಮಾಧ್ಯಮ್ ಮಾತ್ರ್. ಪುಣ್ ಮನ್ಶಾಚೊ ಮೋಗ್, ಮನ್ಶ್ಯಾ ಹುಸ್ಕೊ ಹರ್ಯೆಕಾ ಜಾತಿಚಾ, ಕಾಲೆತಿಚಾ, ಭಾಸೆಚಾ, ಧರ್ಮಾಚಾ ಲೊಕಾಂಕ್ ಸಲೀಸಾಯೆನ್ ಸಮ್ಜೊಂಚೆ ತಸಲೊ. ಸದಾಂಚ್ ಹೆರಾಂಚೆಂ ಬರೆಂಪಣ್ ಉಚಾರ್ಚೊ ಹೊ, ಖುದ್ದ್ ಅಪ್ಣಾವಿಶಿಂ ಉಲಯಿಲ್ಲೊ ಭೋವ್ ಉಣೆಂ. ತಾಚ್ಯಾ ಲೇಖನಾಂನಿಂಯೀ ತೊಚ್ಚ್ ಸಾಮಾಜಿಕ್/ಹೆರಾಂಚೊ ಹುಸ್ಕೊ ನಿಶೆತಾ.
ಶರೊ: ಹೆರಾಂಚ್ಯೊ ತಾರಿಫೊ ಕರ್ಚ್ಯೊ ಆನಿ ಹೆರಾಂಚೆಂ ಬರೆಂಪಣ್ ಆಸ್ಚೆಪರಿಂ ಉಚಾರ್ಚೆಂ ದೋನ್- ವೆವೆಗ್ಳೆಂ. ಆತಾಂ ಜೆಮ್ಮಾ ಪಡೀಲಾವಿಶಿಂ ಮ್ಹಜಿಂ ದೋನ್ ಖಾಸ್ಗಿ ಉತ್ರಾಂ; ಜೆಮ್ಮಾ ಪಡಿಲಾಚೊ ಅನ್ಯೇಕ್ ಶೆಗುಣ್ ಜಾವ್ನಾಸಾ, ಕೆದಿಂಚ್ ನಾಂವಾ ಪಾಟ್ಲ್ಯಾನ್ ಧಾಂವ್ಚೊ ಹೊ ನ್ಹಂಯ್. ಪುಣ್ ಸದಾಂಚ್ ಗರ್ಜೆಂತ್ ಆಸ್ಚಾ ಹೆರಾಂಚೊ ಹುಸ್ಕೊ ಕಾಳ್ಜಾಂತ್ ದವರ್ನ್ ಆಸ್ಚೊ, ಪ್ರಾಯೆನ್ ಜಾಂವ್ - ಅನ್ಭೋಗಾಂತ್ ಜಾಂವ್, ಹರ್ಯೆಕಾಂತ್ ಹಾಂವ್ ತಾಚ್ಯಾ ಪುತಾ ಸಾರ್ಕೊ. ತರ್ಯೀ ಮ್ಹಾಕಾ ತಾಣೆಂ ತಾಚೊ ಕಾಳ್ಜಾಚೊ ಲಾಗ್ಸಿಲೊ ಮಿತ್ರ್ ಮ್ಹಳ್ಳಿ ಜವಾಬ್ಧಾರಿ ಮೊಗಾನ್ ದಿಲ್ಲೆವರ್ವಿಂ ಮ್ಹಾಕಾ ತಾಚೆಥಾವ್ನ್ ಜಾಯ್ತೆಂ ಶಿಕೊಂಕ್ ಸಾಧ್ಯ್ ಜಾಲೆಂ. ಅನಿಕ್ಯೀ ಶಿಕೊನ್ ಆಸಾಂ. ತಾಚ್ಯಾ ವಿಂಚ್ಣಾರ್ ಲೇಖನಾಂಕ್ ಪರ್ಗಟ್ ಕರ್ಚೆಂ ಭಾಗ್ ಮ್ಹಾಕಾ ಲಾಭ್ತಾನಾ, ತಾಚಿಂ ಎಕೇಕ್ ಲೇಖನಾಂ ವಾಚುನ್ ಹಾಂವ್ ಮಿಟಾಖಾಂಬೊ ಜಾಲ್ಲೊಂ. ತಾಚ್ಯೊ ಎಕೇಕ್ ಕಾಣ್ಯೊ ವಾಚುನ್ ಕಿತ್ಲಿಂ ದುಃಖಾಂ ಗಳಯ್ಲ್ಯಾಂತ್ ತೆಂ ಹಾಂವ್ ಆನಿ ತೊ ಸರ್ವೆಸ್ಪರ್ ದೇವ್ ಜಾಣಾಂ. ಅಶೆಂ ಮ್ಹಣ್ ವಾಚ್ಪ್ಯಾಂಕ್ ರಡಂವ್ಚಿಯೀ ಏಕ್ ಕಲಾ. ಹ್ಯಾ ಸಂಸಾರಾಂತ್ ಜಾಯ್ತ್ಯಾ ರಿತಿನ್ ಕಸ್ಟೊನ್ ಆಸ್ಚಾ ಲೊಕಾಂಕ್ ರಡ್ಚೆಂ ನೀಬ್ ಸಲೀಸಾಯೆನ್ ಲಾಭಾನಾ. ಭಿತರ್ ಧಾಂಬುನ್ ದವರ್ಲೆಲೆಂ ದೂಖ್ ಭಾಯ್ರ್ ಕಾಡುಂಕ್ ಜರ್ ಸಾಹಿತ್ಯ್ ಸಕ್ತಾ, ತರ್ ತ್ಯಾ ಸಾಹಿತ್ಯಾಚಾ ಸಕ್ತೆಚೊ ಅಂದಾಜ್ ಘಾಲಾ. ಹಾಚ್ಯಾ ಮಟ್ವ್ಯಾ ಕಾಣ್ಯಾಂಚೆರ್ ದಾಯ್ಜ್ ಪಂಗಡ್ ಫುಡ್ಲ್ಯಾ ದಿಸಾಂನಿ ’ಕಥಾಪಾಠ್’ಚೆರ್ ಅಧ್ಯಯನ್ ಚಲಯ್ತಲೊ.
- ವಲ್ಲಿ ಕ್ವಾಡ್ರಸ್
ಕಥಾದಾಯ್ಜ್ - 13 . ಪರ್ನೆಂ ಕದೆಲ್
ಸಕಾಳಿಂಚಿಂ ಧಾ ವೊರಾಂ. ದಸೆಂಬರ್
ಮಹಿನ್ಯಾಚೆಂ ಥಂಡ್ ವಾರೆಂ ಅಜೂನ್ ಹವ್ಯಾಂತ್ ಮಿಸ್ಳಾಲ್ಲೆಂ.
ಸುರ್ಯಾಚಿಂ ಕಿರ್ಣಾಂ ಭುಮಿರ್ ಪಡ್ಲ್ಯಾರ್ಯೀ ಹವ್ಯಾಂತ್ಲಿ
ಥಂಡಾಯ್ ಉಣಿ ನಾತ್ಲೆಲಿ. ಅರ್ಭಿ ದರ್ಯಾಚಿ ಗಾಜ್ ಆತಾಂ ಆಯ್ಕಾನಾತ್ಲ್ಯಾರೀ
ಮಧೆಂ ಮಧೆಂ ರೈಲಾಚಾ ಪಾಟ್ಯಾರ್ ಧಾಂವ್ಚಾ ರೈಲಾಚೊ ಆವಾಜ್
ಕಾನಾಂಕ್ ಮಾರ್ತಾಲೊ...
ರೊಜ್ಲಿನ್ ದಿಲ್ಲಿ ಹುನ್ ಹುನ್ ಕಾಫಿ ಪಿಯೆವ್ನ್ ನತಾಲ್ಬಾಯೆಚ್ಯಾ ಆಂಗಾರ್
ಹುರುಪ್ ಭರ್ಲೊ. ಯೆದೊಳ್ ಪರ್ಯಾಂತ್ ಕುಡಾ ಭಿತರ್ ಖಟ್ಲ್ಯಾರ್
ಬಸೊನ್ ಆಸ್ಲ್ಲಿ ತಿ, ಸವ್ಕಾಸ್ ಉಟೊನ್ ಭಾಯ್ರ್ ಆಯ್ಲಿ.
ಪುತಾನ್ ಹಾಡ್ಲೆಲೆಂ ಸ್ವೆಟ್ಟರ್ ತಿಣೆ ಘಾಲ್ಲೆಂ. ಮೊಸೈಕ್ ಇಟ್ಯಾಂಚಿ ಥಂಡಾಯ್
ಚುಕಂವ್ಕ್ ಪಾಂಯಾಂಕ್ ತಿಣೆಂ ಹವಾಯ್ ಚಪ್ಪಲಾಂ ಘಾಲ್ಲಿಂ.
ಪಾಲಂವ್ ಆಂಗಾರ್ ಪಾಂಗ್ರುನ್ ಭಾಯ್ರ್ ಸೊಪ್ಯಾಕ್ ಪಾವ್ಲಿ ತಿ.
ವೊರಾಂ ಸಾಡೆ-ಧಾ ಜಾಲ್ಲಿಂ. ತಿಚಿ ದೀಶ್ಟ್ ಮಾರ್ಗಾ ಕುಶಿನ್ ಗೆಲಿ. ತಿಚೆಂ ಘರ್ ರಾಜ್ಯ್-ಮಾರ್ಗಾರ್
ಆಸ್ಲ್ಲೆಂ. ವಾಹನಾಂ ಆಶಾರ್-ಪಾಶಾರ್ ಜಾಲ್ಯಾರ್ಯೀ ತಿಚಿ ಮತ್
ಖುಶ್ ಜಾಲ್ಲಿ ನಾ.
ತಿಚೆ ದೊಳೆ ಪರತ್ ಮಾರ್ಗಾರ್ ಚರ್ಲೆ - ಪೋಸ್ಟ್ಮೆನಾಕ್
ಸೊಧುನ್.
ಪೋಸ್ಟ್ಮೆನ್!
ತಿಕಾ ಸದಾಂಯ್ ಎಕ್ಚ್ ಖಂತ್. ಕೆದಾಳಾ ತೊ ಯೆತಾ, ಕೆದಾಳಾ ಕಾಗದ್
ಯೇತ್.. ಕೆದಾಳಾ ಕಾಗದ್ ವಾಚಿನ್..! ತಿಚೆಂ ಕಾಳಿಜ್
ಆತುರಾಯೆನ್ ಭರೊನ್ ಆಯ್ಲೆಂ. ಮಾರ್ಗಾಕ್ ಪಳೆವ್ನ್
ಪಳೆವ್ನ್ ಪುರೊ ಜಾಲೆಂ ತಿಕಾ. ತಿ ’ತಿಚ್ಯಾ’ ಕದೆಲಾರ್ ಗಳ್ಳಿ.
ತಿಚೆಂ ಕದೆಲ್.. ಪರ್ನೆಂ ಕದೆಲ್!
ತ್ಯಾ ಘರಾಂತ್ ’ಪರ್ನೆಂ’ ಮ್ಹಳ್ಯಾರ್ ತೆಂಚ್ ತೆಂ ಕದೆಲ್. ಘರಾಂತ್ಲ್ಯೊ
ವಸ್ತು ಪೂರಾ ಪುತಾನ್ ನವ್ಯೊ ಹಾಡ್ಲ್ಲ್ಯೊ. ಘರ್
ನವೆಂ ಬಾಂಧ್ತಾನಾ ಸರ್ವ್ ನವ್ಯೊ ಸವ್ಲತಾಯೊ
ತಸೆಂ ವಸ್ತು ತಿಕಾ, ತಿಚೆ ಖಾತಿರ್ ತಾಣೆಂ ಖರೀದ್ ಕೆಲ್ಲ್ಯೊ.
ತಿಕಾ ತಸೆಂ ತ್ಯಾ ಪರ್ನ್ಯಾ ಕದೆಲಾಕ್ ಲಾಗ್ಶಿಲೊ ಸಂಬಂಧ್.
ಹೆಂ ಕದೆಲ್ ತಿಚೆಂ. ತಿಚ್ಯಾ ಮೊಗಾಚಾ ಘೊವಾನ್ ಕೆಲ್ಲೆಂ ಕದೆಲ್
ತೆಂ. ಸುತಾರಿ ತೊ. ಹೆಂ ಏಕ್ ಕದೆಲ್
ತಿಣೆಂ ವಿಂಗಡ್ ಕರುಂಕ್ ಸೊಡ್ಲ್ಲೆಂ ನಾ. ತಿಚೆಂ ಗತ್-ಜೀವನ್; ತಿಚಿ
ಪಾಟ್ಲಿ ಜೀಣ್ ’ತೆಂ’ ಮಾತ್ರ್ ಜಾಣಾ. ಆಯ್ಚಾ ಪರಿಗತೆಂತ್, ತೆಂ
ಪರ್ನೆಂ ಕದೆಲ್ ತಿಚಾ ಆಂಗಾಚೊ ಏಕ್ ಭಾಗ್ ಜಾವ್ನಾಸಾ.
ವೊರಾಂ ಇಕ್ರಾ ಜಾಲಿಂ ಮಾರ್ಗಾರ್ ದೀಷ್ಟ್ ಲಾಯಿತ್ತ್ ಆಸ್ಲ್ಲ್ಯಾ
ನತಾಲ್ಬಾಯೆಕ್, ಪಯ್ಸ್ ಥಾವ್ನ್ ಚಲೊನ್ ಯೆಂವ್ಚೊ
ತಪ್ಪಾಲ್ ಪೆದೊ ಗಂಗಾರಾಮ್ ದಿಸ್ಲೊ. ತಾಕಾ ಪಳೆವ್ನ್ ತಿಚಾ
ತೊಂಡಾರ್ ಹಾಸೊ ಉದೆಲೊ. ಚುರುಕ್ ಜಾವ್ನ್ ಉಬಿ ರಾವ್ಲಿ ತಿ.
ಭಿತರ್ ಕಾಮಾರ್ ಆಸ್ಲ್ಲ್ಯಾ ರೊಜ್ಲಿಕ್ ಉಲೊ ಕರ್ನ್, ಗಂಗಾರಾಮಾಕ್ ಮೆಳೊಂಕ್ ಧಾಂವ್ಡಾಯ್ಲೆಂ
ತಿಣೆಂ. ಥೊಡ್ಯಾ ವೆಳಾನ್ ಹಾತಿಂ ಏಕ್ ಕಾಗದ್ ಘೆವ್ನ್ ಆಯಿಲ್ಲ್ಯಾ ರೊಜ್ಲಿಕ್ ಪಳೆವ್ನ್
ನತಾಲ್ಬಾಯೆಚೆಂ ಕಾಳಿಜ್ ಏಕ್ ಪಾವ್ಟಿಂ ಸಂತೊಸಾನ್ ಉಡ್ಲೆಂ. ಎಕಾ
ಬಾಕ್ಕಾರಾನ್ ಉಭೆಂ ರಾವೊನ್, ಸವ್ಕಾಸ್ ಚಲೊನ್
ಯೆಂವ್ಚಾ ರೊಜ್ಲಿಕ್ ಹಾತ್ಭಾಷೆನ್ ’ಧಾಂವೊನ್ ಯೆ’ ಮ್ಹಳ್ಳೊ
ಹಿಶಾರೊ ದೀವ್ನ್ ಮೆಟಾಂಚೆರ್ ಉಬಿ ರಾವ್ಲಿ ತಿ.
ರೊಜ್ಲಿನ್ ದಿಲ್ಲೆಂ ಕಾಗದ್ ಪಳೆವ್ನ್ ತಿಚೆಂ ಕಾಳಿಜ್ ಭರ್ಲೆಂ.
ನಿಮಾಣೆಂ ತರ್ಯೀ ಕಾಗದ್ ಆಯಿಲ್ಲೆಂ- ತಿಣೆಂ ಅಪೇಕ್ಶಿಲ್ಲೆಂ. ಕಾಗದ್ ತಿಚಾ
ಪುತಾಚೆಂ - ಮೆಕ್ಸಿಚೆಂ.
ಕಾಗದ್ ಫೊಡುನ್ ತಿಚೆ ದೊಳೆ ಶೆಂಬರ್ ಮಯ್ಲಾಂಚಾ ವೇಗಾನ್ ಅಕ್ಷರಾಂ
ವಯ್ರ್ ಧಾಂವ್ಲೆಂ...
ನ್ಯೂಯೋರ್ಕ್
10-12-'86
ಮೊಗಾಚ್ಯಾ ಮಾಂಯ್ಕ್,
ತುಜಾ ಮೊಗಾಚಾ ಮೆಕ್ಸಿನ್ ಬರಂವ್ಚೆಂ ಕಾಗದ್ ಆನಿ ಮಾಗ್ಚೆಂ ಬೆಸಾಂವ್. ತುಜೆಂ ಕಾಗದ್ ಮೆಳ್ಳೆಂ. ವಿಷಯ್ ಕಳಿತ್ ಜಾಲೊ. ಹಾಂವ್ ಬರೊ ಆಸಾಂ. ವೀರಾ ಬರೆಂ ಆಸಾ. ಚೆರ್ಕೊಯ್ ಬರೊ ಆಸಾ. ತುಂ ಕಸಿ ಆಸಾಯ್? ತುಂ ’ಹೆಪ್ಪಿ’ ರಾವ್. ಪಯ್ಶಾಂ ವಿಷ್ಯಾಂತ್ ಖಂತ್ ಕರಿನಾಕಾ. ಹಾವೆಂ ಹ್ಯಾ ಕಾಗ್ದಾ ಸಂಗಿಂ 5,000 ರುಪ್ಯಾಂಚಿ ಡ್ರಾಫ್ಟ್ ಧಾಡ್ಲ್ಯಾ,
ಮಾಗೊನ್ ಬೆಸಾಂವ್,
ತುಜ್ಯಾ ಮೊಗಾಚೊ,
ಮೆಕ್ಸಿ
ಲಾಂಬ್ ಲಾಂಬ್ ಕಾಗದ್ ಆಶೆಲ್ಲ್ಯಾ ನತಾಲ್ಬಾಯೆಚ್ಯೆ ಮತಿಕ್ ಬೆಜಾರ್ ಜಾಲೆಂ. ಕಿತ್ಲ್ಯಾ ಉಲ್ಲಾಸಾನ್ ತಿಣೆಂ ಕಾಗದ್ ವಾಚುಂಕ್ ಅಪೇಕ್ಷಿಲ್ಲೆಂಗೀ, ಆತಾಂ ತಿಆತುರಾಯ್ ಮಾಯಾಗ್
ಜಾಲಿ. ಲಾಂಬ್ ಕಾಗದ್ ವಾಚುಂಕ್ ದೊಳೆ ಘುಂವ್ಡಾಂವ್ಚಾ ತಿಕಾ 5,000 ರುಪ್ಯಾಂಚಿ ಡ್ರಾಫ್ಟ್ ಮಾತ್ರ್ ವ್ಹಡ್ ಗಾತ್ರಾಚಿ ದಿಸ್ಲಿ.ಪುರಾಸಣ್ ಭೊಗ್ಲಿ ತಿಕಾ. ತಿಚೆ ಪಾಂಯ್ ತಿಚಾ
ಖಟ್ಲ್ಯಾ ಸರ್ಶಿಂ ಗೆಲೆ. ಖಟ್ಲ್ಯಾರ್ ಬಸೊನ್ ತಿಣೆಂ ಕಾಗದ್ ಉಶ್ಯಾಪಂದಾ ಲೊಟ್ಲೆಂ. ಸುಮಾರ್ಶಿಂ ಕಾಗ್ದಾಂ ಥಂಯ್ ಆಸ್ಲೆಲಿಂ. ಮಹಿನ್ಯಾಕ್ ಏಕ್ ಪಾವ್ಟಿಂ ಯೆಂವ್ಚಾ
ಕಾಗ್ದಾಂತ್ ತಿಕಾ ದುಸ್ರೆಂ ಕಿತೆಂಯ್ ವಾಚುಂಕ್ ಮೆಳಾನಾಸ್ಲೆಂ. ಸದಾಂಚಿಂಚ್ ಉತ್ರಾಂ-ಹಾಂವ್ ಬರೊ ಆಸಾಂ, ತುಂ ಕಸಿ ಆಸಾಯ್? ತುಂ ’ಹೆಪ್ಪಿ’ ರಾವ್, ತುಕಾ ಡ್ರಾಫ್ಟ್
ಧಾಡ್ಲ್ಯಾ.. ಇತ್ಯಾದಿ.
’ಮ್ಹಾಕಾ ಆತಾಂ ಪಯ್ಶೆ ನಾಕಾತ್ ಪುತಾ. ಪಯ್ಶೆ ನಾಕಾತ್. ಪಯ್ಶೆ ಮ್ಹಾಕಾ ಕಸಲೆಂ ಕರುಂಕ್? ಟಿ.ವಿ., ವಿಡಿಯೊ, ವಿದೇಶಿ ಸವ್ಲತೆನ್ ಭರ್ಲ್ಲ್ಯೊ ವಸ್ತು ಮ್ಹಾಕಾ
ಕಿತ್ಯಾಕ್? ಮ್ಹಾಕಾ ಜಾಯ್ ತುಜೊ ಮೋಗ್. ಮೊಗಾಭರಿತ್ ಕಾಗದ್. ಹ್ಯಾ ಉತರ್ ಪ್ರಾಯೆರ್ ಮ್ಹಾಕಾ ತುಂ ಜಾಯ್. ತುಜಿಂ ಮೊಗಾಚಿಂ ಉತ್ರಾಂ... ತುಜೆಂ ಲಾಂಬ್-ದೀಗ್ ಕಾಗದ್..’ ಕುಡಿನ್
ತಿಚ್ಯೆಂ ಕಾಳಿಜ್ ಭರೊನ್ ಆಯ್ಲೆಂ. ಖಟ್ಲ್ಯಾರ್ ತಿ ಆಡ್ ಪಡ್ಲಿ. ತಿಚ್ಯೆ ದೊಳೆ ತಿಣೆಂ ಧಾಂಪ್ಲೆ ತರೀ, ತಿಕಾ ಸರ್ವ್ ದಿಸ್ಲೆಂ-ತಿಚೆ ಆದ್ಲೆ ದೀಸ್.. ತೆ ’ಪರ್ನೆ’ ದೀಸ್.. ತಿಚಿಂ ಚಿಂತ್ನಾಂ
ಫಾಸಾಳ್ಳಿಂ ಸವ್ಕಾಸ್.
ತಾಂಚೆಂ ಕಾಜಾರ್ ಜಾವ್ನ್ ಪಾಂಚ್ ವರ್ಸಾಂನಿ ಜಲ್ಮಾಲ್ಲೊ ಮೆಕ್ಸಿ. ತಾಂಚೆಂ ಎಕ್ಚ್ ಬಾಳ್. ತಿಚೊ ಘರ್ಕಾರ್ ಅಂತೊನಾಮ್ ವೃತ್ತೆನ್ ಸುತಾರಿ. ಶಿಕಾಪ್ ತಾಕಾ ನಾತ್ಲ್ಲೆಂ ತರ್ಯೀ,
ಪಾಂಚ್ವಿ ಕ್ಲಾಸ್ ಶಿಕ್ಲ್ಲ್ಯಾ ನತಾಲ್ಬಾಎಲಾಗಿಂ ತೊ ಕಾಜಾರ್ ಜಾಲ್ಲೊ. ಪಾಂಚ್ ವರ್ಸಾಂನಿ ಜಲ್ಮಾಲ್ಲ್ಯಾ ಮೆಕ್ಸಿಕ್ ವ್ಹರ್ತ್ಯಾ ಮೊಗಾನ್ ಪಳೆಲ್ಲೆಂ ತಾಣಿಂ.
ವರ್ಸಾಂ ಧಾಂವ್ಲಿಂ.. ಮೆಕ್ಸಿನ್ ಇಸ್ಕೊಲಾಂತ್ ಶಿಕ್ಪಾಂತ್ ನಾಂವ್ ವ್ಹೆಲ್ಲೆಂ. ಹರ್ಯೆಕಾ ವರ್ಸಾ, ಪ್ರಥಮ್ ಯೆತಾಲೊ ತೊ. ವರ್ಸಾವಾರ್ ಜಾಂವ್ಚಾ ’ಸ್ಕೂಲ್ ಡೇ’ ವೆಳಾರ್ ತಾಕಾ
ಬಹುಮಾನಾಂ ಮೆಳ್ತಾಲಿಂ. ಮೆಟ್ರಿಕ್ ಪರಿಕ್ಷಾ ಸಂಪೆಲ್ಯಾ ಮೆಕ್ಸಿನ್, ತಾಂಚಾ ಇಸ್ಕೊಲಾಂತ್ ಪ್ರಥಮ್ ಸ್ಥಾನ್ ಜೊಡ್ಲ್ಲೆಂ. ಫಲಿತಾಂಶಾಚಿ ಖಬಾರ್ ಘರಾ ಹಾಡ್ನ್ ಆಯಿಲ್ಲ್ಯಾ ಮೆಕ್ಸಿನ್ ’ಅಪುಣ್ ಚಡಿತ್
ಶಿಕ್ತಾಂ’ ಮ್ಹಣ್ ಉಚಾರ್ಲೆಂ..
ಲಾಚಾರಿ ಆಂತೊನಾಮಾಚಿ ಲುಂಗಿ ಏಕ್ ಪಾವ್ಟಿಂ ಸಕ್ಲಾ ಗಳ್ಳಿ- ಪುತಾಚೆಂ ಉತಾರ್ ಆಯ್ಕೊನ್! ’ಪೂತ್ ಕೆದಾಳಾ ಮೆಟ್ರಿಕ್ ಕಾಬಾರ್ ಕರಿತ್, ಖಂಯ್ ಭಾಯ್ರ್ ಕಾಮ್ ಕರಿತ್’ ಮ್ಹಣ್
ಆಶೆತಾಲೊ ತೊ. ಪ್ರಾಯ್ ಜಾವ್ನ್ ಯೆತಾಲಿ ತಾಕಾ. ಇರ್ನೆಂ ಮಾರ್ನ್ ಮಾರ್ನ್ ತಾಚೆಂ ಖಾಡ್ ಪಿಕ್ಲ್ಲೆಂ.. ದೊಳೆ ಫೊಂಡಾಕ್ ಗೆಲ್ಲೆ.. ಪಾಟ್ ಭಾಗ್ವಾಲ್ಲಿ.. ಘಾಮಾನ್ ಬುಡ್ಲ್ಲೆಂ ತೊಂಡ್
ಪುಸುನ್ ತಾಣೆಂ ಪುತಾಕ್ ’ಸೈ’ ಘಾಲಿ.
ಕೊಲೆಜಿಂತ್ ಪಿ.ಯು.ಸಿ. ಕರ್ತಾನಾ ಬುಧ್ವಂತ್ಕಾಯೆನ್ ಸ್ಕೋಲರ್ಶಿಪ್ ಮೆಳ್ಳೆಂ. ಮಟ್ವಿಚಡ್ಡಿ ಆನಿ ಧವೆಂ ಕೊಮಿಸ್ ಘಾಲ್ನ್ ಪಿ.ಯು.ಸಿ.ಂತ್ ಮೆಕ್ಸಿ ಪಯ್ಲ್ಯಾ ವರ್ಗಾಂತ್
90%
ಅಂಕ್ ಕಾಡುನ್ ಉತ್ತೀರ್ಣ್ ಜಾಲ್ಲೊ.
"ಬಾಬಾ.. ಹಾಂವ್ ಮದ್ರಾಸ್ ಶಿಕೊಂಕ್ ವೆತಾಂ.." ತ್ಯಾ ಎಕಾ ರಾತಿಂ ಮೆಕ್ಸಿನ್ ಘರಾ ಭಿತರ್ಲೆಂ ಮೌನ್ ಮೊಡ್ಲೆಂ.
"ಮದ್ರಾಸ್! ಕಾಮ್ ಮೆಳ್ಳೆಂಗೀ ಪುತಾ..?" ಅಂತೊನಾಮ್ ದೊಳೆ ವಾಟಾರ್ನ್ ವಿಚಾರಿಲಾಗ್ಲೊ.
"ಹಾಂವ್ ಚಡ್ತಿಕ್ ಶಿಕೊಂಕ್ ಪಳೆತಾಂ ಬಾಬಾ.. ಮ್ಹಾಕಾ ಶಿಕಾಜಾಯ್! ಮ್ಹಾಕಾ ಇಂಜಿನಿಯರ್ ಜಾಯ್ಜಾಯ್ ಬಾಬಾ.." ಮೆಕ್ಸಿಚಿಂ ಉತ್ರಾಂ ಅರ್ಧ್ಯಾರ್ ರಾವ್ಲ್ಲಿಂ.
"ಇಂಜಿನಿಯರ್! ಹಾಂವ್ಯೀ ಎಕಾ ಥರಾನ್ ಇಜ್ನೆರ್
ಪುತಾ ಮ್ಹಜ್ಯಾ ಕಾಮಾಂತ್! ತುವೆಂ ವ್ಹಡ್ ಜಾಯ್ಜಾಯ್ ಪುತಾ.. ತುವೆಂ ವ್ಹಡ್ ಜಾಯ್ಜಯ್. ಪುಣ್ ತುಕಾ ಹಾಂವ್ ಕಿತೆಂ ದೀಂವ್ಕ್ ಸಕನ್?
ಮ್ಹಜೆಗಡೆ ಪಯ್ಶೆ ನಾಂತ್. ತುಕಾ ಪಯ್ಶೆ ನಾಸ್ತಾಂ ಕಸೆಂ ಶಿಕಂವ್?"
"ತುಂ ’ಜಾಯ್ತ್’ ಮ್ಹಣ್ ಸಾಂಗ್. ಮ್ಹಾಕಾ ತುವೆಂ ಮ್ಹಜ್ಯಾ ಜೆವ್ಣಾಚೆಂ ಪಳೆಲ್ಯಾರ್ ಪುರೊ. ಕೊಲೆಜಿಂತ್ಲ್ಯಾ ಲೆಕ್ಚರಾನ್ ಮ್ಹಾಕಾ ಮದ್ರಾಸಾಂತ್ ಭರ್ತಿ ಕರುಂಕ್ ವ್ಯವಸ್ಥಾ
ಕೆಲ್ಯಾ. ಪೂರಾ ಧರ್ಮಾರ್ಥ್.. ಫಕತ್ತ್ ಜೆವ್ಣಾಕ್.."
"ಕಿತೆ ಪಯ್ಶೆ ಪಡಾತ್ ಪುತಾ? ಕಿತ್ಲಿಂ ವರ್ಸಾಂ..?"
"ಮಹಿನ್ಯಾಕ್ ಕಾಂಯ್ ತಿನ್ಶಿಂ ರುಪಯ್ ಲಾಗ್ತಿತ್ ಬಾಬಾ,,?
ಮೆಕ್ಸಿಚಿಂ ಉತ್ರಾಂ ಅರ್ಧ್ಯಾರ್ ರಾವ್ಲಿಂ. ಉಪ್ರಾಂತ್ ಥಂಯ್ ಮೌನ್ ರಾಜ್ ಕರಿಲಾಗ್ಲೆಂ. ಬಾಪಾಯ್ಚೆಂ ಮೌನ್ಪಣ್ ಪಳೆವ್ನ್ ಆತಂಕಾನ್ ಆಸ್ಲ್ಲ್ಯಾ ಮೆಕ್ಸಿನ್ ಬಾಗ್ಲಾರ್ ಉಭಿ
ರಾವೊನ್ ಸರ್ವ್ ಆಯ್ಕಾತೆಲ್ಯಾ ನತಾಲ್ಬಾಯೆಚೆರ್ ಅಪ್ಲೆ ದೊಳೆ ಘುಂವ್ಡಾಯ್ಲೆ. ಮೆಕ್ಸಿಚೆ ದೊಳೆ ದುಕಾಂನಿ ಭರೊನ್ ಆಯಿಲ್ಲೆ ಪಳೆವ್ನ್ ನತಾಲ್ಬಾಯೆಕ್ ಪಳೆಂವ್ಕ್ ಜಾಲೆಂನಾ.
ಪುತಾ ಸರ್ಶಿಂ ಯೇವ್ನ್ ರಾವ್ಲಿ ತಿ.
"ಆಮ್ಕಾಂ ಆಸ್ಚೊ ಏಕ್ ಪೂತ್. ತಾಚೆಂ ಬರೆಂ ಫಾಲೆಂ ಜಾವ್ನಾಸಾ ಆಮ್ಚೆಂ ಋಣ್. ಪಯ್ಶೆ ಆಮ್ಚೆಲಾಗಿಂ ನಾಂತ್. ತರ್ಯೀ
ಆಮಿಂ ಕಿತೆಂಯ್ ಕರ್ನ್ ತಾಕಾ ಸಾಂಬಾಳ್ಯೆತ್
ಹೆಂ ಲ್ಹಾನ್ ಘರ್, ಹೊ ಮಿನಿನ್ ಹಿಂ ದೋನ್ ಕಾಂಕ್ಣಾಂ.."
ವರ್ಸಾಂ ಧಾಂವ್ಲ್ಲಿಂ. ಚ್ಯಾರ್ ವರ್ಸಾಂ ಉತರ್ಲಿಂ. ಇಂಜಿನಿಯರಿಂಗ್ ಪರೀಕ್ಷೆಂತ್ ಪ್ರಥಮ್ ಸ್ಥಾನ್ ಘೆವ್ನ್ ಆಯಿಲ್ಲ್ಯಾ ಪುತಾಚಿ ತಿ ಡಿಗ್ರಿಚಿ ಕೊವ್ಳಿ ಪಳೆವ್ನ್ ನತಾಲ್ಬಾಯೆಚೆ
ಆನಿ ಆಂತೊನಾಮಾಚೆ ದೊಳೆ ರುಂದಾಲೆ. ಹ್ಯಾ ಎಕಾ ಕೊವ್ಳೆ ಖಾತಿರ್ ತಾಣಿಂ ಕಿತೆಂ ಸರ್ವ್ ಸಾಕ್ರಿಫಿಸ್ ಕೆಲಾಂ - ಕಿತೆಂ ಸರ್ವ್ ಸಾಕ್ರಿಫಿಸ್ ಆನಿ ಧಂಡವ್ಣಿ ಕೆಲ್ಯಾ ತೆಂ
ತಿಂ ಮಾತ್ರ್ ಜಾಣಾಂತ್. ತಾಂಚಾ ಆಂಗಾಂತ್ಲೊ ಹರ್ ಏಕ್ ರಗ್ತಾಚೊ ಥೆಂಬೊ ತಾಣಿಂ ಮೆಕ್ಸಿ ಖಾತಿರ್ ಖರ್ಚಿಲ್ಲೊ. ಹಾತಾಂತ್ಲಿ ಕಾಂಕ್ಣಾಂ ಆನಿ ಗಳ್ಯಾಂತ್ಲಿ ಸರ್ಪಳಿ ಸರ್ವ್
ಮಾಯಾಗ್ ಜಾಲ್ಲಿ. ಉರ್ಲ್ಲಿಂ ಮ್ಹಳ್ಯಾರ್ ತೆಂ ಪರ್ನೆಂ ಘರ್ ಆನಿ ತಿಂ ಜಿವ್ಯಾ ಕಾಳ್ಜಾಂತ್ಲೆಂ ’ಪರ್ನೆಂ ಜೀವಿ’.
ಪುತಾಚಾ ಖರ್ಚಾ ಖಾತಿರ್ ಆಂತೊನಾಮಾನ್ ಕಾಡ್ಲ್ಲೆ ಕಷ್ಟ್ ಕಿತ್ಲೆ? ದೀಸ್ ಆನಿ ರಾತ್ ತೊ ಕಾಮ್ ಕರ್ತಾಲೊ. ದಿಸಾಚಿಂ ಚವೀಸ್ ವೊರಾಂ ಮ್ಹಳ್ಳೆಬರಿಂ ತಾಣೆ ಕಾಮ್ ಕೆಲ್ಲೆಂ.
ಘೊವಾಕ್ ಕುಮೊಕ್ ಜಾವ್ನ್ ಮ್ಹಳ್ಳೆಬರಿಂ ನತಾಲ್ಬಾಯೆನ್ ಘರಾ ಕೊಂಬಿಯೊ ಪೊಸ್ಲ್ಲ್ಯೊ ದುಕೊರ್ ಪೊಸ್ಲ್ಲೆ. ವೇಳ್ ಮೆಳ್ತಾನಾ ಆಂತೊನಾಮಾನ್ ಕಿಸುಳ್ ಮಾರ್ತಾನಾ ತಾಕಾ ಹಾತ್
ದಿಲ್ಲೊ ಆಸಾ. ಜಿಣಿ ಏಕ್ ಪಯ್ಣ್ ಆನಿ ತೆಂ ಪಯ್ಣ್ ಕಿತ್ಲ್ಯಾ ಕಷ್ಟಾಂಚೆಂ ತೆಂ ತಾಂಕಾಂ ಕಳಿತ್ ಜಾಲ್ಲೆಂ. ತರ್ಯೀ ತಿಂ ಹರ್ವಾಲಿಂನಾಂತ್. ಪುತಾಕ್ ದುರ್ಸಾಲಿಂನಾಂತ್. ಪುತಾಕ್
ನವೊ ಜೀವ್, ನವೊ ಉಜ್ವಾಡ್ ದೀಂವ್ಕ್ ಹಾ ಸಂಸಾರಾಂತ್ ಕಿತೆಂ ’ಉರ್ಲಾಂ’ ತೆಂ ತಾಣಿಂ ಕೆಲಾಂ.
ಮೆಕ್ಸಿಚಿ ಡಿಗ್ರೆಚಿ ಕೊವ್ಳಿ ಹಾತಿಂ ಘೆವ್ನ್ ಉಮೊ ಘೆತ್ಲ್ಲೊ ಆಂತೊನಾಮಾನ್. ಸಂತೊಸಾಚಿಂ ದೋನ್ ದುಕಾಂ ಉದೆಲಿಂ ತಾಚಾ ದೊಳ್ಯಾಂನಿ. ಪುಸ್ಲಿಂ ನಾಂತ್ ತಾಣೆಂ. ಆಪ್ಲ್ಯಾ
ಜಿವಿತಾಚಿ ಕೊಡ್ಹು ರುಜ್ವಾತ್ ಮ್ಹಣ್ ತಸೆಂಚ್ ತಿಂ ಗಿಳುನ್ ಸೊಡ್ಲಿಂ ತಾಣೆಂ.
ಸಬಾರ್ ವರ್ಸಾಂ ನಂತರ್ ಆಂತೊನಾಮಾಚಾ ತೊಂಡಾರ್ ಪಯ್ಲೆಂ ಪಾವ್ಟಿಂ ಉಲ್ಲಾಸಾಚೊ ಸುರ್ಯೊ ಪಳೆಲೊ ನತಾಲ್ಬಾಯೆನ್. ಆಪ್ಲೊ ಪೂತ್ ’ವ್ಹಡ್ ಮನಿಸ್’ ಜಾಂವ್ಕ್ ಆಪ್ಲ್ಯಾ
ಮೊಗಾಚಿ ’ಪುತ್ತುಶೆಟ್’ ಬಿಡಿ ಸಯ್ತ್ ತಾಣೆ ಸೊಡ್ಲ್ಲಿ! ರುಕಾಡಾಚೆಂ ಕಾಮ್ ಕರ್ತಾನಾ ಉಲ್ಲಾಸಿತ್ ಆಸೊಂಕ್ ಬಿಡಿ ವೊಡ್ತಾಲೊ ತೊ. ದಿಸಾಕ್ ಏಕ್ ಕಾಟ್ ಬಿಡಿಯೆಚೆ ಪಯ್ಶೆ ಉರಂವ್ಕ್
ತಾಣೆಂ ಬಿಡಿ ಸಂಪೂರ್ಣ್ ಸೊಡ್ಲಿ.
"ಬಾಬಾ.. " ತ್ಯೆ ರಾತಿಂ ಜೆವ್ತಾನಾ ಮೆಕ್ಸಿ ಉಲಯ್ತಾಲೊ, "ಮ್ಹಾಕಾ ಅಮೆರಿಕಾಕ್ ವಚೊಂಕ್ ಹಾವೆಂ ಅರ್ಜಿ... ಘಾಲ್ಯಾ."
"ತೆಂ ಕಂಪೆನಿಚೆಂ ನಾಂವ್ಗಿ ಪುತಾ? ತುಕಾ ಕಾಮ್ ಜಾಲೆಂಗೀ? ಮ್ಹಾಕಾ ಕಾಮ್ ಕರ್ನ್ ಪುರೊ ಜಾಲೆಂ ಪುತಾ.." ಮ್ಹಣಾಲೊ ಆಂತೊನಾಮ್. ಹೆಂ ಸತ್ ಜಾವ್ನಾಸ್ಲ್ಲೆಂ. ತೊ
ಕಾಮ್ ಕರ್ನ್ ಕರ್ನ್ ಹದಾ ಜಾಲ್ಲೊ. ತಾಕಾ ವಿಶೆವಾಚಿ, ವಿಶ್ರಾಂತೆಚಿ ಗರ್ಜ್ ಆಸ್ಲ್ಲಿ.
"ಅಮೆರಿಕಾ ಮ್ಹಳ್ಯಾರ್ ಪರ್ಗಾಂಚಾಕ್ ವಚೊಂಕ್ ಮ್ಹಾಕಾ ಸ್ಕೋಲರ್ಶಿಪ್ ಮೆಳ್ಳಾಂ ಬಾಬಾ.. ಹಾಂವ್ ಥಂಯ್ ಶಿಕ್ತಾಂ. ಶಿಕ್ತಾನಾ ಕಾಮ್ ಕರ್ತಾಂ.."
"ತುಂ ಪರ್ಗಾಂವಾಕ್ ವೆತಾಯ್ ಪುತಾ?" ಆಂತೊನಾಮ್ ತಸೆಂ ನತಾಲ್ಬಾಯ್ ಸಾಂಗಾತಾಚ್ ಹಾಂಕ್ರೆಲಿಂ, "ತುವೆಂ ಶಿಕ್ಲ್ಲೆಂ ಪಾವಾನಾಂಗಿ ಪುತಾ? ತುಂ ಆತಾಂ ವ್ಹಡ್ ಇಜ್ನೆರ್.
ತುವೆಂ ಶಿಕ್ಲ್ಲೆಂ ಚಡ್ ಜಾಲೆಂ. ತುವೆಂ ಪರ್ಗಾಂವಾಕ್ ಗೆಲ್ಯಾರ್ ಆಮ್ಚಿ ಗತ್..?" ತಾಂಚಿಂ ದುಃಖಾಭರಿತ್ ಉತ್ರಾಂ ಮೆಕ್ಸಿಚೆಂ ಕಾಳಿಜ್ ಏಕ್ ಪಾವ್ಟಿಂ ಶಿಂಧುಂಕ್
ಪಾವ್ಲಿಂ.
’ನಶಿಬಾಂತ್ ಮೆಳ್ಚೊ ಅಪೂರ್ವ್ ಸಂದರ್ಭ್ ಹೊ! ಸ್ಕೋಲರ್ಶಿಪ್ ಅಸಲ್ಯಾ ಸರ್ವ್ ಸಿಂತಿಮೆಂತಾಂ ಖಾತಿರ್ ಸೊಡ್ಲ್ಯಾರ್ ಹೊ ಸಂದರ್ಭ್ ಪರ್ತುನ್ ಮೆಳಾತ್..?’ ಮೆಕ್ಸಿನ್ ತಾಚೆಯಿತ್ಲ್ಯಾಕ್
ಸವಾಲ್ ಕರ್ನ್, ನಂತರ್ ಆಪ್ಲ್ಯಾ ಆವಯ್-ಬಾಪಾಯ್ಕ್ ಸಾರ್ಕೆಂ ಸಮ್ಜಾಯ್ಲೆಂ.
"ಫಕತ್ತ್ ತೀನ್ ವರ್ಸಾಂಕ್ ಬಾಬಾ.. ಹಾಂಗಾ ಥಾವ್ನ್ ಥಂಯ್ಸರ್ ವೆಚೆಂ! ಖರ್ಚ್ ಮಾತ್ರ್ ಪಳೆಂವ್ಕ್! ಘರ್-ಜಾಗೊ ಆಡವ್ ಘಾಲ್ಯಾರ್ ಜಾಲೆಂ. ಥಂಯ್ ಗೆಲ್ಯಾ ನಂತರ್ ಫಾರಿಕ್
ಕರ್ಚೆಂ.."
"ಫಕತ್ತ್ ತೀನ್ ವರ್ಸಾಂ.. ಘರ್ ಜಾಗೊ ಆಡವ್ ಘಾಲ್.. ತೀನ್ ವರ್ಸಾಂ ನಂತರ್ ಜಿಣಿಭರ್ ಕಿತೆಂಯ್ ಕರಿಜಾಯ್ ಮ್ಹಣ್ ನಾ.. ಸರ್ವ್ ಅಪಾಪಿಂಚ್ ಯೆತೆಲೆಂ.. ಅಪ್ಲೇಸ್ತಕಿಂ.."
ಮೆಕ್ಸಿನ್ ಸಮ್ಜಾಯ್ಲೆಂ. ಆಪ್ಲೆ ದುಃಖಾಂಚೆಂ ದೊಳೆ ಅಪ್ಲ್ಯಾ ಹಾತಾಂನಿ ಪುಸುನ್ ತಾಂಕಾಂ ಸಮಧಾನ್ ಕೆಲೆಂ..
ಏಕ್ ದೀಸ್ ಮೆಕ್ಸಿ ಅಮೆರಿಕಾಕ್ ಉಭ್ಲೊ. ಕಾಗ್ದಾಂ ಬರಯ್ಲಿಂ ತಾಣೆಂ ಪಯ್ಶೆ ಧಾಡ್ಲೆ. ಆಂತೊನಾಮ್ ತಾಂಕ್ಲ್ಯಾರ್ ಕಾಮ್ ಕರ್ತಾಲೊ. ತಾಂಕಾನಾತ್ಲ್ಯಾ ವೋಲ್ ಪಾಂಗ್ರುನ್
ನಿದ್ತಾಲೊ. ನತಾಲ್ಬಾಯೆನ್ ಕುಂಕ್ಡಾಂ ಪೊಸ್ಚೆಂ ತಸೆಂ ದುಕೊನ್ ಪೊಸ್ಚೆಂ ಬಂಧ್ ಕೆಲ್ಲೆಂ. ಘರಾ ಖರ್ಚಾಕ್
ಮ್ಹಣ್ ಮಾತ್ರ್ ದೋನ್-ಚ್ಯಾರ್ ಕುಂಕ್ಡಾಂ ಪೊಸ್ಲ್ಲಿಂ
ತಿಣೆಂ.
ಏಕ್ ದೀಸ್ ರಾತಿಂ ಆಂತೊನಾಮಾಕ್ ಹರ್ಧ್ಯಾಂತ್ ದೂಕ್ ಆಯ್ಲಿ. ಸೆಜಾರ್ಚಾ ಲೊಕಾಚ್ಯೆ ಸಹಾಯೆನ್ ತಾಕಾ ಆಸ್ಪತ್ರೆಕ್ ವ್ಹೆಲ್ಯಾರ್ಯೀ ವಾಂಚಂವ್ಕ್ ಜಾಲೆಂನಾ. ನತಾಲ್ಬಾಯೆಕ್
ವಿಧನ್ ಕರ್ನ್ ತೊ ಸಂಸಾರ್ ಸೊಡ್ನ್ ಗೆಲ್ಲೊ.
ನತಾಲ್ಬಾಯ್ ರಡ್ಲ್ಲಿ ಕಾಳಿಜ್ ಫುಟ್ತಾಸರ್. ತಿಕಾ ಆಂತೊನಾಮಾಚೆಂ ನಿತಳ್ ’ಕಾಳಿಜ್’ ಉಗ್ತೆಂ ದಿಸ್ತಾಲೆಂ. ಪುತಾಕ್ ಶಿಕಂವ್ಕ್ ತಾಣೆಂ ರಾತ್ ದೀಸ್ ಮ್ಹಳ್ಳೆಂ ಲೆಕಿನಾಸ್ತಾಂ
ಕಾಮ್ ಕೆಲ್ಲೆಂ. ಪುತಾ ಮೆಕ್ಸಿಕ್ ಏಕ್ ನವೊ ಮನಿಸ್ ಕರುಂಕ್ ತಾಣೆಂ ತಾಚೆಂ ರಗತ್ ಆಟಯಿಲ್ಲೆಂ. ಅಂತ್ಯಾಕ್ ಸರ್ವ್ ಸೊಡ್ನ್ ಗೆಲ್ಲೊ ತೊ.
ಮೆಕ್ಸಿಕ್ ಖಬರ್ ಪಾವಿತ್ ಜಾಲಿ. ಕಿತೆಂ ಕರ್ತಲೊ ತೊ? ತಾಚೆಂ ಅಂತಿಮ್ ವರಸ್. ಪರಿಕ್ಶಾ ಮುಕಾರ್ ದಿಸ್ತಾಲೊ. "ಮಾಫ್ ಕರಾ. ಹಾಂವ್ ಯೇಂವ್ಕ್ ಸಕಾನಾ." ಟೆಲಿಗ್ರಾಮಾ
ಮುಖಾಂತ್ರ್ ಕಳಯಿಲ್ಲೆಂ ತಾಣೆಂ. ಆಂತೊನಾಮಾಚಿಂ ಹಾಡ್ಕುಟಿಂ ಹಾಡಾಂ ಮಾತ್ಯೆಕ್ ಸೆರ್ವಾಲಿಂ. ಮೆಕ್ಸಿ ವಚೊನ್ ವರ್ಸಾಂ ತೀನ್ ಉಭ್ಲ್ಲಿಂ. ನತಾಲ್ಬಾಯೆಕ್ ಕಾಗ್ದಾಂ ಯೆತಾಲಿಂ. ಮಹಿನ್ಯಾ-ಮಹಿನ್ಯಾಕ್
ಪಯ್ಶೆ ಯೆತಾಲೆ. ಏಕ್ ದೀಸ್ "ಗಾಂವಾಕ್ ಯೆತಾಂ" ಮ್ಹಣ್ ಕಾಗಾದ್ ಬರಯಿಲ್ಲೆಂ ತಾಣೆಂ.
ಗಾಂವಾಕ್ ಪಾವ್ಲ್ಲ್ಯಾ ಮೆಕ್ಸಿಕ್ ಪಳೆವ್ನ್ ನತಾಲ್ಬಾಯೆಕ್ ಅಂತೊನಾಮ್ ಅಂತರ್ಲ್ಯಾರ್ಯೀ ’ಪೂತ್ ಆಯ್ಲೊ ನ್ಹಯ್ವೆ’ ಮ್ಹಣ್ ತತ್ಕಾಲಾಕ್ ಸಮಧಾನ್ ಭೊಗ್ಲೆಂ. ದೂಃಖ್ ವಿಸರ್ಲಿ ತಿ.
ಗೊರೊ ಗೊರೊ ಜಾವ್ನ್ ಪಳೆಂವ್ಕ್ ದೊರ್ಯಾ ಸಾಯ್ಬಾಬರಿ ದಿಸ್ಲೊ ತಿಚೊ ಪೂತ್ ತಿಕಾ. ’ತಾಕಾ ಏಕ್ ಕಾಜಾರ್ ಕೆಲ್ಯಾರ್, ಇತ್ಲ್ಯಾ ವರ್ಸಾಂಚೆಂ ಆಪ್ಣಾಚೆಂ ಕಷ್ಟಿ ತಸೆಂ ದುಃಖೀ-ಜೀವನ್
ಸಾರ್ಥಕ್ ಜಾಯ್ತ್’ ಮ್ಹಣ್ ಭೊಗ್ಲ್ಲೆಂ ತಿಕಾ.
ಗಾಂವಾಕ್ ದೆಂವ್ಲ್ಲ್ಯಾಮೆಕ್ಸಿನ್ ’ಕಾಜಾರ್ ಜಾವ್ನ್ ಹಾಂವ್ ಪಾಟಿಂ ವೆತಾಂ’ ಮ್ಹಳ್ಳೆಂ ಸಾಂಗ್ಲ್ಲೆಂ ಆಯ್ಕೊನ್ ತಿಚಿ ತಕ್ಲಿ ಘುಂವ್ಲಿ. ಪಯ್ಲೆ ಪಾವ್ಟಿಂ ತಿಕಾ ಪುತಾಚೊ ರಾಗ್ ಆಯ್ಲೊ.
ಪುತಾಚಾ ಯೆಣ್ಯಾ ಉಪ್ರಾಂತ್ ಆಂತೊನಾಮಾಚೊ ಉಗ್ಡಾಸ್ ಆಯ್ಲೊ ತಿಕಾ. ಪಯ್ಲೆಂ ಪಾವ್ಟಿಂ ಕಾರಣ್ ನೆಣಾಸ್ತಾಂ ಮ್ಹಳ್ಳೆಬರಿ ದುಃಖಾಂ ಗಳ್ಳಿಂ ತಿಚಾ ದೊಳ್ಯಾಂನಿ.
ಖೂಬ್ ರಡ್ಲಿ ತಿ. ಉಪ್ರಾಂತ್ಲೆಂ ಸರ್ವ್ ಸಲೀಸ್ ಜಾಲೆಂ. ತಾಣೆಂ ಮದ್ರಾಸ್ ಆಸ್ತಾಂ ಮೋಗ್ ಕೆಲ್ಲ್ಯಾ ಎಕೆ ಚಲಿಯೆಲಾಗಿಂ - ವೀರಾಲಾಗಿಂ ತಾಚೆಂ ಕಾಜಾರ್ ಮದ್ರಾಸಾಂತ್ ಜಾಲೆಂ.
ಪುತಾಕ್ ದುಖಂವ್ಕ್ ’ಕಳಾನಾಸ್ತಾಂ’ ಕಾಜಾರಾಕ್ ಗೆಲ್ಲಿ ತಿ.
ಮೆಕ್ಸಿ ಸಂಗಿಂ ಆಯಿಲ್ಲೆಂ ವೀರಾ, ಮೆಕ್ಸಿ ಗೆಲ್ಲ್ಯಾ ಪಾಟಾಪಾಟ್
ಪಾಟಿಂ ಮದ್ರಾಸಾಕ್ ಗೆಲ್ಲೆಂ. ಮೆಕ್ಸಿ ಪಾಟಿಂ ವೆಚಾ ಆಧ್ಲ್ಯಾ ರಾತಿಚಾ ಜೆವ್ಣಾ ವೆಳಾರ್ ಉಲಯಿಲ್ಲೊ ತೊ -
"ಮಾಂಯ್, ತುವೆಂ ಮ್ಹಾಕಾ ’ಹ್ಯಾ’ ಸ್ಥಿತೆರ್ ಹಾಡುಂಕ್ ಕಿತೆಂ ಕೆಲಾಂಯ್ ತೆಂ
ಹಾಂವ್ ಜಾಣಾ. ಹ್ಯಾ ಮುಕಾರ್ ತುಕಾ ’ಬರೆಂ’ ಉತ್ತೀಮ್ ಜೀವನ್ ದಿತಲೊಂ.
ಮ್ಹಾಕಾ ಬರೆಂ ವ್ಹಡ್ಲೆಂ ಕಾಮ್ ಮೆಳ್ಳಾಂ. ಹೆಂ ಘರ್ ಹಾಂವ್
ನವ್ಯಾನ್ ಬಾಂಧ್ತಲೊಂ. ತುವೆಂ ಹ್ಯಾ ಮುಕಾರ್ ಕಸೆಂ ಜಿಯೆಜಾಯ್ ತೆಂ
ಹಾಂವ್ ತುಕಾ ಮ್ಹಜಾ ಪಯ್ಶ್ಯಾಂನಿ ಕಳಿತ್ ಕರ್ತಲೊಂ.. ಯೆದೊಳ್
ಪರ್ಯಾಂತ್ ತುವೆಂ ಪಯ್ಶ್ಯಾಂ ಖಾತಿರ್ ಕಸ್ಟ್ ಕಾಡ್ಲೆಯ್..
ಹ್ಯಾ ಮುಕಾರ್.."
ತಿ ತೆದ್ನಾಂ ಕಿತೆಂಯ್ ಉಲಯಿಲ್ಲಿ ನಾ. ಎಕಾ ತೆಂಪಾರ್ ಪಯ್ಶೆ ತಾಂಕಾಂ ಗರ್ಜ್ ಆಸ್ಲ್ಲೆ.
ಪುತಾಚಾ ಭವಿಶ್ಯಾಖಾತಿರ್, ಎಕಾ ಬರ್ಯಾ ಫುಡಾರಾಕ್! ಆತಾಂ ತಿ ಎಕ್ಸುರಿ!
ಪೂತ್ ಪರ್ಗಾಂವಾಂತ್ ಆನಿ ವೀರಾಯ್ ವೆತಾ ಫಾಲ್ಯಾಂ. ಪಯ್ಶೆ ಕಿತೆಂ ಕರುಂಕ್? ತಿಣೆಂ ತಿಕಾಚ್
ಸವಾಲ್ ಕೆಲ್ಲೆಂ. ಮೆಕ್ಸಿನ್ ಸಾಂಗ್ಲೆಲ್ಯಾಬರಿಂಚ್ ಕೆಲ್ಲೆಂ.
ಮಹಿನ್ಯಾ ಮಹಿನ್ಯಾಕ್ ಪಯ್ಶೆ.. ತೆಂ ಘರ್ ಆಡವಾಂತ್ಲೆಂ
ಸೊಡವ್ನ್, ಹ್ಯಾ ಘರಾಚೆಂ ರೂಪ್ ನವ್ಯಾನ್ ಬದ್ಲಿಲ್ಲೆಂ ತಾಣೆಂ ತರೀ ತಾಚಿಂ ಕಾಗ್ದಾಂ
ಮಾತ್ರ್ ಲ್ಹಾನ್ ಜಾಲ್ಲಿಂ. ಘರಾ ಟೆಲಿಫೋನ್ ಘಾಲ್ಲೆಂ. ಹಫ್ತ್ಯಾಕ್ ಏಕ್
ಪಾವ್ಟಿಂ ಉಲಯ್ತಾಲೊ ತೊ. ’ಏಕ್ ಬರೆಂ ಸುಂದರ್ ಕಾಗದ್ ಬರಯ್
ಪುತಾ’ ಹಜಾರ್ ಪಾವ್ಟಿಂ ಸಾಂಗ್ಲ್ಲೆಂ ತಿಣೆ ಟೆಲಿಫೋನಾರ್ ’ಹಾಂವ್
ಏಕ್ದಮ್ ’ಬಿಜಿ’ ಮಾಂಯ್.. ಮ್ಹಾಕಾ ವೇಳ್ ಕಿತೆಂ ತೆಂ ಆತಾಂ
ಹಾಂಗಾ ಕಳಿತ್ ಜಾಲಾಂ’ ಮೆಕ್ಸಿಚಿ ಸದಾಂಚಿ ಜಾಪ್.
ನತಾಲ್ಬಾಯೆಚಿಂ ಚಿಂತ್ನಾಂ ಜಾಗಿಂ ಜಾಲಿಂ. ತಿಚೆಂ ಪಾಟ್ಲೆಂ ಜೀವನ್
ಮತಿಂತ್ಲೆಂ ’ಜಿಗ್ಗ್’ ಜಾವ್ನ್ ಆಯಿಲ್ಲೆಂ -ಭಾಯ್ರ್ ಗೆಲೆಂ, ಉಶೆಂ ಉಕ್ಲುನ್ ಕಾಗ್ದಾಂಚೆರ್
ಹಾತ್ ಚರಯ್ಲೊ ತಿಣೆ. ಎಕೇಕ್ ಕಾಗದ್ ಕಾಡ್ನ್ ಪರತ್ ವಾಚ್ಲೆಂ ತಿಣೆಂ.
"ಮಾಂಯ್ ತುಂ ’ಹೆಪ್ಪಿ’ ರಾವ್. ತುವೆಂ ಆದಿಂ ಕಷ್ಟ್ ಕಾಡ್ಲ್ಯಾಯ್. ಆತಾಂ ತುವೆಂ
ಸಂತೊಸಾರ್ ರಾವಾಜಯ್.."
"ವೀರಾ ಬಾಳಾಂತ್ ಜಾಲಾಂ, ಚೆರ್ಕೊ, ನಾಂವ್ ಜೇಮ್ಸ್."
"ಹಾವೆಂ ಪಾರ್ಸೆಲಾರ್ ತುಕಾ ವಸ್ತು ಧಾಡ್ಲ್ಯಾತ್." ನತಾಲ್ಬಾಯೆನ್
ಬೆಜಾರಾಯೆನ್ ಕಾಗ್ದಾಂ ಧಾಂಪ್ಲಿಂ. ಏಕ್ ಬರೆಂ ಸುಂದಾರ್ ಸವಿಸ್ತಾರ್ ಕಾಗದ್ ಅಪೇಕ್ಷಿಲ್ಲೆಂ ತಿಣೆಂ.
ತಿಕಾ ತ್ಯಾ ಕಾಗ್ದಾಂನಿ ಮೆಳ್ಳಿಂ ಫಕತ್ - ’ಪಯ್ಶೆ’ ಆನಿ ಸಂತೊಸಾನ್ ರಾವ್..!
ನತಾಲಾಂಕ್ ಏಕ್ ಹಾಫ್ತೊ ಉರ್ಲ್ಲೊ. ಮೆಕ್ಸಿಚೆಂ ಫೋನ್ ಆಯಿಲ್ಲೆಂ ತ್ಯಾ
ದೀಸ್. ’ಹಾಂವ್ ಆನಿ ಕುಟಾಂಬ್ ಗಾಂವಾಕ್ ಯೆತಾಂವ್ ನತಾಲಾಂ
ಪಯ್ಲೆಂ’. - ಹೆಂ ಉತಾರ್ ಆಯ್ಕೊನ್ ನತಾಲ್ಬಾಯೆಚೆಂ ಕಾಳಿಜ್ ಏಕ್
ಪಾವ್ಟಿಂ ಸಂತೊಸಾನ್ ಉಡ್ಲೆಂ.
ಚ್ಯಾರ್ ವರ್ಸಾಂ ಉತ್ರಾಲ್ಲಿಂ -ಮೆಕ್ಸಿ ಪಾಟಿಂ ವಚೊನ್. ಆಪ್ಲ್ಯಾ
ನಾತ್ವಾಕ್ ಪಳೆಂವ್ಕ್ ತಿಚೆ ದೊಳೆ ಖೊರ್ಜುತಾಲೆ.
ತಿಕಾ ಫೋನ್ ಆಯಿಲ್ಲ್ಯಾ ಘಡಿಯೆ ತಾಂಗೆರ್ ಆವಾಜ್ ಸುರು ಜಾಲೊ. ರೊಜ್ಲಿ ಯೆದೊಳ್
ಪರ್ಯಾಂತ್ ಸಮಾ ಕಾಮ್ ನಾಸ್ತಾಂ ಆಳ್ಶಿ ಜಾಲ್ಲ್ಯಾ ತಾಕಾ
ನತಾಲ್ಬಾಯೆನ್ ದಿಲೆಂ ಫರ್ಮಾಣ್ ಪಳೆವ್ನ್ ಕಾಂಪ್ಲೆಂ ತೆಂ, ’ನತಾಲಾಂಕ್ ಕುಸ್ವಾರ್ ತಯಾರ್ ಕರುಂಕ್ ಜಾಯ್.
ಲಾಡು, ಪಾತೆಕಾಂ, ಕಿಡಿ, ನೆವ್ರ್ಯೊ, ಕೊಕ್ಕಿಸಾಂ, ಚಾಕ್ಲ್ಯೊ ಇತ್ಯಾದಿ..
ಮೆಕ್ಸಿಚಾ ಪಸಂದೆಚಿಂ ಖಾಣಾಂ ಕರುಂಕ್ ವಸ್ತು ರಾಸ್ ಪಡ್ಲ್ಯೊ. ದುಕ್ರಾಚಿ ಕಾಳಿಜ್ ಆನ್ಕಿಟಿ
ಬೊಕ್ರ್ಯಾಚಿ ಬೊಟಿ ಇತ್ಯಾದಿ..
ಫಕತ್ತ್ ಮೆಕ್ಸಿ ಆನಿ ತಾಚೆಂ ಕುಟಾಂಬ್ ಯೇಂವ್ಕ್ ಜಾಯ್ ಆಸ್ಲ್ಲೆಂ. ರೊಜ್ಲಿನ್
ನತಾಲ್ಬಾಯೆನ್ ಸಾಂಗ್ಲೆಲ್ಯಾಬರಿಂ ಕುಸ್ವಾರಾಚೆಂ ಕಾಮ್ ಭರಾನ್
ಹಾತಿಂ ಘೆತ್ಲೆಂ. ಲ್ಹಾನ್ ಆಸ್ತಾನಾ ಮೆಕ್ಸಿಕ್ ಏಕ್ಧಮ್ ಪಸಂದ್ ಆಸ್ಲಿ
ಸುರ್. ನತಾಲ್ಬಾಯೆನ್ ಹಳ್ಳೆ ಥಾವ್ನ್ ದೋನ್ ಬೊತ್ಲಿ ಅಪುಣ್
ಸುರ್ ಹಾಡುಂಕ್ ಫರ್ಮಾಯ್ಲೆಂ. ಮೊಗೊರ್ಲ್ಯಾಕ್ ನಂಯ್ಚಿ ತಾಜಾ
ಮಾಸ್ಳೆಖಾತಿರ್ ಕಂತ್ರಾಟ್ ದಿಲೆಂ.
ತಿ ಮೆಕ್ಸಿಕ್ ರಾಕ್ತಾಲಿ.
ತೊ ದೀಸ್ ಉದೆಲೊ. ನತಾಲಾಂತ್ ಫಕತ್ತ್ ದೋನ್ ದೀಸ್ ಉರ್ಲ್ಲೆ. ಆಂತೊನಾಮ್
ಸರ್ಲೆಲ್ಯಾ ಉಪ್ರಾಂತ್ ತ್ಯಾ ಘರಾಂತ್ ಆವಾಜ್ ನಾತ್ಲೊ. ಆತಾಂ ಪರತ್ ಯೇಂವ್ಕ್ ಆಸ್ಚಾ
ಮೆಕ್ಸಿವರ್ವಿಂ ಜಿವಾಳ್ಳೊ. ಘರ್ ಚಟುವಟಿಕಾಂನಿ ಭರ್ಲೆಂ. ಪುತಾಕ್,
ಸುನೆಕ್ ತಸೆಂ ಗುಂಡು-ಗುಂಡು ಜಾವ್ನಾಸ್ಲೆಲ್ಯಾ ನಾತ್ವಾಕ್ ಪಳೆವ್ನ್
ನತಾಲ್ಬಾಯೆಚೆಂ ಕಾಳಿಜ್ ಆನಂದಾನ್ ಉಮಾಳ್ಳೆಂ. ಉಮ್ಯಾಂಚೊ ಶಿಂವೊರ್
ವೊತ್ಲೊ ತಿಣೆ ತಾಚೆರ್. ಮೊಗಾನ್ ಹರ್ಧ್ಯಾಕ್ ದಾಂಬೂನ್ ಧರ್ಲೆಂ ತಿಣೆಂ. ಕಿತ್ಲೊ ವೇಳ್ ತಿಕಾ ಕಳ್ಳೆಂ
ನಾ. ನತಾಲ್ಬಾಯೆನ್ ಭಿತರ್ ಥಾವ್ನ್ ಸುರ್ ಹಾಡ್ನ್ ಮೆಕ್ಸಿಕ್ ದಿಲಿ.
"ಕಿತೆಂ ಮಾಂಯ್..?" ಮೆಕ್ಸಿ ವಿಚಾರಿ.
"ಸುರ್ ಪುತಾ.. ತುಜಾ ಮೊಗಾಚೊ...! ಹಾವೆಂ ಏಕ್ ಮಹಿನೊ
ಅಪುಟ್ ಸುರ್ ಹಾಡುಂಕ್ ಸಾಂಗ್ಲಾಂ.."
"ಏಕ್ ಮಹಿನೊ?" ಮೆಕ್ಸಿಚಾ ತೊಂಡಾರ್ ಜಾಂವ್ಚಾ ಅಜಾಪಾಚಿಂ ಖುಣಾಂ
ವಾಚುಂಕ್ ವೇಳ್ ಕೆಲೊ ನಾ ನತಾಲ್ಬಾಯೆನ್.
ತಿತ್ಲ್ಯಾರ್ ಭಿತರ್ ಥಾವ್ನ್ ವಿವಿಧ್ ಕುಸ್ವಾರ್ ’ಟ್ರೇ’ಂತ್ ಘಾಲ್ನ್
ಹಾಡ್ನ್ ಆಯ್ಲೆಂ ರೊಜ್ಲಿ.
"ಹೆಂ ಕಿತೆಂಗೊ?" ಮೆಕ್ಸಿ ಉಲಯ್ಲೊ.
"ಕುಸ್ವಾರ್ ಬಾಬಾ.."
"ಕುಸ್ವಾರ್? ಹೊ ಕೆದಾಳಾ ಖಾಂವ್ಚೊ?" ತಿತ್ಲೆಂ ಸಾಂಗೊನ್
ಮೆಕ್ಸಿನ್ ಏಕ್ ಚಾಕ್ಲಿ ಕಾಡ್ಲಿ.
"ಖಾ ಪುತಾ.. ತುಜೆ ಖಾತಿರ್ ಕೆಲ್ಯಾತ್ ಪುತಾ, ಥಂಯ್ ತುಕಾ
ಹೆಂ ಪೂರಾ ಖಂಯ್ ಮೆಳ್ತಾ? ಹಾವೆಂ ಕೆಲ್ಲಿ ಪುತಾ.." ನತಾಲ್ಬಾಯೆನ್ ಒತ್ತಾಯ್ ಕೆಲಿ.
"ಮಾಂಯ್.." ಕಿತೆಂ ಕರ್ಚೆಂ ತೆಂ ಕಳಿತ್ ನಾಸ್ತಾಂ ಮೆಕ್ಸಿ ಉಲಯ್ಲೊ.
"ಹೆಂ ಪೂರಾ ತುವೆಂ ಕಿತ್ಯಾಕ್ ಕೆಲೆಂಯ್? ಹೆಂ ಪೂರಾ ಖೆಲ್ಯಾರ್
ಮ್ಹಜೊ ಜೀವ್ ಪಾಡ್ ಜಾಯ್ತ್.. High Protein cholestrol ಆಸಾತ್
ಹಾಂತುಂ. ಮ್ಹಾಕಾ ಪುಣಿ ನಾಕಾ ಮಾಂಯ್.."
ನತಾಲ್ಬಾಯೆಕ್ ಕಾಳ್ಜಾಂತ್ ’ಕಸ್ಕ್’ ಜಾಲೆಂ. ಕಿತ್ಲ್ಯಾ ಮೊಗಾನ್ ತಿಣೆ ಕುಸ್ವಾರ್ ಕೆಲ್ಲೊ.
ಪೂತ್ ತರ್ಯ್ ಕಿತೆಂ ಮ್ಹಣ್ತಾ?
"ಕಿತೆಂ ತೆಂ Protein cholestrol
"ತೆಂ ಆಸ್ಲ್ಯಾರ್ ಮನಿಸ್ ಮೊಟೆ ಜಾತಾತ್. ತಾಂಕಾಂ ಕಾಳ್ಜಾಚಿ ಪಿಡಾ
ಸುರು ಜಾಂವ್ಕ್ ಸಾಧ್ಯ್ ಆಸಾ.."
"ತುಂ ಜಾಲಾಯ್ ಪಳೆ. ತುಕಾ ಮೊಟೊ ಕರ್ನ್ ಧಾಡ್ತೆಲಿಂ"
ನತಾಲ್ಬಾಯೆನ್ ಸೊಡ್ನ್ ದಿಲೆಂ ನಾ.
ಮೆಕ್ಸಿ ಭಿತರ್ ಗೆಲೊ. ಸೂಟ್ಕೇಸ್ ಉಗ್ತಿ ಕರ್ನ್ ಕಾಪಾಡ್ ಆನಿ ಇತರ್
ವಸ್ತು ನತಾಲ್ಬಾಯೆಚಾ ಹಾತಾರ್ ಘಾಲ್ಯೊ.
"ಹೆಂ ತುಕಾ ಮಾಂಯ್! ನತಾಲಾಂಕ್ ತುವೆಂ ’ಹೆಪ್ಪಿ’ ಆಸ್ಲ್ಯಾರ್ ಜಾಲೆಂ. ತುಕಾ ಕಿತೆಂ ಜಾಯ್ ತೆಂ
ಸಾಂಗ್. ತುವೆಂ ಕಿತೆಂಯ್ ಹಾಡಿಜಾಯ್ ಮ್ಹಣ್ ನಾ. ಹಾವೆಂ
ಮೋತಿ-ಮಹಲಾಂತ್ ಧಾ ದಿಸಾಂಕ್..”Suite" ರಿಸರ್ವ್
ಕೆಲಾಂ. ಆಮಿ ಸರ್ವಾಂ ಥಂಯ್ ಯಾ, ತುಕಾ ಹಾವೆಂ ಸಂತೊಸ್
ಕರುಂಕ್.."
ನತಾಲ್ಬಾಯೆಚಾ ಕಾನಾಂಕ್ ಘಡ್ಗಡೊ ಮಾರ್ಲ್ಲ್ಯಾಬರಿಂ
ಜಾಲೆಂ. ತಿಕಾ ಪಾತ್ಯೆಂವ್ಕ್ ಜಾಲೆಂನಾ. ತಕ್ಲಿ ಘುಂವ್ಲ್ಲೆಬರಿಂ ಜಾಲ್ಯಾರ್ಯೀ ತಿಣೆಂ ತಿಕಾಚ್
ಸಾಂಬಾಳುನ್ ವೊಣ್ತಿಕ್ ತೆಂಕುನ್ ರಾವ್ಲಿ ತಿ. ತಿಕಾ ಕಳಾನಾಸ್ತಾನಾ ದುಃಖಾಂ ಗಳೊಂಕ್
ಸುರು ಜಾಲಿಂ.
"ಮಾಂಯ್ ತುಂ ರಡ್ತಾಯ್? ಕಿತೆಂ ಜಾಲೆಂ ತುಕಾ..?"
ಮೆಕ್ಸಿ ಹುಳ್ವುಳ್ಳೊ -
"ತುಂ ಹುಶಾರ್ ನಾಯ್..?"
"ಹಾಂವ್ ಹುಶಾರ್ ನಾತ್ಲ್ಲಿಂ ಆತಾಂ ಹುಶಾರ್ ಜಾಲಿಂ ಪುತಾ.. ತುಮ್ಚ್ಯಾ
ಮೊಗಾನ್ ಹಾಂವ್ ಹುಶಾರ್ ನಾತ್ಲ್ಲಿಂ. ತುಮಿ ’ಥಂಯ್’ ರಾವಾ
ಪುತಾ. ಹಾಂವ್ ಹಾಂಗಾಚ್ ರಾವ್ತಾಂ. ತುಜಾ ಉಗ್ಡಾಸಾಕ್ ಸುರ್
ಪಿಯೆವ್ನ್, ತುಜಾ ಮೊಗಾನ್ ಕುಸ್ವಾರ್ ಖಾವ್ನ್ ತುಜಾ ಸಂತೊಸಾನ್ ರಾಂದ್ಲ್ಲೆಂ
ಖಾವ್ನ್, ಹಾಂವ್ ’ಹೆಪ್ಪಿ’ ರಾವ್ತಾಂ ಪುತಾಂ. ತುಮಿಂ ’ಥಂಯ್’
ಹೆಪ್ಪಿ ರಾವಾ.
ಹಾಂವ್ಯೀ ಹೆಪ್ಪಿ ರಾವ್ತಾಂ. ಮ್ಹಾಕಾ ಹ್ಯೆ ಪ್ರಾಯೆರ್ ಕಿತೆಂ
ಜಾಯ್?"
ತಿಣೆ ಕಾಪ್ಡಾಚಾ ಪಾಲ್ವಾನ್ ದೊಳೆ ಪುಸ್ಲೆ.
ಥೊಡ್ಯಾ ವೆಳಾನ್ ಮೆಕ್ಸಿ, ವೀರಾ ಆನಿ ನಾತು ಜೇಮ್ಸ್ ಗೆಲಿಂ. ವೆಚಾ ವಾಟೆಕ್ ಪಳೆವ್ನ್ ನತಾಲ್ಬಾಯೆಚೆ ದೊಳೆ ಭರೊನ್ ಆಯ್ಲೆ. ರೊಜ್ಲಿನ್ ಹಾಡ್ಲ್ಲಿ ಕುಸ್ವಾರಾಚಿ ’ಟ್ರೇ’ ಟಿಪಾಯೆರ್ ಆಸ್ಲೆಲಿ. ಏಕ್ ಕಿಡಿ ತೊಂಡಾಂತ್ ಘಾಲಿ ತಿಣೆ ಉಪ್ರಾಂತ್, ತಿಣೆ ತಿಚೆಂ ತೆಂ ’ಪರ್ನೆಂ ಕದೆಲ್’ ಉಕಲ್ಲೆಂ. ಉಕಲ್ನ್ ತಿಣೆ ತಿಚಾ ಕುಡಾಕ್ ವ್ಹೆಲೆಂ. ಕಾಳೊಕಾಕ್ ಧಾಂವ್ಡಾಂವ್ಕ್ ಲಾಯ್ಟ್ ಘಾಲೊ ತಿಣೆ. ಉಶ್ಯಾ ಪಂದಾ ವಿಶೆವ್ ಘೆಂವ್ಚಿಂ ತಿಂ ಕಾಗ್ದಾಂ ಪಿಂಜುಂಕ್ ಸುರು ಕೆಲಿಂ ತಿಣೆಂ. ತ್ಯಾ ಕಾಗ್ದಾ ಸಂಗಿಂ ಪೋರ್ ಆಯಿಲ್ಲಿ ಡ್ರಾಫ್ಟ್ ಸಯ್ತ್.
ಪಿಂಜ್ಲ್ಲಿಂ ಕಾಗ್ದಾಂ ಕಾಪ್ಡಾಚಾ ಪಾಲ್ವಾನ್ ಆರಾವ್ನ್ ತಿ ಭಾಯ್ರ್ ಆಯ್ಲಿ ಜಾಲಾಕ್. ಜಾಲಾಂತ್ಲ್ಯಾ ವ್ಹಡ್ ಮಾಡಾ ಮುಳಾಂತ್ ತಿಣೆ ಉಡಯ್ಲಿಂ. ಉಡಯ್ತಾನಾ ದುಃಖಾಂ ಗಳ್ಳಿಂನಾಂತ್. ತಿಣೆ ತಿಚೊ ಪಾಲಂವ್ ಅಂರ್ಧುನ್ ಬಾಂಧ್ಲೊ.
ಭಿತರ್ ಆಯಿಲ್ಲಿ ನತಾಲ್ಬಾಯ್ ಆಪ್ಲ್ಯಾ ಕುಡಾಕ್ ಗೆಲಿ. ಉಪ್ರಾಂತ್ ತ್ಯಾ ಪರ್ನ್ಯಾ ಕದೆಲಾರ್ ಗಳ್ಳಿ. ಪರ್ನೆಂ ಕದೆಲ್ ಉಲಯ್ತಾಶೆಂ ಭೊಗ್ಲೆಂ ತಿಕಾ. ಕದೆಲಾಚಾ ದೊನ್ಯೀ ಹಾತಾಂಚೆರ್ ಅಪ್ಲೆ ದೋನ್ ಹಾತ್ ದವರ್ನ್, ಗಟ್ಟ್ ದಾಂಬೂನ್ ಧರ್ಲೆಂ ತಿಣೆ.
ಆನಿ ಸವ್ಕಾಸ್ ತಿಣೆಂ ಆಪ್ಲೆ ದೊಳೆ ಧಾಂಪ್ಲೆ..
***
ಜೆಮ್ಮಾ ಪಡೀಲಾಚ್ಯೊ ಥೊಡ್ಯೊ ಕಾಣ್ಯೊ: ಪಾತ್ಕಾಂ, ಮೊಳಾಬ್ ಆನಿ ಮೊಡಾಂ, ಪಾಂತಿ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
