ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಂಕರ್ - 7
ಮಟ್ವಿ ವಳೊಕ್: ಪ್ರಸ್ತುತ್ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನೋಲೊಜಿ ಹಾಂತುಂ ಇಂಜಿನಿಯರಿಂಗ್ ಶಿಕೊನ್ ಆಸ್ಚೆಂ ಬಾಯ್ ಜ್ಯೋತಿ ಸ್ವೀಟಾ ನಜ್ರೆತ್, ಕೊಂಕ್ಣೆಂತ್ ಆಯ್ಲೆವಾರ್ ಉದೆವ್ನ್ ಯೆಂವ್ಚೆಂ ತಾಲೆಂತ್. ಥೊಡಿಂ ಕವಿತಾ ಬರಯ್ಲ್ಯಾಂತ್ ಆನಿ ಸಾಹಿತ್ಯಾಂತ್ ಅಪ್ಲಿ ಮಿನತ್ ಮುಖಾರುನ್ ವರಿತ್ ತರ್ ಖಂಡಿತ್ ಜಾವ್ನ್ ಏಕ್ ಬರಿ ಸ್ತ್ರೀ ಲೇಖಕಿ ಜಾಂವ್ಚಿಂ ಲಕ್ಶಣಾಂ ಹಿಚಾ ಬರ್ಪಾಂನಿ ದಿಸೊನ್ ಯೆತಾತ್.
ಜ್ಯೋತಿ ಸ್ವೀಟಾ ನಜ್ರೆತ್, ಕಣಜಾರ್
ಕಥಾಂಕರ್ - 7. ಸಂಬಂಧ್.
"ಹಾಂವೆಂ ಸೀಮಾಲಾಗಿಂ ಉಲವ್ಯೆತ್ವೆ?"
"ಹಾಂವ್ ಸೀಮಾ ಉಲಯ್ತಾಂ" ತಿಶಿಲ್ಯಾನ್ ತಾಳೊ ಆಯ್ಕಾಲೊ.
"ಮ್ಹಜೆಂ ನಾಂವ್ ರೇಖಾ. ಹಾಂವ್ ರೋಹಿತಾಚಿ ಇಷ್ಟಿಣ್. ತೊ ಆತಾಂ ಖಂಯ್ ಆಸಾ? ತಾಚ್ಯಾ ಘರಾ ಹಾಂವೆಂ ಪೋನ್ ಕೆಲ್ಲೊ. ಪುಣ್ ಕೊಣ್ಂಯಿ ಪೋನ್ ಉಕಲ್ನಾಂತ್. ಮ್ಹಜೆಲಾಗಿಂ ತುಮ್ಚೆಂ ಪೋನ್ ನಂಬರ್ ಆಸ್ಲ್ಲೆಂ. ಕಶೆಂ ತರ್ಯೀ ಸೊಧುನ್ ಕಾಡೀಜಯ್ ಮ್ಹಣೊನ್ ಭಗ್ಲೆಂ. ತ್ಯಾ ಖಾತಿರ್ ತುಕಾ ಹಾಂವೆಂ ಪೋನ್ ಕೆಲೊ"
"ಕಾಂಯ್ ಘಡ್ಬಡ್ ಜಾಲ್ಯಾಗಿ? ತೊ ಸಕಾಳಿಂಚ್ ಘರಾ ಥಾವ್ನ್ ಭಾಯ್ರ್ ಸರ್ತಾ" ಮ್ಹಣಾಲೆಂ ಸೀಮಾ ಬೆಜಾರಾಯೆನ್.
"ತುಜೆಂ ಆಫೀಸ್ ಖಂಯ್ಸರ್ ಆಸಾ? ಫೋನ್ ನಂಬರ್ ಪಳೆಯ್ತಾನಾ, ಹಾಗಾಚ್ಚ್ ಲಾಗಿಂಚ್ ಆಸ್ಲೆಲ್ಯಾ ಪರಿಂ ಭಗ್ತಾಂ" ಮ್ಹಣಾಲೆಂ ರೇಖಾ.
"ಹಾಂವ್ ಹಾಂಗಾಚ್ಚ್ ಮಿಟ್ಟಲ್ ಟವರಾಂತ್ ಆಸಾಂ" ಮ್ಹಣಾಲೆಂ. ತರ್ ಮ್ಹಜೆಂ ಆಫೀಸ್ ತುಜ್ಯಾ ಆಪೀಸಾಚ್ಯಾ ಮುಖಾರ್ಚ್ಚ್ ಆಸಾ. ಮ್ಹಾಕಾ ತುಕಾ ಪಳೆಯ್ಜಾಯ್ ಮ್ಹಣ್ ಭಗ್ತಾ. ಸಾಂಜೆರ್ ಮ್ಹಾಕಾ ಕಾಫಿ ಪಿಯೆಂವ್ಕ್ ಮೆಳ್ತಾಯ್ಗಿ?" ಮ್ಹಣಾಲೆಂ ರೇಖಾ. ಸೀಮಾಕ್ ಮನ್ ನಾತ್ಲೆಲೆಂ ತರೀ, ರೇಖಾನ್ ಉಲಯ್ಲೆಲೆಂ ಸಗ್ಳೆಂ ತಾಣೆಂ ಆಯ್ಕಾಲೆಂ. ಮಾಗಿರ್ ನಾಕಾ ಮ್ಹಣೊನ್ ಜಾಯ್ನಾಸ್ತಾಂ ತಾಕಾ ತಾಣೆಂ ಮೆಳ್ತಾಂ ಮ್ಹಣೊನ್ ಭಾಸಾಯ್ಲೆಂ.
ಸಾಂಜೆಚ್ಯಾ ಪಾಂಚ್ ವೊರಾಂಚೆರ್ ರೇಖಾ ಆನಿಂ ಸೀಮಾ ಎಕಾ ಹೋಟೆಲಾಂತ್ ಕಾಫಿ ಪಿಯೆಂವ್ಚಾ ಖಾತಿರ್ ಟೇಬಲಾರ್ ಬಸ್ಲಿಂ. "ಹಾಂವೆಂ ಹ್ಯಾ ರಿತಿರ್ ತುಕಾ ಮೆಳೊಂಕ್ ಹೋಟೆಲಾಕ್ ಆಪಯ್ಲೆಲೆಂ ತುಕಾ ಬೆಜಾರ್ ಜಾವ್ನಾವೆ?" ಮ್ಹಣಾಲೆಂ ರೇಖಾ.
"ಎದೊಳ್ಚ್ಚ್ ಆಮಿಂ ಮೆಳ್ಳ್ಯಾಂವ್ ಆನಿಂ ಬೆಜಾರ್ ಕಿತ್ಯಾಕ್?" ಮ್ಹಣಾಲೆಂ ಸೀಮಾ ಹಾಸೊನ್.
ರೇಖಾ ಸೀಮಾಚೆಂ ತೋಂಡ್ ಬದ್ಲಾಪ್ ಪಳೆವ್ನ್, ’ಹಾಂವೆಂ ತಾಕಾ ಮೆಳೊಂಕ್ ಆಪಯ್ಲೆಲೆಂ ಬರೆಂ ಜಾವ್ನಾ ಕೊಣ್ಣಾ’ ಮ್ಹಣೊನ್ ಮತಿಂತ್ಚ್ಚ್ ಚಿಂತಿಲಾಗ್ಲೆಂ. ಆಶೆಂ ಉಲಯ್ತಾನಾ, ರೇಖಾ ಮ್ಹಣಾಲೆ, "ಹಾಂವ್ ರೋಹಿತಾಚೆಂ ಕ್ಲಾಸ್ಮೇಟ್. ಎಕಾಚ್ಚ್ ಕ್ಲಾಸಿಂತ್ ಆಮಿಂ ಶಿಕ್ಲೆಲ್ಯಾಂವ್. ಮಾಗಿರ್ ಜೀವನಾಚೊ ಮಾರೊಗ್ ವೆಗ್ಳೊ ಜಾಲೊ. ತರೀ ಹಾಂವ್ ಮ್ಹಜ್ಯಾ ಫ್ರೆಂಡ್ಸಾಂಕ್ ಕೊಣಾಯ್ಕಿ ವಿಸ್ರೊಂವ್ಕ್ ನಾಂ. ಸೀಮಾ, ತುವೆಂ ನೀಜ್ ಜಾವ್ನ್ ಸಂತೊಸ್ ಪಾವಜಯ್. ತೊ ಕೆದಾಳಾಯಿ ತುಜೆಂಚ್ ವಿಶ್ಯಾಂತ್ ಚಿಂತಾ ಆನಿಂ ಉಲಯ್ತಾ. ತಾಣೆಂ ಉಲಯ್ಲೆಲೆ ಫಟಿ ನ್ಹಂಯ್ ಮ್ಹಣ್ ಭಗ್ತಾ ಮ್ಹಾಕಾ, ಕಿತ್ಯಾಕ್ ಮ್ಹಳ್ಯಾರ್ ತುಂ ತ್ಯಾಚ್ಚ್ ರಿತಿರ್ ಆಸಾಯ್."
"ರೋಹಿತ್ ಮ್ಹಜ್ಯಾ ವಿಶ್ಯಾಂತ್ ಚಿಂತಾ, ಉಲಯ್ತಾ? ತುಕಾ ಚೂಕ್ ಸಮ್ಜಣಿಂ ಜಾಲ್ಯಾಂ" ಮ್ಹಣಾಲೆಂ ಸೀಮಾ ರಾಗಾನ್.
"ನಾ ಸೀಮಾ, ತುಂ ಇತ್ಲೆಂ ರಾಗಾರ್ ಕಿತ್ಯಾಕ್ ಜಾತಾಯ್? ಹಾಂವ್ ತಾಕಾ ತುಜ್ಯಾಕಿ ಚಡ್ ಜಾಣಾಂ. ತೊ ಕೆದಾಳಾಯಿ, ಕೊಣಾಯ್ಕಿ ಬೆಷ್ಟೆಂಚ್ ಹೊಗೊಳ್ಸಿನಾಂ, ತಾಂಚೆ ವಿಶ್ಯಾಂತ್ ಚಿಂತಿನಾಂ. ಕಾಲೇಜಿಚ್ಯಾ ದಿಸಾನಿಂಚ್ ತೊ ಚಿಂತಾಮಣಿ ಮ್ಹಣೊನ್ ನಾಂವ್ ಪಡ್ಲಲೊ"
"ಹುಂ, ವ್ಹಯ್, ಥೊಡೆ ಪಾವ್ಟಿಂ ತೊ ಶೀದಾ ಉಲಯ್ತಾ", ಮ್ಹಣಾಲೆಂ ಸೀಮಾ ರಾಗಾನ್.
ಪುಣ್ ರೇಖಾ ತಾಚೆಂ ಉತಾರ್ ಆಯ್ಕಾನಾತ್ಲೆಲ್ಯಾ ಪರಿ ಕರಿಲಾಗ್ಲೆಂ, ಆನಿಂ ಮ್ಹಣಾಲೆಂ; "ತೊ ಕಿತ್ಲೊ ಚಂಚಲ್ ಆನಿಂ ಹಾಸ್ಕುರೊ ಜಾವ್ನಾಸ್ಲೊ ಕಿ, ತ್ಯಾ ಖಾತಿರ್ ಸಗ್ಳ್ಯಾ ಕಾಲೇಜಿಚಿಂ ಚೆಡ್ವಾಂ, ತಾಚಾ ಫ್ರೆಂಡ್ಶಿಪಾ ಖಾತಿರ್ ರಾಕ್ತಾಲಿಂ. ಆತಾಂಯಿ ಆಮಿಂ ಕೆದಾಳಾಯಿ ಸಾಂಗಾತಾ ಮೆಳ್ಳ್ಯಾಂವ್ ತರ್ ಪಯ್ಲೆಂ ರೋಹಿತಾ ವಿಶ್ಯಾಂತ್ಚ್ ಉಲಯ್ತಾಂವ್. ತುಂಯೀ ತಾಚೆಂ ಫ್ರೆಂಡ್ ಜಾವ್ನಾಸಾಜೆ ಆಸ್ಲ್ಲೆಂ" ಮ್ಹಣಾಲೆಂ ರೇಖಾ, ಸೀಮಾಕ್.
ರೇಖಾಕ್ ಸೀಮಾಚ್ಯಾ ಜಿಣಿಯೆಂತ್ ಆಯ್ಲೆಲ್ಯಾ ಘಡಿತಾಂ ವಿಷ್ಯಾಂತ್, ಪಯ್ಲೆಂಚ್ ಕಳಿತ್ ಆಸ್ಲೆಲೆ ತರಿ, ತೆಂ ಕಾಂಯಿಚ್ ಗೊತ್ತುನಾತ್ಲೆಲ್ಯಾ ಪರಿ ವರ್ತನ್ ಕರಿಲಾಗ್ಲೆಂ. ಸೀಮಾಚ್ಯಾ ಮತಿಂತ್ಲಿ ಬೆಜಾರಾಯ್ ರೇಖಾಕ್ ಕಳ್ತಾಲಿ. "ಮ್ಹಾಕಾ ಆಸಲೊ ಆವ್ಕಾಸ್ ಮೆಳ್ಲ್ಲೊ ತರ್ ಹಾಂವ್ಚ್ ಪಯ್ಲೆಂ ವಿಚಾರ್ತಿಂ. ಮ್ಹಜೆಂ ಥಾವ್ನ್ ಕೆದ್ನಾಂಚ್ ಪಯ್ಸ್ ಸರೊಂಕ್ ದಿಂವ್ಚಿನಾ ಆಸ್ಲಿ ಸೀಮಾ. ತೊ ಮಸ್ತ್ ಬರೊ ಚೆಡೊ, ತುಂಮ್ಚೆಂ ಕಾಜಾರಿ ಜೀವಿತ್ ಬರ್ಯಾನ್ ಆಸೊಂ. ಹಾಂವ್ ತುಕಾ ಮೆಳ್ಲ್ಲೆಂ ತಾಚೆಲಾಗಿಂ ಸಾಂಗಾನಾಕಾ" ಮ್ಹಣಾಲೆಂ ರೇಖಾ ಆಪ್ಲ್ಯಾ ದೊಳ್ಯಾಂನಿ ದುಃಖಾಂ ಘೆವ್ನ್.
ರೇಖಾಚೊ ಮೋವ್ ತಾಳೊ ಆಯ್ಕೊನ್ ಸೀಮಾಚ್ಯಾ ಮತಿಂತ್ ವಾದಾಳ್ ಉಟ್ಲೆಂ. ಆನಿಂ ತ್ಯಾ ದೀಸ್ ತೆಂ ವೆಗಿಂಚ್ ಘರಾ ಗೆಲೆಂ. ಸೀಮಾ ವೆಗ್ಗಿಂ ಘರಾ ಪಾವ್ಲೆಲೆಂ ಪಳೆವ್ನ್ ರೋಹಿತಾಕ್ ಆಜ್ಯಾಪ್ ಬೊಗ್ಲೆಂ. "ಕಿತೆಂ ಆಜ್ ವೆಗ್ಗಿಂ ಆಯ್ಲಾಂಯ್, ಸಗ್ಳೆಂ ಸಾರ್ಕೆಂ ಆಸಾಮೂ? ಕಾಫಿ ಪಿಯೆತಾಯ್ಗೀ? ಕರಿಜೆಗೀ" ಮ್ಹಣಾಲೊ? ಸೀಮಾ ತಕ್ಲಿ ಉಕಲ್ನ್ ಏಕ್ ಪಾವ್ಟಿ, ರೋಹಿತಾಕ್ ಪಳೆಂವ್ಚಾರ್ ಪಡ್ಲೆಂ. ರೇಖಾಚೆಂ ದೂಕ್ ಆನಿಂ ತಾಚೆಂ ಉಲವ್ಣೆಂ ತಾಕಾ, ಚಿಂತ್ಪಾಕ್ ಹಾಡುಂಕ್ ಲಾಗ್ಲೆಂ. ಖಂಚ್ಯಾ ಧರ್ಣಿಚ್ಯಾ ಮತಿಯೆ ಥಾವ್ನ್ ಹ್ಯಾ ಮನ್ಶಾಕ್ ದೆವಾನ್ ರಚ್ಲಾಂಗಿ ಮ್ಹಣ್ ಮತಿ ಬಿತರ್ಚ್ ಚಿಂತಿಲಾಗ್ಲೆಂ. ಇತ್ಲೆಂ ಸಗ್ಳೆಂ ಜಾವ್ನ್ ಗೆಲ್ಯಾರೀ ಹೊ ಕಸೊ ಇತ್ಲೊ ಸಮಾಧಾನೆನ್ ಜಿಯೆತಾ. ಪಯ್ಲೆಂಚಿ ಹಾಕಾ ಉತ್ರಾಂ ಪರಿಣಾಮಾಕ್ ಪಡೊಂಕ್ ನಾಂತ್ವೆ? ಮ್ಹಣ್ ಚಿಂತಿಲಾಗ್ಲೆ ಸೀಮಾ.
"ನಾಕಾ, ಹಾಂವ್ಚ್ ಕಾಫಿ ಕರ್ತಾ. ತುಂ ಥಂಯ್ಚ್ ಬಸ್," ಮ್ಹಣಾಲೆಂ ತೆಂ. ರೋಹಿತಾಕ್ ಪರ್ತ್ಯಾನ್ ಏಕ್ ಪಾವ್ಟಿಂ ಆಜ್ಯಾಪ್ ಜಾಲೆಂ. ಆನಿಂ ತೊ ರೂಮಾ ಬಿತರ್ ಗೆಲೊ. ಸೀಮಾ ಕಾಫಿ ತಯಾರ್ ಕರುನ್ ಥಂಯ್ಚರ್ ಪಾವ್ಲೆಂ. ಹ್ಯಾ ಪರಿಂ ಕೆದಾಳಾಯಿ ಘಡ್ಲೆಲೆಂ ನಾಂ. ಸದಾಂಯ್ ಆಫೀಸಾ ಥಾವ್ನ್ ತಡೊವ್ ಕರುನ್ ಯೆಂವ್ಚೆಂ. ಯೆತಾಚ್ಚ್ ಏಕ್ ನಾಂ ಏಕ್ ವಿಷಯಾಚೆರ್ ಝಗ್ಡೆಂ ಚಲಂವ್ಚೆಂ, ಸೀಮಾಚೆ ಸದಾಂಚೆಂ ಜಾವ್ನಾಸ್ಲೆಂ.
ತ್ಯಾ ವರ್ವಿಂ ರೋಹಿತಾಕ್ ಸೀಮಾಚಿ ಚಾಲ್ ನವಿ ದಿಸೊಂಕ್ ಲಾಗ್ಲಿಂ. ಸೀಮಾ ತ್ಯಾ ಆಫೀಸಾಕ್ ಕಾಮಾಕ್ ಲಾಗೊನ್ ಪಾಂಚ್ ವರ್ಸಾಂ ಜಾಲ್ಯಾಂತ್. ಆಪ್ಲ್ಯಾ ಆರ್ಶ್ಯಾಚ್ಯಾ ಕ್ಯಾಬಿನಾ ಥಾವ್ನ್ ದೊಳ್ಯಾಂಚ್ಯಾ ದಿಷ್ಟಿಕ್ ಪಡ್ಚ್ಯಾ ತ್ಯಾ ಕದೆಲಾಚೆರ್ ದೀಷ್ಟ್ ಘುಂವ್ಡಯ್ಲ್ಯಾರ್ ತಾಕಾ ತೊ ಪಾಟ್ಲೊ ಉಡಾಸ್ ಮತಿಕ್ ಯೆತಾ. ಮುಖಾರ್ ದಿಸ್ಚ್ಯಾ ಕದೆಲಾಚೆರ್ ತೆಂ ಏಕ್ ಟೈಪಿಸ್ಟ್ ಜಾವ್ನಾಸ್ಲ್ಲೆಂ. ಆಪ್ಣಾಕ್ಚ್, ಆಪುಣ್ ಸಾಬೀತ್ ಕರ್ಚೊ ಆವ್ಕಾಸ್ ತೆಂ ಕೆದಾಳಾಯಿ ಸೊಡ್ನ್ ದೀನಾತ್ಲೆಂ. ಆರ್ಜೆಂಟ್ ಕಾಮ್ ಆಸ್ಲ್ಯಾರ್ಯೀ ಕಿತೆಂ ತರೀ ಕಾರಣ್ ದೀವ್ನ್ ತಾಚೆ ಥಾವ್ನ್ ಚುಕವ್ನ್ ಘೆನಾತ್ಲ್ಲೆಂ. ಕೆದ್ನಾಂಚ್ ಲಾಂಬ್ ರಜಾಯಿ ಘಾಲುಂಕ್ ನಾಂ ತಾಣೆಂ. ಕಿತ್ಲೊ ವೇಳ್ ಜಾಲ್ಯಾರಿ ರಾವೊನ್, ತ್ಯಾ ದಿಸಾಚೆಂ ಕಾಮ್ ತ್ಯಾ ದೀಸಾಚ್ಚ್ ಕರುನ್ ವೆತಾಲೆಂ. ಆಪ್ಣಾಚ್ಯಾ ಶಿಸ್ತ್ ಆನಿಂ ಗುಣಾಂನಿಂ ಕಾಮಾಂತ್ ತೆಂ ಎಕೇಕ್ ಮೇಟ್ ಮುಖಾರ್ ದವರೊನ್ ವೆತಾಲೆಂ. ಜಿಕ್ವಣೆಂತ್ ತಾಣೆಂ ತಾಚೊ ವಾಂಟೊ ಜೊಡ್ಲೆಲ್ಯಾ ಬರಿ ತಾಕಾ ಬೊಗ್ಲೆಂ. ಹೆಂ ತಾಕಾ ಕೆದಾಳಾಯಿ ಸಮಾಧಾನ್ ದಿಂವ್ಚಿ ವಿಶಯ್ ಜಾವ್ನಾಸ್ಲೆಲಿಂ. ಪುಣ್ ಹಿ ವಿಶಯ್ ತಾಚಾ ಘರ್ಚಾಂಕ್ ಬಿರಾಂಕುಳ್ ಜಾಂವ್ಕ್ ಪಾವ್ಲಿ. ಕೆಂ ಕಿತ್ಲೆಂ ಪಾವ್ಟಿಂ ಚಿಂತುನ್ ಫಡ್ಲಾರಿ ಘರಾಂತ್ ಸಮಾಧಾನ್ ಹಾಡುಂಕ್ ಜಾವ್ನಾತ್ಲೆಂ. ತ್ಯಾ ವೆಳಿಂ ತಾಕಾ ಆಪುಣ್ ಲ್ಹಾನ್ ಥಾವ್ನ್ ವಾಡ್ಲೆಲಿ ಹಠಾಚಿ ಜಿಣಿಂ ಉಡಾಸಾಕ್ ಆಯ್ಲಿ. ಸೀಮಾ ಲಾನ್ಪಣಿ ಥಾವ್ನ್ ಹಟ್ಟು ಜಾವ್ನ್ ಆಸ್ಲೆಲೆ.
ಪರ್ತ್ಯಾನ್ ಏಕ್ ಪಾವ್ಟಿಂ, ಎಕಾ ದಿಸಾ ರೇಖಾನ್, ಸೀಮಾಕ್ ಫೋನ್ ಕರುನ್ ರೋಹಿತ್ ಆತಾಂ ಕಸೊ ಆಸಾ ಮ್ಹಣೊನ್ ವಿಚಾರ್ಲೆಂ. ಆನಿಂ ಉಪ್ರಾಂತ್ ರೋಹಿತಾಕ್ ಏಕ್ ಖುಶ್ ಖಬಾರ್ ಆಸಾ ಮ್ಹಣಾಲೆಂ. "ಖಂಯ್ಚಿ ಖುಶ್ ಕಬಾರ್. ತುಂ ತಾಚೆಲಾಗಿಂ ಉಲಂವ್ಕ್ ಆಶೆತಾಯ್ಗಿ? ಕಿತೆಂ ಮ್ಹಳ್ಯಾರಿ ತುಂ ತಾಚೆಂ ಪಯ್ಲೆಂಚೆಂ ಇಷ್ಟಿಣ್ ನ್ಹಂಯ್ಗಿ?" ಸೀಮಾ ವ್ಯಂಗ್ಯ್ ರಿತಿರ್ ಉಲಯ್ಲಾಗ್ಲೆಂ.
"ನಾಂ ಸೀಮಾ, ರೋಹಿತಾ ಭಾಶೆನ್ ತುಂಯಿ ಮ್ಹಜೆಂ ಇಷ್ಟಿಣ್.. ತೊ ಪಾಟ್ಲ್ಯಾ ಸುಮಾರ್ ದಿಸಾ ಥಾವ್ನ್ ಏಕ್ ಗಿಫ್ಟ್ ಶೊಪ್ ಘಾಲಿಜಯ್ ಮ್ಹಣ್ ಆಶಾ ಕರ್ತಾಲೊ. ತ್ಯಾ ಖಾತಿರ್ ತಾಕಾ ರೀಣ್ ಜಾಯ್ ಆಸ್ಲ್ಲೆಂ. ಮ್ಹಜೆಂ ಏಕ್ ಇಷ್ಟಿಣ್, ಎಕಾ ಫೈನಾನ್ಸ್ ಕಂಪೆಂನಿಂತ್ ಕಾಮ್ ಕರ್ತಾ. ಹಾಂವೆಂ ತಾಚೆಲಾಗಿಂ ರೋಹಿತಾಚಿ ವಿಷಯ್ ಸಾಂಗ್ಲೆಲ್ಯಾ ವರ್ವಿಂ ತಾಚೆಂ ಕಾಮ್ ವೆಗ್ಗಿ ಜಾಲೆಂ. ಫ್ರೆಂಡ್ಸಾಂ ಕೆದಾಳಾಯಿ ಎಕಾಮೆಕಾ ಕುಮ್ಕೆಕ್ ಪಾವ್ತಾತ್. ಸೀಮಾ ತುಂ ಏಕ್ ಲ್ಹಾನ್ಶಿ ಪಾರ್ಟಿ ದವರ್ನ್ ಆಸಲಿ ಸಂತೊಸಾಚಿ ವಿಷಯ್ ಮೊಗಾನ್ ದೊಗಾಂಯಿ ವಾಂಟುನ್ ಘೆಯಾ, ರೋಹಿತಾಕಿ ಸಂತೊಸ್ ಭಗಾತ್. ತೊಯೀ ಮಸ್ತ್ ಖುಷಿ ಜಾಂವ್ಕ್ ಆಸಾ". ರೇಖಾ ಥಾವ್ನ್ ಫೋನ್ ಆಯಿಲ್ಲ್ಯಾ ಉಪ್ರಾಂತ್ ಸೀಮಾ ಪರ್ತ್ಯಾನ್ ಏಕ್ ಪಾವ್ಟಿಂ ಚಿಂತಿಲಾಗ್ಲೆಂ. ರೋಹಿತಾಕ್ ಪಯ್ಶೆಂ ಜಾಯ್ ಪಡ್ಲೆಲೆ ತರ್ ಮ್ಹಜೆಂ ಲಾಗಿಂ ವಿಚಾರ್ಯೆತೆ ನಂಯ್ಗಿ? ಮ್ಹಜ್ಯಾ ಸವಾಯಾಂ ಖಾತಿರ್ ತೊ ಜಾಲ್ಯಾರೀ ಕಶೆಂ ವಿಚಾರಿತ್? ತ್ಯಾ ಖಾತಿರ್ಚ್ಚ್ ಕೊಣ್ಣಾ ತಾಚೆಂ ಫ್ರೆಂಡ್ಸ್ ತಾಕಾ ಕುಮಕ್ ಕರ್ತಾತ್. ಭೋವ್ಶಾ ಕೆದಾಳಾಯಿ ತಿಂ ಮೆಳ್ತಾತ್ ಜಾವ್ಯೆತ್ ಮ್ಹಣ್ ಚಿಂತಿಲಾಗ್ಲೆಂ.
ತ್ಯಾ ದೀಸ್ ಸಕಾಳಿಂಚ್ ಕಾಲಿಂಗ್ ಬೆಲ್ಲ್ ವಾಜೊಂಕ್ ಲಾಗ್ಲೆಂ. ಸೀಮಾ ಏಕ್ ಪಾವ್ಟಿಂ ಆಕಾಂತುನ್ ಪಡ್ಲೆಂ. ಕೋಣ್ ಮ್ಹಣೊನ್ ಬಾಗಿಲ್ ಉಗ್ತೆಂ ಕರುನ್ ಪಳೆಯ್ತಾನಾ, ಏಕ್ ಅಪರಿಚಿತ್ ವ್ಯಕ್ತಿ ಹಾತಾಂತ್ ಫುಲಾಂಚೊ ಝೆಲೊ ಹಾಡುನ್ ಉಬೊ ಆಸ್ಲ್ಲೊ. ಕೊಣೆಂ ದೀವ್ನ್ ದಾಡ್ಲಾಂ ಮ್ಹಣೊನ್ ಪಳೆಯ್ತಾನಾ ತಾಂತು ರೋಹಿತಾಚೆಂಚ್ ನಾಂವ್ ಆಸ್ಲ್ಲೆಂ. ತೆಂ ಪಳೆವ್ನ್ ತಾಕಾ ಆಶ್ಚರ್ಯ್ ಬೊಗ್ಲೆಂ. ತಾಚಾ ತೊಂಡಾರ್ ಹಾಸೊ ಉದೆಲ್ಯೊ. ನಿದ್ಲೆಲ್ಯಾ ರೋಹಿತಾಕ್ ಉಟವ್ನ್ ಥ್ಯಾಂಕ್ಸ್ ಮ್ಹಣಾಲೆಂ. ತುಕಾ ಮ್ಹಜ್ಯಾ ಜಲ್ಮಾ ದಿಸಾಚೊ ಉಗ್ಡಾಸ್ ಆಸಾ ಮ್ಹಣಾಲೆಂ. ’ಫುಲಾಂ ಝೆಲೊ? ’ ರೋಹಿತ್ ಆಳ್ಸಾಯೆನ್ ನಿದೆಂತ್ಲ್ಯಾ ದೊಳ್ಯಾಂನಿ ಉಟೊನ್ ಮ್ಹಣಾಲೊ.
ಕಿತ್ಯಾಕ್ ರೋಹಿತ್ ನೆಣಾರ್ಯಾಬರಿಂ ಕರ್ತಾಯ್. ಎಕಾ ವಾಟೆನ್ ಜಲ್ಮಾ ದಿಸಾಚೆ ಶುಭಾಶಯ್ ಪಾಟಯ್ಲಾಯ್, ಆನಿಂ ದುಸ್ರ್ಯಾ ವಾಟೆರ್ ಸಗ್ಳೆಂ ದಾಂಪುನ್ ದವರುಂಕ್ ಪ್ರಯತ್ನ್ ಕರ್ತಾಯ್. ಪುಣ್ ರೋಹಿತಾಕ್ ಏಕ್ಯಿ ವಿಷಯ್ ಸಮ್ಜೊಂಕ್ ನಾಂ. ತೊ ಕಿತೆಂಯಿ ಸಾಂಗಾನಾಸ್ತಾನಾ ವೊಗೆಂ ರಾವಾಲಾಗ್ಲೊ. ಪುಣ್ ತಾಕಾ ಆಪ್ಣಾಚಾ ನಾಂವಾರ್ ಫುಲಾಂ ಝೆಲೊ ಕೊಣೆಂ ದಾಡುನ್ ದಿಲೊ ಮ್ಹಳ್ಳೆಂ ಸಮ್ಜೊಂಕ್ ನಾಂ. ಸೀಮಾ ಚಿಂತಾ ಹಾಂವೆಂ ಬುಕ್ಕೊ ದಾಡ್ಲಾಂ ಮ್ಹಣ್. ಹ್ಯಾ ದಿಸಾಂನಿ ತಾಚ್ಯಾ ಚಾಲ್ಚಮ್ಕಾಣೆಂತ್ ಬದ್ಲಾವಣ್ ದಿಸೊನ್ ಯೆತಾ. ಆಫೀಸಾಕ್ ವೆಚ್ಯಾ ಪಯ್ಲೆಂ ಗಾಲಾಂಚೆರ್ ಏಕ್ ಉಮೊ ದೀವ್ನ್ ಮ್ಹಣಾಲೆಂ, ಸಾಂಜೆರ್ ಆಮಿಂ ಜೆವ್ಣಾಕ್ ಭಾಯ್ರ್ ಯಾ. ಹಾಂವ್ಯಿ ವೆಗ್ಗಿಂ ಯೆತಾ ಆಜ್.
ರೋಹಿತ್ ಆಜ್ಯಾಪುನ್ "ಸೀಮಾ ತುಂ ಹ್ಯಾ ಎಕಾ ಹಾಪ್ತ್ಯಾ ಥಾವ್ನ್ ಮಸ್ತ್ ಬದ್ಲಾವಣ್ ಜಾಲ್ಯಾ" ಮ್ಹಣಾಲೊ.
"ತುಂಯಿ ಬದಲ್ಲಾಯ್. ಚೊರ್ಯಾಂ ಚೊರ್ಯಾಂ ಫುಲಾಂ ಝೆಲೆ ದಾಡುನ್ ದಿತಾಯ್ ಆನಿಂ ಕಿತೆಂಚ್ ಕಳಿತ್ ನಾತ್ಲೆಲ್ಯಾಬರಿ ನಟನ್ ಕರ್ತಾಯ್. ಥೊಡೆ ಪಾವ್ಟಿಂ ಹಾಂವ್ಚ್ ಕಾಫಿ ಕರ್ತಾ ಮ್ಹಣ್ತಾಯ್, ಮ್ಹಜೆ ಖಾತಿರ್ ಉಣ್ ಉದ್ಕಾಕ್ ಗೀಸರ್ ಚಾಲು ಕರ್ತಾಯ್. ಸಕಾಳಿಂ ಬೆಡ್ ಕಾಫಿ ಕರ್ತಾ ಮ್ಹಣೊನ್ ಮ್ಹಜ್ಯಾಕಿ ಪಯ್ಲೆ ತುಂ ಉಟ್ತಾಯ್. " ಮ್ಹಣಾಲೆಂ ಸೀಮಾ.
"ತೆಂ ಸಗ್ಳೆಂ ಹಾಂವ್ ಪಯ್ಲೆಂಯ್ ಕರುನ್ ಆಸ್ಲ್ಲೊಂ. ಪುಣ್ ತುಜ್ಯಾ ಗಮನಾಕ್ ವಚೊಂವ್ಕ್ ನಾಂ." ಮ್ಹಣಾಲೊ ರೋಹಿತ್.
"ಆಸೊಂದಿ ರೋಹಿತ್, ಮ್ಹಜಿ ಮತ್ ಖಂಯ್ಸರ್ ಆಸಾ ಮ್ಹಣೊನ್ ತುಕಾ ಆಜ್ ಸಾಂಜೆರ್ ಕಳಿತ್ ಜಾತೆಲೆಂ."
ರೋಹಿತಾಕ್ ಸೀಮಾಚ್ಯಾ ಉತ್ರಾಂನಿಂ ಗೂಂಡ್ ಆರ್ಥ್ ಲಿಪೊನ್ ಆಸ್ಲೆಲ್ಯಾಬರಿ ಭಗ್ಲೆಂ.
"ರೋಹಿತ್ ಸಾಂಗ್ಲೆಲ್ಯಾ ಪರ್ಮಾಣೆಂ ಆಜ್ ತುಕಾ ಹಾಂವ್ ತುಜ್ಯಾ ಪರ್ನ್ಯಾ ಫ್ರೆಂಡ್ಸಾಕ್ ಸಾಂಜೆರ್ ಮೆಳಯ್ತಾಂ. ತ್ಯಾ ವೆಳಿಂ ತುಕಾ ಮಸ್ತ್ ಖುಷಿ ಜಾಂವ್ಕ್ ಆಸಾ. ಸಂತೊಸಾನ್ ತುಂ ನಾಚೊಂಕ್ ಲಾಗ್ಶಿ. ತುಜೆಂ ತೆ ಪಾಟ್ಲೆ ದೀಸ್ ತುಕಾ ಉಡಾಸಾಕ್ ಯೆತಿತ್. ಸಾಂಜೆರ್ ತಯಾರ್ ಜಾ", ಮ್ಹಣೊನ್ ತೆಂ ಆಫೀಸಾಕ್ ಗೆಲೆಂ. ಪುಣ್ ರೋಹಿತಾಕ್ ಖಂಚಿಯಿ ವಿಷಯ್ ಕಳನಾಸ್ತಾನಾ ಕಾಲುಬುಲು ಜಾಲೊ. ಸಾಂಜೆರ್ ಸೀಮಾ ರೋಹಿತಾಕ್ ಘೆವ್ನ್, ಹೋಟೆಲಾಚ್ಯಾ ಭಾಯ್ರ್ ಕೊಣಾಕ್ಗಿ ರಾಕೊನ್ ಆಸ್ಲೆಲೆಂ. ಮುಖಾರ್ ಯೆಂವ್ಚ್ಯಾ ಚಲಿಯೆಕ್ ರೊಹಿತಾಕ್ ದಾಕವ್ನ್ ಸೀಮಾ ವಿಚಾರಿಲಾಗ್ಲೆ. ’ಹ್ಯಾ ಚಲಿಯೆಚಿ ತುಕಾ ವಳಕ್ ಆಸಾಗಿ’.
ರೋಹಿತಾಕ್ ಆಜ್ಯಾಪ್ ಜಾಲೆಂ. ತಾಚೆ ಹಾತ್ಪಾಂಯ್ ಜಡ್ ಜಾಲ್ಲ್ಯಾ ರಿತಿರ್ ತಾಕಾ ಬೊಗ್ಲೆಂ. ತಾಚ್ಯಾ ತೊಂಡಾ ವಯ್ರ್ ಘಾಮಾಚೆ ಥೆಂಬೆಂ ಉಬ್ಜಾಲೆಂ. ಆನಿಂ ತಾಚ್ಯಾ ದೊಳ್ಯಾಂಕ್ಚ್ ತೊ ಪಾತ್ಯೆನಾ ಜಾಲೊ. "ರೋಹಿತ್ ತುಕಾ ಹ್ಯಾ ಚಲಿಯೆ ವಿಷ್ಯಾಂತ್ ಕಳಿತ್ ಆಸೊಂಕ್ ಪುರೊ. ತುಜ್ಯಾ ವಿಷ್ಯಾಂತ್, ಮ್ಹಾಕಾ ಕಳಿತ್ ನಾತ್ಲೆಲೆಂ ವಿಷಯ್ ಮ್ಹಾಕಾ ತಾಣೆಂ ಸಾಂಗ್ಲ್ಯಾತ್. ತುಜ್ಯಾ ತ್ಯಾ ಕಾಲೇಜಿಚ್ಯಾ ದಿಸಾಂ ವಿಷ್ಯಾಂತ್, ಹಾಂ ತ್ಯಾ ತುಜ್ಯಾ ಭಾಂಗಾರಾಚ್ಯಾ ದಿಸಾ ವಿಷ್ಯಾಂತ್ ತೆಂ ಸಗ್ಳೆಂ ಸಾಂಗಾಲಾಗ್ಲಾ ಮ್ಹಾಕಾ ಮ್ಹಣಾಲೆಂ ಸೀಮಾ. ಹಾಂವ್ ಚಿಂತುಂಕ್ ಪಡ್ಲೊ."
"ತೆಂ ಕಿತೆಂ ಕಾಲೇಜಿಚಿಂ ಸಗ್ಳಿಂ ಚೆಡ್ವಾಂ ತುಜ್ಯಾ ಪಾಟ್ಲ್ಯಾನ್ ಪಡ್ತಾತ್. ಕಿತ್ಯಾಕ್ ತುಜ್ಯಾ ಪಾಟ್ಳ್ಯಾನ್ ತಶೆಂ ಪಡ್ತಾತ್, ಮ್ಹಣೊನ್ ಹಾಂವ್ಯಿ ಚಿಂತುಂಕ್ ಲಾಗ್ಲಿಂ. ಹಾಂವ್ಯಿ ತುಜ್ಯಾ ಪಾಟ್ಲ್ಯಾನ್ ಪಡ್ತಾಂ. ತಶೆಂಯಿ ಕಿತೆಂ ಆಸಾ ಪಳೆಂವ್ಯಾ" ಮ್ಹಣೊನ್ ಮ್ಹಣಾಲೆಂ ಸೀಮಾ. ರೋಹಿತಾಚ್ಯಾ ದೊಳ್ಯಾಂನಿ ದೊಳೆ ದವರ್ನ್, "ತುಂ ವಿಚಾರ್ನ್ ಆಸಲ್ಲೊಯ್ ನಂಯ್ಗಿ ಸಕಾಳಿಂ, ಮ್ಹಜಿ ಬದ್ಲಾವಣ್ ಕಿತೆಂ ಮ್ಹಣ್, ತಾಕಾ ಹೆಂಚ್ ಕಾರಣ್ ಜಾವ್ನಾಸಾ."
ರೋಹಿತಾಚ್ಯಾ ಮತಿಂತ್ ದುಬಾವ್ ಉಬ್ಜಾಲೊ. ತರೀ ತೊ ದುಬಾವ್ ದಾಂಪುನ್ ದವರ್ಚಾ ಖಾತಿರ್ ತೊ ಮ್ಹಣಾಲೊ. "ತುಮಿಂ ರೇಸ್ಟೋರೇಂಟಾಚಾ ಬಿತರ್ ವಚಾ. ಹಾಂವ್ ಇಲ್ಲೆಶೆಂ ಫ್ರೆಶ್ ಜಾವ್ನ್ ಯೆತಾ". ತಿಂ ದೊಗಾಂಯಿ ಬಿತರ್ ಗೆಲ್ಯಾ ಉಪ್ರಾಂತ್, ಥಂಯ್ಚ್ ಆಸ್ಲೆಲ್ಯಾ ಸೊಫಾಚೆರ್ ಬಸ್ಲೊ. ಆದ್ಲೆ ದೀಸ್ ತಾಚ್ಯಾ ಮತಿಚ್ಯಾ ಪಡ್ದ್ಯಾಚೆರ್ ಪರ್ತ್ಯಾನ್ ಉದೆಂವ್ಕ್ ಲಾಗ್ಲೆ. ಏಕಾ ದಿಸಾ ಸಾಂಜೆರ್ ರೋಹಿತ್ ಆಪ್ಣಾಚ್ಯಾ ಗಿಫ್ಟ್ ಶೋಪಾಂತ್ ಬಸೊನ್ ಆಸ್ಲಲೊ. ತೆದಾಳಾ ಏಕ್ ಸ್ತ್ರೀ ಯೇವ್ನ್ ತಾಚೆ ಲಾಗಿಂ ಫ್ಯಾಕ್ಸ್ ರೋಲ್ ಆಸಾಗಿ ಮ್ಹಣೊನ್ ವಿಚಾರಿಲಾಗ್ಲಿ. ಆಮ್ಚೆಂ ಲಾಗಿಂ ನಾಂ. ತರೀ ತ್ಯಾ ಮುಖ್ಲ್ಯಾ ಸ್ಟೇಷನರಿ ಆಂಗ್ಡಿ ಆಸಾ, ಥಂಯ್ ತುಂಮಿಂ ವಿಚಾರಾ ಮ್ಹಣಾಲೊ ತಿಕಾ. ನಾಂ, ಥಂಯ್ಸರ್ಯಿ ನಾಂ ಖಂಯ್. ದುಸ್ರೆಂ ಕಡೆಂ ಹೆಣೆಂ ಖಂಯ್ಸರ್ ಮಳ್ತಾಂ ಸಾಂಗ್ಯೆತ್ಗಿ? ಮ್ಹಣಾಲಿ ತಿ. ರೋಹಿತಾನ್ ತ್ಯಾ ಸ್ತ್ರೀಯೆಕ್ ಸಾರ್ಕ್ಯಾ ರಿತಿನ್ ಪಳೆಯ್ಲೆಂ. ತಿ ಸ್ತ್ರೀ ಘಾಬರ್ಲೆಲ್ಯಾ ಬರಿ ದಿಸ್ತಾಲಿ. ತೊ ಕಿತೆಂಗಿ ಚಿಂತುನ್, ತಿಕಾ ಮ್ಹಣಾಲೊ.
"ತುಂ ಥೊಡೊ ವೇಳ್ ರಾವ್, ಹಾಂವ್ ಖಂಯ್ ತರೀ ಪ್ರಯತನ್ ಕರ್ತಾಂ". ತ್ಯಾ ದೀಸ್ ರೋಹಿತಾನ್ ಆಂಗ್ಡಿ ಥಾವ್ನ್ ಫ್ಯಾಕ್ಸ್ ರೋಲ್ ಹಾಡೂನ್ ತಿಕಾ ದಿಲೆಂ. ತಿಚ್ಯಾ ತೊಂಡಾಚೆರ್ ಹಾಸೊ ಉಬ್ಜಾಲ್ಯೊ, ಸಾಂಗಾತಾಚ್ಚ್ ಬೆಜಾರಾಯ್ ಆಸ್ಲೆಲಿ. ಥೊಡ್ಯಾ ವೆಳಾ ಉಪ್ರಾಂತ್ ತಿಂ, ರೋಹಿತಾಕ್ ತ್ಯಾ ರೋಲಾಚಿ ಗರ್ಜ್ ಕಿತ್ಲಿ ಆಸ್ಲೆಲಿ ಮ್ಹಣ್ ಸಾಂಗಾಲಾಗ್ಲಿ. ಎಕಾದಾವೆಳಾ ಆಜ್ ಹೆಂ ರೀಲ್ ಮೆಳೊವ್ನಾತ್ಲೆ ತರ್, ಮ್ಹಜೊ ಧನಿ ರಾಗಾನ್ ಕಿತೆಂ ಕರ್ತೊ ಕೊಣ್ಣಾ ದೇವ್ ಜಾಣಾಂ.
ತಾಚ್ಯಾ ಉಪ್ರಾಂತ್ ಕೆದಳಾಯಿ ತಿ ಸ್ತ್ರೀ, ಆಫೀಸಾಕ್ ವೆತಾನಾ ಸಕಾಳಿಂ ತಾಕಾ ವಿಶ್ ಕರುನ್ ವೆತಾಲಿ. ಸದಾಂ ಹಾಸ್ಕುರ್ಯಾ ತೊಂಡಾಚಿ, ಆನಿಂ ತ್ಯಾ ಮಧುರ್ ತಾಳ್ಯಾಚೊ ಆವಾಜ್ ರೋಹಿತಾಕ್ ಪಿಸ್ವೊಂಕ್ಲಾಗ್ಲೊ. ಕಿತ್ಲೆಶೆ ಪಾವ್ಟಿಂ ತಾಕಾ ಪಳೆಂವ್ಕ್ ನ್ಹಜೊ ಮ್ಹಣೊನ್ ಚಿಂತುನ್ ಬಸ್ಲ್ಯಾರ್ಯಿ, ಮತ್ ಮಾತ್ರ್ ತಾಚ್ಯಾ ಕುಶಿನ್ಂಚ್ ವೊಡ್ತಾಲಿ. ತಾಚಿ ಉಲಂವ್ಚಿ ರೀತ್, ತಾಚಿ ಸೊಭಾಯ್, ಕಾಜಾರ್ ಜಾಲ್ಯಾ ಉಪ್ರಾಂತ್ ರೋಹಿತ್, ಸೀಮಾಕ್ ಹ್ಯಾಚ್ಚ್ ರೀತಿರ್ ಪಳೆಂವ್ಕ್ ಆಶೆತಾಲೊ. ತರೀ ಪುಣ್ ತಾಚ್ಯಾ ಸೆಕುಂಡಾ ಸೆಕುಂಡಾಕ್ ದಿಸೊನ್ ಯೆಂವ್ಚ್ಯಾ ಬದ್ಲವಣೆ ವರ್ವಿಂ ರೋಹಿತಾಚಿ ಸಪ್ಣಾಂ ಸಗ್ಳಿಂ ಕೊಸ್ಳೊನ್ ಪಡ್ಲ್ಲಿಂ.
ಕಾಜಾರ್ ಜಾವುನ್ ಏಕ್ ಮಹಿನೊ ಜಾಂವ್ಕ್ ನಾತ್ಲ್ಲೊ. ಸೀಮಾ ತಾಚೆಲಾಗಿಂ ಅಸಭ್ಯ್ ರಿತಿರ್ ಚಲಂವ್ಕ್ ಲಾಗ್ಲೆಂ. ತಾಚಿ ತಿ ಗಡ್ ನಾತ್ಲೆಲಿ ಆಶಾ; ತೆಂ ಹಾಡುನ್ ದೀ, ಹೆಂ ಹಾಡುನ್ ದೀ ಮ್ಹಣೊನ್, ಕೆದಾಳಾಯಿ ರೋಹಿತಾಲಾಗಿಂ ಜಗಡ್ತಾಲೆಂ. ಹ್ಯಾ ವರ್ವಿಂ ರೋಹಿತಾಚಿ ಮತ್ ಸಗ್ಳಿ ಪಿಸಾಂತುರ್ ಜಾಲ್ಲಿ. ಮಾಂಯ್ ಸುನೆಕ್ ಘರಾ ಹಾಡುಂಕ್ ಕಿತ್ಲೆಂ ಸೊದುನ್ ಆಸ್ಲೆಲಿ. ತರೀ ಕೊಣಾಚಾಯಿ ತೊಂಡಾರ್ ತಾಚೊ ಸ್ವಭಾವ್ ಬರವ್ನ್ ಆಸಾನಾ ನ್ಹಂಯ್ಗಿ. ತಶೆಂಚ್ ಘಡ್ಲೆಂ ಸೀಮಾ ಥಂಯ್.
ಏಕ್ ದೀಸ್ ಆಫೀಸಾಕ್ ಭಾಯ್ರ್ ಸರ್ನ್ ವೆತಾನಾ, ಸೀಮಾಕ್ ಮಾಂಯ್ನ್ ಸಾಂಗ್ಲೆ " ಸೀಮಾ ಕಾಜಾರಾ ಪಯ್ಲೆಂ ಪ್ಯಾಂಟ್ - ಶರ್ಟ್ ಸೊಬ್ತಾ. ಕಾಜಾರ್ ಜಾಲ್ಲ್ಯಾ ಉಪ್ರಾಂತ್ ನ್ಹಂಯ್. ತುಂ ಹ್ಯಾ ಘರ್ಚಿ ಸುನ್, ತ್ಯಾಚ್ಚ್ ರಿತಿರ್ ರಾವ್ಲ್ಯಾರ್ ಸೊಭಾಯ್"
ಮಾಂಯ್ಚಾ ಉತ್ರಾಂಕ್ ಲೆಕಿನಾಸ್ತಾನಾ, "ಹಾಂವ್ ಎಕಾ ವ್ಹಡ್ ಕಂಪೆನಿಂತ್ ಕಾಮ್ ಕರುನ್ ಆಸಾ ಮ್ಹಳ್ಳೆಂ ತುಮಿಂ ವಿಸ್ರಾನಾಕಾತ್. ಹಾಂತುಂ ಕಿತೆಂ ಉಣೆಂಪಣ್ ಆಸಾ. ಸಗ್ಳ್ಯಾಂನಿಂ ಹೆಂಚ್ ಘಾಲ್ತಾತ್. ರಿವಾಜ್, ಆನಿಂ ತುಮಿಂ ತುಂಮ್ಚೆಂ ಲಾಗಿಂಚ್ ದವರಾ" ಮ್ಹಣಾಲೆಂ ಸೀಮಾ. ಸುನೆಚ್ಯಾ ಉತ್ರಾಂನಿ ಮಾಂಯ್ಚೆಂ ಕಾಳಿಜ್ ಕೊಸ್ಳೆಲ್ಯಾ ಬರಿಂ ಭಗ್ಲೆಂ. ತಿಚಿಂ ಸಗ್ಳಿ ಸಕತ್ ಭಾಯ್ರ್ ಸರ್ನ್ ಗೆಲ್ಲ್ಯಾ ರಿತಿರ್ ಬೊಗ್ಲೆಂ ತಿಕಾ. ಹೆಂ ಪಳೆವ್ನ್ ರೋಹಿತಾಕ್ ರಾಗ್ ಯೇವ್ನ್, "ತುಂವೆಂ ಹ್ಯಾ ರೀತಿರ್ ಮಾಂಯ್ಕ್ ಪಾಟಿಂ ಪಳೆಂವ್ಚೆಂ ಸಾರ್ಕೆಂ ನ್ಹಂಯ್"ಮ್ಹಣಾಲೊ. "ಓಹಿತ್ ತುಂವೆಂ ಮ್ಹಾಕಾ ಉಲಂವ್ಚಿ ರೀತ್ ನೀತ್ ಶಿಕಯ್ಜಾಯ್ ಮ್ಹಣ್ ನಾಂ. ಹಾಂವ್ ತುಜ್ಯಾಕಿ ಚಡ್ ಜೊಡ್ತಾಂ. ಬೂದ್ಬಾಳ್ ಸಗ್ಳೆಂ ಸಾಂಗಾಜಾಯ್ ಮ್ಹಣ್ ಚಿಂತಾಯ್ ಜಾಲ್ಯಾರ್ ತಾಕಾ ದುಸ್ರ್ಯಾಕ್ ಪಳೆ, ಮ್ಹಾಕಾ ಸಾಂಗಾನಾಕಾ" ಮ್ಹಣ್ ಸಾಂಗೊನ್ ಭಾಯ್ರ್ ಸರ್ನ್ ಗೆಲೆಂ. ತ್ಯಾ ದೀಸಾ ಥಾವ್ನ್ ಮಾಂಯ್ನ್ ತಾಚೆಲಾಗಿಂ ಉಲಂವ್ಚೆಂ ಉಣೆಂ ಕೆಲೆಂ. ಘರಾಂತ್ ಸಮಧಾನ್ ಹಾಡಿಜೆ, ಸಂತೊಸ್ ಹಾಡಿಜೆ ಮ್ಹಳ್ಳಿಂ ಆಶಾ ದೀಸ್ ವೆತಾಂ - ವೆತಾಂ ನಿವೊನ್ ಯೆತಾಲಿ. ಘರ್, ಕುಟಾಮ್ ಪಾಡ್ ಜಾವ್ನ್ ಯೆಂವ್ಚಿ ಸಗ್ಳಿಂ ಲಕ್ಶಣಾಂ ದಿಸೊನ್ ಯೆತಾಲಿಂ. ಆಪ್ಲ್ಯಾ ಆವಯ್ನ್ ಸದಾಂ ಬೆಜಾರಾಯೆನ್ ರಾಂವ್ಚೆಂ ತಾಕಾ, ಕೆದಾಳಾಯಿ ಬೆಜಾರ್ ಹಾಡುಂಕ್ ಪಾವ್ಲೆಂ. ಮಾಂಯ್ ಘರಾ ಥಾವ್ನ್ ವೆತಾನಾ, ಏಕ್ ಬರೆಂ ಕಾಮ್ ಮ್ಹಾಕಾ ದೀವ್ನ್ ಗೆಲ್ಲಿ. ಮಿಲಿಟ್ರಿಂತ್ ಬಾಬ್ ಸರ್ಲೆಲ್ಯಾ ಉಪ್ರಾಂತ್, ಮಿಲಿಟ್ರಿಗಾರಾಂನಿ ಸರ್ಕಾರಾ ಥಾವ್ನ್ ಏಕ್ ಅಂಗಡ್ ಮಾಂಯ್ಕ್ ದಿಲ್ಲಿ. ತೆದಾಳಾ ಹಾಂವ್ ಕಾಮ್ ಕರ್ತೆಲ್ಯಾ ಅಫೀಸಾಕ್ ರಿಸೈನ್ ದೀವ್ನ್, ಮಾಂಯ್ಚಿ ಆಂಗಡ್ ಸಾಂಬಾಳ್ಚ್ಯಾರ್ ಪಡ್ಲೊಂ.
ತಾಣೆಂ ಏಕ್ ದೀಸ್ ಗಿಫ್ಟ್ ಪ್ಯಾಕ್ ಕರ್ತಾನಾ ರೇಖಾನ್ ತಾಚೆಂ ನಾಂವ್ ಬರವ್ನ್ ದಿಲ್ಲೆಂ. ಆನಿಂ ತಾಣೆಂ ತೆಂ ಪಳೆವ್ನ್ ಅಜ್ಯಾಪೊನ್ ತ್ಯಾ ಸ್ತ್ರೀಯೆಲಾಗಿಂ ವಿಚಾರ್ಲೆಂ.
"ತುಜೆಂ ನಾಂವ್ ರೇಖಾಗಿ"
"ವ್ಹಯ್ ಹಾಂವೆಂ ತುಕಾ ಮ್ಹಜೆಂ ನಾಂವ್ ಸಾಂಗೊಂಕ್ ನಾಂ ನ್ಹಂಯ್ವೆ?"
"ನಾಂ ತುಂವೆಂ ಮ್ಹಾಕಾ ಸಾಂಗೊಂಕ್ ನಾಂಯ್. ತುಜೆಂ ನಾಂವ್ ಸೊಬಿತ್ ಆಸಾ. ಪಯ್ಲೆಂ ಪಾವ್ಟಿಂ ಹಾಂವೆಂ ಹೆಂ ನಾಂವ್ ಆಯ್ಕೊಂವ್ಚೆಂ" ಮ್ಹಣಾಲೊ ರೋಹಿತ್.
"ಕಿತ್ಯಾಕ್ ಆಜ್ ಮ್ಹಜೆಂಲಾಗಿಂ ಪಾಸಾಯೊ ಮಾರ್ತಾಯ್, ಸಕಾಳಿಂ ಥಾವ್ನ್ ತುಕಾ ಕೊಣಿಂಯ್ ಮೆಳೊಂಕ್ ನಾಂತ್ಗಿ?" ಮ್ಹಣ್ ತೆಂ ಚಿಡಯ್ಲಾಗ್ಲೆಂ.
"ಮ್ಹಜಿಂ ಹಿ ಏಕ್ ಲ್ಹಾನ್ ಆಂಗಡ್. ಆತಾತಾಂ ಶುರುವಾತ್ ಕೆಲ್ಲಿಂ. ಆನಿಂ ಮ್ಹಜ್ಯಾ ಆಂಗ್ಡಿ ಯೆಂವ್ಚೊ ಲೋಕ್ ಬೊಟಾನಿಂ ಮೆಜ್ಯೆತ್ ತಸಲೊ. ಆನಿಂ ಹಾಂವೆಂ ಕೂಣಾ ಸಂಗಿಂ ಪಾಸಾಯೊ ಮಾರ್ಯೆತ್."
ರೇಖಾ ಥೊಡೊ ವೇಳ್ ತಾಚೆಂ ತೊಂಡ್ ಪಳೆವ್ನ್ ತಾಚ್ಯಾ ಮತಿಂತ್ ಕಿತೆಂ ತರೀ ಆಸಾಗಾಯ್ ಮ್ಹಣ್ ಚಿಂತುಂಕ್ ಪಡ್ಲೆಂ. ತಿಂ ದೊಗಾಂಯಿ ಸದಾಂಯಿ ಉಲಯ್ತೆಲಿಂ, ಮೆಳ್ತಾಲಿಂ. ರೋಹಿತ್ ಕೆದಾಳಾಯಿ ಸೀಮಾಕ್ ಆನಿಂ ರೇಖಾಕ್ ಆಸ್ಚೊ ತಫಾವತ್ ಪಳೆಯ್ತಾಲೊ. ಹರ್ಯೇಕ್ ಪಾವ್ಟಿಂ ರೋಹಿತಾಕ್, ರೇಖಾಚಿ ಚಾಲ್-ಚಮ್ಕಾಣ್ ಬರಿ ದಿಸ್ಲಿ. ರೋಹಿತಾಚಿ ಮತ್ ಕೆದಾಳಾಯಿ ರೇಖಾ ಕುಶಿನ್ಂಚ್ ಗುಂವ್ತಾಲಿಂ. ಕಿತ್ಲೆಶೆ ಪಾವ್ಟಿಂ ತಾಣೆಂ ತಾಕಾ ಕಾಫಿ ಪಿಯೆಂವ್ಚಾ ಖಾತಿರ್ ರಾವಯ್ಲಾಂ. ಥೊಡೆಂ ಪಾವ್ಟಿಂ ರಾವ್ತೆಲೆಂ, ನಾ ಜಾಲ್ಯಾರ್ ಶೀದಾ ವೆತಾಲೆಂ. ಏಕ್ ದೀಸ್ ಸಾಂಜೆರ್ ರೇಖಾನ್, ರೋಹಿತಾಕ್ ತಾಚ್ಯಾ ಆಫೀಸಾಕ್ ಆಪವ್ನ್ ನವ್ಯಾ ವರ್ಸಾಕ್ ಥೊಡಿಂ ಗಿಪ್ಟ್ ಪ್ಯಾಕ್ ಕಾಣಿಕ್ ತಯಾರ್ ಕರಿಜೆ ಮ್ಹಣಾಲೆಂ. ತುಂಚ್ ಕರ್ ಮ್ಹಣೊನ್ ತಾಚೆಂ ನಾಂವಾರ್ ಆಸ್ಲೆಲೆಂ ಆರ್ಡರ್ ದೀಲಾಗ್ಲೆಂ.
"ಪುಣ್ ಹೆಂ ಸಗ್ಳೆಂ ಸಾರ್ಕೆಂ ಜಾಯೆ?" ಹೆಂ ಸ್ಯಾಂಪಲ್ ಮ್ಹಜೆಂ ನ್ಹಂಯ್ ನ್ಹಂಯ್ಗಿ" ಮ್ಹಣ್ ರೇಖಾಕ್ ತೊ ವಿಚಾರಿಲಾಗ್ಲೊ. "ತುಂ ಏಕ್ ಬುದ್ದು, ಹಾಂವೆ ಮೇಡಮ್ಲಾಗಿಂ ಸಗ್ಳೆಂ ಸಾಂಗೊನ್ ಹೆಂ ಆರ್ಡರ್ ತುಜ್ಯಾ ನಾಂವಾರ್ ಕೆಲಾಂ. ಜಾಯ್ತ್ ತುಂ ಹಾಂಗಾ ಥಾವ್ನ್ ಆತಾಂ ವಚ್. ಸಾಂಜೆರ್ ತುಜೆಲಾಗಿಂ ಹಾಂವ್ ಉಲಯ್ತಾಂ, ಸಗ್ಳಿಂ ಆಮ್ಕಾಂಚ್ ಪಳೆವ್ನ್ ಆಸಾತ್" ಮ್ಹಣಾಲೆಂ ರೇಖಾ.
ತ್ಯಾ ದೀಸಾ ಥಾವ್ನ್ ರೋಹಿತಾಕ್, ರೇಖಾ ಚಡ್ ಲಾಗ್ಗಿಂಚೆಂ ಜಾಂವ್ಕ್ ಪಾವ್ಲೆಂ. ಕೋಣ್ಗಿ ಮ್ಹಾಕಾ ಪಸಂದ್ ಕರ್ತಾಂ ಮ್ಹಳ್ಳೆಂ ಭಾವನ್ ತಾಚ್ಯಾ ಮತಿಂತ್ ಚಡ್-ಚಡ್ ಜಾಂವ್ಕ್ ಪಾವ್ಲೆಂ. ರೇಖಾನ್ ದಿಲ್ಲ್ಯಾ ಗಿಪ್ಟ್ ಪ್ಯಾಕಾ ಥಾವ್ನ್ ತಾಕಾ ಜಾಯ್ ತಿತ್ಲೊ ಲಾಭ್ ಮೆಳ್ಳೆ. ಏಕ್ ದೀಸ್ ರೇಖಾನ್, ಸಕಾಳಿಂ - ಸಕಾಳಿಂ ವಿಶ್ ಕರ್ನ್, ಹಾಂವೆ ಸಾಂಗ್ಲೆಲೆ ಗಿಫ್ಟ್ ಪ್ಯಾಕ್ ತಯಾರ್ ಆಸಾಗಿ ಮ್ಹಣಾಲೆಂ.
"ಗೊತ್ತುನಾ ಮ್ಹಣಾಲೊ ತೊ. ಆರ್ಡರ್ ದಿಲಾಂ ಹಾಂವೆಂ. ಜಾಲಾಂಗಿ ಪಳೆವ್ನ್ ಯೆತಾ" ಮ್ಹಣಾಲೊ ತೊ ತಾಕಾ.
"ಮ್ಹಾಕಾ ಹೆಂ ಏಕ್ ವ್ಹಡ್ಲೆಂ ಆರ್ಡರ್ ತ್ಯಾ ಖಾತಿರ್ ಸಾರ್ಕ್ಯಾ ರಿತಿರ್ ದೀಜೆ ನ್ಹಂಯ್ಗಿ" ಮ್ಹಣಾಲೊ.
"ಅರೆ ತಾಕಾ ಕಿತ್ಯಾಕ್ ತುಂ ತಿತ್ಲಿ ಖಂತ್ ಕರ್ತಾಯ್, ರಾವ್ ಹಾಂವ್ಯಿ ತುಜ್ಯಾ ಸಾಂಗಾಂತಾ ಯೆತಾ"
ರೋಹಿತ್ ರೇಖಾಕ್ ಪಳೆಂವ್ಚಾರ್ ಪಡ್ಲೊಂ. ತಾಚ್ಯಾ ತ್ಯಾ ನಿರಾಶಿ ಜಿವಿತಾಂತ್ ಥಂಡ್ ಏಕ್ ವಾರೆಂ ವಾಳ್ಲ್ಲ್ಯಾ ಬರಿ ತಾಕಾ ಬೊಗ್ಲೆಂ. ತಾಚೆಂ ಸಂಗಿಂ ಭಂವ್ಚೆಂ ತಾಕಾ ಏಕ್ ರೋಮಾಂಚಕ್ ಮ್ಹಣ್ ಬೊಗ್ಲೆಂ. ರೋಹಿತ್ ಪರ್ತ್ಯಾನ್ ತಾಚಿ ವಯ್ಲಿ ದೀಷ್ಟ್ ಕಾಡಿನಾಸ್ತಾನಾ ತಾಕಾಚ್ಚ್ ಪಳೆಂವ್ಚಾರ್ ಪಡ್ಲೊಂ. ತೆಂ ಕಿತ್ಲ್ಯಾ ಸರಳ್ ಸಬ್ದಾನ್, ಕಿತೆಂಯ್ ಸಂಕೋಚ್ ದಾಕಯ್ನಾಸ್ತಾಂ ಉಲಯ್ತಾ. ಆತಾಂ ರೋಹಿತ್ಯಿ ಲೋವ್-ಲೋವ್ ತಾಚೆ ಲಾಗಿಂ ಉಲಂವ್ಕ್ ಸುರು ಕರಿಲಾಗ್ಲೊ. ರೋಹಿತ್, ಸಗ್ಳಿಂ ವಿಷಯ್ ರೇಖಾಕ್ ಕಳಯ್ತಾಲೊ. ಖಂಚಿಯ್ ವಿಶಯ್ ತೊ ತಾಚೆ ಥಾವ್ನ್ ಲಿಪಯ್ನಾತ್ಲ್ಲೊ. ಸೀಮಾ ವಿಷ್ಯಾಂತ್, ತಾಚ್ಯಾ ಚಾಲ್-ಚಮ್ಕಾಣಾಂ ವಿಷ್ಯಾಂತ್ ವೇಳ್ ಮೆಳ್ಲ್ಲ್ಯಾ ತೆದಾಳಾ, ತೊ ರೇಖಾಲಾಗಿಂ ಸಾಂಗೊಂಕ್ ಲಾಗ್ಲೊಂ. ತಾಣೆಂ ತಾಚೆಂ ಆನಿಂ ಸೀಮಾ ವಿಷ್ಯಾಂತ್ ಸಗ್ಳೆಂ ಜ್ವಾಲಾಮುಖಿ ಭಾಶೆನ್ ದಾಂಪುನ್ ದವರ್ತಾಲೊಂ. ಆತಾಂ ಹಿ ಸಗ್ಳಿ ವಿಷಯ್ ತಾಣೆಂ ರೇಖಾ ಲಾಗಿಂ ಸಾಂಗ್ಲೆಲ್ಯಾ ವರ್ವಿಂ ತಾಚ್ಯಾ ಮತಿಚೊ ಭೊರೊ ಉಣೊ ಜಾಲ್ಲ್ಯಾ ಬರಿ ಬೊಗ್ಲೆಂ ತಾಕಾ ಆನಿಂ ಮತಿಕ್ ಸಮಧಾನ್ ಮೆಳ್ಳೆಂ. ತೆದಾಳಾ ರೇಖಾನ್ ತಾಚೊ ಹಾತ್, ಆಪ್ಲ್ಯಾ ಹಾತಾಂತ್ ದವರ್ನ್ ಉಲಯ್ನಾಸ್ತಾಂ ವೊಗೆಂ ರಾವ್ಲೆಂ. ಏಕ್ ದೀಸ್ ಪರ್ತ್ಯಾನ್ ಸೀಮಾಚಿ ಚಾಲ್- ಚಮ್ಕಾಣ್ ರೋಹಿತಾಕ್ ರಾಗ್ ಹಾಡಂವ್ಕ್ ಲಾಗ್ಲಿ.
"ಕಿತ್ಯಾಕ್ ಇತ್ಲಿ ರಾತ್ ಜಾಲಿ? ಕಿತೆಂ ಇತ್ಲೊ ವೇಳ್? ಕಿತೆಂ ಕರುನ್ ಆಸ್ಲ್ಲೊಯ್" ಮ್ಹಣ್ ತೊ ವಿಚಾರಿಲಾಗ್ಲೊ. ತಾಕಾ ತೆಂ ಸರ್ಪಾ ಭಾಶೆನ್ ರಾಗಾನ್ "ಹಾಂವ್ ಮ್ಹಜ್ಯಾ ಡಿಪಾರ್ಟ್ಮೆಂಟಾಂತ್ ವ್ಹಡಿಲ್ನ್ ಮ್ಹಳ್ಳೆಂ ತುಂ ವಿಸ್ರಾನಾಕಾ. ತುಕಾ ಕಿತೆಂ ಸಾಂಜೆಚ್ಯಾ ಸಾತ್ ವೊರಾಂಚೆರ್ ಆಂಗಡ್ ಬಂದ್ ಕರುನ್ ಆಯ್ಲ್ಯಾರ್ ಜಾಲೆಂ. ಮ್ಹಾಕಾ ತಶೆಂ ನ್ಹಂಯ್. ಜಾಯ್ ತಿತ್ಲಿ ಮೀಟಿಂಗಾ ಚಲಂವ್ಕ್ ಆಸಾತ್."
"ಜಾಯ್ ತರ್ ಮಧ್ಯಾನೆಚೆಂ ರಾತಿಂ ಘರಾ ಯೆಂವ್ಚಿ ಗರ್ಜ್ ಕಿತೆಂ? ಆಪೀಸಾಂತ್ಚ್ ನಿದೆ. ಥಂಯ್ಚ್ ನಿದ್ಲ್ಯಾರ್ ಓವರ್ ಟೈಮ್ ಮೆಳ್ತಾ".
"ಕಿತ್ಯಾ ಹೆಂ ಘರ್ ಮ್ಹಜೆಂ. ಹಾಂವ್ ಮ್ಹಾಕಾ ಕೆದಾಳಾ ಜಾಯ್, ತೆದಾಳಾ ಯೆತಾ, ವೆತಾಂ"
ತಾಕಾ ರೋಹಿತ್ ಅಜ್ಯಾಪೀ ರೀತಿನ್ ತಾಕಾ ಪಳೆವ್ನ್ "ಕಿತೆಂ ಹೆಂ ಘರ್ ತುಜೆಂಗಿ?" ಮ್ಹಣಾಲೊ.
"ವ್ಹಯ್ ತುಂವೆಂ ಹ್ಯಾ ಘರಾಚೆ ಲೋನಾಚೆ ಕಂತ್ ಬಾಂದಿನಾತ್ಲೆಲ್ಯಾ ವೆಳಿಂ ಮ್ಹಜ್ಯಾ ಮಾಮ್ಮಿನ್ ತುಕಾ ಕುಮೊಕ್ ಕೆಲ್ಲಿ ನ್ಹಂಯ್ಗಿ? ತ್ಯಾ ಖಾತಿರ್ ಹೆಂ ಘರ್ ಮ್ಹಜೆಂ"
ತ್ಯಾಚ್ ವೆಳಾ ರೋಹಿತಾಕ್ ಘಡ್ಲೆಲಿ ಸಂಗತ್ ಉಡಾಸಾಕ್ ಆಯ್ಲಿ. ಸೀಮಾನ್ ಆನಿಂ ಸೀಮಾಚ್ಯಾ ಮಾಮ್ಮಿನ್ ಚಡ್ ಬುದ್ವಾಂತ್ಕಾಯೆನ್ ಘರಾಚೆ ದೋನ್ ಕಂತ್ ಬಾಂದುನ್, ಬದ್ಲಾಕ್ ಘರಾಚಿ ಪತ್ರಾಂ ಸಗ್ಳಿಂ ಸೀಮಾಚಾ ನಾಂವಾರ್ ಕೆಲ್ಲಿಂ. ಆಪ್ಲ್ಯಾ, ಅಂಗ್ಡಿ ಖಾತಿರ್ ಲೋನ್ ಕಾಡ್ಚ್ಯಾ ಇರಾದ್ಯಾನ್, ಬ್ಯಾಂಕಾಂತ್ ರೀಣಾ ಖಾತಿರ್ ವೆತಾನಾ, ಘರಾಚಿ ಪತ್ರಾಂ ಸೀಮಾಚ್ಯಾ ನಾಂವಾರ್ ಆಸಾತ್ ಮ್ಹಳ್ಳೆಂ ಕಳೊನ್ ಆಯ್ಲೆಂ. ತಾಚ್ಯಾ ದೊಳ್ಯಾಂಕ್ ತೊ ಪಾತ್ಯೆನಾ ಜಾಲೊ. ತಾಚೆಂ ಕಾಳಿಜ್ ಫುಂಟೊಂಕ್ ಲಾಗ್ಲೆಂ. ಸೀಮಾಚ್ಯಾ ತೋಂಡಾ ಥಾವ್ನ್ ಘರಾಚೆಂ ಧನಿ ಮ್ಹಳ್ಳೆಂ ಹಕ್ಕ್, ಆನಿಂ ಅಹಂಕಾರಾನ್ ಭರ್ಲೆಲೆಂ ತೆಂ ಉಲವ್ಣೆಂ , ಪಳೆವ್ನ್ ತಾಚಿ ಸ್ವಪ್ಣಾಂ ಸಗ್ಳಿಂ ಕೊಸ್ಳೊನ್ ಪಡ್ಲಿಂ. ಸಗ್ಳೊ ದೀಸ್ ತಾಚೆಂ ಸಾಂಗಾಂತಾ, ತಾಣೆಂ ಉಲಯ್ಲೆಲಿಂ ಅಹಂಕಾರಾಚಿ ಉತ್ರಾಂ ತಾಕಾ ಚಿಂತುನ್ - ಚಿಂತುನ್ ವೇಳ್ ವೆತಾಲೊ. ತಿತ್ಲ್ಯಾರ್ ತಾಕಾ ರೇಖಾಚೊ ಆವಾಜ್ ಆಯ್ಕಾಲೊ.
"ಖಂಯ್ ಗೆಲಾಯ್. ಕಿತೆಂ ಚಿಂತುನ್ ಆಸಾಯ್? ಹಾಂ ಕಿತ್ಲೊ ವೇಳ್ ಥಾವ್ನ್ ರಾಕೊನ್ ಆಸಾ. ತುಕಾ ಮ್ಹಜೆ ವಯ್ರ್ ರಾಗ್ಗಿ" ಮ್ಹಣಾಲೆಂ. ರೋಹಿತ್ ಗಾಬರ್ಲೆಲ್ಯಾ ರಿತಿರ್ ತಾಕಾ ಪಳೆವ್ನ್ ಹಾಸೊಂಕ್ ಲಾಗ್ಲೊ. ಉಪ್ರಾಂತ್ ತ್ಯಾ ದೀಸ್ ಚಲ್ಲ್ಲೊ ಸಗ್ಳೊ ವಿಷಯ್ ತಾಕಾ ಸಾಂಗಾಲಾಗ್ಲೊಂ.
"ರೇಖಾ ಮ್ಹಾಕಾ ಖಂಚಾಗಿ ಬೂಕಾಂತ್ ವಾಚ್ಲಲೊ ಉಡಾಸ್ ಆಸಾ. ಮೊಗಾಚೊ ಬಾಂದ್ ಕೇವಲ್ ದೈಹಿಕ್ ರೀತಿರ್ ನ್ಹಂಯ್, ಮಾನಸಿಕ್ ರೀತಿರ್ಯಿ ಆಸಾಜೆ. ಹಿ ವಿಷಯ್ ತುಜ್ಯಾ ಜಿವಿತಾಂತ್ ಸಮಾ ವಿರುದ್ಧ್ ಜಾವ್ನಾಸಾ. ತುಜೆಂ ಘರಾಣೆಂ ಪಾಡ್ ಜಾಂವ್ಚಾರ್ ಆಸಾ. ಘರ್ ಮ್ಹಳ್ಳೆಂ, ಏಕಾ ಮನಾನ್ ಬಾಂದ್ಲೆಲೆ ಜಾಯ್ಜೆ. ನ್ಹಂಯ್ ಸಿಮೆಂಟ್, ಇಟೆ-ಫಾತ್ರಾಂತ್. ತಸಲಿಂ ಘರಾಂ ಪಾಡ್ ಜಾಲ್ಯಾರ್ ಪರ್ತ್ಯಾನ್ ಬಾಂದುನ್ ಹಾಡ್ಯೆತ್. ತುಂ ಮ್ಹಜೆಂ ಸಂಗಿಂ ಆಸ್ಲ್ಯಾರ್ ಹಾಂವೆಂ ಪರ್ತ್ಯಾನ್ ಬರಿ ಜಿಣಿ ಜಿಯೆವ್ಯೆತ್ ಮ್ಹಣಾಲೊ ತೊ ತಾಕಾ. ಆಶೆಂ ಜಾಯ್ಜಾಯ್ ಜಾಲ್ಯಾರ್ ಮ್ಹಾಕಾ ತುಜಿ ಗರ್ಜ್ ಆಸಾ" ಮ್ಹಣಾಲೊ ತೊ ತಾಕಾ.
ರೇಖಾ ಏಕ್ ಪಾವ್ಟಿಂ ಮೌನ್ ಜಾಲೆಂ. ಉಪ್ರಾಂತ್ ಹಾಸೊನ್, "ಕಿತ್ಯಾಕ್ ಮ್ಹಜೆರ್ ವಿಶ್ವಾಸ್ ನಾಂಗಿ " ಮ್ಹಣಾಲೆಂ.
"ವಿಶ್ವಾಸ್ ನಾಸ್ತಾನಾಂಗಿ ಹಾಂವ್ ತುಜೆಲಾಗಿಂ ಮ್ಹಜೆಂ ಕಷ್ಟ್ ದೂಕ್ ವಾಂಟುನ್ ಘೆತಾ"
ರೇಖಾ ಉಟೊನ್ ಉಬೆಂ ಜಾತಾನಾ, ರೋಹಿತಾನ್ ಧಿಡೀರ್ ಮ್ಹಣೊನ್ ತಾಚೊ ಹಾತ್ ಧರ್ಲೊ ಆನಿಂ ಮ್ಹಣಾಲೊಂ "ಥ್ಯಾಂಕ್ಸ್ ರೇಖಾ". ತಾಚ್ಯಾ ಉಪ್ರಾಂತ್ ಚಾರ್-ದಿಸಾಂಚಾ ರಜೆ ಉಪ್ರಾಂತ್ ಪರ್ತ್ಯಾನ್ ರೋಹಿತಾನ್ ಆಂಗಡ್ ಉಗ್ತೆಂ ಕರ್ತಾನಾ, ರೇಖಾ ತಾಚ್ಯಾ ಅಂಗ್ಡಿಲಾಗಿಂ ಆಯ್ಲೆಂ. ಸದಾಂಚಾ ಭಾಶೆನ್ ತಿಂ ದೊಗಾಂಯಿ ಉಲವ್ನ್ ಆಸ್ಲೆಲಿಂ. ತ್ಯಾ ವೆಳಿಂ ರೋಹಿತಾನ್ ರೇಖಾಕ್ ಸಾಂಗ್ಲೆಂ "ತುಕಾ ಏಕ್ ವಿಷಯ್ ಸಾಂಗೊಂಕ್ ಆಸಾ. ಆನಿಂ ತಿ ವಿಷಯ್ ಆಯ್ಕೊನ್ ತುಜ್ಯಾ ಮತಿಕ್ ಸಂತೊಸ್ ಜಾತಲೊ. ತುಕಾ ಸಂತೊಸ್ ದಿಂವ್ಚಿ ಖಬಾರ್ ಆಯ್ಕೊಂವ್ಕ್ ಮ್ಹಾಕಾ ದನ್ಪರಾಂ ಮೇಳ್".
"ವ್ಹಯ್ಗಿ? ತರ್ ಹಾಂವ್ ದನ್ಪರಾ ಆರ್ಧ್ಯಾ ದಿಸಾಚಿ ರಜಾ ಘಾಲ್ತಾಂ. ಖಂಚಾ ತರೀ ಹೋಟೆಲಾಕ್ ವಚೊನ್ ಜೆವ್ಯಾಂ. ಮ್ಹಾಕಾ ರಾಕ್ತಾಯ್ಗಿ ಮ್ಹಣಾಲೆಂ?"
"ನಾಕಾ ರೇಖಾ ಮ್ಹಾಕಾ ತೆದಾಳಾ ಮ್ಹಣಾಸರ್ ರಾಕೊಂಕ್ ವೇಳ್ ನಾಂ. ಆತಾಂಚ್ ಯಾ ಮ್ಹಣಾಲೊ. ರೋಹಿತಾಚೆಂ ಆಪವ್ಣೆಂ ತಾಕಾ ಇನ್ಕಾರ್ ಕರುಂಕ್ ಜಾಯ್ನಾಸ್ತಾನಾಂ, ಲಾಗಿಂಚ್ ಆಸ್ಲೆಲ್ಯಾ ಪಾರ್ಕಾಕ್ ಯಾ ಮ್ಹಣಾಲೆಂ ತೆಂ. ತ್ಯಾ ದೀಸ್ ರೇಖಾಲಾಗಿಂ ಸಗ್ಳೆಂ ಶೀದಾ-ಶೀದಾ ಸಾಂಗಾಜಯ್ ಮ್ಹಣೊನ್ ತಾಣೆಂ ಚಿಂತ್ಲ್ಲೆಂ. "ರೇಖಾ ತುಂ ತ್ಯಾ ದಿಸಾ ಮ್ಹಜೆಲಾಗಿಂ ಉಲಯ್ಲೆಲ್ಯಾ ವರ್ವಿಂ ಮ್ಹಾಕಾ ಜಾಯ್ ತಿತ್ಲೆಂ ಧಯ್ರ್ ಆಜ್ ಮೆಳ್ಳಾಂ. ಪಯ್ಲೆ ಪಾವ್ಟಿಂ ಕೊಣೆಂಗಿ ಮ್ಹಜೆಂ ಕಾಳಿಜ್ ವೊಡ್ಲೆಲ್ಯಾಬರಿ ಬೊಗ್ತಾ. ಮ್ಹಾಕಾ ತುಕಾ ಸೊಡುನ್ ಜಿಯೆಂವ್ಕ್ ಸಾಧ್ಯ್ ನಾಂ. ಹಾಂವ್ ಹಾಂಗಾಚ್ಚ್ ಜೆ.ಸಿ. ನಗರಾಂತ್ ಲ್ಹಾನ್ ಫ್ಲಾಟ್ ಪಳೆಯ್ಲಾಂ. ಸಾಂಗ್ ಮ್ಹಜ್ಯಾ ಜಿವಿತಾಂತ್ ಕೆದಾಳಾ ಯೆತಾಯ್? ಹಾಸೊನ್ ಹಾಸೊನ್ ಆಸ್ಲೆಲೆ ರೇಖಾಚೆಂ ತೊಂಡ್ ಏಕ್ಚ್ಚ್ ಪಾವ್ಟಿಂ ರೋಹಿತಾಚಿಂ ಉತ್ರಾಂ ಆಯ್ಕೊನ್ ಗಂಭೀರ್ ಜಾಲೆಂ. ಅನಿರೀಕ್ಶಿತ್ ರೀತಿನ್ ಏಕ್ಚ್ಚ್ ಪಾವ್ಟಿಂ ರೋಹಿತಾನ್ ಸವಾಲ್ ವಿಚರ್ಲ್ಯಾನ್ ತಾಚೆಂ ಕಾಳಿಜ್ ಕಾಂಪೊಂಕ್ ಲಾಗ್ಲೆಂ. ಪರ್ತ್ಯಾನ್ ಏಕ್ ಪಾವ್ಟಿಂ ರೋಹಿತಾಚೆಂ ತೋಂಡ್ ಪಳೆಯ್ಲಾಗ್ಲೆಂ ಆನಿಂ ಮ್ಹಣಾಲೆಂ "ಜಾಯ್ತ್ ತರ್ ಮ್ಹಾಕಾ ಚಿಂತುಂಕ್ ಥೊಡೊ ವೇಳ್ ದೀ ಮ್ಹಣಾಲೆಂ.
"ರೇಖಾ ಚಡ್ ವೇಳ್ ಘೆನಾಕಾ. ಮ್ಹಾಕಾ ತುಜೆಂ ಬಗಾರ್ ರಾವೊಂಕ್ ಜಾಂವ್ಚೆನಾಂ" ಮ್ಹಣಾಲೊ. ರೇಖಾ ಆಪ್ಣಾಕ್ ತಕ್ಲಿ ಫಡ್ತಾ ಮ್ಹಣೊನ್ ನೀಬ್ ದೀವ್ನ್ ಥಂಯ್ ಥಾವ್ನ್ ಭಾಯ್ರ್ ಸರ್ಲೆಂ. ರೋಹಿತ್ ಆಪ್ಣಾಕ್ ತಿತ್ಲೆಂ ಪಸಂದ್ ಕರ್ತಾಂ ಮ್ಹಣೊನ್ ತಾಣೆಂ ಚಿಂತುಕ್ಯಿ ನಾತ್ಲೆಲೆಂ. ರೋಹಿತಾಚಾ ಉತ್ರಾನಿಂ ತಾಚ್ಯಾ ತ್ಯಾ ಶಾಂತ್ ಮತಿಂತ್ ವಾದಾಳ್ ಉಟಯಿಲ್ಲೆಂ. ದಾದ್ಲೆ ಮನಿಸ್ ಎಕಾ ಸ್ತ್ರೀಯೆಕ್ ಆಪ್ಣಾಚಿ ಏಕ್ ಖರಿ ಇಷ್ಟಿಣ್ ಮ್ಹಣ್ ಘೆನಾ ಮ್ಹಣ್ ಚಿಂತುಂಕ್ ಲಾಗ್ಲೆಂ. ಸಗ್ಳಿ ರಾತ್ ತೆಂ ಚಿಂತುನ್ ಎಕ್ ನಿರ್ಧಾರಾಕ್ ಆಯ್ಲೆಂ. ಆನಿಂ ಸಕಾಳಿಂ ಜಾತಚ್ಚ್ ರೋಹಿತಾಕ್ ತಾಚ್ಯಾ ಅಂಗ್ಡಿ ಮುಖಾರ್ ಮೆಳೊನ್ ಮ್ಹಣಾಲೆಂ. "ಮ್ಹಾಕಾ ಥೊಡ್ಯಾ ದಿಸಾಂ ಖಾತಿರ್, ಆಫೀಸಾಚ್ಯಾ ಕಾಮಾಖಾತಿರ್ ದುಸ್ರ್ಯಾ ಗಾಂವಾಕ್ ವಚೊಂಕ್ ಆಸಾ. ಹಾಂವ್ ಪಾಟಿಂ ಯೇವ್ನ್ ತುಜೆಂ ಲಾಗಿಂ ಸಗ್ಳೆಂ ಸವಿಸ್ತಾರ್ ರಿತಿರ್ ಉಲಯ್ತಾಂ."
ಸೀಮಾನ್ ಆಪಯ್ಲಲೊ ಆವಾಜ್ ಆಯ್ಕಾಲೊ. "ಖಂಯ್ ಗೆಲಾಯ್ ಆಮಿಂ ಭಿತರ್ ರಾಕ್ತಾಂವ್. ತುಂ ಹಾಂಗಾಂ ಬಸ್ಲಾಯ್. ಹೆಂ ಕಿತೆಂ ಬಿತರ್ ಯೇ " ಮ್ಹಣಾಲೆಂ ಸೀಮಾ. ಜೆವಾಣ್ ಜಾಲ್ಲ್ಯಾ ಉಪ್ರಾಂತ್ ರೇಖಾ ಹಾತ್ ಧುಂವ್ಚ್ಯಾ ಖಾತಿರ್ ಬಾತ್ರೂಮಾ ಸರ್ಶಿಂ ಪಾವ್ಲೆಂ. ತ್ಯಾ ವೆಳಾರ್ ರೋಹಿತಾನ್ ನಿರಾಶೆನ್ ರೇಖಾಕ್ ಪಳೆಯ್ಲೆಂ. ಸೀಮಾ ಸರ್ಶಿಂ ನಾತ್ಲೆಲ್ಯಾ ವರ್ವಿಂ ರೇಖಾ ವಿಚಾರಿಲಾಗ್ಲೆಂ "ಮ್ಹಜೆಂ ವಯ್ರ್ ತುಕಾ ರಾಗ್ಗಿ?" ರೋಹಿತಾನ್ ಜಾಪ್ ಕಾಡ್ಲಿನಾ. ಹಾಂವೆಂ ತುಕಾ ಜಾಪ್ ದೀಂವ್ಕ್ ಜಾವ್ನ್ ಕಿತ್ಯಾಕ್ ಮ್ಹಳ್ಯಾರ್ ಮ್ಹಾಕಾ ಮ್ಹಜ್ಯಾ ಘರ್ಚ್ಯಾಂನಿ ಪಯ್ಲೆಂಚ್ ಚೆಡೊ ಪಳೆಯ್ಲಾ ಆನಿಂ ತುಜ್ಯಾ ಸವಲಾ ವೆಳಾರ್ ಮ್ಹಜೆಂ ಖರಾರ್ ಜಾವ್ನ್ ಜಾಲ್ಲೆಂ. ತ್ಯಾ ವೆಳಿಂ ತುಜ್ಯಾ ಸವಲಾಂಕ್ ಖಂಚ್ಯಾ ರಿತಿರ್ ಹಾಂವ್ ಜಾಪ್ ದೀಂವ್ ಸಾಂಗ್. ಮ್ಹಾಕಾ ಗೊತ್ತು ಆಸಾ. ತುಕಾ ಬೆಜಾರ್ ಜಾಲಾಂ ಮ್ಹಣ್, ಬೆಜಾರ್ ಕರಿನಾಕಾ. ತುಕಾ ಹಾಂವ್ ಮಸ್ತ್ ಮಿಸ್ಸ್ ಕರ್ತಾಂ" ಮ್ಹಣಾಲೆಂ.
"ಹಾಂವ್ಯಿ ರೇಖಾ" ಮ್ಹಣಾಲೊ ತೊ.
ಪಾಟ್ಲ್ಯಾನ್ ಸೀಮಾ ಸರ್ಶಿಂ ಯೇವ್ನ್ "ತುಂವೆಂ ನಿಜಾಯ್ಕಿ ಆಮ್ಚೆಂ ಘರ್ ರಾಕ್ಲಾಂಯ್. ಥಂಯ್ಸರ್ ಎಕಾ ರಿತಿಚೆಂ ಮೌನ್ ರುತಾ ಜಾಲ್ಲೆಂ. ಲ್ಹಾನ್ ಲ್ಹಾನ್ ಉತ್ರಾಂನಿ ಜೀವನ್ ಪಿಗ್ಳೊನ್ ಯೆತಾ ಮ್ಹಣ್ ತೆಗಾಂಯಿ ಚಿಂತಿಲಾಗ್ಲಿಂ. ಹೋಟೆಲಾ ಥಾವ್ನ್ ಭಾಯ್ರ್ ಯೆತಾನಾ ತೆಗಾಂಯ್ಚಾ ದೊಳ್ಯಾಂನಿ ದುಃಖಾಂ ಭರ್ಲೆಲಿಂ. ಕಿತ್ಯಾಕ್ ಮ್ಹಳ್ಯಾರ್ ತಾಂಚಾ ಮದ್ಗಾತ್ ಆಸ್ಲೆಲ್ಯಾ ತ್ಯಾ ಸಂಬಂಧಾದ್ವಾರಿಂ. ತ್ಯಾ ವೆಳಿಂ ರೋಹಿತ್ ಆವಯ್ ವಿಷ್ಯಾಂತ್ ಚಿಂತಿಲಾಗ್ಲೊ. ತಿಚಾಯಿ ದೊಳ್ಯಾಂನಿ ಸದಾಂಚ್ ದುಃಖಾಂ ಭರೊನ್ ವೊಮ್ತಾತಾಲಿಂ. ಆನಿಂ ಸೀಮಾ ತ್ಯಾ ದೀಸಾ ಉಪ್ರಾಂತ್ ಸಗ್ಳ್ಯಾಲಾಗಿಂ ಮೊಗಾನ್ ಚಲಾಲಾಗ್ಲೆಂ. ಘರಾಂತ್ ಪರ್ತ್ಯಾನ್ ತಾಣೆಂ ಆಶೆಲ್ಲೆಂ ಶಾಂತ್ ಸಮಾಧಾನ್ ಪಾಟಿಂ ಮೆಳ್ಳೆಂ.
ಆದ್ಲ್ಯಾ ಕಥಾಂಕರ್ ಪಾನಾಕ್: 1, 2, 3, 4, 5, 6
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
