ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 28. ಭಾಂಗಾರಾಚಿ ಚೇಯ್ನ್
ಜುಡಿತ್ ಪಿರೇರಾ: ಸಭಾರ್ ಪಾವ್ಟಿಂ ಜಿಣ್ಯೆಂತ್ಲಿ ಜವಾಬ್ಧಾರಿಚ್ ಚಡ್ ಜಾವ್ನ್ ವೆತಾನಾ ಏಕ್ ಕಾಣ್ಯೆಗಾರಾಕ್ ಅನ್ಯೇಕ್ ಕಾಣಿ ಬರಂವ್ಕ್ ಉಬ್ದೇಸ್ ಭಗ್ತಾತ್. ತರ್ಯ್ ತಾಚೆ/ತಿಚೆ ಥಂಯ್ ಆಸ್ಚೊ ಕಾಣ್ಯೆಗಾರ್ ಕೆದಿಂಚ್ ಜೀವ್ ಸೊಡಿನಾ ಬಗಾರ್ ಸದಾಂಕಾಳ್ ಜಿಯೆತಾ ಮ್ಹಣ್ಚಾಕ್ ಜುಡಿತ್ ಬಾಯ್ ಗೊವಾಯ್. ಕಾಂಯ್ ತೀಸ್ ವರ್ಸಾಂಧಿಂ ಸರಾಗ್ ಬರವ್ನ್ ಆಸ್ಲ್ಲ್ಯಾ ಹಿಣೆಂ ಅವ್ಚಿತ್ ಬರಂವ್ಚೆಂ ರಾವಯ್ಲೆಂ, ಪುಣ್ ಸುಮಾರ್ ತೆಂಪಾ ಉಪ್ರಾಂತ್ ಪರತ್ ಬರಂವ್ಕ್ ಸುರು ಕೆಲ್ಲೆಂ ಹಾಚಿ ರುಜ್ವಾತ್. ಹಿಚಾ ಕಾಣ್ಯಾಂಚೊ ಬೂಕ್ ’ಕೊಡು ಸತಾಂ’ 2003 ಇಸ್ವೆಂತ್ ಪರ್ಗಟ್ ಜಾಲಾ. ಸಾಮಾಜಿಕ್ ಕಾಣ್ಯೊ ಹಿಚಿ ವಿಶೇಷತಾ. ಭಾಂಗಾರಾಚಿ ಚೇಯ್ನ್ ಏಕ್ ಅಸಲಿಚ್ ಉಮಾಳ್ಯಾಂ ಭರಿತ್ ಕಾಣ.�
ಜುಡಿತ್ ಪಿರೇರಾ
ಸರ್ಕಾರಿ ಆಸ್ಪತ್ರ್ ತಿ! ಗತ್ ಆದಾರ್ ನಾತ್ಲ್ಲಿಂ, ಭುರ್ಗ್ಯಾಂನಿ ಭಾಯ್ರ್ ಘಾಲ್ಲಿಂ, ಘರ್ದಾರ್ ನಾಸ್ತಾನಾ ವಾಟೆರ್ ಪಡ್ಲ್ಲಿಂ ಸಗ್ಳಿಂ ಹ್ಯಾ ಸರ್ಕಾರಿ ಆಸ್ಪತ್ರೆಕ್ ಯೆತಾಲಿಂ. ಥೊಡಿಂ ಪಿಡೆಸ್ತ್ ತರ್ ಆನಿ ಥೊಡಿಂ ಕಾಮ್ ಕರುಂಕ್ ತಾಂಕಾನಾಸ್ತಾನಾ ಪಿಡೆಸ್ತ್ ಮ್ಹಣ್ ದಾಕವ್ನ್ ಥೊಡ್ಯಾ ದಿಸಾಂಚೆಂ ಖಾಣ್ ಜೆವಾಣ್ ಮೆಳಾತ್ ಮ್ಹಳ್ಳೆ ಆಶೆನ್ ಥಂಯ್ ಯೇವ್ನ್ ರಾವ್ತಾಲಿಂ. ಥೊಡೆ ದಾಕ್ತೆರ್ ಆನಿ ನರ್ಸಾಂ ಅಸಲ್ಯಾ ಲೊಕಾಚೆರ್ ಭಿರ್ಮೊತ್ ಪಾವ್ತಾನಾ ಆನಿ ಥೊಡೆ "ಧರ್ಮಾಚೆಂ ಮೆಳ್ತಾ ಮ್ಹಣ್ ಖಾಂವ್ಕ್ ಆಯ್ಲ್ಯಾಯ್ಗಿ" ಮ್ಹಣ್ ಹಿಣ್ಸುನ್ ಪಾಟಿಂ ಧಾಡ್ತಾಲೆ. ಭಿರ್ಮೊತ್ ಅಸಲ್ಯಾ ಗರೀಬ್ ಲೊಕಾಚಿ.
ಡೊ. ಜೆನಿಫರ್ ಸೊಮಾರಾಚಿ ಇಂಟರ್ಶಿಪ್ ಡ್ಯೂಟಿ ಕರ್ನ್ ಆಪ್ಲ್ಯಾ ಹೊಸ್ಟೆಲಾಚ್ಯಾ ರುಮಾಕ್ ಪಾಟಿಂ ಆಯಿಲ್ಲೆಂ. ತಾಚೆಂ ರೂಮ್ಮೇಟ್ ಮಲೇಶಿಯಾಕ್ ಗೆಲ್ಲ್ಯಾನ್ ಎಕ್ಸುರೆಂ ಬಸೊಂಕ್ ತಾಕಾ ಬೆಜಾರ್ ಜಾಲ್ಲೆಂ ದೆಕುನ್ ಸರ್ಕಾರಿ ಆಸ್ಪತ್ರೆಕ್ ವಚೊನ್ ತ್ಯಾ ದುಬ್ಳ್ಯಾ ಪಿಡೆಸ್ತಾಂಲಾಗಿಂ ಉಲಯಾಂ ಮ್ಹಣ್ ತಾಕಾ ಮನ್ ಜಾಲೆಂ. ಭಾಯ್ಲ್ಯಾ ಗಾಂವಾಂತ್ ಜಲ್ಮೊನ್ ವ್ಹಡ್ ಜಾಲ್ಲ್ಯಾ ತಾಕಾ ಕೊಂಕ್ಣಿ ಉಲಂವ್ಕ್ ಯೆತಾಲಿ ತರೀ ಕನ್ನಡ ಆನಿ ತುಳು ಯೇನಾತ್ಲ್ಲಿ. ದೆಕುನ್ ಸಾಂಗಾತಾ ಡೊ. ಮಾಲತಿಕ್ ಘೆವ್ನ್ ತೆಂ ಸರ್ಕಾರಿ ಆಸ್ಪತ್ರೆಕ್ ಗೆಲೆಂ.
ವೊರಾಂ ಸಾಂಜೆಚಿಂ ಪಾಂಚ್ ಜಾಲ್ಲಿಂ ತರೀ ಪಿಡೆಸ್ತಾಂಕ್ ಪಳೆಂವ್ಕ್ ಆಯಿಲ್ಲೆ ಜಣ್ ಚಡ್ ನಾತ್ಲ್ಲೆ.
ತ್ಯಾ ದುಬ್ಳ್ಯಾ ಲೊಕಾಕ್ ಕೋಣ್ ಯೇತ್ ಪಳೆಂವ್ಕ್? ಗ್ರೇಸ್ತಾಂತ್ ಜಾಲ್ಯಾರ್ ಫುಲಾಂ, ಫಳಾಂ ಹಾಡ್ನ್ ಲೋಕ್ ವಳೊಕ್ ಕರ್ನ್ ಯೆತೊ ಆಸ್ಲ್ಲೊ. ಪುಣ್ ಹ್ಯಾ ಸರ್ಕಾರಿ ಆಸ್ಪತ್ರೆಂತ್ ಆಸ್ಚೆ ಸಗ್ಳೆ ದುಬ್ಳೆ, ಗತ್ ಆದಾರ್ ನಾತ್ಲ್ಲೆ.
ಡೊ|ಜೆನಿಫರ್ ಆನಿ ಡೊ|ಮಾಲತಿ ರಿಸೆಪ್ಶನ್ ಜಾಗ್ಯಾರ್ ಯೆತಾನಾ ಏಕ್ ಪ್ರಾಯ್ವಂತ್ ದಾದ್ಲೊ ಎಕಾ ನರ್ಸಾಲಾಗಿಂ ಹಾತ್ ಜೋಡ್ನ್ ವಿನತಿ ಕರ್ಚೊ ದಿಸ್ಲೊ. ನರ್ಸ್ ತಾಕಾ ಜ್ಯೋರ್ ಕರ್ನ್ ಧಾಡುಂಕ್ ಪಳೆತಾಲಿ ಜಾಲ್ಯಾರೀ ತೊ ಥಂಯ್ ಥಾವ್ನ್ ಹಾಲೊಂಕ್ ಆಯ್ಕಾಲೊ ನಾ.
"ಹಾಂಗಾ ಕಿತೆಂ ಗಜಾಲ್?" ಡೊ|ಮಾಲತಿನ್ ನರ್ಸಾಲಾಗಿಂ ವಿಚಾರ್ಲೆಂ.
"ಡೊಕ್ಟರ್, ಆಪ್ಣಾಕ್ ಹಾಂಗಾ ರಾವೊಂಕ್ ದೀಜೆ ಮ್ಹಣ್ ಹಠ್ ಕರ್ತಾ. ಪ್ರಾಯ್ವಂತ್ ಜಾಲ್ಯಾರೀ ಪಿಡೆಸ್ತ್ ನ್ಹಂಯ್. ಹಾಂವೆಂ ತಾಕಾ ವಚೊಂಕ್ ಸಾಂಗ್ಲೆಂ".
ನರ್ಸಾಚಿ ಜಾಪ್ ಆಯ್ಕೊನ್ ಡೊ|ಮಾಲತಿಕ್ ಕಠಿಣ್ ರಾಗ್ ಆಯ್ಲೊ. ತಿಣೆಂ ತ್ಯಾ ನರ್ಸಾಕ್ ಸಾಂಗೊನ್ ತ್ಯಾ ಪ್ರಾಯ್ವಂತಾಂಕ್ ದಾಖಲ್ ಕರಯ್ಲೆಂ.
"ದೇವ್ ಬರೆಂ ಕರುಂ ಪುತಾ" ತೊ ಸಾಂಗಾಲಾಗ್ಲೊ ರಡೊನ್. "ಮ್ಹಜಿ ಬಾಯ್ಲ್ ಸರ್ಲಿ ಆನಿ ಆತಾಂ ಮ್ಹಾಕಾ ಕೊಣಿ ಆದಾರ್ ನಾ. ನೀಸ್ ಪೇಜ್ ದಿತೆಲ್ಯಾಚಿ ಗತ್ ನಾ. ಪಯ್ಶೆ ನಾಂತ್ ದೆಕುನ್ ಸೈರೆ ಕೊಣಿ ಲಾಗ್ಗಿಂ ಕರ್ನಾಂತ್".
"ತುಕಾ ಭುರ್ಗಿಂ ನಾಂತ್?" ಡೊ|ಮಾಲತಿನ್ ವಿಚಾರ್ಲೆಂ.
"ಆಸಾತ್" ತೊ ಖಂತಿನ್ ಸಾಂಗಾಲಾಗ್ಲೊ. ಪುಣ್ ಪುತಾಚಿ ವರ್ಸಾಂ ಥಾವ್ನ್ ಖಬರ್ ನಾ!
ಬೊಂಬೊಯ್ಚ್ಯಾ ಗಾಂವಾಂತ್ ವಚೊನ್ ಹ್ಯೆ ಪ್ರಾಯೆರ್ ಹಾವೆಂ ತಾಂಕಾಂ ಖಂಯ್ ಸೊಧ್ಚೆಂ? ಆಸ್ಲ್ಲೆಂ ಧುವ್ ತಾಚ್ಯಾ ಕಶ್ಟಾರ್ ಆಸಾ.
"ಹಾಂಗಾ ತುಕಾ ಚಡ್ ದೀಸ್ ದವರ್ಚೆನಾಂತ್. ಹಾಂವ್ ಜಾತಾತಿತ್ಲೆಂ ಪ್ಯಯತ್ನ್ ಕರ್ತಾಂ ತುಕಾ ಚಡ್ ದೀಸ್ ದವರುಂಕ್. ತ್ಯಾ ಉಪ್ರಾಂತ್ ಖಂಚ್ಯಾ ತರಿ ಪ್ರಾಯ್ವಂತಾಂಚ್ಯಾ ಘರಾಂತ್ ದವರುಂಕ್ ಪಳೆತಾಂ, ಥಂಯ್ ಥಾವ್ನ್ ತುಕಾ ಕೊಣೀಂ ಭಾಯ್ರ್ ಕಾಡಿಶೆನಾಂತ್" ಭರ್ವಸೊ ದಿಲಿ ತಿಣೆಂ.
"ದಯಾ ಕರ್ನ್ ಮ್ಹಾಕಾ ತಸಲಿ ಮಾಂಡಾವಳ್ ಕರಾ ಪುತಾ. ಮ್ಹಾಕಾ ಕೊಣೀ ನಾಂತ್. ಭುರ್ಗಿಂ ಆಸೊನ್ ನಾಂತ್. ಸೈರಿ ಆಸೊನ್ ಪಳೆನಾಂತ್. ದೆವಾನ್ ದಿಲ್ಲೊ ಜೀವ್ ದೆವಾನ್ಂಚ್ ವ್ಹರಿಜೆ ನ್ಹಂಯ್ಗಿ. ಮ್ಹಜಿ ಚಾಕ್ರಿ ಕರ್ಚ್ಯಾ ಮ್ಹಜೆ ಬಾಯ್ಲೆಕ್ ದೆವಾನ್ ವ್ಹೆಲೆಂ. ಪುಣ್ ಮ್ಹಾಕಾ ಹ್ಯಾ ಸಂಸಾರಾಂತ್ ಕಶ್ಟ್ ಸೊಸುಂಕ್ ದವರ್ಲೆಂ.
"ಸಗ್ಳೆಂ ಸಮಾ ಜಾತೆಲೆಂ" ಡೊ|ಮಾಲತಿನ್ ತಾಕಾ ಭುಜಯ್ಲೆಂ.
"ಆಮಿ ಸೊಡ್ನ್ ಘಾಲಿನಾಂವ್. ಹಾಂಗಾ ಆಮಿ ಸದಾಂಯ್ ತುಕಾ ಪಳೆವ್ನ್ ಯೆತಾಂವ್. ತುಕಾ ರಾಂವ್ಚಿ ಬಂದಬಸ್ತ್ಯಿ ಕರ್ತಾಂವ್"
ಡೊ|ಮಾಲತಿಚ್ಯಾ ಉತ್ರಾಂನಿ ತ್ಯಾ ಪ್ರಾಯ್ವಂತಾಕ್ ಧಯ್ರ್ ಮೆಳ್ಳೆಂ. ಆಪ್ಣಾಕ್ ರಾಂವ್ಚೊ ಏಕ್ ತಿಂ ಕರ್ನ್ ದಿತೆಲಿಂ ದಿಸೊಂಕ್ ನಾಂತ್ ದೆಕುನ್ ತಿಂ ಎಕ್ಲ್ಯಾಲಾಗಿಂ ವೆತಾನಾ ತಿಚೆಂ ನಾಂವ್ ಮೇರಿ ಡಿಸೊಜಾ ಮ್ಹಣ್ ಕಳ್ಳೆಂ. ಡೊ|ಜೆನಿಫರಾಕ್ ತಿಚೆಲಾಗಿಂ ಸೊಡುನ್ ಡೊ|ಮಾಲತಿ ಮುಕಾರ್ ಗೆಲಿ.
ಡೊ|ಜೆನಿಫರಾನ್ ಮೇರಿಬಾಯೆಕ್ ಹಾಸೊ ದಿಲ್ಯೊ. ತಿ ಖುಶಿ ಜಾಳಿ. "ಆಜ್ ತುಕಾ ಪಳೆಂವ್ಕ್ ಕೊಣ್ಯೀ ಯೇಂವ್ಕ್ ನಾಂತ್ಗಿ?"
"ನಾ ಡೊಕ್ಟರ್" ತಿ ಸಾಂಗಾಲಾಗ್ಲಿ.
"ಮ್ಹಜೊ ಪೂತ್ ಕುಲಿ ಕಾಮಾಕ್ ಗೆಲಾ ಆಸ್ತಲೊ. ತಾಕಾ ಸಾರ್ಕೆಂ ಕಾಮ್ ನಾ. ಏಕ್ ದೀಸ್ ಆಸ್ಲ್ಯಾರ್ ಚ್ಯಾರ್ ದೀಸ್ ಬೆಕಾರ್ ಆನಿ ಸುನ್ ಕಾಂಯ್ ಕೊಣಾಯ್ಚ್ಯಾ ಘರಾಚೆಂ ಕಾಮ್ ಕರುಂಕ್ ಗೆಲಾಂ ಆಸ್ತೆಲೆಂ. ದೊಗಾಂ ಲ್ಹಾನ್ ನಾತ್ರಾಂ ಆಸಾತ್. ಹಾಂವೆಂ
ತಾಂಕಾಂ ಹಾಂಗಾ ಹಾಡುಂಕ್ ನಜೊ ಮ್ಹಳಾಂ"
"ತುಕಾ ದುಸ್ರಿಂ ಭುರ್ಗಿಂ ನಾಂತ್ಗಿ?"
ಥೊಡೊ ವೇಳ್ ತಿ ವೊಗಿ ರಾವ್ಲಿ. ತಿಚೆಂ ಬಾವ್ಲ್ಲೆಂ ತೋಂಡ್ ಆನಿ ದೊಳ್ಯಾಂನಿ ಭರ್ಲ್ಲಿಂ ದುಕಾಂ ಖಂತ್ ಆನಿ ಬೆಜಾರಾಯ್ ದಾಕಯ್ತಾಲಿಂ.
"ಮ್ಹಾಕಾ ಆಪ್ಲೆಂ ತೋಂಡ್ ದುಸ್ರೆಕುಶಿನ್ ಘುಂವ್ಡಾಯ್ಲೆಂ. ಜೆನಿಫರಾಕ್ ತಿಚಿ ಭಿರ್ಮತ್ ದಿಸ್ಲಿ. ದುಸ್ರೊ ಪೂತ್ ಸರ್ಲಾ ಆಸ್ತಲೊ ಮ್ಹಣ್ ತಾಣೆಂ ಚಿಂತ್ಲೆಂ. ತಾಣೆಂ ಚಡ್ತಿಕ್ ವಿಚಾರ್ಲೆಂ ನಾ.
ಜೆನಿಫರ್ ಕಿತೆಂ ಚಿಂತಾ ತೆಂ ಮೇರಿ ಬಾಯೆಕ್ ಸಮ್ಜಾಲೆಂ.
"ನಾ.ಡೊಕ್ಟರ್. ತೊ ಜಿವಂತ್ ಆಸಾ ಆನಿ ಬರೆ ಜೊಡಿರ್ ಆಸಾ. ಪುಣ್ ಮ್ಹಾಕಾ ತೊ ಅಸೊನ್ಯೀ ನಾತ್ಲ್ಲೆಬರಿಂ"
ಎದೊಳ್ ಉಭೆ ರಾವೊನ್ ಉಲಂವ್ಚೆಂ ಡೊ|ಜೆನಿಫರ್ ಆತಾಂ ಲಾಗ್ಶಿಲೆಂ ಏಕ್ ಕದೆಲ್ ವೋಡ್ನ್ ಬಸ್ಲೆಂ. ತಾಕಾ ಮೇರಿಬಾಯೆಲಾಗಿಂ ಅನಿಕೀ ಉಲಯ್ಜೆ ಆಸ್ಲ್ಲೆಂ.
ಮೇರಿಬಾಯೆನ್ ಕಿತ್ಲ್ಯಾ ವರ್ಸಾಂ ಥಾವ್ನ್ ಆಪ್ಣಾಭಿತರ್ ಬಾಂದುನ್ ದವರ್ಲ್ಲೆ ಅಕ್ಲಾಸ್ ಭಾಯ್ರ್ ಘಾಲ್ನ್ ಆಪ್ಲೆಂ ಕಾಳಿಜ್ ಹಾಳು ಕರುಂಕ್ ಚಿಂತ್ಲೆಂ ಜಾಯ್ಜಯ್. ಖಾಲಿ ಹಾಡಾಂ ಆನಿ ಕಾತ್ ಮಾತ್ರ್ ಆಸ್ಲ್ಲಿ ತಿ ಫಕತ್ ಪನ್ನಾಸ್ ಆನಿ ಪಾಂಚ್ ವರ್ಸಾಂಚಿ ತರೀ, ಪಳೆತೆಲ್ಯಾಂಕ್ ಸತ್ತರ್ ವರ್ಸಾಂಚೆ ಮ್ಹಾತಾರೆಬರಿಂ ದಿಸ್ತಾಲಿ. ಡೊ|ಜೆನಿಫರಾಕ್ ತಿಚಿ ಪ್ರಾಯ್ ಆಯ್ಕೊನ್ ಸತ್ ಪಾತ್ಯೆಂವ್ಕ್ ಜಾಲೆಂನಾ.
"ಆಮಿ ದುಬ್ಳಿಂ ತರೀ ಮ್ಹಜ್ಯಾ ಘರ್ಕಾರಾಕ್ ನಳ್ಯಾ ಖಾರ್ಖಾನ್ಯಾಂತ್ ಕಾಮ್ ಆಸ್ಲ್ಲೆಂ. ತಾಚ್ಯಾ ಸಾಂಬಾಳಾಂತ್ ಆಮ್ಚೆ ದೀಸ್ ವ್ಹೆತಾಲೆ. ರಾವೊಂಕ್ ಲ್ಹಾನ್ ತರೀ ಆಮ್ಚೆಂಚ್ ಮ್ಹಳ್ಳೆಂ ಏಕ್ ಲ್ಹಾನ್ ಘರ್ ಆಸ್ಲ್ಲೆಂ. ದೆವಾನ್ ದೋಗ್ ಚೆರ್ಕೆ ಫಾವೊ ಕೆಲ್ಲೆ. ಮಾಲ್ಘಡೊ ಡೆನಿಸ್ ಸಾದೊ ತರೀ ದಾಕ್ಟೊ ಹೆನ್ರಿ ಕಠಿಣ್ ಉಚಾಂಬಳಿ. ದೀಸ್ ಬರ್ಯಾನ್ ಗೆಲ್ಲೆ ಪುತಾ" ತಿಕಾ ಉಲವ್ನ್ ಪುರೊ ಜಾಲ್ಲೆಂ ಮ್ಹಣ್ ದಿಸ್ತಾ. ಡೊ|ಜೆನಿಫರಾಲಾಗಿಂ ಇಲ್ಲೆಂ ಉದಕ್ ದೀಂವ್ಕ್ ಸಾಂಗ್ಲೆಂ ತಿಣೆಂ. ಮಸ್ತ್ ಉಲಯ್ಲ್ಯಾನ್ ಖೊಂಕ್ಲಿ ಆನಿ ಖರಸ್ ಚಡ್ ಜಾವ್ನ್ ಆಯ್ಲಿ. ನರ್ಸಾಕ್ ಆಪವ್ನ್ ಡೊ|ಜೆನಿಫರಾನ್ ಮೇರಿಬಾಯೆಕ್ ಉದಕ್ ದೀಶೆಂ ಕೆಲೆಂ.
"ಆಮ್ಚ್ಯಾ ಸುಖಿ ಘರಾಕ್ ಕೊಣಾಚಿ ದೀಶ್ಟ್ ಲಾಗ್ಲಿಗಿ?" ತಿ ಸಾಂಗಾಲಾಗ್ಲಿ. "ಮ್ಹಜ್ಯಾ ಘರ್ಕಾರಾಕ್ ಟಿ.ಬಿ. ಲಾಗ್ಲಿ. ತಾಚೆಂ ಕಾಮ್ ಗೆಲೆಂ ಆನಿ ತೊ ಘರಾ ಬೆಕಾರ್ ರಾವ್ಲೊ. ಡೆನಿಸಾಚೆಂ ಇಸ್ಕೊಲ್ ಸೊಡವ್ನ್ ತಾಚ್ಯಾ ಕಾರ್ಖಾನ್ಯಾಂತ್ ಕಾಮ್ ಜಾಲೆಂ. ಹೆನ್ರಿ ಹಾಯ್ಸ್ಕೂಲಾಂತ್ ಶಿಕ್ತಾಲೊ. ಹುಶ್ಯಾರ್ ಆಸ್ಲ್ಲೊ ದೆಕುನ್ ತಾಚೆಂ ಶಿಕಪ್ ಬಂದ್ ಕರುಂಕ್ ಆಮ್ಕಾಂ ಮನ್ ಆಯ್ಲೆಂನಾ. ಪುಣ್ ಡೆನಿಸಾಚೊ ಸಾಂಬಾಳ್ ವಕ್ತಾಕ್ ಶಿಕ್ಪಾಕ್ ಆನಿ ಘರ್ಚ್ಯಾ ಖರ್ಚಾಕ್ ಪಾವನಾಸ್ತಾಂ ಘರ್ ಜಾಗೊ ವಿಕಿಜಾಯ್ ಪಡ್ಲೊ.
ಘರ್ಕಾರಾಂನಿ ಸ್ವಾಸ್ ಸೊಡ್ಲೊ. ಪುಣ್ ಇತ್ಲೆ ಕಶ್ಟ್ ಆಯ್ಲ್ಯಾರೀ ಆಮಿ ಹೆನ್ರಿಚೆಂ ಶಿಕಪ್ ಬಂದ್ ಕರುಂಕ್ ನಾ. ಆತಾಂ ಚಿಂತಾನಾ ತಾಕಾ ಕಾಮಾಕ್ ಲಾಗೊವ್ನ್ ವ್ಹಡ್ಲ್ಯಾಚೆಂ ಶಿಕಪ್ ಮುಕಾರಿಜೆ ಆಸ್ಲ್ಲೆಂ ತಶೆಂ ದಿಸ್ತಾ. ಹೆ ಕಶ್ಟ್ ಯೆತೆನಾಂತ್" ತಿ ರಡ್ಲಿ. ಡೊ|ಜೆನಿಫರಾಕ್ ತಿಚಿ ಮಸ್ತ್ ಭಿರ್ಮತ್ ದಿಸ್ಲಿ.
ಆತಾಂ ಮೇರಿಬಾಯೆನ್ ಕಠಿಣ್ ಖೊಂಕ್ಲಿ ಕಾಡುಂಕ್ ಸುರು ಕೆಲಿ.
"ಆತಾಂ ತುಂ ನಿದೆ. ಫಾಲ್ಯಾಂ ತುಕಾ ಪಳೆಂವ್ಕ್ ಯೆತಾಂ" ಡೊ|ಜೆನಿಫರಾನ್ ತಿಕಾ ಸಾಂಗ್ಲೆಂ. "ಉರ್ಲ್ಲೆಂ ತುಂ ಮ್ಹಾಕಾ ಫಾಲ್ಯಾಂ ಸಾಂಗ್"
ಪುಣ್ ಮೇರಿಬಾಯ್ ಆಯ್ಕಾಲಿನಾ.
"ಸಗ್ಳೆಂ ಆಯ್ಕೊನ್ ವಚ್" ತಿ ಸಾಂಗಾಲಾಗ್ಲಿ. "ಫಾಲಾಂಚೆಂ ಕೋಣ್ ಜಾಣಾ!"
"ಮ್ಹಜಿ ವ್ಹಡ್ಲಿ ಚೂಕ್ ಕಿತೆಂ ಮ್ಹಣ್ ತುಂ ಜಾಣಾಂಯ್. ಘರ್ದಾರ್ ವಿಕುನ್ ತಾಕಾ ಶಿಕಪ್ ದಿಲ್ಲೆಂ. ವ್ಹಡ್ಲ್ಯಾಬರಿಂ ಶಿಕಪ್ ಸೊಡ್ನ್ ಕೂಲಿ ಕಾಮಾಕ್ ಘಾಲ್ಲೆಂ ತರ್ ಆಜ್ ಸಾಂಗಾತಾ ಆಸ್ತೊ ಆಸ್ಲ್ಲೊ"
ಇಂಜಿನಿಯರ್ ಜಾಲ್ಲೊ ಹೆನ್ರಿ ಬೊಂಬೊಯ್ ಕಾಮ್ಮ್ ಮೆಳ್ಲ್ಲೆಂಚ್ ಘರ್ಚ್ಯಾಂಚ್ಯೆ ಖಬ್ರೆವಿಣೆಂ ಕಾಜಾರ್ ಜಾವ್ನ್ ಮಜಾ ಮಾರ್ನ್ ಜಿಯೆತಾಲೊ ಆನಿ ತಾಚಿ ಆವಯ್ ಆನಿ ಕುಲಿ ಕಾಮ್ ಕರ್ಚೊ ಭಾವ್ ಕಶ್ಟಾಂನಿ ದೀಸ್ ಲೊಟ್ತಾಲಿಂ. ಹೆನ್ರಿಕ್ ಘರ್ಚಿ ಪರಿಗತ್ ಕಳಿತ್ ಆಸ್ಲ್ಲಿ ತರೀ ತಾಕಾ ಪಡೊನ್ ವಚೊಂಕ್ ನಾತ್ಲ್ಲೆಂ. ಆಪ್ಲ್ಯಾ ಗ್ರೇಸ್ತ್ ಬಾಯ್ಲೆಚ್ಯಾ ಕುಟ್ಮಾಮುಕಾರ್ ತಾಕಾ ತಾಚೆಂ ಕುಟಮ್ ದಾಕವ್ನ್ ಲಜೆಕ್ ಪಡೊಂಕ್ ನಾಕಾ ಆಸ್ಲ್ಲೆಂ.
ಮೇರಿಬಾಯೆಚ್ಯಾ ಗಳ್ಯಾಂತ್, ಕಾನಾಂತ್ ಯಾ ಹಾತಾಂನ್ ಕಾಂಯ್ಚ್ ಭಾಂಗಾರ್ ನಾತ್ಲ್ಲೆಂ. ತಿಚಿ ಸಗ್ಳಿ ಕೂಡ್ ರುಕಾ ಕುಡ್ಕ್ಯಾಬರಿಂ ದಿಸ್ತಾಲಿ. "ಮ್ಹಜೆಲಾಗಿಂ ಏಕ್ ಬಾರೀಕ್ ಚೇಯ್ನ್ ಆಸ್ಲ್ಲಿ ಪುತಾ" ತಿ ಸಾಂಗಾಲಾಗ್ಲಿ. ಪುಣ್ ಮ್ಹಜ್ಯಾ ಪುತಾನ್ ಮ್ಹಜಿ ಆಸ್ತಮಾ ಸುಮಾರ್ ಕರುಂಕ್ ಪ್ರಯ್ವೇಟ್ ಆಸ್ಪತ್ರೆಂತ್ ದವರ್ತಾನಾ ಆಡೋವ್ ದವರ್ಲಿ. ಪಯ್ಶೆ ಕಾಬಾರ್ ಜಾಲೆ, ಪುಣ್ ಪಿಡಾ ಬರಿ ಜಾಂವ್ಕ್ ನಾ. ಅಳೆ ಆತಾಂ ಹಾಂವ್ ಸರ್ಕಾರಿ ಆಸ್ಪತ್ರೆಂತ್ ಲೊಳ್ತಾಂ."
ತಿತ್ಲ್ಯಾ ಭಿತರ್ ನರ್ಸಾಂನಿ ಪಿಡೆಸ್ತಾಂಕ್ ಜೆವಣ್ ದೀಂವ್ಕ್ ಸುರು ಕೆಲೆಂ. ಸಾದೆಂ ಜೆವಣ್! ಜೀವ್ ಉರ್ಚೆ ತಸಲೆಂ. ಡೊ|ಜೆನಿಫರಾನ್ ನರ್ಸಾಲಾಗಿಂ ಸಾಂಗೊನ್ ತಿಕಾ ಏಕ್ ಕಪ್ ದೂದ್ ಹಾಡ್ನ್ ದಿವಯ್ಲೆಂ. ಉಪ್ರಾಂತ್ ತಿಕಾ ಆಪ್ಲ್ಯಾ ಹಾತಾಂತ್ ವಕ್ತಾಂ ದೀವ್ನ್ "ಫಾಲ್ಯಾಂ ಯೆತಾಂ ತುಕಾ ಮೆಳೊಂಕ್" ಮ್ಹಣ್ ಡೊ|ಜೆನಿಫರ್ ಆಪ್ಲ್ಯಾ ಹೊಸ್ಟೆಲಾಕ್ ಗೆಲೆಂ.
ಥಂಯ್ ತಾಕಾ ನೀದ್ ಪಡ್ಲಿನಾ! ತಾಚೆ ಸದಾಂಚೆ ಡ್ಯೂಟೆರ್ ಮಸ್ತ್ ಥರಾಂಚೆ ಪಿಡೆಸ್ತ್ ಮೆಳ್ತಾಲೆ. ಪುಣ್ ಮೇರಿಬಾಯೆಚೆರ್ ತಾಕಾ ಕಠಿಣ್ ಭಿರ್ಮತ್ ಪಡ್ಲ್ಲಿ. ಕಶೆಂ ಪುಣಿ ಕರ್ನ್ ತಿ ಆಡವ್ ಘಾಲ್ಲಿ ಚೇಯ್ನ್ ಪಾಟಿಂ ಹಾಡ್ನ್ ದೀಂವ್ಕ್ ತಾಣೆಂ ಚಿಂತ್ಲೆಂ.
ದೀಸ್ ವೆತಾಂ ಮೇರಿಬಾಯೆಚಿ ಪಿಡಾ ಆನಿಕೀ ಚಡ್ ಜಾವ್ನ್ ಆಯ್ಲಿ. ಆತಾಂ ಉಲಂವ್ಕ್ ತಿಕಾ ತ್ರಾಣ್ ನಾತ್ಲ್ಲೆಂ. ದೋನ್ ಸಬ್ಧ್ ಉಲಯ್ತಾನಾ ಖರ್ಶೆಲೆಂ. ತ್ಯಾ ದಿಸಾ ಉಲಂವ್ಕ್ ತಿಕಾ ಖಂಚೆಂ ಬಳ್ ಆಯ್ಲೆಂಗೀ ಮ್ಹಣ್ ಡೊ|ಜೆನಿಫರಾನ್ ಚಿಂತ್ಲೆಂ. ಸದಾಂಯ್ ತಿಕಾ ಮೆಳ್ಚೆಂ ತಾಣೆಂ ಸೊಡುಂಕ್ ನಾ!
ತ್ಯಾ ದಿಸಾ ಡೊ|ಜೆನಿಫರ್ ಮಸ್ತ್ ಖುಶೆನ್ ಆಸ್ಲ್ಲೆಂ. ಆಪ್ಲಿ ಡ್ಯೂಟಿ ಕರ್ನ್ ಪಯ್ಲೆಂ ತಿ ಚೇಯ್ನ್ ಆಡಾವ್ ಆಸ್ಲ್ಲ್ಯಾ ಪೆದ್ರು ಸಿಕೇರಿಗೆರ್ ಗೆಲೆಂ. ತಾಚೆ ಪಯ್ಶೆ ಫಾರಿಕ್ ಕರ್ನ್ ತಿ ಚೇಯ್ನ್ ತಾಚೆ ಸಾಂಗಾತಾ ಆಸ್ಪತ್ರೆಕ್ ಹಾಡ್ನ್ ಆಯ್ಲೆಂ.
’ಹಿ ಚೇಯ್ನ್ ಮೇರಿಬಾಯೆಚ್ಯಾ ಗಳ್ಯಾಂತ್ ಘಾಲ್ತಾನಾ ತಿಕಾ ಕಿತ್ಲೊ ಸಂತೊಸ್ ಜಾಯ್ತ್’ ತಾಣೆಂ ಚಿಂತ್ಲೆಂ.
ಖುಶೆನ್ ತೆಂ ವಾರ್ಡಾಭಿತರ್ ಧಾಂವೊನ್ ಆಯ್ಲೆಂ. ಮೇರಿಬಾಯ್ ಆಸ್ಲ್ಲ್ಯಾ ಕುಡಾಂತ್ ರಿಗ್ತಾನಾ ತೆಂ ಕಿತೆಂ ಪಳೆತಲೆಂ?
ನರ್ಸ್ ಧವಿ ಬೆಡ್ಶೀಟ್ ಮೇರಿಬಾಯೆಚ್ಯಾ ಆಂಗಾವಯ್ರ್
ವೊಡ್ತಾಲಿ. ಮೇರಿಬಾಯೆನ್ ಹ್ಯಾ ಸಂಸಾರಾಕ್ ಆಧೇವ್ಸ್ ಕೆಲ್ಲೊ.
ಬೆಜಾರಾಯೆನ್ ಭರ್ಲ್ಲ್ಯಾ ಡೊ|ಜೆನಿಫರಾಚ್ಯಾ ಹಾತಾಂತ್ಲಿ ಚೇಯ್ನ್ ತಾಕಾ ಕಳಾನಾಸ್ತಾಂ ಮೇರಿಬಾಯೆಚ್ಯಾ ಪಾಂಯಾಂಥಳಾ ಪಡ್ಲಿ.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
